Ngond wa 8

Ap pa chisu chamumeshangau mar, Yesu wading ni chisambu cha mu manangu mulong wading wij anch umusangareshin Tatukwend. Washala uziyidina mu yisu yikash. Wamukata Tatukwend ni wasala anch kumusadin Tatukwend kwikal pa ndond ya kusambish mu mwom wend. Kurutu kwa kwez pa divu, wading ‘nsalamudimu’ pamwing ni Nzamb. (Jnsw. 8:30) Ni padingay pa divu, wayifundishang antu akwau nich mushiku piur pa Tatukwend. (Mat. 6:9; Yoh. 5:17) Mudimu winou wamuletina Yesu musangar ujim. (Yoh. 4:34-36) Tukutwish kumwimburij Yesu anch twamuziyin Yehova ni twikal ‘akweta chisu chawonsu yivud ya kusal mu mudimu wa Mwant.’ (1 Kor. 15:58) Anch twikal ‘akwatikena nakash’ mu mudimu wa kulejan, tukutwish kwikal ni chitongijok chiwamp piur pa milong yetu. (Mid. 18:5) Chilakej, antu tukata kutan mu mudimu wa kulejan akat kurish ni milong yikash. Pakwez, anch ilej kumukat Yehova ni kusadin mbil jend, mashakamin mau makat kuwap ni akat kwikal ni musangar. Chisu chawonsu patumena yom yiney, tukat kwikal ni kashinsh anch Yehova ukutubangin. w19.04 10-11 par. 8-9

Antu iniya asala usu nakash mulong wa kuyipandikan aspiritu ayimp. Mabuku mau ma maji mading ma nfalang jivud. Pakwez pa ndond pa kumapan mabuku minam ap kumalandish kudi antu akwau, amashesha kamu mawonsu. Ading ashinshikidin pa kumusangaresh Yehova kusut kushinshikin pa uvud wa nfalang ja mabuku mau. Mutapu ik tukutwisha kwimburij chilakej cha in Kristu a mu mivu chitot ya kusambish? Chikwikal cha manangu kudjibul yom yin yawonsu yitutekina mu umwing nau ayilembil. Mu yom yiney mudi disaku dia kwichidij nich, mukwas, ap yom yin yawonsu yidjadiningau ap yikwetingau antu mulong wa kwichidij kwa aspiritu ayimp. (1 Kor. 10:21) Shinshikin nawamp kwipuwangej kwey. Iyipula anch: Ov, mu kwipuwangej mwam muding yom ya ayilembil? Kwat mupak ukukukwasha kwipuk chom chawonsu chikisinay Yehova. Tukatin kusal usu wetu wawonsu mulong wa “kwikal nich kom kawamp” kurutu kwa Nzamb.—Mid. 24:16. w19.04 22-23 par. 10-12

Amakurump afanyidin kushinshikin nakash piur pa yom yivud anch ijik anch kudi muntu kanang wasalang chitil chijim. Chitongijok cha kusambish cha amakurump chifanyidin kwikal cha kulam dijin dia Nzamb ditumbila. (Lev. 22:31, 32; Mat. 6:9) Yom yikwau yijim yikatau kushinshikin yidi kuyikwash akadivar nau anambaz a mu chikumangen kushal piswimp ni Yehova, kuyongoj ni kuyikasikesh antu arumbukidinau. Chikwau kand, anch mwin kusal chitil udi muntu wa mu chikumangen, amakurump akat kusal usu wa kushinshikin anch muntu udi mwin kukarumuk ni anch chitwishikin kumukwash kuwapish urund wend ni Yehova. (Jak. 5:14, 15) Mwin Kristu ukata kukudish maku mayimp ni kusal chitil chijim uyedin mu spiritu. Chinech chirumburikin anch kadiap kand mu urund uwamp ni Yehova. Chawiy, amakurump adi amingang a mu spiritu. Akat kusal usu wa kumwok “muyej [muntu wasalang chitil].” Yiyul yau yimedina pa Bibil yikutwish kumukwash muntu wasalang chitil kuwapish urund wend ni Nzamb, pakwez chom chinech chikutwish kusadik anch udi chakin mwin kukarumuk.—Mid. 3:19; 2 Kor. 2:5-10. w19.05 10 par. 10-11

Yehova ukutwish kutwinkish impu ya kusal yom. Mutapu ik ukutwishay kusal mwamu? Pamwing ap tukutwish kujingunin anch mu chikumangen mudi muntu kampand ukweta kuswir kwa ukwash ap mudi chom kampand chifanyidina kusal. Ap anch amakurump atang mukand udiokila ku biro wa mutiy ulejena anch kudi chikumangen kanang chakad kwikal mu teritwar wetu chikweta kuswir kwa ukwash. Chinech chifanyidin kutubachik kwiyipul ayinetu anch: ‘Mutapu ik nikutwisha kukwash mulong wa kuwanyish maswir minam?’ Ap pamwing ap atwinkishin chisend kanang chikash, ni tukat kwiyipul anch tukutwish kamu kuchiwanyish nawamp. Ap kand kupwa kwa kutang maverse kanang ma Bibil, tukutwish kwiyipul anch: ‘Mutapu ik nikutwisha kusadin verse winou mulong wa kuyikwash antu kwau?’ Yehova kakutushindilap kusal yom kanang. Pakwez, anch waman anch tukat kutongin piur pa yom tukutwisha kusal, ukutwish kutwinkish impu ya kusal yom tutongina. Yehova ukutwish kand kutwinkish usu wa kusal yom. (Isay 40:29) Ukutwish kutwinkish spiritu wend utumbila mulong wa kuwapish nakash ukaliweny wetu tukweting kal. (Kub. 35:30-35) Kusutil dirijek diend, Yehova ukutwish kutufundish mutapu wa kuwanyish yisend kanang. Anch utongin anch ukutwishap kuwanyish chisend kanang, it ukwash. Kupwa, mwita chisu chawonsu Tatukwetu wa mwiur ukata kupan chakwel akwinkish “ukash upandakena ukash wawonsu.”—2 Kor. 4:7; Luka 11:13. w19.10 21 par. 3-4

