November

Nlel, antu avud amekena kwikal in manangu, alondin anch yiyul ya Bibil yidi ya usup. Alondining anch ang wayiman antu akwau anch adi a usey kukusutamu ey, usupin ni akutwish kukumen. Pakwez, mwikadil winou wa mangand ma Satan, uletin yibudikin ik? Ov, antu ikatina ayinau akwet musangar? Ov, majuku mau makwet musangar ni akwet arund awamp? Ov, adi mu urund uwamp ni Nzamb? Kusutil yom umena amwiney, yom ik yiletina yibudikin yiwamp—kudi kusadin manangu ma mangand minam bil anch kusadin manangu tutanina mu Dizu dia Nzamb? (1 Kor. 3:19) Muntu ulondwila chiyul cha antu amenau mu mangand minam anch adi in manangu, udi mudi muntu washadikang kal umwipwila mukwau washadikang kal chakwel amulej njil yifanyidinay kuya. Yesu walonda piur pa antu a mu chirung chend ading amenau anch adi in “manangu” anch: “Awiy adi amputames akat[a] kuyitakel amputames akwau. Anch mputames wamutakel mputames mukwau, awonsu mwaad wau akuwa mu dibuku.” (Mat. 15:14) Chakin kamu, manangu ma mangand minam udi usup ku mes ma Nzamb. w19.05 24-25 par. 14-16

Mu mivu yiney, uvud wa antu akata kudia ku Chivurikish uyil kurutu. Ov, tufanyidin kwiyakamish mulong wa uvud winou? Bwat. “[Yehova] uyij aend.” (2 Tim. 2:19) Chinyim ni Yehova, akadivar akata kuchind uvud wa antu akata kudia dibot ni kuna nviny ku Chivurikish kijingap muntu udia chakin kamu uzizidilau many. Chawiy, mu uvud winou mudi kand antu atongina anch adi azizidilau many pakwez kadiap kwau azizidilau many. Chilakej, antu amwing adiangang mukat ni kuna nviny imikin. Akwau akutwish kwikal ni mayej mu manangu ni chinech chikat kuyibachik kutong anch akuyikel pamwing ni Kristu mwiur. Chakin kamu, twijap kamu nawamp uvud wa antu azizidilau many achidia pa divu. Pa divu pakwikal azizidilau many ku jindond kushalijan chisu chikwezay Yesu kuyisend mulong wa kuya nau mwiur. Bibil ulondin anch mu machuku ma nsudiel, kukwikal ka uvud kampand ka azizidilau many achidia pa divu. (Kuj. 12:17) Pakwez kalejenap uvud wa azizidilau many akwikala pa divu chisu chikusambisha mar makash. w20.01 29-30 par. 11-13

Yesu wamekesha mutapu Yehova utukatinay kusutin chilakej cha rusangu ra mwan washadika. (Luka 15:11-32) Mu chilakej chinech tatuku kashadishap ruchingej anch mwanend ukuchirik. Pachirikay mwan ku chikumbu, tatuku wamwaka nich musangar. Anch twapumbuka ni kumulik Yehova kupwa twakarumuk, tukutwish kwikal nich kashinsh anch tatukwetu wa rukat udi tayad ni ukatin kutwak kand. Yehova Tatukwetu ukupwish uyimp wawonsu waletay Adam. Kupwa kwa kubwambwil kwa Adam, Yehova wakwata mupak wa kutond antu 144000 akusala mudi ant ni in kupesh mwiur pamwing ni Mwanend Yesu. Yesu nau antu akuyikela nend pamwing akuyikwash antu aziyidina chakwel ikal awanyidina mwi ngand yisu. Kupwa kwa kupak kwa nsudien, Nzamb ukuyinkish mwom wa chikupu. Tatukwetu Yehova ukusangar chad pakumanay mutapu divu dikwizula too nich anend awanyidina. Chikwikal chisu chipandikena kuwap mudi ik! w20.02 6-7 par. 17-19

Etu awonsu tufanyidin kwiyipul anch: ‘Ov, kuswimp nisadina mulong wa kwikal mwin Kristu kudi kwa wuntu wam wa mukach bil anch niswimpin kwam mutapu nimekena ku mes?’ Mu mazu mend madia mu Mateu 12:43-45, Yesu walejana yom tufanyidina kusal. Mazu minam matufundishin dilejan dia usey nakash: Tufanyidinap kwetu ching kulik yitongijok yiyimp, pakwez tufanyidin kuyiswinkesh ni yitongijok yimukatishina Nzamb. Ov, chiswapel kuswimp usu uyikedila manangu metu? Dizu dia Nzamb diakwil anch: ‘Djalany wuntu usu watangau mudi mudia rusot ra Nzamb mu kutentam ni kushinshaman kwakin.’ (Efes 4:24) Mwaning, chitwishidikin kuswimp wuntu wetu wa mukach, pakwez chiswapelap kusal mwamu. Kudi yom yivud yifanyidina kusal kusutamu kusu kwau kulik maku mayimp ap yisal yiyimp. Tufanyidin kuswimp ‘usu uyikedila manangu metu.’ Chinech chitin kuswimp yovil yetu, mikadil yetu ni mayingishin matubachikina kusal yom. Tufanyidin kudandamen kusal usu nakash mulong wa kusal mwamu. w19.06 9-10 par. 6-7

