Ngond wa 2

Ileja kuyijik nawamp akadivar ni anambaz ney. Ambamb nau kurutu yikumangan yisambisha ni kupwa kwa yikumangan, lejan nau pamwing ni anch chitwishikin yitazuka chakwel udia nau kwol kwey. Anch wasal mwamu, ukutwish kushimwok. Chilakej ukutwish kujingunin anch nambaz umekening mudi kakatiningap kuta urund nau akwau uding kwend muntu wakad kulondolang, mukadivar utongidining anch ukatining nakash yom ya ku mujimbu uding mwin kwakan, ap dijuku dikata kuswinkan yisu yawonsu ku yikumangan dirishin ni rupompat. (Job 6:29) Chakin kamu, tufanyidinap “kwichik pa milong yayen.” (1 Tim. 5:13) Ap mwamu tufanyidin kwijik yom yimwing piur pa akadivar nau anambaz netu ni yom yirishinau nich mu mwom yikweta yibachikin pa wuntu wau. Anch washiken kumwijik mukadivar ap nambaz ukata kukujimesh, ukutwish kwitek pa ndond yend. Chitin kusal usu nakash mulong wa kushiken kuyijik akadivar ney nawamp. Pakwez anch wasadin chiyul cha Bibil cha kwazuril muchim wey, umekeshin anch umwimburijin Yehova uyikatina “antu a mitapu yawonsu.”​—1 Tim. 2:3, 4; 2 Kor. 6:11-13. w20.04 16-17 par. 10-12

Uchuku wa nsudien wa mwom wend wa panap pa divu, Yesu wayivurisha in kwilejend anch afanyidin kukatijan umwing ni mukwau. Yesu wading wij anch rukat rikurikina rikuyikwash in kwilejend kwikal mu uumwing ni kujijamen rukis ra mangand. Shinshikin chilakej cha chikumangen cha mu Tesalonik. Asambisha kuyipompat akadivar kudiokal kamu chisu chasambisha chikumangen chinech. Pakwez akadivar ni anambaz inay asha chilakej chiwamp, mulong ashala ashinshamena ni adandamena kukatijan. (1 Tes. 1:3, 6, 7) Paul wayikasikesha kudandamen kumekesh rukat “kakwau ni kakwau.” (1 Tes. 4:9, 10) Rukat rafanyina kuyibachik kuyikasikesh ni kuyikwash aziyina. (1 Tes. 5:14) Akadivar aziyina umutakel wa kambuy Paul, mulong mu mukand wend wa kaad wafunday kupwa kwa muvu piswimp umwing, Paul wayileja anch: “Rukat ren riukwetany kudi muntu ni mukwau rikat kuya ni kujimb kand pakach penen awonsu.” (2 Tes. 1:3-5) Rukat radingau nich rayikwasha kujijamen yakamish yikash ni rupompat. w21.03 22 par. 11

Anch tukatin kutambul difut dia mwom wa chikupu, tufanyidin kutond kubambil kwa win Kristu, charumburik anch njil ya mwom. (Mid. 20:24; 1 Pita 2:21) Pakwez Satan nau antu alondwila chilakej chend akatin anch etu tutond njil yindj; akatin ‘tudandamen kubambil nau.’ (1 Pita 4:4) Akat kusip njil ya mwom tutondila ni akat kulond anch njil yatondilau kal awiy yipandaken kuwap ni yiletin want ipau. Pakwez idimbin. (2 Pita 2:19) Chidi cha usey nakash mud ik kutond njil yiwamp! Satan ukatin anch etu awonsu tulik kulondul njil yiwongina “yitwadila ku mwom” ni ukatil anch tulondul njil yibwabumukina yilondwilau antu avud mu mangand minam. Mwi njil yiney mudi antu avud ni yiswapel kwendil. Pakwez ‘yitwadil ku disheshik.’ (Mat. 7:13, 14) Mulong wa kushal mwi njil yiwamp ni kulik kupumbuk, tufanyidin kumuchingejin Yehova ni kumutesh ndiy. w20.04 26 par. 1; 27 par. 5, 7

Mu mivu yasutang ey, Risi ni jingand jimunungina chikas andamin niyawiy kand mwi “ngand Yipandikena Kuwap.” (Dan. 11:41) Mutapu ik wandaminau? Mu muvu wa 2017, mwant winou musu wa kwiyand wakangeshin mudimu wa atushalapol a Yehova ni wayitekin akadivar ni anambaz netu amwing mu rukan. Wakangeshin kand mikand yetu, kuwejinaku La Bible. Traduction du Monde Nouveau. Chikwau kand, watambwil ku usu biro wetu wa mutiy, Yot ya Want ni Yot ya Yitentam yidia mu Risi. Kupwa kwa yom yiney kusadik, mu muvu wa 2018 Chisak Chitakedila chajingunin patok anch Risi ni jingand jawonsu jimunungina chikas awiy adia mwant wa kwiyand. Chawiy, ap anch atushalapol a Yehova ayizengolap nchik nakash, alikining kwiyandjik mu yisak yawonsu yikata kurish mulong wa kuswimp maguvernema ma antu. Pakwez, alondwiling chiyul cha Bibil chilondina piur pa kuyilembil “awonsu adia mu jindond ja piur,” pakampwil chisu chikwatinau antu mudi inay mipak yikutwisha kwikal ni chibachikin pa want ipetu wa kumwifukwil Yehova. w20.05 14 par. 9