Mangand makat kukasikesh chitongijok chiyimp cha kwitongin. Buku umwing ulondin anch mu mivu ya 1970 abudisha mabuku “mapanina yiyul piur pa mutapu wa kwikal ni mashakamin mawamp.” Mabuku mamwing “mayikasikesha in kumatang anch muntu ufanyidin kwiyijik, kwikwat ni usey ni kusal musambu mulong wendendiy amwinend.” Chilakej, shinshikin mazu mafundau mu buku umwing malondina anch: “Ikata amwiney mulong udi muntu upandikena kuwap ni ukweta usey nakash mu mangand.” Buku winou walonda anch “muntu ufanyidin kukwat mupak piur pa mutapu ukwikalay ni kusal yawonsu yitonginay anch yiwapin.” Ov, wateshinap kal yitongijok yiney? Satan wamukasikesha Ev kusal yom ya mutapu winou. Walonda anch Ev ukwikal “mudi Nzamb, [mwin] kwijik kuwap ni kuyip.” (Dis. 3:5) Nlel unou, antu avud itongidin nakash ayinau ni atongin anch muntu ap Nzamb kafanyidinap kuyilej yifanyidinau kusal piur pa mipak yau yikwatinau yitadina yom yiwamp ni yiyimp. Chilakej, mwikadil winou umeken pakampwil mu mutapu umenau antu uruw. w19.05 23 par. 10-11

Yisu yimwing, yakamish yamupandikena Mwant David. Tongin yakamish yarishay nich. Wifisha nich mulong wa yitil yivud yasalay. (Kus. 40:12) Mwanend mukatish Absalom wamurishikisha ni kusut kwa machuku Absalom amujipa. (2 Sam. 15:13, 14; 18:33) Ni murund umwing wa piswimp nakash wa David wamutuna. (2 Sam. 16:23–17:2; Kus. 55:12-14) Mikand yivud ya Kuseng yafunday David yilejen yovil yend ya kuziy ni ruchingej rend rikash mudiay Yehova. (Kus. 38:5-10; 94:17-19) Mu kusut kwa machuku nfund a kuseng umwing wasambisha kuyovil antu ayimp ris. Yimeken anch wading wa ku muchid wa Asaf mwin Levi, ni wasadina mu “chikumbu chitumbila cha Nzamb.” Nfund a kuseng wading ni yovil ya ushon yamukangesha kwikal ni musangar. Wasambisha kutong anch kumusadin Nzamb kuletiningap kwau yiyukish.—Kus. 73:2-5, 7, 12-14, 16, 17, 21. w19.06 17 par. 12-13

Satan usadidin maswir ma chivadik. Tukweting maswir ma chivadik ma kwilej midimu yikutwisha kutukwash kuwanyish maswir metu ni ma dijuku dietu. (1 Tim. 5:8) Yisu yivud, tukat kwijik midimu yiney anch twaya ku shikol ni kwikal in kwilej akweta mushiku. Pakwez tufanyidin kubabal. Mu jingand jivud, ku mashikol antu akat kwilej mutapu wa kusal midimu, pakwez akat kwilej kand manangu ma mangand (filozofi). Ansand a shikol akat kuyikasikesh kwitiy anch kwikiling Nzamb ni kulik kulimish Bibil. Akat kuyilej anch antu awonsu in manangu itiyijining anch mwom wibudikina kwau. (Rom 1:21-23) Mafundish ma mutapu winou makwatijadinap ap pakemp ni ‘manangu ma Nzamb.’ (1 Kor. 1:19-21; 3:18-20) Kwat mupak wa kulik kwikal ukwatinau mu mupit kusutil “manangu ma antu [filozofi] ma kudimban makad usey” ma mangand ma Satan. (Kol. 2:8) Kangal wamulik Satan akupumbul. (1 Kor. 3:18) Kangal wamulik arumbangesh chitongijok chey piur pa Yehova ni mutapu ukatinay anch umwifukwila. Londul mbil ja piur ja Yehova ja kwishitul. Ni pikil wamulik Satan akubachik kuvuramen chiyul cha Yehova. w19.06 5 par. 13; 7 par. 17

Chikalap nchik mutu wa mulong utondina mulong wa kwisamb ni muntu, tongin pa mashakamin makwetau antu akukutesha. Tongin mutapu ukutwisha mafundish ma Bibil kuyikwash. Pawambambina nau, chidi cha usey kuyitesh ni kulimish yitongijok yau. Kusal mwamu kukutwish kukukwash uyitesha nawamp, mwamu niyau akutwish kukutesh nawamp. Pakwel anch muntu itiy dilejan dia Bibil, ey ufanyidin kwitekin chisu ni kusal usu wa kuchirik kumutal tupamp tuvud. Mulong wak? Mulong yisu yimwing tukatap kwetu kuyitan antu pitukata kuyichirikin kapamp ka kusambish. Chikwau kand, ukutwish kumuchirikin muntu tupamp tuvud kurutu itiya dilejan dia Bibil. Vurik anch mutond ukat kupam ching anch akat kuwichil mem chisu chawonsu. Chilik chimwing, rukat ra muntu mulong wa Yehova ni Kristu rikat kupam ching anch tukat kwambamb ni muntu winou chisu chawonsu piur pa Dizu dia Nzamb. w19.07 14 par. 1; 15-16 par. 7-8

