Ngond wa 4

Aristarik, mwin Kristu wa ku Masedon wadiokala ku Tesalonik, wamekesha anch wading murund ushinshamena kudi kambuy Paul. Tutangin kapamp kakusambish piur pa Aristarik chisu chayay Paul kuyital in ku Efes mu weny wend wa kasatu wa umishoner. Pading pamutwadinayaku Paul, chisak cha antu chamukwata Aristarik. (Mid. 19:29) Chisu chamulikijawaku, kakatap kwichidij amwinend pakwez, nich kushinshaman washala piswimp ni Paul. Kupwa kwa angond akemp, Aristarik wadandamena kushal pamwing ni Paul ap anch akankuny ading akimbin kumujip Paul mwi ngand ya Grek. (Mid. 20:2-4) Piswimp muvu wa 58 C.C. chisu chamutumau Paul ku Rom mudi muntu wa rukan, Aristarik wamutwalaku mu weny winou ulemp, ni awonsu pamwing amana mar ma kujiy kwa waat mu weny wau. (Mid. 27:1, 2, 41) Pashikau ku Rom, chimeken anch wasutisha chisu kanang mu rukan pamwing ni Paul. (Kol. 4:10) Chidiap cha kushimok pa kuman anch Paul wiyova kwikal ukasikeshinau ni wongojinau kudi murund ushinshamena mudi winou! Mudi Aristarik, tukutwish kwikal murund ushinshamena mu kushal piswimp ni akadivar ni anambaz netu kadiap kusu ching mu yisu yiwamp pakwez kand mu yisu yikata kushiken “yom yikash.” w20.01 9 par. 4-5

Muntu uzizidilau many ukutwish kwiyov anch kawanyidinap kwitapil dilau dined dia usey. Pakwez kakatap kwidjidjek ap pakemp anch Yehova wamutondin kal. Ukwet musangar nakash ni kujikitish anch watong piur pa ruchingej ra kushakam mwiur. (1 Pita 1:3, 4) Ov, chinech chirumburikin anch azizidilau many akatining kufa? Kambuy Paul wakwil ku chipul chinech. Wafanikesha mijimbu yau ni mwinkand ni walonda anch: “Pituchidia aom mu minkand ya panap pansh, tukat kwinan nakash. Kichidiap mudi tusotil kudjol mijimbu yitudia nich, pakwez tusotil kudjal mijimbu yisu ya mwiur, chakwel mijimbu yetu yikata kufa [ayiminya kudi] mwom.” (2 Kor. 5:4) Kadiap anch in Kristu inay kakatap kusanger mwom winou ni kukat anch afa swa swa. Pakwez asangaredin mwom ni akatin kumusadin Yehova dichuku diawonsu pamwing ni anamakwau ni arund nau kand. Chikalap nchik yom yisadinau, akat kuvurikang chisu chawonsu ruchingej rau ripandikena kuwap rikwetau mulong wa machuku ma kurutu.—1 Kor. 15:53; 2 Pita 1:4; 1 Yoh. 3:2, 3. w20.01 23 par. 12-13

Chawiy mulong wa kutufumb, Tatukwetu wa rukat ukat kutupupang anch chitin kusal mwamu. Yehova ukat kutupupang mu mitapu yivud. Chilakej, yom tutangina mu Dizu diend ap tuteshina ku yikumangan yetu yikutwish kutukwash kujingunin anch tukwet kuswir kwa kuswimp. Ap pamwing ap ukwash tukweta nich kuswir ukutwish kudiokal kudi amakurump a chikumangen. Chikalap nchik mutapu utupupinay, dipup dia Yehova dimedining chisu chawonsu pa rukat. (Jer. 30:11) Yehova ukat kutukwash kujijaman mu yoziu. Mudi mutapu tatuku mukatay kuyikwash anend mu yisu ya mar, Tatukwetu wa mwiur ukat kutukwashang kujijaman mu yoziu. Ukat kusadin spiritu wend utumbila mulong wa kutuchidij ku chom chin chawonsu chikutwisha kutek urund wetu ni ndiy mu ubaj. (Luka 11:13) Yehova ukat kutuchidij kand chisu tudia mu yakamish. Chilakej, ukat kutwinkish ruchingej ripandikena kuwap. Ruchingej riner ra machuku ma kurutu rikat kutukwash kujijaman mu yisu ya yakamish. Shinshikin uyakin ou: Chikalap nchik yom yiyimp yawonsu yikutwisha kutushiken, Tatukwetu wa rukat ukutukamunin ku mar mawonsu tumena. Yoziu yawonsu turishina nich yikusut, pakwez yiyukish ya Yehova yidi ya chikupu.—2 Kor. 4:16-18. w20.02 5-6 par. 14-15

