Ngond wa 5

Yom ik yikutwishau kusal anvaj mulong wa kuyikwash anau kwilej kumukat Yehova? Lembil chakwel Yehova akukwashmudi mutapu wasalay Manowa. Fundish kand kusutil chilakej chey. Yom ulondina yidi ya usey; pakwez yisal yey yikutwish kwikal ni chibachikin chikash padi mwaney. Tukwet kashinsh anch Josef ni Mariy ading chilakej chiwamp nakash kudi anau, kuwejinaku ni Yesu. Josef wasalang mudimu nakash mulong wa kuwanyish maswir ma dijuku diend. Kupwa kand, Josef wayikasikesha antu a mu dijuku diend kukat yom ya mu spiritu. (Kuv. 4:9, 10) Wayangang “muvu ni muvu” ni dijuku diend ku musamb wa Pasak ku Yerusalem. (Luka 2:41, 42) Pamwing ap atatuku amwing a mu chirung chend atongang anch chading chikasiken nakash kusal weny mudi winou ni dijuku dia kabuj, mulong chading chitin chisu chivud ni nfalang jivud. Pakwez, pakad kwidjidjek Josef wading ukwatin nich usey yom ya mu spiritu ni wayifundisha anend kusal mwamu. Mariy niyend wading wij nawamp Mifund. Pakad kwidjidjek, kusutil mazu ni yisal yend, wayifundisha anend kukat Dizu dia Nzamb. w19.12 24-25 par. 9-12

Tukat kuman uman umekeshina anch Yehova utukatin chisu tutongijokidina pa yom yasalay chisu chamubwambwilau kudi Adam. Chisu Adam chamubwambwilay Tatukwend wa mwiur, washadisha ndond yend mu dijuku dia Yehova dikweta musangar, ndiy nau anend. (Rom 5:12) Pakwez Yehova wakwata mupak wa kuyikwash an a Adam. Yehova wamupupa Adam, pakwez kayilikap an a Adam pakad ruchingej bwat. Washilamu pakad kulab anch antu aziyidina akuchirik kand mu dijuku diend. (Dis. 3:15; Rom 8:20, 21) Yehova watenchika yom yiney kusutil chakupesh cha difut dia Yesu, Mwanend kapokal. Kusutil kumupan Mwanend mulong wetwetu, Yehova wamekesha anch utukatin kamu nakash. (Yoh. 3:16) Udi Tatuku upandikena kuwap. Ukat kuteshang malembil metu ni kuwanyish maswir metu ma ku mujimbu ni ma mu spiritu. Ukat kutufumb ni kutukwash. Ukwet kand yiyukish yipandikena kuwap yitulamidinay mulong wa machuku ma kurutu. Chitusangareshin nakash pa kwijik anch Tatukwetu Yehova utukatin ni ukat kutubangin! w20.02 6 par. 16-17; 7 par. 20

Ov, wikadinap kal ni yakamish piur pa chom kanang? Pamwing ap wiyakamishin mulong wa yom yalondinau ap yasadinau antu akwau, ap kand wiyakamishin piur pa yom walondina ap wasadina. Chilakej, pamwing ap wasadin chitil ni wiyakamishin anch Yehova kakukulikishinap. Ni ukutwish kusambish kutong anch mulong niyakamishin nakash piur pa chom kanang, chimeken anch nikwetap ritiy rikash ni nidi muntu muyimp. Shinshikinaku yilakej yikemp ya mu Bibil. Ana, makwend a muprofet Samwel, wading mband mwin ritiy nakash. Pakwez wiyakamisha nakash chisu chamupompatau kudi muntu wa mu chikumbu chend. (1 Sam. 1:7) Kambuy Paul wading ni ritiy rikash, pakwez ‘wiyakamisha mulong wa yikumangen yawonsu.’ (2 Kor. 11:28) Mwant David niyend wading ni ritiy rikash, chawiy Yehova wamukata nakash. (Mid. 13:22) Ap mwamu, David wasala yitil yamushikija ku kwiyakamish nakash. (Kus. 38:4) Yehova wamukasikesha ni kumulembijek umwing ni umwing wa pakach pa antu inay. w20.02 20 par. 1-2

Kwipan kudi kumulembil Yehova nich kashinsh kawonsu ni kumulej anch ukusadin mwom wey mulong wa kumusadin chikupu. Anch wipan kudi Nzamb, ‘witun kal’ amwiney. Ukwikal chad wayen wa Yehova, ni dined didi dilau dijim nakash. (Rom 14:8) Anch wasal mwamu, ukat kumulej anch kusambish kamu katat, ukushinshikin pa kumusadin ndiy kadiap pa kwisangaresh amwiney. Kwipan kwey madi machip, kwawiy kulond anch kushilamu kwa usey nakash usadina kudi Nzamb. Yehova kakatap kutushindil kusal machip minam. Pakwez anch twachip, utuchingejidin chad chakwel tuwanyish machip metu. (Kus. 116:12, 14) Kwikil muntu mukwau ukata kwijik chisu ukupana mwom wey kudi Yehova. Pakwez dibatish disadikidining kurutu kwa antu avud, ni yisu yivud disadikidining ku yitentam. Anch watambul dibatish, umekeshin kudi antu akwau anch wipanin kal kudi Yehova. Chawiy dibatish dikat kuyijikish antu akwau anch umukatin Yehova Nzamb nich muchim wey wawonsu, mupim wawonsu, manangu mawonsu, ni usu wey wawonsu ni anch ukwatin mupak wa kumusadin chikupu.—Mar. 12:30. w20.03 9 par. 4-5

