Ngond wa 5

Padingay pa divu, Yesu wakwata mupak wa kuyiziyin anvaj end. Katongap anch wij yom yivud kuyisutamu anvaj end, ni kayibwambwilap. Pakad kwidjidjek, Yesu wakwata nich usey chisend chend cha kuvadik mwan wa kusambish. Wasala usu wa kwilej mudimu wa makas kudi tatukwend wa katwumb, Josef chakwel atwish kukwash dijuku diau. Chimeken anch anvaj a Yesu amuleja mutapu wavadikay mu chilay ni yom yalonday mwangel wa Nzamb piur pend. (Luka 2:8-19, 25-38) Yesu kasangerap kwend kusu yom yamulejau, pakwez amwinend niyend wileja Mifund. Yom ik yimekeshina anch Yesu wading mwin kwilej muwamp wa Dizu dia Nzamb? Mulong padingay uchid nsangarum, alej a mu Yerusalem “ashimwoka nakash, mulong wakulanga kwa manangu.” (Luka 2:46, 47) Ni padingay uchid kwend ni mivu 12, wamekesha patok anch Yehova wading Tatukwend.​—Luka 2:42, 43, 49. w20.10 29-30 par. 13-14

Anch tuchingejin anch akatish netu akuvumbuk, chid mulong wa divumbuk dia Yesu. Kwinsambishin kwa mambamb mend piur pa divumbuk, kambuy Paul wisambina uyakin usatu: (1) “Kristu wafa mulong wa yitil yetu.” (2) “Amujika.” (3) “Pa dichuku dia chisatu ndiy wavumbuka wikal kand mwom mudi mufundilau mu Mukand wa Nzamb.” (1 Kor. 15:3, 4) Rufu ra Yesu, kumujik, ni divumbuk diend yirumburikin ik kud etu? Muprofet Isay wasambela kulejan anch Mesia akez “kumujip” ni “[kumujik] nau antu ayimp.” Pakwez kud yom yivud yafanyina kusadik. Isay wawejinaku anch Mesia ukusend “yitil ya antu avud.” Yesu wasenda yitil yiney chisu chapanay mwom wend mud difut. (Isay 53:8, 9, 12; Mat. 20:28; Rom 5:8) Chawiy, kufa, kumujik, ni kuvumbuk kwa Yesu kutwinkishin ruchingej ra kukolik ku chitil ni rufu ni kumanijan kand ni akatish netu afila kal. w20.12 2-3 par. 4-6, 11

Kambuy Paul walejanang yisu yivud mu masinagog ma in Yuda. Chilakej, mu sinagog wa ku Tesalonik, ‘mu machuku masatu ma sabat, ndiy watongijokang nau [in Yuda] yom ya Mukand wa Nzamb.’ (Mid. 17:1, 2) Chimeken anch Paul wiyova nawamp nakash mu sinagog. Amulila mudi mwin Yuda. (Mid. 26:4, 5) Paul wafanyina kuyitesh nawamp in Yuda, chawiy watwisha kuyifundish nich kashinsh kawonsu. (Fil. 3:5) Kupwa kwa kumubachik Paul kuchin kudiokal ku Tesalonik ni ku Berey kudi in kumupompat, waya ku Aten. Kapamp kakwau kand, “[watongijokang] nau in Yuda mu [sinagog], pamwing nau antu a michid yikwau ading ni kumwifukwil Nzamb.” (Mid. 17:17) Pakwez chisu chading chilejenay Paul pa sok, ading amuteshin kudi antu ading ashalijadina ni afundishangay mu sinagog. Pakach pa antu inay pading afilozof ni Akamichid ading amena uruu wa Paul mudi “malejan masu.” Amwela anch: “Mazu mamwing miukata kulond madi mazu masu kudi etu.”​—Mid. 17:18-20. w20.04 9 par. 5-6

Kangal watong anch ukwetap usey anch urishin pa kulikap chisal chiyimp kanang. Vurik anch etu awonsu tukat kurumbok ni etu awonsu tuswirikedin ranaken ra Yehova ritumekeshidinay kusutil difut. (Efes 1:7; 1 Yoh. 4:10) Ni akadivar ni anambaz netu adia mu chikumangen akutwish kutukasikesh! Akutwish kututesh patuyilejina yakamish yetu ni akutwish kutukasikesh nich mazu mawamp. (Jnsw. 12:25; 1 Tes. 5:14) Nambaz Joy, wa mu Nigeria warisha ni kuziy ulondin anch: “Nijap mutapu nafanyina kwikal pakad akadivar ni anambaz nam. Ad chakul cha Yehova ku malembil mam. Kusutil awiy, nileja niyam mutapu wa kuyikasikesh antu akwau aziyina.” Pakwez, tufanyidin kwijik anch akadivar ni anambaz netu kakwijikap chisu chawonsu anch tukwet kuswir kwa ukwash. Chawiy, tufanyidin kuya kud mbay netu mwin Kristu uswila ni kumulej patok anch tukwet kuswir kwa ukwash. w20.12 23-24 par. 7-8

