Ngond wa 6

Mulej ufanyidin kumekesh anch umukatin ni umubangidin mwin kwilej wend. Mumana anch ukutwish kwikal mukadivar ap nambaz netu mu machuku ma kurutu. Chiswapelap kudi mwin kwilej kujip urund ni antu a mangand ni kuswimp yom yimwing mu mwom wend mulong wa kumusadin Yehova. In kulejan akweta ukaliweny akat kuyisejish in kwilej au a Bibil piswimp ni akadivar nau anambaz a mu chikumangen amenau anch akutwish kuyikwash in kwilej au kuya kurutu. Mwamu in kwilej a Bibil akutwish kwikal ni arund pakach pa atushalapol a Yehova, akutwisha kuyikwash kwikal ni urund uwamp ni Yehova ap kurish ni milong yau. Tukatin mwin kwilej wetu mwawonsu iyova anch chikumangen chimukatin ni udi mu dijuku dietu dia mu spiritu. Tukatin anch rukat retu ra ukadivar rimupukun ni rimusejish piswimp ni yetwetu. Mwamu chikumuswapel kujip urund ni antu amukangeshina kumukat Yehova. (Jnsw. 13:20) Anch arund nend akur amwipuk, ukwikal nich kashinsh anch ukutwish kutan arund akin mu dirijek dia Yehova.​—Mar. 10:29, 30; 1 Pita 4:4. w20.10 17 par. 10-11

Tufanyidin kwikal arund a Yesu anch tukatin kwikal mu urund uwamp ni Yehova. Mulong wak? Shinshikin kusu mayingishin maad. Chakusambish, Yesu wayileja in kwilejend anch: “Tatuku amwinend ukukatilany. Ndiy ukukatilany en mulong en winkatilany am.” (Yoh. 16:27) Walonda kand anch: “Kwikil muntu ukutwisha kwiyil kwa Tatuku ching wasutil kudi am.” (Yoh. 14:6) Kupakish kwikal murund wa Yehova pakad kuta urund wa piswimp ni Yesu kudi mudi kupakish kwandam mu chikumbu pakad kwandamin ku chis. Yesu wasadina chilakej mudi chinech pisambinay piur pend amwinend mudi “chis cha diyind dia amikoku.” (Yoh. 10:7) Diyingishin dia kaad didi anch Yesu wimburijin mu mutapu uwanyidina mikadil ya Tatukwend. Wayileja in kwilejend anch: “Muntu mwawonsu wanmena kal am, wamumen kal Tatuku.” (Yoh. 14:9) Chawiy mutapu uwamp wa kumwijik Yehova udi kusutil kwilej mwom wa Yesu. Anch twadandamen kwilej piur pa Yesu, rukat retu mulong wendendiy rikukul. Ni anch urund wetu ni Yesu wakul, rukat retu mulong wa Tatukwend rikukurik nakash. w20.04 21-22 par. 5-6

Ov, udi muyej mu ulal ap chilim mwi nkwas ya ayilim? Ov, ulikumukin mu makus ap ufil mes? Anch mwawiy, ov, ukutwish kubambil pamwing nau ansand ni antu akweta ukash uwamp wa mujimbu? Chakin kamu ukutwish! Amapal avud nau ayilim akat kubambil mwi njil ya mwom. Kakutwishap kusal mudimu winou nich usu wau ayinau. Pakwez akat kuchingejin mu usu wa Yehova kusutil kulondul program wa yikumangan ya win Kristu ku telefon ap akat kutesh mavideo ma yikumangan ma pa kapend. Ni akat kwipan mu mudimu wa kwikadish in kwilej kusutil kupan uman kudi adokter, amingang ni anamakwau. Kangal walikidil milong ya ukash wa mujimbu yikuziyish ni yikubachik kutong anch uziyin nakash mulong wa kubambil mwi njil ya mwom. Yehova ukukatin mulong wa ritiy rey umekeshina mudiay ndiy ni yisal yey ya kujijaman. Kusutamu pakur, katat ukwet kuswir kwa ukwash wend, ni kakukulikap. (Kus. 9:10) Pa ndond pa kukulik, ukwikal ney piswimp nakash. w20.04 29 par. 16-17

Mitu ik ya milong ukutwisha kwisamb ni muntu ukweta relijon? Pakish kukimb yom yitiyijinay yikwatijadina ni mifund. Pamwing ap wifukwidining Nzamb umwing kusu, ap pamwing ap umwitiyijin Yesu mudi Mupandish wa antu, ap kand witiyijin pamwing ap anch tushich mu chisu chiyimp nakash chikupwa piswimp ap. Shindakeshin pa yitiyij witiyinanya en awonsu mulong wa kumulej uruu wa Bibil mu mutapu ukutwisha kumusangaresh. Vurik anch antu kakutwishap kwitiyij yom yawonsu yiyifundishinau mu marelijon mau. Chawiy ap kupwa kwa kujingunin relijon wa muntu, sal usu wa kujingunin yom yitiyijinay ndiy pakampwil. Mukadivar umwing udia mishoner wamen kal anch antu amwing akat kulond anch itiyijin mu usatu, pakwez kakatap kamu pamwing ap kwitiyij anch, Tatuku, Mwan, ni spiritu utumbila adi Nzamb umwing. Ulondin anch: “Kwijik mwamu kukat kusal anch chituswapel kujingunin yom yitiyijinay muntu yikwatijadina ni mifund.” Chawiy ikasikesha kujingunin yom yitiyijinau kamu chakin antu. Mwamu, mudi kambuy Paul, ukutwish ‘kwikal yom yawonsu kudi antu a mitapu yawonsu.’​—1 Kor. 9:19-22. w20.04 10 par. 9-10

