Ngond wa 3

“Amikoku” isambidinau mu chishimu chidia mu Mateu 25:31-36 amekeshin antu atentamina adiaku mu machuku minam ma nsudiel, akweta ruchingej ra kushakam pa divu​—charumburik anch amikoku akwau. Akat kuyikwash nich kushinshaman akadivar nend a Kristu azizidilau many achidia pa divu mu mudimu wa kulejan ni kwikadish in kwilej pa mangand mawonsu. (Mat. 24:14; 28:19, 20) Muvu ni muvu, pa mbing jitwadina ku Chivurikish, amikoku akwau akat kumekesh anch ayikwashin akadivar a Kristu kusutin kwipan mu kampany wa kuyitazuk antu asangaredina mulong wa kwez ku Chivurikish. Akat kukwash kand yom ya usey mulong wa kutenchik nawamp chakwel Chivurikish chisadik mu yikumangen yidia pa mangand mawonsu. Amikoku akwau akweting kand musangar wa kuyikwash akadivar a Kristu mu mutapu winou. Amikoku akwau ij anch Yesu umen yom yisadinau mulong wa kuyikwash akadivar nend azizidilau many mud amusadidinay ndiy.​—Mat. 25:37-40. w22.01 22 par. 11-12

Anch twimburij mikadil ya Yesu ni mutapu wayisadinangay antu akwau—chilakej, riy ramwovilay muyej wa mak, mutapu wamwanakenay mband wading uyedina nakash, ni mutapu wayanakenangay antu afishang akatish nau​—tumwimburijin kand Yehova. (Mar. 1:40, 41; 5:25-34; Yoh. 11:33-35) Anch twamwimburij Yehova, tukumusejin piswimp nakash. Kulondul nzau ja Yesu kukutukwash kwipuk kampuw ka mangand minam mayimp. Uchuku wend wansudiel panap pa divu, Yesu walonda anch: “Am napandakan kal kuyip kwa mangand!” (Yoh. 16:33) Wading ufidin kulond anch walika kwitiy chakwel amupumbul nich yitongijok, mipak, ni yisal ya mangand minam. Yesu kavuramenap diyingishin diamutuminau pa divu​—kumutumbish Yehova. Chid nchik piur petwetu? Mu mangand minam mud yom yivud yikutwisha kutuletin kampuw. Pakwez mud Yesu, anch twadandamen kushinshikin pa kusal rusot ra Yehova, niyetu “kupandakan” mangand.​—1 Yoh. 5:5. w21.04 3-4 par. 7-8

Kambuy Paul wading wij nawamp kushilamu kwa Yesu kulondina anch “muntu mwawonsu ukumwitiyija [Yesu] . . . ukez kikal nich mwom wa chikupu.” (Yoh. 3:16; Rom 6:23) Paul wading pakach pa antu ading itiyijina mu difut. Wading nich kashinsh anch Yehova ukatining kuyilikishin ap antu akata kusal yitil yikash, anch akarumuk. (Kus. 86:5) Paul wading kand ni ritiy anch Nzamb umukatin nakash mulong wamutuma Yesu kufa mulong wendendiy. Kwinsudien kwa verse wa Galatia 2:20 kud mazu mamekeshina kashinsh kadingay nich Paul. Walonda anch: “Mwan a Nzamb . . . wankata am, chad wapana mwom wend mulong wa kwingambat am.” Paul katongap anch ud muntu muyimp nakash mu chilik cha kulik kumukat kud Nzamb, katongap anch ‘Yehova ukutwish kuyikat akadivar nam, pakwez kakutwishap kwinkat am.’ Paul wayivurisha in Rom anch: “Pitwading etu akayitil Kristu watufila!” (Rom 5:8) Kwikil chom chikutwisha kumukangesh Nzamb kutukat! Paul wading nich kashinsh kawonsu anch Nzamb utukatin nakash. Paul wading wij mutapu Nzamb wayishimpishinay in Isarel muchim. w21.04 22 par. 8-10

Chisu utakedina dilejan dia Bibil, mukwasha mwin kwilej wey kumukat Yehova. Mutapu ik? Kimb mutapu wa kupwitin nkeu ja mwin kwilej wey pa mikadil ya Yehova. Mukwasha mwin kwilej wey chakwel amana anch Yehova ud Nzamb wa musangar ukata kuyikwash antu amukatina. (1 Tim. 1:11; Heb. 11:6) Muleja mwin kwilej wey mutapu ukutwishay kutaninamu anch wasadin yom yilejinay, ni murumburila anch kutaninamu kwinoku kumekeshin anch Yehova umukatin. (Isay 48:17, 18) Anch mwin kwilej wey wamukat Yehova nakash, ukukat kand kuswimp mwom wend. Mulong wa kuya kurutu ni kushiken ku dibatish, chimwitin mwin kwilej kulikap yom yimwing. Chikutwish kuyit in kwilej amwing kusha yom yau ya ku mujimbu. Chikutwish kuyit antu avud kujip urund wau nau antu akad kumukat Yehova. Akwau akutwish kuyidjibul kud anamakwau akad kuyikat Atuman a Yehova. Yesu washilamu anch: Antu amulondwila ndiy kakezap kwinan. Akuyiyukish nakash kusutil kuyinkish dijuku dia mu spiritu dikweta rukat.​—Mar. 10:29, 30. w21.06 4 par. 8; 5 par. 9