Yisu yivud, chom chakusambish tukata kusal mulong wa kuta urund wa piswimp ni muntu chiding kusutish nend chisu pamwing. Piudandamedinanya kwambamb umwing ni mukwau, kulejijan yitongijok ni yovil, urund wen ukat kukasikan nakash. Pakwez yisu yimwing, tukat kurish ni yikokujol yimwing mulong wa kuta urund wa piswimp ni Yesu. Chikokujol chimwing chidi anch kand kal tumumanangap Yesu. In Kristu avud a mu mivu chitot ya kusambish niyau arisha ni chikokujol chinech. Ap mwamu, kambuy Pita wafunda anch: “En umukatilany ndiy wakad kal en kumumananyap ku mes, en umwitiyijinany, ap anch kiumumenanyap.” (1 Pita 1:8) Chawiy chitwishikin kuta urund wa piswimp ni Yesu ap anch tumumenap ku mes. Chikwau kand, tukwetap mutapu wa kwambamb ni Yesu. Pitukata kulembil, yitongijok yetu yikat kuya kapamp kamwing kudi Yehova. Chidi chakin anch tukat kulembilang mu dijin dia Yesu, pakwez tukatap kwambamb ni ndiy. Ap Yesu win kakatiningap anch etu tumulembil ndiy. Mulong wak? Mulong malembil didi difukwil, ni ching kusu Yehova ndiy tufanyidina kwifukwil. (Mat. 4:10) Ap mwamu, tukutwish kumekesh anch tumukatin Yesu. w20.04 20 par. 1-3

In kubambil a mu masengan ma Grek afanyina kurish ni yakamish mudi kuziy ni kusansan. Pakwez ruchingej rau rawonsu rading mu kufumb kwatambulau ni mu usu wau ayinau. Mudi in kubambil inay, niyetu tukat kutambulang kufumb piur pa mutapu wa kubambil. Pakwez etu tuyisutinamu in masengan ma kubambil. Etu tukutwish kumuchingejin Yehova, musul wa usu wakad mimbu. Anch twamuchingejin Yehova, ushidinamu kadiap ching kusu kutufumb pakwez kand kutwinkish usu!​ Kambuy Paul wading ni yakamish yivud yafanyinay kurish nich. Kudioshaku masaal ni rupompat ra antu akwau, yisu yimwing waziyang ni wafanyina kand kurish ni chakamish chatazukay anch “rubwambu ripampinau mu mujimbu.” (2 Kor. 12:7) Pakwez pa ndond pa kuman yakamish yiney mudi diyingishin dia kulik kumusadin Yehova, wayimana mudi yimwinkishin mutapu wa kumuchingejin Yehova. (2 Kor. 12:​9, 10) Mulong Paul wading ni chitongijok chinech chiwamp, Yehova wamukwasha kupandikan yoziu yend. w20.04 29 par. 13-14

Tukwet chipan chakad kumekan ku mes cha “kusal mudimu pamwing” ni Yehova, Yesu ni angel. (2 Kor. 6:1) Tukat kusal nau pamwing chisu chawonsu tudia mu mudimu wa kwikadish in kwilej. Paul walonda piur pa amwinend ni pa antu awonsu ipanina mu mudimu winou anch: ‘Tudi ambay a mudimu pamwing ni Nzamb.’ (1 Kor. 3:9) Chisu tusadina mudimu wa win Kristu, tudi kand ambay a mudimu pamwing ni Yesu. Vurik anch kupwa kwa kuyilej in kwilejend chakwel ‘ikadish antu a ku michid yawonsu in kwilej,’ Yesu walonda anch: “Am nidi nen.” (Mat. 28:19, 20, TMK) Chad chidi nchik piur pa angel? Chid chiyukish mud ik kwikal atakedilau kudi angel chisu tulejena “rusangu ruwamp rushichinga chikupu . . . [kudi] antu ashicha pa mangand”! (Kuj. 14:6) Yom ik tuwanyishina kusutil ukwash tutambwila kudiokal mwiur? Patukata kukun uruu wa Want, mbut jimwing jikat kuwil mu michim yiwamp ni jikat kukul. (Mat. 13:18, 23) Nany ukata kukudish mbut jinej ja uyakin ni kujisongish mabuj? Yesu warumburila chom chinech mu mazu ma mufund wa nlel. w20.05 30 par. 14-15

Nlel antu avud akat kujip mauruw. Ap antu adia mu chikumbu chimwing ashich mud antu akad kwijikijan. Chilakej, ikundj umwing ukata kuyulang majuku ulondin anch: “Tatuku, maku ni an, kakatap kand kwambamb pamwing ni akat kusutishin chisu chau chivud ku ma ordinater, ku ma tablet, ma telefon, ap ku masengan ma video. Ap anch ashich mu chikumbu chimwing, pakwez kijikijadinap kamu kwau nawamp.” Tukatinap kwikal mud antu avud adia mu mangand minam akad rukat. Tufanyidin kwilej kuyikat nakash anamakwetu a mu dijuku ni kand akadivar ni anambaz netu mu chikumangen. (Rom 12:10) Rukat ra mutapu ik twisambidina? Twisambidin rukat rikata kuyibachik antu a mu dijuku dimwing kukatijan nakash ni kwikal mu urund wa piswimp. Wawiy winou mutapu tufanyidina kuyikat akadivar ni anambaz netu mu chikumangen. Anch twakudish rukat nakash, tukulam uumwing ni kumwifukwil Yehova nich musangar.​—Mike 2:12. w21.01 20 par. 1-2