Mulong wa ranaken, Yehova watuma angel end mulong wa kumuchinish Lot ni dijuku diend. Pakwez, Lot “walabijoka.” Angel amukwata ku chikas, ndiy ni dijuku diend ni ayibudisha mu musumb. (Dis. 19:15, 16) Kupwa angel amuleja kuchinin ku mikandu. Pa ndond pa kumuziyin Yehova, Lot wita chakwel aya mu ul wading piswimp. (Dis. 19:17-20) Nich kushimpish muchim, Yehova wamutesha ni witiya chakwel Lot aya mu musumb winiwa. Kupwa Lot wova wom wa kushakamamu ni washemunikina ku mikandu, ndond yiwamp yamulejau kapamp ka kusambish kudi Yehova. (Dis. 19:30) Yehova wamekesha kushimpish muchim kupandakena mudi ik! Mudi Lot, mukadivar ap nambaz ukutwish kukwat mipak yiyimp ni yikutwish kumuletin milong yikash. Anch yom mudi yiney yashiken, yom ik tukusala? Tukutwish kupakish kumwel anch wangul kal yom yakunay, ni winou udi uyakin. (Gal. 6:7) Pakwez, tufanyidinap kusal mwamu. Tukusal nawamp anch twamukwash mudi mwasalay Yehova pantaliken ni Lot. w19.06 20-21 par. 3-5

Anch akankuny netu akangesh difukwil dietu, chidi mulong wa kutwovish wom wa kumusadin Yehova. Kupwa kwa kukangesh, akutwish kupalangesh nsangu ja makasu, kutum antu a mburamatad mulong wa kwijik yikumbu yetu, kututwal ku ma tribinal, ap kand kuyitek antu amwing a pakach petu mu jinkan. Akat kutong anch tukutwish kwov anch ayitek akadivar netu amwing mu rukan. Anch twayilik atwovish wom, tukutwish kusambish kwimik difukwil dietu ayinetu. Tukukatap kwikal mudi antu alejenau mu mukand wa In Levi 26:36, 37. Tukutwishap kwitiyij anch wom ukepish mushiku wetu ap utukangesh mijikit yetu ya mu spiritu. Tumuchingejidin nakash Yehova ni tukutwishap kwov wom. (Isay 28:16) Tukat kulembil mulong wa kukimb umutakel wa Yehova. Twij anch nich ukwash wa Yehova kwikil guvernema ap umwing ukweta usu nakash ukutwisha kutukangesh kumwifukwil Nzamb nich kushinshaman. Pa ndond pa kutwovish wom, rupompat rikutwish kutubachik kupandikesh mushiku wetu mu mudimu wa Yehova. w19.07 9-10 par. 6-7

Ap anch umen anch mudimu wey wa kulejan ukwetap yibudikin yiwamp, kangal washadish ruchingej, dandamen kukimb. Vurik anch Yesu wafanikesha mudimu wa kwikadish in kwilej ni mudimu wa kuta ansh. In kuta ansh akutwish kusutish asaa avud nakash pakad kukwat insh ap umwing. Yisu yivud akat kuta ansh uchuku ap pamanch, ni yisu yimwing akat kwawish chintamp chilemp. (Luka 5:5) Chilik chimwing, in kulejan amwing akat kusutish asaa avud mu yisu kushalijan ni ndond kushalijan mulong wa “kulejan” nich kushimpish muchim. Mulong wak? Akat kusal mwamu chakwel atwish kutan antu avud. Mudi chiyukish, in kulejan asadina usu nakash akat kutan antu asangaredina uruu wetu. Ov ukutwish kupakish kulejan pa chisu ukutwisha kuyitan antu avud kwol kwau ap ndond yiswapela kuyitan? Mulong wak kutakel dilejan dia Bibil kwitin kushimpish muchim? Diyingishin dimwing didi anch mulong tufanyidin kusal yom yivud kusutamu kwau kumukwash muntu kwilej mafundish ma pa dishin ma mu Bibil ni kumakat. Tufanyidin kumukwash mwin kwilej kumwijik ni kumukat Muntu Wafundikisha Bibil, Yehova. w19.07 18-19 par. 14-15

Amwing pakach petu akutwish kwikal ni kuswir kwa kupandikan yovil ya kwifish nich mulong wa yitil yasalau pakur. Anch chidi mwamu, ov, umenap anch chidi cha usey kusambish dilejan dia muntu panrend mulong wa kushinshikin pa yakupesh ya difut dia Kristu? Anch twilej, twatongijokin ni twalembil piur pa mulong winou, tukutwish kwipuk yovil yiney ya kwifish nich kudia kuyimp. Tukutwish kand kwipuk kwifish nich ayinetu mulong wa yitil twasala yatulikishinau kal kudi Yehova. Tushinshikinany dilejan dikwau tukutwisha kwilejin ku chilakej cha Paul. Antu amwing alika pamwing ap midimu yau yayiletinang nfalang jivud mulong wa yisakin ya Want. Anch chidi mwamu, ov, tukutwish kuvuramen yom twasha kwinyim mu kulik kutongijokin chisu chawonsu pa yom ya ku mujimbu yitwalika? (Kuch. 11:4-6; Mul. 7:10) Mu ‘yom yawonsu ya kwinyim’ mukutwish kand kwikal yom twasala pakur mu mudimu wa Yehova ap yikokujol twarisha nich pakur. Chakin kamu, kutongijokin pa mutapu watuyikishau ni mutapu watukwashinau kal kudi Yehova mu mivu yivud, kukutukwash chakwel tumusejina Tatukwetu. Pakwez, tufanyidinap kutong anch twamusadidin kal Yehova nakash ni yom twasadina kal mu mudimu wend yiwanyidin kwau.—1 Kor. 15:58. w19.08 3 par. 5-6