Kambuy Paul wafanakesha mudimu wa kwikadish in kwilej ni kukun rubut. Wamekesha anch kud yom yivud tufanyidina kusal kupwa kwa kukun mbut. Wayivurisha in Korint anch: “Am nakuna mbut, chad Apolo wichila mem . . . en udiany chir cha Nzamb.” (1 Kor. 3:6-9) Mulong tud andim mu “chir cha Nzamb,” tukatap kusu kwetu kwimen pa kukun mbut, pakwez tukat kujichil mem ni kushinshikin kand chisu chawonsu mulong wa kuman mutapu ujipamina. Pakwez kand, tukat kuvurik anch Nzamb ndiy ukata kupamish mbut. Did dilau dijim mud ik tukweta dia kulejan ni kuyifundish antu akwau uyakin! Mudimu winou ukat kutuletin musangar nakash. Kambuy Paul wayikwasha in Tesalonik avud kwikal in kwilej urumburil mutapu wiyovay anch: “En udiany ruchingej retu, ni musangar wetu, ni chijingidij chetu cha kupandakan. Chawiy chitukutwisha kwibazin kurutu kwa Nsalejetu Yesu pakuchirikay.”​—1 Tes. 2:19, 20; Mid. 17:1-4. w21.07 3 par. 5; 7 par. 17

Yehova wamupwitina umwing ni umwing wa pakach petu kud ndiy. (Yoh. 6:44) Shinshikin chirumburikina mazu minam. Pashinshikinay Yehova mamiliyon ma antu awonsu adia pansh, wamana chom chiwamp mud ey. Wamana anch ukwet muchim wa kashinsh ni ukutwish kumukat. (1 Jsng. 28:9) Yehova ukwij, ukat kukutesh ni ukukatin. Winou ud uyakin ukasikeshina nakash! Yehova ukubangidin nakash, ni uyibangidin akadivar nau anambaz ney in Kristu awonsu. Mulong wa kutukwash kutesh nawamp uyakin winou, Yesu wamufanakesha Yehova ni kafung. Anch mu chisak cha amikoku chitot mwashadik umwing, yom ik yikusalay kafung? “Ukusha amikoku akwau makum chidivu ni chidivu pa chinanginang pakat kudilau. Chad ukuya ni kumukimb mukoku ushadikina.” Anch kafung wamuman mukoku, kakumujimenap, pakwez ukusangar. Chilakej chinech chitufundishin ik? Mukoku mwawonsu ud wa usey ku mes ma Yehova. Yesu walonda anch: “Tatukwen udia mwiur kasotilap [ap] umwing wa anikanch inay kushadik.”​—Mat. 18:12-14. w21.06 20 par. 1-2

Anch twatongijokin pa rukat ra chikupu ritumekeshidinay Nzamb, tukukasikesh rukat retu mudiay Yehova ni kukasikesh kand urund wetu pamwing ni ndiy. (Rom 8:38, 39) Chilakej cha Yesu chikat kutubachik kumwimburij. (1 Pita 2:21) Machuku matwadina ku Chivurikish, tukat kushinshikin chikurukina pa nsangu ja Bibil ja yom yasadika rubing ra nsudien ra mwom wa Yesu pa divu, rufu rend ni divumbuk diend. Kupwa urel pa chisu cha Chivurikish, diskur dikat kutuvurish rukat ratumekeshinay Yesu. (Efes 5:2; 1 Yoh. 3:16) Anch twatang piur pa chilakej cha Yesu cha kwipan kwa kwikatin ni kutongijokin pa chilakej chend, tukat kwiyov abachikinau “kwikal nich yaku ya mutapu umwing mudi [yadingay nich] Yesu.” (1 Yoh. 2:6) Tukwatin mupak wa kudandamen kamu kushal mu rukat ra Nzamb. (Jud 20, 21) Tukudandamen kushal mu rukat ra Nzamb kusutin kusal usu wetu wawonsu mulong wa kumuziyin, kutumbish dijin diend, ni kusangaresh muchim wend. (Jnsw. 27:11; Mat. 6:9; 1 Yoh. 5:3) Kukumangan ku Chivurikish kukat kutukwash kukasikesh mupak wetu wa kushakam dichuku diawonsu kukwatijan ni mbil ja Yehova. Chid mud tumulejin anch: ‘Nikatin kushal mu rukat rey chikupu!’ w22.01 23 par. 17; 25 par. 18-19

