Ngond wa 8

Ching kusu antu adia mu urund wa piswimp ni Yesu awiy akutaninamu mu chakupesh chend cha difut. Yesu walonda anch wafanyina “kufa mulong wa arund nend.” (Yoh. 15:13) Antu ashinshamena ashakama kurutu kwa Yesu kwez pa divu akez kilej piur pend ni kushiken ku kumukat. Amakundj nau amband inay akez kayivumbul, pakwez ap atushalapol inay a Yehova akwikal ni kuswir kwa kuta urund wa piswimp ni Yesu mulong wa kwikal ni mwom wa chikupu. (Yoh. 17:3; Mid. 24:15; Heb. 11:8-12, 24-26, 31) Tukwet musangar wa kusal pamwing ni Yesu mu mudimu wa kulejan ni kufundish rusangu ruwamp ra Want. Padingay pa divu, Yesu wading mulej. Ni kudiosh kwachirikinay mwiur, mudi ntakel wa chikumangen, Yesu udandamedin kutakel mudimu wa kulejan ni kufundish. Umen ni ukwatin nich usey usu wey usadina mulong wa kuyikwash antu avud chakwel ashiken kumwijik ndiy ni Tatukwend. Chawiy, tukutwish kuwanyish mudimu winou ching kusu kusutil ukwash wa Yehova ni Yesu.​—Yoh. 15:4. w20.04 22 par. 7-8

Yijiken “mwant wa kwiyand” ni “mwant wa kurul” ayisadina chakusambish padi ant a chipolitik ading ku mutambu wa kwiyand ni mutambu wa kurul kwa ngand ya Isarel. (Dan. 10:14) Nzamb wadandamena kwitiy muchid wa Isarel wa ku mujimbu mudi antu end djat kamu pa Pentekot wa muvu wa 33 C.C. Pakwez, kudiokal kamu muvu winiwa, Yehova wamekesha patok anch in kwilej a Yesu ashinshamena awiy ikala antu end. Chawiy, uprofet uvud udia mu Daniel shapitre wa 11 utadinap kand muchid wa Isarel wa ku mujimbu, pakwez uyitadin in kwilej a Kristu. (Mid. 2:1-4; Rom 9:6-8; Gal. 6:15, 16) Ni ant ap maguvernema kushalijan mikala mwant wa kwiyand ni mwant wa kurul mu yisu kushalijan. Ap mwamu, ant inay awonsu ading iliken mu yom yimwing. Chakusambish, ant ayipompata atushalapol a Nzamb nich chisum. Cha kaad, kusutil mutapu wayisadinau atushalapol a Nzamb, amekesha anch amukisin Yehova, Nzamb wakin. Ni cha kasatu, ant inay aad arisha umwing ni mukwau mulong wa kufil kwikal piur pa mant mawonsu. w20.05 3 par. 3-4

Yehova ukat kusal anch yom yisadik mutapu ukatinay kusutil kwikal yawonsu yikatilay mulong wa kuwanyish chitongijok chend. Yehova ukutwish kand kuyikadish atushalapol end akad kuwanyin mutapu wawonsu ukatinay anch ikal mulong wa kumusadin ni kuwanyish chitongijok chend. (Isay 64:8) Kusutil mitapu yiney, Yehova ukat kusal anch rusot rend riwanyin kamu. Kwikil chom ap chimwing chikutwisha kumukangesh kuwanyish rusot rend. (Isay 46:10, 11) Anch twatongijokin pa yom yasadinay kal Tatukwetu wa mwiur ni yom yatutwishishinay kal kusal tukumushimek ni kumulimish nakash. Chilakej, anch twatongijokin pa yitang yend yishimokishena, tukat kumulimish nakash mulong wa yom yasadinay kal. (Kus. 8:3, 4) Ni anch twatongijokin pa mutapu watwikadishinay kal Yehova mulong wa kuwanyish rusot rend, tukat kukudish kalimish kakurikina mulong wendendiy. Chakin kamu tufanyidin kulimish dijin Yehova! Dijin dined dirumburishin wuntu wawonsu wa Yehova, yom yawonsu yasadinay kal ni yom yawonsu yikusalay mu machuku ma kurutu.​—Kus. 89:7, 8. w20.06 9 par. 6-7

Oxygène udi rinkind ukwetau nich antu ni annam kuswir mulong wa kudandamen kwikal aom. Kukwatijan ni in kukimbijol, chimeken anch yitang yikweta mwom yikat kusadinang mamiliyar chitot ma maton ma oxygène muvu ni muvu mulong wa kupim. Yitangil yiney yikat kubudish rinkind muyimp utazukinau anch dioxyde de carbone. Pakwez yitangil yiney yitwishiningap kupwish rinkind muwamp tupimining (oxygène), ni mu rinzwizu kandikal mwizulangap rinkind muyimp tubudishining (dioxyde de carbone). Mulong wak? Mulong Yehova watanga mitond kushalijan, mitond yiney yikat kupwit rinkind muyimp utubudishina etu ni kubudish rinkind muwamp utukweta nich etu kuswir. Chakin kamu, munyingumuku wa rinkind umekeshin uyakin wa mazu madia mu mufund wa nlel. Yom ik yikutwisha kutukwash kwikal in kujikitish mulong wa planet wetu upandikena kuwap ni yom yawonsu yidiap? (Kus. 115:16) Mutapu umwing tukutwisha kusal mwamu udi kusutil kutongijokin pa yom yasalay kal Yehova. Kusal mwamu kukutubachik kumujikitish Yehova dichuku diawonsu mulong wa yom yiwamp yitwinkishinay. Ni tukat kumekesh anch tudi in kujikitish mulong wa divu kusutil kudandamen kwinangish ndond tushicha. w20.05 22 par. 5, 7

