Ngond wa 4

Yesu watumekeshina rukat rijim kusutin kupan mwom wend kwa kwisotin mulong wetwetu. (Yoh. 15:13) Tukwetap chom ap chimwing tukutwisha kumufut Yehova ni Yesu mulong wa rukat ratumekeshinau. Pakwez tukutwish kumekesh kujikitish kusutin yom tusadina mu mwom wetu wa pichuku pichuku. (Kol. 3:15) Azizidilau many akat kukwat nich usey nakash difut, mulong diawiy diyazuridina njil ya ruchingej riwamp nakash rikwetau. (Mat. 20:28) Mulong wa ritiy rau mu yakupesh ya Yesu, Yehova wayitazuka anch atentamin ni wayitiya kwikal mud anend. (Rom 5:1; 8:15-17, 23) Amikoku akwau niyau akwatin nich usey difut. Mulong atekin ritiy mu mash michilay Yesu, ayitokishin kal ku mes ma Nzamb, ni akutwish kumusadin midimu yitumbila ni kwikal ni ruchingej ra ‘kupand ku mar makash.’ (Kuj. 7:13-15) Yisak yiney yawonsu yaad yikat kumekesh kujikitish mulong wa difut kusutin kukumangan ku Chivurikish muvu ni muvu. w22.01 23 par. 14-15

Yesu wading wiyakamishin piur pa diyingishin diamujipinau. Amudimbena anch wamusala Nzamb, charumburik anch kamulimishinap Nzamb ap dijin diend. (Mat. 26:64-66) Diyingishin dined diamakasu diamusala Yesu nayimp nakash, ni wasota anch Tatukwend amukamunin mu usany winou. (Mat. 26:38, 39, 42) Chakusambish, afanyina kumupamp Yesu pa mutond mulong wa kuyikol in Yuda ading mu mashing ma pakampwil. (Gal. 3:10) Itiya anch akuziyin ku Chijil cha Nzamb, pakwez kawanyishap kushilamu kwau. Mud chibudikin, mashing minam miweja pa mashing makwau madingau nich maswanau ku chitil cha Adam. (Rom 5:12) Chijil cha Nzamb chading chilondin anch muntu mwawonsu ukusala chitil chiwanyidina rufu chifanyidin kumujip. Kupwa mujimbu wend chifanyidin kuupamp pa mutond. (Kuv. 21:22, 23; 27:26) Chawiy pamupampau Yesu pa mutond, wayifungwila in Isarel njil ya kukolik ku mashing, ap anch amulika. w21.04 16 par. 5-6

Tongin mar mamanay Yesu dichuku diend dia nsudien panap pa divu kurutu kwa kufa. Amasalay in Rom amubula pakad riy. (Mat. 26:52-54; Yoh. 18:3; 19:1) Amubula ni nfimbu jazanona mbij jend pa mujimbu. Kupwa amusendisha mutond ulimina nakash pa nyim yend yading yitat ya yibul. Yesu wasambisha kukak mutond winou mulong wa kuutwal pa ndond yikumujipinau, pakwez kupwa kwa chisu chikemp amasalay amuleja ikundj umwing kumusendinau. (Mat. 27:32) Pashikau pa ndond yakumujipin, amasalay amupampina Yesu pa mutond nich misumad mu makas ni mu yidjatil yend. Misumad yamupampau nich yasambisha kubwechol mu yital mulong wa kulim kwa mujimbu wend. Arund nend anenganana nakash ni makwend wadila, pakwez anyikel in Yuda amusipa Yesu. (Luka 23:32-38; Yoh. 19:25) Yesu wabinda mu asaa avud. Wading upimin kwa mar nakash, mulong rudung ni michim yend yadingap yisadina nawamp mulong wa mutapu wamupampau. Yesu wading wij anch wajijamana djat ni kwinsudien, ni kurutu kwa kukatuk mupim, wamulembila Yehova kapamp kansudien. Kupwa wazendjika mutu wend pansh ni wafa. (Mar. 15:37; Luka 23:46; Yoh. 10:18; 19:30) Yesu amujipa pakemp pakemp mu mutapu usansena nakash ni ukwatishena usany! w21.04 16 par. 4

Yesu wayileja atwimbuy end ashinshamena 11 manswik maad​—manswik masu ni manswik ma Want. (Luka 22:20, 28-30) Manswik minam mayazurila atwimbuy inay pamwing kand ni antu akwau akemp njil ya kwikal ant ni in kupesh mwiur. (Kuj. 5:10; 14:1) Ching kusu azizidilau many achidia pa divu adia mu manswik minam maad awiy akutwisha kudia mukat ni kuna nviny ku Chivurikish. Yehova wayinkisha ruchingej ruwamp nakash—​kusanger mwom wakad kufang ni kuvund mwiur, kuyikel pamwing ni Yesu Kristu ni pamwing kand ni antu akwau akwikala pakach pa antu 144 000, ni piur pa yawonsu yiney kushakam piswimp kamu ni Yehova Nzamb! (1 Kor. 15:51-53; 1 Yoh. 3:2) Azizidilau many ij anch chiyifanyidin kushal ashinshamena djat ni ku rufu rau.​—2 Tim. 4:7, 8. w22.01 21 par. 4-5