En anvaj, anch ukimbinany anch anen ikala nich kashinsh anch yom yifundishinay Bibil yidi yakin, ijikany anch akwet kuswir kwa kwikal ni urund wa piswimp ni Nzamb ni kwikal nich kashinsh anch yom yifundishinay Bibil yidi yakin. Anch ukatin kuyifundish aney uyakin piur pa Nzamb, ufanyidin chakusambish ey amwiney kwikal chilakej chiwamp kusutil kwikal ni chaku cha kwilej Bibil. Ufanyidin kwitekin chisu cha kutongijokin pa yom wilejina. Kusutil kusal mwamu, ukutwish chad kuyifundish aney chakwel niyau akwimburij. Ufanyidin kuyifundish aney mutapu wa kusadin yamu ya kwilej nich Bibil, mudi in kwilejey a Bibil. Mwamu Ukuyikwash aney kumukat Yehova ni ‘kashalapol ushinshamena ni kubabal’ udia njil yisadidinay Yehova mulong wa kutwinkish yakudia ya mu spiritu. (Mat. 24:45-47) Kangal wimen kwey ching pa kuyifundish aney uyakin wa pa dishin wa Bibil. Yikwasha kand kukasikesh ritiy rau kusutil kuyifundish ‘yom yikurikina ya Nzamb’ kukwatijan ni mivu yikwetau ni ukaliweny wau.—1 Kor. 2:10. w20.07 11 par. 10, 12-13

Antu inch akad kuwanyin asangaredina urund wa piswimp ni Yehova nlel? Adi mamiliyon mavud. Urund winou utwishikin mulong wa ritiy rikwetau mu chakupesh cha difut dia Yesu. Kusutil difut dined, Yehova ukat kwitiy nich rukat anch twipan kudi ndiy ni kutambul dibatish. Anch twasal yom yiney ya usey tukwibomb ni mamiliyon ma in Kristu ipanina kal ni abatishinau kal asangaredina ‘urund wa piswimp’ ni Muntu upandikena kujimb mu mangand mawonsu! Mutapu ik tukutwisha kumekesh anch tukwatin nich usey urund wetu wa piswimp ni Nzamb? Mudi mwashalau Aburaham ni Job ashinshamena kudi Nzamb mu mivu chitot ni kusut, tufanyidin niyetu kushal ashinshamena—chikalap nchik uvud wa mivu twamusadidina kal Yehova mu mangand minam mayimp. Mudi Daniel, tufanyidin kukwat nich usey nakash urund wetu wa piswimp ni Yehova kusutamu mwom wetu. (Dan. 6:7, 10, 16, 22) Kusutil ukwash wa Yehova, tukutwish kujijamen yoziu yin yawonsu tukutwisha kurish nich ni mwamu tukutwish kulam urund wetu wa piswimp ni ndiy.​—Fil. 4:13. w20.05 27 par. 5-6

Mwant David wamumana mband wayen ukat kowal mem. Ndiy wading wij nawamp mbil ya Nzamb yilondina anch: “Kangal wikal ni ris kwi mband wa mukwen.” (Kub. 20:17) Pakwez, chakin kamu wadandamena kumukendjik. Kupwa muchim wend wikala waurikina, ku mutambu umwing wikala ni yovil yiyimp piur pa Batisheba ni ku mutambu ukwau wading ni yovil ya kumusangaresh Yehova. Ap anch David wamukata Yehova ni kumwov wom mu mivu yivud, pakwez waziyina ku yovil yend ya choy. Mulong wa yovil yiney ya choy, David washikena kusal yom yiyimp. Ni wasaadikisha dijin dia Nzamb. Kupwa David wayimeshikisha kand antu akad mulong mar, kuwejinaku kand ni dijuku diend. (2 Sam. 11:1-5, 14-17; 12:7-12) Yehova wamupupa David, ni wachirishirila urund wend uwamp ni Yehova. (2 Sam. 12:13; Kus. 51:2-4, 17) David wavurika milong ni mar mamushikena chisu chalikidilay muchim wend kwikal waurikina. Tukutwish kand kulond mu mutapu ukwau mazu madia mu Kuseng 86:11 anch: ‘Nginkisha muchim wakad kwaurik.’ Ov, Yehova wamukwasha David kwikala ni muchim ubombakena, ap wakad kwaurik? Mwaning, mulong Mazu malonday Yehova piur pa David mamulejen mudi muntu wading ni ‘muchim wa kabuj kudi Yehova Nzamb wend.’​—1 Ant 11:4; 15:3. w20.06 11 par. 12-13