Satan ukat kurumbangesh chitongijok cha antu piur pa Yehova. Kupwa kwa rufu ra atwimbuy a Yesu, antu amwing afangang mu kan anch adi in Kristu asambisha kupalangesh mafundish ma makasu. (Mid. 20:29, 30) In kupumbok inay asambisha kurumbangesh dijin dia Nzamb umwing kusu wakin. Chilikej, alika kusadin dijin dia Nzamb mu makopi mau ma Bibil ni adiswinkesha ni yijiken mudi “Nsalejetu.” Padioshau dijin dia pakampwil dia Nzamb ni kuswinkeshap “Nsalejetu,” chayikasikena antu atangang Bibil kujingunin mutapu ushalijadinay Yehova ni “ansalej” akwau alejenau mu Mifund. (1 Kor. 8:5) Asadinang dizu dimwing, “Nsalejetu,” mulong wa kumujimbul Yehova ni Yesu, ni chinech chasala anch chiyikasiken antu kwijik anch Yehova ushalijadin ni Mwanend. (Yoh. 17:3) Kanrumbangesh kinak kading kakasikeshin mafundish ma Usatu—mafundish makad kwikal mu Dizu dia Nzamb. Mudi chibudikin, antu avud asambisha kwitiyij anch chikasiken kumwijik Nzamb. Minam madi makasu mudi ik!—Mid. 17:27. w19.06 5 par. 11

Mutapu umwing wa kuwanyish mudimu wetu wa win Kristu udi kusutil kuwapish ukaliweny wetu wa kusal mudimu wa kulejan. (Jnsw. 1:5; 1 Tim. 4:13, 15) Didi dilau dijim nakash mud ik dia kutwitiy kudi Yehova anch twikal ‘ambay a mudimu’ end! (1 Kor. 3:9) Anch ‘washinshikin pa yom yidia ya usey nakash’ ni kushinshikin pa mudimu wetu wa win Kristu, ‘ukumusadin Yehova nich musangar.’ (Fil. 1:10; Kus. 100:2) Mulong udi kashalapol wa Nzamb, ukutwish kwikal nich kashinsh anch ukukwinkish usu ukweta nich kuswir mulong wa kuwanyish mudimu wey wa win Kristu chikalap nchik milong urishina nich. (2 Kor. 4:1, 7; 6:4) Ap anch milong yey yisadin anch ulejana nakash ap pakemp, ukutwish ‘kwikal ni diyingishin dia kusangar’ anch wipan ni muchim wawonsu mu mudimu wey wa win Kristu. (Gal. 6:4) Anch uwanyishin nawamp mudimu wey wa win Kristu, umekeshin anch umukatin Yehova ni mutej ney. “Anch ey wasal mwamu ukez kwipandish ey amwiney pamwing nau antu akuteshila.”—1 Tim. 4:16. w19.04 6 par. 15; 7 par. 17

Njil yijim yisadidinay Satan nau ayilembil mulong wa kuyipumbul antu yidi kwambamb nau aspiritu ayimp. Antu akata kusal yom ya ayilembil akat kulond anch ijing ni akat kuman yom yakadiau antu kwijik ap kuman. Chilakej, amwing alondining anch akutwish kwijik yom ya kurutu kusutil kupong, ap kubwak kusutil atutumbu. Akwau akutwish kusal chimekana mudi ambambin nau antu afila kal. Amwing akat kusadin ulaj ap maji, ni akutwish kupakish kumulau muntu. Payipulau ant amwing mu jingand 18 ja mu Amérique Latine ni mu Caraïbes, atana anch muntu umwing pa antu asatu witiyijin mu maji, ulaj, ni avud itiyijin anch chitwishikin kwambamb ni aspiritu ayimp. Ipula kand antu akwau mu jingand 18 ja mu Afrik. Pakach pa antu ipulau, avud alonda anch itiyijin mu ulaj. Chakin kamu, chikalap nchik ndond tushicha, tufanyidin kwichidij ayinetu chakwel kangal twikal mu umwing nau ayilembil. w19.04 20-21 par. 3-4

Yehova Nzamb ukisin mitapu yawonsu ya chisum. (Kus. 5:4-6) Ukisin chipandikena kuyisal an nayimp kusutil yisal ya masandj—mulong chidi chisal chijondila nakash! Mulong tudi Atuman a Yehova, tukat kumwimburij Yehova ni tukisin nakash kuyisal an nayimp kusutil yisal ya masandj ni tukatap kwitiyij chisal chinech mu chikumangen cha win Kristu. (Rom 12:9) Chisal chin chawonsu cha kuyiyipish an kusutil yisal ya masandj chikwatijadinap ni “chijil cha Kristu”! (Gal. 6:2) Yom yawonsu yafundishay Yesu kusutil mazu ni chilakej chend, yimedin pa rukat ni yikasikeshin kutentam. Mulong in Kristu akin aziyidin ku chijil chinech, akat kuyisadin an mu mutapu uwamp chakwel iyova anch adi mu diking ni anch ayikatin kamu chakin. Pakwez kumuyipish mwan kusutil yisal ya masandj, chidi chisal cha choy ni chakad kutentam chimushikijina mwan ku kwiyov anch kwikil muntu umuchidijina ni umukatina. Cha ushon, udi mulong ujim uyishikedina ap in Kristu akin. Mulong wak? “Antu ayimp ni in makasu” akat kuvulijan ni amwing akutwish kupakish kwandam mu chikumangen. (2 Tim. 3:13, TMK) Diyingishin dikwau didi anch, antu amwing ading kumusadin Yehova pakur ashikedin ku kusal chitil cha kusangaresh maku mau ma masandj ni kuyiyipish an kusutil yisal ya masandj. w19.05 8 par. 1-3