Kwading ampongarik aad apampau pamwing ni Yesu. (Luka 23:40, 41) Umwing pakach pau wakarumuka wamutal Yesu, wamwel anch: “Nvurika piukeza kez mudi Mwant!” (Luka 23:42) Mulong wading wij anch Tatukwend ud mwin kulikishin, Yesu walonda mazu mamwinkisha mpongarik winou wading ukimbina kufa ruchingej. (Kus. 103:8; Heb. 1:3) Yehova ukatin kutulikishin ni kutwovil riy anch twanenganan kamu chakin mulong wa yom yiyimp twasala ni twitiyij anch ukutwish kutulikishin yitil yetu kusutil mash ma Yesu Kristu michika. (1 Yoh. 1:7) Chikutwish kuyikasiken antu amwing kwitiyij anch Yehova wayilikishidin kal. Anch wawiy mutapu ukata kwiyov yisu yimwing, tongijok bil: Yesu wamwovila riy mpongarik umwing wading ufanyidina kufa wading wasambisha kal lel chad kumwitiyij. Chad ing mulong wak Yehova kakutwishap kuyovil riy chipandikena atushalapol end ashinshamena?​—Kus. 51:1; 1 Yoh. 2:1, 2. w21.04 9 par. 5-6

Mulong Yesu washala ushinshamen djat ni ku rufu, wawanyisha yom yivud nakash. Chakusambish, wamekesha anch Satan ud mukamakasu. Yesu wamekesha anch muntu uwanyidina ukutwish kulam kushinshaman kwend chikalap nchik yom yawonsu yikutwishay Satan kusal. Cha kaad, Yesu wapana mwom wend mud difut. Mulong wapana mwom wend, chayiswapela antu akad kuwanyin kwikal mu urund ni Nzamb ni kwikal ni ruchingej ra mwom wa chikupu. Cha kasatu, Yesu walondina kutentam kwa ukaleng wa Yehova ni washitwisha dijin dia Tatukwend ku masaal. Tumanany dichuku ni dichuku mud kawiy kapamp ketu kansudiel katufanyidina kumekesh kushinshaman! Mwamu ap anch twafap nchik, tukutwish kulond anch, “Yehova, nasadin usu wam wawonsu wa kulam kushinshaman kwam, wa kumekesh anch Satan ud mukamakasu, wa kutumbish dijin diey, ni wa kulondin ukaleng wey!” w21.04 12 par. 13-14

Kupwa kwa kumufund ni kumufish nich ya makasu piur pa yom yakadiay kwijik, Yesu amusip kal, amuzengol kal, ni kupwa amupamp kal pa mutond wa mar. Amupampang kal misumad mu makas ni mu yidjatil yend. Wovil kusansan nakash pa kupim ni pa kulond. Pakwez ufanyidin kulond, mulong ukwet yom ya usey yifanyidinay kulond. Minam mad malejan ma usey nakash mud ik twilejina kal ku mazu mansudiel malonday Yesu! Atuvurish kal usey wa kuyilikishin antu akwau ni kwikal nich kashinsh anch Yehova ukutulikishin niyetu. Tuyukin nakash pakwikal ni dijuku dipandikena kuwap dia mu spiritu dia akadivar ni anambaz akatina kutukwash. Pakwez anch tukwet kuswir kwa ukwash, tufanyidin kuyilejamu. Twij anch Yehova ukutukwash kujijamen chikokujol chawonsu tukurisha nich. Ni twaman kal usey wa kuman dichuku diawonsu mud diawiy dichuku diansudiel tufanyidina kumekesh kushinshaman ni kwikal nich kashinsh anch mwom wetu ud mu makas ma Yehova. w21.04 8 par. 1; 13 par. 17

Kulondul nzau ja Yesu kutwadin ku mwom wa chikupu. Pamwipulau Yesu kud nsand umwing mpich piur pa yom yifanyidinay kusal mulong wa kwikal ni mwom wa chikupu, Yesu wamwakula anch: “[Ez] wikal mwin kwilej wam.” (Mat. 19:16-21) Yesu wayileja in Yuda ading alikina kumwitiyij mud Kristu anch: “Amikoku am . . . akat kwinlondul. Am nikat kuyinkish mwom wa chikupu.” (Yoh. 10:24-29) Tukat kumekesh anch tumwitiyijin Yesu, kusutil kuziyin ku malejan mend ni kwimburij yom yasalay. Anch twasal mwamu, tukudandamen kwendin mwi njil yitwadina ku mwom wa chikupu. (Mat. 7:14) Kurutu kwa kulondul nich kushinshaman nzau ja Yesu, tufanyidin kwilej kumwijik. Kwilej “kumwijik” Yesu kukwetingap musul. Tufanyidin kudandamen kwilej mulong wa kumwijik nawamp​—kwilej piur pa mikadil yend, mutapu wend wa kutong, ni mbil jend. Chikalap nchik uvud wa mivu twasadina kal mu uyakin, tufanyidin kudandamen kwilej kumwijik Yehova ni Mwanend. w21.04 4 par. 9-10