Bibil ufanikeshin rukat ra Yehova mulong wa antu end ni moj. Mu mutapu ik ufanikena rukat ra Yehova ni moj? Shinshikin chilakej ech: Tongin bil mudi wajiy kal mu karung ukweta mambek nakash ni kupwa muntu kanang wakudjibwil mbemb wa pa mem (gilet de sauvetage). Chakin kamu ukusanger nakash ukwash winou mulong ukukukwash chakwel upempam. Pakwez kupwa kwa kwikal ni mbemb wa pa mem, chitin kand chom chikwau mulong wa kupand. Mulong mem matalel nakash, chawiy ukutwishap kupand anch wandaminap mu waat. Ukuswiriken anch muntu kanang akudjibwil moj ni akupwit chakwel wandam mu waat. Mudi mulejenay Yehova mu mufund wa nlel, ‘wadandamena kuyipwit’ nich rukat in Isarel apumbuka. Winou wawiy mutapu wiyovilay Nzamb nlel piur pa antu alikina kal kumusadin ni arishina ni milong yikash ni yakamish. Ukatin anch antu inay ijik anch uyikatin ni ukatin kuyikwash chakwel achirik kudi ndiy. Ni Yehova ukutwish kukusadin ey chakwel ayimekeshin antu inay rukat riner. Chidi cha usey nakash kuyinkish antu alikina kal kukumangan ni kusal mudimu wa kulejan kashinsh anch Yehova uyikatin, ni anch niyetu tuyikatin. w20.06 27 par. 12-13

Chisu chamujipau mwin kwilej Stefan, in kwilej avud achina mu musumb ni “achinyina djimu mu makunku ma ngand ya Yudeya ni ya Samaria,” akwau aya kulemp mud ku Shipre ni ku Antiosh. (Mid. 7:58–8:1; 11:19) Ukutwish kutong mutapu wamanau in kwilej inay mar. Pakwez alejana rusangu ruwamp kwi ndond kwawonsu kwayau, kwikala yikumangen kwi ndond jivud mu Rom. (1 Pita 1:1) Kupwa kwa yiney arisha kand ni yisu yikwau ya mar nakash. Chilakej, piswimp mu muvu wa 50 C.C., Kulod Mwant wa in Rom wayileja in Yuda awonsu kudiokal mu Rom. Chawiy chading chiyitin in Kristu ading mu Rom kusha yikumbu yau ni kukimb kwi ndond kwa kuya. (Mid. 18:1-3) Piswimp mu muvu wa 61 C.C., kambuy Paul wafunda anch anamakwend in Kristu ayikwatisha usany mukach mwa antu, ayiteka mu rukat ni ayitambula yom yadingau nich. (Heb. 10:32-34) Mud muchading kud antu awonsu, in Kristu niyau afanyina kurish ni uzwendj ni mayej.​—Rom 15:26; Fil. 2:25-27. w21.02 26-27 par. 2-4

Anch twasal usu wa kukasikesh ritiy retu, Satan ap antu atakedilay kakutwishap kutukangesh kwendil mu uyakin. (2 Yoh. 8, 9) Tufanyidin kwijik anch mangand makutukis. (1 Yoh. 3:13) Yohan utuvurishin anch: ‘Ngand yawonsu yidi mu ulabu wa muyimp.’ (1 Yoh. 5:19) Pasejina kamu mangand minam kwinsudiel, ujim wa Satan uyil mu kupandakan nakash. Kakatap kusadin ching kusu kwend kurishikish kwakad kumekan patok, mud masandj ap mafundish ma in kupumbok, pakwez ukat kusadin kand kurishikish kumekena patok, mud rupompat ra chisum. Satan wij anch ukwet chisu chikemp nakash chimushadinaku mulong wa kupakish kwimik mudimu wa kulejan ap kuziyish ritiy retu. Chawiy, chidiap cha kushimok pa kuman anch mudimu wetu wa kulejan akat kuukangesh mu jingand jivud. Ap mwamu, akadivar nau anambaz netu ashicha mu jingand jinej adandamedin kujijaman. Akat kumekesh anch chikalap nchik yom yisadinay Satan pantaliken nau atushalapol a Yehova, tukutwish kudandamen kushal ashinshamena! w20.07 24 par. 12-13

