Ngond wa 7

Kumopat muntu mu chikumangen kud kutenchik kwa Yehova. Kupup kwend kwa rukat kumekeshin anch umubangidin muntu mwawonsu, kuwejinaku ni muntu wasalang uyimp. Antu amwing mu chikumangen akutwish kulond anch kakwatangap mupak uwamp wa kumupup muntu ap kumwopat. Pakwez vurik anch yisu yivud antu a mutapu winou kakatiningap kulond piur pa yom yiyimp yasalangay muntu warumbukang. Tufanyidin kwijik anch tukwetap uman wawonsu. Chawiy, chid cha manangu kwikal nich kashinsh anch amakurump a mu komite wa dirumburish asalang usu wa kulondul nawamp mbil ja Bibil ni kurumburish “mu dijin dia [Yehova].” (2 Jsng. 19:6) Anch walimish mupak wa amakurump wa kumwopat muntu tukatina, ukutwish kumukwash chakwel amuchirikina Yehova. Elizabeth ulondin anch: “Chading chinkasikedin nakash pa kulik kubombakan ni mwanetu ikundj wading wopatinau kal. Pakwez kupwa kwa kumuchirikin Yehova, mwanam walonda anch wading mupak uwamp wa kumwopat. Mu kusut kwa chisu, walonda anch wileja yom yivud mulong wa mupak winou.” w21.09 28-29 par. 11-12

Tong bil piur pa mwadiamufu winawa. Pakad kwidjidjek, chimeken anch wading ukatin kumwinkish Yehova yom yivud. Pakwez wamwinkisha kwend yadingay nich; yom yend ya usey yadingay nich. Ni Yesu wading wij anch mulambu wend wading wa usey nakash ku mes ma Tatukwend. Dilejan dia usey twilejidinaku diawiy ed: Yehova ukat kusangar anch twamwinkish yom ya usey tukweta​—anch twamusadin mudimu nich muchim wetu wawonsu ni mupim wetu wawonsu. (Mat. 22:37; Kol. 3:23) Yehova ukat kusangar anch waman usu tusadina! Mbil jidia mu dilejan dined tukutwish kand kujisadin pantaliken ni uvud wa chisu ni usu tusadina mulong wa kumwifukwil Yehova, mud kulejan ni kukumangan ku yikumangan yetu. Mutapu ik ukutwisha kusadin dilejan wilejidina ku rusangu ra mwadiamufu? Tongijokin piur pa antu umena anch akwet kuswir kwa kuyinkish kashinsh anch usu usadinau umusangareshin Yehova. ukutwish kwikal pamwing ap mukadivar ap nambaz umwing wananapina kal wifishina nich ap wiyovila anch kakwetap usey mulong mayej ap kuziy kwa mujimbu kumukangeshin kusal yom yivud mu mudimu wa Yehova. w21.04 6 par. 17, 19-20

Yehova wij chisu chidia chiwamp nakash chifanyidina kupwish uyimp mu mangand. Kushimpish muchim kwend kwakwashin kukumangej chisak chipandikena kujimb, mudia mamiliyon ma antu amwifukwidina ni kumushiman. Antu awonsu inay akwet musangar nakash mulong Yehova wajijamen mu chisu chilemp, ni chinech chayikwashin kuvadik, kwilej kumukat, ni kwipan kud ndiy. Kujijaman kwa Yehova kukwijikan chad patok chisu chikuyiyukishay nich musangar mamiliyon ma atushalapol end ajijamena djat ni kwinsudien! Chikalap nchik kusansan ni mar mawonsu maletishinay Satan, Yehova udandamedin kwikal ‘Nzamb wa musangar.’ (1 Tim. 1:11) Niyetu tukutwish kulam musangar wetu patuchingedina nich kushimpish muchim chisu chikutumbishay Yehova dijin diend ni ukaleng wend, pakupwishay uyimp wawonsu ni milong yawonsu turishina nich. Komb el tukwatany mupak wa kujijaman ni kutan rongoj kusutin kwijik anch Tatukwetu wa mwiur niyend udandamedin kujijaman. w21.07 13 par. 18-19

Mu mivu chitot ya kusambish antu avud kamwitiyijap Yesu. Awiy amukwatang kusu kwau mud mwan a nsong a mbay wavadikina ku makunku ma Nazaret. Ap Natanyel washikena kwikal mwin kwilej wa Yesu walonda kwinsambishin anch: “Ov, ku Nazaret kukutwish kudiokal chom chiwamp?” Pamwing ap wading utongijokidin pa uprofet ulejenau mu Mike 5:1, wasambela kulejan anch Mesia ukuvadikin ku Betlehem, kadiap ku Nazaret. Yom ik yilejenau mu Mifund? Muprofet Isay wasambela kulejan anch akankuny a Yesu kakushinshikinap yom yikusadika mu “mwom wend.” (Isay 53:8) Anch antu inay itekina chisu cha kushinshikin nsangu jinej, mud ing afanyina kujingunin anch Yesu wavadikina ku Betlehem ni anch wading mwan wa ku dijuku dia Mwant David. (Luka 2:4-7) Yesu wavadikina kwi ndond yilejenau mu uprofet udia mu Mike 5:1. Chad yom ik yayikangesha kujingunin yom yiney? Mulong akwatang mipak ya kadwubudwubu pakad kushinshikin uman wawonsu, chawiy chakanganyau kumwitiyij Yesu. w21.05 2-3 par. 4-6

