Ngond wa 12

Chisu ni chisu, chikutwish kutukasiken kutesh nawamp chom kanang chisambidinau mu Bibil. Ap Yehova ukutwish kwakul malembil metu mu mutapu ukwau wakad kukwatijan ni yom twadia tuchingejina. Yom yiney yikutwish kulangwish kwidjidjek mu muchim wetu. Anch twapipej kwidjidjek kwetu, kukuziyish ritiy retu ni kukuyipish urund wetu ni Yehova. (Jak. 1:7, 8) Kukutwish kand ap kutushadishin ruchingej retu mulong wa machuku ma kurutu. Kambuy Paul wafanikesha ruchingej retu mulong wa machuku ma kurutu ni nkal. (Heb. 6:19) Nkal ukat kwimik waat anch kututin rinkind mukash ni ukat kuukangesh kwibul ku mayal. Pakwez nkal ukutwish kukwash ching anch muyolal umukasinau nich ku waat ukatukinap. Mud mukutwishay kaloz kuziyish muyolal ukasinau kwi nkal, kwidjidjek kukutwish kuziyish ritiy retu. Anch turishin ni rupompat, kwidjidjek kukutwish kutushadishin ruchingej retu anch Yehova ukuwanyish kushilamu kwend. Ni anch twashadish ritiy retu, twashadish kal kand ruchingej retu. Muntu wa mutapu winou kakutwishap kwikal ni musangar! w21.02 30 par. 14-15

Chimeken anch Aburaham wading ni muvu 70 ni kusut chisu chadiokalay mu musumb wa Ur ni dijuku diend. (Dis. 11:31–12:4) Washakama mu minkand ni kutambitamb mwi ngand ya Kanan piswimp mu mivu chitot. Aburaham wafa ni mivu 175. (Dis. 25:7) Pakwez, kamanap kuwanyin kwa kushilamu kwa Yehova kwa kuyinkish anend ngand yendanganay. Ni kamanap chisu chatekau musumb, charumburik anch want wa Nzamb, mulong kasalap mivu yivud. Ap mwamu, Bibil ulejen anch Aburaham wafa ‘ipal wa mivu yivud.’ (Dis. 25:8) Chikalap nchik yikokujol yarishay nich, pakwez Aburaham walama ritiy rend rikash ni wamuchingela Yehova nich musangar. Yom ik yamukwasha kujijaman? Mulong Yehova wamuchidija mu mwom wend wawonsu ni wamumana mudi murund nend. (Dis. 15:1; Isay 41:8; Jak. 2:22) Mudi Aburaham, tuchingedin musumb ushichinga chikupu. (Heb. 11:10) Pakwez, etu tuchingedinap chakwel autung. Want wa Nzamb auteka kal kudiokal mu muvu wa 1914 ni wasambishin kal kuyikel mwiur. (Kuj. 12:7-10) Pakwez, tuchingedin chakwel Want winou uyikel divu diawonsu. w20.08 4-5 par. 11-12

Mulong wa kuyitesh antu akwau nawamp, tufanyidin kwikal ikepishina ni ashimpishina muchim. Chidi cha usey kusal mwamu mulong wa mayingishin masatu. Chakusambish, tukuswapalap kwikal ni yitongijok yiyimp piur pa antu akwau. Cha kaad, tukutwish kujingunin yovil ni mayingishin mayibachikina akadivar netu kusal yom, ni kusal mwamu kukutubachik kuyimekeshin ranaken. Ni cha kasatu, anch twamulik mukadivar alond yom yitonginay, pamwing ap mukadivar winou ukutwish kwilej yom kanang piur pend amwinend. Yisu yimwing tukatap kwov kurumburik kwa yovil yetu djat kamu ni pitukuyilondina kudi antu akwau. Chiyikasikedining akadivar ni anambaz amwing kulejan yovil yau mulong wa yishankur ya kwol kwau, yom yayishikena pakur, ap wuntu wau. Chitining pamwing ap chisu pakwel anch akadivar ni anambaz netu iyova nawamp mulong wa kutulej mutapu wiyovilau. Anch twamwimburij Yehova kusutil kwikal ashimpishina muchim, akadivar ni anambaz inay akutwish kutuchingejin. Chawiy, anch aman anch chidi chisu chiwamp kutulej yovil yau, tufanyidin kuyitesh nawamp. w20.04 15-16 par. 6-7

Yisu yivud, ansh akatining pa ndond padia mem mayisangareshina ni padia yakudia yivud. Chibind wa ansh ufanyidin kand kwijik chisu chiwamp cha kuta ansh. Tal yom yalonday kaman umwing ushicha pa ditung dia Pasifik piur pa mudimu wa kuta ansh, chisu chamutazukay mishoner umwing mulong wa kuta nend ansh. Mishoner wamuleja anch: “Nikwez diamashik pamanch, pa saa ya chidivu.” Mukadivar winou wamwakula anch: “Wovilap kwey yom kurumburik. Tuyiling pa chisu chikata kudil ansh, tukatap kuya pa chisu tukatina etu.” Chilik chimwing, mu mivu chitot ya kusambish chibind wa antu wayangang pa ndond padiau antu ni pa chisu chikutwishay kuyitan. Chilakej, in kwilej a Yesu ayangang kulejan mu tempel, mu masinagog, ku chikumbu ni chikumbu ni mu sok. (Mid. 5:42; 17:17; 18: 4) Niyetu tufanyidin kuyijik nawamp antu adia mu teritwar wa chikumangen chetu. Tufanyidin kuswimp program wetu mulong wa kulejan pa chisu ni pa ndond tukutwisha kutan antu.​—1 Kor. 9:19-23. w20.09 4 par. 8-9