Yom ik yakimbay kulond Yesu? Yesu kadingap kalondina anch in Kristu akusanger kuyikis. Pakwez wading utubabeshin piur pa yom yikutushikena. Tudiap antu a mangand. Tushich kukwatijan nich mafundish ma Yesu ni tukat kulejan uruu walejanangay ndiy. Mudi chibudikin, mangand matukisin. (Yoh. 15:18-21) Tukatin kumusangaresh Yehova. Anch antu atukis mulong tumukatin Tatukwetu, kwijikwau. Tufanyidinap kutong anch tukwetap usey mulong antu avud kutukatinap. Twijap chisu chikutupompatau kudi antu ap chisu chikukangeshau antakel a ngand mudimu wetu. Pakwez twij anch tufanyidin kwirijek kusambish katat kusutil kukasikesh urund wetu ni Yehova, kwikal atakamena nakash ni kusutil kwilej mutapu wa kupandikan rukis ra antu. Kwirijek katat kukutukwash kwiman dang mu machuku ma kurutu. w19.07 6 par. 17-18; 7 par. 21

Chisu twilejina Bibil nau antu apamina kwi ndond kwakad kwitiyijau kwikalaku kwa Nzamb, tufanyidin kudandamen kuyikwash kukasikesh ritiy rau mudiay Nzamb. Tufanyidin kand kuyikwash chakwel akasikesha ritiy rau mu Bibil. Mulong wa kusal mwamu, chitin kuchirikin yisu yivud mafundish mamwing ma usey. Chisu chawonsu twilejina nau, tufanyidin kwisambin pa uman umekeshina patok anch Bibil udi Dizu dia Nzamb kusutil kwisambin mutapu uwanyidina uprofet wa Bibil, mutapu udiay Bibil salal pa milong ya siyans ni nsangu ja antu a pasak, ap mutapu ukutwishay Bibil kutukwash mu mwom wetu. Tukuyikwash antu chakwel ikala in kwilej a Kristu kusutil ku kuyikat, ap anch adi mu relijon ap bwat. (1 Kor. 13:1) Pitukata kuyifundish, chitongijok chetu chiding cha kuyilej anch Nzamb utukatining ni ukatining anch tumukata niyend. Muvu wawonsu tunan twa antu ading ipanina pakemp ap ading akad kwipan mu milong ya chirelijon, akat kutambul dibatish mulong akat kwilej kumukat Nzamb. Chawiy ikal ni chitongijok chiwamp ni yibangina nich rukat antu a mitapu yawonsu. Yitesha. Sal usu wa kwitek pa ndond yau. Kusutil chilakej chey, yifundisha chakwel ikal in kwilej a Kristu. w19.07 24 par. 16-17

An amband a Shalum ading pakach pa antu asadinau kudi Yehova mulong wa kukwash kutunguril mbumbu ja Yerusalem. (Neh. 2:20; 3:12) Ap anch tatukwau wading mwanat, an a Shalum ipana kwa kwikatin mulong wa kusal mudimu winiwa wading ukash ni wa ubaj. (Neh. 4:15-18) Nlel, anambaz ipanina kwa kwikatin akat kukwash kusal midimu yitumbila ya pakampwil—kutung ni kurijek yikumbu ya Want. Ukaliweny wau, kuzangurok kwau ni kushinshaman kwau kutukwashin kuwanyish mudimu winou. Yehova wamubachika Tabita kupandikesh “midimu yiwamp yisu yawonsu, . . . ni kuyikwash atuzwendj” pakampwil adiaafu. (Mid. 9:36) Chisu chafay, antu avud amudila nakash mulong wa yisal yend yiwamp ni mwikadil wend wa kupan. Pakwez asangara nakash chisu chamuvumbulau kudi kambuy Pita. (Mid. 9:39-41) Chilakej cha Tabita chitufundishin ik? Wikala nsand ap ipal, ikundj ap mband, etu awonsu tukutwish kusal yom ya usey mulong wa kuyikwash akadivar nau anambaz netu. w19.10 23 par. 11-12

Mutapu ik tukutwisha kumupwakesh muntu? Shinshikin chilakej ech. Mwin kwilej umwing wa Bibil watwish kal kwilam ku kuleu maar. Kupwa, wakwat mupak wa kujil maar, waya kurutu nakash mu spiritu ni watambul dibatish. Mu kusut kwa machuku, mukadivar umwing wamutazuk chakwel asangar nend pamwing ni wamushindil chakwel ana maar, wamulej anch: “Anch wamekesh kwey mwikadil wa kwilam, ukutwish kuna mu mutapu wisikena.” Chikwikal cha ushon nakash anch mukadivar winou musu watesh chiyul chinech chiyimp ni wachirikin kand chaku chend cha kuleu maar! Yikumangan yetu ya win Kristu yikat kutukwash chakwel tusadin yiyul yidia mu mufund wanlel. Yituvurishin yom yikwatinay Yehova nich usey nakash nimutapu wa kusadin yom twilejina chakwel twikala antu adia zwang. Yitukasikeshin kumukat Nzamb ni akadivar netu. Anch twamukat Nzamb ni akadivar netu nich muchim wetu wawonsu, tukusal usu chakwel twipuk kuyipwakesh akadivar netu. w19.08 10 par. 9; 11 par.13-14

