Ngond wa 12

Anch twakangany kutakel mazu metu, chikutwish kutuletin milong yivud. Chilakej, anch wamusankan mukadivar ap nambaz wa mwi ngand yikangeshinau mudimu wetu, ov, ukat kupakishang kumwipul nsangu piur pa mutapu usadikina mudimu wetu mwi ngand yiniya? Chakin kamu wipwilap mulong wa kuyisal nayimp. Tuyikatin akadivar netu ni twiyakamishin mulong wa yom yiyishikedina. Ni tukatining kand kujimbul milong yirishinau nich chisu tuyitekina mu malembil. Pakwez, chisu mudi chinech chidi cha kulam pa kan petu. Anch twamushindil muntu ukweta nsangu ja ujindj chakwel atulejaj, tumekeshin anch tukwetap rukat—padi muntu winou, ni padi akadivar nau anambaz amuchingejidina mukadivar winou anch ukulam pa kan pend piur pa mutapu usadinau mudimu wetu. Chidi chakin anch kwikil muntu ap umwing pakach petu ukatina kuwejin pa mar ma akadivar ni anambaz netu ashicha mu jingand jikangeshinau mudimu wetu. Chilik chimwing, kwikil mukadivar ap nambaz ushicha mwi ngand yikangeshinau mudimu wetu ukukata kulejan nsangu piur pa mutapu ukatau Atuman ashicha mwi ngand yau kusal mudimu wau ap mijikit ya win Kristu. w20.03 21-22 par. 11-12

Nzamb kakatap anch antu afangang. Pakwez mulong wa kushakam chikupu, Adam ni Ev afanyina kumuziyin Yehova wayinkisha mbil yiswapela kuziyin yading yilondina anch: “Dibuj dia mutond ou wa ronganyin ra kuwap ni kuyip kangal kudidia. Mulong dichuku diukeza kudidia, chakin ukez kufa.” (Dis. 2:16, 17) Kupwa Satan waleta mulong. Wamuleja Ev kusutil nnak mazu madia mu mufund wa nlel. Cha ushon, Ev witiyija makasu ni wadia dibuj. Kupwa, nfumwend niyend wadia dibuj. (Dis. 3:6) Mu mutapu winou, chitil ni rufu yandama mu mangand. (Rom 5:12) Adam ni Ev afa mudi mwayilejau kudi Nzamb. Pakwez Satan kimikap kulond makasu piur pa rufu. Kupwa, wasambisha kand kudimban makasu makwau. Makasu mamwing pakach pa makasu minam madi mafundish malondina anch mujimbu ukat kufang, pakwez chikunku chimwing cha mujimbu wetu chikat kudiokal ni kuya mwi ngand ya mu spiritu. Makasu minam mayipumbwil antu avud nakash nlel unou.—1 Tim. 4:1. w19.04 14-15 par. 3-4

An kakwetap ukaliweny wa kushinshikin yom, wa kutong, wa kujingunin ni kwipuk ubaj. Chawiy chikutwish kuyiswapel in kuyipishan kuyidimb an ni kuyisal nayimp. Mwin kuyipishan ukat kumulej mwan makasu ma ubaj, chilakej ukutwish kumulej mwan anch yeya ufila nich, anch ufanyidin kulam pa kan, ni anch walondamu kwikil muntu ukwitiya ap kukulondin ap ukutwish kumulej kand anch muntu mukurump anch wasal yisal ya masandj ni mwanikanch chidi kwau chiwamp ni chimekeshin anch akatijadin. Makasu mudi minam makutwish kurumbangesh manangu ma mwan mu mivu yivud kurutu ajingunin anch mading kwau makasu. Mwan mudi winou ukat kupam ni yitongijok ya kwifish nich ni ukat kwiman anch kakwetap usey, kwikil muntu umukatina ap ukutwisha kumwongoj ni kakutwishap kwikal mu urund ni Nzamb. Chidiap cha kushimok pa kwijik anch kumuyipish muntu kusutil yisal ya masandj kukutwish kumuletin kusansan mu mivu yivud. Tushich mu machuku ma nsudien mu chirung chidiau antu ‘akad rukat ra chivadik’ ni “antu ayimp ni in makasu [ayil kurutu] mu kuyip ni mu kuyip nakash.”—2 Tim. 3:1-5, 13, TMK. w19.05 15 par. 7-8

Mu mitapu ik yafundishay Yesu? Chakusambish, wayifundisha antu kusutin yom yalondangay. Mazu mend mading ni usu nakash mulong walondang uyakin piur pa Nzamb, ni wafundisha chitongijok chakin piur pa mwom, kupwa washimunina kand anch Want wa Nzamb wawiy ukupwisha mar mawonsu ma antu. (Luka 24:19) Yesu wafundisha kand kusutil chilakej chend. Kusutil mashakamin mend, wayifundisha kand antu mutapu wa kushakam. (Yoh. 13:15) Chisu ik chafundishay Yesu? Wafundisha pa chisu chading chisadinay mudimu wend pa divu. (Mat. 4:23) Wayifundisha kand in kwilejend mu chisu chikemp kupwa kwa kuvumbuk. Chilakej, wabudikina chisak cha in kwilejend—pamwing ap ading 500 ni kusut—ni wayinkisha mbil ja ‘kwikadish antu in kwilej.’ (Mat. 28:19, 20; 1 Kor. 15:6) Mudi ntakel wa chikumangen, Yesu wadandamena kuyifumb in kwilejend kupwa kwa kuchirik mwiur. Chilakej, piswimp ni muvu wa 96 C.C., Kristu wamutakela kambuy Yohan kuyikasikesh ni kuyiyul in Kristu azizidilau many.—Kol. 1:18; Kuj. 1:1. w19.05 3 par. 4-5

