Ngond wa 8

Yesu wading ulondin pamwing ap piur pa amasalay in Rom amupampa misumad mu makas ni mu yidjatil yend pa mutond wa mar. Yesu kakatap kuyilamin rukuny ap kuyijimen mulong amusadina nich kuburen kutentam ni kumumesh mar. (1 Pita 2:23) Mud Yesu, tufanyidin kwikal ni muchim wa kulikishin. (Kol. 3:13) Antu amwing ap kand anamakwetu akutwish kutupompat mulong kwovilap kurumburik kwa yitiyij yetu, ap kwa mulad wa mashakamin tukweta. Akutwish kutudimben makasu, kutukwatish usany kurutu kwa antu, kutusheshin mikand yetu, ap kand kutufunyin anch akutusal nayimp. Pa ndond pa kuyilamin rukuny, tukutwish kumwit Yehova kuyifungul antu atupompatina mes chakwel dichuku dimwing akutwish kujingunin uyakin. (Mat. 5:44, 45) Yisu yimwing chikutwish kutukasiken kulikishin, pakampwil anch atusal yom yiyimp nakash. Pakwez, anch twitiy anch rukuny rikuna mu muchim wetu, twimeshikishin kwetu ayinetu mar. (Kus. 37:8) Anch twakwat mupak wa kulikishin, chirumburikin anch tukudandamenap kujiman.​—Efes 4:31, 32. w21.04 8 par. 3; 9 par. 4

Ov, ukwet muntu ukatina wopatinau kal ku chikumangen? Chinech chikutwish kukuletin runeng nakash! Tong mutapu wanengananay Yehova pamulikau kud angel amwing! (Jud 6) Ni tong kand mutapu wiyovay Yehova pamubwambwilau tupamp ni tupamp kud in Isarel ading atushalapol end akatinay. (Kus. 78:41) Ikal nich kashinsh anch chikat kumunenganeshang kand Yehova anch muntu uukatina wamulik. Umening kusansan wovila. Nich ranaken, ukukwongoj ni kuwanyish maswir mey. Anch mwan ikundj ap mband wamulik Yehova, chikat kushiken kud anvaj kutong anch ading afanyidin kusal usu nakash mulong wa kumukwash mwanau kudandamen mu uyakin. Mukadivar umwing walonda anch: “Nifisha nich. Nasambisha kand kulat yom yiyimp nakash. Nambaz warisha ni mulong mud winou ulondin anch: “Natonga anch pamwing ap narumbukin nakash mu chisend cham mud maku. Nifisha nich anch nakanganya kusal usu wa kumufundish mwanam kumukat Yehova.” w21.09 26-27 par. 1-2, 4

Antu amwing akat kutong anch atushalapol a Nzamb kawanyidinap kufundish Bibil mulong kakatap kwilej ku mashikol majim ma yom ya chirelijon. Pakwez afanyidin kushinshikin uyakin wa yom. Wawiy mupak wakwatay Luka mwin kufund wa Evanjil umwing. Wakwata mupak wa kukimb “rusangu ra chom ni chom mudi muchadinga.” Wading ukatin anch antu “[ijika] uyakin wa yom yawonsu” yateshau piur pa Yesu. (Luka 1:1-4) In Yuda a ku musumb wa Berey wa pasak ading mud Luka. Payilejau kapamp kakusambish rusangu ruwamp piur pa Yesu, awiy ashinshikina Mifund ya Hebereu mulong wa kwikal nich kashinsh anch yom yayilejau yading kamu yakin. (Mid. 17:11) Chilik chimwing ni nlel, antu afanyidin kushinshikin uyakin wa yom. Afanyidin kwilakej yom yiyilejinau kud atushalapol a Nzamb ni yom yilejenau mu Mifund. Afanyidin kand kwilej yom yasadinau kal kud atushalapol Nzamb a mu chirung chetu. Anch ashinshikin nawamp uyakin wa yom, yom yiyimp yikatau antu kulondol piur pa Atuman a Yehova yikutwishap kuyikangesh kumulondul Yesu. w21.05 3 par. 7-8

Ov, mu chikumangen chen mudiap muntu ukutwisha kutazuk kwol kwey? Kud yisu yimwing yikutwishau ambay netu in Kristu kusangar nakash anch twasutish nau chisu pamwing. Chikutwish kuyikasiken nakash in Kristu amwing kwikal pamwing ni anamakwau akad kwikal Atuman chisu chisadinau misambu yakad kukwatijan ni Bibil. Ambay netu akwau akutwish kwov ushon nakash machuku mamwing anch ashik dichuku diafay mwanamakwau ukatilau. Anch twasutish chisu pamwing ni akadivar nau anambaz arishina ni yakamish ya mutapu winou, tumekeshin anch ‘tuyibangidin.’ (Fil. 2:20) Kud mayingishin mavud nakash makutwisha kusal anch mwin Kristu iyova yisu yimwing mud ud amwinend. Pakwez tufanyidin kuvurik anch Yehova wij nawamp mutapu twiyovila. Ukat kutuwanyishin maswir metu, yisu yivud kusutil ambay netu in Kristu. (Mat. 12:48-50) Ku mutambu wetu, tukat kumekesh anch tumujikitishin Yehova mulong wa chikumangen anch twasal usu wa kuyikwash akadivar ni anambaz netu. Chikalap nchik mutapu tukutwisha kwiyov, tudiap ayinetu, mulong Yehova ud netu chisu chawonsu! w21.06 13 par. 18-20