Antu akwau amekening mudi ichingejidining ni alondining yom yitonginau, pakwez kusal mwamu kumekeshinap kamu anch adi in kwitutul. (Yoh. 1:46, 47) Pakwez, antu akad kwikal ni usany afanyidin kubabal nakash chakwel kangal achingejin pa ukaliweny wau wa chivadik. Twikala antu akweting usany ap bwat, etu awonsu tufanyidin kusal usu wa kwikal antu ikepishina kamu chakin. Tushinshikinany chilakej cha kambuy Paul. Amusadina nakash kudi Yehova mulong wa kusambish yikumangen yisu mu misumb kushalijan. Wasala kand yom yivud nakash mu mudimu wa kulejan kusutamu atwimbuy akwau a Yesu Kristu. Pakwez, Paul katongap anch ndiy udi wa piur kuyisutamu atwimbuy akwau. Kupwa, kambuy Paul walonda anch wading ni urund uwamp ni Yehova kadiap mulong wa mikadil yend yiwamp ap mulong wa midimu yading yasadinay kal, pakwez chading mulong wa ranaken ra Nzamb. (1 Kor. 15:10) Paul wading chilakej chiwamp nakash cha kwikepish. Chisu chayifundinay in Kristu a ku Korint mukand, Paul kibazap ap anch antu amwing mu chikumangen ading akatin kwimekesh mudi adi a piur kumusutamu ndiy.—2 Kor. 10:10. w19.09 3 par. 5-6

Diyingishin dimwing dikutwisha kusal anch chitukasiken kumuziyil Yehova didi mulong twaswana chitil ni tudi antu akad kuwanyin. Chawiy chikata kusal anch tulik kukat kumuziyil Yehova chisu chawonsu. Kupwa kwa Adam ni Ev kumubwambwil Nzamb ni kudia dibuj diayijidikau, itekina ayinau mbil piur yom yiwamp ni yiyimp. (Dis. 3:22) Nlel, antu avud kalimishinap mbil ja Yehova ni akat kwitekin ayinau mbil piur pa yom yiwamp ni yiyimp. Chikutwish kuyikasiken ap antu amwija Yehova ni amukatina kumuziyil chisu chawonsu. Kambuy Paul warisha ni chikokujol mudi chinech. (Rom 7:21-23) Mudi Paul, tukatining kusal yom yitentamina ku mes ma Yehova. Pakwez tufanyidin kurishikish chisu chawonsu maku mayimp ma kusal yom yiyimp. Diyingishin dikwau dikutwisha kusal anch chikasikan kumuziyil Yehova didi anch yishankur ya ndond twapamina yikweting yibachikin padi etu. Yishankur yimwing ya antu yikwatijadinap ni rusot ra Yehova, chawiy tufanyidin kudandamen kusal usu wa kulik kutong mudi antu inay. w19.09 15 par. 4-6

Tufanyidin kwijik anch umwing ni umwing wa pakach petu ukwet mimbu piur pa yom yikutwishay kusal. Tufanyidin kubabal piur pa yom tusadina. Chilakej, tukutwish kushesh usu wetu mu kukimb mapit ma ku mujimbu. Shinshikin yom yakulay Yesu pamwipulau kudi nsand wading mpich anch: “Ov, chifanyidin nisala nchik [chakwel] nikala nich mwom wa chikupu?” Nsand winou wading kuziyinang ku Chijil. Chimeken anch wading nsand muwamp mulong rusangu ridia mu Evanjil wa Marko rilejen anch Yesu ‘wamukata.’ Yesu wamutazuka ikundj winou kusutil mazu madia mu mufund wa nlel. Ikundj winou wakata kumulondul Yesu, pakwez kakatap kulik ‘mapit mavud’ madingay nich. (Mar. 10:17-22) Mudi chibudikin, kitiyap kusend mpand yamwinkishau kudi Yesu ni wadandamena kusadin “mapit.” (Mat. 6:24) Anch yeya yom ik wafanyina kutond? Chisu ni chisu tufanyidin kutong piur pa yom tutekina pa ndond ya kusambish mu mwom wetu. Mulong wak? Chakwel twikal nich kashinsh anch tusadidin usu wetu nich manangu. w19.09 24 par. 17-18

Mudimu wetu wa kulejan Want ukupwap djat kamu pakulondinay Yehova anch kwapwa kal. Kulep ik kwa chisu chashala kal mulong wa antu kumwijik Yehova Nzamb ni Yesu Kristu? (Yoh. 17:3) Twijap. Twij anch djat kamu ni chisu chikusambisha mar makash, antu “[awanyidina] mulong wa kutambul mwom wa chikupu” akudandamen kwitiy rusangu ruwamp ni kumusadin Yehova. (Mid. 13:48) Mutapu ik tukutwisha kuyikwash antu inay pikuchidia kal chisu? Yehova utwinkishin kusutil dirijek diend yom yawonsu tukweta nich kuswir mulong wa kuyifundish antu uyakin. Chilakej, rubing rawonsu akat kutufumb ku yikumangan ya mukach mwa rubing. Chikumangan chinech chikat kutukwash kwijik yom tufanyidina kulond chisu tumwendidina muntu kapamp ka kusambish ni pitumuchirikidina. Ni kupwa kwa mambamb mawamp ni muntu usangaredina, anch wamushil trakt ap gazet, ukutwish kudandamen kumutang djat ni chisu ukumuchirikina. Chidi chisend chetu ayinetu cha kudandamen kwikal akwatikena nakash ngond ni ngond mu mudimu wa kulejan Want. w19.10 9 par. 7; 10 par. 9-10

