Ngond wa 12

Yesu wafanikesha urund ukwetay ni in kwilejend nich urund uding pakach pa kafung ni amikoku end. (Yoh. 10:14) Kufanakesh kwinoku kuwanyidin kamu. Amikok ijing nawamp kafung wau ni akat kutesh dizu dend. Ikundj umwing wamana chom chinech. Walonda anch: “Twading tukimbin kuyikwat amikoku amwing yipich ni twasala usu wa kuyisejish piswimp. Pakwez katusejinap mulong kadingap kija mazu metu. Kupwa kweza nsand umwing wadinga kafung; payitazukay amikoku, amulondula kapamp kamwing.” Yom yamanay ikundj winou yituvurishin mazu ma Yesu piur pa amikoku end, charumburik anch in kwilejend. Walond anch: “Akez katesh dizu diam.” Pakwez Yesu ud mwiur. Mutapu ik tukutwisha kutesh dizu diend? Mutapu umwing tukutwisha kumekesh anch tuteshin dizu dia Mwant wetu ud kusutin kusadin malejan mend mu mwom wetu.​—Mat. 7:24, 25. w21.12 16 par. 1-2

Kambuy Paul wayizengola nakash in Kristu. Pakwez mu kusut kwa chisu, wajingunina anch wading usadin yom yiyimp ni waswimpa yaku ni wuntu wend. (1 Tim. 1:12-16) Kusutin usu wa Yehova, Paul wikala mwin rukat, mwin ranaken, ni kafung wikepishina. Wamuchingejina Yehova anch ukumulikishin pa ndond pa kutongijokin chisu chawonsu pa kurumbok kwend. (Rom 7:21-25) Kachingejap anch ikal muntu uwanyidina. Pakwez, wasala usu nakash mulong wa kuwapish wuntu wend wa win Kristu ni kumuchingejin Yehova nich kwikepish chakwel amukwash kuwanyish mudimu wend. (1 Kor. 9:27; Fil. 4:13) Amakurump kakatap kuyitond anch mulong ad antu awanyidina. Pakwez Yehova ukatin anch itiyina kurumbok kwau ni kusal usu wa kuwapish wuntu wau wa win Kristu. (Efes 4:23, 24) Mukurump ufanyidin kwishinshikin amwinend kusutin Dizu dia Nzamb ni kusal usu wa kuswimp wuntu wend. Mwamu Yehova ukumukwash kwikal ni musangar ni kwikal mukurump muwamp.—Jak. 1:25. w22.03 29-30 par. 13-15

Yom ik tufanyidina kusal anch twajingunin anch twamurumburishang mbay netu mwin Kristu? Tufanyidin kuvurik anch tufanyidin kuyikat akadivar netu. (Jak. 2:8) Chikwau kand, tufanyidin kumwit Yehova mu malembil makurukina chakwel atukwash kulik kumurumburish. Tukutwish kusal kukwatijan ni malembil metu kusutin kukwat mupak wa kwambamb ni muntu twalondina nayimp. Tukutwish kumutazuk mulong wa kuya nend mu mudimu wa kulejan ap kudia nend yakudia. Anch twamwijik nawamp mukadivar netu, tukutwish kumwimburij Yehova ni Yesu kusutil kushinshikin uwamp udia mudiay muntu winou. Anch twasal mwamu, tukumekesh anch tutesh mbil ya kafung wetu muwamp ya kulik kuyirumburish antu akwau. Mud mutapu ukatau amikoku kutesh dizu dia kafung wau, in kwilej a Yesu ateshining dizu diend. Twikala a mu “chisak chikemp” ap pakach pa “amikoku akwau,” el tudandamenany kutesh ni kuziyin dizu dia kufung muwamp.​—Luka 12:32; Yoh. 10:11, 14, 16. w21.12 19 par. 11; 20-21 par. 17-18

Chisu chikalay Robowam mwant wa Isarel, antu end eza mulong wa kumwit ukwash. Amwita kuyipipejinaku mpand yayitwikau kud tatukwend Salomon. Robowam waya kuyiman amakurump in chiyul a mu Isarel mulong wa kwijik mutapu wafanyinay kuyakul antu. Amakurump inay amuyula mwant anch ang wasal kukwatijan ni yom yamwitangau kud antu, akudandamen kumusadin. (1 Ant 12:3-7) Chimeken anch Robowam kasangerap chiyul chamwinkishau kud amakurump inay, chawiy chayikimbay akwau a reng rend mulong wa kuyit chiyul. Amuyula kuyiwejin antu dilim kwi mpand yashay tatukwend. (1 Ant 12:9-11) Robowam wafanyina kumwipul Yehova chiyul chafanyinay kusadin. Pa ndond pa kusal mwamu, ndiy wasadina yom yamulejau kud akwau ansand. Yibudikin yikalaku yading yiyimp nakash kud Robowam ni kud in Isarel. Ku mutambu wetu, yiyul tutambwila yikutwishap yisu yawonsu kwikal kamu yitwadia tuchingejidina. Pakwez, anch chimedin pa Dizu dia Nzamb, tufanyidin kuchitiy. w22.02 9 par. 6