Chisak cha masengan chidia mu uumwing chikutwish kwikal ni katok ka kuwin kusutamu chisak chaurikina. Muchim wey ukutwish kwikal mudi chisak chinech chikweta katok ka kuwin anch yitongijok yey, yom ukatina ni yovil yey yibombaken mu uumwing mu kumusadin Yehova. Vurik anch Satan ukatin kwauril muchim wey. Ukatin anch yitongijok yey, yom ukatina ni yovil yey yipwitamijan ni mbil ja Yehova. Chawiy ey ufanyidin kwikal ni muchim ubombakena chakwel umusadin Yehova. (Mat. 22:36-38) Kangal wamwitiyij Satan auril muchim wey! Mulembila Yehova mudi mutapu walembilay David anch: “[Bombakesh] muchim wam wova dijin diey wom.” Sal yawonsu ukutwisha mulong wa kusadin mazu madia mu malembil minam mu mwom wey. Dichuku diawonsu, kwat mupak wa kumekesh anch ukwet kalimish kakurikina mulong wa dijin ditumbila dia Nzamb mu yom yawonsu usadina, yijim ap yikemp. Mulong udi umwing wa Atuman a Yehova, anch niyey wasal mwamu, ukuyikwash antu kwikal ni kalimish piur pa dijin dined. (Jnsw. 27:11) Ni etu awonsu tukutwish kulond mudi mwalonday muprofet Mike anch: ‘Tukez kwendin mu dijin dia Yehova Nzamb wetu chikupu ni chikupu.’​—Mike. 4:5. w20.06 13 par. 17-18

Anch mwant wa kwiyand ni maguvernema makwau ayirishikish atushalapol a Nzamb, chinech chikumujimesh nakash Nzamb Mwin Dikand Diawonsu, kupwa njit ja Harmagedon jikusambish. (Kuj. 16:14, 16) Pa chisu chinicha, mwant wa kwiyand ni michid yikwau yisadina Gog wa Magog akuyinongish, ni kakumanap “muntu mwin kumukwash.” (Dan. 11:45) Verse udia kwinshin ou mu uprofet wa Daniel urumburil yom yivud piur pa mutapu ukumusheshau mwant wa kwiyand pamwing ni maguvernema mamunungina chikas ni mutapu ukutupandishau. (Dan. 12:1) Verse winou urumburikin ik? Mikayel didi dijin dikwau dia Mwant wetu, Yesu Kristu. Wasambisha “kuchidij” atushalapol a Nzamb kusambish kamu chisu chikalay Mwant mwiur mu muvu wa 1914. Piswimp ap, “ukwez” mulong wa kuyishesh akankuny nend kwi njit ja Harmagedon. Njit jinej jikwikal chinship cha nsudien cha chirung chatazukay Daniel anch “chisu cha mar” chipandikena kuyip mu rusangu ra antu.​—Kuj. 6:2; 7:14. w20.05 15-16 par. 15-17

Padingay Josef muswik ni kupwa padingay kand mu rukan, kadingap kakweta chakusal mulong wa kuswimp mashakamin mend. Yom ik yamukwasha kulam musangar? Pa ndond pa kushinshikin pa yom yakadiay kwikal ni mutapu wa kusal, wipana nich mushiku mu mudimu wawonsu wamwinkishangau. Josef wading ushinshikidin pa chom cha usey nakash, kumusangaresh Yehova. Mud chibudikin, Yehova wayukisha chom chawonsu chasalay Josef. (Dis. 39:21-23) Rusangu ra Josef rituvurishin anch mangand minam mad ma chisum ni antu akutwish kutusadin nich kuburen kutentam. Ap ambay netu in Kristu akutwish kutusadin nich kuburen kutentam. Pakwez, anch twamuman Yehova mud Diyal dietu ap Mpwembu yetu, tukutwishap kuziy ap kwimik kumusadin. (Kus. 62:6, 7; 1 Pita 5:10) Vurik kand anch Josef wading ni mivu piswimp 17 chisu chamulejau yilat yiney kud Yehova. Chawiy, Yehova uyichingejidin ansand amusadidina. Nlel unou ansand avud ad mud Josef. Akwet niyau ritiy mudiay Yehova. Amwing pakach pau akat kuyitek mu rukan mulong wa kushinshaman kwau kud Nzamb.​—Kus. 110:3. w20.12 16 par. 3; 17 par. 5, 7

Kambuy Pita ni kambuy Yohan amana anch chidi cha musangar kuyipompat mulong wa kumwambat Yesu ni kuyifundish antu akwau piur pend. (Mid. 4:18-21; 5:27-29, 41-42) In kwilej kadingap ni diyingishin ap dimwing dia kwov usany. Ap anch antu ading ayinyingumukina kayilimishangap, in Kristu inay a mu mivu chitot yakusambish asala usu nakash wa kuyikwash antu akwau. Chilakej, mabuku ma mu Bibil mafundau kudi amwing a pakach pa in Kristu inay madandamedin djat ni nlel unou kukwash mamiliyon ma antu ni kuyinkish ruchingej. Ni Want wading ulejenau uyikedin katat mwiur ni piswimp ap ukuyiyikel antu awonsu. (Mat. 24:14) Mu kufanikesh, guvernema wa usu wa Rom wa pakur wayizengolang in Kristu wawa kal kwasutin kal mivu yivud, pakwez in Kristu inaya ading ashinshamena adi katat ant mwiur. Chikwau kand, antu ayipompatang afil kal; ni ap anch akuvumbuk, akuyiyikel kudi Want walejanangau kudi in Kristu ading akisinau.​—Kuj. 5:10. w20.07 15 par. 4

