Ngond wa 3

Tukatiningap kutukis. Tukatiningap anch atumesh mar mulong wa ritiy retu. Chad mulong wak tukutwish kusangar anch atukis? Shinshikin mayingishin masatu. Chakusambish, anch twajijaman, tukat kumusangaresh Yehova. (1 Pita 4:13, 14) Cha kaad, ritiy retu akat kurishitwish ni rikat kukasikan nakash. (1 Pita 1:7) Ni cha kasatu, tukutambul difut dijim nakash​—mwom wa chikupu. (Rom 2:6, 7) Machuku makemp kupwa kwa Yesu kuvumbuk, atwimbuy ova musangar wayilejau kud Yesu. Kupwa kwa kuyibul ni kuyikangesh kusal mudimu wa kulejan, asangara. Mulong wak? “Mulong Nzamb witiya awiy kuman mar mulong wa kumwambat Yesu.” (Mid. 5:40-42) Ading amukatin nakash Nsalejau, chawiy kwovap wom wa rukis ra akankuny nau. Ni amekesha rukat kusutin kulejan rusangu ruwamp “pichuku pichuku.” Nlel akadivar netu avud adandamedin kumusadin Yehova nich kushinshaman chikalap nchik yikokujol. Ij anch Yehova kakutwishap kuvuramen mudimu wau ni rukat rau rimekeshinau mulong wa dijin diend. w21.03 25 par. 18-19

In Kristu azizidilau many kakatap kuvadik ni ruchingej ra kuya mwiur. Nzamb ndiy ukata kuyinkish ruchingej riner. Akat kutongijokin pa ruchingej rau ni kurilembil ni akatin kutambul difut diau mwiur. Kijap mutapu ukwikala mijimbu yau mwiur. (Fil. 3:20, 21; 1 Yoh. 3:2) Pakwez, achingedin kwikal pa jindond jau mu Want wa mwiur. Amikoku akwau achingejin kushakam chikupu pa divu, riner rawiy ruchingej rikatau kuvadik nich antu awonsu. Achingedin dichuku dikukwashau kukarumun divu diawonsu kwikal paradis. Achingedin nich musangar dichuku dikutungau yikumbu yau, dikudimau yir yau ni kulil an akweta ukash wa mujimbu uwanyidina. (Isay 65:21-23) Achingedin kwendangan pa divu mulong wa kutal jindond kushalijan—mikandu, madit, aturung—ni kwilej kand yom yawonsu yatangay Yehova. Pakwez chiyisangareshin kand nakash pa kwijik anch akudandamen kwikal mu urund wa piswimp nakash ni Yehova. w21.01 18-19 par. 17-18

Kupwa kwa in Babilon kushesh musumb, antu afanyina ching kusu kulond anch: “Ngand yiney yikez kikal mudi mpay yakad kushakam antu ap annam. . . . Akez kayipan kudi in Babilon.” (Jer. 32:43) Piswimp mivu 200 kupwa kwa kulejan uprofet wa Jowel, Yehova wamusadina Jeremiy mulong wa kusambel kulejan chom chikwau piur pa kurishikish kwinoku. Walonda anch amasalay afanyina kuyikimb pakemp pakemp in Isarel awonsu ading asadina yom yiyimp ni afanyina kuyikwat awonsu. Yehova walonda anch “‘Am nikez kayitum ayibind au avud kuya kuyikwat antu inay. Chad nikez katum kand ayibind kuyizomb ku mikandu, ni ku yinanginang, ni mu mandam mawonsu ma mayal. . . . Nikez kayifutish tupamp twaad mulong wa kuyip kwau.’” Ap aturung ap madit mafanyinap kutwish kuyijindjik in Isarel akad kukarumuk kudiokal ku chikas cha amasalay in Babilon.​—Jer. 16:16, 18. w20.04 5 par. 12-13

Pa chisu chikash mu mwom wend, Lot kaziyinap swa swa ku umutakel wa Yehova. Etu tukutwish kutong pamwing ap anch Lot kadingap kwend kabanginaku yom yamulejau kusal kudi Yehova, ni ap kand anch wabwambwila. Pakwez Yehova kamulikap bwat. “Mulong [Yehova] wamwovila riy,” angel amukwata ndiy ni dijuku diend ku makas ni ayibudisha pol pa musumb. (Dis. 19:15, 16) Yehova wafanyina kumwovil Lot riy mulong wa mayingishin mavud. Pamwing ap Lot widjidjeka kudiokal ku chikumbu chend mulong wading wovil wom wa antu ading pol pa musumb. Kwading kand ubaj ukwau. Pamwing ap Lot wading wij rusangu ra ant aad awila mu mabuku ma chinat mwi nkurubuk ya Sidim. (Dis. 14:8-12) Mulong wading ngatan ni kupwa tatuku wa dijuku, Lot wafanyina kwiyakamish mulong wa dijuku diend. Chikwau kand, Lot wading mpich, chawiy pamwing ap wading ni chikumbu chend chiwamp mu Sodom. (Dis. 13:5, 6) Chakin kamu, kwikil chom ap chimwing pakach pa yom yiney yawonsu chading chifanyidina kumukangesh Lot kumuziyin Yehova pakad kulab. Pakwez pa ndond pa kushinshikin pa kurumbuk kwa Lot, Yehova wamumana mudi “muntu utentamina.”​—2 Pita 2:7, 8. w20.04 18 par. 13-14