Mutapu umwing wa kuta urund ni Yesu udi kusutil kunung chikas ku mipak yikwatinau mu dirijek dia Yehova. Tukat kukasikesh urund wetu ni Yesu udia ntakel wa chikumangen anch twasal mu kwovijan nau antu atondilau mulong wa kututakel. (Efes 4:16) Chilakej, nlel tukat kusal usu wa kwikal nich kashinsh anch Yot yawonsu ya Want ayisadidin nawamp. Mulong wa diyingishin dined, yikumangen yimwing ayibombodin. Kusal mwamu kwakwashin dirijek dietu kulam nfalang jivud jidiokila ku yipan. Pa chisu chawiy chimwing ayitin kand in kulejan amwing kushemunikin ku jindond jindj. In kulejan inay ashinshamena ading asadidin kal pamwing ap mu chikumangen kanang mu mivu yivud ni pamwing ap ading ijidin kal nakash ni akadivar nau anambaz a mu chikumangen chinicha. Pakwez katat ayitin chakwel asadin mu chikumangen chindj. Chinech chikat kumusangaresh Yesu mud ik pa kuman mutapu usadinau in kwilej inay ashinshamena mu kwovijan nich mupak winou! w20.04 24 par. 14

Mwant wa kwiyand ni mwant wa kurul adandamedin kupwitamijan mulong wa kufil kwikal dikand dia pa mangand mawonsu. Chilakej, shinshikin yom yasadika kupwa kwa Njit ja Kaad ja pa Mangand Mawonsu, pasambisha want wa Union Soviétique kuyikel chikunku chijim cha Erop. Chinech chamubachika mwant wa kurul kwovijan ni jingand jikwau mulong wa kubomb amasalay au chakwel amurishikish mwant wa kwiyand. Ditenchik dined diawiy diatazukau anch Organisation du traité de l’Atlantique Nord. Mwant wa kwiyand ni mwant wa kurul adandamedin kand kupwitamijan kusutil kufil kwikal ni amasalay a usu nakash kumupandikanamu mukwau. Mwant wa kwiyand wamurishikisha kand mwant wa kurul kusutil kuyikwash akankuny a mwant wa kurul chisu chasadika njit ja mu Afrik, Aziy ni mu Amerik Latin. Mu mivu yasutina ey, Risi ni jingand jimunungina chikas ikadil ni chibachikin chikash pa mangand mawonsu. Amurishikishin kand mwant wa kurul kusutil kusadil ma ordinater (cyberattaques). Ant inay akat kufundijan umwing ni mukwau anch asadidin maprogram mayimp ma ordinater chakwel akwau ashadish nfalang ni mulong wa kuwish want wau. Kukwatijan ni yom yasambelay kulejan Daniel, mwant wa kwiyand udandamedin kand kuyirishikish atushalapol a Nzamb.​—Dan. 11:41. w20.05 13 par. 5-6

“Ov, komb mband ukutwish kumuvuramen mwanend [wamwishinay]?” Chinech chidi chipul chipulay Yehova pa chirung cha muprofet Isay. Nzamb wayileja antwend anch: “Ap anch mband wamuvuramen mwanend, am kinikutwishap kukuvuramenany en.” (Isay 49:15) Yisu yivud Nzamb kakatap kwifanakesh ni maku. Pakwez pa chisu chinech wifanakesha nend. Yehova wasadina chilakej cha rukat rikurikina riding pakach pa maku ni mwanend mulong wa kumekesh mutapu uyikatinay nakash atushalapol end. Amaku avud akutwish kwiyov mudi mwiyovay nambaz Jasmin ulondina anch: “Chisu umwamwishina mwaney, ukat kukudishany rukat ra pakampwil rikata kushakam mu mwom wawonsu.” Yehova wijing nawamp anch umwing wa anend wimik kuya ku yikumangan ya win Kristu ni kwipan mu mudimu wa kulejan. Akadivar ni anambaz inay akatish alikinap kal kusal mudimu wa kulejan, akat kuchirik ku chikumangen ni tukat kuyak nakash anch asal mwamu! Yehova ukatin anch antu inay achirik, niyetu mwawiy tukatina.​—1 Pita 2:25. w20.06 18 par. 1-3

Kidiap yipan yawonsu yikata kumekanang ku mes. Pakwez, yipan yipandikena kujimb yidi yakad kumekan. Mu Malejan mend ma pa Mukandu, Yesu wisambina piur pa mapit ma mwiur makweta usey nakash kusutamu nfalang. Kupwa wawejinaku uyakin ou: “Kudia mapit mey, kwawiy kand kukwikala muchim wey.” (Mat. 6:19-21) Muchim wetu ukutubachik kukimb yom yikweta usey nakash. Tukat kutudikin “mapit . . . mwiur” kusutil kwisadin dijin diwamp ku mes ma Nzamb. Yesu walejana anch mapit ma mutapu winou makutwishap kusheshik ni kakutwishap kumiy. Kambuy Paul utukasikeshin “kutal ku yom yakad kumekan ku mes.” (2 Kor. 4:17, 18) Pakach pa yom yiney yakad kumekan ku mes padi yiyukish tukusangera mwi ngand yisu ya Nzamb. Ov, tumekeshin anch tudi in kujikitish mulong wa yipan yiney yakad kumekan ku mes? w20.05 26 par. 1-2

