Ngond wa 9

Pita wasadina mazu kushalijan chisu chading chijimbwilay mazu ma uprofet wa Jowel. (Mid. 2:16, 17) Pa ndond pa kusambish nich mazu malondina anch “kwinyim kwa yom yiney,” Pita walonda anch: “Machuku piswimp ni kwisudiel” ni pa chisu chinicha wading wisambidin piur pa machuku mading matwadila ku disheshik dia Yerusalem ni tempel wend. Pa chisu chinicha spiritu wa Nzamb ukez kashirik ‘kudi antu a mitapu yawonsu.’ Chinech chimekeshin anch kwasuta chisu chilemp chakwel uprofet wa Jowel uwanyin. Kupwa kwa Nzamb kuzizil spiritu utumbila padi in Kristu a mu mivu chitot ya kusambish, asambisha mudimu wa kulejan wafanyina mu kusut kwa chisu kupalangan pa mangand mawonsu. Pa chisu chafunday Paul mukand wend kudi in Kolosay piswimp ni muvu wa 61 C.C., walonda piur pa rusangu ruwamp anch arilejen kal kudi ‘antu a pa mangand mawonsu.’ (Kol. 1:23) Kusutil ukwash wa ukash wa spiritu wa Yehova, mudimu wa kulejan wapalangen kal nakash mu chirung chetu djat ni ‘kwinsudiel kwa mangand’!​—Mid. 13:47 w20.04 6-7 par. 15-16

Yehova umukatin umwing ni umwing wa pakach petu, kuwejinaku ni mukoku win mwawonsu wapumbukina kal mu chisak chend. (Mat. 18:12-14) Nzamb washilamu anch ukuyikimb amikoku end ashadikina kal ni ukuyikwash chakwel achirish urund uwamp ni ndiy. Ni walejana yom yikusalay, yom mudi yasalangay kand kafung wa mu Isarel anch mukoku washadik. (Ezek. 34:12-16) Chakusambish, kafung wafanyinang kumukimb mukoku, chinech chading chitin usu ni chisu chivud. Kupwa, anch wamuman mukoku wapumbukang, kafung wafanyinang kumuchirish mu chisak. Chikwau kand, anch mukoku wijipang kal chitat ap wafang kal nzal, kafung wafanyinang kumukwash nich rukat nnam uziyina, kukas chitat chend, kumusend ni kumudish. Amakurump adia atufung a “amikoku a Nzamb,” afanyidin kusal yom mudi yiney mulong wa kuyikwash amikoku akata kupumbuk mu chikumangen. (1 Pita 5:2, 3) Amakurump afanyidin kuyikimb, kuyikwash kuchirik ku chikumangen, ni kuyimekeshin rukat kusutil kuyinkish yakudia ya mu spiritu yikwetau nich kuswir. w20.06 20 par. 10

Ov, Yesu wayimana antu mudi mbut jading jaswa kal mulong wa kujangul mulong wading uchingejin anch antu avud akumulondul? Bwat. Mifund yasambela kulejan anch antu akemp kusu awiy akumwitiyija. (Yoh. 12:37, 38) Ni Yesu wading ukwet usu wa kutang mu michim. (Mat. 9:4) Ap anch washinshikina nakash pa antu akemp ading akweta mutapu wa kwitiyij, pakwez wadandamena kulejan nich mushiku kudi antu awonsu. Mulong etu tukutwishap kutang mu michim ya antu, chawiy tufanyidinap ap pakemp kuyirumburish antu adia mu teritwar ap muntu panrend. Pa ndond pa kusal mwamu, yimana antu mudi in kwilej a machuku ma kurutu. Vurik yom yayilejau in kwilej kudi Yesu. Mbut jaswa kal mu yir, jawanyin kal pa kujangwil. Antu akutwish kukarumuk ni kwikal in kwilej a Kristu. Yehova uyimen antu inay akutwisha kwikal in kwilej mu machuku ma kurutu mudi ‘yom ya usey.’ (Age 2:7) Anch twayiman antu mutapu uyimenau kudi Yehova ni Yesu, tukwilej kwijik mashakamin mau ni yom yiyisangareshina. Tukuyimanap mu mutapu uyimp, pakwez tukuyiman mudi antu akutwisha kwikal akadivar ni anambaz netu. w20.04 13 par. 18-19

Dizu dia Nzamb dilejen patok anch tufanyidin kumukat Yesu ni kulam rukat riner anch tukimbin kumusangaresh Yehova. Chom chimwing tukutwisha kusal mulong wa kwikal arund a Yesu kudi kwilej kumwijik ndiy. Tukutwish kusal mwamu kusutil kutang mikand ya Bibil mudi Mateu, Marko, Luka, ni Yohan. Anch twatongijokin piur pa nsangu ja mwom wa Yesu jisambidinau mu Bibil, tukushiken ku kumukat ni kumulimish Yesu mulong wayisadinang antu mu mutapu uwamp. Chilakej, ap anch wading nsalejau, pakwez kayisadinap in kwilejend mudi aswik. Chinyim ni chinech, wayileja yitongijok ni yovil yend. Chisu chading chinenganenau, Yesu ni ndiy wanenganana ni wadila nau pamwing. (Yoh. 11:32-36) Ap akankuny nend ading ij anch Yesu wading murund wa antu itiyang uruu wend wafundishangay. (Mat. 11:19) Anch twimburij mutapu Yesu wayisadinangay in kwilejend, tukat kuwapish urund wetu nau antu akwau, tukat kwikal ni musangar, ni rukat ni kalimish ketu mulong wa Kristu yikat kukul nakash. w20.04 22 par. 9-10

