Ngond wa 2

Dizu “kutentam,” mudi mudisadidilau mu Bibil, dirumburikin kusal yom yimenay Nzamb anch yidi yiwamp ni kuyisal pakad kasolikany. Shinshikin mutapu wamekesha yisal ya Yesu mwikadil wend wa kutentam. Mu chirung cha Yesu, antakel a chirelijon a in Yuda ading ayikisin antu akad kwikal in Yuda, imananga anch ading a usey nakash kuyipandakanamu in Yuda akad kwilej mashikol ma chirelijon wau ni kayilimishangap amband. Pakwez Yesu wading utentamin ni wayisadina antu awonsu pakad kasolikany. Wayitiya antu akad kwikal in Yuda ading ni ritiy chakwel amulondul. (Mat. 8:5-10, 13) Walejana kudi antu awonsu pakad kasolikany, kudi ampich nau atuzwendj. (Mat. 11:5; Luka 19:2, 9) Kayisadinangap amband ni chisum. Pakwez, ndiy wayilimishang ni wayisadinang amband mu mutapu uwamp, pamwing ni antu akwau amanangau anch kakwetap usey. (Luka 7:37-39, 44-50) Tukutwish kumwimburij Yesu kusutil kuyisadin antu akwau pakad kasolikany ni kulejan rusangu ruwamp kudi antu awonsu akatina kutesh uyakin pakad kushinshikin mashakamin mau ap yishankur yau ya chirelijon. Amakundj in Kristu akutwish kumekesh anch alondwil chilakej cha Yesu anch ayisadin amband mu mutapu wa kalimish. w19.05 2 par. 1; 5 par. 15-17

Nlel, amakurump ashinshamena akutwish kusadin mazu ma rukat ni ma ranaken papaninau rongoj rimedina pa Mifund kudi antu adia mu maswir. Ov, ching kusu kwau amakurump awiy afanyidina kupan rongoj kudi antu ayipishau? Bwat. Etu awonsu tukwet chisend cha ‘kudandamen kukasikeshijan muntu ni mukwau.’ (1 Tes. 4:18) Anambaz in Kristu akudila mu spiritu akutwish kuyikasikesh pakampwil anambaz akweta kuswir kwa rongoj. Yehova ukwet mayingishin nakash ma kwifanikesh ni maku umwongojina mwanend. (Isay 66:13) Bibil ukwet yilakej ya amband ayongoja antu ading anenganena. (Job 42:11) Yehova ukat kusangar nakash anch waman amband in Kristu ayongojina anambaz nau arishina ni yovil yiyimp! Yisu yimwing mukurump umwing ap aad akutwish kumwit nambaz wakudila kal mu spiritu chakwel amukwash nambaz umena mar mu mutapu winou. Chakin kamu, patumukwashina mukadivar ap nambaz tufanyidin kubabal chakwel kangal twamubachik kutulej yom yakadiay kukat kulond.—1 Tes. 4:11. w19.05 16-17 par. 10-12

Kurutu amakurump asal komite wa dirumburish mu chikumangen, mulong wak afanyidin bil kwikal ni uman wa antu anch akep aad? Chidi mulong kusal mwamu kukwatijadin ni mbil ja piur ja Bibil piur pa kutentam. Anch ayilej amakurump anch muntu kanang wasalang chitil chikash, pakwez amwinend kitiyidinap, amakurump afanyidin kwikal ni uman wa antu aad kurutu kwa kusal komite wa dirumburish. (Kuv. 19:15; 1 Tim. 5:19) Anch muntu watadik anch amudimbedin, amakurump akat kusadin uman wa antu amanang. Anch muntu walejan anch muntu wa mu chikumangen wamuyipishang mwan ni muntu mukwau niyend walejan anch wamumanang, amakurump akutwish kutek komite wa dirumburish kusutil uman winou. Kuburen kwa kaman wa kaad kurumburikinap anch muntu walejanang rusangu riner udi mukamakasu. Ap anch kwikil uman wa antu aad umekeshina anch muntu winou wamuyipishang mwan kusutil yisal ya masandj, amakurump ij anch muntu walejanangau wasalang pamwing ap chisal chiyimp nakash. Amakurump akudandamen kuyongoj ni kuyikwash antu ovang nayimp ni afanyidin kubabal nakash mulong wa kuchidij chikumangen chakwel kangal muntu winou wayipish kand mwan mukwau.—Mid. 20:28. w19.05 11 par. 15-16

