Ngond wa 3

Rukat mulong wa Nzamb ni mulong wa Dizu diend rikat kutubachik kumuziyin Yehova ap anch anamakwetu ap arund netu atubachik kwiyandjik mu yisal yakad kukwatijan ni mifund piur pa afu. Akutwish kupakish kutwovish usany pamwing ap kusutil kulond anch twadingap tuyikatina ni tuyilimishina anamakwetu afila kal. Ap kand akutwish kulond anch yisal yetu yikuyibachik antu afila kal ayisala nayimp antu adia aom. Mu muchid umwing wa mu Caraïbe, antu avud itiyijin anch kupwa kwa rufu ra muntu, “mwizwizwimb” wend ukat kushal mulong wa kuyipup antu amumesha mar. Referans umwing ulondin anch: “Mwizwizwimb” winou ukutwish ap kulet kanvundangesh mu chisak cha antu. Mu jindond jimwing mu Afrik, muding chishankur cha kubwik pa makalash mu chikumbu cha muntu wafang ni kukarumun yipich yend kuyitadish ku rubumbu. Mulong wak? Amwing alondining anch afu kafanyidinap kwiman ayinau! Mulong tudi atushalapol a Yehova, tukatap kwitiyij yishankur ap kwiyandjik mu yisal yikasikeshina makasu minam ma Satan!—1 Kor. 10:21, 22. w19.04 16 par. 11-12

Yesu wafundisha mbil jafanyina kuyikwash in kwilejend chakwel ayisadin antu akwau nich kutentam. Chilakej, tongin pa mbil yilondina anch yisadina antu akwau mudi muukatina anch ing niyau akusadilang ey. Tukatining etu awonsu kutusadin mu mutapu uwamp. Chawiy, tufanyidin kuyisadin antu akwau mu mutapu uwamp. Kusal mwamu, kukuyibachik chakwel atusadina niyetu mu mutapu uwamp. Pakwez chikwikal nchik anch atusadidin kal mu mutapu wakad kutentam? Yesu wayifundisha in kwilejend kwikal ni ruchingej anch Yehova ukez ‘kayiyingish antwend akata kumudidil muten ni uchuku.’ (Luka 18:6, 7) Mazu minam madi kushilamu kulondina anch: Nzamb wetu utentamina wij nawamp yoziu turishina nich mu machuku minam ma nsudien ni ukutuyingish nich pa chisu chiwanyidina. (2 Tes. 1:6) Anch twasadin mbil jafundishay Yesu, tukuyisadin antu akwau mu mutapu utentamina. Ni anch atusadinap kal yom yakad kutentam mu mangand minam ma Satan, tukutwish kutan rongoj kusutil kwijik anch Yehova ukez kutuyingish nich. w19.05 5 par. 18-19

Ov, udi nsand uyiling ku shikol? Ambay ney awonsu a kalas akutwish kwitiyij anch antu kayitangap kwau pakwez ibudikina. Ukukat kuyilej mulong wak witiyijin anch antu ayitang mudi mufundishinay Bibil, pakwez pamwing ap ukutwish kwiyov anch ukutwishap kuyirumburil. Chawiy ufanyidin kwilej! Pawilejina ufanyidin kwikal ni yitongijok yaad: (1) kukasikesh yitiyij yey anch Nzamb ndiy watanga yom yawonsu ni (2) kuwapish ukaliweny wey wa kuyirumburil antu akwau uyakin wa Dizu dia Nzamb. (Rom 1:20) Ufanyidin chakusambish kwiyipul amwiney anch: ‘Mulong wak ambay nam a kalas itiyijin anch antu kayitangap?’ Kupwa sadin mikand yetu mulong wa kukimbijol mitu ya milong yisambidina chipul chinech. Kulond patok piur pa yitiyij yey kukasikenap kwau mudi mutapu utongina. Antu itiyijining anch mwom kautangap kwau pakwez wibudikina mulong mwawiy muyilejiningau kudi antu achingejidinau. Anch wajingunin chom chimwing ap yaad ukutwisha kuyilej ambay ney a kalas, ukutwish kumukwash muntu ukweta chakin kamu kuswir kwa yakul.—Kol. 4:6. w19.05 29 par. 13

Chisu chading chichininay muprofet Elija akankuny nend, wiyova nayimp nakash ni wakata kwend anch afa. Yehova watuma mwangel wend ukweta usu mulong wa kumukasikesh Elija. Mwangel wamukwasha Elija. Wamwinkisha yakudia yiswan ni wamukasikesha chakwel adia. (1 Ant 19:5-8) Rusangu riner rilejen uyakin wa usey nakash: Yisu yimwing chisal chikemp cha rukat tukutwisha kusal chikutwish kumukwash nakash muntu kanang. Pamwing ap yakudia, kachipan kawamp, ap kand kufund mesaj makasikeshina kukutwish kumwinkish mukadivar ap nambaz wiyovila nayimp kashinsh anch tumukatin ni tumubangidin. Anch chitukasikedin kumukasikesh muntu piur pa yovil yend tukutwish kusadin chom chimwing pakach pa yom twajimbula kal ey mulong wa kumukwash. Yehova wamukwasha Elija kusutil chilay chakwel aya weny ulemp mulong wa kushik ku Mukandu wa Horeb, kulemp nakash ni ndond yadingau antu ading akimbina kumujip. Chilakej chinech chitufundishin ik? Anch tukatin kuyongoj antu ayipishinau, tufanyidin chakusambish kuyikwash chakwel iyova anch adi mu diking, ku yikumbu yau ap ku Chot cha Want. w19.05 16-17 par. 11, 13-14

