Ngond wa 10

Mafundish ni yitiyij yetu yidiokil mu Bibil. Pakwez antu avud akat kulik kutesh uruu wetu, mulong tukusalangap yom yikata kuyishimokish antu ni tukatap kufundish yom yikatinau awiy kutesh. Yom ik tufanyidina kusal mulong wa kulam ritiy? Kambuy Paul wayileja in Kristu a ku Rom anch: “Ritiy rikat kudiokal ku yom yikat kuteshau, akat kutesh pakat kulondau in kurumburil rusangu ruwamp ra Kristu.” (Rom 10:17) Chawiy tukat kukasikesh ritiy retu kusutil kwilej Mifund, kadiap kusutil kwiyandjik mu yisal ya chirelijon yakad kukwatijan ni Mifund, ap anch yom yiney yimeken mud yiwapin ni yitusangareshin. Tufanyidin kukasikesh ritiy retu kusutin ronganyin rakin, mulong “wakad ritiy muntu kakutwishap kumusangarish Nzamb.” (Heb. 11:1, 6) Chawiy, tukwetap kuswir kwa kuman chijingidij cha mwiur cha pakampwil mulong wa kwikal chad nich kashinsh anch tud mu uyakin. Kushinshikin nawamp mafundish ma Bibil makasikeshina ritiy kwawiy kukutwisha kutwinkish kashinsh anch komb tud mu uyakin ni kutukwash kwipuk kwidjidjek kwawonsu. w21.05 4-5 par. 11-12

Kambuy Paul warisha ni yikokujol yivud. Wading ukwet kuswir kwa kumukasikesh, pakampwil pamubulau, pamwasau mayal, ni pamutekau mu rukan. (2 Kor. 11:23-25) Paul amwinend witiyina anch yisu yimwing warishang nakash mulong wa kupandikan kuziy. (Rom 7:18, 19, 24) Wajijamena kand mayej mafanikeshay ni “rubwambu . . . mu mujimbu,” ni wading ukatin anch Nzamb amudioshar. (2 Kor. 12:7, 8) Yehova wamwinkisha Paul usu wa kudandamen kulejan chikalap nchik yikokujol yading yirishinay nich. Shinshikin yom yasalay Paul. Chilakej, chisu chamutekau mu rukan mu chikumbu ku Rom, wadandamena kulejan nich mushiku kud antakel a in Yuda ni pamwing ap kand kud antakel ading akweta ulabu mu want wa Rom. (Mid. 28:17; Fil. 4:21, 22) Wapana kand uman kud Atulam a ku Chikumbu cha Mwant ni kud antu awonsu ading ezina kumutal. (Mid. 28:30, 31; Fil. 1:13) Pa chisu chinicha, pawiy pafunday kand Paul mikand yidandamedina kutukwash djat ni nlel unou. w21.05 21 par. 4-5

Mulong Mwant Ozias wikala mwin kwitutul, walika kutesh chiyul ni wasala yom yakadiay kwikal ni mbil ya kusal. Ozias wading ikundj chifuvu. Wawina njit jivud. Watunga misumb ni wading ni yir yivud. “Nzamb wamuyukisha kupandakan.” (2 Jsng. 26:3-7, 10) Pakwez Bibil ulondin anch: “Chikalay . . . nich usu uvud, muchim wend wibaza kwa kujiy.” Yehova wading wapanin kal mbil anch ching in kupesh awiy ading ni mbil ya kwosh malash mu tempel. Pakwez Mwant Ozias kalimishap mimbu yend, ni waya kwosh malash mu tempel. Yehova kasangarap ni wamwasa ikundj winou mwin kwitutul musong wa mak. (2 Jsng. 26:16-21) Ov, niyetu tukutwish kufa mu mupit wa kwitutul, mud mwafayamu Ozias? Mwaning, chikutwish kutushiken anch twashinshikin kupandakan pa ukaliweny tukweta. Tufanyidin kuvurik anch Yehova ndiy utwinkishina ukaliweny wawonsu tukweta ni yisend yawonsu tukweta mu chikumangen. (1 Kor. 4:7) Yehova kakutusadinap anch tud in kwitutul. w21.06 16 par. 7-8

Yesu wading wij anch in kwilejend kakudandamenap kutan yibudikin yiwamp mu mudimu wau. Chawiy, twijap antu inch ikala in kwitiyij pakach pa antu alejau kud in kwilej a Yesu. In kwilej ading afanyidin kwov musangar, kadiap mulong wa yom yasalau, pakwez cha usey nakash pa kwijik anch Yehova wading usangaredin usu wasalau ni mushiku wau. Anch twashal ajijamena mu mudimu wetu, tukutambul mwom wa chikupu. Anch twasal usu wetu wawonsu mulong wa kulejan ni kufundish rusangu ruwamp, tukat kand ‘kukun mulong wa spiritu’ mulong tukat kwitiyij chakwel spiritu utambula wa Nzamb asala mudimu mu mwom wetu. Anch twasal usu wa kulik “kuziy” ap “kulikumwish makas,” Yehova utukanin anch tukwangul mwom wa chikupu, ap anch kandikal tumukwashap muntu ap umwing kushiken ku dibatish.—Gal. 6:7-9. w21.10 26 par. 8-9