Bibil ukwet yilakej yiwamp ya antu ayukishau mulong atesha yiyul. Shinshikin chilakej cha Job. Ap anch wading umwovil Nzamb wom, kadingap muntu uwanyidina. Pading parishinay ni yakamish, walonda yom yimekeshina yitongijok yiyimp. Mud chibudikin, amuyula kud Elihu ni Yehova. Mutapu ik wasalay Job? Witiya yiyul nich kwikepish. Walonda anch: “Nalondil yom yinakad am amwinam kwov nawamp . . . chawiy nifish kal nich mulong wa mazu mam, katat nakarumun kal muchim wam, ni kwibumburol pansh kurutu kwey.” (Job 42:3-6, 12-17) Wamekesha kwikepish kwend pitiyay chiyul chamwinkishau kud Elihu, ap anch Elihu wading mwanikanch nakash ku mes ma Job. (Job 32:6, 7) Kwikepish kukutwish kutukwash kusadin chiyul ap anch twatong anch chadiap chiwanyidina, ap anch muntu wachipanang ud mwanikanch nakash ku mes metu. Nany pakach petu wakading kukat kuya kurutu mu kukudish dibuj dia spiritu, ni kuwapish mutapu wetu wa kusal mudimu wa kulejan? w22.02 11 par. 8; 12 par. 12

In Kristu awonsu akwet chisend cha kukasikesh rukat ni chisambu mu chikumangen chakwel kangal muntu ap umwing wiyov anch ud amwinend. Yom tusadina ni tulondina yikutwish kuyikasikesh nakash antu akwau! Yom ik ukutwisha kusal mulong wa kuyikwash antu adia Atuman ayinau mu majuku mau chakwel iyova anch akadivar nau anambaz adia mu chikumangen ayikatin? Sal usu wa kuta urund nau antu asu. Tukutwish kusambish kuta urund nau antu asu kusutil kuyaak nich chirungul mu chikumangen. (Rom 15:7) Pakwez kud yom yikwau tufanyidina kusal kusut kwau kwimen pa kuyaak. Tufanyidin kukasikesh urund winou mu kusut kwa chisu. Chawiy, ikal muntu muwamp ni mekesh anch uyibangidin antu asu. Pakad kumwipul nsangu jend ja ujindj, sal usu wa kwijik milong yirishinay nich. Chikutwish kuyikasiken antu amwing kulejan mutapu wiyovilau. Chawiy, babal chakwel kangal wayishindil kulond. Pakwez, yipula yipul nich nkeu ni tang matu nich kushimpish muchim ku yakul yau. Chilakej, ukutwish kuyipul piur pa mutapu washikedinau kwijik uyakin. w21.06 11 par. 13-14

Tukwet musangar nakash wa kumusadin Yehova mu umwing mud “chisak chimwing” chikweta “kafung wau umwing”! Buku Arijekinau Mulong wa Kusal Rusot ra Yehova, paj wa 165 ulondin anch: “Mulong utanidinamu mu uumwing winou, niyey ukwet chisend cha kuulam.” Chawiy tufanyidin kusal “usu wa kuyiman akadivar ni anambaz netu mud muyimenay Yehova.” Yehova utukwatin nich usey nakash etu awonsu tudia “anikanch.” Ov, niyey wawiy mutapu uyimena akadivar ni anambaz ney? Yehova ukat kuman ni kukwat nich usey chom chawonsu tukata kusal mulong wa kuyikwash ni kuyibangin. (Mat. 10:42) Tuyikatin ambay netu in Kristu. Chawiy tukwatin mupak anch “kitukusalap chom cha kumupwakesh mwanamakwetu mwin Kristu.” (Rom 14:13) Tuyimen akadivar ni anambaz anch ad awamp kutupandakanamu ni tukatin kuyilikishin nich muchim wawonsu. Chawiy, kangal twitiy anch yom yisadinau antu akwau yitupwakesh. Pakwez, el tusalany usu wa “kukimb yisu yawonsu mutapu wa kulet chisambu ni kukasikeshijan muntu ni mukwau.”​—Rom 14:19. w21.06 24 par. 16-17

Anch twilej nawamp ni kusadin yiyul ya Dizu dia Nzamb ni dirijek diend, tukukudish pakemp pakemp mikadil ya win Kristu. Tukushiken kand kumwijik Nzamb nawamp nakash. Yesu wasadina chilakej chimwing mulong wa kurumburil mutapu uruu wa Want wa Nzamb tulejena udia mud karubut kakemp kakatap kupam pakemp pakemp mu michim ya antu awamp. Walonda anch: “Mbut jinej jikat kuminy ni kukul machuku mawonsu . . . Ndiy [mwin kukus] kijap mutapu ujikata kukul. Ku usu wa divu idinau, mbut jakusau jikat kusapuk mayij, jimish mavumu, chad jabudish mbut.” (Mar. 4:27, 28) Yesu wading ufidin kurumburil anch mud mutapu ukata mutond kupam pakemp pakemp, muntu ukata kwitiy uruu wa Want niyend ukat kukul mu spiritu pakemp pakemp. Chilakej, anch antu twilejina nau Bibil asej piswimp ni Yehova, tukat kusambish kuman mutapu uswimpinau yom yivud mu mwom wau. (Efes 4:22-24) Pakwez tufanyidin kuvurik anch Yehova ndiy upamishina karubut kinak. w21.08 8-9 par. 4-5

