Ngond wa 4

Ov, urishin ni choziu kanang? Pamwing ap mukadivar ap nambaz kanang mu chikumangen wakurumbukidin. (Jak. 3:2) Ap kand pamwing ap ambay ney a ku mudimu ap a ku shikol akat kukusip mulong ud kaman wa Yehova. (1 Pita 4:3, 4) Ap kand antu a mu dijuku diey akat kukukangesh kuya ku yikumangan ap kuya mu mudimu wa kulejan. (Mat. 10:35, 36) Anch urishin ni choziu chikash nakash, ukutwish kwiyov yisu yimwing mud ulikap kwey chad ni kumusadin Yehova. Pakwez ikal nich kashinsh anch chikalap nchik choziu urishina nich, Yehova ukukwinkish manangu ni usu chakwel ujijaman. Yehova wafundikisha mu Dizu diend jinsangu jikemp jikemp piur pa yom yasalau atushalapol end akad kuwanyin mulong wa kupandikan yoziu yarishau nich. Mulong wak? Chakwel twilejin ku yilakej yiney. Yiney yawiy yom yamutakelau kambuy Paul kufund kud Yehova. Kutang jinsangu jinej kukutwish kutukasikesh ni kutwinkish ruchingej mu chilik kanang. Pakwez anch tukimbin anch jitukwash kamu nakash, tufanyidinap kwetu kwimen ching pa kujitang. Tufanyidin kuyilik Mifund yiswimp mutapu wetu wa kutong ni yipukun michim yetu. w21.03 14 par. 1-2

Ov, uyimening antu ukata kufundish uyakin mudi mbut jaswa kal mulong wa kujangul? Anch mwawiy, ukusal yom yisatu. Chakusambish, ukulejan nich kuswapej nakash. Ukuvurik anch chirung cha kwangul chikwet mimbu; ukukatap kushadish chisu ap chikemp. Cha kaad, ukwikal ni musangar pa kuman mutapu witiyinau antu rusangu ruwamp. Bibil ulondin anch: ‘Antu akat kusangar pa chirung cha kwangul.’ (Isay 9:3) Ni cha kasatu, ukumuman muntu mwawonsu mudi mwin kwilej wa mu machuku ma kurutu, chawiy ukusal usu chakwel mutapu wey wa kufundish ukwatijan nich yom yiyisangareshina antu. Yesu kayiduwulangap in Samariy mudi mutapu wafanyinau kusal in kwilejend. Pakwez wayimana mudi antu akutwisha kwikal in kwilej mu machuku ma kurutu. Niyetu tufanyidin kuyiman antu adia mu teritwar wetu mudi in kwilej a Kristu a mu machuku ma kurutu. Kambuy Paul watushila chilakej chiwamp tufanyidina kwimburij. Wading wij yitiyij ya antu afundishangay, wajingunina yom yading yiyisangareshina antu, ni wayimana mudi antu afanyina kwikal in kwilej a Yesu mu machuku ma kurutu. w20.04 8-9 par. 3-4

Pa ndond pa kumurumburish muntu mulong wa yom yisadinay, sal usu wa kwijik yovil yend. Ching kusu Yehova ndiy ukata kututeshang kamu nawamp nakash. Chawiy mwita chakwel akukwash kuyiman antu akwau mudi muyimenay ndiy ni kwijik mutapu wa kuyimekeshin ranaken. Ufanyidinap kutond akadivar ni anambaz ufanyidina kumekeshin ranaken. Antu inay awonsu arishin ni milong yivud mudi yarishay nich Yona, Elija, Hagar, ni Lot. Yisu yivud, akat kwikakin milong ayinau. Pakwez mu kulond patok, etu awonsu tukat kwikakinang milong mu mitapu kushalijan. Chawiy Yehova ukwet mayingishin ma kutwit anch tumekeshijadin ranaken umwing ni mukwau. (1 Pita 3:8) Anch twamuziyin Yehova, tukat kukasikesh uumwing wa dijuku dietu dia pa mangand mawonsu dikweta antu a mitapu kushalijan. Chawiy mu mashakamin metu pamwing ni akadivar nau anambaz netu, el tukwatany amboku mupak wa kutesh, kwilej ni kumekesh ranaken. w20.04 18-19 par. 15-17

Yesu watushila chilakej chipandikena kuwap cha kumuziyil Yehova. Chawiy, mutapu umwing wa usey nakash tukata kumekesh kuziyil kud Yehova udi kusutil kwikasikesh kwimburij nawamp chilakej chatushilay Yesu. (Yoh. 8:29) Mulong wa kudandamen kwendil mu uyakin, tufanyidin kwikal nich kashinsh anch Yehova udi Nzamb wa uyakin, ni anch chom chin chawonsu chitulejinay mu Dizu diend, Bibil, chidi chakin. Ni tufanyidin kand kwikal nich kashinsh anch Yesu udi Mesia wakanau. Nlel antu avud kitiyijinap anch Yesu amutonda kwikal Mwant wa Want wa Nzamb. Kambuy Yohan watakela kubabeshan anch kwading “in kudimban avud” afanyina kuyipumbul antu ading akad kwitiyij nich kashinsh kawonsu uyakin piur pa Yehova ni Yesu. (2 Yoh. 7-11) Yohan wafunda anch: “Ov, nany mwin makasu? Mwin makasu udi muntu mwawonsu ulikina kumwitiy Yesu anch, udi Kristu.” (1 Yoh. 2:22) Mutapu umwing tukutwisha kwipuk kwikal apumbwilau udi kusutil kwilej Dizu dia Nzamb. Ching kusu anch twasal mwamu pawiy lel tukushikena chad kumwijik Yehova ni Yesu. (Yoh. 17:3) Ni ching anch twasal mwamu chad lel twikal nich kashinsh anch tud mu uyakin. w20.07 21 par. 4-5

