BIBLIOTEK Udia pa Kapend
BIBLIOTEK
UDIA PA KAPEND
Uruund
  • BIBIL
  • MIKAND
  • YIKUMANGAN
  • es23 map. 88 ​-​ 97
  • Ngond wa 9

Kwikil video ukimbina

Video winou umukimbinap amboku nawamp.

  • Ngond wa 9
  • Tushinshikinany Mifund Dichuku Diawonsu—2023
  • Tumitu twa milong
  • Diakatan, 1 Ngond wa 9
  • Diampos, 2 Ngond wa 9
  • Diarubing, 3 Ngond wa 9
  • Diakajikamu, 4 Ngond wa 9
  • Diakaad, 5 Ngond wa 9
  • Diakasatu, 6 Ngond wa 9
  • Diakanying, 7 Ngond wa 9
  • Diakatan, 8 Ngond wa 9
  • Diampos, 9 Ngond wa 9
  • Diarubing, 10 Ngond wa 9
  • Diakajikamu, 11 Ngond wa 9
  • Diakaad, 12 Ngond wa 9
  • Diakasatu, 13 Ngond wa 9
  • Diakanying, 14 Ngond wa 9
  • Diakatan, 15 Ngond wa 9
  • Diampos, 16 Ngond wa 9
  • Diarubing, 17 Ngond wa 9
  • Diakajikamu, 18 Ngond wa 9
  • Diakaad, 19 Ngond wa 9
  • Diakasatu, 20 Ngond wa 9
  • Diakanying, 21 Ngond wa 9
  • Diakatan, 22 Ngond wa 9
  • Diampos, 23 Ngond wa 9
  • Diarubing, 24 Ngond wa 9
  • Diakajikamu, 25 Ngond wa 9
  • Diakaad, 26 Ngond wa 9
  • Diakasatu, 27 Ngond wa 9
  • Diakanying, 28 Ngond wa 9
  • Diakatan, 29 Ngond wa 9
  • Diampos, 30 Ngond wa 9
Tushinshikinany Mifund Dichuku Diawonsu—2023
es23 map. 88 ​-​ 97

Ngond wa 9

Diakatan, 1 Ngond wa 9

Amwipula chakwel ayisadila chilay mulong wa kumekesh anch ulabu wend udiokil kudi Nzamb.​—Mat. 16:1.

Antu a pa chirung cha Yesu ading akimbin yom yivud kusutamu kusu kwau mafundish mashimokishena ma Yesu. Pakwez alika kumwitiyij mulong kayinkishap chijingidij chading chikimbinau. (Mat. 16:4) Yom ik yilejenau mu Mifund? Muprofet Isay wafunda piur pa Mesia anch: “Kakez kabarokap, ap kulond nich dizu dikash, ap kwombil rubil mu mikombil.” (Isay 42:1, 2) Mu mudimu wend, Yesu kasalap yom mulong wa kwipitin nkeu ja antu. Katungap matempel, kudjal masun ma pakampwil mud mwadjalangau antakel a chirelijon, ni kayilejangap antu chakwel asambish kumutazuk pa maz ya ntumb ya chirelijon. Chisu chading chimurumburishinau, Yesu kitiyap kusal chilay mulong kwau wa kumusangaresh Mwant Herod ap anch mwom wend wading mu ubaj. (Luka 23:8-11) Twij anch Yesu wasalaku yilay, pakwez mudimu wa kulejan rusangu ruwamp wawiy wading ukwatinay nich usey nakash. Wayileja in kwilejend anch “wawiy mulong unezila.”​—Mar. 1:38. w21.05 4 par. 9-10

Diampos, 2 Ngond wa 9

Antu akwikal nich mwom wa chikupu anch akwijik ey Nzamb wakin, ni kumwijik Yesu Kristu watuma ey.​—Yoh. 17:3.

Tukat kuyikimb antu adia mu “mwikadil uwanyidina mulong wa kutambul mwom wa chikupu.” (Mid. 13:48) Mulong wa kuyikwash antu inay kwikal in kwilej, tufanyidin kuyikwash (1) kutesh, (2) kwitiy, ni (3) kusadin yom yilejinau mu Bibil. (Kol. 2:6, 7; 1 Tes. 2:13) Etu awonsu mu chikumangen tukutwish kuyikwash in kwilej a Bibil kusutin kwikal yilakej yiwamp mu kuyimekeshin rukat ni kuyak nawamp anch ez ku yikumangan. (Yoh. 13:35) Mwin kulejan utakedina dilejan dia Bibil chikumwit kand niyend kusutish chisu chivud ni kusal usu nakash wa kumukwash mwin kwilej kulik yitiyij ni yisal yadia yikunina kal mu muchim wend mud “mapat makash.” (2 Kor. 10:4, 5) Chid chakin anch chikutwish kusend angond avud mulong wa kumukwash muntu kuwanyish yom yiney yawonsu chakwel ashiken ku dibatish. Pakwez chid cha usey kusal mwamu. w21.07 3 par. 6

Diarubing, 3 Ngond wa 9

Shinshikany yom yawonsu, ulamany yom yidia yiwamp.​—1 Tes. 5:21.

