Ngond wa 7

Tufanyidin kwikal mu urund uwamp ni Yesu chakwel malembil metu amakul. Chinech chirumburikin anch tufanyidin kusal yom yivud kusutamu kusu kwau kwikal ni chaku cha kupwish malembil metu nich mazu “mu dijin dia Yesu.” Tufanyidin kwijik mutapu Yehova umusadidinay Yesu mulong wa kwakul ku malembil metu. Yesu wayileja atwimbuy end anch: “Am nikez kusal yom yawonsu yiukwitanya mu dijin diam.” (Yoh. 14:13) Ap anch Yehova ndiy kusu ukata kutesh ni kwakul malembil, pakwez wamwinkishin kal Yesu ulabu wa kuwanyish mipak Yend. Chawiy, kurutu Nzamb akul malembil metu, ukat kutal bil anch tusadidin chiyul chapanay Yesu. Chilakej, Yesu walonda anch: “Anch wayilikishinany akwen akusalanya nayimp, Tatukwen udia mwiur ukukulikishinany kand niyen. Pakwez anch en walikany kuyilikishin akwen, Tatukwen kakez kukulikishinanyap kuyip kuwasalanya.” (Mat. 6:14, 15) Chawiy, chidi cha usey mud ik anch tuyisadin antu akwau mu mutapu ukatay Yehova ni Yesu kutusadin etu! w20.04 22 par. 6

Kambuy Paul wajingunina yom yading yiyisangareshina antu, ni kupwa wakwatikesha mafundish mend nich yom yiniya. Chilakej, antu ambamba nend mu Listre ading ni ronganyin rikemp nakash ra Mifund ap kand bwat. Chawiy Paul wasadina mazu mading makwatijadina ni yom yiyisangareshina. Wisambina piur pa kuvulijan kwa mbut ni ukaliweny wa kusanger mwom. Wasadina mazu ni yilakej yading yiswapela kutesh kudi antu. Sadin nkeu mulong wa kujingunin yom yisangaredinau antu adia mu teritwar wey ni kwatikesh mafundish mey nich yom yiney. Mutapu ik ukutwisha kujingunin yom yimusangareshina muntu chisu wambambina nend ap usejina ku chikumbu chend? Ikal mwin nkeu. Pamwing ap ukat kurijek yisalamb, utangin buku, ukat kurijek motak, ap usadin mudimu kanang. Anch chitwishikin ukutwish kusambish nend mambamb kusutil yom yisadinay. (Yoh. 4:7) Ap masun ma muntu makutwish kumekesh chom kanang piur pend​—pamwing ap mamekeshin ngand yend, mudimu wend, ap chisak cha masengan chikatiningay. w20.04 11 par. 11-12

Mulong akat kwiyakamish nakash, akadivar nau anambaz amwing akutwish kukis ni kulik kusanger mwom wau wa pichuku pichuku. Pamwing ap kiyovilingap kwau nawamp anch adi mu chisak cha antu, pakwez akat kudandamen kuya ku yikumangan ni ku yitentam. Chiyikasikedining pamwing ap kwambamb nau antu akadiau kwijik, pakwez akat kwambamb nau antu akwau mu mudimu wa kulejan. Anch chidi mwamu ku mutambu wey, ijik anch udiap amwiney. Antu avud iyoviling niyau mudi ey. Vurik anch Yehova ukat kusanger nakash usu usadina ni muchim wey wawonsu. Mulong udandamedin kumusadin, chinech chimekeshin anch ukuyukishin ni ukwinkishin usu ukweta nich kuswir. (Fil. 4:6, 7) Anch umusadidin Yehova chikalap nchik milong ya ukash wa mujimbu, ukutwish kwikal nich kashinsh anch umusangareshin. Avud pakach petu akwet milong ya ukash wa mujimbu, pakwez tukat kujijaman etu awonsu. (2 Kor. 4:16) Nich ukwash wa Yehova, etu awonsu tukubambil djat kamu ni kwinsudiel! w20.04 31 par. 20-21

Manangu ma Nzamb mameken patok kusutil mutapu watangay divu, ndond yetu ya kushakam. (Heb. 3:4) Divu didi dia pakampwil mulong diawiy kusu diwanyishina yom yawonsu yidia ya usey chakwel antu adandamen kwikalaku. Divu didi mudi waat upempamina pa karung mujim. Pakwez kudi kushalijan kujim nakash pakach pa waat mwizwila too antu ni divu. Chilakej, utongin anch antu asendinau mu waat akutwish kusal machuku minch anch chayit kwisadin ayinau rinkind mulong wa kupim, yakudia, mem ni anch chayit kulam yishoshot mu waat pakad kuyidjibul mu karung? Antu adia mu waat winou akufa pakad kulab. Chinyim ni chinech, divu diwanyishin maswir ma mamiliyar ma yitang yikweta mwom. Dikat kutwinkish rinkind wa kupim, yakudia, mem tukweta nich kuswir ni kwikil dichuku twaburenap kal yom yiney ya usey. Yishoshot yawonsu ya pa divu yikatap kuya mu rinzwizu, pakwez divu didandamedin kwikal diwamp nakash ni dinangina. Mutapu ik chidia mwamu? Yehova watanga divu mu mutapu wa kwel anch dikutwish kukarumun yishoshot kwikal yom yiwamp tukutwisha kand kusadin. w20.05 20 par. 3-4