Ansand, chikutwish kwit chisu chakwel antu ading akwija piwadia uchidia kal mwanikanch asambish kukukwat mud muntu mukurump. Ikal nich kashinsh anch Yehova kakumenap mutapu umekena kusu kwey ku mes. Ukwij nawamp ni wij yom ukutwisha kusal. (1 Sam. 16:7) Kasikesh urund wey ni Nzamb. David wasala mwamu kusutil kushinshikin nakash yitang ya Yehova. David watongijokina nakash pa yom yilejay piur pa Sakatang kusutil yitang yiney. (Kus. 8:3, 4; 139:14; Rom 1:20) Chikwau kand, ufanyidin kumuchingejin Yehova chakwel akwinkish usu. Chilakej, ov, ambay ney a ku shikol akat kukusip mulong ud Kaman wa Yehova? Anch mwawiy, mulembila Yehova chakwel akwinkish usu wa kujijaman. Kupwa sadin yiyul yidia mu Dizu diend ni yidia mu mikand ni mu mavideo mimedina pa Bibil. Anch waman mutapu Yehova ukukwashinay kupwish milong yey, chinech chikukukwash kumuchingejin nakash. Anch antu akwau aman anch umuchingejidin Yehova, akukuchingejin. w21.03 4 par. 7

Arund a piswimp akatining kulejijan yitongijok ni yovil yau umwing ni mukwau. Ov, wawiy mutapu tukata kusal mu urund wetu pamwing ni Yehova? Mwaning! Yehova ukat kwambamb netu kusutil Dizu diend Bibil, ni mwinimwa ukat kutulej yitongijok ni yovil yend. Tukat kwambamb nend kusutil malembil, mwinimwa tukutwish kumulej yitongijok ni yovil yetu ya mukach. Mudi Murund wa rukat, Yehova kakatap ching kusu kutesh malembil metu pakwez ukat kumakul kand. Yisu yimwing ukat kwakul pakad kulab. Yisu yikwau chitwitining kudandamen kulembil piur pa mulong kanang. Pakwez, tukutwish kwikal nich kashinsh anch Yehova ukutwakul pa chisu chiwanyidina ni mu mutapu uwamp. Chakin kamu, mutapu ukutwakulay Nzamb ukutwish washalijan ni yom twading tuchingejina. Chilakej, pa ndond pa kudiosh choziu kanang, ukutwish watwinkish manangu ni usu mulong wa ‘kujijaman.’ (1 Kor. 10:13) Mutapu ik tukutwisha kumekesh kujikitish kwetu mulong wa chipan chinech cha usey nakash cha malembil? Mutapu umwing tukutwisha kusal mwau udi kusutil kusadil chiyul cha Nzamb chilondina anch “lembilany kwakad kulik.”​—1 Tes. 5:17. w20.05 27-28 par. 7-8

Antu akata kubambil akat kutal kapamp kamwing mes pansh kurutu kuyilau chakwel kangal ipwakal. Anch awa, akat kulank ni kudandamen kubambil. Akat kushinshikin chakusambish kadiap pa chom chayipwakeshang, pakwez pa mufund wansudien ni pa difut dichingejinau kutambul. Mu kubambil kwetu, tukutwish kuwa tupamp tuvud, kusutil kurumbuk mu mazu ni mu yisal yetu. Ap pamwing ap ambay netu atubambidina nau akutwish kusal yom yikutwisha kutunenganesh nakash. Chinech chifanyidinap kutushimokish. Etu awonsu tudi antu akad kuwanyin, ni tukat kubambil etu awonsu mwi njil yimwing yiwongina yitwadila ku mwom. Chawiy, yisu yimwing “tukububijan” umwing ni mukwau. (Kol. 3:13) Pakwez pa ndond pa kushinshikin pa chom chatupwakeshang, el tushinshikinany pa difut didia kurutu ni kudandamen kubambil. Anch twajiman ni kulik kulank, tukushikap pa mufund wansudien ni tukutambulap difut. Chikwau kand, tukutwish kuyipwakesh antu akwau ikasikeshina kubambil netu mwi njil yiwongina yitwadila ku mwom. w20.04 26 par. 1; 28 par. 8-9

Muprofet Daniel wisambina piur pa kuswinkanijan kwa maguvernema ma antu mafanyina kuyipompat atushalapol a Nzamb. Amafanikeshin nich yikunku kushalijan ya chirumbidij chilemp cha chikung. Guvernema wa nsudien mu kuswinkanijan kwinoku amufanikeshin nich yidjatil ya chirumbidij yisadinau nich utad ujal wa kubomb ni kam. Yidjatil yifanikeshin Dikand Dia pa Mangand Mawonsu Dia Angleter ni Amerik. Uprofet winou umekeshin anch dikudandamen kwikalaku djat ni pa chisu chikweza Want wa Nzamb mulong wa kushesh mant ma antu. Kambuy Yohan niyend wisambidin piur pa kuswinkanijan kwa mant ma usu nakash pa mangand mawonsu mafanyina kuyipompat atushalapol a Yehova. Kambuy Yohan ufanikeshin maguvernema minam nich nnam wa chidiany ukweta mitu sambwad. Mutu wa sambwad wa nnam winou ufanikeshin Dikand Dia pa Mangand Mawonsu Dia Angleter ni Amerik. Kwijik chom chinech kudi kwa usey mulong kalejenap anch nnam winou ubudishin kand mitu yikwau. Mutu wa sambwad wa nnam winou ukudandamen kuyikel djat ni pakuusheshinau pamwing ni nnam mwawonsu wakabuj kudi Kristu ni amasalay end a mwiur.​—Kuj. 13:1, 2; 17:13, 14. w20.05 14 par. 11-12

