Ngond wa 2

Yehova ukatin anch atushalapol end awonsu ikal ni musangar. Ud piswimp ni umwing ni umwing wa pakach petu, ni ukat kutuman chisu tukata kuziy mulong wa milong turishina nich. (Kus. 145:18, 19) Shinshikin mutapu wabanginay Yehova yovil ya muprofet Elija. Ikundj winou wadingaku pa chisu chimwing chikash mu rusangu ra in Isarel. Ayizengola nakash atushalapol a Yehova ni akankuny a Yehova ading amukimbin nakash Elija mulong wa kumujip. (1 Ant 19:1, 2) Kwading kand yom yikwau yamuziyisha Elija. Wading utongin anch ndiy kwend muprofet umwing washalaku. (1 Ant 19:10) Yehova wamukwasha kapamp kamwing Elija. Watuma mwangel mulong wa kumwinkish muprofet wend kashinsh anch kadingap dia amwinend. Kwading kuchid in Isarel avud adinga amwovila Nzamb wom! (1 Ant 19:5, 18) Yesu wayinkisha in kwilejend kashinsh anch chikumangen chikwikal mud dijuku diau dia mu spiritu. (Mar. 10:29, 30) Ni Tatukwetu wa mwiur, Yehova, ushidinamu anch ukuyikwash antu akatina kumusadin.​—Kus. 9:10. w21.06 8-9 par. 3-4

Antu avud nlel katukatinap mulong tukat kusadin Bibil mulong wa kuyifundish antu anch mafundish mavud ma chirelijon mad ma makasu. Antakel a chirelijon akat kuyifundish antu anch Nzamb ukat kuyimesh antu ayimp mar mu kasu ka chikupu. Akat kusadin mafundish minam ma makasu mulong wa kuyiyikel antu. Mulong tud atushalapol a Yehova amwifukwidina Nzamb wa rukat, tukat kumekesh patok anch mafundish minam mad ma makasu. Antakel a chirelijon akat kuyifundish kand antu anch mupim ukufangap. Tukat kumekesh patok anch mafundish minam madiokilap mu Bibil, makwet misul ya upagan, mulong anch mad makin kwakulond anch kukwikalap divumbuk. Ni chinyim ni yitiyij yilejena anch yom yawonsu yisadikina nlel, Nzamb ndiy wasambela kuyitenchik kurutu kwa chisu, tukat kuyifundish antu anch muntu ukwet want ipend, ni ukutwish kutond kumusadin Nzamb anch ukatin. Pitukata kusaul mafundish mau ma makasu, antakel a chirelijon akat kwiyov mutapu ik? Yisu yivud akat kujiman! Anch tukatin uyakin, tufanyidin kand kwitiyij ni kuziyin yom yilondinay Nzamb. (Yoh. 8:45, 46) Chinyim ni Satan Djabul, etu tukat kwiman dang mu uyakin. Tukatap kusal yom yakad kukwatijan ni yitiyij yetu. (Yoh. 8:44) Nzamb uyitin antu end anch “kisany yom yawonsu yiyimp” ni “lamatany yom yawonsu yiwamp,” mud mwasalay Yesu.—Rom 12:9; Heb. 1:9. w21.05 10-11 par. 10-11

Yom ik tufanyidina kusal anch twajingunin anch twawidin kal mu mupit wa kwitutul ap wa ris? Tukutwish kusuurikamu! Kambuy Paul walonda anch antu ‘ozinau kal aom kud’ Djabul akutwish kusuurik mu mupit wend. (2 Tim. 2:26) Kangal wavuramen ap pakemp anch Yehova ukwet usu nakash kumusutamu Satan. Chawiy anch twitiy ukwash wa Yehova, tukutwish kusuurik mu mupit ap mu chilemb chawonsu cha Djabul. Pakwez chid chiwamp kwipuk mipit yawonsu ya Satan pa ndond pa kufamu bil chad etu twasuurikamu. Tukutwish kusal mwamu ching ku ukwash wa Yehova. Chawiy mwilembila Yehova dichuku diawonsu chakwel akukwash kushinshikin yitongijok ni yisal yey. (Kus. 139:23, 24) Sal usu wawonsu chakwel kangal wikal mwin kwitutul ap mwin ris! Satan ud chibind mukur nakash. Pakwez piswimp ap akumukas ni kupwa akumushesh. (Kuj. 20:1-3, 10) Tuchingedin nich impu nakash dichuku dinadia. Pakwez kurutu dishika, tudandamenany kubabel mipit ya Satan. Sal usu chakwel kangal kwitutul ap ris yikuyikel. Kwat mupak wa “kurish nend Sakudimban, chad ndiy [ukukuchin] kulemp.” w21.06 19 par. 15-17