Yehova wapwisha nich manangu, kushimpish muchim ni kutentam, mulong waletay Satan. Wamekeshin kal kand dikand diend mu mitapu kushalijan. Cha usey nakash, ukat kumekesh rukat mu yom yawonsu yisadinay. (1 Yoh. 4:8) Yehova udandamedin kusal mudimu mulong wa kutumbish dijin diend. Nlel Satan udandamedin kand kufukejin dijin dia Nzamb. Ukat kuyibachik antu kwidjidjek anch Nzamb udi mwin dikand, utentamina, mwin manangu ni mwin rukat. Chilakej, ukat kusal usu wa kuyinkish antu kashinsh anch Yehova kadiap kwend Sakatang. Chad anch antu itiyij anch Nzamb udingaku, Satan ukat kusal usu wa kuyibachik kwitiyij anch mbil Jend jikasiken nakash ni jitentaminap kwau. Ukat kuyifundish kand antu anch Yehova kakuyibanginangap ni udi Nzamb mwin chisum ukata kuyosh antu mu dijiy dia kasu. Anch antu itiyij ku makasu mend, akat kushiken ku kukwat mupak uyimp​—kulik mbil jitentamina ja Nzamb. Satan ukudandamen kusal usu wa kukubachik chakwel niyey ulik kumuziyin Yehova djat kamu ni pakumusheshinau. Ov ukutwish? w20.06 5 par. 13-15

Mu yikumangen yivud mudi akadivar nau anambaz asadina usu wa kwilej dizu dindj. Chikutwish kuyikasiken pamwing ap kulond yom yitonginau. Pakwez anch twalik kushinshikin pa mutapu ulondinau dizu dilejinau, tukutwish kujingunin anch amukatin Yehova ni akatin kumusadin. Anch twajingunin mikadil yau yiney yiwamp, tukuyikat ni kuyilimish nakash. Ni tukutwishap kuyel anch “kinikwetap kuswir kwenen” mulong kusu kwau katwishinap kulond nawamp dizu dietu. (1 Kor. 12:21) Yehova watwinkishin kal dilau dipandikena kuwap mulong muntu ni muntu pakach petu ukat kusal mudimu wa usey mu chikumangen. Wikala mu uruw ap mujich, ikundj ap mband, nsand ap ipal ap anch ukat kulondang nawamp dizu kanang ap bwat, ijik anch udi wa usey ku mes ma Yehova ni kudi akadivar nau anambaz ney. (Rom 12:4, 5; Kol. 3:10) Elany amboku tusalany usu chisu chawonsu wa kusanger chitudia ni tukukimb kand mitapu ya kuyilimish antu akwau adia mu chikumangen. w20.08 31 par. 20-22

Kambuy Paul kayiduwulap in ku Aten ap anch musumb wau wading wizwil too nich difukwil dia akish, masandj, ni mafilozofi ma apagan; ni kalikap kuyilej rusangu ruwamp ap anch ading akat kumusaal. Paul amwinend wikala mwin Kristu ap anch wading “mwin kusaalan ni mwin kwakamishan ni kurumbok.” (1 Tim. 1:13) Mudi mutapu wachingejay Yesu anch Paul ukutwish kwikal mwin kwilej dichuku dimwing, Paul witiyija anch in Aten akutwish kwikal in kwilej. Ni kashinsh kend kadingap kayimp bwat. (Mid. 9:13-15) Mu mivu chitot ya kusambish, antu a mashakamin ma mitapu yin yawonsu ikala in kwilej a Yesu. Chisu chayifundinay Paul in Kristu ading ashicha mu Korint, musumb wa Grek, walonda anch amwing pakach pa akadivar a chikumangen chinicha ading mu chisu chimwing in kujipan ap kand ading ni mashakamin ma masandj. Ni kupwa wawejinaku anch: “Antu amwing a pakach pen ading mwamu. Pakwez en akoyishinany kal ku yitil.” (1 Kor. 6:9-11) Anch yeya ov wafanyina kuyiman antu iniya anch ading ni mutapu wa kukarumuk ni kwikal in kwilej? w20.04 12 par. 15-16

Amakurump kafanyidinap kuswakal kuyifish nich antu iyipwila anch kumusadin Yehova kudi kamu chakin kwa usey. Pa ndond pa kuyifish nich, amakurump afanyidin kusal usu wa kwijik diyingishin diyibachikina kulond ap kusal mwamu. Ching kusu anch amakurump asal mwamu chad lel atwish kwijik mutapu wa kusadin Bibil mulong wa kuyikasikesh antu inay. Muprofet Elija wamuchina Mwant Mwad Jezabel. (1 Ant 19:1-3) Wiyova anch mudimu wend wading kwau wakad usey ni wakata anch afa kwend. (1 Ant 19:10) Pa ndond pa kumufish nich Elija, Yehova wamwinkisha kashinsh anch kadingap amwinend, wamuleja anch ufanyidin kuchingejin usu wa Nzamb ni anch kwading kuchid mudimu ujim wading ufanyidinay ndiy kusal. Nich kudimuk Yehova watesha yovil ya Elija ni wamwinkisha yisend yisu. (1 Ant 19:11-16, 18) Chilakej chinech chitufundishin ik? Etu awonsu, pakampwil amakurump, tufanyidin kuyisadin amikoku a Yehova nich kudimuk. Ap anch muntu walond anch wovil ujim ap walond anch wiyovil anch Yehova kakumulikishinap, amakurump afanyidin kumutesh nawamp chisu chirumburilay mutapu wiyovilay. Kupwa afanyidin kumwinkish mukoku washadikang kal kashinsh anch Yehova umukatin. w20.06 21-22 par. 13-14