Yehova wakata anch antu ashakam chikupu pa divu, ndond yipandikena kuwap yatangay. Pakwez, Adam ni Ev amubwambwila Tatukwau wa rukat ni chinech chaletisha chitil ni rufu mu mangand. (Rom 5:12) Mutapu ik wasalay Yehova? Pakad kulab, Yehova watenchika mutapu wa kuyipandish antu. (Dis. 3:15) Yehova watenchika kumupan Mwanend mudi chakupesh cha difut mulong wa kuyikwash an a Adam ni Ev kukwolik ku chitil ni ku rufu. Kusutil kusal mwamu, antu awonsu afanyina chadi kwikal ni mutapu wa kutond kumusadin Yehova ni kutambul mwom wa chikupu. (Yoh. 3:16; 1 Kor. 15:21, 22) Chisu chikuvumbulay Yehova mamiliyon ma antu kusutil Mwanend, chimeken anch antu awonsu kakezap kuvumbuk pa chisu chimwing. Mulong wak tulondina mwamu? Mulong anch chasadik mwamu, pa divu pakwikal runtu ripandakena kuvul nakash, ni chimeken anch chinech chikuletish kanvundangesh pa divu. Pakwez Yehova kakusalangap ap pakemp yom nich kanvundangesh. Mulong wij anch pakwel anch chisambu chidandamen kwikalaku, chitin kusal yom pakad kanvundangesh.—1 Kor. 14:33. w20.08 14 par. 3; 15 par. 5

Mwin kwilej ufanyidin kwijik anch chitongijok cha dilejan diend dia Bibil chidi cha kumukwash kumusadin Yehova mud Kaman wa Yehova. Mwin kwilej wa Bibil muwamp ukutwish kuwanyish yitinau pakemp pakemp chakwel ashiken ku dibatish! Chakusambish, mwin kwilej ukat kumwijik Yehova, kumukat ni kukudish ritiy mudiay Ndiy. (Yoh. 3:16; 17:3) Kupwa ukat kuta urund pamwing ni Yehova ni kukumangan pamwing nau akadivar ni anambaz mu chikumangen. (Heb. 10:24, 25; Jak. 4:8) Kupwa kand mwin kwilej ukat kulikap yisal yiyimp ni kukarumuk ku yitil yend. (Mid. 3:19) Mu kusut kwa chisu, ritiy rend rikutwish kumubachik kuyilej antu akwau uyakin wijay. (2 Kor. 4:13) Disudien ukat kwipan kud Yehova ni kutambul dibatish. (1 Pita 3:21; 4:2) Dichuku dinidia, diding dichuku dimwing dia musangar nakash! Patumena mutapu uwanyishinay mwin kwilej nzau jinej pakemp pakemp, tufanyidin kumujikitish ni muchim wawonsu ni kumukasikesh kudandamen kuya kurutu. w20.10 17-18 par. 12-13

Anch wasambish kwiyisikesh nau antu akwau adia mu chikumangen, ukutwish kusambish kutong anch ukwetap kwey usey mu chikumangen. Antu amwing mu chikumangen akutwish kwikal ni ukaliweny wa kufundish, akwau akutwish kwikal nich ukaliweny wa kutenchik nawamp yom, ni akwau kand akutwish kwikal nich ukaliweny mu mudimu wa ukafung. Pamwing ap ukutwish kwiyov anch akwen akwet ukaliweny nakash kukusutamu ey. Kwiyov mwamu kumekeshin anch udi muntu wikepishina ni wij mimbu yey. (Fil. 2:3) Pakwez ufanyidin kubabal. Anch wikal ni chaku cha kwiyisikesh nau antu akweta ukaliweny nakash, ukutwish kwiziyish amwiney. Mudi mutapu wafunday Paul, ukutwish kand kushiken ku kwiyov anch ukwetap ndond mu chikumangen. Yehova wayinkisha in Kristu amwing a mu mivu chitot ya kusambish yiyukish yidiokila ku spiritu utumbila, pakwez in Kristu awonsu katambulap yiyukish ya mutapu umwing. (1 Kor. 12:4-11) Pakwez in Kristu awonsu ading a usey. Nlel unou tukatap kutambul yiyukish yidiokila ku spiritu utumbila mu chilay. Pakwez uyakin udi anch, mudi mutapu yasadika mu mivu chitot ya kusambish, etu awonsu tukutwishap kwikal ni ukaliweny wa mutapu umwing, pakwez etu awonsu tukwet usey ku mes kwa Yehova. w20.08 23 par. 13-15

