Ngond wa 5

Mulong wa kutukwash kumwijik nawamp Mwanend, Yehova wafundikisha mu Dizu diend Bibil ma Evanjil manying. Ma Evanjil minam makwet nsangu piur pa mwom wa Yesu ni mudimu wasalay. Nsangu jinej jitulejin yom yalonday Yesu, yom yasalay, ni mutapu wiyovay. Nsangu jidia mu ma Evanjil minam jikat kutukwash kutongijokin nakash pa chilakej cha Yesu. Mu mikand yiney mud nzau jashay Yesu. Chawiy, anch twilej ma Evanjil, tukutwish kamu kumwijik nawamp Yesu. Mud chibudikin, tukutwish kulondul nich kushinshaman nzau jend. Anch tukimbin anch tutanyinamu nakash mu ma Evanjil, tufanyidinap kwetu kwimen kusu pakumatang. Tufanyidin kwitekin chisu cha kumilej nawamp ni kutongijokin nakash pa yom twilejina. (Ilakej ni Joshua 1:8) Tongijokin pa nsangu jidia mu ma Evanjil ni kujiman mud yom yisadikina katat. Sal mud umen, uteshin yom yasadikang, ni pakish kwiyov mutapu wafanyinau kwiyov antu a mu rusangu utangina. Kimbijol mu mikand ya kukimbijol nich yitwinkishinau kud dirijek. w21.04 4-5 par. 11-13

Yehova wasambela kulejan mu Dizu diend yitot ya mivu kurutu kwa Yesu kwez pa divu anch Mesia akez kamulandish kwi nfalang 30. (Zak. 11:12, 13) Mwin kumupan wafanyina kwikal umwing wa pakach pa arund nend a piswimp. (Kus. 41:9) Muprofet Zakariy wafunda niyend anch: “Mujipa kamu [kafung], chakwel amikoku akez kapalangan djimu.” (Zak. 13:7) Yinship yiney yafanyinap kuyiziyish antu ading amukatina Yehova, pakwez yafanyina kuyikasikesh, mulong yading yiwanyishin uprofet piur pa Yesu. Ov, yawiy kand yom yisadikina nlel? Mwaning. Nlel antu amwing ading ijikena mud Atuman a Yehova akat kulik uyakin ni kwikal in kupumbok, kupwa akat kusal usu wa kuyipumbul antu akwau. Akat kupalangesh nsangu jiyimp ja makasu piur pa Atuman a Yehova mu majurnal, ku maradio, ku matelevizion ni pa Internet. Pakwez antu amukatina Yehova kakatap kupumbuk. Akat kuvurik anch Bibil wasambela kulejan anch yom yiney yikusadik.​—Mat. 24:24; 2 Pita 2:18-22. w21.05 11 par. 12; 12-13 par. 18-19

Bibil urumburil patok anch antu a Nzamb akat kutesh nawamp uyakin mu kusut kwa chisu. (Kol. 1:9, 10) Yehova ukat kuyijingunin antu end uyakin pakemp pakemp, ni tufanyidin kwikal in kushimpish muchim kushik ni pakuzazina chitokish cha uyakin. Pa chisu chikata Chisak Chitakedila kujingunin anch tufanyidin kuswimp mutapu wetu wa kutesh ni wa kusal yom kanang, akat kuswimp yom pakad kulab. Nlel marelijon mavud makat kuswimp malejan mau mulong wa kuyisangaresh antu ap mulong wa kwijikan nakash mu mangand. Pakwez Atuman a Yehova akat kuswimp yom mulong wa kumusangaresh Yehova ni kumwifukwil mud mwasalay Yesu. (Jak. 4:4) Pitukata kuswimp yom, tukatap kusal mwamu kukwatijan ni yitongijok ya an a antu, pakwez mulong tuteshin Bibil nawamp. Tukatin uyakin!​—1 Tes. 2:3, 4. w21.10 22 par. 12

Yom ik ufanyidina kusal anch wiyovil mud ud amwiney? Shinshikin pa mutapu ukukwashinau kud Yehova. (Kus. 55:22) Kusal mwamu kukukukwash kuman anch udiap amwiney. Tongijokin kand pa mutapu Yehova uyikwashinay ambay ney in Kristu iyovila mud ad ayinau. (1 Pita 5:9, 10) Mukadivar Hiroshi wading Kaman amwinend mu dijuku diau mu mivu yivud ulondin anch: “Kwijik anch etu awonsu tusadin usu wa kumusadin Yehova, kukutwish kuyikasikesh antu amwing pakach petu adia akwau ayinau Atuman mu majuku mau.” Chikwau kand, lembilang, tangang Bibil ni kumanganang chisu chawonsu. Muleja Yehova patok mutapu wiyovila. Chid cha usey kutang Dizu dia Nzamb chisu chawonsu ni kutongijokin pa yom utangina yimekeshina anch Yehova ukukatin. In Kristu amwing akat kulam mu manangu maverse mamwing makata kuyikasikesh nakash, mud Kuseng 27:10 ni Isay 41:10. Antu akwau amen anch kutesh mikand yetu yakwatinau kal kukat kuyikwash kwiyov mud kadiap ayinau chisu chirijekinau yikumangan ap chitanginau Bibil. w21.06 9-10 par. 5-8