Mazu minam matuvurishin uyakin wa usey nakash: Nzamb ndiy musul wa mwom, ndiy kand musul wa rukat. Yehova utukatin! Rukat rend rawiy ritukwashina kwiyov mu diking ni kwikal musangar. Mwin Kristu kakutwishap kwikwatin mupak anch ukutwish kumekesh rukat ap kulik kwend. Kumekesh rukat chid chijil. (Mat. 22:37-40) Anch twamwijik nawamp Yehova, tukuman anch chiswapel kwau kuziyil ku chijil chakusambish. Chid mwamu mulong Yehova uwanyidin; ukat kutubangin, ni ukat kutusadin nich rukat. Pakwez, chikutwish kutukasiken kuziyil ku chijil cha kaad. Mulong wak? Mulong akadivar ni anambaz netu—adia pakach pa amutej netu—ad antu akad kuwanyin. Yisu yimwing akutwish kulond ap kusal yom tumena anch yiwapinap ni katumekeshidinap rukat. Yehova wading wij anch yom yiney yikutwish kushiken, chawiy chasadinay spiritu wend mulong wa kuyibachik antu amwing kufund mu Bibil yiyul yimwing ya pakampwil yimekeshina mulong wak ni mutapu ik tukutwisha kumekeshijadin rukat muntu ni mukwau. Kambuy Yohan ud pakach pa antu inay.​—1 Yoh. 3:11, 12. w21.01 8 par. 1-2

Ap anch twasambishin kumusadin Yehova katat ap tumusadidin kudiosh pakur, tufanyidin kwiyipul ayinetu anch: ‘Ov, nikat kujijaman ku yoziu ya Satan ya kwauril muchim wam?’ Chilakej, mutapu ik ukata kusal anch waman chipich ku televizion ap pa Internet chikutwisha kulangwish maku mayimp? Chikutwish kukuswapel kutong anch chipich ap filim kampand kadiap kamu kwend wa pornografi. Pakwez, ov, chipich chinech ap filim winou udi chom chisadidinay Satan mulong wa kwauril muchim wey? Chipich chinech chikutwish kwikal mudi musumad usadidinay muntu mulong wa kufuril nich rubau rijim. Kwinsambishil, ukwandjik ris risomburikina ra musumad mu rubau. Kupwa pauyila musumad kwandam, ribau rikat kufurik. Ov, yipich yilangwishina maku mayimp yidi mudi ris ra musumad? Yom yikutwisha kumekan mudi ya usweral ni yakad ubaj yikutwish kumushikij muntu ku kusal yitil yikutwisha kwauril muchim wend ni kuyipish kushinshaman kwend. Chawiy dimuk chakwel kangal wandjik yom yijondila mu muchim wey! Dandamen kulam muchim wey ubombakena mulong wa kumwov Yehova wom! w20.06 11-12 par. 14-15

Tufanyidin kudandamen kuyikwash ni kuyikasikesh antu alikina kal kukumangan ni kusal mudimu wa kulejan. Mudi mwiyovay mwan washadika wisambidinau mu chishimu cha Yesu, antu inay akutwish kudandamen kwov kusansan kwitina chisu chilemp chakwel lel kupwa. (Luka 15:17-24) Ni aziyin pamwing ap mu spiritu mulong wa yom yayishikedina mu mangand ma Satan. Tufanyidin kuyikwash chakwel akasikesh kand ritiy rau mudiay Yehova. Mu chishimu cha mukoku washadika, Yesu warumburila mutapu kafung wamutekay mukoku pa makij mend ni kumuchirish pa chisak cha amikoku akwau. Kafung wading wasutishang kal chisu chivud ni wasala usu nakash mulong wa kumukimb mukoku wading washadikang kal. Pakwez wamana kand anch chitin kumuchirish mukoku winou pa chisak cha akwau mulong kakutwishap kuchirik amwinend. (Luka 15:4, 5) Chikutwish kutwit chisu chivud ni usu mulong wa kuyikwash antu alikina kal kukumangan ni kusal mudimu wa kulejan chakwel atwish kupandikan yom yiyikangeshina kumuchirikin Yehova. Pakwez kusutil ukwash wa spiritu wa Yehova, Dizu diend, ni mikand yibudishinau kudi dirijek diend, tukutwish kuyikwash kwikal kand akash mu spiritu. Chawiy anch akwit kwilej ni muntu wa mutapu winou, ufanyidin kwitiy nich musangar chisend chinech. w20.06 28 par. 14-15