Anch wamulembil Yehova chakwel akwinka kutakaman, Yehova ukwakul ku malembil mey ni kakutwishap kukulik. (Mid. 4:29, 31) Ukwikalaku chisu chawonsu mulong wa kukukwash. Tongin pa mutapu wakukwashay chakwel upandikana yakamish yey ni mutapu wakukasikeshay chakwel uswimpa mwom wey. Chakin kamu, Nzamb wayikwasha antu end kwauk Karung Musuz ukutwish kukukwash kand niyeyey chakwel wikala mwin kwilej wa Kristu. (Kub. 14:13) Ikal nich kashinsh mudi nfund a kusend walonda mazu ma mufund wilel. Yehova ukutwish kand kuyikwash in kulejan achidia kal asu chakwel ikal atakamena. Shinshikin yom yamushikena nambaz Tomoyo. Pakokalau ku chikumbu chakusambish padingau mu mudimu wa kulejan wa ku chikumbu ni chikumbu, mwin chikumbu wayakula anch: “Nikatinap kwambamb ni Atuman a Yehova!” Kupwa wapata chis ni usu. Nich kutakaman, Tomoyo wamwipula nambaz wadingay nend mu mudimu wa kulejan anch: “Wateshang yalondangay? Ap anch nalondangap kwam dizu, pakwez wanjinguninang anch nidi Kaman wa Yehova. Yom yiney yansangaresh kal nakash!” Nlel unou, Tomoyo udi chibol wa rawonsu. w20.09 6 par. 13-14

Asa wayileja antu anch Yehova ndiy “[wayinkisha] chisambu ku mitambu yawonsu.” (2 Jsng. 14:6, 7) Mwant Asa katongap anch chisu chinech cha chisambu chading chisu cha kwiswedish. Pakwez, wasadina chisu chinech mulong wa kutung misumb, mbumbu, yimet, ni yis. Wayileja antu a mu Yuda anch: “Ngand yidi iyetu.” Yom ik yafilay kulond Asa? Wading ufidin kuyilej antu anch mwi ngand mwikil muntu ukutwisha kuyikangesh kwend ap kuyikangesh kutung. Wayikasikesha antu chakwel asadin nawamp chisu cha chisambu. Mwant Asa wasadina kand chisu chend cha chisambu mulong wa kurijek chisak chend cha amaslay chakwel chikal ni usu. (2 Jsng. 14:7) Ov, kusal mwamu kumekeshin anch kadingap kamuchingejidina Yehova? Bwat. Pakwez, mulong wading mwant, Asa wading wij anch chidi chisend chend cha kuyirijek antu chakwel atwish kurish ni milong yikuyishikena kurutu. Asa wading wij anch chisu cha chisambu chikushakamap chikupu, ni mwawiy kamu mwasadika yom. w20.09 15 par. 4-5

Mukurump akutwish kutong anch akwet usu wa kutek mbil jimenay anch jikuchidij amikoku a Nzamb. Pakwez, kud kand kushalijan kujim pakach pa ulabu ukwetay mukurump ni ukwetay ntakel wa dijuku. Chilakej, Yehova wayinkisha amakurump chisend cha kurumburish ni cha kwopat mu chikumangen antu asadina yitil akad kukarumuk. (1 Kor. 5:11-13) Ku mutambu ukwau, Yehova wayinkisha antakel a majuku ulabu wa kusal yom yimwing, pakwez amakurump bwat. Chilakej, wamwinkisha ntakel wa dijuku usu wa kutek mbil ni kushinshikin anch antu a mu dijuku diend ajiziyidin. (Rom 7:2) Ntakel wa dijuku ukwet ulabu wa kuyitekin anend mbil piur pa chisu chifanyidinau kuchirik ku chikumbu uchuku. Ukutwish kand kuyipup anend anch alik kuziyin kwi mbil jinej. (Efes 6:1) Pakwez, ntakel wa dijuku ukweta rukat ukat kwisamb bil ni mukajend kurutu kwa kutek mbil ku chikumbu, mulong awonsu aad asadin “muntu umwing.”​—Mat. 19:6. w21.02 16-18 par. 10-13

Diyingishin dimwing dimekeshina anch uyakin udia mu Dizu dia Nzamb udi wa usey nakash didi anch, Yehova ukat kumekesh uyakin winou ching kudi antu ikepishina adia mu ‘mwikadil ufanyidina.’ (Mid. 13:48) Antu ikepishina itiyining anch Nzamb ukat kumusadin kashalapol ushinshamena ni kubabal chakwel atufundisha uyakin udia mu Bibil mu chirung chetu. (Mat. 11:25; 24:45) Tukutwishap kwijik uyakin winou pakad ukwash wa kashalapol, ni chidi cha usey nakash kwijik uyakin winou. (Jnsw. 3:13) Yehova watwinkishin kal kand dilau dia kuyifundish antu akwau uyakin piur pend ni piur pa rusot rend. (Mat. 24:14) Uruu tukata kulejan udi wa usey nakash, mulong uyikwashining antu chakwel ikala mu dijuku dia Yehova ni uyinkishining kand mutapu wa kutambul mwom wa chikupu. (1 Tim. 4:16) Twikala ni mutapu wa kulejan nakash ap bwat, etu awonsu tufanyidin kwijik anch tunungin chikas ku mudimu wa usey nakash usadikina nlel unou. (1 Tim. 2:3, 4) Dilau dia usey mudi ik twitapidila dia kwikal ambay a mudimu a Nzamb!​—1 Kor. 3:9. w20.09 26-27 par. 4-5

