Ngond wa 6

Mwadiamufu umen mar nakash ni chimeken anch kakwetap nfalang jiwanyidina mulong wa kuwanyish maswir mend. Pakwez, waya kal ku mushet umwing ku udjindj ni wadjubwilamu kal nfalang ja usweral jaad, chimeken anch jadjim kal kwa usweral pijawila kal mu mushet. Yesu wij anch wadjubul kal tufalang tukemp twaad twatazukangau anch lepta, nfalang jasadinangau pa chirung chinicha. Nfalang jinej jiwanyidinap ap mu kuland nich muswesu umwing, atujil ading ni usey wa pansh nakash. Mwadiamufu winou wamusangaresh kal Yesu nakash. Chawiy, wayitazuk kal in kwilejend, wamwisik kal mwadiamufu winou ni ukat kuyilej anch: “Mwadiamufu winou walambul kal mu chipau chinech yom yivud kupandakanamu antu akwau awonsu.” Kupwa warumburil anch: “Antu akwau [pakampwil ampich] awonsu alambula nfalang jivud mulong akwet kand jikwau jivud. Pakwez ndiy kazwendj mudiay omu watekangamu yawonsu yikwetay, yelangay kudia nich.” (Mar. 12:43, 44) Papanay mwadiamufu winou ushinshamena ka rufalang kawonsu kadingay nich, wamekesha anch umuchingejidin Yehova chakwel amukwash.​—Kus. 26:3. w21.04 6 par. 17-18

Padingay pa divu, Yesu walama chitongijok chiwamp piur pa mudimu wa kulejan, ni ukatin anch in kwilejend asal mwamu. (Yoh. 4:35, 36) Chisu chadingay Yesu pamwing nau in kwilejend, in kwilej inay alejanang nich mushiku nakash. (Luka 10:1, 5-11, 17) Pakwez kupwa kwa kumukas ni kumujip Yesu, in kwilej ashadisha mushiku mu chisu kanang. (Yoh. 16:32) Yesu pavumbukay, wayikasikesha chakwel ashinshikin pa mudimu wa kulejan. Ni kupwa kwa kuchirik mwiur, in kwilejend asambisha kand kulejan nich mushiku nakash, chawiy ayela kud akankuny nau mazu malejenau mu mufund wa nlel. Yesu watakela mudimu wa kulejan wasalau kud in Kristu a mu mivu chitot yakusambish, ni Yehova wayukisha mudimu wau, mulong wayikwasha kwikal ni yibudikin yiwamp. Chilakej, pa Pentekot wa muvu wa 33 C.C., antu piswimp 3000 ayibatisha. (Mid. 2:41) Ni in kwilej adandamena kuvul nakash. (Mid. 6:7) Pakwez Yesu wasambela kulejan anch mudimu wa kulejan ukwikal ni yibudikin yipandikena kuwap nakash mu machuku ma kwinsudiel.​—Yoh. 14:12; Mid. 1:8. w21.05 14 par. 1-2

Ov, uvurikin kapamp kakusambish wajingunina anch watan kal uyakin? Watonga anch muntu mwawonsu ukutwish kumitiyij pakad ntad. Wading ukweta kashinsh anch uruu wa Bibil ukutwish kuyikwash antu kwikal ni musangar katat ni kuyinkish ruchingej ripandikena kuwap mulong wa machuku ma kurutu. (Kus. 119:105) Chawiy wasambisha kuyilej nich mushiku nakash arund ney ni anamakwey yom wading wilejina. Pakwez yom ik yashikena? Cha ushon antu avud kitiyap yom wayileja. Tufanyidinap kushimok anch antu alik kwitiy uruu tukata kulejan. Yesu niyend amulika kud antu avud a pa chirung chend ap anch wasala yilay yading yimekeshina anch wading ni dilau dia Nzamb. Chilakej, Yesu wamuvumbula Lazar​—ni ap akankuny nend kadingap ni mutapu wa kutadik chilay chinech. Pakwez antakel a in Yuda kamwitiyijap Yesu mud Mesia. Kupwa akwata mupak wa kuyijip awonsu, Yesu ni Lazar!​—Yoh. 11:47, 48, 53; 12:9-11. w21.05 2 par. 1-2

Sal usu wa kukumangan pakad kujing. Program wa yikumangan ukukukasikesh ni ukutwish kand kwijikijan ni akadivar nau anambaz. Kimb arund mu chikumangen ukutwisha kwilejin ku yilakej yau, ap ashalijangena mivu ni yeyey ni ap anch en awonsu wadiokalanyap kwi ndond yimwing. Bibil utuvurishin anch “amapal” awiy akweta manangu. (Job 12:12) Amapal niyau akutwish kwilejin kud akadivar ansand ashinshamena. David wading mwanikanch nakash ku mes ma Jonatan, pakwez chinech chayikangeshap kuta urund wa piswimp. (1 Sam. 18:1) David ni Jonatan akwashijana kumusadin Yehova, chikalap nchik yikokujol yikash yarishau nich. (1 Sam. 23:16-18) Nambaz Irina udia Kaman amwinend mu dijuku diau ulondin anch: “Akadivar nau anambaz netu akutwish kwikal chakin kamu anvaj ap anamakwetu a mu spiritu. Yehova ukutwish kuyisadin chakwel kangal twiyova anch tud ayinetu.” Arund ney akatin kukukasikesh ni kukukwash, pakwez akwet kuswir anch uyilej maswir mey chakwel awiy akukwash. w21.06 10-11 par. 9-11