Tukutwishap kwov wom wa machuku mezina mulong Daniel ni Yohan, awonsu aletin kashinsh anch Yehova ni Yesu akuyipandish atushalapol au pa chisu cha mar makash. Daniel ulejen anch antu “afundilau majin mu mukand” awiy akupanda. Yom ik tukutwisha kusal chakwel dijin dietu adifund mu mukand? Tufanyidin kumekesh patok anch tumwitiyijin Yesu, Mwan a Mukoku wa Nzamb. (Yoh. 1:29) Tufanyidin kupan mwom wetu kudi Nzamb ni kutambul dibatish. (1 Pita 3:21) Ni tufanyidin kukwash Want wa Nzamb kusutil kusal usu wetu wawonsu mulong wa kuyikwash antu akwau chakwel amwijik Yehova. Katat chawiy chisu cha kukasikesh ruchingej retu mudiay Yehova ni mu dirijek diend mudia antu ashinshamena. Katat chawiy chisu cha kukwash Want wa Nzamb. Anch twasal mwamu, tukupand chisu chikumusheshau mwant wa kwiyand ni mwant wa kurul kudi Want wa Nzamb. w20.05 16 par. 18-19

Adam ni Ev ading ij nawamp anch dijin dia Nzamb didi Yehova, ni ading ij kand yom yivud ya usey piur Pend. Ading amwij anch ndiy Sakatang, wayinkisha mwom ni ndond yiwamp ya kushakam ni mbay wa uruw uwanyidina. (Dis. 1:26-28; 2:18) Pakwez, ov, Adam ni Ev adandamena kusadin manangu mau mawanyidina mulong wa kutongijokin pa yom yiwamp yayisadinau kudi Yehova? Ov, adandamena kumukat ni kumujikitish Yehova? Yakul yamekana patok chisu chayipakau kudi mukankuny wa Nzamb. Pasadinay nnak mulong wa kulond nich, Satan wamwipula Ev anch: “Ov, komb, Nzamb wakulejinany anch: ‘Kangal wadiany mitond ya mu chir?’” (Dis. 2:16, 17; 3:1) Pipulay Satan chipul chinech wading ulejen makasu piur pa Nzamb ni Ev wasambisha kutong yom yiyimp piur pa Nzamb. Nzamb wayileja anch akutwish kudia mitond yawonsu kudioshaku kusu kwau umwing. (Dis. 2:9) Satan wayibachika antu kutong anch Nzamb kadiap mwin kupan. Ev wafanyina kwiyipulap anch, ‘Ov Nzamb winjindjikidin chom chiwamp?’ w20.06 3 par. 8-9

Atushalapol amwing a Yehova akat kujiman nakash mulong wa yom yikatau kusal ambay nau in Kristu. Kambuy Paul walejana anch yisu yimwing tukutwish kwikal ni “mulong” pamwing ni mukadivar ap nambaz netu. Akutwish kand pamwing ap kutusadin nich kuburen kutentam. Anch tubabelap tukutwish kulam rukuny. Ujim ukutwish chad kumubachik muntu pakemp pakemp kwiyauril ni atushalapol a Yehova. Pablo wa mu Amerik wa Kurul, amudimbena makasu anch wasalang yom yiyimp, ni chinech chamushikija ku kushadish yisend yend mu chikumangen. Mutapu ik wasalay? Pablo ulondin anch: “Najimana nakash ni pakemp pakemp nasambisha kwaurik ni chikumangen.” Anch muntu wasala chitil chikash pasak, kom kend kakutwish kumufish nich mu chisu chilemp. Ukutwish kwiyov anch Nzamb kakutwishap kumukat ap pakemp. Ap anch wakarumuka kal ni amulikishina kal chitil chend, ukutwish kudandamen kwiyov anch kawanyidinap kwend kwikal pakach pa atushalapol a Nzamb. Mutapu ik wiyovila piur pa akadivar nau anambaz arishina ni yakamish mud twisambina kal ey? w20.06 19 par. 6-7