Mutapu umwing tukutwisha kwipuk kwikal ‘diyal dia kupwakesh’ kudi ambay netu tubambidina nau, udi kusutil kuyilik asal yom mu mutapu wau anch chitwishikin pa ndond pa kukat chisu chawonsu anch asal yom mu mutapu tukatina etu. (Rom 14:19-21; 1 Kor. 8:9, 13) Anch twasal mwamu, tukushalijan nau antu akata kusal masengan ma kubambil akata kurilang umwing ni mukwau, ni mwin kubambil mwawonsu ukat kusal usu mulong wa kutambul difut mulong wendendiy amwinend. In kubambil inay akat kwitonginang chakusambish ayinau. Chawiy, mwin kubambil ukutwish kuyibachok akwau chakwel ndiy ikal kurutu. Chinyim nau in kubambil inay, etu tukatap kuril umwing ni mukwau. (Gal. 5:26; 6:4) Chitongijok chetu chidi cha kuyikwash antu avud chakwel tushik nau ku mufund wa nsudien ni tutambul etu awonsu difut dia mwom. Chawiy tukat kwikasikesh kusadin chiyul chapepilau cha kulik ‘kukimb ching yisakin yetu ayinetu, pakwez kand yisakin ya antu akwau.’ (Fil. 2:4) Mu kubambil tubambidina, Yehova wasambedin kal kutulej difut tukutambula anch twashik kwi nsudien​—mwom wa chikupu mwiur ap mu paradis pa divu. w20.04 28 par. 10; 29 par. 12

Mamiliyon ma in Kristu, amakundj ni amband akwandam mwi ngand yisu. Antu akupanda pa divu akwimenap mutapu ukuripandakanau kand rufu chisu chikuvumbulau mamiliyon ni mamiliyon ma antu adia afila kal. Tongin musangar ukwikalaku chisu chikusadika yom yiney! (Mid. 24:15) Antu awonsu akushinshamana chakin kamu kud Yehova akuripandakan rufu raswanau kud Adam. Akutwish kushakam chakin kamu chikupu. In Kristu awonsu adia aom nlel afanyidin kujikitish mulong wa mazu matwongojina mafunday Paul kud in Korint piur pa divumbuk. Tukwet chakin kamu diyingishin diakumekesh patok anch twitiyin mazu ma Paul matukasikeshina kwikal akwatikena nakash nlel mu “midimu . . . ya Nsalejetu.” (1 Kor. 15:58) Anch twipan mu mudimu winou nich kushinshaman ni mushiku, tukwikal irijekina mulong wa kusanger yiyukish ya machuku mezina. Yiyukish tukwikala nich mu machuku ma kurutu yikwikal yiwamp nakash kusutamu mutapu tuyitongidina. Yikumekesh chakin kamu anch mudimu twading tusadina mulong wa Nsalejetu wadingap wa chamwamu. w20.12 13 par. 16-17

Chimeken anch uprofet udia mu Ezekiel 38:10-23; Daniel 2:43-45; 11:44–12:1; ni Kujingunik 16:13-16, 21 wisambidin yom yawiy yimwing. Chad anch mwawiy, tutongin anch yawiy yom yikusadika. Chisu chikemp kupwa kwa mar makash kusambish, “ant a mangand mawonsu” akez kabombakan ni kusal chisak chimwing. (Kuj. 16:13, 14) Bibil utazukin chisak chinech cha michid anch ‘Gog wa ngand ya Magog.’ (Ezek. 38:2) Chisak cha michid yiney chikuyirishikish atushalapol a Nzamb ni kupakish kuyinongish kamu chikupu. Mu uprofet wisambidina piur pa chisu chinech, kambuy Yohan wamana mayal majim ma nvul makat kuyiturikin akankuny a Nzamb. Mayal minam ma nvul ma chifanikesh makutwish kurumburik uruu ukash wa dirumburish ukulejanau kudi atushalapol a Yehova ukumubachik Gog wa Magog kuyirishikish atushalapol a Nzamb nich chitongijok cha kuyinongish kamu pa divu.​—Kuj. 16:21. w20.05 15 par. 13-14

