Ngond wa 10

Tukwet kamu uman uvud umekeshina anch Yehova uyichidijin antu end nlel. Chilakej: Tukat kulejan ni kufundish uyakin ku makonk mawonsu ma divu. (Mat. 28:19, 20) Mudi chibudikin, tumekeshin patok midimu yiyimp ya Djabul. Chakin kamu, anch Satan ukwet usu, wafanyinang kwimik mudimu wetu wa win Kristu, pakwez kakutwishap. Chawiy tukutwishap kwov wom wa aspiritu ayimp. Anch tudi ashinshamena kudi Yehova, ayilembil kakutwishap kutusal nayimp. Pakwez, etwawonsu tuswirikedin kuyipandikan aspiritu ayimp ni kumuchingejin Yehova. Anch twasal mwamu, tukutambul yiyukish yivud ni kakutupumbulap nich makasu ma Satan. Chikwau kand, tukuziyap kumusadin Yehova mulong wa wom wa ayilembil. Cha usey nakash, tukukasikesh urund wetu wa piswimp ni Yehova. Mwin kwilej Jakobu wafunda anch: “Rishany nend Sakudimban, chad ndiy ukukuchinany kulemp. Sejany piswimp kudi Nzamb, chad niyend ukusej piswimp ni yenen.”—Jak. 4:7, 8. w19.04 24 par. 15; 25 par. 18

Anen adi chipan chidiokila kudi Nzamb, “uswan wa [Yehova].” Chidi chisend chen cha kuyichidij an inay. Yom ik ukutwisha kusal mulong wa kuyichidij aney pantaliken nau antu akata kuyipish an? Chakusambish, ileja mulong wa kwijik chirumburikina kumuyipish mwan. Ileja mulong wa kwijik antu a mutapu ik akata kuyipish an ni milad yikatau kusadin mulong wa kuyidimb an. Shinshikin yom ap antu amekeshina ubaj kanang. (Jnsw. 22:3; 24:3) Ijik anch yisu yivud mwin kumuyipish mwan uding muntu wijay mwan nawamp ni uchingejidinay. Cha kaad, ikal ni chaku cha kwambambang patok nau aney. (Kuv. 6:6, 7; Jak. 1:19) Vurik anch an akatau kuyipish akweting wom nakash wa kulond. Mwan ukutwish kov wom anch kwikil kwau muntu ukwitiya yom yikulonday ap ukutwish kwov wom mulong muntu wamuyipishang wamulejang anch ukumusal nayimp anch walejan. Anch wajingunin anch kudi chom kampand chiyimp chamushikenang mwaney, mwipula mu mutapu uwamp ni mutesha nawamp nich kushimpish muchim chisu chirumburilay. Cha kasatu, yifumba aney. Yifundisha yom yifanyidinau kulond ni kusal anch muntu wapakish kuyikwat pa ndond yakad kuwanyin ni mu mutapu wakad kuwanyin. w19.05 13 par. 19-22

Mulong wak Yehova uyikisin antu in kwibaz? Diyingishin dimwing didi anch antu akata kukudish ni kumekesh mwikadil wa kwikat ayinau imburijin kwibaz kwa Satan. Tongijok bil, Satan watonga anch Yesu—wasadinau kudi Nzamb mulong wa kutang yom yawonsu—ufanyidin kumwasin manungin ni kumwifukwil! (Mat. 4:8, 9; Kol. 1:15, 16) Antu imena ayinau anch akwet usey nakash amekeshin patok anch manangu ma mangand madi usup ku mes ma Nzamb. (1 Kor. 3:19) Pakwez, Bibil utukwashin kwikal ni chitongijok chisikena piur pa ayinetu. Ulondin anch chidi cha usey kwikat ayinetu mu chilik chiwanyidina. Yesu walonda anch: “Mukata mukwen mudi ey amwiney,” chinech chirumburikin anch tufanyidin kwikal isikena patushinshikidina pa maswir metu. (Mat. 19:19) Pakwez, Bibil kalejenap anch tufanyidin kwikwat nich usey nakash kuyisutamu antu akwau. Chinyim ni chinech, ulondin anch: “Kangal wasalany yom mulong wa kwitong ayinen ap mulong wa kwibaz, pakwez ikepishany, muntu ni muntu amumana mukwau mudi udi muwamp kumupandakanamu.”—Fil. 2:3; Rom 12:3. w19.05 24 par. 13-14

urik kuswimp wasala piwitiya kapamp ka kusambish uyakin wa Dizu dia Nzamb ni piwakwata mupak wa kumusadin Yehova. Avud pakach petu ading ni kuswir kwa kulik yaku yiyimp mulong wa kumusadin Yehova. (1 Kor. 6:9-11) Pakwez tufanyidinap kutong anch tukwetap kuswir kwa kuswimp yaku kanang. Ap anch twalikin kal kusal yitil yikash twading kusalang kurutu tutambula dibatish, tufanyidin kusal usu nakash wa kwipuk chom chin chawonsu chikutwisha kutubachik kusal yitil yiney. Mutapu ik tukutwisha kusal mwamu? Kudi yom yaad tufanyidina kusal. Chakusambish, tufanyidin ‘kulik kwikal aumbilau,’ kudi mangand minam. Cha kaad, tufanyidin ‘kukarumuk’ mu kuswimp manangu metu. Kukarumuk kurumburikin yom yivud kusutamu kwau kukarumuk kumekena ku mes. Kutadin wuntu wetu wawonsu. Tufanyidin kuswimp manangu metu—wuntu wetu wa mukach, yovil yetu ni maswir ap maku metu. w19.06 9 par. 4-6