Nlel antu avud akwet kuswir kwa kusal mudimu nakash mulong wa kuman nfalang jikwetau nich kuswir mu mwom wau. Akadivar netu avud akat kusutish asaa avud mu mudimu mulong wa kuwanyish maswir ma majuku mau. Akadivar akwau akat kusutish asaa avud dichuku diawonsu mulong wa kufaat kwi ndond kulemp kukat kusadinau mudimu. Akwau kand avud akat kwiwanyishil maswir mau ayinau kusutil kusal midimu yikash. Chadi kwinsudien kwa dichuku, akadivar ni anambaz inay akat kuziy nakash! Mulong wa kuziy akadivar avud akat kukangany kwilej. Pakwez uyakin udi anch tufanyidin kukimb chisu cha kwilej—kwilej chakin kamu—Dizu dia Nzamb ni mikand yetu ya win Kristu. Mulong urund wetu ni Yehova ni mwom wetu wa chikupu yimedin pa kwilej! (1 Tim. 4:15) Antu amwing akat kulank pabudid dichuku diawonsu ni kwilej pachilelau antu akwau ni pachidutila manangu mau. Akwau akat kwitekin aminit akemp urel mulong wa kwilej ni kutongijokin pa yom yilejinau mu Bibil ni mu mikand yetu pa ndond yakad masok. w19.05 26 par. 1-2

Kuswimp kwinoku kukatap kusadik kapamp kamwing ni kukutwishap kusadik anch tusadinap usu. Tukwet kuswir kwa ‘kwikasikesh’ nakash mu mivu yivud. (2 Pita 1:5) Tufanyidin kusal usu nakash mulong wa kuswimp wuntu wetu wa mukach. Malembil chidi chom cha usey nakash tufanyidina kusal chakusambish. Tufanyidin kulembil mudi mwasalay nfund a kuseng palonday anch: “A! Nzamb, ntangirila muchim usu wa zwang, nginkisha [spiritu musu] ushinshamena.” (Kus. 51:12) Tufanyidin kwitiy anch tukwet kuswir kwa kuswimp usu uyikedila manangu metu ni kwit ukwash wa Yehova. Kutongijok chidi chom cha kaad cha usey nakash. Pa chisu tutangina Dizu dia Nzamb dichuku diawonsu, tufanyidin kwitekin chisu cha kutongijokin nakash pa yom tutangina mulong wa kujingunin yitongijok ni yovil tufanyidina kuswimp. (Kus. 119:59; Heb. 4:12; Jak. 1:25) Tufanyidin kujingunin yovil ni yitongijok yawonsu yikwatijadina ni yitongijok ya mangand. Tufanyidin kwitiyin nich kwikepish kuziy kwetu ni kusal usu wa kuswimp. w19.06 8 par. 1; 10 par. 10; 12 par. 11-12

Chisu ukwatina mipak, ufanyidin kutond chisu chiukusala yom wakwatina kal mupak wa kusal ni kangal wa chiswimp. Kangal wachingel anch ching kamu mashakamin mey mawap nakash chakwel lel usambish. Pamwing ap ukezap kumikal nich. (Mul. 11:4) Babal chakwel kangal yom yakad usey nakash yikudil chisu ni usu ukweta nich kuswir mulong wa kusal yom ya usey nakash. (Fil. 1:10) Anch chiswapel, tond chisu chiumena anch antu akwau kakutwishap kukuletin kampuw. Yilejamu antu akwau anch kangal akuletin kampuw pa chisu chinech. Fung telefon wey ni tang mesaj mey ap sadin tupend twa kwambambin chisu chikwau. Yibudikin ya mupak wey yidi mudi kwi ndond uyila anch usadin weny. Anch ukatin kamu chakin kushik kwi ndond uyila, ukutwish kudandamen weny wey ap anch chitin kuswimp mulong wa kuyil mwi njil yindj. Chilik chimwing, anch twashinshikin pa yibudikin ya mipak yetu, tukuziyap swa swa anch twatan yikokujol.—Gal. 6:9. w19.11 30 par. 17-18

Yom ik yifanyidina kwikal dishin dia mupak wey wa kutambul dibatish? Mulong wad kwilej Bibil chikurikina, wajingunin yom yivud piur pa Yehova—wuntu wend ni mutapu wend wa kusal yom. Yom wilejina piur pend yasangareshin muchim wey ni yakubachikin kumukat nakash. Chawiy, rukat rey mulong wa Yehova rifanyidin kwikal dishin dia pakampwil dia mupak wey wa kutambul dibatish. Mupak wey wa kutambul dibatish wimedin kand pa uyakin wa mu Bibil witiyijina. Shinshikin yom yalonday Yesu chisu chapanay mbil ja kwikadish in kwilej. (Mat. 28:19, 20) Kukwatijan ni Yesu, antu atambwila dibatish afanyidin kusal mwamu “mu dijin dia Tatuku, ni dia Mwan, ni dia [spiritu] utumbila.” Chinech chirumburikin ik? Ufanyidin kwitiyij nich muchim wey wawonsu uyakin udia mu Bibil piur pa Yehova; Mwanend, Yesu; ni spiritu utumbila. Uyakin winou ukwet usu nakash ni ukutwish kupukun nakash muchim wey. w20.03 9 par. 8-9

