Ngond wa 1

Ritiy ra Timote rading rimedin pa kashinsh kadingay nich anch mafundish ma Bibil madi makin ni yawiy yamupwitina kudi Yehova. Niyey ufanyidin kutongijokin pa yom wilejina ni kukimb mayingishin makwinkishina kashinsh anch yom yifundishinay Bibil piur pa Yehova yidi yakin. Mulong wa kusal mwamu, ufanyidin kwikal nich kashinsh ka uyakin wa pa dishin anch wakep usatu. Chakusambish, ufanyidin kwikal nich kashinsh anch Yehova Nzamb ndiy Sakatang wa yom yawonsu. (Kub. 3:14, 15; Heb. 3:4; Kuj. 4:11) Cha kaad, ufanyidin kukimb uman ukwinkishina kashinsh anch Bibil udi uruu wapepilau kudi Nzamb mulong wa antu. (2 Tim. 3:16, 17) Ni cha kasatu, ufanyidin kwikal nich kashinsh anch Yehova ukwet dirijek dia antu amwifukwidila ditakedilau kudi Kristu ni anch Atuman a Yehova awiy asadina dirijek dined. (Isay 43:10-12; Yoh. 14:6; Mid. 15:14) Chinech chirumburikinap anch ufanyidin kwijik chom chin chawonsu chidia mu Bibil. Chitongijok chey chifanyidin kwikal cha kusadin ‘usu wey wa kutong’ mulong wa kukasikesh kashinsh key anch udi mu uyakin.​—Rom 12:1. w20.07 10 par. 8-9

Uprofet winou wisambidin chisak cha ampasu akweta yifu mudi ya antu ni ‘amekena mudi adjadin yibangul ya utad wa or’ ku mitu yau. (Kuj. 9:7) Akat kuyimesh mar “antu [akankuny a Nzamb] awonsu akad chijingidij cha Nzamb pa jimpal jau” mu chirung cha angond atan, kulep kwa mwom wawonsu wa ampasu. (Kuj. 9:4) Chimeken anch uprofet winou wisambidin atushalapol azizidilau many a Yehova. Nich kutakaman akat kulejan dirumburish dia Nzamb pantaliken ni mangand minam mayimp ni chinech chikat kuyakamish nakash antu awonsu anungina chikas ku mangand minam. Ov, chinech chirumburikin anch ampasu isambidinay Jowel 2:7-9 kawiyap ampasu isambidinau mu buku wa Kujingunik? Mwaning. Mu Bibil, yisu yimwing chifanakesh chikutwish kwikal ni kurumburik kushalijan anch achisadin mu mitapu kushalijan. Chilakej, mu Kujingunik 5:5, Yesu amutazukin anch “Ntambu wa muchid wa Yuda,” pakwez mu 1 Pita 5:8, amulejen Djabul mudi “ntambu wonyina.” w20.04 3 par. 8; 4 par. 10

Hagar, mwilomb wa Sarai, wasala yom ya usup kupwa kwa kwikal mband wa Abram. Hagar wimisha ni kupwa wasambisha kumupipej Sarai, wading wakad kuvalang. Yom yayipa nakash chawiy Sarai wamwopata Hagar. (Dis. 16:4-6) Mulong tudi antu akad kuwanyin, tukutwish kutong anch Hagar wading mband mwin chibud, chawiy dipup dined diading dimuwanyidin. Pakwez kiwawiyap mutapu wamumanau Hagar kudi Yehova. Wamutumina mwangel wend. Chisu chamutanau kudi mwangel, wamukwasha kurijek mutapu wend wa kutong ni wamuyukisha. Hagar wajingunina anch Yehova wading umumen ni anch wading wij yom yawonsu piur pend. Chinech chamubachika kumutazuk Yehova anch ‘Nzamb umena, . . . ndiy ukata kwinman.’ (Dis. 16:7-13) Yom ik yashinshikinay Yehova piur pa Hagar? Wading wij yom yamushikena Hagar pakur ni yom yawonsu yajijamenay. Yehova wading wij anch Hagar warumbuka nakash pa kumupipej Sarai, pakwez ku mutambu ukwau kand watesha yovil ni mayingishin mamubachika Hagar kusal mwamu ni wamwanikena. w20.04 16 par. 8-9

Kambuy Paul walonda anch in Kristu awonsu adi mu kubambil. (Heb. 12:1) Ni etu awonsu twikala ansand ap amapal, akweta usu ap aziyila, tufanyidin kujijaman djat ni kwinsudiel anch tukatin kutambul difut dikutwinkishay Yehova. (Mat. 24:13) Anch Paul watwisha kulond nich kashinsh kawonsu, chidi mulong watwisha ‘kubambil djat ni kwinsudiel.’ (2 Tim. 4:7, 8) Pakwez kubambil kwisambinay Paul kurumburikin pakampwil ik? Yisu yimwing Paul wasadina yilakej ya masengan masadikang mwi ngand ya Grek wa pakur mulong wa kufundish malejan ma usey. (1 Kor. 9:25-27; 2 Tim. 2:5) Paul wafanikesha tupamp tuvud mwom wa mwin Kristu nich masengan ma kubambil. (1 Kor. 9:24; 2 Tim. 4:8) Muntu ukat kusambishang “kubambil” anch wipan amwinend kudi Yehova ni kutambul dibatish. (1 Pita 3:21) Ukupwish kubambil kwend chisu chikumwinkishau difut diend dia mwom wa chikupu kudi Yehova.​—Mat. 25:31-34, 46; 2 Tim. 4:8. w20.04 26 par. 1-3