Anch tudi mu yakamish, tukutwish kutan kukasikesh anch twaya ku yikumangan. Anch twaya ku yikumangan, tumwinkishin Yehova mutapu wa kwikal mwin ‘kutukwash ni kutwongoj.’ Kwinikwa ukat kutukasikesh kusutil spiritu wend utumbila, Dizu diend, ni antu end. Yikumangan yikat kutwinkish kand mutapu wa ‘kukasikeshijan.’ (Rom 1:11, 12) Nambaz Sophia walonda anch: “Yehova nau akadivar netu a pa mangand mawonsu ankwasha kujijaman. Cha usey nakash kudi am yading yikumangan yetu. Namana anch kwipan nakash mu kulejan ni mu kusal yom yivud mu chikumangen kwankwasha nakash kurish ni yakamish.” Anch twikal ni yovil ya kuziy, tufanyidin kuvurik anch Yehova kakaninap kwend ching kusu kupwish yakamish mu machuku ma kurutu pakwez utukwashin kand kurish nich yakamish yiney kusambish kamu nlel. Utwinkishin “usu wa kusal” mulong wa kurish ni yovil ya kuziy ni kwikal ni ruchingej.—Fil. 2:13. w19.06 19 par. 17-18

Yesu ufanyidin kwikal ni mbil ya usey nakash ya kuyinkish in kwilejend, mulong chom cha kusambish chasalay kal Yesu kupwa kwa kuvumbuk kwend chidi kutenchik mulong wa kukumangan pamwing nau in kwilejend. Ku chikumangan chinech chatenchikay Yesu, wakasikeshina pa mudimu wa usey nakash wafanyinau kusal in kwilejend mu mivu chitot yakusambish—mudimu wa mutapu umwing tusadina kand nlel. Yesu walonda anch: “Yangany kudi antu a michid yawonsu, [ni yikadishany] in kwilejam. . . . Yilejany kuziyil ku yom yawonsu yinakulejanya.” (Mat. 28:19, 20) Yesu ukatin anch in kwilejend awonsu asal mudimu wa kulejan. Kapanap kwend mbil yiney ching kudi atwimbuy ashinshamena 11. Mutapu ik twija mwamu? Mulong chisu chapanay Yesu mbil ya kwikadish in kwilej ku mukandu wa Galalia, kwadingap kwau ching kusu atwimbuy. Mulong wak tulondina mwamu? Vurik anch mwangel wayileja amband aya kwi nzay anch: “Kwinikwa kwawiy kuukumumenanya [ku Galalia].” (Mat. 28:7) Chawiy amband ashinshamena afanyina kwikalap niyau chisu chapanay Yesu mbil yiney. w20.01 2 par. 1-4

Yesu warumburila mulong wak tufanyidin kuchingej anch akutupompat. Walonda anch akutukis mulong tudiap a mangand minam. Rupompat rimekeshinap anch tukwetap dilau dia Yehova. Pakwez, rimekeshin anch tusadin yom yitentamina! Mulong adi kwau an a antu, in kutupompat kakutwishap kamu kukangesh difukwil dia Yehova Nzamb mwin dikand diawonsu. Antu avud apakisha kal kusal mwamu, pakwez akat kukangany. Shinshikin yom yasadika chisu cha Njit ja Kaad ja Mangand mawonsu. Pa chisu chinicha, mu jingand jivud, anyikel ayipompata antu a Nzamb nakash. Mudimu wa Atuman a Yehova kaukangeshap kusu kwau kudi in Nazi mu Allemagne pakwez kand kudi anyikel a mu Australie, mu Canada ni mu jingand jikwau. Chad, shinshikin yom yashikena. Chisu chasambisha njit mu muvu wa 1939, pa mangand mawonsu pading in kulejan 72475. Marapor malejana anch kupwa kwa njit mu 1945, nich ukwash wa Yehova, in kulejan awanyina 156299. Uvud wa in kulejan wiweja tupamp twaad ni kusut! w19.07 9 par. 4-5

Ap anch ukwetap dilejan dia Bibil utakedina mu chisu chinech, ukutwish kukwash ku mudimu wa kwikadish antu in kwilej mu mitapu yikwau. Chilakej, ukutwish kuyak antu asu ezina ku Chot cha Want ni kuta nau urund. Mu kusal mwamu, ukutwish kuyikwash kwikal nich kashinsh anch rukat ritumekeshin patok anch tudi in Kristu akin. Yakul yey yiswimp upanina chisu cha yikumangan, yikutwish kuyifundish antu asu akumangena chakwel niyau asambish kulond patok piur pa ritiy rau nich kashinsh ni mu mutapu wa kalimish. Ukutwish kand kuya mu mudimu wa kulejan pamwing ni mwin kulejan musu ni kumukwash chakwel ijik mutapu wa kuyitongish antu kusutil Mifund. Anch wasal mwamu, ukumukwash chakwel amwimburij Yesu. (Luka 10:25-28) In Kristu avud akwatiken nakash mulong akwet yisend yivud ya usey. Pakwez ap anch akwet yisend yivud, in Kristu akat kwitekin chisu mulong wa kutakel malejan ma Bibil, ni kusal mwamu kukat kuyiletin musangar nakash. w19.07 17 par. 11, 13