Yehova watwinkisha chipan cha want ipetu. Tukutwish kutond yom tukatina kusal mu mwom wetu. Nzamb wetu wa rukat ukat kusangar anch twatond kumusadin. (Kus. 84:12; Jnsw. 27:11) Tukutwish kusadin nawamp want ipetu mulong wa kukwat mipak yikwau yiwamp yivud. Anch twimburij chilakej cha Yesu, tukutwish kutond kutek yisakin ya antu akwau pa ndond ya kusambish. Dichuku dimwing, Yesu nau atwimbuy ading aziyang kal nakash, ayang kwi ndond kwakad masok chakwel apimaku. Pakwez, akanganya kupim. Chisak cha antu chayilondula, mulong ading ni impu ya kuyifundish kud Yesu. Chawiy Yesu kajimanap. Pakwez, wayovila antu riy. Chad, yom ik yasalay Yesu? “Wasambisha kuyilej yom yivud.” (Mar. 6:30-34) Anch twamwimburij Yesu mu kusadin chisu ni usu wetu mulong wa kuyikwash antu akwau, tumutumbishin Tatukwetu wa mwiur.​—Mat. 5:14-16. w21.08 3 par. 7-8

Yehova ukatining kushalijan kwa yom. Twij mwamu mulong wasala mitond kushalijan, annam kushalijan, ni ap kand antu kushalijan. Muntu ni muntu ushalijadin ni mukwau. Chawiy Yehova kakatap kukufanakesh ni antu akwau. Ukat kushinshikin muchim wey, wuntu wey wa mukach. (1 Sam. 16:7) Wij kand pimedina usu wey, kuziy kwey, ni mutapu wapama. Ni kakatap kukwit kusal yom yivud yisutinamu usu wey. Tufanyidin kumwimburij Yehova kusutin kwiman ayinetu mud mutumenay ndiy. Mwamu tukwikal ni ‘chitongijok chisikena,’ tukutongap anch tukwet usey nakash ap tukwetap usey ap pakemp. (Rom 12:3) Chakin kamu, tukutwish kutaninamu nakash mu kushinshikin yilakej yiwamp ya akadivar nau anambaz akweta yibudikin yiwamp mu mudimu wa kulejan. (Heb. 13:7) Tukutwish kuman yom tukutwisha kwimburij mulong wa kuwapish ukaliweny wetu mu mudimu wetu wa kulejan. (Fil. 3:17) Pakwez kud kushalijan pakach pa kwimburij chilakej chiwamp cha muntu ni kwiyilakej nend. w21.07 20 par. 1-2

Ukutwish kukasikesh ritiy rey mudiay Sakatang kusutin kushinshikin annam, mitond ni atutumbu. (Kus. 19:2) Anch wilej nakash piur pa yom yiney, ukwikal ni kashinsh nakash anch Yehova ndiy Sakatang. Chisu wilejina yitang, shinshikin nakash pa yom ukutwisha kwilej piur pa Sakatang wetu. (Rom 1:20) Chilakej, ukutwish kuman anch muten ukat kulet chirungul ni chitokish yidia ya usey mulong wa mwom yidia pa divu. Pakwez nsis jimwing ja muten jikutwish kulet ubaj. Etu antu tukwet kuswir kwa kutuchidij kwi nsis jinej, ni atuchidijin! Mutapu ik? Kud rinkind unyingumukina divu ukata kukepish usu wa nsis jinej ja ubaj ni kutuchidij. Anch nsis jinej ja usu japandikan, rinkind winou niyend ukat kuvul. Ov, umenap anch kufanyidin kwikal muntu wasala yom yiney ni ufanyidin kwikal Sakatang wa rukat ni ukweta manangu? w21.08 17 par. 9-10

Kupwa kwa kuyibatish, tufanyidin kudandamen kuyikat ni kuyilimish. (1 Yoh. 4:20) Mutapu ik tukutwisha kusal mwamu? Chilakej, tufanyidinap kuyirumburish kapamp kamwing mulong wa yom yisadinau. Anch twijap diyingishin diayibachikang kusal chom kanang, tufanyidinap kutong anch asalang chom chinech nich mayingishin ma choy. Pakwez, tufanyidin kumulimish mukadivar ap nambaz netu, kumuman mud utupandikenamu. (Rom 12:10; Fil. 2:3) Chawiy, tufanyidin kwikal antu awamp ni in ranaken kud antu awonsu. Anch tukatin kwikal pakach pa antu akumutazuka Yehova anch Tatuku chikupu, tufanyidin kusadin Dizu dia Nzamb mu mwom wetu. Chilakej, Yesu wafundisha anch tufanyidin kwikal antu awamp ni in ranaken kud antu awonsu, ap kud akankuny netu. (Luka 6:32-36) Tukutwish kuman anch yisu yimwing chikutwish kutukasiken kusal mwamu. Anch chid mwamu, tufanyidin kwilej kutong ni kusal yom mud mwasalay Yesu. Anch twasal usu wawonsu mulong wa kumuziyin Yehova ni kumwimburij Yesu, tukat kumekesh kud Tatukwetu wa mwiur anch tukatin kwikal chikupu mu dijuku diend. w21.08 6 par. 14-15

