Ngond wa 7

Anch antu akwau alond ap asal yom yiyimp, tukutwish kwiyakamish. Chinech chidi chakin pakampwil anch muntu utunenganeshina udi murund wa piswimp ap mwanamakwetu. Mulong wa kurish ni yakamish, tukutwish kwilej yom yivud kusutil chilakej chisambidinau mu Bibil cha Ana, wasipangau nayimp kudi mukajinend. (1 Sam. 1:12) Mudi Ana, tukutwish kwambamb chisu chilemp ni Yehova piur pa yakamish yetu ni yom yitwovishina wom. Tukwetap kuswir kwa kulond chom chawonsu mu mutapu uwanyidina ni upandikena kuwap bwat. Yisu yimwing tukutwish ap kusambish kudil ni kukaturok mu malembil metu chisu tumulejina Yehova piur pa yakamish yetu. Ap mwamu, Yehova kakuziyap kutesh malembil metu. Kupwa kwa kulembil piur pa milong yetu, tufanyidin kuvurik chiyul chidia mu Filip 4:6, 7. Kambuy Paul walejana anch tufanyidin kumujikitish Yehova mu malembil. Tukwet mayingishin mavud nakash ma kumujikitish Yehova—mudi mulong wa chipan cha mwom, yitang yend, rukat rend rishinshamena, ni ruchingej ripandikena kuwap ratwinkishinay kal. w20.02 21 par. 3; 22 par. 6

Dizu chidi chipan chidiokila kudi Yehova. (Kub. 4:10, 11; Kuj. 4:11) Yehova utukwashin kwijik mutapu wa kusadin chipan chinech nawamp kusutil Dizu diend. Tufanyidin kwikal chisu chawonsu tayad mulong wa kulond piur pa Yehova ni piur pa Want. (Mat. 24:14; Rom 10:14) Anch twasal mwamu, tumwimburijin Yesu. Dimwing pakach pa mayingishin ma usey nakash mezinay Yesu pa divu diading mulong wa kuyilej antu akwau uyakin piur pa Tatukwend. (Yoh. 18:37) Pakwez tufanyidin kuvurik anch mutapu wetu wa kulond udi kand wa usey. Chawiy, pituyilejina antu akwau piur pa Yehova, tufanyidin kusal mwamu nich “kudimuk ni kalimish,” ni tufanyidin kumekesh anch tubangidin yovil ni yitiyij ya antu akwau. (1 Pita 3:16) Mwamu, tukusal yom yivud kusutamu kwau kulond; tukufundish ni pamwing ap tukupukun muchim wa muntu. Amakurump kafanyidinap kwidjidjek kulond anch aman anch mukadivar ap nambaz kanang ukwet kuswir kwa yiyul. Chakin kamu, afanyidin kukimb chisu chiwamp cha kwambamb nend chakwel kangal amukwatish usany. w20.03 18-19 par. 2-4

Tukutwish kulembil piur pa chom ik? Tukutwish kumulembil Yehova chakwel “[a]tuwejinaku ritiy.” (Luka 17:5; Yoh. 14:1) Tukwet kuswir kwa ritiy mulong Satan ukuyipak antu awonsu amulondwila Yesu. (Luka 22:31) Ritiy rikutukwash mutapu ik? Anch twasal yawonsu tutwishina kusal mulong wa kupandikan yoziu, ritiy rikutwinkishay Yehova rikutukwash kulik kwov wom mulong twij anch ndiy ukupwish mulong winou pa chisu chiwanyidina. Mulong tuchingejin anch ndiy ukupwish milong nawamp kusutamu ayinetu, chawiy tukweta chisambu cha mu manangu ni cha mu muchim. (1 Pita 5:6, 7) Malembil matukwashining kulam chisambu chetu cha mu manangu yikalap nchik yoziu turishina nich. Shinshikin chilakej cha Robert, mukurump wa chikumangen ushinshamena ukweta mivu 80 ni kusut. Ulondin anch: “Chiyul chidia mu Filip 4:6, 7 chankwasha kurish nich yoziu yivud mu mwom wam. Nafanyina kurish ni milong ya kuburen nfalang. Ni chisu chimwing nashadisha dilau diam dia kusal mudi mukurump wa chikumangen.” Ov, yom ik yamukwasha Robert kulam chisambu cha mu manangu? Ulondin anch: “Anch nasambish kwiyakamish, nikat kulembil pakad kulab. Nikat kuman anch pinidandamedina kulembil nakash, nikat kwikal kamu ni chisambu nakash.” w19.04 9-10 par. 5-7

Kumuyipish mwan, chidi chitil pantaliken ni Nzamb. Anch muntu wasal chitil pantaliken ni muntu mukwau, wasal kal kand chitil pantaliken ni Yehova. Shinshikin chilakej chading mu Chijil chapanay Nzamb kudi in Isarel. Chijil chalonda anch muntu wading kumwiy mutej nend wading “wakad kushinshaman kudi Yehova.” (Lev. 6:2-4, NWT) Chakin kamu, anch muntu mu chikumangen wamuyipish mwan—ukat kuyipish diking diend—ni kusal mwamu kudi kuburen kushinshaman kudi Nzamb. Muntu wijikena mudi mwin kumwifukwil Yehova anch wamuyipish mwan wasaadikish kal dijin dia Yehova. Mulong wa diyingishin dined, tufanyidin kwijik anch kumuyipish mwan chidi chitil chikash pantaliken ni Nzamb ni tufanyidin kuchikis. Mitu ya milong yidia mu Chinong cha Kalam ni Réveillez-vous ! yisambidin kal mutapu ukutwishau antu ayipishau kurish ni yovil ya ushon yikata kwikalau nich chisu chilemp, mutapu ukutwishau antu akwau kuyikwash ni kuyikasikesh ni mutapu ukutwishau anvaj kuyichidij anau. Amakurump ayifumbin kal kusutil Mifund mutapu wa kupwish chitil chitadina kumuyipish mwan kusutil yisal ya masandj. Dirijek didandamedin kutenchik mutapu ukutwishau amakurump kupwish mulong wa chitil cha kumuyipish mwan. w19.05 9 par. 8-9