Yesu wapana chilakej cha mwant ni kashalapol wend. Mwant wamulikishina kashalapol wend chikal chijim nakash chakadiay kashalapol kwikal ni mutapu wa kufut. Kupwa, kashalapol winou walika kumulikishin kashalapol mukwau wading ni kachikal ka usweral. Mud chibudikin, mwant wamuteka kashalapol winou wakad riy mu rukan. Yom yasalay kashalapol yamusalap kwau ching ndiy nayimp, pakwez yayisala kand antu akwau nayimp. Chakusambish, wading muntu muyimp ni kamekeshap riy. Mulong rusangu rend rilejen yom yamusalay kashalapol mukwau anch: “Waya wamutwal mu rukan, wamwel anch ‘kiukutwishap kubudik ching kamu wanfut chikal cham chawonsu.’” Cha kaad, wayisala nayimp atushalapol akwau amana yom yasalay. “Atushalapol akwau, chamanau mwamu, ova ushon nakash.” (Mat. 18:30, 31) Chilik chimwing, yisal yetu yikwet yibudikin pad antu akwau. Anch muntu kanang waturumbukin chad twalik kumulikishin, yom ik yikutwisha kushiken? Chakusambish, yikumusal nayimp, mulong tumulikishidinap, tumubangidinap ni tumumekeshidinap rukat. Cha kaad, tukat kuyishadishin antu adia mu chikumangen musangar anch atuman anch tudiap mu chisambu ni muntu kanang. w21.06 22 par. 11-12

Satan ukatin kuyipish kamu nakash mwikadil wa antu atangau mu chifu cha Nzamb. Pa chirung cha Nowa, “Nzamb wamana anch, kuyip kwavulijan kal . . . [Yehova] wanenganana, walond anch: ‘Nalauka kwam kuyitang antu pansh.’ Mwamu ndiy wova ushon mu muchim wend.” (Dis. 6:5, 6, 11) Kudiokal pinipa, ov, yom yawapin kal? Bwat kamu ap pakemp! Djabul ukat kusangar nakash pamenay mutapu udandamedina kupalangan pa mangand yisal ya masandj ya mitapu ni mitapu, mud yisal ya masandj pakach pa antu a yid ya ruvaj yishalijadina ap a yid ya ruvaj yimwing! (Efes 4:18, 19) Satan ukat kusangar chipandikena anch watwish kumuwishin kashalapol wa Yehova mu chitil. Mu umutakel wa Satan, muntu ‘kimedinap kusu pa kumuyikel mukwau,’ pakwez ukat kushesh kand divu ni annam amwinkishau kulam kud Yehova. (Mul. 8:9; Dis. 1:28) Kusal mwamu kuletin yibudikin ik? In kukimbijol amwing alondin anch yom yisadinau antu yikutwish kushesh mitapu ya yitang yikweta mwom miliyon umwing ni kusut kurutu kutuyila oku. w21.07 12 par. 13-14

Atushalapol a Nzamb amwing adandamena kwifish nich nakash mulong wa yitil yasalau pakur. Kwifish nich kwinoku kwayibachika kutong anch Yehova kakutwishap kuyilikishin ap pakemp​—ap anch akarumukap kal nchik. Anch ukwet yovil ya mutapu winou, kwilej piur pa mutapu ukatiningay Yehova kumekesh rukat rend rudimukina kud atushalapol end kukukukwash kumusadin Yehova nich musangar ni kom kishitwila. Chinech chitwishikin mulong “mash ma rufu ra Mwanend Yesu [matutokishin] ku yitil yetu yawonsu.” (1 Yoh. 1:7) Anch uziyin mulong wa kurumbok kumwing, vurik anch Yehova ukatin chakin, inge, ukatin kamu kumulikishin muntu wasadina chitil ukarumukina. Tal mutapu wamekeshay nfund a kuseng David kutanijan kudia pakach pa rukat rudimukina ni kulikishin. Wafunda anch: “Mudi mudia diur dizambukin piur pa divu, mwamu muvulijadila kand rukat rend rudimukina kudi akata kumwov ndiy wom. Mudi mudia kwingangel kulemp ni kurand, mwamu kand mwatwalay kuyip kwetu kulemp ni yetwetu.”​—Kus. 103:11, 12. w21.11 5-6 par. 12-13