Muchingejina Yehova. Ushidinamu kutuyukish anch twamuchingejin ni twamusadin nich usu wetu wawonsu. Bibil ukwet yilakej yivud ya antu ipana nakash mulong wa kumusadin Yehova. Yisu yivud, asala yom kanang yamekesha anch amuchingejidin Yehova kurutu atambula yiyukish ya pakampwil. Chilakej, ching kupwa kwa Aburaham kudiokal kwol kwend​—“wakad kwijik kwisu kuyilay”—​pawiy chad pamuyukishau kud Yehova. (Heb. 11:8) Chid kand kupwa kwa kurish ni mwangel pawiy chad patambulay Jakob yiyukish ya pakampwil. (Dis. 32:24-30) Chisu chading muchid wa Isarel piswimp ni kwandam mwi Ngand ya Kushilamu, in Isarel atwisha kwauk Wit wa Yordan ching pasambishau in kupesh kwandam mu mem mading ni muzuzu nakash. (Jos. 3:14-16) Ukutwish kand kwilejin ku yilakej ya Atuman a mu chirung chetu amuchingejina Yehova ni kuwanyish mipak yau. w21.08 29-30 par. 12-14

En akadivar ni anambaz amapal, wijany nawamp mutapu wasadikang yom pakur, pakwez umenany kand usey wa kwijidin yom yisu kukwatijan ni yishiken. Niyen amapal abatishinau katat ukwetany mitapu yivud ya kukwash. Ansand akusangar nakash kutesh yom wijanya ni ya wilejinanya kal. Anch wikal ni ‘chaku cha kupan’ yom yidia mwi nkil ya ronganyin rey kusutin kuyifumb antu akwau, Yehova ukukuyukish nakash. (Luka 6:38) En akadivar ni anambaz akatish udianya amapal, anch wayisejinany ansand ni ayangadim piswimp, ukutwish kukwashijanany amwing ni akwau. (Rom 1:12) Muntu ni muntu ukwet chom cha usey nakash chiburedinau akwau. Amapal akwet manangu ni ukaliweny wikadilau nich mu kusut kwa chisu. Ansand akwet usu ni ukash wa mujimbu. Anch nsand ni ipal asal pamwing mud arund, akumutumbish Tatukwetu wa mwiur ni akwikal chiyukish kud antu awonsu adia mu chikumangen. w21.09 8 par. 3; 12-13 par. 17-18

Mulong wak mutapu wamujipau Yesu wayirumbangesha in Yuda avud? Kud awiy, kumujip Yesu pa mutond kwading kurumburikin anch ud mpongarik ni mukayitil​—kadiap Mesia. (Kuv. 21:22, 23) In Yuda alika kumwitiyij Yesu avuramena kwijik anch kadingap kwend ni mulong, yom yamufundau yading ya makasu, ni anch amusadina yom yakad kutentam. Antu amurumburisha Yesu amurumburisha pakad kutentam. Anzwij a mu dirumburish dijim dia in Yuda ovijana ni amurumburisha nich mafef nakash. (Luka 22:54; Yoh. 18:24) Pa ndond pa kutesh pakad kasolikany uman wading upaninau antu piur pa Yesu, anzwij akimba ayinau “uman wa makasu mulong wa kumufish nich Yesu kwa kumujip.” (Mat. 26:59; Mar. 14:55-64) Ni kupwa kwa kuvumbuk kwa Yesu, anzwij inay ayimp ayifuta amasalay in Rom ading kwi nzay ya Yesu “nfalang jivud” chakwel apalangesh makasu anch Yesu kavumbukap.​—Mat. 28:11-15. w21.05 11 par. 12-13

Yehova ukwet kwend mutapu wa kushesh mangand minam chisu chawonsu chikatinay. Pakwez kushimpish kwend kwa muchim kutukwashin nakash! An awonsu a Adam ni Ev akat kuvadik nich kuburen kuwanyin. Pakwez Yehova uyikatin ni ukat kuyibangin, ni ukanin anch ukushesh mangand minam mayimp. (1 Yoh. 4:19) ni watekin kal dichuku dikupwishay mayej mawonsu mayimeshina antu mar. Ov, umenap anch rukat rend rifanyidin kutubachik niyetu kudandamen kujijaman nend pamwing? Yehova ud chilakej chiwanyidina cha kujijaman. Yesu watwisha kwimburij chilakej cha kujijaman cha Tatukwend. Padingay pa divu, Yesu wajijamena masaal, usany wamukwatishau ni mutond wa mar mulong wa kutwambat etu. (Heb. 12:2, 3) Chakin kamu, chilakej cha kujijaman kwa Yehova chamwinkisha Yesu usu wa kujijaman. Ni chikutwish kand kutukasikesh niyetu. w21.07 12-13 par. 15-17

Dichuku diawonsu tukat kuman mutapu ukatay Tatukwetu wa mwiur kutulikishin. (Kus. 103:10-14) In kwilej a Yesu ading antu akad kuwanyin; pakwez, Yesu wayovilang riy ni wading kuyilikishin. Wapana kand mwom wend kwa kwikatin chakwel atulikishin yitil yetu. (1 Yoh. 2:1, 2) Tukat kukasikesh rukat mu dijuku dietu dia mu spiritu kusutin “kulikishijadin.” (Efes 4:32) Chawiy, kuyilikishin antu akwau kukutwish kukasikan nakash yisu yimwing, pakwez tufanyidin kusal usu. Nambaz umwing watanga mutu wa mulong wa Chinong cha Kalam ulondina anch “Chifanyidin Kulikishijadin Umwing ni Mukwau” ni wamukwasha nakash. Ufundin anch: “[Mutu wa mulong winou] warumburila anch kuyilikishin antu akwau kumekeshinap anch tusangaredin ap tupipejin yom yiyimp yasalangay muntu. Pakwez kulikishin kurumburikin kulik kulam rukuny mulong wa yom yatusalangau ni kulam chisambu chetu.” Anch twayilikishin akadivar ni anambaz netu kwa kwikatin, tukat kumekesh anch tumukatin ni tumwimburijin Tatukwetu, Yehova. w21.09 23-24 par. 15-16