Tufanyidin kwikal ni ukaliweny wa kusambel kujingunin yom yikutwisha kutusal nayimp ni kusal usu wa kuyipuk. (Heb. 5:14) Chilakej, tufanyidin kutond milad ya kwipuwangej nich manangu. Yisu yivud, yom yikatau kulejan ku Televizion ap mu mafilim yikasikeshining mikadil yijondila. Mikadil yiney yikat kumujimesh Nzamb ni yikutwish kamu kutusal nayimp. Komb, tufanyidin kwipuk kwipuwangej kukutwisha pakemp pakemp kukepish rukat retu mulong wa Nzamb. (Efes 5:5, 6) Tufanyidin niyetu kujingunin ubaj wa nsangu ja makasu ja in kupumbok, nsangu ja makasu jikatau kupalangesh ni piur pa dirijek dia Yehova. (1 Tim. 4:1, 7; 2 Tim. 2:16) Nsangu ja makasu mudi jinej, jikutwish kuziyish ritiy retu. Tufanyidinap kwitiy ap pakemp makasu minam. Mulong wak? Mulong nsangu ja mutapu winou akat kujipalangesh kudi “antu arumbangena akad kwijik uyakin.” Chitongijok chau chidi cha kusarumun ‘matend ni ntad.’ (1 Tim. 6:4, 5) Akatin anch twitiyij makasu mau ni tulik kuyichingejin akadivar. w20.09 29 par. 13, 15

Ikundj ni mband afanyidin kwisadin umwing ni mukwau nich rukat ni kalimish. (Efes 5:33) Bibil utufundishin kushinshikin pa kupan pa ndond pa kushinshikin pa kutambul. (Mid. 20:35) Mwikadil ik ukutwisha kuyikwash ambay a uruw kumekeshijadin rukat ni kalimish? Udi mwikadil wa kwikepish. Kwikepish kwayikwashin kal ambay a uruw avud in Kristu kwikal ni musangar ujim mu uruw wau. Chilakej, Steven ulondin anch: “Anch udiany mu chisak chimwing, ukusalany mudimu pamwing, pakampwil anch kudi milong. Pa ndond pa kutong anch ‘yom ik yidia yiwamp mulong wamam?’ ufanyidin kutong anch ‘yom ik yidia yiwamp mulong wetwetu?’” Mukajend Stephanie, niyend wiyovil mutapu umwing. Ulondin anch: “Kwikil muntu ukatining kushakam pamwing ni muntu ukata kumutendish chisu chawonsu. Anch twapwitamijan, tukat kukimb dishin dia mulong. Kupwa tukat kulembil, kukimbijol ni kuwisambin mulong winou pamwing. Tukat kusal usu wa kupwish mulong pa ndond pa kurishikishijan.” Angatan nau angachik akat kutaninamu kamu chakin anch muntu ni muntu walik kwitongin amwinend chipandikena. w20.07 4 par. 5-6

Kangal wachingejin usu wey ap ukaliweny wey chisu umusadidina Yehova. Kambuy Paul wileja nakash​—amufundisha kudi Gamaliel, umwing wa pakach pa alej a in Yuda ading alimishinau nakash chisu chinicha. (Mid. 5:34; 22:3) Ni pa chisu chimwing, Paul wikala muntu wa usey nakash pakach pa anamakwend in Yuda. (Mid. 26:4) Pakwez Paul kichingejinap amwinend. Nich musangar, Paul walikap yom yading yisadina anch amekan mudi muntu wa usey ku mes ma antu akwau. (Fil. 3:8) Paul wamana mar nakash mulong wa kumwambat Kristu. Amukisa kudi antu a muchid wend. (Mid. 23:12-14) Ni amubula ni kumutek mu rukan kudi anamakwend in Rom. (Mid. 16:19-24, 37) Chikwau kand, Paul warisha nakash nich kuburen kuwanyin kwend ni warishang nakash pa kusal yom yiwamp. (Rom 7:21-25) Pakwez Paul kimikap kumulondul Kristu mulong wa milong yadingay nich, chinyim ni chinech ‘wasangerang mu kuziy.’ Mulong wak? Mulong chisu chaziyangay chawiy chisu chamukwashangau kudi Nzamb.​—2 Kor. 4:7; 12:10. w20.07 15-16 par. 7-8

Nlel chidi cha usey nakash kutek mudimu wa kulejan pa ndond ya kusambish. Yesu wasambela kulejan anch kupwa kwa rufu rend, mudimu winou ukudandamen kusadik ni ukushik kulemp nakash. Pavumbukay, Yesu wayikwasha in kwilejend kukwat ansh avud nakash kusutin chilay. Pawiy pinipa payilejay anch mudimu wa kulejan udi wa usey nakash kusutamu midimu yikwau yawonsu. (Yoh. 21:15-17) Kurutu kwa kuchirik mwiur, wayileja in kwilejend anch mudimu wa kulejan wasambishay ukushik kulemp nakash ni ukumatik mimbu ya Isarel. (Mid. 1:6-8) Mu kusutu kwa chisu, Yesu wamuleja kambuy Yohan chishimushimu chading chilejena yom yikusadika “pa Dichuku dia Nsalejetu.” Mu chishimushimu chinech Yohan wamana chinship ech chishimokishena: Wamana mwangel umwing wading ulejena, “rusangu ruwamp rushichinga chikupu” kudi “antu a mangand mawonsu, ni a michid yawonsu, ni a jindim jawonsu.” (Kuj. 1:10; 14:6) Chakin kamu, Yehova ukatin anch twipan mu mudimu winou usadikina pa mangand mawonsu djat kamu ni pakulondinay anch kwapwa kal. w20.09 9 par. 5