Chidi cha usey mulong wa kuyikwash an kwijik mutapu wa kwilej. Chilikej, akwet kuswir kwa kwilej mutapu wa kurijek yikumangan ya chikumangen, ap mutapu wa kukimbijol jinsangu mu mikand yetu piur pa yipul ap milong yitaninau ku shikol. (Heb. 5:14) Anch an akat kusutish chisu mu kwilej Bibil ku chikumbu, chikuyiswapel kutesh nawamp mafundish mafundishinau ku yikumangan ni ku yitentam. Chakin kamu, kulep kwa chisu cha kwilej kufanyidin kwimen pa chimbu ni ukaliweny wa an. Antu tukata kwilej nau Bibil akwet niyau kuswir kwa kwijik mutapu wa kwilej. Chisu chikatau kusambish kwilej Bibil, tukat kusangar anch twayiman atekang kal yijingidij pa yakul mu buku wau wa kwilej nich Bibil ap wa kwilej ku chikumangan. Pakwez tukwet kand kuswir kwa kuyifundish antu twilejining nau Bibil mutapu wa kukimbijol jinsangu mu mabuku metu ni mutapu wa kusal dilejan dia muntu panrend. Kusal mwamu kukutwish kuyikwash anch ikal ni milong kanang, akutwish kukimbijol ayinau mu mabuku metu mulong wa kutan yiyul yikwetau nich kuswir. w19.05 26 par. 2; 28 par. 10-11

Satan wakwatin kal mupak wa kuswimp yitongijok yetu. Ukat kusadin mitapu yin yawonsu ya mafundish mulong wa kuyipish mutapu wetu wa kutong ukwatijadina ni Dizu dia Nzamb. Satan udandamedin kusadin chipul mudi chasadinay kudi Ev mu chir cha Eden: “Ov, komb [chakin kamu] Nzamb wakulejinany anch . . . ?” (Dis. 3:1) Mu mangand matakedilau kudi Satan, yisu yivud tukat kutesh yipul yikata kuletish kwidjidjek mudi: ‘Ov, chakin kamu Nzamb kitiyijinap uruw wa antu akweta yidi ya ruvaj ya mutapu umwing? Ov, chakin kamu Nzamb kakatiningap anch tusal musambu wa nowel ap wa machuku ma kuvadik? Ov, chakin kamu Nzamb wen ukatin anch ulikany kukutekany mash? Ov, chakin kamu Nzamb wa rukat ukatin anch wipukany urund nau akatish nen opatinau kal mu chikumangen?’ Tufanyidin kwikal ni kashinsh ka yitiyij yetu. Anch twitiyij anch yipul yikata kulet kwidjidjek yishakam mu manangu metu, yikutwish kusal anch tusambish kwidjidjek piur pa yom twitiyijina anch yidi yakin. Kwidjidjek kwinoku kukutwish pakemp pakemp kuyipish yitongijok ni yitiyij yetu. w19.06 12-13 par. 15-17

Yehova utukatin chikurukina. (Yoh. 3:16) Tukatin kumwimburij Tatukwetu wa rukat. Chawiy tukat kwikasikesh ‘kwitek pa ndond ya antu akwau, kwikal nich rukat ra ukadivar, ni ranaken’ kudi antu awonsu, pakwez pakampwil “anamakwetu in ritiy.” (Gal. 6:10) Chisu chirishinau akadivar ni anambaz netu nich yakamish, tukatining kuyikwash. Mutapu ik tukutwisha kumwongoj muntu wafishang mbay nend wa uruw? Chom chakusambish tufanyidina kusal chidi kwambamb nend, ap anch twiyovil anch tuwanyidinap kupan rongoj ap tukwetap mazu makumulej. Paula ukweta nfumwend wafa mu chikashimwish, ulondin anch: “Najingunina anch ang muntu wafa, antu akwau akat kwiyov nayimp nakash. Akat kwiyakamish anch yom yikulondau yikutwish kumujimeshish muntu kanang. Pakwez chipandaken kuyip anch antu kalondinap chom ap chimwing.” Muntu ukweta ushon pamwing ap kakutwishap kuchingejin anch tukutwish kulond mazu mawamp. Paula ulondin anch: “Nasangarang nakash anch arund nam anlej anch: ‘Nikwet ushon nakash mulong wa rufu ra mbay ney.’” w19.06 20 par. 1; 23 par. 14

Anch mudimu wetu aukangesh, amakurump akutenchik yom mulong ukumanganany pakad akankuny netu kujingunin. Akukulejany mutapu wa kukumangan mu yisak yikemp yikemp ni chisu chawonsu akusambish kuswimp chisu ni ndond ya kukumangen. Piur pa mudimu wa kulejan, akutwish kuusal mu mitapu kushalijan kukwatijan ni ndond. Pakwez, mulong tumukatin Yehova ni tukatin kuyilej antu akwau piur pa Want wend, chawiy tukukimb mitapu ya kulejan. (Luka 8:1) Palonday piur pa Atuman a Yehova a mu Union soviétique wa pakur, mwin kwilej nsangu ja pakur Emily B. Baran walonda anch: “Chisu chayikangeshau Atuman a Yehova kuyilej antu akwau piur pa ritiy rau kudi guvernema, Atuman asambisha kwisamb nau amutej nau, ambay nau a mudimu ni arund nau. Payitekau mu jinkan mulong wa mudimu wa kulejan, Atuman asambisha kuyilej antu adingau nau mu rukan.” Chikalap nchik kukangesh kwinoku, akadivar netu kimikap kulejan. Ukutwish niyey kuyimburij akadivar inay! w19.07 11 par. 12-13