KambuyPaul kitiyap anch yom yiwamp ap yiyimp yasalay pakur yimukangesh kusal mudimu wa Yehova. Chawiy walonda anch ‘kuvuramen yom yawonsu ya kwinyim’ kwading kwa usey mulong wa “[kutambul] yom yezila kurutu,” charumburik anch kuwanyish kamu kubambil kwend. Yom ik yimwing yafanyina kumuletin Paul kampuw? Chakusambish, kurutu ikala mwin Kristu wading pakach pa in Yuda ading ni mashakamin mawamp. Pakwez wamana yom yiney mudi “dishit divundila.” (Fil. 3:3-8) Cha kaad, kalikidinap anch yovil ya kwifish nich piur pa yom yiyimp yayisalay in Kristu pakur, yimukangesh kumusadin Yehova. Ni cha kasatu, katongap anch ufanyidin kwimik kusal mudimu ukash mulong wasadin kal yom yivud mu mudimu wa Yehova. Paul wasala yom yivud nakash mu mudimu wa kulejan ap anch amubula, amwasa mayal, wajiya ni waat, waburena yakudia ni ya kudjal. (2 Kor. 11:23-27) Pakwez, chikalap nchik yom yading yasalay kal ni mar mamanay, Paul wading wij anch ufanyidin kudandamen kuya kurutu. Niyetu tufanyidin kusal mwamu. w19.08 3 par. 5

Akadivar ni anambaz netu avud ashich mu jingand jilikishinau mudimu wa kulejan ap mukangeshinau kulejan ku chis ni chis, chawiy akimbining mitapu yikwau yikutwishau kulejan rusangu ruwamp. (Mat. 10:17-20) Mwi ngand yimwing, kalam wa munyingumuku walonda anch chiwapin mwin kulejan win mwawonsu alejana kudi anamakwend a ku mujimbu, amutej nend, ambay nend a mudimu ap a ku shikol ni kudi antu akwau ijay nawamp. Kupwa kwa mivu yaad, uvud wa yikumangen wiweja mu munyingumuku winiwa. Pamwing ap mwi ngand tushicha kakangeshinap mudimu wa kulejan. Chawiy tukutwish kwilej dilejan dia usey kusutin yilakej ya akadivar ni anambaz netu: Chisu chawonsu kimb mutapu wa kwipan nakash mu mudimu wa kulejan, ni ikal nich kashinsh anch Yehova ukukwinkish usu ukweta nich kuswir chakwel upandakana chikangesh chin chawonsu. (Fil. 2:13) Mu chirung chinech chikash, el amboku tushinshikinany yom yikweta usey nakash, twikal zwang, twipuk kuyipwakesh antu akwau ni tumekesh yisalijok yiwamp. Anch twasal mwamu tukujimbish rukat retu ni tukumutumbish Yehova Tatukwetu wa rukat. w19.08 13 par. 17-18

Tukatiningap kamu kwikal pamwing nau antu akad kuteshang yitongijok ya antu akwau ni akatining anch ching antu akwau asala yom yikatilau awiy. Pakwez, chitusangareshining nakash kwikal pamwing nau akadivar ni anambaz akata ‘kwitek pa ndond ya antu akwau, kumekesh rukat ra ukadivar, ranaken, ni kwikepish.’ (1 Pita 3:8) Anch twayisejin antu a mutapu winou, niyau akutusejin—anch twadandamen kwikal ikepishina. Kwikepish kukat kuwapish mashakamin metu. Chakin kamu, yisu yimwing yom tutongina anch yidi yakad kutentam yikutwish kutushiken. Mwant Salomon, ikundj wading ni manangu nakash walonda anch: Antu akweting ukaliweny nakash kakatap kutambul ntumb chisu chawonsu. Pakwez yisu yimwing antu akweting ukaliweny ukemp akat kwikal ni ntumb nakash ni antu akat kuyishinshikin. Ap mwamu, Salomon wajingunina anch tufanyidin kwitiyij mashakamin mutapu madia pa ndond pa kujiman piur pa mutapu usadikina yom mu mashakamin metu. (Mul. 6:9) Anch twikepishin, chikutuswapel kwitiyij mutapu udia mashakamin metu—ap anch madiap mutapu tukatina. w19.09 4-5 par. 9-10

Antu akweta umutakel kampand, mudi amakurump a yikumangen, atatuku, ni amaku, akwet diyingishin dikwau dia kuyikwash antu akwau. Yehova wamwinkisha tatuku chisend cha kwikal ntakel wa dijuku, ni Nzamb umuchingejidin anch ayifumb anend ni kuyipup. (1 Kor. 11:3) Pakwez chinech chirumburikinap anch tatuku ufanyidin kusadin umutakel winou mu mutapu ukatinay. Yehova ndiy Sakatang wa dijuku, chawiy atatuku akez kupan kuchind kudi Yehova piur pa mutapu ulaminau majuku mau. (Efes 3:14, 15) Atatuku akat kumekesh anch amuziyidil Yehova anch asadin umutakel wau mu mutapu umusangareshina Yehova. Kangal wasadin nayimp umutakel wakwinkishau kudi Yehova. Itiyin kurumbok kwey, ni itiy yiyul yimedina pa Bibil ya antu akwau. Anch wasal mwamu, dijuku diey dikukulimish mulong wa kwikepish kwey. Piulembila pamwing ni dijuku diey, mwazurila Yehova muchim wey—el antu a mu dijuku diey atesha mutapu umuchingejidina Yehova. Cha usey nakash, sal mudimu wa Yehova wikal chom cha usey nakash mu mwom wey. (Kuv. 6:6-9) Chilakej chey chiwamp chidi chipan cha usey nakash ukutwisha kupan ku dijuku diey. w19.09 15 par. 8; 17 par. 14; 18 par. 16