Tukutwish kwikal ni musangar anch twaukimb kwi ndond kuwamp. Muntu ukata kushinshikin pa ‘yom yikwetay,’ chilakej pa mashakamin mend ma katat, ukweting musangar. Pakwez, muntu ukweta maku mayimp ukat kudandamen kuchingel yom yikulika kwau kuwanyin. Chawiy, dilejan ik tudioshinaku? Mulong wa kwikal ni musangar, tufanyidin kushinshikin pa yom tukweta ni yom tumena anch tukwet mutapu wa kuyiwanyish. Ov, chitwishikin kusanger yom ukweta kal? Antu avud akat kutong anch chiswapelap, mulong mu uyakin, mu kusut kwa chisu, tukat kwikal kand ni impu ya kwikal ni yom yisu. Pakwez ijik anch chiswapel. Tukutwish kusanger “yom tukweta.” Mutapu ik tukutwisha kusal mwamu? Mulong wa kwakul ku chipul chinech, shinshikin chishimu cha Yesu cha atalent, chidia mu Mateu 25:14-30. Ni shinshikin pa mutapu tukutwisha kwikal ni musangar ni ap kand kuvudish musangar winou mu yiyukish tukweta katat. w21.08 21 par. 5-6

Yehova uyibangidin chipandikena antu “akweta michim yinenganena.” Etu awonsu tukutwish kuyikasikesh akadivar nau anambaz netu akatish, kadiap ching chisend cha amakurump. Mutapu umwing tukutwisha kuyikasikesh ud kumekesh anch tuyikatin kamu. Yehova ukatin tuyikwasha kuman anch uyikatin nakash. (Jnsw. 19:17) Tukutwish kand kuyikwash akadivar nau anambaz netu kusutin kwikal ikepishina ni kulik kwibaz mulong wa ukaliweny tukweta. Tufanyidinap kwipwitin nkeu ja antu, mulong tusotinap kuyibachik kutwovil mukau. Pakwez, tufanyidin kusadin ukaliweny ni ronganyin retu mulong wa kukasikeshijan nau akadivar netu. (1 Pita 4:10, 11) Tukutwish kwilej yom yivud piur pa mutapu wa kuyisadin akadivar netu kusutin kushinshikin mutapu Yesu wayisadinangay in kwilejend. Yesu wading muntu mujim nakash. Pakwez, wading ‘ushimpishina muchim ni wikepishina.’ (Mat. 11:28-30) Wafundishang nich mazu ni yilakej yiswapela kutesh yapukunang michim ya in kumutesh.​—Luka 10:21. w21.07 23 par. 11-12

Kwat mupak wa kwambamb nau amapal. Chid chakin anch pamwing ap mes mau mamenap kand nawamp, katwishinap kand kwend mau mau, ap kand katwishinap kulond ni usu, pakwez achid ansand mu manangu, ni isadin kal ‘dijin diwamp’ ku mes ma Yehova. (Mul. 7:1) Vurik diyingishin dimubachikina Yehova kuyikwat nich usey. Dandamen kuyilimish. Ikal mud Elisha. Wadandamena kushakam piswimp ni Elija djat ni kuupal wend. Elisha wamuleja Elija tupamp tusatu anch: “Am kinikukushap.” (2 Ant 2:2, 4, 6) Mekesh anch uyibangidin kamu amapal kusutin kuyipol yipul nich kalimish. (Jnsw. 1:5; 20:5; 1 Tim. 5:1, 2) Yipula yipul mud yilondwilaku ey: “Chisu wading nsand, yom ik yakwinkisha kashinsh anch watan kal uyakin?” “Yom wamena mu mwom wey yakukwashin nchik kusej piswimp ni Yehova?” “Yom ik yikata kukukwash kulam musangar wey mu mudimu wa Yehova?” (1 Tim. 6:6-8) Kupwa mutesha nawamp chisu chikulejinay rusangu rend. w21.09 5 par. 14; 7 par. 15

Anch wasal usu wa kulejan ni kwikadish in kwilej, umekeshin anch umukatin Nzamb. (1 Yoh. 5:3) Tongijok bil: Rukat rey mulong wa Yehova rawiy rakubachika kusambish kulejan ku chis ni chis. Ov, chading chiswapel kuziyin kwi mbil yiney? Chimeken anch bwat. Chisu wakokala kapamp ka kusambish ku chis chakusambish, ov, wiyakamishaku? Inge! Pakwez, mulong wading wij anch Yesu ndiy ukatina anch usal mudimu winou, waziyina kwi mbil yiney. Ni mu kusut kwa chisu chimeken anch chakuswapedin chad kusal mudimu wa kulejan. Chad chid nchik piur pa kutakel dilejan dia Bibil? Ov, ukweting wom wa kusal mwamu? Pamwing ap. Pakwez anch wamwit Yehova chakwel akukwash kupandikan wom ni chakwel akwinkish kutakaman kwa kumwit muntu mulong wa kusambish kwilej nend Bibil, Yehova ukutwish kukukwash kukasikesh impu yey ya kwikadish in kwilej. w21.07 3 par. 7