Yom yayifundishau in Isarel kudi Moses yakasikesha ritiy rau ni yayikwasha mudi ruvul uwawatidina pa yifukis. Mutapu ik tukutwisha kwikal nich kashinsh anch wawiy winou mutapu tufundishining niyetu? Patudia mu mudimu wa kulejan ku chikumbu ni chikumbu ap pa ndond yidia antu avud, tufanyidin kusadin Bibil mulong wa kuyilej antu dijin dia pakampwil dia Nzamb, Yehova. Tukutwish kuyinkish antu yichap yiwamp ya kutang, kuyitadish mavideo mawamp ni kuyilej yom yidia pa kapend ketu ka web yimutumbishina Yehova. Patudia ku mudimu, ku shikol ap pitwendangena, tukutwish kuman chisu chiwamp cha kulejan piur pa Nzamb wetu wa rukat ni piur pa mikadil yend. Anch twambamb nau antu tusankena piur pa chitongijok cha rukat cha Yehova mulong wa antu ni divu, tuyikwashin kujingunin kapamp ka kusambish mutapu utukatinay Yehova nakash. Chisu chawonsu tuyilejina antu uyakin piur pa Tatukwetu wa rukat, tukat kukwash kutumbish dijin dia Nzamb. Tukat kushitwish dijin Yehova ku makasu mavud mafundishinau antu piur pa dijin dined. Tukat kuyinkish antu ukwash, mafundish mapandikena kuwap ni makasikeshina makutwishau kwilej.​—Isay 65:13, 14. w20.06 10 par. 8-9

Mikadil ik tufanyidina kumekesh anch tukimbin kuyikwash antu akatina kuchirik kudi Yehova? Shinshikin malejan mamwing tukutwisha kwilejin ku chishimu cha Yesu cha mwan wadiokala kwol kwau. (Luka 15:17-24) Mwan wachirisha manangu ni kukwat mupak wa kuchirik kwol kwau. Tatuku waya mau kumwak mwan ni wamubwikata nich chirungul mulong wa kumekesh anch umukatin mwanend ikundj. Mwan wading ni kom kamufishina nich ni wiyova anch kawanyidinap kumutazuk kudi tatukwend anch mwanend. Pading parumburilay mwan mutapu wading wiyovilay, tatukwend witeka pa ndond yend. Kupwa tatuku wakwata mupak wa kusal yom yimwing mulong wa kumwinkish mwanend kashinsh anch umwakin mudi mwan wa mu dijuku ukatinay. Mulong wa kumwinkish kashinsh kinak, tatuku watenchika musambu ni wamwinkisha mwanend wakarumuka masun mawamp. Yehova udi mudi tatuku wa mu chishimu chinech. Uyikatin akadivar ni anambaz netu alikina kal kusal mudimu wa kulejan ni ukatin anch amuchirikin. Anch twamwimburij Yehova, tukuyikwash chakwel achirik. Chinech chitin kushimpish muchim, kwitek pa ndond ya muntu, ni kumekesh rukat. w20.06 25-26 par. 8-9

Yesu walonda anch antu amwing akwitiy uyakin ‘nich musangar,’ pakwez ritiy rau rikuziy anch arish ni milong. (Mat. 13:3-6, 20, 21) Pamwing ap kadingap ija anch antu amulondwila Yesu akurish ni yakamish. (Mat. 16:24) Ap kand pamwing ap ading atongin anch, ang muntu wikal mwin Kristu kwapwa kal, kakumanap kand kwend mar, ndiy ukwikal kwend ching ni yiyukish, Nzamb ukumuchidij ku yakamish yawonsu. Pakwez mulong tushich mu mangand makad kuwanyin, yakamish yikudandamen kwikalaku. Yishiken yimwing yikutwish kuswimp mwom wetu ni kukepish musangar wetu mu chisu kanang. (Kus. 6:6; Mul. 9:11) Akadivar ni anambaz netu avud amekeshin patok anch akwet kashinsh anch adi mu uyakin. Mutapu ik twija mwamu? Mulong kakatap kwipwakal anch mbay nau mwin Kristu wayirumbukin ap anch wiyandjik mu mwikadil wakad kwikal wa win Kristu. (Kus. 119:165) Tupamp twawonsu tukatau kurish nich yakamish, ritiy rau rikat kudandamen kukasikan nakash pa ndond pa kuziy. (Jak. 1:2-4) Tufanyidin kukudish ritiy rikash mudi riner. w20.07 8 par. 1; 9 par. 4-5