Muntu wikepishina ni wija mimbu yend kakatap kushinshikin pa ukaliweny ukwetau ansand, pakwez pa usu wau. Kakatap kuyiman ansand mud antu afidinay nend ndond, pakwez ukat kuyiman mud ambay nend a mudimu. Akadivar amapal akat kuyiman ansand mud chipan chidiokila kud Yehova ni akat kujikitish nakash mulong wa mudimu ukatau kusal. Pakata kukep usu wau, amapal akat kujikitish nakash anch aman anch kud ansand akweta usu akatina kwipan mulong wa kusal midimu ni kukwash chikumangen. Bibil ulondin piur pa Nawom anch ud chilakej chiwamp nakash cha ipal witiya ukwash wa changadim ni kumekesh kujikitish. Chakusambish, Nawom wamukasikesha mawenend Rut kuchirik kwol kwau. Pakwez, Rut wakasikesha chakwel aya pamwing ni Nawom ku Betlehem, ni Nawom witiya ukwash wa Rut. (Rut 1:7, 8, 18) Awonsu aad ikala ni yiyukish yivud! (Rut 4:13-16) Kwikepish kukuyibachik amapal kwimburij chilakej cha Nawom. w21.09 10-11 par. 9-11

Tatukwetu wa mwiur wij yom yikutwishay kusal umwing ni umwing wa pakach petu. Pamwing ap ey ukutwish kusal yom yivud kuyisutamu antu avud wija ni ukatina. Ap kand ukutwishap kusal yom mud musadinau antu akwau, pamwing ap mulong wa mivu ukweta, mayej, ap yisend ya mu dijuku. Kangal waziy. (Gal. 6:4) Yehova kakutwishap kuvuramen mudimu wey. Anch wadandamen kusal yom ukutwisha kukwatijan ni usu wey nich yibachikin yiwamp, Yehova ukuyisanger. Yehova ukat kuman kand mu muchim wey yom ukatina kusal. Ukatin anch wikal ni musangar mulong wa yom utwishina kusal mulong wa kumwifukwil. Tukat kwikal nich chisambu mu manangu mulong twij anch Yehova ukat kuyikwash in kumwifukwil end chisu chirishinau ni milong. (Isay 41:9, 10) Tukwet chakin kamu mayingishin ma kwikal ni musangar patumwifukwidila Tatukwetu wa rukat uwanyidina “kutambul uyaj, ni katumb,” kud yitang yend yawonsu!​—Kuj. 4:11. w22.03 24 par. 16; 25 par. 18

Tukatin kumwimburij Yesu, pakwez tufanyidinap kuziy anch twakangany kumwimburij Yesu nawamp. (Jak. 3:2) Nsand wa kalas kakutwishap kusal yom kumupandakanamu mulej wend. Pakwez payilay kwilejin ku kurumbok kwend ni kusal usu wa kumwimburij mulej wend, ukudandamen kuwapish ukaliweny wend. Chilik chimwing, anch twasadin yom twilejina mu dilejan dietu dia pa kampwil ni twasal usu wa kuwapish tuyilim tukweta, tukutwish kwimburij kamu nawamp chilakej chatushilay Yesu. (Kus. 119:59) Tushich mu mangand mwizwila antu akad muchim wa kwipan. Pakwez antu a Yehova ashalijadin nau antu a mangand. Muchim wa kwipan wa Yesu utupukwin nakash, ni tukwatin mupak wa kwimburij chilakej chend. (1 Pita 2:21) Anch twasal usu wa kwimburij muchim wa kwipan wa Yesu, tukwikal ni musangar udiokila ku kwikal ni dilau dia Yehova. w22.02 25 par. 16, 18

Mutapu umwing ukatay Yehova kupan umutakel kud antu end ud kusutin Dizu diend, Bibil. Anch twitekin chisu cha kutongijokin nakash pa yom yitufundishinay Yehova, chikutuswapel kulondul umutakel wend ni kuwanyish mudimu wetu wa kulejan. (1 Tim. 4:15, 16) Mutapu ukwau upaninay Yehova umutakel wend ud kusutin ‘kashalapol ushinshamena ni kubabal.’ (Mat. 24:45) Yisu yimwing, kashalapol winou ukutwish wapan umutakel twakad kamu kutesh nawamp. Chilakej, tukutwish kutambul mbil jimwing jilejena mutapu wa kwirijek mulong wa kupand ku mar madiokila ku yom yatangau, yom tutongina anch yikezap kwau kushiken kwi ndond tushicha. Yom ik tufanyidina kusal anch twatong anch mbil jipaninau jovikenap? Tongijokin pa nsangu twatangina kal mu Bibil. Yisu yimwing antu a Nzamb atambula umutakel wading umekena mud wovikenap mu kuman kwa antu, pakwez wayipandisha.​—Ank. 7:7; 8:10. w22.03 18 par. 15-16