Pakur muswik amutekang chijingidij mulong wa kwijik nsalejend. Chilik chimwing, antu awonsu nlel akatin anch muntu ni muntu ikal ni chijingidij cha chifanakesh ku chikas ap pa mpal. Akukat anch muntu ni muntu amekesh kusutin yitongijok ni yisal yend anch ukwashin maguvernema. Ov, tukwitiy chijingidij chinech cha chifanakesh ni kukwash maguvernema? Antu akulika kuyitek chijingidij chinech akurish ni yikokujol ni akwikal mu ubaj. Mukand wa Kujingunik urumbuburil anch: “Kwikil muntu ukutwisha kuland ap kulandish chom, ching anch ukwet chijingidij chinech.” (Kuj. 13:17) Pakwez antu a Nzamb ij yom yikusalay Nzamb kud antu akweta chijingidij chilejenau mu Kujingunik 14:9, 10. Pa ndond pa kwitiy chijingidij chinech pa jimpal, antu a Nzamb akufund mu chifanakesh pa makas mau anch: ‘Nid wa Yehova.’ (Isay 44:5) Katat chawiy chisu cha kwikal nich kashinsh anch kushinshaman kwetu kud Yehova kud kukash. Anch twasal mwamu, Yehova ukwikal ni musangar wa kulond anch tud ayend! w21.09 18 par. 15-16

Antu akwau akutwish kutukwash kuwanyish mudimu wetu wa kulejan. Kambuy Paul wamuleja Timote milad yasadinangay ndiy mulong wa kufundish ni kulejan rusangu ruwamp, kupwa wamukasikesha Timote chakwel ni ndiy ayifumb antu akwau. (1 Kor. 4:17) Mud Timote, niyetu akutwish kutukwash nakash kud akadivar ni anambaz a mu chikumangen chetu akweta ukaliweny. Chikwau kand, ufanyidin kumulembil Yehova chakwel akukwash. Chisu chawonsu ukimbina kuya mu mudimu wa kulejan, kurutu kwa kuya mulembila Yehova chakwel akutakel. Pakad ukwash wa spiritu wend utumbila, tukutwishap kusal chom. (Kus. 127:1; Luka 11:13) Piumulembila Yehova chakwel akukwash, ovikesh nawamp yom. Chilakej, mwita chakwel akukwash kutan muntu udia mu mwikadil uwanyidina ni ukweta kuswir kwa kutesh uyakin. Ufanyidin kand kwitekin chisu cha kusal dilejan dia muntu panrend. Dizu dia Nzamb dilondin anch: ‘Shinshikinany ayinen rusot ra Nzamb, yom yiwamp, yisangareshina ni yiwanyidina.’ (Rom 12:2) Anch etu ayinetu tukwet kashinsh anch twij uyakin piur pa Nzamb, mu mudimu wa kulejan tukuyifundish kand antu nich kashinsh kawonsu. w21.05 18 par. 14-16

Pamwing ap wilejin Bibil ni muntu, ni ukat kusal usu nakash mulong wa kwikal mulej muwamp. Ukat kulembil nakash mulong wa mwin kwilej wey. Pakwez kasadidinap yom yilejinay mu mwom wend ni ukimbin kwimik dilejan dia Bibil. Ap kand pamwing ap kandikal umukwashangap muntu kushiken ku dibatish. Ov, chinech chimekeshin anch kud kurumbuk kwey ni Yehova kayukishinap kwend mudimu wey wa kulejan? Yehova ukat kushinshikinang pa usu tusadina ni kujijaman kwetu. Ku mes ma Yehova, tutwishin mudimu wetu wa kulejan anch twalejan nich mushiku ni rukat ap anch antu alik kwau kututesh. Paul wafunda anch: “Nzamb utentamin, ndiy kakutwishap kuvuramen [midimu] yen ap rukat ruumekeshinanya [mulong] wa dijin diend, piukat kuyikwashany [atumbila] kudiokal pakur ni katat.” (Heb. 6:10) Yehova uvurikin usu tusadina ni rukat retu, ap anch usu tusadina ukwetap yibudikin yiwamp. Chawiy, yom yafunday Paul kud in Korint mu mufund wa nlel yitutadin kand niyetu. w21.10 25 par. 4-6

