Ngond wa 9

Ov, chilakej cha Nzamb ni Yesu piur pa kusal mudimu ukash chimekeshin anch chidiap kwau cha usey kudi etu kwiswedish? Bwat. Yehova kakuziyangap, chawiy kakwetap kuswir kwa kwiswedish mudi muntu. Ap mwamu, Bibil ulondin piur pa Yehova anch kupwa kwa kutang maur ni divu, “ndiy wiswedisha.” (Kub. 31:17) Chawiy, chinech chimekeshin anch Yehova wimika kutang ni wasambisha kusanger yom yatangay. Ap anch Yesu wasala mudimu nakash chisu chadingay panap pa divu, witekina chisu cha kwiswedish ni kudia pamwing nau arund nend. (Mat. 14:13; Luka 7:34) Bibil uyikasikeshin atushalapol a Nzamb kukat kusal mudimu. Atushalapol end afanyidin kwikal in kusal mudimu akash pa ndond pa kwikal amikopu ap in usweral. (Jnsw. 15:19) Pamwing ap ukat kusal mudimu wa ku mujimbu mulong wa kuwanyish maswir ma dijuku diey. Kupwa in kwilej awonsu a Kristu akwet chisend cha kwipan mu mudimu wa kulejan rusangu ruwamp. Pakwez, ukwet kand kuswir kwa kwiswedish chiwanyidina. w19.12 2 par. 2; 3 par. 4-5

Lik kupalangesh nsangu ja ayilembil. Pa mulong winou, tufanyidin kwimburij chilakej cha Yesu. Kurutu kwa kwez pa divu, Yesu wading mwiur ni wading wij yom yivud nakash piur pa Satan ni ayilembil. Pakwez, karumburilap nsangu piur pa midimu yasalau aspiritu ayimp. Yesu kakatap kwikal kaman wa Djabul pakwez wa Yehova. Tukutwish kumwimburij Yesu anch twalik kupalangesh nsangu piur pa ayilembil. Pakwez, tumekeshin kusutil mazu metu anch ‘michim yetu yizwil sens ni mazu mawamp’ charumburik anch uyakin. (Kus. 45:1) Pikil wov wom wa aspiritu ayimp. Mu mangand minam makad kuwanyin, yom yiyimp yikutwish kutushiken. Akisidan, mayej ap rufu yikutwish kutushiken pakad kuchingejin. Pakwez tufanyidinap kutong anch aspiritu akad kumekan awiy aletishina yom yiney. Bibil ulejen anch “chisu cha mar chikat kushik kudi antu awonsu.” (Mul. 9:11) Piur pa ayilembil, Yehova wamekesha kal anch ukwet usu nakash kuyisutamu ayilembil. w19.04 23-24 par. 13-14

Ov, amakurump afanyidin kuziyin ku yijil ya mburamatad yitina kuyijikish antakel a ngand anch muntu wamuyipish mwan kusutil yisal ya masandj? Mwaning. Mu jingand mudia yijil yiney, amakurump akat kwikasikesh kulimish yijil ya mburamatad piur pa kuyijikish anch amuyipish mwan. Yijil yiney yipwitamijadinap ni chijil cha Nzamb. (Mid. 5:28, 29) Chawiy anch muntu kanang wayilej amakurump anch kudi mwan wayipishangau, amakurump afanyidin kutazuk ku biro wa mutiy pakad kulab mulong wa kuyilej mutapu ukutwishau kuziyin ku yijil ya mburamatad piur pa mulong winou. Amakurump akat kwambamb ni mwan wayipishangau ni anvajend pamwing ni antu akwau akweta uman anch mwan amuyipishang ni amakurump akat kuyilej antu inay anch akwet mbil ya kumwijikishamu mburamatad piur pa mulong winou. Pakwez chidi nchik anch muntu wa mu chikumangen ndiy wamuyipishang mwan ni mulong winou awijikang kal kudi antu avud? Ov, mwin Kristu wijikishang rusangu riner, ufanyidin kwifish nich anch wasaadikishang kal dijin dia Nzamb? Bwat. Muntu wayipishanang ndiy usaadikishina dijin dia Yehova. w19.05 10-11 par. 13-14

Bibil umulejin ikundj ni mband anch afanyidin kulimishijan umwing ni mukwau ni kulimish machip mau ma uruw. Uyikasikeshin ambay a uruw kudandamen kushakam pamwing, palondinay anch: “Ikundj ukez kudiokal kudi tatukwend ni makwend, ni kulamat kudi mukajend, chad awiy aad akwikal mujimbu umwing.” (Dis. 2:24) Chinyim ni chinech, antu atakedilau nich manangu ma mangand awiy akwet chitongijok chindj, alondining anch muntu ni muntu ufanyidin kushinshikin pa maswir mend amwinend. Buku umwing wisambidina milong ya kujip uruw ulondin anch: “Mu jingand jimwing anch antu atijan, pa ndond pa kuchip anch ‘akushal ashinshamena mu mwom wau wawonsu,’ awiy akat kuchip anch akudandamen ni uruw wau ‘ching anch adandamen kukatijan.’” Mulong antu kamenap anch uruw ufanyidin kwikal wa rawonsu, ambay amwing akat kushiken ku kwaurik, ni avud akat kwikal ni yovil yisansena. Pakad kwidjidjek, chitongijok cha mangand piur pa uruw chidi cha usup. w19.05 23 par. 12