Ov, ud mu chidil cha mukatish ney wafila? Itekina chisu cha kukasikesh ritiy rey mu ruchingej ra divumbuk, kusutin kutang nsangu ja Bibil ja antu avumbulau. Ov, unenganen mulong wa mwanamakwey wa mu dijuku wopatinau? Ileja chakwel wikal nich kashinsh anch mutapu wa kupup wa Nzamb uding yisu yawonsu uwamp. Chikalap nchik mulad wa mar urishina nich, sadin chishiken chinech mulong wa kukasikesh ritiy rey. Mufungwila Yehova muchim wey. Kangal wiyauril nau akadivar ni anambaz ney. (Jnsw. 18:1) Ipana mu midimu yikutwisha kukukwash kujijaman, ap anch chikwitin kusal mwamu ni mansoj ku mes. (Kus. 126:5, 6) Lam chaku chey cha kukumangan, kwipan mu mudimu wa kulejan, ni kutang Bibil. Ni dandamen kushinshikin pa yiyukish yipandakena kuwap yakukaninay kal Yehova. Piumena mutapu ukukwashinay Yehova, ritiy rey mudiay ndiy rikukasikan. w21.11 23 par. 11; 24 par. 17

Mutapu ik ufanakenau in kwilej a Yesu ni “anikanch”? Antu a mutapu ik akatau kukwat nich usey nakash mu mangand? Ad ampich, antu akweta ntumb ni antu akweta usu. Pakwez in kwilej a Yesu ayimen kwau mud antu akad usey ap mud “anikanch.” (1 Kor. 1:26-29) Pakwez wawiyap mutapu uyimenau kud Yehova.Yom ik yamubachika Yesu kwisambin piur pa “anikanch inay”? In kwilej amwipula Yesu anch: “Nany upandakena kujimb mu Want wa mwiur?” (Mat. 18:1) Pa chirung chinacha, in Yuda avud ading akwatin nich usey nakash maaz. Mulej umwing ulondin anch: “Ntumb ni kalimish yawiy yakimbangau antu mu mwom wau.” Yesu wading wij anch in kwilejend afanyidin kusal usu nakash mulong kudiosh mu michim yau mwikadil wa kubambil wading upalangena pakach pa in Yuda. w21.06 20 par. 2; 21 par. 6, 8-9

Mud mukurump, kambuy Paul washa chilakej chiwamp. Chilakej, chisu chaswirikenau akadivar a ku Tesalonik chiyul, Paul kidjidjekap kuyiyul. Pakwez, mu mikand yayifundinay, Paul wasambela bil kuyijikitish mulong wa mudimu wau wa ritiy, rukat rau, ni kujijaman kwau. Washinshikina kand mashakamin mau, ni wayileja anch wading wij anch mashakamin mau mading makash, ni ading ajijamedin rupompat. (1 Tes. 1:3; 2 Tes. 1:4) Wayileja kand akadivar inay anch ading chilakej chiwamp kud in Kristu akwau. (1 Tes. 1:8, 9) Afanyina chakin kwov musangar nakash patambulau kujikitish kwa chirungul kwa Paul! Pakad kwidjidjek, afanyina kwiyov chakin kamu anch Paul uyikatin akadivar nend nakash. Chawiy chom chamukwasha kupan yiyul yiwamp mu mikand yend yaad yayifundinay in Tesalonik.​—1 Tes. 4:1, 3-5, 11; 2 Tes. 3:11, 12. w22.02 15 par. 6

Satan uyisadidin antakel a relijon wa makasu mulong wa kuyifundish antu anch Yehova ud mukachisum ni ndiy udia musul wa mar tumena. Amwing pakach pau akat kulond anch an afiling, Nzamb ndiy uyisendining mulong ukwet kuswir kwa angel avud mwiur. Kwinoku kud kuswing mud ik! Etu twij nawamp musul wa mar. Anch twayel nakash ap anch twafish mukatish netu, tukatap kumufish nich Nzamb. Twitiyijin anch dichuku dimwing yom yikuwap. Tukutwish kuyilej antu awonsu akatina kutesh chakwel ijik anch Yehova ud Nzamb wa rukat nakash. Anch twasal mwamu, tukat kumukwash Yehova kumwakul Satan ukata kumusarumun. (Jnsw. 27:11) Yehova ud Nzamb wa ranaken. Kakatiningap kutuman tukat kudilol mulong wa mar tumena mud rupompat, ni kuburen kuwanyin. (Kus. 22:23, 24) Pitukata kwov kusansan, Yehova niyend ukat kwov kusansan; ukatin kupwish mar, ni ukumapwish.​—Ilakej ni Kubudik 3:7, 8; Isay 63:9. w21.07 10 par. 9-10