Ov, twakasikeshin kal kashinsh mu manangu metu anch yom tufundishina ud kamu uyakin ni mutapu wa difukwil ulondwilau Atuman a Yehova nlel witiyikin kud Yehova? Kambuy Paul wading kamu ni kashinsh nakash ka uyakin. (1 Tes. 1:5) Kashinsh kinak kadingap kwau kimedina pa yovil. Paul wilejang nich mushiku Dizu dia Nzamb. Wading witiyijin anch ‘Mufund wawonsu aupepila ku spiritu wa Nzamb.’ (2 Tim. 3:16) Yom ik yajinguninay mu kwilej kwend? Paul watana mu Mifund uman ukurukina umekeshina anch Yesu ndiy wading Mesia washilaumu—uman wadiburilau kud antakel a chirelijon. Antakel inay in rubabek alondang anch ayifundishin antu uyakin piur pa Nzamb, pakwez awiy akat kusal yom yikisinay Nzamb. (Tit. 1:16) Paul kadingap mud amakundj inay, kadingap kutond yom yikatinay kwitiyij mu Dizu dia Nzamb ni yikatinay kulik kwitiy. Wading ukatin kufundish ni kusadin “yom yawonsu yatenchikay Nzamb.”​—Mid. 20:27. w21.10 18 par. 1-2

Diakajikamu, 4 Ngond wa 9

Kwikil muntu ukutwisha kwiyezil kudi am, ching anch Tatuku wantuma am wamulet kudi am.​—Yoh. 6:44.

Patukunina ni kwichil mem pa mbut ja uyakin, tufanyidin kutek mu manangu anch Nzamb ndiy ukata kupamish mbut. (1 Kor. 3:6, 7) Antu awonsu ad a usey ku mes ma Yehova. Yehova utwinkishin dilau dia kusal pamwing ni Mwanend mu mudimu wa kuyikumangej antu a michid yawonsu kurutu disudiel dia mangand minam dishika. (Age 2:7) Mudimu wetu wa kulejan ufaniken ni mudimu wa kuyipandish antu aturikinang kal mu dibuku. Ni in kulejan tufaniken ni chisak cha antu atuminau kuya kuyipandish antu aturikinang kal mu dibuku. Ap anch antu akemp kusu kwau mu chisak chinech awiy akuyibudisha antu aturikinang kal mu dibuku, pakwez mudimu ukusalau awonsu ud wa usey. Chilik chimwing ni mudimu tusadina wa kulejan. Twijap uvud wa antu akupanda mu mangand minam ma Satan. Pakwez Yehova ukutwish kumusadin muntu win mwawonsu pakach petu mulong wa kuyikwash antu inay. Andreas ushicha mu Bolivi ulondin anch: “Pakwel anch muntu ilej Bibil ni kushiken ku dibatish, nijing anch chitin usu ni ukwash wa antu avud.” Komb twikalany nich chitongijok cha mutapu winou piur pa mudimu wa kulejan. Anch twasal mwamu, Yehova ukutuyukish ni tukwikal ni musangar nakash mu mudimu wa kulejan. w21.05 19 par. 19-20

Diakaad, 5 Ngond wa 9

[Suurik] mu mupit wa Sakudimban.​—2 Tim. 2:26.

Chibind ukweting kuswir kwa kumukwat nnam ap kwa kumujip. Mud kamu mwalonday murund umwing muyimp wadimbana kumwongoj Job, chibind ukutwish kusadin mipit ap yilemb kushalijan. (Job 18:8-10) Mutapu ik ukatay chibind kusal chakwel nnam afa mu mupit wend? Ukat kwilejang mwikadil wa nnam. Kwisu kukatay kwendinang? Yom ik yimusangareshining? Mupit ik ukutwishay kulik kujingunin ukutwisha kumwoz? Satan ud mud chibind winou. Ukat kutwilej ni kushinshikin kutukata kuyang ni yom tukatina. Kupwa ukat kuta mupit umenay anch tukufamu pakad kuujingunin. Pakwez Bibil utwinkishin kashinsh anch ang twafa mu mupit wa Satan, tukutwish kusuurikamu. Utufundishin kand mutapu tukutwisha kusenguril mipit yiney yawonsu. Kwitutul ni ris yid pakach pa mipit yikatay Satan kusadin nakash. Satan watwishin kal kuyoz antu avud nich mikadil yiney yiyimp mu tunan twa mivu. Ud mud mwin kuta atujil uyisungidina atujil mu mupit ap mu wand. (Kus. 91:3) Pakwez tufanyidinap kufa mu mupit wa Satan. Mulong wak? Mulong Yehova watulejin kal mipit yikatay Satan kusadin.​—2 Kor. 2:11. w21.06 14 par. 1-2

Diakasatu, 6 Ngond wa 9

Jinvu jitok jidi chibangul cha uyaj, anch akat kujimen mwi njil ya kutentam.​—Jnsw. 16:31.

Akadivar ni anambaz netu amapal ad a usey nakash. Dizu dia Nzamb difanakeshin jinvu jau jitok ni chibangul. (Jnsw. 20:29) Pakwez, chikutwish kutuswapel kuvuramen mapit minam. Ansand ija usey wa amapal akutwish kutaninamu yom ya usey yisutinamu mapit ma ku mujimbu. Amapal akwet usey nakash ku mes ma Yehova. Ukat kuman chakin kamu chidiau mu michim, ni ukat kuman ni kusanger nakash mikadil ya usey yikwetau. Ukat kusangar anch waman amapal akat kuyifundish ansand piur pa ronganyin ratambwilau mu mivu yivud yamusadidinau Yehova nich kushinshaman. (Job 12:12; Jnsw. 1:1-4) Yehova ukwatin kand nich usey nakash kujijaman kwau. (Mal. 3:16) Arisha ni yakamish mu mwom yau, pakwez ritiy rau mudiay Yehova raziyap. Ruchingej rau mulong wa machuku ma kurutu rakasiken nakash kusutamu pa chisu chilejau uyakin. Ni Yehova uyikatin nakash mulong adandamedin kulejan dijin diend “djat ni ku mivu yau ya upal.”​—Kus. 92:12-15. w21.09 2 par. 2-3

Diakanying, 7 Ngond wa 9

Chifanyidin muntu mwawonsu kwirumburish amwinend. Anch yisalijok yend yidi yiwamp, ndiy ukutwish kwibaz amwinend.​—Gal. 6:4.