Marko wasangerang kuyisadin antu akwau. Chilakej, mu yisu kushalijan wasala pamwing ni kambuy Paul ni Pita chisu chading chiwanyishinau yisend yau, ni chimeken anch Marko wayikwashang kuwanyish maswir mau ma ku mujimbu. (Mid. 13:2-5; 1 Pita 5:13) Paul umujimbwil Marko mudi umwing wa “in Kristu, akata kusal mudimu wa Want wa Nzamb” pamwing nend, ni mudi ‘ukwash ukata kukasikesh’ kudi ndiy. (Kol. 4:11) Marko wikala umwing wa pakach pa arund a piswimp a Paul. Chilakej, pamutekau Paul kapamp ka nsudiel mu rukan ku Rom, piswimp muvu wa 65 C.C. wafunda mukand wend wa kaad kudi Timote. Mu mukand winou, Paul wamuleja Timote kumusend Marko chakwel aya nend pamwing ku Rom. (2 Tim. 4:11) Pakad kwidjidjek Paul wasangera mudimu ushinshamena wasalay Marko pakur, chawiy waswirikena kwikal nend pamwing pa chisu chinicha cha usey. Marko wamwinkisha Paul ukwash wading uswirikedinay, pamwing ap kusutil kumwinkish yakudia ap kumwinkish mivungur ni ink mulong wa kufund mikand. Chimeken anch ukwash ni kukasikesh yatambulay Paul yamukwasha kujijaman kwinsudiel kwa mwom wend machuku makemp kurutu kwa kumujip. w20.01 11 par. 12-13

Twatonda mwom wa kwipan ni wa kusal mudimu ukash. Yesu watakela kutubabesh anch akez katuzengol. Pakwez tuchingejin anch Yehova ukutwinkish usu chakwel tutwish kujijamen chakamish chawonsu. Anch twadandamen kujijaman tukwikal akash. (Jak. 1:2-4) Tukutwish kuchingej kand anch Yehova ukutwinkish yom tuswirikedina, Yesu ukutulam, ni akadivar nau anambaz netu akutukasikesh. (Mat. 6:31-33; Yoh. 10:14; 1 Tes. 5:11) Mband wokau kudi Yesu musong wend wa “rulong ra mash” wikala ukasikeshinau dichuku diayerikay. (Luka 8:43-48) Pakwez ukutwish kudandamen kwikal ukasikeshinau chikupu ching anch wikala mwin kwilej ushinshamena wa Kristu. Utongin anch mband winou wasala ik? Anch watonda kusend mpand ya Yesu, tongijokin piur pa difut diafanyinay kwikal nich—kusal pamwing ni Yesu mwiur! Yom yawonsu yashay mulong wa kumulondul Kristu yikutwishap kwilikan ni yiyukish yikutambulay. Ruchingej retu rikala ra kuya mwiur ap ra kushakam panap pa divu, tukutwish kwikal ni musangar nakash mulong twitiya kutazuk kwa Yesu kulondina anch: “Ezany kudi am!” w19.09 25 par. 21-22

Mulong ading akwet kuswir kwa ukwash, chawiy amakundj a David amwita Nabal ikundj umwing mpich mwin Isarel anch ayinkishaku yakudia ap kusu yikemp. Anch amwita chidi mulong ading amuchidijidin yisak ya amikoku ading mu masuku. Pakwez mulong wa choy Nabal wayikisha. Chawiy David wajimana ni wakwata mupak wa kumujip Nabal nau amakundj awonsu a mu chikumbu chend. (1 Sam. 25:3-13, 22) Pakwez, Abigayil mband muwamp wa Nabal, wading mwin manangu nakash. Nich kutakaman wawa ku yilaz ya David ni wamwilembina anch pikil wasend chisend cha mash kusutil kumujip Nabal ni antwend. Wamuyula nich nkeu anch ufanyidin kumuchingejin Yehova chakwel amukwash. Mazu ma kwikepish ma Abigayil ni yisal yend yiwamp yading yakad kwijikan yapukuna muchim wa David. David wajingunina anch Yehova ndiy wamutuma Abigayil. (1 Sam. 25:23-28, 32-34) Abigayil wakudisha mikadil yiwamp ni yawiy yasala anch Yehova amusadin. Chilik chimwing, anch anambaz in Kristu ikal in nkeu ni in manangu, Yehova ukutwish kuyisadin mulong wa kukasikesh majuku mau ni antu akwau mu chikumangen.—Tit. 2:3-5. w19.10 23 par. 10