Yesu wamekesha anch wading muntu muwamp ni mwin rukat kusutin mutapu wayisadinangay in kwilejend. Wading wij anch ading akwet ukaliweny ni mashakamin kushalijan. Chawiy kadingap ni yisend ya mutapu umwing; awonsu kasalangap yom yawiy yimwing ni kadingap ni yibudikin ya mutapu umwing mu mudimu wau. Pakwez, Yesu wayijikitishang nakash mulong wa usu wading usadinay muntu ni muntu. Yesu wamekesha mwamu patok mu chishimu cha talent. Mu chishimu chinech, mwant wamwinkisha kashalapol ni kashalapol mudimu, “muntu ni muntu mudi mwading manangu mend.” Umwing wa atushalapol inay aad wavudisha nfalang jend kumusutamu mukwau. Pakwez mwant wayijikitisha awonsu aad nich mazu ma mutapu umwing anch: “Chiwamp, ey udi kashalapol muwamp, mwin yakin!” (Mat. 25:14-23) Yesu ukat kutumekeshin chisu chawonsu kuwap ni rukat rend. Wij anch etu awonsu tukwet ukaliweny ni mashakamin kushalijan, ni ukat kusanger yom tumusadidina nich usu wetu wawonsu. Tufanyidin kuyisadin akwetu mud mwasalangay Yesu. w21.07 23 par. 12-14

Mwant David kamekeshap riy chisu chawonsu. Chilakej, David wasula ku muchim ni wakwata mupak wa kumujip Nabal ikundj wading uchinchikina muchim, ni antu awonsu ading mu chikumbu chend, chisu chamuburenay David kalimish ni kulik kumwinkish yakudia pamwing ni amakundj adingay nend. Chaying Abigayil mband a Nabal wadinga mband muwamp ni ushimpishina muchim, wapana pakad kulab yakudia kud David, ni David walika kwichil mash. (1 Sam. 25:9-22, 32-35) Ijik anch chisu chajimanay David nakash, wakwata mupak anch Nabal ni antu awonsu a kwol kwend chifanyidin kuyijip. Kupwa, David walonda kand anch ikundj mpich wa mu chilakej cha Natan chading chifanyidin kumujip mulong wa yom yasalay. Kapamp kinak ka kaad, tukutwish kwiyipul anch mulong wak ikundj mwin ranaken winou washikena ku kurumburish kwa chisum mwamu. Shinshikin mutapu wasadika yom. Pa chisu chinicha, David wading ni kom kamufishina nich. Anch muntu wayirumburish akwau kwa chisum, chimekeshin anch kakweta urund uwamp ni Yehova. w21.10 12 par. 17-18; 13 par. 20

Twilejin kusutin mazu ma mufund wetu wa dichuku anch, tukutwish kumwimburij Yehova udia chilakej chijim cha kutumb. Tufanyidin kwikal atumbila mu yisal yetu. Chinech chikutwish kumekan mud chikasiken mulong tud antu akad kuwanyin. Kambuy Pita amwinend warumboka nakash; pakwez ap mwamu, chilakej chend chimekeshin anch tukutwish kwikal atumbila. Antu avud akat kutong anch antu atumbila ad antu akad kusipolang, akata kudjal mizabu, ni amekena ku mes mud ilimishina nakash. Pakwez kimwawiyap mutapu udingau antu atumbila. Yehova, udia utumbila, amulejen anch ud ‘Nzamb wa musangar.’ (1 Tim. 1:11) Awonsu akata kumwifukwil ayilejen anch ‘ayukin.’ (Kus. 144:15) Yesu wayifisha nich antu awonsu adjalang yidjal mulong wa kushalijan ni antu akwau ni asalang yom yiwamp patok mulong wa kwimekesh anch atentamin. (Mat. 6:1; Mar. 12:38) Mulong tud in Kristu, twij nawamp chirumburikina kwikal atumbila kusutin yom twilejina mu Bibil. Tukwet kashinsh anch Nzamb wetu wa rukat kakutwishap kutwinkish mbil jimenay anch tukutwishap kuziyin. w21.12 2 par. 1, 3

Yom yin yawonsu tukweta atwinkishay kud Nzamb. Pamwing ap chom cha usey nakash pakach pa yipan yiney did dilau tukweta dia kumwifukwil ndiy. Tukat kumekesh kud Yehova anch tumukatin kusutin ‘kuziyin kwi mbil jend.’ (1 Yoh. 5:3) Pakach pa mbil jikatinay Yehova anch tuziyin pad mbil yatwinkishay Yesu ya kwikadish in kwilej ni kuyibatish. (Mat. 28:19) Utulejin kand kukatijan umwing ni mukwau. (Yoh. 13:35) Yehova ukuyak antu amuziyidina mu dijuku didia pa mangand mawonsu dia in kumwifukwil end. (Kus. 15:1, 2) Yikata antu akwau. Rukat ud mwikadil wa kusambish wa Yehova. (1 Yoh. 4:8) Yehova watukata kurutu tumwijika. (1 Yoh. 4:9, 10) Tukat kumwimburij anch twayikat antu akwau. (Efes 5:1) Mutapu upandikena kuwap tukutwisha kumekesh anch tuyikatin antu ud kuyikwash kwilej piur pa Yehova pa kuchidia chisu ap. (Mateu 9:36-38) Anch twasal mwamu, tuyikwashin kwijik yom yifanyidinau kusal mulong wa kwikal mu dijuku dia Nzamb. w21.08 5-6 par 13-14