Nich kashinsh kawonsu, Yesu walonda mazu ma mufund wa nlel. Yesu wading wij anch mwom wend wa machuku ma kurutu ud katat mu makas ma Yehova ni wading nich kashinsh anch Tatukwend ukumuvurik. Yom ik tukutwisha kwilejin ku mazu ma Yesu? Tek mwom wey mu makas ma Yehova, charumburik anch ufanyidin kushal ushinshamena kud ndiy ap anch mwom wey ud mu ubaj. Mulong wa kusal mwamu, ufanyidin kusadin chiyul chilondina anch “mukungamena [Yehova] ni muchim wey wawonsu.” (Jnsw. 3:5) Shinshikin chilakej cha Joshua, mukadivar nsand wa mivu 15 wading uyedina pifil. Walika kumwok ni milad yijipina chijil cha Nzamb. Chisu chikemp kurutu afa, wamuleja makwend anch: “Maku, mwom wam ud mu makas ma Yehova. . . . Nikutwish kukulej nich kashinsh anch: Yehova ukwinvumbul kamu pa chisu cha divumbuk. Umen mu muchim wam, ni nimukatin chakin kamu.” Muntu ni muntu pakach petu ufanyidin kwiyipul anch: ‘Anch narish ni chikokujol chikutwisha kwinshikij ku rufu chipakina ritiy ram, ov, nikutek mwom wam mu makas ma Yehova ni kumuchingejin anch ukwinvurik?’ w21.04 12 par. 15; 13 par. 16

Yehova ukat kuyikasikesh antwend kusutin mudimu wa ulejan. Kuyifundish antu akwau uyakin wa Bibil kukat kutwinkish usu ni kutukasikesh, atutesha ap bwat. Mulong wa yakamish yirishinau nich, antu amwing akutwish kwiyov mud kipaninap kamu mu mudimu wa kulejan. Anch wawiy mutapu wiyovila, vurik anch Yehova ukat kusanger yom umusadidina nich usu wey wawonsu. Yehova umen ni usangaredin nakash impu tukweta ya kulejan nakash, ap anch tukwetap mutapu wa kudiokal ku chikumbu. Ukutwish kutukwash chakwel tuman mutapu wa kupan uman kud antu alamina ayej ap amingang. Anch twasambish kwilakej yom tusadina mu mudimu wa Yehova katat ni mutapu twasalang pakur, tukutwish kuziy. Pakwez anch twashinshikin pa mutapu utukwashinay Yehova nlel, tukutwish kujijamen yoziu yetu nich musangar. Tukutwishap kwijik rubut ik ra uyakin twakuna kal rikuminya ni kudandamen kupam.​—Mul. 11:6. w21.05 24-25 par. 14-17

Ris ramushikija Mwant David ku kuvuramen yom yawonsu yamwinkishau kud Yehova, kuwejaku mapit, ntumb ni kuwin njit jivud pad akankuny nend. David wading wij nawamp anch yipan yamwinkishau kud Nzamb yading “yipandaken kuvul!” (Kus. 40:5) Pakwez chisu chimwing, David wavuramena yom yawonsu yamwinkishau kud Yehova. Ap anch David wading nau amband avud, wasambisha kand kumwovil mband ayen ris. Mband winou wading Batisheba ni nfumwend wading Uria mwin Het. David witongina amwinend ni walala ni Batisheba, ni Batisheba wimisha. Yom yasalay David yading yiyimp nakash. Pakwez warijeka kand chakwel amujip Uria! (2 Sam. 11:2-15) Yom ik yading yitonginay David? Ov, wading utongin anch Yehova kamenap kwend? Ap anch David wading wamusadidin kal Yehova mu mivu yivud, wakudisha ris, ni kusal mwamu kwamuletina mar nakash. Pakwez cha musangar, mu kusut kwa chisu, David witiyina kurumbuk kwend ni wakarumuka. David wamujikitisha Yehova nakash mulong wamulikishina!​—2 Sam. 12:7-13. w21.06 17 par. 10

Pamwing ap tutongin anch tukwetap ukaliweny uwanyidina mulong wa kutakel dilejan dia Bibil. Tukutwish pamwing ap kwiyov anch tufanyidin bil kukudish ronganyin ni ukaliweny wa kufundish kurutu kwa kusambish kumufundish muntu kanang Bibil. Anch wawiy mutapu wiyovila, tal yom yisatu yikutwisha kukwinkish kashinsh. Chakusambish, Yehova ukumen anch uwanyidin kuyifundish antu akwau. Cha kaad, Yesu winkishinau kal ‘ulabu wawonsu mwiur ni pa divu’ ndiy ukwinkishina mbil ya kufundish. (Mat. 28:18) Cha kasatu, akadivar ni anambaz ney akutwish kukukwash. Yesu wading uchingejidin yom yamufundishau kud Tatukwend piur pa mutapu wa kulond. Niyey ukutwish kusal mwamu. (Yoh. 8:28; 12:49) Chikwau kand, ukutwish kumwit ntakel wa chisak chen cha mudimu wa kulejan, ap chibol ukweta ukaliweny, ap kand mwin kulejan mukwau ukweta ukaliweny chakwel akukwash mutapu wa kusambish ap kutakel dilejan dia Bibil. Ni ukutwish kwikal nich kashinsh anch ukutwish kutakel dilejan dia Bibil kusutin kuyitwalaku in kulejan inay ku malejan mau ma Bibil ni kuman mutapu utakedinau awiy. w21.07 6 par. 12