Kurutu kwa kusambish kutang Bibil, mwita Yehova chakwel akukwash kuman mutapu ukutwisha kusadin mu mwom wey yom ukimbina kutang. Chilakej, anch ukwet kuswir kwa umutakel kanang mulong wa kupwish mulong wey, mwita Yehova chakwel akukwash kutan mbil jidia mu Dizu dien jikutwisha kukutakel. (Fil. 4:6, 7) Yehova watwinkisha ukaliweny wa kwitek pa ndond ya muntu kanang ap pa ndond ya chom kanang mulong wa kwijik mutapu wasadika yom. Pakwel anch rusangu ra Bibil rimekan mud yid yom yisadikina katat, ufanyidin kutongijokin mutapu wasadika yom ni kusal usu wa kwitek pa ndond ya muntu ukweta rusangu wilejina. Pakish kuman yom yamanay ni kwiyov mutapu wiyovay ndiy. Kupwa tongijok. Kutongijok kud kushinshikin chikurikina pa yom utangina mulong wa kuman mutapu yom yiney yikutadina ey. Kutongijok kukukukwash kubombakesh yitongijok kushalijan chakwel wova chad nawamp yom wilejina. Kutang Bibil pakad kutongijok kud mud yikung kushalijan ya nking yichidia kal mu karton. Kutongijok kukat kutukwash kwikal ni chitongijok chawonsu cha yom. w21.03 15 par. 3-5

Paul wafanyina kushinshikin pa yom yasutila kal ni kutong anch ang katondap kwend kwikal mwin Kristu mud ing kamutekinap mu rukan. Wafanyina kuyijimen amakundj a ku distrik wa Aziy amuchina ni kulik kuyichingejin chad arund nend akwau. Pakwez Paul kasalap mwamu. Ap anch Paul wading wamanang kal rufu ni mes mend, pakwez kavuramenap chom cha usey nakash​—kumutumbish Yehova. Ni wadandamena kukimb mutapu wa kuyikasikesh antu akwau. Wamuchingejina Yehova kusutil kulembil chisu chawonsu. Pa ndond pa kushinshikin nakash pa antu amuchina, Paul wajikitisha nakash mulong wa mutapu wamukwashau kud arund nend ashinshamena. Chikwau kand, Paul wadandamena kwilej Dizu dia Nzamb. (2 Tim. 3:16, 17; 4:13) Ni cha usey nakash, wading ukwet kashinsh anch Yehova ni Yesu amukatin. w21.03 18 par. 17-18

Chisu chimwing kupwa kwa muvu wa 100, in Kristu a makasu avud nakash andama mu chikumangen cha win Kristu. Asambisha kufundish yishankur ya relijon wa makasu ni ajindjika uyakin udia mu Dizu dia Nzamb. Kusambish kamu pinipa djat ni mu muvu wa 1870, kwadingap kand dirijek dia atushalapol a Nzamb pa divu. In Kristu a makasu akula mudi yinfananfan mu chir, ni chinech chasala anch chikasikana nakash pa kuyijingunin in Kristu akin. (Mat. 13:36-43) Mulong wak chidi cha usey kwijik yom yiney? Chinech chimekeshin anch mwant wa kwiyand ni mwant wa kurul alejenau mu Daniel shapitre wa 11 kikalapaku kudiokal mu muvu wa 100 kushik mu muvu wa 1870. Mulong kwadingap dirijek dia atushalapol a Nzamb afanyinau kurishikish. Pakwez, chimeken anch mwant wa kwiyand ni mwant wa kurul asambisha kand kwikalaku chisu chikemp kupwa kwa muvu wa 1870. w20.05 3 par. 5

Jowel wasambela kulejan anch chisak cha ampasu chikez kashesh ngand ya Isarel,akez kadia mitond yawonsu ya mwi ngand ya Isarel! (Jow. 1:4) Mu mivu yivud, twalondang anch uprofet winou ufanikeshin antu a Nzamb adandamedina kwipan mu mudimu wa kulejan, mudi chisak cha ampasu akad kutwish kukangesh. Twalondang anch mudimu winou ukwet yibudikin yiyimp pa “ngand,” antu atakedinau kudi antakel a chirelijon. Pakwez anch twashinshikin nawamp uprofet wawonsu wa kabuj, tumen anch chidi cha usey kuswimp mutapu wetu wa kuutesh. Shinshikin kushilamu kwa Yehova piur pa chisak cha ampasu: “Nikez kayopat atubwol avudila mudi yisak ya amasalay adiokila kwiyand.” (Jow. 2:20) Anch ampasu afanikeshin Atuman a Yehova aziyidina kwi mbil ya Yesu ya kulejan ni kwikadish in kwilej, mulong wak chad Yehova washilamu anch ukuyopat? (Ezek. 33:7-9; Mat. 28:19, 20) Uyakin udi anch Yehova ukat kwopat, kadiap atushalapol end ashinshamena, pakwez chom ap muntu uletina ubaj kudi antwend. w20.04 3 par. 3-5

Chad yom ik tufanyidina kusal anch twaman mud Yehova ulabin ni kwakul malembil metu? Jakobu ulondin anch tufanyidin ‘kudandamen’ kumwit Nzamb. Yehova kakatap kukis anch twadandamen kumwit manangu ni kakujimanangap. Anch twamulembil Tatukwetu wa mwiur mulong wa kumwit manangu chakwel tujijamen yikokujol yetu, “ukat kupan kudi awonsu wakad katond.” (Kus. 25:12, 13) Umen yikokujol turishina nich, utwanakedin ni ukatin kutukwash. Chakin kamu dined did diyingishin tufanyidina kusanger nakash! Chad mutapu ik ukatay Yehova kutwinkish manangu? Kusutil Dizu diend. (Jnsw. 2:6) Mulong wa kwikal ni manangu minam, tufanyidin kwilej Dizu dia Nzamb ni mikand yikwau yimedina pa Bibil. Pakwez tufanyidinap kwetu kusu kwimen pa kwilej. Tufanyidin kusadin yom yitulejinay Nzamb mu mwom wetu. Jakobu wafunda anch: “Ikalany in kusadil Dizu dia Nzamb. Kangal wikalany in kuditesh kusu.” (Jak. 1:22) Anch twasadin yiyul ya Nzamb, tukwikal in chisambu, isikena ni in riy. (Jak. 3:17) Mikadil yiney yikutukwash kujijamen yikokujol yin yawonsu pakad kushadish musangar wetu. w21.02 29 par. 10-11

