Ngond wa 6

Ana, makwend a muprofet Samwel warisha ni milong yimwing yikash. Wading mumb mu mivu yivud. (1 Sam. 1:2) Mu yishankur ya mu Isarel, mband wakad kuval amumanang mudi muntu ushinginau. Chinech chamukwatisha Ana usany nakash. (Dis. 30:1, 2) Chipandikena kand kuyip, nfumwend wading ni mband mukwau, Penina, ni wavala nend an ni wamusipang Ana mulong wading mumb. Ana warisha nakash ni yakamish yiney yikash. Wanenganana nakash chawiy “wadilanga walik kudia.” Ana “wanenganana nakash” mu muchim wend. (1 Sam. 1:7, 10) Mutapu ik watanay Ana rongoj? Ana wamuleja Yehova yovil yend kusutil malembil. Kupwa kwa kulembil, warumburila mulong wend kudi Eli, Mwin Kupesh Mujim. Kupwa Eli wamuleja anch: “Yang nich chisambu, Nzamb wa in Isarel itiya kulembil kwey.” Yibudikin ik yikalaku? Ana “waya kwol kwend ni kudia, chawiy ushon wapwa mu muchim wend.” (1 Sam. 1:17, 18) Malembil mamukwasha Ana kuchirish chisambu chend. w20.02 21 par. 4-5

Piswimp ap, Yehova ukushesh mangand minam. Ching antu adia ‘mu mwikadil ufanyidina kutambul mwom wa chikupu’ awiy akupanda. (Mid. 13:48) Chawiy tukatina kand kupan uman kudi anamakwetu chakwel niyau amusadin Yehova pamwing niyetu. Tatukwetu wa rukat, Yehova, “kasotilap muntu ap umwing kusheshik, pakwez usotil antu awonsu kukarumuk kudiokal ku yitil yau.” (2 Pita 3:9) Tufanyidin kwijik anch kudi mutapu uwamp ni mutapu uyimp wa kupan uruu wa dipandish. Ap anch tumekeshining nkeu chisu tupanina uman kudi antu twakad kwijik, pakwez tukutwish kuburen nkeu chisu twambambina nau anamakwetu. Anch twatongijokin kapamp ka kusambish twapakisha kupan uman kudi anamakwetu, antu avud pakach petu akutwish kunenganan piur pa mutapu wapanau uman ni kutong anch afanyina kusal mwamu mu mutapu uwamp. Chidi cha usey kuvurik chiyul cha kambuy Paul, chidia mu mufund wa nlel chisu twambambina nau anamakwetu. Chamwamu tukuyijimesh pa ndond pa kuyikwash chakwel atutesha. w19.08 14-15 par. 3-5

Mutapu ik wiyova chisu wileja uyakin ulondwilaku ou piur pa Mwan? Yesu ndiy muntu wakaad udia mujim nakash mu mangand mawonsu. Ndiy Mwin Kutukwol. Wapana kwa kwikatin mwom wend mulong wetwetu. Anch twamekesh kusutil yisal yetu anch tukwet ritiy mu difut, akutwish kutulikishin yitil yetu, tukutwish kukudish urund ni Nzamb, ni tukutwish kwikal nich mwom wa chikupu. (Yoh. 3:16) Yesu udi Mwin Kupesh wetu Mujim. Ukatin kutukwash chakwel tutaninamu mu difut ni twikal mu urund wa piswimp ni Nzamb. (Heb. 4:15; 7:24, 25) Mulong udi Mwant wa Want wa Nzamb, ndiy muntu ukezau kusadin kudi Yehova mulong wa kutumbish dijin Diend, kupwish uyimp wawonsu, ni kupan yiyukish ya chikupu mu Paradis wezina. (Mat. 6:9, 10; Kuj. 11:15) Yesu udi chilakej chetu. Watushila chilakej kusutil kupan mwom wend mulong wa kusal rusot ra Nzamb. (Yoh. 4:34) Anch witiyij yom yifundishinay Bibil piur pa Yesu, ukushiken chad ku kumukat Mwan a Nzamb ukatilay nakash. Rukat riner rikukubachik kusadin mwom wey mulong wa kusal rusot ra Nzamb mudi mwasalay Yesu. w20.03 10 par. 12-13

Yesu walembila yisu yivud dichuku dia nsudiel ya mwom wend wa pa divu. Payilejay in kwilejend mutapu wa kuvurik rufu rend, Yesu walembila mulong wa dibot ni nviny. (1 Kor. 11:23-25) Kurutu kwa kushemunik pa ndond yasadilau Pasak, Yesu walembila pamwing nau in kwilejend. (Yoh. 17:1-26) Chisu chashikay uchuku nau in kwilejend ku Mukandu wa Mitond mudi ya Mpach, walembila tupamp tuvud. (Mat. 26:36-39, 42, 44) Ni mazu ma nsudien malonday Yesu kurutu kwa kufa mading malembil. (Luka 23:46) Mu malembil minam, Yesu walembila kudi Yehova piur pa chom chin chawonsu chafanyina kumushiken pa dichuku dinidia dia nsudien ya mwom wend. Anch Yesu wajijamena choziu chend, chading mulong wamuchingejina Tatukwend mu malembil. Pakwez atwimbuy kajijamanap mu malembil uchuku winiwa. Mudi chibudikin, kutakaman kwau kwaziya payipakau. (Mat. 26:40, 41, 43, 45, 56) Paturishina ni yoziu, tukutwish kushal ashinshamena ching anch twalondul chilakej cha Yesu ni ‘kudandamen kulembil.’ w19.04 9 par. 4-5