Pasejina disudien dia mangand minam, chitwitin kuchingejin nakash mutapu usadiningay Yehova yom kusutamu pasak. Mulong wak? Pa chirung cha mar makash, tukutwish kutambul umutakel umekena mud wakad kovikan ni ukasikena kuziyin. Chawiy, Yehova kakwambambap netu pakampwil. Chimeken anch ukutwinkish umutakel kusutin amakundj atonday kal mulong wa kutakel dirijek diend. Chikwikalap chisu cha kwidjidjek piur pa umutakel ap kwiyipul anch: ‘Ov, chakin kamu umutakel winou udiokil kud Yehova bil anch yid kwau mipak ya akadivar atakedina?’ Ov, ukumuchingejin Yehova ni dirijek diend mu chirung chinicha chikash? Yom ukata kutong katat piur pa mipak yikatau kukwat amakundj atonday Nzamb mulong wa kutakel yikutwish kukukwash kutan chakul. Anch wachingejin mu umutakel tutambwila nlel ni kuziyin ni muchim umwing, chimeken anch ukutwish kand kusal mwamu pa chisu cha mar makash. w22.02 6 par. 15

Yehova wamukwasha Gedeyon nau amakundj 300 kuwin njit jimwing ja pakampwil, ni ading ni mutapu wa kwibaz. Amakundj a ku muchid wa Eferayim aya kumanijan ni Gedeyon, kadiap mulong wa kumujikitish, pakwez mulong wa kumutendish mulong kayilejap chakwel aya nau kwi njit. (Ank. 8:1) Gedeyon wayinkisha chilakej chimekeshina mutapu wayiyukishau awiy kud Yehova. Mud chibudikin, amakundj inay “apwisha ujim wau.” (Ank. 8:3) Gedeyon wipuka kwitutul mulong wa kulam chisambu pakach pa antu a Nzamb. Chilakej cha in Eferayim chitufundishin anch tufanyidinap kushinshikin pa kukimb ntumb ja ayinetu pa ndond pa kumutumbish Yehova. Antakel a majuku ni amakurump a chikumangen akutwish kwilejin ku chilakej cha Gedeyon. Anch yom twasalang yamujimesh muntu, tufanyidin kwikasikesh kutongin mutapu umenay ndiy yom. Tukutwish kand kumujikitish mulong wa yom yiwamp yasadinay kal ndiy. Pakwez chitin kwikepish mulong wa kusal mwamu. Pakwez vurik anch chisambu chid cha usey nakash kusutamu kukimb kwitutul. w21.07 16-17 par. 10-12

Yehova wamekesha anch utukwatin nich usey patutangay mu chisu chend. Mulong atutanga mu chifu cha Nzamb, tukutwish kukudish ni kumekesh mikadil yend yivud yipandikena kuwap, mud rukat, ranaken, kushinshaman, ni kutentam. (Kus. 86:15; 145:17) Anch twakudish mikadil yiney, tukat kumutumbish Yehova ni kumekesh anch tumujikitishin. (1 Pita 1:14-16) Anch twashakam mu mutapu umusangareshina Tatukwetu wa mwiur, ayinetu tukat kwikal ni musangar. Chikwau kand, mulong Yehova watutanga mu chifu chend, watwinkisha mutapu wa kukudish mikadil yifanyidinau kwikal nich antu akatinay anch ikal mu dijuku diend. Yehova waturijekina ndond yiwamp nakash ya kushakam. Kurutu amutanga ikundj wa kusambish, Yehova warijeka divu mulong wa antu. (Job 38:4-6; Jer. 10:12) Mulong ud Nzamb muwamp ni mwin kupan, Yehova watwinkisha yom yiwamp yivud chakwel twikal ni musangar. (Kus. 104:14, 15, 24) Yisu yimwing, witekinang chisu cha kutongijokin pa yom yading yitanginay, ni wamana anch “yading yiwamp kamu.”​—Dis. 1:10, 12, 31. w21.08 3 par. 5-6

Etu awonsu tukwet chisend cha kulejan ni kwikadish in kwilej. (Mat. 28:19, 20; Rom 10:14) Ov, ukatin kukudish nakash ukaliweny wey mu mudimu winou wa usey nakash? Chisu wilejina ni kusadin yom wilejina mu broshir Kufundish, kwat mipak. Chisu ukwatina mipak piur pa yom utongina kusal, kangal wavuramen mupak wa usey nakash—kukudish mikadil ya win Kristu. (Kol. 3:12; 2 Pita 1:5-8) Chakin kamu, etu awonsu tukatin kumusadin Yehova nakash kusutamu mutapu tumusadidina katat. Mwi ngand yisu, tukumusadin chipandikena. Pakwez patuchingedina ngand yisu, tukutwish kwikal ni musangar nakash ni kwipuk kuziy anch twamusadin nich usu wetu wawonsu. Ni cha usey nakash, tukumutumbish ni kumushiman Yehova, ‘Nzamb wa musangar.’ (1 Tim. 1:11) Komb el tusangerany yisend tukweta katat! w21.08 25 par. 18-20

