Ngond wa 11

Yehova ukat kutukwash mu mitapu yivud. Ukutwish kukukwash kwikuchik kurutu kwa mwin kukupompat. Ukutwish kand kukukwash kuvurik verse muwamp wa kumulej muntu usangaredina kukutesh. Ni ukukwinkish usu wa kudandamen kulejan ap anch watan yikokujol mu teritwar wey. (Jer. 20:7-9) Yehova ukat kutumekeshin kand kuwap kwend kusutin kutufumb chakwel tutwish kusal mudimu wa kulejan. Ku yikumangan yetu ya mukach mwa rubing, tukat kuman yakumenaku, ni akat kutukasikesh chakwel tuyisadina mu mudimu wa kulejan. Kwinsambishin, tukutwish kwov wom wa kusadin yom yisu, pakwez anch twikasikesh kusal mwamu, tukutwish kuman anch yitongijok yiney yiyisangareshin nakash antu a mu teritwar wetu. Akat kutukasikesh kand ku yikumangan ni ku yitentam kupakish mitapu kushalijan ya mudimu wa kulejan twakad kal kusadinangap. Kusal mwamu kukutwish kand kutwakamishaku, pakwez anch twapakish kusal mwamu, Yehova ukutuyukish. w21.08 27 par. 5-6

Mu mukand wayifundinay in Korint, kambuy Paul wayinkisha chiyul cha usey. Kupwa kwa kufund mukand winou, wamutuma Titus kuya kuyital. Musangar mud ik wovay pijikay anch atesha ni kuziyin ku chiyul chend! (2 Kor. 7:6, 7) Amakurump akutwish kwimburij chilakej cha Paul kusutin kusutish chisu pamwing ni ambay nau in Kristu. Mutapu umwing wa kusal mwamu ud kusal usu wa kushik kurutu kwa chisu ku yikumangan mulong wa kusutish mambamb makasikeshina ni antu akwau. Yisu yivud, chitining kwau kachisu kakemp mulong wa kumukasikesh mukadivar ap nambaz udia mu maswir. (Rom 1:12) Mukurump wimburijina chilakej cha Paul ukutwish kand kuyikasikesh ambay nend in Kristu mu kusadin Dizu dia Nzamb ni kuyinkish kashinsh anch Nzamb uyikatin. Ukat kukimb mitapu ya kuyijikitish mulong wa yom yisadinau. Chisu chawonsu mukurump ufanyidin kusadin Dizu dia Nzamb anch ukimbin kupan chiyul. Ukutwish kulond patok chom chimuyudidinay muntu, pakwez ufanyidin kubabel mazu mend, mulong ukatin anch muntu itiy chiyul chend.​—Gal. 6:1. w22.03 28-29 par. 11-12

Nlel Yehova ukat kuyinkish atushalapol end “ukash upandakena ukash wawonsu” chakwel adandamen kumusadin nich kushinshaman. Mutapu umwing ukatua kutukasikesh ud kusutin malembil. Mu mukand wa Efes 6:18, kambuy Paul utukasikeshin kumulembil Nzamb “yisu yawonsu.” Anch twasal mwamu, Nzamb ukutwinkish usu. Yisu yimwing, yakamish yikutwish kutupandiken nakash kushik ni mu chilik cha kukangany kuman yom tukutwisha kumulej Yehova mu malembil. Pakwez Yehova utwitin anch tumulembil ap anch chitukasikedin kuman mazu tukutwisha kusadin mulong wa kumurumburil mutapu twiyovila. (Rom 8:26, 27) Ukat kutukasikesh kusutin Bibil. Paul wakimbang usu ni rongoj mu Mifund, niyetu tukutwish kusal mwamu. (Rom 15:4) Patutangina Dizu dia Nzamb ni kutongijokin pa yom tutangina, Yehova ukutwish kusadin spiritu wend utumbila mulong wa kutukwash kutesh nawamp mutapu yom tutangina yikwatijadina ni milong turishina nich.​—Heb. 4:12. w21.05 22 par. 8-10

Tukwatining nich usey nakash chisend chetu cha kufundish ap anch turishin ni yikokujol yimwing yitukangeshina kwipan nakash mu mudimu wa kulejan mud mutapu tukatina. Yishiken yimwing yikutwish kwikal chikokujol. Chilakej, in kulejan amwing ad amapal, akwau ayedin. Ov, niyey ud pakach pau? Anch mwawiy, Vurik anch twajingunin anch tukutwish kutakel malejan ma Bibil kusutin yom ya elektronik! Chawiy ukutwish kusambish kutakel dilejan dia Bibil pakad kudiokal ku chikumbu. Kud kand kutaninamu kukwau ku kusal mwamu. Antu amwing akatining kwilej Bibil, pakwez chisu chikatau kusut akadivar mu kulejan, awiy kadingap ku yikumbu yau. Pakwez antu inay akutwish kwishadin pamanch nakash ap uchuku. Ov, ukutwish kwipan mulong wa kuyikwash? Vurik anch Yesu wamufundisha Nikodem uchuku, mulong chawiy chisu chading chikatinay Nikodem.—Yoh. 3:1, 2. w21.07 5 par. 10-11