Dichuku dimwing, Yesu nau in kwilejend ading aziyang kal kupwa kwa kulejan nakash. Ading akimbin ndond ya kupimin, pakez kukashimuk chisak cha antu chashika. Yesu wayovila riy ni wasambisha kuyifundish “yom yivud.” Yesu witeka pa ndond ya antu inay. Wamana mutapu wading umenau mar​—mutapu wading ukwetau kuswir kwa ruchingej—​ni wakata kuyikwash. Wawiy kand mutapu udiau antu nlel. Mutapu umekenau ku mes kangal wakudimb. Ad mud amikoku apalangena akad ruchingej ni akad kafung. Kambuy Paul walejana mutapu udiau antu inay palonday anch kakwetap Nzamb ni kakwetap ruchingej. (Efes 2:12) Anch twashinshikin mwikadil wa mu spiritu wa antu a mu teritwar wetu, rukat ni ranaken yikutubachik kuyikwash, ni mutapu uwamp wa kuyikwash ud kusutin kuyit chakwel twilej nau Bibil. w21.07 5 par. 8

Muntu mwin kwitongin nakash uding mwin kwitutul ni mwin choy. Muntu mwin mukau kakatiningap kusu kwend ching kwikal ni yom yikwetay mukwau, pakwez ukatining kand anch ing mukwau washadishang yom yikwetay. Chakin kamu, mukau rid rikis. Yaku yiney yiyimp, kwitongin ni mukau, tukutwish kuyifanikesh nich yishoku yidia mu kasarony wa avion. Avion ukutwish kwend kutumbuk nawamp, pakwez yishoku yidia mu kasarony yikutwish kwishil mu miyeng ya kasarony, ni chinech chikutwish kumuwishikish avion. Chilik chimwing, muntu ukutwish kwend kumusadin Yehova mu chisu kanang. Pakwez anch ud mwin kwitongin ni mwin mukau, ukuwa. (Jnsw. 16:18) Ukwimik kumusadin Yehova, ni chinech chikutwish kumusal ndiy ni antu akwau nayimp. Tukutwish kurishikish mwikadil wa kwitongin anch twadandamen kuvurik chiyul chapanay kambuy Paul anch: “Kangal wasalany yom mulong wa kwitong ayinen ap mulong wa kwibaz, pakwez ikepishany, muntu ni muntu amumana mukwau mudi udi muwamp kumupandikanamu.”​—Fil. 2:3. w21.07 15 par. 6-7; 16 par. 8

Antu amwing akat kutong anch relijon wakin ufanyidin kwakul ku chipul chin chawonsu, ap anch yipul yiney yikwetap kamu yakul mu Bibil. Ov, chitwishidikin kamu? Shinshikin chilakej cha kambuy Paul. Wayikasikesha ambay nend ‘kushinshikin yom yawonsu,’ pakwez walonda kand anch kwading yom yivud yading yakad kuteshay. (1 Tes. 5:21) Wafunda anch: “Chiyukish chetu cha ronganyin kichiwanyidinap mulong kitwijap yom yawonsu,” kupwa walonda kand anch “tukat kuman yom ya Nzamb mudi muntu witadidila mu chintadil chiyimp.” (1 Kor. 13:9, 12) Paul kadingap kija yom yin yawonsu, niyetu kand. Pakwez Paul wading wij uyakin wa dishin piur pa Yehova. Wading wij yom yiwanyidina yamwinkisha kashinsh anch yom yading yitiyijinay yading uyakin! Mutapu umwing tukutwisha kwikal nich kashinsh nakash anch twatanina kal uyakin ud kufanakesh chilakej cha difukwil chay Yesu nich mutapu umwifukwidinau Nzamb nlel kud Atuman a Yehova. w21.10 18-19 par. 2-4

En akadivar ni anambaz amapal, wikalany mu mudimu wa chisu chawonsu ap bwat, ijikany anch ukutwish kuyikwashany nakash antu akwau. Mutapu ik? Ikasikeshany kusanger yisend ukwetanya katat, itekinany mipak yisu, ni shinshikinany pa yom ukutwishanya kusal katat. Mwant David wasota kutung chikumbu cha Yehova. Pakwez pamulejau kud Yehova anch chisend chinech akuchiwanyish kud nsand Salomon, David witiya mupak wa Yehova ni wakwasha mudimu wa kutung tempel nich muchim wawonsu. (1 Jsng. 17:4; 22:5) David katongap anch ndiy wading uwanyidina kutung tempel mulong Solomon wading “uchid nsand wakad kal [ukaliweny].” (1 Jsng. 29:1) Wading wij anch ching chiyukish cha Yehova chawiy chafanyina kusal anch atwish kutung tempel, kadiap uvud wa mivu ap ukaliweny wa antu afanyina kutakel mudimu winou. Mulong wa kumwimburij David, amapal akat kudandamen kukwash ap anch ayiswimp yisend. Ni ij anch Yehova ukuyiyukish ansand asadina mudimu wasalangau awiy. w21.09 9 par. 4; 10 par. 5, 8