Chikwikal chiwamp kushinshikin yibachikin yetu chisu ni chisu. Chilakej tukutwish kwiyipul anch: ‘Ov, nikat kwiyilakejang nau akwetu mulong wa kuman usey nikweta? Ov, nikweting kuswir kwa kumekan anch yam nijing kusal yom nawamp nakash, ap kwiman mud nid muwamp nakash kumusutamu mukadivar ap nambaz kanang? Anch nikatining kumusadin Yehova kukwatijan ni usu wam?’ Bibil utukasikeshin kwipuk mwikadil wa kwiyilakej nau akwetu. Mulong wak? Mulong ku mutambu umwing, anch twajingunin anch tuyisutinamu akwetu, tukutwish kusambish kwitutul. Ku mutambu ukwau, anch twajingunin anch akwetu atusutinamu, tukutwish kuziy. (Rom 12:3) Tufanyidin kuvurik anch ang Yehova watupwitina kud ndiy, chadingap mulong wa ufun, ukaliweny twading nich, ap mulong twijiken nakash, pakwez chading mulong twading tukwet kuswir kwa kumukat ni kwa kumutesh Mwanend.​—Yoh. 6:44; 1 Kor. 1:26-31. w21.07 14-15 par. 3-4

Diakatan, 8 Ngond wa 9

‘Ufanyidinany kudandamen kwikal asu mu usu uyikedila manangu men.’​—Efes 4:23.

Mulong wa kuswimp manangu metu, tufanyidin kulembil, kwilej Dizu dia Nzamb, ni kutongijokin pa yom twilejina. Chawiy dandamen kusal yom yiney, ni mwita Yehova usu wa kusal mwamu. Spiritu utumbila ukukukwash kupandakan chaku cha kwifanikesh nau antu akwau. Yehova ukukukwash kand kujingunin anch wasambish kwikal ni ris ap chibud, ni ukukwinkish usu wa kwipuk yom yiney pakad kulab. (2 Jsng. 6:29, 30) Yehova wij yidia mu muchim wetu. Wij kand mutapu turishina ni yibachikin yiyimp ya mangand ni mutapu turishina nich kuburen kuwanyin kwetu. Mulong Yehova umen usu tusadina mulong wa kurish ni yibachikin yiyimp, ukat kutukat nakash. Mulong wa kutulej mutapu ukatay kwiyov piur petu, Yehova wasadina chilakej cha rukat riding pakach pa maku ni mwanend. (Isay 49:15) Chikasikeshin nakash pa kwijik anch wawiy mutapu utukatinay Yehova pamenay tukat kusal usu wa kumusadin nich usu wetu wawonsu! w21.07 24-25 par. 17-19

Diampos, 9 Ngond wa 9

Sangarany pamwing nau antu asangera.​—Rom 12:15.

Tukutwish kwikal ni musangar nakash anch twipan nakash mu chisend chawonsu chitwinkishinau mu mudimu wa Yehova. “[Ipana] chisu chawonsu” mu mudimu wa kulejan, ni kusal nakash midimu yikwau ya chikumangen. (Mid. 18:5; Heb. 10:24, 25) Rijek nawamp yikumangan mulong wa kwakul mu mutapu ukasikeshina. Kwat nich usey nakash chikunku chawonsu chikukwinkishau ku shikol ya chikumangan cha mukach mwa rubing. Anch akwit kukwash mudimu kanang mu chikumangen, itiy ni shik kurutu kwa chisu. Kangal watong anch mudimu wakwinkishangau ud wa usweral ni ukutwishap kusutish chisu chey mulong wa mudimu winou. Sal usu wa kuwapish ukaliweny wey. (Jnsw. 22:29) Anch wipan nakash mu midimu ni yisend ya mu spiritu ukweta, ukuwapish urund wey ni Yehova, ni ukwikal ni musangar nakash. (Gal. 6:4) Chikukuswapel kand kusangar pamwing nau antu akwau anch ayinkish yisend ukatina niyey kwikal nich.​—Gal. 5:26. w21.08 22 par. 11

Diarubing, 10 Ngond wa 9

Manangu madiokila mwiur madi zwang, makwet chisambu, ni kwitudish, ni kwovijan, mizwil nich riy ni yisalijok yiwamp, wakad kasolikany ap rubabek.​—Jak. 3:17.

Tufanyidin kwipuk chibud, ni kwitiy kufumb kwa Yehova. Mud mutapu ukutwisha mayej kuchinchikish mijir ya muchim wetu ni kuukangesh kusal nawamp, chibud chikutwish kuchinchikish muchim wetu wa chifanakesh ni kutukangesh kulondul umutakel wa Yehova. Afaris alikidila michim yau chakwel yichinchik mu chilik cha kulik kwitiy uman wa patok wayimekeshinau ku usu wa spiritu wa Nzamb. (Yoh. 12:37-40) Chibud chau chadinga cha ubaj mulong chafanyina kuyikangesh kutambul mwom wa chikupu. (Mat. 23:13, 33) Chid cha usey nakash mud ik kudandamen kulikidil Dizu dia Nzamb ni spiritu wend kuswimp wuntu wetu ni kwikal ni usu pa mutapu wetu wa kutong ni pa mipak yetu! Mulong Jakobu wading wikepishin, witiya kumufundish kud Yehova. Ni kwikepish kwend kwamukwasha kwikal mulej muwamp. w22.01 10 par. 7

Diakajikamu, 11 Ngond wa 9

‘Dandamenany kwit.’​—Mat. 7:7.