Yesu wading ukatin uyakin piur pa Nzamb ni yom yitonginay kusal. Wading ushich kukwatijan ni uyakin winou, ni wawijikisha kud antu akwau. (Yoh. 18:37) In kwilej akin a Yesu niyau akatin nakash uyakin. (Yoh. 4:23) Chawiy, kambuy Pita wafanakesha win Kristu nich ‘njil ya uyakin.’ (2 Pita 2:2) Mulong ading akatin nakash uyakin, in Kristu akusambish alika yitongijok ya chirelijon, yishankur yau, ni yitongijok ya antu yading yakad kukwatijan ni uyakin. (Kol. 2:8) Chid kand mwamu nlel, in Kristu akin akat kusal usu wa ‘kudandamen kwendil mu uyakin’ kusutin kujamishin yitiyij ni mashakamin mau pa Dizu dia Yehova. (3 Yoh. 3, 4) Atuman a Yehova kakatap kulond anch chisu chawonsu akat kutesh chom ni chom mu Bibil. Yisu yimwing, arumbuka mu mutapu wa kurumburil malejan mamwing ma Bibil ni wa kutenchik chikumangen. Pakwez pajinguninau uyakin, aswimpa kapamp kamwing. w21.10 21-22 par. 11-12

Mud mutapu wading uyichidijinau antu kud mbumbu jading jinyingumukina musumb pasak, rukat rudimukina ra Yehova rid mud mbumbu jikata kutuchidij ku yom yikutwisha kuyipish urund wetu wa piswimp ni ndiy. Chikwau kand, rukat rudimukina ra Yehova rimubachikining kutusejish piswimp ni ndiy. (Jer. 31:3) Nfund a kuseng David wasadina chilakej chikwau mulong wa kumekesh mutapu Nzamb uyikinginingay antu end. Wafunda anch: “Nikuwang kand mulong wa rukat rey rudimukina, mulong ey udi kwikang kwam ni dipat diam.” David walonda kand piur pa Yehova anch: “Ndiy udi [rukat ram rudimukina] ni dipat diam. Udi mpwembu yam, ndiy kamu Mupandish wam. Ndiy kamu unikata kukungamen, mulong wa kwinchidij.” (Kus. 59:17; 144:2) Mulong wak David wafanakesha rukat rudimukina ra Yehova nich mpwempu ni dipat? Chikalap nchik kwi ndond kutushicha, mulong tud atushalapol end, Yehova ukutuking mu mitapu yin yawonsu chakwel tutwish kulam urund wetu wa piswimp ni ndiy. w21.11 6 par. 14-15

Padingay Yesu ni in kwilejend mu waat akat kwauk, kwatuta rinkind mukash. Yesu wasadina chinship chinech mulong wa kuyilej anch ading afanyidin kukasikesh ritiy rau. (Mat. 8:23-26) Rinkind wading mukash nakash ni mambek minzwisha men mu waat, pakwez Yesu wading kwend ulel pakad kwiyakamish. Chisu chovau in kwilejend wom nakash ni kumulangwish chakwel ayipandish, Yesu wayipula anch: “Ov, mulong wak wovilany wom mwamu? En ukwetany karitiy kakemp!” Ov, niyey urishin ni “rinkind mukash” mu mwom wey? Pamwing ap umen mar madiokila ku yom yatangau. Ap umen mar ma rinkind mukash wa chifanakesh, mud mayej makash makuziyishina nakash ni umenap cha kusal. Ukutwish kwiyakamish yisu yimwing, pakwez kangal walikidil yakamish yiney yikukangesh kumuchingejin Yehova. Musejina piswimp mu kumulembil ni muchim wawonsu. Kasikesh ritiy rey kusutin kutongijokin yisu yakukwashay Yehova pakur. (Kus. 77:11) Ukutwish kwikal nich kashinsh anch kakukulikap ap pakemp​—katat, ap kurutu. w21.11 22 par. 7, 10