Pading payilay ku Rom, tupamp tuvud, kambuy Paul watambula ukwash wa Yehova kusutil ambay nend in Kristu. Chilakej, arund aad ashinshamena a Paul, Aristarik nenday Luka, akwata mupak wa kumutwalaku Paul ku Rom. Itiya kutek mwom wau mu ubaj mulong wa kuya pamwing ni Paul, ap anch kadingap nich kashinsh anch akutwish chakin kamu kushik ku Rom. Ching kusu kupwa kwa kwend chikunku chilemp mu weny winou wa mar, pawiy lel chad pijikau anch komb akushik nawamp. Pashikau mu musumb wa Sidon, Julius wamwitiya Paul “kuya kuyilangwish arund nend.” (Mid. 27:1-3) Kupwa, pashikau mu musumb wa Puzol, Paul ni arund nend ‘atana anamakwau in Kristu, awiy ayita chakwel ashakama nau rubing rumwing.’ Pezau in Kristu inay mulong wa kumuletin Paul ni arund nend yom yading yiswirikedinau, pakad kwidjidjek, Paul wayikasikesha akadivar inay kusutil kuyilej yom yamushikena.​—Ilakej ni Midimu 15:2, 3. w20.11 15-16 par. 15-17

Anvaj, yifundishany anen kusutil mazu men ni yisal yen anch umukatinany nakash Yehova. Ijik anch chipan chijim ukutwisha kuyinkish aney kudi kuyikwash kumukat Yehova. Ni chidi cha usey nakash kuyifundish mutapu wa kulam yaku yiwamp ya mu spiritu mudi kwilej Bibil, kulembil, kukumanganang, ni kusal mudimu wa kulejan. (1 Tim. 6:6) Chidi chakin anch ufanyidin kuwanyish maswir ma kumujimbu ma aney. (1 Tim. 5:8) Pakwez, ijik anch aney akupand kwinsudiel kwa mangand minam ni kwandam mwi ngand yisu mulong wa urund wau wa piswimp ni Yehova, kidiap mulong wa yom ya kumujimbu. (Ezek. 7:19) Chisangareshin nakash kuman anch anvaj in Kristu avud akat kukwat mipak yiwamp ya mu spiritu mulong wa kuyikwash anau kwikal ni urund wa piswimp ni Yehova! An akata kupamin mu majuku ma mutapu winou, akat kudandamen ni yaku yiney yilejau anch apam, ni kakatap kwinan mulong wa mutapu wayililau kud anvajau!​—Jnsw. 10:22. w20.10 28-29 par. 10-11

Yisu yimwing, kambuy Pita wasala ap kulond yom yashikena ku kumunenganesh. Chilakej, Yesu payilejay atwimbuy end anch akumumesh mar ni kumujip, Pita wamukanda kusutil mazu ma mufund wa nlel. (Mat. 16:21-23) Kupwa Yesu wamukwasha kuswimp yitongijok yend. Peza chisak cha antu mulong wa kumukwat Yesu, kapamp kamwing Pita wapwita mpak, wamukatul kashalapol umwing wa mwin kupesh mujim ditu. (Yoh. 18:10, 11) Yesu wamuyula kand Pita. Chikwau kand, Pita wibaza anch ap anch atwimbuy akwau amuchin Yesu, ndiy kakutwishap ap pakemp kusal mwamu! (Mat. 26:33) Pakwez, kiwawiyap mutapu wasadika yom, Pita wova wom wa antu ni wamutuna Nsalejend tupamp tusatu. Pita waziya nakash ni “wabudika, wasambish kudil mansoj nakash.” (Mat. 26:69-75) Pamwing ap wiyipula anch Yesu ukutwish kumulikishin. Pakwez, Pita kalikidinap chakwel kuziy kumukangesh kumusadin Yehova. Kupwa kwa kwipwakal, wasala usu wa kuswimp ni kupwa wadandamena kumusadin Yehova pamwing ni atwimbuy akwau.​—Yoh. 21:1-3; Mid. 1:15, 16. w20.12 20-21 par. 17-18

Ntakel wa dijuku ukutwish kumekesh kwikepish mu mitapu yivud. Chilakej, kakatap kuchingej anch mukajend ap anend asala yom mu mutapu uwanyidina. Ukat kutesh ni kushinshikin yitongijok ya antu a mu dijuku diend ap anch yikwatijadinap ni yitonginay ndiy. Chikwau kand, ikundj wikepishina ukat kusal midimu ya ku chikumbu kwa kwikatin, ap anch kwi ndond kushichay antu akat kutong anch yiney yid midimu ya amband. Kusal mwamu kuswapelap. Mulong wak? Nambaz Rachel ulondin anch: “Kwi ndond nadiokala, anch ikundj wamukwash mukajend kowish malong ap kukomb mu chikumbu, amutej ni anamakwend akwiyipul anch ‘winou ud ikundj wa mutapu ik.’ Akutong anch amukandamin kal kud mukajend.” Anch mwawiy mutonginau antu kwi ndond ushicha, vurik anch Yesu wayowisha in kwilejend ku mend ap anch mudimu winou ading aumen mud wa atushalapol. Ntakel muwamp wa dijuku kakatap kusal yom chakwel antu akwau amuman anch ukwet ulabu ap anch ud wa usey nakash, pakwez ukat kusal yom mulong wa kumusangaresh mukajend ni anend. w21.02 2 par. 3; 4 par. 11