Spiritu wa Nzamb chid chipan tufanyidina kukwat nich usey nakash. Tukutwish kwikal in kujikitish nakash mulong wa spiritu utumbila kusutil kutongijokin pa yom yitukwashinay spiritu winou kuwanyish nlel. Yesu wayileja in kwilejend kurutu kwa kuchirik mwiur anch: “Anch [spiritu] utumbila wakushirikinany en, ukez kwikalany nich ukash. Chad ukez kwikalany atuman amam . . . djat ni kusudiedila mangand.” (Mid. 1:8) Kusutil ukwash wa spiritu utumbila, piswimp amiliyon chinan ni chikunku a antu amwifukwidila Yehova akat kuyikumangej kudiokal ku makonk mawonsu ma mangand. Tukat kusanger kand paradis wa mu spiritu mulong spiritu wa Nzamb utukwashin kukudish mikadil yiwamp mudi rukat, musangar, chisambu, kushimpish muchim, kudimuk, kuwap, ritiy, kwitudish, ni kwilam. Mikadil yiney yawiy yisadina ‘dibuj dia spiritu.’ (Gal. 5:22, 23) Spiritu utumbila udi chipan chipandikena kuwap mud ik! w20.05 28 par. 10; 29 par. 13

Kudi mayingishin mavud matubachikina kutong anch, antu akuyaka antu akuvumbulau akutwish kuyonganyin anamakwau. Chilakej, anch twatongin pa nsangu ja antu avumbulau pakur, chimeken anch Yehova ukuyivumbul antu nich mutapu wa kutong, wa kulond ni yifu mudi yadingau nich kurutu afa. Vurik anch Yesu wafanikesha rufu ni tul ni wafanikesha kand divumbuk nich kulank pa tul. (Mat. 9:18, 24; Yoh. 11:11-13) Anch muntu walank pa tul, chifu chend, dizu diend ni manangu mend yikatap kuswimp, yiding kamu mudi mutapu yadia kurutu kwa kulal. Shinshikin chilakej cha Lazar. Wasala machuku manying mwi nzay, chawiy mujimbu wend wading wasambishang kal kuvund. Pakwez, chisu chamuvumbulau kudi Yesu, ampanyend amonganyina kapamp kamwing, ni chimeken anch Lazar niyend wayivurika.​—Yoh. 11:38-44; 12:1, 2. w20.08 14 par. 3; 16 par. 8

Azizidilau many ni amikoku akwau iliken mu mitapu kanang. Yisak yawonsu yaad yid ya usey nakash ku mes ma Nzamb ni uyikatin awonsu mutapu umwing. Nzamb wayilanda awonsu nich usey umwing, mwom wa Mwanend mukatish. Kushalijan kudia pakach pa yisak yiney yaad kud anch akwet ruchingej rishalijadina. Pakwez awonsu afanyidin kushal ashinshamena kud Nzamb ni kud Kristu. (Kus. 31:23) Ni vurik anch spiritu wa Nzamb ukutwish kutukwash etu awonsu mutapu umwing. Chinech chirumburikin anch Yehova ukat kupan spiritu wend kud muntu ni muntu kulondwish ni maswir mend. Yehova wapanin kal ruchingej ripandikena kuwap mulong wa machuku ma kurutu kud kashalapol mwawonsu wipanina kal kud ndiy. (Jer. 29:11) Chivurikish cha rufu ra Kristu chid chisu chipandikena kuwap kud etu awonsu cha kumushiman Nzamb ni Kristu mulong wa yom yasalau chakwel twikal ni ruchingej ra kushakam chikupu. Chivurikish chid chikumangan cha usey nakash chikatau kusal in Kristu akin muvu wawonsu. w21.01 18 par. 16; 19 par. 19

Antu avud akata kukumangan ku Chivurikish akwet ruchingej ra kushakam pa divu. Chad, mulong wak akat kukumangan ku Chivurikish? Akat kukumangan mud mukatau kukumangan antu ku uruw wa murund nau. Akat kusal mwamu mulong wa kumekesh anch ayikatin ni kunung chikas ku uruw wa antu atijana kal. Amikoku akwau akat kukumangan ku Chivurikish mulong akatin kumekesh anch amukatin Kristu ni azizidilau many ni akatin kuyikwash. Akat kukumangan kand mulong wa kumekesh kujikitish kwau piur pa yakupesh yivurikinau ku Chivurikish, yakupesh yisadina anch ikal ni ruchingej ra kushakam chikupu pa divu. Anch amikoku akwau akat kukumangan ku Chivurikish chid kand mulong wa kuziyin kwi mbil ya Yesu. Kapamp kakusambish kasalay Yesu musambu wa Yakudia ya Urel ya Mwant pamwing ni atwimbuy end ashinshamena wayileja anch: ‘Dandamenany kusal mwamu mulong wa kwinvurik am.’ (1 Kor. 11:23-26) Chawiy, amikoku akwau adandamedin kukumangan ku musambu winou pachidiau kal in Kristu akwau azizidilau many pa divu. w21.01 17-18 par. 13-14