Ikundj mwin Kristu ufanyidin kumulimish mukajend. (1 Pita 3:7) Kalimish karumburikin kwikal ni chitongijok chiwamp ni chishitwila pad antu akwau. Chilakej, ikundj ukat kumulimish mukajend kusutin kumukwat nich usey. Kakatap kumwit kusal yom yimusutina chipim. Ni kakatap kumufanikesh ni amband akwau. Mutapu ik ukutwishay mband kwiyov anch nfumwend wamufanakesh mutapu winou? Ikundj wading wakad kwikal Kaman wa Nambaz Rosa wamufanakeshang yisu yivud ni amband akwau. Mazu minam ma chisum mamovishang kamu Rosa nayimp nakash ni kutong anch kwikil muntu umukatina. Ulondin anch: “Nading nikwet kuswir kwa kwinvurish chisu chawonsu anch Yehova winmen anch nikwet usey ku mes mend.” Chinyim ni chinech, ikundj mwin Kristu ukat kusal usu wa kumulimish mukajend. Wij anch kusal mwamu kukat kuwapish urund wend ni mukajend ni kukat kand kuwapish urund wend ni Yehova. Ikundj umulimishina mukajend kakatap kumulond nayimp, ukat kumwinkish kashinsh anch umukatin, ni ukat kumujikitish. w21.07 22 par. 7-8

Ov, ukat kwiyov kuziy anch difund dikweta chom uswirikedina nakash dalik kushik pa chisu utongidina? Pakwez anch wijik anch kud diyingishin diwamp diasalang anch difund dilik kushik pa chisu wadia utongidina, ov, ukat kushimpish muchim ni kuchingel? Chilakej chimwing chimekeshina usey wa kushimpish muchim chid mu Jinswir 13:11. Ulondin anch: “Dipit dia kupit mau mau dikez kakep, pakwez mwin kupit pakemp pakemp, dipit diend dikez kavul.” Yom ik twilejina mu verse winou? Muntu ukweta manangu ukat kusal yom nawamp pakemp pakemp, ni ukat kutan yibudikin yiwamp nakash. Jinswir 4:18 utulejin anch: “Njil ya in kutentam yidi mudi kutok kumunyikina [pamanch], yikat kuzaz jinsis ni kushik kamu muten pakach.” Mazu minam mamekeshin mutapu ukatay Yehova kuyijingunin antwend rusot rend pakemp pakemp. Pakwez, verse winou tukutwish kand kumusadin mulong wa kumekesh mutapu ukatay mwin Kristu kukul mu spiritu. Kukul mu spiritu kukusadikangap kapamp kamwing. Kwitining chisu. w21.08 8 par. 1, 3-4

Tukwet yom yivud nakash ya kusal pasejina nakash mangand minam kwinsudien. (Mat. 24:14; Luka 10:2; 1 Pita 5:2) Etu awonsu tukatin kumusadin nakash Yehova nich usu wetu wawonsu. Antu avud akat kutanduril mudimu wau. Amwing akwatin mupak wa kwikal ayibol. Akwau akwatin mupak wa kusadin ku Betel ap mu mudimu wa kutung yikumbu ya kusadin midimu ya Nzamb. Ni akadivar avud asadin usu wa kuwanyish yitinau mulong wa kusal mud ankwash a mudimu ap amakurump. (1 Tim. 3:1, 8) Yehova ukat kusangar nakash pamenay mutapu ukatinau antu avud kwipan mulong wa kumusadin! (Kus. 110:3) Pakwez ov, uziyin mulong uwanyishinap mupak kanang wa mu spiritu? Anch chid mwamu, mulembila Yehova pa mulong winou ni muleja mutapu wiyovila. (Kus. 37:5-7) Chikwau kand, yipula akadivar aswila kal akuleja yom kanang ukutwisha kuwapish mu mudimu umusadidina Nzamb, ni sal usu wa kusadin yiyul yiney. Anch wasal mwau, akutwish kukwinkish chisend usotina ap ukutwish kuwanyish mupak wey. w21.08 20 par. 1; 21 par. 4

Muprofet wading mwadiamufu, Ana wading ni mivu 84 pakwez wading “kuya mu chikumbu cha Nzamb” pakad kujing. Yehova wamuyukisha mulong “wakumanganang” ku tempel pakad kujing ni wamwinkisha dilau dia kumuman mwan Yesu. Simeyon ni Ana ading a usey nakash ku mes ma Yehova. (Luka 2:36-38) Mu chirung chetu, atushalapol avud ashinshamena amapal ad yilakej yiwamp nakash kud ansand. Tukutwish kutaninamu nakash anch twitekin chisu cha kuyisejin piswimp ni kuyitesh nawamp parumburilau piur pa musangar wikalau nich mulong wa yom yasalau mu dirijek dia Yehova. Akadivar ni anambaz netu amapal akwet usey nakash mu dirijek dia Yehova. Amen kal mutapu uyukishinay Yehova dirijek diend mu mitapu kushalijan pamwing ni mutapu wayiyukishau awiy. Ilejidin kal ku kurumbok kwau. Yimana mud “musul wa manangu,” ni ilejina ku ukaliweny wau. (Jnsw. 18:4) Anch witekin chisu cha kuyijik nawamp, ritiy rey rikutwish kukasikan. w21.09 3 par. 4; 4 par. 7-8; 5 par. 11, 13