“Nsalejetu udi [ushinshamena], ndiy ukukukasikeshany ni kukuchidijany kudi Sakudimban.” (2 Tes. 3:3) Chad, mutapu ik ukatay kutuchidij Yehova? Yehova watwinkishin kal yom yawonsu ya njit mulong wa kutuchidij ku jinseu ja Satan. (Efes 6:13-17) Yom yiney ya njit ja mu spiritu yid yikash ni yiwamp kwichidij nich! Pakwez, yom yiney yikutuchidij ching anch twayidjal yawonsu​—ni twalik kuyidjol. Chilakej, nshipu ya uyakin yimekeshin uyakin udia mu Dizu dia Nzamb, Bibil. Mulong wak tufanyidin kudjal nshipu? Mulong Satan ud “tatuku wa makasu mawonsu.” (Yoh. 8:44) Ukwet tunan twa mivu kudiosh kwasambishay kudimban, chawiy wapumbwil kal “mangand mawonsu”! (Kuj. 12:9) Pakwez uyakin udia mu Bibil ukat kutuchidij chakwel kangal atupumbul. Chad, mutapu ik tukata kudjal nshipu yiney ya chifanakesh? Tukat kudjal nshipu yiney anch twilej uyakin piur pa Yehova, twamwifukwil ‘mu spiritu ni uyakin,’ ni anch twikal in kashinsh mu yom yawonsu.—Yoh. 4:24; Efes 4:25; Heb. 13:18. w21.03 26-27 par. 3-5

Ngand yiney yading ya pakampwil nakash mulong yawiy ndond yamwifukwilangau Yehova. Kusambishin pa Pentekot 33 C.C., “ngand” yiney yidiap kand ndond kanang yidia pa divu, mulong atushalapol a Yehova adi pa mangand mawonsu. Pakwez nlel unou “ngand Yipandikena Kuwap” didi dirijek diend mumwifukwidilau kudi atushalapol end kusutil yom mudi yikumangan ni mudimu wa kulejan. Mu machuku minam ma kwinsudiel, mwant wa kwiyand wandamin tupamp tuvud mwi “ngand Yipandikena Kuwap.” Chilakej, padingay Alemany Nazi mwant wa kwiyand, pakampwil pa chisu cha njit ja kaad, mwant winou wandama mwi “ngand Yipandikena Kuwap” kusutil kuyizengol ni kuyijip atushalapol a Nzamb. Kupwa kwa Njit ja Kaad ja pa Mangand Mawonsu, chisu chikala want wa Union Soviétique mwant wa kwiyand, mwant winou wandama kand niyend mwi “ngand Yipandikena Kuwap” kusutil kuyizengol atushalapol a Nzamb ni kuyibukish ku usu mu jingand jau. w20.05 13-14 par. 7-8

Shinshikin yilakej yimwing ya amakundj ikala arund a Nzamb kurutu kwa Yesu kwez pa divu. Aburaham wading ikundj umwing wading ni ritiy rikash. Mivu 1 000 ni kusut kupwa kwa rufu ra Aburaham, Yehova wamutazuka anch “murund nam.” (Isay 41:8) Chawiy ap rufu rikutwishap kumwauril Yehova nau arund nend a piswimp. Mu manangu ma Yehova, Aburaham udi mwom. (Luka 20:37, 38) Chilakej chikwau chidi cha Job. Yehova wamulondina Job kurutu kwa chisak cha angel mwiur. Yehova wamutazuka anch “muntu uyingila, chad kand utentamina, udi kand mwin kumwov Nzamb wom, ni kwiyep ku kuyip!” (Job 1:6-8) Ni mutapu ik wiyovay Yehova piur pa Daniel, wamusadina nich kushinshaman mu mivu piswimp 80 pakach pa antu akad kumwifukwil Nzamb? Mwangel wamuleja tupamp tusatu nich kashinsh ikundj winou wading wananapina kal anch “Nzamb ukukatil [nakash].” (Dan. 9:23; 10:11, 19) Tukutwish kwikal nich kashinsh anch Yehova ukatin chakin kamu kuyivumbul arund nend akatish afila kal.​—Job 14:15. w20.05 26-27 par. 3-4

Mwin kwilej muwamp ukutwish kwilej yijil ya Nzamb, ap kand kuyisanger. Pakwez, ov, mwin kwilej ukumuziyin Yehova mulong umukatin? Vurik anch Ev wading wij chijil cha Nzamb, pakwez kadingap kamukatina chakin kamu Mwin Kuchipan; Adam niyend chilik chimwing. (Dis. 3:1-6) Chawiy tufanyidin kusal yom yivud kusutamu kwau kuyifundish antu mbil ni yijil yitentamina ya Nzamb. Mbil ni yijil ya Yehova yiding ya ukwash ni yisangareshina chisu chawonsu. (Kus. 119:97, 111, 112) Pakwez mwin kwilej kakutwishap kuyiman mutapu winou ching anch wijik anch Yehova utwinkishin yijil yiney mulong utukatin. Chawiy tufanyidin kumwipul mwin kwilej wetu anch: “Utongin anch mulong wak Nzamb uyitin atushalapol end kusal yom kanang ap kulik kusal yom kampand? Yom yiney yitufundishin ik piur pa wuntu wend?” Anch twamukwash mwin kwilej wetu kutongijokin pa wuntu wa Yehova ni kukudish rukat rakin mulong wa dijin diend ditumbila, tukutwish pamwing ap kupukun muchim wend. Mwin kwilej wetu ukushiken kukat kadiap ching yijil pakwez ukumukat kand Mwin Kuyipan. Ritiy rend rikukasikan ni chinech chikumukwash kujijamen yoziu yikash yikutwisha kumushiken.​—1 Kor. 3:12-15. w20.06 10 par. 10-11