Yehova ukisining kwikal mu umwing nau aspiritu ayimp! Wayileja in Isarel anch: “Kangal ez atan mu en muntu umwing ukat kumupan mwanend ikundj, ap mwanend mband ku kasu, ap mwin kupong, ap mwin kudimban kwipuril, ap mwin kupandol, ap mwin kubauk, ap mwin kukayan, ap mwin kubudik akish, ap mwin kutazuk afu. Mulong mwawonsu ukusala yom yiney udi mwin kutakanan kudi [Yehova].” (Kuv. 18:10-12) In Kristu kadiap mwinshin mwa Chijil chayinkishau in Isarel kudi Yehova. Pakwez twij anch yitongijok ya Yehova piur pa kwikal mu umwing nau ayilembil yiswimpinap. Yehova utubabeshin piur pa kwikal mu umwing ni aspiritu ayimp mulong wij anch Satan usadidin njil yiney mulong wa kuyisal antu nayimp. Satan usadidin njil yiney mulong wa kupalangesh makasu—mudi makasu makwel anch afu akweting mwom ndond kanang. (Mul. 9:5) Satan uyitekin kand antu mu umwing nau ayilembil mulong wa kuyovish wom ni kuyauril kulemp ni Yehova. Rusot ra Satan ridi anch antu adia mu umwing nau ayilembil ayitiyija aspiritu ayimp pa ndond pa kumwitiyij Yehova. w19.04 21 par. 5-6

Kuyipish mwan chidi chitil chikash. Mwin kumuyipish mwan ukat kumusal nayimp mu mitapu kushalijan. Ap anch mwan umuchingejidin, mwin kumuyipish mwan ukat kudiul yovil ya mwan ni kumushindil kusal yom yakad kufanyin mwan kusal. Tufanyidin kuyichidij an pantaliken ni atubaj inay, ni antu asalau kal nayimp mu mutapu winou akwet kuswir kwa kuyongoj ni kuyikwash. (1 Tes. 5:14) Anch muntu wa mu chikumangen wamuyipish mwan, ukat kupwishikish kalimish ka chikumangen. (Mat. 5:16; 1 Pita 2:12) Tukatap kwitiyij anch antu ashakama mu chikumangen anch akat kusal yom yiyimp ni alikin kukarumuk ni akat kupwishikish kalimish ka chikumangen. Anch muntu mu chikumangen wabwambwil ku chijil cha ngand, chilakej kusutil kumuyipish mwan, muntu winou wasal kal chitil pantaliken nau antakel a ngand. (Ilakej ni Midimu 25:8.) Amakurump a chikumangen kakwetap ulabu wa kumupup muntu ujipina chijil cha ngand. Pakwez kakatap kumuchidij muntu ukata kumuyipish mwan pantaliken ni dipup didiokila kudi mburamatad. w19.05 9 par. 4-7

Etu awonsu tukutwish kupandikan yoziu yetu mulong Yehova udi Mulej wetu Mujim. (Isay 30:20, 21) Dizu diend ditwinkishin yawonsu tukweta nich kuswir mulong wa kwikal ‘awanyidina’ ni “kwikal kand nich ukash wa kusal midimu yawonsu yiwamp.” (2 Tim. 3:17) Anch twashakam kukwatijan ni mafundish ma Bibil, tukwikal in manangu kuyisutamu antu akata kulond anch tufanyidin kushakam kukwatijan ni “manangu ma mangand minam.” (Kus. 119:97-100) Cha ushon, manangu ma mangand makat kumeken yisu yivud ku maku ma mujimbu. Chawiy chikutwish kutukasiken kujijamen yitongijok ni yisal ya antu a mangand. Bibil ukwet diyingishin dia kulond anch: ‘Babalany, chakwel kangal muntu wakukwatany mu mupit wa manangu ma antu [filozofi] ma kudimban makad usey, ni makasu madiokila ku yishankur ya antu.’ (Kol. 2:8) Mudi mwasambelay kulond Bibil piur pa machuku ma nsudien, antu akwikal “in kukat yom ya kwisangaresh.” (2 Tim. 3:4) Kupalangan kwa mayej makata kusamburok kusutil masandj mudi mayej ma SIDA, udi uman umwing umekeshina anch manangu ma mangand madi ma usup.—2 Pita 2:19. w19.05 21 par. 1-2; 22 par. 4-5

Satan wayipumbula in Isarel payibachikay kwitiyij anch mulong wa kudandamen kwikal mwom, afanyina kwimburij yaku ya apagan ading ayinyingumukina. Apagan inay ading itiyijin anch anzamb au akutwish kunakish ruval ching kusu anch awiy asadin yishankur kanang ya difukwil diau. In Isarel aburena ritiy mudiay Yehova itiyija anch winou wawiy wading mutapu umwing wa kwipuk chang, chawiy iyandjika mu yishankur ya difukwil dia Bal. Wasadina kand maku ma masandj. Michid ya apagan yifukwilang anzamb au kusutil kwiyandjik mu yisal yijim ya masandj. Difukwil dined dijondila diading kand ni tempel wa masandj ma amband ni amakundj. Utun ni yisal yikwau ya masandj kayilikidilangap kusu kwau, pakwez ayimanang anch yidi kwau yiwamp! (Kuv. 23:17, 18; 1 Ant 14:24) Apagan itiyijang anch yisal yiney yayibachikang anzamb au kufukish divu nakash. In Isarel avud awila mu yisal ya masandj ya apagan ni mu kusal mwamu, atonda ayinau kuyisadin anzamb a makasu. w19.06 2 par. 3; 4 par. 7-8