Atushalapol a Yehova akutwish kusadin ukaliweny winou watazukay Isay anch ‘mayel ma michid.’ (Isay 60:5, 16) Mulong wa ukaliweny ukwetau amakundj ni amband inay a usey nakash ezina mu uyakin, mudimu wa kulejan ukat kusadik mu jingand 240, ni mikand yetu ayibudishin mu mazu 1000 ni kusut. Mu machuku minam ma kwinsudiel, chinship chinyikeshina michid chiyibachikin antu kukwat mupak. Ov, akukwash Want wa Nzamb bil anch akutek ruchingej rau mu maguvernema ma mangand? Ud mupak ufanyidinay muntu ni muntu kukwat. Ap anch atushalapol a Nzamb akat kuziyin ku yijil ya guvernema wa ngand yishichau, kakatap kwiyandjik ap pakemp mu milong ya politik. (Rom 13:1-7) Ij anch Want wa Nzamb wawiy kusu ukupwisha milong ya an a antu. Want winou udiap wa mangand minam.​—Yoh. 18:36, 37. w21.09 17-18 par. 13-14

Anch muntu ukatina wamulik Yehova, chid cha usey anch udandamen kukasikesh ritiy rey ni ra antu akwau a mu dijuku. Mutapu ik ukutwisha kusal mwamu? Mulong wa kwikal ni usu udiokila kud Yehova, ileja pakad kujing Dizu diend ni tongijokin pa yom wilejina, pamwing kand ni kukumangan ku yikumangan ya win Kristu. Joanna ukweta tatukwend ni mpanyend alika uyakin ulondin anch: “Nova pee pinatanga nsangu ja antu alejenau mu Bibil mud Abigayil, Ester, Job, Josef, ni Yesu. Yilakej yau yankasikesha ni yankwasha kulam chitongijok chiwamp.” Chisu wovila ushon, dandamen kulembil. Dandamen kumwit Nzamb wetu wa rukat chakwel akukwash chakwel umana yom mud muyimenay ndiy, ni “[akwinkish manangu] ni kukwijikish njil yiufanyidina kulondul.” (Kus. 32:6-8) Chakin kamu, ukutwish kwov kusansan nakash pa kumulej Yehova mutapu wiyovila kamu. Pakwez Yehova umen kusansan wovila ku muchim wey. Ukwitin kumulej yom yawonsu yidia ku muchim wey.​—Kub. 34:6; Kus. 62:7. w21.09 28 par. 9-10

Kupwa kwa musambu wa Pasak wa muvu wa 32 C.C., kambuy Pita, Jakob, ni Yohan amana chishimushimu chikwamushena. Padingau pa mukandu, pamwing ap pa Mukandu wa Herimon, chifu cha Yesu chaswimpa kurutu kwau. “Chifu chend chapaya mudi muten, ni maswin mend mazuta, matok too.” (Mat. 17:1-4) Atwimbuy atesha dizu dia Nzamb dialonda anch: “Winou udi mwanam unikatila, nikat kusanger mwi ndiy, muteshany.” Atwimbuy inay asatu amekesha mu mashakamin mau anch amutesha Yesu. Tukatin kwimburij chilakej chau. Tumujikitishin nakash Yehova mulong wa umutakel wa rukat utwinkishinay kusutin Yesu Kristu udia ‘mwant wa chikumangen.’ (Efes 5:23) Mud kambuy Pita, Jakobu, ni Yohan, el tukwatany mupak wa ‘kumutesh’ Yesu. Anch twasal mwamu, tukutambul yiyukish yivud nlel ni kwikal ni musangar wa chikupu mu machuku ma kurutu. w21.12 22 par. 1; 27 par. 19

Mwin Kristu umwing wa ku Korint wasala masandj ni mband wa tatukwend. Kambuy Paul wayileja in Korint anch chifanyidin kumwopat. Mwikadil wa mwan winou wading wasambish kal kwikal ni chibachikin chiyimp pad antu akwau mu chikumangen, mulong antu amwing amana anch chadingap kwau chitil chikash! (1 Kor. 5:1, 2, 13) Mu kusut kwa chisu, Paul watesha anch mwan winou wakarumuka kamu chakin! Paul wayileja amakurump anch chifanyidin: “Kumulikishin ni kumwongoj.” Shinshikin mulong wak Paul walonda anch afanyidin kusal mwamu: “Chakwel kangal wov ushon nakash.” Paul wamwovila mwan winou wakarumuka riy. Kambuy kakatap anch ushon umupandaken ikundj winou mulong wa yom yasalay mu chilik cha kumuziyish kukimb dilikishin. (2 Kor. 2:5-8, 11) Mulong amwimburijin Yehova, amakurump akatining niyau kumekesh riy. Akat kupupan pakad maswimbu anch chid cha usey kusal mwamu, pakwez akat kumekesh kand riy anch kud mayingishin ma kusal mwamu. Anch amakurump alik kumupup ap pakemp muntu wasalang yom yiyimp, kwinoku kudiap kumekesh riy, kud kukasikesh uyimp. w21.10 11 par. 12-15