Tukutwish kumusejin Nzamb wetu nich kalimish chisu chawonsu, chikalap nchik ndond tudia. Kakwatikeningap nakash mu chilik cha kulik kututesh; chisu chawonsu udi kwaku ni ukat kuta matu ku malembil metu. Anch twajingunin anch Yehova ukat kuteshang malembil metu, tukat kumusejin nakash. Nfund a kuseng umwing walonda anch “Nimukatil [Yehova] mulong uteshil dizu dia kwilemb kwam.” (Kus. 116:1) Yehova Tatukwetu kakatap ching kusu kutesh malembil metu, pakwez ukat kumakulang kand. Kambuy Yohan utwinkishin kashinsh anch: “Anch twamwit [Nzamb] chom, chad tumwit mudi mudia rusot rend, ndiy ukututesh.” (1 Yoh. 5:14, 15) Chakin kamu, Yehova kakutwishap pamwing ap kwakul ku malembil metu mu mutapu tuchingejina. Wij yom yidia yiwamp mulong wetwetu, chawiy yisu yimwing chakul chend chiding anch bwat ap kand ukatining anch tuchingel. (2 Kor. 12:7-9) Yehova ukat kutuwanyishin maswir metu. Usadining yom yiyilejinay atatuku awonsu kusal. (1 Tim. 5:8) Ukat kuwanyishang maswir ma ku mujimbu ma anend. Kakatiningap anch twiyakamish piur pa yakudia, yidjal ap ndond ya kushakam. (Mat. 6:32, 33; 7:11) Mulong udi nvaj wa rukat, Yehova watenchikin kal kand mulong wa kuwanyish maswir metu mu machuku ma kurutu. w20.02 5 par. 10-12

Kadiap awonsu akweta ruchingej ra kushakam mwiur adia mu chisak chisadina ‘kashalapol ushinshamena ni kubabal.’ (Mat. 24:45-47) Mudi mu mivu chitot ya kusambish, nlel Yehova ni Yesu akat kusadin akadivar akemp mulong wa kuyidish ap kuyifundish antu avud. Ching kusu akadivar akemp azizidilau many awiy asadinau mulong wa kufund Mifund ya Grek ya win Kristu mu mivu chitot ya kusambish. Nlel, ching kusu in Kristu akemp azizidilau many awiy akweta chisend cha kupan “yakudia pa chisu chiwanyidina.” Yehova wakwatin kal mupak wa kuyinkish atushalapol end avud mwom wa chikupu pa divu ni kupan mwom wa mwiur kudi antu akemp akuyikela pamwing ni Yesu. Yehova ukat kuyifut atushalapol end awonsu—“mwin Yuda” ni “amakundj dikum”—ni uyitin kuziyil ku yijil ya mutapu umwing ni kushal ashinshamena. (Zak. 8:23) Awonsu afanyidin kudandamen kwikal ikepishina. Awonsu afanyidin kumusadin pamwing ni mu uumwing. Ni awonsu afanyidin kusal usu nakash mulong wa kulam chisambu mu chikumangen. Pitusejina nakash kwinsudiel ya mangand minam, el tudandamenany kumusadin Yehova ni kumulondul Kristu mudi “chisak chimwing.” w20.01 31 par. 15-16

Tukutwishap kuyishindil anamakwetu kwitiy rusangu ruwamp, pakwez tukutwish kuyikasikesh kutongijokin pa uruu wa Bibil ni kuwitiy. (2 Tim. 3:14, 15) El mwikadil wey ukulondin. Yisu yivud, anamakwetu ashinshikidining pa yom tukata kusal kusutamu yom tukata kulond. Dandamen kusal usu wa kuyikwash anamakwey. Yehova utushidin chilakej chiwamp. “Tupamp ni tupamp” ukat kuyinkish antu mutapu wa kwitiy rusangu ruwamp chakwel atambula mwom wa chikupu. (Jer. 44:4) Kambuy Paul niyend wamuleja Timote chakwel adandamena kuyikwash antu akwau. Mulong wak? Mulong kusal mwamu, kwafanyina kumupandish amwinend ni kuyipandish kand antu akwau ading amuteshina. (1 Tim. 4:16) Tuyikatining anamakwetu, chawiy tukatining kand anch niyawiy ijika uyakin udia mu Dizu dia Nzamb. w19.08 14 par. 2; 16-17 par. 8-9