Tunan twa akadivar ni anambaz ading ku Betel ni akwau avud ading mu mudimu wa chisu chawonsu ikadin ni yisend yisu. Chikutwish kuyikasiken akadivar ni anambaz inay kusha chisend chau chading chikatinau nakash. Anch udi umwing wa pakach pau, yom ik yikutwisha kukukwash kurish nich kuswimp? Shal piswimp ni Yehova kusutil kutang dichuku diawonsu Mifund ni kuyitongijokin nakash. Kupwa, dandamen kulejan rusangu ruwamp mu chikumangen chey chisu. Yehova ukat kuyivurik antu awonsu adandamedina kumusadin nich kushinshaman, ap anch kakwetap kand usu wa kusal yom yasalangau pakur. Ikal ni mwom uswapela. Kangal walikidil yakamish ya mangand ma Satan yikukangesh kumusadin Yehova. (Mat. 13:22) Pikil wayitesh antu akad kumusadin Yehova ap anamakwey akuyudina anch ufanyidin kwikal ni nfalang jivud chakwel wikal ni mashakamin mawamp. (1 Yoh. 2:15-17) Muchingejina Yehova utukanina anch ukuwanyish maswir metu pa “chisu chitukweta kuswir.” Ukutukwash kukasikesh ritiy retu, ukutwinkish chisambu cha mu manangu, ni yom yawonsu ya ku mujimbu tukweta nich kuswir.—Heb. 4:16; 13:5, 6. w19.08 20 par. 4; 21 par. 7-8

Ov, niyey urishin ni yakamish? Chikasikeshin mudi ik kwijik anch Yehova ukat kutesh milong yetu! Wij nawamp yom tukutwisha kusal ni yom twakad kutwish kusal, ni wij yitongijok yetu ni mutapu twiyovila. (Kus. 103:14; 139:3, 4) Anch twamuchingejin Yehova, ukutukwash kurish ni milong yetu yituletidina yakamish. Yakamish yikutwish kusal utonga anch mashakamin mey makutwishap kuswimp, ni yikutwish kukuziyish. Anch yom mudi yiney yashiken, vurik anch Yehova ukukukwash kurish ni yakamish yey. Mutapu ik ukutwishay kusal mwamu? Ukwitin chakwel umulej milong yey ni mutapu wiyovila. Ni ukwakul ku malembil mey ma kwit ukwash. (Kus. 5:3; 1 Pita 5:7) Chawiy mulembila Yehova chisu chawonsu piur pa milong yey. Kakutwishap kulond ney kapamp kamwing, pakwez ukutwish kwambamb ney kusutil Dizu diend Bibil ni kusutil dirijek diend. Nsangu utangina mu Bibil jikutwish kukongoj ni kukwinkish ruchingej. Chikwau kand, akadivar nau anambaz ney akutwish kukukasikesh.—Rom 15:4; Heb. 10:24, 25. w19.06 16 par. 7-8

Chisu chikuzengodilau, mulembila Yehova “nich muchim wawonsu” ni muleja Tatukwey wa rukat yom yawonsu yikwovishina wom ni yikwakamishina. (Mad. 2:19) Anch wadandamen kulembil mu mutapu winou, ukwiyov anch udi piswimp nakash ni Yehova. (Rom 8:38, 39) Ikal nich kashinsh anch yiyukish ya Want wa Nzamb yikuwanyin kamu chakin. (Kuch. 23:19) Anch ritiy rey mu kushilamu kwinoku riziyin, chikumuswapel Satan nau antu end kukwovish wom. (Jnsw. 24:10; Heb. 2:15) Itekina chisu cha kwilej kushilamu kwa Nzamb piur pa Want wend ni piur pa mayingishin masadina anch wikal nich kashinsh anch kushilamu kwinoku kukuwanyin kamu. Mutapu ik ukutwisha yom yiney kutukwash? Shinshikin chilakej cha Stanley Jones, watekau mu rukan mu mivu sambwad mulong wa ritiy rend. Yom ik yamukwasha chakwel atwisha kujijaman nich kushinshaman? Walonda anch: “Ritiy ram rakasikana mulong nading nij chidia Want wa Nzamb ni yom yikusala Want winou, ni nidjidjekap ap pakemp piur pa kushilamu kwinoku. Chawiy kwikil muntu ukutwisha kwingauril ni Yehova.” Anch ukwet ritiy rikash mu kushilamu kwa Nzamb, ukutwishap kulik kumusadin mulong wa wom.—Jnsw. 3:25, 26. w19.07 2 par. 1; 3 par. 6-7