Shinshikin chilakej. Kusansan tukutwisha kwov anch aturumbukin kukutwish kwikal mud yitat. Yitat yimwing yiding yikemp, yikwau yiding yijim. Chilakej, anch twisukin, tukutwish kwitap kachitat ku muny. Tukutwish chakin kamu kwov kusansan, pakwez kupwa kwa dichuku dimwing ap maad, tukutwish pamwing ap kuvuramen ndond yading kachitat. Chisik chimwing, akutwish kuturumbukin mu tuyom tukemp. Chilakej, murund netu ukutwish kulond ap kusal yom yikutwisha kututap ku muchim, pakwez chikutuswapel kumulikishin. Pakwez anch tukwet chitat chijim, dokter ukutwish kuchichim ni kutukasap bandaj. Anch twadandamen kuchikwatol, chikutwish kuvuk ni kutusal nayimp nakash. Cha ushon, muntu ukutwish kusal chom cha mutapu winou anch amurumbukin nakash. Ukutwish kudandamen kutongijokin pa kusansan kwiyovay ni pa mutapu wamurumbukinau. Pakwez antu akata kulam rukuny, akat kwisal nayimp ayinau. Chid cha usey mud ik kuziyin chiyul chidia mu mufund wa nlel. w21.12 12 par. 15

Shinshikin chilakej. Tong bil anch mukurump wiyipwil yipul piur pa mutapu wa kudjal ni wa kwileng wa mbay nend mwin Kristu. Mukurump winou ukutwish kwiyipul anch: ‘Ov, kud diyingishin dia kumuyudin dimedina pa Mifund?’ Mulong chimwitinap kupan chiyul chimedina pa yitongijok yend, ukutwish kumwipul mukurump mukwau ap mwin kulejan uswila piur pa yom yitonginay. Akutwish kushinshikin pamwing chiyul chapanay Paul piur pa kudjal. (1 Tim. 2:9, 10) Paul wisambina mbil jimwing jilejena anch mwin Kristu ufanyidin kudjal mu mutapu uwamp, ni wa kalimish. Pakwez Paul kaletap muruzu wa mbil piur pa yom yifanyidina kusal ni yifanyidina kwipuk. Wading wij anch akadivar nau anambaz akwet want ipau wa kudjal yom yikatinau anch yidiap kwau chinyim ni Mifund. Chawiy, amakurump afanyidin kushinshikin anch muntu udjadin mu mutapu wa kalimish ni wisikena. Chid cha usey kuvurik anch in Kristu aad aswila mu spiritu akutwish kukwat mipak yishalijadina, pakwez yawonsu yiwapin kwau. Tufanyidinap kuyishindin ambay netu in Kristu yom tutongina etu anch yawiy yiwapina ap yiyipina. w22.02 16 par. 9-10

Tukwet mayingishin mawamp ma kumekeshijadin rukat rudimukina umwing ni mukwau. Anany amwing tufanyidina kumekeshin rukat riner? Tal mutapu jinswir jilondwilaku ej jakwila ku chipul chinech: “Kangal washadish [rukat rudimukina] ni uyakin. . . . Mwamu ey ukez katan dilau, ni kuwap kwakin ku mes kwa Nzamb ni kwa antu.” “Muntu mwin [rukat rudimukina] ukat kwiwapish amwinend mu muchim.” “Muntu ukata kulondul kutentam ni [rukat rudimukina] ukez katan mwom.” (Jnsw. 3:3, 4; 11:17; 21:21) Jinswir jinej jijimbwil mayingishin masatu tufanyidina kumekeshin rukat rudimukina. Chakusambish, kumekesh rukat rudimukina kutwikadishin a usey ku mes ma Nzamb. Cha kaad, tukat kutaninamu ayinetu kusutin kumekesh rukat rudimukina. Chilakej, tukat kukudish urund uwamp nakash ni antu akwau. Cha kasatu, kumekesh rukat rudimukina kukutukwash kutambul yiyukish ya machuku ma kurutu, kuwejaku ni mwom wa chikupu. Chakin kamu, tukwet mayingishin mawamp ma kuta matu ku mazu ma Yehova malondina anch: “Chifanyidin en kumekesh [rukat rudimukina] ni riy kudi muntu ni muntu.” w21.11 8 par. 1-2

Anch yikokujol warisha nich pakur ap urishina nich katat yamekeshin anch ritiy rey rikasikenap nakash, kangal waziy. Man yom yiney mud mutapu weyey kukasikesh ritiy rey. Mulembila Yehova nich muchim wey wawonsu, pakampwil chisu urishina ni mulong ukash. Vurik anch Yehova ukutwish kukuwanyishin maswir mey kusutin dijuku diey ap arund ney. Anch wamulikidil Yehova chakwel akukwash kujijamen yikokujol yey ya katat, ukwikal nich kashinsh anch ukukukwash kujijamen yikokujol yivud ukutwisha kurish nich mu machuku ma kurutu. Yesu wayikwasha in kwilejend kuman pading paziyina ritiy rau, pakwez kidjidjekap anch kusutin ukwash wa Yehova akutwish kujijaman nich kushinshaman mu yikokujol yikurishau nich kurutu. (Yoh. 14:1; 16:33) Wading nich kashinsh anch ritiy rikash rikutwish kukwash rumb rijim ra antu kupand ku mar makash makushikena. (Kuj. 7:9, 14) Niyey ukwikal pakach pa antu inay anch wasal usu wey win wawonsu wa kukudish ni kukasikesh ritiy rey katat!​—Heb. 10:39. w21.11 25 par. 18-19