In Kristu akin awonsu afanyidin kumekesh patok anch ashalijadin nakash ni Babilon Mujim. Kurutu kwa kwilej uyakin, pamwing ap mwin kwilej wa Bibil wading mu relijon wa makasu. Pamwing ap wakumanganang nau ni wakwashang ku mijikit ya relijon. Ap kand pamwing ap wapanang nfalang ku ditenchik dined. Kurutu kwa kumwitiy mwin kwilej wa Bibil mudi mwin kulejan wakad kal kutambul dibatish, ufanyidin kujip urund wawonsu ni relijon wa makasu. Ufanyidin kuyifundin antu a relijon wend wa pakur mukand umekeshina anch kadiap kand umwing wa pakach pau ni anch kakwetap urund ap pakemp ni Babilon Mujim. Mwin Kristu wakin ufanyidin kwikal nich kashinsh anch mudimu wend wa ku mujimbu ununginap chikas ku Babilon Mujim. (2 Kor. 6:14-17) Mulong wak tukwatin mupak winou wa usu? Mulong tukatinap kubombakan mu midimu ni mu yitil ya yitenchik ya marelijon yijondila ku mes ma Nzamb.—Isay 52:11. w19.10 12 par. 16-17

Jeremiy ndiy wafunda mukand wa Bibil ukweta dijin diend ni chimeken anch ndiy wafunda kand Ant wa 1 ni wa 2. Pakad kwidjidjek, chisend chinech chamukwasha kuman ranaken ra Yehova pantaliken ni antu akad kuwanyin. Chilakej, wading wij anch chisu chakarumukay Mwant Akab kudiokal ku yitil yend, Yehova wamukamunina chakwel kangal amana kusheshik kwa dijuku diend pachidiay mwom. (1 Ant 21:27-29) Chilik chimwing, Jeremiy wading wij anch Manase wasala yom yamujimesha Yehova nakash kusutamu yasalay Akab. Ap mwamu, Yehova wamulikishina Manase mulong wakarumuka. (2 Ant 21:16, 17; 2 Jsng. 33:10-13) Nsangu jinej jafanyina kumukwash Jeremiy kwimburij kushimpish muchim ni ranaken ra Nzamb. Shinshikin mutapu Jeremiy mwamukwashay Baruk pikalay ni kampuw mu chisend chend mu chisu kanang. Pa ndond pa kumulik murund nend kapamp kamwing, Jeremiy wamukwasha Baruk kusutil kumulej uruu wa rukat wa Nzamb, pakwez pakad kumujindjikin chom.—Jer. 45:1-5. w19.11 6 par. 14-15

Mu mukand wa In Levi, twilejin anch mwin Isarel wafanyina kupan yakupesh ya mulambu wa chisambu “mulong wa kujikitish.” (Lev. 7:11-13, 16-18) Wapanang mulambu winou, kadiap mulong chading chimufanyidin kusal mwamu, pakwez mulong wading ukatin kusal mwamu. Mudimu wetu kudi Yehova udi mudi yakupesh ya mulambu wa chisambu yiney mulong umekeshin mutapu twiyovila piur pa Yehova. Tukat kumwinkish Yehova yom yetu ya usey, ni tukat kusal mwamu mulong tumukatin nich muchim wetu wawonsu. Musangar mudi ik ufanyidinay kwikal nich Yehova pakuman ma miliyon ma in kumwifukwil kwa kwisotil makat kumusadin mulong amukatin ni akatin jinjil jend! Tukutwish kwikal akasikeshinau kusutil kuvurik anch Yehova umen ni ukwatin nich usey kadiap ching kusu kwau yom yawonsu tusadina pakwez kand yibachikin yetu. Chilakej, anch wananapin kal ni utwishinap kand kusal yom yivud mudi mutapu ukatina, ikal nich kashinsh anch Yehova umen mimbu yey. Pamwing ap wiyovil anch usadinap yom yivud mu mudimu wa Yehova, pakwez Yehova umen rukat rey rikurikina rikubachikina kusal yom utwishina kusal. Usangaredin yom yawonsu usadina kukwatijan ni usu wey. w19.11 22 par. 9; 23 par. 11-12

Kwikal ni chitongijok chisikena piur pa mudimu kudi kwa usey. Mwant Solomon amupepila kufund anch: ‘Kuding chisu mulong wa yom yawonsu.’ Wajimbula kukun, kutung, kudil, kusip, kuja maj ni yom yikwau. (Mul. 3:1-8) Chakin kamu, mudimu ni kwiswedish yidi yom yaad ya usey mu mwom. Yesu wading ni chitongijok chisikena piur pa mudimu ni kwiswedish. Dichuku dimwing atwimbuy achirika kudiokal mu mudimu wa kulejan. Ading aziyang kal ni “kamanap chisu cha kudia.” Yesu wayileja mazu madia mu mufund wa nlel. (Mar. 6:30-34) Ap anch ndiy nau in kwilejend katwishap kamu kwiswedish mudi mwakatau, pakwez Yesu wading wij anch ading akwet kuswir kwa kwiswedish. Chakin kamu, yisu yimwing tukutwish kwikal ni kuswir kwa kuswimp program wetu piur pa mudimu ni kwiswedish. Tukutwish kujingunin chom chinech kusutil ditenchik diatekay Nzamb mulong wa antu end a pasak piur pa kulimish Sabat wa rubing ni rubing. Tudiap mwinshin mwa Chijil cha Moses; pakwez kwilej yom yalejanau mu chijil chinech piur pa Sabat kukutwish kutukwash. w19.12 3 par. 6-7