Yesu walama chitongijok chiwamp piur pa mudimu wa kulejan ni wadandamena kulejan ap anch antu amwing kadingap kasangaredina uruu wend. Mulong wak? Wading wij anch antu ading akwet kuswir nakash kwa kwijik uyakin ni wading ukatin kuyikwash antu avud. Kupwa wading kand wij anch antu amwing alikina kusanger uyakin nlel akutwish kuusanger dichuku dikwau. Shinshikin yom yasadika mu dijuku din dia Yesu. Mu mivu yawonsu yisatu ni chikunku yasalay mudimu wa kulejan panap pa divu, kwikil ap kusu mwanamakwend umwing wikala mwin kwilej wend. (Yoh. 7:5) Pakwez kupwa kwa kuvumbuk kwa Yesu, anamakwend ikala in Kristu. (Mid. 1:14) Twijap nany ukwitiya uyakin wa Bibil tufundishina. Chikutwish kusend chisu chilemp kud antu amwing pakwel anch itiy uruu wetu. Ap anch kitiyinap yom tufundishina, pakwez akat kuman mwikadil wetu uwamp ni chitongijok chiwamp tukweta piur pa mudimu wa kulejan, pamwing ap kurutu kwa machuku “akumushiman Nzamb.” w21.05 18 par. 17-18

Padingay Yesu pa divu, wayinkisha in kwilejend mudimu ukweta yikunku yaad. Wayileja kulejan rusangu ruwamp ra Want, ni wayileja mutapu wa kusal mwamu. (Luka 8:1) Yesu wasambela kuyilej in kwilejend piur pa yibudikin yiwamp ni yiyimp yikutanau pakulejanau uruu wa Want. (Luka 9:2-5) Wasambela kand kuyilej mutapu ukupalangana rusangu ruwamp payilejay anch in kwilejend akupan “uman kudi antu a michid yawonsu.” (Mat. 24:14; Mid. 1:8) Kupwa, wayileja in kwilejend kuyifundish antu akwikala in kwilej mu machuku ma kurutu kuziyin kwi mbil jawonsu ja Yesu. Yesu walonda anch mudimu winou wa usey ukudandamen, ukushik ni pa chirung chetu “djat ni kwisudiel kwa mangand.” (Mateu 28:18-20) Ni mu kujingunik kwamulejay Yohan, Yesu wamekesha patok anch ukatin anch in kwilej awonsu ayikwash antu kumwijik Yehova.​—Kuj. 22:17. w21.07 3 par. 3-4

Nlel antu avud mu mangand akwet mwikadil wa kubambil mulong ikatin ayinau. Chilakej, ikundj mwin kwisak ukutwish kusadin milad yakad kwikal yiwamp chakwel ayisutam akwau. Mwin masengan ma kubambil ukutwish kumubachik ap kumuwish mukwau chakwel ndiy ikal wa kusambish. Nsand a shikol uridina ndond kanang ku Iniversite wijikena nakash ukutwish kwiy ku ekzamen chakwel amatik. Pakwez etu in Kristu twij anch mwikadil winou ud uyimp. Ud pakach pa ‘yisal ya ku mujimbu.’ (Gal. 5:19-21) Chad, ov, chikutwish kushiken anch atushalapol a Yehova asambish kubambil mu chikumangen pakad ayinau kwijik? Chinech chid chipul cha usey, mulong mwikadil wa kubambil ukutwish kuyipish uumwing wa ukadivar. Chid cha usey kwisambin yilakej ya amakundj ni amband ashinshamena a pakur atwisha kwipuk mwikadil wa kubambil. w21.07 14 par. 1-2

Rukat rudimukina ritubachikining kuyikwash antu anenganena. Nlel akadivar ni anambaz adumukina akat kwipan kwa kwikatin mulong wa kuyikwash antu anenganena ap aziyina adia mu chikumangen. Ayikatin kamu akadivar ni anambaz nau, ni akatin kusal usu wau wawonsu mulong wa kuyikwash. (Jnsw. 12:25; 24:10) Asadin kamu mud mwatukasikeshay kambuy Paul anch: ‘Londany nich rongoj kud anenganena, yikwashany aziyila, shimpishany michim kud antu awonsu.’ (1 Tes. 5:14) Yisu yivud, mutapu umwing ukutwisha kuyikwash akadivar nau anambaz anenganena ud wa kuyitesh nawamp ni kuyinkish kashinsh anch tuyikatin. Yehova umening nawamp usu ukata kusal mulong wa kubangin amikoku end. Jinswir 19:17 ulondin anch: “Mwin kumwovil kazwendj riy ukat kumusondjik [Yehova], ni [Yehova] ukez kamuchirishin mulong wa chom chasalay.” w21.11 10 par. 11-12