Yehova katumap angel mulong wa kumubabesh kusu Lot pakwez kand mulong wa kumukwash kwiyep ku kusheshik kwa Sodom. (Dis. 19:12-14, 17) Chilik chimwing, niyetu tukumubabesh mukadivar netu anch twaman anch usadin yom yikutwisha kumuletin milong. Ap anch kasadidinap kapamp kamwing chiyul cha Bibil tumwinkishina, tufanyidin kushimpish muchim. Ikal mudi angel aad iniya. Pa ndond pa kumulik mukadivar ni kumuchin, tufanyidin kumukwash kadiap kusu ching mu mazu pakwez kand mu yisal. (1 Yoh. 3:18) Tukutwish kumukwat ku chikas mu chifanakesh ni kumukwash kusadin yiyul yiwamp yimwinkishinau. Yehova wafanyina kushinshikin pa kurumbok kwa Lot. Pakwez, mu kusut kwa machuku, wamupepila kambuy Pita kwisambin piur pa Lot mudi muntu utentamina. (Kus. 130:3) Ov, tukutwish kwimburij mutapu wamusadinau Lot kudi Yehova? Anch twashinshikin mikadil yiwamp ya akadivar nau anambaz netu, tukuyishimpishin muchim. Anch twasal mwamu, chikuyiswapel kwitiy ukwash tuyinkishina. w19.06 21 par. 6-7

Anch guvernema wa mwi ngand ushicha wakangesh difukwil dietu, ukutwish kwiyipul pamwing ap anch ufanyidin kushemunikin mwi ngand yikwau mulong wa kumusadin Yehova nich want ipey. Winou udi mupak ufanyidinay kukwat muntu amwinend. Antu amwing akutwish kukwat mupak wa kushinshikin mutapu wasalau in Kristu a mu mivu chitot ya kusambish chisu chayizengolau. In kwilej ading mu Yerusalem achinina mu Yudeya ni mu Samaria ni ashika kulemp mudi ku Fenisiy, Shipre, ni ku Antiosh. (Mat. 10:23; Mid. 8:1; 11:19) Pakwez, pasambishau kand kuyizengol in Kristu a mu mivu chitot ya kusambish, kambuy Paul wakwata mupak wa kulik kudiokal kwi ndond kwading kukangeshinau mudimu wa kulejan. (Mid. 14:19-23) Nsangu jinej jitufundishin ik? Ntakel mwawonsu wa dijuku ufanyidin kukwat mupak piur pa kushemunik. Kurutu kwa kukwat mupak, ntakel wa dijuku ufanyidin kulembil ni kushinshikin nakash piur pa mashakamin ma dijuku diend ni yibudikin yiwamp ni yiyimp yikwikalaku anch ashemunik. Tufanyidinap kuyirumburish antu akwau mulong wa mupak ukwatilau. w19.07 10 par. 8-9

Yesu watuleja anch: ‘Yangany kudi antu a michid yawonsu, yikadishany in kwilejam.’ (Mat. 28:19) Chikwau kand, kupwa kwa kumufundish mwin kwilej yom yitinay Yesu anch in kwilejend asal, tufanyidin kumukwash mwin kwilej kwijik mutapu wa kwikal ni mashakamin mamekeshina anch udi mwin Kristu wakin. Nich kushimpish muchim tufanyidin kumukwash chisu chisadinay usu wa kusadin mbil ja Bibil. Amwing atwishining kuswimp yitongijok ni yaku yau mu angond akemp; akwau akat kusal chisu chilemp chakwel aswimpa. Mishoner umwing udia mwi ngand ya Pérou wamana chom chimwing chimekeshina usey wa kushimpish muchim. Ulondin anch: “Nileja mabuku maad ni mwin kwilej umwing dijin diend Raúl. Pakwez wading uchidandamedin kwikal ni milong yivud mu mwom wend. Atendang nakash mu uruw wau, wading ni mazu mayimp matapena ku muchim ni anend kadingap kamulimishina mulong wa mikadil yend yiyimp. Pakwez wayangang ku yikumangan yisu yawonsu, chawiy nadandamena kumwendin ni kumukwash pamwing ni dijuku diend. Kupwa kwa mivu yisatu ni kusut, naya kumutal ni namutana wawanyishin kal yom yitinau mulong wa kutambul dibatish.” w19.07 15 par. 3; 19 par. 15-17

Tushinshikinany chom chawonsu chasalay Paul chisu chayifundinay in Kristu a ku Filip mukand. Amuteka mu rukan mu Rom. Kadingap ni mutapu wa kwendangan mulong wa kulejan. Pakwez, wading ukwatiken ni kupan uman kudi antu ezang kumutal ni wafunda mikand ya kutum ku yikumangen yading kulempMudi mwasalay Yesu, Paul wading wij anch ufanyidin kwikasikesh mu mwom wend wawonsu. Chawiy chafanikeshay mwom wa mwin Kristu ni masengan ma in kubambil. (1 Kor. 9:24-27) Mwin kusengan ubambidila ukat kushinshikin pa diloz diend ni ukat kwipuk chom chin chawonsu chikutwisha kumuletin kampuw. Chilakej, nlel in kubambil akutwish kusadin masengan ma kubambil mwi njil mudia jindond ja kulandishin ni yom yikwau yikutwisha kuyiletin kampuw. Ov, utongin anch mwin kubambil ukutwish kwiman chakwel ashinshikina pa yom yilandishinau? Bwat, kakutwishap kusal mwamu anch ukatil kuwin! Mu kubambil kwetu mulong wa mwom, niyetu tufanyidin kwipuk yom yikutwisha kutuletin kampuw. Anch twashinshikin pa diloz dietu, ni kwikasikesh mudi mwasalay Paul, tukutambul difut! w19.08 3 par. 4; 4 par. 7