Paul wading wiyakamishin mulong in Kristu amwing ading ameken mudi asambishin kal kwikal atakedilau kusutil yitongijok yiyimp ni mafilozofi makasikeshinau kudi mangand minam ma Satan. (Efes 4:17-19) Yom mudi yiney yikutwish kumushiken muntu mwawonsu wa pakach petu. Satan udia nzamb wa mangand minam usadidin jinjil kushalijan mulong wa kutwauril ni Yehova. Chilakej, anch tukatin kwikal antu a usey nakash ap ijikena, Satan ukusadin yom yiney mulong wa kutwauril ni Yehova. Ukutwish kand kusadin yom twileja kwol kwetu, ku shikol ni kudi antu atunyingumukinamu mulong wa kutubachik kutong mutapu ukatinay ndiy. Ov, yitwishidikin kulik yom yikunina kal mu manangu metu mudi “mpwembu jikash”? (2 Kor. 10:4, TMK) Shinshikin mutapu wakwilay Paul: ‘Tukat kuumbol yitongijok ni chikangesh chin chawonsu chipwitamijadina ni ronganyin ra Nzamb, ni tukat kukwat yitongijok yawonsu, kuyitek pamwing mudi mu winkwal chakwel yimuziyil Kristu.’ (2 Kor. 10:5) Mwaning, nich ukwash wa Yehova tukutwish kulik yitongijok yiyimp. w19.06 8 par. 1-3

Ap anch ading ni yikamish yikash, Ana, David ni nfund a kuseng amuchingejina Yehova chakwel ayikwash. Amuleja yakamish yau kusutil malembil. Amuleja patok mayingishin masala anch iyakamish nakash. Ni adandamena kuya kwi ndond ya difukwil mulong wa kumwifukwil Yehova. (1 Sam. 1:9, 10; Kus. 55:22; 73:17; 122:1) Yehova wayakula awonsu nich rukat. Ana wikala ni chisambu cha mu manangu. (1 Sam. 1:18) David wafunda anch: “Mwin kutentam ukwet yakamish yivud, pakwez [Yehova] ukat kumudioshamu mu yawonsu.” (Kus. 34:19, TMK) Kupwa nfund a kuseng wiyova anch Yehova ‘wamulama nich chikas chend cha katatuku,’ wamutakela nich chiyul cha rukat. (Kus. 73:23, 24) Yom ik twilejidina ku yilakej yiney? Yisu yimwing tukutwish kwikal ni milong yikash yikutwisha kutuletin yakamish. Pakwez tukutwish kurish anch twatongijokin pa mutapu wayikwashau antu akwau kudi Yehova, kumuchingejin ndiy kusutil malembil ni kumuziyin mu kusal yom yitwitinay kusal.—Kus. 143:1, 4-8. w19.06 17-18 par. 14-15

Pikil walikidil chom chin chawonsu chilondinau kwau antu chikwovish wom ap usany wa kwikal Kaman wa Yehova. (Mike 4:5) Shinshikin chilakej chatushilau atwimbuy ku Yerusalem kupwa kwa rufu ra Yesu. Ading ij nawamp mutapu wading uyikisinau kudi antakel a chirelijon in Yuda. (Mid. 5:17, 18, 27, 28) Pakwez dichuku diawonsu adandamena kuya ku tempel ni iyijikishang patok kudi antu awonsu anch adi in kwilej a Yesu. (Mid. 5:42) Kitiyap anch wom uyikangesh kudandamen. Niyetu tukutwish kwipuk wom wa antu kusutil kwiyijikish chisu chawonsu kudi antu anch tudi Atuman a Yehova—ku mudimu, ku shikol, ni mu mukal tushicha. (Mid. 4:29; Rom 1:16) Mulong wak atwimbuy ading ni musangar? Ading ij mulong wak ayikisin ni akwata rikis riner mudi katumb ka kwikal azengodinau mulong wa kusal rusot ra Yehova. (Luka 6:23; Mid. 5:41; 1 Pita 2:19-21) Anch twijik anch atukisin mulong tusadin yom yitentamina, tukulikidilap rukis ra antu ritukangesh kumusadin Yehova. w19.07 7 par. 19-20

Yesu nau in Kwilejend in Yuda alimishang Sabat mulong ading mwinshin mwa Chijil cha Moses. Pakwez, Yesu wamekesha kusutil yisal ni yom yalonday anch chading chifanyidin kwikal ni chitongijok chisikena piur pa Sabat, ni anch chading chitiyikin kusal yom yiwamp ni kuyikwash antu akwau pa dichuku dia Sabat. (Mat. 12:9-11) Kamanap chisal cha kuyikwash antu akwau ni kusal yom yiwamp mudi kujip chijil cha Sabat. Yom yasalay Yesu yamekesha patok anch wading uteshin nawamp diyingishin diatekinay Nzamb Sabat. Mulong antu a Nzamb iswedishang ku midimu yau ya pichuku pichuku, ading ni chisu cha kushinshikin yom ya mu spiritu. Yesu wapamina mu dijuku diasadilang dichuku dia Sabat mulong wa kushinshikin pa yom ya mu spiritu. Twij yom yiney kusutil yom tutangina piur pa Yesu chisu chadingay mu Nazaret ul wend wa chivadik anch: “Pa Dichuku dia Kwiswedish ndiy [Yesu] wandama mu Chikumbu cha Nzamb (sinagog) mudi mwadinga chaku chend. Ndiy wimana piur mulong wa kutang mukand wa Nzamb.” (Luka 4:15-19) Chikwau kand, in Kwilej ading alimishin nakash chijil cha Sabat chawiy chimikau kurijek yom mulong wa kumujik Yesu djat kamu ni papwila dichuku dia Sabat.—Luka 23:55, 56. w19.12 4 par. 10