Yom ik tukutwisha kusal katat mulong wa kwirijek mulong wa machuku ma kurutu? Tufanyidin kusanger mu urund wetu wa piswimp ni Yehova. Anch twilej kumwijik Nzamb wetu nawamp, tukwikal nich kashinsh anch ukutuking chisu chikurishikishay Gog wa Magog. Mazu madia mu mufund wa dichuku dia nlel marumburil mayingishin masala anch David achingejin mu ukwash wa Yehova. Yisu yivud David wamuchingejinang Yehova, ni Nzamb wend kamulikap ap pakemp. Padingay mwanikanch, David warisha nend Goliyat, chitabu ikundj mwin Filistin, ni wamwela anch: “Ilel unou [Yehova] ukukupan mu makas mwam.” (1 Sam. 17:46) Mu kusut kwa chisu, David wasadina kwa mwant Saul wapakisha tupamp tuvud kumujip. Pakwez “[Yehova] wading nend” David. (1 Sam. 18:12) Mulong David wimenap mutapu wamukwashau kud Yehova pasak, wijika anch wading ufanyidin kumuchingejin mu mar mading marishinay nich pa chisu chinicha. w22.01 6 par. 14-15

Mu yom yawonsu yikatay kusal, Yehova ukat kushimpish muchim ni kutek chisu chifanyidina mulong wa kuwanyish mudimu wend. Ukat kusal mwamu mulong wa kutumbish dijin diend ni kuyikwash antu. Chilakej, shinshikin mutapu warijekay divu pakemp pakemp mulong wa antu. Bibil urumburil mutapu watangay Yehova divu anch “wateka kujimb,” wajika “mashin,” ni wateka “diyal dia pa dikonk.” (Job 38:5, 6) Witekina chisu mulong wa kushinshikin pa mudimu wend. (Dis. 1:10, 12) Ukutwish kutongin mutapu wiyovau angel pading pamenau yom yisu yading yitanginay Yehova pakemp pakemp? Asangara nakash! Mulong pamanau yom yiney, “atupula disok dia musangar.” Yom ik twilejidinaku? Midimu ya kutang ya Yehova yasenda tunan twa mivu mulong wa kuyipwish, pakwez pashinshikinay yom yawonsu yitekinay chisu cha kuyitang, wamana anch “yading yiwamp kamu.”​—Dis. 1:31. w21.08 9 par. 6-7

Mu chishimu cha Yesu, ikundj umwing wading ukimbin kuya mu weny. Kurutu kwa kutumbuk, wayitazuka atushalapol end ni wayinkisha muntu ni muntu atalent chakwel isak nich. Ikundj winou wading wij anch atushalapol end ashalijadin ukaliweny wa kwisak, chawiy wamwinkisha kashalapol umwing atalent atan, mukwau wamwinkisha aad, ni wapana talent umwing kud kashalapol wa kasatu. Kashalapol wa kusambish ni wa kaad asala usu wa kuvudish nfalang ja mwant wau. Pakwez kashalapol wa kasatu kasalap chom ap chimwing ni rufalang ramwinkishau, chawiy mwant wend wamudiosha pa mudimu. Kashalapol wa kusambish ni wa kaad akwata nich usey nakash chisend chayinkishau ni asala usu nakash wa kumusadin mwant wau. Mud chibudikin, avudisha nfalang ja mwant wau tupamp twad. Ayifuta nakash mulong wa mushiku ni ukaliweny wau. Mwant wau wasangar nakash, pakwez wayimana kand anch awanyidin kuyinkish yisend yikwau! w21.08 21 par. 7; 22 par. 9-10

Yehova ushimpishin muchim nakash mu machuku minam ma kwisudiel. Kakatinap anch muntu ap umwing asheshik. (2 Pita 3:9) Uyinkishin antu awonsu chisu cha kukarumuk. Pakwez kushimpish muchim kwend kukwet mimbu. Antu alikina kunung chikas ku Want wa Nzamb akwikal ni yibudikin ya mutapu umwing mud yamushikena Farao pa chirung cha Moses. Yehova wamuleja Farao anch: “Anch nasota kutandjek chikas cham, ni kukubul ey ni antwey nich chipupu, ey ing washeshikin pa mangand. Pakwez nakwitiy kal ey kwikal mwom, mulong wa kukumekeshin usu wam chakwel dijin diam dijikana pa mangand mawonsu.” (Kub. 9:15, 16) Antu a michid yawonsu akwijik kamu anch Yehova ndiy Nzamb wakin. (Ezek. 38:23) Kunyikek kulejenau mu mufund wa nlel kurumburikin kusheshik kwa chikupu kwa antu alikina kwitiy ukaleng wa Yehova mud mwasalay Farao. w21.09 18-19 par. 17-18