In kwilej a Yohan ashimoka nakash mulong in kwilej a Yesu kajilangap yakudia. Yesu wayirumburila anch in kwilejend kadingap kakweta kuswir kwa kujil yakudia mulong ndiy wading uchid mwom. (Mat. 9:14-17) Pakwez, Afaris ni akankuny akwau a Yesu amufisha nich anch mulong ndiy kadingap kalondwila yishankur yau. Ajimana nakash pokay ayej pa dichuku dia Sabat. (Mar. 3:1-6; Yoh. 9:16) Ading akat kufa mukan anch alimishining Sabat, pakwez oku akat kuyilik antu akat kwisakin kwau mu tempel. Ajimana nakash payifishau nich kud Yesu. (Mat. 21:12, 13, 15) Ni akwau afundishau mu sinagog wa mu Nazaret kud Yesu, ajimana nakash pasadinay Yesu chilakej cha yom yasadika mu Isarel mulong wa kuyilej anch ad in choy ni kakwetap ritiy. (Luka 4:16, 25-30) Antu avud alika kumwitiyij Yesu mulong kasalap yom yading yikatinau antu avud anch asal.—Mat. 11:16-19. w21.05 5-6 par. 13-14

Mutapu umwing utubabeshinay Yehova piur pa kwitutul ni ris ud kusutil kutukasikesh kwilejin ku yilakej ya antu awila mu mipit yiney. Pitukata kwisambin piur pa ris, tukat pamwing ap kumuvurik Satan Djabul. Mulong wading mwangel wa Yehova, chimeken anch Satan wading ni yisend yiwamp yivud. Pakwez kasangerap yom yadingay nich. Wakata anch antu amwifukwil ndiy pa ndond pa kumwifukwil Yehova. Satan ukatin twikala mud ndiy. Chawiy chisadinay usu wa kutubachik kulik kusanger yom tukweta. Wasala mwamu kapamp ka kusambish chisu chambambay ni Ev. Yehova wamwinkisha Ev ni nfumwend yakudia yivud ni yisangareshina ya ku “mitond yawonsu ya mu chir,” kudioshaku kwau mutond umwing. (Dis. 2:16) Pakwez Satan wamudimba Ev mu kumubachik kutong anch ufanyidin kand kudia ku mutond wamujidikau. Ev wakanganya kusanger yom yadingay nich, wakata kwikal ni yivud. Twij nawamp yibudikin yikalaku. Ev wasala chitil, kupwa wafa.​—Dis. 3:6, 19. w21.06 14 par. 2-3; 17 par. 9

Afanyina kuval an ni kulam kand nawamp divu. Anch aziyina ni kusal yom yayitau kud Nzamb, Adam ni Ev pamwing ni anau, afanyina kudandamen kwikal mu dijuku dia Nzamb chikupu. Adam ni Ev ading ni ndond ya usey nakash mu dijuku dia Yehova. Kukwatijan ni Kuseng 8:6, David walonda piur pa muntu anch: “Yey wamutanga muntu kwikal mwishin [mwa angel] pakemp kusu, ukat kumudjik chibangul cha uyaj ni kulim.” Chakin kamu, antu kayinkishap usu, manangu, ni ukaliweny mud ukwetau angel. (Kus. 103:20) Pakwez, ad kwau ‘mwishin pakemp kusu’ pantaliken ni angel, yitang yikweta usu. Cha ushon, Adam ni Ev ashadisha ndond yau mu dijuku dia Yehova. Chinech chaletisha yibudikin yiyimp pad anau. Pakwez chitongijok cha Yehova chaswimpap. Ukatin anch antu amuziyidina ikal anend chikupu. w21.08 2-3 par. 2-4

Nlel in kumwifukwil Yehova avud arishin ni rupompat. Chilakej, amwing ashich mu jingand mukangeshinau mudimu wetuni akat kuyikas, ni “[kuyitwal] kurutu kwa anyikel ni ant” mulong wa kupan uman kud awiy. (Mat. 10:17, 18) Atuman akwau arishin ni rupompat ra mutapu ukwau. Ashich mwi ngand mumusadidinau Yehova pakad chikangesh, pakwez adandamedin kurish ni rupompat ridiokila kud antu a mu majuku mau akwatina mupak wa kuyikangesh kumusadin Nzamb. (Mat. 10:32-36) Yisu yivud, in kuyipompat anamakwau adia Atuman akat kwimik kusal mwamu anch aman anch usu usadinau mulong wa kuyiziyish ud kwau wa chamwamu. Ni yisu yikwau, antu ading in rupompat akweta chisum ashikena kwikal Atuman akweta mushiku. Anch akupompat, kangal waziy! Ikal utakamena. Yehova ud ku mutambu wey ni ukukukwash ni spiritu wend utumbila, chawiy ukwetap mayingishin ma kwov wom! w22.03 16 par. 8