Dizu dia Nzamb didi mudi mpak ya musamun yikutwisha kumekesh patok makasu ma Satan. (Efes 6:17) Chilakej, Dizu dia Nzamb dimekeshin patok makasu makwel anch afu akutwish kwambamb ni antu adia aom. (Kus. 146:4) Dituvurishin kand anch ching kusu Yehova ndiy ukutwisha kulejan nawamp yom yikusadika machuku ma kurutu. (Isay 45:21; 46:10) Anch tukat kutang ni kutongijokin chisu chawonsu pa Dizu dia Nzamb, tukwikal atenchikinau mulong wa kwipuk ni kukis makasu makatinau aspiritu ayimp anch twitiyij. Chawiy, lik kusal chom chin chawonsu chikwatijadina ni ayilembil. Mulong tudi in Kristu, tukatap kwikal mu umwing nau ayilembil ap pakemp. Chilikej, tukuyangap kuyital in kupong ap kupakish kwambamb ni afu mu mitapu yin yawonsu. Tulikining yishankur ya chidil yimedina pa yitiyij ya kwel anch afu adandamedin kwikal ni mwom ndond kanang. Ni tukusadinangap wimbuk ap kupong mulong wa kwijik yom yikusadika machuku ma kurutu. Twij anch yisal yawonsu ya mutapu winou yidi ya ubaj nakash ni yikutwish kututek mu umwing nend Satan nau ayilembil end. w19.04 21-22 par. 8-9

Antu itiyina manangu ma mangand minam akat kukwat ni kapipej mbil ja Bibil piur pa kwishitul ni kwitiyij anch mbil jinej jidiap ja ukwash. Antu mudi inay akutwish kwipul anch: ‘Mulong wak Nzamb watutanga ni maku ma kulalijan ni kupwa watwit kulik kumasadin?’ Akat kwipul chipul chinech mulong wa chitongijok chau chiyimp chilondina anch muntu ufanyidin kwend kusal chom chawonsu chikatinay kusal. Pakwez yom yilondinay Bibil yishalijadin nakash ni chitongijok chinech. Utufundishin anch tukutwish kukwat mupak wa kuyikel maku metu mayimp. (Kol. 3:5) Chikwau kand, Yehova watwinkisha chipan cha uruw, kutenchik kusadina anch antu asangaresha maku mau mu mutapu wa kalimish. (1 Kor. 7:8, 9) Chinyim ni manangu ma mangand minam, Bibil utufundishin chitongijok chipandikena kuwap piur pa yidi ya ruvaj. Ulejen anch yid ya ruvaj yikutwish kutuletin musangar. (Jnsw. 5:18, 19) Chawiy, Bibil ulejen anch: ‘Chifanyidin muntu ni muntu kwijik kuyikel mujimbu wend mu katumb ni mu kalimish, wakad maku mayimp.’—1 Tes. 4:4, 5. w19.05 22-23 par. 7-9

Nzamb kakwitiyap anch michid yiyishesha antu end. Atushalapol a Nzamb akat kwibaz mulong asendin dijin diend ni aziyidin kwi mbil yend ya kudiokal mu Babilon Mujim. (Mid. 15:16, 17; Kuj. 18:4) Asadin kand usu wa kuyikwash antu akwau chakwel adiokal mu Babilon. Chawiy, ap anch atushalapol a Yehova akuyichidij chisu chikusheshau Babilon Mujim, pakwez akwikal ni kuswir kwa ritiy rikash mulong wa kujijamen yom yikusadika kupwa kwa kumushesh Babilon Mujim. (Ezek. 38:2, 8) Kupwa kwa kusheshik kwa ditenchik dia relijon wa makasu, antu a Nzamb akwiman dang mudi mutond umwing kusu wapanda kal ku rinkind mukash. Chakin kamu, Satan ukujiman nakash. Mulong wa ujim winou, ukusadin makasu ma ayilembil—‘mazu mapepidilau matakanena’—chakwel michid yibombakan pamwing mulong wa kuyirishikish atushalapol a Yehova. (Kuj. 16:13, 14) Kubombakan kwinoku kwa michid akutazukin anch ‘Gog wa ngand ya Magog.’ Chisu chikusambisha michid kuyirishikish antu a Yehova, pawiy pakusambisha njit ja Harmagedon.—Kuj. 16:16. w19.09 11 par. 12-13