Satan wading ukat kumulej Ev anch Nzamb udi mukamakasu. Chawiy Satan wikala kapamp kamwing djabul ap mwin kafukej. Ev amudimba ni wamwitiyija Satan. (1 Tim. 2:14) Wamuchingejina ndiy nakash kulik Yehova. Yom yiney yamubachika Ev kukwat mupak upandikena kuyip. Wakwata mupak wa kumubwambwil Yehova. Wadia dibuj dia mutond wamujidikau kudia kudi Yehova. Kupwa wamwinkisha kand Adam. (Dis. 3:6) Tong bil mutapu wafanyinay kwakul Ev chisu chamupakau kudi Satan. Tong bil mudi anch Ev wamwakula Satan anch: “Am nikwijap ey, pakwez nimwij Tatukwam, Yehova, nimukatin ni nimuchingejidin ndiy. Yom yawonsu tukweta am ni nfumwam ndiy watwinkishay. Chad mulong wak ulondina yom yiyimp piur pend? Diokal pinap!” Musangar mud ik welay kwov Yehova anch watesha mazu mudi minam ma kushinshaman mafanyinay kulond mwanend mband ukatilay! (Jnsw. 27:11) Pakwez Ev kamekeshap rukat rishinshamena kudi Yehova; Adam niyend chilik chimwing. Mulong aburena rukat mudi riner mulong wa Tatukwau, chawiy chakanganyau Adam ni Ev kulondin dijin dia Nzamb chisu chadifukejinau. w20.06 4 par. 10-11

Tufanyidin kuyijikitish anambaz mulong wa yom yawonsu yisadinau mu mudimu wa Yehova. Pakach pa midimu yiney padi kutung ni kurijek yikumbu ya Want, kukwash yirund ya mazu ma wingendj, ni kusal mudi mwin kwisotil ku Betel. Akat kwipan mu mudimu wa kuyikwash akadivar nau anambaz anch kwashiken mar madiokila ku yom yatangau, akat kukwash mu mudimu wa kukarumun mikand yetu, ni akat kusal kand mudi ayibol ap amishoner. Chikwau kand, amband akat kuyikwash anfumwau kuwanyish yisend yijim yikwetau mu chikumangen ap mu dirijek. Akadivar inay akweta yisend kakutwishap kusal nawamp mudi ‘yipan mudi antu’ anch akajau kayikwashinap. (Efes 4:8) Amakurump awamp ijing anch anambaz adi “chisak chijim cha amasalay” ipanining mu midimu, ni anch yisu yivud anambaz ading pakach pa in kulejan akweta ukaliweny. Chikwau kand, amakurump ijing anch anambaz ashinshamena apamina kal ijing nawamp mutapu wa kuyikwash anambaz achidia kal ayangadim chakwel atwish kurish ni yakamish yau. (Tit. 2:3-5) Chakin kamu, anambaz netu adi antu tufanyidina kujikitish! w20.09 23-24 par. 13-14

Yehova kakatap kuyivuramen antu ading kumusadin pakur pakwez imikina kal kukumangan ni kusal mudimu wa kulejan mu chisu kanang; ni kakatap kuvuramen yom yasalau mu mudimu wend. (Heb. 6:10) Muprofet Isay wafunda piur pa chilakej chiwamp chilejena mutapu ukatay Yehova kuyibangin atushalapol end. Isay wafunda anch: ‘Ndiy ukulam yivam yend mudi kafung. Nich chikas chend ukez kukumangej pamwing an a amikoku, ukez kasend an a amikoku mwi nkond yend.’ (Isay 40:11) Mutapu ik ukatay kwiyov Yehova, Kafung Mujim anch mukoku wend umwing wapumbuk? Yesu wovikesha mutapu ukatay kwiyov Yehova payipulay in kwilejend anch: “Ov, utongilany [anch] muntu ukusal nchik anch ukwet amikoku chitot, chad mukoku umwing washadik? Ndiy ukusha amikoku akwau makum chidivu ni chidivu pa chinanginang pakat kudilau. Chad ukuya ni kumukimb mukoku ushadikina. Nakulejany chakin, pakumutanay ukusangar nakash mulong wa mukoku winou umwing, kupandakanamu kusangar mulong wa amikoku makum chidivu ni chidivu akad kushadik.”​—Mat. 18:12, 13. w20.06 19-20 par. 8-9

Tukat kuman yisend tukweta mu dirijek dia Yehova mudi dilau dia kumusadin Yehova mu mutapu wawonsu tukutwisha kumusadin. (Kus. 27:4; 84:10) Anch mukadivar ukatin kusal yom yivud mu dirijek dia Yehova, chinech chidi chiwamp. Pakwez, anch amwinkish yisend, kafanyidinap kutong anch udi wa usey nakash kusutamu antu akwau. (Luka 17:7-10) Chitongijok chend chifanyidin kwikal cha kuyisadin antu akwau nich kwikepish. (2 Kor. 12:15) Mu Bibil mudi yilakej ya kutubabesh nich ya antu itongina ayinau kupandikan. Dioteref kadingap mwin kwikepish. Wading ukatin kwikal ni ndond ya “piur” mu chikumangen. (3 Yoh. 9, TMK) Nich kwitutul, Ozias wapakisha kuwanyish chisend chakad kumutal. (2 Jsng. 26:16-21) Abisalom wakata kwikal mwant, chawiy wamekesha mudi uyikatin antu chakwel ayipwitina ku mutambu wend. (2 Sam. 15:2-6) Nsangu jinej jidia mu Bibil jimekeshin patok anch Yehova kakatap kuyisangerang antu akatining kwimekesh. (Jnsw. 25:27) Chakin kamu, antu adia in kwitutul ni akatina kuyishimek kudi antu akwau akat kwikal ni milong mu kusut kwa chisu.​—Jnsw. 16:18. w20.07 4 par. 7-8