Kudiokal mu muvu wa 1870, Grande-Bretagne wikala want ujim nakash pa divu, ni wading ni amasalay akweta usu nakash. Want winou wamekana kwikal kamuseng kakemp kisambidinau mu uprofet wa Daniel karishikisha miseng yikwau yisatu​—Frans, Espany, ni Pays-Bas. (Dan. 7:7, 8) Wawiy want wikala mwant wa kurul pa chisu chasadika Njit ja Kusambish ja pa Mangand Mawonsu. Pa chisu chawiy chimwing, États-Unis d’Amérique yikala ngand ya wimpich nakash mu mangand ni yata urund wa piswimp ni Grande-Bretagne. Pa chisu cha Njit ja Kusambish ja pa Mangand Mawonsu, États-Unis ni Grande-Bretagne abombakana ni ikala ni amasalay akweta usu nakash. Pa chisu chinicha, Grande-Bretagne ni États-Unis ata urund, abombakana pamwing ni ikala Dikand Dia pa Mangand Mawonsu Dia Angleter ni Amerik. Mudi mutapu wasambelay kulejan Daniel, mwant winou wakumangeja “yisak yijim ya amasalay a usu.” Mu chirung cha machuku ma kwinsudiel, Grande-Bretagne ni États-Unis awiy adia mwant wa kurul. w20.05 4 par. 7-8

Mem makutwishap kwikwat mulong divu dietu aditeka pa chintamp chiwanyidina ni muten. Chawiy, anch iswimpishaku pakemp chintamp chinech ni muten, mem mawonsu mafanyina kutwik ni divu diafanyina kuswan nakash ni kuwumidin, kwafanyinap kwikal yitang yikweta mwom pa divu. Chikwau kand, anch alepishaku pakemp chintamp chidia pakach pa divu ni muten, mem mawonsu mafanyina kwikwat baa ni divu din diafanyina kwikwat baa nich maglas. Mulong Yehova wateka divu pa chintamp chiwanyidina, munyingumuku wa mem madia pa divu ukat kusal anch mwom udandamen kwikalaku. Muten ukat kuswanish mem mu aturung ni pa divu ni ukat kutwikish mem chakwel masal madj. Muvu ni muvu muten ukat kutwikish mamiliyon ni mamiliyon ma malitre ma mem. Mem minam makat kusal machuku piswimp 10 mu rinzwizu kurutu manaka mudi ruval. Kupwa mem makat kuchirik kand mu aturung ap mu atuwit akwau, ni munyigumuku ukat kusambishiril kand. Mutapu wasalay Yehova munyigumuku winou chakwel divu dikal ni mem chisu chawonsu umekeshin anch Yehova udi mwin manangu nakash ni mwin dikand.​—Job 36:27, 28. w20.05 22 par. 6

Yesu watukasikesha kudandamen kwit spiritu utumbila mu malembil. (Luka 11:9, 13) Kusutil spiritu wend, Yehova ukat kutwinkish usu​—ukat kutwinkish kand ap “ukash upandakena ukash wawonsu.” (2 Kor. 4:7) Nich ukwash wa spiritu wa Nzamb, tukutwish kujijamen choziu chin chawonsu tukutwisha kurish nich. Spiritu utumbila ukutwish kand kutukwash kuwanyish yisend yetu mu mudimu wa Nzamb ni ukutwish kuwapish ukaliweny wetu. Twij anch spiritu wa Nzamb ndiy utukwashina kwikal ni yibudikin yiwamp mu mudimu wend. Tukutwish kumekesh anch tukwatin nich usey spiritu utumbila wa Nzamb kusutil kumwit chakwel atukwash kujingunin yitongijok ni maku mawonsu mayimp madia mu muchim wetu. (Kus. 139:23, 24) Anch twasal malembil ma mutapu winou, Yehova ukutwish kutukwash kusutil spiritu wend chakwel tujingunin yitongijok ap maku mayimp Tufanyidin kwit spiritu wa Nzamb chakwel atwinkish usu wa kupandikan yitongijok ni maku ma mutapu winou. Mwamu tukumekesh anch tukwatin mupak wa kwipuk chom chin chawonsu chikutwisha kusal anch Yehova alik kutukwash nich spiritu wend utumbila.​—Efes 4:30. w20.05 28-29 par. 10-12