Tukutwish kupandikan mukau! Shinshikin chilakej cha anamakwend a Josef. Mivu yivud kupwa kwa kumurumbukin Josef, atanijana nend mu Idjibit. Kurutu kwa kwiyijikish kudi anamakwend, Josef wayipaka mulong wa kuman anch aswimpin kal. Warijeka yakudia ni wamwinkisha Benjamin wading mwanikanch yakudia yivud kusutamu yayinkishay anamakwend akwau. (Dis. 43:33, 34) Pakwez kwikil uman umekeshina anch anamakwend amwovila Benjamin mukau. Pa ndond pa kusal mwamu, amekesha anch amubangidin mwanamakwau ni tatukwau Jakob. (Dis. 44:30-34) Mulong anamakwend a Josef ading alikin kal mukau, atwisha kuchirish chisambu mu dijuku diau. (Dis. 45:4, 15) Chilik chimwing, anch twadiosh yovil yawonsu ya mukau, tukutwish kukwash kulam chisambu mu dijuku dietu ni mu chikumangen. Yehova ukatin anch turishikish ris ni tukasikesh chisambu. anch twakudish kwikepish, kusanger yitukweta ni kujikitish, tukwikalap ni ris. w20.02 19 par. 17-18

Mutapu umwing wa kumekesh kujikitish mulong wa rukat ra Yehova udi kusutil kwambamb nend mu malembil. Rukat rey mulong wa Nzamb rikudandamen kujimb piumulejina piur pa milong yey ni kumujikitish mulong wa yom yawonsu yikusadidinay. Ni urund udia pakach peyey ni Yehova ukukasikan chisu umena mutapu wakwilay ku malembil mey. Ukwikal nich kashinsh anch ukuteshin. Pakwez mulong wa kumusejin Yehova piswimp, ufanyidin kwijik mutapu wend wa kutong. Ni ufanyidin kwijik yom yikatinay anch usala. Mutapu umwing kusu ukukukwasha kwak ronganyin riner udi kusutil kwilej Dizu diend, Bibil. Chawiy ileja kudikwat nich usey. Ching kusu Bibil ndiy ukweta uyakin piur pa Yehova ni piur pa yom yitonginay kusal mulong weyey. Ukutwish kumekesh anch umukwatin Bibil nich usey kusutil kumutang dichuku diawonsu, kusutil kurijek dilejan diey dia Bibil ukata kwilej ni mulej wey, ni kusadin yom wilejina. (Kus. 119:97, 99; Yoh. 17:17) Ov, ukweting program wa pakampwil wa kutang Bibil? Ov, ukat kulimish program winou, ni kwikal nich kashinsh anch ukat kutang Bibil dichuku diawonsu? w20.03 5 par. 8-9

Anch utwishinap kwend nakash, ukutwish kushakam pa ndond yidia antu avud mulong wa kulejan kudi antu asutina. Ap kand ukutwish kupan uman wa chikashimwish, kufund mikand, ap kulejan kusutin telefon. In kulejan avud akad kutwish kulejan ku chikumbu ni chikumbu mulong wa mayej ap milong yikwau, akutwish kwikal ni musangar kusutil milad yiney ya kulejan. Chikalap nchik mayej, ukutwish kuwanyish nawamp mudimu wey wa win Kristu. Paul walonda anch: ‘Mulong wa yom yawonsu nikwet usu kusutil ndiy ukata kwingikish ukash.’ (Fil. 4:13) Paul wading ni kuswir kwa usu winou chisu chayelay mu weny wend umwing wa umishoner. Wayileja in Galatia anch: “Mulong nayela, pawiy pinamana chisu cha kukurumburilany rusangu ruwamp.” (Gal. 4:13) Chilik chimwing, mayej uyedina makutwish kukwinkish mitapu ya kulejan rusangu ruwamp kudi antu akwau mudi adokter, amingang, ni in kulam ayej. Avud pakach pau ading ku midimu pakatau kuya in kulejan ku yikumbu yau. w19.04 4-5 par. 10-11

Mu muvu wa 2018, in kulejan a rusangu ruwamp 223000 ni kusut ading ashich mu jingand mukangeshinau mijikit yetu ya mu spiritu yimwing ap yawonsu. Chinech chitukashimwishinap. In Kristu akin ij anch akuyizengol. Chikalap nchik ndond tushicha, antakel a ngand akutwish kutukangesh kumwifukwil Yehova Nzamb wetu wa rukat kapamp kamwing pakad kutongin. Anch mburamatad wakangesh difukwil dietu, tukutwish pamwing ap kutong anch tukwetap dilau dia Nzamb. Pakwez ijik anch rupompat rirumburikinap anch Yehova katukatinap. Chinshikin chilakej cha kambuy Paul. Nzamb wading umukatin chakin kamu. Wikala ni dilau dia kufund mikand 14 pakach pa mifund ya Grek ya win Kristu, ni wading kambuy wa michid. Ap mwamu, warisha ni rupompat rikash. (2 Kor. 11:23-27) Kusutin yom yamushikena kambuy Paul twilejin anch Yehova ukat kulikidil atushalapol end ashinshamena ayipompata. w19.07 8 par. 1, 3

Mutapu umwing wa rukat umekeshina anch Yehova utubangidin mudi atushalapol end udi kusutil kutukwash kuyipandikan akankuny netu. Satan nau ayilembil adi akankuny netu ajim. Yehova utubabeshin piur pa akankuny inay ni utwinkishin yom tuswirikedina mulong wa kuyipandikan. (Efes 6:10-13) Anch twitiy ukwash wa Yehova ni twamuchingejin ni muchim wetu wawonsu, tukutwish kumuwin Djabul. Niyetu tukutwish kwikal nich kashinsh mudi kadingay nich kambuy Paul. Wafunda anch: “Anch Nzamb udi ni yetwetu, ov, nany ukutwisha kutupompat?” (Rom 8:31) Mulong tudi in Kristu akin, tukatap kumushinshikin Satan ni ayilembil end. Tukat kushinshikin nakash piur pa kwilej mulong wa Yehova ni kumusadin. (Kus. 25:5) Ap mwamu, tufanyidin kwijik jinjil jijim jisadidinay Satan. Mulong wak? Mulong pikil watudimb.—2 Kor. 2:11. w19.04 20 par. 1-2