Muntu uziyina nakash ukutwish kwiyov mudi kawanyidinap kumusejin Yehova mu malembil. Anch tukatin kumukasikesh muntu mudi winou, tufanyidin kulembil nend pamwing ni kujimbul dijin diend mu malembil. Tufanyidin kumulej Yehova anch akadivar ni anambaz awonsu mu chikumangen tumukatin muntu winou nakash. Tukutwish kumwit Yehova chakwel amukasikesh kashalapol wend ni kumwinkish chisambu. Malembil mudi minam makutwish kumukasikesh nakash mukadivar. Tong kurutu kwa kulond. Mazu mayimp makutwish kumutap muntu ku muchim. Mazu mawamp makutwish kumwok muntu. (Jnsw. 12:18) Chawiy mulembila Yehova chakwel akukwash kusadin mazu mawamp, makasikeshina ni mongojina. Vurik anch kwikil mazu makwau makweta usu nakash kusutamu mazu ma Yehova amwinend tutanina mu Bibil. (Heb. 4:12) Anch twayikasikesh antu akwau tuyikwashin kuvurik anch Yehova uyikatin. Ni tufanyidinap kuvuramen anch Yehova udi Nzamb wa kutentam. Yehova uyibangidin antu awonsu ayipishau ap anch kwikil muntu mukwau uyibangidina. Yehova umen yom yawonsu ni kakukanganyap kuyipup akayitil awonsu akad kukarumuk.—Kuch. 14:18. w19.05 18 par. 18; 19 par. 19, 21

Satan ukatin kutukangesh kumukat Yehova. Mulong wa kuwanyish chitongijok chend, Satan ukat kusal usu wa kuyipish mutapu wetu wa kutong, ni ukat kusal anch mutapu wetu wa kutong wikal mudi ukatinay ndiy. Ukat kusal usu wa kutudimb chakwel tumulondula ndiy mu kusadin maswir metu. (Kol. 2:4) Ov, tudi chakin kamu mu ubaj ukash wa kwikal apumbwilau kudi Satan? Mwaning, tudi mu ubaj! Vurik anch Paul kafundap kubabesh kudia mu mukand wa Kolosay 2:8 mulong wa antu akad kwitiyij. Wayifundina in Kristu ading azizidilau many nich spiritu utumbila. (Kol. 1:2, 5) In Kristu inay ading mu ubaj wa kwikal apumbwilau pa chisu chinicha, ni nlel niyetu tudi mu ubaj upandakena. (1 Kor. 10:12) Mulong wak? Satan amudjibula kal pansh ni usadin usu nakash wa kuyipumbul atushalapol ashinshamena a Nzamb. (Kuj. 12:9, 12, 17) Chikwau kand, tushich mu chirung chiyilau antu ayimp ni in makasu kurutu “mu kuyip ni mu kuyip nakash.”—2 Tim. 3:1, 13. w19.06 2 par. 1-2

Chisu chakimbau kumujip kudi mwant Mwad Jezabel, Elija wova wom nakash. Chawiy wachinina ku Berisheba. Waziya nakash, chawiy “ndiy wita rufu.” Yom ik yasala anch iyova mwamu? Elija wading muntu wakad kuwanyin, “wading muntu mudi etu.” (Jak. 5:17) Pamwing ap wiyova nayimp nakash mulong wa yakamish ni waziya nakash ku mujimbu. Chimeken anch Elija wading utongin anch usu wend wading usadinay mulong wa kukasikesh difukwil dishitwila wading wa chamwamu ni kwikil chom chading chiswimpina mu Isarel, ni wading utongin anch ndiy kwend kusu umwing wading udandamedina kumusadin Yehova. (1 Ant 18:3, 4, 13; 19:10, 14) Yehova wova kurumburik kwa yovil ya Elija, kamuswejenap mulong wamekesha mutapu wading wiyovilay. Pakwez, wamukwasha kwikal kand ni usu. (1 Ant 19:5-7) Kupwa, nich kudimuk, Yehova wamukwasha Elija kurijek mutapu wend wa kutong pamumekeshinay usu Wend upandakena. Yehova wamuleja kand anch kuchishadin antu 7000 mu Isarel ading alikina kumwifukwil Bal. (1 Ant 19:11-18) Kusutil yilakej yiney, Yehova wamekesha anch wading Umukatin Elija. w19.06 15-16 par. 5-6

Ipuk kudiul umutakel. Anch twalondul umutakel tutambwila kudi akadivar atutakedila, tukwipuk milong. Chilakej, mwi ngand yimwing mwading mukangeshinau mudimu wetu wa kulejan, amakurump ayileja in kulejan anch kafanyidinap kupan mikand ya kuchap mu mudimu wa kulejan. Pakwez mukadivar umwing chibol wadiula umutakel winou ni wasambisha kupan mikand. Chibudikin ik chikalaku? Chisu chikemp, papwishay nau akadivar akwau kupan uman wa chikashimwish, ayikwata kudi ampurij. Chimeken anch ampurij ading ayilondwil ni atambula mikand yawonsu yapanau. Rusangu riner ritufundishin ik? Tufanyidin kulondul umutakel ap anch tutongin anch twij yom yivud. Yehova ukudandamen kutuyukish chisu chawonsu anch twasal pamwing nau akadivar atonday kal mulong wa kututakel.—Heb. 13:7, 17. w19.07 12 par. 17