Tufanyidin kushimpish muchim mulong chitining chisu pakwel anch muntu amuchirikin Yehova. Akadivar ni anambaz avud alika kukumangan ni kusal mudimu wa kulejan pakur alondin anch amuchirikina Yehova kupwa kwa kuyendin tupamp tuvud kudi amakurump ni kudi antu akwau mu chikumangen. Nambaz Nancy wa mu Aziy ufundin anch: “Murund umwing wa piswimp mu chikumangen wankwasha nakash. Wading winkatin mudi yayend. Wanvurisha piur pa yisu yiwamp twasutisha nend pakur. Wata matu ni kwintesh nawamp chisu namuleja yovil yam, ni wanginkisha yiyul pakad kwidjidjek. Wamekesha anch udi murund wakin, udia kwaku mulong wa kukwash chisu chawonsu.” Kwitek pa ndond ya muntu kudi mudi mon ukweta usu ukutwisha kumukwash muntu kuyerik. Antu amwing alikina kal kukumangan ni kusal mudimu wa kulejan ayijimesha kudi muntu kanang mu chikumangen kwasutin kal mivu yivud ni adandamedin kwov ujim ni kusansan mulong wa yom yayisalau. Yom yiney yayikatwil kal impu ya kumuchirikin Yehova. Amwing akutwish kutong anch ayisadina yom yakad kutentam. Akutwish kwikal ni kuswir kwa muntu ukutwisha kuyitesh ni kwov kurumburik kwa yovil yau. w20.06 26 par. 10-11

Chisu chawonsu ujijamedina choziu, chikukuswapel kusal yom yiwamp. Vurik kand anch, chitongijok chiyimp cha mangand minam piur pa yom ya masandj chidiokil kud Satan. Chawiy anch wipuk chitongijok cha mangand minam, ijik anch ukat “kumupandakan Sakudimban.” Twij anch Yehova ndiy ufanyidina kututekin mipak anch chom kampand chidi chitil. Ni tukat kusal usu chakwel kangal twasal chitil. Pakwez anch twawil mu chitil, tukat kumwit Yehova dilikishin kusutil malembil. (1 Yoh. 1:9) Ni anch twasal chitil chijim, tukat kukimb ukwash wa amakurump atekay kal Yehova mulong wa kutulam. (Jak. 5:14-16) Pakwez, tufanyidinap kudandamen kwifish nich mulong wa yitil twasala pakur. Mulong wak? Mulong Tatukwetu mwin rukat udia mwiur wamupana Mwanend mud chakupesh cha difut chakwel yitil yetu akutwish kuyilikishin. Komb palondinay Yehova anch ukuyilikishin akayitil akarumukina, chirumburikin anch ukat kusalang kand mud mulondinay. Chawiy, kwikil chom chikutwisha kutukangesh kumusadin Yehova nich kom kishitwila.​—1 Yoh. 2:1, 2, 12; 3:19, 20. w20.07 22-23 par. 9-10

Yehova wading amwinend kurutu atanga yom. Pakwez kiyovap mudi udi amwinend. Mulong Yehova kakwetingap kuswir kwa muntu mukwau chakwel ikal ni musangar. Ap mwamu, Nzamb wakata anch antu akwau asanger niyau mwom. Chawiy rukat ramubachika kusambish kutang yom. (1 Yoh. 4:19) Yehova wamutanga chakusambish Mwanend Yesu. Kupwa, “watanga yom yawonsu,” kuwejaku ni mamiliyon ma angel, kusutil Mwanend winou. (Kol. 1:16) Yesu wasangera nakash dilau dined dia kusal mudimu pamwing ni Tatukwend. (Jnsw. 8:30) Angel niyau asangara nakash. Ading amen mutapu wading utanginau diur ni divu kudi Yehova ni Yesu, udia mwin kusal mudimu ukweta ukaliweny. Mutapu ik wamekeshau musangar winou? ‘Abula nkash ja musangar’ chisu chatangau divu, ni pakad kwidjidjek, adandamena kubul nkash mulong wa yom yawonsu yatangay Yehova, pakampwil, patangay antu. (Job 38:7; Jnsw. 8:31) Yitang yiney yawonsu yamekesha rukat ra Yehova ni manangu mend.​—Kus. 104:24; Rom 1:20. w20.08 14 par. 1-2

Yehova watutanga ni impu ya kukatan ni ya kutukat. Chawiy anch muntu utukisin, tukat kwiyovang nayimp nakash, ni pamwing ap kand tukat kwovang wom. Mukadivar umwing ulondin anch: “Chisu chambulau kud amasalay, kwinsaal, ni kwinlej anch akwinsal nayimp mulong nid Kaman wa Yehova, nova wom ni nakwachika usany.” Rukis ra mutapu winou rikat kutwovish kusansan nakash, pakwez ritushimokishinap bwat. Yesu wasambela kulejan anch akutukis. Mulong wak mangand mayikisin in kwilej a Yesu? Mulong mud Yesu, ‘tudiap a mangand minam.’ (Yoh. 15:17-19) Chawiy, ap anch tukat kulimishang maguvernema ma antu, pakwez tukatap kuyifukwil ap kwifukwil ma drapo mau. Tukat kumwifukwil ching kusu Yehova. Tunungin chikas kwi mbil ya Nzamb ya kuyiyikel antu​—mbil yikatau kurishikish kud Satan ni “mbut” yend. (Dis. 3:1-5, 15) Tukat kulejan anch Want wa Nzamb wawiy ruchingej rumwing kusu ra antu, ni anch piswimp ap, ukuyishesh antu awonsu abwambwidina ku Want winou. (Dan. 2:44; Kuj. 19:19-21) Uruu winou rid rusangu ruwamp kud antu itudishina, pakwez rid rusangu riyimp kud antu ayimp. w21.03 20 par. 1-2