Ov, wovil kusansan ku muchim mulong wa mwanamakwey ukatina wopatinau? Ni yom ik ukutwisha kusal anch antu amwing mu chikumangen alond yom yikusadina nayimp? Tufanyidinap kuchingej anch antu awonsu akulond ching yom yidia yiwamp. (Jak. 3:2) Etu awonsu tud antu akad kuwanyin, chawiy kangal washimok anch muntu walond yom yiyimp pakad kutongin, ap kand anch wasadinamu kwend mulong wa kukutap ku muchim. Vurik chiyul cha Paul chilondina anch: ‘Dandamenany kudiulijadin kurumbok amwing ni akwau ni kulikishijadin amwing ni akwau kwa kwikatin ap anch muntu ukwet mulong ni mukwau.’ (Kol. 3:13) Dandamen kuyikwash antu a mu dijuku ashinshamena. Akwet kuswir anch uyimekeshin rukat ni kuyikasikesh nakash katat kusutamu pakur. (Heb. 10:24, 25) Yisu yimwing, antu a mu dijuku dia muntu wopatangau akat kuman anch antu amwing mu chikumangen akat kuyiyep mud niyau ayopatin. Tufanyidinap kusal mwamu! Tufanyidin kuyijikitish ni kuyikasikesh nakash ansand akweta anvaj adiokila kal mu uyakin. w21.09 29 par. 13-14; 30 par. 16

Anch ipal ni nsand itekin chisu cha kwambamb, chikat kuyikasikesh awonsu aad. (Rom 1:12) En ansand ukwikalany nich kashinsh nakash anch Yehova ukat kuyibangin atushalapol end ashinshamena, ni amapal ukutwish kwiyov anch ad a usey. Ukutwish kwov musangar wa kukurumburil mutapu wamuyukishau kud Yehova. Ufun wa mujimbu ukat kupwa mu kusut kwa mivu, pakwez antu ashinshamena akat kwikal ni ufun nakash kud Yehova payilau mu kunanap. (1 Tes. 1:2, 3) Mulong wak chidia mwamu? Mulong mu kusut kwa mivu, itiya chakwel spiritu wa Nzamb ayikwash kukudish mikadil yiwamp nakash. Anch twasal usu wa kuyijik nawamp kupandikan akadivar nau anambaz amapal, twayilimish, ni twilejin ku chilakej chau, tukuyiman kand anch akwet usey kupandakan mud mapit ma usey nakash! Chikumangen chikat kukasikan kadiap kwau ching anch ansand ayikwat amapal nich usey, pakwez kand ching anch amapal niyau ayikwat ansand nich usey. w21.09 7 par. 15-18

Tufanyidin kubabal nakash mulong wa kulik kwikal in chisum ni kusal usu wa kumekesh “riy kupandakan,” mud Nzamb. (Efes 2:4) Kwikal mwin riy kwitin yom yivud kusutamu kwau kwikal ni yovil ya riy. Antu akweta riy akat kusal yom mulong wa kuyikwash antu akwau. Komb el etwawonsu tukimba antu adia mu maswir tukutwisha kukwash, ikala a mu dijuku dietu, a mu chikumangen, ap antu tushicha nau ndond yimwing. Chakin kamu, kud mitapu yivud tukutwisha kuyimekeshin antu riy! Ov, wijaku muntu ukweta kuswir kwa ukwash? Ov, tukutwish kumwinkish yakudia, ap kusal yom yikwau mulong wa kumukwash? Ov, kud mwin Kristu wadia wopatinau kal wachirishinau ukweta kuswir kwa arund awamp in kumukasikesh? Ov, tukutwish kuyilej antu akwau uruu wa rusangu ruwamp ukasikeshina? (Job 29:12, 13; Rom 10:14, 15; Jak. 1:27) Anch tutil muchim ku maswir ma antu akwau, tukuman anch tukwet mitapu yivud ya kuyimekeshin antu atunyingumukinamu riy. Anch twamekesh riy, tukumusangaresh nakash Tatukwetu wa mwiur, Nzamb mwin ‘riy ripandakena’! w21.10 13 par. 20-22

Mu Kuseng 23, David ujimbwil yom ya usey nakash, mud yiyukish yivud yatambulay kusutin kumwitiyij Yehova mud Kafung wend. Yehova wamutakela “mu jinjil jitentamina,” ni wamukwasha nich kushinshaman mu yirung ya musangar ni ya mar. David wajingunina anch kwikal mu “madil mawamp” ma Yehova kwafanyinap kumwiyepish ku milong. Mu yisu yimwing wafanyina kuziy, mud muntu udia “mu ruwengil ra rufu,” ni wafanyina kwikal nau akankuny. Pakwez mulong Yehova wading Kafung wend, David ‘kwovap kwend wom.’ Mu mutapu ik walikay David ‘kuburen chom’? Wading ni yom yawonsu yiswirikedinay mu spiritu mulong wa kushal piswimp ni Yehova. Musangar wend wadingap wimedina pa yom ya ku mujimbu. David wasangerang yom yamwinkishangau kud Yehova. Yiyukish ni diking dia Nzamb yawiy yadinga ya usey nakash kud ndiy. Mazu ma David matukwashin kuman mulong wak chid cha usey kwikal ni chitongijok chiwamp piur pa yom ya ku mujimbu. w22.01 3-4 par. 5-7