Pakwel anch mwin kwilej wa Bibil aya kurutu ni kutambul dibatish, ukwet kuswir kwa ukwash wa antu akwau adia mu chikumangen. Mwin kulejan mwawonsu ukutwish kuyikwash in kwilej asu chakwel aya kurutu. Chibol umwing walonda anch: “Kuding chishimu chilondining anch kuvul kuwap. Nitongin anch chishimu chinech chikwatijadin kamu ni mudimu wa kwikadish in kwilej; ukwash wa in kulejan awonsu ud wa usey mulong wa kumukwash muntu kwikal Kaman.” Chilakej, anamakwetu, arund ni alej, akutwish kutukwash kumupamish mwan nawamp. Akutwish kusal mwamu kusutin kumukasikesh mwan ni kumufundish malejan ma usey. Chilik chimwing kand, in kulejan awonsu akutwish kuyiyul, kuyikasikesh, ni kwikal chilakej chiwamp kud in kwilej a Bibil mulong wa kuyikwash chakwel ashiken ku dibatish. (Jnsw. 15:22) Mulong wak mwin kulejan utakedina dilejan dia Bibil ufanyidin kusanger ukwash umwinkishinau mwin kwilej wend kud in kulejan akwau? Mulong antu avud akutwish kumukwash mwin kwilej kuya kurutu mu spiritu. w21.03 8 par. 1-3

In Kristu awonsu, ansand nau amapal, afanyidin kwipuk mashakamin ma rubabek. Kambuy Yohan wafunda anch tukutwishap kwendil mu uyakin anch pa chisu chawiy chimwing tukwet mashakamin mijondila. (1 Yoh. 1:6) Anch tukatin kwikal ni dilau dia Yehova nlel ni mu machuku ma kurutu, tufanyidin kuvurik chisu chawonsu anch Yehova umen chom chin chawonsu tusadina. Ap anch antu kakatap kuman yom tusadining mu ujindj, Yehova ndiy umen chom ni chom tusadina. (Heb. 4:13) Tufanyidin kwipuk chitongijok cha mangand piur pa chitil. Mu machuku ma Yohan, in kupumbok alondang anch muntu ukutwish kwend kusal yitil, oku udandamedin kwikal mu urund uwamp ni Nzamb. Nlel tushich nau antu akweta chitongijok mud chinech. Antu avud nlel alondin anch amwitiyijin Nzamb, pakwez kitiyinap yom yilondinay Nzamb piur pa chitil, pakampwil piur pa yom ya masandj. Yom yimenay Yehova anch yid yitil, awiy akat kulond anch ud mulong umutadila muntu ni muntu panrend, ap anch muntu ni muntu ukutwish kwend kuyisal anch yimukatishin. w20.07 22 par. 7-8

Ov, ukweting chaku cha kuyilondin anambaz ney anch chitin kusal mwamu? Shinshikin chilakej ech. In kulejan amwing amen anch nambaz, umwing ukweta nfumwend wakad kwikal Kaman, ukat kuswinkanang yisu yivud ku yikumangan ni uding kand wakusambish kuya anch chikumangan chapwa. Wezining nau an pa chipatu. Chad in kulejan inay asambish kumulondol anch ufanyidin kwambamb ni nfumwend chakwel ezangang nau an ku yikumangan. Pakwez, avuramen kwijik anch nambaz winou usadin usu nakash mulong wa kukumangan. Chimukasikedin kulimish program wend ni anch kendiyap ukweta dizu diansudien piur pa an. Anch wamubaz nambaz ni kuyilej piur pa yom yiwamp yisadinay nambaz winou, ukuyikangesh kudandamen kumulond nayimp. Amakurump ijing anch Yehova ukat kushinshikinang nakash mutapu uyisadidinau. (Jak. 1:27) Chawiy, akat kumwimburij Yesu kusutil kwikal isikena. Akat kusal mwamu kusutil kushinshikin mutapu udia mashakamin ma muntu pa ndond pa kushinshikin pa mbil. (Mat. 15:22-28) Anch amakurump asal usu wa kuyikwash anambaz, anambaz akat kwiyov anch Yehova ni dirijek diend ayikatin. w20.09 24-25 par. 17-19