Uchuku winiwa kurutu Nsalejetu Yesu amujipa, walonda anch antu awonsu akwatina mupak wa kwikal in kwilejend akuyikis. (Yoh. 17:14) Kudiosh chisu chinicha djat ni nlel, in Kristu ashinshamena ayizengodin kal nakash kudi antu akata kupompat difukwil diakin. Mulong disudien dia mangand minam disejin piswimp, etu awonsu tuchingejin anch akankuny netu akutupompat nakash. (Mat. 24:9) Mutapu ik tukutwisha kwirijek kusambish katat mulong wa kujijaman anch atuzengol? Chidiap kwau cha usey kutongijokin pa yom yawonsu yiyimp yikutwisha kutushiken. Anch twasal mwamu tukutwish kwov wom nakash ni kwiyakamish. Anch twatong piur pa yom yawonsu yiyimp yikutwisha kutushiken, tukutwish kwov wom ni kulik kumusadin Yehova kurutu kuzengol kushika. (Jnsw. 12:25; 17:22) Wom udi ut wa usu nakash ukatay kusadin ‘mukankuny netu Sakudimban’ mulong wa kutwoz. (1 Pita 5:8, 9) Chawiy chidi cha usey kukasikesh urund wetu wa piswimp ni Yehova ni tufanyidin kusal mwamu kusambish kamu katat. w19.07 2 par. 1-3

Atwimbuy iyova kwikal akasikeshinau chisu chakumanganau ku mukandu. Kupwa kwa divumbuk diend, Yesu wayileja chakwel atanijan nend ku mukandu kwinikwa. (Mat. 28:16) Pamwing ap chawiy chisu “[chamekanay] kapamp kamwing kudi in kwitiyij yitot yitan ni kusut.” (1 Kor. 15:6) Mulong wak Yesu wayitazuka in kwilejend chakwel atanijan nend kwinikwa? Chading mulong wa kuyinkish mbil yisangareshina yilondina anch: ‘Yangany kudi antu a michid yawonsu, yikadishany in kwilejam.’ (Mat. 28:18-20) In kwilej awonsu atesha mazu ma Yesu ikala mu chikumangen cha win Kristu cha mu mivu chitot ya kusambish. Chisend cha pakampwil cha chikumangen chinicha chading cha kwikadish antu avud in kwilej a Kristu. Nlel unou pa mangand mawonsu padi yikumangen yivud nakash ya in Kristu akin, ni chisend cha pakampwil cha yikumangen yiney yawonsu chidi cha kuyikadish antu in kwilej. w19.07 14 par. 1-2

Kalam umwing wa munyingumuku wa mwi ngand ya Norvège ulondin anch antu avud akisining kwisambin piur pa Nzamb, yisu yivud akatining kuyilej piur pa yom yisadikina mu mangand. Kupwa kwa kuyilangwish antu, ukat kuyipul anch: “Utongin nchik piur pa mashakamin metu mu machuku ma kurutu ma kwikala mawamp? Ov, ruchingej retu riwamp, rimedin pa antu a chipolitik, pa in siyans, anch pa muntu kanang?” Kupwa kwa kumutesh nawamp, ukat kutang ap kujimbul verse ulejena ruchingej ripandikena kuwap tukweta. Amwing pakach pau akat kusanger nakash kushilamu kwa Bibil kulejena anch divu dikushal kamu chikupu ni in kutentam akushakam chikupu. (Kus. 37:29; Mul. 1:4) Tufanyidin kusadin milad kushalijan kukwatijan nau antu tusankena. Mulong wak? Mulong yom yikutwisha kumusangaresh muntu umwing pamwing ap yikutwish kumukisish muntu mukwau. Antu amwing akatining kwambamb nau piur pa Nzamb ap piur pa Bibil, pakwez akwau akatining kusambish bil ni nsangu jindj. Mu mikadil yawonsu yiney, tufanyidin kusal usu wa kwambamb nau antu a mitapu yawonsu. (Rom 1:14-16) Yehova ndiy ukata kukudish uyakin mu michim ya antu akatina kutentam.—1 Kor. 3:6, 7. w19.07 22-23 par. 10-11

Rukat rijim ra Nzamb mulong wetwetu rikutubachik kuyikat akadivar netu. (1 Yoh. 4:20, 21) Tukutwish kutong anch chikutuswapel kuyikat akadivar nau anambaz netu. Chidi mwamu mulong tumwifukwidil Yehova ni twikasikeshin kwimburij mikadil yend yiwamp. Tulondwil chilakej cha Yesu, wading ni rukat rijim ramubachika kupan mwom wend mulong wetwetu. Pakwez, yisu yimwing tukutwish kuman anch chikasiken kuziyin ku chijil cha kukatijan umwing ni mukwau. Evodiy ni Sintik ading anambaz akweta mushiku asala mudimu “pamwing” ni kambuy Paul. Pakwez, pamwing ap kwikala kupwitamijan pakach pau ni chinech chasala anch alik kovijan. Mu mukand wend wafunday ku chikumangen chadingau anambaz inay, Paul wamujimbula Evodiy ni Sintik ni wayinkisha yiyul ya patok chakwel “ovijana.” (Fil. 4:2, 3) Paul watonga kand anch chading cha usey kuchilej chikumangen chawonsu anch: “Piukusalanya yom yawonsu, salany wakad kwinan ap wakad kutadikijan.”—Fil. 2:14. w19.08 9 par. 6-7