Chisu tudia ni muntu unenganena, ov, tuding in kutesh awamp? Chitin yom yivud kusutamu kusu kwau kushakam zong pakad kulond chom. Tukutwish kwitek pa ndond ya antu akwau ni kumekesh ranaken chisu tuyiteshina. Yisu yimwing, kusadin nich nkeu mazu mamekeshina ushon kukutwish kumekesh mutapu twiyovila. Ukutwish kulond anch: “Niyovil nayimp nakash mulong wa yom yakushikenang!” Pamwing ap ukutwish kumwipul chipul chimwing ap yaad mulong ikal ni kashinsh anch uteshin yom yikulejinay murund winou wovila kusansan. Ukutwish kumwipul anch: “Dises amboku, ov ukutwish kwinrumburil nawamp mazu minam?” ap kand anch: “Pawalondang anch . . . , am novang mudi yirumburikin anch . . . Ov mwawiy?” Mazu ma rukat mudi minam makutwish kumwinkish muntu kashinsh anch umuteshin nawamp. (1 Kor. 13:4, 7) Babal chakwel ‘kangal waswakal kulond.’ Kangal wamukaturij muntu palondinay ap kuswimp yom yilondinay. Shimpish muchim! Pa ndond pa kupakish kuyilej mutapu wa kupwish mulong wau, tufanyidin kwitek pa ndond yau, ni kuyimekeshin ranaken.—1 Pita 3:8. w19.05 17-18 par. 15-17

Mu dijuku, ikundj ufanyidin kumukat mukajend ‘mudi mukat kusalay Kristu piur pa chikumangen.’ (Efes 5:28, 29) Ikundj ufanyidin kwimburij rukat rakin ra Kristu kusutil kutek maswir ma mukajend pa ndond ya kusambish. Amakundj amwing amening anch chiyikasikedining kumekesh rukat mudi riner, pamwing ap mulong kapaminap kwi ndond yikatau kuyisadin antu akwau mu mutapu uwamp nich rukat. Chikutwish kuyikasiken kulik yaku yiney yiyimp, pakwez afanyidin kuswimp mulong wa kuziyin ku chijil cha Kristu. Ikundj ukata kumekesh rukat rakin, akat kumulimish kudi mukajend. Tatuku uyikatina chakin kamu anend kafanyidinap kuyinenganesh ap kuyiswidiosh kusutil yom yilondinay ap yisadinay. (Efes 4:31) Pakwez ukat kumekesh rukat rend kusutil mutapu uyisadidinay anend chakwel iyova anch adi mu diking. Tatuku ukata kusal mwamu akat kumukat ni kumuchingejin kudi anend. w19.05 6 par. 21

Mazu ma Gabriel mading marumburikin ik kudi Mariy? Ov, ndiy watonga anch mazu ma Gabriel marumburikin anch Yesu ukumuswinkan Mwant Herod—ap kumuswinkan umwing wa ant amuswinkana mwant Herod mu Isarel? Anch Yesu wikala Mwant, ing Mariy wafanyina kwikal makwend a Mwant, ni dijuku diend diafanyina kushakam mu chipang cha want. Pakwez kandikal tutangap anch Mariy wita ndond ya piur mu want. Mariy wading mband wikepishina! El tuvurikany anch chitongijok chetu chijim cha kwilej Dizu dia Nzamb ni mikand yetu ya win Kristu chidi cha kusej piswimp ni Yehova. Tukatin kand kwiman nawamp anch tudi ‘antu a mutapu ik’ ni yom ik tufanyidina kuswimp mulong wa kumusangaresh Nzamb. (Jak. 1:22-25; 4:8) Chisu chawonsu kurutu kwa kusambish kwilej, tufanyidin kwit ukwash wa spiritu wa Yehova. Tufanyidin kumwit chakwel atukwasha kutaninamu nakash mu yom twilejina ni kujingunin yom tufanyidina kuswimp. w19.05 31 par. 18-19

Yisu yimwing, tukutwish kurish ni yakamish yivud pa chisu chawiy chimwing. Shinshikin yilakej yidia kwinshin oku. Kaman utazukinau anch John, uyedina mayej matazukinau anch sclérose waziya nakash chisu chamulikau kudi mukajend kupwa kwa kusal mivu 19 ya uruw. Kupwa anend amband aad alika kumusadin Yehova. Bob ni mukajend Linda arisha ni milong kushalijan. Awonsu aad ashadisha midimu ni ashadisha chikumbu chau. Kupwa kwa yiney, Linda amuleja kudi dokter anch ukwet mayej ma rudung makutwisha kumujip, ni mayej makwau masambisha kuyipish usu ukata kuchidij mujimbu (système immunitaire). Tukutwish kwikal nich kashinsh anch Sakatang wetu Yehova Tatukwetu udia mwiur wij nawamp mutapu twiyovila chisu turishina nich yakamish. Ni ukatin kutukwash kurish nich yakamish yiney. (Fil. 4:6, 7) Dizu dia Nzamb dikwet jinsangu jilejena yakamish yarishau nich atushalapol a Nzamb. Dilejen kand mutapu wayikwashau kudi Yehova kurish ni yakamish yiney. w19.06 14 par. 2-3