Anch wavadikina mu dijuku dia Atuman a Yehova, pamwing ap wileja piur pa Yehova piwading uchidia mwan mukemp. Wileja anch kuding Sakatang, anch ukwet mikadil yiwamp nakash, ni utongin kusal yom yiwamp nakash mulong wa antu. (Dis. 1:1; Mid. 17:24-27) Antu avud akat kulond anch Nzamb kwikiling ni kadiap kwend ndiy watang yom yawonsu. Akat kulond anch mwom wiyezina kwau, kupwa mwom winou wasambisha kukarumuk kwikal milad ya yom yikweta mwom yikwamushena. Antu amwing akata kulond mwamu ad antu ilejina nakash. Akat kulond anch siyans umekeshin anch Bibil udimben ni antu itiyijina anch kud Sakatang ad antu akad kwilej, akad manangu, ni ayisup. Chikalap nchik uvud wa mivu twasadina kal mud Kaman wa Yehova, etu awonsu tufanyidin kudandamen kukasikesh ritiy retu. Anch twasal mwau, kakutwishap kutudimb nich “manangu ma antu [filozofi] ma kudimban makad usey” mafundishinau kud antu atadikishina Dizu dia Nzamb.​—Kol. 2:8. w21.08 14 par. 1-3

Abel, Nowa, Aburaham, ni Job amekesha kalimish ni rukat rau mulong wa Yehova kusutin kuziyin, ritiy rau, ni kwipan kudiay ndiy. Asala usu wau wawonsu mulong wa kumulimish Yehova, ni witiya difukwil diau. Kupwa Yehova wayinkisha in Isarel Chijil cha Moses. Mu chijil chinech mwadinga mbil jivud piur pa mutapu wa kumwifukwil Yehova mu mutapu witiyinay. Kupwa kwa rufu ni divumbuk dia Yesu, Yehova kayitap kand antu end kuziyin ku Chijil cha Moses. (Rom 10:4) In Kristu afanyina chad kulondul chijil chisu, “chijil cha Kristu.” (Gal. 6:2) Afanyina kuziyin ku “chijil” chinech, kadiap kusutin kuziyin ku muruzu wa mbil, pakwez kusutin kwimburij chilakej cha Yesu ni kuziyin ku mafundish mend. Nlel kand in Kristu asadin usu wau wawonsu mulong wa kumwimburij Kristu chakwel amusangaresh Yehova ni ‘kwiswedish.’​—Mat. 11:29. w22.03 20-21 par. 4-5

Yehova ukat kuyiteshang anend. Watesha chakin kamu malembil ma Mwanend padingay pa divu. Wamutesha Yesu palembilay piur pa kukwat mipak yijim nakash, mud mupak wa kutond atwimbuy 12. (Luka 6:12, 13) Yehova wamutesha kand Yesu chisu chalembilay mulong wa yakamish. Kurutu amupana, Yesu wamulembila nakash Tatukwend mulong wa choziu chikash nakash chading chikimbinay kurish nich. Yehova kateshap kwend ching malembil ma Yesu, pakwez watuma kand mwangel mulong wa kumukasikesh mwanend. (Luka 22:41-44) Nlel, Yehova udandamedin kutesh malembil ma atushalapol end, ni ukat kuyakul pa chisu chiwanyidina ni mu mutapu uwamp nakash. (Kus. 116:1, 2) Nambaz umwing mu Inde wamana mutapu wakulay Yehova ku malembil mend. Wading urishin ni yakamish yikash, ni wamulembila nakash Yehova pa mulong winou. Ufundin anch: “Program wa JW Télédiffusion wa Ngond wa 5, 2019 wading wisambidin yom tukutwisha kusal anch turishin ni yakamish, ni yawiy kamu yom nading niswirikedina. Chading chakul ku malembil mam.” w21.09 21-22 par. 6-7

Ov, ukutwish kutongijokin mutapu wayikasikena in Kristu inay a mu mivu chitot yakusambish kusha yom yau yawonsu ni kusambishiril mashakamin masu? Chading chiyitin kwikal ni ritiy rikash mulong wa kumuchingejin Yehova chakwel awanyish maswir mau. Pakwez, kwading chom chafanyina kuyikwash. Mivu yitan kurutu in Rom aunyingumuka musumb wa Yerusalem, kambuy Paul wayinkisha in Hebereu chiyul chinech cha usey nakash: “Kangal ris ra nfalang rakuyikelany, pakwez sangarany nich yom yiukwetany[a]. Mulong Nzamb amwinend walonda anch: ‘Kinikukushap, kinikez kakulikap chikupu.’ Chawiy mwamu niyetu tukutwish kulond patok, wakad wom, anch: ‘[Yehova] ndiy mwin kwinkwash, kinikez kwovap wom. Ov, muntu ukwinsal chom ik?’” (Heb. 13:5, 6) Pakad kwidjidjek, antu awonsu alondula chiyul cha Paul kurutu in Rom ashesha musumb amana anch chading chiyiswapedin kwijidin mashakamin masu kwi ndond kwayau. Ading akwet kashinsh anch Yehova ukuwanish maswir mau. w22.01 4 par. 7, 9