Anvaj amwing in Kristu akat kubukin mu jingand jindj pamwing ni majuku mau mulong wa kukimb diking ap mulong wa kukimb mudimu. Kubuk kwinoku kukutwish kusal anch anau ileja shikol mu dizu dia ngand yayau kal. Chikwau kand, mulong wa kuman mudimu, anvaj afanyidin niyau pamwing ap kwilej dizu dia ngand yiniya. Mutapu ik ukusalau anch pa ndond pashichau padi chikumangen ap chirund cha dizu diau dia chivadik? Dijuku dined difanyidin kuya mu chikumangen ik? Ov, afanyidin kuya mu chikumangen cha dizu dia ngand yishichau bil anch mu chikumangen cha dizu diau dia chivadik? Ntakel wa dijuku ufanyidin kutond chikumangen mu kwikalay ni dijuku diend. Mulong winou udi mupak umutadina muntu amwinend, chawiy ntakel wa dijuku ufanyidin kukwat mupak ukutwisha kukwash dijuku diend. Tufanyidin kulimish mupak wa ntakel wa dijuku. Chikalap nchik mupak ukukwatay, tufanyidin kuulimish ni kwak dijuku diau nich musangar mu chikumangen chetu.​—Rom 15:7. w20.08 30 par. 17-18

Anch tukimbin anch Yehova atukwash, tufanyidinap kutong anch usey tukweta wimedin pa ukash wetu wa mujimbu, shikol twileja, ndond twapamina, ap pa mapit ma ku mujimbu tukweta. Kadiap yom yiney yisadina anch twikal antu a usey ku mes ma Yehova. Ni anch twatal nawamp, atushalapol avud a Yehova kadiap kwau “in manangu, avud kakwetap ukash, avud kadiap in majuku malimina.” (1 Kor. 1:26) Chawiy, ap anch ukwetap kwey yom yajimbulau kal kwinsambishin kwa paragraf winou, ukutwish kwey kudandamen kumusadin Yehova. Pakwez, ikal ni chitongijok chiwamp piur pa mashakamin mey. Mutapu ik ukutwisha kusal mwamu? Ijik anch ang ukwetap kwey yom yiyimekeshina antu a mangand minam mudi a usey, ukutwish kuman chad mutapu ukukwinkishay Yehova ukash. Chilakej anch wovil wom piur pa antu akutwisha kukurishikish mulong wa yitiyij yey, mulembila Yehova chakwel akwinkish kutakaman kwa kulond piur pa yitiyij yey. (Efes 6:19, 20) Anch urishin ni mayej makash, mwita Yehova chakwel akwinkish usu ukweta nich kuswir chakwel udandamen kwikal ukwatikena mu mudimu wend kukwatijan ni usu ukweta. Chisu chawonsu ukumana mutapu ukukwashinay Yehova, ritiy rey rikukasikan ni ukwikal ni usu. w20.07 16 par. 9

Anch tukimbin kutek Want pa ndond ya kusambish mu mwom wetu, tufanyidin kumwimburij Aburaham walikap yom yimwing kwa kwikatin mulong wa kumusangaresh Nzamb. (Mar. 10:28-30; Heb. 11:8-10) Kangal watong anch ukwikal ni mwom wakad yakamish. Ap antu ipaninakal mulong wa kumusadin Yehova mu mwom wau wawonsu akutwish kurish ni yakamish. (Jak. 1:2; 1 Pita 5:9) Kusutamu pakur, nlel tukwet mayingishin mavud nakash mafanyidina kutubachik kushinshikin pa ruchingej ra machuku ma kurutu. Yom yisadikina mu mangand yimekeshin patok anch tushich mu chisu cha nsudiel cha machuku ma nsudiel ya mangand minam. Pakach pa yiyukish yivud tukusangera pakuyikela Want, tukuyiman kand akatish netu akuvumbuka. Pa chisu chinicha, Yehova ukumufut Aburaham mulong wa ritiy rend ni kushimpish kwend kwa muchim kusutil kumuvumbul ni dijuku diend. Ov, niyey ukwikalaku mulong wa kuyak antu inay? Ukutwish kwikalaku anch mudi Aburaham, walikap yom yimwing kwa kwikatin mulong wa Want wa Nzamb, anch wadandamen kulam ritiy rey chikalap nchik yakamish ni anch wamuchingel Yehova nich kushimpish muchim.—Mike 7:7. w20.08 5-6 par. 13-14; 7 par. 17

Twij anch ap anch akankuny netu atujip, Yehova ukutuvumbul. Tukwet kashinsh anch kwikil chom ap chimwing chisadinau chikutwisha kutukangesh kumusadin Yehova. (Rom 8:35-39) Yehova umekeshin anch udi mwin manangu nakash kusutin ruchingej ra divumbuk ritwinkishinay! Mulong tukwet ruchingej riner, tukutwishap kwov wom ap anch akankuny netu atulej anch akutujip anch tusadinap yom yilondinau, ni ruchingej riner ritwinkishin kutakaman chakwel tudandamen kushal ashinshamena kudi Yehova. Anch akankuny a Yehova akulej anch akukujip, ov, ukumuchingejin Yehova anch ukukuvumbul? Mutapu ik ukutwisha kwijik anch ukumuchingejin Yehova? Mutapu umwing ukutwisha kutan chakul, udi kusutil kwiyipul anch: ‘Ov, mipak yikemp yikemp nikata kukwat dichuku diawonsu, yimekeshining anch nimuchingejidining chakin kamu Yehova?’ (Luka 16:10) Chipul chikwau ukutwisha kwiyipul chawiy ech: ‘Ov, mashakamin mam mamekeshin anch nikwet ritiy mu kushilamu kwa Yehova kwa kuwanyish maswir mam ma ku mujimbu anch natek Want wend pa ndond ya kusambish?’ (Mat. 6:31-33) Anch wakul anch mwaning ku yipul yiney, wirijekin mulong wa choziu chin chawonsu chikutwisha kukushiken.​—Jnsw. 3:5, 6. w20.08 17-18 par. 15-16