Muntu ni muntu pakach petu ufanyidin kumekesh rukat​—chijingidij cha in Kristu akin. Pakwez tukwet kand kuswir kwa ‘ronganyin rakin ni kujingunin kuwanyidina.’ (Fil. 1:9) Anch chamwamu tukutwish kwikal apwepodinau ku “rinkind wa malejan ma antu in kudimban,” ni in kupumbok. (Efes 4:14) Chisu chalikau in kwilej avud a Yesu kumulondul mu mivu chitot ya kusambish C.C, kambuy Pita walonda nich kashinsh kend kawonsu anch Yesu wading ni “mazu makata kulet mwom wa chikupu.” (Yoh. 6:67, 68) Ap anch pa chisu chinacha Pita kovap kamu nawamp kurumburik kwa mazu minima, pakwez washala ushinshamena mulong wading wij uyakin piur pa Kristu. Niyey ukutwish kukasikesh kashinsh key mu yom yifundishinay Bibil. Anch wasal mwamu, ritiy rey rikushal rikash chisu chikuripakau ni ukuyikwash antu akwau kukasikesh ritiy rau.​—2 Yoh. 1, 2. w20.07 8 par. 2; 13 par. 18

Mulong wa kuyikwash akadivar nau anambaz netu kushal ku uyakin, tufanyidin kumekesh ranaken. (1 Yoh. 3:10, 11, 16, 17) Tufanyidin kukatijan umwing ni mukwau kadiap kusu kwau ching chisu tudia mu musangar pakwez kand mu yisu ya yakamish. Chilakej, ov, umwij mukadivar ap nambaz wafishina mukatish nend ni ukweta kuswir kwa kumwongoj ap kwa kumukwash mu mitapu yikwau? Ap kand ov, watambwil rusangu anch ambay ney in Kristu ashadishin yom yau yivud mulong wa mar madiokila ku yom yatangau ni anch akwet kuswir kwa kuyitungin kand Yot ya Want ni yikumbu yau yasheshikina? Tukat kumekesh anch tuyikatin ni kuyanaken nakash akadivar ni anambaz netu kadiap kusu kwau mu mazu pakwez, cha usey nakash, mu yisal. Tukat kumwimburij Tatukwetu wa rukat udia mwiur anch twakatijan umwing ni mukwau. (1 Yoh. 4:7, 8) Mutapu umwing wa usey nakash tukata kumekesh rukat udi kusutil kulikishijadin umwing ni mukwau. Chilakej, muntu ukutwish kuturumbukin ni kupwa watwit dilikishin. Tukat kumekesh rukat anch twamulikishin ni kuvuramen yom yatusalangay.​—Kol. 3:13. w20.07 24 par. 14-15

Ov, muntu ni muntu ukuvumbuka akumufundish panrend, mudi tutakedila malejan ma Bibil nlel? Ov, antu inay akuvumbuka, akwikal mu yikumangen mulong wa kuyifumb chakwel niyau ayifundisha antu akwau akuvumbuka? Tulamany mes, tukuman mutapu yikusadika. Pakwez, twij nawamp anch kwinsudien kwa Mivu Kanan ya Winyikel wa Kristu, “ngand yikez kizul nich ronganyin ra [Yehova].” (Isay 11:9) Tukwikal akwatikena nakash mu mivu kanan yiney, pakwez yikwikal yisangareshina! Mu Mivu Kanan ya Winyinkel wa Kristu, chikuyit atushalapol awonsu a Yehova akwikala pa divu kuswimp mashakamin mau mulong wa kumusangaresh. Chawiy, atushalapol inay awonsu akwitek chakin kamu pa ndond ya antu akuvumbulau chisu chiyikwashinau kuswimp yitongijok yau ni kulikap maku mau mayimp chakwel ashakam kukwatijan ni mbil ja Yehova. (1 Pita 3:8) Antu akuvumbulau akuman anch atushalapol a Yehova ikepishin ni anch adandamedin kuswimp mashakamin mau mulong wa kumusangaresh Yehova, chawiy akukat kubombakan nau pamwing mulong wa kumwifukwil.—Fil. 2:12. w20.08 15-16 par. 6-7

Anch twasadin chiyul cha kambuy Paul ni anch twashinshikin pa yom tukutwisha kusal, tukutwish kujingunin anch tukwet ukaliweny wa kusal yom yimwing nawamp kuyisutamu antu akwau. Chilakej, mukurump wa chikumangen ukutwish kuburen ukaliweny wa kusal nawamp madiskur, pakwez ukutwish kwikal ni ukaliweny nakash mu mudimu wa kwikadish in kwilej. Ap ukutwish kuburen ukaliweny wa kutenchik yom nawamp mu chikumangen mudi amakurump akwau, pakwez ukutwish kwijikan mudi kafung muwamp ni ukweta rukat, ukatinau kusejin kudi akadivar nau anambaz mulong wa kumwit yiyul yimedina pa Bibil. Ap kand ukutwish kwijikan mudi muntu ukweting chaku cha kwakan. (Heb. 13:2, 16) Anch twajingunin ukaliweny tukweta, tukutwish kusanger yom tukutwisha kusal mulong wa kukwash chikumangen. Ni tukuyovilap ris akadivar akweta ukaliweny ushalijadina ni wetwetu. Chikalap nchik yisend tukweta mu chikumangen, etu awonsu tufanyidin kwikal ni impu ya kuwapish mutapu wetu wa kusal mudimu ni kukudish ukaliweny wetu. w20.08 24 par. 16-18