Mu yikumangen yivud, akadivar nau anambaz akat kuyikwashang antu adia mu mudimu wa chisu chawonsu chakwel adandamena ni yisend yau. Akat kusal mwamu kusutil kuyikasikesh chakwel adandamen ni mudimu wau, akat kuyinkish nfalang ni yom yikwau ya ku mujimbu, ap kuyikwash anamakwau. Anch akadivar adia mu mudimu wa chisu chawonsu atambul chisend chisu cha kusadin mu chikumangen chey, kangal watong anch akanganyang kusal nawamp mudimu ap ayipupang. Pa ndond pa kutong mwamu, yikwasha chakwel ijidina mashakamin mau masu. Ufanyidin kuyak nich musangar wawonsu ni kuyijikitish mulong wa midimu yau yasalau, ap anch kakwetap kand usu wa kusal yom yivud mulong wa mayej. Ufanyidin kuyijik nawamp. Ilejina ku ronganyin rau, ku kufumb kwatambulau ni ku ukaliweny wau. Akadivar atambwila chisend chisu akutwish kwikal chakusambish nich kuswir kwa chikumbu, mutapu wa kushemunik (transport), kutan mudimu ap yom yikwau yikwikalau kand nich kuswir. w19.08 23 par. 12-13

Gog ukuchingejin mu “chikas [chend] cha mujimb[u] wa mbij”—amasalay end akweta usu. (2 Jsng. 32:8) Etu tukumuchingejin Yehova Nzamb wetu—kusal mwamu kukutwish kumekan mudi usup kudi michid. Mulong wak? Mulong Babilon Mujim wad ukwet usu, pakwez anzamb end katwishilap kumupandish kudiay “nnam wa [chidiany]” ni ku “miseng” yend! (Kuj. 17:16) Chawiy Gog ukutong anch chikumuswapel kutushesh. “Mudi ruvul mukash wa rinkind usutila mwi ngand,” mwawiy mukuyirishikishay atushalapol a Yehova. Pakwez, Gog ukujingunin pakad kulab anch wafa kal mu mupit. Mudi yom yamushikena Farao mu Karung Musuz, Gog ukujingunin anch urishin ni Yehova (Kub. 14:1-4; Ezek. 38:3, 4, 18, 21-23) Kristu pamwing ni amasalay end a mwiur akez kuyichidij antu a Nzamb ni kumushesh Gog ni amasalay end. (Kuj. 19:11, 14, 15) Pakwez, chikwikal nchik piur pa mukankuny mujim wa Yehova, Satan ukudimba michid ni kuyibachik chakwel yiyirishikisha antu a Nzamb kwi njit ja Harmagedon? Yesu ukumukas Satan nau ayilembil end ni ukuyidjibwil mu dibuku diakad musul mu mivu kanan.—Kuj. 20:1-3. w19.09 11-12 par. 14-15

Tukwet ruchingej mulong wa yom yiwamp yatukaninau kal kudi Yehova. Chawiy, anch yom tuchingejina yamekan mudi yilabin kuwanyin, tukutwish kushadish musangar wetu. Tukutwish kand ap kuziy. (Jnsw. 13:12) Yom yiney yayishikena akadivar amwing mu muvu wa 1914. Chisu chinicha, in Kristu avud azizidilau many ading achingejin kuya mwiur mu muvu wa 1914. Palika kuwanyin yom yiney, mutapu ik wasalau antu ashinshamena chisu chalika kuwanyin yom yading yichingejinau? Kaziyap mu kubambil kwau mulong wa mwom, mulong ading ashinshikidin cha kusambish pa kusal rusot ra Nzamb nich kushinshaman, kusut kushinshikin pa ruchingej rau ra kuya mwiur. Awiy akwata mupak wa kubambil nich kujijaman. Pakad kwidjidjek niyey uchingedin chisu chikushitwishay Yehova dijin diend ni kumekesh anch mutapu wend wa kuyikel utentamin ni chisu chikuwanyishay kushilamu kwend kwawonsu. Ikal nich kashinsh anch yom yiney yawonsu yikuwanyin pa chisu chatekay kal Yehova. Pakwez kurutu chisu chinech chishik, tufanyidin kwikal akwatikena nakash mu mudimu wa Yehova ni tufanyidinap kuziy anch yom tuchingedina yamekan mudi yilabin kuwanyin. w19.08 4 par. 9-10