Tufanyidin kwijik mutapu wa kusadin nawamp Dizu dia Nzamb. Tukutwish kwilej yom yimwing yikutwisha kutukwash kusadin nawamp Dizu dia Nzamb ku yikumangan yetu. Pakwez, anch tukimbin kuyinkish antu akwau kashinsh anch uyakin wa Bibil ukutwish kuyikwash, tufanyidin ayinetu kwikal ni chaku cha kumwilejang pakad kujing. Tufanyidin kusadin Dizu dia Nzamb mulong wa kukasikesh ritiy retu. Mulong wa kusal mwamu, tufanyidinap kusu kwetu ching kutang Bibil. Chitin kutongijokin pa yom tutangina ni kukimbijol mu mikand yetu chakwel tutesha nawamp Mifund ni kwijik mutapu wa kuyisadin mu mwom wetu. (1 Tim. 4:13-15) Anch twasal mwamu, tukutwish chad kwijik mutapu wa kusadin Dizu dia Nzamb mulong wa kuyifundish antu akwau. Kuyifundish antu akwau kwitinap kwau ching kusu kutang maverse. Tufanyidin kumukwash muntu kwov kurumburik kwa maverse ni kuman mutapu maverse minam mamutadina ndiy amwinend. Anch twasambish kwilej Dizu dia Nzamb chisu chawonsu, tukutwish kuswish mutapu wetu wa kusadin Dizu dia Nzamb mulong wa kuyifundish antu akwau.​—2 Tim. 3:16, 17. w20.09 28 par. 12

Tukutwish kudandamen kutek mudimu wa kulejan pa ndond ya kusambish anch twatongijokin pa yom yawonsu yisadinay Yehova mulong wa kutukwash. Chilakej, utwinkishin yakudia yivud ya muspiritu mudi mikand yikatau kuchap ni ya elektronik, ya mazu ni mavideo makatau kukwat ni ma program ma JW Télédiffusion. Tong bil kand: Kapend ketu ka web kakwet jinsangu mu mazu 1000 ni kusuta! (Mat. 24:45-47) Mutapu ukwau wa kudandamen kutek mudimu wa kulejan pa ndond ya kusambish udi kusutil kwimburij chilakej cha Yesu. Yesu kalikidinap chom ap chimwing chakwel chimukangesh kulejan. (Yoh. 18:37) Chisu chakimbay Satan kumwinkish Yesu “mant mawonsu ma pa mangand ni uyaj wau” ap chisu chakimbau kumudish want kudi antu, Yesu kitiyap. (Mat. 4:8, 9; Yoh. 6:15) Kakatap yom ya kumujimbu ni kwovap wom wa rupompat rikash. (Luka 9:58; Yoh. 8:59) Anch ritiy retu aripak, tukutwish kudandamen kutek mudimu wa kulejan pa ndond ya kusambish anch twavurik chiyul chapanay kambuy Paul mu mufund wa nlel. w20.09 9-10 par. 6-7

Tukwet musangar nakash pa kwikal nau anambaz avud mwamu mu chikumangen akweta muchim wa kwipan! Akat kusal yikunku ni kwakul ku yikumangan, ni akat kwipan kand nakash mu mudimu wa kulejan. Amwing pakach pau akat kwipan mu mudimu wa kurijek Chot chau cha Want, ni akat kuyikwash kand akadivar nau anambaz nau. Pakwez, akat kurish kand ni milong. Amwing pakach pau ayilamin anvaj au ananapina kal. Akwau akat kurish ni rupompat ra anamakwau. Akwau kand alidin an diayinau, ni akat kusal midimu yikash mulong wa kuwanyish maswir ma anau. Mulong wak tufanyidin kuyikwash anambaz netu? Mulong antu a mangand kakatap kuyilimish amband ap kuyikwat nich usey. Chikwau kand, Bibil utulejin anch tufanyidin kuyikwash anambaz. Chilakej, kambuy Paul wayileja in Kristu a ku chikumangen cha Rom kumwak Febe ni “[kumukwash nich] yom yawonsu yikwetay nich kuswir.” (Rom 16:1, 2) Paul wading pakach pa antu ading ayimena amband mudi antu akad usey. Pakwez, kudiosh kwikalay mwin Kristu, Paul wasala usu wa kumwimburij Yesu, wayilimishang amband ni kuyimekeshin rukat. w20.09 20 par. 1-2