Bibil ulejen anch Yehova ukisin “mwin kutal kwa kwibaz, rudim ra makasu, makas makata kumwang mash mayingila.” (Jnsw. 6:16, 17) Chikwau kand, “[uyikisin] in kumwang mash ni in kudimban.” (Kus. 5:6) Yehova ukisining nakash yaku ni yisal yiney, chawiy chayisheshay antu ayimp awonsu pa chirung cha Nowa mulong izwisha chisum pa divu. (Dis. 6:13) Chikwau kand, kusutin muprofet wend Malakiy, Yehova walonda anch ukisin antu akata kukimb kujip uruw ni ambay nau akad mulong. Nzamb kitiyap difukwil diau ni ukuyirumburish mulong wa yaku yau. (Mal. 2:13-16; Heb. 13:4) Yehova ukatin anch “[tukis] yom yawonsu yiyimp.” (Rom 12:9) Dizu ‘kukis’ dimekeshin yovil yikash; dirumburikin kuchidiosh kamu chom ku muchim, kuchiman mud chitakanen. Chawiy, tufanyidin kwiyov nayimp piur pa yitongijok ya kusal chom chilondinay Yehova anch chid chiyimp. w22.03 4-5 par. 11-12

Piswimp ap, Tatukwetu wa mwiur ukutuyukish chipandikena kusutin Want wend. Antu adandamedina kumuchingel Yehova akutambul yiyukish yivud kusambish nlel djat kamu mu mangand masu mezina. Chisu chikwandamau antu a Nzamb mu mangand masu, kakujijamenap kand yakamish yikwau ni yikokujol yirishinau nich nlel. Kuburen kutentam kukwikalapaku kand, ni kusansan kukupwa. (Kuj. 21:4) Tukuchingelap kand nich yakamish yom tuswirikedina, mulong kukwikal yom yivud nakash. (Kus. 72:16; Isay 54:13) Yid chakin yiyukish yipandikena kuwap! Mu chisu chinech, Yehova ukat kutufundish mulong wa kushakam mwinshin mwa winyikel wend kusutin kutukwash kurishikish yaku yiyimp ni kukudish mikadil ya Nzamb. Kangal washadish ruchingej, ni kangal waziy. Yom yiwamp yikat kwez! Pituchingedina yiyukish yiney, tulamany amboku musangar wetu patumuchingedina Yehova nich kushimpish muchim chakwel awanyish yom yatukanay! w21.08 13 par. 17-19

Chisu chikemp kupwa kwa kutambul mukand wa kambuy Paul, in Kristu a mu Yudeya afanyina kusha yikumbu yau, midimu yau, ni anamakwau akad kwitiyij, ni chading chiyitin ‘kuchinin ku mikandu.’ (Mat. 24:16) Pa chisu chinicha, kwading kamu maswir nakash kupandakan ma kukwashijan umwing ni mukwau. Anch ateka chiyul cha Paul cha kwanganijan yom yadingau nich umwing ni mukwau pa ndond ya kusambish, chafanyina kuyiswapel kwijidin mashakamin masu. Akadivar ni anambaz netu kakutwishap kutwijikish chisu chawonsu maswir mau. Ikal uswakela kusejin mulong wa kukwit ukwash. Pakad kwidjidjek, uyij akadivar ni anambaz adia mu chikumangen chen akweting chaku cha kuyikwash akwau. Kakatap kumekesh anch tuyishindidin kutukwash. Twij anch tukutwish kuyichingejin anch twikal mu maswir, ni tukatin niyetu kwikal mud awiy! w22.02 23 par. 13; 24 par. 14-15

Mivu yasutina ey, kwading kuswimp kwa yom pantaliken ni yikumangen ni minyingumuku yivud. Anch atulej kuya mu chikumangen chisu, chikutwish kutukasiken pamwing ap kuyisha arund ni dijuku dietu. Ov, Nzamb ndiy ukata kuyilej amakurump chikumangen ni chikumangen chifanyidinau kumutum mwin kulejan mwawonsu? Bwat. Ni chinech chikutwish kutukasiken kuziyin ku umutakel utwinkishinau. Pakwez Yehova uyichingejidin amakurump chakwel akwat mipak mud yiney, chawiy niyetu tufanyidin kuyichingejin. Mulong wak tufanyidina kuziyin umutakel wa amakurump ap anch ukwatijadinap kamu ni yom twading tukatina? Mulong anch twasal mwamu, tukulam uumwing udia pakach pa antu a Nzamb. Chikumangen chikat kuya kurutu anch antu awonsu alondul nich kwikepish mipak yikwatinau mu chisak cha amakurump. (Heb. 13:17) Cha usey kupandikan, tumekeshin kud Yehova anch tumuchingejidin kusutin kusal mu kwovijan nau antu achingejidinay mulong wa kutulam.​—Mid. 20:28. w22.02 4-5 par. 9-10