Mu muvu wa 1935, Mukadivar J. F. Rutherford wasala diskur diading dilondina anch “Runtu Ruvud.” Diskur dined wadisala ku chitentam chasadikina mu Washington, D.C., États-Unis. Mu diskur dined, Mukadivar Rutherford warumburila antu asadina “chisak chipandikena kujimb” (TMK), ap “runtu ruvud,” alejenau mu Kujingunik 7:9. Kurutu kwa diskur dined, antu a mu chisak chipandikena kujimb atongang anch akuya mwiur ni akwikal mu chisak cha antu ading akad kushinshaman nakash. Mukadivar Rutherford wasadina Mifund mulong wa kurumburil anch antu asadina chisak chipandikena kujimb kakatap kuyitond mulong wa kuya mwiur, pakwez ad amikoku akwau a Kristu akupanda ku “mar makash” ni kushakam chikupu pa divu. (Kuj. 7:14) Yesu walonda anch: “Nikwet kand amikoku akwau kadiap mu diyind dined. Nifanyidin kuyilet kand. Awiy akez katesh dizu diam, chad awonsu akez kikal chisak chimwing ni kafung wau umwing.” (Yoh. 10:16) Amikoku akwau inay amekeshin Atuman a Yehova ashinshamena akweta ruchingej ra kushakam chikupu pa divu mu Paradis.​—Mat. 25:31-33, 46. w21.01 14 par. 1-2

Tufanyidin kwikasikesh anch tukimbin kujijaman mulong wa kuwanyish mudimu wetu wa kulejan. (Mat. 28:19, 20) Tukatap kuvadik ni mwikadil wa kwikasikesh kusal yom. Yisu yivud tukatining kusal yom tumena anch yiswapel. Pakwez, yisu yivud chiswapelingap kusal yom ya usey nakash. Chawiy chitin kwikasikesh. Tukwet kuswir kwa kutukwash chakwel tukudish chaku cha kusalang yom tumena anch yikasiken. Yehova ukat kutukwash kusutil spiritu wend utumbila. (Gal. 5:22, 23) Kambuy Paul wikasikeshang. Pakwez, witiya ‘kumesh mujimbu wend mar’ mulong wa kusal yom yitentamina. (1 Kor. 9:25-27) Wayileja antu akwau kwikasikesh kusal yom yawonsu ‘pakad kanvundangesh.’ (1 Kor. 14:40) Tufanyidin kusal usu wa kudandamen kumwifukwil Yehova, charumburik anch kwikal ni chaku cha kulejan ni cha kufundish rusangu ruwamp.​—Mid. 2:46. w20.09 6-7 par. 15-17

Mu jingand jivud nlel tukwet want ipetu wa kulejan. Ov, niyey ushich mwi ngand ya mutapu winou? Anch mwawiy, iyipula anch ‘ov, mutapu ik nisadidina chisu chinech cha chisambu?’ Atushalapol a Yehova akwet musangar nakash mu machuku minam ma nsudiel, mulong asadin mudimu wa kulejan mu chilik chipandikena kujimb chakad kal kusadikangap. Kudi yom yivud nakash tukutwisha kusal mu mudimu winou. Mutapu ik ukutwisha kusadin nawamp chisu cha chisambu? (2 Tim. 4:2) Ov, umen nchik anch washinshikin mashakamin mey mulong wa kuman anch ey ap muntu mukwau wa mu dijuku dien ukwet mutapu wa kuswimp mwom wend mulong wa kwipan nakash mu mudimu wa kulejan, chilakej, kusal mudi chibol? Chinech chidiap chisu cha kwikumangejin mapit ap kukimb yom ya ku mujimbu​—mulong yom yiney yikupandap kwau ku mar makash. (Jnsw. 11:4; Mat. 6:31-33; 1 Yoh. 2:15-17) In kulejan avud akat kwilej kulond dizu dindj chakwel ayikwasha antu akwau kwilej piur pa Yehova. Dirijek dia Yehova dibudishin mikand mu mazu 1 000 ni kusut! w20.09 16 par. 9-11

Isalay muwamp uding ushinshamena. Ukat kusal usu wend wawonsu mulong wa kumuchidij muntu ukatinay ap mulong wa kuchidij chom cha usey chikwetay. Paul wamukasikesha Timote kumukat nakash Nzamb, charumburik anch kushal ushinshamena kudi Nzamb. (1 Tim. 4:7) Anch twamukat Nzamb nakash, tukwikal ni impu ya kulam baang uyakin. (1 Tim. 4:8-10; 6:6) Isalay muwamp ufanyidin kand kwikasikesh anch ukatin kuwanyish nawamp chisend chend. Timote washala ushinshamena mulong wasadina chiyul cha Paul cha kwipuk maku mayimp, cha kukudish mikadil yiwamp, ni cha kuta urund ni akadivar nau anambaz nend. (2 Tim. 2:22) Kusal mwamu kwading kumwitin kwikasikesh. Chitin kwikasikesh mulong wa kupandikan maku mayimp ma mujimbu. (Rom 7:21-25) Chitwitin kand kwikasikesh mulong wa kudandamen kudjol wuntu ukur ni kudjal wuntu usu. (Efes 4:22, 24) Anch urel twaziyang kal mulong wa midimu twasalang muten, chitwitin kwikasikesh mulong wa kukumangan.​—Heb. 10:24, 25. w20.09 28 par. 9-11