Muprofet Daniel wakimbang chisu chawonsu ukwash wa Yehova nich kwikepish. Chilakej, chisu charumburilay chilat cha Nebukadinezar, Daniel kalondap anch warumburila chilat chinech kusutil usu wend amwinend. Chinyim ni chinech, wapana ntumb jawonsu kudi Yehova. (Dan. 2:26-28) Yom ik twilejidinaku? Anch akadivar akat kusanger madiskur tukata kusal, ap anch twikal ni yibudikin yiwamp mu mudimu wa kulejan, tufanyidin kupan ntumb jawonsu kudi Yehova. Nich kwikepish, tufanyidin kwijik anch tukutwishap kusal yom yiney pakad ukwash wa Yehova. (Fil. 4:13) Anch twasal mwamu, tumekeshin anch twimburijin kand chilakej chiwamp cha Yesu. Yesu wamuchingejina Yehova. (Yoh. 5:19, 30) Kapakishap kwikangin ulabu wa Tatukwend. Filip 2:6 ulejen anch Yesu “karilap kwilikan pamwing nend Nzamb.” Mulong udi Mwan uziyidina, Yesu wijika nawamp mimbu yend ni walimisha ulabu wa Tatukwend. w20.08 11 par. 12-13

Antu amwing abambidina mwi njil ya mwom, arishin ni milong yakadiau antu akwau kuman ni pamwing ap yakadiau kwov kurumburik. Anch ukwet milong ya ukash wa mujimbu, ni anch wiyovil anch antu akwau kakuteshinap ukutwish kutan usu kusutil chilakej cha Mefiboket. (2 Sam. 4:4) Wafanyina kurish nich ulim, ni amurumburisha nayimp kudi Mwant David. Pakwez kakudishap chitongijok chiyimp; wasangera yom yiwamp yamushikena mu mwom wend. Wajikitisha mulong wa rukat ramumekeshinau pakur kudi David. (2 Sam. 9:6-10) Chawiy, chisu chamurumburishau nayimp kudi David, Mefiboket washinshikina yom yawonsu yashikija ku mulong winou. Kalikidilap kurumbuk kwa David kumujimesh. Ni kamufishap nich Yehova mulong wa yom yasalay David. Mefiboket washinshikina pa yom yafanyinay kusal mulong wa kumukwash mwant watondau kudi Yehova. (2 Sam. 16:1-4; 19:24-30) Yehova wafundikisha chilakej chiwamp cha Mefiboket mu Dizu Diend mulong wa kutaninamu kwetwetu.​—Rom 15:4. w20.04 26 par. 3; 30 par. 18-19

Antu amwing mu chikumangen akutwish kusal mudi amishoner, ayibol a pakampwil, ap ayibol a rawonsu. Asadin kal anch mudimu wa kufundish Bibil ni wa kwikadish in kwilej wikal mulad wau wa mashakamin. Ap anch antu inay adia mu mudimu wa chisu chawonsu kakwetap yom yivud ya ku mujimbu, pakwez Yehova ukat kuyiyukish chipandikena. (Mar. 10:29, 30) Tuyikatin nakash akadivar ni anambaz inay, ni tusanger nakash kwikal nau mu chikumangen! Ov, ching akadivar akweta yisend ni antu adia mu mudimu wa chisu chawonsu awiy kwau akweta usey mu chikumangen? Bwat kamu! Mwin kulejan mwawonsu wa rusangu ruwamp udi wa usey ku mes ma Nzamb ni mu chikumangen. (Rom 10:15; 1 Kor. 3:6-8) Chidi mwamu mulong mudimu wa usey nakash mu chikumangen udi wa kwikadish in kwilej a Nsalejetu Yesu Kristu. (Mat. 28:19, 20; 1 Tim. 2:4) Antu awonsu akata kulejan, ikal abatishinau kal ap akad kubatishau akat kusal usu wa kutek mudimu winou pa ndond ya kusambish mu mwom wau.​—Mat. 24:14. w20.08 21 par. 7-8

Mud mutapu ulejenau mu mufund wa nlel, anch twarish ni yakamish, Yesu ukutukwash. Mazu ma Yesu makutwish kutukasikesh. Mulong wak? Mulong yisu yimwing tukat kurish ni milong yikash kujijamen. Chilakej, anch twafish muntu tukatina, tukutwish kurish ni runeng pamwing ap mu mivu yivud. Antu akwau akutwish kurish ni yakamish ya upal. Ni akwau kand akwet mashakamin makash mulong arishin ni ushon upandikena. Chikalap nchik yakamish yiney, tukwet usu wa kudandamen kujijaman mulong twij anch Yesu udi netu “machuku mawonsu,” ap machuku turishina ni milong yikash mu mwom wetu. (Mat. 11:28-30) Bibil utwinkishin kashinsh anch Yehova ukat kutukwash kusutil angel end. (Heb. 1:7, 14) Chilakej, angel akat kutukwash ni kututakel chisu tulejena “rusangu ruwamp ra Want” kudi antu a “mangand mawonsu, ni a michid yawonsu, ni a jindim jawonsu.”​—Mat. 24:13, 14; Kuj. 14:6. w20.11 13-14 par. 6-7