Yehova ukatin anch tusanger urund uwamp pamwing nau arund ni anamakwetu. (Kus. 133:1) Yesu wading nau arund awamp. (Yoh. 15:15) Bibil urumburil mutapu tukutwisha kutaninamu anch tukwet arund akin. (Jnsw. 18:24) Ni utulejin anch chiwapilap anch muntu wiyauril nau antu akwau. (Jnsw. 18:1) Antu avud amening anch kusadil tupend twa Internet twa kutumijadin jinsangu udi mutapu uwamp wa kwikal nau arund avud ni kwipuk kwiyov anch udi amwiney. Pakwez, tufanyidin kubabal piur pa kusadin mutapu winou wa kwambamb. In kwilej ajingunin anch antu akata kusutish chisu chivud mulong wa kutal yom yifundinau ni yipich yitekinau antu akwau pa tupend twa Internet twa kutumijadin jinsangu akat kushiken ku kwiyov kwikal dia ayinau ni kuziy mu manangu. Mulong wak? Diyingishin dimwing disadina mwamu didi anch yisu yivud antu atekining pa tupend twa Internet twa kutumijadin jinsangu ching yipich yimekeshina mashakamin mau ma piur ni atondining yipich yipandikena kuwap ya ayinau, ap ya arund nau yakwatinau ku jindond jipandikena kuwap jendinau. Muntu utadina yipich yiney yimekeshina mashakamin ma piur ang wafanikesh ni mwom wend, ukutwish kutong anch mashakamin mendendiy madi kamu ma pansh nakash​—ap machamwamu. w20.07 5-6 par. 12-13

Chinong cha Kalam cha 1 Ngond wa 10, 1988 mu Français, chilondin anch: “Amakurump afanyidin kwijik anch Kristu ukutwish kusadin spiritu utumbila mulong wa kumutakel mukurump kampand wa mu chisak cha amakurump chakwel isambin mbil ya Bibil yikutwisha kukwash chisak cha amakurump chawonsu kukwat mupak uwamp. (Mid. 15:7-15) Kwikil mukurump ap umwing ufanyidina kutong anch spiritu utumbila ukat kumutakelang kwend ching ndiy.” Mukurump uyilimishina akwau kakatap kwipupwilang chisu chawonsu kulond wakusambish. Kakatap kulond nakash chisu chambambinau, ni kakutongangap anch yom yitonginay ndiy yiding chisu chawonsu yiwamp. Pakwez, ukat kulondang yom yitonginay nich kwikepish. Ukat kuta kand matu ku yitongijok ya akwau. Cha usey nakash, ukatining kulond yom yimedina pa mbil ja Bibil ni kuziyin ku umutakel wa ‘kashalapol ushinshamena ni kubabal.’ (Mat. 24:45-47) Anch amakurump isambin yom mu mutapu wa kalimish ni rukat, spiritu wa Nzamb ukat kwikalang nau, ni ukat kuyikwashang kukwat mipak yiwamp.​—Jak. 3:17, 18. w20.08 27 par. 5-6

Akankuny a Paul ading ni usu nakash kumusutamu ndiy. Tupamp tuvud, amubula ni kumutek mu rukan. Chikwau kand, Paul amusadina yom yiyimp kudi antu ading afanyidina kwikal arund nend. Ap kand ni mu chikumangen antu amwing amupipeja. (2 Kor. 12:11; Fil. 3:18) Pakwez Paul wayipandikana antu awonsu ading amurishikishina. Mutapu ik? Wadandamena kulejan chikalap nchik rupompat. Washala ushinshamena kudi akadivar nau anambaz nend ap chisu chamurumbukinangau. Ni cha usey nakash, washala ushinshamena kudi Nzamb djat ni ku rufu rend. (2 Tim. 4:8) Watwisha kupandikan yikokujol yiney, kadiap mulong wa usu wend, pakwez mulong wamuchingejina Yehova. Ov, urishin nich masaal ap rupompat? Chitongijok chey chidi cha kuyikwash antu kwilej Bibil chakwel amwijik Yehova. Ukutwish kuwanyish chitongijok chinech kusutil kusadin Bibil mulong wa kwakul ku yipul yipwilau antu, kusutil kwikal muntu muwamp ni kuyilimish antu akurumbukidina, ni kusutil kand kuyisadin antu awonsu yom yiwamp, ap akankuny ney.—Mat. 5:44; 1 Pita 3:15-17. w20.07 17-18 par. 14-15