Yehova umekeshin anch uyikwatin anambaz in Kristu nich usey nakash kusutin kuyinkish mudimu wa usey. Anambaz inay adi yilakej yiwamp mulong wa manangu mau, ritiy rau, mushiku wau, kutakaman kwau, muchim wau wa kupan ni mulong wa midimu yau yiwamp. (Luka 8:2, 3; Mid. 16:14, 15; Rom 16:3, 6; Fil. 4:3; Heb. 11:11, 31, 35) Tukwet kand musangar nakash mulong tudi nau amapal avud mu yikumangen. Akadivar ap anambaz netu ananapina kal akutwish kurish ni mayej mavud madiokila ku upal. Chikalap nchik mwamu, amapal inay akat kwikasikesh kusal mudimu wa kulejan kukwatijan ni usu wau, ni akat kusal usu wau wawonsu mulong wa kuyikasikesh ni kuyifumb antu akwau! Ni tukat kwilejin kand ku ukaliweny wau. Chakin kamu, amapal inay adi a usey nakash ku mes kwa Yehova ni adi kand a usey nakash kudi etu. (Jnsw. 16:31) Tong bil kand piur pa ansand. Akat kurish nich milong yivud nakash, mulong apamidin mu mangand matakedilau kudi Satan Djabul ni mizwila too nich mafundish ma antu. Pakwez ansand inay akat kutukasikesh chisu chakwilau ku yikumangan, chisu chipaninau mu mudimu wa kulejan, ni chisu chilondinau pakad wom piur pa yitiyij yau. Chakin kamu, en ansand, ukwetany usey nakash mu chikumangen cha Yehova!​—Kus. 8:2. w20.08 21-22 par. 9-11

Anch twasambish kulejan ni twijikan mudi Kaman wa Yehova, tukutwish kurish ni “rinkind mukash,” charumburik anch anamakwetu akutwish kutupompat, arund netu akutwish kutusip, ap antu akwau akulik kutesh uruu wetu. Mutapu ik ukutwisha kukudish mwikadil wa kutakaman? Chakusambish, ufanyidin kwikal nich kashinsh anch Yesu utakedin mudimu wa kulejan ap anch udi mwiur. (Yoh. 16:33; Kuj. 14:14-16) Kupwa, ufanyidin kukasikesh ritiy rey mu kushilamu kwa Yehova anch ukuwanyish maswir mey. (Mat. 6:32-34) Anch ritiy rey rikal rikash, ukutwish kwikal utakamena. Wamekesha ritiy rikash piwayijikisha arund ney ni anamakwey anch wasambishin kal kwilej Bibil nau Atuman a Yehova ni wasambishin kal kukumangan nau! Chakin kamu, waswimpin mashakamin mey chakwel ushakama kukwatijan ni mbil jitentamina ja Yehova. Kusal mwamu kwading kukwitin kand ritiy ni kutakaman. Anch wadandamen kukudish kutakaman ukutwish kwikal nich kashinsh anch Yehova Nzamb wey ukwikal “ni yeyey kwawonsu kuukuya.”​—Jos. 1:7-9. w20.09 4-5 par. 11-12

Mwant Asa udi chilakej chiwamp nakash, mulong wasadina chisu chend nich manangu ni wamuchingejina kamu Yehova. Wamusadina Yehova mu yisu yawonsu, pa chisu cha yakamish ni pa chisu cha chisambu. Kudiosh ku wanikanch, “muchim wa Asa wawonsu wading ching kudi [Yehova].” (1 Ant 15:14) Mwant Asa wamekesha anch wading umusadidin Yehova ni muchim wend wawonsu kusutil kujiyish difukwil dia makasu mwi ngand ya Yuda. Bibil ulondin anch “ndiy wadiosha yintamb ya akish ni jindond ja piur, wapuchola manguj ma mayal, waumbwola akish awonsu.” (2 Jsng. 14:2, 4) Wamumwanga kand Maka, ngakend mband pa katumb ka wad. Mulong wak wasalay mwamu? Mulong Maka wading uyikasikeshin antu kwifukwil atupwany. (1 Ant 15:11-13) Mwant Asa kimenap ching kusu kwend pa kushesh difukwil dia makasu, pakwez wakasikesha kand difukwil diakin ni wayikwasha antu a mu Yuda kumuchirikin Yehova. Yehova wamuyukisha Asa ni in Isarel, mulong wayinkisha chisambu. Mu mivu dikum pading payikedinay mwant Asa, “ngand yading nich chisambu.”​—2 Jsng. 14:1, 4, 6. w20.09 14 par. 2-3