Chimeken anch Paul wiyovang nayimp nakash anch wavurik yom yiyimp yasalay pasak. Chawiy, chishimokishenap pa kuman anch wiyela amwinend anch ud mukayitil “muyimp kupandakanamu awonsu”! (1 Tim. 1:15) Kurutu kwa kwilej uyakin, Paul waya mu misumb kushalijan kuyikimb in Kristu mulong wa kuyizengol, amwing wayiteka mu rukan, ni akwau witiya anch ayijip. (Mid. 26:10, 11) Chakin kamu, Paul wiyovang nayimp nakash anch wamusankan nsand mwin Kristu ukweta anvaj ajipeshishay? Paul wanenganana nakash mulong wa kurumbuk kwasalay, pakwez wading wij anch kakutwishap kuswimp chom. Witiyija anch Kristu wafa mulong wendendiy, ni wafunda nich kashinsh kawonsu anch: “Mulong wa ranaken ra Nzamb am nidi mudi munidia.” (1 Kor. 15:3, 10) Dilejan ik tudioshinaku? Itiy anch Kristu wafa mulong weyey ni wakufungwila njil ya kwikal ni urund uwamp ni wa pakampwil ni Yehova. (Mid. 3:19) Yom ya usey yimenay Nzamb yid yom usadina katat ni yiukusala mu machuku ma kurutu, kadiap kurumbuk wasala pasak, ap anch chisu warumbuka wading wikadin kal Kaman ap bwat.​—Isay 1:18. w21.04 23 par. 11

Ap anch in Yuda avud a pa chirung cha Yesu kadingap katongidina anch Mesia ukufa, pakwez Mifund yasambela kulejan anch: “Ndiy wapana mwom wend ku rufu, witiya kufa rufu ra antu ayimp; witwika yitil ya antu avud, chad ndiy wayilembidina in kufa nich chakwel atambul dilikishin.” (Isay 53:12) Komb in Yuda kadingap ni diyingishin dia kulik kumwitiyij Yesu anch mulong amujipa mud mukayitil. Nlel, tukutwish kwipuk kupumbuk anch twakimb uyakin wa yom. Mu Mafundish mend ma pa Mukandu, Yesu wayileja antu ading amuteshina anch antu amwing akez “kukutwambilany makasu.” (Mat. 5:11) Makasu minam madiokil kud Satan. Ndiy ukata kuyibachik antu atukisina chakwel apalangesh makasu piur petu. (Kuj. 12:9, 10) Tufanyidin kwipuk makasu ma akankuny netu. Tufanyidinap kumalikidin chakwel matwovish wom ap kuziyish ritiy retu. w21.05 12 par. 14, 16

Mukwasha mwin kwilej wey wa Bibil kumuchingejin Yehova. Yesu wayinkisha in kwilejend kashinsh anch Yehova ukuyikwash mulong uyikatin. (Mat. 10:19, 20, 29, 30) Muvurisha mwin kwilej wey anch Yehova ukumukwash niyend. Ukutwish kumukwash kumuchingejin Yehova kusutil kulembil nend pamwing piur pa mipak yend. Franciszek ushicha mu Polony ulondin anch: “Yisu yivud, mulej wam wajimbulang mipak yam mu malembil mend. Pinamana mutapu Yehova wakulangay ku malembil ma mulej wam, niyam nasambisha kapamp kamwing kulembilang. Namana mutapu wankwashau kud Yehova chisu nita ku mudimu wam chakwel anshilaku chisu cha kukumanganang ku yikumangan ni ku yitentam.” Yehova uyibangidin nakash in kwilej etu a Bibil. Ukat kusanger nakash usu ukatau kusal in Kristu wa kufundish mulong wa kuyikwash antu kumusejin ndiy piswimp, ni uyikatin nakash alej inay mulong wa mudimu wau. (Isay 52:7) Anch utakedinap dilejan dia Bibil pa chisu chinech, ukutwish kudandamen kuyikwash in kwilej a Bibil kuya kurutu mulong wa kushiken ku dibatish kusutil kuyitwalaku in kulejan akwau ku malejan mau ma Bibil. w21.06 7 par. 17-18