Iyipula anch: ‘Ov, antu akwau amening mudi muntu ukweta mwikadil wa kwitudish ni kwikepish? Ov, nikat kusalang kwa kwikatil tumidimu tumekena mudi twa antu akad usey mulong wa kuyisadin antu akwau? Ov, antu akwau amening anch niding muntu muwamp?’ Yesu wading mwin chisambu, chinech chasala anch antu asalangay nend mudimu amusejin, ni wakata nakash kuyifumb. (Luka 10:1, 19-21) Wayikasikesha in kwilejend kwipul yipul, ni wayipulang yipul mulong wading ukatin kutesh yitongijok yau. (Mat. 16:13-16) Mudi mbut jichidijinau ku ubaj, in kwilejend aya kurutu. Ata matu ku malejan mafundishay Yesu ni asonga mabuj kusutil ku midimu yiwamp. Ov, tukwet umutakel kampand padi antu akwau? Anch chidi mwamu, iyipula anch: ‘Mutapu ik nikata kuyisadin antu akwau ku mudimu ap ku chikumbu? Ov, nikat kusalang anch ndond nidia yikal ya chisambu ni yisangareshina? Ov, nikat kuyikasikeshang antu akwau kwipul yipul? Nikatining kutesh yitongijok yau?’ Tukatinap kwikal mudi Afaris, ajimanang anch antu akwau ayipul yipul ni ayizengolang antu apanang yitongijok yishalijadina ni ya awiy.—Mar. 3:1-6; Yoh. 9:29-34. w19.09 20 par. 1; 23 par. 9-11

Yisu yimwing antakel a mangand akat kusadinang mazu mudi minam mulong wa kumekesh anch kwikal kal kwovijan pakach pa michid. Pakwez, kwijikish kwa “chisambu ni [zoong]” kwisambidinau mu Bibil kukwikal kwa pakampwil. Mulong wak? Mulong anch kwijikish kwinoku kwasambish, antu akutwish kutong anch antakel a mangand atwish kal kulet diking pa mangand. Pakwez uyakin udi anch, ‘mar makash’ makusambish ni kupwa “kusheshik kukez kuyikashimwish.” (Mat. 24:21) Twijap yom yikuyibachika antakel a mangand chakwel apalangesha kwijikish kwinoku ap mutapu kukusadika. Ni kitwijap anch kukwikal kwijikish kujim kwa kapamp kamwing ap anch kukwikal kwijikish kwa kazez kazez. Chikalap nchik mutapu ukusadika kwijikish kwinoku, twij anch: Antakel a mangand kakutwishap kulet chisambu, chawiy kwijikish kwinoku kufanyidinap kutupumbul. Pakwez chidi chijingidij chimekeshina anch ‘dichuku dia Yehova’ didi piswimp ni kusambish!—1 Tes. 5:2. w19.10 8-9 par. 3-4

Njit ja Harmagedon jawiy jikuleta disudiel dijim dia mangand minam. Pakwez, tufanyidinap kwov wom. Mulong wak? Mulong Yehova ndiy ukurisha, kadiap etu. (Jnsw. 1:33; Ezek. 38:18-20; Zak. 14:3) Anch Yehova wapan mbil, Yesu Kristu ukutakel njit. Ukwikal pamwing nau azizidilau many avumbwilau ni tutikit twa angel. Awonsu pamwing, akumurishikish Satan ni ayilembil end ni amasalay au a pa divu. (Kuj. 6:2; 17:14) Yehova washidinamu kal anch: ‘Ut wawonsu ukuchilau mulong wa kukurishish ukez kupandikanap bwat.’ (Isay 54:17) “Chisak chipandikena kujimb” cha atushalapol ashinshamena a Yehova chikupand ku “mar makash”! Chad awiy akudandamen kumusadin ndiy. (Kuj. 7:9, 13-17) Bibil utwinkishin kashinsh anch tukupand mu machuku mezina! Twij anch ‘Yehova ukat kuyichidij antu ashinshamena.’ (Kus. 31:23) Antu awonsu amukatina ni amutumbishina Yehova akusangar chisu chikumanau mutapu utumbishinay dijin diend.—Ezek. 38:23. w19.10 18-19 par. 17-18

Pitusejina kamu piswimp nakash ni kwisudiel kwa “machuku ma kwisudiel,” tukutwish kurish ni milong yivud nakash. (2 Tim. 3:1) Chilakej, kupwa kwa kampany wa mavot wasadika mwi ngand yimwing ya kurand kwa Afrik, antu asambisha kurish nakash. Mwa angond musamban ni kusut, chayikasikena akadivar nau anambaz kushemunik mulong ading ashich mwi ndond mwading murishidinau. Yom ik yayikwasha kupandakan yisu yiney ya yakamish? Amwing pakach pau achinina mu yikumbu ya akadivar ading kwi ndond kwading diking. Mukadivar umwing walonda anch: “Mu yisu ya yakamish mudi yiney, nasangara nakash mulong nading pamwing nau arund. Twakasikeshijana umwing ni mukwau.” Chisu chikusambisha “mar makash,” tukwikal ni kuswir kwa arund awamp atukatina. (Kuj. 7:14) Chinech chawiy chisu tufanyidina kukasikesh urund pakad kulab. (1 Pita 4:7, 8) Mulong wak? Mulong akankuny netu akusal usu wa kutwauril mu kusadin jinsangu jiyimp ni ja makasu. Akusal usu chakwel tulik kuchingejijadin ni kukwashijan. Pakwez kakutwishap kutwauril. Kakutwishap kutukangesh kuyikat akadivar netu. Kwikil chom ap chimwing chisadinau chikutwisha kuyipish urund wetu twatila kal. w19.11 2 par. 1-2; 7 par. 19