Tukat kumwimburij Yesu anch twalond yom yiwamp piur pa dijin dia Nzamb. Yesu kijikishap kusu kwend dijin dia Nzamb kusutil kusu kwau ku kudijimbul pakwez wayifundisha kand antu chidiay kamu chakin Yehova. Chilakej, wasala chinyim nau Afaris amekeshang mu mitapu kushalijan mudi Yehova udi mukachisum, utwitina yom yikash, wakad kutwish kusejin ni wakad riy. Yesu wayikwasha antu chakwel ijik anch Tatukwend udi wisikena, mwin kushimpish muchim, mwin rukat ni mwin kulikishin. Wayikwasha kand antu kumwijik Tatukwend kusutil kwimburij mikadil yiwanyidina ya Yehova kusutil mashakamin mend ma pichuku pichuku. (Yoh. 14:9) Mudi mwasalay Yesu, tukutwish niyetu kuyifundish antu akwau mutapu udiay Yehova Nzamb muwamp ni mwin rukat. Anch twasal mwamu, tukutwish kumekesh anch yom yawonsu yikatau kulond akankuny piur pa Yehova yidiap ya kashinsh. Mwamu tukutumbish dijin Yehova ni kusal anch dikal dishitwila mu manangu ni mu michim ya antu. Kusutil mazu metu ni yisalijok yetu tukutwish kuyikwash antu kwijik mikadil ya Yehova. Tukat kutumbish dijin dia Nzamb kusutil kuyikwash antu akwau kukwolik ku yitongijok ya makasu yikutwishau kwikal nich piur pa dijin dined. w20.06 6 par. 17-18

Tupend twa Internet twa kutumijadin jinsangu tukutwish kutukwash anch twatusadin mu mutapu uwamp​—chilakej, mulong wa kudandamen kwambamb nau anamakwetu ni arund netu. Pakwez, antu amwing akat kufund, kutek yipich, ni mavideo pa tupend twa Internet twa kutumijadin jinsangu chakwel ayibaza kudi antu akwau. Chidi mudi akimbin kuyilej antu akwau anch “ntalany mutapu nidia.” Antu akwau akat kushiken ap ku kufund mazu ma masaal pa yipich yau ap pa yipich yitekinau antu akwau. In Kristu ayikasikeshin kwikal ikepishina ni kwitek pa ndond ya antu akwau, chawiy kafanyidinap kusadil mu mutapu winou tupend twa Internet twa kutumijadin jinsangu. (1 Pita 3:8) Anch usadidin tupend twa Internet twa kutumijadin jinsangu, iyipula anch: ‘Ov, yipich ni mavideo nikata kutek pa tupend twinetu, ap yom nikata kufund yimekeshining anch nibazin? Ov, nikutwish kuyibachik antu akwau kov mukau?’ In Kristu kakatiningap kuyikwat nich usey nakash ap kuyishimek kudi antu akwau. Akat kulondul chiyul cha Bibil chidia mu mufund wa nlel. Anch tudi ikepishina, tukukatap kwikal mudi antu a mu mangand minam akata kwitutwish ni akatining anch antu akwau ayiman mudi adi a usey nakash.​—1 Yoh. 2:16. w20.07 6 par. 14-15

Kurutu kwa kambuy Paul kwikal mwin kwilej wa Kristu, wading nsand wakad kalimish wayizengolang in kwilej a Yesu. (Mid. 7:58) Yesu amwinend wamukangesha Paul, watazukangau pa chisu chinicha anch Saul, chakwel kangal warishikish kand chikumangen cha win Kristu. Yesu wambamba ni Paul kudiokal mwiur ni wamwikadisha mputames. Mulong wa kuman kand, chading chimwitin Paul kuya kukimb ukwash kudi antu azengolangay. Nich kwikepish witiya ukwash wa mwin kwilej Ananias wamukwasha Paul chakwel asambishiril kand kuman. (Mid. 9:3-9, 17, 18) Kupwa Paul washikena kwikal mukadivar wijikena nakash mu chikumangen cha win Kristu, pakwez kavuramenap dilejan diamufundishau kudi Yesu mwi njil ya Damas. Paul washala wikepishina, ni nich muchim umwing witiya ukwash wa akadivar ni anambaz nend. Witiyina anch awiy ‘amwinkisha ukwash wamukasikesha nakash.’—Kol. 4:10, 11. w20.07 18-19 par. 16-17

Ap anch Yehova udi mwin dikand diawonsu, ukat kuyinkishang antu akwau yisend. Chilakej, wamutonda Yesu kwikal Mwant wa Want wend, ni ukuyinkish kand antu 144 000 ulabu wa kuyikel pamwing ni Yesu. Chakin kamu, Yehova wamufumba Yesu chakwel ikal Mwant ni Mwin Kupesh Mujim. (Heb. 5:8, 9) Yehova ukat kuyifumb kand antu akuyikela ni Yesu chakwel awanyish nawamp chisend chau, pakwez kakatap kushinshikin kachom ni kachom mulong wa kuman mutapu usadinau mudimu. Mulong uyichingejidin anch akusal rusot rend. (Kuj. 5:10) Anch Tatukwetu wa mwiur wakad kwikalang ni kuswir kwa ukwash wa muntu kanang, ukat kuyinkishang antu akwau yisend, chidi chakin anch etu tufanyidin kupandikesh kusal mwamu! Chilakej, ov, udi ntakel wa dijuku ap mukurump wa chikumangen? Imburij chilakej cha Yehova cha kuyinkish antu akwau yisend ni kangal kushinshikin kachom ni kachom piur pa mutapu usadinau mudimu. Anch wamwimburij Yehova, mudimu ukusadik, ukuyifumb antu akwau ni ukuyikwash kwikal nich kashinsh ka ayinau.​—Isay 41:10. w20.08 9 par. 5-6