Ov, tukutwish kulond chakin kamu anch Yehova uding wikepishina? Mwaning, tukutwish kulond mwamu mudi mwajinguninay David mu mazu ma mufund wa nlel (Kus. 18:35) Pafunday David mazu minam, wading pamwing ap uvurikin chisu chayay Samwel ku chikumbu cha tatukwend a David mulong wa kumuzizil many muntu wafanyina kwikal mwant wa Isarel mu machuku ma kurutu. David wading kaswulans pakach pa an amakundj chinan; pakwez ndiy watondau kudi Yehova mulong wa kumuswinkan Mwant Saul. (1 Sam. 16:1, 10-13) David wafanyina kwitiyij chakin kamu yom yalondau kudi nfund a kuseng piur pa Yehova anch: “Ukat kutal mes pa maur ni mangand. Ndiy ukat kumudiosh kazwendj mu rufunfut, ukat [kumuzambwish] kand uburedina . . . chakwel [amushichik] pamwing nau ayilol.” (Kus. 113:6-8) Yehova umekeshining anch udi wikepishina kusutil mutapu ukatay kuyisadin atushalapol end akad kuwanyin. Kakatap kwend ching kwitiy difukwil dietu, pakwez ukat kutumanang kand mudi arund nend. (Kus. 25:14) Mulong wa kusal anch urund winou wikalaku, wakwata mupak wa kumupan Mwanend mudi yakupesh mulong wa yitil yetu. Yehova udi chakin kamu Nzamb ukata kulikishin ni mwin ranaken! w20.08 8 par. 1-3

Yehova watekin kal dichuku ni chisu chikusheshay mangand minam mayimp. (Mat. 24:36) Kakwetap muchim wa kadwukudwuku ni kakutwishap kushesh mangand minam kurutu chisu chatekay kal chiwanyin. Ap anch ukwet impu nakash ya kuyivumbul antu afila kal, pakwez ushimpishin muchim. (Job 14:14, 15) Uchingedin chisu chatekay kal chakwel ayivumbul chad. (Yoh. 5:28) Tukwet manyingishin mavud matubachikina kumujikitish Yehova mulong wa kushimpish muchim kwend. Tongijok bil pakemp: Mulong Yehova ushimpishin muchim, utwinkishin etu awonsu chisu cha “kukarumuk.” Yehova ukatin anch antu avud atambul mwom wa chikupu. Chawiy el tumekeshany etu awonsu anch tumujikitishin mulong wa kushimpish muchim kwend. Mutapu ik tukutwisha kusal mwamu? Tukutwish kusal mwamu kusutil kuyikimb nich mushiku antu adia ‘mu mwikadil ufanyidina kutambul mwom wa chikupu’ ni kuyikwash chakwel amukat Yehova ni kumusadin. (Mid. 13:48) Anch twasal mwamu, niyau akutaninamu mu kushimpish muchim kwa Yehova mudi etu. w20.08 18 par. 17

Yom yilejinay mwin kwilej mu Bibil yifanyidinap ching kusu kwau kushal mu manangu, pakwez yifanyidin kand kupukun muchim wend. Mulong wak? Mulong anch yom yilejinay yapukun muchim wend​—ukutwish kuyisadin mu mwom wend. Yesu wayifundishang antu yom yivud ni asangerang kumutesh. Pakwez anch itiya kumulondul, chidi mulong mafundish mend mapukunang kand michim yau. (Luka 24:15, 27, 32) Mwin kwilej wey ufanyidin kumukwat Yehova mudi muntu umenay ni mes mend, ufanyidin kwikal nich kashinsh anch Yehova ukutwish kwikal tatukwend, Nzamb wend, ni murund nend. (Kus. 25:5) Chisu wilejina nend Bibil, kasikeshin pa mikadil ya Nzamb. (Kub. 34:5, 6; 1 Pita 5:6, 7) Sal mwamu chikalap nchik mutu wa mulong wilejina nend. Mukwasha mwin kwilej chakwel aman mikadil yipandikena kuwamp ya Yehova—mud rukat, kuwap ni ranaken. Yesu walonda anch “dilejan dipandikenamu malejan mawonsu” diawiy ed: “Mukata [Yehova] Nzamb wey.” (Mat. 22:37, 38) Sal usu wa kumukwash mwin kwilej wey chakwel amukat Yehova. w20.10 10 par. 12

Yesu wayilimishang amband awonsu. (Yoh. 4:27) Pakwez, Yesu wayilimishang nakash amband ading asadina rusot ra Tatukwend. Chakin kamu, wayimanang mudi ampanyend ni wayijimbula pamwing nau amakundj ading akwatinay mudi dijuku diend dia mu spiritu. (Mat. 12:50) Yesu wading kand murund muwamp kudi awiy. Shinshikin urund wa piswimp wading pakach pa Yesu, Mariy ni Mart, amband ading pamwingap ajich. (Luka 10:38-42) Yisal ni mazu ma Yesu yasalang anch amband inay asanger kusutish nend chisu pamwing. Mariy kidjidjekap kushakam ku mend ma Yesu mudi mwin kwilej. Mart ni ndiy kidjidjekap kumulej Yesu yom yading yitonginay chisu chakisay mulong Mariy kadingap kamukwashina kwisuk. Yesu wasadina chisu chinicha mulong wa kuyifundish amband inay malejan ma usey. Yesu wamekesha anch wading uyibangidin amband inay ni mpanyau Lazar, mulong wayangang kuyital. (Yoh. 12:1-3) Chawiy, chidiap cha kushimok pa kuman anch chisu chayelay nakash Lazar, Mariy ni Mart ading ij anch akutwish kumwit Yesu chakwel ayikwasha.​—Yoh. 11:3. w20.09 20 par. 3; 21 par. 6