Anch twatongijokin piur pa chidiay muntu ukweta riy, tukutwish kutong anch ud muntu muwamp, mwin kubangin, ukweta ranaken, ni mwin kupan. Tukutwish kand kuvurik rusang ralejanay Yesu piur pa mwin Samaria muwamp. Muntu wadinga wa muchid ukwau “wamwovila riy” mwin Yuda wabulau kud ampopol ni kumwiy yom. Mwin Samaria “wamwovila riy nakash” mulong wa yitat yamupusolau ni wamusenda nich rukat. (Luka 10:29-37) Chishimu chinech chimekeshin mwikadil upandikena kuwap wa Nzamb​—riy. Mwikadil winou ud chikunku cha rukat ra Nzamb ni ukat kutumekeshinau pichuku pichuku mu mitapu kushalijan. Kud mutapu ukwau ukutwishay muntu kumekesh riy. Muntu ukweta riy ukutwish kukwat mupak wa kulik kumupup muntu wading uwanyidina kupup. Pa mulong winou, Yehova ukat kutumekeshin kamu riy nakash. Nfund a kuseng walonda anch “[kakutusadinangap] mudi mudia yitil yetu.” (Kus. 103:10) Pakwez yisu yikwau, Yehova ukutwish kamu kumupup nakash muntu wasalang chitil. w21.10 8 par. 1-2

Yehova ukat kumekeshang rukat rudimukina ching kud antu adia mu uruund wa piswimp ni ndiy​—atushalapol end. Tutanin kashinsh kinak mu mazu malonday Mwant David ni muprofet Daniel. Chilakej, David walonda anch: “Palangesh rukat rey rudimukina kudi antu awonsu akwija ey.” “Rukat rudimukina ra [Yehova] ridi ra mivu ni minang kudi awiy akata kumwov ndiy wom.” Ni Daniel niyend walond anch: “[Yehova] Nzamb, ey udi mujim, . . . ukat kumekesh rukat rey rudimukina kudi antu akukatila ey, awiy kamu akata kukuziyil ey.” (Kus. 36:11; 103:17; Dan. 9:4) Kukwatijan ni mazu minam mapepilau, Yehova umekeshining rukat rend rudimukina kud atushalapol end mulong awiy amwij, amwovil wom, amukatin, ni alimishining yijil yend. Yehova umekeshining rukat rend rudimukina ching kusu kud antu akata kumwifukwil mu mutapu witiyinay. Kurutu tusambisha kumusadin Yehova, Nzamb watumekeshinang rukat mud riyimekeshidinay antu awonsu. (Kus. 104:14) Pakwez, katat mulong tud atushalapol end, ukat kutumekeshin kand rukat rudimukina. w21.11 4 par. 8-9

Chikalap nchik chom chikutwishay muntu kusal mulong wa kutuswimp chitongijok, tukwatin mupak wa kuziyin mazu ma Yesu madia kwiur am. Nlel, antu avud akatin kwimburij antakel a chirelijon ijikena nakash. Akat kuyitumbish nakash antakel inay mu chilik chimekeshina anch ayifukwidin. Antu avud akat kuyang mu ma egliz mau, kuland mabuku mau, ni kuyinkish nfalang jivud nakash mulong wa kuyikwash. Antu amwing itiyijining kwau yom yin yawonsu yiyifundishinau. Akat kuyisanger chipandikena antakel inay a chirelijon mud ndiy Yesu win wayishirikinang kal kudiokal mwiur! Chinyim ni chinech, atushalapol akin a Yehova kakwetingap antakel ajim. Ap anch tuyilimishin antu atakedina, tukat kusadin mazu ma Yesu malondina anch: “En awonsu udiany akadivar.” (Mat. 23:8-10) Kitukatap kumwifukwil muntu ap umwing, mud antakel a marelijon ap a politik. Ni tukatap kunung chikas ku yom yisadinau. Pakwez, tudandamedin kwikal aurikina ni mangand. Chawiy mu yom yiney yawonsu, tushalijadin nakash ni marelijon makwau makata kulond anch mad ma win Kristu.​—Yoh. 18:36. w21.10 20 par. 6-7