Yisu yivud tukat kupanang yom yetu ya usey kudi antu akwau chakwel atulaminay. Chilakej, tukutwish kutek nfalang jetu ku bank. Chawil lel, pitukata kutek nfalang jetu ku bank, tukweting kashinsh anch akujilam nawamp, kakujiyap ni jikushadikap. Kambuy Paul wamuvurisha Timote anch amwinkisha yom ya usey nakash. Yom yiney yidi ronganyin rakin ra rusot ra Nzamb piur pa antu. Yehova wamwinkisha kand Timote dilau dia “[ku]rumburil rusangu ruwamp.” (2 Tim. 4:2, 5) Paul wamukasikesha Timote kulam baang yom yamwinkishau. Mudi Timote, niyetu atwinkishin kal kulam yom ya usey nakash. Yehova watwinkisha ronganyin rakin ra usey nakash ridia mu Dizu diend, Bibil. Uyakin winou wa Bibil udi wa usey nakash, mulong utufudishin mutapu wa kwikal ni urund wa piswimp ni Yehova, ni utulejin kand mutapu wa kwikal ni musangar wakin. Anch twitiy uyakin winou ni kuusadin mu mwom wetu, tukwikal ishitwila mu mwom wetu ni kakutudimbap nich malejan ma makasu.—1 Kor. 6:9-11. w20.09 26 par. 1-3

Mwin kwilej ufanyidin kukuman anch ufundishin nich chirungul ni kashinsh uyakin udia mu Bibil. Anch wasal mwamu, chikutwish kumubachik pamwing ap kukat yom umufundishina. Anch chitwishikin, ukutwish kumurumburil mutapu wakukwasha mbil jimwing ja Bibil mu mwom wey. Kusal mwamu kukutwish kumukwash mwin kwilej kujingunin anch Bibil ukwet mbil jikutwisha kumukwash niyend. Chisu wilejinanya, muleja mwin kwilej wey yilakej yimwing ya akadivar ni anambaz arisha ni yakamish yimwing mudi yirishinay nich ndiy ni mutapu wayipandakanau. Ukutwish kusend mukadivar ap nambaz wa mu chikumangen chen udia chilakej chikutwisha kumukwash mwin kwilej. Mukwasha mwin kwilej kuman anch chid cha manangu kusadin mbil ja Bibil mu mwom wend. Anch mwin kwilej ud mu uruw, mwipula anch mbay nend wilejin niyend. Anch kilejiningap, mutazuka chakwel ikalap chisu wilejinanya Bibil. Mukasikesha mwin kwilej kuyilej antu a mu dijuku diend ap arund nend yom yilejinay.​—Yoh. 1:40-45. w20.10 16 par. 7-9

Yesu amukwasha kudi anvaj end achiwuntu kwitapil dilau dia Nzamb; mulong alondula umutakel wa Yehova uyitadina anvaj. (Kuv. 6:6, 7) Josef ni Mariy ading amukatin Yehova nakash, ni mupak wa usey nakash mu mwom wau wading wa kuyikwash anau kwikal mudi awiy. Josef ni Mariy akwata mupak wa kumwifukwil Yehova pamwing ni anau pakad kujing. Pakad kwidjidjek, ayangang rubing rawonsu ku yikumangan mu sinagog, ku Nanzaret, ni ayangang kand muvu ni muvu ku musambu wa pasak ku Yerusalem. (Luka 2:41; 4:16) Chimeken anch payangangau ku Yerusalem, amufundishang Yesu ni anamakwend akwau piur pa nsangu ja atushalapol a Yehova, ni pamwing ap ayilejang ndond jijimbwilau mu mifund. Chading chifanyidin kumukasiken Josef ni Mariy kusal weny winou pading payilau an mu kuvul. Pakwez, kusal mwamu kwayiletina yiyukish! Mulong ateka difukwil dia Yehova pa ndond ya kusambish, dijuku diau diading dikash mu spiritu. w20.10 28 par. 8-9

Anch ukumutwalaku mukwen ku dilejan dia Bibil, chid cha usey nakash kwirijek kurutu kwa chisu piur pa yom ukufundishanya. Mukadivar Dorin udia chibol wa pakampwil ulondin anch: “Nikat kusangarang nakash anch mwin kulejan wintwadinaku wirijekang kal kurutu kwa chisu. Mwamu ukutwish kulond yom yikutwisha kumukwash nakash mwin kwilej.” Chikwau kand, anch mwin kwilej waman anch etu awonsu twirijekang kal nawamp, niyend ukutwish kusambish kusal mwamu. Ap anch ukwetap chisu cha kurijek yom yawonsu ukwilejanya, pakwez chid cha usey kwitekin chisu cha kushinshikin manans majim ukufundishanya. Malembil mad pakach pa yom ya usey nakash tufanyidina kusal chisu tutakedina dilejan dia Bibil. Chawiy, tongin kurutu kwa chisu yom ukutwisha kulond mu malembil anch akwit kulembil. Mwamu ukutwish kulembil yom yovikena nawamp. (Kus. 141:2) Hanae udia mu uvurikin malembil masalay nambaz wamutwalaku mulej wend wa Bibil. Ulondin anch: “Najingunina anch nambaz winou wading mu urund wa piswimp nakash ni Yehova, ni nakata kwikal mud ndiy. Niyova kand anch winkatin mulong wanjimbula mu malembil mend.” w21.03 9-10 par. 7-8