In kwilej a Yesu ading achingejin anch Want ‘ukumekan kapamp kamwing’ mulong wa kuyikol ku winyikel wa in Rom. Tuchingedin nich impu nakash dichuku Want wa Nzamb ukudiosha uyimp wawonsu ni kutek ngand yisu yitentamina. (2 Pita 3:13) Pakwez, tufanyidin kushimpish muchim ni kuchingel chisu chatekay kal Yehova. Yehova wamushila Nowa chisu chiwanyidina mulong wa kutung waat ni kwikal “mwin kulejan wa kutentam.” (2 Pita 2:5; 1 Pita 3:20) Yehova wamutesha Aburaham tupamp tuvud chisu chading chimwipwilay piur pa mupak wakwatay wa kuyishesh antu ayimp a mu musumb wa Sodom ni Gomor. (Dis. 18:20-33) Yehova wamekesha kushimpish muchim kumwing kujim nakash pantaliken ni muchid wa Isarel wading wakad kushinshaman mu yitot yivud ya mivu. (Neh. 9:30, 31) Nlel tumen kushimpish muchim kwa Yehova payishidinay antu awonsu akatina kwikal arund nend chisu chakwel ashiken ku “kukarumuk.” (2 Pita 3:9; Yoh. 6:44; 1 Tim. 2:3, 4) Chilakej cha Yehova chitukwashin niyetu kumekesh mwikadil wa kushimpish muchim patudandamedina kusal mudimu wa kulejan ni kufundish. w20.09 10 par. 8-9

Yehova ukuyivumbul antu nich manangu ni wuntu mudi yadingau nich kurutu kwa kufa. Tongin bil piur pa kurumburik kwa mazu minam. Yehova ukukatin nakash ni ukat kuman yom yawonsu utongina, mutapu wiyovila, yom ulondina ni yiusadina ni ukat kudandamen kuvurik yom yiney. Chawiy anch wakimb kukuvumbul, chikumukasikenap kukuvumbul mudi mutapu wading kurutu kwa kufa. Mwant David wading wij anch Yehova umwijing nawamp muntu ni muntu wa pakach petu. (Kus. 139:1-4) Mutapu ik twiyovila pa kwijik anch Yehova utwij nawamp? Chisu tutongijokidina piur pa mutapu utwijau nawamp kudi Yehova, tufanyidinap kwiyakamish anch Yehova ukushinshikin pa kuziy kwetu. Mulong wak? Vurik anch Yehova utukatining nakash. Ukat kusangerang mikadil yimwikadishining muntu ni muntu wa pakach petu wa usey ku mes mend. Ukat kushinshikinang yom yawonsu yatushikena kal mu mwom yisadina anch twikal mutapu tudia nlel. Winou udi uyakin utwongojina mud ik! Tufanyidinap ap pakemp kwiyov anch tudi ayinetu. Ijik anch Yehova udi netu dichuku diawonsu ni ukatin kutukwash.​—2 Jsng. 16:9. w20.08 17 par. 13-14

Yehova ukatining nakash kuyifumb atushalapol end. Ukatin anch amwijik, amukat ni ashakam chikupu mudi anend akatish. Pakwez yom yiney yikutwishap kusadik anch ndiy katufumbinap. (Yoh. 17:3) Yehova wasadina chikumangen cha win Kristu cha mu mivu chitot ya kusambish mulong wa kuyifumb antwend. (Kol. 1:9, 10) Spiritu utumbila​—“mwin kukwash” wakanay Yesu—​wayikwasha kand in kwilej nakash. (Yoh. 14:16) Spiritu winou ndiy wayikwasha in kwilej kutesh Dizu dia Nzamb, ni wayivurisha yom yivud yalonday ni yasalay Yesu yafundau mu ma Evanjil. Ronganyin riner rakasikesha ritiy ra in Kristu a mu mivu chitot ya kusambish, ni rayikwasha kand kumukat nakash Nzamb, Mwanend, ni kukatijan kand ayinau umwing ni mukwau. Mu chirung chetu, Yehova wasambela kulejan anch “mu chirung cha machuku ma kwinsudiel,” antu a michid yawonsu akez kez ku mukandu wend wa chifanikesh chakwel ayifundish jinjil jend. (Isay 2:2, 3, NWT) Nlel tumen mutapu uprofet winou uwanyidina. w20.10 24 par. 14-15

Yom ik yikutwisha kumushikij muntu ku kulik kwitiy chiyul cha murund nend umukatina? Kwitutul. Antu in kwitutul akatining “kuyilej ching kusu yom yikatilau.” Akat “komb nyim ku uyakin.” (2 Tim. 4:3, 4) Akat kutong anch akwet manangu nakash ni adi a usey nakash, chawiy kakwetap kuswir kwa chiyul. Pakwez kambuy Paul wafunda anch: “Anch muntu witong anch, udi muntu mujim, komb udi kwend muntu wamwamu, ndiy ukat kwidimb amwinend.” (Gal. 6:3) Mwant Salomon warumburila yom yiney nawamp nakash. Wafunda anch: “Chiwamp kudi nsand kazwendj ukweta manangu, kupandakanamu mwant ipal udia chisup, wakad kuteshang chiyul.” (Mul. 4:13) Shinshikin chom chasalay kambuy Pita chisu chamuyudilau pakach pa antu kud kambuy Paul. (Gal. 2:11-14) Pita wading ufanyidin kumujimen Paul, anch washinshikina pa mutapu wamwinkishau chiyul ni ndond yamwinkishinawach. Pakwez Pita wading mwin manangu. Witiya chiyul ni kamulaminap Paul chinshilend. Mu kusut kwa machuku, wamutazuka Paul anch “mwanamakwetu wa rukat.”​—2 Pita 3:15, TMK. w20.11 21 par. 9, 11-12