Tufanyidin kushimpish muchim chisu tumukwashina mwin kwilej, chakwel aya kurutu ni ashiken ku kwipan ni kutambul dibatish. Pakwez, chitin kand kushinshikin anch mwin kwilej ukwet impu ya kumusadin Yehova Nzamb. Ov, umen yom kanang kudi mwin kwilej wey yimekeshina anch usadin usu wa kuziyil kwi mbil ja Yesu? Anch mwin kwilej wey ukatin kwend kwilej nsangu ja mu Bibil? Chisu chawonsu shinshikin anch mwin kwilej wey uyil kurutu. Chilakej, ov, ukat kulond patok mutapu wiyovilay piur pa Yehova? Ov, ukat kumulembil Yehova? (Kus. 116:1, 2) Ov, ukatining kutang Bibil? (Kus. 119:97) Ov, ukat kukumanganang pakad kujing? (Kus. 22:22) Ov, kudi kuswimp kusadinay mu mwom wend kumekeshina anch usadidin yom yilejinay? Ov, wasambishin kal kuyilej antu a mu dijuku diend ap arund nend yom yilejinay? (Kus. 9:1) Cha usey nakash, ov, ukatin kwikal Kaman wa Yehova? (Kus. 40:8) Anch waman anch mwin kwilej kasadinap chom ap chimwing pakach pa yom yiney, sal usu wa kwijik mulong wak ni nich manangu isamba nend mu mutapu uwamp, pakwez muleja yom patok. w20.10 18 par. 14-15

Tatukwend a Yesu udia mwiur ukwatining chisu chawonsu mipak yiwamp, ni anvaj end a pansh niyau akwata mipak nich manangu. Pakwez pading payilay Yesu mukupam, chading chimwitin kukwat mipak amwinend. (Gal. 6:5) Niyend wading ni want ipend wa kutond mudi mutukweta etu awonsu. Wading kwend ukwet mutapu wa kukwat mupak wa kutek pa ndond ya kusambish maswir mend amwinend. Pakwez, wakwata mupak wa kulam urund uwamp ni Yehova. Pilejay Yesu piur pa chisend chikwetay mu rusot ra Yehova, wakwata mupak wa kuchitiy. (Yoh. 6:38) Wading wij anch antu avud akumukis, ni chinech chafanyina kumwakamish. Pakwez, wakwata mupak wa kumuziyin Yehova. Pamubatishau Yesu mu muvu wa 29 C.C., chom cha usey nakash mu mwom wend chading kusal yom yimwitinau kudi Yehova kusal. (Heb. 10:5-7) Ap chisu chadingay pa mutond wa mar, Yesu wadandamena kusal rusot ra Tatukwend.​—Yoh. 19:30. w20.10 29 par. 12; 30 par. 15

Ov, wij akadivar ni anambaz amwing adia mu chikumangen chen amena mar mulong wa mayej ap yakamish yikwau? Ap pamwing ap afishin mukatish nau. Anch twatesh anch kudi antu amwing akweta kuswir kwa ukwash, tukutwish kumwit Yehova chakwel atukwasha kwijik mazu mawamp tufanyidina kulond ni yom yiwamp tufanyidina kuyisadin. Mazu ni yisal yetu yikutwish pamwing ap kuyikasikesh akadivar nau anambaz netu. (1 Pita 4:10) Twij anch tukutwish kwikal atakamena mulong Yehova udi netu. Ukat kutukwash kusutil Yesu ni angel. Chikwau kand, anch chikwatijadin ni rusot rend, Yehova ukutwish kuyisadil antu atakedina mulong wa kutukwash. Ni mud mwimedinawap kal antu avud pakach petu, Yehova ukat kusadin spiritu wend utumbila mulong wa kuyibachik atushalapol end kuyikwash anamakwau in Kristu. Chawiy, mud kambuy Paul tukwet diyingishin dia kulond nich kashinsh anch: “[Yehova], ndiy mwin kwinkwash, kinikez kwovap wom. Ov, muntu ukwinsal chom ik?”​—Heb. 13:6. w20.11 17 par. 19-20

Atwimbuy ading ni uman umekeshina patok anch Yehova wading nau. Wayinkisha usu wa kusal yilay. (Mid. 5:12-16; 6:8) Pakwez, etu kitukatap kusal yilay nlel. Chikalap nchik mwamu, Yehova utwinkishin kashinsh kusutil Dizu diend anch ang atuzengol mulong wa kutentam, tukutwish kusangar mulong tumusangareshin ni spiritu wend ukwikal netu. (1 Pita 3:14; 4:14) Chawiy, pa ndond pa kutongijok piur pa yom tukusala anch atupompat mu machuku ma kurutu, tufanyidin kushinshikin pa yom tukutwisha kusal katat mulong wa kukasikesh ruchingej retu mudiay Yehova anch ukwikal netu ni ukutukamunin. Tufanyidin kwikal ni ruchingej mu kushilamu kwa Yesu kulondina anch: “Yam nikeza kakwinkishany mazu ni manangu mawanyidina. Kwikil mukankuny ap umwing ukutwisha kukutadikany ap kukumanany makasu.” Yesu watushilamu anch: “Imanany dang, chad ukez kwipandishany ayinen.” (Luka 21:12-19) Ni kangal wavuramen anch Yehova uvurikin ap tuyom tukemp tukemp piur pa atushalapol end afa ashinshamena. Chawiy ukuyivumbul. w21.01 4 par. 12