Tong bil anch utangin shapitre wa 12 wa uprofet wa Zakariy, wisambidina piur pa rufu ra Mesia. (Zak. 12:10) Anch washik mu verse wa 12, ukuman afundin anch “dijuku dia Natan” dikudil nakash pakufay Mesia. Pa ndond pa kusut mau mau pa mazu minam, ufanyidin kwiman ni kwiyipul anch: ‘Kukwatijan ik kudia pakach pa dijuku dia Natan ni Mesia?’ Sal usu wa kupakish kukimbijol. Referans marijinal ukukutwal mu mukand wa 2 Samwel 5:13, 14, mulejenau anch Natan wading umwing wa pakach pa an a Mwant David. Referans marijinal wa kaad udi, Luka 3:23, 31, umekeshina anch Yesu wading wa ku muchid wa Natan mulong Natan wading ngakend wa Mariy. Kapamp kamwing yom yiney yikukusangaresh kamu! Wij nawamp anch asambela kulejan anch Yesu ukez kadiokal mu dijuku dia David. (Mat. 22:42) Pakwez David wavala an 20 ni kusut. Ov, chishimwokishinap kujingunin anch Zakariy ulejen anch dijuku dia Natan dikwet pakampwil diyingishin dia kudil nakash piur pa rufu ra Yesu? w19.05 30 par. 17

Yom ik tufanyidina chad kusal? Kusutil kwilej pakad kujing, tukutwish kwijik uyakin tukata kwilej udia mu Bibil. Tukutwish kwikal nich kashinsh anch mbil ja Yehova jidi jitentamina. Kupwa, mudi mutond ukweta mij yandamina pansh, tukujamish ni ‘kwikasikesh mu ritiy.’ (Kol. 2:6, 7) Vurik anch kwikil muntu ukutwisha kukasikesh ritiy pa ndond yey, chawiy dandamen kwikal muntu musu mu usu uyikedila manangu mey. Dandamen kulembil chisu chawonsu; mwita Yehova mulong wa ukwash wa spiritu wend. Tongijok nakash ni dandamen kushinshikin yitongijok ni yibachikin yey. Kimb arund awamp akutwisha kukukwash kuswimp yitongijok yey. Anch wasal mwamu, ukutwish kupwish yibudikin yiyimp ya ulemb wa mangand ma Satan ni kuumbol ‘yitongijok ni chikangesh chin chawonsu chipwitamijadina ni ronganyin ra Nzamb.’—2 Kor. 10:5. w19.06 13 par. 17-18

Mudi Rut mwalamatay kudi Nawom, tufanyidin kuyikwash antu afishina akatish nau. (Rut 1:16, 17) Paula ulondin anch: “Kupwa kwa rufu ra nfumwam, natambula ukwash uvud. Mu kusut kwa machuku ikala kand akwatikena ni midimu yau ya pichuku pichuku. Pakwez mwom wam waswimpa nakash. Chiding cha ukwash nakash anch antu akwau ajingunin anch muntu ukweta ushon ukwet kuswir kwa ukwash mu angond ap mu mivu yambakedina rufu ra mukatish nend.” Chakin kamu, antu ashalijadin. Antu amwing akat kwijidin mashakamin mau masu pakad kulab. Pakwez akwau, anch asal midimu yasalangau pamwing ni ambay nau, akat kuyivurik akatish nau ni kwiyov nayimp nakash. Mutapu ukatau antu kwov ushon ushalijadin. El tuvurikany anch Yehova utwinkishin dilau ni chisend cha kuyibangin antu afishina akatish nau. w19.06 24 par. 16

Anch akangesh difukwil dietu tufanyidin kwijik anch kudi “chisu chimwing cha kunenet.” (Mul. 3:7) Tufanyidin kulam nsangu ja ujindj, mudi kulejan majin ma akadivar nau anambaz netu, ndond tukumangedina, mutapu tusadina mudimu wetu wa kulejan ni mutapu tutambwila yakudia ya mu spiritu. Tufanyidinap kulejan yom yiney kudi antakel a ngand, kudi arund netu, kudi anamakwetu adia mwi ngand yetu ap mu jingand jikwau. Anch twalejan yom yiney, tukuyitek akadivar netu mu ubaj. Pikil walikidil tumilong tukemp tukemp tutwaurila. Satan wij anch dijuku diaurikina dikat kujiy. (Mar. 3:24, 25) Chawiy ukudandamen kusal usu wa kutwauril. Mulong wij anch mu kutwauril, tukusambish kupwitijan ayinetu pa ndond pa kumurishikish ndiy. Ap in Kristu aswila mu spiritu afanyidin niyau kubabal chakwel pikil awil mu mupit winou. Anch twasal usu wa kupandikan tumilong tukemp tukemp nau akadivar netu, kwikil chom chikutwaurila.—Kol. 3:13, 14. w19.07 11-12 par. 14-16