Kudiosh pakur, antu amwing kakatap kuyitesh atuman a Yehova. Chilakej, Nowa wading “mwin kurumburil yom yitentamina,” mu mivu piswimp 40 ap 50. (2 Pita 2:5) Pakad kwidjidjek, wachingeja anch antu akwau akumutesh, chawiy Yehova kamulejap chom pa mulong winou. Pakwez, chisu chamulejau Nowa mutapu wafanyinay kutung waat, Nzamb walonda anch: “Ukwandam mu waat, ey ni aney amakundj, ni mukajey, ni amband au aney ukwandam nau.” (Dis. 6:18) Nowa wajingunina pamwing ap anch antu avud kakumuteshap, mulong waat wamulejau kusal ku Yehova wadingap kwau ujim nakash chakwel antu awonsu awanyinamu. (Dis. 6:15) Mud mutapu twija, kwikil muntu ap umwing wamutesha Nowa. (Dis. 7:7) Ov, Yehova wamumana Nowa anch kasadinap nawamp mudimu wend wa kulejan? Bwat kamu! Ku mes ma Nzamb, Nowa watwisha mudimu wend wa kulejan mulong wasala nich kushinshaman yom yamulejau kud Yehova.​—Dis. 6:22. w21.10 26 par. 10-11

Tongijokin mutapu wafanyinay kwiyov Rut pateshay mazu minam malonday Nawom! Rut wasala usu wend win wawonsu mulong wa kumukwash Nawom. Rut wadilang nend pamwing, wamukasikeshang, ni washakama nend pamwing mu machuku mavud. Chikalap nchik ukwash winou wawonsu, Nawom walonda anch: “[Yehova] wanlet kal makas a makas.” Mazu minam mamekeshin anch Nawom kadingap kwend kakwatina nich usey ukwash wa Rut wading ushicha nend pamwing. Tong mutapu wafanyinay kunenganan Rut mulong wa mazu minam! Pakwez, wadandamena kushakam ni Nawom. (Rut 1:3-18) Nlel, nambaz udia mu yakamish ukutwish kulond yom yikutwisha kututap ku muchim​—chikalap nchik usu tusadina mulong wa kumukwash. Pakwez tukatap kukwat mazu minam mud utwedinam etu. Tukat kudandamen kumukwash nambaz udia mu maswir, ni kumwit Yehova atukwash kutan mutapu uwamp wa kumukasikesh. (Jnsw. 17:17) Nambaz udia mu maswir kwinsambishin ukutwish kulik ukwash. Pakwez, rukat rudimukina rikutubachik kusal usu wetu wawonsu wa kushal nend piswimp.​—Gal. 6:2. w21.11 11 par. 17-18; 12 par. 19

Mu Bibil, dizu “utumbila” dimekeshin kwikal wishitwila mu mwikadil ni mu mijikit ya relijon. Dizu dined dikutwish kand kwikal ni chitongijok cha kuyauril antu panrau mulong wa kumusadin Nzamb. Mu kulond kukwau, tukutwish kwikal atumbila ching anch twikal atumbila mu yisal, anch twamwifukwil Yehova mu mutapu witiyinay, ni anch twikal ni urund wa piswimp ni ndiy. Chishimokishen pa kuman anch, ap anch tud antu akad kuwanyin ni Yehova ud utumbila nakash, pakwez ukatin kamu anch twikal mu urund wa piswimp ni ndiy. Yehova ud wishitwila ni wa zwang mu yom yawonsu. Twilejin chom chinech kusutin mazu malondau piur pend kud angel ading piswimp ni ditand dia Nzamb. Amwing pakach pau alonda anch: “Utumbila, Utumbila, Utumbila, udi [Yehova] Mwin Dikand.” (Isay 6:3) Chakin, mulong wa kwikal ni urund wa piswimp ni Nzamb wau utumbila, angel afanyidin niyau kwikal atumbila ni mwawiy mudiau. w21.12 3 par. 4-5

Yisu yivud ansand akat kwiyipul piur pa mutapu uwamp ukutwishau kusadin mwom yau. Ku mutambu umwing, alej ni antu a mu dijuku akad kwikal Atuman akutwish kuyikasikesh ansand kwilej mashikol malemp mulong wa kutan mudimu uwamp ni kwikal ni nfalang jivud. Mashikol ma mutapu winou makutwish kand kuyisend chisu chilemp. Ku mutambu ukwau, anvaj ni arund mu chikumangen akutwish kuyikasikesh ansand kusadin mwom yau mu kumusadin Yehova. Yom ik yikutwisha kumukwash nsand umukatina Yehova kukwat mipak yiwamp? Chiyul chidia mu Efes 5:15-17 chikutwish kumukwash. Kupwa kwa kutang maverse minam, nsand ukutwish kwiyipul anch: ‘Risu “rusot ra Yehova”? Mupak ik ukumusangaresha? Mupak ik ukwinkwasha kusadin nawamp chisu cham?’ Vurik anch, “chirung chitudia chidi chirung chiyimp,” ni mangand minam matakedilau kud Satan akumashesh piswimp ap. w22.01 27 par. 5