Mwin Kristu mwawonsu ukatina kwikal utumbila ufanyidin kwikal nich kashinsh anch kwikil chom ap muntu mukwau udia pakach pa urund wend ni Nzamb. Ni mulong tukwet dijin dia Atuma a Yehova, tukwatin mupak wa kwipuk chisal chin chawonsu chikutwisha kusadikish dijin diend ditumbila. (Lev. 19:12; Isay 57:15) In Isarel amekeshang anch amwitiyin Yehova mud Nzamb wau kusutin kuziyin ku yijil yivud. In Levi 18:4 ulondin anch: “Ukez kusadilany yijidik yam, ni kuyilam yijil, ni ku yiney kwawiy kuukeza kwendilany. Am nidi [Yehova] Nzamb wen.” Shapitre wa 19 ukwet “yijil” yimwing yayinkishau in Isarel. Chilakej, verse wa 5-8, 21, 22 malejen piur pa yakupesh ya annam. In Isarel ading afanyidin kupan yakupesh yiney mu mutapu wafanyina kulik ‘kwijondish yom yitumbila ya Yehova.’ Kutang maverse minam kukutwish kutwinkish impu ya kumusangaresh Yehova ni kumwinkish yakupesh ya kumushiman yimusangareshina, mud mulejenau mu Hebereu 13:15. w21.12 5 par. 14; 6 par. 15

Ambay a uruw asu nlel akutwish kutaninamu mu yilakej ya antu akwau ileja kumuchingejin Yehova. Ambay a uruw amwing asadin kal pamwing ap mivu yivud mu mudimu wa chisu chawonsu. Umenany nchik anch wayany kuyit yiyul chisu ushinshikidinanya mipak yen ya mu spiritu? Winou ud mutapu wa kumekesh anch tumuchingejidin Yehova. (Jnsw. 22:17, 19) Vurik, uruw chid chipan cha Yehova. (Mat. 19:5, 6) Ukatin anch ambay a uruw asanger chipan chinech. En ambay a uruw asu, shinshikinany yom usadinanya mu mwom wen. Ov, usadinany usu wa kumekesh kud Yehova anch usangaredinany chipan chinech chakwinkishanyay? Mulembilany Yehova. Kimbijolany mu Bibil mbil jikutwisha kukukwashany kulondwish mashakamin men. Kupwa sadinany yiyul yikwinkishinanyau kud Yehova. Ukutwish kwikalany nich kashinsh anch ukwikalany nich musangar ni yiyukish mu mwom wen anch watekany mudimu wa Yehova pa ndond ya kusambish mu uruw wen! w21.11 19 par. 16, 18

Jakobu wading ni chitongijok chiwamp piur pa amwinend. Jakobu katongap anch wading muntu wa pakampwil ap wa usey nakash kuyipandakanamu akadivar ni anambaz nend, mulong wa dijuku diavadikinay ap yisend yadingay nich. Wayitazuka ambay nend in Kristu anch “anamakwam akarukat.” (Jak. 1:16, 19; 2:5) Kapakishap kwimekesh mud wading muntu uwanyidina. Dilejan: Tuvurikany anch etu awonsu tud akayitil. Tufanyidinap kutong anch tud a piur kuyisutamu antu tufundishina. Mulong wak? Anch twimekesh kud in kwilej etu mud tud antu akad kurumbukang, akutwish kuman anch kakutwishap kuziyin ku yom yitwitinau kud Nzamb. Pakwez anch twitiyin nich win kashinsh anch chading chitukasikedin niyetu kuziyin kwi mbil ja Bibil, ni twarumburil mutapu watukwashay Yehova kupandakan yikokujol yiney, tukutwish kuyikwash in kwilej kuman anch niyau akutwish kumusadin Yehova. w22.01 11-12 par. 13-14

Anch twasal usu nakash wa kutong mud mwatongangay Yesu, chikutuswapel nakash kwimburij yisal ni wuntu wend. (Heb. 1:3) Tukutwish kutong anch: ‘Yesu ud muntu uwanyidina. Nikutwishap ap pakemp kwikal mud ndiy!’ Anch wiyovil mutapu winou, vurik yom yilondwilaku ey. Cha kusambish, akutanga mulong wa kwikal mud Yehova ni Yesu. Chawiy ukutwish kuyimburij, ni ukutwish kusal mwamu mu chilik kanang. (Dis. 1:26) Cha kaad, spiritu utumbila wa Nzamb ud usu upandakena. Nich ukwash wa usu winou, ukutwish kusal yom wadia wakad kufanyin kutwish kusal nich usu wey amwiney. Cha kasatu, Yehova kakwitinap anch umekesha dibuj dia spiritu mud muntu uwanyidina katat. Tatukwetu wa rukat udia mwiur watushidin kal etu tukweta ruchingej ra kushakam pa divu mivu 1 000 mulong wa kwikal antu awanyidina. (Kuj. 20:1-3) Yom yitwitinay Yehova nlel yid kwikasikesh kusal yom tukutwisha ni kuchingejin ukwash wend. w22.03 9 par. 5-6