Yehova ukatin anch twiyova mutapu ik piur pa amikoku end ashadikina kal? Yesu watushila chilakej tufanyidina kwimburij. Wading wij anch amikoku awonsu a Yehova adi a usey nakash ku mes kwa Yehova, chawiy Yesu wasala usu wend wawonsu mulong wa kuyikwash “amikoku ashadikina, awiy kamu in Isarel” chakwel achirik kudi Yehova. (Mat. 15:24) Mulong udi kafung muwamp, Yesu wasala kand usu nakash chakwel kangal washadish kamukoku ap kamwing ka Yehova. (Yoh. 6:39) Kambuy Paul wayikasikesha amakurump a chikumangen cha Efes kwimburij chilakej cha Yesu. Walonda anch: “[Ufanyidinany kuyikwash aziyina]. Vurikany mazu malonday Nsalejetu Yesu amwinend anch: ‘Chiyukish cha mwin kupan chipandakenamu cha mwin kutambul.’” (Mid. 20:17, 35) Chakin kamu, nlel amakurump akwet chisend cha pakampwil cha kuyibangin amikoku a Yehova. Salvador mukurump umwing udia mwi ngand ya Espany urumburil anch: “Anch natongijokin piur pa mutapu ukatay Yehova kuyibangin amikoku end ashadikina, nikat kwiyov kwikal ubachikinau kusal usu wam wawonsu mulong wa kuyikwash. Nikwet kashinsh anch Yehova ukatin niyibangin amikoku end.” w20.06 23 par. 15-16

Yehova ukutuchingel nich kushimpish muchim djat kwinsudiel kwa mivu kanan kurutu kwa kutwit chakwel tusal yom mu mutapu uwanyidina. Kusambish katat kushik ni chisu chinicha, Yehova ukudandamen kutulikishin yitil yetu kwa kwikatin. Chakin kamu niyetu tufanyidin kwimburij chilakej chend kusutin kushinshikin pa mikadil yiwamp yikwetau antu akwau ni kuyishimpishin muchim. Yesu nau angel asangara nakash chisu chatangay Yehova divu. Pakwez tongin musangar ukwikalau nich chisu divu dikwizula too nich antu awanyidina amukatina Yehova ni kumusadin. Tongin kand musangar ukwikalau nich antu akuya mwiur mulong wa kuyikel ni Kristu pakumanau mutapu mudimu wau uyikwashina antu. (Kuj. 4:4, 9-11; 5:9, 10) Ni tongin mutapu ukwikala mwom chisu mansoj ma musangar makuswinkana pa ndond pa mansoj ma kusansan, chisu chikupwa mayej, ushon ni ruvu chikupu. Pauchingedina kuwanyin kwa yom yiney, kwat mupak wa kumwimburij Yehova Tatukwey wa rukat, mwin manangu ni ushimpishina muchim. Anch wasal mwamu, ukulam musangar wey chikalap nchik yoziu urishina nich. (Jak. 1:2-4) Tumujikitishin chakin kamu Yehova mulong watushilamu anch ‘kukwikal divumbuk’!​—Mid. 24:15. w20.08 18-19 par. 18-19

Bibil udi chipan cha rukat chidiokila kudi Nzamb. Tatukwetu wa mwiur wayitakela amakundj amwing chakwel afund Bibil mulong utubangidin nakash. Kusutil Bibil, Yehova ukat kwakul yipul ya usey nakash tukutwisha kwiyipul mudi: Kwisu twadiokala? Mulong wak atutanga? Ni mutapu ik ukwikala machuku ma kurutu? Yehova ukatin anch anend awonsu atan yakul ku yipul yiney, chawiy kudiokal pakur wayibachika amakundj amwing chakwel akarumun Bibil mu mazu mavud. Nlel Bibil wakabuj ap wa chikunku udiaku mu mazu 3 000 ni kusut! Bibil ndiy buku wakusambish ukarumwinau ni kwangan nakash pa mangand mawonsu mu rusangu ra antu. Tukutwish kumekesh kujikitish kwetu mulong wa Bibil kusutil kumutang dichuku diawonsu, kutongijokin pa yom yifundishinay ni kwikasikesh kusadin yom twilejina. Kupwa tumekeshin kujikitish kwetu kudi Nzamb kusutil kusal usu wetu wawonsu mulong wa kuyilej antu avud uruu wa Bibil.​—Kus. 1:1-3; Mat. 28:19, 20. w20.05 24-25 par. 15-16

Muprofet Jeremiy amutuma kulejan mu teritwar umwing mukash. Waziya nakash chisu chimwing ni wova mud alikap kwend. Pakwez, kalikapap. Mulong wak? ‘Mazu ma Yehova’ mading mud kasu mu muchim wend, ni katwishap kuninet! (Jer. 20:9) Tukutwish niyetu kwiyov mwamu anch twizwish manangu ni mu michim yetu nich Dizu dia Nzamb. Chinech chirumburikin anch tufanyidin kwilej Bibil dichuku diawonsu ni kutongijokin pa yom twilejina. Mud chibudikin, tukwikal ni musangar nakash ni antu avud akutwish kututesh. (Jer. 15:16) Chawiy, anch waziy, mwilembina Yehova chakwel akukwash. Ukukukwash chakwel utwish kurish nich kuburen kuwanyin, kuziy, ap kuyel. Ukukukwash kwikal ni chitongijok chisikena piur pa yisend. Ni ukukukwash kwikal ni chitongijok chiwamp pa mudimu wa kulejan. Chawiy, mufungwila Tatukwey wa rukat muchim wey mu malembil. Kusutil ukwash wend, ukutwish kupandakan kuziy. w20.12 27 par. 20-21