Anch mwom wetu wakwatijan ni mbil ja Nzamb, pamwing ap chikutwish kuyikasiken anamakwetu kwitiy kuswimp kwinoku twasala kal. Yisu yivud, chom cha kusambish chikata kushinshikinau chiding kulik kwiyandjik mu misambu yau ya chirelijon ap mu milong ya politik. Kwinsambishin anamakwetu amwing akutwish kutujimen. (Mat. 10:35, 36) Pakwez tufanyidinap kuziy. Anch twalik kuyikwash chakwel atesha yitiyij yetu, chidi mudi tukat kuyirumburish anch kawanyidinap kutambul mwom wa chikupu. Yehova katwinkishinap etu mudimu wa kuyirumburish—chisend chinech wamwinkishinach kal Yesu. (Yoh. 5:22) Anch twikal ashimpishina muchim, dichuku dimwing anamakwetu akutwish kusanger kutesh uruu wetu. Tufanyidin kwikal antu awamp, pakwez kangal aswimp mupak wetu, ap anch chitin kujijamen yoziu. (1 Kor. 4:12b) Chikutwish kwit chisu chilemp kurutu anamakwetu ajingunin anch kumusadin Yehova chidi chom cha usey nakash kudi etu. w19.08 17 par. 10, 13; 18 par. 14

“Anch natong piur pa chikokujol ap chakamish napandikana, nimen anch nafanyinap kutwish kuchipandikan nich usu wam amwinam.” Ov, niyey walondinap kal mazu mudi minam? Avud pakach petu alondin kal mwamu. Pamwing ap walonda mwamu kupwa kwa kutongijokin pa mutapu watwisha kujijamen mayej makash ap rufu ra mukatish. Anch watongijokin piur pa yakamish yiney, ukwiyov anch watwisha kujijaman mulong spiritu wa Yehova wakwinkisha “ukash upandakena ukash wawonsu.” (2 Kor. 4:7-9) Tukwet kand kuswir kwa spiritu utumbila mulong wa kujijamen yibachikin ya mangand minam mayimp. (1 Yoh. 5:19) Chikwau kand, tuswirikedin usu mulong wa kurish ni ‘aspiritu ayimp akweta usu.’ (Efes 6:12) Spiritu utumbila wa Yehova ukat kutukwash kusutil kutwinkish usu, ap ukash mulong wa kuwanyish yisend chikalap nchik yakamish. Kambuy Paul wiyova anch watwisha kudandamen kusal mudimu ni kuwanyish chisend chend chikalap nchik yakamish mulong wading uchingejidin mu “ukash wa Kristu.”—2 Kor. 12:9. w19.11 8 par. 1-3

Bibil ndiy buku umwing kusu wakin ulejena yom yasalay Yesu mulong weyey. Ileja kumukat Yesu, ni rukat rey mulong wa Yehova rikukul. Mulong wak? Mulong Yesu wamekesha mikadil ya Tatukwend mu mutapu uwanyidina. Chawiy, anch wadandamen kwilej yom yivud piur pa Yesu, ukumwijik nawamp Yehova ni ukumukat kand. Tong piur pa ranaken ramekeshay Yesu pantaliken nau antu akwatangau nich usey ukemp mudi—atuzwendj, ayej, ni antu ading akad diking. Chikwau kand, tongin piur pa yiyul ya manangu yikwinkishinay ni piur pa mutapu ukata kuwap mwom wey piusadidina yiyul yiney. (Mat. 5:1-11; 7:24-27) Rukat rey mulong wa Yesu rikutwish kukul piudandamedina kutongin nakash piur pa yakupesh yapanay chakwel yitil yetu ayilikishin. (Mat. 20:28) Anch wijik anch Yesu wafa kwa kwikatin mulong weyey, ukutwish kwiyov ubachikinau kukarumuk ni kukimb dilikishin dia Yehova. (Mid. 3:19, 20; 1 Yoh. 1:9) Anch washiken kumukat Yesu ni Yehova, ukukat kand kwikal mu urund pamwing nau antu ayikatina. w20.03 5-6 par. 10-12

Ikundj mwin Kristu ukutwish kutong anch ndiy uwanyidina kusal mudimu kanang kusutamu akadivar akwau. Ap mband mwin Kristu ukutwish kutong anch ‘Nfumwam ukutwish kusal nawamp nakash mudimu winou kusutamu akadivar akwau!’ Pakwez, anch twikepishin chakin, tukwipuk yitongijok mudi yiney ya kwibaz. Tukutwish kwilejin ku mutapu wasalay Moses chisu chatambulau antu akwau yisend. Moses wasangera chisend chend cha kutakel muchid wa Isarel. Mutapu ik wasalay Moses payinkishay Yehova antu akwau usu wa kusal midimu yimwing yasalangay Moses? Moses kovap mukau. (Kuch. 11:24-29) Wading wikepishin ni witiyija anch antu akwau amukwasha kusal mudimu wa kurumburish antu. (Kub. 18:13-24) Mwamu in Isarel ikala ni anzuj avud afanyina kuyikwash kupwish milong pa ndond pa kuchingel chisu chilemp. Chinech chimekeshin anch Moses washinshikina pa kuyikwash antu pa ndond pa kushinshikin pa yisend yend. Chilakej chiwamp mudi ik tufanyidina kwimburij! Tufanyidin kuvurik anch ang tukimbin anch Yehova atusadin nakash, chidi cha usey kwikal ikepishina nakash kusutamu kutakej ukaliweny kurutu. w19.09 5-6 par. 13-14