Mu dijuku dia Aburaham mwading milong yikash. Sara mukajend mukatish wading mumb. Arisha ni chakamish chinech mu mivu yivud. Mu kusut kwa chisu, Sara wamupana Agar, mwilomb wend kudi Aburaham chakwel ayivadin mwan. Pakwez chisu chimishay Agar, wasambisha kumupipej Sara. Yom yakasikana nakash, chawiy Sara wamwopata Agar ku chikumbu. (Dis. 16:1-6) Mu kusut kwa chisu, Sara wimisha ni wavala mwan ikundj ni Aburaham, ni wamupila anch Isak. Aburaham wading uyikatin anend awonsu aad, Isamayel ni Isak. Pakwez, Yehova wamuleja Aburaham kumwopat Isamayel ni Agar mulong wa yisal yiyimp yadingay nich Isamayel pantaliken ni Isak. (Dis. 21:9-14) Kupwa, Yehova wamwita Aburaham chakwel amupesh Isak. (Dis. 22:1, 2; Heb. 11:17-19) Tupamp twawonsu twaad, Aburaham wafanyina kumuchingejin Yehova anch ukuwanyish kushilamu kwend piur pa anend. w20.08 4 par. 9-10

Tongin bil musangar ukwikalau nich antu akuvumbuka pakusambishau kudjol wuntu wau ukur, ni kusambish chad kushakam kukwatijan ni mbil jitentamina ja Nzamb. Mulong ching antu akusala mwamu awiy akwitiyau chakwel ashakam chikupu mu Paradis. Pakwez antu akumubwambwila Nzamb, kakuyitiyap chakwel adandamen kushakam mu Paradis mulong akuyipish chisambu. (Isay 65:20; Yoh. 5:28, 29) Chisu chikuyikela Want, atushapol awonsu a Nzamb akuman mutapu ukuwanyina mazu mudia mu Jinswir 10:22 malondina anch: “Chiyukish cha [Yehova] chawiy chikata kulet dipit, ni Ndiy kakuwejangakup ushon.” Kusutil ukwash wa spiritu wa Yehova, atushalapol end akwikal ampich mu spiritu, charumburik anch akwikal chakin kamu mudi Kristu ni akushiken kwikal awanyidina. (Yoh. 13:15-17; Efes 4:23) Mu kusut kwa dichuku ni dichuku akwikal ni ukash uwamp wa mujimbu ni akwikal antu apandikena kuwap. Mwom ukwikal chakin kamu usangareshina!​—Job 33:25. w20.08 17 par. 11-12

Tufanyidin kwijik anch in Kristu amwing ashadin ajich mulong akatin kusal mwamu. Akwau akatin kwatan, pakwez kandikal aman muntu uwanyidina kwatijan nend. Akwau kand ashadin ajich mulong pamwing ap afishin ambay nau a uruw. Chikalap nchik diyingishin, ov, chiwapin kudi akadivar nau anambaz adia mu chikumangen kuyipul akadivar nau anambaz adia ajich mulong wak katenap ap kachikinap, ni kuyilej anch akutwish kuyikimbin mbay wa uruw? Tongin bil anch mukadivar ap nambaz kakwitinap ukwash winou, mutapu ik ukwiyovay anch wamulej anch umukimbin muntu wa kwatijan nend? (1 Tim. 5:13) Akadivar nau anambaz netu adia ajich akusangar nakash anch twayilimish mulong wa mikadil yau yiwamp pa ndond pa kushinshikin pa ujich wau. Pa ndond pa kuyinanin, tufanyidin kuyisanger mulong wa kushinshaman kwau. Anch twasal mwamu, akadivar nau anambaz netu ajich kakutwishap kwiyov mudi tuyilejin anch: “Kinikwetap kuswir kwenen!” (1 Kor. 12:21) Pakwez, akwikal nich kashinsh anch tuyilimishin ni tuyikwatin nich usey mu chikumangen. w20.08 29 par. 10, 14

Kupwa, Yesu wamumekena kambuy Paul. (1 Kor. 15:8) Paul (Saul) wading uyil ku Damas, chad watesha dizu dia Yesu ni wamumana mu chishimushimu mu uyaj wend wa mwiur. (Mid. 9:3-5) Yom yamanay Paul wading uman ukwau waleta kashinsh anch chakin kamu Yesu wavumbuka. (Mid. 26:12-15) Antu amwing afanyina kwitiy uman wa Paul, pakampwil mulong kurutu kwa yom yiney, wayipompatang in Kristu. Kudiosh kamu kwikalay nich kashinsh anch Yesu wavumbuka, Paul wipana nakash mulong wa kuyikwash antu akwau kwikal nich kashinsh ka uyakin winou. Chikalap nchik yibul, rukan, ap kujiyol ni waat, Paul wadandamena kulejan anch Yesu wafa ni kupwa wavumbuka. (1 Kor. 15:9-11; 2 Kor. 11:23-27) Paul wading ukwet kamu kashinsh anch Yesu wavumbuka, chawiy wading witiyidin ap kufa mulong wa kulejan yitiyij yend. Ov, uman winou wa in Kristu a mu mivu chitot ya kusambish, ukwinkishin niyey kashinsh anch Yesu wavumbuka? Uman winou utwinkishin kand kashinsh anch divumbuk dikwikalaku kamu chakin, ov, kimwawiyap? w20.12 3 par. 8-10