Yehova washilamu anch ukuyibangin atushalapol end ashinshamena, ni ukat kwiyov ubachikinau kuwanyish kushilamu kwend. (Kus. 31:1-3) Chikwau kand, Yehova wij anch tukwov ushon nakash ni kuziy anch kayibangidinap antu a mu dijuku diend. Ushidinamu anch ukuwanyish maswir metu ma kumujimbu ni ma mu spiritu, ni kwikil chom chikutwisha kumukangesh kuwanyish kushilamu kwinoku! (Mat. 6:30-33; 24:45) Chisu turishina ni milong ya kuburen nfalang, anch twavurik mulong wak Yehova ukat kuwanyishang kushilamu kwend, tukutwish kwikal nich kashinsh anch ukutukwash. Shinshikin chilakej cha in Kristu a mu mivu chitot ya kusambish. Chisu chazengolau nakash chikumangen cha mu Yerusalem, “ayipalangesha in kwitiyij awonsu . . . ching kusu atwimbuy a Yesu, awiy ashala.” (Mid. 8:1) Tong piur pa yibudikin yafanyina kwikalaku mulong wa kuzengol kwinoku. Mudi kuburen nfalang! Chimeken anch in Kristu ashadisha yikumbu yau ni yom yau yisakangau nich. Pakwez Yehova kayilikap; ni in Kristu inay kashadishap musangar wau. (Mid. 8:4; Heb. 13:5, 6; Jak. 1:2, 3) Yehova wayikwasha in Kristu inay ashinshamena, ni ukutukwash kand niyetu.—Kus. 37:18, 19. w20.01 17-18 par. 14-15

Chisu chatwishay David kuchidij amikoku a tatukwend kwi ntambu ni nnam mukwau wa chidiany, wajingunina anch Yehova ndiy wamukwasha kuyipandikan annam inay akweta usu. Chisu chamupandikanay Goliat, chitabu ikundj mwin kurish njit wa usu, David wamana kamu anch Yehova wading umutakedil. (1 Sam. 17:37) Ni chisu chatwishay kumuchin Saul Mwant mwin mukau, David witiya anch Yehova ndiy wamupandisha. (Kus. 18, mazu ma kwinsambishil) Muntu mwin kwitutul wafanyina kulond anch yom yiney wayisala ku usu wend amwinend. Pakwez David wading wikepishin chawiy watwisha kujingunin chikas cha Yehova mu mwom wend. Dilejan ik twilejina? Tufanyidin kusal yom yivud kusutamu kusu kwau kwit ukwash wa Yehova. Tufanyidin kand kwikasikesh kujingunin chisu ni mutapu utukwashinay. Anch twitiyin nich kwikepish mimbu yetu, tukuman chakin kamu anch Yehova ndiy utukwashina kusal yom yitwakad kutwish etu ayinetu kusal. Ni anch chisu ni chisu twajingunin mutapu utukwashinay, urund wetu ni ndiy ukukasikan nakash. w19.12 20 par. 18-19

Tukwet mayingishin mavud matubachikina kwitiyij anch Yehova utukwatin nich usey. Watupwitina kudi ndiy ni washinshikina mutapu twitiya rusangu ruwamp. (Yoh. 6:44) Pitwasambisha kumusejin Yehova piswimp, ni ndiy watusejina piswimp. (Jak. 4:8) Yehova ukat kwitekinang kand chisu ni ukat kusal usu wa kutufumb, mulong wa kumekesh anch tukwet usey ku mes mend. Wij anch tudi antu a mutapu ik nlel ni wij kand mutapu tukwikala. Ni ukat kutupup mulong utukatin. Winou udi uman ujim mudi ik umekeshina anch Yehova utukwatin nich usey! Antu amwing amumanang Mwant David mudi muntu wading wakad usey, pakwez David wading wij anch Yehova wading umukatin ni wamukwashang. Kutong mwamu kwamubachika David kwikal ni chitongijok chiwamp piur pa yakamish yend. (2 Sam. 16:5-7) Anch twiyov kuziy ap anch turishin ni yakamish, Yehova ukutwish kutukwash kuman yom mu mutapu uwamp ni ukutwish kutukwash kand kupandikan chipwakesh chin chawonsu. (Kus. 18:27-29) Anch tukwet ukwash wa Yehova, kwikil chom ap chimwing chikutwisha kutukangesh kumusadin nich musangar.—Rom 8:31. w20.01 15 par. 7-8

Chisu utakedina dilejan dia Bibil, ufanyidin kusambish nich malembil. Yisu yivud, chiding chiwamp kusambish ni kupwish dilejan nich malembil mu machuku makemp kupwa kwa kusambish dilejan. Tufanyidin kumukwash mwin kwilej kwijik anch tukutwish kutesh Dizu dia Nzamb ching kusu nich ukwash wa spiritu wa Nzamb. In kulejan amwing akat kurumburilang mulong wak chidi cha usey kulembil chisu cha dilejan kusutil kutang mukand wa Jakobu 1:5, ulondina anch: “Anch umwing wenen waburen manangu, amwita Nzamb.” Kupwa kwa kutang mukand, mwin kulejan ukat kumwipul mwin kwilej anch: “Mutapu ik tukutwisha kumwit Nzamb manangu?” Mwin kwilej ukwakul pamwing ap anch tufanyidin kumulembil Nzamb. Mufundisha mwin kwilej wey mutapu wa kulembil. Murumburila nich kashinsh anch Yehova ukatin kutesh malembil mend madiokila ku muchim. Rumburil anch kusutil malembil metu ma pakampwil, tukutwish kumufungwil chakin kamu Yehova muchim wetu—kumurumburil yovil tukutwisha kwidjidjek kumulejay muntu mukwau. Vurik anch Yehova wij nawamp yitongijok yetu ya mukach.—Kus. 139:2-4. w20.01 2 par. 3; 5 par. 11-12