Aburaham wading ni ritiy riner rikash mu kushilamu kwa Nzamb ni chading mudi wamumana Uzizidilau Many ap anch Mesia wafanyina kwikal Mwant wa Want wa Nzamb. Diawiy diyingishin diasala anch Yesu ayilej in Yuda a pa chirung chend anch: “Tatukwen Aburaham wasangara nakash mulong ndiy wijika anch, chisu cham cha kwez pa mangand chikat kwez. Ndiy wasangara nakash pamanay chom chinech.” (Yoh. 8:56) Chakin kamu, Aburaham wading wij anch anend amwing afanyina kwikal mu Want wafanyinau kutek kudi Yehova, ni wachingela kwa kwikatin chakwel Yehova awanyhisha kushilamu kwinoku. Mutapu ik wamekeshay Aburaham anch wading uchingedin musumb, charumburik anch Want watenchikau kudi Nzamb? Chakusambish, Aburaham kiyandjikap mu want ap umwing wa pansh. Wading mwin kutambitamb, charumburik anch kashakamap ndond yimwing ni kamukwashap mwant ap umwing wa chiuntu. Chikwau kand, Aburaham kapakishap ap pakemp kwisadin want wend amwinend. Pakwez, wadandamena kumuziyin Yehova ni wachingela chakwel Yehova awanyish kushilamu Kwend. Kusutil kusal mwamu, Aburaham wamekesha ritiy rimwing ra pakampwil mudiay Yehova. w20.08 3 par. 4-5

Yehova ushidinamu anch mu Paradis kwikil muntu ap umwing ukeza kalond anch: “Niyedin.” (Isay 33:24) Chakin kamu, antu akuvumbuka akwikal nich ukash uwamp wa mujimbu. Pakwez, kakwikalap kapamp kamwing awanyidina. Anch chamwamu, chikuyikasiken anamakwau kuyonganyin. Chimeken anch antu awonsu akwikal awanyidina pakemp pakemp mu chirung cha Winyikel wa Mivu Kanan wa Kristu. Yesu ukuchirish Want kudi Tatukwend ching kwinsudiel kwa mivu kanan. Pinipa Want ukwikal wawanyishin kal rusot ra Yehova ni kuyikadish antu awanyidina. (1 Kor. 15:24-28; Kuj. 20:1-3) Tongin bil mutapu ukwiyova chisu ukwakijana kand nau akatish ney. Ov, musangar ukwova ukukubachik kusip bil anch kudil? Ov, musangar ukukupandiken mu chilik cha kusambish kumutumbish Yehova nich miminy? Uyakin udi anch ukumukat nakash Yehova, Tatukwetu wa rukat ni Mwanend utukatina mulong wa chipan chipandikena kuwap cha divumbuk. w20.08 16-17 par. 9-10

Kambuy Paul wayikasikesha in Kristu kushinshikin mulong wa kuman anch akutwish kumusadin Yehova mudi ajich. (1 Kor. 7:8, 9) Chakin kamu, Paul kayidiburilap in Kristu ajich. Chawiy, wamutonda nsand Timote, mukadivar mujich mulong wa kuwanyish yisend yijim. (Fil. 2:19-22) Komb, chikwikal chiyimp kutong anch mukadivar uwanyidin kwikal ni yisend ap bwat mulong udi ngatan ap mulong udi mujich. (1 Kor. 7:32-35, 38) Ikala kambuy Paul ap Yesu, kwikil wafundisha anch mwin Kristu ufanyidin kwatan ap anch ufanyidin kushal mujich. Chadi, yom ik tufanyidina kulam mu manangu piur pa uruw ni ujich? Chinong cha Kalam cha 1 Ngond wa 10, 2012 mu Français, chalejana nawamp piur pa mulong winou anch: “Chakin kamu, wikala [uruw ap ujich], yawonsu yidi yipan yidiokila kudi Nzamb. . . . Yehova kameningap [ujich] mudi chom chifanyidina kumubachik muntu kwov usany ap kunenganan.” Chawiy, tufanyidin kuyilimish akadivar nau anambaz ajich adia mu chikumangen. w20.08 28 par. 8-9

Mwi ngand jimwing, antu akat kwitiyang rusangu ruwamp nich musangar nakash. Amekeshining kamu anch adi aswirikedin rusangu riner! Pakwez mu jingand jikwau, antu kasangarediningap kwau yom ya Nzamb ap ya Bibil. Chidi nchik kwi ndond ushicha? Antu atesha ap alika kwau, Yehova ukatin anch tudandamen kulejan djat kamu ni pakulondinay anch kwapwa kal. Anch chisu chatekay kal Yehova chawanyin, mudimu wa kulejan ukwiman ni “disudiel dia mangand [dikwez].” (Mat. 24:14) Yesu wasambela kuyilej in kwilejend mutapu ukwikalau antu ni yom yikusadika mu machuku ma nsudiel; ni yom yiney yikutwish kuyikangesh in kwilejend kutek mudimu wa kulejan pa ndond ya kusambish. Yesu wayiyula in kwilejend anch “babalany.” (Mat. 24:42) Pa chirung cha Nowa, kwading yom yivud yayiletina antu kampuw chakwel alik kutesh kubabesh kwa Nowa. Yom mudi yiney yikutwish kand kutuletin kampuw nlel. (Mat. 24:37-39; 2 Pita 2:5) Chawiy, tukatin kutek pa ndond ya kusambish mudimu watwinkishinay kal Yehova. w20.09 8 par. 1-2, 4