Tufanyidin kwiyipul anch: ‘Ov, nikat kukumanganang pakad kujing?’ Ku yikumangan yetu akat kutukasikesh mulong wa kudandamen kumusadin Yehova, ni akadivar nau anambaz netu akat kutukasikesh kand. (Mat. 11:28) Tufanyidin kand kwiyipul anch: ‘Ov, nikat kwilejang Bibil pakad kujing?’ Anch udi mu dijuku, ov, ukwetingany program wa difukwil dia mu dijuku rubing rawonsu? Ap anch udi amwiney, ov, ukweting program wa dilejan diey dia pakampwil? Kupwa, ov, usading usu wa kwipan mu mudimu wa kulejan ni wa kwikadish in kwilej? Mulong wak tufanyidin kwiyipul yipul yiney? Bibil utulejin anch Yehova ukat kushinshikinang yitongijok yawonsu yidia mu muchim wetu, chawiy niyetu tufanyidin kusal mwamu. (1 Jsng. 28:9) Anch twajingunin anch kudi yom yimwing tufanyidina kuswimp mu mipak yetu, mu mwikadil wetu, ap mu yitongijok yetu, tufanyidin kumwit Yehova chakwel atukwasha kuswimp. Chinech chawiy chisu cha kwirijek mulong wa yishiken yezina kurutu yikupaka ritiy retu. w20.09 19 par. 19-20

Yesu wasadina yilakej yimwing mulong wa kumekesh chirumburikina kwikal mwin kwilej wend. Wisambina piur pa muntu ukimbina kutung, ni piur pa mwant ukimbina kuya kurish ni mukwau. Yesu walonda anch muntu ukatina kutung ufanyidin “kushakam pansh pakusambish mulong wa kurijek usey wa yom yawonsu” chakwel aman anch ukutwish kupwish kutung, ni mwant “ukushakam [bil] mulong wa kushinshik” anch amasalay end akutwish kuwin njit. (Luka 14:27-32) Chilik chimwing, Yesu wading wij anch muntu ukatina kwikal mwin kwilej wend ufanyidin kushinshikin nakash chirumburikina kumulondul ndiy. Chawiy tufanyidin kuyikasikesh in kwilejetu ayila kurutu chakwel twilejang nau rubing rawonsu. Mulej, ufanyidin kwirijek nawamp piur pa yom ukwileja ni muntu ni muntu panrend. Kupwa mutongina mwin kwilej wey, tongin mutapu wa kufundish yom mu mutapu uswapela ni wovikena, ukutwisha kumukwash mwin kwilej wey kwov yom nawamp ni kuyisadin.​—Neh. 8:8; Jnsw. 15:28a. w20.10 7 par. 5; 8 par. 7

Mbil japanay Yesu joviken patok. Tufanyidin kuyifundish antu yom yalonday Yesu. Pakwez, tufanyidinap kuvaramen chom chimwing cha usey nakash. Yesu kalondap anch: ‘Yifundishany yom yawonsu yinakulejanya.’ Pakwez, walonda anch: Yifundishany “kuziyil ku yom yawonsu yinakulejanya.” Mulong wa kuziyin kwi mbil yiney yapanay Yesu, tufanyidinap kwimen ching kusu pa kuyifundish in kwilej a Bibil, pakwez tufanyidin kand kuyikwash kusadin yom yilejinau. (Mid. 8:31) “Kuziyil” kurumburikin kusadin yom twilejina. Pitukata kwilej Bibil ni antu akwau, tukat kuyifundish yom yitwitinay Nzamb kusal. Pakwez, kudi yom yikwau tufanyidina kusal. Tufanyidin kuyifundish in kwilej etu a Bibil kusadin yom yilejinau mu mwom wau wa pichuku pichuku. (Yoh. 14:15; 1 Yoh. 2:3) Kusutil mashakamin metu, tukutwish kuyifundish in kwilej a Bibil mutapu ukutwishau kusadin yom yilejinau mu Bibil chisu chidiau ku shikol, ku mudimu ap chisu chipuwangejinau. Tufanyidin kumulembil Yehova ni kumwit spiritu wend utumbila chakwel amukwasha mwin kwilej.​—Yoh. 16: 13. w20.11 2-3 par. 3-5

In kwilej a Yesu arisha ni milong. Chilakej, makopi ma mifund mading kusu kwau makemp. Kadingap kakweta mikand ya kwilej nich Bibil mudi nlel. In kwilej ading afanyidin kand kulejan rusangu ruwamp kudi antu ading alondina mazu kushalijan. Chikalap nchik milong yiney yawonsu, in kwilej inay ading akweta mushiku, atwisha kusal yom yading yimekena mudi yakad kutwishidik—mu mivu piswimp makum masatu, alejana rusangu ruwamp ku ‘yitang yawonsu yidia mwinshin mwa diur.’ (Kol. 1:6, 23) Mu chirung chetu, Yehova udandamedin kuyitakel atushalapol end ni kuyinkish usu. Ukat kuyitakel kusutil Dizu diend diafundau ku ukwash wa spiritu utumbila. Mu Dizu diend Bibil mwawiy tutanina nsangu piur pa mudimu wasalay Yesu, ni mbil yapanay kudi in kwilejend ya kudandamen kusal mudimu wasambishay. (Mat. 28:19, 20) Yehova kakwetap kasolikany, wasambela kulejan anch rusangu ruwamp akurilejan kudi “antu a mangand mawonsu, ni a michid yawonsu, ni a jindim jawonsu.” (Kuj. 14:6, 7) Ukatin anch antu awonsu atesh uruu wa Want. w20.10 21 par. 6-8