Mwin Kristu mwawonsu udia mwin kulejan ukwet chisend cha kupan ukwash mulong wa kukimb antu akweta michim yiwanyidina. Tukutwish kufanikesh mudimu winou nau antu akimbina mwan washadikang kal. Mu mutapu ik? Tongin yom yashikena piur pa mwan ikundj wa mivu yisatu washadika. Antu piswimp 500 ading akat kumukimb. Kupwa kwa asaa 20 kudiosh chisu chashadikay mwan, muntu umwing wamumana mu chir. Muntu winou kibulap pa ntul anch ndiy wamumanang mwan ni kakatap anch antu amutumbish. Walonda anch: “Twamumanang mwan mulong kwading ukwash wa antu avud.” Antu avud nlel adi mudi mwan winiwa. Iyovil mudi ashadikin kal. Kakwetap ruchingej, pakwez akwet kuswir kwa ukwash. Chawiy, etu awonsu mamiliyon chinan tufanyidin kusal usu wa kuyikimb antu inay. Ku usu wey amwiney, pamwing ap ukutwishap kutan muntu ukutwisha kwitiy kwilej nend Bibil. Pakwez in kulejan akwau alejena mu teritwar umwing niyey akutwish kutan muntu ukatishina kwilej uyakin udia mu Dizu dia Nzamb. Anch mukadivar ap nambaz waman muntu, ni muntu winou washiken ku kwikal mwin kwilej wa Kristu, antu awonsu adia ipanina mu kumukimb muntu winou akwet diyingishin diwamp dia kusangar. w19.07 16-17 par. 9-10

Kambuy Paul wayivurisha in Kristu a ku Filip usey wa kudandamen kubambil nich kujijaman. Chisu chasambisha chikumangen, antu a mu Filip ayizengola nakash akadivar. Mu muvu wa 50 C.C. Paul ni Silas itiya kutazuk kwa Nzamb kulondina anch “ez ku Masedon.” Chawiy Paul ni Silas aya ku Filip mulong wa kulejan rusangu ruwamp. (Mid. 16:9) Kwinikwa amutana Lidi, ndiy ‘wayitesha, ni Yehova wazurila muchim wend’ mulong wa kutesh rusangu ruwamp. (Mid. 16:14) Watambula dibatish pamwing nau antu ading mu chikumbu chend. Pakwez, Djabul wasambisha kuyirishikish pakad kulab. Amakundj a mu musumb amukwata Paul ni Silas ayitwala kudi amakurump a musumb ni ayifunda anch aletishin kanrumbangesh. Mudi chibudikin, Paul ni Silas ayibula, ayitek mu rukan ni kupwa ayileja kudiokal mu musumb pakad kulab. (Mid. 16:16-40) Ov, aziya? Bwat kamu! Chading nchik piur pa akadivar nau anambaz ading achidia asu mu chikumangen? Chakin kamu niyau ajijamana! Pakad kwidjidjek chilakej chiwamp cha Paul ni Silas chayikasikesha nakash. w19.08 2 par. 1-2

Pakad kwidjidjek, mu “yisalijok yiwamp” yiney mwading kumukat Yehova ni antu end. Mwafanyina kwikal kand kuyilej antu akwau piur pa ritiy retu mudiay Yesu ni ruchingej retu ripandikena kuwap. Tukat kumekesh “yisalijok yiwamp” anch twipan nakash mu mudimu wa usey nakash wa kwikadish in kwilej. (Mat. 28:18-20) Chikalap nchik mashakamin tukweta, tukutwish kumunyik mudi yimunyik. Yisu yimwing, yom yimekena mudi yikutwish kutukangesh kulejan rusangu ruwamp, yikutwish kuswimp kwikal mitapu yiwamp yikutukwasha kupan uman. Chilakej, kambuy Paul wading mu rukan ku Rom chisu chayifundinay in Kristu a ku Filip mukand. Pakwez, miyolal yamukasau yamukangeshap kulejan rusangu ruwamp kudi atulam a rukan ni antu ezang kumutal. Paul walejana nich mushiku chikalap nchik mashakamin madingay nich, ni chinech chayinkisha akadivar kashinsh ni kuyikasikesh chakwel adandamen “kurumburil dizu dia Nzamb patok wakad wom.”—Fil. 1:12-14; 4:22. w19.08 12 par. 15-16