Mulong wakuyikwash in kwilej chakwel akudisha impu ya kulejan rusangu ruwamp kudi antu akwau, tufanyidin kuyipul in kwilej etu yipul mudi yilondwilaku ey: “Mutapu ik uswimpina mashakamin mey piusadidina yom wilejina mu Bibil? Ov, utongin anch antu akwau akwet kuswir kwa kutesh rusangu ruwamp? Yom ik ukutwisha kusal mulong wa kuyikwash antu inay?” (Jnsw. 3:27; Mat. 9:37, 38) Tufanyidin kwijik anch Yesu watuleja kuyifundish antu akwau “kuziyil ku yom yawonsu” yafundishay. Pakach pa yom yiney padi yijil yijim yaad: Kumukat Nzamb ni mutej netu​—yom yiney yaad yawiy yikwatijadina ni mudimu wa kulejan ni wa kwikadish in kwilej. (Mat. 22:37-39) Chakin kamu,diawiy diyingishin dia pakampwil ditubachikining kusal mudimu wa kulejan rid rukat. Chid chakin anch in kwilej a Bibil amwing akutwish kwov wom wa kusal mudimu wa kulejan. Pakwez, tukutwish kuyinkish in kwilej inay kashinsh anch kusutil ukwash wa Yehova akutwish kupandikan wom wa antu.—Kus. 18:1-3; Jnsw. 29:25. w20.11 3 par. 6-8

Chisu urijekina dilejan dia Bibil, ufanyidin kumulembil Yehova mulong wa mwin kwilej wey ni maswir mend. Mwita Yehova chakwel akukwash kusadin Bibil mu mutapu ukutwisha kupukun muchim wa muntu. Vurik anch chitongijok chey chid cha kumukwash mwin kwilej chakwel aya kurutu ashiken ku kutambul dibatish. Mwin kwilej ufanyidin kand kwambamb ni Yehova. Mutapu ik ukutwishay kusal mwamu? Kusutil kumutesh Yehova ni kumulej kand niyend yitonginay. Ukutwish kumutesh Yehova kusutil kutang Bibil dichuku diawonsu. (Jos. 1:8; Kus. 1:1-3) Ukutwish kwambamb ni Yehova kusutil kumulembil dichuku diawonsu. Chawiy lembil nich muchim wey wawonsu pamwing ni mwin kwilej wey kwinsambishin ni kwinsudiel kwa dilejan, ni mujimbula mwin kwilej wey mu malembil minam. Anch wakutesh mutapu ulembila, niyend ukwilej mutapu wa kulembil nich muchim wend wawonsu kudi Yehova ni ukusambish kusal mwamu kusutil dijin dia Yesu. (Mat. 6:9; Yoh. 15:16) Tongin mutapu kutang Bibil dichuku diawonsu (charumburik anch kumutesh Yehova) ni kulembil (charumburik anch kwambamb ni Yehova) kukutwisha kumukwash mwin kwilej wey kusej piswimp nakash ni Nzamb!​—Jak. 4:8. w20.10 8 par. 8; 9 par. 10-11

Nlel dirijek dia Yehova disadin usu nakash wa kulam chisambu ni kwipuk kanvundangesh mu chikumangen cha win Kristu, mudi mutapu yadinga mu chikumangen cha mu mivu chitot ya kusambish. (Mid. 16:4, 5) Chilakej: Anch ukimbin kukumangan ku dilejan dia Chinong cha Kalam mu chikumangen chindj​—ap mwi ngand yindj—​wij kal kwey mutu wa mulong ukwilejau ni mutapu ukuutakelau. Ukwiyov kamu kwey mudi udi mu chikumangen cha kwol kwen! Anch kudi uumwing mudi winou, chidi mulong wa spiritu wa Nzamb! (Zak. 3:9) Yom ik ukutwisha kusal? Iyipula anch: ‘Ov, nikat kukasikeshang umwing ni chisambu mu chikumangen? Ov, nikat kuyiziyinang akadivar atakedila? Ov, akadivar nau anambaz akutwish kwinchingejin, pakampwil anch nikwet yisend mu chikumangen? Ov, niding mwin kulimish chisu, mwin kuyikwash antu akwau, ni niding kwaku mulong wa kukwash anch kudi maswir?’ (Jak. 3:17) Anch umen anch kudi yom ufanyidina kuswimp, mulembila Yehova chakwel akwink spiritu utumbila. Anch witiy anch spiritu utumbila akukwash kuswimp mikadil yey ni yaku yey, akadivar ni anambaz ney akukukat nakash, ni kukusanger. w20.10 23 par. 12-13

Dizu dia Nzamb did mud chintadil (dikalash). (Jak. 1:23-25) Antu avud pakach petu tukweting chaku cha kwital pa dikalash pamanch kurutu kwa kubudik. Mwamu tukutwish kuman anch kud chidik tufanyidina kurijek chakwel kangal achiman kud antu akwau. Chilik chimwing, anch tukat kutang Bibil dichuku diawonsu, tukutwish kwijik mutapu wa kuswimp yitongijok yetu ni mwikadil wetu. Antu avud amening anch chiding cha ukwash nakash kutang mufund wa dichuku pamanch pawonsu kurutu kwa kudiokal ku chikumbu. Mwamu akutwish kutongijokin pa yom yiney dichuku diawonsu diakabuj ni kukimb mitapu ya kuyisadin. Kupwa, tufanyidin kwikal ni chaku cha kutang ni kutongijokin Dizu dia Nzamb dichuku diawonsu. Chinech chikutwish kumekan mud chom chiswapela, pakwez chidi pakach pa yom ya usey nakash tufanyidina kusal mulong wa kudandamen kwendil mwi njil yiwongina yitwadila ku mwom. Dizu dia Nzamb did mud chipim cha radio chikatau kusadin ku opital mulong wa kuman yom yidia mukach mwa mujimbu. Pakwez tufanyidin kwikal ikepishina anch tukimbin anch tutaninamu mu yiyul ya Bibil ap ya akadivar asadidinay Yehova mulong wa kututakel. w20.11 18 par. 3; 20 par. 8