Mwant David wading ikundj ukatina ‘yijil ya Yehova.’ (Kus. 1:1-3) David wading wij anch Yehova ukat kuyipandishang antu ikepishina, pakwez uyikisining in kwitutul. Chawiy David witiya chakwel Dizu dia Nzamb diswimp mutapu wend wa kutong. Wafunda anch: “Nikat kumushiman [Yehova] ukata kwinyul. Uchuku kom kam kakat kwimbabesh.” (Kus. 16:7) Anch tud ikepishina, tukwitiy chakwel Dizu dia Nzamb diswimp yitongijok yetu yiyimp kurutu yitushikij ku kusal yom yiyimp nakash. Dizu dia Nzamb did mud dizu dia muntu utulejina anch: “Njil ya kuya yawiy ey. Yangany mwinimwa.” Dikutubabesh anch twakimb kupumbuk ku chikas cha katatuku ap ku chikas cha kamaku. (Isay 30:21) Kumutesh Yehova kukat kutuletin yiyukish yivud nakash. (Isay 48:17) Chilakej, tukwovap usany mulong wa chiyul chikutwinkishau kud muntu kanang. Ni tukusej piswimp nakash ni Yehova, mulong twij anch utukwatin mud mwanend ukatinay nakash.—Heb. 12:7. w20.11 20 par. 6-7

Antu amwing mu musumb wa Korint asambisha kwitiy chitongijok chinech. (1 Kor. 15:12) Ni akwau asambisha kand kutong anch divumbuk did dia chifanakesh, atongang anch antu ad “afu” chisu chidiau akayitil, pakwez anch ikal in Kristu, kwawiy kulond anch “avumbuk kal.” Chikalap nchik diyingishin, kulik kwitiyij divumbuk kwading kurumburikin anch ritiy rau rading kwau ra chamwamu. Mulong anch Yesu kavumbukap, kwawiy kulond anch kwikil difut diafutau ni kwikil muntu walikishinau yitil. Chawiy antu ading alikina kwitiyij divumbuk kadingap kakweta ruchingej rakin. (1 Kor. 15:13-19; Heb. 9:12, 14) Kambuy Paul wading wij nawamp anch “Kristu wavumbuka ku rufu wikal kand mwom.” Divumbuk dia Yesu diading dia usey nakash kusutamu antu akwau avumbuka kurutu kwendendiy—mulong awiy afa kand kwau. Paul walonda anch Yesu wading ‘dibuj da kusambish kud awiy alela mu tul twa rufu.’ Wading muntu wakusambish wavumbuka nich mujimbu wa mu spiritu, ni muntu wa kusambish wavumbulau mulong wa kuya mwiur.​—1 Kor. 15:20; Mid. 26:23; 1 Pita 3:18, 22 w20.12 3 par. 11; 5 par. 12

Mu mivu chitot ya kusambish, chisak chitakedila chading ku Yerusalem chasala mu umwing mulong wa kulam chisambu chading pakach pa antu a Nzamb ni kwipuk kanvundangesh. (Mid. 2:42) Chilakej, pikwalanka kupwitamijan pakach pa in Kristu piur pa mulong wa kutwalan ku mukand, piswimp mu muvu wa 49 C.C., Chisak Chitakedila chalondula umutakel wa spiritu utumbila mulong wa kupwish mulong winou. Anch chikumangen chadandamena kwaurik pa mulong winou, kafanyinap kutwish kulejan nawamp. Ap anch atwimbuy nau amakurump ading in Yuda, pakwez kengaminap ku yishankur ya in Yuda, ap kulondul yiyul ya antu ading akasikeshina yishankur yiney. Aziyina ku umutakel wa Dizu dia Nzamb ni wa spiritu utumbila. (Mid. 15:1, 2, 5-20, 28) Yibudikin ik yikalaku? Yehova wayukisha mupak wau, kwikala chisambu ni uumwing ni mudimu wa kulejan wadandamena kuya kurutu. (Mid. 15:30, 31; 16:5) Mu chirung chetu, dirijek dia Yehova disadin usu wa kulam chisambu ni kwipuk kanvundangesh pakach pa antu a Nzamb. w20.10 22-23 par. 11-12