Anch ‘twadandamen kulembil’ tukutwish kwikal nich kashinsh anch tatukwetu wa mwiur ukututesh. (Kol. 4:2) Ap anch chakul ku malembil metu chimeken mud chilabin, Yehova ushidinamu kwakul ku malembil metu ‘pa chisu chiwanyidina.’ (Heb. 4:16) Chawiy, tufanyidinap kumufish nich Yehova anch chom kanang chisadikinap kapamp kamwing mutapu twading tukatina. Chilakej, antu avud alembil kal mu mivu yivud chakwel Want wa Nzamb weza ni kujiyish mangand minam mayimp. Yesu niyend watuleja kulembil mulong wa kwit Want winou. (Mat. 6:10) Pakwez chikwikal cha usup mud ik anch ritiy ra muntu mudiay Nzamb raziy mulong disudien diezinap pa chisu chading chichingejinau antu! (Hab. 2:3; Mat. 24:44) Tukwikal in manangu anch twadandamen kumuchingel Yehova ni kumulembil nich ritiy anch ukutwakul. Disudien dikwez kamu pa chisu chiwanyidina, mulong Yehova watekin kal ‘dichuku ni chisu’ chikushika disudien. Ni dichuku dinidia dikwikal chisu chiwamp nakash kud antu awonsu.​—Mat. 24:36; 2 Pita 3:15. w21.08 10 par. 10-11

Diakaad, 12 Ngond wa 9

Ikepishany, muntu ni muntu amumana mukwau mudi udi muwamp kumupandakanamu.​—Fil. 2:3.

Amapal ikepishina ijing anch mulong wa upal, kakutwishap kand kusal yom yivud mud mwasalangau pakur. Shinshikin chilakej cha atulam a minyingumuku. Anch wawanyish mivu 70, akat kumuswimp chisend. Pakwez chiswapelap. Chading chiyisangareshin nakash kuyisadin akadivar nau anambaz nau. Pakwez ij anch akadivar ansand akutwish kukwash nawamp mu mudimu winou. Akat kumekesh mwikadil mud wadingau nich in Levi mu Isarel wa pakur, imikang mudimu wau ku dizang anch awanyish mivu 50. In Levi inay amapal asangerang chisend chawonsu chayinkishangau. Ipanang nich muchim wawonsu mu mudimu wayinkishangau mulong wa kuyikwash ansand. (Kuch. 8:25, 26) Nlel, atulam a munyingumuku imikina kal mudimu wau, akat kukwash ni kukasikesh yikumangen mudiau. w21.09 8-9 par. 3-4

Diakasatu, 13 Ngond wa 9

Tatuku, am nasadil kal chitil kudi Nzamb ni kudi ey kand. Am kiniwanyidinap kand kwintazuk anch, nidi mwaney.​—Luka 15:21.

Yesu warumburila rusangu rikasikeshina piur pa mwan washadika, rifundinau mu Luka 15:11-32. Nsand umwing wamubwambwila tatukwend ni wadiokala ku chikumbu, kupwa “waya kwi ngand ya kulemp.” Kwinikwa wiyandjika mu mashakamin mayimp ma utandj. Pakwez pakasikana mashakamin mend, watonga nakash piur pa mupak uyimp wakwatay. Wajingunina anch mwom wend wading uwamp nakash padingay kwa tatukwend. Yesu walonda anch, nsand winou ‘wachirisha manangu.’ Wakwata mupak wa kuchirik ku chikumbu ni kumwit tatukwend dilikishin. Chadinga cha usey kud mwan kuman anch warumbuka nakash. Chamwita kusal chom kanang pa mulong winou. Mwan washadika wamekesha kukarumuk kwakin kusutin yom yasalay. Chishimu chinech chidiap kwau ching kusu rusangu rikasikeshina. Malejan madiamu makutwish kuyikwash amakurump mulong wa kushinshikin anch muntu muntu wasalang chitil chikash ukarumukin kamu. w21.10 5 par. 14-15

Diakanying, 14 Ngond wa 9

Nikez kanyikesh michid yawonsu.​—Age 2:6, NWT.

Yom ik yikulikau kunyikesh, ap kudiosh? Kambuy Paul wafunda anch: “Etu tukat kutambul Want wakad kutwish kunyikek, chawiy chifanyidin etu . . . kumwifukwil [Nzamb] mutapu uwamp nich kalimish ni wom.” (Heb. 12:28) Kupwa kwa kunyikesh kwinoku kwa nsudiel, ching kusu Want wa Nzamb wawiy ukushala. Ukudandamen kwiman dang pa ndond yau! (Kus. 110:5, 6; Dan. 2:44) Kwikil chisu cha kusutish! Antu afanyidin kutond: Anch adandamen kukwash mangand minam, akusheshik. Anch atond kumusadin Yehova ni kuswimp mashakamin mau mulong wa kusal rusot rend, akwikal ni mwom wa chikupu. (Heb. 12:25) Kusutin mudimu wetu wa kulejan, tukutwish kuyikwash antu kukwat mupak winou wa usey nakash. Ni el tudandamenany kuvurik mazu manam ma Nsalejetu Yesu: “Chifanyidin rusangu ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.”​—Mat. 24:14. w21.09 19 par. 18-20

Diakatan, 15 Ngond wa 9

Kinikukushap, kinikez kakulikap chikupu.​—Heb. 13:5.

Amakurump, ukwetany chisend cha pakampwil cha kuyongoj ambay nen akweta anamakwau amulikina Yehova. (1 Tes. 5:14) Kimbany mutapu wa kuyikasikesh kurutu ni kupwa kwa yikumangan. Yendilany ku yikumbu ni lembilany nau pamwing. Yang nau pamwing mu mudimu wa kulejan, ap yisu yimwing yitazuka mu difukwil dien dia mu dijuku. Amakurump afanyidin kukimb mutapu wa kuyibangin antu anenganena ni kuyimekeshin rukat ni ranaken. (1 Tes. 2:7, 8) Yehova “kasotilap muntu ap umwing kusheshik, pakwez usotil antu awonsu kukarumuk kudiokal ku yitil yau.” (2 Pita 3:9) Ap anch muntu wasal chitil chijim, mwom wend ud wa usey kud Nzamb. Vurik anch Yehova wapana difut dia usey nakash, yakupesh ya Mwanend mukatish, mulong wa umwing ni umwing pakach petu. Yehova ukat kuyanaken ni kuyikwash antu amulikina kal chakwel amuchirikin. Uchingejin anch akukwat mupak wa kumuchirikin, mud mutapu ulejenau mu chishimu cha Yesu piur pa mwan washadika.​—Luka 15:11-32. w21.09 30-31 par. 17-19

Diampos, 16 Ngond wa 9

Watanyinanyamu kal mulong wa mudimu wa awiy.​—Yoh. 4:38.