Mipak ya mu spiritu yikat kuwapish mwom wetu ni kutuletin musangar. Pakwez tufanyidin kukwat mipak tumena anch tukuyiwanyish. Tufanyidinap kukwat mipak mulong kwau wawiy mutapu usadinau antu akwau. Tufanyidinap kukwat mipak yikutwisha kutuziyish ni kukangany kuyiwanyish. (Luka 14:28) Mulong ud kashalapol wa Yehova, ukwet usey nakash mu dijuku dia Yehova, ni kwikil muntu mukwau wa kukufanakesh ney. Yehova kakupwitinap kud ndiy mulong ud muwamp nakash kuyisutamu antu akwau. Wakupwita mulong wamana anch wading muntu wikepishina wading ukatina kwilej piur pend ni kuswimp mwikadil wey. Ikal nich kashinsh anch ukat kusangar chisu usadina usu wawonsu mulong wa kumusadin. Kujijaman ni kushinshaman kwey yid uman umekeshina anch ukwet “muchim uwamp wa kuziyil.” (Luka 8:15) Chawiy dandamen amboku kumusadin Yehova nich usu wey wawonsu. Anch wasal mwamu, ukwikal ni diyingishin dia kusangar ‘amwiney wakad kwiyilakej.’​—Gal. 6:4. w21.07 24 par. 15; 25 par. 20

Yisu yivud chitwitin kushimpish muchim patuchingedina chakwel apwish mulong kanang. Chilakej, anch amakurump ijik anch kud muntu wasalang chitil chikash mu chikumangen, akat kulembil mulong wa kwit “manangu madiokila mwiur,” chakwel amana mulong mud muumenay Yehova. (Jak. 3:17) Chitongijok chau chid cha kumukwash muntu wasalang chitil chakwel ‘akarumuka kudiokal ku kurumbuk kwend’ anch chiswapel. (Jak. 5:19, 20) Akusal kand usu wa kuchidij chikumangen ni kuyongoj antu arumbukinangau. (2 Kor. 1:3, 4) Ni chisu chipwishinau mulong utadina chitil chikash, amakurump afanyidin chakusambish kwijik nawamp yom yasadikang, ni chinech chikutwish kusend chisu kanang. Kupwa akat kulembil ni kupan yiyul yidia mu Dizu dia Nzamb, ni kumupup muntu “mudi mudia yisalijok.” (Jer. 30:11) Amakurump kafanyidinap kukwat mupak wa mau mau. Anch amakurump alondul umutakel wa Yehova, chikumangen chikwikal nawamp. w21.08 10-11 par. 12-13

Mulong wa nzal yandama mu Isarel, Nawom, nfumwend, ni anau aad abukina ku Mowab. Padingau kwinikwa, ikundj a Nawom wafa. Anend amakundj aad atana, pakwez cha ushon, awonsu aad afa. (Rut 1:3-5) Yishiken yiney yamuletina Nawom runeng ripandakena ni waziya nakash. Yakamish yamupandakena kushik ni mu chilik cha kutong anch Yehova ndiy wading umupompatina. Walonda yovil yend piur pa Nzamb anch: “Chikas cha [Yehova] champompatin kal am.” “Nzamb wa dikand diawonsu wantanyishin kal.” Walond kand anch: “Am kanshikumwishau kal kwam kudi [Yehova] wa dikand diawonsu wantekin kal mu mar.” (Rut 1:13, 20, 21) Yehova wij anch ‘kuzengok kukutwish kumushikij mwin manangu kwikal chisup.’ (Mul. 7:7) Wamubachika Rut kwikal nend piswimp ni kumumekeshin rukat rudimukina. Rut wipana kwa kwikatin mulong wa kumukwash mawenend kupandakan yovil ya runeng ni kuman anch Yehova udandamedin kumukat. w21.11 9 par. 9; 10 par. 10, 13

Anch twasal usu wa kushinshikin pa yisend tukweta katat mu mudimu wa Yehova, ov komb chirumburikin anch tufanyidinap kand kukimb mitapu ya kutanduril mudimu wetu? Bwat, chidiap mwamu! Tufanyidin kwikwatin mipak ya mu spiritu yikutukwasha kudandamen kukudish ukaliweny wetu mu mudimu wa kulejan ni kufundish, ni kuyikwash akadivar ni anambaz netu. Tukutwish kusal mwamu anch nich kwikepish twashinshikin pa kuyikwash antu akwau pa ndond pa kwishinshikin ayinetu. (Jnsw. 11:2; Mid. 20:35) Mipak ik ya mu spiritu ukutwisha kukwat? Mwita Yehova chakwel akukwasha kushinshikin mipak ukutwisha kuwanyish. (Jnsw. 16:3) Sal us wa kuwanyish mupak wa kwikal chibol nkwash ap chibol wa rawonsu, kusal ku Betel, ap kwandam mu mudimu wa kutung yikumbu ya midimu ya Nzamb? Pamwing ap ukutwish kwilej dizu dindj mulong wa kuya kulejan mu teritwar ulondinau dizu dined. w21.08 23 par. 14-15