Anambaz amwing amening anch ku yikumangan yawiy ndond yimwing yiyiswapedining kusutish chisu pamwing nau ambay nau in Kristu. Chawiy, tufanyidin kusadin yisu yiney mulong wa kuyak nawamp, kwambamb nau, ni kumekesh patok anch tuyibangidin. Mudi Yesu, tukutwish kusal usu wa kusutishang chisu pamwing nau anambaz. (Luka 10:38-42) Chilakej, tukutwish kuyitazuk kwol kwetu mulong wa kudia nau pamwing ap mulong wa kwipuwangej nau pamwing. Ni anch twasal mwamu, tufanyidin kusal usu chakwel mambamb metu mikal makasikeshina. (Rom 1:11, 12) Amakurump afanyidin kwimburij mwikadil wa Yesu. Yesu wading wij anch ujich ukutwish kwikal chikokujol kudi antu amwing, pakwez, wamekesha patok anch musangar wakin wimedinap pa uruw ap pa kuval an. (Luka 11:27, 28) Tukwikal nich musangar wakin anch twatek mudimu wa Yehova pa ndond yakusambish. (Mat. 19:12) Pakampwil, amakurump afanyidin kuyikwat anambaz in Kristu mudi ampanyau ap mudi amakwau. Chikwikal chiwamp anch amakurump asambish kwitekin chisu mulong wa kwisamb nau anambaz kurutu, ap kupwa kwa yikumangan. w20.09 21-22 par. 7-9

Mu Isarel, mwin kudim wakunang mbut jend kwinsambishin kwa ruval ni wajangulang kwinsambishin kwa chishipu. (Mar. 4:28) Tukumekesh anch tudi in manangu, anch twimburij kushimpish muchim kwa mwin kudim. Pakwez, chiswapelingap kusal mwamu. Antu akad kuwanyin akatining kuman yibudikin yiwamp ya mudimu wau pakad kulab. Pakwez, anch tukimbin anch disal dietu disongish, tufanyidin kudandamen kudirijek, charumburik anch kukankul, kukun, kusedin ni kwichil mem. Chilik chimwing, mulong wa kwikadish in kwilej tufanyidin kudandamen kusal usu. Chitwitining niyetu chisu mulong wa kumukwash mwin kwilej chakwel ipuk kasolikany. Kushimpish muchim kukutukwash kwipuk kuziy anch antu alik kututesh. Pakwez, ap anch antu atuteshap nchik, tufanyidin kand kushimpish muchim. Tukutwishap kuyishindil in kwilej Bibil chakwel akula mu ritiy. Ap kand yisu yimwing in kwilej a Yesu kwovap kurumburik kwa yom yayifundishau kapamp kamwing. (Yoh. 14:9) Tufanyidin kwijik anch, tukutwish kukun ni kwichil mem, pakwez ukata kupamish udi Nzamb.​—1 Kor. 3:6. w20.09 11 par. 10-11

Etu awonsu tukatining anch in kwilej etu a Bibil aya kurutu ni ashiken ku kutambul dibatish. Tukutwish kuyikwash anch twayikasikesh chakwel ikal ni chaku cha kukumangan. Yisu yivud,in kwilej akata kukumangan pakad kulab akat kuyang kand karutu pakad kulab. In kulejan amwing akat kuyilejang in kwilejau anch, twilejin ney yom yimwing, pakwez yom yikwau ukuyilejin ku yikumangan. Tang Hebereu 10:24, 25 pamwing ni mwin kwilej wey ni murumburila mulong wak chidi cha usey kuya ku yikumangan. Murumburila nich musangar wey wawonsu yom wilejanganya ku chikumangan cha nsudien wasalanganya. Kusal mwamu kukutwish kumwinkish impu ya kukumangan. Yom yikumanay ni yikuteshay mwin kwilej wey kapamp ka kusambish kakukumanganay yikusutamu yom yin yawonsu yamanay kal ap kutesh ku chikumangan cha relijon win mwawonsu kwayilayap kal. (1 Kor. 14:24, 25) Kwinikwa ukutwish kutanijan nau akadivar ni anambaz adia yilakej yiwamp yikutwishay kwimburij, ni yikutwisha kumukwash kuya kurutu ni kushiken ku kutambul dibatish. w20.10 10-11 par. 14-15

Spiritu wa Nzamb ukukukwash chakwel utwish kusadin mu mwom wey yom ukata kwilej ni kutang mu Dizu dia Nzamb. Lembil mudi nfund a kuseng walonda anch: “Nlejap njil yey, A [Yehova], chakwel nikendil mu uyakin wey; bwalikesh muchim wam wova dijin diey wom.” (Kus. 86:11, TMK) Chawiy dandamen kutang ni kwilej Bibil ni mikand yikwau yitwinkishinau kudi dirijek dia Yehova. Chakin kamu, kusal mwamu kudiap kusu kwau mulong wa kwak ronganyin. Chidi mulong ukatin kwikal nich kashinsh ka uyakin ni kuusadin mu mwom wey. Spiritu wa Yehova ukutwish kukukwash kusal mwamu. Ukatin kand kuyikasikesh akadivar nau anambaz ney. (Heb. 10:24, 25) Mulong wak? Mulong adi anamakwey a muspiritu. Mulembila Nzamb chakwel akwink spiritu wend ukutwisha kukukwash kupan yakul yitungina ku yikumangan ya win Kristu, ni kwirijek nawamp anch ukwet chikunku ku chikumangan. Mwamu Yehova ni Yesu akuman anch ukatin “amikoku” au akwatinau nich usey nakash. (Yoh. 21:15-17) Piswimp ap, ching kusu dirijek ditakedilau kudi spiritu wa Nzamb diawiy dikushala pa divu. w20.10 24-25 par. 15-17