Kambuy Paul kindiyap muntu wa kusambish wisambina piur pa ruchingej ra divumbuk. Job niyend wisambina ruchingej riner. Wading ukwet kashinsh anch Nzamb ukumuvurik ni ukumuvumbul. (Job 14:7-10, 12-15) “Divumbuk dia afu” did pakach pa “malejan ma kusambish,” ap ma pa dishin mitiyijinau in Kristu. (Heb. 6:1, 2) Yom yalonday Paul piur pa divumbuk ayifundin mu 1 Korint shapitre wa 15. Chimeken anch yom yafunday yayikasikesha nakash in Kristu a mu mivu chitot ya kusambish. Ni yom yidia mu shapitre winou yikutwish kutukasikesh ni kukasikesh ruchingej retu mu divumbuk, ap anch tukwet ruchingej riner kudiokal pakur. Divumbuk dia Yesu Kristu diawiy ditwinkishina kashinsh anch akatish netu afila kal akuvumbuk. Divumbuk dia Yesu diading pakach pa “rusangu ruwamp” ralejanay Paul kud in Korint. (1 Kor. 15:1, 2) Chawiy, walonda anch ang mwin Kristu walik kwitiyij anch Kristu wavumbuka, ritiy rend rid ra chamwamu.​—1 Kor. 15:17. w20.12 2 par. 2-4

Yom ik yamukwasha kambuy Pita kuchirish musangar wend? Chakusambish, Yesu walembila kurutu kwa kumukwat anch ritiy ra Pita rifanyidinap kuziy. Yehova wakula ku malembil minam. Mu kusut kwa chisu, Yesu wamumekena Pita, pamwing ap mulong wa kumukasikesh. (Luka 22:32; 24:33, 34; 1 Kor. 15:5) Yesu wayibudikina kand atwimbuy end awonsu chisu chading chitilau ansh uchuku, pakwez achish mudad. Pa chisu chinicha, Yesu wamwinkisha Pita katok ka kulond patok mutapu umukatinay Yesu. Yesu wamulikishina murund nend mukatish ni wamwinkisha yisend yijim. (Yoh. 21:15-17) Yesu wamekesha anch ud mwin ranaken nakash mud Tatukwend kusutil mutapu wamusadinay Pita. Chawiy, anch twarumbuk, tufanyidinap kutong anch Yehova kakutulikishinap. Tufanyidin kwijik anch wawiy mutapu ukatinay Satan anch tutonga. Pakwez, tufanyidin kutongin piur pa mutapu utukatinay Yehova ni mutapu wijay kuziy kwetu, ni kwijik anch ukatin kutulikishin. Ni tufanyidin kumwimburij anch antu akwau aturumbukin.—Kus. 103:13, 14. w20.12 20-21 par. 17-19

Tukutwish kwilejin ku yilakej ya antu akanganya kwikuchik ni kumuchingejin Yehova. Kwilej yilakej yiney yiyimp kukutukwash kwipuk kuwil mu mipit yawilau awiy. Chilakej, kwinsambishin kwa want wend, Mwant Asa wamuchingejina Yehova chisu charishay ni milong. Pakwez, mu kusut kwa chisu wakanganya kumuchingejin Nzamb chakwel amukwash ni wakata kupwish milong mud mukatinay ndiy. (2 Jsng. 16:1-3, 12) Mupak wa Asa wa kuya kud in Siria kuyit ukwash chakwel ayirishikish in Isarel wading umeken mud uwapin. Pakwez, chisambu chikalau nich chading kwau cha chisu chikemp. Yehova wamuleja Asa kusutil muprofet anch: “Mulong ey wamuchingejin kwey mwant wa in Siria, pakwez walik kumuchingej [Yehova] Nzamb wey, katat amasalay a mwant wa in Siria akwiyepil kal.” (2 Jsng. 16:7) Tufanyidin kubabal nakash chakwel kangal twatong anch tukutwish kupwish milong nawamp ayinetu pakad kukimb umutakel wa Yehova udia mu Dizu diend, Bibil. Ap anch chitwitin kukwat mupak pakad kulab, tufanyidin kwikuchik ni kumuchingejin Yehova, ukutukwash kukwat mupak uwamp. w21.01 6 par. 13-15

Nlel unou atushalapol a Yehova akat kuman mar ma nzal mulong wa kuburen nfalang jiwanyidina ja kuland yakudia ap mulong wa njit. Akwau akat kuyitek mu rukan mulong wa ritiy rau. Pakwez antu adia mu chisak chipandikena kujimb akwet musangar upandikena pa kwijik anch pakusheshau mangand minam mayimp akwikal ni yakudia yivud ya ku mujimbu ni ya mu spiritu chisu chawonsu. Chisu chikusheshau mangand minam mayimp ma Satan, Yehova ukuchidij chisak chipandikena kujimb ku “chirungul” chikash cha ujim wend ukusheshay nich michid. Kupwa kwa mar makash, Yesu ukuyitwal antu akupanda pa divu ku “mem ma mwom [wa chikupu].” (Kuj. 7:17) Tongijokin bil pa ruchingej ripandikena kuwap rikwetau antu adia mu chisak chipandikena kujimb. Antu awonsu afila kal akuvumbulau pa chisu chinicha kakezap kand kufa! (Yoh. 11:26) Amikoku akwau akwet ruchingej ripandikena kuwap riyibachikina kumujikitish Yehova ni Yesu! w21.01 17 par. 11-12