Tukutwish kumekesh kujikitish mulong wa dilau dia kwikal nich Dizu dia Nzamb kusutin kuditang pakad kujing. Tufanyidin kutek program wa kutang Bibil dichuku diawonsu, kadiap kwau ching kusu patumena anch tukwet chisu. Anch twikal ni chaku cha kwilej Bibil pakad kujing, tukutwish kudandamen kulam ritiy retu rikash. Chinyim ni “in manangu ni antu ilejina” a mangand minam, tukwet ritiy rikash rimedina pa Dizu dia Nzamb. (Mat. 11:25, 26) Anch twilej buku winou utumbila, mud chibudikin, tukwijik mulong wak mangand madandamedin kuyip nakash ni yom yikusalay Yehova mulong wa kumawapish. Chawil, el amboku tukwatany mupak wa kukasikesh ritiy retu ni tuyikwashany antu avud chakwel ikal ni ritiy mudiay Sakatang wetu. (1 Tim. 2:3, 4) Ni el tudandamenany kuchingel chisu tukumushimana Yehova ni kulond mazu madia mu Kujingunik 4:11 malondina anch: “A! [Yehova], Nzamb wetu! Ey yey uwanyidina kutambul uyaj . . . mulong yey watanga yom yawonsu.” w21.08 19 par. 18-20

Mulong ad atufung, amakurump akwet chisend cha kuyulan anch chid cha usey kusal mwamu. Afanyidin kusal usu wa kupan yiyul yidia ya ukwash ni ya kuyikasikesh antu, ni yikutwisha “kusangarish muchim.” (Jnsw. 27:9) Amakurump ayikatining akadivar nau anambaz nau. Yisu yimwing, akat kumekesh rukat rau kusutin kumuyul muntu wasambisha kal kuya mwi njil ya chitil. (Gal. 6:1) Kurutu ambamba ni muntu, mukurump ukutwish kushinshikin yom yalonday kambuy Paul piur pa rukat. “Rukat rikat kushimpish muchim, rudimukin kand. . . . Rukat kirukubangangakup milong, rukat rikat kutukasikesh yisu yawonsu kulam ritiy retu, ni ruchingej retu, ni kushimpish kwetu kwa muchim.” (1 Kor. 13:4, 7) Kutongijokin pa ma verse minam kukumukwash mukurump kushinshikin yom yimubachikina kuyulan ni kumuyul mukadivar nend nich rukat. Anch muntu uyudinau wiyov anch mukurump umubangidin kamu, chikutwish kumuswapel kwitiy chiyul. w22.02 14 par. 3; 15 par. 5

Yehova payitangay angel ni antu, ading awanyidina. Kadingap ni chidik ap chimwing. Pakwez mwangel umwing ntombwij Satan (charumburik anch “Mwin Kubwambwil”) wayibachika Adam ni Ev, antu awanyidina kumubwambwil Yehova. Angel ni antu akwau ibomba nau mu wintombwij. (Jud 6) Yehova wiyova chakin kamu anch amutun kal. Pakwez wajijamana, ni ukudandamen kujijaman djat kamu ni pakuwanyina chisu chatekay mulong wa kuyijiyish antombwij awonsu. Yom yiney yikuyiletin atushalapol end ashinshamena musangar nakash, awiy ajijamedina nend pamwing uyimp usadikina mu mangand minam! Satan wamufunda Job, kashalapol utentamina wa Yehova, ni ukat kuyifund atushalapol awonsu ashinshamena a Yehova anch amusadidin Nzamb mulong wa kutanyinamu kwau ayinau. (Job 1:8-11; 2:3-5) Djabul udandamedin kusal mwamu ni nlel unou. (Kuj. 12:10) Tukutwish kumekesh anch Satan ud mukamakasu anch twajijaman mu yoziu ni kushal ashinshamena kud Yehova mulong tumukatin. w21.07 9 par. 7-8

Kambuy Paul wasadina chilakej mulong wa kutufundish usey wa kuswimp mu mwom wetu. Wafunda anch tufanyidin kupampin “ku mutond” wuntu wetu wa pakur. (Rom 6:6) Yesu witiya kumupamp pa mutond mulong wa kumusangaresh Yehova. Chilik chimwing, mulong wa kumusangaresh Yehova, tufanyidin niyetu kwitiy kuswimp mikadil ni yisal yikisinay. Ching kusu anch twawanyish nzau jinej pawiy tukwikala ni kom kishitwila ni ruchingej ra kusanger mwom chikupu. (Yoh. 17:3; 1 Pita 3:21) Yehova kakutwishap kuswimp mbil jend mulong wa kutusangaresh. Pakwez, yetu tufanyidina kuswimp wuntu wetu kukwatijan ni mbil jend. (Isay 1:17, 18; 55:9) Ap kupwa kwa kutubatish, tufanyidin kudandamen kurishikish maku mayimp ma ku mujimbu. Mwita Yehova ukwash mu malembil ni chingejin spiritu wend, kangal mu usu wey amwiney. (Gal. 5:22; Fil. 4:6) Chitwitin kusal usu nakash anch tukimbin kudjol wuntu ukur ni kuudjibul kulemp. w22.03 6 par. 15-17