Mu chirung cha Isarel wa pasak, Satan wasadina relijon wa makasu mulong wa kukasikesh yisal ya masandj. Nlel, Satan usadin kand mwamu. Relijon wa makasu witiyin kwend yisal ya masandj ni ukat kupakish kumekesh anch yisal yiney yidi kwau yiwamp. Cha ushon, antu avud afila mu kan anch amusadidin Nzamb alikin kal mbil jend ja kwishitul. Kambuy Paul ulejen mu mukand wend kudi in Rom yibudikin ya chisal cha relijon cha kukasikesh yisal ya masandj. (Rom 1:28-31) Pakach pa “yom yakad kufanyin kusal” padi mitapu yawonsu ya masandj, kuwejaku ni utun. (Rom 1:24-27, 32; Kuj. 2:20) Chidi cha usey mud ik kudi etu kushal aziyidina ku mafundish ma Bibil movikena! Manangu ma antu makwatijadinap ni mbil jitentamina ja Yehova. Makatap kuyikasikesh antu kukudish dibuj dia spiritu wa Nzamb, pakwez makat kukasikesh “yisalijok ya wuntu.” (Gal. 5:19-23) Makat kuyikasikesh antu ikal in kwibaz ni kwitutul, ni chibudikin chidi anch antu akat kwikal “in kwikat ayinau.” (2 Tim. 3:2-4) Mikadil yiney yikwatijadinap ni mwikadil wa kwitudish, kwikepish, mikadil yikatinay Nzamb anch atushalapol end ikal nich.—2 Sam. 22:28 w19.06 5-6 par. 12-14

Elija wamusadina Yehova mu yisu yikash ni warisha ni yakamish yikash. Chisu chamulejau Elija kudi Yehova kupan midimu yimwing kudi Elisha, Yehova wamekesha mu mutapu winou anch wamwinkisha Elija murund muwamp wafanyina kumukwash kurish ni yovil yend ya kuziy. Chilik chimwing, anch twamulej murund tuchingejidina mutapu twiyovila, ukutwish kutukwash kurish ni yovil yetu. (2 Ant 2:2) Anch waman anch ukwetap muntu ufanyidina kulej milong yey ni mutapu wiyovila, mulembila Yehova chakwel akukwash kuman mwin Kristu uswila ukutwisha kukukasikesh. Yehova wamukwasha Elija kurish ni yakamish yend ni kumusadin nich kushinshaman mu mivu yivud. Yom yamushikena Elija yitwinkishin ruchingej. Yisu yimwing tukutwish kurish ni yakamish yivud nakash ni tukutwish kuziy ku mujimbu ni mu manangu. Pakwez anch twamuchingejin Yehova, ndiy ukutwinkish usu tuswirikedina mulong wa kudandamen kumusadin.—Isay 40:28, 29. w19.06 15 par. 4; 16 par. 9-10

Tukutwish kwikal atakamena nakash kusambish katat kusutil kulejan rusangu ruwamp ra Want wa Nzamb. Mulong wak? Mulong mudimu wa kulejan ukat kutufundish kumuchingejin Yehova ni kulik kuyov antu wom. Mudi mutapu ukata kutatuk mujimbu wetu chisu twiyijidishina ni masengan kanang, kutakaman kwetu kukat kupandikan anch tulejen ku chikumbu ni chikumbu, pa ndond padia antu avud, mu chikashimwish, ni pa ndond yilandishidinau antu. Anch twakudish kutakaman mulong wa kulejan kusambish katat, tukwikal irijekina mulong wa kulejan ap anch akangesh mudimu wetu. (1 Tes. 2:1, 2) Tukutwish kwilej yom yivud kusutil chilakej cha anambaz aad ashinshamena amekesha kutakaman kukash. Nancy Yuen wading ni kulep kwa metre umwing ni chikunku, pakwez chadingap chiswapela kumwovish wom. Kitiyap kwimik mudimu wa kulejan rusangu ruwamp ra Want wa Nzamb. Mudi chibudikin amuteka mu rukan mu mivu piswimp 20. Antakel amurumburisha alonda anch wading “muntu ukweta mutu nakash” mwi ngand yau. w19.07 5 par. 13-14

Antu amwing akweting impu nakash ya kwilej uyakin wa Bibil, pakwez antu avud tutanijadining nau kapamp kakusambish akutwish kumekan mudi kakatinap kwau. Tufanyidin kuyikwash chakwel akata kwilej. Mulong wa kulejan nawamp, tufanyidin kwirijek nawamp. Tond mitu ya milong kanang yiumena anch yikuyisangaresh antu ukutanijana nau. Kupwa irijeka piur pa mutapu wa kusadin mutu wa mulong wawonsu watondang. Chilakej, ukutwish kumwipul mwin chikumbu anch: “Ov, chikusangareshin niteshap chitongijok chey piur pa chipul ech? Milong yivud turishina nich nlel yiyikwatin antu pa mangand mawonsu. Ov, utongin anch tukwet kuswir kwa guvernema wa an a antu mulong wa kupwish mar madia pa mangand?” Kupwa ukutwish kwisambin Daniel 2:44. Ap kand ukutwish kumwipul muntu anch: “Wisu mutapu uwamp wa kuyilil an chakwel ikal ni mikadil yiwamp? Nikatin amboku kutesh chitongijok chey.” Kupwa isambina Kuvurik Yijil 6:6, 7. Pakad kwidjidjek, tukat kwovang musangar nakash anch twamukwash muntu kwikal mwin kwilej wa Kristu. w19.07 15 par. 4, 6-7