Ukaliweny wa kuvurik yom yikur chidi chipan chidiokila kud Yehova, pakwez ap anch pakur twading ni mashakamin mawamp nakash, makutwishap kusutamu mashakamin tukwikala nich mwi ngand yisu. Antu akwau akutwish kuturumbukin, pakwez anch twalikishin, tukudandamen kumusadin Yehova nawamp. Kwifish nich kusutina chipim kukutwish kutukangesh kumusadin Yehova nich musangar. Pakwez, mud kambuy Paul, tufanyidin kwikal nich kashinsh anch Yehova watulikishidin kal. (1 Tim. 1:12-15) Tukwet ruchingej ra mwom wa chikupu. Ni mwi ngand yisu, tukuvurikap kand yom yiyimp yatunenganeshang. Bibil ulondin piur pa chisu chinicha anch: “Yom yawonsu ya pakur akez kayivuramen.” (Isay 65:17) Tong bil: Amwing pakach petu ananapin kal mu mudimu wa Yehova, pakwez mwi ngand yisu akwikal kand ansand. (Job 33:25) Chawiy, komb tukwatany mupak wa kulik kushinshikin nakash pa yom yikur. Pakwez, tushinshikinany mes pa yom ya kurutu yituchingedina! w20.11 24 par. 4; 29 par. 18-19

Yom ik tuchingedina kurutu oku? Chisu cha mar makash, Yehova ukuyipandish atushalapol end mu mitapu yaad yishimokishena. Chakusambish, ukuyipandish atushalapol end ashinshamena chisu chikuyibachikay ant a mangand minam kumushesh Babilon Mujim, ditenchik dia relijon wa makasu. (Kuj. 17:16-18; 18:2, 4) Kupwa ukuyipandish atushalapol end chisu chikusheshay yikunku yikwau ya mangand minam ma Satan kwi njit ja Harmagedon. (Kuj. 16:14, 16) Anch twashal piswimp ni Yehova, Satan kakutwishap kutumesh mar ma chikupu. Pakwez, ndiy ukusheshika rawonsu. (Rom 16:20) Chawiy komb, djal yom yawonsu yakurish nich njit​—ni kangal wayidjol! Kangal wapakish kurish diamwiney. Yikwasha akadivar ni anambaz ney ni londul umutakel upaninay Yehova. Anch wasal mwamu, ukwikal nich kashinsh anch Tatukwey wa rukat udia mwiur ukukukasikesh ni ukukuchidij.​—Isay 41:10. w21.03 30 par. 16-17

Mutapu ik tukutwisha kumekesh anch tumuchingejidin Yehova? Kusutil kusadil umutakel utwinkishinay. Mu Bibil mud nsangu jivud jimekeshina anch chid cha usey kwikuchik ni kumuchingejin Yehova. Piwilejina nsangu jinej, shinshikin yom yayikwasha atushalapol a Nzamb kwikuchik payipompatau. Chilakej, atwimbuy kwovap wom chisu chayikangeshau kulejan ku dirumburish dijim dia in Yuda. Pakwez, alonda nich kutakaman anch: “Tufanyidin kumuziyil Nzamb kupandakan kuyiziyil antu.” (Mid. 5:29) Ap kupwa kwa kuyibul nfimbu, atwimbuy kwovap wom bwat. Mulong wak? Mulong ading ij anch Yehova uyikwashin. Amusangaresha Yehova. Chawiy chadandamenau kulejan rusangu ruwamp. (Mid. 5:40-42) Chilik chimwing, pakimbau kumujip Stefan, walama chisambu ni kwikuchik, ni mpal yend yamekana “mudi ya muruu wa mwiur.” (Mid. 6:12-15) Mulong wak? Mulong wading nich kashinsh anch ukwet dilau dia Yehova. w21.01 4 par. 10-11