Tufanyidin kwijik anch ang muntu kanang wasal usu wa kutuyul, chimeken anch twarumbukang nakash pakad ayinetu kujingunin. Pa yisu mudi yiney, tukutwish kuman anch chitongijok chetu chakusambish chikwikal cha kulik chiyul. Tukutwish kulondol nayimp piur pa muntu watuyulang ap piur pa mutapu watuyulangay. Pakwez anch twikepishin, tukusal usu wa kwikal ni chitongijok chiwamp. Muntu wikepishina ukat kujikitishang anch amuyul. Chilakej: Tong bil anch udi ku chikumangan. Kupwa kwa kwambamb nau ambay in Kristu avud, umwing pakach pau wakupwitin kuns ni wakulej anch ukwet yipapal ya yom wadiang mu mazeu. Pakad kwidjidjek, ukwovaku kamu usany. Pakwez, ukumujikitish mulong wakulejang patok. Chakin kamu, ukutong anch ing muntu mukwau wasambelang kukulej! Chilik chimwing, tufanyidin kwikepish ni kujikitish anch mukadivar ap nambaz watwinkish chiyul. Tufanyidin kumuman muntu winou mudi murund, kangal mudi mukankuny.—Jnsw. 27:5, 6; Gal. 4:16. w19.09 5 par. 11-12

Yehova wayinkishin kal amaku chisend cha usey nakash mu dijuku, ni wayinkishin kal umutakel kampand padiau anau. Chakin kamu, yom yisadinay ni yilondinay maku yikutwish kwikal ni chibachikin padi anend mu mwom wau. (Jnsw. 22:6) Tushinshikinany yom yikutwishau amaku kwilejin ku chilakej cha Mariy, makwend a Yesu. Mariy wading wij nawamp Mifund. Wading umulimishin nakash Yehova ni wakasikesha urund wa pakampwil ni Yehova. Wading uziyidin kwa kwikatin ku umutakel wa Yehova ap anch kusal mwamu kwafanyina kuswimp yom yivud mu mwom wend. (Luka 1:35-38, 46-55) En amaku, ukutwishany kwimburij chilakej cha Mariy mu mitapu kushalijan. Mutapu ik? Chakusambish, kusutil kukasikesh urund wen wa piswimp ni Yehova mu kwilej Bibil ayinen ni kulembil. Cha kaad, kusutil kuswimp yom yimwing mu mashakamin men mulong wa kumusangaresh Yehova. w19.09 18 par. 17-19

Nzamb wamuleja kambuy Yohan chishimushimu chimwing chisangareshina. Mu chishimushimu chinech, ayileja angel anying kulam rinkind wa kushesh nich wa mar makash djat ni pa kupwishinau kutek yijingidij pa jimpal ja chisak cha atushalapol. (Kuj. 7:1-3) Chisak chinech chidi cha antu 144000 akuyikela pamwing ni Yesu mwiur. (Luka 12:32; Kuj. 7:4) Kupwa Yohan ujimbwil kand chisak chikwau chijim chilondinay anch: “Chiyasuta yom yiney, natala, chad naman [chisak chipandikena kujimb, chakad] kutwish kuchind kudi muntu. Antu inay adiokala ku mangand mawonsu, ni ku michid yawonsu, ni ku antu awonsu, ni ku jindim jawonsu. Ading iminy kurutu kwa ditand ni kwa Mwan a Mukoku.” (Kuj. 7:9-14) Tong mutapu wovay Yohan musangar pijikay anch mu machuku ma kurutu miril ya antu yikumwifukwil Nzamb mu mutapu uwamp! Pakad kwidjidjek, chishimushimu chinech chakasikesha ritiy ra Yohan. Chishimushimu chinech chikutwish kand kukasikesh ritiy retu, mulong tushich pa chirung chiwanyidina uprofet winou! Tukat kuman mamiliyon ma antu andamina mu chisak chipandikena kujimb, akweta ruchingej ra kupand ku mar makash ni kushakam chikupu pa divu. w19.09 26 par. 2-3

Tongin bil mudi anch antakel a mangand apalangesh kwijikish kwa “chisambu ni [zoong]” kwatakelau kulejan kudiosh pakur. Akutwish kwibaz anch mangand mikal kal mu chisambu nakash. Antakel a mangand akukat anch niyetu tusambish kutong anch awiy akutwish kupwish milong ya mangand. Pakwez kakutwishap ap pakemp kukangesh yom yikushikena kupwa kwa kwijikish kwinoku! “Babilon Mujim” akumushesh! (Kuj. 17:5, 15-18) “Nzamb [ukuyinkish] michim ya kusal mudi mwatenchikay.” Yom ik yatenchikay? Kushesh ditenchik dia pa mangand mawonsu dia relijon wa makasu, pamwing ni Kristendom. Nzamb ukupan kudi “miseng dikum” ya “nnam [usuz] wa chidiany” muchim wa kusal mudi mwatenchikay. Miseng dikum yimekeshin maguvernema mawonsu mamukwashina “nnam wa chidiay”—charumburik anch Nations unies. (Kuj. 17:3, 11-13; 18:8) Pakumukarumukinau relijon wa makasu kudi maguvernema minam, chikwikal chijingidij chimekeshina kusambish kwa mar makash. Chikwikal chinship cha kukashimwish ni chikuyovisha antu awonsu adia pa divu wom. w19.10 14 par. 1, 3