Ap anch yisu yivud in Kristu a mu mivu chitot ya kusambish ayipompata, pakwez asangera chisambu mu yisu kanang. Yom ik yasalau in kwilej inay pa chisu cha chisambu? In Kristu inay ashinshamena alejana rusangu ruwamp pakad kupim. Rusangu rau rilejenau mu mukand wa Midimu rilejen anch ‘amulimisha Yehova.’ Adandamena kwipan mu kulejan rusangu ruwamp ni mudi chibudikin, adandamena “kuvulijan.” Chakin kamu, Yehova wayukisha mudimu wau wa kulejan pa yirung ya chisambu. (Mid. 9:26-31) In Kristu a mu mivu chitot yakusambish alejanang chisu chawonsu rusangu ruwamp anch kwamekan mutapu wa kusal mwamu. Chilakej, pamanay kambuy Paul anch kudi mutapu wa kulejan rusangu ruwamp mu Efes, wasadina chisu chinech mulong wa kulejan ni kwikadish in kwilej mu musumb winou. (1 Kor. 16:8, 9) In kwilej ipana nakash mu kulejan ‘rusangu ruwamp ra dizu dia Yehova.’ (Mid. 15:30-35) Yibudikin ik yikalaku? Mufund wa nlel utulejin yom yasadika. w20.09 16 par. 6-8

Chisu chasalay Adam chitil, wikakina amwinend rufu, pakwez wayikakinar kand anend. Nlel unou tudandamedin kuman mar mulong wa kubwambwil kwend. Pakwez tukutwish kuchingej yom yiwamp, mulong Nzamb wamuvumbula Mwanend! “Kuvumbuk kwa afu kwikal kand aom kwashik kal mulong wa muntu umwing,” charumburik anch Yesu. Kambuy Paul wafunda anch: “Mudi mukat kufau antu awonsu mulong adiokala kudi Adam, chawiy kand chimwing, in Kristu awonsu akez kavumbuk kwikal kand aom mulong wa Kristu.” (1 Kor. 15: 22) Pafunday anch “mudi mukat kufau antu awonsu mulong adiokala kudi Adam,” Paul wading wisambidin piur pa an a Adam. Mulong an inay aswana chitil ni kuburen kuwanyin kud Adam, chawiy ad kwau in kufa. (Rom 5:12) Adam kadiap pakach pa antu akeza “kuvumbuk kwikal kand aom.” Difut dia Kristu dikutwishap kumukol Adam, mulong ndiy wading muntu uwanyidina wabwambwila kwa kwikatin. Yibudikin ya Adam yid pamwing ni ya antu akurumburishau kud “Mwan a muntu” anch ad “ampemb,” charumburik anch antu akulejau “kadimu ka chikupu.”—Mat. 25:31-33, 46; Heb. 5:9. w20.12 5 par. 13-14

Anch kakwinkishinap chisend kanang, vurik chilakej cha angel ashinshamena. Pa chisu chading chiyikedilay Mwant Akab, Yehova wayita angel kulet yitongijok piur pa mutapu wa kumwoz mwant winou muyimp. Angel kushalijan apana yitongijok yau. Pakwez, Nzamb watonda mwangel umwing ni wamuleja anch chitongijok chend chikuwanyin. (1 Ant 22:19-22) Ov, angel akwau ashinshamena aziya, pamwing ap kutong anch: ‘Mulong wak nasheshang chisu cham mulong wa kupan chitongijok’? Chakin kamu kimwawiyap. Angel ading ikepishina ni akatining anch ntumb jawonsu jiya kud Yehova. (Ank. 13:16-18; Kuj. 19:10) Shinshikin pa dilau tukweta dia kututazuk anch Atuman a Yehova ni kulejan Want wend. Kidiap yisend yitwikadishina a usey ku mes ma Nzamb. Ching anch twikal antu ija mimbu yetu ni ikepishina chad lel twikal a usey ku mes ma Yehova ni ma akadivar netu. Chawiy mwita Yehova chakwel akukwasha kushal wikepishina ni kwijik mimbu yey. Tongijokin pa yilakej yiwamp ya antu isambidinau mu Bibil alimisha mimbu yau ni ading ikepishina. Yikwasha akadivar ney kwakwikatil mu yom yawonsu ukutwisha kusal.​—1 Pita 5:5. w20.12 26 par. 16-17

Mpup ya dipandish (chiful) rid ruchingej ritwinkishinay Yehova anch ukutuvumbul ni ukuyifut antu awonsu asadina rusot rend. (1 Tes. 5:8; 1 Tim. 4:10; Tit. 1:1, 2) Ruchingej ra dipandish rikat kuchidij manangu metu. Rikat kutukwash kushinshikin nakash pa kushilamu kwa Yehova pa ndond pa kushinshikin pa milong turishina nich. Mutapu ik tukata kudjal mpup? Tukat kusal mwamu kusutil kuman yom mu mutapu uyimenau kud Nzamb. Chilakej, tukatap kutek ruchingej retu mu mapit makata kusheshik, pakwez tukat kumuchingejin Nzamb. (Kus. 26:2; 104:34; 1 Tim. 6:17) Mpak ya musamun ya spiritu did Dizu dia Nzamb, Bibil. Mpak yiney yikwet usu wa kumekesh patok makasu ni kuyikol antu ku mafundish ma makasu ni yisal yijondila. (2 Kor. 10:4, 5; 2 Tim. 3:16, 17; Heb. 4:12) Tukat kwilej mutapu wa kusadin nawamp mpak yiney kusutil dilejan dietu dia pakampwil, ni kusutil kufumb tukata kutambul mu dirijek dia Nzamb.​—2 Tim. 2:15. w21.03 27 par. 4; 29 par. 10-11