Yehova ukat kusangarang nakash anch muntu witiy uyakin wa Bibil ni wasambish kuulejan kud antu kwau. (Jnsw. 23:15, 16) Tongin musangar ukwetay Yehova pamenay yom yisadikina nlel! Chilakej, mu muvu wa mudimu wa 2020, chikalap nchik chipupu chapalangena pa mangand mawonsu, twatakedin malejan ma Bibil 7705765. Kusutin malejan minam, twakwashin antu 241994 kwipan kud Yehova ni kutambul dibatish. In kulejan inay asu niyau akutakel malejan ma Bibil ni akuyikwash antu avud kwikal in kwilej. (Luka 6:40) Chakin kamu tukat kumusangaresh nakash Yehova chisu twipanina mu mudimu wa kwikadish in kwilej. Kwikadish in kwilej udiap mudimu uswapela, pakwez kusutin ukwash wa Yehova, tukutwish kuyikwash antu asu kumukat Tatukwetu wa mwiur. Umen nchik anch witekin mupak wa kusambish kutakelaku ap kwau dilejan dimwing dia Bibil? Ukutwish kushimwok nakash pa kuman yibudikin yikwikalaku anch wasambish kwikasikesh pa chisu chiwanyidina kuyit antu awonsu wisambina nau chakwel usambish kwilej nau Bibil. w21.07 6-7 par. 14-16

Mwant David wapana yom ya usey ni nfalang jivud mulong wa kukwash kutung kwa tempel. (1 Jsng. 22:11-16) Wasala mwamu ap anch wading wij anch antu akutazuk tempel anch tempel wa Solomon. Anch tukwetap kand usu wa kukwash mudimu wa kutung mu dirijek dia Yehova, tukutwish kudandamen kukwash midimu yiney kusutin yipan yetu kukwatijan ni patukwetidina. Ni tukutwish kuyifumb ansand nich ukaliweny tukwetaPiur pa mwikadil wa kupan, tongijokin piur pa chilakej cha kambuy Paul. Wamutazuka nsand Timote mulong wa kuya nend mu mudimu wa umishoner, ni Paul wamufundisha nsand winou milad ya kulejan ni kufundish. (Mid. 16:1-3) Kufumb kwa Paul kwamukwasha Timote kwikal mwin kulejan ni mwin kufundish muwamp wa rusangu ruwamp. (1 Kor. 4:17) Timote niyend wasadina yom yamufundishau kud Paul mulong wa kuyifumb nich antu akwau. w21.09 12 par. 14-15

Yom ik tukutwisha kwilejin ku chilakej cha Apolo ni Paul? Amakundj aad inay ading ni ronganyin rijim ra Mifund. Awonsu ading alej ijikena ni ija kufundish. Ni awonsu akwasha mu mudimu wa kwikadish in kwilej avud. Pakwez kwovijadinangap mukau. (Mid. 18:24) Chisu chikemp kupwa kwa Apolo kudiokal mu Korint, Paul wamukasikesha kuchirik kand kwinikwa. (1 Kor. 16:12) Apolo wasadina ukaliweny wend mu mutapu uwamp​—mu kulejan rusangu ruwamp ni kuyikasikesh akadivar. Tukutwish kwikal kand nich kashinsh anch Apolo wading ikundj wikepishina. Chilakej, Bibil kalejenap anch wajimana chisu chamutazukau kud Prisil ni Akila chakwel “amurumburil kand nawamp yom yikwau ya rusot ra Nzamb.” (Mid. 18:24-28) Kambuy Paul wading wij mudimu uwamp wasalay Apolo. Pakwez Paul kiyakamishap anch antu akumuman anch amusutinamu ukaliweny kud Apolo. Anch twatang yom yafunday Paul ku chikumangen cha Korint, tukutwish kuman anch wading muntu wikepishina ni wija mimbu yend.—1 Kor. 3:4-6. w21.07 18-19 par. 15-17