Mutapu ik wayisadinay Yesu atwimbuy end pading paziyinau? Chisu chikemp kupwa kwa kuvumbuk, Yesu wayileja in kwilejend amwing anch: “Kangal wovany wom. Yangany, ukayilejany anamakwam [anch navumbukang kal].” (Mat. 28:10a) Yesu kayilikap atwimbuyend, bwat. Ap anch awiy amulika, ndiy wadandamena kuyitazuk anch “anamakwam.” Yesu wading mwin riy ni mwin kulikishin mudi Yehova. (2 Ant 13:23) Chilik chimwing, niyetu tuyibangidin nakash akadivar ni anambaz alikinap kal kulejan. Adi akadivar ni anambaz netu, ni tuyikatin! Tudandamedin kuvurik mudimu ukash wasalau akadivar ni anambaz inay mulong wa Yehova​—pamwing ap mu mivu yivud nakash. (Heb. 6:10) Chakin kamu tukwet kuswir kwau! (Luka 15:4-7) Chawiy, yikasikesha antu alikinap kal kulejan kukumangan anch kandikal asambish kusal mwamu. Ni anch muntu walikinap kal kulejan wez ku Chot cha Want, tufanyidin kumusejin ni kumwak nich chirungul. w20.11 6 par 14-17

Jakobu ni Yohan pamwing ni makwau aya kumwit Yesu chom chakadiay kwikal nich mbil ya kupan. Pakad kwidjidjek, Yesu wayileja anch ching Tatukwend wa mwiur ndiy ukutwisha kukwat mupak piur pa muntu ukushakama ku chikas cha katatuku ni cha kamaku cha Yesu mu Want. (Mat. 20:20-23) Kusutil mutapu wakulay, Yesu wamekesha anch wading ulimishin mimbu yend. Kasalap chom ap chimwing pakad kulimish mbil jamwinkishau kudi Yehova. (Yoh. 12:49) Mutapu ik tukutwisha kwimburij chilakej chiwamp cha Yesu? Tukat kwimburij chilakej cha Yesu kusutil kusadin chiyul chidia mu mufund wa nlel. Chawiy anch atwit chiyul, tufanyidinap kuyikasikesh antu akwau kwitiy yitongijok yetu ap kulond kwau pakad kutongin nawamp pa mulong. Chinyim ni chinech, chiyul chetu chifanyidin kwimen pa Bibil ni pa mikand yimedina pa Bibil. Anch twasal mwamu, tumekeshin anch twij mimbu yetu. Ni tumekeshin kand anch tudi ikepishina mulong tumekeshin anch twij anch yiyul ya Yehova yiding chisu chawonsu yiwamp kusutamu yetwetu.​—Kuj. 15:3, 4. w20.08 11 par. 14-15

Anch ukimbin kumwinkish murund ney chiyul, yom ik ufanyidina kutek mu manangu? Kurutu kwa kumwinkish murund ney chiyul, ufanyidin kwiyipul anch: “Ov, ‘nipandakeshin kutentam’?” Muntu utentamina kusut chipim kakatap kuyirumburishang akwau kukwatijan ni mbil ja Yehova, pakwez kukwatijan ni yom yikatinay ndiy, ni yisu yivud kadingap mwin ranaken. Anch watongijokin nakash pa diyingishin dikubachikina kumuyul murund ney, ni waman anch ukwet diyingishin dia kumuyul, mukwasha kujingunin uyimp wasalangay ni mutongisha kusutil yipul chakwel ijingunin anch komb warumbukang. Ikal nich kashinsh anch yom ulondina yikwatijadin ni mifund, ni vurik anch murund ney ukupan kuchind kud Yehova, kadiap kud ey. (Rom 14:10) Sadin manangu madia mu Dizu dia Nzamb, ni paupanina chiyul, ikal mwin ranaken mud Yesu. (Jnsw. 3:5; Mat. 12:20) Mulong wak? Mulong mutapu tuyisadidina antu akwau wawiy mutapu ukutusadinau niyetu kud Yehova.​—Jak. 2:13. w20.11 21 par. 13