Rukat rikurikina radingay nich Yesu pantaliken ni Yehova ramubachika kwipan mulong wa Tatukwend ni mulong wetwetu. (Yoh. 14:31) Yesu wamekesha kujimb kwa rukat rend pantaliken ni antu kusutin mutapu wading mashakamin ma mwom wend panap pa divu. Dichuku diawonsu, wading mwin rukat ni ranaken, ap pa yisu yamupompatangau kud antu amwing. Mutapu umwing wa pakampwil wayimekeshinangay antu rukat wading kusutin kuyifundish piur pa Want wa Nzamb. (Luka 4:43, 44) Yesu wamekesha kand rukat rend rijim nakash mulong wa Nzamb ni antu kusutin kwitiy kuman mar ni kufa rufu risansena mu makas ma akankuny nend. Kusutin kusal mwamu, watufungwila njil ya kutambul mwom wa chikupu. Twipana kud Yehova ni kutambul dibatish mulong tumukatin Tatukwetu wa mwiur. Chawiy, mud Yesu, tukutwish kumekesh rukat retu mulong wa Yehova kusutin mutapu tuyimena antu akwau. Kambuy Yohan wafunda anch: “Anch muntu kamukatilap mwanamakwend umenay ku mes, kakutwishap kumukat Nzamb wakad kumekan ku mes.”​—1 Yoh. 4:20. w22.03 10 par. 8-9

Pakwez ap anch tukatining kusutish chisu pamwing ni Yehova, yisu yivud chituswapediningap kusal mwamu. Tukwatiken nakash mu mwom, ni chinech chikutwish kusal anch chitukasiken kutan chisu cha kusal mijikit ya mu spiritu. Mudimu wa ku mujimbu, yisend ya dijuku, ni midimu yikwau, yikutwish kutusend chisu chijim mu chilik cha kwiyov anch tukwatiken nakash, ni tukutwishap kwetu kulembil, kwilej, ni kutongijokin pa yom twilejina. Kud kand chom chikwau chikutwisha kutusend chisu nakash. Anch tubabelap, tukutwish kulikidil midimu yidia kwau yiwamp kutusend chisu chijim nakash tufanyidina kusadin mulong wa kumusejin Yehova piswimp. Chilakej, chid cha usey kwikal ni chisu cha kwipuwangej. Pakwez ap mwamu, kwipuwangej kumwing kukutwish kutudil chisu mu chilik cha kushal ni kachisu kakemp mulong wa mijikit ya mu spiritu. Tufanyidin kuvurik anch kwipuwangej chidiap chom cha kusambish chikweta usey nakash mu mwom.​—Jnsw. 25:27; 1 Tim. 4:8. w22.01 26 par. 2-3

Chisu Yehova chayilejay in Isarel kuyikat amutej nau, kayilejap anch afanyina kuyikat ching antu a chikit chau ap a ngand yau. Ayileja kand kuyikat aeny adinga pakach pau. Tutanin uruu winou mu In Levi 19:33, 34. Mweny afanyina kumukwat mud “mwin ngand,” ni in Isarel afanyina ‘kumukat’ mud ayinau. Chilakej, in Isarel afanyina kuyitiy aeny ni atuzwendj kuboburol yakudia mu yir mud mwading chijil. (Lev. 19:9, 10) Mbil piur pa kuyikat aeny yiyitadin kand in Kristu nlel. (Luka 10:30-37) Mutapu ik? Nlel kud mamiliyon ma antu abukidina mu jingand jikwau, ni pamwing ap amwing ashich ney piswimp. Chid cha usey kuyikwat amakundj, amband, ni an inay nich usey ni kalimish. w21.12 12 par. 16

Anch twasal usu nakash wa kuchingejin mu umutakel wa Yehova nlel, tukwikal kand nich kashinsh nakash anch ukutupandish mu machuku ma kurutu. Chitin kwikal ni ritiy ni muchim wa kumuchingejin Yehova mulong wa kumwit mukurump wetu wa mudimu chakwel atwinkish konje mulong wa kuya ku chitentam, ap mulong wa kutuwapishinaku program wetu wa mudimu chakwel tutwish kukumangan ku yikumangan ni kwipan mu mudimu wa kulejan. Katat tong bil mud anch ntakel wetu wa mudimu walik kwend ni twashadish mudimu wetu. Ov, tukwet ritiy anch Yehova kakutulikap ni anch ukudandamen kutuwanyishin maswir metu? (Heb. 13:5) Antu adia mu mudimu wa chisu chawonsu akutwish kurumburil uman umekeshina mutapu Yehova wayikwashay chisu chadingau mu maswir nakash. Yehova ud ushinshamena. Mulong Yehova ud ku mutambu wetu, tukwetap diyingishin dia kwov wom mulong wa yom yikushikena kurutu. Nzamb wetu kakutwishap kutudjibul anch twadandamen kutek yisakin ya Want pa ndond ya kusambish mu mwom wetu. w22.01 7 par. 16-17