Yehova ukat kusanger mu rukat rishinshamena. (Ozey 6:6) Yehova wamusadina muprofet Mike mulong wa kutukasikesh “kumekesh rukat rudimukina.” (Mike 6:8) Pakwez, kurutu kwa kurimekesh, tufanyidin kwijik chirumburikina rukat ridumukina. Rukat rudimukina chom ik? Muntu ukweta rukat rudimukina umukatining nakash muntu mukwau ni ukat kudandamen kumukat ni kushal kamu nend piswimp nich kushinshaman. Rukat rudimukina arisadidining yisu yivud mulong wa kumekesh rukat rikwetay Nzamb mulong wa antu end, pakwez rid kand rukat rikatau kumekeshijadin antu. Yehova ud chilakej chijim nakash cha rukat rudimukina. Chidiap cha kushimok pa kuman anch Mwant David washikena kulond anch: “[A! Yehova], rukat rey rudimukina ridi rujim mudi mwiur, . . . [A! Nzamb] Rukat rey ridimukina rid chom chijim chipandakena!” (Kus. 36:6, 8) Mud David, ov, niyetu tukat kukwat nich usey nakash rukat rudimukina ra Nzamb? w21.11 2 par. 1-2; 3 par. 4

Mu dijuku dia in kumwifukwil Yehova mud kand Yesu udia ‘Mwan wa kusambish wa yitang yawonsu’ ni tutikit twa angel. (Kol. 1:15; Kus. 103:20) Padingay Yesu pa divu, wayikwasha antu ashinshamena kwijik anch akutwish kumutazuk Yehova anch Tatukwau. Pambambagay nau in kwilejend, Yesu wamutazukang Yehova chisu chawonsu anch “Tatukwam, ndiy kamu [Tatukwen].” (Yoh. 20:17) Chisu tukata kwipan ayinetu kud Yehova ni kutubatish, tukat kwikal mu dijuku dikweta rukat dia akadivar nau anambaz. (Mar. 10:29, 30) Yehova ud Tatuku wa rukat. Yesu ukatin anch tumumana Yehova mud mumumenay ndiy, charumburik anch kumuman mud nvaj wa rukat tukutwisha kwisamb nend chisu chawonsu, kadiap mud muntu ukweta dizaz mwin kutulej kwend ching yom tufanyidina kusal. Mu malembil ma chilakej, Yesu wasambisha ni mazu manam: “Tatukwetu.” Yesu wafanyina kutulej kwend kumutazuk Yehova anch “Mwin Dikand Diawonsu,” “Sakatang,” ap “Mwant wa chikupu”—Bibil usadidin mazu minam mulong wa kurumburil chidiay Yehova. (Dis. 49:25; Isay 40:28; 1 Tim. 1:17) Pakwez, Yesu wasadina dizu “Tatuku.” w21.09 20 par. 1, 3

Mwant Manase niyend kitiyijap kubabesh kwa Yehova kwamwijikishau kusutin aprofet end. Kupwa, “[Yehova] wayitumina [in Yuda] atulal a njit a mwant wa in Asiria. Amukwata Mwant Manase nich dilond, amukas jimbwambu ja utad wa bronze, amutwal ku Babilon.” Padingay mu rukan mwi ngand ya wingendj, chimeken anch Manase watonga nakash piur pa yom yasalay. “Wishikumwisha nakash kurutu kwa Nzamb wa angakirilend.” Pakwez wasala kand yom yikwau. ‘Wamwilembina Yehova Nzamb wend.’ Manase “wamulembila Nzamb.” (2 Jsng. 33:10-12) Yehova wakula ku malembil ma Manase pa chisu chinicha. Wamana anch ikundj winou waswimp kal muchim wend kusutin yom yitay mu malembil mend. Yehova wamutesha Manase pitay dilikishin ni wamuchirisha kand pa ditand diend dia want. Manase wasala usu wa kumekesh kamu anch wakarumukin kamu chakin. w21.10 4 par. 10-11