Diyingishin dijim tukweta dia kukudish mwikadil wa kwikepish didi mulong mwikadil winou ukat kumusangaresh Yehova. Kambuy Pita wovikesha nawamp chitongijok chinechchisu chafunday mazu madia mu mufund wa nlel. Pisambidinay piur pa mazu ma Pita, buku “ Viens, suis-moi ” shapitre wa 3 paragraf wa 23 ulondin anch: “Kwitutul kudi mudi ulemb. Yibudikin yikutwish kwikal yiyimp nakash. Muntu witutwila ap anch wikalap nchik ni ukaliweny upandikena kakwetap usey ku mes ma Nzamb. Ku mutambu ukwau, mwikadil wa kwikepish ukutwish kumusal muntu umekena mudi wakad usey ikal wa usey nakash ku mes ma Yehova. . . . Yehova ukwikal ni musangar nakash wa kukufut anch udi muntu wikepishina.” Chakin kamu, chom chiwamp nakash tukutwisha kusal kudi kumusangaresh Yehova? (Jnsw. 23:15) Anch twakudish mwikadil wa kwikepish, tukat kumusangaresh chakusambish Yehova ni tukat kutaninamu kand yiyukish yivud nakash. Kwikepish kukat kusal anch antu akwau atusejin piswimp. Mulong wak? Tong amwiney piur pa antu ukatining kwikal nau pamwing.—Mat. 7:12. w19.09 4 par. 8-9

Amakurump akat kusal mudimu nakash mulong wa kuyikwash akadivar ni anambaz nau. Ni kakatap kwiyov anch adi a usey kuyisutamu antu akwau mulong wa umutakel ukwetau. Pakwez, akat kuyisadin antu adia mu chikumangen nich rukat. (1 Tes. 2:7, 8) Rukat rau rikurikina ni kwikepish kwau yikat kumekanang mu mutapu wau wa kwisamb ni antu akwau. Andrew, mukurump ukweta ukaliweny ulondin anch: “Najingunina anch ang akadivar nau anambaz aman anch mukurump udi muntu muwamp ni uswapela kusejin, chikat kuyipukun nakash ku muchim. Mikadil yiney yikat kuyibachik antu mu chikumangen kusal mu uumwing nau amakurump.” Tony mukadivar mukwau wasadina kal mudi mukurump mu mivu yivud ulondin anch: “Nikat kusal usu wa kusadil chiyul chidia mu Filip 2:3 ni kusal chisu chawonsu usu wa kuyiman antu akwau mudi adi a usey kwinsutamu am. Chinech chikat kwinkwash kulik kuyishindin antu akwau chakwel anziyil.” Amakurump afanyidin kwimburij chilakej cha kwikepish cha Yehova. Ap anch Yehova udi mukaleng wa mangand mawonsu, ukat “kutal mes pa mangand” mulong wa kumudiosh “kazwendj mu rufunfut.” (Kus. 18:35; 113:6, 7) Pakwez Yehova uyikisin nakash antu in kwibaz ni in kwitutul. w19.09 16-17 par. 11-12

Mulong wa kudandamen kwikal akasikeshinau chisu tusendina mpand ya Yesu, tufanyidinkwikal ni chitongijok chiwamp. Mudimu tusadina udi wa Yehova, chawiy tufanyidin kuusal mudi mukatinay Yehova amwinend. Tudi ansalamudimu, ni Yehova ndiy Mwant wa mudimu. (Luka 17:10) Anch twasal mudimu mu mutapu tukatila etu, tukuman anch mpand yitulimidin. Ku mutambu ukwau, tukutwish kusal yom yishimokishena ni kupandikan yikangesh anch twalondul umutakel wa Yehova. Vurik anch kwikil muntu ukutwisha kukangesh rusot ra Yehova kusadik! (Rom 8:31; 1 Yoh. 4:4) Chitongijok chetu chidi cha kumutumbish Yehova, Tatukwetu wa rukat. Antu a pa chirung cha Yesu ading ni yibachikin ya choy ni ya ris, ashadisha musangar wau ni alika kusend mpand ya Yesu. (Yoh. 6:25-27, 51, 60, 66; Fil. 3:18, 19) Ku mutambu ukwau, antu ading nich rukat rakad choy mulong wa Nzamb ni mulong wa amutej nau asenda mpand nich musangar mu mwom wau wawonsu panap pa divu, nich ruchingej ra kusal pamwing ni Kristu mwiur. Mudi awiy, tukudandamen kusend mpand ya Yesu nich musangar anch tukwet yibachikin yiwamp. w19.09 20 par. 1; 24-25 par. 19-20

Tongin kand pa yiyukish usangeridina mulong wakwolikin kal ku yitiyij yakad kudiokal mu mifund witiyijang mu mivu yivud. Musangar mudi ik pa kwikal ni want ipau mudi winou! Ukutwish kuchingej kukwolik kujim nakash kwezina kurutu oku. Piswimp ap, Yesu ukushesh relijon wa makasu ni maguvernema mayimp ma antu. Nzamb ukuchidij “chisak chipandakena kujimb” cha antu amusadidina, ni kupwa ukwitiy anch awiy asanger yiyukish mu paradis panap pa divu. (Kuj. 7:9, 14, TMK) Antu avud nakash akuvumbuk ni akwikal ni mutapu wa kukwolik ku yibudikin yawonsu ya chitil cha Adam. (Mid. 24:15) Pa chisu cha Winyikel wa Mivu Kanan, Yesu nau antu akuyikela nend pamwing akuyinkish antu mijimbu yiwanyidina ni kuyikwash kwikal mu urund uwamp nakash ni Nzamb. Chisu chinech cha kukwolik ku chitil ni ku kuburen kuwanyin chikwikal mudi Muvu wa Musangar mu Isarel. Mudi chibudikin, antu awonsu adia pa divu amusadidina Yehova nich kushinshaman akwikal awanyidina ni akukwolik ku chitil. w19.12 12-13 par. 14-16