Ap chisu chamutekau mu rukan mulong wading ulejen piur pa Yesu, kambuy Yohan wamekesha anch wading uyikatina antu akwau. Chilakej, wafunda mukand wa kujingunik watumay ku yikumangen chakwel ijik yom “yikushika mu chisu chikemp.” (Kuj. 1:1) Kupwa, padiokalay pa ditung dia Patimos, Yohan wafunda Evanjil ulejena rusangu ra mwom wa Yesu ni mudimu wasalay. Wafunda kand mikand yikwau yisatu mulong wa kuyikasikesh akadivar ni anambaz. Ukutwish kwimburij chilakej cha mwom wa kwipan wadingay nich Yohan ni kumekesh anch uyikatin antu kusutil yom utondina kusal mu mwom wey. Mangand ma Satan makatin anch tusadina usu ni chisu chetu mulong wa ayinetu, kwipan mu kukimb nfalang ni kukimb ntumb ja mangand minam. Pakwez, pa mangand mawonsu, in Kristu akat kusadin chisu chau chivud mulong wa kulejan rusangu ruwamp ni kuyikwash antu akwau kumusejin Yehova. w21.01 10 par. 9-10

Jonatan wafanyina kumwovil David mukau. Mulong wading mwan a Mwant Saul, wafanyina kulond anch ndiy ukumuswinkana tatukwend. (1 Sam. 20:31) Pakwez Jonatan wading wikepishin ni wading ushinshamen kud Yehova. Chawiy wanunga chikas ku mupak wakwatay Yehova anch David ikal mwant. Wading kand ushinshamena kud David, ap anch kusal mwamu kwamujimesha tatukwend Saul. (1 Sam. 20:32-34) Jonatan wading umukatin nakash David, chawiy kamumanap mud mukankuny nend. Jonatan wading chifuvu wija kurish njit, ni wading wij kwas nseu nakash. Antu alondang piur pendendiy ni tatukwend Saul anch “ayisutamu atujil ambur mau” ni “ayipandakana antambu usu.” (2 Sam. 1:22, 23) Chawiy, Jonatan wafanyina kwibaz mulong wa ukaliweny wadingay nich. Pakwez, kabambilap ni David, ap kamwovilap mukau mulong wa yom yiwamp yasalay. Chinyim ni chinech, Jonatan wamubaza David mulong wa kutakaman kwend ni ruchingej radingay nich mudiay Yehova. Chilakej, Jonatan wasambisha kumukat David mud mwikatilay amwinend kupwa kwa David kumujip Goliat. w21.01 21 par. 6; 22 par. 8-9

In Kristu awonsu ad mwinshin mwa umutakel uwanyidina wa Yesu Kristu. Pakwez anch nambaz wachik, wikal kal mwinshin mwa umutakel wa ikundj wakad kuwanyin. Kukutwish kwikal yikokujol. Chawiy anch nambaz utongin kwatijan ni mukadivar kanang, ufanyidin kwiyipul anch: ‘Yom ik yimekeshina anch mukadivar winou ukwikal ntakel muwamp wa dijuku? Ov, ukat kutek yom ya mu spiritu pa ndond yakusambish mu mwom wend? Anch bwat, yom ik yimbachikina kutong anch ukwikal ntakel muwamp wa mu spiritu kupwa kwa kwatijan?’ Ku mutambu ukwau, nambaz ufanyidin kand kwiyipul anch: ‘Mikadil ik nikweta yikutwisha kulet musangar mu uruw wetu? Ov, niding mwin kushimpish muchim ni mwin kupan? Ov, nikwet kamu urund ukash ni Yehova?’ (Mul. 4:9, 12) Anch nambaz wakwat mipak yiwamp kurutu kwa kwachik, chinech chikutwish kumukwash kwikal ni uruw uwamp ni ukweta musangar. Kud mamiliyon ma anambaz netu in Kristu ashila chilakej chiwamp kusutin kuyiziyin anfumwau. Tuyijikitishin nakash! w21.02 8 par. 1-2

Kusambishin mu mivu yikemp yasutina ey, in kulejan avud itekidin mupak wa kwilej dizu dindj mulong wa kutanduril mudimu wau wa kulejan ni kukwash mu yikumangen ya mazu mindj mudia maswir nakash ma in kulejan a Want. Winou udi mupak ukwatinau in Kristu inay ayinau mulong wa kutwal yisakin ya Want kurutu. Ap anch chikutwish kuyit mivu yivud chakwel atwish kulond dizu dined disu pakad kuditabangesh, pakwez akwashin chikumangen mu mitapu yivud. Mikadil yau yiwamp ni ukaliweny wau yikat kukasikesh chikumangen. Tuyikatin nakash akadivar nau anambaz inay akweta muchim wa kwipan! Chisak cha amakurump chifanyidinap kulik kumutond mukadivar chakwel ikal mukurump wa chikumangen ap nkwash wa mudimu mulong kusu kijap kwend kulond nawamp dizu dia chikumangen. Amakurump a chikumangen akat kushinshikinang mifund ya Bibil mulong wa kuman anch mukadivar uwanyishin yitinau mulong wa kwikal mukurump wa chikumangen ap nkwash wa mudimu, pakwez kakatap kushinshikinang mulong wa kuman anch wij kulond nawamp dizu dia chikumangen ap bwat.—1 Tim. 3:1-10, 12, 13; Tit. 1:5-9. w20.08 30 par. 15-16