Mutapu ik tukutwisha kuyikwash antu akad kwitiyij chakwel ilej kumukat Nzamb ni ikal in kwilej a Kristu? Tufanyidin kwijik anch ndond yapaminay muntu yikutwish kwikal ni yibachikin pa mwikadil wa muntu pantaliken ni uruu wetu. Chilakej, mutapu ukutwishau kututesh kudi antu a mu Erop chisu tulejena, ukutwish kushalijan ni mutapu ukutwishau kututesh kudi antu adiokila mu Aziy. Mulong wak? Mu Erop, antu avud ijaku yom yimwing piur pa Bibil ni akat kwitiyijang anch yom yawonsu ayitanga kudi Nzamb. Pakwez mu Aziy antu avud ij tuyom tukemp nakash ap kand kijap chom piur pa Bibil, ni akat kwitiyij anch kwikiling Sakatang. Chawiy ikal ni chitongijok chiwamp. Muvu wawonsu antu akad kwitiyij akat kwikal Atuman a Yehova. Avud pakach pau ading kulimishang mbil jimwing ja piur mu mashakamin mau ni akisang nakash rubabek rikwetau antu a chirelijon. Akwau ading ni mashakamin mayimp nakash ni avud pakach pau ading ni mikadil yiyimp yafanyinau kuswimp. Kusutil ukwash wa Yehova, tukutwish kwikal nich kashinsh anch tukuyitan antu adia ‘mu mwikadil uwanyidina mulong wa kutambul mwom wa chikupu.’—Mid. 13:48; 1 Tim. 2:3, 4. w19.07 20-21 par. 3-4

Ruchingej retu rikala ra mwom wa chikupu mwiur ap pa divu, tufanyidin kudandamen kubambil salal djat ni pa diloz. Chikalap nchik yom twajijamedina kal, tufanyidinap kutong piur pa yom ya pakur ni tufanyidinap kulik chom ap chimwing chitukangesh kumusadin Yehova. (Fil. 3:16) Kuwanyin kwa yom tuchingedina kukutwish kumekan mudi kulabin, ap kand mujimbu wetu ukutwish kuziy. Pamwing ap twajijamedin kal yikokujol ni kuzengol mu mivu yivud. Chawiy, chikalap nchik mashakamin metu, “kangal twiyakamishany mulong wa chom.” Pakwez, mwijikisha Nzamb yom yawonsu umwitila, ni ndiy ukukwinkish chisambu chisutila yom yawonsu utongina. (Fil. 4:6, 7) Mudi mwin kubambil wikasikeshina amwinend pabambidilay mwi njil mudia yom yivud yikutwisha kulet kampuw, tufanyidin kushinshikin pa diloz mulong wa kutambul mwom. Kukwatijan ni usu ni mashakamin tukweta, tufanyidin kwikasikesh ni kuya kurutu mulong wa kutambul yiyukish yipandikena kuwap. w19.08 7 par. 16-17

Chikutwish kutukasiken kutan mazu ma kumulej muntu unenganena. Yisu yimwing mansoj metu makutwish kulond yivud kusutamu mazu. Pafay Lazar murunend a Yesu, Mariy, Mart, ni antu akwau adila mulong wa mwanamakwau ni murund nau winou. Pashikay Yesu kupwa kwa machuku manying, niyend “wadila” ap anch wading wij anch ukumuvumbul. (Yoh. 11:17, 33-35) Mansoj ma Yesu mamekesha yovil ya Tatukwend. Mamekesha kand rukat ra Yesu mulong wa dijuku dia Lazar, ni chinech chamukasikesha kamu Mariy ni Mart. Chilik chimwing, anch akadivar aman anch tuyikatin ni tuyibangidin, akwiyov anch kadiap ayinau pakwez ayinyingumukin kudi arund ayibangidina ni ayikwashina. Yisu yimwing tufanyidin kwikal in kutesh awamp. Mulika mukadivar ney afungul muchim wend ni pikil wajiman mulong wa ‘mazu ma usup.’ (Job 6:2, 3) Mukadivar ukutwish kand kwikal mu yakamish yikwau yidiokila ku rupompat ra anamakwend akad kwikal Atuman. Chawiy lembil nend pamwing. Mwilembila ‘Ukata kwakul ku malembil’ chakwel amwinkisha usu ni amukwasha kwikal ni yitongijok yiwamp.—Kus. 65:2. w19.04 18-19 par. 18-19