Yisu yivud, antu kakwitiyangap uruu wetu mulong wa yom tulondina, pakwez mulong wa mutapu tuyilondina. Akat kuukat nakash anch twikal adimukina, in nkeu, ni anch twamekesh anch tuyibangidin. Tukatap kuyishindil chakwel atesh yom tuyilejina. Pakwez tukat kusal usu wa kujingunin mayingishin mayibachikina kwikal ni chitongijok chinech piur pa relijon ni tukat kusal usu wa kutesh yovil yau. Chilakej, chisu chambambangay nau in Yuda, Paul wasadinang Mifund. Pakwez, chisu chambambangay nau in Grek a ku Aeropaj akad kwitiyij milong ya Nzamb, kayilejangap anch mafundish minam madiokil mu Bibil. (Mid. 17:2, 3, 22-31) Mutapu ik tukutwisha kwimburij chilakej cha Paul? Anch twamusankan muntu wakad kwitiy Bibil, chiwapinap kumulej kapamp kamwing maverse chisu twambambina nend. Anch waman anch muntu ukwov usany anch amuman ukat kutang Bibil pamwing niyeyey, sal usu wa kumulej maverse kampand mu mutapu wakwel anch antu akwau kangal aman, chilakej kusutil telefon. w19.07 21 par. 5-6

Nich kubabal, Satan wayipaka in Isarel mulong wa kwifukwil akish. Wading wij anch ading akwet kuswir kwa yakudia, chawiy chapakishay kusadin maswir minam mulong wa kuyikwat mu mupit wend. Chisu chandamau mwi Ngand ya Kushilamu, afanyina kwilej mutapu usu wa kudim. Chisu chadingau mu Idjibit, in Isarel asadinang mem ma Wit wa Nil mulong wa kwichil mu yir yau. Pakwez mwi Ngand ya Kushilamu mwadingap wit mujim, chawiy mulong wa kupamish yakudia mu yir, ading akwet kuswir kwa mem ma ruval ni maum. (Kuv. 11:10-15; Isay 18:4, 5) Chawiy in Isarel afanyina kwilej mitapu yisu ya kudim. Mulong wak Yehova wayibabesha in kumwifukwil end pantaliken ni difukwil dia anzamb a makasu pading pisambidinay piur pa kwilej mitapu yisu ya kudim? Yehova wading wij anch in Isarel afanyina kuyipak mulong wa kwilej mitapu ya kudim ya ndond yiniya kudi apagan ading ayinyingumukina. Chakin kamu, apagan inay ading ni ukaliweny nakash mu mudimu wa kudim, ni antu a Nzamb afanyina kwilej mutapu wa kuwapish mutapu wau wa kudim kusutil apagan, pakwez kusal mwamu kwading kwa ubaj. Yitongijok ya andim a ku Kanan ading ayiyipishin kal ni yitiyij ya difukwil dia Bal.—Kuch. 25:3, 5; Ank. 2:13; 1 Ant 18:18. w19.06 3 par. 4-6

Chisu chashikay kambuy Paul, Silas, Luka, ni Timote mu musumb wa Filip wading mwinshin mwa umutakel wa Rom, atana antu avud mwinimwa ading asangaredina uruu wa Want. Akadivar inay anying in mushiku akwasha kusambish chikumangen ni akadivar nau anambaz asu asambisha kukumangan pamwing, pamwing ap mu chikumbu cha Lidi mband wading ni chaku cha kwakan. (Mid. 16:40) Pakad kulab chikumangen chinech chisu chasambisha kurish ni yakamish. Satan wayibachika akankuny a uyakin chakwel apompata mudimu wa kulejan wa in Kristu inay ashinshamena. Paul ni Silas ayikasa, ayibula nfimbu ni ayiteka mu rukan. Kupwa kwa kubudik mu rukan, aya mulong wa kuyital in kwilej asu ni kuyikasikesh. Kupwa, Paul, Silas, ni Timote adiokala mu musumb winou, pakwez chimeken anch Luka ndiy washala mwinimwa. Mutapu ik wafanyinau kusal akadivar ni anambaz inay asu? Nich ukwash wa spiritu wa Yehova, adandamena kusal mudimu wa Yehova nich mushiku. (Fil. 2:12) Paul wading ukwet diyingishin dia kwibaz mulong wa awiy! w19.08 8 par. 1-2

Ov, wabukidin ndond kanang machuku masutina am? Chikutwish kwit nfalang jivud mulong wa kubukin ndond kanang, ni chinech chikutwish kusal anch twiyandjik mu mabaz nakash. Mulong wa kwipuk mabaz, ufanyidin kwipuk kusondam nfalang mulong wa kuland yom yiwakad kwikal nich kuswir nakash. (Jnsw. 22:3) Anch tudi mu yisu yikash, mudi kumulam mwanamakwetu uyedina, chikutwish kutukasiken kwijik uvud wa nfalang jifanyidina kusondam. Mu yisu mudi yiney, vurik anch ‘kulembil ni kumwilembin’ Yehova kukutwish kwakukwash kukwat mipak ya manangu. Yehova ukutwish kwakul ku malembil mey kusutil kukukwash wikala ni chisambu chakwel ukwata mipak yiwamp. (Fil. 4:6, 7; 1 Pita 5:7) Ikal nau arund awamp. Yileja arund ney piur pa yom utongina ni yakamish urishina nich, pakampwil yileja antu arisha kal ni yakamish mudi yiney. Kusal mwamu kukutwish kwakukwash wiyova nawamp. (Mul. 4:9, 10) Arund wading nau kurutu kwa kushemunik akudandamen kwikal arund ney. w19.08 22 par. 9-10