Muntu ukutwish kutong anch uziyidin ku chijil chinech mulong ukat kusal usu wa kulik kusend chom chakad kwikal nchend. Pakwez ukutwish kwiy mu mutapu ukwau. Chilakej, mwin kwisak usadidina yilik ap yipim yiyimp mulong wa kuyidimb in kuland, tukutwish kulond anch ukat kuyiy antu inay. In Levi 19:13 ukwatikeshin kwiy ni milad ya kwisak yakad win kashinsh, palondinay anch: “Kangal wamwiy mukwen.” Chawiy anch muntu kakwetap win kashinsh mu milong yend ya kwisak, muntu winou uyiyin antu. Chijidik cha chinan chilondin anch kwiy kuyipin. Pakwez kurumburil kudia mu In Levi kutukwashin kwijik mutapu tufanyidina kusadin mbil yidia mu chijil chinech, tufanyidin kwikal in kashinsh mu yom yawonsu tusadina. Chid cha usey kwikal ni chitongijok cha Yehova piur pa kuburen kashinsh ni wij. Tukutwish kwiyipul anch: ‘Kukwatijan ni yom yilejenau mu In Levi 19:11-13, ov, kud chom nifanyidina kuswimp mu mwom wam? Ov, nifanyidin kuwapish chom kanang mu mudimu wam wa kwisak?’ w21.12 9 par. 6; 10 par. 7-8

Chisu ulembila pa amwiney, tongijokin pa kurumbuk wasalang chisu cha muten ni kupwa mwita Yehova chakwel akulikishin. Pakwez anch wasalang chitil chijim, ukuswiriken kand ukwash a amakurump. Akukutesh nawamp ni kukuyul nich rukat kusutin Bibil. Akulembil ney pamwing mulong wa kumwit Yehova chakwel akulikishin ni chakwel uchirish kand nend urund uwamp. (Jak. 5:14-16) Chikwau kand, chid cha usey kutongijokin pa difut. Niyey ukutwish kamu kwov nayimp anch watongijokin pa mar mamanay Mwan a Nzamb. Pakwez anch watongijokin nakash pa difut, ukumukat nakash Yehova ni Mwanend. Muvu ni muvu tukat kumekesh anch tud in kujikitish nakash mulong wa difut, kusutin kukumangan ku Chivurikish cha rufu ra Yesu ni kuyitazuk antu akwau nich mushiku chakwel akumangan netu. Dined did dilau mud ik diatwinkishinay kal Yehova dia kuyifundish antu akwau piur pa Mwanend! w21.04 18-19 par. 13-16

Tong piur pa yom yasalay Yesu chisu chamulondulau kud rumb ra antu ku mukandu. Yesu wakera uchuku wa kabuj mulong wa kulembil. Wafanyina kuziy nakash, pakwez pamanay chisak cha antu, wayovila atuzwendj ni ayej ading pakach pau riy. Kimenap kwend kusu pa kuyok, pakwez wayifundisha kand malejan mamwing makasikeshina nakash matazukinau anch—Mafundish ma pa Mukandu. (Luka 6:12-20) Yesu wasadinang kand chisu chend mulong wa kuyikwash antu akwau. Ov, ukutwish kutongijokin mutapu wiyovay Yesu pateshay anch murunend Yohan Mubatish amukatulang kal mutu? Bibil ulondin anch: “Chateshay Yesu rusangu ra [rufu ra] Yohan, wadiokala kwinikwa, wandam mu waat, waya kwi ndond yend amwinend.” (Mat. 14:10-13) Pakwez chisak chijim cha antu chasambela kushik kwi ndond kwikuchikina kwading kuyilay kurutu ndiy ashika. (Mar. 6:31-33) Wafanyina kuman anch ading akwet kamu kuswir kwa kuyikwash mu spiritu, ni wipana kapamp kamwing mulong wa kuyiwanyishin maswir minam.—Luka 9:10, 11. w22.02 21 par. 4, 6

Yom ik tufanyidina kusal anch twajingunin anch twamurumbukidin mbay netu mwin Kristu? Tufanyidin kumulembil Yehova nich kashinsh. Tukutwish kumulembil chakwel ayukish usu tusadina mulong wa kuchirish chisambu ni mukadivar netu. Tufanyidin kand kwitekin chisu cha kwishinshikin ayinetu. Tukutwish kwiyipul anch: ‘Ov, niswakeling kwitiyin kurumbuk kwam, kwit dilikishin nich kwikepish, ni kuchirish chisambu? Mutapu ik ukwiyovay Yehova ni Yesu anch nakwat mupak wa kuchirish chisambu ni mukadivar ap nambaz nam?’ Yakul yetu yikutwish kutubachik kumutesh Yesu ni kuyisejin ambay netu nich kwikepish mulong wa kuchirish chisambu. Anch twaya kud mukadivar netu mulong wa kuchirish nend chisambu, tufanyidin kusal mwamu nich kwikepish. (Efes 4:2, 3) Tufanyidin kwisamb ni muntu twarumbukinang ni chitongijok cha kudutish kusansan kwovilay chakwel tuchirisha nend chisambu. Vurik anch kuchirish chisambu ni mukadivar ney kud kwa usey nakash kupandikanamu kufil kwijik uyingina ni ufil nich.​—1 Kor. 6:7. w21.12 26 par. 13-16