Mulong wak kwikadish in kwilej udi mudimu wa usey nakash? Mulong ching kusu in kwilej a Kristu awiy akutwisha kwikal arund a Nzamb. Chikwau kand, antu amulondwila Kristu akwet mashakamin mawamp katat ni akwet ruchingej ra kusanger mwom wa chikupu mu machuku ma kurutu. (Yoh. 14:6; 17:3) Chakin kamu, Yesu watwinkishin kal chisend cha usey nakash, pakwez mudimu winou tuusadinap ayinetu bwat. Kambuy Paul wafunda piur pend ni piur pa ambay nend anch: ‘Etu tudi ambay a mudimu pamwing ni Nzamb.’ (1 Kor. 3:9) Dilau dijim mud ik diayinkishinau kal antu akad kuwanyin kudi Yehova ni Kristu! Rizau ra kusambish mulong wa kwikadish in kwilej ridi ra ‘kukimb’ antu akatina kwilej piur pa Yehova. Tumekeshin anch tudi chakin kamu Atuman a Yehova anch twasambish kulejan kudi antu awonsu tutanijadina nau. Tumekeshin kand anch tudi in Kristu akin anch twaziyin kwi mbil ya Kristu ya kulejan. w19.07 15 par. 3-5

Antu avud akat kusangerang cha kusambish mbil ja manangu jidia mu Bibil mulong wa mwom wetu wa pichuku pichuku. Mu musumb wa New York, nambaz ukata kuya kuyital antu ulondining dizu dia Mandarin ulondin anch: “Nisadining usu wa kuyibangin antu ni kuyitesh. Anch nijik anch adiokil mwi ngand yikwau nikat kuyipulang anch: ‘Mutapu ik warijekang weny wey chakwel ushik kunoku? Ov, ukwet katat mudimu? Antu a mu ul winou akusadidin nawamp?’” Yisu yimwing kusal mwamu kwawiy kukata kumukwash chakwel asambisha mambamb ma Bibil. Anch kwamekan mutapu ukwau, nambaz winou wipwiling kand anch: “Utongin anch chom ik cha usey ufanyidina kusal mulong wa kwikal mu urund uwamp nau antu? Yikukusangaresh chakwel nikuleja jinswir umwing mu Bibil? Ulondin anch: ‘Disambishil dia matend didi mudi kusambish kujikul mem, chawiy lik piwakadia kal kusambish matend.’ Utongin anch chiyul chinech chikutwish kutukwash kwikal mu urund uwamp nau antu akwau?” (Jnsw. 17:14) Mambamb ma mutapu winou makutwish kutukwash kujingunin antu akweta kuswir kwa kuyichirikin kand. w19.07 23 par. 13

Antu ikadina ni chisend chisu kakwetap kuswir kwa kuyovil ching kusu riy, pakwez akwet kuswir kwa kuyitesh piur pa mashakamin mau. Pamwing ap arishin ni mayej mau ap ma anamakwau. Akutwish kand kwikal anenganena nakash mulong wa rufu ra anamakwau. Ni ap anch kalondinap, pakwez akutwish kwikal ni ushon mulong ayishil kal arund adingau nau chisu chadingau ni yisend yikur. Chitin chisu mulong wa kupandikan yovil ya mutapu winou yikutwisha kurumbangesh manangu mau. Anch walejan nau pamwing ni wayikasikesh kusutil chilakej chey chiwamp, ukutwish kuyikwash chakwel ijidin mashakamin mau masu. Nambaz umwing wasadina mwi ngand ya wingendj mu mivu yivud ulondin anch: “Pinading mu chisend cham chikur, natakelang malejan ma Bibil dichuku diawonsu. Pakwez mu chisend cham chisu, chading chinkasikedin kuman mutapu wa kutang mifund ap kumekesh video mu mudimu wa kulejan. Chawiy, akadivar nau anambaz a mu chikumangen cham chisu anlejang chakwel tuya nau mu kuyichirikin antu. Chinech chasala anch niyova nawamp piur pa teritwar unidia. Nileja mutapu wa kusambish mambamb nau antu mu teritwar musu. Yom yiney yawonsu yankwasha kwikal kand ni musangar.” w19.08 22 par. 10; 23-24 par. 13-14

Yisu yimwing chikutwish kutukasiken kuyikat akadivar netu mulong tusadin yom mudi yasalay Evodiy ni Sintik ni tushinshikidin pa kurumbok. Etu awonsu tukat kurumbok dichuku diawonsu. Anch twashinshikin pa kurumbok kwa antu akwau, chikutukasiken kuyikat. Chilakej, anch mukadivar wavuramen kutukwash kurijek Chot cha Want, tukutwish kujiman. Anch twasambish kutong kand piur pa kurumbok kukwau twija piur pa mukadivar winou, ujim wetu ukupandikan ni rukat retu mulong wendendiy rikukep. Anch ukwet mulong mudi winou ni mukadivar wa mu chikumangen chen, tongijokin pa chom ech: Yehova wij nawamp kurumbok kwetu ni kwa mukadivar netu. Pakwez, chikalap nchik kurumbok kwetu, udandamedin kumukat mukadivar netu pamwing ni yetwetu. Mulong wa diyingishin dined, tufanyidin kwimburij rukat ra Yehova ni kushinshikin pa mikadil yiwamp ya akadivar netu. Anch twasal usu mulong wa kuyikat akadivar netu, tukasikeshin uumwing wetu.—Fil. 2:1, 2. w19.08 9-10 par. 7-8