Anch ud mukadivar wabatishinau kal, ukuwish kudandamen kusal usu wa kuwapish ukaliweny wey wa kufundish ap wa kusal ma diskur. Mulong wak? Mulong anch wasal usu nakash wa kwikal mwin kutang, mwin kusal madiskur, ni mwin kufundish muwamp, ukwikal ni mutapu wa kuyikwash antu akukutesha. (1 Tim. 4:15) Sal usu wa kwitekin mupak wa kwilej ni kusadin dilejan ni dilejan dia mu broshir Ipana mu Kutang ni mu Kufundish. Ileja dilejan diawonsu pa kapamp kamwing, iyijidisha nawamp ku chikumbu, ni ikasikesha kudisadin anch akwinkish chikunku ku chikumangen. It yiyul kud mwin kuyulan nkwash ap kud amakurump akwau akata kusal usu nakash wa “kurumburil rusangu ruwamp ap akata [kufundish].” (1 Tim. 5:17) Kangal wakimb ching kusu kwov kurumburik kwa dilejan, pakwez sal kand usu wa kuyikwash antu akukutesha kukasikesh ritiy rau ap kuyikasikesh chakwel akwata mupak wa kusadin yom yikwilejau. Anch wasal mwamu, ukwikal ni musangar nakash ni antu akukutesha akwikal niyau ni musangar. w21.08 24 par. 17

Anch twayiman akwetu mud atupandikenamu, tukusambishap kubambil ni akadivar nau anambaz akweta pamwing ap ukaliweny wa kusal yom kutusutamu etu. Pa ndond pa kusal mwamu, tukusanger yom yisadinau. Pakampwil anch asadin ukaliweny winou mulong wa kumusadin ni kumushiman Yehova. Mud chibudikin, etu awonsu tukukasikesh chisambu ni uumwing mu chikumangen. Tukutwish kwipuk mukau anch twakudish mwikadil wa kwijik mimbu yetu. Anch twij mimbu yetu, tukukimbap kumekesh anch tukwet ukaliweny ap twij kusal yom kuyisutamu akwetu. Pakwez tukusal usu wa kwimburij chilakej cha akadivar nau anambaz atusutinamu. Chilakej, anch mukadivar ukat kusalang madiskur mawamp nakash mu chikumangen, tukutwish kumwipul chakwel atulejaku yom yikatay kusal mulong wa kurijek diskur. Anch nambaz wij kwisuk nakash, tukutwish kumwit chakwel atufumbaku niyetu. w21.07 16 par. 8-9

Mu buku wa Kuchind Michid, tutangin anch Yehova wapana mbil ya kumujip mwin Isarel wachaya nkuny pa dichuku dia Sabat. Mu buku wa kaad wa Samwel, alejenamu anch mu kusut kwa yitot ya mivu, Yehova wamulikishina Mwant David chitil chend cha masandj ni cha kujipan. (Kuch. 15:32, 35; 2 Sam. 12:9, 13) Tukutwish kwiyipul anch: ‘Mulong wak Yehova wamulikishina David wasala chitil cha kujipan ni masandj, pakwez wapan mbil ya kumujip ikundj umwing mulong wa kurumbuk kwading kumekena kwau mud kwa usweral mwamu?’ Yisu yawonsu Bibil kakatap kulejan yom yawonsu piur pa rusangu kanang. Chilakej, twij anch David wakarumuka kamu chakin ku yisal yend yiyimp. (Kus. 51:2-4) Pakwez, ov, mutapu ik wadingay muntu wajipa chijil cha Sabat? Ov, wanenganana mulong wa chisal chend chiyimp? Ov, wading wabwambwilap kal kand ku yijil ya Yehova pasak? Ov, wakwata kwend nich kapipej ap kubwambwil ku kubabesh kwamulejau? Bibil kalondinap chom pa mulong winou. Pakwez, twij yom yivud piur pa Nzamb wetu yitwinkishina kashinsh anch Yehova “uding utentamina mu yisalijok yend yawonsu.”​—Kus. 145:17. w22.02 2-3 par. 3-4