Mulong wa kwikal ni rukat rakin, tufanyidin kand kurimekeshin mu yisal. (Ilakej ni Jakobu 2:17, 26) Chilakej, Yehova utukatin. (1 Yoh. 4:19) Ni ukat kutulej anch utukatin kusutil mazu mawamp mafundinau mu Bibil. (Kus. 25:10; Rom 8:38, 39) Pakwez, twij nawamp anch Nzamb utukatin kadiap kwau ching mu mazu, pakwez kand kusutil yom yisadinay. Yehova walikidina anch mwanend mukatish amana mar ni afa mulong wetwetu. (Yoh. 3:16) Tukwet kamu kashinsh anch Yehova utukatin! Tukat kumekesh anch tumukatin Yehova ni Yesu anch twayiziyin. (Yoh. 14:15; 1 Yoh. 5:3) Ni Yesu watuleja kukatijan umwing ni mukwau. (Yoh. 13:34, 35) Tufanyidin kumekesh anch tuyikatin akadivar ni anambaz netu mu mazu, pakwez tufanyidin kand kumekesh rukat riner mu yisal.​—1 Yoh. 3:18. w21.01 9 par. 6; 10 par. 8

Antu azizidilau many nich spiritu utumbila akwet ruchingej ra kushakam pamwing ni Yesu chikupu ni chikupu, ni kuyikel nend mu Want wa Nzamb. Akwikal pamwing ni Kristu​—akusambish kumuman, kwambamb nend, ni kusutish nend chisu pamwing. (Yoh. 14:2, 3) Antu akweta ruchingej ra kushakam pa divu niyau Yesu ukuyikat ni kuyibangin. Ap anch kakumumanap Yesu, pakwez urund wau ni ndiy ukukasikan nakash pa kudandamenau kusanger mwom ukuyinkishau kudi Yehova ni Yesu. (Isay 9:6, 7) Anch twitiy kutazuk kwa Yesu mulong wa kwikal arund nend, tukat kutaninamu yiyukish yivud. Chilakej, tukat kutaninamu mu rukat rend ni ukwash wend kusambish katat. Tukwet ruchingej ra kushakam chikupu. Ni cha usey nakash, urund wetu ni Yesu ukutushikij ku dilau dipandikena kujimb​—urund wa piswimp ni wa pakampwil pamwing ni Tatukwend a Yesu, Yehova. Didi dilau mud ik tukweta pa kututazuk anch arund a Yesu! w20.04 25 par. 15-16

Mukand winou kambuy Paul wading uyifundidinau in Kristu azizidilau many a mu Korint, ading afanyidina kuvumbuk mulong wa kuya mwiur. In Kristu inay ‘ayitazuka kwikal antu adia zwang mu umwing ni Kristu Yesu. Awiy atazukau kwikal antu atumbila.’ Kupwa, Paul wisambina piur pa ‘awiy alangela kal tul mu rufu mu umwing ni Kristu.’ (1 Kor. 1:2; 15:18; 2 Kor. 5:17) Mu mukand ukwau, Paul wafunda anch antu adia “nend [Yesu] mu umwing mu rufu mudi mwafay” akez “kwikal kand nend mu umwing mu kuvumbuk kwikal kand aom, mudi mwavumbukay ndiy kwikal kand mwom.” (Rom 6:3-5) Yesu wavumbuka nich mujimbu wa mu spiritu ni waya mwiur. Yiney yawiy kand yom yikusadika piur pa antu adia ‘mu umwing ni Kristu,’ charumburik anch in Kristu awonsu azizidilau many. Paul wafunda anch Kristu wavumbuka mud ‘dibuj dia kusambish kud awiy alela mu tul twa rufu.’ (1 Kor. 15:20) Yesu wading wakusambish kuvumbuk nich mujimbu wa mu spiritu ni kutambul mwom wa chikupu. w20.12 5-6 par. 15-16

Nlel anch mwin Kristu uzizidilau many wafa, ukat kuvumbuk kapamp kamwing ni kuya mwiur. Uyakin winou umeken mu mazu ma kambuy Paul madia mu 1 Korint 15:51, 52. Kupwa kwa kuvumbuk, akadivar inay a Kristu akwikal ni musangar upandikena kujimb. Bibil utulejin mudimu ukusalau mwiur kud antu akatau kukarumun “mudi kufet kwa dis.” Yesu wayileja anch: “Mwin kupandakan, ndiy kamu ukuziyila rusot ram djat ni kwisudiel, nikez kamwinkish ulabu wa kutakel michid. Ndiy ukez kayikel nich mukombu wa utad ujal, ukez kayibuz mudi ansab a kam, mudi kand munatambula am ulabu kudi Tatukwam.”​—Kuj. 2:26, 27. w20.12 12 par. 14-15

Pamutazukay Yesu anch ‘dibuj dia kusambish,’ kambuy Paul wamekesha anch kud kand antu akwau akuvumbuka niyawiy mulong wa kuya mwiur. Charumburik anch atwimbuy ni antu akwau kand adia ‘mu umwing ni Kristu’ akumulondul Yesu. (1 Kor. 15:18) Anch chisu chawanyin, akuvumbuk mud mutapu wavumbukay Yesu. Chisu chayifundinau in Korint kud Paul, divumbuk dia antu adia ‘mu umwing ni Kristu’ akuya mwiur diading kandikal disambish kusadik. Pakwez Paul wading wisambidin piur pa yom yikusadika mu machuku ma kurutu, wafunda anch: “Muntu ni muntu ukez kuvumbuk pa chisu chend. Kristu ndiy wa kusambish, chad aend awonsu akez kuvumbuk kwikal kand aom [pa dichuku diend].” (1 Kor. 15:23; 1 Tes. 4:15, 16) Nlel tushich pa ‘dichuku’ dia Nsalejetu. Chakin kamu, atwimbuy nau in Kristu akwau azizidilau many asambela kufa ading afanyidin kuchingel dichuku dined mulong wa kuya mwiur ni “kwikal kand nend [Yesu] mu umwing mu kuvumbuk kwikal kand aom, mud mwavumbukay ndiy kwikal kand mwom.”—Rom 6:5. w20.12 5 par. 12; 6 par. 16-17