Piswimp ap, antu aziyidina akusanger dilau dipandakena kujimb dia kumukat ni kumwifukwil Yehova chikupu! Yesu ukupwish milong yawonsu yaletishau kud Adam ni Ev pakwatau mupak wa kudiokal mu dijuku dia Nzamb. Yehova ukuvumbul mamiliyon ma antu ni kuyinkish mutapu wa kwikal ni mwom wa chikupu ni ukash wa mujimbu uwanyidina pa divu dikukarumunau kwikal paradis. (Luka 23:42, 43) Pakwikalau antu amusadidina Yehova awanyidina, akwikal ni “uyaj ni kulim” yafunday David. Anch ud wa mu ‘chisak chijim,’ ukwet ruchingej ripandikena kuwap. (Kuj. 7:9) Nzamb ukukatin; ukatin anch wikala mu dijuku diend. Chawiy sal usu wey wawonsu mulong wa kumusangaresh. Dichuku diawonsu, lam kushilamu kwa Nzamb mu muchim ni mu manangu mey. Kwat nich usey dilau ukweta dia kumwifukwil Tatukwetu wa rukat wa mwiur, ni sanger ruchingej ra kumushiman chikupu! w21.08 7 par. 18-19

Muprofet Jeremiy walejana mu mivu 40 ni kusut ap anch antu ading alikin kwau kumutesh ni ading amupompatin. Waziya mulong wa ‘masaal ni kumuswingish’ kud in kumupompat ni watonga ja kulikap chisend chend. (Jer. 20:8, 9) Pakwez Jeremiy kaziyap bwat! Yom ik yamukwasha kudandamen ni kutan musangar mu mudimu wend? Washinshikina pa yom yaad ya usey. Chakusambish, uruu wa Nzamb walejanay Jeremiy wading ulejen “ruchingej ra kurutu.” (Jer. 29:11) Cha kaad, Yehova wamutonda Jeremiy kuyilej antu uruu wend. (Jer. 15:16) Tukat kulejan niyetu uruu wa ruchingej kud antu, ni mulong tud Atuman a Yehova, tukwet dijin diend. Anch twashinshikin manangu metu pa yom yiney , tukutwish kwikal ni musangar chikalap nchik mutapu wakwilau antu. Chawiy kangal waziy anch waman anch mwin kwilej wa Bibil kayilap kamu kurutu mud mutapu wading uchingejina. Mud mudimu wa kudim, mudimu wa kwikadish in kwilej witin kushimpish muchim.​—Jak. 5:7, 8. w21.10 27 par. 12-13

Chikalap nchik kulep kwa chisu twasutishina kal mu kumusadin Yehova, tufanyidin kudandamen kulam ritiy rikash mudiay ndiy. Mulong wak? Mulong anch tubabelap, ritiy retu rikutwish kuziy. Vurik anch ritiy rirumburikin kand yom yakin yakad kumekan ku mes. Yom twakad kuman tukutwish kand kuyivuramen swa. Chawiy chom chatazukay Paul kuburen ritiy anch ‘chitil chikata kutupwakesh mu mutapu uswapela.’ Chad mutapu ik tukutwisha kwipuk kuwil mu mupit winou? (2 Tes. 1:3) Chakusambish, mwita Yehova spiritu wend utumbila ni sal mwamu chisu chawonsu. Mulong wak? Mulong ritiy chid chikunku cha dibuj dia spiritu. (Gal. 5:22, 23) Tukutwishap kukasikesh ritiy retu mudiay Sakatang pakad ukwash wa spiritu utumbila. Anch twadandamen kumwit Yehova spiritu wend, ndiy ukutwinkishay. (Luka 11:13) Pakampwil, tukutwish kulembil anch: “Tuwejinaku ritiy.” (Luka 17:5) Cha kaad, ileja pakad kujing Dizu dia Nzamb, Bibil.​—Kus. 1:2, 3. w21.08 18-19 par. 16-18

Amapal akutwish kukwash nakash dirijek dia Yehova mu mitapu kushalijan. Ap anch kakutwishap kusal midimu ya usu mud mwasalangau pakur, akwet ronganyin ra yom yivud nakash yamenau mu kusut kwa mivu. Yehova ukutwish kudandamen kuyisadin mu mitapu kushalijan Chilakej, Bibil ulejen yilakej yiwamp ya antu ashinshamena adandamena kumusadin Yehova nich mushiku djat ni mu upal wau. Chilakej, Moses wading ni mivu 80 pasambishau kumusadin kud Yehova mud muprofet ni ntakel wa muchid wa Isarel. Yehova wadandamena kumusadin Daniel mud muprofet ap anch wading pamwing ap ni mivu piswimp 90 ni kusut. Ni kambuy Yohan wading niyend pamwing ap ni mivu 90 ni kusut chisu chamupepilau kufund buku wa Kujingunik. Simeyon “wading [muntu] muwamp, wading umulimishin Nzamb,” pakwez Yehova wading umwij nawamp ni wamwinkisha dilau dia kumuman mwan Yesu ni kulejan uprofet piur pa mwan winou ni makwend.​—Luka 2:22, 25-35. w21.09 3-4 par. 5-7