Muntu wija mimbu yend, kakatap kusot kusal yom yakadiay kwikal ni mutapu wa kusal. Mud chibudikin, ukat kulam musangar wend ni kudandamen kusal mudimu. Tukutwish kumufanikesh muntu wija mimbu yend ni shofer ukaninikina mukandu ni motak. Mulong wa kukaninik mukandu, shofer ufanyidin kutek vites wa mwinshin. Chakin, motak ukuyap mau nakash, pakwez ukudandamen kukaninik pakemp pakemp. Chilik chimwing, muntu wija mimbu yend wij chisu chifanyidina kusadin “vites wa mwinshin” mulong wa kudandamen kumusadin Yehova ni kwikal ni yibudikin yiwamp. (Fil. 4:5) Shinshikin chilakej cha Barizilay, wading ukweta mivu 80 chisu chamutazukau kud Mwant David mulong wa kusadin mu chipang. Mulong wading wij mimbu yend, Barizilay kitiyap. Mulong wading wij mimbu yend, wita chakwel pa ndond yend amutekap Kimiham, wading uchidia nsand. (2 Sam. 19:35-37) Mud Barizilay, akadivar ananapa kal akat kusanger kuyinkish ansand yisend. w21.09 10 par. 6-7

Ov, chikukasikedin kumuman Yehova mud Tatukwey wa rukat? Amwing pakach petu chiyikasikedin. Anch tatuku watuvala wading mukachisum, chikutwish kutukasiken kutongin mutapu udingay tatuku wa rukat. Chid chikasikeshina nakash kwijik anch Yehova wij nawamp mutapu twiyovila! Ukatining kwikal netu piswimp. Chawiy chitukasikeshinau mu Dizu diend anch: “Sejany piswimp kudi Nzamb, chad niyend ukusej piswimp ni yenen.” (Jak. 4:8) Yehova utukatin ni utulejin anch ukwikal Tatuku upandikenamu atatuku awonsu kuwap. Yesu ukutwish kutukwash kwikal piswimp ni Yehova. Yesu umwij Yehova nawamp ni wamekesha mikadil ya Nzamb mu mutapu uwanyidina, chawiy chalonday anch: “Muntu mwawonsu wanmena kal am, wamumen kal Tatuku.” (Yoh. 14:9) Mulong Yesu ud mud yayetu, watufundisha mutapu wa kumulimish ni kumuziyin Tatukwetu, mutapu wa kwipuk kumunenganesh, ni mutapu wa kwikal ni dilau Diend. Mashakamin ma Yesu pa divu mamekesha patok anch Yehova ud mwin rukat ni mwin riy. w21.09 21 par. 4-5

Antu a Yehova amwifukwidin Nzamb umwing wakin pamwing mu chisambu. Yehova wayinkishin kal amakurump chisend chijim cha kulam chikumangen chishitwila. Anch mwin Kristu wasal chitil chijim, Yehova uyitin amakurump kushinshikin anch chitin kumulam muntu winou mu chikumangen ap bwat. Chikwau kand afanyidin kushinshikin mulong wa kuman anch muntu ukarumukin kamu chakin ku chitil chend. Muntu ukutwish kulond anch ukarumukin, pakwez ov, ukisin kamu chakin uyimp wasalangay? Ov, wakwatin mupak wa kulik kuchirikinap kand chitil chinech? Anch arund ayimp awiy amushikijina ku kusal chitil, ov, wakwatin mupak wa kuyilik arund inay? Amakurump akumulembil Yehova mulong wa kushinshikin yom yasalangay muntu ni yom yilondinay Bibil, ni kushinshikin mutapu wovilay muntu warumbukang pantaliken ni chitil chend. Kupwa akutwish kukwat mupak wa kuman anch muntu wasalang chitil ukutwish kushal mu chikumangen. Yisu yimwing, akutwish kumwopat muntu wasalang chitil.​—1 Kor. 5:11-13. w22.02 5 par. 11-12

Chikal atubatishin kal pasut kal chisu chikemp ap mivu yivud, etu awonsu tukatin kwikal ni wuntu ukatinay Yehova. Mulong wa kwikal ni wuntu wa mutapu winou, tufanyidin kushinshikin manangu metu. Mulong wak? Mulong yitongijok yetu yawiy yikata kutakel wuntu wetu. Anch twasambish kutongijokin chisu chawonsu pa maku mayimp ma mujimbu, tukutwish kulond ap kusal yom yiyimp. (Efes 4:17-19) Ku mutambu ukwau, anch twizwish manangu metu ni yitongijok yiwamp, tukutwish kulond ni kusal yom mu mutapu musangareshina Tatukwetu Yehova. (Gal. 5:16) Chawiy, tukutwishap kukangesh yitongijok yawonsu yiyimp kwandam mu manangu metu. Pakwez tukutwish kukwat mupak wa kulik kusal yom kukwatijan ni yitongijok mud yiney. Kurutu atubatisha, tufanyidin kwipuk kulond ni kusal yom yikisinay Yehova. Winou ud mupak wa kusambish wa usey kupandakan mulong wa kudjol wuntu ukur. Mulong wa kumusangaresh Yehova chipandakena, tufanyidin kand kudjal wuntu usu ni kuulam. w22.03 8 par. 1-2