Antu akutwish kutong anch akutwish kwikal ni musangar ching anch akwet ukash uwamp wa mujimbu, nfalang jivud ni dijuku dikweta musangar. Pakwez musangar wisambidinay Jakobu ud chikunku cha dibuj dia spiritu wa Nzamb ni wimedinap pa mutapu udia mashakamin metu. (Gal. 5:22) Mwin Kristu ukat kwikal ni musangar wakin anch wijik anch umusangareshin Yehova ni wimburijin chilakej cha Yesu. (Luka 6:22, 23; Kol. 1:10, 11) Mud muzuzu wa kasu ka lamp uchidijinau mu chilaud, musangar winou ukat kudandamen kusut mu muchim wa mwin Kristu chikalap nchik yikokujol yirishinay nich. Ukatap kushadik anch muntu wayel ap waburen nfalang. Ni musangar winou ukatap kand kushadik anch atuswingish ap atupompat kud anamakwetu ap antu akwau. Pa ndond pa kukep, musangar wetu ukat kuvul chisu chawonsu chikatau kutupompat. Yikokujol tukata kurish nich mulong wa ritiy retu yimekeshin patok anch tud in kwilej akin a Kristu. (Mat. 10:22; 24:9; Yoh. 15:20) Diawiy diyingishin diamubachika Jakobu kufund mazu madia mufund wetu wa dichuku. w21.02 28 par. 6

Chisu utangina maverse ma Bibil mamekeshina anch chid cha usey kwikuchik ni kumuchingejin Yehova, sal usu wa kumalam mu manangu. Ukutwish kumatang nich dizu dia piur ap kumafund ni kumatang yisu yivud chakwel umalam mu manangu. Yehova wamuleja Joshua kutang chisu chawonsu buku wa Yijil nich dizu dia mwinshin chakwel atwish kukwat mipak ya manangu. Yom yatangangay mu chijil yafanyina kand kumukwash kulik kwov wom, pakwez kwikal utakamena mulong wa kuyitakel antu a Nzamb. (Jos. 1:8, 9) Maverse mavud madia mu Dizu dia Nzamb makutwish kukuletin chisambu cha mu manangu ni cha mu muchim chisu urishina ni milong yifanyidina kukuletin yakamish ap kukwovish wom. (Kus. 27:1-3; Jnsw. 3:25, 26) Yom tukata kwilej ku yikumangan yetu, yakul yikatau kwakul antu akumangena, ni yom tukata kwambamb ni akadivar nau anambaz netu yikat kutukasikesh. (Heb. 10:24, 25) Akutwish kand kutukasikesh anch twayilej arund tuchingejidina adia mu chikumangen yom yitwakamishina. w21.01 6 par. 15-16

Chisu watambula dibatish, wamekesha anch ukwet ritiy rikash mudiay Yehova ni umuchingejidin. Ni Yehova witiya anch wandam mu dijuku diend. Pakwez katat ufanyidin kudandamen kumuchingejin Yehova. Chikutwish kukuswapel kumuchingejin Yehova chisu ukwatina mipak ya usey nakash mu mwom, pakwez chid nchik chisu ukata kukwat mipak yimekena mud ya usweral? Chid cha usey nakash kumuchingejin Yehova chisu ukwatina mipak, mud chisu utondina milad ya kwipuwangej, mudimu wa ku mujimbu, ap chisu witekidina mipak mu mwom wey! Kangal wachingejin manangu mey amwiney. Kimb mbil ja Bibil jikutwisha kukukwash kukwat mipak yiwamp, ni kupwa jisadina. (Jnsw. 3:5, 6) Anch wasal mwamu, ukumusangaresh Yehova, ni akadivar ni anambaz mu chikumangen chey akukulimish. Chakin kamu, ud muntu wakad kuwanyin mud antu awonsu ni yisu yimwing ukutwish kurumbuk. Pakwez, yiney yifanyidinap kukukangesh kwipan mu mudimu wa Yehova. w21.03 6 par. 14-15

Ov, antu a mu dijuku diey akupompatin? Ap ov, ushich mwi ngand mukangeshinau yom yimwing piur pa mudimu wetu ap muukangeshinau kamu? Anch mwawiy, kutang mukand wa 2 Timote 1:12-16 ni 4:6-11, 17-22. Kambuy Paul wafunda maverse minam chisu chadingay mu rukan. Kurutu kwa kutang maverse minam, murumburila Yehova mulong wey ni mutapu wiyovila. Muleja kachom ni kachom piur pa mutapu wiyovila. Kupwa, mwita Yehova chakwel akukwash kujingunin malejan kusutil chilakej cha yom yamushikena Paul ukutwisha niyey kusadin mulong wa kupwish mulong wey. Yehova wasambela kumulej Paul anch akumuzengol mulong ud mwin Kristu. (Mid. 21:11-13) Yehova wamukwasha mutapu ik Paul? Wakula malembil mend, ni mukusut kwa chisu wamwinkisha ukash. Paul wading ukwet kashinsh anch ukutambul difut diamenay mar mwamu. Yehova wayisadina kand arund ashinshamena a Paul mulong wa kumukwash. w21.03 17-18 par. 14-15, 19