Mulong wak Yehova ufanakeshin njit jijim ja nsudiel ni Megido? Megido ni Nkurubuk ya piswimp ni Jizarel jading ndond jarishinangau njit nakash. Yisu yimwing Yehova wayikwasha antu end kuwin njit jivud pa ndond jinej. Chilakej, “ku mem ma Megido,” Nzamb wamukwasha Nkalansambu mwin Isarel Barak kuwin chisak cha amasalay in Kanan atakelau kudi kalal wau Sisera. Barak ni muprofet mband Debora amujikitisha Yehova mulong wa kuwin kwinoku kushimokishena. Awanga anch: “Atutumbu a mwiur arisha njit . . . nend Sisera. . . . “Mwamu mukat kujiyau akankuny ney awonsu, A! [Yehova], pakwez, arund ney akat kwikal mudi muten muukata kubudik nich usu wau!” (Ank. 5:19-21, 31) Chilik chimwing kand, akankuny a Nzamb akusheshik kwi njit ja Harmagedon, chad antu amukatina Nzamb akupand. Pakwez, kudi kushalijan kumwing kwa usey pakach pa njit jinej jaad. Ku Harmagedon, antu a Nzamb kakurishap. Kakwikalap ni mat! ‘Usu wau ukwikal wa kushakam zoong ni kumuchingejin’ Yehova ni amasalay end a mwiur.—Isay 30:15; Kuj. 19:11-15. w19.09 9 par. 4-5

Mutapu umwing wa ‘kwez kudi’ Yesu udi wa kusal usu wetu win wawonsu mulong wa kwilej piur pa yom yalonday ni yasalay. (Luka 1:1-4) Kwikil muntu ukutwisha kusal mwamu pa ndond yetu—tufanyidin kwilej ayinetu nsangu jinej. Tukutwish kand ‘kwez kudi’ Yesu kusutil kukwat mupak wa kutambul dibatish ni kwikal mwin kwilej wa Kristu. Mutapu ukwau wa ‘kwez kudi’ Yesu udi kusutil kuya kudi amakurump a chikumangen anch tukwet kuswir kwa ukwash. Yesu ukat kusadin ‘yipan mudi antu’ yiney mulong wa kulam amikoku end. (Efes 4:7, 8, 11; Yoh. 21:16; 1 Pita 5:1-3) Tufanyidin kusal usu mulong wa kwit ukwash wau. Tufanyidinap kutong anch amakurump akutwish kujingunin yom yidia mu muchim wetu ap mu manangu metu ni kwijik yom tukweta nich kuswir. Shinshikin yom yilondinay mukadivar Julian: “Nita ukwash, ni ukwash natambula kudi amakurump wading chipan cha usey nakash.” Amakurump ashinshamena mudi amukwasha Julian, akutwish kutukwash kwijik “chitongijok cha Kristu,” charumburik anch kwijik nawamp ni kwimburij mutapu wend wa kutong ni mwikadil wend. (1 Kor. 2:16; 1 Pita 2:21) Chakin kamu, chinech chidi chipan cha usey nakash pakach pa yipan ya usey tukutwisha kutambul. w19.09 21 par. 4-5

Mu Bibil tukat kutang nsangu ja amakundj ni amband akweta ritiy ni atakelau nich spiritu utumbila; pakwez kadiap mu chisak cha antu 144000. Yohan mubatish udi pakach pa antu mudi inay. (Mat. 11:11) David udi chilakej chikwau. (Mid. 2:34) Antu inay ni akwau avud nakash akuyivumbul mulong wa mwom mu paradis panap pa divu. Awonsu—azizidilau many pamwing ni chisak chipandikena kujimb—akwikal ni mutapu wa kumekesh kushinshaman kwau kudi Yehova ni ku ukaleng wend. Kudiosh pakur, Nzamb kandikal akumangejangap mamiliyon ma antu adiokila ku michid yawonsu mudi musadinay nlel. Ruchingej retu rikala ra kuya mwiur ap ra kushakam pansh, tufanyidin kuyikwash antu avud chakwel eza mu chisak chipandikena kujimb cha “amikoku akwau.” Piswimp ap, Yehova ukulet mar makash matakelau kulejan makunongisha maguvernema ni ma relijon mayimeshina antu mar. Dilau dijim mudi ik diyichingedina antu awonsu adia mu chisak chijim kurutu oku—kumusadin Yehova chikupu pa divu!—Kuj. 7:14. w19.09 31 par. 18-19