Anch twamusadin muntu wafishang mbay nend wa uruw yom yiwamp, tumekeshin anch tumukatin chakin kamu. Mu chisu cha mutapu winou akweting kuswir kwa arund awamp. Mutapu ik ukutwisha kumekesh anch udi murund nau? Ukutwish kuyitazuk kwol kwey mulong wa kudia nau pamwing. Ni ukutwish kand kusutish nau chisu pamwing mu kwipuwangej ap mu mudimu wa kulejan. Ukutwish kand kuyitazuk chakwel usalany nau pamwing difukwil dia mu dijuku dien. Anch wasal mwamu ukumusangaresh Yehova, mulong udi “piswimp nau awiy akweta michim yinenganena” ni udi “mwin kuyichidij adiaafu.” (Kus. 34:19; 68:6) Piswimp ap, pakuyikela Want wa Nzamb divu dined, “mar [mawonsu] makez kapwa, ni kumavuramen.” Tuchingedin nich kushimpish muchim chisu chikuwanyina mazu malondina anch: “Yom yawonsu ya pakur akez kayivuramen.” (Isay 65:16, 17) Kusambish katat, el tukwashijanany muntu ni mukwau ni kumekesh kusutil mazu ni yisal yetu anch tuyikatin akadivar nau anambaz netu.—1 Pita 3:8. w19.06 25 par. 18-19

Mu mivu yivud yasutina ey, Chinong cha Kalam chalonda anch: “Antu amwija Nzamb nawamp akumuchingejin ndiy nakash pa chisu cha yakamish.” Mazu minam madi kamu makin! Mulong wa kujijaman anch atuzengol, tufanyidin kumukat Yehova ni kumuchingejin nakash. (Mat. 22:36-38; Jak. 5:11) Tang Bibil dichuku diawonsu ni chitongijok cha kukasikesh urund wey ni Yehova. (Jak. 4:8) Pautangina Bibil, shinshikin pa mikadil yiwamp ya Yehova. Sal usu wa kujingunin mutapu ukukatinay chisu utangina piur pa yom yilondinay ni yisadinay. (Kub. 34:6) Antu amwing akutwish kuman anch chikasiken kuyikat kudi Nzamb mulong kwikil muntu ap umwing wayikatap kal. Anch wawiy mutapu wiyovila, sal usu wa kushinshikin dichuku diawonsu mulong wa kuman mitapu yikumekeshidinay Yehova ranaken ni kukulikishin. (Kus. 78:38, 39; Rom 8:32) Anch washinshikin pa yom yiwamp yishikedina mu mwom wey, ni kutongijokin pa yom utangina mu Dizu dia Nzamb, ukutwish amwiney kuman yom yivud yasadinay kal Yehova mulong weyey. Anch wadandamen kusanger nakash yom yisadinay Yehova, urund wey ni Yehova ukuwap nakash.—Kus. 116:1, 2. w19.07 2-3 par. 4-5

Yehova katwinkishinap mbil ya kuyikwatin antu akwau mipak. Muntu uyitekidina akadivar nend mbil jakad usey kayichidijinap, pakwez uyikedin ritiy ra akadivar nend. Satan Djabul ukudandamen kusal usu wa kuyizengol atushalapol ashinshamena a Yehova. (1 Pita 5:8; Kuj. 2:10) Satan nau antu end akusal usu wa kukangesh difukwil dia Yehova. Pakwez ap anch atwovishap nchik wom, tukwimikap kumusadin Yehova! (Kuv. 7:21) Yehova udi ku mutambu wetu ni ukudandamen kutukwash ap anch mudimu wetu aukangesh. (2 Jsng. 32:7, 8) El tukwat niyetu mupak mudi wadingau nich akadivar a mu mivu chitot ya kusambish ayakula antakel a mu chirung chau anch: “Tongany ayinen anch chitentamin kurutu kwa Nzamb kukuziyilany en kupandakanamu kumuziyil Nzamb. Mulong etu kitukutwishap kulik kulond yom yitwamana ni yitwatesha ayinetu.”—Mid. 4:19, 20. w19.07 13 par. 18-20

Chisu tulejena, tufanyidin kusal usu wa kwijik mulong wak antu tutanina mu mudimu wa kulejan iyovil mwamu. Kambuy Paul wapamina pakach pa in Yuda. Chakin kamu ndiy wasala usu chakwel mudimu wend wa kulejan ukwatijana ni yaku ya Akamichid ading ija yom yikemp ap akad kwijik chom piur pa Yehova ni piur pa Bibil. Tufanyidin kukimbijol chakwel twijik nawamp mutapu utonginingau ni wiyovilingau antu a mu teritwar wetu. (1 Kor. 9:20-23) Chitongijok chetu chidi cha kuyitan antu ‘awanyidina.’ (Mat. 10:11) Mulong wa kutan yibudikin yiwamp, tufanyidin kuyipul antu yom yitonginau ni kuyitesh nawamp. Mukadivar umwing wa mu Angleterre ukat kuyipulang antu piur pa yom yitonginingau pa mutapu wa kwikal ni uruw usangareshina, mutapu wa kulil an, ni mutapu wa kurish ni kuburen kutentam. Kupwa kwa kutesh yitongijok yau, ukat kuyipul anch: “Utonginany nchik piur pa chiyul ech chafundau kwasutin kal mivu piswimp 2000?” Kupwa, pakad kujimbul “Bibil,” uyilejining mazu ma maverse matondangay kal nawamp mu telefon wend. w19.07 21-22 par. 7-8