Anvaj kafanyidinap kumwilakej mwan ni mwan mukwau ap kumwit mwan kusal yom yimusutina chipim. Anch anvaj asal mwamu, akutwish kumuziyish mwanau. (Efes 6:4) Nambaz utazukinau anch Sachiko ulondin anch: “Maku wading ukatin anch nimatik ni chitot pa chitot, chom chading chinkasikedina kusal. Ap anch napwishin kal shikol pasutin kal mivu yivud, yisu yimwing niyipwiling anch Yehova ukwatin kamu nich usey yom nimusadidina nich usu wam wawonsu.” Mwant David walonda anch “kinikat kusotap kwam yom yijim yijim” ap kupakish kusal yom yimusutina usu. Kwikepish ni kwijik mimbu yend kwamuletina “musangar ni chisambu.” (Kus. 131:2) Yom ik yikutwishau anvaj kwilejin ku mazu minam ma David? Anvaj afanyidin kwikal ikepishina ni ija mimbu yau, kafanyidinap kuchingej kusal yom yiyisutina chipim, ap kuchingej anch anau asal mwamu. Anvaj akutwish kusal anch anau iyova nawamp kusutin kushinshikin mimbu yau payikwashinau kwitekin mipak yikutwishau kuwanyish. w21.07 21-22 par. 5-6

Tufanyidin kuvurik anch Yehova watwinkisha chipan cha want ipau. Chinech chirumburikin anch tufanyidin kutond anch tukumuziyin ap bwat. Ansand amwing kadingap ni anvaj adia chilakej chiwamp, pakwez atonda kumusadin Yehova ni kushal ashinshamena. Amwing anvajau asala usu wa kuyifundish kumukat Yehova, pakwez mu kusut kwa chisu, amulika Yehova. Chawiy, muntu ni muntu ufanyidin kukwat mupak amwinend wa kumusadin Yehova. (Jos. 24:15) Chawiy, anvaj akweta ushon mulong mwanau wamulikin Yehova kafanyidinap kwifish nich! Yisu yimwing, nvaj ukutwish kulikap uyakin ap kand kudjibul dijuku diend. (Kus. 27:10) Chinech chikat kuyisal an nayimp nakash, mulong ading ayimen anvaj au mud chilakej chiwamp cha kwimburij. En ansand, anch anvajen ayopat mu chikumangen, ikalany amboku nich kashinsh anch Yehova wij kusansan urishinanya nich. Ukukatinany ni ukwet musangar mulong udandamedinany kumusadin nich kushinshaman kwen. Vurikany anch ufanyidinanyap kwifish nich mulong wa mupak wa anvajen. w21.09 27 par. 5-7

Tukutwish kumufanakesh mwin Kristu wopatinau ni mukoku uyedina ukutwisha kuyisamburishin amikoku akwau. Niyend uyedin mayej ma mu spiritu. (Jak. 5:14) Tukutwish kufanakesh mayej ma mu spiritu nich mayej makata kusamburok nakash. Chawiy, chid cha usey yisu yimwing kumwauril muntu uyedina mu spiritu ni chikumangen. Dipup dined ud uman wa rukat ra Yehova pantaliken ni antu ashinshamena adia mu diyind Diend, ni kusal mwamu kukutwish kumukwash muntu warumbukina kukarumuk. Muntu wopatinau ukutwish kwend kukumangan ku yikumangan mulong wa kukasikesh kand ritiy rend. Ukutwish kand kwend kutambul mikand yend ya kwilej ni kutal program wa JW Télédiffusion. Ni amakurump akutwish kushinshikin mutapu uyilay kurutu mu spiritu, akutwish kumwinkishang yiyul chisu ni chisu mulong wa kumukwash kurijek urund wend ni Yehova chakwel amuchirish kand mu chikumangen mud Kaman wa Yehova. w21.10 10 par. 9, 11

Nlel tukat kulondul mulad wa difukwil washau kud in Kristu a mu mivu chitot ya kusambish. Chilakej, mutapu utenchikinau dirijek dietu ud kamu mud mwasalau in Kristu a kusambish​—tukwet atulam in kwendangan, amakurump, ni ankwash a mudimu. (Fil. 1:1; Tit. 1:5) Mud mwasalau in Kristu a kusambish, tukat kulimish yijil ya Yehova piur pa kulalijan ni piur pa uruw, piur pa mutapu wa kusadin mash, ni tukat kuyopat mu chikumangen in kusal uyimp alikina kukarumuk. (Mid. 15:28, 29; 1 Kor. 5:11-13; 6:9, 10; Heb. 13:4) Bibil utulejin patok anch Nzamb witiyin ching “mutapu umwing wa kumwitiyij.” (Efes 4:4-6) Dilau dijim mud ik tukweta dia kwikal pakach pa antu a Yehova ni dia kwijik uyakin piur pa Yehova ni yom yitonginay kusal! Chawiy tudandamenany amboku kusal yawonsu tukutwisha kusal mulong wa kukasikesh kashinsh ketu anch tud mu uyakin. w21.10 22-23 par. 15-17