Pasejina disudien dia mangand ma Satan, tukutwish kuchingej anch yakamish yikash nakash yikutwish kupak kushinshamena kwetu kudi Nzamb ni Want wend. Chimeken anch antu akudandamen kutusip. Akusal mwamu mulong etu twiyandjikinap ap pakemp mu yom ya mangand ma Satan. Tufanyidin kukasikesh kushinshaman kwetu kusambish kamu katat mulong wa kushal ashinshamena pa chisu cha mar makash. Chisu cha mar makash, kukwikal kuswimp kumwing piur pa akadivar atakedila dirijek pa divu. Chisu chimwing, in Kristu awonsu azizidilau many achidia pa divu akuyikumangejin mwiur mulong wa kukwash kurish njit ja Harmagedon. (Mat. 24:31; Kuj. 2:26, 27) Chinech chirumburikin anch Chisak Chitakedila chikwikalap netu pa divu. Pakwez chisak chipandikena kujimb chikudandamen kwikal chitenchikinau. Akadivar amwing awanyishina yitinau adia pakach pa amikoku akwau akuyitakel antu a Nzamb. Tukwikal ni kuswir kwa kumekesh kushinshaman kwetu kusutil kusal pamwing nau akadivar inay ni kulondul umutakel wau utambwilau kudi Yehova. Ching kusu anch twasal mwamu chad lel twapand! w19.10 17 par. 13-14

Nawom wading mband ushinshamena wading umukatina Yehova. Pakwez kupwa kwa rufu ra nfumwend nau anend aad, wakata kuswimp dijin diend dia Nawom ni kwipil anch “Mara,” charumburik anch “Ntany.” (Rut 1:3, 5, 20, 21) Rut mawenend a Nawom washala ushinshamena kudi ndiy mu chisu cha yakamish yend. Rut kamukwashap kwend Nawom ching ni yom ya ku mujimbu, pakwez wamwongoja nich mazu mawamp. Rut wamekesha rukat rend ni wamukwasha Nawom kusutil mazu mawamp ni maswapela kutesh. Anch mukadivar ap nambaz wafish mbay nend wa uruw, ukweting kuswir kwa ukwash wetu. Ambay a uruw adi mudi mitond yaad yidia piswimp yipamina pamwing. Mu kusut kwa mivu, mij ya mutond yiney yikat kwikasijan. Anch mutond umwing auvumbul, mutond ukwau ukutwish kushal pantetel. Chilik chimwing, anch muntu wafish mbay nend wa uruw, ukutwish kwikal ni yovil yikash mu chisu chilemp. w19.06 23 par. 12-13

Tufanyidinap ching kusu kwetu kushinshikin mulad wa kwipuwangej tusangaredina pakwez kand kulep kwa chisu tusutishina mu kwipuwangej. Chamwamu, tukutwish kusambish kusutish chisu chivud nakash mu kwipuwangej kusutamu chisu tusutishina mu mudimu wa Yehova. Chakusambish, ufanyidina kusal chidi kwijik kulep kwa chisu usutishining mu kwipuwangej. Ov, umenap anch chidi cha usey kufund asaa wipuwangejining mu rubing rumwing kusu? Fund ku kalandriye uvud wa asaa usutishining ku televizion, pa Internet, ni mu kusengan masengan madia pa telefon wey. Anch waman anch ukat kusutishang chisu chivud nakash, pakish kwitekin program. Chakusambish, tek chisu cha kusal yom ya usey nakash, ni kupwa chad tek chisu cha kwipuwangej. Kupwa mwita Yehova chakwel akukwash kulimish program wey. Anch wasal mwamu, ukwikal ni chisu ni usu ukweta nich kuswir mulong wa dilejan diey dia Bibil dia muntu panrend, difukwil dia mu dijuku, yikumangan, ni kumusadin Yehova mu mudimu wa kulejan ni kufundish. Mwamu ukwifishap nich piur pa chisu usutishina mu kwipuwangej mulong umutekin Yehova pa ndond ya kusambish. w19.10 30 par. 14, 16; 31 par. 17

Piswimp ni muvu wa 55 C.C., in Korint akwata mupak wa usey nakash. Pijikau anch akadivar nau ku Yerusalem ni ku Yudea ading arishin ni yakamish yikash ni uzwendj, akwata mupak wa kukumangej niyau yipan mulong wa kuyikwash. (1 Kor. 16:1; 2 Kor. 8:6) Kupwa kwa angond akemp, kambuy Paul watesha anch in Korint kapaninap kwau yipan yalondau kupan. Mudi chibudikin, chimeken anch yipan yau yadingap kamu tayad pa chisu cha kuyitwal ku Yerusalem pamwing ni yipan yadiokala ku yikumangen yikwau. (2 Kor. 9:4, 5) In Korint akwata mupak uwamp, ni Paul wayijikitisha mulong wa ritiy rau rikash ni impu yau yikash ya kupan. Pakwez wayikasikesha nakash mulong wa kuwanyish yom yalondau kusal. (2 Kor. 8:7, 10, 11) Chilakej chau chitufundishin anch ap mwin Kristu ushinshamena ukutwish kurish mulong wa kuwanyish mupak uwamp wakwatay. Mulong wak? Mulong wa kuburen kuwanyin, tukutwish kuladikij yom. Ap yom yakad kuchingejin yikutwish kusal anch chitukasiken kuwanyish yom twalonda kusal.—Mul. 9:11. w19.11 26-27 par. 3-5