Kambuy Paul wading wisambidin piur pa muntu uvumbwilau nich mujimbu wa mwiur, charumburik anch, “mujimbu wa [mu spiritu].” (1 Kor. 15:43, 44) Chisu chadingay Yesu pa divu, wading ni mujimbu wa mbij. Pakwez chisu chavumbukay, “[wikala spiritu] ukata kupan mwom” ni waya miur. Chilik chimwing, in Kristu azizidilau many akuyivumbul ni mijimbu ya mu spiritu. Paul warumburila anch: “Mudi mutufanakena nend muntu waumbau nich rufunfut ra pansh, mwamu kand mutukeza kafanakan nend muntu wadiokala mwiur.” (1 Kor. 15:45-49) Chid cha usey kuvurik anch Yesu kavumbukap ni mujimbu wa mbij. Paul walonda anch: “Mbij ni mash kiyikutwishap kwandam mu Want wa Nzamb,” mwiur. (1 Kor. 15:50) Atwimbuy nau azizidilau many akwau anch avumbuk, kakuyap mwiur nich mijimbu ya mbij ni mash yikata kuvund. w20.12 10-11 par. 10-12

Nzamb wayitakela in kwilej amwing a Yesu mu mivu chitot ya kusambish chakwel afund piur pa ruchingej ra mwiur. Kambuy Yohan wafunda anch: “Katat tudi an a Nzamb, pakwez kand kal tushinshik nawamp mutapu tukeza kikal. Pakwez chom chimwing chitwija chawiy chinech, pakez kamekanay Kristu tukez kafanakan nend ndiy.” (1 Yoh. 3:2) Chawiy, in Kristu azizidilau many kijap mutapu ukwikalau chisu chikuyivumbulau nich mijimbu ya mu spiritu mulong wa kuya mwiur. Pakwez, akumuman Yehova chisu chikutambulau difut diau. Kambuy Paul wafundaku yom yimwing piur pa divumbuk dined. In Kristu azizidilau many akwikal pamwing ni Kristu chisu chikusheshay “kuyikel kwa mitapu yawonsu, ni ulabu wa mitapu yawonsu, ni ukash wa mitapu yawonsu,” kuwejaku ni “mukankuny wa kwisudiel . . . rufu.” Kwinsudiel, Yesu—pamwing ni antu akuyikelay nend—kuwejaku ni yom yawonsu, akwikal mwinshin mwa umutakel wa Yehova. (1 Kor. 15:24-28) Chinech chikwikal chisu chisangareshina nakash! w20.12 8 par. 2

In Kristu awonsu ashinshamena akad kwikal ni ruchingej ra kushakam ni Kristu mwiur niyau akwet ruchingej ra divumbuk. Bibil ulejen anch kambuy Paul ni akwau ayila mwiur akuvumbuk mu “kuvumbuk [kwa kusambish] mu rufu kwikal kand mwom.” (Fil. 3:11) Ov, umenap anch mazu minam mamekeshin anch kukwikal divumbuk dikwau dikwambakenap? Chitongijok chinech chikwatijadin ni yom yalonday Job piur pa ruchingej radingay nich mulong wa machuku ma kurutu. (Job 14:15) “Aend [Kristu] awonsu akez kavumbuk kwikal kand aom [pa dichuku diend],” akwikal ni Yesu mwiur chisu chikusheshay kuyikel kwa mitapu yawonsu, ni ulabu wa mitapu yawonsu, ni ukash wa mitapu yawonsu. Ap “mukankuny wa kwisudiel . . . rufu” akumunongish. Chakin kamu, rufu twaswana kudi Adam rikwikalap kand ni usu kud antu akuvumbuka mulong wa kuya mwiur. (1 Kor. 15:23-26) Ruchingej ra antu akushakama pa divu rimedin pa yom yalonday Paul yilejenau mu mufund wa nlel. Twij nawamp anch kwikil muntu wakad kutentam ukutwisha kuya mwiur, chawiy mazu minam mamekeshin anch kukwikal divumbuk pa divu. w20.12 6-7 par. 18-19