Twijap mayingishin makuyibachika antakel a mangand chakwel amushesh Babilon Mujim. Akutwish kulond anch marelijon ma pa mangand makangeshin chisambu ni miyandjikin chisu chawonsu mu yom ya politik. Ap pamwing ap akulond anch marelijon mikumangejidin kal mapit ni yom yivud nakash. (Kuj. 18:3, 7) Chimeken anch, kurishikish kwinoku kurumburikinap anch antu awonsu adia mu marelijon akuyijip. Pakwez, chimeken anch antakel a mangand akushesh yitenchik ya marelijon. Anch ashesh yitenchik yiney, antu ading mu marelijon minam akujingunin chad anch antakel au a chirelijon akangany kal kusal yom yakanau ni pamwing ap akupakish chad kwiyauril ni marelijon minam. Bibil kalejenap kulep kwa chisu chikumusheshau Babilon Mujim, pakwez twij anch chisu chinech chikwikal chiswimp. (Kuj. 18:10, 21) Yehova washilamu anch ukez “kukepish kuvul kwa machuku” ma mar mulong wa kupandish “antu end atonday” kal ni relijon wakin.—Mar. 13:19, 20. w19.10 15 par. 4-5

Amaku, pamwing ap akulilana kudi anvaj ajimanang nakash ni ayilondolang nayimp nakash anau. Chawiy ukutwish pamwing ap kutong anch kusal mwamu wawiy mutapu uwamp wa kuyilil aney. Ap kupwa kwa kwilej mbil ja Yehova, chikutwish kukukasiken kwikal witudishila ni ushimpishina muchim pantaliken nau aney, pakampwil anch akubwambwil chisu waziyang kal. (Efes 4:31) Pa yisu mudi yiney, ufanyidin kumuchingejin Yehova kusutil malembil. (Kus. 37:5) Amaku amwing akutwish kurish ni chikokujol chikwau—chikutwish kuyikasiken kumekesh anch ayikatin anau. pamwing ap ayilila kudi anvaj amwing akad kuyimekeshinang anau rukat. Anch wawiy mutapu wakulilau, ufanyidinap niyey kwimburij kurumbuk kwa anvaj ey. Maku umuziyidina Yehova ufanyidin kwilej mutapu wa kuyimekeshin anend rukat. Chikutwish kumukasiken kuswimp. Pakwez, chiswapel kuswimp ni anch wasal mwamu ndiy ni dijuku diend akwikal ni musangar. w19.09 18-19 par. 19-20

Muntu umwifukwidina Yehova oku ukat kusutish kand chisu chivud ni usu uvud mulong wa kupakish kwikumangejin mapit ma mangand minam, udi mudi ukat kupakish kuyisadin ansalej aad. Kakutwishap kwipan ching kusu kudi Yehova. Piswimp ni kwinsudiel kwa mivu chitot ya kusambish C.C., antu a mu chikumangen chading mu musumb wa Laodisey asambisha kwibaz anch: “Am nidi mpich. Nikwet mapit mavud, kiniswiridinap chom.” Pakwez ku mes ma Yehova ni Yesu, ading ‘antany, ni ayimana mar, atuzwazu, kanzikis, ni amputames.’ Yesu kayiyulap mulong ading ampich bwat, pakwez mulong rukat rau ra mapit rading rikat kushesh urund wau wa piswimp ni Yehova. (Kuj. 3:14-17) Anch twajingunin anch twasambish kal kukudish rukat ra mapit mu muchim wetu, tufanyidin kukwat mupak wa kuswimp yitongijok yetu pakad kulab. (1 Tim. 6:7, 8) Anch tusadinap mwamu, tukusambish kukat yom ya ku mujimbu nakash ni Yehova kakwitiyap kand difukwil dietu. Yehova “udi Nzamb wa mukau.”—Kuv. 4:24. w19.10 27 par. 5-6

Dizu dia Grek dikarumwinau anch ‘kutakel’ dirumburikin “kupwepul.” Dizu dia Grek dia mutapu winou adisadina kand kudi Luka, mwin kufund wa mukand wa Midimu mulong wa kurumburil piur pa waat ‘upwepwilau’ kudi rinkind. (Mid. 27:15) Chawiy pafunday kambuy Pita anch in kufund a Bibil ‘ayitakela’ kusutil spiritu utumbila, wasadina dizu diafanyina kuyibachik antu kutongin pa milong ya kwawish. Chawiy, Pita walonda anch mudi mukata rinkind kupwepul waat uyila mu weny djat ni ku chikum, aprofet ni in kufund Bibil ayipwepula kudi spiritu utumbila mulong wa kuwanyish mudimu wau. Mwin kwilej milong ya Bibil winou ulondin kand anch: “In kufund Bibil ading mudi antu awishina azambulang kal yikay yau.” Ading tayad mulong wa kusal mudimu wayibachikangau kusal kudi spiritu utumbila. Yehova wasala yom yading yikatinay kusal. Wapepa “rinkind,” charumburik anch spiritu utumbila. Chad in kufund Bibil asala mudimu wayinkishau kusal. Alondula umutakel wa spiritu utumbila mulong wa kusal mudimu wau. Ni nlel, mudi rinkind wa pa karung utalakedina mutambu uyila waat, spiritu utumbila ukat kutukwash kudandamen kumusadin Yehova chikalap nchik yakamish djat kamu ni mu mangand masu mashilayimu Nzamb. w19.11 9 par. 7-9