Chakin, tuchingejinap anch niyetu atuking mu chilay nlel. Pakwez tukwet kashinsh anch kwikil muntu umuchingejidina Yehova ukudandamena kuman mar chikupu. Piswimp ap, ruchingej retu mudiay Yehova anch ukutuchidij akuripak. Chisu Gog wa Magog, charumburik anch kubombakan kwa michid, chikurishikishay antu a Nzamb, mwom yetu yikumekan mud yid mu ubaj. Tukwikal ni kuswir kwa kwikal nich kashinsh anch Yehova ukutwish kutupandish ni ukusal mwamu. Ku mes ma antu a michid, tukumekan mud amikoku akad mwin kuyiking. (Ezek. 38:10-12) Tukwikalap ni yom ya kurish nich njit, ni tukwiyijidishap mulong wa kurish. Michid yikuman anch chiyiswapedin kutunongish. Kakumanap yom tumena etu nich mes metu ma ritiy​—charumburik anch chisak cha angel ayinyingumukina antu a Nzamb ni adiaku mulong wa kutukamunin. Michid yikutwishap kuyiman angel inay, mulong yikwetap kwau ritiy mudiay Nzamb. Chikuyikashimwish mud ik chisu chikumanau mutapu ukutukwashau kud amasalay a mwiur!​—Kuj. 19:11, 14, 15. w22.01 6 par. 12-13

Yehova uyikwatin akadivar ni anambaz netu awonsu nich usey nakash. Niyetu tufanyidin kuyikwat nich usey. Tufanyidin kusal usu wetu wawonsu mulong wa kuyichidij ni kuyibangin. Anch twajingunin anch twamurumbukinang ap twamujimeshang muntu kanang, tufanyidinap kwetu kupipej ni kulond anch niyend upandakeshin chad, oku ufanyidin kudiulangaku yom yimwing. Mulong wak antu amwing akutwish kujiman? Pamwing ap mulong wa ndond yapaminau. Akadivar ni anambaz netu amwing akat kwimanang mud kakwetap usey mud antu akwau. Akwau ad asu mu uyakin ni kand kal ileja anch chifanyidin kuyilikishin antu akwau anch arumbuk. Chikalap nchik diyingishin, tufanyidin kusal usu wa kuchirish chisambu. Ku mutambu ukwau, muntu ukweting chaku cha kujiman swa mulong wa yom yikatau kusal antu akwau, ufanyidin kwijik anch chid chaku chiyimp ni ufanyidin kusal usu wa kuswimp. Ufanyidin kusal mwamu mulong wa kulam chisambu chend cha mu manangu, ni kulam kand chisambu nau antu akwau. w21.06 21 par. 7

Yesu wij mutapu wiyovila. Anch turishin ni yakamish, tukat kov musangar nakash anch murund wezina kutwongoj wij nawamp mutapu twiyovila, pakampwil anch muntu winou warishap kal ni yakamish mud turishina nich. Yesu ndiy kamu murund winou. Wij nawamp mutapu ukatay kwiyov muntu uziyina ni ukweta kuswir kwa ukwash. Wij nawamp kuziy twovila, ni ukushinshikin chakwel tutambul ukwash tuswirikedina “pa chisu chitukweta kuswir.” (Heb. 4:15, 16) Mud mutapu witiyay Yesu ukwash wa mwangel mu chir cha Getiseman, tufanyidin kwikal aswakela kwitiy ukwash wa Yehova, chikal kusutin mukand kanang, video, diskur, ap kusutin mukurump ap murund uswila mu spiritu utwendidina mulong wa kutukasikesh. (Luka 22:39-44) Yehova ukukwinkish “chisambu cha Nzamb” ni kukukasikesh. Anch twamulembil, ukutwinkish “chisambu cha Nzamb chisutila ronganyin ra antu.”​—Fil. 4:6, 7. w22.01 18-19 par. 17-19