Ipuk yom yikutwisha kulet kampuw chisu wilejina. Kud kand chom chikwau tufanyidina kuwejin pa malembil mulong wa kukasikesh urund wetu wa piswimp ni Yehova. Kwilej Dizu dia Nzamb ni kukumangan kukutwish kand kutukwash kumusejin Nzamb piswimp. Ov, kud yom ukutwisha kusal mulong wa kusadin nawamp chisu chey cha kwilej ni chisu usutishina mu yikumangan? Iyipula anch: ‘Yom ik yikutwisha kwinletin kampuw chisu nidia mu yikumangan ap chisu nilejina?’ Ov, kud kwakul ap kutum uruu kusutin telefon, ap yom yikwau? Anch wajingunin anch manangu mey makat kuwayiway pa chisu wilejina ap wakumanganang kal, mwita Yehova chakwel akukwash kutek manangu mwi ndond. Chikutwish kukukasiken kutek yakamish yey kuns mulong wa kushinshikin pa yom ya mu spiritu, pakwez chid cha usey kusal mwamu. Lembil mulong wa kwit chisambu chikulama muchim wey ni “yitongijok” yey.​—Fil. 4:6, 7. w22.01 29-30 par. 12-14

Mwant Ozias walika kutesh chiyul. Wandama mu kapalikany ka tempel, ndond yandamangau ching kusu kud in kupesh, ni wading ufidin kwosh malash. In kupesh a Yehova amuleja anch: “Kiudiap mudimu weyey, Ozias, wa kwosh diseng dia malash kudi [Yehova], pakwez udi wayen wa in kupesh.” Mutapu ik wasalay Ozias? Anch wading wikepishin, wafanyina kutesh chiyul ni kubudik kapamp kamwing mu tempel. Yehova wafanyina pamwing ap kumulikishin. Pakwez, ‘Ozias . . . wajimana.’ Mulong wak walikay kutesh chiyul? Chimeken anch watonga anch mulong ud mwant, ukutwish kwend kusal yawonsu yikatinay. Pakwez Yehova kamanap yom mu mutapu winou. Mulong Ozias wading mwant mwitambwil, amwasa musong wa mak ni waushala nich “kushik kamu pa dichuku dia rufu rend.” (2 Jsng. 26:16-21) Chilakej cha Ozias chitufundishin anch, chikalap nchik yisend tukweta, anch twalik kutesh yiyul yimedina pa Bibil, tukushadish dilau dia Yehova. w22.02 9 par. 7

Yisu yivud, muntu utakedinau kud ‘wuntu ukur’ ukat kutong ni kusal yom yikwatijadin ni maku mayimp ma mujimbu. (Kol. 3:9) Ukutwish kwikal mwin kwitongin, mwin kujiman swa, wakad kujikitishang, ni mwin chibud. Ukutwish kusanger kutal pornografi ni mafilim mayimp ap ma chisum. Pakad kwidjidjek ukutwish kwikal ni mikadil yimwing yiwamp, ni ukutwish kwifish nich mulong wa yom yiyimp yilondinay ap yisadinay. Pakwez kakwetap kutakaman kwa kuswimp yitongijok ni yaku yend. (Gal. 5:19-21; 2 Tim. 3:2-5) Tud antu akad kuwanyin, chawiy kwikil muntu ap umwing pakach petu ukutwisha kudiosh yitongijok ni yovil yawonsu yiyimp mu muchim ni mu manangu mend. Yisu yimwing, tukutwish kulond ap kusal yom yikutwisha kutunenganesh. (Jer. 17:9; Jak. 3:2) Pakwez anch twadjol wuntu ukur, mikadil ni yisal yiyimp yikututakelap kand. Tukwikal ni wuntu usu ushalijadina kamu ni ukuru.​—Isay 55:7. w22.03 3 par. 4-5

En amakurump, shinshikinany mikadil yiwamp yikwetau akadivar nau anambaz. Etu awonsu tud antu akad kuwanyin; pakwez muntu ni muntu ukwet mikadil tukutwisha kubaz. Chawiy, amakurump akutwish chisu ni chisu kuyikwash akadivar ni anambaz kuswimp yitongijok yau. Pakwez, mud kambuy Paul, amakurump afanyidin kusal usu wa kulik kushinshikin kusu ching pa mazu ap yisal yikutwisha kuyijimesh. Pakwez, chikuwap anch ashinshikin pa rukat rikwetay muntu mulong wa Yehova, kujijaman kwamekeshinay kal mu kumusadin, ni impu yikwetay ya kusal yom yiwamp. Amakurump akata kushinshikin pa mikadil yiwamp ya antu akwau akat kuyikwash akadivar ni anambaz nau kwiyov anch ayikatin kud antu awonsu mu chikumangen. Vurikany anch Yehova kakwitinanyap kwikal awanyidina; pakwez ukwitinany kwikal ashinshamena. (1 Kor. 4:2) Ukutwish kwikal nich kashinsh anch Nzamb usangaredin mudimu wey umusadidina. Yehova kakutwishap ap pakemp ‘kuvuramen mudimu wen ap rukat riumekeshinanya mulong wa dijin diend, piukata kuyikwashany anamakwend a Kristu kudiokal pakur ni katat.’​—Heb. 6:10. w22.03 31 par. 19, 21