Uchuku wa nsudiel wa mwom wend panap pa divu, Yesu wading utongijokidin piur pa yikokujol yikurishau nich in kwilejend. Chawiy, mulong wading uyikatin arund nend inay, Yesu wamwita Tatukwend anch: “Uyichidij kudi Sakudimban, ndiy kamu Muyimp.” (Yoh. 17:14, 15) Yesu wading wij anch ang wachirik mwiur, Satan Djabul ukudandamen kuyirishikish antu awonsu akukata kumusadin Yehova. Chawiy, atushalapol a Yehova afanyina kwikal ni kuswir kwa kuyichidij. Nlel tukwet kuswir nakash kwa kutuchidij kud Yehova kusutamu pakur. Satan amudjubwil kal pansh, ni “ujimen nakash.” (Kuj. 12:12) Chawiy, ukat kusal usu wa kuyinkish antu akata kutupompat kashinsh anch “akat kumusadil Nzamb.” (Yoh. 16:2) Antu akwau akad kumwijik Nzamb akat kutupompat mulong tukatinap kwimburij mangand minam. Pakwez tukutwishap kwov wom chikalap nchik diyingishin ditumeshidinau mar. Mulong wak? Chakul chid mu mufund wa nlel. w21.03 26 par. 1, 3

Rukat rawiy rimubachikining Yehova kusal chom chawonsu. Mulong utukatin, ukat kutuwanyishin maswir metu mawonsu. Rukat ramubachika Yehova kupan difut mulong wa kutukol. Yesu niyend utukatin nakash ni witiya kupan mwom wend mulong wetwetu. (Yoh. 3:16; 15:13) Kwikil chom ap chimwing chikutwisha kuyikangesh Yehova ni Yesu kuyikat antu ashinshamena kud awiy. (Yoh. 13:1; Rom 8:35) Chilik chimwing kand, rukat rawiy rifanyidina kutakel chom chawonsu chisadinay ntakel wa dijuku. Mulong wak chid cha usey? Kambuy Yohan wakwil anch: “Anch muntu kamukatilap mwanamakwend [ap antu a mu dijuku] umenay ku mes, kakutwishap kumukat Nzamb wakad kumekan ku mes.” (1 Yoh. 4:11, 20) Ikundj ukatina dijuku diend ni ukatina kumwimburij Yehova ni Yesu, ukuwanyish maswir ma ku mujimbu ni ma mu spiritu ma dijuku diend, ni ukubangin yovil yau. (1 Tim. 5:8) Ukuyifumb anend ni kuyipup anch arumbuk. Ukudandamen kand kwilej mutapu wa kukwat mipak yimusangareshina Yehova ni yikutwisha kukwash dijuku diend. w21.02 5 par. 12-13

Tatukwetu wa rukat udia mwiur wij nawamp yom yayishikena pakur ni mutapu wiyovilau. Ni umen kand mikadil yiwamp tukweta ap anch ayinetu tuyimenap. (1 Yoh. 3:19, 20) Muntu urishina pa kulikap chisal chiyimp chamwikunina kal ukutwish kuziy anch wawilamu kand kapamp kakwau. Chid chiwamp kwifish nich mu chilik kanang anch twasal chitil. (2 Kor. 7:10) Pakwez, tufanyidinap kupandikesh kwifish nich ni kutong anch: ‘Nid kamu kwam chidobu. Yehova kakutwishap kwinlikishin ap pakemp.’ Yitongijok yiyimp mud yiney yimedinap pa uyakin ni yikutwish kutubachik kwimik kumusadin Yehova. Pakwez, tufanyidin ‘kuchakul’ ni Yehova kusutil kumulembil ni kumwit chakwel atulikishin. (Isay 1:18) Anch Nzamb waman anch ukarumukin kamu chakin, ukukulikishin. Chikwau kand, yimana amakurump a chikumangen. Akutwish kukukwash kuyerik mu spiritu.​—Jak. 5:14, 15. w20.12 23 par. 5-6

Yesu wading uyilimishin amband. Kalondulap yishankur ya Afaris ading kuyipipej amband ni kulik kwambamb nau mukach mwa antu, ap kulik kwambamb nau piur pa Bibil. Pakwez, Yesu walejana uyakin wa usey nakash kud amband ni amakundj. (Luka 10:38, 39, 42) Wayitiya kand amband kuya nend pamwing mu mudimu wa kulejan. (Luka 8:1-3) Yesu wayinkisha kand amband dilau dia kuya kuyijikish atwimbuy anch wavumbukang kal. (Yoh. 20:16-18) Kambuy Paul wamukasikesha Timote kuyilimish amband. Paul wading wij nawamp anch makwend ni ngakend a Timote awiy amufundisha chakusambish Timote Mifund yitumbila. (2 Tim. 1:5; 3:14, 15) Mu mukand wayifundinay in Rom, Paul wayilangwisha anambaz pa majin mau. Kisambinap kwend kusu ching piur pa mudimu wasalau, pakwez wayijikitisha kand mulong wa mudimu wau.​—Rom 16:1-4, 6, 12; Fil. 4:3. w21.02 15 par. 5-6