Chisu ik chikalay Jakobu mwin kwilej ushinshamena wa Yesu? Kupwa kwa Yesu kuvumbuk, “wamekana kudi Jakobu, chad wamekana kand kudi atwimbuy awonsu.” (1 Kor. 15:7) Kupwa kwa kumumeken kud Yesu, Jakobu wikala mwin kwilej wend. Wading pamwing nau atwimbuy ading mu kapalakany ka piur mu Yerusalem mulong wa kuchingel spiritu utumbila wayikanau. (Mid. 1:13, 14) Mu kusut kwa chisu, wading ni musangar wa kusal mu chisak chitakedila cha mu mivu chitot ya kusambish. (Mid. 15:6, 13-22; Gal. 2:9) Ni chisu chimwing kurutu kwa muvu wa 62 C.C., amupepila mulong wa kuyifundin in Kristu azizidilau many mukand. Twikal ni ruchingej ra kuya mwiur ap ra kushakam pa divu, mukand winou ud kand wa usey kud etu nlel. (Jak. 1:1) Kukwatijan ni Josèphe, mwin kufund nsangu ja pakur wa mu mivu chitot ya kusambish, Jakobu amujipa kukwatijan ni mbil japanay Mwin Kupesh Mujim mwin Yuda Ananias mwan wenday Anas. Jakobu washala ushinshamena kud Yehova djat ni ku rufu rend. w22.01 8-9 par. 3, 5

Dilejan dimwing tukutwisha kwilejin ku mufund wa nlel did anch tufanyidinap kuchingej anch Yehova ukutuchidij ku milong yawonsu yikupaka ritiy retu. Mud mwamupakau Yesu djat ni pansudiel, niyetu tufanyidin kwirijek mulong wa kumekesh kushinshaman kwetu djat ni ku rufu anch chatwit kusal mwamu. (Mat. 16:24, 25) Pakwez, tukwet kashinsh anch Nzamb kakwitiyap anch atupaka kusut chipim. (1 Kor. 10:13) Dilejan dikwau twilejidinaku did anch, mud mwamusalau Yesu, niyetu akutwish kutuzengol pakad mulong. (1 Pita 2:19, 20) Kakatap kutuzengol anch mulong twasalang chom chiyimp, pakwez akat kutuzengol mulong tudiap a mangand minam ni mulong tulejen uyakin. (Yoh. 17:14; 1 Pita 4:15, 16) Yesu wova kurumburik mulong wak Yehova wamulika aman mar. Pakwez atushalapol amwing ashinshamena ading amena mar iyipula yisu yimwing mulong wak Yehova witiya anch yom yiney yiyishiken. (Hab. 1:3) Nzamb wetu wa riy ni ushimpishina muchim wovil kurumburik anch antu mud inay kaburedinap kwau ritiy; pakwez akwet kuswir kwa rongoj ridiokila ching kud ndiy.​—2 Kor. 1:3, 4. w21.04 11 par. 9-10

Yehova ukwitiy difukwil diau anch dikwatijadin ni rusot rend, ni anch adisadin mu mutapu wa kalimish ni wa rukat. Tumukatin Yehova nakash. Twij anch ndiy uwanyidina kwifukwil, ni tukatin anch difukwil dietu dikal dipandakena kuwap. Mutapu umwing tukata kumwifukwil Yehova ud chisu tukata kumulembil. Bibil ufanakeshin malembil metu nich malash mawamp moshangau ku dizang ni kupwa ku tempel. Malash minam mamusangareshang Nzamb. Chisik chimwing, malembil metu madiokila ku muchim “wawiy musangar wend,” ap anch twasadin kwetu mazu maswapela. (Jnsw. 15:8; Kuv. 33:10) Chikat kusangaresh muchim wa Yehova anch watutesh tukat kulond mutapu tumukatina ni kumujikitish mu malembil. Ukatin anch tumulej yakamish yetu, yom tuchingejina, ni maswir metu. Ov, umen nchik anch wasambel kurijek yom ya kulond kurutu kwa kumusejin Yehova mu malembil? Anch wasal mwamu, ukwosh “diseng dia malash” dikweta usey kupandakan kud Tatukwey wa mwiur. w22.03 20 par. 2; 21 par. 7