Mudi rikibu rijim rikata kuchidij chikunku chijim cha mujimbu, ritiy rey rikat kukuchidij pantaliken ni yom yiyimp ya mangand minam, mudi mwikadil wijondila, chisum, ni yom yikwau yiyimp yakad kukwatijan ni mbil ja Nzamb. Mulong tudi in Kristu, turishin njit ja mu spiritu, ni pakach pa akankuny netu padi aspiritu ayimp. (Efes 6:10-12) Mutapu ik ukutwisha kwikal nich kashinsh anch ritiy rey rikushal rikash chisu chikuripakau? Chakusambish, ufanyidin kulembil mulong wa kwit ukwash wa Nzamb. Kupwa ufanyidin kusadin Dizu dia Nzamb mulong wa kukukwash kwiman amwiney mutapu ukumenau kudi Nzamb. (Heb. 4:12) Bibil ulondin anch: “Mukungamena [Yehova] ni muchim wey wawonsu. Kangal wachingej ronganyin rey amwiney.” (Jnsw. 3:5, 6) Katat tongin piur pa mulong kanang warishina nich mu mwom wey ni mutapu wasadina piur pa mulong winou. Chilakej, ov, warishin ni mulong ukash wa kuburen kwa nfalang? Ov, wavurikin kushilamu kwa Yehova kudia mu Hebereu 13:5 kulondina anch: “Kinikukushap, kinikez kakulikap chikupu”? Ov, kushilamu kwinoku kwakwinkishin kashinsh anch Yehova ukukukwash? Anch mwawiy, chinech chimekeshin anch ulamin rikibu rey ra ritiy nawamp. w19.11 14 par. 1, 4

Mulong wa kumulil mwan, anvaj awonsu aad afanyidin kusal usu nakash ni afanyidin kand kusutish nend chisu chivud. Chawiy, anch ambay a uruw akwet an avud alondulijadina mivu, chikutwish kuyikasiken kumubangin mwan ni mwan. Anvaj amwing akweta an avud achidia kal anikanch alondin anch akat kwiyovang rumbangan. Maku ukutwish yisu yawonsu kuziy ku mujimbu ni mu manangu. Ukutwish kuziy ni kukangany usu wa kwilej, kulembil ni kwipan mu mudimu wa kulejan nich mushiku. Chikutwish kand kumukasiken kulondul nawamp program wa yikumangan ya win Kristu ni kutaninamu. Chakin kamu, ikundj ukweta rukat ukutwish kusal usu wend wawonsu mulong wa kumukwash mukajend kuyibangin an, chisu chidiau ku yikumangan ni ku chikumbu. Chilakej, ukutwish kumukwash mukajend kusal midimu ya chikumbu. Ufanyidin kusal usu mulong wa kwikal nich kashinsh anch antu awonsu a mu dijuku diend atanidinamu mu program wa Difukwil dia mu Dijuku wa rubing ni rubing. Ni atatuku in Kristu akat kulejan pamwing nau antu a mu dijuku diau chisu chawonsu. w19.12 24 par. 8

Muvu wa Musangar wayikwashang in Isarel mutapu ik? Tongin bil anch mwin Isarel ukwet chikal chijim nakash, chad mudi chibudikin, chamwit kulandish chiputu chend mulong wa kufut chikal chinech. Pa Muvu wa Musangar, chiputu chinech afanyina kumuchirishinach. Mwamu muntu wafanyina “kuchirik kwol kwend,” ni uswan wa anend wafanyinap kushadik. Ku mutambu ukwau, anch ikundj wandam mu chikal chijim nakash, wafanyina kulandish umwing wa pakach pa anend—ap kand kwilandish amwinend—mu uswik mulong wa kufut chikal. Pa Muvu wa Musangar, muswik wafanyina “kuchirik kand ku chisak chend.” (Lev. 25:10) Mwamu kwikil muntu wafanyina kwikal muswik wa chikupu pakad ruchingej! Chikwau kand Yehova walonda anch: “Kikukez kwikalap kazwendj pakach pen, mulong [Yehova] ukez kukuyukishany mwi ngand yikwinkishinanyay [Yehova] Nzamb wen kuyiswan.” (Kuv. 15:4) Yom yiney yishalijadin nakash ni yom yisadikina mu mangand nlel, mudandamedinau ampich kwikal ampich nakash ni atuzwendj kwikal atuzwendj nakash! w19.12 8-9 par. 3-4

Parishay ni yoziu, Yesu walembila “nich dizu dia piur ni mansoj ku mes.” (Heb. 5:7) Malembil mend makashinsh mading mamekeshin anch wading ushinshamena kudi Yehova ni wamukwasha nakash kudandamen kwikal uziyidila. Malembil ma Yesu mading kudi Yehova mudi res ruwamp ra diseng dia malash. Mwom wawonsu wa Yesu wamusangaresha Tatukwend ni kutumbish ukaleng Wend. Tukutwish kumwimburij Yesu kusutil kusal usu wetu win wawonsu mulong wa kumuziyil Yehova ni kushal ashinshamena kudi ndiy. Anch turishin ni yoziu, tukat kwit ukwash wa Yehova kusutil malembil mulong tukatil kumusangaresh. Tumen anch Yehova kakwitiyap malembil metu anch tukat kusal yom yikisinay. Pakwez, anch twashakam kukwatijan ni yijil ya Yehova, tukutwish kwikal nich kashinsh anch malembil metu makwikal mudi res ruwamp ra diseng dia malash kudi Yehova. Ni tukutwish kwikal nich kashinsh anch kushinshaman kwetu ni kuziyin kwetu kumusangareshin Tatukwetu wa mwiur. w19.11 21-22 par. 7-8