Yom ik yikumukwasha nakash mwin kwilej wa Bibil kuya kurutu mu spiritu? Kudi kukumangan ku yikumangan yetu ya win Kristu. Yom yikwilejay ku yikumangan yikumukwash kujimbish ronganyin rend, kukasikesh ritiy rend, ni yikumukwash kand kumukat Nzamb nakash. (Mid. 15:30-32) Chikwau kand, mwin kulejan ukutwish kumurumburil mwin kwilej mutapu kumukat Yehova kwamubachika kusadin mbil ja Nzamb. (2 Kor. 7:1; Fil. 4:13) Ni anch mwin kwilej wijikijan nau in kulejan ashinshamena kushalijan, ukutwish kwilejin ku yilakej yau mutapu wa kuziyin kwi mbil ya Yesu ya kumukat Nzamb ni mutej nend. (Yoh. 13:35; 1 Tim. 4:12) Mwin kwilej ukutwish kwilejin ku yilakej ya in kulejan arisha ni milong mudi yirishinay nich ndiy ni ukwijik anch niyend ukutwish kwend kuswimp ni kwikal mwin kwilej wa Kristu. (Kuv. 30:11) Muntu mwawonsu udia mu chikumangen ukutwish kumukwash mwin kwilej mu mutapu kanang chakwel aya kurutu mu spiritu.​—Mat 5:16. w20.11 5-6 par. 10-12

Pamwing ap kambuy Paul wading wisambidin annam akin arishay nau mu chiwandj cha masengan ku Efes. (2 Kor. 1:8; 4:10; 11:23) Ap kand pamwing ap wading wisambidin in Yuda akachisum ading mudi “annam ayidiany.” (Mid. 19:26-34; 1 Kor. 16:9) Chikalap nchik yom yading yisambidinay pinap, uyakin ud anch Paul wamana mar nakash. Pakwez, wadandamena kulam ruchingej. (1 Kor. 15:30, 31; 2 Kor. 4:16-18) Tushich mu chirung chikash. Akadivar netu amwing akat kuyisadin nich chisum. Akwau ad mu ubaj mulong ashich kwi ndond kudia jinjit. Pakwez akwau kand mwom wau ud mu ubaj ni kakwetap want ipau, mulong amusadidin Yehova mu jingand mukangeshinau mudimu wetu. Ap mwamu, akadivar ni anambaz inay awonsu atushidin chilakej chiwamp, mulong adandamedin kumwifukwil Yehova. Kwovilap wom, mulong ij anch ap anch afa nlel, Yehova uyikanin yom yiwamp nakash. w20.12 9 par. 3-4

Ov, yisu yimwing waziyap kal mulong antu adia mu teritwar wey ameken mud kakatinap kwau kutesh, ap mulong chikasiken kuyitan antu ku yikumbu? Anch yom yiney yashiken, yom ik tukutwisha kusal mulong wa kujimbish musangar wetu? Chid cha usey kwikal ni chitongijok chiwamp piur pa mudimu wetu wa kulejan. Chinech chirumburikin ik? Dandamen kushinshikin pa kulejan dijin dia Nzamb ni Want wend. Yesu walejana anch antu akemp awiy akutana njil ya mwom. (Mat. 7:13, 14) Chisu tudia mu mudimu wa kulejan, tukwet dilau dia kusal mudimu pamwing ni Yehova, Yesu ni angel. (Mat. 28:19, 20; Kuj. 14:6, 7) Yehova ukat kuyipwit antu akatina kumusadin. (Yoh. 6:44) Chawiy, anch muntu walik kwitiy uruu wetu chisu chimwing, pamwing ap ukwitiy chisu chikwau. Nambaz Deborah ulondin anch: “Kuziy ud mupit wa usu nakash ukatay kusadin Satan.” Pakwez, Yehova Nzamb ukwet dikand kumusutamu Satan ap mat masadidinay. w20.12 26-27 par. 18-19, 21

In Kristu avud ashinshamena akat kusal mudimu wa ku mujimbu dichuku diawonsu mulong wa kuwanyish maswir mau ni maswir ma majuku mau. Chikalap nchik mwamu, in kulejan inay ashinshamena akat kusal usu wa kukwash dirijek dia Nzamb kulondwish ni yom yikutwishau kusal. Chilakej, amwing akat kukwash kwindond kudia yinship ya mar, akwau akat kukwash mu midimu ya kutung, ni etu awonsu tukwet mutapu wa kupan nfalang jetu mulong wa kukwash mudimu usadikina pa mangand mawonsu. Akat kusal yom yiney mulong amukatin Nzamb ni antu akwau. Rubing rawonsu tukat kumekesh anch tuyikatin akadivar ni anambaz netu kusutil kukumangan ni kwakul ku yikumangan. Ap anch twaziyang kal, tukat kusal usu wa kuya ku yikumangan. Ap anch tukwet yakamish, tukat kusal usu wa kwakul. Ni ap anch etu awonsu turishin ni milong kanang, tukat kuyikasikesh antu akwau kurutu ni kupwa kwa yikumangan. (Heb. 10:24, 25) Tujikitishin nakash mulong wa mudimu usadinau akadivar ni anambaz netu! w21.01 10 par. 11