Ov ukukat anch antu akurumburisha kukwatijan ni ulombu wa chikit chey, mutapu udia chifu chey ap chimbu chey? Chimeken anch ukusangarap. Chitukasikeshin mud ik pa kwijik anch Yehova kakatap kuturumburish kusutil yom yimekena ku mes! Chilakej, chisu Samwel chayimanay an amakundj a Yese, kayimanap mudi mwading muyimenau kudi Yehova. Yehova wasambela kumulej Samwel anch umwing wa pakach pa an a Yese ukwikal mwant wa Isarel. Pakwez mwan ik? Samwel pamumanay Eliyab mwan wakusambish wa Yese, walonda anch, ‘Chakin kamu, Yehova ukwet iwend wa kuzizil many kurutu kwend.’ Eliyab wading umeken kamu mudi mwant. “Pakwez [Yehova] wamuleja Samwel anch: ‘Kangal kutal kuwap kwa mujimbu wend ap kulep kwa chimbu chend, mulong namulika kal.’” Yom ik twilejidinaku? Yehova wadandamena kulond anch: “Muntu ukat kutal yimenay nich mes mend, pakwez [Yehova] ukat kutal [mu] muchim.” (1 Sam. 16:1, 6, 7) Tufanyidin kumwimburij Yehova chisu tuyisadidina akadivar nau anambaz netu. w20.04 14 par. 1; 15 par. 3

Chimeken anch Yesu wading kusutin mu yir yading ni mbut jasambisha kal chad kupam. (Yoh. 4:3-6) Mbut jinej jading jifanyidin kuswa mulong wa kujangul kupwa kwa angond piswimp anying. Pakwez Yesu walonda chom chimwing chalikau antu kutesh kurumburik anch: “Zambulany mes men, utalany, mbut jaswa kal mu yir, jawanyin kal pa kujangwil!” (Yoh. 4:35, 36) Yom ik yakimbay kulond? Chimeken anch Yesu wading ukat kwisambin kwangul kwa chifanikesh, charumburik anch kwangul antu. Shinshikin yom yashikena. Ap anch yisu yivud in Yuda kwovijanangap nau in Samariy, pakwez Yesu wamufundisha mband umwing mwin Samariy​—ni mband winou wamutesha! Chawiy, chisu chisambinay Yesu piur pa yir yading ni mbut “jawanyin[a] kal pa kujangwil,” chisak cha in Samariy alejau nsangu piur pa Yesu kudi mband wafundishau kudi Yesu amulondula chakwel ayifundish yom yivud. (Yoh. 4:9, 39-42) Buku umwing wisambidina piur pa nsangu ja Bibil ulondin piur pa rusangu riner anch: “Impu yadingau nich antu ya kumutesh Yesu . . . yamekesha anch ading mudi mbut jaswa kal mulong wa kujangul.” w20.04 8 par. 1-2

Yikumangan yikat kutukwash kand mu mitapu yikwau. Yikat kutukwash kwikal in kulejan ni alej awamp. Chilakej, tukat kwilej mutapu wa kusadin nawamp yom yidia mu Mushet wa Yom ya Kufundish Nich. Chawiy, ikal ni chaku cha kurijek nawamp yikumangan. Anch waya ku yikumangan, tang matu ku yom yifundishinau. Ni anch wachirik, yisadina mu mwom wey. Anch wasal yom yiney, ukwikal “isalay muwamp wa Kristu Yesu.” (2 Tim. 2:3) Tukwet kand ukwash wa miril ni miril ya angel akweta usu nakash. Mwangel umwing kusu kwend ukutwish kusal yom yitwakad kutongin! (Isay 37:36) Chad katat tongin yom yikutwishau kusal chisak chawonsu cha angel akweta dikand anch abombakan. Kwikil muntu ap chilembil ukweta usu kuyisutamu amasalay a usu a Yehova. Yehova ndiy dipwishin, chawiy anch ud ku mutambu wetu, tukwikal ni usu nakash kuyisutamu in kutupompat in awonsu, ap anch avulap kwau nchik. (Ank. 6:16) Mazu minam mad makin! Vurik yom yiney chisu chawonsu chikukimbau kukwovish wom kusutil yom yikusalay mbay ney wa mudimu, mbay ney wa ku shikol, ap mwanamakwey wakad kwikal Kaman. Vurik anch urishinap amwiney, Yehova ukutakedin. w21.03 29 par. 13-14

Chimeken anch kambuy Paul wisambina mukand wa Isay 22:13, ulejena mwikadil wadingau nich in Isarel. Pa ndond pa kumusejin Nzamb piswimp, alabatina kwau mwom wa kwisangarish ayinau. Mashakamin ma in Isarel mading kwau ma kwel anch “sal yawonsu ukatina nlel mulong diamashik kwikil ruchingej.” Chinech chawiy kand chitongijok chikwetau antu avud nlel. Chakin kamu, ruchingej ra divumbuk rifanyidin kwikal ni usu pa mutapu wetu wa kutond arund. Akadivar a mu Korint ading afanyidin kwipuk kuta urund nau antu ading alikina kwitiyij anch kukwikal divumbuk. Pad dilejan tukutwisha kwilejinaku niyetu nlel: Chid cha ubaj kuta urund nau antu asangaredina kwau ching yimenau nlel. Kuta urund nau antu a mutapu winou kukutwish kuyipish mwikadil wetu uwamp wa win Kristu. Antu a mutapu winou akutwish kumubachik mwin Kristu kusal yom yikisinay Nzamb—yitil. Chawiy, Paul utukasikeshin nakash anch: “Tenchikany yitongijok yen, kangal wasalany kand yitil.”​—1 Kor. 15:33, 34. w20.12 9 par. 3, 5-6