Chidiap chiswapela kud amakurump kujingunin anch muntu wasadina chitil chikash ukarumukin kamu chakin. Mulong wak? Mulong amakurump kakatap kutang mu muchim, chawiy afanyidin kushinshikin uman umekeshina kamu patok anch mukadivar nau wilejin kukis yom yasadinay. Chawiy amakurump akuswiriken kuman anch chakin kamu muntu wasadina chitil waswimpin yitongijok ni mwikadil wend. Chikutwish kumwit ikundj winou chisu chilemp chakwel amekesha anch ukarumukin. Chakwel amekesh anch ukarumukin chakin kamu, muntu wopatangau ufanyidin kudandamen kwez ku yikumangan, ni kulondul yiyul ya amakurump ya kwikal ni chaku cha kulembil ni kwilej Bibil. Ufanyidin kand kusal usu wa kwipuk yom yamubachika kuwil mu chitil chinech. Anch wasal usu wa kuchirish urund wend ni Yehova, ukutwish kwikal nich kashinsh anch Yehova ukumulikishin kamu ni amakurump akumuchirish mu chikumangen. w21.10 6 par. 16-18

Mulong wading umukatin Yehova nakash, Yesu wamwifukwila ching Yehova chisu chadingay mwiur ap chisu chezay pansh. (Luka 4:8) Wayifundisha in kwilejend niyau kusal mwamu. Yesu ap in kwilejend ashinshamena kasadinap yifatul mu difukwil diau. Mulong Nzamb ud spiritu, kwikil chom ap chimwing tukutwisha kusal chifanakena ni ndiy! (Isay 46:5) Pakwez chid nchik piur pa kusal yifatul ya antu atazukinau anch ansant mulong wa kuyilembil? Mu chijil cha kaad cha yijil dikum, Yehova walonda mazu ma mufund wa nlel. Antu awonsu akatina kumusangaresh Yehova ij anch kafanyidinap kwifukwil atupwany. Antu avud ileja nsangu ja pakur ajingunina anch in Kristu a mu mivu chitot ya kusambish ading kumwifukwil ching Nzamb. Nlel Atuman a Yehova alondwil chilakej cha in Kristu a mu mivu chitot ya kusambish. w21.10 19-20 par. 5-6

Yesu wayibabesha in Kristu a mu mivu chitot ya kusambish ading ashicha mu yudeya anch kukwikal chisu chimwing “amasalay [akuwombamu] musumb wa Yerusalem.” (Luka 21:20-24) Anch yom yiney yashiken, ading afanyidin ‘kuchinin ku mikandu.’ Kuchin kwafanyina kupandish mwom yau, pakwez chafanyina kuyikasiken nakash kusha yom yau. Pasut kal mivu yikemp, Chinong cha Kalam charumburila pa mulong winou anch: “Asha yir ni yikumbu yau, pakad ap kukungamejin yom yau mu yikumbu. Ateka difukwil dia Yehova pa ndond yakusambish, ni adikwata nich usey mulong ading nich kashinsh anch Yehova ukuyiking ni kuyikwash.” Chalonda kand anch: “Kukutwish kushiken yikokujol yikutwisha kumekesh mutapu tumena yom ya ku mujimbu; ov, yawiy yikwikala yom ya usey nakash bil anch dipandish tukutambula mulong tud ashinshamena kud Nzamb? Chakin kamu, kuchin kukutwish kumekan mud chom chikash ni kukutwish kutukangesh kwikal ni yom yimwing. Chikutwit kwikal aswakela kusha yom yawonsu.” w22.01 4 par. 7-8

Chisu chikemp kupwa kwa in Isarel kubudik mu Idjibit, Yehova wiyijikisha amwinend kurutu kwa Moses kusutin kumulej Dijin diend ni mikadil yend. Walonda anch: “[Yehova, Yehova], Nzamb wa ranaken ni mwin riy, wakad kwovang ujim swa, wizwila sens nich rukat rudimukina ni uyakin, ukata kumekesh rukat rend rudimukina ku tunan ni tunan twa antu, ukata kulikishin kurumbuk, ni kuyip, ni yitil.” (Kub. 34:6, 7) Mu mazu minam masangareshina malejena mikadil yend, Yehova wamujingunina Moses chom chimwing cha pakampwil piur pa rukat Rend rishinshamena. Chom ik? Yehova kalondap anch ukwet kwend kusu rukat rudimukina, pakwez walonda anch ud “wizwila sens nich rukat rudimukina.” Mazu minam amachirikidin tupamp musamban ni kusut mu Bibil. (Kuch. 14:18; Neh. 9:17; Kus. 86:15; 103:8; Jow. 2:13; Yona 4:2) Ni pa ndond pawonsu pamajimbwilau, mamutadin ching kusu Yehova, kadiap an a antu. Ov, chitushimokishinap pa kuman anch Yehova amwinend ukasikeshidin nakash pa mwikadil wend wa rukat rishinshamena? w21.11 2-3 par. 3-4