Yehova utukanin anch ukutwinkish yakudia, yidjal, ni ndond ya kushakam anch twadandamen kukimb bil Want ni kushakam kukwatijan ni mbil jend jitentamina. (Mat. 6:33) Pa chinech, tufanyidin kwipuk kutong anch yom ya kumujimbu yitumena mu mangand minam yikutuletin diking ni musangar wakin. Twij anch tukwikal ni chisambu chakin ching anch twasal rusot ra Yehova. (Fil. 4:6, 7) Ap anch tukutwish kwikal ni mutapu wa kuland yom yivud, tufanyidin kushinshikin mulong wa kuman anch tukwet chisu ni usu wa kuyisadin ni kuyirijek. Ov, tukulamat nakash ku yom yetu ya ku mujimbu? Vurik anch Yehova watwinkisha mudimu wa kusal mu dijuku diend. Chinech chirumburikin anch tufanyidinap kwikal ni kampuw. Chakin kamu, tusotinap kwikal mud ikundj walika dilau dia kumusadin Yehova pamwing ni ruchingej ra kwikal pakach pa anend—​yawonsu yiney mulong wading ulamatin nakash ku mapit ma pansh madingay nich!​—Mar. 10:17-22. w21.08 6 par. 17

Piwilejina Mifund, ukujingunin mikadil kushalijan ya Yehova—ni ukuman anch yawiy kand mikadil wajingunina chisu wading wilejina yitang. Kwilej piur pa mikadil ya Yehova kukat kutwinkish kashinsh anch Yehova udiaku chakin kamu. (Kub. 34:6, 7; Kus. 145:8, 9) Anch wamwijik Yehova nawamp nakash, ritiy rey mudiay ndiy rikukul, rukat rey mulong wendendiy rikukurik, ni urund wey ni ndiy ukwikal ukash. Yileja antu akwau piur pa ritiy rey mudiay Nzamb. Pakwez, chikwikal nchik anch muntu ulejina wakwipul chipul piur pa kwikalaku kwa Nzamb pakwez ey ukwetap kashinsh ka yom ufanyidina kumwakul? Sal usu wa kukimbijol mu mikand yetu verse wakwila ku chipul chinech, kupwa mulejana kud muntu wisambina nend. Ukutwish kand kwit ukwash kud mwin kulejan mukwau ukweta ukaliweny. Ap anch muntu tulejina witiy ap walik kwend chakul chidiokila mu Bibil, ey ukutanyinamu mu kukimbijol kwey. Ritiy rey rikukasikan. w21.08 18 par. 14-15

Tukutwishap kulikap yom yawonsu tukweta yitusangareshina mulong wa kumusadin Yehova. (Mul. 5:19, 20) Pakwez, anch twalik kumusadin nakash Yehova mulong tukatinap kusha yom tukatina, tukutwish kwikal mud muntu wa mu chishimu cha Yesu wikimbina mashakamin mawamp pakwez wamudiburil Nzamb. (Luka 12:16-21) Chisu tukata kurish ni yikokujol, tukat kulembil mulong wa kwit ukwash, kupwa tukat kutek program wa yom tufanyidina kusal. (Jnsw. 3:21) Yehova ukat kutuyukish mu mitapu yivud. Tukutwish kumekesh anch tusangaredin yiyukish yiney kusutin kusal usu wawonsu mulong wa kumutumbish. (Heb. 13:15) Tukutwish kusal yom kushalijan mulong wa kumusadin Yehova, ni ndiy ukutuyukish nakash kupandakan. Chawiy, dichuku diawonsu kimb amboku mitapu ya ‘kupak ni kutal mutapu Yehova udiay muwamp.’ (Kus. 34:8) Mwamu tukwikal mud Yesu walonda anch: “Yakudia yam yidi kuziyil kusal mudi musotilay wantuma am ni kuwanyish mudimu wangikishay kusal.”​—Yoh. 4:34. w21.08 30-31 par. 16-19

Satan ukatin anch twikal in kwitutul. Wij anch ang twakudish mwikadil winou, tukwikal mud ndiy ni tukushiken ku kushadish ruchingej ra kwikal ni mwom wa chikupu. Chawiy kambuy Paul watubabesha anch muntu ukutwish “[kwitutul] nich kwibaz, chad akez kamufish nich mudi mwamufishau nich Sakudimban.” (1 Tim. 3:6, 7) Ap anch tud asu mu uyakin ap twamusadidin kal Yehova mu mivu yivud, yom yiney yikutwish kutushiken etu awonsu. Muntu mwin kwitutul ukat kwitongin nakash amwinend. Satan ukat kusal usu wa kutwoz mu mupit winou kusutil kutubachik kwitongin nakash ayinetu kusutamu kumutongin Yehova, pakampwil chisu turishina nich yikokujol. Chilakej, ov, kud muntu wakudimbedina makasu? Ap ov, akusadidin yom mu mutapu wakad kutentam? Satan ukatin anch umujimen Yehova, ap akadivar ney. Ni Djabul ukatin utong anch mutapu umwing wa kupwish milong ud kusal yom mud muukatila pa ndond pa kulondul mbil ja Yehova jidia mu Dizu diend.​—Mul. 7:16, 20. w21.06 15 par. 4-5