Yisu yimwing tukutwish kuziy mulong wa milong yetu. Pakwez tufanyidinap kutongin pa milong yetu chisu chawonsu. Anch twasal mwamu, tukutwish kuvuramen yom yawonsu yipandikena kuwap yatukaninau kal kudi Yehova. (Kuj. 21:3, 4) Kupwa, kuziy nakash kukutwish kusal anch tulikumuk ni twimik kumusadin Yehova. Shinshikin mutapu walamay nambaz umwing udia mu États-Unis ritiy rend chisu chading chimulaminay nfumwend wading uyedina nakash. Wafunda anch: “Mayej minam mading matwakamishin nakash ni mading kutuziyish yisu yimwing, pakwez ritiy retu ridi rikash. Nijikitishin nakash mulong wa chom chin chawonsu chitwinkishinay Yehova chisadina anch ritiy retu rikal rikash ni twikal akasikeshinau. Tukwet chakin kamu kuswir kwa yiyul yiney ni kukasikesh. Yiyul yiney yikat kutukwash kudandamen kumusadin Yehova ni kujijaman.” Kusutil chilakej cha nambaz winou, twilej kal anch tukutwish kuwin kuziy! Mutapu ik? Vurik anch milong yey yidi kupak kudiokila kudiay Satan. Ikal ni ruchingej anch Yehova ukukukasikesh. Ni sanger nakash chakudia cha mu spiritu chikwinkishinay. w19.11 16 par. 9-10

Pakampwil, amakurump afanyidin kusadin mbil yiney. Mukurump wij anch kafanyidinap kulejan “ujindj” wa antu a mu chikumangen. Anch walejan nsangu jinej, akadivar akutwish kulik kumuchingejin ni ukushadish kalimish kend. Antu akweta yisend mu chikumangen kafanyidinap kwikal “in ndim jaad,” ap akad kashinsh. (1 Tim. 3:8) Chinech chirumburikin anch kafanyidinap kwikal in makasu ap in kulondol piur pa nsangu ja antu akwau. Anch mukurump umukatin mukajend, kakumulejap nsangu jakad kumutal. Mband ukutwish kumukwash nfumwend kulam kalimish kend anch walik kumubachik chakwel amulej nsangu jidia ja ujindj. Anch mband wasadin chiyul chinech, kamukwashinap ching kusu nfumwend pakwez uyilimishin kand antu amulejang nfumwend nsangu jinej. Ni cha usey nakash, umusangareshin Yehova mulong unungin chikas ku chisambu ni uumwing mu chikumangen.—Rom 14:19. w20.03 22 par. 13-14

Shinshikin yom yasadika mu muvu wa 1512 K.C.C. chisu chatungau dizang ku Mukandu wa Sinay, Moses watakela yom yasadika mulong wa kumutek Aron ni anend kwikal in kupesh. Muchid wa Isarel wakumangana mulong wa kuman mutapu wapanau in kupesh milambu yau ya kusambish ya annam. (Kub. 40:17; Lev. 9:1-5) Mutapu ik wamekeshay Yehova anch uyitiyijin in kupesh inay asu? Padingay Aron nend Moses akat kuyiyukish antu, Yehova watuma kasu mulong wa kwosh milambu yawonsu yading pa chintamb. (Lev. 9:23, 24) Kasu kadiokala mwiur kamekesha ik pa chisu chading chimutekinau mwin kupesh mujim? Yehova wamekesha anch umukwashin Aron ni anend Atonday mulong wa kwikal in kupesh. Pamanau in Isarel uman winou umekeshina anch Yehova uyikwashin in kupesh, ading ni diyingishin diwamp dia kuyikwash niyau. Yom yiney yidi ya usey kudi etu? Mwaning! In kupesh a mu Isarel ading mwizwizwimb wa in kupesh akweta usey nakash. Kristu udia Mwin Kupesh Mujim nakash, ukwet chisak cha in kupesh 144000, akusala nend pamwing mwiur. (Heb. 4:14; 8:3-5; 10:1) Pakad kwidjidjek, Yehova utakedin ni uyukishin dirijek diend nlel. w19.11 23 par. 13; 24 par. 14, 16