Mu mivu chitot ya kusambish, Diotref wayovila mukau akadivar ading atakedila mu chikumangen cha win Kristu. Wakata “kwikal mukurump” pakach pa akadivar mu chikumangen, chawiy wapalangesha nsangu jiyimp mulong wa kumupwishikish Yohan ni akadivar akwau ading atakedila kalimish. (3 Yoh. 10) Ap anch tukusalap yom mudi yasalay Diotref, pakwez tukutwish niyetu kusambish kuyovil mukau ambay netu in Kristu inkishinau yisend yitwadia tuchingejina anch yetwa tukuyitambula—pakampwil anch twiyovil anch niyetu tuwanyish yitinau mulong wa kutambul yisend yiney. Ris ridi mudi yinfananfan. Anch raminy mu muchim wetu, chikukasikan nakash pa kurishesh. Yovil yikwau yiyimp mudi mukau uyimp, kwitutul, ni muntu kwitongin amwinend yikutwish kukudish ris. Mudi mutapu ukata yinfananfan kukangesh mbut kukul nawamp, ris rikutwish kutukangesh kukudish mikadil yiwamp mudi rukat, ranaken, ni kudimuk. Anch twaman anch twasambish kal kukudish ris, tufanyidin kamu kurubwit pakad kulab mu muchim wetu. w20.02 15 par. 6-7

Kambuy Paul wading ulondin anch wading urishin ni choziu chisansena mudi rubwambu. Watazuka choziu chinech anch “muruu wa Sakudimban” wadandamena ‘kumwakamish.’ Pamwing ap Satan ni ayilembil end kamuletinap kamu Paul yoziu, yidia mudi rubwambu ripampinau mu mujimbu. Pakwez chisu chamanau aspiritu inay ayimp “rubwambu,” asala usu chakwel randama chikurikina, charumburik anch chakwel avudish mar ma Paul. Yom ik yasalay Paul? Kwinsambishin, Paul wakata anch amubwit “rubwambu.” Walonda anch: ‘Namulembila Nsalejetu [Yehova] tupamp tusatu . . . chakwel andioshar.’ Pakwez, chikalap nchik malembil ma Paul, rubwambu radandamena kwikal mu mujimbu. Ov, chinech chimekeshin anch Yehova kakulap malembil ma Paul? Bwat kamu. Wamakula. Yehova kapwishap mulong, pakwez wamwinkisha Paul usu wa kujijaman. Yehova walonda anch: “Ukash wam [ukat kuwanyin] nakash anch ey uziyil.” (2 Kor. 12:8, 9) Ni kusutil ukwash wa Nzamb, Paul watwisha kulam musangar wend ni chisambu cha mu manangu!—Fil. 4:4-7. w19.11 9 par. 4-5

Tufanyidin ching kusu kumwifukwil Yehova mulong ndiy Sakatang wetu ni ndiy Mwin Kupan Mwom. (Kuj. 4:11) Pakwez kudi yom turishina nich. Ap anch tumukatin ni tumulimishin Yehova, yom yimwing yikutwish kutuyikel mu mwom wetu ni yikutwish kutukangesh kumwinkish difukwil diwanyidina. Mu Bibil, kumwifukwil Nzamb kurumburikin kwikal ni rukat rikurikina mudiay ndiy. Anch twipan ching kusu kudi Yehova, tukumwifukwil kand ching kusu ndiy. Tukwitiyap anch muntu ap chom chin chawonsu chisend ndond yakusambish mu muchim wetu. (Kub. 34:14) Tukatap kwipan kudi Yehova pakad kwov yom kurumburik. Mulong wak? Mulong yom twileja piur pend yawiy yatubachika kwipan kudi ndiy. Twakata nakash mikadil yend yipandikena kuwap. Twij yom yikatinay ni yikisinay ni twitiyijin yitongijok yend. Twij ni tunungin chikas ku rusot rend piur pa antu. Didi dilau dijim nakash mulong Yehova witiyin anch twikal arund nend. (Kus. 25:14) Yom yawonsu tukata kwilej piur pa Sakatang wetu yikat kutusejish piswimp ni ndiy.—Jak. 4:8. w19.10 26 par. 1-3

Nlel unou, akadivar ni anambaz netu arishin ni yakamish kushalijan. Chilakej, antu avud arishin ni mar madiokila ku yom yatangau ap madiokila ku yom yisadinau antu. Anch mar minam mashiken, amwing pakach petu tukutwish kushakam ni akadivar ni anambaz inay ku yikumbu yetu. Akwau akutwish kuyikwash kusutil kuyinkish nfalang. Pakwez etu awonsu tukutwish kumwit Yehova chakwel ayikwasha akadivar ni anambaz netu. Anch twatesh anch mukadivar ap nambaz uziyin mulong wa milong, pamwing ap tukutwishap kwijik yom tufanyidina kulond ap kusal. Pakwez etu awonsu tukwet mutapu wa kukwash. Chilakej, tukutwish kusutish chisu pamwing ni murund netu. Tukutwish kumutesh nawamp chisu chilondinay. Ni tukutwish kumulej verse tukatining nakash. (Isay 50:4) Chidia cha usey nakash chidi anch ufanyidin kwikal kwaku mulong wa kuyikwash arund ney chisu chikwetau kuswir kwa ukwash. Tufanyidin kukwat mupak wa kukasikesh ni kulam urund wetu nau akadivar ni anambaz netu kusambish kamu katat. Urund winou ukwikalaku kadiap ching kusu kwau mu machuku minam mansudiel, pakwez chikupu! w19.11 7 par. 18-19