Yehova uyikatining antu ikepishina. Ching kusu antu ikepishina kamu chakin awiy akutwisha kwikal mu urund wa piswimp ni Yehova. Kumutambu ukwau, “in kwibaz ukat kuyitadil kulemp.” Etu awonsu tukatil kumusangaresh Yehova ni tukatil anch atukata, chawiy tukwet mayingishin mawamp ma kwilej mutapu wa kukudish mwikadil wa kwikepish. Muntu wikepishina kakutongangap anch udi wa usey nakash kuyisutamu antu akwau ap kakwetingap chibud. Bibil ulejen anch muntu wikepishina ukweting chitongijok chiwamp piur pa urund wend ni Yehova ni urund wend nau antu akwau. Muntu wikepishina wijing anch antu akwau amupandikenamu mu yom kanang. (Fil. 2:3, 4) Antu amwing amekening mudi ikepishin, pakwez bwat. Mu chivadik chau akutwish kwikal in usany ap akad kulondolang nakash. Ap akutwish kuyilimish antu akwau mulong wawiy mutapu wayililau. Pakwez, anch twayishinshikin nawamp akutwish kumekan anch adi antu in kwitutul nakash. Katat ap mu kusut kwa chisu, akutwish kumekesh patok chidiau kamu chakin.—Luka 6:45. w19.09 2 par. 1, 3-4

Mu “rusangu ruwamp ra Nsalejetu Yesu” mudi uyakin wawonsu wafundishay Yesu. Tukat kuziyil ku rusangu ruwamp anch twasadin yom twilejina mu mwom wetu. Kuziyil kwinoku kwitin kand kutek yisakin ya Want pa ndond ya kusambish, kushakam kukwatijan ni mbil ja Nzamb ni kulejan Want wa Nzamb. (Mat. 6:33; 24:14) Kupwa, kwitin kand kuyikwash akadivar a Kristu azizidilau many pawanyishinau yisend yau yijim. (Mat. 25:31-40) Piswimp ap akuyimekeshin “amikoku akwau” ranaken piswimp ap mulong wa ukwash wayinkishau. (Yoh. 10:16) Mutapu ik? Kurutu njit ja Harmagedon jisambisha, azizidilau many awonsu 144000 akwikal ayil kal mwiur ni akwikal yitang ya mu spiritu yakad kufang. Akwikal chad pakach pa amasalay a mwiur akumushesha Gog ni kuchidij “chisak chipandakena kujimb” cha amikoku akwau. (Kuj. 2:26, 27; 7:9, 10, TMK) Mwaning, chisak chipandikena kujimb chikwikal ni musangar nakash mulong ayikwasha atushalapol azizidilau many chisu chadingau pa divu! w19.09 12-13 par. 16-18

Mulong wak tukat kwikal akasikeshinau anch twasal mudimu watwinkishau kusal kudi Yesu? Mulong tukwet atulam awamp. Yehova kalam wetu mujim, kadingap kalam wa chisum ap wakad kujikitishang. Ukat kusanger mudimu tusadina. (Heb. 6:10) Ni ukat kutwinkish usu tuswirikedina mulong wa kusal mudimu watwinkishay. (2 Kor. 4:7; Gal. 6:5) Yesu mwant wetu, watushila chilakej chiwamp. (Yoh. 13:15) Ni amakurump atulamina akat kusal usu wa kumwimburij Yesu, “kafung mujim.” (Heb. 13:20; 1 Pita 5:2) Akat kwikasikesh kwikal antu awamp, in kukasikeshan, ni atakamena chisu chitufundishinau ni kutulam. Tukwet kand arund awamp. Kwikil muntu mukwau ukweta arund awamp akweta rukat ni mudimu uwamp mudi wetwetu. Tong bil: Tukwet chisend cha kusal mudimu pamwing nau antu akweta mikadil yishitwila ni akad kwiman mudi adi a usey nakash kuyisutamu antu akwau. Akwet ukaliweny nakash pakwez ikepishin, ni akat kuyiman antu akwau mudi adi a usey nakash kuyisutamu awiy. Kakatap kutuman ching kusu mudi ambay a mudimu, pakwez kand mudi arund. Ni rukat rau ridi rijim nakash mu chilik cha kupan mwom yau mulong wetwetu! w19.09 20 par. 1; 23 par. 12-14

Mu Kubabesh kwend, kambuy Paul wisambidin ‘dichuku dia Yehova.’ (1 Tes. 5:1-6) Mu mufund winou, dichuku dia Yehova dimekeshin chisu chikusambisha ni disheshik dia “Babilon Mujim,” ditenchik dia pa mangand mawonsu dia relijon wa makasu, ni chisu chinech chikupwa ni Harmagedon. (Kuj. 16:14, 16; 17:5) Paul utulejin kand yom tufanyidina kusal mulong wa kwikal nich kashinsh anch tudi irijekina mulong wa ‘dichuku dia Yehova.’ Kitufanyidinap “kulal tul mudi antu akwau.” Tufanyidin “kuchish ku mes” ni kubabal piur pa ubaj wa kwiyandjik mu yom ya politik wa mangand minam. Anch twiyandjik mu yom yiney, tukutwish kwikal “a mangand” minam. (Yoh. 15:19, TMK) Twij anch Want wa Nzamb rawiy ruchingej rimwing kusu ra antu mulong wa chisambu cha mangand. Tukatil kand kuyikwash antu akwau kwilej piur pa yom yatakelay kulejan Bibil yikushikena mangand minam. Anch mar makash masambish kukwikalap kand chisu mulong wa antu kumusadil Yehova. Chawiy, mudimu wetu wa kulejan udi wa kuswapej nakash! w19.10 8 par. 3; 9 par. 5-6