Pamwing ap ukutwishap kulejan ni kufundish mud mutapu wading kusalang mulong wa mayej kanang. Pakwez ukutwish kudandamen kwikal ni musangar mu yom utwishina kusal mu mudimu wa kwangul. Shinshikin yom yamushikena Mwant David chisu chayay pamwing ni amakundj end mulong wa kukamunin majuku mau mu makas ma akankuny nau in Amalek. Amakundj yitot yaad pakach pau ading aziyang kal ni kadingap kand ni usu wa kurishikish, chawiy ashala kwinyim mulong wa kulam mafund. Kupwa kwa kuwin njit, David wapana mbil ya kwanganijan pakach mapit matambulau. (1 Sam. 30:21-25) Chid mutapu umwing ni mudimu wetu wa kwikadish in kwilej usadikina pa mangand mawonsu. Muntu win mwawonsu usadina usu wa kulejan ukwov niyend musangar mud wovilay muntu wadia kutakel dilejan dia Bibil anch kwikal muntu ukushikena ku dibatish. Yehova umening rusot retu ruwamp ni muchim wetu wa kwipan mulong wa kusal mudimu winou, ni ukutuyukish. Utufundishin kand mutapu tukutwisha kutan musangar mu kachom kakemp kawonsu tusadina mu mudimu wa kulejan. (Yoh. 14:12) Tukutwish kwikal nich akashinsh anch tukwikal ni dilau dia Nzamb anch twalik kuziy! w21.10 27-28 par. 15-17

Diarubing, 17 Ngond wa 9

Uyaj wa ansangarum wawiy usu wau.​—Jnsw. 20:29.

Patuyila mu kunanap, tukutwish kwiyakamish anch tukutwishap kand kusal yom yivud mu mudimu wa Yehova mud mutapu twasalang ku usand. Chid chakin anch tukwikalap kamu ni usu mud twading nich, pakwez tukutwish kusadin manangu ni ukaliweny tukweta mulong wa kuyikwash ansand kwipan nakash mu mudimu wa Yehova ni kuwanyish yisend yivud mu dirijek. Mulong wa kuyikwash ansand, amapal afanyidin kwikepish. Muntu wikepishina ukat kuyimanang akwau mud amusutinamu. (Fil. 2:3, 4) Amapal ikepishina ijing anch kud mitapu kushalijan yikutwisha kulet yibudikin yiwamp, yikutwishay kusadin muntu mulong wa kuwanyish chisend kampand pakad kuya kuns kwa Mifund. Chawiy, kakatap kukimb anch antu awonsu asal yom ching kamu mu mutapu wayisalangau awiy. (Mul. 7:10) Ap anch akwet ukaliweny ukutwishau kuyikwash nich ansand, pakwez ijing anch ‘mangand minam makat kuswimp’ ni anch chikutwish kuyit pamwing ap kuswimp mutapu wa kusal yom.​—1 Kor. 7:31. w21.09 8 par. 1, 3

Diakajikamu, 18 Ngond wa 9

Nany udia mudi ey, A! [Yehova], pakach pa akish? Ov, nany udia mudi ey, mu ukaleng wa kutumb kwey?​—Kub. 15:11.

Yehova kakutwishap kwitiyij anch in kumwifukwil end asal yom yikutwisha kuyijondish. Ndiy kamu udia dipwishin dia kutumb kwawonsu. Mulong wa kuyivurish in Isarel piur pa kutumb kwend, kwading kabond ka utad wa or kading pa mpup wa diswin wadjalangay mwin kupesh mujim ku mutu. Pa kabond kinak ading afundinap anch: ‘Kutumb kud kwa Yehova.’ (Kub. 28:36-38) Mazu mading pa kabond kinak mafanyina kumwinkish muntu win mwawonsu wamamanang kashinsh anch Yehova ud chakin kamu utumbila. Chad chid nchik piur pa in Isarel ading aburedina mutapu wa kuman mazu minam mulong kadingap ni mutapu wa kumusejin mwin kupesh piswimp? Ov, afanyina kamu niyau kwijik anch Yehova ud utumbila? Mwaning. Mwin Isarel mwawonsu wateshang mazu minam chisu chatangangau Chijil cha Nzamb kurutu kwa amakundj, amband, ni an. (Kuv. 31:9-12) Niyey anch wadingaku pa chirung chinicha, wafanyina kutesh mazu malondina anch: “Am nidi [Yehova] Nzamb wen, chawiy . . . ikalany antu atumbila, mulong Am nitumbil.” “Ikalany antu atumbila kudi am, mulong am [Yehova] nitumbil.”​—Lev. 11:44, 45; 20:7, 26. w21.12 3 par. 6-7

Diakaad, 19 Ngond wa 9

Kangal wanengananany.​—Luka 12:29.