Chikat kuyikasikenang nakash in kwitutul kuyijikitish antu akwau, mulong akatining kutambul ntumb. Akatining nakash kwifanakesh nau antu akwau ni kuril kwikal akusambish. Pa ndond pa kuyifumb antu akwau ni kuyinkish yisend, akatining kulond anch: “Ufanyidin kusal chom amwiney anch ukimbin anch chisadik nawamp”—charumburik anch mutapu ukatinau awiy. Muntu mwin kwitutul ukatining yisu yivud kwikal wa usey nakash kuyisutamu antu akwau ni ukweting mukau anch antu akwau asal yom yiwamp kumusutamu ndiy. Anch twajingunin anch twitutwil, nich kwikepish kwawonsu, tufanyidin kumwit Yehova ukwash mulong wa ‘kuswimp manangu metu’ chakwel kangal mwikadil winou uyimp wikun mudi etu. (Rom 12:2) Tujikitishin nakash mulong wa chilakej chiwamp cha Yehova! (Kus. 18:35) Tumen kwikepish kwend kusutil mutapu ukatay kuyisadin atushalapol end, ni tukatin kumwimburij. Chikwau kand, tukatin kwimburij yilakej tutanina mu Bibil ya antu ading ija mimbu yau ni ikala nich dilau dia kwend pamwing ni Yehova. Chawiy, tumwinkishany amboku Yehova uyaj ni ntumb chisu chawonsu, mulong ndiy uwanyidina kuyitambul.​—Kuj. 4:11. w20.08 13 par. 19-20

Uruw ud chipan cha Nzamb chiwanyidina, pakwez antu ad akad kuwanyin. (1 Yoh. 1:8) Chawiy Dizu dia Nzamb diyibabeshin antu atijadina anch “akuman mar mu chirung chinech mu mwom yau,” charumburik anch akurish ni milong yimwing. Yehova umwitin ikundj mwin Kristu kuwanyish maswir ma mu spiritu, ma ku mujimbu ni kubangin yovil ya dijuku diend. (1 Tim. 5:8) Pakwez ap anch nambaz mwin Kristu ukwatikenap nchik, ufanyidin kwitekin dichuku diawonsu chisu cha kutang Dizu dia Nzamb, kutongijokin pa Yom yitanginay, ni kumulembil Yehova ni muchim wend wawonsu. Chikutwish kumukasiken kusal mwamu. Ngachik ukwatikening nakash, pakwez chid cha usey nakash kukimb chisu cha kusal yom yiney. Mulong wak? Mulong Yehova ukatin anch muntu ni muntu akudish urund wa pakampwil ni ndiy ni alam urund winou. (Mid. 17:27) Chid chakin anch chimwitin mband kusal usu nakash mulong wa kumuziyin nfumwend wakad kuwanyin. Pakwez chikutwish kumuswapel kumuziyin ni kumulimish nfumwend mud mumwitinau kud Yehova, anch wijik ni witiy mayingishin madia mu Bibil mamwitidinau kusal mwamu. w21.02 8 par. 3; 9 par. 6-7

Yikokujol yid mud kasu kasadidinau mulong wa kuchil chom. Anch atek chikung mu kasu kupwa achinish, chom chikuchilau chikat kukasikan nakash. Chilik chimwing, anch twajijamen yikokujol, ritiy retu rikat kukasikan. Chawiy chafunday Jakobu anch: “Muchim wa kudandamen ufanyidin kuwanyish mudimu wau chakwel wikalany antu akash awanyidina, wakad kuburen chom.” (Jak. 1:4) Anch twaman anch yikokujol yikasikeshin ritiy retu, tukutwish kuyijijamen nich musangar. Jakobu walejana kand mu mukand wend yom yikwau yikutwisha kutushadishin musangar. Yom yikutwisha kutushadishin musangar yid anch tumenap chakusal. Anch turishin ni chikokujol, tufanyidin kumuchingejin Yehova chakwel tukwata mipak yikutwisha kumusangaresh ndiy, yikuyikwasha akadivar ni anambaz netu ni yikutukwasha kushal ashinshamena kud ndiy. (Jer. 10:23) Tukwet kuswir kwa manangu mulong wa kwijik yom tufanyidina kusal ni tufanyidina kulond kud antu atupompatina. Anch tumenap chakusal, tukutwish kuziy ni pakad kulab tukutwish kushadish musangar wetu. w21.02 28 par. 7-9

Yehova utushidin chilakej chiwamp. Utukatin nakash, ni anch twashal ashinshamena kud ndiy, kwikil chom chikutwisha kumukangesh kutukat. (Rom 8:38, 39) Mazu “rukat rakin” mamekeshin kwikasikesh ap kusal usu wa kumekesh rukat. Yisu yimwing chitin “kwikasikesh” ap “kusal usu” wa kuyikat akadivar ni anambaz netu. Anch antu akwau aturumbukin, tufanyidin kudandamen ‘kuduwulijan kuziy kwa muntu ni mukwau mu rukat, kwikasikesh kwikal mu umwing wa spiritu ukata kutwinkish chisambu chitukasina etu awonsu pamwing.’ (Efes 4:1-3) Tukuduwul kurumbuk kwa akadivar ni anambaz netu ni kusal usu wa kuyiman akadivar ni anambaz mud muyimenau kud Yehova. (1 Sam. 16:7; Kus. 130:3) Yisu yimwing chikutwish kutukasiken kuyikat nakash akadivar ni anambaz netu, pakampwil anch twij kuziy kwau. Chimeken anch winou wawiy mulong warishau nich in Kristu amwing a mu mivu chitot yakusambish. Chilakej, Evodiy ni Sintik. Kambuy Paul wayiyula anch “ovijanany mudi anambaz mwi Nsalejetu.”—Fil. 4:2, 3. w21.01 22 par. 10-11