Tukatin kumukwash mwin kwilej kwov kurumburik anch yom yilejinay yidiokil mu Bibil, Dizu dia Nzamb. (1 Tes. 2:13) Mutapu ik tukutwisha kusal mwamu? Mukasikesha mwin kwilej kulond yom yitonginay piur pa yom yilejinay. Pa ndond pa kumurumburil maverse mawonsu, mwita mwin kwilej chakwel akurumburil maverse mamwing. Mukwasha mwin kwilej chakwel aman mutapu Dizu dia Nzamb dimutadina ndiy. Mwipula yipul yikutwisha kumubachik kulond yom yitonginay ap mutapu wiyovilay piur pa maverse matangay kal. (Luka 10:25-28) Chilakej, mwipula anch: “Mwikadil ik wa Yehova wajingunina kal kusutil verse winou?” “Uyakin winou wileja kal, ukutwish kukukwash mutapu ik?” “Mutapu ik wiyovila piur pa yom wileja kal?” Chom cha usey nakash kidiap uvud wa yom yijay mwin kwilej, pakwez mutapu ukatinay ni usadidinay yom yijay. Mulika Bibil afundish amwinend. Ufanyidin kwikepish anch ukatin kwikal mulej ukweta ukaliweny. w20.10 15 par. 5-6

Tukutwish kwikal nich kashinsh anch mudimu wa kulejan ukupwa pa chisu chiwanyidina. Shinshikin yom yasadika pa chirung cha Nowa. Yehova wamekesha anch ndiy wijing kulimish chisu mu mutapu uwanyidina. Yehova wasambela kutek chisu chikusadika mabeb piswimp mivu 120 kurutu mabeb masambish. Kupwa kwa mivu yivud, wamuleja Nowa chakwel atung waat. Chimeken anch pikwading kuchishadin mivu 40 ap 50 kurutu kwa mabeb kusambish, Nowa wading udandamedin kusal mudimu ukash. Ap anch antu kadingap kamuteshina, pakwez Nowa wadandamena kuyibabesh djat kamu ni pa chisu chamulejau kudi Yehova anch chisu cha kwandam mu waat chawanyin kal. Kupwa, chisu chatekay Yehova pichawanyina, “[Yehova] wapata chis.” (Dis. 6:3; 7:1, 2, 16) Piswimp ap Yehova ukwimik mudimu wa kulejan; kupwa ukushesh mangand minam mayimp ma Satan, ni kuswinkeshap ngand yisu yitentamina. Patuchingedina kuwanyin kwa yom yiney, el amboku tumwimburijany Nowa ni antu akwau alika kwitiy chakwel chikas chau chiswedish. Tutekany amboku mudimu wa kulejan pa ndond ya kusambish, tushimpishany muchim, ni tukasikeshany ritiy mudiay Yehova ni mu kushilamu kwend. w20.09 13 par. 18-19

Anch kwikil antu inkishinau ulabu wa kutakel, dijuku dia Yehova dikwikalap ni musangar ni dikwikal mu kanvundangesh. Chilakej, ing kwikil muntu wija nany ufanyidina kukwat mipak ya nsudiel ni nany ufanyidina kulondul chakwel mipak yiney ayiwanyisha. Anch ditenchik dia Nzamb dia kutek umutakel did diwamp, mulong wak nlel amband avud iyovil anch ayiyikedil kwa chisum kud anfumwau? Chid mulong amakundj avud kakatinap kuziyil kwi mbil ja Yehova piur pa dijuku, ni akat kulondul yishankur ni yaku ya ndond yishichau. Akat kuyisadin kand amband nich chisum mulong wa uwamp wa ayinau. Chilakej, ikundj ukutwish kumuyikel mukajend kwa chisum mulong wa kumekesh anch ud ikundj wa kashinsh ap mulong wa kumekesh kud antu akwau anch “kamukandaminap kud mband.” Ukutwish kutong anch kakutwishap kumushindin mukajend chakwel amukata, pakwez ukutwish kumwovish wom chakwel atwish kumuyikel. Amakundj akweta mwikadil winou ap akata kutong mwamu, ayipwishikishin amband kalimish kayiwanyididina, ni Yehova kakatinap anch amakundj ayisadin akajau mwamu.​—Efes 5:25, 28. w21.02 3 par. 6-7

In Kristu iyakamishina mulong wa mulong kanang, akutwish kumulembil Yehova chakwel ayikwasha. Yehova ukutwish kwakul malembil mey kusutil kukwinkish “chisambu cha Nzamb chisutila ronganyin ra antu.” (Fil. 4:6, 7) Yehova ukat kutwinkish chisambu chinech kusutil ukash wa spiritu wend utumbila. (Gal. 5:22) Chisu umulembila Yehova, muleja yom yawonsu piur pa mutapu wiyovila. Muleja mulong urishina nich ni murumburila mutapu wiyovila pa mulong winou. Anch kud mutapu wa kupwish mulong winou, mwita chakwel akwinkisha manangu ma kujingunin yom ufanyidina kusal ni chakwel akwinkish usu wa kusal yom yiney. Anch kwikil chom cha kusal mulong wa kupwish mulong winou, mwita Yehova chakwel akukwasha kulik kwiyakamish nakash. Anch mu malembil metu tukat kulond patok milong turishina nich, mu kusut kwa chisu tukuman chad nawamp mutapu wakulay Yehova malembil metu. Anch malembil mey kamakwilap kapamp kamwing kupwa kwa kulembil, kangal waziy. Yehova ukatin anch umulej patok mulong ukweta, pakwez ukatin kand anch udandamen kulembil.​—Luka 11:8-10. w21.01 3 par. 6-7