Mu muvu wa 1919, Yesu watonda kachisak kakemp ka akadivar azizidilau many kwikal ‘kashalapol ushinshamena ni kubabal.’ Kashalapol winou ukat kutakel mudimu wa kulejan ni kuyinkish in kwilej a Kristu “yakudia pa chisu chiwanyidina.” Satan ni mangand mend asadin usu nakash mulong wa kurishikish mudimu wa kashalapol winou ap kand kuukangesh. Chikalap nchik jinjit jasadika pa mangand mawonsu tupamp twaad, kuzengol kukash, mar ma nfalang pa mangand mawonsu, ni kutusadin mu mutapu wakad kutentam, kashalapol ushinshamena ni kubabal udandamedin kupan yakudia ya mu spiritu kudi in kwilej a Kristu pa divu. Tongijokin pa yakudia ya mu spiritu yivud yidiaku nlel, tutambwila pakad kufut, mu mazu 900 ni kusut! Winou udi uman umekeshina anch Nzamb umukwashin kashalapol. Shinshikin kand uman ukwau umekeshina yiyukish ya Yehova: mudimu wa kulejan. Rusangu ruwamp akat kurilejan chakin kamu “ku mangand mawonsu.”—Mat. 24:14. w19.11 24 par. 15-16

Muvu ni muvu pa Dichuku dia Kuchakwish,vurik anch mwin kupesh mujim wading ufanyidin kwosh diseng dia malash kurutu apana ya kupesh. Mu kusal mwamu, wading nich kashinsh anch ukwikal ni dilau dia Nzamb chisu chipaninay yakupesh. Padingay pa divu, Yesu wading ni chom cha usey nakash chafanyinay kusal kurutu kwa kupan yakupesh—chom chimwing cha usey nakash chisutinamu kuyipandish antu. Chom chinech chading chom ik? Wading ufanyidin kumuziyin Yehova nich kushinshaman mu mwom wend wawonsu panap pa divu chakwel Yehova itiy yakupesh yend. Mu kusal mwamu, Yesu wafanyina kumekesh anch kusal yom mu mutapu ukatinay Yehova wawiy mutapu uwamp wa mashakamin. Yesu wafanyina kumekesh anch ukaleng wa Tatukwend udi uwamp ni utentamina. Mu mwom wend wawonsu panap pa divu, Yesu wamuziyila kamu Yehova mu mutapu uwanyidina. Ap anch warisha ni yoziu wadandamena kumekesh anch mutapu wa kuyikel wa Tatukwend wawiy upandikena kuwap.—Fil. 2:8. w19.11 21 par. 6-7

Parishay Yesu nich yikokujol mu mudimu wend wa kulejan, atwimbuy end ashinshamena amekesha kamu anch adi arund awamp kudi Yesu. (Jnsw. 18:24) Arund mudi inay ading a usey nakash kudi Yesu. Pasalangay mudimu wend wa kulejan, anamakwend a ku mujimbu kamwitiyijap. (Yoh. 7:3-5) Dichuku dimwing, anamakwend atonga anch Yesu warumbangana manangu. (Mar. 3:21) Pakwez, chinyim ni yitongijok yau, Yesu wayileja atwimbuy end ashinshamena uchuku kurutu kwa rufu rend mazu madia mu mufund wa nlel. Atwimbuy yisu yimwing amunenganesha Yesu, pakwez ndiy kashinshikinap pa kurumbuk kwau, wamana ritiy radingau nich mudiay ndiy. (Mat. 26:40; Mar. 10:13, 14; Yoh. 6:66-69) Uchuku wa nsudien wadingay ni in kwilejend kurutu afa, Yesu wayileja amakundj inay ashinshamena anch: “Am [nikutazukinany] anch, arund nam, mulong nakulejany kal yom yawonsu yanlejay Tatukwam.” (Yoh. 15:15) Pakad kwidjidjek, arunend a Yesu amukasikesha nakash. w19.04 11 par. 11-12

Mutapu ik ukatay kwijik muntu anch amutazukin mulong wa kuya mwiur? Kwakul kumeken patok mu mazu mafunday kambuy Paul kudiau in Rom ‘atazukau kwikal antu atumbila.’ Kupwa kwa kuyilej mazu madia mu mufund wa nlel, wayileja anch: ‘Chawiy spiritu watambulanya kadingap wa kukwikadishany aswik ap wa kukwovishany kand wom, bwat. Pakwez spiritu utumbila ukat kukwikadishany an a uswan a Nzamb. Chad ku ukash wa spiritu utumbila kwawiy kutukata kumutazukin Nzamb anch: “Aba! Tatuku!”’ (Rom 1:7; 8:15) Chawiy kusutil spiritu wend utumbila, Nzamb ukat kuyinkish azizidilau many kashinsh anch ayitazukin mwiur. (1 Tes. 2:12) Yehova ukat kudiosh kwidjidjek kwawonsu mu manangu ni mu michim ya antu atondinay kal mulong wa kuya mwiur. (1 Yoh. 2:20, 27) In Kristu azizidilau kakwetap kuswir kwa kuyinkish kashinsh kudi muntu ap umwing anch adi azizidilau many. w20.01 22 par. 7-8