Padingay ku Korint, kambuy Paul washakama pamwing ni Akila ni Prisil ni “wasalanga kand nau mudimu wa kuchim minkand, mulong awonsu asalanga mudimu wa mutapu umwing.” Palondinay Paul anch wasala mudimu “uchuku ni muten” chirumburikinap anch wasalang mudimu pakad kupim. Chilakej, pa dichuku dia Sabat katungangap minkand. Wasadinang dichuku dinidia mulong wa kupan uman kudi in Yuda ading apimina niyau pa dichuku dia Sabat. (Mid. 13:14-16, 42-44; 16:13; 18:1-4) Paul wasalang mudimu wa ku mujimbu; pakwez wipanang kand nich mushiku mu “mudimu [utumbila] wa kurumburil rusangu ruwamp rudiokila kudi Nzamb.” (Rom 15:16; 2 Kor. 11:23) Wayikasikesha antu akwau chakwel niyau asal mwamu. Chawiy, Akila ni Prisil ading ‘ambay nend a mudimu mu Kristu Yesu.’ (Rom 12:11; 16:3) Paul wayikasikesh in Korint kwikal ni ‘yivud ya kusal mu mudimu wa Nsalejetu.’ (1 Kor. 15:58; 2 Kor. 9:8) Yehova wamupepila kambuy Paul kufund anch: “Muntu wakad kwend kusal mudimu, kafanyidinap kwend kudia.”—2 Tes. 3:10. w19.12 5 par. 12-13

Yehova wayitanga ambay a uruw akusambish nich impu ya kuval an. Pakwez nany ufanyidina kuyikwatin antu atijadina mupak anch afanyidin kuval ni piur pa chisu chifanyidinau kuval? Kukwatijan ni yishankur yimwing, anch antu atijan, antu akwau akat kuchingej anch antu inay atijanang akuval pakad kulab. Antu a mu dijuku ni antu akwau kand akutwish kusambish kuyikasikesh ambay a uruw chakwel avala. Jethro, mukadivar wa mu Aziy, ulondin anch: “Mu chikumangen, akadivar amwing akweta an, akat kuyikasikesh ambay a uruw akad kal kuval chakwel avala.” Jeffrey, mukadivar mukwau wa mu Aziy, ulondin anch: “Antu amwing akat kuyilej ambay a uruw akad kuval anch kakumanap muntu ukutwisha kuyilam chisu chikunanapau.” Pakwez, ambay a uruw in awonsu afanyidin kwikwatin mupak ayinau anch akuval ap bwat. Awiy afanyidina kukwat mupak; chidi chisend chau. (Gal. 6:5) Chakin kamu, arund ni antu a mu dijuku akatining anch ambay a uruw atijanang ikal ni musangar. Pakwez awonsu afanyidin kuvurik anch mupak wa kuval an ap kulik kuval uyitadin ambay a uruw ayinau.—1 Tes. 4:11. w19.12 22 par. 1-3

Ov, chikukasikedining kumuman Nzamb mudi Tatukwey? Antu amwing akutwish kwiyov anch kakwetap usey mulong pakatau kwiyilakej ni Yehova, amen anch Yehova udi mujim nakash. Kakwetap kashinsh anch Nzamb Mwin Dikand Diawonsu umubangidin muntu ni muntu pakach pau. Pakwez, Tatukwetu wa rukat kakatinap anch twiyova mwamu. Watwinkisha mwom ni ukatin anch twikal arund nend. Kupwa kwa kulejan uyakin winou, kambuy Paul wayirumburila antu ading amuteshina mu musumb wa Aten anch “Nzamb kadiap kulemp ni muntu mwawonsu.” (Mid. 17:24-29) Nzamb ukatin anch muntu ni muntu pakach petu amusejin mudi mukatay mwan kumusejin nvaj ukweta rukat ni umubangidina. Chikutwish kuyikasiken antu akwau kumuman Yehova mudi Tatukwau mulong atatukwau ayivadina kayimekeshinangap kwau rukat nakash ap kand kadingap kayikatina ap pakemp. Nambaz umwing mwin Kristu ulondin anch: “Tatuku waswejang nakash. Pinasambisha kwilej Bibil, chading chinkasikedin kwiyov anch nidi piswimp ni Tatukwam wa mwiur. Pakwez kupwa kwa kumwijik Yehova, yom yawonsu yaswimpa.” Ov, wawiy mutapu wiyovila? Anch mwawiy, ikal nich kashinsh anch ukutwish niyey kushiken ku kumuman Yehova mudi Tatuku upandikena kuwap. w20.02 3 par. 4-5

Yesu watufundisha anch ap anch yom tusadina yamekan mudi yikwetap usey patuyila mu kunanap, Yehova ukat kusanger nakash chom chawonsu tukutwisha kusal mu mudimu wend. (Kus. 92:12-15; Luka 21:2-4) Chawiy shinshikin pa yom ukutwisha kusal. Chilakej, ukutwish kulond piur pa Yehova, kulembil mulong wa akadivar ney, ni kuyikasikesh antu akwau chakwel ashal ashinshamena. Yehova ukumen mudi mbay nend wa mudimu, kadiap mulong wa yom usadina, pakwez mulong wa rusot rey ra kumusadin. (1 Kor. 3:5-9) Tujikitishin nakash mulong tumwifukwidin Yehova, Nzamb uyikwatining chakin kamu nich usey antu amusadidina! Watutanga mulong wa kusal rusot rend, ni difukwil dishitwila diawiy dikata kutuletin musangar mu mwom. (Kuj. 4:11) Ap anch mangand matumen mudi tukwetap usey, Yehova ndiy katumenap mwamu. (Heb. 11:16, 38) Anch mayej, milong ya kuburen nfalang ap upal yatuziyish, el tuvurikany anch kwikil chom ap chimwing chikutwisha kutwauril ku rukat ra Tatukwetu wa mwiur.—Rom 8:38, 39. w20.01 18 par. 16; 19 par. 18-19