Ov, tufanyidin kumukat Nzamb mu chilik ik? Yesu wakula ku chipul chinech chisu chamulejay Mufaris umwing anch: “Mukata [Yehova] Nzamb wey nich muchim wey wawonsu, ni mupim wey wawonsu, ni manangu mey mawonsu.” (Mat. 22:36, 37) Tukatin kumukat Yehova nich muchim wetu wawonsu. Ni tukatin kand kujimbish pichuku pichuku rukat retu mulong wendendiy. Mulong wa kumukat Nzamb, tufanyidin bil kumwijik. Bibil ulondin anch: “Ndiy wakad kukatan kamwijip Nzamb; mulong Nzamb udi rukat.” (1 Yoh. 4:8) Paul wamekesha anch rukat retu mulong wa Nzamb rikutwish kujimb anch twak ‘ronganyin rakin ni kujingunin kwawonsu’ piur pend. (Fil. 1:9) Chisu twasambisha kwilej Bibil, twasambisha kumukat Yehova ap anch twadingap twija yom yivud piur pa mikadil yend yipandakena kuwap. Chawiy chitwadandamena kwilej piur pa Yehova rukat retu mulong wendendiy rajimba. Diawiy diyingishin disadina anch dilejan dietu dia Bibil dia pichuku pichuku ni kutongijokin pa Dizu dia Nzamb yikala pakach pa yom ya usey nakash mu mwom wetu!—Fil. 2:16. w19.08 9 par. 4-5

Anch udi muchisend chisu, ukwet kuswir kwa kwikal nau arund asu. Vurik anch mulong wa kwikal nau arund, ufanyidin amwiney kwikal murund muwamp. Isambina pa yiyukish yakwinkishay Yehova, ni sal anch arund ney akumana anch ukwet musangar mu mudimu wa Yehova. Anch wimika chisend chey mulong wa mayej ma mbay ney wa uruw, kangal wasambish kumufish nich. Chikwau kand, anch yeya amwiney uyedina, kangal wifish nich ap kutong anch yeya wamukangesha kal mbay ney kudandamen ni chisend chend. Vurik anch udiany “mujimbu umwing,” ni wachipanya kurutu kwa Yehova anch ukubangijadinany umwing ni mukwau chikalap nchik yom yikushikena. (Mat. 19:5, 6) Anch wimikany chisend chen mulong wa madikaj makad kuchingejin, mulejany mwanen anch ukwet usey nakash kusutamusend chiwadinganya nich. Mulejany mwanen chisu chawonsu anch umukwatilany mudi “chiyukish” chidiokila kudi Nzamb. (Kus. 127:3-5) Kupwa, mulejany piur pa yom yiwamp watananya mu mudimu wa chisu chawonsu. Kusal mwamu kwawiy kukumukwasha mwanen chakwel amusadina Yehova mu mudimu wa chisu chawonsu mudi muwasalanya en. w19.08 22 par. 10-11

Babilon Mujim, charumburik anch ditenchik dia pa mangand mawonsu dia relijon wa makasu wapwishikishin kal kalimish ka dijin dia Nzamb. Ukat kufundish makasu piur pa dijin dia Nzamb. Mudi mband mwin kusochik, relijon wa makasu walikin kal kwikal ushinshamena kudi Yehova kusutil kukwash maguvernema ma antu. Ukat kusadin usu ukwetay mulong wa kuyizengol antu end ni kuyiy nfalang. Ni wajipin kal antu avud nakash kuwejinaku ni atushalapol a Nzamb. (Kuj. 18:24; 19:2) Yehova ukumushesh “mband mwin kusochik nakash” kusutil “misengu dikum” ya “nnam usuz wa [chidiany].” Nnam wa chidiany winou wa chifanakesh umekeshin Nations unies. Miseng dikum yimekeshin maguvernema makwashina ditenchik dined. Pa chisu chatenchikay kal Nzamb, maguvernema minam makumurishikish Babilon Mujim. “Akez kumubuu yom yawonsu, amusha kanzikis” kusutil kumutambul mapit mawonsu ni kumekesh uyimp wend patok. (Kuj. 17:3, 16) Kusheshik kwinoku kukez kasadik mau mau nakash—kukumekan mudi kwasadikang kwau mu dichuku dimwing. Chawiy, awonsu ading amukwashina akez kanenganan nakash pakampwil, mulong wad kwibaz ni kulond anch: “Kinikez kudilap rufu, bwat!”—Kuj. 18:7, 8. w19.09 10 par. 10-11