Pamwing ap tukutwish kwiyipul anch: ‘Mutapu ik nikutwisha kwikal kamu nich kashinsh anch Yehova wanlikishidin kal?’ Anch wiyipul chipul chinech, chimeken anch Yehova ukutwish kukulikishin. Pakur, Chinong cha Kalam chalonda anch: “[Tukutwish] kwipwakal ni kuwil mu chitil chimwing tupamp tuvud, pamwing ap mulong chid chaku chading chikunina kal nakash mu mwom wetu kurutu kwa kwijik uyakin. . . . Kangal watong anch chitil chinech Yehova kakutwishap ap pakemp kuchilikishin. Satan ukatin anch utonga mwamu. Mulong unenganen ni wiswidioshin mulong wa yom yiyimp wasadina, umekeshin anch udiap muntu muyimp ni Yehova ukutwish kukulikishin. Kangal wov wom wa kudandamen kumwit Yehova dilikishin nich kwikepish, ni chakwel akukwash kwikal ni kom kishitwila.” Kurutu kwa kwikal mwin Kristu, kambuy Paul wasala yitil yikash nakash. Paul wavurikang yom yasalay. (1 Tim. 1:12-15) Pakwez Wading ukwatin chipan cha difut mud achipana pakampwil mulong wendendiy. Chawiy Paul kifishap nich kusut chipim, ni wadandamena kumusadin Yehova nich usu wend wawonsu. w20.11 27 par. 14; 29 par. 17

Satan usadidin yom yivud mulong wa kutubachik kusal yom yiyimp. Mutapu ik tukata kusal? Chikutwish kuswapal kutong anch yom yiney yiyipinap kwau. Chilakej, tukutwish kutong anch: ‘Kakwingopatap kwam mu chikumangen mulong wa chom chinech, chawiy chimeken anch chiyipinap kwau nakash.’ Chitongijok mudi chinech chidi chiyimp nakash. Chidi chiwamp kwiyipul yipul mudi yiney: ‘Ov, Satan usadidin mupit winou mulong wa kwauril muchim wam? Anch naziyin ku maku mayimp, ov, nikutwish kusaadikish dijin dia Nzamb? Ov, chisal chinech chinsejishin piswimp ni Nzamb wam bil anch chingauril kulemp ni ndiy?’ Tongijokin nakash pa yipul mudi yiney. Lembil mulong wa kwit manangu ma kwakul ku yipul yiney nich kashinsh kawonsu. Anch wasal chom mudi chinech ukwikal mu diking diakin. Kusal mwamu kukutwish kukukwash kwipuk choziu nich kutakaman mudi mwasalay Yesu palonday anch: “Diokal kwa Satan!” (Mat. 4:10) Vurik anch muchim waurikina ukwetap usey. w20.06 12-13 par. 16-17

Tukat kumuziyinang Yehova nich kwikepish, mulong twij anch Yehova wijing chisu chawonsu yom yidia yiwamp mulong wetwetu. (Efes 4:22-24) Kwikepish kutubachikining kutek rusot ra Yehova pa ndond ya kusambish mu mwom wetu ni kuyiman antu akwau anch atupandikenamu etu. Mudi chibudikin, tukusanger urund uwamp ni Yehova nau ambay netu in Kristu. (Fil. 2:3) Anch tubabelap, tukutwish kuyimburij antu in kwitutul ni in kwitongin ayinau adia mu mangand minam matakedilau kudi Satan. Chimeken anch winou wading ubaj wayishikena in Kristu amwing a mu mivu chitot ya kusambish C.C., mulong kambuy Paul wafunda kudi in Rom anch: “Nikat kukulejany en awonsu anch, kangal wapandakeshany kwitong ayinen chamwamu. Pakwez itongany [mu chilik chisikena].” Paul wading wij anch tukutwish kwitongin ayinetu mu chilik kanang. Pakwez, kwikepish kukutukwash kwikal nich chitongijok chisikena piur pa mutapu twimena ayinetu ni kukutukwash kwipuk kwitongin nakash ayinetu. w20.07 2 par. 1-2

Pa chirung cha Mwant Asa, chisu cha chisambu chadandamenap bwat. Chisak chijim cha amasalay miliyon umwing ni kusut akweta usu nakash, cheza kudiokal ku Etiopi. Kalal wau, Zerak, wading nich kashinsh anch amasalay end akuyinongish in Yuda. Pakwez Asa wamuchingejina Yehova Nzamb, kachingejinap uvud wa amasalay end. Asa walembila anch: “Ez utukwasha, amboku, [Yehova] Nzamb wetu, mulong tukungamedin kudi ey, mu dijin diey mwawiy twezidila kurish ni chisak chijim mudi chinech.” (2 Jsng. 14:11) Ap anch amasalay in Etiopi ading avud nakash tupamp twaad kuyisutamu amasalay a Asa, Asa wading wij anch Yehova ukwet usu ni ukuyirishin atushalapol End. Ni chakin kamu, Yehova wayikwasha antu end; wayikwatisha amasalay in Etiopi usany. (2 Jsng. 14:8-13) Ap anch twijap kamu nawamp yom yikumushikena muntu ni muntu pakach petu mu machuku ma kurutu, pakwez twij anch chisambu chikwetau antu a Nzamb nlel chikudandamenap bwat. Vurik anch Yesu wayileja in kwilejend anch mu machuku ma nsudiel “antu awonsu akez kakukisany.”​—Mat. 24:9. w20.09 17-18 par. 14-16