Yehova wamwinkisha muprofet Age chisend chimwing cha usey nakash. Chimeken anch Age wading pakach pa antu adiokala mu winkwal mu Babilon mu muvu wa 537 K.C.C. mulong wa kuchirik ku Yerusalem. Chisu chikemp kupwa kwa kushik kwading kuyilau, atushalapol a Yehova inay ashinshamena atunga mufulandal wa tempel, chikumbu cha Yehova. (Esi. 3:8, 10) Pakwez, pakad kulab kwashikena chom chikwatishena ushon. Aziya ni imika mudimu wa kutung mulong wa rupompat ra akankuny nau. (Esi. 4:4; Age 1:1, 2) Chawiy mu muvu wa 520 K.C.C., Yehova wamwinkisha Age chisend cha kuvuvurish mushiku wau ni kuyikasikesh chakwel apwish kutung tempel. (Esi. 6:14, 15) Chitongijok cha uruu walejanay Age chading mulong wa kukasikesh ritiy ra in Yuda mudiay Yehova. Mazu ‘Yehova wa yisak ya amasalay’ mafanyina kuyinkish kashinsh. Yehova ukwet chisak chijim nakash cha amasalay adia angel akatay kutum, chawiy in Yuda afanyina kumuchingejin ndiy chakwel atwisha mu mudimu wau. w21.09 15 par. 4-5

Nlel Atuman a Yehova akatijadin nakash ni ad mu uumwing. Tushalijadin kamu ni ma relijon makwau mulong tusadin dijuku dimwing ap anch tukwet ulomb wa chikit kushalijan, tudiokil mu jingand kusalijan, ni tukwet yaku kushalijan. Tukat kuman rukat riner ku yikumangan yetu ni ku yitentam. Chinech chikat kukasikesh kashinsh ketu anch tumwifukwidin Yehova mu mutapu ukatinay. (Yoh. 13:34) Bibil utukasikeshin anch ‘ikalany nich rukat ripandakena umwing ni mukwau.’ (1 Pita 4:8) Mutapu umwing tukata kumekesh rukat riner ud kusutin kulikishijadin umwing ni mukwau ni kudiulijadin kuburen kuwanyin. Tukat kukimb kand mitapu ya kupan ap kuyak antu awonsu a mu chikumangen, ap antu aturumbukina. (Kol. 3:12-14) Pitukata kumekesh rukat mud riner tukat kumekesh patok anch tud in Kristu akin. w21.10 22 par. 13-14

Ov, kumwopat muntu kukutwish kumukwash kukarumuk ni kuswimp mwikadil wend? Mwaning, kukutwish. Antu avud awila mu chitil chijim ajingunina anch kuyopat kwading kwa usey mulong wa kuyikwash kujingunin kujimb kwa uyimp wasalau, mulong wa kukarumuk ni kuswimp mwikadil wau, ni kumuchirikin kand Yehova. (Heb. 12:5, 6) Shinshikin chilakej ech. Kafung umwing wajingunin kal anch mukoku wend umwing uyedin. Wij anch chakwel anch mukoku winou ayerik, chitin kumwauril nau amikoku akwau. Chawiy, amikoku yid yitang yikatining kushakam mu chisak, ni mukoku ukat kuwayiway anch amwauril nau akwau. Ov, chinech chimekeshin anch kafung ud muyimp anch wakwat mupak wa kumwauril mukoku nau akwau chakwel ayerika? Bwat kamu. Wij anch ang wamulik mukoku uyedina kushakam pamwing ni akwau, ukuyisamburishin mayej. Anch amwauril mukoku uyedina, kafung ukuchidij chisak cha amikoku akwau. w21.10 10 par. 9-10