Yesu wamwinkisha kambuy Paul kashinsh anch ukushik mu Rom. Pakwez in Yuda amwing akwata mupak wa kumujikin Paul mwi njil mulong wa kumujip. Pajinguninay Kulod Lisias, mukurump wa amasalay a mu Rom mpung jinej, wamukwasha Paul. Pakad kulab, Kulod Lisias watumbwisha chisak cha amasalay chakwel amuchidij Paul mulong wa kumutwal ku musumb wa Sezarey. Kwinikwa, Nyikel Felikis wapana mbil ya “kumulamin Paul mu chikumbu cha nyikel chatungay Herod.” Paul amukinga ku ubaj wa antu ading akimbina kumujip. (Mid. 23:12-35) Felikis amuswinkana kudiay nyikel Festus, wading ukatina “kwiwapish kudi in Yuda.” Wamwipula Paul anch: “Ov, ey ukutwish kwitiy kuchirik ku Yerusalem, chakwel am nikakurumburishin kwinikwa mulong wa yom yiney?” Paul wading wij anch pamwing ap ku Yerusalem kwawiy kukumujipinau. Walonda anch: “Nit kal dirumburish dia mwant [Kayisar]!” Festus wamuleja Paul anch: “Ey wit kal dirumburish dia mwant [Kayisar], chawiy ukuya kwey kudi mwant [Kayisar].” Mu chisu chikemp, Paul wafanyina kuya mu Rom​—kulemp ni in Yuda ading akimbina kumujip.​—Mid. 25:6-12. w20.11 13 par. 4; 14 par. 8-10

Kwifish nich kuyipinap ni yisu yimwing etu awonsu tukat kwifishang nich. Chilakej, antu amwing akat kwifish nich mulong wa uyimp wasalau kurutu kwa kwilej uyakin. Akwau akat kwifish nich mulong wa yitil yasalau kupwa kwa kutambul dibatish. (Rom 3:23) Chakin kamu, tukatining kusal yom yiwamp. Pakwez “etu awonsu tukat kurumbok mu mitapu yivud.” (Jak. 3:2; Rom 7:21-23) Ap anch tukusangerangap yovil ya kwifish nich, pakwez yisu yimwing yovil yiney yiding yiwamp. Mulong wak? Mulong yovil ya kwifish nich yikutwish kutubachik kulikap chisal chiyimp ni kukwat mupak wa kulik kuchichirikin. (Heb. 12:12, 13) Ku mutambu ukwau, chitwishikin kwifish nich kusut chipim—charumburik anch kudandamen kwifish nich ap anch twakarumukin kal ni Yehova watulikishidin kal. Kwifish nich kwa mutapu winou kud kwa ubaj. (Kus. 31:10; 38:3, 4) Kulik kwifish nich kusut chipim kud kwa usey. Tongin bil musangar ukwovay Satan anch twiziyish kwetu ayinetu—ap anch Yehova ndiy katulikinap!​—Ilakej ni 2 Korint 2:5-7, 11. w20.11 27 par. 12-13

Mwin Levi umwing wading kand nfund a kuseng Wasambisha kuyovil antu ayimp ni in kwibaz ris, kadiap mulong wa uyimp wau, pakwez mulong ading ameken mud ading akwet mwom uwamp. (Kus. 73:2-9, 11-14) Ading ameken mud awanyishin kwau yawonsu—akwet mapit, mashakamin mawamp, ni kakwetap yakamish. Mwin Levi wading ufanyidin kuman yom mud muyimenay Yehova. Ni pasalay mwamu, wachirisha chisambu ni musangar wend. Walonda anch: “Kwikil chom chikwau chinisotila pa mangand, ching kusu ey [Yehova].” (Kus. 73:25) Chilik chimwing, niyetu tufanyidinap ap pakemp kuyovil ris antu ayimp amekena mud akwet mwom uwamp. Musangar wau ud kwau wa piur piur ni wa chisu chikemp. (Mul. 8:12, 13) Kuyovil ris kukutwish kutuziyish ap kand kuyipish urund wetu ni Yehova. Chawiy anch wajingunin anch wasambish kal kuyovil antu ayimp ris, sal mud mwasalay mwin Levi. Ziyin ku yiyul ya rukat ya Nzamb ni kumangan pamwing ni ambay ney asadina rusot ra Yehova. Anch wamukat Yehova nakash kusutamu yom yawonsu, ukwikal ni musangar wakin. Ni ukudandamen kwendin mwi njil ya “mwom udia wakin.”​—1 Tim. 6:19. w20.12 19-20 par. 14-16

Chisu umulejina Yehova yakamish yey mu malembil, sal kand usu wa kumujikitish. Chid cha usey kutongijokin pa yiyukish tukweta ap anch turishin ni milong yivud. Anch yisu yimwing chakukasiken kutan mazu ukutwisha kusadin mulong wa kulond mutapu wiyovila, vurik anch Yehova ukutwish kwakul malembil mey ap anch walond kwey anch: ‘Nkwashaku amboku!’ (2 Jsng. 18:31) Chingejin manangu ma Yehova, kangal ma amwiney. Pa chirung cha muprofet Isay, in Yuda ova wom wa kuyirishikish kud in Siria. Mulong wa wom wa kuyikwat mu uswik kud in Siria, aya kukimb ukwash kud apagan in Idjibit. (Isay 30:1, 2) Yehova wayibabesha anch yom yisadinau yikuyiletin yibudikin yiyimp. (Isay 30:7, 12, 13) Kusutil Isay, Yehova wayileja antu end kukutwishau kutan diking diakin. Wayileja anch: “Usu wen udi kudandamen kwikuchik ni kulam ruchingej” mudiay Yehova.​—Isay 30:15b, NWT. w21.01 4 par. 8-9