Adam ni Ev amubwambwila Nzamb kwa kwikatin, chawiy ading awanyidin kuyidiosh mu dijuku dia Nzamb. Pakwez yom ik yafanyina kuyishiken anau? Mu rukat rend, Yehova watenchika chakwel an a Adam aziyidina ikal kand mu dijuku diend. Wasala mwamu kusutin chakupesh cha Mwanend kapokal. (Yoh. 3:16) Mud chibudikin, Yehova witiya anch antu ashinshamena 144000 ikal anend mulong wa chakupesh cha Yesu. (Rom 8:15-17; Kuj. 14:1) Chikwau kand, mamiliyon ma antu akwau ashinshamena amuziyidin Nzamb ni kusal rusot rend. Akwet ruchingej ra kwikal mu dijuku dia Nzamb kupwa kwa kupak kwa nsudien kwinsudien kwa mivu kanan. (Kus. 25:14; Rom 8:20, 21) Ap katat akat kumutazuk Yehova anch Sakatang wau, ap ‘Tatuku.’ (Mat. 6:9) Antu akuvumbulau akuyinkish niyau mutapu wa kwilej yom yikatinay Yehova anch asala. Antu awonsu akumuziyina akwikal kand mu dijuku dia Yehova. w21.08 5 par. 10-11

Kambuy Paul amwinend wasadinang chiyul chend chinech. Amwinkisha chisend cha kusal mudimu wa kulejan, ni yawiy yom yamanay kwikal yipandakena usey mu mivu yivud. Walejana ‘pa ndond ya antu avud ap ku chisu ni chis.’ (Mid. 20:20) Walejanang chisu chawonsu ni ndond yawonsu yikwetay mutapu wa kusal mwamu! Chilakej, chisu chading chiyichingedinay ambay nend mu musumb wa Aten, wasambisha kulejan rusangu ruwamp ku yisak kushalijan ya antu, ni kwikala yibudikin yimwing yiwamp. (Mid. 17:16, 17, 34) Ap chisu chadingay “mu rukan,” Paul walejanang kud antu amusejinang piswimp. (Fil. 1:13, 14; Mid. 28:16-24) Paul wasadina nawamp chisu chend. Wayitang yisu yivud antu akwau mulong wa kuya nau mu mudimu wa kulejan. Chilakej, mu weny wend wa kusambish mu mudimu wa umishoner, wamusenda Yohan utazukinau kand anch Marko; ni mu weny wa kaad wamusenda Timote. (Mid. 12:25; 16:1-4) Pakad kwidjidjek, Paul wasala usu wend wawonsu mulong wa kuyifundish amakundj inay mutapu wa kurijek yikumangen, mutapu wa kusal mudimu wa ukafung, ni mutapu wa kwikal alej awamp.​—1 Kor. 4:17. w22.03 27 par. 5-6

Antu amwing kitiyijinap anch kud Sakatang, akat kulond anch itiyijin ching mu yom yikutwishau kuman. Pakwez oku akat kwitiyij yom yimwing yakad kumekan ku mes, chilakej rinkind. Ritiy risambidinau mu Bibil rimedin kand pa uman ukwau wa ‘yom yakin yakad kumekan ku mes.’ (Heb. 11:1) Chitin chisu ni usu mulong wa kushinshikin uman, ni antu avud aburedin kutakaman kwa kusal mwamu. Muntu wakad kwitekin chisu cha kushinshikin uman ukutwish kushiken kutong anch Nzamb kwikiling. Kupwa kwa kushinshikin uman, in siyans amwing ashikena kwikal nich kashinsh anch Nzamb ndiy watanga mangand. Antu amwing akutwish kulond anch kwikil Sakatang mulong ku iniversite kandikal afundishangapaku piur pa kutang kwa yom. Pakwez, akat kushiken kumwijik kumwijik Yehova ni kumukat. Chawiy, niyetu tufanyidin kukasikesh ritiy retu mudiay Nzamb, chikalap nchik shikol twileja ap ndond twapamina. w21.08 14 par. 1; 15-17 par. 6-7