Mu yikumangen yetu mudi ambay a uruw akad kwikal nau an, ni akwau akweta an. Pakwez mudi kand akadivar nau anambaz adia ajich. Chadi, mutapu ik tufanyidina kuyiman akadivar nau ambaz adia ajich? Shinshikin mutapu Yesu mwayimanangay ajich. Padingay pa divu, Yesu katanap. Washala mujich ni wasadina chisu ni usu wend mulong wa kuwanyish mudimu wend. Yesu kafundishap anch chifanyidin kamu ching kwatan ap anch chifanyidin kamu ching kushal mujich. Pakwez, walonda anch in Kristu amwing akat kutond kushal ajich. Yesu wayilimishang ajich. Kayipipejangap ni kayimanangap mudi aburedin chom mu mwom wau mulong adi ajich. Kambuy Paul nindiy washala mujich mu chisu chawonsu chasalay mudimu wend. Paul kafundishap dichuku ap dimwing anch kwatan kuyipin. Mulong wading wij anch winou udi mupak umutadina muntu amwinend. w20.08 28 par. 7-8

Kambuy Yohan wasala mivu yivud, ni wamana yinship yivud mu mwom wend. Warisha ni yakamish ya mitapu yawonsu yading yifanyidina kuziyish ritiy rend. Pakwez, chisu chawonsu wasalang usu wa kuziyin kwi mbil ya Yesu, mud mbil ya kuyikat akadivar ni anambaz nend. Mud chibudikin, Yohan wading nich kashinsh anch Yehova ni Yesu amukatin, ni akumwinkish usu wa kujijamen yoziu yiney. (Yoh. 14:15-17; 15:10) Satan ni mangand mend kafanyinap kutwish kumukangesh Yohan kuyikat akadivar ni anambaz nend ni kuyimekeshin rukat riner mu mazu ni mu yisal. Mud Yohan, tushich mu mangand mayikedilau kud ntakel wakad rukat, Satan. (1 Yoh. 3:1, 10) Ap anch ukatin anch tulik kuyikat akadivar ni anambaz netu, kakutwishap kusal mwamu anch tumufungwidinap njil. El tukwatany mupak wa kuyikat akadivar ni anambaz netu, kuyilej anch tuyikatin mu mazu, ni kumekesh rukat riner mu yisal yetu. Anch twasal mwamu, tukwikal ni musangar wa kwikal mu dijuku dia Yehova ni tukwikal ni musangar mu mwom wetu.​—1 Yoh. 4:7. w21.01 13 par. 18-19

Mu mangand minam mayikedilau kud Satan mwom ukasiken nakash, ni yisu yimwing tukutwish kukangany kuman chakusal. (2 Tim. 3:1) Pakwez, tufanyidinap kwiyakamish ap kwov wom. Yehova wij yom yawonsu yitushikedina. Utukanin anch ang twikal ni kuswir kwa ukwash, ukutulam ku chikas chend cha katatuku cha dikand. (Isay 41:10, 13) Mulong tukwet kashinsh anch Yehova ukutukwash, Mifund yikutwish kutwinkish usu tukweta nich kuswir mulong wa kupandikan chikokujol chin chawonsu tukutwisha kurish nich. Madram metu ma mavideo ap makutesh ni mitu ya milong yidia pafundinau anch “Imitez leur foi”, yikat kutukwash kuman nsangu jisambidinau mu Bibil mud yom yisadikina nlel. Kurutu kwa kutal, kutesh, ap kutang jinsangu jinej, mwita Yehova chakwel akukwash kudioshaku malejan ukutwisha kusadin. Iteka pa ndond ya muntu wisambidinau. Tongin pa yom yasalau atushalapol inay a Yehova mulong wa kupandikan yakamish yau ni mutapu wayikwashau kud Yehova. Kupwa, sadin mu mwom wey malejan wilejidina ku yilakej yau. Mujikitisha Yehova mulong wa ukwash ukatay kukwinkish. Ni mekesh anch umujikitishin mulong wa ukwash ukatay kukwinkish kusutil kukimb mitapu ya kuyikasikesh ni kuyikwash antu akwau. w21.03 19 par. 22-23

Anch udiany ambay a uruw ni ukatilany kuval an, iyipulany anch: ‘Ov, tudi antu ikepishina ni a mu spiritu akutwishay Yehova kwinkish uswan wend kulam?’ (Kus. 127: 4) Anch wavadin kal an, iyipula anch: ‘Ov, nikat kuyifundish anam usey wa kusal mudimu ukash?’ (Mul. 3:12, 13) ‘Ov, nikat kusal usu wam wawonsu wa kuyichidij anam ku yom yiyimp yikutwishau kusankan?’ (Jnsw. 22:3) Ukutwishap kuyichidij aney ku milong yawonsu. Pakwez, pakemp pakemp ni mu mutapu wa rukat, ukutwish kuyifumb aney mutapu ukutwishau kuchingejin Bibil mulong wa kutan yiyul anch arish ni yakamish ya mu mwom. (Jnsw 2:1-6) Chilakej, anch muntu wa mu dijuku walik uyakin, yikwasha aney kwilej mu Dizu dia Nzamb mulong wak chidi cha usey kushal ushinshamena kudi Yehova. (Kus. 31:23) Ap anch muntu ukatinanya wafa, yileja aney mutapu ukutwishau kusadin Dizu dia Nzamb chakwel atwish kurish ni ushon ni kulam chisambu.—2 Kor. 1:3, 4; 2 Tim. 3:16. w20.10 27 par. 7