Chamwita Akila ni Prisil kusha ndond yading yijidinau kal, kukimb ndond yindj ya kushakam, ni kusambishiril kand kwinsambishin mudimu wa kutung minkand ya kulandish. Ku chikumbu chau chisu mu Korint, Prisil ni Akila asambisha kukwash chikumangen ni asala pamwing ni kambuy Paul mulong wa kuyikasikesh akadivar kwinikwa. Mu kusut kwa chisu, aya ku misumb yikwau kwadinga maswir ma in kulejan. (Mid. 18:18-21; Rom 16:3-5) Mwom uwamp ni usangareshina mud ik wikalau nich! Ambay a uruw nlel akutwish kwimburij chilakej cha Prisil ni Akila kusutin kutek yisakin ya Want pa ndond ya kusambish. Chisu chiwamp chifanyidinau ambay a uruw kwitekin mipak mu mwom yau chid kurutu atijan. Anch ambay a uruw akwat mipak ya mu spiritu pamwing ni asal usu wa kuyiwanyish, akwikal ni dilau dia kuman mutapu ukuyikwashau kud spiritu wa Yehova mu mwom wau.​—Mul. 4:12. w21.11 17 par. 11-12

Choviken patok anch tufanyidin kuziyin kwi mbil ya Nzamb ya kuyilimish anvaj etu. Vurikany anch mbil yidia mu In Levi 19:3, yilondina kumulimish tatuku ni maku, ayilejen kamu kupwa kwa chijil chilondina anch: “Ikalany atumbila, mulong am, [Yehova] Nzamb wen, nitumbil.” (Lev. 19:2) Kukwatijan ni chiyul cha Yehova cha kuyilimish anvaj, tufanyidin kwiyipul anch: ‘Ov, niyilimishining kamu anvajam?’ Anch wajingunin anch kimwawiyap kamu muwadia kusalang pasak, ukutwish kukwat mupak wa kuwapish mwikadil wey. Ukutwishap kuswimp yom yasutina kal, pakwez ukutwish katat kukwat mupak wa kusal yom yivud pamwing ni anvajey mulong wa kuyikwash. Pamwing ap ukutwish kwirijek mulong wa kusutish nau chisu. Ap ukutwish pamwing ap kuyikwash nakash ku mujimbu, muspiritu, ap kand kuyikasikesh. Kusal mwamu kukwatijadin ni mazu madia mu In Levi 19:3. w21.12 4-5 par. 10-12

Mwant David, ikundj wasala kurumbuk kujim nakash. Chilakej, wasala masandj ni Batisheba, ni wamujipesha kand nfumwend. (2 Sam. 11:2-4, 14, 15, 24) Mud chibudikin, David kisalap kwend kusu amwinend nayimp, pakwez kand dijuku diend pamwing nau akajend akwau. (2 Sam. 12:10, 11) Chisu chikwau kand, David kamekeshap ritiy mudiay Yehova papanay mbil jakad kuwanyin mulong wa kuchind uvud wa amasalay. Yisu yadinga yibudikin? Piswimp in Isarel 70000 afa ku chipupu! (2 Sam. 24:1-4, 10-15) Ov, wafanyina kumurumburish David anch kadingap kawanyidina ranaken ra Yehova? Kimwawiyap mwasalay Yehova. Washinshikina pa kushinshaman kwadingay nich David mu mwom wend wa kwinyim ni pa kukarumuk kwend kwakin. Mud chibudikin, Yehova wamulikishina David yitil yiney yikash yasalay. Yehova wading wij anch David wading umukatin nakash ni wading ukatin kusal yom yiwamp. Ov, chikwovishinap musangar pa kuman anch Nzamb ukat kushinshikin pa uwamp udia mu etu?​—1 Ant 9:4; 1 Jsng. 29:10, 17. w21.12 19 par. 11-13

Yesu wayanakenang ayilim. Vurik uruu watumay kud Yohan Mubatish: “Amputames akat kuman, ayilim akat kwend, in musong wa mak akat kuyerik, atujikamatu akat kutesh, afu akat kuvumbuk.” Pamanau antu yilay ya Yesu, “amushimana Nzamb.” (Luka 7:20-22) In Kristu akwet musangar wa kwimburij ranaken ra Yesu pantaliken nau antu akweta ulim kanang. Chawiy tukat kwikal antu awamp, in kubangin, ni ashimpishina muchim pantaliken ni antu a mutapu winou. Chid chakin anch Yehova katwinkishap usu wa kusal yilay mud mwasalay Yesu. Ap mwamu, tukwet dilau dia kuyirumburil antu adia amputames ku mujimbu ap mu spiritu rusangu ruwamp piur pa paradis mukwikalau antu ni ukash uwamp wa mujimbu ni wa mu spiritu. (Luka 4:18) Rusangu ruwamp riner rayikwashin kal antu avud kumushiman Nzamb. w21.12 9 par. 5