Yehova wamushilamu Simeyon ikundj ipal ushinshamena wading mu Yerusalem anch kakufap kurutu amumana Mesia. Kushilamu kwinoku kwafanyina kumukasikesh Simeyon nakash, mulong wad wachingedin kal kwez kwa Mesia mu mivu yivud. Yehova wamuyukisha Simeyon mulong wa ritiy ni kujijaman kwend. Dichuku dimwing, “[spiritu] utumbila wamutwala,” mu tempel. Mwinimwa mwawiy mwamumanay mwan Yesu, ni Yehova wamusadina Simeyon mulong wa kupan uprofet piur pa mwan winou wading ufanyidina kwikal Kristu. (Luka 2:25-35) Ap anch Simeyon wafa pamwing ap kurutu Yesu asambish mudimu wend, Simeyon wamujikitisha nakash Yehova mulong wa dilau diamwinkishay ni ukwikal ni yom yipandikena kuwap mu machuku ma kurutu! Mu mangand masu, ikundj winou ushinshamena ukuman mutapu ukwikala winyikel wa Yesu chiyukish ku majuku mawonsu ma pa mangand. (Dis. 22:18) Niyetu tudi in kujikitish nakash mulong wa dilau din diawonsu diatwinkishinay kal Yehova mu mudimu wend. w19.10 22 par. 7; 23 par. 12

Twikala ni yom yivud ya ku mujimbu ap bwat, tufanyidin kulam muchim wetu. Mutapu ik? Kangal wakudish rukat ra mapit. Ni kangal witiy anch mudimu wey wa ku mujimbu wikal pa ndond ya kusambish kusutamu mudimu wa Yehova. Mutapu ik ukutwisha kwijik anch mudimu wey wa ku mujimbu wawiy udia pa ndond ya kusambish? Ufanyidin kwiyipul amwiney yipul mudi: ‘Ov, nikat kutongijokinang pa mudimu wam wa ku mujimbu chisu nidia ku yikumangan ap mu mudimu wa kulejan? Ov, nikat kwiyakamishang piur pa kwikal ni nfalang jivud mu machuku ma kurutu? Ov, nfalang ni yom ya ku mujimbu yikat kuletish milong mu uruw wam? Ov, nikutwish kwitiy kusal mudimu wa ku mujimbu umenau antu akwau anch udi wa pansh chakwel nitwisha kusutish chisu chivud mu mudimu wa Yehova?’ (1 Tim. 6:9-12) Chisu tushinshikidina yipul yiney, tufanyidin kuvurik anch Yehova utukatin ni ushidinamu kudi antu awonsu ipanina kudi ndiy anch: “Kinikukushap, kinikez kakulikap chikupu.” Diawiy diyingishin diamubachika kambuy Paul kufund anch: “Kangal ris ra nfalang rakuyikelany.”—Heb. 13:5, 6. w19.10 29 par. 10

Anch twasal mudimu pamwing nau ambay netu mu ritiy ni anch twasal usu wa kushinshikin mikadil yau yiwamp, tukuyijik nawamp ni tukuyisejil piswimp. Chilakej, mutapu ik ukata kwiyov anch udi mu mudimu wa kulejan ni wamutesh murund ney ukat kurumburil nich kutakaman mayingishin ma yitiyij yend ap anch ukat kulond nich kashinsh piur pa Yehova ni yom yitonginay kusal? Chimeken anch ukumukat kamu nakash. Adeline nambaz ukweta 23, wamwita murund nend Candice chakwel aya nend kulejan mu teritwar wading wakad kulejanau kal nakash. Ulondin anch: “Twading tukatin kulejan nich mushiku nakash ni kusanger mudimu. Etu awonsu twading tukwet kuswir kwa kutukasikesh mu spiritu chakwel tudandamen kumusadin Yehova nich usu wawonsu.” Kusal mudimu pamwing kwayikwasha mutapu ik? Adeline ulondin anch: “Dichuku diawonsu urel, twisambinang piur pa mutapu twiyovila, yom twasangerang mu mambamb metu ma mudimu, ni mutapu watukwashangay Yehova mu mudimu wa kulejan. Etu awonsu twasangerang mambamb minam ni twashikena kwijikijan nawamp nakash.” w19.11 5 par. 10-11

Pakur, chading cha usany anch isalay wayang kwi njit wachirik kwol kwend pakad rikibu rend. Mwin kufund nsangu ja pakur umwing wa mu Rom utazukinau anch Tacitus wafunda anch: “Chading cha usany nakash anch isalay washa rikibu rend.” Dined didi diyingishin dimwing diasalang anch amasalay asala usu wa kulam nkibu jau. Tukat kulam ba rikibu retu ra ritiy kusutil kukumangan ku yikumangan yetu ya win Kristu ni kuyilej antu akwau piur pa dijin dia Yehova ni Want wend. (Heb. 10:23-25) Chikwau kand, tukat kutang Dizu dia Nzamb dichuku diawonsu ni kumulembil Yehova chakwel atukwasha kusadin yom tutangina. (2 Tim. 3:16, 17) Kupwa, kwikil ut ap umwing usadidinay Satan ukutwisha kutusal uyimp wa chikupu. (Isay 54:17) ‘Rikibu retu rijim ra ritiy’ rikutuchidij. Tukwiman dang, tukusal mudimu nich kutakaman pamwing nau akadivar ni anambaz netu. Ni tukuwin njit turishina pichuku pichuku mulong wa kulam ritiy retu rikash. Ni cha usey nakash tukwikal ni musangar wa kwikal ku mutambu wa Yesu chisu chikuwinay njit pantaliken ni Satan ni antu end.—Kuj. 17:14; 20:10. w19.11 19 par. 18-19