Yesu wova ushon nakash mu muchim mulong wading wij anch antu avud a mu musumb winou ading amekeshin kal anch kakwitiyap uruu wa Want. Mud chibudikin, Yerusalem afanyina kumushesh ni in Yuda avud afanyina kupand afanyina kuyikwat mu winkwal. (Luka 21:20-24) Pakad kulab, mud mwalonday Yesu, antu avud kamwitiyap. Mutapu ik ukatau antu avud kwakul ku uruu wa Want kwi ndond ushicha? Anch antu akemp awiy akata kwitiy uyakin chikalap nchik usu usadina mulong wa kuyifundish, yom ik ukutwisha kwilejin ku kudil kwa Yesu? Yehova uyibangidining antu. Kudil kwa Yesu kutuvurishin mutapu ukatay Yehova kuyibangin nakash antu. “Kasotilap muntu ap umwing kusheshik, pakwez usotil antu awonsu kukarumuk kudiokal ku yitil yau.” (2 Pita 3:9) Nlel, tumekeshining anch tuyikatin amutej netu kusutin kudandamen kusal usu wa kupukun michim yau nich rusangu ruwamp.​—Mat. 22:39. w22.01 16 par. 10-12

Ritiy rey rikukasikan anch watongijokin pa yom yasalay Yehova pasak mulong wa antu end, ni yakusadidinay kal ey pa kampwil. Cha usey kupandikan, rukat rey mulong wa Yehova rikukul. Kusutamu mikadil yawonsu, rukat rikukubachik kumuziyin Yehova, kwipan mulong wa kumusangaresh, ni kujijamen yikokujol yin yawonsu. (Mat. 22:37-39; 1 Kor. 13:4, 7; 1 Yoh. 5:3) Kwikil chom chikutwisha kwikal cha usey kusutamu urund uwamp ni wa piswimp ni Yehova! (Kus. 63:1-7) Vurik anch kulembil, kwilej, ni kutongijokin yid pakach pa difukwil dietu. Mud Yesu, kimb ndond yikuchikina mulong wa kusutish chisu pamwing ni Yehova. Ipuk yom yakad usey yikutwisha kulet kampuw. Mwita Yehova chakwel akukwash kutek manangu mwi ndond chisu usadina mijikit ya muspiritu. Anch wasadin nawamp chisu chey katat, Yehova ukufut mwom wa chikupu mwi ngand yisu ya Nzamb.​—Mar. 4:24. w22.01 31 par. 18-20

Yitongijok yetu yikweting usu pa yisal yetu. Yawiy yatufundishay Yesu kwipuk yitongijok yikutwisha kutushikij kusal chitil chikash. (Mat. 5:21, 22, 28, 29) Pakwez tukatin kumusangaresh Tatukwetu wa mwiur, kimwawiyap? Chawiy chid cha usey nakash mud ik kwipuk pakad kulab yitongijok yin yawonsu yiyimp yikata kwez mu manangu metu! Yesu walonda anch: “Yikata kubudik mu kan yikat kudiokal mu muchim.” (Mat. 15:18) Chakin kamu, mazu metu makat kumekesh yom yidia mukach mwa muchim wetu. Chawiy iyipula anch: ‘Ov, nikat kwipuk kudimban, ap anch kulond uyakin kukutwish kwinletin milong? Anch nid ngatan ap ngachik, ov, nikat kwipuk kwizez ni muntu wa chid cha ruvaj chikwau? Ov, nikat kwipuk mazu mijondila mud mutapu nikata kwipuk chipupu? Ov, nikat kwakul kwa matul anch muntu wanjimesh?’ Kutongijokin nakash pa yiyul yiney kukutwish kukukwash. Anch wasal usu wa kwipuk mazu mayimp, makasu, ni mazu matakanena mu mambamb mey, chikukuswapel kudjol wuntu ukur. w22.03 5 par. 12-14

Winou ud kamu uyakin! Antu itining chiyul pa ndond pa kuchingel chakwel muntu iyezinap amwinend mulong wa kuyiyul, yisu yivud akat kukul nakash mu spiritu kusutamu antu akad kwitang chiyul. Chawiy, sal rizau ra kusambish mulong wa kwit chiyul. Chisu ik tufanyidina kwit chiyul kud mbay netu mwin Kristu? Shinshikin yilakej yimwing. (1) Nambaz ukat kumwit mwin kulejan ukweta ukaliweny nakash chakwel amutwalaku kutakel dilejan dia Bibil, ni kwinsudien wamwit kal chiyul piur pa mutapu ukutwishay kuwapish mutapu wend wa kufundish. (2) Nambaz udia mujich ukimbin kuland masun, chawiy wamwit kal nambaz uswila mu spiritu chitongijok chiwamp piur pa masun mafanyidinay kutond. (3) Mukadivar amutond kal kapamp kend ka kusambish mulong wa kusal diskur dia antu awonsu. Kupwa wamwit kal mukadivar ukweta ukaliweny wa kusal madiskur chakwel atesh pirijekinay ni kumwinkish yiyul piur pa mutapu ufanyidinay kuwapish. Ap mukadivar wasadina kal madiskur mu mivu yivud ukutwish niyend kwit chiyul kud mukadivar ukweta ukaliweny wa kusal madiskur ni kusadin yiyul yikumwinkishau.​—Jnsw. 19:20. w22.02 13 par. 15-17