Satan “ujimen nakash,” ni tukutwishap kwipuk yibudikin ya ujim wend. (Kuj. 12:12) Etu awonsu ritiy retu akuripak piswimp ap. Kukwikal “[mar makash], kupandakan mar mamanau [kal] antu kudiokal ku disambishil dia mangand kushik ni katat.” (Mat. 24:21) Pa chisu chinicha, anamakwetu akutwish kutupompat, ap mudimu wetu akutwish kuukangesh. (Mat. 10:35, 36) Tufanyidin kusal mudi mwasalay Mwant Asa, kumuchingejin Yehova chakwel atukwasha ni kutuking. (2 Jsng. 14:11) Yehova ukat kutufumb mu spiritu katat mulong wa yom yikutushikena kurutu. Ukat kumutakel ‘kashalapol ushinshamena ni kubabal’ mulong wa kutwinkish “yakudia pa chisu chiwanyidina” chakwel twimana dang ni kudandamen kumwifukwil Yehova. (Mat. 24:45) Pakwez, chitwitin niyetu kusal usu mulong wa kukasikesh ritiy retu mudiay Yehova.​—Heb. 10:38, 39. w20.09 18 par. 16-18

Yehova ukutwish kusadin ukash wa spiritu wend utumbila anch chikwatijadin nich rusot rend, chakwel anyikel a ngand awanyisha yom yikatinay kusal. Antu akutwish kupund mukwaku mulong wa kupumbwil mem kwi ndond kukatinau. Chilik chimwing kand, Yehova ukutwish kusadin spiritu wend utumbila chakwel akarumuna yitongijok ya antakel a ngand chakwel asala yom yikwatijadina ni rusot rend. Anch yom yiney yashiken, antakel a ngand akwatining mipak yimwing yikata kuyichidij atushalapol a Nzamb. (Ilakej ni Esidera 7:21, 25, 26.) Yom ik tukutwisha kusal? Tukutwish kulembil mulong wa “ant ni antu awonsu akata kutakel” chisu chikatau kukwat mipak yikutwisha kwikal ni yibudikin pa mwom wetu wa win Kristu ap pa mudimu wetu wa kulejan. (1 Tim. 2:1, 2; Neh. 1:11) Mudi mwasalau in Kristu a mu mivu chitot ya kusambish, niyetu tukutwish kumulembil nakash Nzamb mulong wa akadivar ni anambaz netu adia mu rukan.​—Mid. 12:5; Heb. 13:3. w20.11 15 par. 13-14

Ukusangar chipandikena anch yeya wadia wilejina ni mwin kwilej watambula kal dibatish! (1 Tes. 2:19, 20) Anch mwin kwilej wa Bibil waya kurutu ni washiken kutambul dibatish, winou udi uman umekeshina mudimu ukash ni wa kwipan wasadina ey ni in kulejan awonsu a mu chikumangen. Chawiy tukutwish kuyitazuk in kwilej a Bibil anch ‘mikand yikweta mwom ya kwiyijikish nich’ kidiap kusu mulong wa antu ilejina nau Bibil, pakwez kand mulong wa chikumangen chawonsu. (2 Kor. 3:1-3) Chisangareshin nakash pakwijik anch mu mivu yinying, twad tukat kutakel ngond ni ngond malejan ma Bibil piswimp 10 000 000 pa mangand mawonsu. Mu mivu yiney kand, antu piswimp 280 000 adi akat kutambul dibatish muvu ni muvu mulong wa kwikal Atuman a Yehova ni in kwilej asu a Yesu Kristu. Mutapu ik tukutwish kukwash mamiliyon mawonsu minam ma in kwilej a Bibil chakwel ashiken ku kutambul dibatish? Pachishimpishinay kal Yehova muchim ap ni kuyinkish antu chisu ni mutapu wa kwikal in kwilej a Kristu, tukatin kusal usu wetu win wawonsu mulong wa kuyikwash in kwilej a Bibil chakwel ashiken ku kutambul dibatish pakad kulab. Chisu chashala kal chid chikemp!​—1 Kor. 7:29a; 1 Pita 4:7. w20.10 6 par. 1-2

Mwant Saul kamuziyinap Yehova. Ni pamulejau kurumbuk kwend kud muprofet Samwel, Saul kitiyinap kurumbuk kwend. Pakwez wasambisha kwiyingish nich kusutil kupipej uyimp wasalay ni kuyidjibwil antu akwau chisend. (1 Sam. 15:13-24) Kurutu yom yiney yisadik, Saul wasala kand yom mud ya mutapu winou. (1 Sam. 13:10-14) Cha ushon, walikidila chakwel muchim wend witutul. Kaswimpap mutapu wend wa kutong, chawiy Yehova wamupupa ni wamulika. Tukatinap kumwimburij Saul, chawiy tufanyidin kwiyipul ayinetu anch: ‘Pinikata kutang chiyul kanang mu Dizu dia Nzamb, ov, nikat kupakish kuyingish nich mutapu wam wa kutong? Ov, nikat kupipej yom yiyimp nisadina? Ov, nikat kuyidjubwil antu akwau chisend?’ Anch twakul anch mwaning, ap kusu ku chipul chimwing pakach pa yipul yiney, kwawiy kulond anch tufanyidin kuswimp mutapu wetu wa kutong. Anch chamwamu, muchim wetu ukutwish kwitutul ni Yehova kakwitiyap kand anch twikal arund nend. w20.11 20 par. 4-5