Tukutwish kurishikish mukau kusutil kukudish kwikepish ni kusanger yitukweta. Anch muchim wetu wizul nich mikadil yiney yiwamp, tukukudishap ris. Kwikepish kukutukwash chakwel twipuk kwitongin nakash ayinetu. Muntu wikepishina kakatap kwiyov anch uwanyidin kwikal ni yom yivud kuyisutamu antu akwau awonsu. (Gal. 6:3, 4) Muntu ukata kusanger yom yikwetay kakatap kwiyilakej anau antu akwau. (1 Tim. 6:7, 8) Muntu wikepishina ni ukata kusanger yikwetay, anch wamuman muntu mukwau wikal ni chom chiwamp, ukat kumusangerang. Tukwet kuswir kwa spiritu utumbila mulong wa kwipuk mukau udia mwikadil wa ku mujimbu, ni mulong wa kukudish kwikepish ni kusanger yitukweta pa ndond pa kwov mukau. (Gal. 5:16; Fil. 2:3, 4.) Spiritu utumbila wa Yehova ukutwish kutukwash chakwel tushinshikin yitongijok ni yibachikin yetu ya mu muchim. Ku ukwash wa Nzamb, tukutwish kuswinkesh yitongijok ni yovil yikata kukasikesh antu akwau pa ndond pa yitongijok ni yovil yiyimp.—Kus. 26:2. w20.02 15 par. 8-9

Kwipan madi machip ni Yehova uchingejin anch umawanyish. Chawiy shal piswimp ni chikumangen chey. Akadivar nau anambaz ney mu chikumangen adi dijuku diey dia mu spiritu. Kusutil kukumangan pakad kujing, ukukasikesh nau urund wey. Tang Dizu dia Nzamb ni kuditongijokin dichuku diawonsu. (Kus. 1:1, 2) Itekina chisu cha kutongijokin chikurikina piur pa yom watanga kal. Mwamu, yom yiney yikupukun muchim wey. ‘Lembil chisu chawonsu.’ (Mat. 26:41) Malembil mey makashinsh makukusejish piswimp ni Yehova. ‘Dandamen kukimb bil Want.’ (Mat. 6:33) Ukutwish kusal mwamu kusutil kutek mudimu wa kulejan pa ndond ya kusambish mu mwom wey. Kusutil kuya mu mudimu wa kulejan chisu chawonsu, ukulam ritiy rey rikash. Chikokujol chin chawonsu ukurisha nich mu mangand minam chidi kwau cha “chisu chikemp [ni cha usweral].” (2 Kor. 4:17) Chinyim ni chinech, kwipan kwey ni dibatish yikutwish kukukwash kwikal ni mwom usangareshina nlel ni “mwom udia wakin” mu machuku ma kurutu. ov, chidi cha usey kukwat mupak winou? Nakash kamu!—1 Tim. 6:19. w20.03 13 par. 19-21

Anch mwin kwilej wey wa Bibil kaswimpinap mashakamin mend, ukutwish kwiyipul yisu yimwing anch: ‘Ov, nifanyidin kwimik kwilej nend?’ Kurutu kwa kukwat mupak winou, iyipula anch: ‘Ov, mwin kwilej wam uyil kurutu mu chilik chisikena kukwatijan ni mashakamin mend?’ ‘Ov, wasambishin kal “kuziyil,” ap kusadin, yom yilejiningay?’ (Mat. 28:20) Cha ushon, in kwilej a Bibil amwing adi mudi in Isarel a pa chirung cha Ezekiel. Yehova wamuleja Ezekiel piur pa in Isarel inay anch: “Antwam kakulimishinap, akumen kwey mudi mwin kuyiwangil miminy ya rukat, ap mwin kubul kadiad. Akat kutesh mazu mey mawonsu, pakwez kaziyidilap ku dizu ap dimwing.” (Ezek. 33:32) Chikutwish kutukasiken kumulej muntu anch tukwilejap kand nend. Pakwez, “chisu [chishadinaku] chakep kal.” Pa ndond pa kusutish chisu mu kutakel dilejan diakad kuya kurutu, tufanyidin kukimb muntu udia ‘mu mwikadil ufanyidina kutambul mwom wa chikupu.’—Mid. 13:48. w20.01 6 par. 17; 7 par. 20

Ma egliz ma Kristendom makatap kufundish uyakin wa mu Bibil ulondina anch antu aziyidina akez kashakam chikupu panap pa divu. (2 Kor. 4:3, 4) Nlel, ma relijon minam mafundishin anch antu awamp ayiling mwiur pakatau kufa. Pakwez marelijon minam mading mashalijadin ni ka chisak kakemp ka in Kwilej a Bibil abudisha Chinong cha Kalam kusambish mu muvu wa 1879. Ajingunina anch Nzamb ukuchirish Paradis pa divu ni mamiliyon ma antu aziyidina makushakam chikupu panap pa divu—kadiap mwiur bwat. Chawiy chita chisu chakwel ajingunin nawamp anany akwikala antu inay aziyidina. Chakin kamu, in Kwilej a Bibil ajingunina kand mu Mifund anch chisak cha antu amwing “[ayilanda] kal kuyidiosh pansh” mulong wa kuyikel ni Yesu mwiur. (Kuj. 14:3, TMK) Chisak chinech chikwikal cha in Kristu 144000 akweta mushiku ni ipanina kal, amusadina Nzamb nich kushinshaman chisu chadingau pa divu. w19.09 27 par. 4-5