Mu mivu chitot ya kusambish C.C., Josef (watazukangau anch Barnabas) witiya kwa kwikatin anch Yehova amusadil. (Mid. 4:36, 37) Kupwa kwa Saul kwikal mwin kwitiyij, akadivar avud ading ni wom wa kumusejin mulong wa mwikadil wend wadingay nich mudi mwin kuzengol yikumangen. Pakwez Barnabas wamukasikesha ni wamukwasha Saul, ni Saul wafanyina kwikal mwin kujikitish nakash mulong wa ukwash winou. (Mid. 9:21, 26-28) Kupwa, amakurump ading ashicha mu Yerusalem akata kuyikasikesh akadivar ading ashicha kulemp mudi ku Antiosh wa ku Siri. Ov, nany watumau? Barnabas! Kutond kwinoku kwading kuwamp. Atulejin anch Barnabas “wayikasikesha antu awonsu kudandamen nich michim yau yawonsu ni kwikasin kudi Nsalejetu.” (Mid. 11:22-24) Chilik chimwing nlel, Yehova ukutwish kutukwash kwikal “mwin kukasikesh” kudi ambay netu in Kristu. Chilakej, ukutwish kutusadin etu mulong wa kuyikasikesh antu afishina akatish nau. Ap ukutwish kutubachik mulong wa kuya kumutal ap kumutazuk ku telefon muntu uyedila ap ukweta ushon mulong wa kumulej mazu makukasikesh. Ov, ukwitiy anch Yehova akusadin mudi mwamusadilay Barnabas?—1 Tes. 5:14. w19.10 22 par. 8

Yisu yimwing anch twasal mudimu pamwing nau arund netu, tukat kujingunin mikadil yau yiwamp, pakwez tukat kujingunin kand kuziy kwau. Yom ik yikutwisha kutukwash kulam urund wetu chikalap nchik kurumbok kwa arund netu? Chakin kamu, tufanyidinap kuchingej anch akadivar nau anambaz netu ikal awanyidina. Chawiy, kupwa kwa kuta urund wa piswimp, tufanyidin kusal usu wa kuulam. Anch murund netu warumbuk, tufanyidin kumwinkish chiyul chiwamp chimedina pa Dizu dia Nzamb pakwez pakad kumujindjikin chom. (Kus. 141:5) Ni anch atujimesh, tufanyidin kuyilikishin. Anch twayilikishin, tufanyidin kwipuk kulond kand piur pa yom yasalau yatujimesha. Chidi cha usey nakash mu machuku minam ma kwinsudiel kushinshikin pa mikadil yiwamp ya akadivar ni anambaz netu pa ndond pa kushinshikin pa kuziy kwau! Anch twasal mwamu, tukutwish kukasikesh urund wetu pamwing nau, ni chidi cha usey kusal mwamu katat mulong tukwikal ni kuswir kwa arund a piswimp pa chisu cha mar makash. w19.11 6 par. 13, 16

Pitutakedina malejan ma Bibil, tufanyidin kusal usu wetu wawonsu mulong wa ‘kwikadish in kwilej . . . , kuyilej kuziyil ku yom yawonsu yalejanay [Yesu].’ Tufanyidin kuyikwash antu kwijik usey wa kumusadin Yehova ni kukwash ku Want wend. Chinech chirumburikin kusal usu wa kuyikasikesh antu chakwel asal uyakin wikal mutapu wa mashakamin wau kusutil kusadin yom yilejinau, kupan mwom yau kudi Yehova ni kutambul dibatish. Ching kusu anch asal mwamu chad lel apand ku dichuku dia Yehova. (1 Pita 3:21) Kushadil kusu kachisu kakemp nakash kusambish katat kushik ni ku disudiel dia mangand minam. Chawiy tufanyidinap kusutish chisu mu kwilej nau antu akad kukat kuswimp mu mwom yau mulong wa kumekesh anch akatin kwikal atushalapol a Yehova. (1 Kor. 9:26) Mudimu wetu udi wa kuswapej! Kudi antu avud akweta kuswir kwa kutesh uruu wa Want mu chisu chinech chishadilaku. w19.10 11-12 par. 14-15

Muvu ni muvu pa Dichuku dia Kuchakwish, muchid wa Isarel wakumanganang pamwing ni mwin kupesh mujim wapeshang annam. Yakupesh yiney yayikwashang in Isarel kuvurik anch ading akwet kuswir kwa kuyishitwish ku yitil! Chakusambish, mwin kupesh mujim wakukumwinang pa kasu diseng dia malash ditumbila, ni kupwa kapalikany kizulang sens nich res riwamp. Yom ik tukutwisha kwilejinaku? Bibil ulejen anch malembil mitiyinay Yehova ma atushalapolend ashinshamena madi mudi diseng dia malash. (Kus. 141:2; Kuj. 5:8) Vurik anch mwin kupesh mujim watwalang diseng dia malash kurutu kwa Yehova nich kalimish kakurikina. Chilik chimwing chisu tumusejidina Yehova mu malembil, tukat kusal mwamu nich kalimish kakurikina. Tukat kujikitish nakash mulong Sakatang wetu utwitiyijin kumusejin ni kwikal nend piswimp mudi mwan udia ni tatukwend. (Jak. 4:8) Ukat kutwitiyij mudi arund nend! (Kus. 25:14) Tukat kusanger nakash dilau dined chipandakena mu chilik cha kwiyakamish chakwel kangal tusala yom ya kumunenganesh. w19.11 20-21 par. 3-5