Papwishau kufund muvungur winou, Jeremiy wamuchingejina murund nend Baruk chakwel alejan uruu winou. (Jer. 36:5, 6) Nich kutakaman, Baruk wawanyisha chisend chend ap anch chading cha ubaj. Ukutwish kutongin pa musangar wovay Jeremiy payay Baruk mu chipang cha tempel mulong wa kutang muvungur kurutu kwa antu? (Jer. 36:8-10) Pateshau anat a mu Yuda rusangu ra yom yasalay Baruk, amuleja chakwel ayitangina muvungur nich dizu dia piur! (Jer. 36:14, 15) Anat akwata mupak wa kumulej Mwant Jojakim yom yalonday Jeremiy. Mwant Jojakim wajimana nakash pateshay mazu mafunday Jeremiy, chawiy wosha muvungur ni wapana mbil anch amukwat Jeremiy ni Baruk. Ap mwamu, Jeremiy wanona muvungur ukwau, wamwinkishau Baruk, ni wasambisha kumulej uruu wa Yehova, Baruk “wafundamu yom yawonsu yading mu mukand wa kusambish [woshau kudi Mwant Jojakim].”—Jer. 36:26-28, 32. w19.11 3-4 par. 4-6

Yehova ukutwish kwikal chom chawonsu chikatinay mulong wa kuwanyish rusot rend. Chilakej, Yehova ukat kwiyikadish Mulej, mwin Kwongoj, ni mwin Kulejan, yiney yidi kusu yom yimwing pakach pa yom yivud yikatay kwiyikadish. (Isay 48:17; 2 Kor. 7:6; Gal. 3:8) Pakwez yisu yivud ukat kusadinang antu mulong wa kuwanyish rusot rend. (Mat. 24:14; 28:19, 20; 2 Kor. 1:3, 4) Yehova ukutwish kand kutwinkish etu awonsu manangu ni usu tukweta nich kuswir mulong wa kwikal chom chin chawonsu tukutwisha kwikal mulong wa kuwanyish rusot rend. Kukwatijan nau in kwilej avud, yom yiney yawonsu yidi kurumburik kwa dijin dia Yehova. Etu awonsu tukatining kutusadil kudi Yehova, pakwez antu amwing akutwish pamwing ap kwidjidjek anch Yehova uyisadidin. Mulong wak? Mulong iyovil anch katwishinap kand kusal yom yivud mudi mukatinau mulong wa upal, yishiken kanang, ap kuburen ukaliweny kampand. Ku mutambu ukwau, antu amwing akutwish kwiyov anch yom yisadinau yiwanyidin kwau ni kakwetap kuswir kwa kusal yom yivud nakash. w19.10 20 par. 1-2

Rukat ra yom ya ku mujimbu rikutwish kutuletin kampuw ni kusal anch tudiul rikibu retu ra ritiy. Kambuy Paul walonda anch: “Muntu usadila mudimu wa usalay ukatil kumusangarish mukurump wamwandjika ku mudimu, chawiy ndiy kakubangakup kand milong ya mwom wakad wa usalay.” (2 Tim. 2:4) Chakin kamu, amasalay in Rom kadingap kayitiyijina kusal midimu yikwau. Mudi amasalay awamp, tufanyidinap kuvuramen chitongijok chetu cha kusambish—kwitapil dilau dia Yehova ni Yesu, Antakel etu. Tumen dilau dined anch didi dia usey nakash kusutamu chom chin chawonsu tukutwisha kutambul mu mangand ma Satan. Tufanyidin kwikal nich kashinsh anch tukwet chisu ni usu tuswirikedina mulong wa kumusadin Yehova ni kulam rikibu retu ra ritiy ni kulam kand nawamp yom yikwau ya kurish nich njit jetu ja mu spiritu. Tufanyidin kubabal chisu chin chawonsu! Mulong wak? Kambuy Paul watubabesha anch “antu asotila kwikal ampich . . . [akupumbukin] kulemp ni ritiy rau.”—1 Tim. 6:9, 10. w19.11 17-18 par. 12, 14-15

Akusambel kulond anch: “Chisambu ni [zoong]” kurutu kwa ‘dichuku dia Yehova’ kushik. (1 Tes. 5:1-6) Kukwatijan ni 1 Tesalonik 5:2, ‘dichuku dia Yehova’ dimekeshin “mar makash.” (Kuj. 7:14) Mutapu ik tukujingunina anch mar makash madi piswimp ni kusambish? Bibil utulejin anch antu akez kalond yom yakadingawap kal kulondang. Kulond kwinoku kukumekesh chijingidij chijim cha nsambishin ya mar makash. Kwinoku kukez kikal kulond kwa “chisambu ni [zoong].” Ov, antakel a chirelijon akez kabombakan nau? Pamwing ap chikwikal mwamu. Chawiy, mazu minam makez kikal makasu mapepidilau kudi ayilembil. Pakwez makasu minam makez kikal ma ubaj nakash mulong makuyidimb antu anch ikal kal mu diking kurutu mar makash makadingap kal kushiken mu rusangu ra muntu masambisha. Chakin kamu, “pawiy pinipa kamu kusheshik kukez kuyikashimwish, mudi misong yikata kumukashimwish mband ukweta divumu.” Chikwikal nchik piur pa atushalapol ashinshamena a Yehova? Akez pamwing ap kushimok piur pa kusambish kwa chikashimwish kwa dichuku dia Yehova, pakwez kakezap kwov wom. w19.09 9 par. 7-8