Chinech chirumburikin anch akwet kom kishitwila ni Yehova uyisangaredin. (Isay 1:18) Apanin kal mwom yau kud Yehova ni kuyibatish mud in Kristu, akwet ritiy rikash mu yakupesh ya Yesu ni ad mu urund wa piswimp ni Yehova. (Yoh. 3:36; 1 Pita 3:21) Chawiy, awanyidin kwiman kurutu kwa ditand dia Nzamb mulong wa “kumusadil ndiy muten ni uchuku” panap pa divu mu chipang cha tempel wend wa mu spiritu. (Kuj. 7:15) Ap nlel unou, akat kwipan nich mushiku ni kusal mudimu upandikena kujimb wa kulejan Want ni kwikadish in kwilej, ni akat kutek yisakin ya Want wa Nzamb pa ndond yakusambish. (Mat. 6:33; 24:14; 28:19, 20) Antu adia mu chisak chipandikena kujimb akupanda ku mar makash akwet kashinsh anch Nzamb ukudandamen kuyilam, mulong “Ndiy ushicha pa ditand ukez kashakam nau ni kuyichidij.” Amikoku akwau akuman kuwanyin kwa kushilamu kwading kuchingedinau kudiokal pakur kulondina anch: “[Nzamb] ukez kayikusol mansoj mawonsu ku mes mau.”​—Kuj. 21:3, 4. w21.01 16 par. 9-10

Tukwet musangar wa kwikal mu dijuku dia Yehova, ni tukat kusal usu wa kuyilimish antu inkishay Yehova ulabu wa kutakel. Bibil umekeshin anch Yehova uyikwatin amband nich usey mud amakundj. Chilakej, Bibil ulejen anch mu mivu chitot yakusambish Yehova wazizila spiritu wend utumbila pad amband mud kand mwazizilay pad amakundj mulong wa kuyinkish ukash wa kusal yilay mud kulond mazu kushalijan. (Mid. 2:1-4, 15-18) Awonsu ayizizila many nich spiritu utumbila mulong wa kuyikel ni Kristu. (Gal. 3:26-29) Ikal amband ap amakundj, etu awonsu tukutambul difut dia mwom wa chikupu panap pa divu. (Kuj. 7:9, 10, 13-15) Ni etu awonsu atwinkisha chisend cha kufundish ni kulejan rusangu ruwamp. (Mat. 28:19, 20) Chilakej, mu mukand wa Midimu alejenamu rusangu ra nambaz Prisil. Ndiy ni nfumwend Akila arumburila uyakin mu mutapu wovikena kud Apolo, ikundj umwing wading wilejina nakash.​—Mid. 18:24-26. w21.02 14 par. 1; 15 par. 4

Amakurump, ukwetany chisend chijim nakash cha kuyikwash in kulejan chakwel ikal alej ni in kulejan awamp a Dizu dia Nzamb. Anch mwin kulejan wovil usany wa kutakel dilejan padiay niyeyey, ukutwish kumwit chakwel ey utakel. Amakurump afanyidin kusal usu wa kuyikasikesh in kulejan chakwel adandamen kuya kurutu. (1 Tes. 5:11) Ap anch etu tukwetap dilejan dia Bibil tutakedina mu chisu chinech, pakwez tukutwish kumukwash mwin kwilej mukwau kukul mu spiritu. Kangal walond nakash, pakwez ukutwish kusadin yom warijekang nawamp mulong wa kumukwash mbay ney mwin kulejan chisu chitakedinay dilejan. Tukutwish kuta urund nau in kwilej anch asambish kwez ku yikumangan, ni tufanyidin kwikal yilakej yiwamp yikutwishau kwimburij. Amakurump akutwish kuyikasikesh in kwilej a Bibil kusutil kwitekin chisu cha kwambamb nau, ni akutwish kand kuyikasikesh in kulejan kusutil kuyifumb ni kuyijikitish. Chakin kamu, ov, umenap anch tukusangar nakash pa kwijik anch niyetu twanunginaku chikas, ap kusu kwau pakemp mulong wa kumukwash muntu chakwel amusadin ni kumukat Tatukwetu, Yehova? w21.03 13 par. 18-19

David wamekesha anch wading muntu wakuchingejin mu mwom wend wawonsu. Chilakej, chisu chadingay nsand walamang amikoku a tatukwend. Chinech chading chisend cha ubaj. Dichuku dimwing David wamuleja Mwant Saul anch: “Padingay kashalapol wey ni kulam amikoku a tatukwend, kweza ntambu, kweza kand nnam wa chidiany, wamukwat mukoku mu chisak. Am namulondula, namubul, namukamunina mukoku ku kan kwend.” (1 Sam. 17:34, 35) David wading wij anch ukwet chisend cha kuyichidij amikoku. Akadivar ansand akutwish kumwimburij David anch awanyish nawamp yisend yiyinkishinau. David wakudisha urund wa piswimp nakash ni Yehova. Urund winou wading wa usey nakash kud ndiy kusutamu kutakaman kwadingay nich ap ukaliweny wend wa kubul kadiad. Yehova kadingap ching kusu Nzamb wa David, pakwez wading kand Murund nend—Murund nend wa piswimp nakash. Akadivar ansand, chom cha usey nakash ufanyidinanya kusal kud kukasikesh urund wen wa piswimp ni Tatukwen wa mwiur. w21.03 3 par. 4-5