Mwant Josafat warisha ni chikokujol chikash. Rumb ra amasalay in Amon, in Mowab, ni a ku mikandu ya Seyir ayirishikisha ndiy, dijuku diend, ni antu end. (2 Jsng. 20:1, 2) Yom ik yasalay Josafat? Wamwita Yehova chakwel amukwasha ni kumwinkish usu. Malembil ma kwikepish ma Josafat mafundinau mu 2 Jinsangu 20:5-12, mamekeshin mutapu wading utekinay ruchingej rend mudiay Tatukwend wa rukat udia mwiur. Yehova wamusadina mwin Levi Jakaziel mulong wa kupan uruu wend kud Josafat, ukweta mazu madia mu mufund wa nlel. Mulong wading ni ritiy rikash mud Nzamb, Josafat wasala mud mwamulejau. Chisu chayay pamwing ni antu end kusankanijan ni akankuny nau, pa ndond pa kutek kurutu amasalay afanyidina kuyijip akankuny nau, ndiy watakejaku in kuwang akad yom ya njit. Yehova wawanyisha kamu kushilamu kwend kud Josafat; wamukwasha kuyipandakan akankuny nend.​—2 Jsng. 20:18-23. w21.11 15-16 par. 6-7

Anch mar matushiken, tukutwish kwikal nich kashinsh anch Yehova ukutwinkish ukwash tuswirikedina mulong wa kulam kushinshaman kwetu. (2 Kor. 4:7-9) Tukutwish kwikal nich kashinsh anch rukat rudimukina ra Yehova rikudandamen kwikal netu mud kamu mutapu walonday nfund a kuseng anch, “mes ma Yehova matadil kudi awiy akata kumulimish ndiy, awiy kamu akata kuchingej rukat rend rudimukina.”(Kus. 33:18-22) Kurutu tusambish kumusadin Yehova, Nzamb watumekeshinang rukat mud riyimekeshidinay antu awonsu. Pakwez mulong katat tud atushalapol end, ukat kutumekeshin kand rukat rudimukina. Rukat riner rudimukina rimubachikin Yehova kutubwikat nich makas mend ma diking. Ukudandamen kutusejish piswimp ni ndiy ni kutusadin yom yawonsu yatukanay. Ukatin kand anch twikal arund nend chikupu! (Kus. 46:2, 3, 8) Chawiy, chikalap nchik yikokujol tukutwisha kurish nich, Yehova ukutwinkish usu tuswirikedina mulong wa kulam kushinshaman kwetu. w21.11 7 par. 17-18

Avud pakach petu amenap kal muntu walamap kal rukuny mulong wa mbay nend wa mudimu, mbay nend wa ku shikol, mwanamakwend, ap muntu wa mu dijuku diend​—pamwing ap mu mivu yivud! Vurik anch anamakwend a Josef dikum amulamina rukuny, ni dinsudien ashikena kusal chom chiyimp nakash. (Dis. 37:2-8, 25-28) Pakwez Josef wayisadina mu mutapu ushalijadina! Pikalay ni ulabu, pa ndond pa kuyifundakeshin anamakwend, ndiy wayovila riy. Josef kalamap rukuny. Pakwez, wasala kukwatijan ni chiyul twamanang mu In Levi 19:18. (Dis. 50:19-21) Rusangu ra Josef ra kulikishin pa ndond pa kulam rukuny ap kufundakesh chid chilakej kud in Kristu akatina kumusangaresh Nzamb. Yesu watuleja kuyilikishin antu akata kuturumbukin. (Mat. 6:9, 12) Chisik chimwing, kambuy Paul wayibabesha ambay nend in Kristu anch: “Arund nam, kangal wafundakeshany.”​—Rom 12:19. w21.12 11 par. 13-14

Uchuku nakash pa dichuku dia 14 ngond wa Nisan muvu wa 33 C.C., Yesu waya mu chir cha Getiseman. Kwinikwa wamufungwila Yehova muchim wend mu malembil. (Luka 22:39-44) Pa chisu chinicha chikash, Yesu “walembila . . . nich dizu dia piur ni mansoj ku mes.” (Heb. 5:7) Yom ik yitay Yesu mu malembil uchuku winiwa wa nsudien kurutu kwa rufu rend? Wita chakwel amwinkish usu wa kushal ushinshamena kud Yehova ni kusal rusot Rend. Yehova watesha ushon wadinga mu muchim wa Mwanend kusutin malembil, ni watuma mwangel chakwel amukasikesh. Yesu wading wiyakamishin mulong wa chisend chijim nakash chadingay nich cha kutumbish dijin dia Tatukwend. Yehova watesha malembil makurukina ma Yesu. Mulong wak? Mulong Yesu wading wiyakamishin chakusambish piur pa kushal ushinshamena kud Tatukwend ni kutumbish dijin diend. Anch twiyakamishin cha kusambish piur pa kusal chom chinech, Yehova ukwakul ku malembil metu chisu tumwitina ukwash.​—Kus. 145:18. w22.01 17-18 par. 15-17