Kwikil muntu ap umwing ukatining kumusaal. Pakwez chikalap nchik mwamu, anch akankuny netu atusaal ni twiyakamish nakash piur pa yom yilondinau, tukutwish kuziy. (Jnsw. 24:10) Chad, mutapu ik tufanyidina kuman masaal ma akankuny netu? Mudi Kambuy Paul, tukutwish ‘kusanger . . . mu masaal.’ Mulong wak? Mulong anch antu atusaal ni atupompat, chinech chimekeshin anch tudi kamu in kwilej akin a Yesu. (1 Pita 4:14) Yesu walonda anch in kwilejend afanyina kuyizengol. (Yoh. 15:18-20) Yiney yawiy yom yasadika mu mivu chitot yakusambish. Pa chisu chinicha, antu ading akatina yishankur ya in Grek ayimanang in Kristu mudi antu akad manangu ni akad usey. Ni ayimanang in Kristu pakach pa in Yuda mudi “antu amwamu akad kwilej,” mudi kambuy Pita ni kambuy Yohan. (Mid. 4:13) In Kristu ading ameken mudi aziyin ni kakwetap diking mulong kiyandjikangap mu yom ya politik ap ya usalay, ni antu ayimanang mudi antu akad usey. Ov, in Kristu inay a mu mivu chitot ya kusambish alikidina anch yitongijok ya akankuny nau yiyikangesh kulejan? Bwat. w20.07 14-15 par. 3-4

Kambuy Yohan wading wiyakamishin nakash piur pa ritiy ra akadivar nend, ni yovil yiney yimeken patok kusutil yiyul yapanay mu mikand yend yisatu yafunday. Chitusangareshin nakash mud ik pa kwijik anch amakundj nau amband azizidilau many akuyikela ni Kristu ayikatin ni akat kuyibangin akadivar ni anambaz nau mudi mwasalay Yohan! (1 Yoh. 2:27) El tudandamenany kuvurik yiyul twisambina kal ey. Tukwatany amboku mupak wa kwendil mu uyakin ni wa kumuziyil Yehova mu mwom wetu win wawonsu. Ileja Dizu dia Nzamb, ni dichingejina. Kasikesh ritiy rey mudiay Yesu. Ipuk manangu ma antu ni mafundish ma in kupumbok. Kangal wayitesh antu akubachikina kwikal ni mashakamin ma rubabek ap kusal chitil. Shakam kukwatijan ni mbil ja piur ja Yehova. Ni el tuyikwashany akadivar netu kulam ritiy rau rikash kusutil kuyilikishin akata kuturumbukin ni kuyikwash adia mu maswir. Anch twasal mwamu, chikalap nchik yikokujol turishina nich, tukudandamen kwendil mu uyakin. w20.07 24-25 par. 15-17

Yehova Nzamb wa rukat ukatin anch atushalapol end awonsu ashinshamena ikal mu chikumangen. Chawiy, ap anch tukwet midimu kushalijan, pakwez etu awonsu tudi a usey ni muntu mwawonsu ukwet kuswir kwa mukwau. kambuy Paul wamekesha nich kashinsh anch, kwikil muntu ukutwisha kumupipej kashalapol mukwau wa Yehova ni kumwel anch: ‘Nikwetap kuswir kwey.’ (1 Kor. 12:21) Anch tukimbin anch mu chikumangen mwikal chisambu, tufanyidin kuyikwat akwetu nich usey ni kusal etu awonsu pamwing. (Efes 4:16) Anch twasal etu awonsu pamwing mu uumwing, chikumangen chikukasikan ni muntu mwawonsu ukwiyov anch amukatin. Amakurump awonsu a chikumangen akat kuyitondang ku ukwash wa spiritu utumbila. Pakwez mukurump ni mukurump ukwet ukaliweny wend ushalijadina ni wa akwau. (1 Kor. 12:17) Pamwing ap akadivar amwing ayitondin kwikal amakurump katat, chawiy kandikal ikal ni ukaliweny uvud mudi amakurump akwau. Pamwing ap kand amakurump akwau katwishinap kusal yom yimwing mulong wa upal ap mulong wa mayej. Ap mwamu, kwikil mukurump ap umwing ufanyidina kuyipipej akwau ap kumuman mukwau mudi kakwetap usey. Pakwez, mukurump mwawonsu ufanyidin kusadin chiyul chapanay kambuy Paul chidia mu Rom 12:10. w20.08 26 par. 1-2; 27 par. 4

Yehova ukat kututakel mwi njil ya mwom kusutil chikunku cha dirijek diend chidia pa divu. Anch dirijek diatwinkish umutakel piur pa mwikadil tufanyidina kwikal nich, tukat kwitiy ni kusadin umutakel winou pakad kulab. Pakwez, mutapu ik tukata kusal anch dirijek dia Nzamb diapan umutakel ukutwisha kuswimp yom kanang mu mwom wetu, chilakej anch akwat mupak wa kulandish Chot cha Want chitukata kukumangen? Tukulam musangar wetu anch twavurik anch tumusadidin Yehova, ni ndiy amwinend utakedila dirijek diend. (Kol. 3:23, 24) Mwant David watushila chilakej chiwamp papanay nfalang mulong wa kutung nich tempel. Walonda anch: “Ov, am nidi nany, ni antwam adi anany chakwel ing tupana mulambu wakin? Oku yom yawonsu yadiokala kudi ey, chawiy yom yitukwinkishina yidiokil ku chikas chey.” (1 Jsng. 29:14) Patukata kupan milambu yetu, tukat kumwinkish Yehova yom yatwinkishay kand amwinend. Pakwez, Yehova ukat kusanger nakash chisu chetu, usu wetu ni mapit metu tukata kupan mulong wa kukwash midimu yend.​—2 Kor. 9:7. w20.11 22-23 par. 14-16