Ansand, tondany nany ukusadinanya. Ufanyidinany kwikal nich kashinsh anch Yehova udi nany, risu rusot rend, ni yom ik ufanyidina kusal mu mwom wey mulong wa kusal rusot rend. (Rom 12:2) Mwamu ukutwish chad kukwat mupak wa usey nakash mu mwom wey, mupak wa kumusadin Yehova. (Jos. 24:15) Anch wadandamen kutang ni kwilej Bibil pakad kujing, rukat rey mulong wa Yehova rikudandamen kukul, ni ritiy rey rikwikal rikash. Kwat mupak wa kutek rusot ra Yehova pa ndond yakusambish mu mwom wey. Antu adia mu mangand ma Satan akat kulond anch ang wasadin ukaliweny wey mulong wa kutaninamu amwiney ukwikal ni musangar. Pakwez, uyakin udi anch, antu akata kushinshikin pa yom ya ku mujimbu michim yau yikat kutem nich “yakamish yivud.” (1 Tim. 6:9, 10) Ku mutambu ukwau, anch watond kumutesh Yehova ni kutek rusot rend pa ndond yakusambish, ‘ukukwat mipak nich manangu,’ ni ukwikal ni musangar mu mwom wey.​—Jos. 1:8. w20.10 30-31 par. 17-18

Mu mivu chitot ya kusambish, uruu walejanay Yesu wayinkisha antu a mitapu yawonsu ruchingej. Yesu wayileja in kwilejend kudandamen ni mudimu wasambishay ndiy, kupan uman “djat ni kusudiedila mangand.” (Mid. 1:8) Chakin kamu, kafanyinap kutwish kusal mudimu winou nich usu wau ayinau. Ading akwet kuswir kwa spiritu utumbila—“mwin kukwash” wayikanau kudi Yesu. (Yoh. 14:26; Zak. 4:6) In kwilej a Yesu atambula spiritu utumbila pa Pentekot, 33 C.C. Kusutil ukwash wa spiritu winou, asambisha kulejan pakad kulab, ni mudi chibudikin, kupwa kwa machuku makemp, tunan tuvud twa antu itiya rusangu ruwamp. (Mid. 2:41; 4:4) Chisu chasambishau kuyipompat, pa ndond pa kwov wom, in kwilej amuchingejina Nzamb. Amulembila anch: “Itwinkisha etu atushalapol ey ukash wa kulond dizu diey wakad wom.” Kupwa izula nich spiritu utumbila ni adandamena “kulejan mazu ma Nzamb wakad wom.”​—Mid. 4:18-20, 29, 31. w20.10 21 par. 4-5

Yom ik yitwinkishina kashinsh anch Yehova wamuvumbula Yesu? Kwading antu avud nakash amumana Yesu kupwa kwa kuvumbuk, ni apana uman piur pa divumbuk diend. (1 Kor. 15:5-7) Kaman wa kusambish ulejenau kud Paul wading kambuy Pita (Kefas). Chisak cha in kwilej alonda anch Pita wamumana Yesu kupwa kwa kuvumbuk. (Luka 24:33, 34) Chikwau kand, atwimbuy amumana Yesu kupwa kwa kuvumbuk. Kupwa Kristu “wamekana kapamp kamwing kudi in kwitiyij yitot yitan ni kusuta,” pamwing ap chawiy chisu chasadika chikumangan chisangareshina mu Galalia chisambidinau mu Mateu 28:16-20. Kupwa kand, Yesu “wamekana kudi Jakobu,” pamwing ap ndiy mwanamakwend wading ulikina kwitiyij anch Yesu ud Mesia. (Yoh. 7:5) Kupwa kwa kumuman Yesu, Jakobu wamwitiyija chad. Chisangareshin nakash pakwijik anch pafunday Paul mukand winou piswimp mu muvu wa 55 C.C. antu avud amumana Yesu kupwa kwa kuvumbuk ading achid aom, chawiy muntu mwawonsu wading widjidjekina piur pa divumbuk dia Yesu, wafanyina kuyipul awiy. w20.12 3 par. 5, 7-8

Anch tuyedin, ni pakampwil anch mad mayej makad kuyerikang, chikutwish kutukasiken kutong yom yiwamp. Chawiy, mwita Yehova chakwel akukwash. Ap anch kakatap kutwok mu chilay nlel, pakwez ukat kutwongoj ni ukutwish kutwinkish usu tuswirikedina mulong wa kujijaman. (Kus. 94:19) Chilakej, ukutwish kuyibachik ambay netu in Kristu chakwel atukwasha kusal midimu yimwing ku chikumbu. Ukutwish kuyibachik akadivar kulembil netu pamwing. Ap kand ukutwish kutukwash kuvurik maverse makasikeshina, chilakej maverse misambidina piur pa ruchingej ripandikena kuwap ra mwom wakad mayej ni kusansan mwi ngand yisu. (Rom 15:4) Pakwez, tukutwish pamwing ap kuziy anch tutwishinap kulejan mud mutapu tukatina. Nambaz Laurel ading amuladikin mu mashiny mading mamukwashina kupim mu mivu 37! Warisha ni mayejej ma kanser, amubarila tupamp tuvud, ni wading kand ni mayej ma pa chikit. Pakwez, yakamish yiney yamukangeshap kulejan. Wapanang uman kud amingang ni kud antu akwau ezang kumutal, ni wakwasha antu piswimp 17 kwilej piur pa Yehova! w20.12 24 par. 9; 25 par. 12