Satan, “tatuku wa makasu,” ukat kuyisadin antu atakedilay mulong wa kupalangesh makasu piur pa Yehova ni piur pa akadivar ni anambaz netu. (Yoh. 8:44) Chilakej, in kupumbok akat kupalangesh makasu ni kuchikul nsangu piur pa dirijek dia Yehova pa tupend twa web ni kusutil televizion ni yom yikwau ya kupalangesh nich nsangu. Makasu minam madi pakach pa “jinseu ja kasu” ja Satan. Yom ik tufanyidina kusal anch muntu wasambish kutulej piur pa makasu minam? Tufanyidinap kumutesh ap pakemp! Mulong wak? Mulong tukwet ritiy mudiay Yehova ni tuyichingejidin akadivar netu. Chakin kamu, tukatap kwambamb ap pakemp nau in kupumbok. Tukatap kwitiyij anch muntu kampand ap chom kanang, ap nsangu jimekena kwikal jisu yitubachik kutadikijan nau ap kuziyish ritiy retu. Ov, watwishin kulik kutesh ap kutadikijan nau in kupumbok piur pa makasu mapalangeshinau? Uwanyidin kukujikitish. Pakwez tufanyidin kubabal mulong Satan ukwet mat makwau masadidinay mulong wa kupakish kuturishikish. w19.11 15 par. 8; 16 par. 11

Chisu ukwatina mipak, Shinshikin yibachikin yey. Yehova ukatin anch twikal in kashinsh mu yom yawonsu. Chawiy anch twakwat mipak, niyetu tufanyidin kwikal in kashinsh pantaliken ni ayinetu ni in kashinsh pantaliken ni antu akwau piur pa yibachikin yetu. Anch tudiap kamu chakin in kashinsh, chikutukasiken pamwing ap kulamat ku mupak wetu. Chilakej, mukadivar nsand ukutwish kukwat mupak wa kwikal chibol wa rawonsu. Pakwez mu kusut kwa chisu, wasambish kurish pa kuwanyish asaa itinau ni musangar wend wakep mu mudimu wa kulejan. Ukutwish kutong anch diyingishin diend dia pakampwil diamubachika kusal mudimu wa uchibol diading mulong wa kumusangaresh Yehova. Pakwez, pamwing ap diyingishin diend dia pakampwil dia kusal mudimu wa uchibol diading mulong wading ukatin kuyisangaresh anvajend ap muntu mukwau. Tong piur pa mwin kwilej wa Bibil ukwatina mupak wa kulik kuna ruwand. Kwinsambishin wikasikesh kulik kuna mu rubing rumwing ap jaad ap anch chimukasikedin kusal mwamu, kupwa wasambish kand kuna. Kwinsudiel, watwish kwimik kuna! Rukat rend mulong wa Yehova ni maswir mend ma kumusangaresh Ndiy yawiy yamukwashina kulik kuna ruwand.—Kol. 1:10; 3:23. w19.11 27 par. 9; 29 par. 10

Paul wading ni kashinsh anch ukubambil djat ni kwinsudiel ni ukutambul difut. Mulong wading mwin Kristu uzizidilau many, wading uchingejin kutambul “chom [difut] cha usey chikupanay Nzamb, kwawiy kamu kutazuk kwa Nzamb.” Pakwez, mulong wa kutambul difut dined, Paul wajingunina anch wading ufanyidin kudandamen ‘kubambil.’ (Fil. 3:14) Paul wasadina chilakej chipandakena kuwap mulong wa kuyikwash in Kristu a ku Filip kushinshikin pa diloz diau. Paul wayivurisha in Kristu a ku Filip piur pa mashakamin mau ma mwiur. (Fil. 3:20) Mulong wak afanyina kuvurik mashakamin minam? Mu machuku minima, antu akatang nakash kwikal an a ngand a Rom mulong isakinangamu nakash. Pakwez in Kristu azizidilau many ading antu a guvernema muwamp nakash, wading ufanyidina kuyiletin yiyukish yivud nakash kusutamu ya in Rom. Mu kwilakej nich wan a ngand wa mwiur, wan a ngand wa Rom wading wa usey ukemp nakash! Nlel in Kristu azizidilau many ashil chilakej chiwamp pa bambidilau mulong wa mwom wau wa chikupu mwiur. w19.08 6 par. 14-15

Want ipau winou wading chakin kamu ujim nakash kusutamu watambulangau pa chisu cha Muvu wa Musangar wa in Isarel! (Lev. 25:8-12) Chilakej, ikundj wakwolikang pa chisu cha Muvu wa Musangar wafanyina kand dichuku dimwing kwikal muswik, ni dichuku dimwing wafanyina kwend kufa. Pa dichuku dia Pentekot wa muvu wa 33 C.C., Yehova wayizizila atwimbuy many nich spiritu utumbila pamwing nau amakundj ni amband akwau ashinshamena. Wayitiya kwikal anend chakwel anch kurutu kwa machuku akutwish kuvumbuk mulong wa kuya mwiur chakwel ayikel pamwing ni Yesu. (Rom 8:2, 15-17) Inay awiy antu akwolika akusambish, kukwolik kwalejanay Yesu mu sinagog wa ku Nazaret. (Luka 4:16-19, 21) Amakundj ni amband inay ading aswik a mafundish ma makasu ni yishankur ya antakel a in Yuda yakad kudiokal mu mifund. Nzamb wayimana kwikal akwolikina ku yibudikin ya chitil chiyitwadila ku rufu. Muvu wa Musangar wa chifanikesh wasambisha chisu chayizizilau in kwilej a Kristu many mu muvu wa 33 C.C. ukupwa kwinsudiel kwa Mivu Kanan ya Winyikel wa Yesu. w19.12 11 par. 11-12