Winou wading mulambu wa kwisotil wapanangay muntu mulong wading umukatil Nzamb wend, Yehova. Muntu wapanang mulambu, dijuku diend ni in kupesh afanyina kudia mbij ja annam apeshilau. Pakwez yid yimwing ya nnam ayipeshang ching kusu kudi Yehova. Yid ik? Yehova wamanang yises ya many ma nnam mudi chikunku chiwamp nakash. Walonda kand anch yikunku yikwau ya nnam mudi makund yading ni usey wa pakampwil. (Lev. 3:6, 12, 14-16) Chawiy Yehova wasangarang nakash anch mwin Isarel wapesh kwa kwikatin yid ya usey nakash ni yises ya many. Mwin Isarel wapeshang yom yiney wamekeshang anch wading ni impu ya kupan yom yend ya usey kudi Nzamb. Chilik chimwing, Yesu wapana kudi Yehova kwa kwikatin yom yend ya usey kusutil kumusadin nich muchim wend wawonsu mulong wading Umukatin. (Yoh. 14:31) Yesu wasangerang nakash kusal rusot ra Yehova. (Kus. 40:8) Yehova wasangara kamu nakash pa kumuman Yesu ukat kumusadil kwa kwikatil! w19.11 22-23 par. 9-10

Dizu dia Nzamb dilejen anch kupwa kwa kutang yom mu “machuku” musamban, Nzamb wimika kutang yom pa divu. (Dis. 2:2) Pakwez Yehova ukatining kusal mudimu, mu kulond kukwau, ‘udandamedin kusal mudimu.’ (Yoh. 5:17) Chijil cha Sabat chayinkishau in Isarel chikwatijadin ni dichuku dia kwiswedish dia Yehova disambidinau mu Disambishil. Nzamb walonda anch Sabat wading chijingidij pakach pendendiy nau in Isarel. (Kub. 31:12-14) Kwikil muntu wafanyina kusal mudimu, ap an, ap aswik, ap kand annam a kudim nich. (Kub. 20:10) Sabat wayinkishang antu chisu cha kushinshikin nakash pa yom ya mu spiritu. Antakel avud a chirelijon a pa chirung cha Yesu ateka mbil jiyimp piur pa kuziyin ku chijil chinech. Alejanang anch kwading kujip chijil anch muntu wapuril tidiku ap wamwok muyej pa dichuku dia Sabat. (Mar. 2:23-27; 3:2-5) Yitongijok ya mutapu winou yadingap yikwatijadina ni mutapu wading utonginay Nzamb, ni Yesu wamekesha uyakin winou kudi antu ading akatina kumutesh. w19.12 3 par. 8-9

Anch twadandamen kwilej piur pa mikadil ya Yehova, tukutwish kumwimburij. David washikena kumwijik nawamp Tatukwend wa mwiur, chawiy watwisha kumwimburij mu mutapu wend wa kuyisadin antu akwau. Mulong David wading ni urund uwamp ni Yehova, wikala mwant wakatau nakash kudi in Isarel ni Yehova wamusadina mudi chilakej kudi ant akwau a mu Isarel. (1 Ant 15:11; 2 Ant 14:1-3) Dilejan ik twilejina? Tufanyidin kwikal in ‘kumwimburij Nzamb.’ Anch twimburij mikadil yend, tumekeshin anch tudi anend. (Efes 4:24) Tukezap kapwish kwilej piur pa Yehova. (Mul. 3:11) Chom cha usey, kadiap uvud wa yom twija piur pend, pakwez mutapu tusadidina yom twija. Anch twasadin yom twilejina ni kwikasikesh kumwimburij Tatukwetu wa rukat, ukudandamen kutusejin piswimp. (Jak. 4:8) Utwinkishin kashinsh kusutil dizu diend anch kakezap kamulik muntu win mwawonsu udandamedina kumukimb. w19.12 20 par. 20; 21 par. 21, 23

Jakob wading uyikatin anend awonsu, pakwez wading umukatin pakampwil Josef wading ukweta mivu 17. Yom ik yasalau anamakwend a Josef? Amwovila ris ni chinech chayishikija ku kumukis. Chawiy, amulandisha Josef mu uswik ni amudimba tatukwau anch mwaney mukatish amujipin kudi nnam wa chidiany. Ris rayishikija ku kuyipish chisambu cha dijuku ni kunenganesh muchim wa tatukwau. (Dis. 37:3, 4, 27-34) Ris ridi pakach pa yisalijok ya chiuntu yitwadila ku rufu yikutwisha kumukangesh muntu kuswan Want wa Nzamb. (Gal. 5:19-21) Yisu yivud ris riding mudi mutond ukata kusongish mabuj makweta ulemb mudi rukuny, matend, ni ujim. Chilakej cha anamakwend a Josef chimekeshin mutapu ris rikutwisha kuyipish urund ni kuvundangesh chisambu mu dijuku. Ap anch tukukatap kusal yom mudi yasalau anamakwend a Josef, pakwez etu awonsu tukwet muchim wakad kuwanyin ni wa rubabek. Chawiy, yisu yimwing tukutwish kurish nich yovil ya ris. w20.02 14 par. 1-3