Chidi mutapu ik mulong wa antu alondining anch awiy kamwitiyijinap Nzamb? Mukadivar umwing ukweta ukaliweny walejena kal nakash kudi antu akad kwitiyij a mu jingand ja Kwingangel kwa Asie ulondin anch: “Yisu yivud anch muntu walond anch, ‘nimwitiyijinap Nzamb,’ chimeken anch kakatap kwifukwilang anzamb ifukwidinau antu avud mwi ndond mushichay. Chawiy nitiyijining anch anzamb avud adi yirumbidij ya antu ni kadingap akin. Yisu yivud nikat kutang Jeremiy 16:20 ni nikat kuyipul anch: ‘Mutapu ik tukutwisha kujingunin nzamb wakin ni yirumbidij ya antu?’ Nikat kumuteshang nawamp, kupwa namutangin Isay 41:23 ulondina anch: ‘Tulejanyap yom yikeza kez kurutu, chakwel tukwijikany anch, komb udiany anzamb a kashinsh!’ Kwinsudien nikat kumulej chilakej chilejena yom yatakelay kulejan Yehova mulong wa machuku ma kurutu.” Mukadivar mukwau ulondin anch: “Nikat kuyilejang yilakej yimekeshina manangu ma Bibil, kuwanyin kwa uprofet wa Bibil, ni yijil yimwing yitakedila yom yatangau. Kupwa nikat kuyilejang mutapu umekeshina yom yiney yawonsu anch kudi Sakatang udia mwom ni ukweta manangu. Anch muntu witiyij anch Nzamb udingaku, am nikat kusambish chadi kumulej yilondinay Bibil piur pa Yehova.” w19.07 23-24 par. 14-15

Mu yom yiney yikweta usey mudi kutumbish dijin dia Yehova, kuwanyin kwa kushilamu kwend ni chisambu ni uumwing mu chikumangen. (Mat. 6:9, 10; Yoh. 13:35) Anch yom yiney yikal ya usey nakash mu mwom wetu, tumekeshin anch tumukatil Yehova. Kambuy Paul walonda kand anch tufanyidin “kwikal zwang.” Chinech chirumburikinap anch tufanyidin kamu kwikal awanyidina. Yehova ukutuman anch tudi zwang anch twasal usu wetu wawonsu mulong wa kukasikesh rukat retu ni kushinshikin pa yom yikweta usey nakash. Mutapu umwing tumekeshina rukat retu udi kusutil kusal usu wetu wawonsu mulong wa kwipuk kuyipwakesh antu akwau. Mbil ya kwipuk kuyipwakesh antu akwau yidi chakin kamu kubabesh kujim. Mutapu ik tukutwisha kumupwakesh muntu mukwau? Tukutwish kusal mwamu kusutil mutapu wetu wa kwipuwangej, mutapu wetu wa kudjal, ap midimu ya ku mujimbu tutondina. Pamwing ap yom tusadina yiyipinap kwau. Pakwez anch yom tutondina yarumbangesh kom ka muntu mukwau ni wipwakal, udi mulong ujim nakash.—Mat. 18:6. w19.08 10 par. 9-11

Kusambish mu muvu wa 1935, Atuman a Yehova atesha chad nawamp anch chisak chipandikena kujimb chamanay Yohan mu chishimushimu chading cha in Kristu ashinshamena akweta ruchingej ra kushakam chikupu pa divu. (Kuj. 7:9, 10) Mulong wa kupand ku mar makash, chisak chipandikena kujimb chifanyidin kwilej piur pa Yehova kurutu winyikel wa Mivu Kanan usambish. Chikwet kuswir kwa kumekesh ritiy rikash mulong wa ‘kurezik ku yom yiney yawonsu yikeza kez’ kurutu kwa Winyikel wa Mivu Kanan wa Kristu. (Luka 21:34-36) Antu a mu chisak chipandikena kujimb akwet musangar nakash piur pa ruchingej rau. Ij anch Yehova ndiy ukata kukwat mupak piur pa ndond yifanyidinau kumusadin atushalapol end ashishamena, mwiur ap pa divu. In Kristu azizidilau many ni adia mu chisak chipandikena kujimb, awonsu ij anch akutambul difut diau ku ranaken ra Yehova ramekeshay kusutil chakupesh cha difut dia Yesu Kristu.—Rom 3:24. w19.09 28 par. 10; 29 par. 12-13

Ov, ukwet chisend chisu? Sal usu chakwel uchijidin. Kangal watong anch akuswimp kal mulong wasadin mudimu uyimp mu chisend chey chikur ap mulong ukwetap usey. Tongin pa mitapu yivud yikukwashinau kudi Yehova ni dandamen kulejan. Yimburija in Kristu a mu mivu chitot ya kusambish. Kwi ndond kwawonsu kwadingau, “awiy ading ni kurumburil mazu ma Nzamb.” (Mid. 8:1, 4) Usu wey usadina mulong wa kudandamen kulejan, ukutwish kulet yibudikin yiwamp. Chilakej, ayibol opatau mwi ngand yimwing ashemunikina mwi ngand yikwau mwadinga maswir nakash ma in kulejan a dizu diau. Mu angond akemp, yirund ya yikumangen yasambisha pakad kulab. Musangar wetu ujim ufanyidin kudiokal ku urund wetu ni Yehova Chawiy, anch tukimbin kwikal ni musangar, tufanyidin kwikal piswimp ni Yehova, kudandamen kumuchingejin chakwel atwinkish manangu, umutakel, ni ukwash. Vurik anch washikena kukat chisend chey chikur mulong wasala usu wey wawonsu mulong wa kuyikwash antu a ndond yiwading. Sal usu wa kukat chisend chey chisu ni tongijokin pa mutapu ukukwashinay Yehova chakwel ukat kand chisend chinech.—Mul. 7:10. w19.08 24-25 par. 15-16