Yehova utukatin ni ukat kutubangin, mud mwading mumukatinay Yesu ni kumubangin chisu chading chiwanyishinay chisend chend chikash pa divu. (Yoh. 5:20) Wamukwasha Yesu kulam ritiy rikash, wamukasikeshang chisu chadingay ni yakamish, ni wasalang anch Yesu ikal ni yom ya kumujimbu yiswirikedinay. Ni Yehova wamuleja Mwanend anch wading umukatin ni umusangaredin. (Mat. 3:16, 17) Yesu kiyovap ap pakemp anch ud amwinend, mulong wading umuchingejidin Tatukwend wa rukat wa mwiur. Mud Yesu, etwawonsu twamen kal yom yivud yimekeshina rukat ra Yehova. Tong bil: Yehova watupwitidin kal kud ndiy ni watwinkishin kal dijuku dia mu spiritu dikweta rukat ni didia mu uumwing chakwel twikal ni musangar ni kutukasikesh chisu tudia ni yakamish. (Yoh. 6:44) Yehova utwinkishin kand chom chin chawonsu tuswiridina mulong wa kulam ritiy retu rikash. Ni ukat kutwinkish kand yom ya ku mujimbu tuswiridina dichuku diawonsu. (Mat. 6:31, 32) Anch twatongijokin pa mutapu utukatinau kud Yehova, rukat retu mulong wendendiy rikupandakan. w21.09 22 par. 8-9

Mutapu ik wadinga mwom wey kurutu usambish kwilej Bibil nau Atuman a Yehova? Avud pakach petu tukutwish kwiyov nayimp anch twatongijokin pa mwom ukur. Yom yilondinau antu a mangand yawiy yading yitakedila yitongijok yetu ni wuntu wetu piur pa yom yiwamp ni yiyimp. Anch mwawiy, chirumburikin anch twading “wakad ruchingej, wakad kand Nzamb.” (Efes 2:12) Pakwez kupwa kwa kusambish kwilej Bibil, wajingunina anch ukwet Tatukwey wa mwiur ukukatina nakash. Wajingunina kand anch ang usotin kumusangaresh Yehova ni kwikal mu dijuku dia in kumwifukwil end, wafanyina kuswimp yom yivud mu mwom ni mu yitongijok yey. Chakwita kwilej kushakam kukwatijan ni mbil jend ja piur. (Efes 5:3-5) Sakatang wetu ni Tatukwetu wa mwiur Yehova, ukwet mbil ya kukwat mupak piur pa mikadil yifanyidinau kwikal nich antu a mu dijuku diend. Chikwau kand, utwitin kukudish mikadil yiney kurutu kwa kutubatish ni kusal usu nakash wa “kudjol wuntu ukur ni yaku yend.” w22.03 2 par. 1-3

Amikoku akwau akat kusangar kwikalaku mulong wa kutal mutapu usadikina Chivurikish, niyau akat kutongijokin pa ruchingej rau. Akat kukumangan ku Chivurikish mulong wa kutesh diskur, ni kuta matu nakash mulong wa kutesh yom yikusalay Kristu nau antu akuyikela nend 144 000 pa chisu cha Winyikel wa Mivu Kanan mulong wa antu ashinshamena. Mwinshin mwa umutakel wa Mwant wau Yesu, antu akuyikela mwiur akukwash kukarumun divu kwikal paradis ni kuyishikij antu aziyidina kwikal awanyidina. Chikat kuyisangaresh nakash mamiliyon ma antu akata kukumangan mulong wa kutal mutapu usadikina Chivurikish ni kutongijokin pa mutapu ukuwanyina uprofet wa Bibil mu machuku ma kurutu, mud uprofet udia mu Isay 35:5, 6; 65:21-23; ni Kujingunik 21:3, 4. Pakata kutongijokinau mutapu ukwikalau pamwing nau akatish nau mwi ngand yisu, akat kukasikesh ruchingej rau ra machuku ma kurutu ni kukwat mupak wa kulik kwimik kumusadin Yehova.​—Mat. 24:13; Gal. 6:9. w22.01 21 par. 5-7

Difut chom ik? Usey wapanay Yesu mulong wa kuchirish yom yashadishay Adam. (1 Kor. 15:22) Mulong wak tukwet kuswir wa difut? Mulong mud mwalejanau mu Chijil, mbil ja Yehova piur pa kutentam jilejen anch mwom ku mwom. (Kub. 21:23, 24) Adam washadisha mwom wend uwanyidina. Mulong wa kulimish mbil jitentamina ja Nzamb, Yesu wapana mwom wend uwanyidina. (Rom 5:17) Chawiy wikal “Tatuku wa Chikupu” kud antu awonsu itiyijina mu difut. (Isay 9:6; Rom 3:23, 24) Yesu witiyina kupan mwom wend mulong umukatin nakash Tatukwend wa mwiur ni utukatin kand niyetu. (Yoh. 14:31; 15:13) Rukat riner ramubachika kushal ushinshamena djat ni ku rufu rend ni kuwanyish rusot ra Tatukwend. Mud chibudikin, chitongijok chadingay nich Yehova patangay divu ni payitangay antu chikuwanyin. w21.04 14 par. 2-3