In Kristu azizidilau many akwikal ant ni in kupesh pamwing ni Kristu mwiur, dined diawiy difut dikuyinkishau mulong wa kushinshaman kwau. (Kuj. 20:6) Yehova, Yesu ni angel akusangar nakash pakumanau antu azizidilau many 144 000 akat kutambul difut diau mwiur. Kupwa kwa kuman ant ni in kupesh inay 144 000, kambuy Yohan wamana kand chom chimwing chisangareshina, “chisak chipandikena kujimb” cha antu akupanda ku Harmagedon. Chisak cha kaad chishalijangen ni chakusambish mulong chikwet antu avud nakash akad kutwish kuchind. (Kuj. 7:9, 10, TMK) Ading “adjit ankandj alemp atok,” chinech chimekeshin anch ad “wakad kwijond” mu mangand ma Satan ni ashadin ashinshamena kud Nzamb ni Kristu. (Jak. 1:27) Ading akat kutoy anch ayipandish kal mulong wa yom yasalau Yehova ni Yesu, udia Mwan a Mukoku wa Nzamb. Ading kand akwet malal ma mabu mu makas mulong wa kumekesh anch akwet musangar ni itiyijin anch Yehova wamutonda Yesu kwikal Mwant.​—Ilakej ni Yohan 12:12, 13. w21.01 15-16 par. 6-7

Ikundj ukutwish kwilej kwikal ntakel muwamp wa dijuku kusutil kwimburij mutapu usadidiningau Yehova ni Yesu ulabu wau. Chilakej, tushinshikinany mwikadil wa kwikepish. Yehova ndiy muntu wa kusambish ukweta manangu nakash; pakwez ukat kutesh yitongijok ya atushalapol end. (Dis. 18:23, 24, 32) Yehova ud uwanyidina, pakwez kakatap kutwit anch tusala yom mu mutapu uwanyidina. Ukat kuyikwash antu akad kuwanyin amusadidina chakwel atwisha yom yisadinau. (Kus. 113:6, 7) Bibil umulejen kand Yehova anch ud “nkwash.” (Kus. 27:9; Heb. 13:6, TMK) Mwant David walonda anch watwisha kupwish mudimu ujim wamwinkishau mulong Yehova wading wikepishin ni wamukwasha. Tushinshikinany chilakej cha Yesu. Wayowisha in kwilejend ku mend ap anch wading Nsalejau ni Mulej wau. Yesu walonda anch: “Am nakwinkishany kal chilik chakwel niyen ukez kasalany mudi munakusalanya kal en.” (Yoh. 13:12-17) Ap anch Yesu wading ukwet ulabu nakash, kachingejap anch antu akwau amusadin ndiy. Pakwez, ndiy wayisadina antu akwau.​—Mat. 20:28. w21.02 3-4 par. 8-10

Akadivar ansand, ukutwish kukwashany chikumangen nakash. Avud pakach pen ukwetany usu nakash. Ukat kuyikwashany nakash akadivar ni anambaz nen mu chikumangen. Pamwing ap ukatinany nakash kwikal ankwash a mudimu. Yisu yimwing, ukutwish kwiyov anch akadivar ni anambaz akukwatin mud uchid kal mwanikanch ni ukwetap ukaliweny uwanyidina mulong wa kukwinkish yisend ya usey. Pakwez ap anch uchid kal mwanikanch, ijik anch kud yom ukutwisha kusal kusambish katat yikutwisha kusal anch akadivar ni anambaz akuchingejin. Ov, ukwetany ukaliweny ukutwisha kukwash chikumangen? Inge, avud pakach pen akwet ukaliweny winou. Chilakej, ukutwish kuman anch akadivar ni anambaz avud ananapa kal akwet kuswir kwa kuyifumb mutapu wa kusadin matablet mau, matelefon, ni yom yikwau ya elektronik mulong wa kwilej nich Dizu dia Nzamb ni mulong wa yikumangan. Ukaliweny ukwetanya mu yom ya teknoloji ukutwish kuyikwash nakash akadivar ni anambaz inay. Mu yom yawonsu usadilanya, musangareshany Tatukwen wa mwiur. w21.03 2 par. 1, 3; 7 par. 18

Ap anch mband wileja nakash kumusutamu ikundj, chid chisend cha ikundj cha kutakel difukwil dia mu dijuku ni mijikit yikwau ya mu spiritu. (Efes 6:4) Mband ufanyidin kumuziyin nfumwend, pakwez ukwet kand chisend cha kulam nawamp ukash wend wa mu spiritu. Mulong wa kusal mwamu, chimwitin kwitekin chisu cha kusal dilejan diend dia pakampwil ni kutongijokin pa yom yilejinay. Chinech chikumukwash kudandamen kumukat ni kumulimish Yehova, ni ukumuziyin nfumwend nich musangar. Amband akata kudandamen kuyiziyin anfumwau mulong amukatin Yehova, akwikal ni musangar nakash kusutamu amband akata kubwambwil ku umutakel watenchikay Yehova. Akat kusha kand chilakej chiwamp kud ansand ni ayangadim. Ni akat kukasikesh rukat ni kuletish chisambu, kadiap kwau kusu ching mu majuku mau, pakwez kand mu chikumangen. (Tit. 2:3-5) Pakach pa atushapol ashinshamena a Yehova nlel, amband awiy adia avud.​—Kus. 68:11. w21.02 12-13 par. 21-23