Akadivar ni anambaz apamina kal akat kusangar nakash kumusadin Yehova pamwing ni yenen ‘chikij ku chikij’! (Sof. 3:9) Akat kusanger nakash mutapu ukata kuwanyishany yisend yen nich mushiku ni musangar. Ukwetany dilau diau. Akadivar ansand, kangal wavuramenany anch Yehova ukukatinany ni ukuchingejidinany. Wasambela kulejan anch mu machuku ma nsudiel kukwikal chisak chijim cha ansand akwipana kud ndiy kwa kwikatil. (Kus. 110:1-3) Wij anch umukatilany ni ukatilany kumusadil nich usu wen wawonsu. Chawiy, yishimpishinany akwen muchim ni ishimpishinany kand ayinen muchim. Anch warumbuk itiy chiyul ni dipup yikwinkishinau, yimana mud yidiokil kud Yehova amwinend. (Heb. 12:6) Sal usu wa kuwanyish nawamp chisend chin chawonsu chikwinkishinau. Ni cha usey nakash, mu yom yawonsu usadina, musangaresha Tatukwey wa mwiur.​—Jnsw. 27:11. w21.03 7 par. 17-18

Kud yom yivud yikutwisha kutuziyish—yimwing yid mu mujimbu wetu, yikwau yid pol. Pakach pa yom yiney pad kuburen kuwanyin kwetu, kurumbok kwetu, ni mayej. Tukutwish kand kuziy anch tutambwilap chisend twadia tukatina kwikal nich mu mudimu wa Yehova, ap anch tulejen mwi ndond mudia antu avud alikina kutesh uruu wetu. Tukutwish kuziy anch tukwet yitongijok yiyimp piur pa kuburen kuwanyin ni kurumbok kwetu. Mud chibudikin, tukutwish kutong anch Yehova kakutwishap kutwitiyij ap pakemp kwandam mu mangand masu mulong wa kurumbok kwetu. Kutong mwamu kud kwa ubaj nakash. Bibil utulejin anch kumudioshaku Yesu, antu awonsu “asala yitil.” (Rom 3:23) Chawiy, Yehova kakushinshikinangap pa kurumbok kwetu ap kutwit anch twikal awanyidina. Pakwez, ud Tatuku wa rukat ukatina kutukwash. Ud kand mwin kushimpish muchim. Umen mutapu turishina nich kuburen kuwanyin kwetu ni usu tusadila mulong wa kwikal ni chitongijok chiwamp piur pa ayinetu, ni ukatin kutukwash.​—Rom 7:18, 19. w20.12 22 par. 1-3

Etu awonsu tud mu weny. Tuyil mwi ngand yisu yikutakelau kudi winyikel wa rukat wa Yehova. Dichuku diawonsu tukat kusal usu wa kwendil mwi njil yitwadila ku mwom. Pakwez Yesu walonda anch njil yiney yiwongin ni yiswapelap kuyendin. (Mat. 7:13, 14) Mulong tud antu akad kuwanyin, chikutwish kutuswapel kupumbuk mwi njil yiney. (Gal. 6:1) Anch tukatin kudandamen kwendil mwi njil yiwongina yitwadina ku mwom, tufanyidin kudandamen kuswimp mutapu wetu wa kutong, mwikadil wetu ni yaku yetu. Kambuy Paul utukasikeshin ‘kulondul chiyul.’ Chitukasikedining kushinshikin yitongijok ni yovil yetu. Mulong muchim wetu ukweting rubabek, chikutwish kutukasiken kujingunin ku ututwadina. (Jer. 17:9) Mwamu chikutwish kutuswapel ‘kwidimb ayinetu.’ (Jak. 1:22) Chawiy tufanyidin kusadin Dizu dia Nzamb mulong wa kwishinshikin ayinetu. Dizu dia Nzamb dikat kujingunin chitudia mukach, dikat kujingunin “yitongijok ni rusot” ra mu muchim wetu.​—Heb. 4:12, 13. w20.11 18 par. 1-3

Anch tudi ikepishina ni kwijik mimbu yetu, chimeken anch tukutwish kwikal ni musangar. Mulong wak? Mulong anch twitiyin anch kudi yom yimwing tukutwisha kukangany kusal, tukat kwikal ni musangar ni in kujikitish mulong wa ukwash win wawonsu tukata kutambul kudi antu akwau. Chilakej, vurik yom yasadika chisu chokay Yesu amakundj dikum ading akweta musong wa mak. Umwing kusu pakach pau ndiy weza kumujikitish Yesu mulong wa mayej makash mamokau—mulong kafanyinap kutwish kwiyok amwinend. Muntu winou wading wikepishina ni wija mimbu yend wajikitisha nakash mulong wa ukwash watambulay ni wamutumbisha Yehova. (Luka 17:11-19) Antu ikepishining ni ijing mimbu yau ashiching nawamp ni antu akwau ni akweting urund uwamp. Mulong wak? Mulong akweting musangar pa kwijik anch antu akwau akwet mikadil yiwamp ni akat kuyichingejin antu inay. Antu ikepishina ni ija mimbu yau akweting musangar anch antu akwau asal nawamp mu yisend yau ni akat kuyijikitish ni kuyilimish. w20.08 12 par. 17-18