Ap anch tusadidin mu teritwar ap ku Betel, tukutwish kukudish nakash rukat mulong wa antu ap mulong wa ndond tusadidina. Chikalap nchik diyingishin dikutwisha kusal anch twimika chisend chetu, twoviling ushon nakash. Tukat kwaurik nau antu twadia nau, ni tukat kwinan nakash, pakampwil anch twaurikang mulong atuzengodin. (Mat. 10:23; 2 Kor. 11:28, 29) Yisu yimwing chikutwish kand kwikal chikash kuya ndond yindj—ap kuchirik kwol kwetu, mulong tufanyidin kwijidin yishankur yisu. Antu amwing atambwila yisend yisu akutwish kurish ni milong ya nfalang. Akutwish kwiyov mudi antu a chamwamu, akad diking ni akutwish kuziy. Yom ik yikutwisha kuyikwash? Shal piswimp ni Yehova. (Jak. 4:8) Mutapu ik tukutwisha kusal mwamu? Kusutil kumuchingejin ndiy ukata “Kwakul kulembil kwetu.” (Kus. 65:2) Yehova ukutwish kusal “yom yivud yipandakena yipul yetu ap yom yitutongila.” (Efes 3:20) Yehova kakatap kutwinkish ching kusu kwau yom tukata kumwit mu malembil metu. Ukutwish kupwish milong yetu mu mutapu twakad kutwish kutongin. w19.08 20-21 par. 5-6

Antu amwing akat kusadin dizu “Harmagedon” mulong wa kumekesh anch jidi njit ja nikleyer ap chinship chikash cha mar chikushesha mangand. Chinyim ni chinech, yom yilondinay Bibil piur pa Harmagedon yimekeshin anch ridi rusangu ruwamp rikutwisha kulet musangar! (Kuj. 1:3) Njit ja Harmagedon jikuyisheshap antu pakwez jikuyipandish kamu! Mutapu ik twija mwamu? Kusutil kushesh winyikel wa antu. Njit jinej jikez kuyipandish kand antu kusutil kuyishesh antu ayimp ni kuyichidij antu atentamina. Jikuyipandish kand antu kusutil kushesh yom yawonsu yiyipishina divu dietu. (Kuj. 11:18) Dizu “Harmagedon” adisambidin kapamp kamwing mu Bibil ni dizu dined didiokil ku dizu dia Hebereu dirumburikina anch ‘Mukandu wa Megido.’ (Kuj. 16:16) Megido wading musumb wa Isarel wa pasak. (Jos. 17:11) Pakwez Harmagedon yidiap ndond kampand yidia pa divu. Mu kulond patok, Harmagedon umekeshin chisu chikukumanganau “ant a mangand mawonsu” mulong wa kurish ni Yehova.—Kuj. 16:14. w19.09 8 par. 1-3

Ap anch kadingap ni ruchingej ra kuyerik, mband winou wading uswirikedin ukwash. Waya kudi adokter avud nich ruchingej ra kuyerik. Kupwa kwa mivu 12 ya mayej, kwadingap muntu watwisha kumwok. Kukwatijan ni Chijil cha Moses, wading wijondil. (Lev. 15:25) Pateshay anch Yesu wading ukat kwokan, waya kumuman. Pamumany, wapukuna ku rizez ra kabwik wend, ni papinipa kamu wayerika! Pakwez Yesu kimenap kwend ching pa kumwok, wasala kand anch mband winou iyova anch amulimishin. Chilakej, chisu chading chambambinay nend wasadina mazu ma kalimish “mwanam mband.” Mband winou wiyova kamu kwikal ukasikeshinau! (Luka 8:44-48) Ijik anch mband winou waya kudi Yesu. Wasala usu kanang. Chilik chimwing ni nlel—tufanyidin kusal usu wa ‘kwez kudi’ Yesu. Nlel, Yesu kokinap kusutin chilay mayej ma antu ‘ezina kudi’ ndiy. Pakwez udandamedin kututazuk anch: “Ezany kudi am, . . . chad am nikez [kukukasikeshany].”—Mat. 11:28. w19.09 20 par. 2-3

Muprofet Zakariy wasambela kulond piur pa yom mudi yiney. Wafunda anch: “Mu machuku minima, antu dikum a michid yikwau akez kez kudi [kukwat ku diswin dia, [NWT] mwin Yuda umwing [ni] kumulej anch: ‘Tusotil kubombakan [ap, kuya ni yenen], mulong tuteshil anch, Nzamb udi ni [yenen].’” (Zak. 8:23) Atuman a Yehova ajingunin anch mulong wa kukumangej antu a mazu mawonsu, chifanyidin kulejan rusangu ruwamp mu mazu mavud. Nlel tusadin usu nakash wa kukarumun mikand mu yitot ya mazu kusutamu pakur. Chakin kamu, chinech chidi chilay chisadinay Yehova mu machuku metu—kukumangejin antu adiokila ku michid yawonsu mu chisak chipandikena kujimb. Tujikitishin mulong tukwet yakudia ya mu spiritu mu mazu mavud nakash, ni chinech chisadin anch antu kushalijan amwifukwila Yehova mu uumwing. Ni Atuman adia mu chisak chinech ijiken nawamp mulong wa mushiku wau mu mudimu wa kulejan ni rukat rau ra ukadivar. Chom chinech chikasikeshin ritiy retu mudi ik!—Mat. 24:14; Yoh. 13:35. w19.09 30 par. 16-17