Kambuy Paul wading ukwet kuswir kwa ukwash. Piswimp muvu wa 56 C.C., chisak cha antu chamukakina Paul pol pa tempel wa mu Yerusalem ni chakimba kumujip. Mu kwacha, pamutwalau Paul kudi in Sanedrin, kwashala pakemp ni kumuzanon kudi akankuny nend. (Mid. 21:30-32; 22:30; 23:6-10) Pa chisu chinicha, Paul wafanyina pamwing ap kwiyipul anch: ‘Nikujijamen mar minam kushik ni chisu ik?’ Yesu wamukwasha Paul mutapu ik? Uchuku wa dichuku diamukwatau Paul, “Nsalejetu,” Yesu wamumekena ni wamuleja anch: “Kangal wov kwey wom! Ey wamekesh kal uman wey mulong wamam kunoku mu Yerusalem, chawiy chifanyidin kand ey kumekesh uman winou ku musumb wa Rom.” (Mid. 23:11) Mazu minam mamukasikesha nakash Paul! Yesu wamujikitisha Paul mulong wa uman wapanay ku Yerusalem. Ni wamukana Paul anch ukushik nawamp ku Rom, ni ukupan kand uman ukwau kwinikwa. Kupwa kwa kumwinkish kashinsh kinak, Paul wafanyina kwiyov anch ud mu diking mud mwan usendinau mu makas kud tatukwend. w20.11 12 par. 1, 3; 13 par. 4

Ruchingej tukweta mulong wa Want ritukwashin mud ‘nkal mulong wa kuchidij mwom,’ ni rikat kutukwash kwikuchik chisu turishina ni yishiken yikash ap yakamish. Tongijokin piur pa machuku ma kurutu chisu chikupwa yakamish yawonsu. (Isay 65:17) Tongin chisu ukwikala mu mangand masu ma chisambu, mu mangand mwakad yishiken yikutwisha kwakamishan. (Mike 4:4) Ukutwish kand kukasikesh ruchingej rey anch wayilej antu akwau piur pa ruchingej riner. Sal usu wa kwipan mu mudimu wa kulejan ni wa kwikadish in kwilej. Anch wasal mwamu, ukutwish ‘kwikal nich kashinsh kawonsu ka ruchingej djat kamu ni kwinsudiel.’ (Heb. 6:11) Mulong tusejin piswimp ni disudiel dia mangand minam, tukurish ni milong yivud yikutwisha kutwakamish. Tukutwish kujijamen yishiken yiney ni kwikuchik, kadiap nich usu wetu ayinetu, pakwez kusutil kumuchingejin Yehova. Chawiy, el tumekeshany kusutil yisal yetu anch tukwet ritiy mu kushilamu kwa Yehova kulondina anch: “Usu wen udi kudandamen kwikuchik ni kulam ruchingej.”​—Isay 30:15, NWT. w21.01 7 par. 17-18

Kubudik 34:6 ukwatikeshin rukat ra Yehova ni mwikadil ukwau ukata kutusejish kud ndiy​—ranaken rend. (Jak. 5:11, TMK) Mutapu umwing ukatay Yehova kutwanaken ud kusutil kutulikishin kurumbok kwetu. (Kus. 51:1) Mu Bibil, kumwanaken muntu kurumburikin yom yivud kusutamu kwau kumulikishin. Kumekeshin kand yovil yikash yikatay kwov muntu anch wamuman mukwau ukat kuman mar ni yovil yiney yikat kumubachik kumukwash. Yehova urumburil anch yovil yikash yikwetingay mulong wa kutukwash yisutinamu yovil yikwetingay maku mulong wa mwanend. (Isay 49:15) Anch turishin ni mar kanang, ranaken ra Yehova rikat kumubachik kutukwash. (Kus. 37:39; 1 Kor. 10:13) Tukutwish kumekesh anch tuyanakedin akadivar ni anambaz netu kusutil kuyilikishin anch aturumbukin, ni kulik kuyilamin rukuny. (Efes 4:32) Pakwez, mutapu wa pakampwil tukutwisha kumekesh ranaken ud kusutil kuyikwash akadivar ni anambaz netu amena mar. Mwamu tukat kumwimburij Yehova udia chilakej chijim cha rukat.​—Efes 5:1. w21.01 21 par. 5