Yesu wamutazuka muntu win mwawonsu kwez kudi ndiy ni ukumwak chakin kamu muntu mwawonsu ukatina kumusadin Nzamb. (Yoh. 6:37, 38) In kwilej a Kristu awonsu akwet dilau dia kusal mudimu wamwinkishau Yesu kusal kudi Yehova. Tukutwish kwikal nich kashinsh anch Yesu ukwikal netu mulong wa kutukwash kusal mudimu winou. (Mat. 28:18-20) Antu ikepishina awiy amusejina Yesu. (Mat. 19:13, 14; Luka 7:37, 38) Mulong wak? El tushinshikinany kushalijan kudia pakach pa Yesu nau Afaris. Antakel inay a chirelijon kadingap ni rukat ni ading in kwitutul. (Mat. 12:9-14) Yesu wading ni rukat ni wikepishina. Afaris awiy ading akatin kwijikan nakash ni in kwitutul mulong wa maz yau ya piur yadingau nich. Yesu walonda anch chadingap chiwamp kwikal ni mikadil yiyimp mudi yiney ni wayifundisha in kwilejend kwikal antu ikepishina ni in kuyisadin antu akwau. (Mat. 23:2, 6-11) Afaris ayiyikelang antu akwau ni kuyovish wom piur pa yom yikuyishikena anch ayibwambwil. (Yoh. 9:13, 22) Yesu wayikasikesha antu akwau kusutil yisalijok yiwamp ni mazu ma rukat. Ov, niyey wilejidinap kal malejan minam kudi Yesu? w19.09 20 par. 1; 21 par. 7-8; 23 par. 9

Yikumangan yikat kutukwash kumusejin Yehova piswimp. Kwikal ni chaku cha kukumangan kumekeshin anch tukutwish kujijaman anch atuzengol machuku ma kurutu. (Heb. 10:24, 25) Mulong wak tulondina mwamu? Anch twitiy anch tumilong tukemp tukemp tutukangesh kukumangan, yom ik yikutushikena mu machuku ma kurutu anch chit kutek mwom yetu mu ubaj mulong wa kukumangan pamwing nau akadivar nau anambaz netu? Chawiy, anch twakwat mupak wa kukumanganang, tukutwishap kwimik kusal mwamu anch akankuny netu asal usu wa kutukangesh kukumangan. Chinech chawiy chisu cha kukudish rukat mulong wa yikumangan yetu. Anch twakat yikumangan, kwikil rupompat, ap guvernema ukutwisha kutukangesh kuziyin kudi Nzamb. (Mid. 5:29) Lam mu manangu maverse ukatining. (Mat. 13:52) Manangu mey madiap mawanyidina, pakwez Yehova ukutwish kusadin usu wa spiritu wend mulong wa kukuvurish maverse minam. (Yoh. 14:26) Maverse minam makutwish kukukwash kushal piswimp ni Yehova—ni kujijaman nich kushinshaman. w19.07 3 par. 5; 4 par. 8-9

Ov, wavadika kupwa kwa muvu wa 1914? Anch mwawiy, mwom wey wawonsu uusutishidin mu “machuku ma kwinsudiel” ma mangand minam. Etu awonsu tukat kutesh piur pa yinship yatakelay kulejan Yesu piur pa chirung chetu. Mu yinship yiney mudi jinjit, kamungun, kuzal kwa divu, yipupu, kuvulijan kwa uyimp, ni kuyizengol atushalapol a Yehova. (Mat. 24:3, 7-9, 12; Luka 21:10-12) Tukat kuman kand antu akweta mikadil mudi yasambelay kulejan kambuy Paul. Mulong tudi atushalapol a Yehova, tukwet kashinsh anch tushich kwinsudiel kwa “machuku ma kwinsudiel.” (Mike 4:1) Mulong kwasut kal mivu yivud nakash kudiokal mu muvu wa 1914, tufanyidin katat kwikal kwinsudiel kwa “machuku ma kwinsudiel.” Mulong disudiel didi piswimp nakash, tukwet kuswir kwa kutan yakul ku yipul yimwing ya usey mudi: Yinship ik yikusadika kwinsudiel kwa “machuku ma kwinsudiel”? Ni yom ik yikatinay Yehova anch tusala chisu tuchingedina yinship yiney? w19.10 8 par. 1-2

Kujijaman kwetu kwimedinap kwau pa yisu yiwamp. Tukutwish kukasikesh kujijaman kwetu kusutil kumuchingejin Yehova. (Rom 12:12) Kushilamu kwa Yesu kudia mu mufund wa nlel kurumburikin anch tufanyidin kushal ashinshamena chikalap nchik yakamish turishina nich. Anch twajijamen yoziu yawonsu yitushikedina nlel, ritiy retu rikukasikan kurutu mar makash masambish. Mudi kujijaman, kutakaman kwakin kwimedining pa kumuchingejin Yehova. Mutapu ik tukutwisha kwilej kumuchingejin Yehova nakash? Kusutil kutang dizu dien dichuku diawonsu ni kutongijokin pa mutapu Yehova wayipandishay antwend pakur. (Kus. 68:20; 2 Pita 2:9) Chisu chikuturishikishau kudi michid chisu cha mar makash, tukwikal ni kuswir kwa kutakaman ni kumuchingejin Yehova nakash kusutamu pakur. (Kus. 112:7, 8; Heb. 13:6) Anch twamuchingejin Yehova nlel, tukwikal nich kutakaman tukweta nich kuswir mulong wa kujijamen rupompat ra Gog. Tukwet kashinsh anch tukutwish kwikal achidijinau mwi mpwembu ya rukat ya Yehova.—1 Kor. 13:8. w19.10 18 par. 15-16