Anvaj, yikwashany anen kutond arund awamp. Tatuku ni maku afanyidin kuyijik arund a anau ni yom yisadiningau. Afanyidin kand kwijik antu ambambining ni anau ku telefon ni pa Internet. Arund inay akutwish kwikal ni yibachikin pa mutapu wa kutong ni pa yisal ya aney. Anvaj avud akat kutenchikang yisu yimwing chakwel anau asutish chisu pamwing nau antu adia chilakej chiwamp mu kumusadin Nzamb. Chilakej, N’Déni ni Bomine, ambay a uruw a mu Côte d’Ivoire, ading ni chaku cha kumutazukang kalam wa munyingumuku ni kushakam nend kwol kwau. N’Déni ulondin anch: “Kusal mwamu kwading ni yibudikin yiwamp padi mwanetu. Wasambisha kusal mudimu wa uchibol ni pinap usadin mudi kalam wa munyingumuku nkwash.” Anvaj akutwish kusambish kuyifumb anau nawamp pachidiau kal anikanch. (Jnsw. 22:6) Shinshikin chilakej cha Timote. Timote amufumba kudi makwend Yunis ni ngakend mband Loyis “kudiokal ku wanikanch.”—2 Tim. 1:5; 3:15. w19.12 25 par. 14; 26 par. 16-17

Ikal murund wa kuchingejin. Chilakej, tukatap kwetu ching kukan anch tukuyikwash akadivar ni anambaz netu adia mu maswir pakwez tukat kuyikwash kand nich yom yiswirikedinau. (Mat. 5:37; Luka 16:10) Anch antu adia mu maswir ikal nich kashinsh anch tukutwish kuyikwash, akat kwiyov kwikal ongojinau. Nambaz umwing urumburil mulong wak chidia mwamu. Ulondin anch: “Ukwikalap kand ni yakamish mulong wij anch muntu wakukanang anch ukukukwash ukwez pa chisu chakanangay mulong wa kusal yom yakanangay.” Antu arishina ni yakamish ap anenganeshinau yisu yivud akat kutan rongoj kusutil kumulejamu murund uchingejidinau. Pakwez, mulong wa kwikal murund wa kuchingejin, tufanyidin kukudish mwikadil wa kushimpish muchim. Chisu chamuchinau Zhanna kudi nfumwend, watana rongoj kusutil kuyilej arund nend a piswimp mutapu wading wiyovilay. Ulondin anch: “Arund inay antesha nich kushimpish muchim, ap anch nading nichirikidin yom yimwing tupamp tuvud.” Niyey ukutwish kumekesh anch udi murund muwamp anch wikal mwin kutesh muwamp. w20.01 10-11 par. 9-11

Mu Bibil mudi yilakej yivud ya amakundj ading akweta ritiy atambula spiritu utumbila; pakwez kikalap ni ruchingej ra kushakam mwiur. David amutakela nich spiritu utumbila. (1 Sam. 16:13) Spiritu utumbila wamukwasha kutesh yom yikurikina piur pa Yehova ni wamutakela kufund yikunku yimwing ya Bibil. (Mar. 12:36) Ap mwamu, kambuy Pita walonda anch David “kamukandjikap mwiur.” (Mid. 2:34, TMK) Yohan Mubatish “[amwizwisha] nich spiritu utumbila.” (Luka 1:13-16, TMK) Yesu walonda anch kwadingap muntu upandikena kujimb kumusutamu Yohan, pakwez walonda kand anch Yohan kakwikalap pakach pa antu akuyikela mu Want wa mwiur. (Mat. 11:10, 11) Yehova wasadina spiritu wend utumbila mulong wa kuyinkish amakundj inay usu wa kusal yom yikwamushena, pakwez kasadinap spiritu winou mulong wa kuyitond chakwel ashakam mwiur. Ov, chinech chirumburikin anch ading ni ritiy rikemp? Bwat. Chirumburikin kwau anch Yehova ukez kayichirish ku mwom mu Paradis pa divu.—Yoh. 5:28, 29; Mid. 24:15. w20.01 25 par. 15

Yehova watutazuka chakwel twandam mu dijuku diend ni twikal pakach pa antu amwifukwidila. Kwinoku kudi kutazuk kupandikena kuwap mud ik! Antu adia mu dijuku dined ipanin kal ayinau kudi Nzamb ni amekeshin ritiy mu chakupesh cha difut dia Mwanend. Tudi mu dijuku dikweta musangar nakash. Tukat kusanger mwom upandikena kuwap nlel, ni tukat kusanger kand ruchingej ra kwikal ni mwom wakad nsudien—mwiur ap mu Paradis panap pa divu. Yehova watwazurila chis cha kwandam mu dijuku diend mulong utukatin nakash. (Yoh. 3:16) “[Atulanda] kal nich usey ukash.” (1 Kor. 6:20) Kusutil difut, Yehova wasala anch chituswapel kwikal mu urund wa piswimp nakash ni ndiy. Tukutwish kumutazuk Muntu upandikena kujimb mu mangand mawonsu anch Tatukwetu. Ni, mudi twamanang mu mutu wa mulong wasambelang, Yehova ndiy Tatuku upandikena kuwap. Tukutwish kwiyipul mudi mwiyipulay mwin kufund umwing wa Bibil anch: “Ov, yom ik nikutwisha kumuchirishin [Yehova] ku yom yawonsu yiwamp yansadinay?” (Kus. 116:12) Chakul chidi anch tukutwishap ap pakemp kumufut Tatukwetu wa mwiur. Pakwez twiyovil kwikal abachikinau kumukat. w20.02 8 par. 1-3