Nlel Antu avud akat kulik kutesh uruu wetu anch mulong tukatap kwiyandjik mu milong ya politik. Akatin anch tusambish kuvot nau. Pakwez etu twij anch ang twamutond mwan a muntu kwikal ntakel wetu, kwakulond twamulik kal Yehova. (1 Sam. 8:4-7) Antu akat kutong kand pamwing ap anch tufanyidin kutung mashikol, ma opital ni kusal yom yikutwisha kuyikwash antu. Akat kulik kutesh uruu wetu mulong tusadin usu wa kulejan rusangu ruwamp pa ndond pa kukimb kupwish milong yirishinau nich antu mu mangand minam nlel. Yom ik tufanyidina kusal mulong wa kulam ritiy? (Mat. 7:21-23) Mudimu watushilay Yesu wawiy tufanyidina kukwat nich usey nakash. Tufanyidinap kwipan kukimb mutapu wa kupwish milong ya mangand minam. Tuyikatin antu ni tukat kuyovil riy mulong wa milong yirishinau nich, pakwez mutapu uwamp wa kuyikwash amutej netu, ud kusutil kuyifundish piur pa Want wa Nzamb ni kuyikwash chakwel ikal arund a Yehova. w21.05 7 par. 19-20

Ap anch anyikel avud a michid yiney akat kulond nlel anch amusadidin Nzamb, kakatinap kulik want ni ulabu wau. Chawiy mud ant a pa chirung cha Yesu, nlel kand anyikel akat kumubwambwil Uzizidinau Many wa Yehova kusutin kuyirishikish in kwilejend ashinshamena. (Mid 4:25-28) Mutapu ik usadinay Yehova? Kuseng 2:10-12 wakwil anch: “Chawiy en ant babalany, en aanzuj a pansh iyiyan, wilejan manangu. Musadilany [Yehova] ni woma, sangarany ni kumuzal wom. Zengamany ni kusus mend ma mwan, palemp ukez kujiman, [ukujiyan] mwi njil, mulong ujim wend kiukulabangip kwez. Ayuk kwau awiy akat kukungamen mwi Ndiy.” Yehova ud muwamp ni uyishidin chisu cha kukwat mipak yiwamp. Achikwet mutapu wa kusal usu wa kuswimp ni kwitiy Want wa Yehova. Pakwez chisu chinech chidiap chilemp. (Isay 61:2) Chid chisu cha kuswapej nakash kud antu kusal usu wa kwilej uyakin ni kutond kumusadin Yehova. w21.09 15-16 par. 8-9

Paul wading ulondin anch tukutwish kusanger chom chawonsu cha ku mujimbu tukweta. (Fil. 4:12) Chom cha usey nakash tukweta ud urund tukweta pamwing ni Nzamb wetu, kadiap yom ya kumujimbu tukutwisha kwikal nich. (Hab. 3:17, 18) Shinshikin yom yayilejau in Isarel kud Moses kupwa kwa kusutish mivu 40 mwi mpay: “Mulong [Yehova] Nzamb wen wakuyukishanya kal mu midimu yawonsu ya makas men. . . . Mu mivu yiney makum manying, [Yehova] Nzamb wen wadi ni yenen, kiwaburenanyap chom.” (Kuv. 2:7) Mu mivu 40 yiney, Yehova wayinkishang in Isarel mana mud yakudia. Masun mau madiokalau kamu nich mu Idjibit kimapokap ap kutokurok. (Kuv. 8:3, 4) Yehova ukusangar nakash anch twilej kusanger yom tukweta, charumburik anch kwikal in kujikitish mulong wa kachom kin kawonsu katwinkishinay, ni kukaman mud chiyukish chend. w22.01 5-6 par. 10-11

Angatan, ukwetany chisend cha kuchidij majuku men, chawiy usadinany usu nakash mulong wa kumaking ni kumakwash. Anch warishany ni yikokujol, ukutwish kutongany anch ukwetany mutapu wa kuyipwish ayinen. Pakwez, ipukany kuchingejin pa usu wen. Pa ndond pa kusal mwamu, mwitany Yehova mu malembil pa ndond ya ayinen chakwel akukwashany. Chikwau kand, lembil nich kashinsh kawonsu pamwing ni mukajey. Kimb umutakel wa Yehova kusutin kwilej Bibil ni mikand yibudishinau kud dirijek dietu, ni sadin yiyul ukutana. Antu akwau akutwish kukis mipak ukwatina yimedina pa Bibil. Akutwish kulond anch nfalang ni yom ukulanda yikutwish kulet diking ku dijuku diey. Pakwez vurik chilakej cha Mwant Josafat. (2 Jsng. 20:1-30) Wamuchingejina Yehova ni wamekesha mwamu kusutin yisal yend. Yehova kamulikap ikundj winou ushinshamena, ni ijik anch niyey kakukulikap.​—Kus. 37:28; Heb. 13:5. w21.11 15 par. 6; 16 par. 8