Dichuku dimwing, mudi mwasalay padi Moses, Yehova wapana kand spiritu wend utumbila ku chisak cha amakurump in Isarel ading iminya piswimp ni mwinkand wa kukumangen. Kupwa kwa chisu chikemp, amwijikisha Moses anch amakurump aad alika kuya ku mwinkand wa kukumangen atambul kal niyau spiritu utumbila ni asambish kal kusal mudi aprofet. Mutapu ik wasalay Moses chisu chamulejau kudi Joshua anch ayikangesha amakurump inay aad? Moses kayovilap amakundj inay atondau kudi Yehova mukau. Pakwez, nich kwikepish wasangara nau pamwing mulong wa dilau dikalau nich. (Kuch. 11:24-29) Dilejan ik tukutwisha kwilejin ku chilakej cha Moses? Anch udi mukurump wa chikumangen, ov akwitinap kal kumufumb muntu mukwau chakwel ikal ni chisend ukweta ni chiukatining nakash mu chikumangen? Anch udi wikepishina mudi Moses, ukutongap anch ukwikal nich usey ukemp anch akwit kumufumb mukadivar mukwau chakwel mu machuku ma kurutu ez atambul chisend chinech. Pakwez ukusanger kumukwash mukadivar ney. w20.02 15 par. 9; 17 par. 10-11

Mayej makutwish kwikal ni chibachikin chiyimp pa yovil yetu. Tukutwish kwiyov nayimp anch antu ajingunin anch tutwishinap kusal yom yimwing ap tukutwish kwiyov kand nayimp anch chitwitin kuyichingejin antu akwau mulong wa ukwash. Ap anch antu akwau kijap anch tuyedin, tukutwish kurish ni yovil ya usany mulong tutwishinap kand kusal yom yimwing. Mu yisu ya yakamish mudi yiney, Yehova ukat kutukasikesh. Mutapu ik usadiningay mwamu? Mu Bibil, Yehova watekinamu kal mazu mawamp matuvurishina anch tukwet usey ku mes mend chikalap nchik mayej metu. (Kus. 31:19; 41:3) Kusutil mazu minam mapepilau, Yehova ukutukwash kurish ni yitongijok yiyimp yidiokila ku mayej metu. Ikal nich kashinsh anch Yehova wij mar umena. Mwita ukwash chakwel ukudish chitongijok chiwamp piur pa mayej mey. Kupwa sadin Bibil mulong wa kutan mazu mawamp malonday Yehova mulong weyey. Shinshikin maverse mamekeshina mutapu Yehova uyikwatinay atushalapol end nich usey nakash. Kusutil kusal mwamu, ukuman anch Yehova udi muwamp kudi awonsu amusadidina nich kushinshaman.—Kus. 84:11. w20.01 15-16 par. 9-10; 17 par. 12

Isak wading mpich, ni in Filistin ova ris ra mapit mend. (Dis. 26:12-14) Ashita kand ni majiy masadinangay Isak mulong wa kunish yivam yend mem. (Dis. 26:15, 16, 27) Mudi in Filistin, antu amwing nlel akat kuyovil ris antu akweta mapit mavud kuyisutamu awiy. Kakatiningap ching kusu kwau kwikal ni yom yikwetau antu kwau, pakwez kand kakatiningap anch akwau ikal ni yom yiney. Antakel a chirelijon in Yuda amwovila Yesu mukau mulong ading amukatin nakash kudi antu avud. (Mat. 7:28, 29) Yesu wading umwimburijin Tatukwend, ni wafundishang uyakin. Ap mwamu, antakel inay a chirelijon apalangesha makasu ni amufukejina Yesu chakwel antu amukis. (Mar. 15:10; Yoh. 11:47, 48; 12:12, 13, 19) Dilejan ik tukutwisha kwilejin ku rusangu riner? Tufanyidin kusal usu chakwel kangal twikal ni yovil ya mukau pantaliken ni antu akweta mikadil yisadina anch antu akwau ayikat nakash mu chikumangen. Kupwa, tufanyidin kwikasikesh kwimburij yisal yau ya rukat.—1 Kor. 11:1. w20.02 15 par. 4-5

Tong bil mudi anch washakama pakur nakash mwi ngand ya Peris. Ukwet kuswir kwa kwambamb ni mwant wa ngand piur pa mulong kanang, chawiy wakas kal weny wa kuya ku Suz, mu musumb ushichay mwant. Kurutu kwa kwambamb ni mwant, ching akwinkish mbil ya kusal mwamu. Anch wapakish kwambamb nend pakad kutambul mbil, akutwish kukujip! Tujikitishin nakash mulong Yehova kadiap mudi mwant winou wa ngand ya Peris! Yehova udi piur nakash kusutamu mwant win mwawonsu wa chiuntu, pakwez ukat kututazuk chakwel twambamb nend chisu chawonsu. Ukatin anch etu twambamb nend pakad kwidjidjek. Chilakej, ap anch Yehova ukwet yijiken yikwamushena mudi Sakatang Mujim, Mwin Dikand Diawonsu, ni Mukaleng Mwant, ukatin anch etu twambamb nend kusutil kusadin dijin “Tatuku” dimekeshina anch utukatin. (Mat. 6:9) Chitusangareshin mudi ik kwijik anch Yehova ukatin anch twiyova kwikal piswimp ni ndiy! Tukwet diyingishin diwamp dia kumutazuk Yehova anch “Tatuku” mulong udi Musul wa mwom wetu. (Kus. 36:9) Mulong udi Tatukwetu, tufanyidin kumuziyin. Anch twasal yom yitwitinay, tukusanger yiyukish yipandikena kuwap. (Heb. 12:9) Pakach pa yiyukish yiney padi kand mwom wa chikupu, mwiur ap pa divu. w20.02 2 par. 1-3