Twaman kal anch Jakobu wading ujamishidin malejan mend pa Mifund. Wasadina Dizu dia Nzamb mulong wa kuyikwash antu ading amuteshina kuman anch chisu chawonsu Yehova ukat kuyifut antu ashinshamena kudiay Ndiy mud mwadingay Job. Jakobu wafundisha uyakin winou kusutin kusadin mazu maswapela ni movikena. Kusutin kusal mwamu, wapwitina nkeu ja in kumutesh padiay Yehova, kadiap pad amwinend. Dilejan: Fundish nich mazu maswapela kutesh, ni jamishin mafundish mey pa Dizu dia Nzamb. Chitongijok chetu chifanyidinap kwikal cha kwimekesh kud antu anch twij nakash, pakwez cha kuyilej yom yivud yijay Yehova ni mutapu ukatay kuyibangin. (Rom 11:33) Tukutwish kusal mwamu kusutin kulond chisu chawonsu yom yimedina pa Bibil. Chilakej, pa ndond pa kuyilej antu twilejina nau Bibil yom twafanyinang kusal pa ndond yau, tufanyidin kuyikwash kutongijokin pa yilakej ya mu Bibil ni kuman yom mud muyimenay Yehova. Chinech chikuyikasikesh antu tufundishina kusadin yom yilejinau mulong akatin kumusangaresh Yehova. w22.01 10-11 par. 9-10

Nzamb ukatin anch tuyisadin akwetu yom yivud kusutamu kwau kwipuk kusal yom yikutwisha kuyisal nayimp. Kumukat mukwen mud amwiney kud kwa usey nakash kud mwin Kristu ukatina kumusangaresh Nzamb. Tal mutapu wakasikeshinay Yesu pa usey wa mbil yidia mu In Levi 19:18. Mufaris umwing wamwipula Yesu anch: “Chijil chisu chipandakenamu mu yijil yawonsu?” Yesu wamwakula anch “chijil chipandakena ni cha kusambish” chading kumukat Yehova ni muchim wetu wawonsu, ni mupim wetu wawonsu, ni manangu mwetu mawonsu. Kupwa Yesu wajimbula mazu madia mu In Levi 19:18, malondina anch: ‘Cha kaad chifanikena nich chawiy ech: “Ufanyidin kumukat mukwen mudi muwikatila ey amwiney.”’ (Mat. 22:35-40) Kud mitapu yivud nakash tukutwisha kumekesh rukat kud akwetu. Mutapu umwing ud kusutin kusadin chiyul chidia mu In Levi 19:18. Ulondin anch: “Kangal wez wafundakesh ap kuyilamin akwen rukuny mu muchim wey.” w21.12 10 par. 11; 11 par. 12-13

Yesu wamukwata kambuy Pita ku chikash wamutuntul. Chid chakin anch Pita wenda chintamp kanang pa mem pading padandamedinay kushinshikin pad Yesu. Pakwez chisu chashinshikinay Pita pa rinkind wading ututina, wova wom nakash ni widjidjeka, chawiy wasambisha kujiy. (Mat. 14:24-31) Tukutwish kwilejin ku chilakej cha Pita. Chisu chashirikay Pita mu waat ni kusambish kwend mu karung, katonginap anch ukutwish kwov wom wa rinkind ni kusambish kujiy. Wading ukatin kamu kwendin pa mem djat pakushikinay kudiay Nsalejend. Pakwez wakanganya kushinshikin pa diloz diend. Nlel etu tukutwishap kwend pa mem, pakwez tukat kurish ni yom yikutwisha kupak ritiy retu. Anch twalik kushinshikin pad Yehova ni mu kushilamu kwend, tukusambish kujiy mu spiritu. Chikalap nchik rinkind mukash wa chifanakesh ukutwisha kushiken mu mwom wetu, tufanyidin kudandamen kumuchingejin Yehova ni mu usu ukwetay mulong wa kutukwash. w21.12 17-18 par. 6-7

Kulembil, kwilej Bibil, ni kutongijokin, yid chikunku cha difukwil dietu. Pitulembila, tukat kwambambang ni Tatukwetu wa mwiur utukatina nakash. Pitwilejina Bibil, Tukat kwak “ronganyin ra Nzamb,” udia musul wa manangu min mawonsu. (Jnsw. 2:1-5) Chisu tutongijokidina, tukat kuman mikadil yisangareshina ya Yehova ni kwijik yom yipandakena kuwap yitonginay kutusadin etu pamwing ni antu awonsu. Winou wawiy mutapu uwamp wa kusadin chisu chey. Pakwez yom ik yikutwisha kutukwash kusadin mu mutapu uwamp kachisu kakemp tukweta? Anch chitwishikin, kimb ndond yikuchikina. Shinshikin chilakej cha Yesu. Kurutu kwa kusambish mudimu wend pa divu, Yesu wasutisha machuku 40 mwi mpay. (Luka 4:1, 2) Mwi ndond yiney yikuchikina, Yesu wafanyina kumulembil Yehova ni kutongijokin pa rusot ra Tatukwend. Pakad kwidjidjek, kusal mwamu kwamurijeka Yesu mulong wa yom yafanyina kumushiken ni kupak ritiy rend. w22.01 27-28 par. 7-8