Pa chisu cha mar makash, antu akunenganan nakash pakumanau anch yom yawonsu yading yitonginau anch yikushakam chikupu yayip kal. “[A]kukatuk mong” ni kwakam mulong wa mipim yau, mulong akwikal mu chirung chipandikena kuyip cha mu rusangu ra antu. (Zak. 1:14, 15) Mu chisu chinicha, mwom ukwikal wa mar nakash ap kudi atushalapol a Yehova. Mulong tudandamedin kwikal aurikina ni mangand, tukutwish kurish ni yakamish yimwing. Tukutwish kuburen yom tukweta nich kuswir mudi yakudia ap yakudjal. “Kashalapol ushinshamena ni kubabal” watukwashin kal kwirijek mulong wa kushal ashinshamena pa chisu cha mar makash. (Mat. 24:45, TMK) Wasadin kal mwamu mu mitapu yivud, pakwez shinshikin chilakej chimwing: maprogram metu ma yitentam ya muvu wa 2016-2018. Maprogram minam matukwashin kukasikesh mikadil tukweta nich kuswir pasejina dichuku dia Yehova piswimp. w19.10 14 par. 2; 16 par. 10; 17 par. 12

Anch twaminy yakudia, tukwetap kand usu piur pa yibudikin ya yakudia yiney mu mujimbu wetu. Yakudia yiwamp, yikutwish kukwash mujimbu wetu; pakwez yakudia yiyimp yikutwish kushesh mujimbu wetu. Yibudikin yikutwishap kumekan kapamp kamwing, pakwez yikusambish kumekan mu kusut kwa chisu. Chilik chimwing, chisu tutondina kwipuwangej kwetu, tufanyidin kushinshikin yom twandjikina mu manangu metu. Anch kwipuwangej twatondang kwandam mu manangu metu, kukwikal ni usu pa mutapu wetu wa kutong ni pa yovil yetu. Kwipuwangej kuwamp kukutwish kutusangaresh, pakwez kwipuwangej kudia kuyimp kukutwish kutusal nayimp. (Jak. 1:14, 15) Yibudikin ya kwipuwangej kuyimp yikutwishap kumekan kapamp kamwing kamu, pakwez yikutwish kumekan patok kupwa kwa chisu kanang. Chawiy Bibil utubabeshin anch: “Kangal kwidimbany ayinen, mulong kwikil muntu ukutwisha kumudimb Nzamb. Yikukunay muntu, yawiy yikez kwangulay. Anch muntu wakun yom ya rusot ra wuntu, ndiy ukez kwangul kusheshik.” (Gal. 6:7, 8) Chidi cha usey nakash mudi ik kudi etu kwipuk kwipuwangej kwin kwawonsu kukasikeshina yom yikisinay Yehova!—Kus. 97:10. w19.10 30 par. 12-14

Yehova watumekeshina rukat rijim pamupanay Mwanend kwikal difut mulong wetwetu. (Yoh. 3:16) Mutapu ik tukutwisha kwimburij rukat ra Yehova? Chidi kusutil kuyiman akadivar ni anambaz awonsu anch adi a usey ni anch twamwak nich musangar ‘mukoku washadika’ umuchirikidina Yehova. (Kus. 119:176; Luka 15:7, 10) Tukutwish kand kumekesh anch tuyikatin akadivar nau anambaz netu, anch twipan ayinetu mulong wa kuyikwash pa chisu cha maswir. (1 Yoh. 3:17) Yesu wayileja in kwilejend anch afanyidin kumekeshijadin rukat rakin umwing ni mukwau. (Yoh. 13:34, 35) Mbil yapanay Yesu yidi yisu mulong yitwitin kumekesh mutapu wa rukat rading rakad kwitau mu Chijil chapanay Nzamb kudi in Isarel: Tufanyidin kuyikat akadivar netu mudi mwatukatay Yesu. Chinech chitin rukat rakin. Tufanyidin kuyikat akadivar netu kupandikanamu mutapu twikatina ayinetu. Tufanyidin kuyikat mu chilik cha kupan kwa kwikatin mwom wetu mulong wawawiy mudi mwasalay Yesu mulong wetwetu. w19.05 4 par. 11-13