Kufund yom utongina kusal kukutwish kukukwash kuwanyish mupak wey. (1 Kor. 14:40) Chilakej, chisak cha amakurump chikutwish kutond mukurump umwing mulong wa kufund mipak yawonsu yikwatinau mu chisak, kufund dijin dia mukurump watondangau kusal yom yiney ni dichuku difanyidinay kupwish kusal yom yiney. Amakurump akata kulondul umutakel winou, chikat kuyiswapelang kuwanyish kamu mipak yau. Chilik chimwing, niyetu tukutwish kusal mwamu mu mwom wetu wa pichuku pichuku. Chilakej, ukutwish kutenchik list wa yom ya kusal pa dichuku ni kuyilong pa list kukwatijan ni mutapu ukuyisala. Kusal mwamu kukutwish kukukwash kupwish yom wasambisha kal kusal, ni kusal kand yom yikwau yivud mu chisu chikemp. Pakwez ufanyidin kwikasikesh. Chitining usu nakash mulong wa kulondul plan wey ni kuwanyish yom wasambisha kusal. (Rom 12:11) Kambuy Paul wamuleja Timote ‘kudandamen kwipan’ amwinend ni ‘kudandamen’ kuya kurutu mulong wa kwikal mulej muwamp. Tukutwish kusadin chiyul chinech cha Paul mu chom chin chawonsu tukatina kusal mulong wa Yehova.—1 Tim. 4:13, 16. w19.11 29-30 par. 15-16

Chisu chamulejau Moses kubudish muchid wa Isarel mu uswik, kadingap kamu ni kashinsh mu amwinend ni wamuleja Yehova tupamp tuvud anch kakutwishap kwend. Yehova wamwanakena Moses ni wamukwasha. (Kub. 4:10-16) Mudi chibudikin, Moses watwisha kumulej Farao uruu ukash wa dirumburish. Moses wamana chad mutapu wasadinay Yehova usu wend chisu chayipandishay in Isarel ni kumushesh Farao ni amasalay end mu Karung Musuz. (Kub. 14:26-31; Kus. 136:15) Kupwa kwa Moses kuyibudish in Isarel mu Idjibit, awiy adandamena kunyinyit. Ap mwamu, Moses wamana mutapu wadandamenay Yehova kushimpish muchim pantaliken ni antu akwolay mu uswik. (Kus. 78:40-43) Moses wamana kand mutapu wamekeshay Yehova kwikepish kwa pakampwil chisu Chaswimpay yitongijok Yend Pamwitau kusal mwamu kudi Moses. (Kub. 32:9-14) Kupwa kwa Kubudik mu Idjibit, urund wa Moses ni Yehova wikala wa piswimp nakash, chawiy wikala mudi ukat kumuman Tatukwend wa mwiur.—Heb. 11:27. w19.12 17 par. 7-9

In kwilej avud a Yesu ading in Galalia. Chawiy pa ndond pa kuya mu chikumbu kampand mu Yerusalem—mukandu wa Galalia yading ndond yiwamp nakash mulong wa kusadinaku chikumangan nau antu avud nakash. Chikwau kand, kupwa kwa kuvumbuk, Yesu wading wayimekenang kal atwimbuy end 11 kwa ayinau mu chikumbu ku Yerusalem. Anch Yesu wading ukatin kuyilej kwend ching kusu atwimbuy end kulejan ni kwikadish in kwilej, wafanyina kusal mwamu mu Yerusalem pa ndond pa kuyilej atwimbuy end ni amband pamwing kand ni antu akwau chakwel atanijan nend ku Galalia. (Luka 24:33, 36) Mbil ya Yesu ya kwikadish in kwilej yadingap kusu kwau yiyitadina ching in Kristu a mu mivu chitot ya kusambish. Mutapu ik twija mwamu? Yesu wapwisha kupan mbil kudi in kwilejend nich mazu malondina anch: “Am nikez kwikal ni yenen machuku mawonsu, djat ni kwisudiel kwa mangand.” (Mat. 28:19, 20) Mudimu wa kwikadish in kwilej udandamedin djat ni nlel. Tongijok bil pa chom chinech! Piswimp antu 300000 akat kutambul dibatish muvu ni muvu mudi Atuman a Yehova ni kwikal in kwilej a Kristu! w20.01 2 par. 1; 3 par. 5-6