Pa chisu cha Harmagedon, chikutwitap etu kukwat mupak piur pa nany uwanyidina ranaken ra Yehova ni wakad kuriwanyin. (Mat. 25:34, 41, 46) Ov, chikutuswapel kuchingejin mu dirumburish dia Yehova bil anch dikwikal diyal din kutupwakesh? Chakin kamu, tufanyidin kukasikesh ruchingej retu mudiay Yehova nlel chakwel twez tutwish kand kumuchingejin nich muchim wetu wawonsu mu machuku ma kurutu. Tongijokin piur pa mutapu tukwiyova mu mangand masu. Relijon wa makasu akumushesh, ni ditenchik diyimp dia milong ya kwisak ni ya politik diyizengodina antu a Nzamb ni kuyiletin mar dikwikalapaku kand. Mayej, upal, ni rufu ra akatish netu yikwikalapaku kand. Satan ni ayilembil end akuyidjubwil mu rukan mu mivu kanan. Kukwikalap kand yibudikin yidiokila ku kubwambwil kwau. (Kuj. 20:2, 3) Tukwikal ni musangar ujim nakash mulong twachingejina mutapu ukatay Yehova kusal yom! w22.02 6-7 par. 16-17

Yesu wasalang rizau ra kusambish mulong wa kuchirish chisambu ni kuyikasikesh antu akwau kwovijan. Wayifundisha anch afanyidin kusal chisambu pamwing ni akadivar nau anch akatin anch Yehova itiy difukwil diau. (Mat. 5:23, 24) Ni wayikwasha atwimbuy tupamp tuvud kupwish kupwitamijan kwau kwa kukimb kwijik muntu wadinga mujim kuyipandakanamu akwau. (Luka 9:46-48; 22:24-27) Mulong wa kwikal in kusal chisambu, tufanyidinap kwetu kwimen kusu pa kwipuk yom yikutwisha kulet kupwitamijan. Tufanyidin kukwat mupak wa kusal chisambu ni kuyikasikesh akadivar ni anambaz netu kuchirish chisambu anch apwitamijanang. (Fil. 4:2, 3; Jak. 3:17, 18) Tukutwish kwiyipul yipul ey: ‘Yom ik nikata kusal mulong wa kuchirish chisambu nau antu akwau? Anch mukadivar ap nambaz nam wasal yom yinjimeshina, ov, nikat kulamang rukuny? Ov, nikat kuchingel chakwel muntu mukwau asal rizau ra kusambish mulong wa kuchirish chisambu, anch nikat kwikal wakusambish kusal mwamu, ap anch chimeken patok anch antu akwau awiy anrumbukinang?’ w22.03 10 par. 10-11

Kwasut kal mivu yivud, Bibil wasambela kulond anch antu a Nzamb ‘akwipan kwa kwikatin’ mu mudimu wa Yehova mwinshin mwa umutakel wa Mwanend. (Kus. 110:3) Uprofet winou uwanyidin kamu mu machuku metu. Muvu ni muvu, atushalapol a Yehova akweta mushiku akat kusal yitot ya mamiliyon ma asaa mu mudimu wa kulejan. Kakatap kuyifut mu mudimu winou, pakwez akat kuusal kwa kwikatin. Akat kwishil kand chisu cha kuyikwash ambay nau akaritiy ku mujimbu, mu spiritu, ni kuyikasikesh. Akadivar akweta yisend akat kusutish chisu chivud mu kurijek yikunku mulong wa yikumangan ni kuyendin ambay nau mu mudimu wa ukafung. Yom ik yiyibachikining antu a Yehova kusal yom yiney yawonsu? Rid rukat rau mulong wa Yehova ni mulong wa amutej nau. (Mat. 22:37-39) Yesu washa chilakej chiwamp piur pa kutek maswir ma antu akwau pa ndond yakusambish. Tusadin usu wetu wawonsu mulong wa kulondul nzau jend. (Rom 15:1-3) Antu akata kumwimburij akutambul yiyukish yivud. w22.02 20 par. 1-2

Mu Isarel, antu avud asalang mudimu wa kudim, ni chading chitin kuyifut dichuku diawonsu kwinsudien kwa mudimu wa dichuku. Kulik kuyifut ansalamudimu inay kwafanyina kuyikangesh kuwanyish maswir ma majuku mau dichuku dinidia. Yehova warumburila anch: “Mulong ndiy udi kazwendj, utekil muchim pa difut diend.” (Kuv. 24:14, 15; Mat. 20:8) Nlel, ansalamudimu avud ayifutining kapamp kamwing ap twad pa ngond, kadiap dichuku diawonsu. Ap amwamu, mbil yidia mu In Levi 19:13 yichikwet usey. Amakurump a mudimu amwing akat kuyisakin ansalamudimu au mu kuyifut nfalang ja usweral jakad kukwatijan ni kujimb kwa mudimu usadinau. Ij anch ansalamudimu inay kakwetap cha kusal ni akudandamen kusal mudimu ap anch ayifutin nayimp. Tukutwish kulond anch amakurump a mudimu inay akat ‘kulam difut dia mwin mudimu.’ Mwin Kristu usadishina mudimu ufanyidin kuyisadin in mudimu end nich kutentam. w21.12 10 par. 9-10