Mulong wa kutambul ukwash wa spiritu utumbila, tufanyidin kudandamen kulembil. (Luka 11:13) Chilakej cha Yesu chidia mu Luka 11:5-9 chitukwashin kwijik mulong wak Yehova ukutwinkish spiritu utumbila. Ikundj wisambidinau mu chilakej chinech wading ukatil kwikal mwin kwakan muwamp. Wading ukatin kumwinkish ngendj wend washika uchuku nakash yakudia, pakwez ndiy kadingap nich chom cha kumwinkish. Yesu walonda anch mutej nend walanka mulong ikundj winou wadandamena kwit dibot. Yom ik yakimbay kufundish Yesu? Anch muntu wakad kuwanyin ukat kwitiy kumukwash mutej nend udandamedina kwit, tufanyidin kwikal nich kashinsh anch Tatukwetu muwamp udia mwiur ukat kuyikwash antu akata kudandamen kumwit spiritu utumbila! Chawiy, tukutwish kulembil nich kashinsh anch Yehova ukwakul ku malembil metu mulong wa kwit spiritu utumbila. (Kus. 10:17; 66:19) Tukutwish kwikal nich kashinsh anch chikalap nchik usu usadinay Satan mulong wa kuturishikish, tukuwin. w19.11 13 par. 17-19

Yesu wading wij anch ndiy nau atwimbuy end ading akwet kuswir kwa kupim yisu yimwing. Chawiy antu a pasak ap kand a nlel akutwish kwikal mudi ikundj mpich wisambinay Yesu mu chishimu chend. Ikundj winou walonda piur pa amwinend anch: “Iswedisha kwey, diang ni kuna, isangarisha kwey amwiney.” (Luka 12:19; 2 Tim. 3:4) Watonga anch chom cha usey nakash mu mwom wend chading kwiswedish ni kwisangaresh. Pakwez, Yesu nau atwimbuy end kasadinap mwom yau mulong wa kwisangaresh ayinau. Nlel tukat kusal usu wa kumwimburij Yesu kusutil kusadin chisu cha konje kadiap kusu kwau mulong wa kupim pakwez kand kuchisadin nawamp kusutil kupan uman kudi antu akwau ni kuya ku yikumangan ya win Kristu. Mulong kwikadish in kwilej ni kukumangan yidi ya usey nakash, tukat kusal usu wetu win wawonsu mulong wa kwipan nich mushiku mu mijikit yiney yitumbila. (Heb. 10:24, 25) Ap chisu tudia mu konje kwi ndond yindj, tukat kudandamen kulam mushiku wetu mu mijikit ya mu spiritu mudi kukumangan chikalap nchik ndond tudia, ni kukimb mitapu ya kwisamb piur pa Bibil nau antu tusankena.—2 Tim. 4:2. w19.12 7 par. 16-17

Yehova ukatin anch twikwatin mipak piur pa yom tukusala mu mwom. Ukat kutufundish mutapu wa kukwat mipak yiwamp, ni anch twakwat mipak yimusangareshina ukat kutukwash chakwel tutwish kuyiwanyish. (Kus. 119:173) Chawiy anch twasadin manangu tutanina mu Dizu dia Nzamb, tukutwish kukwat mipak yiwamp. (Heb. 5:14) Ap anch twakwat mipak ya manangu, chikutwish kutukasiken kupwish yom twasambisha kusal. Shinshikin yilakej yimwing: Mukadivar umwing nsand wakwat kal mupak wa kutang Bibil mwawonsu. Chad watang kal kwend mwi mbing jikemp kupwa wimik mulong wa mayingishin kanang. Nambaz umwing wakwat kal mupak wa kusal mudi chibol wa rawonsu pakwez ukat kulab mulong wa kusambish. Chisak cha amakurump chakwat kal mupak wa kwipan nakash mu mudimu wa ukafung mulong wa kuyendin amikoku a mu chikumangen, pakwez kwasut kal angond avud kasambishinap kwau kusal yom yalondau. Yilakej yiney yishalijadin, pakwez mu yawonsu tutaninamu chom cha mutapu umwing. Antu inay awonsu akwatin mipak pakwez kasadinap kwau yom yalondau kusal. w19.11 26 par. 1-2

Yesu wafanikesha chirung chetu ni “chirung cha Nowa,” ni pakad kwidjidjek tushich chakin kamu mu ‘yisu ya mar yikasikena nakash.’ (Mat. 24:37; 2 Tim. 3:1) Mulong wa diyingishin dined, ambay a uruw amwing akwatin mupak wa kulik bil kuval mu chisu kanang mulong wa kwipan bil nakash mu mudimu wa win Kristu. Chisu chikwatinau mupak anch akuval ni uvud wa an akuvalau, ambay akweta manangu akat kusalang bil ‘tupamp.’ (Luka 14:28, 29) Anvaj akweta ukaliweny alejen anch kulil an kwitiningap kusu kwau ching nfalang, pakwez kwitining kand chisu ni usu nakash. Chawiy, chidi cha usey kudi ambay a uruw kushinshikin yipul mudi: ‘Ov, etu awonsu tukusambishang kusal mudimu mulong wa kuwanyish maswir ma dijuku dietu? Ov, twovijadin piur pa yom yidia chakin kamu ya usey mulong wa dijuku dietu? Anch etu awonsu tukusambishang kusal mudimu, nany ukusambisha kulam an? Nany ukwikala ni yibachikin pa mutapu wau wa kutong ni wa kusal yom?’ Chisu chisambidinau pakemp pakemp ambay a uruw yipul yiney akat kuvurik kand mazu madia mu mufund wa nlel. w19.12 23 par. 6-7