Uchidi nsand, pakwez akukwat mayej makash makutwisha kukuziyishang nakash, wananap kal ni chikasiken kutan mudimu. Wananap kal nakash ni utwishinap kand kusal yom yivud mu mudimu wa Yehova mudi mutapu wasalang pakur. Anch niyey urishin ni mulong umwing pakach pa milong yajimbulau kal ey, ukutwish kwiyov anch ukwetap usey. Milong yiney yikutwish kukukepishin musangar, kukushikij ku kwiyov anch ukwetap usey, ni yikutwish kuyipish urund wey nau antu akwau. Mangand minam mamekeshin chitongijok cha Satan piur pa mwom wa antu. Yisu yawonsu Satan ukat kuyiman antu mudi akwet usey ukemp. Nich chisum wamuleja Ev anch ukwikal ni usu wa kusal yom yawonsu yikatinay anch wamubwambwil Nzamb, ap anch wading wij anch kumubwambwil Nzamb kwafanyina kushikij ku rufu. Yisu yivud Satan ndiy ukata kutakel mangand minam. Chawiy chidiap cha kushimok anch antakel avud a mangand minam akwat mwom wa antu nich usey ukemp ni alik kubangin yovil ya antu. Ku mutambu ukwau, Yehova ukatin twijik anch tukwet usey ni ukat kutukwash kurish ni milong yikutwisha kutubachik kwiyov anch tukwetap usey.—Rom 12:3. w20.01 14 par. 1-4

Mu mivu piswimp 40, Jeremiy washakama pakach pa antu akad kushinshaman, pakach pa antu inay pading amutej nend ni pamwing ap anamakwend amwing a ku mujimbu adiokala ku ul wend wa chivadik wa Anatot. (Jer. 12:6) Pakwez, kiyaurilap ni akwau. Wamuleja patok Baruk, sekreter wend ushinshamena yovil yend, ni twij mutapu wiyovay mulong ayifunda. (Jer. 8:21; 9:1; 20:14-18; 45:1) Mulong Baruk ndiy wafunda rusangu ra Jeremiy, tukutwish kutong pakad kwidjidjek anch amakundj inay aad akudisha rukat rikurikina ni alimishijanang umwing ni mukwau. (Jer. 20:1, 2; 26:7-11) Mu mivu yivud, Jeremiy wayibabesha nich kutakaman in Isarel piur pa yom yading yifanyidina kushiken musumb wa Yerusalem. (Jer. 25:3) Papakishay kuyikwash antu kapamp kakwau chakwel akarumuka, Yehova wamuleja Jeremiy chakwel afunda kubabesh Kwend mu muvungur. (Jer. 36:1-4) Pading pasadinay Jeremiy nend Baruk pamwing mulong wa kuwanyish chisend chinech chamwinkishau kudi Nzamb, chasala pamwing ap angond avud, chakin kamu ading ni mambamb ma kukasikeshijan mu ritiy. w19.11 2-3 par. 3-4

Mutapu ik tufanyidina kuyiman akadivar nau anambaz azizidilau many? Chidi chiyimp kumubaz muntu nakash, ap anch udi mukadivar uzizidilau many wa Kristu. (Mat. 23:8-11) Pisambidinay Bibil piur pa amakurump, ukat kutukasikesh ‘kwimburij ritiy rau,’ pakwez kakatap kutulej anch tukutwish kumwikadish muntu kwikal ntakel wetu. (Heb. 13:7) Chidi chakin anch Bibil ulondin anch chitin kuyinkish antu amwing “kalimish kawanyidina tupamp twaad.” Pakwez chidi mwamu mulong akat ‘kutakel mu mutapu uwamp’ ni ‘asadin mudimu ukash mu kulond ni mu kufundish,’ kadiap anch mulong adi azizidilau many. (1 Tim. 5:17, TMK) Anch twapwitin nkeu jetu padiau azizidilau many ni kuyinkish ntumb nakash, chinech chikutwish kuyovish nayimp. Ap chipandikena kand kuyip, tukutwish kuyishikij ku kwikal in kwitutul. (Rom 12:3) Kwikil muntu ap umwing pakach petu ukatina kusal chom chikutwisha kumubachik umwing wa pakach pa akadivar azizidilau many a Kristu kusal chitil chijim mudi chinech!—Luka 17:2. w20.01 28 par. 8

Kambuy Paul wading ni mayingishin mavud nakash ma kwiyakamishin. Wiyakamisha nakash mulong wa milong yarishau nich akadivar ni anambaz nend. (2 Kor. 2:4) Antu ading amukisina amubula yisu yivud ni kumutek mu rukan. Wajijamena kand yishiken yimwing yamubachika kwiyakamish, mudi “uzwendj.” (Fil. 4:12) Ni anch twavurik anch wajiya kand tupamp anch twakep tusatu mu mwom wend, tukutwish kutongin mutapu wiyakamishay piur pa kuya mu weny ni waat. (2 Kor. 11:23-27) Paul warisha mutapu ik ni yakamish? Paul wiyakamisha mulong wa akadivar ni anambaz nend chisu chading chirishinau ni yakamish, pakwez kapakishap kupwish milong yiney yawonsu amwinend. Paul wading wij anch kakutwishap kusal yom yawonsu amwinend. Chawiy wayileja antu akwau chakwel amukwash kubangin chikumangen, amakundj a kuchingejin mudi Timote ni Titus. Mudimu wasalau akadivar inay chakin kamu wamukwasha Paul kukepish yakamish yend.—Fil. 2:19, 20; Tit. 1:1, 4, 5. w20.02 23 par. 11-12