Yehova usadining chisu chawonsu yom mu mutapu utentamina. Pakwez chikokujol chikash tukutwisha kurish nich chid piur pa kuyichingejin antu atondinay kal mulong wa kutakel dirijek diend. Tukutwish kushiken kwiyipul anch, ov, mipak yikwatinau antu akweta yisend mu dirijek yikwatijadin ni rusot ra Yehova bil anch rid kwau rusot rau ayinau? Uyakin ud anch tukutwishap kulond anch tumuchingejidin Yehova anch tuyichingejidinap antu inkishay yisend pa divu mulong wa kutakel dirijek diend​—mulong ndiy uyichingejidin. Nlel Yehova utakedin chikunku cha pa divu cha dirijek diend kusutin ‘kashalapol ushinshamena ni kubabal.’ (Mat. 24:45) Mud chisak chitakedila cha mu mivu chitot ya kusambish, kashalapol winou ukat kutakel atushalapol a Yehova adia pa mangand mawonsu ni kupan umutakel kud amakurump a chikumangen. Ku mutambu wau, amakurump niyau akat kusal usu wa kulondul umutakel winou mu chikumangen. Tukutwish kumekesh anch tuchingejidin mutapu usadiningay Yehova yom kusutin kuziyin umutakel tutambwiling mu dirijek ni kud amakurump. w22.02 4 par. 7-8

Musangar ujim mud ik tukweta mulong tud Atuman a Yehova! Tukat kusangar anch twatwish kumukwash muntu udia “mu mwikadil ufanyidina kutambul mwom wa chikupu” kwikal mwin kwitiyij. (Mid. 13:48) Tukat kwiyovang mud mwiyovay Yesu, “amwovisha musangar nakash kudi [spiritu] utumbila” pachirikau in kwilejend nich musangar mulong atana yibudikin yiwamp mu mudimu wau wa kulejan. (Luka 10:1, 17, 21) Kambuy Paul wamuleja Timote anch: “Babal ey amwiney, babal kand ku malejan mey.” Paul walonda kand anch: “Mulong anch ey wasal mwamu ukez kwipandish ey amwiney pamwing nau antu akuteshila.” (1 Tim. 4:16) Chawiy mudimu wetu ukat kupandish mwom ya antu. Tukat kusal usu wa kubabal chisu chawonsu mulong tud antu a mu Want wa Nzamb. Tukat kusal usu chisu chawonsu wa kusal yom yikuleta ntumb padiay Yehova ni yikwatijadina ni rusangu ruwamp tukata kulejan. (Fil. 1:27) Tukat kumekesh anch ‘tubabedin ku malejan metu’ kusutin kwirijek nawamp mulong wa mudimu wa kulejan ni kwit chiyukish cha Yehova kurutu kwa kuyilej antu akwau. w21.10 24 par. 1-2

‘Wuntu usu’ ud mutapu wa kutong ni wa kusal yom umekeshina wuntu wa Yehova. Muntu ukutwish kudjal wuntu usu kusutin kumekesh dibuj dia spiritu wa Nzamb, kulikidil spiritu utumbila chakwel atakel yitongijok ni yisal yend. Chilakej, muntu wa mutapu winou umukatining Yehova ni antu end. (Mat. 22:36-39) Ulamining kand musangar wend ap anch urishin ni yikokujol. (Jak. 1:2-4) Uding mwin kusal chisambu. (Mat. 5:9) Uding mwin kushimpish muchim ni udimukina pantaliken ni antu akwau. (Kol. 3:13) Ukatining yom yiwamp ni ukat kuyisal. (Luka 6:35) Ukat kumekesh kusutin yisal yend anch ukwet ritiy rikash mudiay Tatukwend wa mwiur. (Jak. 2:18) Ukat kudandamen kwikuchik anch amusarumun ni ukat kwilam anch amwoz. (1 Kor. 9:25, 27; Tit. 3:2) Mulong wa kudandamen kudjal wuntu usu, tufanyidin kukudish mikadil yilejenau mu Galatia 5:22, 23 ni mu maverse makwau. w22.03 8-9 par. 3-4

Amakurump akutwish kumwimburij kambuy Paul kadiap ching kusutin kulejan ku chis ni chis, pakwez kand kusutin kulejan pa chisu ni ndond yawonsu yikwetau mutapu wa kusal mwamu. (Efes 6:14, 15) Mud Paul, amakurump akutwish kusadin chisu chisutishinau mu mudimu mulong wa kuyifumb antu akwau, kuwejinaku ni ankwash a mudimu. (1 Pita 5:1, 2) Pakwez amakurump kafanyidinap ap pakemp kukwatikan nakash mu yisend yau mu chilik cha kuburen chisu cha kulejan. (Mat. 28:19, 20) Mulong wa kwikal isikena, chiyitin yisu yimwing kulikap yisend yimwing. Kupwa kwa kushinshikin mu malembil, akutwish kujingunin anch ang akwat mupak wa kwitiy chisend kanang, akutwish kushiken kudiul yom yipandakena usey nakash, mud difukwil dia mu dijuku, kwipan nakash mu mudimu wa kulejan, ap kuyifumb an mu mudimu winou. Akutwish kwikal nich kashinsh anch Yehova umen maswir mau ma kwikal isikena mu yom yawonsu. w22.03 27 par. 4, 7; 28 par. 8