Chisu ukwatina mipak,tenchik nawamp program wey. Anch utenchikin nawamp program wey, chikutwish kukuswapel kuwanyish mipak yey. Chilakej, ukutwish kukwat mupak wa kutang Bibil nich mushiku. Pakwez anch utenchikinap nawamp program wey, ukutwishap kuwanyish mupak wey. Ap amakurump a chikumangen akutwish kukwat mupak wa kusal mudimu wa ukafung nich mushiku, pakwez mu kusut kwa chisu akangany kuwanyish mupak wau. Mulong wa kutwish, afanyidin kwiyipul yipul mudi: “Ov, twasala list wa akadivar ni anambaz twafanyina kuya kutal nakash? Ov, twateka chisu chiwanyidina mulong wa kuyendin?” Kupwa, shinshikin pa yom ukutwisha kusal. Kwikil muntu ap umwing ukweting chisu, mutapu, ap usu wa kusal chom chin chawonsu chikatinay kusal. Chawiy shinshikin yom ukutwisha kusal ni ikal wisikena. Anch chidi cha usey, ukutwish kwikal ni kuswir kwa kuswimp mupak umena anch ukutwishap kwey kuuwanyish. w19.11 29 par. 11-12

Uprofet urumburila mutapu ukwikala mwom panap pa divu mu machuku mezina aulejen mu Isay 65:21-23. Tukwikalap in usweral ap kushakam kwau mwamu pakad kusal chom, bwat. Pakwez, Bibil ulejen anch antu a Nzamb akusal mudimu uwamp, usangareshina pa chisu chinicha. Kwinsudiel kwa Winyikel wa Mivu Kanan, tukutwish kwikal nich kashinsh anch “yom yatangau yikutwish kudiokal kand iyinau mu uswik wa yom yivundila, ni kwez ku kwikol kwa uyaj wa an a Nzamb.” (Rom 8:21, TMK) Mudi mutapu watenchikay Yehova yom chakwel in Isarel ikal isikena piur pa mudimu ni kwiswedish, chawiy chikwikal kand mwamu kudi antu end mu chisu cha Winyikel wa Mivu Kanan wa Kristu wezina. Chakin kamu tukwikal ni chisu cha kushinshikin yom ya muspiritu. Kumwifukwil Nzamb kudi kwa usey mulong wa kwikal ni musangar nlel, chawiy mwi ngand yisu tukwikal ni chisu cha kusal mwamu. Antu awonsu ashinshamena akwikal ni musangar pa chisu cha Winyikel wa Mivu Kanan wa Kristu mulong etu awonsu tukwikal ni mudimu uwamp usangareshina ni etu awonsu tukumusadin Nzamb. w19.12 12 par. 15; 13 par. 17-18

Dizu ‘kwandjik’ dirumburikin “kufundish ni kuvurish chisu ni chisu.” Mulong wa kusal mwamu, anvaj afanyidin kwikal ni chaku cha kusutishang chisu pamwing ni anau achidia kal anikanch. Kuyifundish an yom yawiy yimwing chisu chawonsu kukutwish kuyiziyish anvaj. Pakwez anvaj afanyidin kwikasikesh kuman chom chinech mudi mutapu wa kuyikwash anau chakwel atesh Dizu dia Nzamb ni kudisadin. Chawiy ikal mwin nkeu. Kuseng 127 uyifanikeshin an ni jinseu. (Kus. 127:4) Mudi mutapu ukutwishau kuchil jinseu kusutil yikung kushalijan, ni jikweta kujimb kushalijan, chilik chimwing, kwikiling an aad a mutapu umwing. Chawiy anvaj afanyidin kwijik mutapu wa kumufumb mwan ni mwan. Ambay a uruw amwing a mwi ngand ya Israël wa katat atwishina kupamish anau aad mu uyakin, alejen yom yayikwasha anch: “Mwan ni mwan twilejang nend Bibil panrend.” Chakin kamu, ntakel mwawonsu wa dijuku ukukwat mupak anch kusadin mulad winou kudi kwa usey ni anch chitwishikin kusal mwamu. w19.12 26 par. 18-20