Chitongijok chetu chidi cha kumukwash mwin kwilej wa Bibil kuya kurutu mu spiritu. (Efes 4:13) Anch muntu witiy kwilej netu Bibil, chimeken anch wamanang mutapu ukutwisha dilejan dia Bibil kumukwash. Payila rukat rend mulong wa Yehova kukul, ukutwish pamwing ap niyend kutong mutapu ukutwishay kuyikwash antu akwau, kuwejinaku nau antu a mu chikumangen. (Mat. 22:37-39) Anch chidi chisu chiwamp kusal mwamu, kangal widjidjek kumulej mwin kwilej anch tukwet mutapu wa kukwash mudimu wa Want nich nfalang jetu. Mufundisha mwin kwilej wey wa Bibil yom yifanyidinay kusal anch milong yashiken. Chilakej, anch mwin kwilej wey udia mwin kulejan wakad kutambul dibatish wakulej anch muntu kanang mu chikumangen wamujimeshang. Pa ndond pa kukimb kumulej nany ufila nich ap uyingina nich, muleja yifanyidinay kusal kukwatijan ni yilondinay Bibil. Ukutwish kumulikishin mukadivar nend ni kuvuramen mulong winou. Ap, anch katwishinap kuvuramen mulong winou, ukutwish kuya kumutan muntu winou ni kwambamb nend mu mutapu wa rukat nich chitongijok cha kuchirish ‘divar.’ (Ilikej ni Mateu 18:15.) Mukwasha mwin kwilej wey kurijek yom yikulonday. w20.01 5-6 par. 14-15

Tukat kumekesh anch tujikitishin mulong wa dilikishin dia Yehova anch twadit kusutil malembil, twitiy dipup, ni twasal usu wa kulik kuchirikin yitil twasala. Anch twasal yom yiney, tukuchirish chisambu chetu cha mu manangu. Chidi chikasikeshina mud ik pa kwijik anch “[Yehova] udi piswimp nau awiy akweta michim yinenganena, ukat kuyipandish akweta michim yakad ruchingej”! (Kus. 34:18) Pasejina disudiel dia mangand minam piswimp, kukwikal yom yivud yikutwakamisha. Anch wasambish kwiyakamish, it pakad kulab ukwash wa Yehova. Ileja Bibil nich mushiku. Ilejina ku chilakej cha Ana, kambuy Paul, ni Mwant David. Mwita Tatukwey wa mwiur chakwel akukwash kujingunin yom yikuletidina yakamish. (Kus. 139:23) Mutwika yisend yey, pakampwil yikulimidina ap yawakad kutwish kusend. Anch wasal mwamu, ukwikal mudi nfund a kuseng wamuwangila Yehova anch: ‘Chisu champandikena yakamish, ey wangongoja ni kwinlembijek.’—Kus. 94:19. w20.02 24 par. 17; 25 par. 20-21

Nzamb wasadina spiritu wend mulong wa ‘kuyipepil’ in kufund Bibil yitongijok yend. Anch twatang Bibil ni kutongijokin pa yom tutangina, mafundish ma Nzamb makat kwandam mu manangu ni mu muchim wetu. Yitongijok yiney yipepidilau yikat kutubachik kuswimp mwom wetu chakwel tumusangaresh Yehova. (Heb. 4:12) Pakwez mulong wa kutaninamu nakash mu spiritu utumbila, tufanyidin kwitekin chisu cha kwilej nich mushiku Bibil ni kutongijokin nakash pa yom tutangina. Anch twasal mwamu, Dizu dia Nzamb dikwikal ni yibachikin pa yom yawonsu tulondina ni tusadina. Chikwau kand, tufanyidin kumwifukwila Nzamb pamwing ni ambay netu. (Kus. 22:22) Yikumangan yetu ya win Kristu yidi yinship yitakedilau kudi spiritu wa Yehova. (Kuj. 2:29) Mulong wak tulondina mwamu? Mulong pitukata kukumangan nau ambay netu in Kristu, tukat kulembil mulong wa kwit spiritu utumbila, tukat kuwang miminy ya Want yimedina pa Dizu dia Nzamb, ni tukat kutesh mafundish ma mu Bibil mafundishinau kudi akadivar akatau kutond kusutil spiritu utumbila. Ni spiritu utumbila winou ukat kuyikwash kand anambaz kurijek ni kusal yikunku yau. Mulong wa kutaninamu chipandikena mu usu wa spiritu utumbila, tufanyidin kurijek ni kwakul ku yikumangan. w19.11 11 par. 13-14