Kwi ndond ushicha, antu avud akweting chitongijok ik piur pa midimu? Kusutamu pakur, nlel mu jingand jivud antu akat kusal midimu yikash ni mu chisu chilemp. Antu asadina midimu nakash akat kukwatikan nakash kushik ni mu chilik cha kukangany kwiswedish, kushakam pamwing ni majuku mau, ap kuwanyish maswir mau ma mu spiritu. (Mul. 2:23) Ku mutambu ukwau, antu amwing kakatiningap kusal mudimu ap pakemp ni akat kukimb mayingishin mulong wa kwiyep mudimu. (Jnsw. 26:13, 14) Chinyim ni yitongijok ya mangand yakad kwisikan pantaliken ni mudimu, shinshikin mutapu umeningay Yehova ni Yesu mudimu. Pakad kwidjidjek, Yehova ukatining kusal mudimu. Yesu wamekesha yom yiney patok palonday anch: “Tatukwam uchikat kusal mudimu ni katat ou, niyam [nidandamedin] kusal mudimu.” (Yoh. 5:17, TMK) Tong piur pa mudimu wasalay Nzamb chisu chatangay tutikit twa angel ni mangand mawonsu. Tumen kand yom yivud yatangay Nzamb panap pa divud, ndond yiwamp nakash tushicha. w19.12 2 par. 1-2

Mutapu ik washikenay David kwikal piswimp mwamu ni Yehova? David wileja kumwijik Yehova kusutil yitang. Padingay nsand, David walalang yisu yivud pol mulong wa kulam amikoku a Tatukwend. Pamwing ap chawiy chisu chasambishay kutongijokin piur pa yom yasalay Yehova. Chilakej, pazambulangay mes mend uchuku ni kutal mwiur, kamanangap kwend ching kusu tutikit twa atutumbu, pakwez wafanyina kand kujingunin mikadil ya Sakatang wa yom yiney. (Kus. 19:1, 2) Chisu chatongijokinay David piur pa mutapu ushimokishena wayitangau antu, wajingunina mutapu udiay Yehova mwin manangu nakash. (Kus. 139:14) Chisu chapakishay David kwiyilikej ni midimu ya Yehova, wajingunina anch udi mukemp nakash mu kwiyilakej ni Yehova. (Kus. 139:6) Dilejan ik twilejina? Mu mwom wey wa pichuku pichuku, tongijokin piur pa mutapu ukutwisha yitang yikunyingumukina mudi mitond, annam ni antu—kukufundish. Mwamu dichuku diawonsu ukwilej yom yivud nakash piur pa Tatukwey wa rukat. (Rom 1:20) Ni ukuman anch dichuku diawonsu rukat rey mulong wendendiy rikudandamen kukul nakash. w19.12 19-20 par. 15-17

Moses wasadina yom yilejay. Padingay ni mivu 40, Moses watonda kwibomb pamwing nau antu a Nzamb, in Hebereu, pa ndond pa kwijikan mudi “mwan wa changadim wa mwant [Farao] wa in Idjibit.” Moses walika mashakamin ma ntumb. Kusutil kwibomb nau in Isarel ading aswik mu Idjibit, Moses wafanyina kumujimesh Farao wading wijikena kwikal mwant wa usu nakash ni wamanangau kudi in Idjibit mudi nzamb. Chinech chading chisal cha ritiy rikash mudi ik! Moses wamuchingejina Yehova. Ruchingej riner rawiy rading mufulandal wa urund ukash wa Moses ni Yehova, urund walamay mu mwom wend wawonsu. (Jnsw. 3:5) Dilejan ik twilejina? Mudi Moses, etu awonsu tufanyidin kukwat mupak: Ov, tukutond kumusadin Nzamb ni kwibomb nau antu end? Mulong wa kumusadin Nzamb chikutwit pamwing ap kwipan nakash, ni antu akad kumwijik Nzamb akutwish kutupompat. Pakwez anch tumuchingejidin Tatukwetu wa mwiur, tukwikal nich kashinsh anch ukutukwash! w19.12 17 par. 5-6