Ambay a uruw akutwish kwilejin yivud ku chilakej cha kambuy Pita ni mukajend. Piswimp angond musamban ap muvu umwing kupwa kwa kutanijan ni Yesu kapamp ka kusambish, chamwita kukwat mupak wa usey. Pita wasalang mudimu wa kuta ansh mulong wa kuwanyish maswir mend. Chawiy Yesu pamutazukay Pita chakwel amulondul chisu chawonsu, wading ufanyidin kutongijokin pa mukajend kurutu kwa kukwat mupak. (Luka 5:1-11) Pita watonda kumutwalaku Yesu mu mudimu wa kulejan. Ni chimeken anch mband a Pita witiya mupak wend. Bibil ulejen anch kupwa kwa Yesu kuvumbuk, mband a Pita wamutwalaku nfumwend mu maweny ma mudimu. (1 Kor. 9:5) Pakad kwidjidjek, chilakej chend chiwamp mud mband mwin Kristu chamukwasha Pita kupan yiyul patok kud amakundj ni amband in Kristu. (1 Pita 3:1-7) Chid chakin anch Pita ni mukajend achingejina mu kushilamu kwa Yehova anch Ndiy ukuyiwanyishin maswir mau anch atek yisakin ya Want pa ndond ya kusambish mu mwom wau.​—Mat. 6:31-34. w21.11 18 par. 14

Kambuy Paul wading uyikatin akadivar nend. Wasala mudimu wa usu nakash mulong wa kuyikwash. (Mid. 20:31) Yawiy yom yasala anch ambay nend in Kristu amukata nakash. Chisu chimwing, pajinguninau amakurump a mu Efes anch kakezap kand kumuman, “adila.” (Mid. 20:37) Chilik chimwing, amakurump asadin mudimu nakash, ayikatin nakash akadivar ni anambaz nau, ni akat kusal usu mulong wa kuyikwash. (Fil. 2:16, 17) Pakwez, yisu yimwing amakurump niyau akat kurish ni yikokujol. Yom ik yikutwisha kuyikwash kupandakan yikokujol yiney? Amakurump akata kusal mudimu nakash akutwish kushinshikin chilakej Paul. Wading niyend muntu wakad kuwanyin mud etu, ni wakanganya yisu yimwing kusal yom yitentamina. (Rom 7:18-20) Ni wading urishin ni milong yikash kushalijan. Pakwez Paul kaziyap ap kushadish musangar wend. Anch amakurump amwimburij Paul, akutwish kupandakan yikokujol yirishinau nich ni kulam musangar wau pamusadidinau Yehova. w22.03 26 par. 1-2

In Levi 19:3 ulejen kulimish Sabat. In Kristu kadiap mwinshin mwa chijil, chawiy tukwetap kuswir kwa kulimish Sabat wa pa rubing. Chikalap nchik mwamu, tukutwish kwilej yivud kusutin mutapu in Isarel walimishangau Sabat ni mutapu watanyinangawamu. Sabat diading dichuku dia kwiswedish ku midimu ya pichuku pichuku ni kubangin yom ya mu muspiritu. Chawiy chayilangay Yesu mu sinagog pa dichuku dia Sabat mu musumb wend wa chivadik mulong wa kutang Dizu dia Nzamb. (Kub. 31:12-15; Luka 4:16-18) Kubabesh kwa Nzamb kudia mu In Levi 19:3 kulejena ‘kulimish sabat’ kufanyidin kutubachik kuland chisu mu mijikit yetu ya pichuku pichuku mulong wa kushinshikin pa yom ya muspiritu. Ov, umen anch ufanyidin kuswimp yom kanang mulong wa kuziyin kwi mbil yiney? Anch wikal ni chaku cha kwitekin chisu cha kushinshikin pa yom ya muspiritu, ukukudish urund wa piswimp ni Yehova, chom chidia cha usey mulong wa kwikal atumbila. w21.12 5 par. 13