Tufanyidin kumuziyil Yehova mulong udi Sakatang wetu. Mulong wa diyingishin dined, ukwet mbil ya kutulej yom tufanyidina kusal. (Kuj. 4:11) Pakwez, tukwet kand diyingishin dikwau disadina anch tumuziyil Nzamb—mutapu wend wa kutakel udi uwamp nakash. Kudiokal pakur, antakel avud akweting ka usu kanang ni ka ulabu kampand piur pa antu akwau. Anch twayilakej antakel inay ni Yehova, tumen anch Yehova udi Ntakel ukweta manangu nakash, rukat ripandikena, ranaken, ni riy kusutamu antakel awonsu. (Kub. 34:6; Rom 16:27; 1 Yoh. 4:8) Tukat kumuziyil Yehova kusutil kusal usu wa kumuziyil mu yom yin yawonsu ni kusutil kurishikish maku mayimp ma kukat kwitekin mbil piur pa yom yiwamp ni yiyimp. (Jnsw. 3:5) Chikat kutuswapel kumuziyil Yehova anch twilej yom yivud piur pa mikadil yend yipandikena kuwap. Mulong wak? Mulong mikadil yiney yimekedining mu yom yawonsu yisadiningay. (Kus. 145:9) Chitudandamedina kwilej piur pa Yehova, tukushiken ku kumukat nakash. Ni anch twamukat Yehova, tukwikalap ni kuswir kwa list wa yom tufanyidina kusal ni yom yitwakad kufanyin kusal. w19.09 14-15 par. 1, 3

Satan ukat kuyimesh antu mar nakash nich makasu mend ni chinech chiyisadin antu ashadisha ruchingej. Chilakej, ukatin twitiyij anch Yehova kakutulikishinap yitil yetu ni anch katukatilap. Minam madi makasu mayimp mayimeshina antu mar nakash! (Yoh. 8:44) Anch ‘twez kudi’ Kristu, yitil yetu akat kuyilikishin. (Mat. 11:28) Ni uyakin udi anch Yehova utukatin etu awonsu nakash. (Rom 8:32, 38, 39) Chisend chitwinkinay Yesu kusend chishalijadin ni yisend yikwau tufanyidina kusend. Chilakej, kwinsudiel kwa dichuku pitukata kupwish kusal mudimu wa ku mujimbu, antu avud kakatap kusu kwau kuziy pakwez akat kushadish kand musangar wau. Chinyim ni chinech, kupwa kwa kusutish chisu mu mudimu wa Yehova ni wa Kristu, tukat kov musangar nakash. Tukutwish pamwing ap kuziyni kusal usu wa kuya ku yikumangan chisu cha urel. Pakwez yisu yivud tukat kwikal akasikeshinau chisu tudiokila ku yikumangan ni usu ukat kuchirik kand. Yom yiney yikat kusadik kand chisu tukata kusal usu wa kulejan ni kusal dilejan dia Bibil dia muntu panrend. Difut tukata kutambul didi dijim kusutamu usu tukata kusadin! w19.09 20 par. 1; 23-24 par. 15-16

Mu chisu chinech chikemp chishadilaku kurutu kwa “dichuku” diend kusambish, Yehova ukatin anch tudandamen kwikal akwatikena nakash mu mudimu wa kulejan. Tufanyidin kwikal nich kashinsh anch “[tusadin] nich mushiku midimu ya Nsalejetu.” (1 Kor. 15:58) Pisambinay Yesu piur pa yom ya usey nakash yikusadika mu machuku ma kwinsudiel, walonda kand anch: “Chifanyidin rusangu ruwamp arulejan bil kudi antu a michid yawonsu.” (Mar. 13:4, 8, 10; Mat. 24:14) Tongin pa chom ech: Chisu chawonsu uyila mu mudimu wa kulejan, umekeshin anch ukwashin mulong wa kuwanyish uprofet winou wa Bibil! Muvu ni muvu, mudimu wa kulejan Want udandamedin kuya kurutu. Chilakej, tongijokin kuvulijan kwa in kulejan a Want pa mangand mawonsu mu machuku minam ma kwinsudiel. Mu muvu wa 1914, kwading kwau in kulejan 5155 mu jingand 43. Nlel kudi in kulejan amiliyon 8 ni chikunku, mu jingand 240! Ap mwamu, mudimu wetu kandikal upwa. Tufanyidin kudandamen kuyilej antu anch Want wa Nzamb wawiy kusu ukupwisha milong ya antu.—Kus. 145:11-13. w19.10 8 par. 3; 9-10 par. 7-8

Yehova wamusadila Barizilay mulong wa kumukwash Mwant David. David ni antu adingay nend ading ‘afil nzal, aziyin ni ovil impu’ pading pamuchininau Absalom Mwan ikundj wa David. Barizilay wading wananapina kal pamwing ni antu akwau ateka mwom yau mu ubaj mulong wa kumukwash David ni antu ading nend. Barizilay katongap anch Yehova kafanyinap kand kumusadil mulong wa upal. Pakwez, wasadila ukaliweny wadingay nich mulong wa kuyikwash atushalapol a Nzamb ading mu maswir. (2 Sam. 17:27-29) Chilakej chinech chitufundishin ik? Chikalap nchik mivu tukweta, Yehova ukutwish kutusadil mulong wa kuwanyish maswir ma ambay netu mu ritiy adia pa ndond tushicha ap adia mwi ngand yikwau akweta kuswir kwa ukwash. (Jnsw. 3:27, 28; 19:17) Ap anch tukutwishap kuyikwash etu ayinetu, pakwez tukutwish kunung chikas ku mudimu usadikina pa mangand mawonsu kusutil milambu chakwel nfalang jinej jitwish kuyikwash akadivar ni anambaz chisu chikwetau kuswir kwa ukwash.—2 Kor. 8:14, 15. w19.10 21 par. 6