Djabul ndiy uyikedila mangand minam, ni ukat kumasadin mulong wa kutubachik kutek pa ndond ya kusambish maswir ma ku mujimbu ni kusal anch chitukasiken kwipuk maku metu mayimp. (Efes 2:1-3) Chitongijok chend chidi cha kutubachik chakwel tukat nakash yom yindj pa ndond pa kumukat nakash ching kusu Yehova. Kupwa kwa kufund piur pa disudiel dia mangand ma Satan ni piur pa ngand yisu yezila, kambuy Pita walonda anch: “Arund nam, piuchingedilany dichuku dined, salany usu wa kwikal zwang wakad kufa nich kurutu kwa Nzamb, ikalany nich chisambu pakach penen nend ndiy.” (2 Pit. 3:14) Anch twaziyin ku chiyul chinech ni twasal usu wa kushal ishitwila mu mwikadil wetu ni mu spiritu, tumekeshin anch twipanin ching kusu kudi Yehova. Satan ni mangand mend akudandamen kutubachik chakwel tutek pa ndond yakusambish mu mwom wetu yom yindj kusutamu Yehova. (Luka 4:13) Pakwez yikalap nchik yakamish turishina nich, tukwitiyap ap pakemp anch muntu ap chom chin chawonsu chisenda ndond ya Yehova mu muchim wetu. Tukwatin mupak wa kumwinkish Yehova yom yimuwanyidina ching kusu ndiy—kwipan ching kusu kudi ndiy! w19.10 26 par. 4; 31 par. 18-19

Yakamish yimwing yidi yiwamp. Chilakej, chidi chiwamp kwiyakamish piur pa kumusangaresh Yehova ni Yesu. (1 Kor. 7:32) Anch twasal chitil chikash, tukat kwiyakamish mulong wa kuwapish urund wetu ni Nzamb. Tukat kwiyakamish kand mulong wa kumusangaresh mbay netu wa uruw ni mulong wa kulam nawamp dijuku dietu ni ambay netu mu ritiy. (1 Kor. 7:33; 2 Kor. 11:28) Ku mutambu ukwau, yakamish yipandikena yikutwish kutubachik kusambish kwiyakamish chisu chawonsu piur pa kwikal ni yakudia ni yidjal yivud. (Mat. 6:31, 32) Mulong wa kukepish yakamish yiney, tukutwish kusambish kushinshikin nakash pa kwikal ni yom yivud ya ku mujimbu. Tukutwish ap kukudish rukat ra nfalang. Anch twalikidil anch yom yiney yishiken, ritiy retu kudi Yehova rikuziy ni urund wetu ni ndiy ukuyip. (Mar. 4:19; 1 Tim. 6:10) Ap tukutwish kusambish kwiyakamish nakash piur pa mutapu utonginau antu akwau piur petu. Tukutwish chad kwov wom wa kutwovish usany ap kutuzengol kudi antu pa ndond pa kwov wom wa kumunenganesh Yehova. Mulong wa kwichidij ayinetu ku ubaj winou, tufanyidin kumwilembil Yehova chakwel atwinkish ritiy ni kutakaman tukweta nich kuswir mulong wa kurish ni mulong winou.—Jnsw. 29:25; Luka 17:5. w19.11 15 par. 6-7

Mipak yimwing ya usey nakash tufanyidinap kuyiswimp. Chilakej, tulamatin ba ku mupak wetu wa kumusadin Yehova, ni tukwatin mupak wa kudandamen kwikal ashinshamena kudi mbay netu wa uruw. (Mat. 16:24; 19:6) Pakwez mipak yikwau tukutwish kuyiswimp. Mulong wak? Mulong mashakamin makat kuswimp. Nzau ik jikutwisha kutukwash kukwat mipak yiwamp? Lembil mulong wa kwit manangu. Mu chilik kanang etu awonsu tukat “[kuburen] manangu.” Chawiy mukungamena Yehova chisu ukwatina mupak ni chisu ukweta kuswir kwa kuuswimp. Kupwa Yehova ukukukwash kukwat mipak ya manangu. Kimbijol chikurikina. Shinshikin Dizu dia Nzamb, tang mikand yibudishinau kudi dirijek dia Yehova, ni ambamb ni antu auchingejidina. (Jnsw. 20:18) Kukimbijol mudi kwinoku kudi kwa usey nakash kurutu kwa kukwat mupak piur pa kuswimp mudimu, kushemunikin ndond kanang, ap mulong wa kutond shikol yikutwisha kukukwash kuwanyish maswir mey ni kudandamen kumusadin Yehova. w19.11 27 par. 6-8