Ap anch atutanga kudiokal ku rufunfut, tukwet usey nakash kusutamu rufunfut. Shinshikin mayingishin mamwing matubachikina kwikal nich kashinsh anch tukwet usey ku mes ma Yehova. Wayitanga antu nich ukaliweny wa kwimburij mikadil yend. (Dis. 1:27) Mu kusal mwamu, wayisala antu mu mutapu wa pakampwil kusutamu yom yikwau yatangay pa divu, watwinkisha chisend cha kuyikel divu ni annam. (Kus. 8:4-8) Ap kupwa kwa Adam kusal chitil, Yehova wadandamena kuyikwat antu nich usey. Utukwatin nich usey nakash chawiy chamupanay mwanend mukatish, Yesu, mudi difut mulong wa yitil yetu. (1 Yoh. 4:9, 10) Kusutil difut, Yehova ukuyivumbul antu afila kal mulong wa chitil cha Adam, ‘atentamina ni akad kutentam.’ (Mid. 24:15) Dizu diend dimekeshin anch tukwet usey ku mes mend ap anch tuyedin, tudi atuzwendj, ap amapal.—Mid. 10:34, 35. w20.01 15 par. 5-6

Muntu kakatap kuswan ruchingej ra mwiur kudi antu a mu dijuku diend. Ukat kuritambul kudi Nzamb. (1 Tes. 2:12) Chawiy, ipuk kwipul yipul yikutwisha kuyijimesh antu akwau. Chilakej, tukutwishap kumwipul mband a mukadivar uzizidilau many piur pa mutapu wiyovilay piur pa ruchingej ra kushakam chikupu pa divu pakad nfumwend. Cha usey nakash, tufanyidin kwikal kamu nich kashinsh anch mwi ngand yisu, Yehova ukez “kuwanyish rusot ra chom chawonsu chikweta mwom.” (Kus. 145:16, TMK) Anch twalik kuyiman azizidilau many mudi adi a usey nakash kuyisutamu antu akwau, twichidijin kand ayinetu. Mutapu ik? Bibil utulejin anch azizidilau many amwing akutwish kushadish kushinshaman kwau. (Mat. 25:10-12; 2 Pita 2:20, 21) Pakwez anch twipuk “kuyibaz antu,” tukutwishap kuyimburij antu akwau, ap azizidilau many ap ijikena nawamp ap kand amusadina kal Yehova mu mivu yivud. (Jud 16, TMK) Mwamu, anch antu inay ashadish kushinshaman kwau ni adiokal mu chikumangen, tukushadishap ritiy retu mudiay Yehova ap tukwimikap kumusadin. w20.01 29 par. 9-10

Mulong tudi “anend akatilay,” twikasikeshin kumwimburij ndiy, Yehova. Tukat kwimburij mikadil yend kusutil kumekesh rukat, kudimuk, ni kusutil kwikal in kulikishin. Anch antu akad kumwijik Nzamb aman mwikadil wetu uwamp, chinech chikutwish kuyibachik kwilej yom yivud piur pend. (1 Pita 2:12) Anvaj in Kristu afanyidin kumwimburij Yehova mu mutapu wa kuyisadin anau. Anch asal mwamu, anau akukat kwikal mu urund wa piswimp ni Yehova. Tukat kwibaz mulong wa Yehova, Tatukwetu wa mwiur, ni tukatining anch antu kwau amwijik. Twiyovil etu awonsu mudi Mwant David wafunda anch: “Chifanyidin muchim wam wibazina mu [Yehova].” (Kus. 34:3) Chidi nchik chad anch tuzangurokiningap kwetu? Mutapu ik tukutwisha kwikal atakamena? Tukat kwikal atakamena anch twashinshikin pa mutapu tukumusangaresha Yehova ni mutapu ukutaninawamu antu akwau anch ilej piur pend. Yehova ukutwinkish kutakaman tukweta nich kuswir. Wayikwasha akadivar netu a mu mivu chitot ya kusambish chakwel ikal atakamena, ukutukwash kand niyetu.—1 Tes. 2:2. w20.02 11 par. 12-13

Antu avud akata kwilejang Bibil akat kuya kurutu ni kushiken ku kutambul dibatish. Pakwez, chimeken anch antu amwing tukata kwilej nau Bibil akwet wom wa kwikal in kwilej. Akat kusanger kwilej Bibil, pakwez kakatap kuya kurutu mulong wa kushiken kutambul dibatish. Anch utakedil dilejan dia Bibil, tukwet kashinsh anch ukatin kumukwash mwin kwilej wey chakwel asadin yom yilejinay ni kushiken kwikal mwin kwilej wa Kristu. Yehova ukatin antu amusadin mulong amukatin. Chawiy chitongijok chetu chidi cha kuyikwash in kwilej kutesh nawamp anch Yehova uyibangidin muntu ni muntu panrend ni anch uyikatin nakash. Tukatin kuyikwash chakwel amuman Yehova mudi “tatuku wa an anshon ni mwin kuyichidij adiaafu.” (Kus. 68:6) Anch in kwilej ey ajingunin mutapu uyikatilau kudi Nzamb, akwikal pamwing ap apukwinau ku michim ni akushiken kumukat Yehova nakash. Chawiy, yikwasha in kwilej chakwel atesh nawamp anch Nzamb wetu wa rukat ukatin anch awiy atambul mwom wa chikupu, ni anch udi tayad kuyikwash chakwel atambul mwom winou. w20.01 3 par. 7-8