Chikutwish kutukasiken kuyilej antu akwau yom patok mulong pamwing ap muntu kanang waturumbukina pasak. (Jnsw. 18:19) Ap tukutwish kutong anch tukwetap chisu ni usu mulong wa kukudish urund wa piswimp. Pakwez, tufanyidinap kuziy. Anch tukatin anch akadivar netu ez atukwash pa yisu ya yakamish, tufanyidin kwilej kuyichingejin kamu chakin kusambish katat kusutil kuyilej yom tutongina ni mutapu twiyovila. Riner ridi rizau ra usey nakash tufanyidina kusal mulong wa kwikal arund akin. (1 Pita 1:22) Yesu wamekesha anch wading uyichingejidin arund nend kusutil kwambamb nau patok pakad kuyijindjikin chom. (Yoh. 15:15) Tukutwish kumwimburij kusutil kuyilej arund netu yom yikata kutusangaresh, yakamish yetu, ni yom yikata kutujimesh. Ikal mwin kutesh muwamp anch muntu ukulejin yom, ni ukuman patok anch ukwetany yitongijok, yovil ni mipak ya mutapu umwing. Anch ukat kuyilej arund ney yitongijok ni yovil yey ni kuyitesh nawamp chisu chikulejinau yitongijok ni yovil yau, urund wen ukukasikan. Mudi Cindy, anch wikal ni chaku cha kwambamb nawamp ni patok nau antu akwau, urund wey nau antu inay ukukasikan.—Jnsw. 27:9. w19.11 4 par. 8-9

Chimeken anch chisu cha mar makash, uruu tulejena nlel ukuswimp. Nlel, tukat kulejan rusangu ruwamp ra Want ni tukat kusal usu wa kwikadish in kwilej. Pakwez chisu chinicha, chimeken anch tukulejan uruu usansena udia mudi mayal ma nvul. (Kuj. 16:21) Tukutwish kulejan anch piswimp ap mangand ma Satan makusheshik. Anch chisu chawanyin, tukwijik nawamp uruu tukulejana ni mutapu wa kuulejan. Ov, tukusadin milad twasadinang mu mivu ya kwinyim mulong wa kulejan ni kufundish? Anch tukusadin milad yindj? Tufanyidin kuchingel mulong wa kuman yom yikusadika. Chikalap nchik mutapu tukulejana, chimeken anch tukupalangesh pakad wom uruu wa dirumburish dia Yehova! (Ezek. 2:3-5) Chimeken kamu anch uruu wetu ukuyibachik antakel a mangand kupakish kutunenetish kapamp kamwing djat kamu chikupu. Mudi mutapu tumuchingejidina Yehova nlel mu mudimu wetu wa kulejan, tukwikal kand ni kuswir kwa kumuchingejin pa chisu chinicha. Tukutwish kwikal nich kashinsh anch Nzamb wetu ukutwinkish usu upandikena mulong wa kuwanyish rusot rend.—Mike 3:8. w19.10 16 par. 8-9

Dizu ‘kupumbuk’ dirumburikin anch tukutwish kwikal ni kampuw kusutil kushinshikin nakash piur pa kwikal ni yom yitwakad kwikal nich kuswir. Muchim wetu ukutwish chad “kutem nich yakamish yivud.” (1 Tim. 6:9) Pa ndond pa kulikidil maku minam mu muchim wetu, tufanyidin kumaman mudi mat makutwisha kutushesh. Tongin bil anch ukwet nfalang jiwanyidina kuland yom yivud ya ku mujimbu. Ov, chiyipin kuland yom ukatina pakwez yiwakad kamu kwikal nich kuswir katat? Tukutwishap kulond kamu anch chiyipin. Pakwez tongin pa yipul ey: Ap anch tukwet mutapu wa kuland chom kanang, ov, tukwet chakin kamu chisu ni usu wa kuchisadin ni kuchirijek? Chikwau kand, ov, tukukat nakash yom ya ku mujimbu? Ov, rukat retu ra yom ya ku mujimbu ritubachikin kusal yom mudi yasalay nsand walika kutazuk kwa Yesu kwa kujimbish mudimu wend mulong wa Nzamb? (Mar. 10:17-22) Chikwikal chiwamp kudi etu mudi ik kupipej mwom wetu ni kusadin chisu chivud ni usu wetu mulong wa kusal rusot ra Nzamb! w19.11 18 par. 15-16

Nzamb ukutwish kukwinkish ‘usu wa kusal yom’ ni kuwanyish mupak wey. (Fil. 2:13) Chawiy, mwita Yehova spiritu wend utumbila ukutwisha kukwinkish usu uswirikedina. Dandamen kulembil ap anch chakul cha malembil mey chimeken mudi chilabin. Mudi mwalonday Yesu: “Dandamenany kwit, ni akukwinkishany [spiritu utumbila].” (Luka 11:9, 13) Chikwau kand, sal plan. Mulong wa kuwanyish chom chin chawonsu utongina kusal, ufanyidin kusal plan. Kupwa ufanyidin kusal kukwatijan ni plan winou. Chilik chimwing, anch wakwat mupak, fund nzau ufanyidina kulondul mulong wa kuwanyish nawamp mupak wey. Kwangan mudimu ujim mu tumidimu tukemp tukemp, kukutwish kusal anch chikuswapel kuusal. Kambuy Paul wayikasikesha in Kristu a ku Korint kutek chikunku cha nfalang kuns “dichuku dia [kusambish] dia rubing ni rubing” pa ndond pa kuchingel ni kupakish kupan yom yawonsu pa chisu chikushikay. (1 Kor. 16:2) Kwangan mudimu ujim mu tumidimu tukemp tukemp kukukukwash kand kulik kwiyov anch ukutwishap kuupwish. w19.11 29 par. 13-14