Yehova ukat kukwat mupak piur pa chisu chifanyidinay kutond antu azizidilau many. (Rom 8:28-30) Yehova wasambisha kutond azizidilau many kupwa kwa Yesu kuvumbuk. Chimeken anch mu mivu chitot ya kusambish, in Kristu awonsu akin ading azizidilau many. Mu yitot ya mivu yalondulaku, avud pakach pa antu ading afila mu kan anch ading in Kristu kamulondulap kamu chakin Kristu. Ap mwamu, mu mivu yiniya, antu akemp adinga in Kristu akin awiy azizilau many kudi Yehova. Ading mudi tidiku walonday Yesu anch ukupam pamwing ni yinfananfan. (Mat. 13:24-30) Mu machuku minam ma nsudiel, Yehova udandamedin kutond antu akwikala pakach pa in Kristu 144000. Chawiy anch Nzamb wakwat mupak wa kutond antu amwing akwikala pakach pa in Kristu inay piswimp ni nsudiel, chakin kamu tufanyidinap kwidjidjek piur pa manangu mend. (Rom 9:11) Tufanyidin kubabal nakash chakwel kangal twikal mudi in kusal mudimu alonday Yesu mu chimwing cha pakach pa yishimu yend. Amununganijana mukurump wau piur pa mutapu wayisadinay antu asambisha mudimu mu asaa a kwinsudiel.—Mat. 20:8-15. w20.01 30 par. 14

Yehova ukatin anch dijuku diend dikal ni musangar. Kudi mayingishin mavud matubachikina kwikal ni musangar kusambish kamu nlel, ap anch turishin pamwing ap ni yakamish. Chilakej, tukwet kashinsh anch Tatukwetu wa mwiur utukatin nakash. Tukwet ronganyin rakin ra Bibil, Dizu dia Nzamb. (Jer. 15:16) Ni tudi mu dijuku dia pakampwil mudia antu amukatina Yehova, akatina mbil jend ja piur ja kwishitul, ni akatijadina umwing ni mukwau. (Kus. 106:4, 5) Tukutwish kudandamen kwikal ni musangar mulong tukwet kashinsh anch mwom ukwikal uwamp nakash mu machuku ma kurutu. Twij anch piswimp ap Yehova ukuyishesh antu ayimp awonsu, ni kusutil umutakel wa Want wend, divu dikwikal kand Paradis. Tukwet kand ruchingej ripandikena kuwap anch antu awonsu afila kal akuvumbuk ni akushakam kand pamwing nau akatish nau. (Yoh. 5:28, 29) Chinech chikwikal chisu cha musangar ujim mud ik! Ni cha usey nakash, tukwet kashinsh anch piswimp ap, antu awonsu mwiur ni pansh akumwinkish Tatukwetu wa rukat ntumb, uyaj, ni difukwil dimuwanyidina. w20.02 13 par. 15-16

Anch wasal chitil chikash, kangal wapakish kuchijindjik. Pakwez, mulembila Yehova ni muleja patok yom wasalang. Kupwa kwa kusal mwamu, ukutwish chad kwiyov nawamp ni kom kakukufishap kand nich. Pakwez anch ukatin kurijek urund wey ni Yehova, ufanyidin kand kusal yom yikwau. Ufanyidin kwitiy dipup. Chisu chamutumau muprofet Natan kudi Yehova mulong wa kujingunin patok chitil cha Mwant David chasalay nend Batisheba, David kasambishap kwiyingish nich ap kupakish kupipej chitil chend. Witiya kapamp kamwing anch wasala chitil kadiap kusu kwau ching pantaliken ni ikundj wa Batisheba pakwez, chipandikena kuyip wasala chitil pantaliken ni Yehova. David witiya dipup dia Yehova, chawiy Yehova wamulikishina. (2 Sam. 12:10-14) Anch twasadin chitil chikash, tufanyidin kuyilej antu atonday Yehova mulong wa kututakel. (Jak. 5:14, 15) Ni tufanyidin kwipuk kwiyingish nich. Anch twitiy ni kusadin pakad kulab dipup ditwinkishinau, tukuchirish kand pakad kulab chisambu ni musangar wetu. w20.02 24-25 par. 17-18

“Amakundj dikum” amekeshin antu akweta ruchingej ra kushakam chikupu pa divu. Ij anch Yehova watondin kal chisak cha azizidilau many afanikeshinau nich “Mwin Yuda” ni amen anch didi dilau dijim dia kumwifukwil Nzamb pamwing nau antu inay. Ap anch nlel chikasiken kwijik dijin dia muntu mwawonsu uzizidilau many udia pa divu, antu akweta ruchingej ra kushakam pa divu akutwish “kuya ni” azizidilau many. Mutapu ik? Verse winou wa Bibil ujimbwil mwin Yuda umwing. Pakwez amakundj dikum alondin anch ni “yenen” mulong wa kumekesh anch ayilejin antu avud. Chinech chirumburikin anch mwin Yuda winou kadiap muntu umwing kusu pakwez umekeshin chisak chawonsu cha azizidilau many. Antu akad kwikal azizidilau many amusadidin Yehova pamwing nau azizidilau many. Pakwez, kayimenap azizidilau many mudi antakel au, mulong ij anch Yesu ndiy ukweta chisend cha kwikal Ntakel.—Mat. 23:10. w20.01 26 par. 1-2