Kambuy Paul wikala mu ubaj tupamp tuvud. (2 Kor. 11:23-28) Wading kand ufanyidin kujijamen “rubwambu ripampinau mu mujimbu,” pamwing ap mulad kanang wa mayej. (2 Kor. 12:7) Ni waziya kand nakash chisu chamuchinau kudi Demas, mbay nend wa mudimu “mulong Demas wakata nakash yom ya mangand.” (2 Tim. 4:10) Paul wading mwin Kristu uzizidilau many utakamena nakash wayikwashang antu akwau nakash, pakwez niyend waziyang yisu yimwing. (Rom 9:1, 2) Paul watambula rongoj ni ukwash yading yiswirikedinay. Mutapu ik? Yehova wasadina chakin kamu spiritu wend utumbila mulong wa kumukasikesh. (2 Kor. 4:7; Fil. 4:13) Yehova wamukasikesha kand kusutil ambay nend in Kristu. Paul wisambidin piur pa ambay nend a mudimu amwing mudi ‘musul wa rongoj rijim.’ (Kol. 4:11) Pakach pa ambay nend inay wajimbulap Aristarik, Tishik, ni Marko. Amukasikesha Paul, ni amukwasha kujijaman. w20.01 8 par. 2-3

Yesu wamekesha anch chikasikening kumurumburil kamu nawamp muntu wakad kuzizilau many mutapu wiyovilingay muntu ukata “kuvadik kapamp ka chaad,” ap “kuvadik ku ukash wa [spiritu].” (Yoh. 3:3-8) Yom ik yikata kuswimp mu mutapu wa kutong wa in Kristu anch ayizizil many? Kurutu kwa Yehova kuyizizil in Kristu inay many, ading akatin nakash ruchingej ra kushakam chikupu pa divu. Ading achingedin nich impu yikash chisu chikezay Yehova kudiosh uyimp wawonsu ni kukarumun divu kwikal paradis. Pamwing ap ading kutongijokin piur pa mutapu ukuyakau anamakwau ap arund nau afila kal. Pakwez kupwa kwa kwikal azizidilau many, asambisha kutong mu mutapu ukwau. Mulong wak chidi mwamu? Chinech chirumburikinap anch kakatap ruchingej rau ra kushakam pa divu. Kaswimpap mutapu wau wa kutong mulong wa kuziy mu manangu ap mulong wa mar. Kiyovap kapamp kamwing anch chikwikalap chisangareshina kushakam pa divu chikupu. Pakwez, Yehova wasadina spiritu wend utumbila mulong wa kuswimp mutapu wau wa kutong ni ruchingej rikatinau nakash. w20.01 22-23 par. 9-11

Mu Chijil chapanay Nzamb kudi in Isarel, amakundj kapwishangap kwau ching milong ya mu spiritu, pakwez apwishang kand milong yakad kutal difukwil dia Yehova. Pakwez mu “chijil cha Kristu,” chisend cha amakurump chidi cha kupwish ching kusu milong yitadina difukwil dia Yehova. (Gal. 6:2) Amakurump ij anch Nzamb uyilikidil antakel a mangand chisend cha kupwish milong yakad kutal difukwil diend. Awiy akweta mbil ya kukandan ap kumutek muntu mu rukan. (Rom 13:2-4) Ov, amakurump akwet chisend ik anch muntu wa mu chikumangen wasal chitil chijim? Akat kusadin Mifund mulong wa kushinshikin milong ni kukwat mipak. Akat kuvurik anch rukat wawiy mufulandal wa chijil cha Kristu. Rukat rikat kuyibachik amakurump kushinshikin chipul ech: Yom ik tufanyidina kusal mulong wa kumukwash muntu mwawonsu mu chikumangen wasadinau yom yiyimp? Pantaliken ni muntu wasalang chitil, rukat rikuyibachik amakurump kushinshikin yipul mudi: Ov, muntu winou umekeshin anch ukarumukin? Ov, tukutwish kumukwash kuwapish urund wend ni Nzamb? w19.05 7 par. 23-24