Mutapu ik ukutwishau kupak ruchingej retu mudiau amakurump? Tong bil mud anch muntu wopatangau ud kamu murund wa piswimp nakash. Tukutwish kutong anch pamwing ap amakurump kashinshikinangap kamu uman wawonsu, ap kand kushiken kwiyipul anch arumburishang kamu mulong kukwatijan ni rusot ra Yehova. Yom ik yikutwisha kutukwash kwikal ni chitongijok chiwamp piur pa mupak wakwatangau amakurump? Tufanyidin kuvurik anch mupak wa kumwopat muntu rid rusot ra Yehova, ni anch chid mulong wa kukwash chikumangen ni muntu wasalang chitil. Anch amwitiyij muntu wasalang chitil wakad kukarumuk kushal mu chikumangen, ukutwish kuyishikij antu akwau ku kusal niyau chitil. (Gal. 5:9) Chikwau kand, kakutwishap kuman kujimb kwa chitil chend, ni kakwikalap ni rusot ra kuswimp yitongijok ni yisal yend mulong wa kwikal kand ni dilau dia Yehova. (Mul. 8:11) Tukutwish kwikal nich kashinsh anch chisu chikatau kukwat mupak anch chifanyidin kumopat muntu ap bwat, amakurump ijing anch chid chisend chimwing chijim nakash chikwetau. w22.02 5-6 par. 13-14

Kushimpish muchim ni kudimuk kud kwa usey, pakampwil anch muntu walik kapamp ka kusambish yiyul yimedina pa Bibil. Mukurump ufanyidin kusal usu wa kulik kujiman anch muntu walik kutesh kapamp kamwing chiyul chend ap kuchisadin. Chawiy, chisu chilembilay mukurump pa ndond ya amwinend, ufanyidin kumwit Yehova chakwel amuyukish muntu ukuyulay ni amukwash kutesh mayingishin ma chiyul chinech ni kuchisadin. Mukadivar ukuyulau ukutwish kwikal ni kuswir kwa chisu mulong wa kutongijokin pa mazu mamulejangau. Anch mukurump ud ushimpishina muchim ni udimukina, muntu uyudilau kakushinshikinap pa mutapu umuyudinau, pakwez pa uruu udia mu chiyul. Chakin kamu, chiyul chifanyidin chisu chawonsu kwimen pa Dizu dia Nzamb. Tukatin anch chiyul chetu chikal chiwamp, pakwez chikala kand chin “kusangarish muchim.”​—Jnsw. 27:9. w22.02 18 par. 17, 19

Anch twalembil mulong wa kwit usu chakwel tutwisha kujijamen chikokujol ap kulikap chisal chiyimp, tukutwish kwiyov anch Yehova ulabin nakash ni kwakul ku malembil metu. Mulong wak Yehova kakatap kwakul malembil min mawonsu kapamp kamwing? Ukat kuman malembil tusadina nich muchim wetu wawonsu mud uman umekeshina ritiy retu. (Heb. 11:6) Yehova ukat kusangar kand pameningay mutapu twikasikeshina kushakam kukwatijan ni malembil metu mulong wa kusal rusot rend. (1 Yoh. 3:22) Tufanyidin kushimpish muchim ni kusal kukwatijan ni malembil metu, ni kusal usu nakash wa kupandikan chaku ap chisal chiyimp. Yesu watukwasha kwijik anch malembil mamwing kakutwishap kumakul kapamp kamwing palonday anch: ‘Dandamenany kwit, ni akukwinkishany; dandamenany kukimb, ni ukutanany; dandamenany kukokal, ni akukwanzurilany; mulong muntu mwawonsu ukata kwit ukez kutambul, ni ukata kusurab ukez kutan, niyend ukata kukokal akez kamwanzuril.’​—Mat. 7:7, 8. w21.08 8 par. 1; 10 par. 9-10

Mulong wa kukasikesh ritiy mudiay Sakatang, chitin kudandamen kwilej Dizu dia Nzamb. (Jos. 1:8) Chilakej, shinshikin mutapu urumburilay Bibil nawamp yom yasadika kwasutin kal mivu yivud. Shinshikin kand uprofet udiamu wawanyidina kal, ni mutapu utanijadina yom yafundau antu kushalijan. Kusal mwamu kukutwish kukasikesh ritiy rey anch atutanga kud Sakatang ukweta rukat ni manangu ni ndiy wafundikisha Bibil. (2 Tim. 3:14; 2 Pita 1:21) Chisu wilejina Bibil, shinshikin mutapu ukutwisha yiyul yend kukukwash. Chilakej, Bibil watakela kubabeshan anch rukat ra nfalang rid ra ubaj ni rikat kulet “yakamish yivud.” (1 Tim. 6:9, 10; Jnsw. 28:20; Mat. 6:24) Chawiy, chiyul cha Bibil chilondina anch tufanyidinap kukat nfalang chid kamu cha ukwash nakash! Ov, wij yiyul yikwau ya Bibil wamena kal anch yid ya ukwash? Anch twatongijokin pa yiyul yiwamp yawonsu yidia mu Bibil, tukuman anch Sakatang wetu wa rukat wij yom yidia ya ukwash kud etu ni chisu chawonsu tukuchingejin yiyul yend. (Jak. 1:5) Mud chibudikin, tukwikal ni musangar mu mwom.​—Isay 48:17, 18. w21.08 17 par. 12; 18 par. 13