Yesu walonda anch in kwilejend akin afanyina kuyijingunin patok anch amekesh rukat ra mutapu umwing mudi ramekeshay ndiy. Mazu minam mading makin mu mivu chitot ya kusambish, ni madi kand makin nlel. Chawiy chidi cha usey nakash kukatijan umwing ni mukwau ap anch chatukasiken kusal mwamu yisu yimwing. Iyipula anch: ‘Yom ik nilejidina kudi akadivar nau anambaz adandamena kumekeshijadin rukat umwing ni mukwau ap anch chading chikasiken kusal mwamu?’ Kuburen kuwanyin kukat kusal anch chitukasiken kumekeshijadin chipandikena rukat umwing ni mukwau. Ap mwamu, tufanyidin kusal usu wa kumwimburij Kristu. Yesu watufundisha usey wa kusal chisambu pamwing ni mukadivar utwakad kwovijan nend. (Mat. 5:23, 24) Wateka kashony anch tufanyidin kwikal mu urund uwamp nau antu akwau anch tukatin kumusangaresh Nzamb. Yehova ukat kusangar anch twasal usu wa kusal chisambu nau akadivar netu. Kakwitiyap difukwil dietu anch twalam rukuny ni twalik kusal usu wa kusal chisambu.—1 Yoh. 4:20. w20.03 24-25 par. 1-4

Satan, “tatuku wa makasu,” wayipumbwil kal antu kudiokal kwinsambishin kwa rusangu ra muntu. (Yoh. 8:44) Makasu mend mamwing madi mafundish piur pa rufu ni pa mwom kupwa kwa rufu. Yishankur yivud yijikena yimedin pa wom wa aspiritu a afu. Mulong wak antu avud nakash apumbukin? Satan ukat kwilej yovil yetu piur pa rufu mulong wa kutudimb. Mulong atutanga chakwel tushakam chikupu, tukatiningap kufa. (Mul. 3:11) Rufu turimen mudi mukankuny. (1 Kor. 15:26) Chikalap nchik mausu ma Satan, uyakin piur pa rufu ushadikinap. Chawiy, kudi antu avud nakash ija yom yifundishinay Bibil piur pa mwikadil wa afu ni ruchingej ra divumbuk ni akat kuyilejan kudi antu akwau. (Mul. 9:5, 10; Mid. 24:15) Uyakin winou ukat kutukasikesh, ni ukat kutuchidij ku wom ni kwidjidjek piur pa yom yikata kushiken ku rufu. w19.04 14 par. 1; 15 par. 5-6

Yehova Nzamb uyikatin atushalapol end. Uyikatining chisu chawonsu ni ukudandamen kuyikat. Ukatining kand chisu chawonsu kutentam. (Kus. 33:5) Chawiy tukutwish kwikal nich kashinsh ka yom yaad: (1) Yehova ukat kwov kusansan nakash anch atushalapol end ayisadin yom yakad kutentam. (2) Ushidinamu anch antu end kakudandamenap kuyisadin yom yakad kutentam kudi antu ayimp ni ukulet dipup pa chisu chiwanyidina. Chijil chayinkishau in Isarel kudi Nzamb chading chimedin pa rukat. Chayikasikesha antu kwikal atentamina—ni kuyisadin antu awonsu nich kutentam ap antu akad diking. (Kuv. 10:18) Chijil chinech chimekeshin mutapu uyibangidinay Yehova atushalapol end. Chijil cha Moses chapwa mu muvu wa 33 C.C. chisu chasambisha chikumangen cha win Kristu. Ov, in Kristu afanyina kushal pakad diking didiokila ku chijil chinech chimedina pa rukat ni chikasikeshina kutentam? Bwat kamu! In Kristu atambula chijil chisu, “chijil cha Kristu.” Yesu kayifundinap in kwilejend list wa yijil, pakwez wayinkisha mbil ni yijidik yifanyidina kuyitakel. Mu “chijil cha Kristu” mudi yom yawonsu yafundishay Yesu. w19.05 2-3 par. 1-3

Antu akweting maswir ma chivadik ma kuyongoj ni akaliweny wa kuyongoj antu akwau. Chilikej, anch mwan mukemp wawa ni wijip chitat pa dinungin chisu chisengenay ukutwish kuya mau kudiay Makwend ap Tatukwend nich kalel pa kan. Anvajend kakutwishap kupwish chitat pakwez akutwish kumwongoj mwan. Akutwish kumwipul yom yamushikena kal, kumukuswol mansoj, kumulembijek nich mazu mawamp ni ma rukat ni pamwing ap kumutekap mon ap kumukasap chibel. Pakad kulab mwan ukuninet ni pamwing ap ukusambish kand kusengan. Mu kusut kwa chisu chitat chikuya. Yisu yimwing, akat kwov kusansan mu mitapu yiyimp nakash. An amwing akat kuyiyipish kusutil yisal ya masandj. Mwan akutwish kumuyipish kapamp kamwing ap tupamp tuvud mu yisu kushalijan kupwa kwa mivu. Anch ayiyipish kusutil yisal ya masandj, an akat kwiyovang nayimp nakash ni yovil ya kusansan yikutwish kudandamen mu mivu yivud. Yisu yimwing mwin kumuyipish mwan akat kumukwat ni kumupup. Yisu yikwau, mwin kumuyipish mwan kakatap kumupup. Pakwez ap anch amupup muntu wayipishanang, mwan ukutwish kudandamen kwov kusansan ap anch wapam. w19.05 14 par. 1-2