Antu amwing akutwish kwiyakamish piur pa maswir mau ma kumujimbu. Pamwing ap ashich mu jingand mudia uzwendj nakash ni chikutwish kuyikasiken kuman mudimu. Chikutwish kuyikasiken kuman nfalang jiwanyidina mulong wa kuwanyish maswir ma majuku mau. Ap ntakel wa dijuku ukutwish kufa, ni kusha dijuku diend pa mutaj pakad mwin kudiwanishin maswir. utwinkishin kashinsh anch ukutuwanyishin maswir metu ma ku mujimbu anch twatek yisakin ya Want pa ndond yakusambish. (Mat. 6:32, 33) Kud uman uvud umekeshina anch ukat kuwanishang kamu kushilamu kwinoku. (Kuv. 8:4, 15, 16; Kus. 37:25) Anch Yehova ukat kuwanyishang maswir ma atujil ni yisalamb, chakin kamu tufanyidinap kwiyakamish piur pa yom tukudia ap tukudjala! (Mat. 6:26-30; Fil. 4:6, 7) Mud mutapu ukata rukat kuyibachik anvaj kuyiwanyishin anau maswir ma ku mujimbu, rukat rimubachikining Tatukwetu wa mwiur kubangin maswir ma ku mujimbu ma antwend. w21.12 16 par. 4; 17 par. 5; 18 par. 8

Diakasatu, 20 Ngond wa 9

‘Yehova wadandamena kwikal ni Josef ni wadandamena kumumekeshin rukat rend rushinshamena.’​—Dis. 39:21.

Ov, niyey akurumbukidinap kal kamu nakash kud muntu kanang, pamwing ap kud mukadivar ap nambaz ney? Shinshikin chilakej cha Josef wamana mar pakad mulong mu makas ma anamakwend. Kalikidinap anch uyimp winou umubachik kuyijimen. Pakwez, wadandamena kushinshikin pa kumusadin Yehova, ni amuyukisha chipandikena mulong wa kushimpish muchim ni kujijaman kwend. Mu kusut kwa chisu, Josef wading ni mutapu wa kuvurik uyimp wamusalau ni kuman mutapu wamuyukishau kud Yehova. (Dis. 45:5) Mud Josef, tukat kwiyov ongojinau chisu tukata kumusejin Yehova ni kutek mulong mu makas mend chakwel aupwish. (Kus. 7:17; 73:28) Anch wiyovil nayimp nakash mulong akurumbukidin ap mulong wa diyingishin dikwau, vurik anch Yehova ud piswimp nau antu “akweta michim yinenganena.” (Kus. 34:19) Ukukatin nakash mulong wa kushimpish muchim kwey ni mulong utekin chisend chey kud ndiy. (Kus. 55:23) Ndiy udia nzuj wa pa divu diawonsu. Umen yom yawonsu yisadikina. (1 Pita 3:12) Anch urishin ni milong wakad kutwish kupwish, ov, ukukat kumuchingel Yehova? w21.08 11 par. 14; 12 par. 16

Diakanying, 21 Ngond wa 9

‘Dandamenany kushinshik risu ridia rusot ra Yehova.’​—Efes 5:17.

Chikwikal cha manangu anch twasadin mwom wetu mu mutapu ukutusejisha piswimp ni Yehova. Tufanyidin kutek yom ya usey pa ndond ya kusambish. Yisu yimwing, mulong wa kusadin nawamp chisu chetu, chikutwit kutond chom chimwing pakach pa yom yaad, ap anch yawonsu yaad yidiap kwau yiyimp. Tukutwish kwov kurumburik kwa chom chinech kusutin yom yasadika chisu chayay Yesu kumutal Mariy ni Mart. Pakad kwidjidjek, mulong Mart wading ukatin nakash kumwak Yesu kwol kwau, wipana mulong wa kumwisukin yakudia. Pakwez Mariy washakama pamwing ni Yesu mulong wa kutesh mafundish mend. Yom yasalay Mart yadingap yiyimp, pakwez Yesu walonda anch Mariy “watondang kal chom chiwamp.” (Luka 10:38-42) Mu kusut kwa chisu, Mariy wafanyina kuvuramen yakudia yadiau pa chisu chinicha, pakwez tukutwish kwikal nich kashinsh anch kafanyinap kuvuramen yom yilejay kud Yesu. Mud mwasangeray Mariy kusutish ka chisu kinika pamwing ni Yesu, niyetu tusangaredining chisu tukata kusutish pamwing ni Yehova. w22.01 27 par. 5-6

Diakatan, 22 Ngond wa 9

Ov, wamanang kal mutapu wishikumwishay Akab ku mes kwam?​—1 Ant 21:29.

Ap anch Akab wikepisha ku mes ma Yehova, yom yasalay mu kusut kwa chisu yamekesha anch kakarumukap kamu kwend chakin. Kasalap usu ap ukemp mulong wa kudiosh difukwil dia Bal mu want wend. Ni kayikasikeshap akwau kumwifukwil Yehova. Kupwa kwa rufu ra Akab, Yehova wamekesha mutapu wading umumenay ikundj winou. Muprofet wa Yehova walonda anch wading “muntu muyimp.” (2 Jsng. 19:1, 2) Chawiy tongijok bil: Anch kukarumuk kwa Akab kwading kamu kwakin, ov, muprofet wafanyina kumutazuk anch muntu muyimp umukisina Yehova? Chakin kamu, ap anch Akab wanenganana mu chilik kanang, kakarumukap kamu kwend chakin. Yom ik tukutwisha kwilejin ku chilakej cha Akab? Pateshay uruu wa Yehova wa mar mafanyina kushiken mu dijuku diend, Akab wishikumwisha pa chisu chinicha. Chading chom chiwamp nakash chasalay. Pakez mu kusut kwa chisu, yom yasalay yamekesha anch kakarumukap kamu kwend chakin. Chakin kamu, kukarumuk kwitin yom yivud kusutamu kwau kulond anch tunenganen mulong wa yom yiyimp twasalang. w21.10 3 par. 4-5, 7-8

Diampos, 23 Ngond wa 9

Chifanyidin rusangu ruwamp ra Want wa Nzamb ez arulejan bil.​—Mat. 24:14.