Anch ud ipal, ikal nich kashinsh anch Yehova uvurikin mudimu wamusadina piwading nsand. Wakwasha mudimu wa kulejan nich mushiku. Wajijamana mu yikokujol​—ap yikokujol yakusala nayimp nakash—​waziyina ni kulondin mbil ja Bibil jitentamina, wawanyisha nich kushinshaman yisend yikash yakwinkishau, ni wayifumba antu akwau. Wasala usu wa kulam musangar wey chikalap nchik kuswimpol kusadikina mu dirijek. Wayikwasha ni kuyikasikesh antu adia mu mudimu wa chisu chawonsu. Yehova Nzamb ukukatin nakash mulong wa kushinshaman kwey. Bibil ulondin anch Yehova “kakuyilikangap antwend [ashinshamena]”! (Kus. 37:28) Ukushidinamu anch: “Nikukulamany kushik ni piukunanapilanya.” (Isay 46:4) Chawiy, kangal watong anch mulong wananap kal, ukwetap kand usey mu dirijek dia Yehova. Ukwetany usey nakash! w21.09 3 par. 4

Yehova umekeshining riy mulong ukwet manangu nakash. Bibil ulondin anch “manangu madiokila mwiur . . . mizwil nich riy ni yisalijok yiwamp.” (Jak. 3:17) Mud nvaj ukweta rukat, Yehova wijing anch anend akutwish kutaninamu mu riy rend. (Isay 49:15) Mulong Yehova ukat kumekesh riy, antu end akwet ruchingej ra machuku ma kurutu chikalap nchik kuburen kuwanyin kwau. Chawiy, mulong Yehova ukwet manangu nakash, chisu chawonsu ukat kumekesh riy anch waman anch ukwet mayingishin ma kusal mwamu. Pakwez kud kand yisu yikatay Yehova kulik kumekesh riy rend. Nich manangu, kakatap kumekesh riy rend anch waman anch kusal mwamu kukutwish kumushikij muntu kudandamen mu uyimp wend. Tong bil anch kashalapol wa Nzamb wakwat mupak kwa kwikatin mulong wa kwiyandjik mwi njil ya chitil. Yom ik yifanyidina kumusal? Yehova wamupepila kambuy Paul kufund anch “kangal wovijanany nend muntu” winou. (1 Kor. 5:11) Muntu usadina uyimp pakad kukarumuk akat kumwopat mu chikumangen. Kusal mwamu kud kwa usey nakash mulong wa kuchidij akadivar nau anambaz ashinshamena ni kumekesh anch jinjil ja Nzamb jid jitumbila. w21.10 9-10 par. 7-8

Tukat kumwifukwil Yehova chisu tukwashina mudimu wa Want nich yipan yetu. In Isarel kafanyinangap kwimekesh kurutu kwa Yehova makas a makas. (Kuv. 16:16) Afanyinang kusend chipan kukwatijan ni pakwetidinay muntu. Mu kusal mwamu, amekeshang anch amujikitishin Yehova mulong wa yom yawonsu yasalangay mulong wa kuyikwash mu spiritu. Mutapu ik tukutwisha kumekesh rukat retu mulong wa Yehova ni kujikitish kwetu mulong wa yom yawonsu ya mu spiritu yitwinkishinay? Mutapu umwing tukutwisha kusal mwamu ud kupan nfalang mulong wa kukwash maswir ma chikumangen udia, ni mudimu wa pa mangand mawonsu kukwatijan ni mashakamin mey. Kambuy Paul wisambina chitongijok chinech palonday anch: “Anch wapanany nich muchim uwamp, Nzamb ukez kwitiy milambu yen mudi mudia yom yiukwetany[a] wakad kuchind yom yiwakadiany nich.” (2 Kor. 8:4, 12) Yehova ukat kusanger mulambu wawonsu tukata kupan nich muchim umwing, ap anch umeken kwau mud wa usweral.​—Mar. 12:42-44. w22.03 24 par. 13

Chid chakin anch amakurump kakutwishap kupwish yikokujol yin yawonsu yirishinau nich atushalapol a Yehova. Ap mwau, Yehova ukatin anch amakurump asal yawonsu yikutwishau mulong wa kuyikasikesh ni kuyiking amikoku end. Mutapu ik ukutwishau amakurump akwatakena mwamu kutan chisu cha kuyikwash akadivar ni anambaz adia mu maswir? Imburij chilakej cha kambuy Paul. Paul wakimbang mitapu ya kuyijikitish ni kuyikasikesh akadivar nend. Amakurump akutwish kwimburij chilakej chend cha rukat kusutin kuyisadin atushalapol a Yehova nich rukat. (1 Tes. 2:7) Paul wayinkisha ambay nend in Kristu kashinsh anch Yehova uyikatin, ni ndiy niyend uyikatin. (2 Kor. 2:4; Efes 2:4, 5) Paul wayisadinang antu a mu chikumangen mud arund nend, wasutishang nau chisu pamwing. Wamekesha anch uyichingejidin kusutin kuyilej patok piur pa wom wading wovilay ni kurumbok kwend. (2 Kor. 7:5; 1 Tim. 1:15) Chawiy, Paul kashinshikinap nakash pa milong yading yirishinay nich. Pakwez, wakata kuyikwash akadivar nend. w22.03 28 par. 9-10