Yesu wasadina chishimu cha mwan washadika mulong wa kutukwash kwijik mutapu ukatinay Yehova kumekesh riy. Mwan wadiokala kwol kwau, ni “washesha nfalang jend ku yom yiyimp.” (Luka 15:13) Kupwa kwa kukarumuk ku mwom wend wijondila, wikepisha ni kuchirik kwol kwau. Mutapu ik wasalay tatukwend? Yesu walonda anch: “Pachadingay [mwan] kulemp ni kwol kwau, tatukwend wamumana, wamwovila riy nakash. Ndiy waya mau, wamubwikat mwanend, wamulangwisha nich kususu ku kan.” Tatuku kamukwatishap mwanend usany. Pakwez wamwovila mwanend riy ni kumulikishin, ni wamwaka pachirikay mu dijuku. Mwan washadika warumbuka nakash, pakwez mulong wakarumuka, tatukwend wamulikishina. Mu chishimu chinech, tatuku winou wamekesha riy umumekeshin Yehova. Mu mafundish mend, Yesu wamekesha anch Tatukwend ukatining kuyilikishin antu akarumukina kamu chakin.—Luka 15:17-24. w21.10 8 par. 4; 9 par. 6

Ov, Atuman a Yehova ad antu atondau mulong wa dijin dia Yehova? Shinshikin uman umekeshina mwamu. Nlel amakurump avud a chirelijon asadin usu wawonsu mulong wa kujindjik uman umekeshina anch Nzamb ukwet dijin dia pakampwil. Adioshin kal dijin dia Nzamb mu ma Bibil makatau kukarumun, ni yisu yimwing akat kukangesh kusadin dijin dined mu mijikit yau ya chirelijon. Chimeken kamu patok anch ching Atuman a Yehova awiy kwau akata kulimish dijin dia Nzamb. Tukat kwijikish dijin dia pakampwil dia Nzamb kusutamu yisak yawonsu ya marelijon! Pa mulong winou, tukat kusal usu wa kushakam kukwatijan ni dijin tukweta dia Atuman a Yehova. (Isay 43:10-12) Twabudishin kal mamiliyon 240 ni kusut ma dikarumun dia La Bible. Traduction du monde nouveau, uchirishina dijin dia Nzamb pa ndond padidioshau mu ma Bibil makwau kud in kukarumun. Ni tukat kubudish mikand mu mazu 1000 ni kusut yisadidina dijin dia Nzamb! w21.10 20-21 par. 9-10

Tukat kumwifukwil Yehova anch twayikwash ambay netu in Kristu adia mu maswir. Yehova wakana anch ukuyifut in Isarel ayanakenang atuzwendj. (Kuv. 15:10) Chakin kamu, chisu chawonsu tukata kuyikwash ambay netu mu ritiy adia mu maswir, Yehova ukat kuman yipan yiney mud tumwinkishinay Ndiy. (Jnsw. 19:17) Chilakej, chisu chatumau in Kristu a ku Filip chipan kud Paul wadinga mu rukat, wachitazuka anch “yakupesh yiwanyidina kumusangarish Nzamb.” (Fil. 4:18) Shinshikin mu chikumangen chen ni iyipula anch: ‘Ov, mud muntu nikutwisha kukwash?’ Yehova ukat kusangar anch watuman tukat kusadin chisu, usu, ukaliweny, ni yom yetu ya ku mujimbu mulong wa kuyikwash antu adia mu maswir. Ukat kuman yom yiney mud chikunku cha difukwil dietu. (Jak. 1:27) Difukwil diakin ditin chisu ni usu. Pakwez chidiap chisend chilimina. (1 Yoh. 5:3) Mulong wak? Mulong rukat retu mulong wa Yehova ni mulong wa akadivar ni anambaz netu rawiy ritubachikina kusal mwamu. w22.03 24 par. 14-15