Tukutwish kulond anch muntu wij yom yimwing piur pa Yehova anch wij dijin dia Nzamb ap wijaku yom yimwing Yalonday ap Yasalay. Pakwez, kumwijik Yehova nawamp kwitin yom yivud. Tufanyidin kwitekin chisu cha kwilej piur pa Yehova ni pa mikadil yend yipandikena kuwap. Ching kusu anch twasal mwamu chad lel twatwish kujingunin mayingishin makata kumubachik kulond ap kusal yom. Kusal mwamu kukutukwash kujingunin anch yitongijok, mipak ni yisal yetu yimusangareshining. Anch twajingunin yom yikatinay Yehova anch tusal, tufanyidin kuyisadil. Antu amwing akutwish kutusip ap kupakish kutwovish usany mulong tukatin kumusadin Yehova, ni akutwish kutupompat nakash anch twasambish kukumangan pamwing ni antu end. Pakwez anch twamuchingejin Yehova, kakutulikap ap pakemp. Tukusambish kutek mufulandal wa urund wetu wa piswimp ni Nzamb, urund wa chikupu. Ov, tukutwish chakin kamu kumwijik Yehova nawamp nlel? Inge, tukutwish! w19.12 16-17 par. 3-4

Yisu yimwing anvaj akutwish kuman anch chikasiken nakash kuyifundish anau, pakwez an chidi chipan cha Yehova. Udiaku chisu chawonsu mulong wa kuyikwash anvaj. Ukatining kutesh malembil ma anvaj. Ni ukat kwakulang malembil minam kusutil Bibil, mikand yetu, ni kusutil yilakej ni yiyul ya anvaj akweta ukaliweny adia mu chikumangen. Antu amwing alondining anch kumulil mwan udi mudimu wa mivu 20, pakwez winvaj ukupwangap. Rukat, chisu, ni kufumb kudiokila mu Bibil yidi pakach pa yom yipandikena kuwap yikutwishau anvaj kuyinkish anau. Mwikadil wa mwan ni mwan pantaliken ni kufumb kutambwilay ushalijadining. Pakwez avud pakach pau alilau kudi anvaj adia Atuman a Yehova akat kwiyov mudi Joanna Mae, nambaz wa mu Aziy ulondina anch: “Nikat kuyijikitish nakash anvaj am mulong ampupang ni anfundisha kumukat Yehova. Kanginkap ching kusu kwau mwom, pakwez ankwasha kand kwikal ni mwom wa musangar.” (Jnsw. 23:24, 25) Mamiliyon ma akadivar ni anambaz iyovil mutapu winou. w19.12 27 par. 21-22

Chiswapeling kuyijingunin akadivar ni anambaz akweta kuswir kwa kuyongoj. Tufanyidin kukimb mitapu ya kuyongoj antu akwau ap anch twoviling wom wa kusal mwamu. Chilakej, tukutwish kwov wom anch twijap kwetu yom ya kulond ap tufanyidina kusal kudi muntu ukweta kuswir kwa kumwongoj. Tukutwish kwikal in kwongojan awamp anch twamekesh anch tuyibangidin antu twongojina. Pitudandamedina kusej piswimp ni disudiel dia mangand minam, mashakamin mu mangand makuyip nakash ni mwom ukwikal ukash. (2 Tim. 3:13) Ni milong twikakidina ayinetu mulong wa chitil twaswana ni kuburen kuwanyin yimekeshin anch tukudandamen kwikal ni kuswir kwa rongoj. Anch kambuy Paul watwisha kujijaman nich kushinshaman djat ni ku rufu rend, ku mutambu umwing chidi mulong amwongoja kudi ambay nend in Kristu. El twikalany ashinshamena mudi Aristarik, akuchingejin mudi Tishik, ni akatina kuyisadin antu akwau mudi Marko. Kusutil kwimburij chilakej chau, tukutwish niyetu kuyikwash akadivar nau anambaz netu kwiman dang mu ritiy.—1 Tes. 3:2, 3. w20.01 12-13 par. 17-19

Azizidilau many kakatap kuchingej anch antu akwau ayisadin mu mutapu wa pakampwil. (Fil. 2:2, 3) Ij anch chisu chayizizilau many, Yehova kamwijikishamwap muntu ap umwing yom yiney. Chawiy muntu uzizidilau many kakatap kushimok anch antu akwau kitiyijinap anch udi uzizidilau many. Ukat kuvurik anch Bibil utulejin anch tufanyidinap kwitiyij kamu kapamp kamwing anch muntu walond anch Nzamb wamwinkishin chisend cha pakampwil. Mwin Kristu uzizidilau many kakatiningap anch antu amumana mu mutapu wa pakampwil. Chawiy, chisu chidiay nau antu akwau kakatap kuyilejamu anch udi uzizidilau many. Ni kafanyidinap kwibaz piur pa yom yiney. (1 Kor. 4:7, 8) In Kristu azizidilau many kakatap kuyikimb in Kristu akwau azizidilau many mulong wa kwisambin piur pa dilau dined ap kusal tuyisak kanang twa ayinau mulong wa kwilej Bibil. (Gal. 1:15-17) Chikumangen chikwikalap mu uumwing anch azizidilau many asal mwamu. Mulong akusal yom yakad kukwatijan ni spiritu utumbila, ukata kuyikwash antu a Nzamb kwikal ni chisambu ni uumwing.—Rom 16:17, 18. w20.01 28 par. 6-7