Mulong wa upal, mayej, ap yom yikwau, akutwish pamwing ap kulik kutwinkish chisend kanang mu dirijek. Anch yom yiney yatushiken, tukutwish kwilejin ku chilakej cha Mwant David. Pamulejau anch kendiyap watondau mulong wa kutung tempel wa Nzamb​—chisend chading chikatinay nakash—​wakwata mupak wa kumukwash muntu watondau kud Nzamb mulong wa kuwanyish chisend chinech. David wapana kand yom yend ya usey mulong wa kukwash mudimu winou. Chinech chid chilakej chiwamp nakash tufanyidina kwimburij! (2 Sam. 7:12, 13; 1 Jsng. 29:3-5) Mulong wa mayej, mukadivar Hugues wa mu Frans watula yisend ya ukurump, ni kadingap ni mutapu wa kusal ap tumidimu twa usweral kwol kwend. Ufundin anch: “Kwinsambishin naziya nakash ni kwiyov mud nikwetap usey. Pakwez, mu kusut kwa chisu namana anch chid cha usey kwitiyij mimbu yam, ni natana musangar mu kumusadin Yehova chikalap nchik mayej. Nikudandamen kurish mud mwasalay Gedeyon ni amakundj yitot yisatu ading nend​—ap anch ading aziyangap kal nchik!”​—Ank. 8:4. w20.12 25 par. 14-15

Mu Evanjil wafunday, kambuy Yohan wisambina nakash piur pa “rukat” kusutamu ma Evanjil makwau. Yom yafunday ku usu wa spiritu utumbila yimekeshin anch rukat rawiy rifanyidina kututakel mu yom yawonsu tusadina. (1 Yoh. 4:10, 11) Pakwez chamwita Yohan chisu mulong wa kwilej yom yiney. Padingay Yohan nsand, kadingap kayikatina akwau chisu chawonsu. Chilakej, chisu chimwing pading payilay Yesu nau in kwilejend ku Yerusalem, asutina mu ul umwing wa in Samaria. Pakwez antu a mu ul winiwa alika kuyak. Yohan wakata anch atazuk kasu mwiur chakwel kashesha ul winou! (Luka 9:52-56) Dichuku dikwau, Yohan ni mwanamakwend Jakobu amuleja makwau chakwel amwita Yesu mulong wa kuyinkish ndond ja piur nakash kwi mbet kwend mu Want. Pateshau atwimbuy akwau yom yasalay Jakobu ni Yohan, ajimana! (Mat. 20:20, 21, 24) Pakwez, chikalap nchik kurumbok kwinoku kwa Yohan, Yesu wading umukatin.​—Yoh. 21:7. w21.01 8-9 par. 3-4

Yehova ukat kukwatang mipak mulong wa uwamp wa antu akwau. Chilakej, wakwata mupak wa kutang mwom, kadiap mulong wa uwamp wa amwinend, pakwez wasala mwamu chakwel niyetu tusanger mwom. Kwikil muntu wamushindina anch amupana mwanend mulong wa yitil yetu. Wamupana mwanend kwa kwikatin mulong wa uwamp wetu. Yesu niyend wakwata mipak mulong wa uwamp wa antu akwau. Chilakej, wakwata mupak wa kulik kwiswedish mulong wa kuyifundish antu ading akungamang kal. (Mar. 6:31-34) Ntakel muwamp wa dijuku wijing anch chom chimwing chikash chifanyidinay kusal chid kukwat mipak ya manangu mulong wa uwamp wa dijuku diend, ni chinech chiding chisend chimwing chikash. Ukat kwipuk kukwat mipak nich muchim wa kadwubudwubu, pakad kushinshikin nawamp yom. Pakwez ukat kumuchingejin Yehova chakwel amufumb mutapu wa kukwat mipak yiwamp. (Jnsw. 2:6, 7) Anch wasal mwamu, ukutongin pa uwamp wa antu akwau, kadiap pa uwamp wa amwinend. (Fil. 2:4) Anch ikundj wasal usu wa kwimburij chilakej cha Yehova ni Yesu, ukwikal ntakel muwamp wa dijuku. w21.02 7 par. 19-21

Chisu chadingay nsand, Mwant Asa wading muntu wikepishina ni utakamena. Chilakej, chisu chamuswanay tatukwend Abija, wasambisha kushesh atupony mwi ngand yawonsu. Kupwa “wayileja in Yuda kumusot [Yehova] Nzamb wa angakirilau, ni kusadil yijil ni yijidik yend.” (2 Jsng. 14:1-7) Chisu chezay Zerak mwin Etiopi ni amasalay end 1000000 mulong wa kuyirishikish in Yuda, Asa wamuchingejina Yehova ni wamwela anch: “A! [Yehova], yey umwing ukutwisha kukwash uziyila ni ukweta dikand. Ez utukwasha, amboku, [Yehova] Nzamb wetu mulong tukungamedin kudi ey.” Mazu minam mapandikena kuwap mamekeshin anch Asa wading umuchingejidin Yehova anch ukutwish kumupandish ni ukuyipandish antu end. Asa wamuchingejina Tatukwend wa mwiur, ni “[Yehova] wayopata in Etiopi.” (2 Jsng. 14:8-12) Chakin kamu, kumurishikish Asa kud amasalay 1 000 000, chading chom chikwatishena wom, pakwez mulong wamuchingejina Yehova, Asa wayipandikana. w21.03 5 par. 12-13