Cha musangar, Nzamb watenchika mutapu wa kutukamunin, ap kutukwol ku chitil. Kukwolik kwinoku kutwishikin mulong wa Yesu. Mivu 700 ni kusut kurutu kwa Yesu kwez pa divu, muprofet Isay wasambela kulejan piur pa kukwolik kujim kwezina. Kukwolik kwinoku kujim kukuwanyish yom yivud nakash kusutamu yasadikang pa chisu cha Muvu wa Musangar mu Isarel. Wafunda anch: “Nsalejam [Yehova] wangizwisha ni [spiritu] wend. Wantonda, chad wantuma kutwal rusangu ruwamp kudi [ikepishina], ni kuyok akweta michim ya runeng, ni kuyilej ankwal rusangu ra kuyikwol.” (Isay 61:1) Uprofet winou wading umutadin nany? Uprofet winou wa usey piur pa kukwolik wasambisha kuwanyin kupwa kwa Yesu kusambish mudimu wend. Chisu chayay mu sinagog wa ku Nazaret, ul wend wa chivadik, Yesu wayitangina in Yuda ading akumanganang kal uprofet winou wa Isay ni walonda anch umutadin ndiy.—Luka 4:16-19. w19.12 9-10 par. 6-8

Mulong wa kujijaman chisu chituzengodinau tukwet kuswir kwa kutakaman. Anch wiyovil anch ukwetap mwikadil winou, yom ik ufanyidina kusal? Vurik anch kutakaman kwakin kwimediningap pa chimbu chey, usu ukweta ap pa ukaliweny wey. Shinshikin chilakej cha nsand David chisu chamurishikishay Goliat. Anch twamufanikesh David ni chitabu winou, ukuman anch David wading muntu mukemp, uziyina, ni wakad yom ya kurish nich njit. David wading uburedin ap mpak. Pakwez wading utakamen nakash. Nich kutakaman David waya mau kumurishikish chitabu winou. Mulong wak David wading nich kutakaman mwamu? Wading nich ruchingej rikash anch Yehova wading nend. (1 Sam. 17:37, 45-47) David kashinshikinap pa mutapu wading ujimbinay Goliat kumusutamu ndiy. Pakwez washinshikina pa mutapu wading ukepinay Goliat mu kumwilakej ni Yehova. Yom ik twilejidina ku rusangu riner? Tukutwish kwikal nich kutakaman anch twikal nich kashinsh anch Yehova udi netu ni anch tukwet kashinsh anch akankuny netu adi akemp nakash mu kuyifanikesh ni Nzamb wa Dikand diawonsu.—2 Jsng. 20:15; Kus. 16:8. w19.07 5 par. 11-13

Tishik, wading murund mwin Kristu uchingejidinau kudi kambuy Paul. (Mid. 20:4) Piswimp ni muvu wa 55 C.C., Paul wasangisha nfalang mulong wa kuyikwash in Kristu a ku Yudeya, ni chimeken anch wamwinkisha Tishik chisend chinech cha usey mulong wa kumukwash. (2 Kor. 8:18-20) Kupwa, chisu chadingay Paul mu rukan kapamp kakusambish ku Rom, Tishik wasala mudi muruu wend. Watwalang uruu ni mikand yikasikeshina ya Paul ku yikumangen ya mu Aziy. (Kol. 4:7-9) Tishik wadandamena kwikal murund wa kuchingejin wa Paul. (Tit. 3:12) Kadiap in Kristu awonsu ading akuchingejin mudi Tishik. Piswimp ni muvu wa 65 C.C., chisu chamutekau mu rukan kapamp ka kaad, Paul wafunda anch amakundj avud in Kristu mwi ngand ya Aziy amwiyepa, pamwingap mulong ading ovil wom wa in kuyipompat. (2 Tim. 1:15) Chinyim ni in Kristu inay, Paul wamuchingejina Tishik ni wamwinkisha chisend chikwau. (2 Tim. 4:12) Chakin kamu, Paul wasangera kwikal ni murund muwamp mudi Tishik. w20.01 10 par. 7-8

Pamwing ap ukat kwiyipul anch akuzizidil kal many nich spiritu utumbila. Anch mwawiy, tongijokin piur pa yipul yiney ya usey: Ov, ukwet impu yikash nakash ya kusal rusot ra Yehova? Ov, wiyovil anch ukwet mushiku wa pakampwil mu mudimu wa kulejan? Ov, udi mwin kwilej ukweta mushiku wa Dizu dia Nzamb ukatina kwilej piur pa ‘yom yikurikina ya Nzamb’? Ov, wiyovil anch Yehova ukat kukwinkish yibudikin yipandakena kuwap mu mudimu wa kulejan? Wiyovil anch ukwet chisend chijim cha kuyikwash antu akwau kwilej piur pa Yehova? Ov, ukwet uman umekeshina anch Yehova wakukwashin kal mu mitapu yivud nakash ya pakampwil mu mwom wey? Ang kwakul kwey kudi anch inge ku yipul yiney yawonsu, ov chirumburikin kamu anch akutazukin kuya mwiur? Bwat, kimwawiyap kwau. Mulong wak? Mulong atushalapol awonsu a Nzamb akutwish kwiyov mwamu. Chawiy, anch ukwetap kashinsh anch udi uzizidilau many nich spiritu utumbila, kwidjidjek mudi kwinoku kumekeshin anch udiap kwey uzizidilau many. Antu atazukinau kal kudi Yehova kakwiyipulangap anch adi azizidilau many ap bwat! Ijing! w20.01 23 par. 14