Mukurump wa chikumangen ap mukadivar mukwau uswila mu spiritu ukutwish kutulej chom kanang tufanyidina kuswimp mu mwom wetu. Anch muntu utukatina nakash watwinkish chiyul chimedina pa Bibil, tufanyidin kusadin chiyul chend. Chakin kamu, chikutwish kutukasiken kutesh chiyul chitwinkishinau kud muntu. Chikutwish kand kutujimesh yisu yimwing. Mulong wak? Ap anch twitiyidining anch tud antu akad kuwanyin, chikutwish kutukasiken kwitiy chiyul anch chapukun kamu pa ndond tuziyina. (Mul. 7:9) Tukutwish kwiyingish nich. Tukutwish kwiyipul piur pa yom yamubachikang muntu kutuyul ap kujiman piur pa mutapu wapanangay chiyul. Tukutwish kand kuman uyimp udia mudiay mwin kutuyul ni kutong anch: ‘Yom ik yiwamp yisadiningay chakwel eza kwinyul am? Oku niyend ukat kurumbukang!’ Mu uyakin, anch chiyul tutambwila chitusangareshinap, tukutwish kuchilik ap kwit chiyul kud muntu windj tutongina anch ukutwish kutulej yom tukatina. w22.02 8-9 par. 2-4

Ov, mu mangand masu ma Nzamb mukutwish kwikal yikokujol yikutwisha kupak ruchingej retu mu mutapu usadiningay Yehova yom? Chilakej, shinshikin yom yasadika kupwa kwa in Isarel kukolik mu uswik mu Idjibit. Antu amwing asambisha kunyinyit mulong wa yakudia yashau mu Idjibit, ni akwata nich kapipej mana, yakudia yayinkishau kud Yehova. (Kuch. 11:4-6; 21:5) Ov, tukutwish niyetu kwikal ni yitongijok ya mutapu winou kupwa kwa kupand ku mar makash makushika piswimp ap? Twijap kujimb kwa mudimu ukwikalaku mulong wa kwinangish divu ni kudiwapish pakemp pakemp chakwel dikal paradis. Pamwing ap kukwikal midimu yivud yakusal, ni mashakamin makwikalap maswapela kwinsambishin. Ov, tukwikal in kunyinyit piur pa yom yikutwinkishay Yehova pa chisu chinicha? Kashinsh kad anch: Anch twikal in kujikitish mulong wa yom yitwinkishinay Yehova nlel, chimeken anch tukusal kand mwamu pa chisu chinicha. w22.02 7 par. 18-19

Mu uprofet udia mu Zakariy 8:23, mazu “mwin Yuda” ni ‘ni yenen’ mamekeshin chisak chimwing​—azizidilau many achidia pa divu. (Rom 2:28, 29) “Antu dikum a michid [yawonsu]” amekeshin amikoku akwau. Antu inay ‘alamin fe,’ charumburik anch ayishinshamedin azizidilau many, ni kwibomb nau mu difukwil. Chilik chimwing, mu kuwanyin kwa uprofet udia mu Ezekiel 37:15-19, 24, 25, Yehova wayibombin kal azizidilau many pamwing ni amikoku akwau mulong wa kusal mudimu pamwing mu umwing. Uprofet ulejen mitond yaad. Antu akweta ruchingej ra kushakam mwiur ayifanakeshin ni mutond “wa in Yuda” (muchid mwatondangau ant a mu Isarel), ni akweta ruchingej ra kushakam pansh ayifanakeshin ni mutond ‘wa Efirayim.’ Yehova wafanyina kubomb yisak yiney yaad chakwel yisal ‘mutond umwing.’ Chinech chirumburikin anch akusal mu kwovijan mwinshin mwa umutakel wa Mwant wau Yesu Kristu.​—Yoh. 10:16. w22.01 22 par. 9-10

Yesu walonda piur pa antu apanang yipan kud atuzwendj, pakwez akat kusal usu chakwel antu akwau ayiman mulong wa kuyishiman. Yisal yiney yading yimekena mud yiwamp yadingap nich usey ku mes ma Yehova. (Mat. 6:2-4) Tukutwish kwikal chakin antu awamp ching anch twasal yom yiwamp nich yibachikin yiwamp. Chawiy iyipula anch: ‘Ov, nikatap kwimen kusu pa kwijik yom yiwamp ya kusal, pakwez nikat kuyisal kand chisu chawonsu? Yom ik yikata kwimbachik kusal yom yiwamp?’ Yehova ud Nzamb ukata kusal mudimu, ni spiritu wend niyend ud usu ukata kusal mudimu. (Dis. 1:2) Chawiy mwikadil ni mwikadil wa dibuj dia spiritu ukutwish ni ufanyidin kutubachik kusal chom kanang. Chilakej, mwin kwilej Jakobu wafunda anch: “Ritiy rakad yisalijok yiwamp rufil.” (Jak. 2:26) Tukutwish kand kulond mwamu piur pa mikadil yawonsu ya dibuj dia spiritu wa Nzamb. Chisu chawonsu tukata kuyimekesh, tukat kumekesh anch komb spiritu wa Nzamb utukwashin. w22.03 11 par. 14-15; 12 par. 16