Anch twatongijokin pa milong yirishinau nich akadivar nau anambaz netu, tukutwish kuyanaken. Chilakej, nambaz ukutwish kwikal ni mayej makash. Pakwez kakwinanolangap kwend, chawiy ukutwish kusangar nakash anch muntu wamukwash. Ov, tukutwish kumukwash kwiswok ap kurijek mu chikumbu? Pamwing ap mukadivar washadishin mudimu. Tukutwish kumwinkish chipan ap nfalang jikemp, pamwing ap pakad kumulej anch yetu tumwinkishina, mulong wa kumukwash djat ni pakumanay mudimu ukwau. Tufanyidinap kuchingel anch ching akadivar ni anambaz netu atwit ukwash kurutu kwa kuyimekeshin ranaken. Mud mukatay kusal Yehova, tufanyidin kuyikwash kurutu atwita. Nzamb ukat kutubudishin muten pichuku pichuku pakad kumwit! Ni chirungul cha muten chikat kuyikwash antu awonsu, kadiap kwau ching kud antu akata kujikitish. Ov, umenap anch mu kutwinkish yom tuswirikedina, Yehova umekeshin anch utukatin? Tumukatin kamu nakash Yehova mulong ud muwamp ni mwin kupan! w21.09 22-23 par. 12-13

Rukat rudimukina ra Nzamb rimubachikining kulikishin. Anch Yehova wamuman muntu wasalang chitil ukat kusal usu wa kukarumuk ni kulikap mwikadil wend uyimp, rukat rudimukina rikat kumubachik kumulikishin. Nfund a Kuseng David walonda piur pa Yehova anch: “Ndiy kakutwilikejinangap mudi mudia yitil yetu, kakuturumburishangap mudi mudia kuyip kwetu.” (Kus. 103:8-11) David wimenap amwinend mutapu ukutwishay muntu kwifish nich ni kwov ushon anch kom kamubindishin. Pakez wileja kand anch Yehova “ukat kulikishin.” Yom ik yimubachikining Yehova kulikishin? Chakul tuchitanin muverse wa mufund wa nlel. Chakin kamu, mud mwalonday David mu malembil, Yehova ukat kulikishinang mulong winzwil sens nich rukat rudimukina pantaliken ni awonsu akata kumwit dilikishin. Anch twasal chitil, chid chovikena ni chiwamp kwifish nich. Kusal mwamu kukutwish kutubachik kukarumuk ni kukwat mupak wa kuswimp mwikadil wetu. w21.11 5 par. 11-12

Yehova ukatining dijin diend ni ukatin anch muntu mwawonsu adilimish. (Isay 42:8) Pakwez kwasut kal mivu piswimp tunan musamban kudiosh kwasambishinau kuswingish dijin diend. (Kus. 74:10, 18, 23) Yom yiney yasambisha chisu Djabul (charumburik anch “Mwin Kafukej”) pamufunday Nzamb anch uyikishin Adam ni Ev chom chiwamp chikwetau nich kuswir. (Dis. 3:1-5) Kudiosh kamu chisu chinicha, Yehova akat kumufund anch uyikishin antu yom yikwetau nich kuswir. Yesu wading wiyakamishin nakash piur pa mutapu uswingishinau dijin dia Tatukwend. Yehova ukwet mbil yin yawonsu ya kuyikel mwiur ni pansh, ni mutapu wend wa kuyikel wawiy upandikena kuwap. (Kuj. 4:11) Pakwez Djabul wasala usu wa kuyipumbul angel ni antu ni kuyibachik kutong anch Nzamb kakwetap mbil ya kuyikel. Piswimp ap, mulong winou akuupwish rawonsu. Yehova ukwitumbish amwinend ni kumekesh anch ching kusu Want wend wawiy ukutwisha kulet chisambu chakin ni diking diakin pa mangand. w21.07 9 par. 5-6