Nzamb watutanga mu chifu chend, chawiy tukatap kusanger kuman antu akat kuyisadin akwau mu mutapu wakad kutentam. (Dis. 1:26) Pakwez, mulong tud antu akad kuwanyin, tukutwish kurumburish mulong kanang mu mutapu uyimp, ap anch tutongin anch tukwet uman wawonsu. Chilakej, vurik mutapu wakisay Yona piur pa mupak wakwatay Yehova wa kuyanaken in Ninive. (Yona 3:10–4:1) Pakwez shinshikin yibudikin yikalaku. Piswimp in Ninive 120 000 akarumuka ni apandisha mwom yau! Dinsudien, chamekana patok anch Yona ndiy wayirumburisha antu nayimp​—kadiap Yehova. Yehova kakwetap kuswir kwa kuyirumburil antu mayingishin ma mipak yend. Chid chakin anch Yehova wayitiya atushalapol end a pasak chakwel arumburil yovil yau piur pa mipak yakwatay ap yading yikimbinay kukwat. (Dis. 18:25; Yona 4:2, 3) Yisu yimwing, warumburilang mayingishin ma mipak yend. (Yona 4:10, 11) Ap mwamu, Yehova kakwetap kwend kuswir anch twitiy ap tutadik mupak wend, kurutu ap kupwa kwa kuukwat.​—Isay 40:13, 14; 55:9. w22.02 3-4 par. 5-6

Tukat kwikal mud mwan mukemp anch muntu ni muntu wamuman mukwau mud ud muwamp kumupandakanamu. (Fil. 2:3) Anch twasal usu wa kukudish mwikadil winou, tukwipuk kuyipwakesh antu akwau. Akadivar ni anambaz netu awonsu atusutinamu mu chom kanang. Chikutuswapel kuman mwamu anch twashinshikin pa mikadil yau yiwamp. Tufanyidin kulam mu manangu chiyul ech chapanay kambuy Paul kud in Korint anch: “Ov, nany wakuteka ey kwikal mujim kuyipandakanamu akwen? Ov, Nzamb kindiyap wakwinkisha yom yiney yiukweta? Chawiy ing, ukutwish nchik kwibaz anch yom yawonsu yiukweta yidi kwau yakwinkishau kudi Nzamb ya riy?” (1 Kor. 4:7) Chawiy tufanyidinap ap pakemp kukat anch antu akwau atubaz ap kutong anch tuyipandakenamu. Anch mukadivar ukat kusalang madiskur mawamp nakash ap anch nambaz ukwet ukaliweny nakash wa kutakel malejan ma Bibil, ufanyidin kupan ntumb kud Yehova. w21.06 21-22 par. 9-10

Chiyikasikedining nakash in kulejan amwing pa kuyitan antu ku yikumbu yau. In kulejan amwing ad mu jindond mudia yikumbu yichidijinau, kukasikena nakash pa kwandam ap yidia mu jimbumbu. Ku yikumbu mud yiney kukutwish kwikal kalam ukutwisha kukukangesh kwandam anch kakutazukangap kud in chikumbu. In kulejan akwau chiyikasikedin nakash pa kuyitan antu ku yikumbu yau ap ad mu tumal tukemp mudia kusu kwau antu akemp. Mu mal mud minam, yisu yimwing chitin kwend nakash chad lel utanap muntu—ni yisu yimwing ukushik kwol kwend kadiapaku kwend! Anch yawiy yikokujol urishina nich, kangal waziy. Pakish kuyendin antu chisu chindj. Tukutwish kwambamb nau antu avud anch twalejan pa chisu tukutwisha kuyitan ku yikumbu yau. Ap anch muntu wadiokal ku chikumbu, chidiaku ching wachirik kwol kwend! Akadivar ni anambaz avud amen anch kulejan kupwa kwa midi ap urel kud kuwamp, mulong akat kuyitan antu avud kwol kwau. Kupwa mu yisu yiney antu avud akat kwishadin ni akutwish kututesh nawamp. w21.05 15 par. 5, 7