Mulong tudi Atuman a Yehova, kadiap uvud wa antu tuletininga mu dirijek dia Nzamb umekeshina anch tusadin nawamp mudimu wetu wa kulejan. (Luka 8:11-15) Anch twadandamen kulejan ni kuyifundish antu akwau rusangu ruwamp, Yehova ukutuman anch tusadin nawamp mudimu wetu. Mulong wak? Mulong tumekeshin anch tumuziyidin ndiy ni Mwanend. (Mar. 13:10; Mid. 5:28, 29) Tukwet diyingishin dikwau ditubachikina kwipan nakash mu mudimu wa kulejan katat: Disudiel dia mangand minam diezin mau nakash! Chisu chashala kal cha kusal mudimu winou upandishina antu chashal kal chikemp nakash. Kangal waladikij yom ap kuchingel anch ching chisu chawap chakwel wipan lel mu mudimu winou wa usey nakash. Chinech chawiy chisu cha kukasikesh mayingishin mey makubachikina kulejan, kukudish ronganyin rey ra Bibil, kukudish mwikadil wa kutakaman, ni kukudish mwikadil wey wa kwikasikesh. Sal pamwing nau in kulejan amiliyon chinan ni kusuta alejena rusangu ruwamp pa mangand mawonsu, ni ukwimenap amwiney musangar upaninay Yehova. (Neh. 8:10; Luka 5:10) Kwat mupak wa kwipan nakash mu mudimu wa kulejan djat ni pa chisu chikulonday Yehova anch kwapwa kal. w20.09 7 par. 18-20

Tufanyidinap kulikidin maku ma kukimb yom ya ku mujimbu matuletin kampuw. “Rukat ra mapit” rikutwish kutalesh rukat retu mulong wa Yehova, rikutwish kutushikij ku kulik kukwat nich usey Dizu dia Nzamb, ni rikutwish kutushikij ku kushadish musangar wetu wa kudilejan kudi antu akwau. (Mat. 13:22) Anch twaman ubaj, tufanyidin kuwipuk pakad kulab anch tukatin kulam baang yom yatwinkishau kudi Yehova. Tufanyidin kusambel kwijik yom tukusala anch twabudikin yom ya masandj, yom ya chisum, ap nsangu jipalangeshinau in kupumbok chisu tudia pa Internet, tutadina filim ap chisu tutadina program kampand ku Televizion. Kusambel kwirijek mulong wa yom yikutwisha kushiken, kukutukwash kuchidij urund wetu ni Yehova ni kushal ishitwila ku mes kwend anch ubaj washiken. (Kus. 101:3; 1 Tim. 4:12) Tufanyidin kuchidij yom ya usey yatwinkishinau kal kudi Yehova. Yom yiney yidi, uyakin wa Bibil ni dilau dia kuyifundish antu akwau uyakin winou. Anch twasal mwamu, tukwikal ni kom kishitwila, tukwikal ni mwom usangareshina, ni tukwikal ni musangar udiokila ku kuyikwash antu akwau kumwijik Yehova. w20.09 30 par. 16-19

Ov, akubatishin kal? Anch mwawiy, piwatambula dibatish, wamekesha patok ritiy rey mudiay Yehova ni wamekesha anch ukatin kumusadin pamwing ni dirijek diend. Mutapu utakedinay Yehova dirijek diend nlel umekeshin wuntu wend, rusot rend ni mutapu udia mbil jend. Tal mikadil yisatu ya Yehova yimekena kusutil dirijek diend. Chakusambish, “Nzamb kakwetap kasolikany.” (Mid. 10:34) Rukat rawiy ramubachika Yehova kumupan Mwanend mulong wa “kuyikwol antu awonsu.” (1 Tim. 2:6; Yoh. 3:16) Mulong wa kuyikwash antu awonsu kutambul yiyukish ya difut, Yehova ukat kuyisadin atushalapol end chakwel alejan rusangu ruwamp kudi antu awonsu akatina kutesh. Cha kaad, Yehova udi Nzamb wa chisambu ni wakad kanvundangesh. (1 Kor. 14:33, 40) Chawiy, atushalapol end afanyidin kand kumusadin mu chisambu ni pakad kanvundangesh. Cha kasatu, Yehova udi ‘Mulej Mujim.’ (Isay 30:21) Chawiy, dirijek diend dikat kusal usu nakash wa kufundish Dizu diend, Bibil mu chikumangen ni kudi antu akad kand kumwijik. w20.10 20 par. 1-3