Isay wading muprofet, ni chimeken anch mukajend wading niyend nich yisend ya uprofet, chawiy chamutazukau anch “muprofet mband.” (Isay 8:1-4, NWT) Mud ambay a uruw, Isay ni mukajend ashinshikina chakusambish pa difukwil dia Yehova. Nlel ambay a uruw akutwish kand kushinshikin chakusambish pa kumusadin Yehova mu mwom wau kusutin kusal yawonsu yikutwishau mu mudimu wa Yehova. Akutwish kukasikesh ruchingej rau mudiay Yehova kusutin kwilej mauprofet ma Bibil pamwing ni kushinshikin mutapu ukata kumawanyin. (Tit. 1:2) Akutwish kutongijokin pa yom yikutwishau kusal mulong wa kukwash kuwanyin kwa mauprofet mamwing. Chilakej, akutwish kukwash kuwanyish uprofet wa Yesu ulondina anch rusangu ruwamp akurilejan bil pa mangand mawonsu kurutu dinsudiel dishika. Anch ambay a uruw ikal nich kashinsh nakash piur pa mutapu uwanyidina mauprofet, akukwat mupak wa kwipan nakash mu mudimu wa Yehova. w21.11 16 par. 9-10

Diarubing, 24 Ngond wa 9

Wamuleja kand mwin kwilej anch: “Mband ou, katat udi mudi makwey!”​—Yoh. 19:27.

Yesu wading wiyakamishin piur pa makwend wading pamwing ap mwadiamufu. Mulong Yesu wading umukatin ni umubangidin Mariy, wamupana mu makas ma Yohan mulong wading wij anch ukumuwanyishin maswir mend ma mu spiritu. Kudiosh dichuku dinidia, Yohan wikala mud mwan a Mariy ni wamulama mud makwend. Riner rading rukat rijim mud ik ramekeshay Yesu kud mband winou wa usey wamulila nich rukat ni wading wiminya piswimp ni Yesu chisu chafay! Yom ik tukutwisha kwilejin ku mazu ma Yesu? Urund tukweta ni akadivar nau anambaz netu ukutwish kwikal ukash kusutamu urund tukweta ni anamakwetu a ku mujimbu. Anamakwetu a ku mujimbu akutwish kutupompat ap kutudjibul, pakwez mud mwakanay Yesu, anch twashal piswimp ni Yehova ni dirijek Diend, tukutambul “tupamp chitot” yom twashadisha. Akadivar ni anambaz netu akwikal mud anetu amband ap amakundj akatish, amakwetu, ap atatukwetu. (Mar. 10:29, 30) Mutapu ik wiyovila piur pa kwikal ni akadivar nau anambaz ​adia mu uumwing mulong akwet ritiy ni rukat, amukatin Yehova ni akatijadin kand umwing ni mukwau?​—Kol. 3:14; 1 Pita 2:17. w21.04 9 par. 7; 11 par. 8

Diakajikamu, 25 Ngond wa 9

Kangal wavuramenany kusal yom yiwamp ni kukwashijanany muntu ni mukwau.​—Heb. 13:16.

Rukat rudimukina rikat kumubachik muntu kusal yom yivud kusutamu yimuchingejidinau. Mud pasak, nlel kand akadivar ni anambaz avud akat kumekesh rukat rudimukina kud ambay nau in Kristu, ap kud antu akad kal kumanangawap ku mes. Chilakej, anch ijik anch kwi ndond kampand kwashikenang mar madiokila ku yom yatangau, akat kukimb kapamp kamwing mutapu wa kukwash. Anch mar makash mamushiken muntu mu chikumangen, pakad kulab akat kukimb kwijik maswir ma muntu mulong wa kumukwash. Mud in Kristu a ku Masedon a mu mivu chitot ya kusambish, akat kusal yivud kusutamu yiyichingejidinau. Akat kwipan nakash kusutin kusadin chisu ni yom yau ya ku mujimbu mulong wa kuyikwash ambay nau adia mu maswir. (2 Kor. 8:3) Nlel kand, amakurump akat kuyijikitish akadivar nau anambaz mu chikumangen anch aman yom yisadinau mulong wa kuyikwash akwau. Kuyijikitish akadivar nau anambaz pa chisu chiwanyidina kukutwish kuyinkish usu uswirikedinau chakwel kangal aziy.​—Isay 32:1, 2. w21.11 11 par. 14; 12 par. 21

Diakaad, 26 Ngond wa 9

Tang matu ku mazu ma in manangu.​—Jnsw. 22:17.

Etu awonsu tukwet kuswir kwa yiyul chisu ni chisu. Yisu yimwing, tukutwish kwit chiyul kud muntu tulimishina. Yisu yikwau, mukadivar ukutwish kuman chom kampand ni kutuyul anch tukimbin ‘kuwa mu chitil’​—charumburik anch kusal chom chikutwisha kutunenganesh. (Gal. 6:1) Ap kand akutwish kutuyul chisu chitupupinau kupwa kwa kusal chitil chijim. Chikalap nchik mutapu utuyudinau, tufanyidin kutesh. Chid chiwamp nakash kusal mwamu ni chikutwish kupandish mwom wetu! (Jnsw. 6:23) Mufund wetu wa dichuku utukasikeshin anch “tang matu ku mazu ma in manangu.” Kwikil muntu wa mujimbu wa mbij wijing yom yawonsu; pakwez kuding muntu umwing ukweta manangu ni ukaliweny ujim nakash kutupandakanamu etu awonsu. (Jnsw. 12:15) Chawiy kutesh chiyul kud kumekesh mwikadil wa kwikepish. Kumekeshin anch twij mimbu yetu, ni anch tukwet kuswir kwa ukwash mulong wa kuwanyish mipak yetu. Mwant wa Manangu Salomon wafunda anch: “[Kudia] in chiyul avud kutenchik kukat kujamish.”​—Jnsw. 15:22. w22.02 8 par. 1-2

Diakasatu, 27 Ngond wa 9

Muntu mwin kujindjik kurumbuk kwend kakuzangijalap nawamp, pakwez mwin kwitiyil kurumbuk ni kukulik, ukez katan ranaken.​—Jnsw. 28:13.