Ap anch tukutwish kwipan mu mijikit kushalijan ya mu spiritu ni kusal midimu yivud yiwamp, kambuy Pita walejana kusal chom chimwing cha pakampwil. Kurutu kwa kutukasikesh kwikal atumbila mu yisal yetu yawonsu, Pita walonda anch: “Tenchikany manangu men mulong wa kusal chom.” (1 Pita 1:13) Chom ik chinech? Pita walonda anch akadivar nend a Kristu azizidilau many afanyidin “kurumburil yisalijok yikwamushena ya Nzamb, ndiy kamu” wayitazuka. (1 Pita 2:9) Chawiy, in Kristu awonsu nlel akwet dilau dia kusal mudimu winou wa usey nakash kupandakan, uyikwashina antu kusutamu yom yawonsu tukutwisha kusal. Did dilau dipandakena kuwap mud ik ditukweta mud antu atumbila dia kwipan yisu yawonsu nich mushiku mu mudimu wa kulejan ni kufundish! (Mar. 13:10) Anch twasal usu wetu wawonsu mulong wa kusal mwamu, tumekeshin anch tumukatin Nzamb ni mutej netu. Ni tumekeshin kand anch tukatin ‘kwikal atumbila’ mu yisal yetu yawonsu. w21.12 13 par. 18

Kambuy Paul walama chitongijok chiwamp piur pa akadivar ni anambaz. Wading wij kushalijan kudia pakach pa mwikadil uyimp ni muntu muyimp. Wading uyikatin akadivar nend ni washinshikinang pa mikadil yau yiwamp. Anch akangany kusal yom yiwamp, wasalang usu wa kutong anch ading akimbin kusal yom yiwamp ni akwet kwau kuswir kwa kuyikwash. Shinshikin mutapu Paul wayikwashay anambaz aad ading mu chikumangen cha Filip. (Fil. 4:1-3) Chimeken anch Evodiy ni Sintik alikidina kurumbok kwa umwing ni mukwash chakwel kuyikangesh kwovijan. Paul kayisuminap ap kuyilond nayimp; washinshikina pa mikadil yau yiwamp. Ading anambaz ashinshamena ni ading amusadin kal Yehova mu mivu yivud. Paul wading wij anch Yehova uyikatin. Chitongijok chiwamp cha Paul piur anambaz inay aad chamubachika kuyikasikesh chakwel achirish chisambu. Mulong Paul washinshikina pa mikadil yiwamp ya antu akwau, watwisha kulam musangar wend ni urund wend ukash nau akadivar ni anambaz a mu chikumangen. w22.03 30 par. 16-18

Chisambu chikutwinkishay Yehova chikudutish michim ni yovil yetu. Shinshikin mutapu wamanay nambaz Luz uyakin wa yom yiney. Ulondin anch: “Niyovang yisu yivud mud nid amwinam. Yisu yimwing yovil yiney yanshikijang kutong anch Yehova kankatinap. Pakwez anch chom chinech chashiken, namulejang Yehova kapamp kamwing mutapu niyovila. Malembil mawiy mankwasha kwiyov pee.” Mud mutapu twamana kal mu chilakej chinech, tukutwish kwikal ni chisambu kusutin malembil. (Fil. 4:6, 7) Twij anch Yehova ni Yesu akutwongoj anch twafish mukatish netu. Atukasikesh kal kulejan ni kufundish nich ranaken mulong Yehova Nzamb ni Yesu Kristu amekeshining mwikadil winou. Ni twatan kal rongoj pa kwijik anch Yehova ni Mwanend mukatish atwanakedin mu yakamish yetu, ni akatin kutukwash kujijaman. Tudandamedin kuchingel djat kamu ni pa dichuku dikezay Yehova “[kakuswol] mansoj mawonsu ku mes [metu]”!​—Kuj. 21:4. w22.01 15 par. 7; 19 par. 19-20

Yesu wajimbula yis yaad yishalijadina yitwadina ku jinjil jaad kushalijan, njil “yibwabumukina” ni njil ‘yiwongina.’ (Mat. 7:14) Kwikil njil ya kasatu bwat. Tufanyidin ayinetu kutond njil tukatina kulondul. Winou udi mupak wa kusambish kujimb kusutamu mipak yin yawonsu​—mulong mwom wetu wa chikupu wimedin pa mupak tukukwata. Antu avud ad mwi njil “yibwabumukina” mulong yiswapel kwendin. Cha ushon, antu avud atondin kushal mwi njil yiney ni kulondul rumb ra antu endidilamu. Akangeny kujingunin anch njil yiney ayikasikeshin kud Satan Djabul, ni anch yitwadil ku disheshik. (1 Kor. 6:9, 10; 1 Yoh. 5:19) Chinyim ni njil “yibwabumukina,” njil yikwau yid ‘yiwongina’ ni antu akemp kusu awiy akata kuyitan. Mulong wak? Mu maverse malondwilaku, Yesu wayibabesha in kwilejend piur pa aprofet a makasu.​—Mat. 7:15. w21.12 22-23 par. 3-5