Did dilau dijim nakash dia kwikal mu dijuku dikweta rukat dia pa mangand mawonsu. Tukatin anch antu avud eza mulong wa kwibomb netu mu kumwifukwil Nzamb wetu. Chawiy, tufanyidinap kusal chom ap chimwing chikutwisha kuyibachik antu kutong nayimp piur pa Yehova ap piur pa antwend. Tukat kusal usu wa kwiyendish nawamp mulong wa kuyipwitin antu ku rusangu ruwamp. Yisu yimwing, antu akutwish kutulond nayimp ap kand kutupompat mulong tumuziyidin Tatukwetu wa mwiur. Yom ik tufanyidina kusal anch twovil wom wa kuyilej antu akwau piur pa yitiyij yetu? Tufanyidin kumuchingejin Yehova ni Mwanend chakwel atukwash. Yesu wayileja in kwilejend anch kafanyidina kwiyakamish piur pa yom yikulondau ni mutapu ukuyilondau. Mulong wak? Yesu warumburila anch: “Akez kukwinkishany mazu ma kulond. Mazu miukeza kulondany kimakudiokalap kudi en, makez kudiokal kudi [spiritu] wa Tatukwen ukeza kulondil mu en.”​—Mat. 10:19, 20. w21.09 24 par. 17-18

Moses wasadina niyend mazu mafanakena ni minam mulong wa kumekesh anch Yehova ud dipat dia kuchinyin. (Kus. 90:1) Chawiy, padingay piswimp ni kufa, Moses walonda kand mazu makwau ma chifanikesh makasikeshina. Wafunda anch: “Nzamb wa chikupu, ndiy kwikang kwey. Kwishin [kwey] kudi makas ma chikupu.” (Kuv. 33:27) Mazu “kwishin [kwey] kudi makas ma chikupu” matufundishin ik piur pa Yehova? Anch twamuman Yehova anch ud dipat dietu, tukwiyov anch tud mu diking. Pakwez yisu yimwing tukutwish kuziy ni kulik kumuman Yehova mud ud dipat dietu. Mu yisu mud yiney, yom ik yikusalay Yehova mulong wa kutukwash? (Kus. 136:23) Ukutek makas mend kwinshin kwetu ni kutulangwish nich rukat, ni ukutukwash kupandakan yovil ya kuziy. (Kus. 28:9; 94:18) Kwijik anch tufanyidin kuchingejin chisu chawonsu ukwash wa Nzamb kutukwashin mu mitapu yaad. Chakusambish, tukwet ndond ya diking ya kuchinin chikalap nchik ndond tudia. Cha kaad, Tatukwetu wa rukat udia mwiur utubangidin chikurikina. w21.11 6 par. 15-16

Yesu wading wij anch kuburen kutentam kukupak ritiy ra in kwilej. Mulong wa kuyikwash kujijaman, wayileja chilakej chifundinau mu mukand wa Luka. Yesu wisambina rusangu ra mwadiamufu wadandamena kumudidil nkalansambu wakad kutentam chakwel ayikatwil mulong. Wading ukwet kashinsh anch amukwasha anch wadandamen. Dinsudien, nkalansambu watesha kwit kwend. Dilejan ik tudioshinaku? Yehova ud utentamina. Chawiy chalonday Yesu anch: “Ov, Nzamb kakez kuyiyingishap antwend akata kumulembijek muten ni uchuku?” (Luka 18:1-8) Yesu walonda kand anch: “Pakez kezay Mwan a Muntu, ov, ukez kutan in ritiy [mud riner] mu mangand?” Anch tumen mar mulong wa kuburen kutentam, tufanyidin kumekesh anch tukwet ritiy rikash mud ra mwadiamufu kusutin kushimpish muchim ni kujijaman. Anch twikal ni ritiy mud riner, tukutwish kwikal nich kashinsh anch ap mwakumap nchik, Yehova ukutukwash. Tufanyidin kand kuchingejin mu usu ukweta malembil. w21.11 23 par. 12; 24 par. 14

En ansand, ov, yisu yimwing ukat kwiyovany anch mbil ja Yehova jikukangeshinan kwikal ni want ipen? Mwawiy mukatinay Satan anch utongany. Ukatin anch wipanany niyen mu kusal yom mud yisadinau antu asutidina mwi njil yibwabumukina, mulong amekening yisu yimwing mud akwet musangar. Satan ukutwish kusadin yom yisadinau ambay ney a shikol ap umena pa Internet mulong wa kukubachik kutong anch wishadinap yom yiwamp. Satan ukatin utong anch mbil ja Yehova jikukangeshin kusanger mwom mu mutapu uchifanyidina. Pakwez vurik anch: Satan kakatinap anch antu endidina mwi njil yend ajingunin yom yiyichingedina kwinsudien kwa weny wau. (Mat. 7:13, 14) Ku mutambu ukwau, Yehova wakulejin kal patok yom yiyichingedina antu adandamedina kwendin mwi njil ya mwom.—Kus. 37:29; Isay 35:5, 6; 65:21-23. w21.12 23 par. 6-7