Yehova ukatin anch an ayiziyin anvajau, ni ukatin kand anch etu tumuziyin ndiy. Tufanyidin kumuziyin mulong udi Sakatang wetu, Mwin Kulam mwom yetu, ni ukwet manangu mapandikena kusutamu anvaj awonsu. Pakwez, anch tumuziyidin Yehova chakusambish chidi mulong tumukatin. (1 Yoh. 5:3) Ap anch kudi mayingishin mavud matubachikina kumuziyin Yehova, pakwez kakatap kutushindil chakwel tumuziyin. Yehova watwinkisha chipan cha want ipetu, chawiy ukat kusangarang nakash anch twatond kumuziyin mulong tumukatin. Anvaj akatining anch anau ikal mu diking. Chawiy akat kutekang mbil piur pa mwikadil ufanyidinau kwikal nich an mulong wa kuyichidij. Anch an aziyin mbil jinej, akat kumekesh anch ayichingejidin anvajau ni ayilimishin. Chawiy chidi cha usey nakash kwijik ni kuziyin mbil ja Tatukwetu wa mwiur. Anch twasal mwamu, tukat kumekesh anch tumukatin Yehova ni tumulimishin, ni tukat kand kwisakinamu ayinetu. (Isay 48:17, 18) Pakwez antu akata kumudiul Yehova ni mbil jend akat kushiken ku kwikakin yisansan.—Gal. 6:7, 8. w20.02 9-10 par. 8-9

Mudi Abigayil, tufanyidin kwikal nich kutakaman kwa kulond anch twamuman mbay netu ukat kusal chom kanang chikutwisha kumushikij ku kusal chitil chikash. (Kus. 141:5) Tufanyidin kwikal nich kalimish, pakwez tufanyidin kand kwikal atakamena. Anch twamwinkish muntu chiyul chiswirikedinay nich rukat, tumekeshin anch tudi kamu murund wakin. (Jnsw. 27:17) Pakampwil, amakurump afanyidin kwikal nich kutakaman kwa kwambamb nau antu a mu chikumangen akata kurumbuk. (Gal. 6:1) Nich kwikepish, amakurump ijing anch niyau adi antu akad kuwanyin ni dichuku dimwing akwikal ni kuswir kwa chiyul. Pakwez chinech chikatap kuyikangesh amakurump kuyikwash antu akweta kuswir kwa dipup. (2 Tim. 4:2; Tit. 1:9) Akat kwikasikesh kusadin chipan chau cha dizu mulong wa kumufundish muntu nich manangu ni kushimpish muchim chisu chimwinkishinau chiyul. Rukat rau mulong wa mukadivar nau rikat kuyibachik kumukwash. (Jnsw. 13:24) Pakwez chitongijok chau cha kusambish chidi cha kumutumbish Yehova kusutil kulimish mbil jend ni kuchidij chikumangen ku ubaj.—Mid. 20:28. w20.03 20 par. 8-9

Yehova wamwikadisha Moses mwin kuyikwol in Isarel. Pakwez, chisu ik chamusadinau kudi Yehova? Ov, chading chisu chiyovay Moses anch wading uwanyidin kupwa kwa kutambul “manangu mawonsu ma in Ijibit”? (Mid. 7:22-25) Bwat, Yehova wamusadina Moses kupwa kwa kumukwash kwikal muntu wikepishila ni witudishila. (Mid. 7:30, 34-36) Yehova wamwinkisha Moses kutakaman kwa kulond kurutu kwa mwant wading ukweta usu nakash wa Idjibit. (Kub. 9:13-19) Kusutil chilakej chinech tumen anch Yehova ukat kuyisadinang antu asadila usu wa kwimburij mikadil yend ni amuchingejidina ndiy mulong wa kuyinkish usu. Mu rusangu ra antu, Yehova wayisadidin kal atushalapol end mulong wa kuwanyish yisend yivud kushalijan. Chad ey ukukwikadish nany? Yom yivud yimedin pa mutapu wipanina amwiney. (Kol. 1:29) Anch wipan amwiney, Yehova ukutwish kukwikadish mwin kulejan wa mushiku, mulej muwamp, mwin kukasikeshan muwamp, nsalamudimu ukweta ukaliweny, murund muwamp, ap chom chin chawonsu chikatilay mulong wa kuwanyish rusot rend. w19.10 21 par. 5; 25 par. 14

Arund awamp akutukwash kushal ashinshamena kudi Yehova. Ni mulong wa kwikal nau arund awamp, chifanyidin kwikal murund muwamp. (Mat. 7:12) Chilakej, Bibil utukasikeshin kwipan ayinetu mulong wa kuyikwash antu akwau, pakampwil antu “aburedina.” (Efes 4:28) Anch twikal akwatikena nakash mu kuyikwash antu akwau, tukwikal ni musangar nakash. (Mid. 20:35) Arund netu akutukwash patukurisha ni yoziu ni akutukwash kulam chisambu chetu cha mu manangu. Mudi mutapu Elihu wamuteshay Job pading pamulejinay piur pa mar mend, arund netu akutukwash patuteshinau nich kushimpish muchim patuyilejina piur pa yovil yetu. (Job 32:4) Tufanyidinap kuchingej anch arund netu atukwatin mipak, pakwez tudi in manangu anch twatesh yiyul yau yimedina pa Bibil. (Jnsw. 15:22) Ni mudi mwitiyay Mwant David nich kwikepish ukwash wa arund nend, niyetu tufanyidin kwikepish mulong wa kwitiyij ukwash utwinkishinau arund netu chisu tudia mu maswir. (2 Sam. 17:27-29) Chakin kamu, arund a mutapu winou chidi chipan chidiokila kudi Yehova.—Jak. 1:17. w19.04 11 par. 12; 12 par. 14-15