Kupwa kwa mar mawonsu mamanay Yesu, wafanyina kwov impu nakash. Wading ukwet kuswir kwa ukwash mulong wa kupwish impu yend. Yesu katongap anch kulejan mutapu wiyovilay kukumekesh anch uziyin; niyetu tufanyidinap kutong mwamu. Pamwing ap yisu yivud mu mwom wetu tukatiningap kuyilej antu akwau yom tuswirikedina. Pakwez chisu chimwing twikal ni kuswir kwa ukwash, kangal twidjidjek kuyit antu akwau ukwash. Chilakej, anch tud ipal ap chilim, tukutwish kumwit murund netu chakwel atulandinaku chom ku magazeng, ap chakwel atutwalaku kumanijan ni dokter. Anch tuziyin, mukurump ap murund netu waswila kal ukutwish kututesh nawamp ni kutulej “dizu diwamp” dikutwisha kutukasikesh. (Jnsw. 12:25) Tufanyidin kwijik anch akadivar ni anambaz netu atukatin ni akatin kutukwash mu “yom yikash.” (Jnsw. 17:17) Pakwez, kakutwishap kwijik yom yidia mu manangu metu. Kakutwishap kwijik anch tukwet kuswir kwa ukwash anch etu tuyilejinap. w21.04 11-12 par. 11-12

Kuswimp kwa mashakamin chiding chikokujol chikash kud antu avud pakach petu. Antu amwing asala mivu yivud mu mudimu wa chisu chawonsu ayiswimpa yisend. Akwau imika mudimu wau wading ukatinau nakash mulong wa upal. Chiyipinap kwau kwov ushon anch mashakamin metu maswimp mu mutapu winou. Tukutwish kwijidin nawamp mashakamin anch twasal usu wa kuman yom mud muyimenau kud Yehova. Yehova usadin yom yivud nakash nlel, ni tukwet dilau dijim dia kwikal ambay nend a mudimu. (1 Kor. 3:9) Rukat ra Yehova mulong wetwetu rikuswimpap. Chawiy, anch kuswimp kusadikina mu dirijek kwaswimp mashakamin mey, ipuk kusutish chisu chivud nakash mulong wa kutong piur pa mayingishin maletishang kuswimp kwinoku. Pa ndond pa kutongijokin pa “machuku masutila,” lembil chakwel Yehova akukwash kuman uwamp udia mu kuswimp kwinoku. (Mul. 7:10) Kulam chitongijok chiwamp. Anch twasal mwamu, tukudandamen kwikal ni musangar ni kushal ashinshamena ap anch mashakamin ma mwom maswimp. w22.03 17 par. 11-12

Anany amekeshidiningay Yehova rukat rudimukina? Bibil ulejen anch tukutwish kukat yom yivud, mud “kudim,” “maar ni kudia many,” “kufumb,” “ronganyin,” “manangu.” Yiney yid kwau yom yikemp twajimbula kal. (2 Jsng. 26:10; Jnsw. 12:1; 21:17; 29:3) Pakwez, rukat rudimukina kakurumekeshinangap pa yom; akat kurimekesh ching pad antu. Pakwez Yehova kakumekeshangap rukat rudimukina pad muntu win mwawonsu. Urimekeshining ching pad antu adia mu urund wa pakampwil ni ndiy. Nzamb wetu ud ushinshamena kud arund nend. Utongin kuyisadin yom yiwamp, ni ukudandamen kuyikat. Yehova wayimekeshina antu awonsu rukat. Yesu wamuleja Nikodem anch: “Nzamb wakata ngand [antu] nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kikal nich mwom wa chikupu.”​—Yoh. 3:1, 16; Mat. 5:44, 45. w21.11 2 par. 3; 3 par. 6-7

Mwom mu mangand minam ukasiken ni kurutu tuyila oku tukutwish kurish ni yakamish yikash nakash. (Mat. 24:21) Chakin kamu, tuchingedin nich impu nakash dichuku dikupwa yom yiney yawonsu ni kuyivuramen kamu chikupu! (Isay 65:16, 17) Chakin kamu, tukwet kuswir kwa kudandamen kukasikesh mwikadil wetu wa kujijaman. Mulong wak? Mulong Yesu walonda anch: “Imanany daang, chad ukez kipandishany ayinen.” (Luka 21:19) Kutongijokin mutapu utwishinau akwetu kujijamen yakamish ya mutapu umwing ni yitukweta kukutwish kukasikesh mwikadil wetu wa kujijaman. Nany udia chilakej chipandikena kuwap cha kujijaman? Ud Yehova Nzamb. Pamwing ap wiyipwil anch mutapu ik? Inge, chakul chinech chikutwish kukushimokish ni chitin kutong nakash. Mangand minam amatakedin kud Djabul, ni mizwil too nich yakamish. Yehova ukwet usu wa kuyipwish kapamp kamwing, pakwez uchingedin mulong wa kuyipwish mu machuku ma kurutu. (Rom 9:22) Mu chisu chinech, Nzamb wetu udandamedin kujijaman ni kuchingel dichuku diatekay kal chakwel diwanyin. w21.07 8 par. 2-4