Ntakel wa dijuku ufanyidin kwikal wisikena. kafanyidinap kwipan nakash mu mudimu wa ku mujimbu mulong wa kuwanyish maswir ma ku mujimbu ma dijuku diend, mu chilik cha kukangany kubangin maswir ma mu spiritu ni yovil ya dijuku diend ni kuyifumb. Yehova ukat kutufumb ni kutupup mulong wa uwamp wetu. (Heb. 12:7-9) Mud Tatukwend, Yesu niyend ukat kuyifumb antu adia mwinshin mwa umutakel wend nich rukat. (Yoh. 15:14, 15) Ukat kuyiyul patok, pakwez mu mutapu uwamp. (Mat. 20:24-28) Wij anch tud antu akad kuwanyin ni yisu yivud tukat kurumbok. (Mat. 26:41) Ntakel wa dijuku uyimburijina Yehova ni Yesu, ufanyidin kwijik anch antu a mu dijuku diend ad akad kuwanyin. Kakatap “kumuzazimwokin” mukajend ap anend. (Kol. 3:19) Pakwez, ukat kusadin mbil jidia mu Galatia 6:1, (TMK) ni ukat kusal usu wa kuyikand nich “muchim wa kwitudish,” ni ukat kuvurik anch niyend ud kwend muntu wakad kuwanyin. Mud mwasalay Yesu, ntakel wa dijuku wijing anch mutapu uwamp wa kufumb dijuku diend ud kusutil chilakej chend. w21.02 6 par. 16-18

Kusutil difut, Yehova walandin kal mwom ya antu awonsu adia mu chikumangen, ni antu akwau akwikala ni ritiy mudiay Yesu. (Marko 10:45; Mid. 20:28; 1 Kor. 15:21, 22) Chawiy, Yehova wading ni diyingishin dia kumutek Yesu, wapana mwom wend mud difut mulong wetwetu kwikal ntakel wa chikumangen. Mulong ndiy udia ntakel wetu, Yesu ukwet ulabu wa kutek mbil piur pa yom yifanyidinau kusal antu a mu dijuku, mu chikumangen ap muntu mwawonsu, ni kushinshikin anch aziyidin kwi mbil jinej. (Gal. 6:2) Pakwez Yesu kakatap kwend kututekin ching kusu mbil. Utukatin ni ukat kutulam. (Efes 5:29) Anambaz akat kumekesh anch amulimishin Kristu kusutil kuziyin ku umutakel upaninau amakundj atondau mulong wa kuyilam. Akadivar akutwish kumekesh anch ovil kurumburik kwa umutakel watenchikay Yehova, anch ayilimish anambaz. Anch antu awonsu mu chikumangen ov kurumburik ni alimish ditenchik dia umutakel, chikumangen chikat kwikal mu chisambu. Ni cha usey nakash, tukat kumutumbish Tatukwetu wa rukat udia mwiur, Yehova. w21.02 18-19 par. 14-17

Chisu chading chimuchinyinay mwant Saul, David ni amasalay end dichuku dimwing asha majuku mau ni aya mu kurish njit. Payau awiy kwi njit, akankuny ayiswinkana kwinyim. Osha yikumbu yau ni majuku mau amasenda mu winkwal. Mulong wading ukwet ukaliweny nakash mu kurish njit, David wading ufanyidin kwend kukwat mupak piur pa mutapu ukutwishay kuyipandish antu asendau mu winkwal. Pakwez, David wamuchingejina Yehova chakwel amutakel. David wamwipula Yehova anch: “Ov, nikutwish kulondul chisak chinicha?” Yehova wamuleja David anch ayilondul, ni wamwinkisha kand kashinsh anch ukuyikamunin antu akwatau mu winkwal. (1 Sam. 30:7-10) Yom ik ukutwisha kwilejin ku rusangu riner? It chiyul kurutu kwa kukwat mipak. En an yimanany anvaj ey. Akutwish kand kukwinkish yiyul yiwamp anch wambamb ni amakurump akweta ukaliweny. Yehova uyichingejidin amakundj inay atondinay kal, niyey ufanyidin kuyichingejin. Yehova uyikwatin mud ‘yipan’ yapaninay kal ku yikumangen. (Efes 4:8) Anch wimburij ritiy rau ni kutesh yiyul yau ya manangu yikwinkishinau, ukutwish kutaninamu nakash. w21.03 4-5 par. 10-11

Yesu walonda anch ang tusadidinap yom twilejina tud mud ikundj utungidina chikumbu chend pa winsukuril. Wimeshin mar ma kutung, pakwez usheshin usu wend chamwamu. Mulong wak? Mulong anch kwatut rinkind ap ruval mukash, chikumbu chend chikuwupuk. (Mat. 7:24-27) Chilik chimwing, anch tusadidinap yom twilejina, tusheshin usu wetu chamwamu. Anch ritiy retu aripak nich yoziu ap rupompat, tukutwishap kwiman bwat. Pakwez, anch twilej ni kusadin yom twilejina, tukukwat mipak yiwamp, tukwikal ni chisambu nakash, ni tukukudish ritiy rikash. (Isay 48:17, 18) Tufanyidin kumuchingejin Yehova kusutil malembil ni kwikal ni chaku cha kwilej Dizu dia Nzamb, mulong wa kushal ashinshamen pa chisu cha yoziu. Ni tufanyidin kuvurik chisu chawonsu anch chom cha usey nakash tufanyidina kusal, kud kumutumbish Yehova. Tufanyidin kwikal nich kashinsh anch Yehova kakutulikap ap pakemp, ni anch kwikil chom ap chimwing chikutwishau kusal antu chikumukangesha Yehova kutukat.​—Heb. 13:5, 6. w21.03 15 par. 6; 18 par. 20