Ov, yawiy kand yom yisadikina nlel? Mwaning. Antu avud akat kukis mulong Atuman a Yehova kakatap kwibomb nau mu kusal misambu ya yishankur yakad kukwatijan ni Mifund, mud misambu ya kuvadik ni Nowel. Akwau akat kujiman mulong Atuman a Yehova kakatap kwimbomb nau mu misambu ya wan a ngand ni kakatap kulimish yishankur ya pa yidil yakad kukwatijan ni Dizu dia Nzamb. Pamwing ap antu inay akwet kashinsh anch amwifukwidil Nzamb mu mutapu ukatinay. Pakwez kakutwishap kumusangaresh, mulong atakejin yishankur ya mangand kurutu pa ndond pa kulimish yom yifundishinay Bibil. (Mar. 7:8, 9) Yom ik tufanyidina kusal mulong wa kulam ritiy? Tufanyidin kukat nakash yijil ya Yehova ni mbil jend. (Kus. 119:97, 113, 163-165) Anch twamukat Yehova, tukwipuk yishankur yawonsu yikisinay. Tukwitiyap anch chom ap chimwing chitukangesh kumukat Yehova. w21.05 6 par. 15-16

Mutapu ik tukutwisha kusadin chiyul cha kambuy Paul? Tufanyidin kukasikesh ritiy retu kusutin kwilej Bibil chisu chawonsu, kulembil chisu chawonsu ni kudandamen kusal nich mushiku mudimu watwinkishinay kal Yehova. (2 Tim. 4:4) Anch tukwet ritiy rikash, tukwiyakamishap anch twatesh jinsangu jiyimp jipalangeshinau piur petu. (Isay 28:16) Kumukat Yehova, kukat Dizu diend, ni kuyikat akadivar netu kukutukwash chakwel kangal atupumbul kud antu alikina kal uyakin. Mu mivu chitot yakusambish, antu avud alika kumwitiyij Yesu. Pakwez kwading kand akwau avud amwitiyija, kuwejaku ni mwin Yuda umwing wa mu chisak cha in Sanedrin ni “in kupesh avud” kand. (Mid. 6:7; Mat. 27:57-60; Mar. 15:43) Chilik chimwing, nlel kud mamiliyon ma antu iminya dang mu uyakin. Mulong wak? Mulong ij ni akatin uyakin udia mu Mifund. Dizu dia Nzamb dilondin anch: “Antu akatila yijil yey akwet chisambu, kwikil chom ap chimwing chikutwisha kuyiwish.”​—Kus. 119:165. w21.05 13 par. 20-21

Kambuy Paul wading wij anch yom yawonsu yasalay mu mudimu wa Yehova wayisala kusutin usu wa Nzamb, kadiap kusutin usu wend. Walonda anch usu wa Nzamb Yehova wamwinkisha Paul usu wa kuwanyish nawamp mudimu wend kusutin spiritu wend utumbila​—chikalap nchik rupompat, kumutek mu rukan, ni yikokujol yikwau yarishay nich. Nsand Timote wadinga murund nend a Paul, wachingejina niyend ukwash wa Nzamb mulong wa kuwanyish mudimu wend. Timote wamutwalangaku Paul mu maweny malemp ma umishoner. Kupwa, Paul wamutuma kand ku jindond kushalijan mulong wa kukasikesh yikumangen. (1 Kor. 4:17) Chimeken anch Timote wiyova anch kakutwishap kuwanyish yisend yiney. Pamwing ap yawiy yamubachika Paul kumufundin anch: “Kangal muntu kukudiul mulong chiuchidia nsand.” (1 Tim. 4:12) Kupwa, pa chisu chinicha Timote wading urishin kand ni rubwambu radingay nich mu mujimbu—​“kuyelol.” (1 Tim. 5:23) Pakwez Timote wading wij anch spiritu utumbila wa Yehova wafanyina kumwinkish usu wading ukwetay nich kuswir mulong wa kulejan rusangu ruwamp ni kuyisadin akadivar nend.​—2 Tim. 1:7. w21.05 21 par. 6-7

Mbil yilejenau mu Jakobu 1:19 yiyitadin kamu antu akata kupan yiyul. Jakobu wafunda anch: “Muntu mwawonsu ufanyidin kuswakal kutesh, pakwez ashimpish muchim pa kulond, ashimpish kand muchim wakad kujiman swa.” Mukurump ukutwish kutong anch wij yom yawonsu yisadikina, pakwez, ov, chid kamu chakin? Jinswir 18:13 utuvurishin anch: “Anch muntu wakul wakad kal kutesh [uman], udi usup wend ni usany.” Chid cha usey kumwipul muntu amwinend chakwel arumburila yom yimushikedina. Chinech chitin kutesh kurutu kwa kulond. Mukurump ufanyidin kwiyipul anch: “Yom ik yakushikedina mu mwom wey?” “Mutapu ik nikutwisha kukukwash?” Anch amakurump itekin chisu cha kutesh bil yikokujol yirishinay nich muntu, akutwish kumukwash ni kumukasikesh nawamp mukadivar ap nambaz nau. Kuyulan nawamp kwitin kusal yom yivud kusutamu kwau kutang maverse ap kumulej muntu chom kampand ap kanang chikutwishay kusal. Akadivar nau anambaz akwet kuswir kwa kwiyov anch tuyibangidin, tuyiteshin, ni tukatin kuyikwash. w22.02 17 par. 14-15