Kambuy Paul wading wikepishin chawiy wijika anch wading ukwet kuswir kwa kumukasikesh kudi arund nend. Kiyakamishap anch antu akwau akumuman mudi uziyin mulong amwongoja kudi arund nend pa yisu ya yakamish. (Kol. 4:7-11) Anch twitiyin nich kwikepish anch tukwet kuswir kwa kutukasikesh, akadivar ni anambaz netu akusanger nakash kutwinkish ukwash tukweta nich kuswir. Paul wading wij anch Mifund yafanyina kumwongoj. (Rom 15:4) Yafanyina kand kumwinkish manangu mulong wa kurish nich choziu chin chawonsu. (2 Tim. 3:15, 16) Pamutekau kapamp ka kaad mu rukan ku Rom, Paul wiyova anch rufu rend rasej kal piswimp. Wamutumesha Timote chakwel eza swa amanijan nend ni amusendin ‘mivungur.’ (2 Tim. 4:6, 7, 9, 13) Mulong wak? Mulong chimeken anch mivungur yiney yading yikunku ya Mifund ya Hebereu yafanyinay kusadin Paul mu dilejan diend dia Bibil dia muntu panrend. Anch twamwimburij Paul kusutil kwilej nich mushiku Dizu dia Nzamb, Yehova ukusadin mifund mulong wa kutwongoj—chikalap nchik yoziu turishina nich. w20.02 23-24 par. 14-15

Elifaz, Bilidad, ni Sofar kasutishap chisu mulong wa kutongijokin piur pa mutapu wafanyinau kumukwash Job. Pakwez ading akat kutong piur pa mutapu wa kumufish nich Job anch wasadin yom yiyimp. Mazu mamwing malondau mading mawamp, pakwez yom yivud yalondau piur pa Job ni piur pa Yehova yading kamu yiyimp ni ya makasu. Amurumburisha Job nayimp. (Job 32:1-3) Yom ik yasalay Yehova pa mulong winou? Wajimana nakash mulong wa amakundj inay asatu. Wayitazuka anch ayisup ni wayileja anch amwit Job chakwel ayilembil. (Job 42:7-9) Twilejin yom yivud kusutil chilakej chiyimp cha Elifaz, Bilidad, ni Sofar. Chakusambish, tufanyidinap kuyirumburish akadivar netu. (Mat. 7:2-5) Pakwez, tufanyidin kuyitesh nawamp kurutu kwa kulond. Ching anch twasal mwamu chad lel twatesh milong yirishinau nich. (1 Pita 3:8) Cha kaad, chisu tulondina tufanyidin kwikal nich kashinsh anch mazu metu madi mawamp ni yom tulondina yidi yakin. (Efes 4:25) Ni cha kasatu, Yehova ukat kuta matu nakash ku yom twambambina umwing ni mukwau. w20.03 22-23 par. 15-16

Yisu yivud pitukata kuyifundish antu akwau piur pa Yehova, niyetu tukat kushiken kumwijik nawamp. Chilakej, tukat kuman uman umekeshina chakin kamu ranaken ra Yehova pakatay kututakel mulong wa kuya kudi antu akweta mwikadil uwamp wa muchim. (Yoh. 6:44; Mid. 13:48) Tukat kuman mutapu usadina usu wa Dizu dia Nzamb chisu tumena mutapu ulikinau antu twilejining nau Bibil yaku yau yiyimp ni kudjal untu usu. (Kol. 3:9, 10) Ni tukat kuman uman wa kushimpish muchim kwa Nzamb pakatay kuyishil tutikit twa antu a mu teritwar wetu chisu cha kwilej piur pend chakwel apand. (Rom 10:13-15) Pakwez, chikalap nchik uvud wa mivu twamusadidina kal Yehova, tufanyidin kudandamen kukwat nich usey urund wetu ni ndiy. Mutapu umwing wa pakampwil tukutwisha kumekesh anch tukwatin nich usey urund wetu ni Yehova, udi kusutil kwambambang nend mu malembil. Mambamb mawamp makat kukasikeshang urund. Chawiy, musejina Nzamb chisu chawonsu mu malembil, muleja yitongijok ya muchim wey pakad kwov wom. w19.12 19 par. 11, 13-14

Chitongijok chinech chitukasikeshin mud ik! Chidiay Mwant wa Want wa Nzamb, Yesu ukupwish mar mawonsu tumena mulong wa Satan ni mangand mend. (Isay 65:17; 1 Yoh. 3:8; Kuj. 21:3, 4) Ruchingej ruwamp mud ik tukweta! Ni ap anch Yesu watwinkishin kal chisend chikash, udi pamwing netu ni utukwashin djat ni kwinsudien kwa mangand minam. (Mat. 28:19, 20) Mazu minam makat kutukasikesh kamu chipandikena! Kukasikesh, ruchingej ni kutakaman—yom yiney yidi mayal ma mufulandal pimedina chisambu chetu cha mu manangu. Chawiy, mutapu ik ukutwisha kulam chisambu chey cha mu manangu chisu urishina ni yoziu? Ukutwish kusal mwamu kusutil kwimburij yom yasalay Yesu. Chakusambish, lembil ni dandamen mu malembil. Cha kaad, muziyina Yehova ni lejan nich mushiku ap anch chikasiken kusal mwamu. Ni cha kasatu, kimb ukwash wa arund ney anch udi mu yoziu. Mwamu chisambu cha Nzamb chikulam manangu mey ni muchim wey. (Fil. 4:6, 7) Ni mudi Yesu, tukutwish kupandikan choziu chin chawonsu.—Yoh. 16:33. w19.04 13 par. 16-17