Kambuy Paul watushila chilakej chiwamp cha kutakaman ni kujijaman. Waziya yisu yimwing. Pakwez, watwisha kwiman dang mulong wamuchingejina Yehova chakwel amwinkish usu wa kujijaman. (2 Kor. 12:8-10; Fil. 4:13) Niyetu tukutwish kwikal nich usu wa kujijaman ni kutakaman anch twitiy nich kwikepish anch tukwet kuswir kwa ukwash wa Yehova. (Jak. 4:10) Tufanyidin kwikal nich kashinsh anch yikokujol turishina nich kadiap Yehova utupupina. Mwin kwilej Jakobu utwinkishin kashinsh anch: “Muntu anch amwoz, kangal walond anch: ‘Nzamb wangoza.’ Mulong Nzamb kakumwozangap nich kuyip, niyend Nzamb kakumwozap muntu.” (Jak. 1:13) Anch twikal nich kashinsh kinak, tukumusejin nakash Tatukwetu wa rukat udia mwiur. Yehova “kakukarumukangap.” (Jak. 1:17) Wayikwasha in Kristu a mu mivu chitot yakusambish chisu charishau ni yikokujol, ni ukutukwash kand niyetu nlel. Mwita Yehova nich muchim wey wawonsu chakwel akukwash kwikal nich manangu, ritiy, ni kutakaman. Ukwakul malembil mey. w21.02 31 par. 19-21

Ukutwish kumukasikesh mwin kwilej wa Bibil wasambishina kal kukumangan kusutin dandamen kumubangin. (Fil. 2:4) Pakad kufil kwijik nsangu jend ja ujindj, ukutwish kumujikitish mulong wa kuswimp kusadinay, ni kumwipulaku nsangu piur pa dilejan diend dia Bibil, dijuku diend, ni piur pa mudimu usadiningay. Kusal mwamu kukutwish kusal anch akwijidin. Anch wata uruund ni mwin kwilej wa Bibil, ukutwish kumukwash kuya kurutu ni kushiken ku dibatish. Anch mwin kwilej wadandamen kuya kurutu, mukwasha chakwel iyova anch kadiap ngendj mu chikumangen. Ukutwish kusal mwamu kusutil kumutazuk ku chikumbu. (Heb. 13:2) Anch mwin kwilej wikal mwin kulejan wakad kal kubatishau, ukutwish kusambish kulejan nend pamwing. Diego, mwin kulejan udia mwi ngand ya Brezil ulondin anch: “Akadivar avud ansendang mu mudimu wa kulejan. Kusal mwamu kwankwasha kuyijik nawamp. Nileja yom yivud nakash kusutil akadivar inay, ni namusejina Yehova ni Yesu piswimp.” w21.03 12 par. 15-16

Yesu wayileja in kwilej end anch afanyidin kuyikat akankuny nau. (Mat. 5:44, 45) Ov, chiswapel kusal mwamu? Bwat! Pakwez tukutwish kusal mwamu ku ukwash wa spiritu utumbila. Mu dibuj dia spiritu mud rukat, kushimpish muchim, kudimuk, kwitudish, ni kwilam. (Gal. 5:22, 23) Mikadil yiney yikat kutukwash kujijamen rukis. Kud in kutupompat avud ashikedina kal kukarumuk mulong nfumwend, mukajend, mwanend, ap mutej nend wamekesha mikadil yiney ya winzamb. Ni kud kand antu avud ading kutupompatang adia nlel unou akadivar ni anambaz netu. Chawiy, anch umen anch chikukasikedin kuyikat antu akukisina mulong umusadidin Yehova, mwita Yehova akwinkish spiritu wend utumbila. (Luka 11:13) Ni ikal nich kashinsh anch jinjil ja Yehova jiding yisu yawonsu jiwamp. (Jnsw. 3:5-7) Rukis rikutwish kwikal ni usu ni kutusal nayimp, pakwez rukat rikwet usu nakash kusutamu rukis. Rukat rikat kumuswimp muntu ni rikat kusangaresh muchim wa Yehova. Pakwez ap anch akankuny netu adandamen kutukis, tukutwish kudandamen kusangar. w21.03 23 par. 13; 24 par. 15, 17

Muprofet Jowel wading wisambidin piur pa kurishikish kwa amasalay. (Jow. 2:1, 8, 11) Yehova walonda anch ukusadin “yisak ya njit” (amasalay a in Babilon) mulong wa kuyipup in Isarel abwambwila. (Jow. 2:25) Choviken patok mulong wak ayitazukin amasalay inay anch “adiokila kwiyand” mulong in Babilon afanyina kudiokal kwiyand mulong wa kukwat Isarel. (Jow. 2:20) Amasalay inay ayifanikeshin nich chisak cha ampasu atenchikinau nawamp. Jowel ulondin piur pa amasalay inay anch: ‘Isalay mwawonsu udandamedin mu weny wend. . . . Akat kuwil mu musumb, . . . chad asutil mu tupend andam mu yikumbu mudi aij.’ (Jow. 2:8, 9) Ov, ukutwish kutongin mutapu wasadika yom? Amasalay adi ndond jawonsu. Kwikil ndond ja kujingamin. Kwikil muntu ukutwisha kukwasinik kwi mpak ya musamun ya in Babilon! Mudi ampasu, in Babilon (ap, in Kalidey) ashesha musumb wa Yerusalem mu muvu 607 K.C.C. Bibil ulondin anch: “Mwant wa in Babilon. . . . Kwikil ap kusu umwing washay, ap ansand, ap ayangadim, ap amakurump, ap amapal.”​—2 Jsng. 36:17. w20.04 5 par. 11-12