“Chijil cha Kristu” chimedin pa mufulandal upandikena kuwap—rukat. (Gal. 6:2) Yom yawonsu yasalay Yesu yading yimedin pa rukat. Riy ap ranaken yikat kumekesh rukat. Riy ra mutapu winou rawiy ramubachika Yesu kuyifundish antu, kwok ayej, kuyidish afila nzal ni kuyivumbul afu. (Mat. 14:14; 15:32-38; Mar. 6:34; Luka 7:11-15) Yesu wateka kwa kwikatin maswir ma antu akwau pa ndond ya kusambish. Cha usey nakash wamekesha rukat ripandikena papanay mwom wend mulong wa antu akwau. Tukutwish kumwimburij Yesu anch twatek maswir ma antu akwau pa ndond ya kusambish. Tukutwish kand kumwimburij anch twayanaken antu a mu teritwar wetu. Anch ranaken ra mutapu winou ratubachik kufundish ni kulejan rusangu ruwamp, tukumekesh anch tuziyidin ku chijil cha Kristu. w19.05 4 par. 8-10

Yesu wapana mutapu wa kukwolik ku yishankur yiyimp yafundishangau antakel a chirelijon. In Yuda avud ashakama kurutu kwa chisu chinicha ading aswik a yishankur ni yitiyij ya makasu. (Mat. 5:31-37; 15:1-11) Antu ading afila mukan anch ading antakel a mu spiritu, ading kwau amputames, mulong ayinau kadingap kwau kamusadidina Nzamb. Kusutil kulik kumwitiyij Mesia ni chitokish cha muspiritu chapanay, adandamena kushal mu mididim ni mu chitil. (Yoh. 9:1, 14-16, 35-41) Yesu wayijikisha antu ikepishina mutapu wafanyinau kukwolik ku mafundish ma makasu kusutil kufundish uyakin ni kusutil chilakej chend chiwamp. (Mar. 1:22; 2:23–3:5) Yesu wapana mutapu wa kukwolik ku uswik wa chitil chitwaswana. Kusutil cha kupesh cha Yesu, Nzamb wafanyina kulikishin yitil ya antu amekeshina ritiy ni itiyijina difut diapanay.—Heb. 10:12-18. w19.12 10 par. 8; 11 par. 10-11

Yehova ukat kusadinang spiritu wend utumbila mulong wa kuyinkish in Kristu awonsu azizidilau many kashinsh anch wayitondin kal. Mu mutapu winou, spiritu utumbila udi “chizu [chijingidij ap kushilamu]” chiyinkishinau mulong wa kuyinkish kashinsh anch akez kushakam chikupu mwiur kulik pa divu. (2 Kor. 1:21, 22) Anch mwin Kristu amuzizil many, ov, chinech chirumburikin anch kwapwa kal ukutambul kamu difut diend dia mwiur? Bwat. Ukwet kashinsh anch amutondin kal mulong wa kuya mwiur. Pakwez, ufanyidin kuvurik chiyul chinech: “Anamakwam in Kristu, wejanyaku mushiku wen nakash, chakwel ukushinshikany nawamp kutazuk kwakutazukanyau ni kutond kwakutondanyau kudi Nzamb. Anch [wadandamenany kusal] mwamu kiukez kuwanyap mu yitil.” (2 Pita 1:10) Chawiy, ap anch mwin Kristu uzizidilau many amutazukin kal mulong wa kuya mwiur, ukez katambul difut diend ching anch washal ushinshamena.—Fil. 3:12-14; Heb. 3:1; Kuj. 2:10. w20.01 21-22 par. 5-6

Diyingishin dimwing diasala anch arund ayimp asatu eza kumwongoj Job aburena ranaken didi anch awiy ashinshikina kusu yom yimekena ku mes. Mudi chibudikin, ikala ni chitongijok chiyimp, ni amurumburisha Job mu mutapu uyimp. Mutapu ik tukutwisha kwipuk kusal mwamu? Vurik anch Yehova amwinend ndiy kusu wijing nawamp yom yawonsu yimushikedina muntu. Tesh nawamp yom yikulejinay muntu wovila kusansan. Pa ndond pa kutesh kusu kwau yom yilondinay; sal usu wa kwiyov mutapu wiyovilay. Ching kusu anch wasal mwamu chad lel watwish kwitek pa ndond ya mukadivar ap nambaz ney. Ranaken rikutukangesh kupalangesh mboj piur pa milong ya antu akwau. Muntu mwin mboj kakatap kutung chikumangen, ukat kuchiziyish. (Jnsw. 20:19; Rom 14:19) Ukat kuyilond antu amena mar mazu mayimp. (Efes 4:31, 32) Chidi chiwamp mudi ik anch twashinshikin pa mikadil yiwamp yikwetay muntu ni kutong piur pa mutapu tukutwisha kumukwash kurish ni yakamish yend! w19.06 21-22 par. 8-9