Yesu wading wij anch Tatukwend ndiy wading Musul ni Mwin Kulam mwom wend chisu chalonday mazu madia kwiur oku. Yesu wamuchingejina nakash Tatukwend, ni Yehova wawanyisha maswir mend ma ku mujimbu. Cha usey nakash, Yehova wawanyisha maswir ma mu spiritu ma Yesu. (Mat. 4:4) Yehova ukat kuwanyish maswir metu ma mu spiritu. Kusutil Dizu diend, watulejin kal uyakin piur pend, piur pa yom yitonginay kusal, mulong wak watutanga, ni piur pa yom yikusadika mu machuku ma kurutu. Wamekesha anch utubangidin pakampwil pa twileja uyakin kapamp ka kusambish kusutil anvajetu ap mulej mukwau watukwasha kumwijik. Ni udandamedin kutukwash kwikal arund nend kusutil amakurump a chikumangen akweta rukat ni akadivar ni anambaz akwau aswila. Chikwau kand, Yehova ukat kutufumb kusutil yikumangan ya chikumangen, ndond tukata kwilejin pamwing nau akadivar ni anambaz netu. Mu mitapu yiney ni yikwau kand yivud, Yehova ukat kutumekeshin etu awonsu rukat ra winvaj.—Kus. 32:8. w20.02 3 par. 8; 5 par. 13

Kukwikalap chisambu anch twasambish kwovijadin mukau umwing ni mukwau. Tufanyidin kudiosh mukau mu muchim wetu ni kwipuk kuyibachik antu akwau kwikal ni yovil ya mukau. Yom ik tukutwisha kusal pakampwil mulong wa kuyikwash antu akwau kurishikish mukau, ni mutapu ik tukutwisha kukasikesh chisambu? Mwikadil ni yisal yetu yikutwish kwikal ni chibachikin chikash padi antu kwau. Mangand makatin anch twikal in “kwibaz” mulong wa yom tukweta. (1 Yoh. 2:16) Pakwez mwikadil winou ukat kukasikesh mukau. Tukwipuk kuyibachik antu akwau kwikal ni ris anch twipuk kulondol chisu chawonsu piur pa yom tukweta ap tutongina kuland. Mutapu ukwau tukutwisha kwipuk kukudish mukau udi kusutil kwikal isikena piur pa yisend tukweta mu chikumangen. Anch twikal ni chaku cha kulondol chisu chawonsu piur pa yisend tukweta, tukutwish kuyibachik antu akwau kukudish mukau. Chinyim ni chinech, anch twayibangin nakash antu akwau ni kushinshikin pa yom yiwamp yisadinau, tukat kuyikwash kusanger yikwetau ni kukasikesh uumwing ni chisambu mu chikumangen. w20.02 18 par. 15-16

Ukutwish kwilej piur pa Yehova kusutil yitang yend. (Kuj. 4:11) Tongijokin piur pa manangu ma Yehova makurikina nakash mamekena kusutil mutapu watangay annam ni mitond. Ileja yom yimwing piur pa mutapu ushimokishena wakutangau. (Kus. 139:14) Ni tongijokin piur pa usu watekay Yehova mu muten, kupwa ijik anch kudi tutikit ni tutikit twa atutumbu adia mudi muten. (Isay 40:26) Anch wasal mwamu, ukumulimish Yehova nakash. Pakwez, kwijik anch Yehova udi mwin manangu ni mwin dikand chidi kwau chikunku cha mufulandal wa urund wey ni ndiy. Mulong wa kukudish rukat rikash mulong wa Yehova, ufanyidin kwijik yom yivud piur pend. Ufanyidin kwikal nich kashinsh anch Yehova ukubangidin pakampwil. Vurik anch ‘ang wamukimb, ndiy ukez kumekan kudi ey.’ (1 Jsng. 28:9) Pakwez, diyingishin ukweta katat dia kwilejin Bibil didi anch Yehova udi mudi ukulejin anch ‘nakupwitina kudi am.’ (Jer. 31:3) Anch wadandamen kwijik yom yawonsu yasalay kal Yehova mulong weyey, rukat rey mulong wendendiy rikukurik. w20.03 4 par. 6-7

Kambuy Paul washa chilakej chiwamp piur pa kutek mudimu wa kulejan pa ndond ya kusambish mu mwom wend. Padingay mu musumb wa Korint chisu cha weny wend wa kaad wa umishoner, wading ni nfalang jikemp ni yisu yimwing watungang minkand. Wasala mudimu winou mulong umukwash kudandamen kulejan rusangu ruwamp kudi antu a mu Korint ‘pakad kwikal chisend’ kudi awiy. (2 Kor. 11:7) Ap anch Paul wafanyina kusal mudimu wa ku mujimbu, wadandamena kutek pa ndond ya kusambish mudimu wa kulejan ni walejanang pa Sabat mwawonsu. Chisu chawapa mashakamin mend, Paul washinshikina nakash pa mudimu wa kulejan. “Wipana chisu chawonsu mulong wa kurumburil rusangu ra Yesu kudi in Yuda. Wayirumburilanga kamu patok anch, Yesu, ndiy kamu Kristu.” (Mid. 18:3-5; 2 Kor. 11:9) Kupwa, pasalay mivu yaad mu rukan ku Rom, Paul wayifundishang antu ezang kumutal ni wafundang mikand. (Mid. 28:16, 30, 31) Paul kalikidinap chom ap chimwing chimuletin kampuw mu mudimu wend wa kulejan. w19.04 4 par. 9