Twij nawamp anch tufanyidin kulikishin ni chawiy chom chiwamp tufanyidina kusal. Pakwez chikutwish kutukasiken kusal mwamu. Chimeken anch yisu yimwing kambuy Pita warishang ni mulong winou. (Mat. 18:21, 22) Yom ik yikutwisha kutukwash kulikishin? Chakusambish, tongijokin pa mutapu ukatay Yehova kutulikishinang. (Mat. 18:32, 33) Ukat kutulikishin kwa kwikatin ap anch tuwanyidinap kwetu kutulikishin. (Kus. 103:8-10) Chilik chimwing, niyetu “tufanyidin kukatijan muntu ni mukwau.” Tukutwishap kutond kulikishin ap bwat. Tufanyidin kuyilikishin akadivar ni anambaz netu. (1 Yoh. 4:11) Cha kaad, tongijokin yom yikata kushikenang anch twalikishin. Tukutwish kumukwash muntu waturumbukinang, kulam uumwing mu chikumangen, kuchidij urund wetu ni Yehova ni kwiyov nawamp ayinetu. (2 Kor. 2:7; Kol. 3:14) Cha kasatu, mulembila Yehova utwitina kulikishin. Kangal witiy anch Satan ayipisha chisambu ukweta pamwing ni ambay ney in Kristu. (Efes 4:26, 27) Tukwet kuswir kwa ukwash wa Yehova mulong wa kwipuk kuwil mu mupit wa Satan. Kangal witiy kukupwakesh. w21.06 22 par. 11; 23 par. 14

David wading ukat kuchin mulong wa kupandish mwom wend. Saul wading mwant wa usu mu Isarel wading usotin kumujip. Pikalay David nich maswir ma yakudia, wimana mu musumb wa Nob, ni mwinimwa wita mikat yitan. (1 Sam. 21:1, 3) Mu kusut kwa chisu, ndiy pamwing nau amakundj adingay nend achinina mu mandam. (1 Sam. 22:1) Mutapu ik washikenay David kwawonsu kwinoku? Saul wading umwovidin David mukau nakash, mulong antu avud amushimana mulong wa jinjit jawinay. Saul wading kand wij anch kubwambwil kwend kwamubachika Yehova kumulik ni kumutond David mulong wa kumuswan pa ditand. (1 Sam. 23:16, 17) Mulong wading mwant wa Isarel, Saul wading ukwet chisak chijim cha amasalay ni antu avud ading amukwashina, chawiy David wafanyina kuchin mulong wa kupandish mwom wend. Ov, Saul wading utongin anch ukutwish kumukangesh Nzamb kumwikadish David mwant? (Isay 55:11) Bibil kalondinap chom, pakwez tukutwish kwikal nich kashinsh ka chom chimwing anch: Saul wading wiyandjikin mu kasu. Awonsu akata kumurishikish Nzamb akat kukangany! w22.01 2 par. 1-2

Yesu wipana nakash mu mudimu wa kulejan. Wayimekeshina antu rukat rend kusutin kudandamen kuyifundish yisu yawonsu. (Luka 19:47, 48) Yom ik yamubachikang kusal mwamu? Yesu wayanakenang. Mu chisu chimwing, mulong antu avud akata kutesh malejan ma Yesu, ndiy ni in kwilejend “katwishap kudia.” (Mar. 3:20) Wipanang kand kulejan ap uchuku—chisu chading chiyiwapidina in kumutesh amwing. Antu avud amutesha Yesu kapamp kakusambish kikalap in kwilejend. Pakwez awonsu amutesha atambula uman wa patok wovikena zwang. Nlel tukatin kumukwash muntu win mwawonsu kutesh rusangu ruwamp. (Mid. 10:42) Mulong wa kusal mwam, chikutwish kutwit pamwingap kuwapish mutapu wetu wa kusal mudimu wa kulejan. Pa ndond pa kusadin program tumena anch ud muwamp kud etu, tufanyidin kurijek program wetu wa kulejan kukwatijan ni chisu tukutwisha kutan antu avud. Anch twasal mwau, tukutwish kwikal nich kashinsh anch tukumusangaresh Yehova. w22.01 17 par. 13-14

Nlel chiyikasikedin antu avud kuyichingejin antu atakedina. Antu ashikedin kal kuman anch yijil ni maguvernema yiyikingining kwau yisu yivud ampich ni antu akweta ulabu, pakwez yikatap kuyikwash atuzwendj. Chikwau kand, mwikadil wa amakurump a chirelijon amwing uyisangareshiningap antu, ni wayikangeshin kal antu amwing kumuchingejin Nzamb. Chawiy anch muntu witiy kwilej netu Bibil, tukwet chisend chijim nakash cha kumukwash kukudish ruchingej rend mudiay Yehova ni mudiau antu asadidinay pa divu. Chakin kamu, kadiap kwau ching kusu in kwilej a Bibil afanyidina kwilej kumuchingejin Yehova ni dirijek diend. Ap etu twasadina kal mivu yivud mu uyakin, tufanyidinap kushadish ritiy tukweta anch mutapu usadiningay Yehova yom uding chisu chawonsu uwamp. Yisu yimwing, kukat kwikal yom yikutwisha kupak ritiy retu pa mulong winou. w22.02 2 par. 1-2