Tutanin mu Bibil nsangu ja antu akad kuwanyin akatijana chikurikina. Tushinshikinany chilakej cha Jonatan ni David. Bibil ulondin anch: “Muchim wa Jonatan wikasa ni wa David, chawiy Jonatan wamukata David mudi amwinend.” (1 Sam. 18:1) David ading amutondin kal mulong wa kumuswan mwant Saul. Kupwa, Saul wamwovila David mukau ni wafila kumujip. Pakwez, Jonatan mwan a Saul, kibombap ni tatukwend mwi mpung ja kumujip David. Jonatan ni David ashilamu kudandamen kwikal arund ni kukwashijan umwing ni mukwau chisu chawonsu. (1 Sam. 20:42) Chimeken patok anch rukat radingau nich Jonatan ni David rading ra usu nakash, mulong kud yom yivud yafanyina kuyikangesh kwikal arund. Chilakej, Jonatan wading umusutilamu David ku mivu piswimp 30. Jonatan wafanyina kutong anch kakutwishap kwikal mu urund wa piswimp ni David udia kwend mwanikanch ni wakad ukaliweny. Pakwez Jonatan katongap mwamu, ni wading umulimishin David nakash. w21.01 21-22 par. 6-7

Yesu wayishilamu in kwilejend anch akwikal ni musangar chakin. Pakwez wayileja kand antu amukatina anch akuyipompat. (Mat. 10:22, 23; Luka 6:20-23) Tukwet musangar wa kwikal in kwilej a Kristu. Pakwez, mutapu ik tukata kwiyov anch atupompat kud anamakwetu, atuzengol kud mburamatad, ap atubachik kusal yom yiyimp kud ambay netu a mudimu ap a shikol? Chimeken kamu patok anch yom yiney yikutwakamish. Antu avud akat kutong anch tukutwishap kusangar anch atupompatin. Pakwez Dizu dia Nzamb ditufundishin anch tukutwish kusangar ap anch atupompatin. Chilakej, Jakobu wafunda anch tufanyidinap kwiyakamish chisu tumena mar, pakwez tufanyidin kusangar. (Jak. 1:2, 12) Yesu niyend walonda anch tufanyidin kusangar ap anch atuzengodin. (Mateu 5:11) Yehova wamutakela Jakobu kuyifundin in Kristu inay mulong wa kuyinkish yiyul yikutwisha kuyikwash kulam musangar wau ap anch arishin ni yikokujol. w21.02 26 par. 1-2; 27 par. 5

Antu amwing a pa chirung cha Timote kakwatap nich usey dilau diadingau nich dia kusal pamwing ni Nzamb. Pakach pau pading Demas, Fijel, Herimojen, Himeney, Alekizandre, ni Filet. (1 Tim. 1:19, 20; 2 Tim. 1:15; 2:16-18; 4:10) Chimeken patok anch antu inay kwinsambishin ading amukatin nakash Nzamb, pakwez akanganya kukwat nich usey yom yadingau nich. Mutapu ik ukatay kusal Satan usu wa kutwoz chakwel tulika kukwat nich usey yom yatwinkishau kudi Yehova? Shinshikin mipit yimwing yikatay kusadin Satan. Ukat kusadin kwipuwangej ni yom yakupalangesh nich jinsangu mulong wa kukasikesh yitongijok ni yaku yijay anch yikutwish kutushikij ku kulik uyakin. Ukat kusal usu wa kutwovish wom kusutil kuyibachik antu kutulond yom yiyimp ap kutupompat chakwel twimik mudimu wa kulejan. Ukat kusal kand usu wa kutubachik kuta matu ku yom yifundishiningau in kupumbok yikat “kwelau anch ‘yidi yom yakin’” chakwel tulikap uyakin. Anch tubabelap, tukutwish kusambish kushadish uyakin pakemp pakemp.​—1 Tim. 6:21. w20.09 27 par. 6-8

Ov, kud murund ney ap mwanamakwey wakurumbukidina? Anch mwawiy, kushinshikin yom yasalay Mwant David pamurumbukinau kud mwanend Abisalom. (2 Sam. 15:5-14, 31; 18:6-14) Paukweta rusangu mu manangu, muleja Yehova yom yawonsu piur pa mutapu wiyovila mulong wa yom yiyimp yakusadidinau. (Kus. 6:6-8) Kupwa, tongin mutapu wafanyinay kwiyov David mulong wa yom yiney yawonsu yamushikena. Wading umukatin Abisalom ni wading umuchingejidin Ahitofel. Pakwez awonsu amurumbukina. Asala yom yamwovisha kusansan nakash ni akimba kand kumujip. David wafanyina kulik kuyichingejin ni arund nend awonsu ni kutong anch pamwing ap niyau ibombin kal ni Abisalom. Wafanyina kwend chad kwiyauril ni antu akwau ni kuchin diamwinend. Ap wafanyina kamu kwend chad kushadish ruchingej. Pakwez, wamulembila Yehova chakwel amukwash. Wita kand ukwash kud arund nend. Wasambisha kuwanyish mipak yakwatay pakad kulab. Ap anch David wading unenganen nakash, pakwez kalikap kuyichingejin arund nend ni kayijimenap antu amurumbukina. Wadandamen kumuchingejin Yehova ni arund nend. w21.03 15 par. 7-8; 17 par. 10-11