Padingay pa divu, Yesu wasutishang chisu pamwing ni antu a mitapu yin yawonsu. Wadangang pamwing nau ampich ni antu akweta usu, pakwez wasutisha kand chisu chivud nakash pamwing nau atuzwendj ni antu ading ameshinau mar. Chikwau kand, wayovilang riy antu atazukangau kud antu avud anch “in yitil.” Yom yiney yasalay Yesu yayipwakesha antu amwing ading ikwatina anch ad atentamina. Ayipula in kwilej a Yesu anch: “Ov, mulong wak udilanya ni kuna pamwing ni in kulambwish yitad ni in yitil?” Chawiy Yesu wayakula mazu ma mufund wa nlel. (Luka 5:29-31) Mivu yivud kurutu Mesia eza, muprofet Isay wasambela kulejan anch kakumwitiyijap kud antu. Uprofet winou walejana anch: “[Amudiurola ni kumulik kud antu] . . . kwikil muntu ap umwing wamubangaku, ap kumutalaku.” (Isay 53:3) Mesia afanyina kumulik ‘kud antu,’ chawiy in Yuda inay a mu mivu chitot yakusambish ading afanyidin kutek mu manangu anch Yesu kakumwitiyijap. w21.05 8-9 par. 3-4

In Kristu amwing a mu mivu chitot ya kusambish ading alabijokin kusadin yiyul. (Jak. 1:22) Akwau amekeshang kasolikany pantaliken nau atuzwendj. (Jak. 2:1-3) Akwau kand chading chiyikasikedin kushinshikin mazu malondinau. (Jak. 3:8-10) In Kristu inay ading ni milong yikash, pakwez Jakobu wading ukwet kashinsh anch akutwish kuswimp. Wapana chiyul chend mu mutapu uwamp, pakwez patok, ni wayikasikesha antu ading ni milong ya mu spiritu kukimb ukwash kud amakurump. (Jak. 5:13, 14) Dilejan: Shinshikin mutapu udia yom, pakwez ikal ni chitongijok chiwamp piur pa antu akwau. Chikutwish kuyikasiken antu avud twilejining nau Bibil kusadin yom yilejinau. (Jak. 4:1-4) Chitin chisu mulong wa kulikap yaku yiyimp ni kuyiswinkesh nich mikadil ya win Kristu. Chitwitin kutakaman mulong wa kuyilej in kwilej etu yom yifanyidinau kuswimp. Tukwet kand kuswir kwa kudandamen kulam chitongijok chiwamp ni kuchingej anch Yehova ukuyisejish antu ikepishina kud ndiy ni ukuyinkish usu wa kuswimp mu mwom yau.​—Jak. 4:10. w22.01 11 par. 11-12

In Kristu awonsu akat kusal usu wa kwimburij riy ra Yehova. Mulong wak? Diyingishin did anch Yehova kakutwishap kuyitesh antu alikining kuyovil akwau riy. Nany wa pakach petu ukatina anch Yehova alik kutesh malembil mend? Chawiy tufanyidin kusal usu wa kwipuk kukudish muchim wakad riy. Pa ndond pa kujik matu metu mulong wa kulik kumutesh mbay netu mwin Kristu udia mu mar, tufanyidin kusal usu wa kutesh “kudil kwa kazwendj.” Chilik chimwing, tukat kusal usu wa kusadin chiyul ech: “Muntu mwawonsu wakad kuyovil antu akwau riy, Nzamb ukez kumurumburish niyend wakad kumwovil riy.” (Jak. 2:13) Anch twavurik nich kwikepish anch tukwet kuswir kwa kutwovil riy, niyetu tukukat kwovilan riy. Tufanyidin kumekesh riy anch amuchirish mu chikumangen muntu wasala chitil chad wakarumuk. Yilakej yidia mu Bibil ya antu adinga ni riy ni ranaken yikutwish kutukwash kwikal in riy ni kwipuk chisum. w21.10 12 par. 16-17

Uchuku wa nsudien wa mwom wend panap pa divu, ni pashikay kwinsudien kwa mudimu wend, Yesu wakimba ndond yikuchikina mulong wa kutongijokin ni kulembil. Watana ndond yiney mu chir cha Getiseman. Pa chisu chinicha, Yesu wayinkisha in kwilejend chiyul cha usey nakash piur pa malembil. Pashikau mu chir cha Getiseman, kwading kwajalang kal nakash, pamwingap mu mapep ma uchuku. Yesu wayileja atwimbuy ‘kuchish ku mes,’ ni waya kulembil. (Mat. 26:37-39) Pakwez pading palembilay, atwimbuy asambisha kuzel tul. Payitanay alalang kal, Yesu wayikasikesha kand anch “chishany ku mes, chad [dandamenany kulembil].” (Mat. 26:40, 41) Wajingunina anch ading iyakamishin nakash ni ading aziyang kal. Nich ranaken, Yesu wamana anch ‘mujimbu wa mbij uziyin.’ Pakwez, Yesu wachirika kand tupamp tukwau twad mulong wa kulembil, ni pachirikangay wayitanang in kwilejend idjubulang kal mu tul pa ndond pa kulembil.​—Mat. 26:42-45. w22.01 28 par. 10-11