Chisu turishina ni yakamish, tukat kuyijikitish nakash antu akata kutwinkish ukwash wa yom tuswirikedina! Ryan ukweta tatukwend wafa rufu ra kukashimuk ku aksidan ulondin anch: “Pa yisu ya mar chikasikening kusal midimu yivud tukata kusal pichuku pichuku. Chikat kongojang nakash anch muntu watukwash kusutil kusal chom kanang—ap anch chimeken kwikal cha usweral.” Chisu chawonsu vurik anch ukutwish kuyikasikesh antu akwau nakash anch wasal ap kusu tuyom tumekena kwau mudi twa usweral mulong wa kuyikwash. Marko mwin kwilej wa mu mivu chitot ya kusambish wading mwin Kristu ukwatikena nakash. Pakwez Marko witekina chisu mulong wa kumwongoj kambuy Paul, ni Paul wiyova anch ukutwish kumwit Marko ukwash. Chisu chamujipau mwanamakwend, Angela wayijikitisha nakash antu ipana mulong wa kumwongoj. Ulondin anch: “Anch arund akatin kukukwash, chiswapeling kwambamb nau. Chimekening patok anch akatin kukwash ni kidjidjekiningap kusal mwamu.” Tukutwish kwiyipul anch: ‘Ov, nijikening mudi muntu ukatining kuyongoj ambay nend mu ritiy kusutil kuyikwash yom yiswirikedinau?’ w20.01 12 par. 14-16

Mutapu ik ukutwishay muntu kudia dibot ni kuna nviny mu mutapu ‘wakad kuwanyin’ chisu cha Chivurikish? Ukutwish kusal mwamu anch wadia dibot ni kuna nviny pakwez kadingap kashicha kukwatijan ni mbil jitentamina ja Yehova. (Heb. 6:4-6; 10:26-29) Azizidilau many ij anch afanyidin kushal ashinshamena anch akimbin kutambul “chom cha usey chikupanay Nzamb, kwawiy kamu kutazuk kwa Nzamb mu Kristu Yesu.” (Fil. 3:13-16) Spiritu utumbila wa Yehova ukat kuyikwashang atushalapol end chakwel ikala antu ikepishina, akad kwibaz. (Efes 4:1-3; Kol. 3:10, 12) Chawiy azizidilau many kakatap kutong anch adi a piur kuyisutamu akwau. Ij anch Yehova kakatap kuyinkish azizidilau many spiritu utumbila muvud kusutamu atushalapol end akwau. Kakatap kutong anch awiy ateshina nawamp uyakin wa Bibil kuyisutamu antu akwau. Ni kafanyidinap ap pakemp kumulej muntu mukwau anch udi niyend uzizidilau many ni ufanyidin kusambish kudia dibot ni kuna nviny chisu cha Chivurikish. Pakwez, nich kwikepish akat kuvurik anch ching Yehova kusu ndiy ukata kuyitazuk antu mulong wa kuya mwiur. w20.01 27 par. 4-5

Yehova ukatin anch tumusejin piswimp ni twambambang nend. Utukasikeshin “[kulembil] yisu yawonsu,” ni yisu yawonsu ukat kututesh. (Rom 12:12) Kakwatikeningap nakash ap kuziy nakash chakwel alik kututesh. Ni tukat kumutesh kusutil kutang Dizu diend Bibil, ni mikand yitukwashina kuditesh. Tukat kumuteshang kand kusutil kuta matu nakash ku yikumangan yetu ya win Kristu. Mudi mutapu mambamb makata kuyikwash an kushal piswimp nau anvajau, kwambamb chisu chawonsu ni Yehova kukat kutukwash kushal piswimp ni ndiy. Tongin piur pa mutapu ukata kulembil. Yehova ukatin anch tumwazuril muchim wetu mu malembil. (Kus. 62:8) Tufanyidin kwiyipul anch: ‘Ov, malembil mam mading kwau ma piur piur, mudi mazu ma kukopiril, anch madiokiling kamu mu muchim, mudi mukand ufundilau kamu ku chikas?’ Pakad kwidjidjek umukatin kamu Yehova nakash, ni ukatin kudandamen kukasikesh urund wey ni ndiy. Mulong wa kusal mwamu, ufanyidin kwambambang nend chisu chawonsu. Muleja yovil yey ya ujindj. Muleja piur pa yom yikusangareshina ni yikwakamishina. Ikal nich kashinsh anch ukutwish kumwit ukwash. w20.02 9 par. 4-5

Yehova wayinkishin kal amakurump a yikumangen chisend cha usey nakash cha kulam antu end. Amakurump akutwish kwilej yom yivud kusutil kushinshikin mutapu Nehemiy wayisadinay antu a Yehova. Mulong wading Guverner wa Yuda, Nehemiy wading ni ulabu kampand. (Neh. 1:11; 2:7, 8; 5:14) Tongin pa yikokujol yimwing yarishay nich Nehemiy. Wajingunina anch antu ading ijondishin tempel ni kadingap kayiwanyishidina in Levi maswir mau ma ku mujimbu mudi mwading mulondina chijil. In Yuda kadingap kalimishina chijil cha Nzamb piur pa Sabat, ni amakundj amwing ata amband a michid yakad kumwifukwilang Yehova. Guverner Nehemiy wading ufanyidin kupwish chikokujol chinech chikash. (Neh. 13:4-30) Nehemiy kasadinap nayimp ulabu wend kusutil kuyishindil antu a Nzamb kulondul mbil jend. Pakwez, wakimba umutakel wa Yehova kusutil malembil ni wayifundisha antu yijil ya Yehova. (Neh. 1:4-10; 13:1-3) Nich kwikepish Nehemiy wasala mudimu pamwing nau akadivar nend, ni wayikwasha kand kutunguril mbumbu ja Yerusalem.—Neh. 4:15. w19.09 15-16 par. 9-10