Verse winou urumburil mutapu warijekay Yehova dijuku diend mwiur ni pansh. Umutakel ukwet yom yaad—ulabu ni kupan kuchind. Yehova ndiy “mwant,” ukweta ulabu wawonsu, ni anend awonsu, ikala angel ap antu, akez kapan kuchind kud ndiy kulondwish mutapu usadidinau ulabu wayinkishau. (Rom 14:10; Efes 3:14, 15) Yehova wamwinkishin kal Yesu ulabu wa kutakel chikumangen, ni ukupan kuchind kud Yehova kulondwish mutapu utusadidinay. (1 Kor. 15:27) Yehova wamwinkisha kand ikundj ulabu wa kumutakel mukajend ni anend. Mutapu ik ukutwishay kwilej kwikal ntakel muwamp wa dijuku? Ufanyidin chakusambish kwijik yom yimwitinau kusal kud Yehova. Ufanyidin kand kwijik diyingishin diatekinay Yehova umutakel ni, cha usey nakash ufanyidin kwijik mutapu wa kwimburij chilakej cha Yehova ni Yesu. Mulong wak chid cha usey kusal mwamu? Chid mulong Yehova wayinkisha antakel a majuku ulabu kanang, ni ukatin anch ausadin mu mutapu uwamp.​—Luka 12:48b. w21.02 2 par. 1-3

Chikwikal chiwamp anch twamwimburij Yehova kusutil kuvuramen yom yimwing. Chilakej, Yehova ukweting manangu mawanyidina, pakwez anch twakarumuk, ukat kutulikishinang ni kuvuramen uyimp wetu. (Kus. 25:7; 130:3, 4) Chawiy ukatin anch niyetu tuyisadin antu akwau mutapu wawiy umwing anch anenganan mulong wa uyimp watusadilau. (Mat. 6:14; Luka 17:3, 4) Tukutwish kumekesh kujikitish mulong wa chipan cha wong wetu ushimokishena kusutil kumuziyil Muntu watwinkisha chipan chinech. Antu amwing atondining kusadin wong wau mulong wa mayingishin ma choy​—kwitekin ayinau mbil piur pa kuwap ni kuyip. Mulong Yehova ndiy watutanga, mbil jend jawiy jipandikena kuwap kusutamu mbil jawonsu tukutwisha kwitekin. (Rom 12:1, 2) Anch twashakam kukwatijan ni mbil jend, tukwikal ni chisambu mu mwom wetu. (Isay 48:18) Mwamu tukwikal ni chitongijok cha mwom​—kumutumbish ni kumusangaresh Sakatang wetu udia kand Tatukwetu.​—Jnsw. 27:11. w20.05 24 par. 13-14

Yom ik tukutwisha kusal mulong wa kuyikat nakash akadivar ni anambaz netu nlel? Anch twilej kuyijik nawamp ambay netu in Kristu, chikutuswapel kuyitesh ni kuyikat. Ikala an akemp ap amakurump, ni chikalap nchik ndond yidiokilau, tukutwish kwikal nau mu urund wa piswimp. Vurik anch Jonatan wading umusutinamu David ku mivu piswimp 30; pakwez akudisha urund wa piswimp. Ov, mu chikumangen chen mud muntu​—udia mukurump nakash, ap udia mwanikanch nakash—​kukusutamu ey ukutwisha kuta nend urund? Anch twasal mwamu, tukumekesh anch tuziyidin ku chiyul chilondina anch ‘yikatany akadivar awonsu.’ (1 Pita 2:17) Ov, kwikal ni rukat rakin kurumburikin anch tukwikal piswimp nau antu awonsu adia mu chikumangen mu chilik chimwing? Bwat, chikasiken kwikal piswimp nakash ni muntu mwawonsu. Chidiap kamu kwau chiyimp kwikal piswimp nakash ni antu amwing kusutamu antu akwau mulong asangaredin yom yimwing yitukatina niyetu. Yesu walonda anch atwimbuy awonsu ading “arund” nend, pakwez wading ni rukat ra pakampwil mulong wa Yohan. (Yoh. 13:23; 15:15; 20:2) Chikalap nchik mwamu, Yesu wayisadinang awonsu mu mutapu umwing.​—Mar. 10:35-40. w21.01 23 par. 12-13

Mutapu walejanay kambuy Paul kudi Akamichid a ku Aten wawiyap mutapu walejanay kudi in Yuda mu sinagog. Washinshikina nich nkeu yom yading yimunyingumukina ni walama mu manangu yishankur ya relijon ya antu. (Mid. 17:23) Kupwa, Paul wakimba yom yading yikwatijadina pakach pa difukwil dia antu inay ni uyakin udia mu Mifund. Paul wakwatikesha mafundish mend kulondwish ni yitiyij ya antu. Wayileja in Aten anch uruu wend wading udiokil “Kudi Nzamb Wakad Kwijikan,” wading upakishinau kwifukwil. Ap anch Akamichid kadingap kija Mifund, Paul kayiduwulap bwat. Pakwez wayimana mudi mbut jaswa kal mulong wa kujangul, ni wakwatikesha mutapu wend wa kulejan rusangu ruwamp kulondwish ni yitiyij yau. Mudi Paul, ikal mwin nkeu. Kimb yijingidij yimekeshina yom yitiyijinau antu mu teritwar wey. Yom ik yitayokinay nich mwin chikumbu motak wend ap chikumbu chend? Ov, dijin diend, mutapu wend wa kudjal, mutapu wend wa kwilengol, ap mazu mend yimekeshin anch uding mu relijon ik? w20.04 9-10 par. 7-8