Ov, wova wom wa kwikal Kaman wa Yehova? Pamwing ap wova wom anch ukutwishap kulejan ku chis ni chis. Ap kand wova wom anch anamakwey ni arund ney akukupompat. Anch mwawiy, ukutwish kwijik nawamp mutapu wiyovilay mwin kwilej wey wa Bibil anch niyend mwamu mwiyovilay. Yesu wading wij anch antu amwing akutwish kwov wom winou. Pakwez wayikasikesha in kwilejend anch kangal alikidin wom winou chakwel uyikangesh kumusadin Yehova. (Mat. 10:16, 17, 27) Pakemp pakemp, mufumba mwin kwilej wey wa Bibil kusambish kuyilej antu akwau yom yilejinay. In kwilej afanyina kwov wom payitumau kud Yesu mulong wa kuya kulejan. Pakwez Yesu wayileja ndond ya kulejen ni uruu ufanyidinau kulejan. (Mat. 10:5-7) Mutapu ik ukutwisha kumwimburij Yesu? Mukwasha mwin kwilej wey kwijik ndond yikutwishay kulejen. Chilakej, mwipula anch wij muntu kanang umenay anch ukutwish kutaninamu anch wilej uyakin wa Bibil kanang. Kupwa muleja yom yikutwishay kulond ni mutapu wa kuyilond mu mutapu uswapela. w21.06 6 par. 15-16

“Mu aminit akemp kusu, yikumbu ya kulandishin ni yikumbu yatungau kudiosh pakur yasambisha kuwupok.” “Antu awonsu asambisha kuzazat . . . Antu avud alonda anch kunyikek kwa divu kwasala kwau aminit piswimp aad. Pakwez am namana mud kwalaba nakash.” Minam mad mazu malondau antu apanda ku kuzal kwa dizu kwasadika ku Nepal mu muvu wa 2015. Chawiy, niyetu tushich chirung chisadikina kunyikek kwa mutapu ukwau kukusadika ku michid yin yawonsu. Kunyikek kwinoku atakela kukulejan kud muprofet Age. Wafunda anch: ‘Talany mulondinay Yehova wa yisak ya amasalay: “Mu chisu chikemp am nikez kanyikesh diur ni divu.”’ (Age 2:6) Kunyikek kurumburilay Age kudiap mud muding kuzal kwa dizu kukata ching kushesh yom. Pakwez, kukat kulet kand yibudikin yiwamp. Yehova amwinend utulejin anch: “Nikez kanyikesh michid yawonsu, ni yom ya usey ya michid yawonsu yikez kwandam mu chikumbu chinech.” w21.09 14 par. 1-3

Urund pakach pa antu aad ukat kukasikan nakash anch akat kwambamb chisu chawonsu ni kulejijan yom patok. Chid kand mutapu umwing piur pa urund wetu ni Yehova. Anch twamulej mutapu twilyovila, twamulej yitongijok yetu ni yakamish yetu kusutil malembil, tumekeshin anch tumuchingejidin ni twij anch utukatin. (Kus. 94:17-19; 1 Yoh. 5:14, 15) Ikal piswimp ni arund ashinshamena; ad chipan chidiokila kud Yehova. (Jak. 1:17) Tatukwetu udia mwiur ukat kumekesh anch utubangidin pakampwil kusutil kutwinkish dijuku dia mu spiritu dia akadivar ni anambaz akata kutumekeshin “rukat machuku mawonsu.” (Jnsw. 17:17) Mu mukand wend wayifundinay in Kolosay, kambuy Paul wajimbulamu in Kristu amwing amukwasha, ni walonda piur pau anch akat “kwinkasikesh am nakash.” (Kol. 4:10, 11) Ap Yesu Kristu niyend waswirikena ukwash ni wayijikitisha nakash arund nend amukwasha, ikalap nchik angel ap antu. (Luka 22:43) Kumulej murund uswila yakamish yetu kumekeshinap anch tuziyin; pakwez kukutwish kutuchidij. w21.04 24-25 par. 14-16

Yom ik ufanyidina kusal anch mbay ney mwin Kristu wasalang yom yikusadina nayimp nakash? Sal usu wawonsu mulong wa kulam chisambu. Muleja Yehova mu malembil mutapu wiyovila. Mwita chakwel amulikishin muntu wakurumbukinang ni akukwasha kand kuman mikadil yiwamp yikwetay muntu winou—mikadil yimukatidinau kud Yehova. (Luka 6:28) Kimb mutapu uwamp ufanyidina kwambamb ni mukadivar ney anch utwishinap kuvuramen yom yasalangay. Chid cha usey kuvurik anch mukadivar ney kadiap kakweta kuswir kwa kukurumbukin. (Mat. 5:23, 24) Chisu wambambina nend, tek mu manangu anch kadiap kakweta kuswir kwa kukurumbukin. Chad tukusal nchik anch kakatinap kuchirish chisambu? Dandamen “kudiul kuziy” kwend. Dandamen kumushimpishin muchim. (Kol. 3:13) Cha usey nakash, kangal walam rukuny, mulong rikutwish kuyipish urund wey ni Yehova. Kangal walikidin chom ap chimwing chikupwakesh. Anch wasal mwamu, ukumekesh anch umukatin nakash Yehova kusutamu yom yikwau yawonsu.​—Kus. 119:165. w21.06 23 par. 15