Chimeken anch antu akweta marelijon masheshikina akutwish kujiman nakash pakumanau anch relijon wa Atuman a Yehova kasheshikinap. Chakin kamu, akumekesh ujim wau patok, mudi kusutil kupalangesh jinsangu jiyimp pa Internet. Antakel a mangand ni mwant wau Satan akutukis nakash mulong relijon wetu ndiy kusu ukudandamena kwikalaku. Akukangany kuwanyish chitongijok chau cha kushesh marelijon mawonsu ma pa mangand. Chawiy, akutushinshikin chad etu. Chisu chinicha, michid yikubombakan chad mulong wa kwikal Gog wa Ngand ya Magog. Yikubombakan yawonsu pamwing mulong wa kuyirishikish antu a Yehova nich usu win wawonsu. (Ezek. 38:2, 14-16) Tukutwish kusambish kwov wom mulong wa yom yikushikena chisu cha mar makash, pakampwil mulong twijap yom yin yawonsu yikushikena. Pakwez, tukwet kashinsh ka chom chimwing: Tufanyidinap kwov wom wa mar makash. Yehova ukutwinkish mbil tufanyidina kulondul mulong wa kutupandish.—Kus. 34:19. w19.10 16-17 par. 10-11

Pa ndond pa kwikal kusu kwau ni yovil ya kujikitish; tufanyidin kand kulond ni kusal yom yimekeshina anch tumujikitishin Yehova. Chinech chikat kumekesh anch tushalijadin ni antu avud nlel. Tushich mu mangand mudia antu akad kujikitish mulong wa yom yawonsu yiyisadidinau kudi Nzamb. Chakin kamu, chijingidij chimwing chimekeshina anch tushich mu “machuku ma kwisudiel” chidi anch antu kadiap in kujikitish. (2 Tim. 3:1, 2) Pikil amboku twimburijany ap pakemp mwikadil winou! Anvaj kakatiningap anch anau ikal in matend, pakwez ikal arund. Chilik chimwing, Yehova ukatin anch anend awonsu ikal mu urund uwamp umwing ni mukwau. Chakin kamu, rukat tukweta umwing ni mukwau rimekeshin anch tudi in Kristu akin. (Yoh. 13:35) Twitiyin mazu malonday nfund a kuseng anch: ‘Talany kuwap ni musangar kudi akadivar wa kushakam pamwing mu uumwing!’ (Kus. 133:1) Anch twayikat akadivar ni anambaz netu, tumekeshin anch tumukatin Yehova. (1 Yoh. 4:20) Chisangareshin mud ik kwikal mu dijuku dia akadivar ni anambaz “adimukina, in kwanakenijan muntu ni mukwau”!—Efes 4:32. w20.02 9 par. 6-7

Yom yading yimuletidina Ana yakamish yapwap kamu kapamp kamwing. Wadandamena kushakam mu chikumbu chimwing ni Penina. Ni Bibil kalejenap anch Mwikadil wa Penina waswimpa, bwat. Chawiy chimeken anch Ana wafanyina kudandamen kujijamen rupompat ra mukajinend. Pakwez Ana watwisha kuchirish chisambu chend cha mu manangu ni kuchilam. Kupwa kwa kutek mulong wend mu makas ma Yehova, Ana kiyakamishap kand bwat. Witiya anch Yehova amwongoj ni kumulembijek. Kupwa kwa chisu kanang, Yehova wakula malembil ma Ana ni wavala an! (1 Sam. 1:2, 6, 7, 17-20) Tukutwish kuchirish chisambu chetu ap anch yom yituletidina yakamish yidandamedin. Ap anch twadandamen kulembil ni kuya ku yikumangan yisu yawonsu, milong yimwing yikutwish kudandamen. Pakwez kusutil chilakej cha Ana, twilejin anch kwikil chom chikutwisha kumukangesh Yehova kwongoj muchim wetu wiyakamishina. Yehova kakezap kutuvuramen ap pakemp, ni piswimp ap, ap kand kupwa kwa chisu kanang ukutufut mulong wa kushinshaman kwetu.—Heb. 11:6. w20.02 22 par. 9-10

Amakurump kakatap kwidjidjekang mulong wa kuyinkish antu akwau mbil ja Bibil jikutwisha kuyikwash kukwat mipak ya manangu. Mulong wak chidi cha usey kwikal nich kutakaman kwa kulond pa chisu chitina kusal mwamu? Shinshikin chilakej cha Eli: Mwin Kupesh Mujim Eli wading nau an amakundj aad ading akatinay nakash. Pakwez, an amakundj inay kadingap kwau kamulimishina Yehova. Ading akwet chisend chijim nakash cha kusadin ku dizang mudi in kupesh. Pakwez asadina nayimp umutakel wau, kadingap kalimishina ap pakemp yakupesh yaletangau mulong wa Yehova, ni asalang masandj patok. (1 Sam. 2:12-17, 22) Kukwatijan ni chijil cha Moses, an a Eli ading afanyidin kufa, pakwez Eli wayikanda kusu kwend nich usweral ni wayilika adandamen kusadin ku dizang. (Kuv. 21:18-21) Yom ik yatongay Yehova piur pa yom yasalay Eli pa mulong winou? Wamuleja Eli anch: “Ov, mulong wak uyilimishina aney kwinsutamu am?” Chawiy, Yehova wakwata mupak wa kuyijip amakundj inay ayimp aad.—1 Sam. 2:29, 34. w20.03 19 par. 4-5