Kukarumuk kwakin kurumburishin yivud kusutamu kwau kunenganan mulong wa chitil twasalang. Kurumburikin kand kuswimp yitongijok ni muchim. Chinech chirumburikin kulikap mwikadil uyimp ni kuziyin kand kwi mbil ja Yehova. (Ezek. 33:14-16) Chom cha usey nakash kud muntu wasalang chitil chid kuwapish bil urund wend ni Yehova. Yom ik tufanyidina kusal anch twajingunin anch murund netu wa piswimp wasalang chitil chikash? Tukutwish kumusal murund netu nayimp anch twapakish kujindjik chitil chend. Kujindjik kudiap kwau kwa usey, mulong Yehova umen kwend yawonsu. (Jnsw. 5:21, 22) Ukutwish kumukwash murund ney kusutin kumuvurish anch amakurump akatin kumukwash. Anch murund ney walik kwend kulejan chitil chend kud amakurump, ukutwish kuya kuyirumburil mulong winou, mwamu ukumekesh anch ukatin chakin kumukwash murund ney. w21.10 7 par. 19-21

Diakanying, 28 Ngond wa 9

Chifanyidin muntu ni muntu atala nawamp ku yom ya mwom wa mukwau, wakad kutal nawamp ching kusu ku yom ya mwom wend amwinend.​—Fil. 2:4.

Etu awonsu tukutwish kwilej kwimburij chilakej cha Yesu cha muchim wa kwipan. Bibil ulondin anch Yesu “watambul[a] ndond ya ukashalapol.” (Fil. 2:7) Kashalapol muwamp ukat kukimbang mitapu ya kumusangaresh mwant wend. Mulong ud kashalapol wa Yehova ni mwin kuyisadin akadivar ney, chakin kamu ukatin kukusadin nakash kud Yehova ni kuyikwash ambay ney akaritiy. Iyipula anch: ‘Ov, nikweting muchim wa kwipan mulong wa kuyikwash antu akwau? Ov, niswakeling kukwash anch kud maswir ma in kwisotin mulong wa kurijek ndond ya kusadin chitentam ap Chot cha Want?’ Tong bil mud wajingunin kal anch ufanyidin kuwapish chom kanang, pakwez ukwetap yovil ya kusal mwamu. Pa mulong winou, mulembila Yehova nich kashinsh kawonsu. Muleja mutapu wiyovila ni mwita chakwel akwinkish ‘impu ni usu wa kusal’ mwamu.​—Fil. 2:13. w22.02 23 par. 9-11

Diakatan, 29 Ngond wa 9

Nikez kukukasikeshany.​—Mat. 11:28.

Yesu wamekesha kudimuk kwend kusutin kwikal muntu muwamp ni wisikena, ap mu yirung yikash. (Mat. 11:29, 30) Chilakej, chisu chamwilembinau kud mband mwin Fenisiy mulong wa kumwok mwanend, kwinsambishin kitiyap kwit kwend, pakwez chisu chamekeshay mband winou ritiy rikash, nich rukat Yesu wamwoka mwanend. (Mat. 15:22-28) Chikalap nchik kudimuk kwend, Yesu kalikangap kupan yiyul. Yisu yimwing wamekesha kudimuk kwend mu kuyipup antu akatinay. Chilakej, chisu chapakishay Pita kumuziyish Yesu kusal rusot ra Yehova, Yesu wamupupa kurutu kwa in kwilej akwau. (Mar. 8:32, 33) Kasalap mwamu mulong wa kumukwatish Pita usany, pakwez mulong wa kumufumb ni kuyibabesh nich in kwilej akwau kulik kusal yom yakadiau mbil. Pakad kwidjidjek, Pita wovaku usany, pakwez dipup diamukwasha. Mulong wa kumekesh kudimuk kwakin kud antu ukatina, yisu yimwing chikwitin kuyilej yom patok. Piusadina mwamu, imburij chilakej cha Yesu kusutin kupan yiyul yimedina pa Dizu dia Nzamb. Ikal muntu muwamp. w22.03 11 par. 12-13

Diampos, 30 Ngond wa 9

‘Tupanany yakupesh ya kushiman kudi Nzamb, charumburik anch, dibuj dia milamu yetu.’​—Heb. 13:15.

Tukat kumwifukwil Yehova chisu tumutumbishina. (Kus. 34:1) Tukat kumutumbish Yehova kusutin kuyilej antu akwau mutapu tukatina ni tusangaredina mikadil yend yipandakena kuwap ni midimu yend. Tukuman yom yivud ya kulond piur pa Yehova anch tukwet muchim wa kujikitish. Anch twishil chisu cha kutongijokin pa uwamp wa Yehova, charumburik anch yom yawonsu yatusadidinay kal—tukwikal ni mayingishin mavud ma kumutumbishin. Mudimu wa kulejan utwinkishin dilau dia ‘kupan yakupesh ya kushiman kudi Nzamb, charumburik anch, dibuj dia milamu yetu.’ Mud mutapu tukata kushinshikin piur pa yom tukulonda kurutu kwa kumusejin Yehova mu malembil, chid kand cha usey kutongijokin piur pa yom tukulonda kud antu tukutanijana nau mu mudimu wa kulejan. Tukatin anch “yakupesh ya kushiman” yikal yiwamp nakash. Chawiy tukata kulond nich musangar chisu tulejena uyakin kud antu akwau. w22.03 21 par. 8

    Mikand ya Uruund (1999-2025)
    Budik
    Andam
    • Uruund
    • Kwangan
    • Yom ukatina
    • Copyright © 2025 Watch Tower Bible and Tract Society of Pennsylvania
    • Mbil ja Kusadin
    • Mbil ja Ujindj
    • Paramètres de confidentialité
    • JW.ORG
    • Andam
    Kwangan