Ntakel wa dijuku ukatining kukimb yakudia yiwanyidina, yidjal, ni ndond ya kulal ya mukajend ni anend, ni chinech chiding chivadik. Ov, umen mar mulong wa kuburen nfalang? Anch mwawiy, chid chirung chikash nakash kud ey. Pakwez chikalap nchik mwamu, ukutwish kusadin chirung chinech mulong wa kukasikesh ritiy rey. Lembil ni tang mazu ma Yesu madia mu Mateu 6:25-34, kupwa matongijokina. Shinshikin yilakej ya mu chirung chetu yimekeshina anch Yehova ukat kuyiwanyishin maswir awonsu akwatikena ni mijikit ya uteokras. (1 Kor. 15:58) Kusal mwamu kukukasikesh ritiy rey anch mud mutapu wayikwashau antu akwau kud Tatukwey wa mwiur mu yishiken mud yiney, ukukukwash kand niyey. Wij kamu maswir mey, ni wij mutapu ukutwishay kukuwanishinam. Anch waman mutapu Yehova ukukwashinay mu mwom wey, ritiy rey rikukasikan ni kukukwash kujijamen yikokujol yikash yikushikena mu machuku ma kurutu. w21.11 21 par. 3; 22 par. 6

Mafundish ma difut makasikeshin kal ritiy ra in Kristu avud. Adandamena kusal mudimu wa kulejan chikalap nchik kuyipompat, ni ajijamena yoziu ya mitapu ni mitapu djat ni ku upal wau. Shinshikin chilakej cha kambuy Yohan. Walejana uyakin piur pa difut ni piur pa Kristu nich kushinshaman, ni chimeken anch wasala mwamu mu mivu 60 ni kusut. Padingay Yohan ni mivu piswimp 100, in Rom amumana anch wading kabaj ni amutwala mu rukan pa ditung dia Patimos. Mulong wak? Amwinend walonda anch “mulong narumburila dizu dia Nzamb ni uyakin yanjinguninay Yesu.” (Kuj. 1:9) Chinech chid chilakej chiwamp mud ik cha ritiy ni cha kujijaman! Yohan wamekesha anch umukatin Yesu nakash ni ud mwin kujikitish mulong wa difut kusutil mikand yamupepilau kufund. Mu mikand yiney mud maverse 100 ni kusut misambidina piur pa difut ap piur pa yiyukish yiletina difut. (1 Yoh. 2:2) Chimeken kamu patok anch Yohan wajikitisha nakash mulong wa difut. w21.04 17 par. 9-10

Yehova wayikasikesha antu end kuyibangin antu ading akweta ulim kanang. Chilakej, in Isarel kadingap kafanyidina kumushing kajikamatu. Mashing minam mading marumburikin kumusal muntu yom ap kumulond mazu mayimp. Chinech chading chom chiyimp nakash pantaliken ni kajikamatu! Kakutwishap kutesh yom yimwedinau, chawiy kakwetap mutapu wa kwakul. Chikwau kand, mu In Levi 19:14 twilejin anch antu a Nzamb kafanyinap “[kutek] chom kurutu cha kumuwish nich mputames.” Buku umwing ulondin piur pa antu akweta ulim kanang anch: “Mu Isarel wa pakur, [ayisadinang] ayilim nich chisum.” Pamwing ap antu akweta michim yiyimp atekang yom kurutu kwa mputames mulong wa kumuwishikish ap mulong wa kumusip. Muchim uyimp mud ik! Yehova wayikwasha antu end kwijik anch afanyidin kuyanaken ayilim kusutin chijil chend. w21.12 8-9 par. 3-4

Jakob wading wiyakamishin anch pamwing ap mwanamakwend uchidandamedin kumulamin rukuny. Chawiy, wamulembila nakash Yehova pa mulong winou. Kupwa, wamutumina Esau chipan chiwamp nakash. (Dis. 32:9-15) Disudien, chisu chatanijanau mes ni mes, Jakob wamulimisha Esau. Wamuzengamina Esau pansh, kadiap kapamp kamwing ap kaad, pakwez tupamp sambwad! Nich kwikepish ni kalimish, Jakob wachirisha chisambu ni mwanamakwend. (Dis. 33:3, 4) Tudioshin dilejan ku mutapu wirijekay Jakob mulong wa kuya kumanijan ni mwanamakwend ni mutapu wamusejinay. Jakob wamwita Yehova nich kwikepish chakwel amukwash. Kupwa wasala kukwatijan ni malembil mend kusutin kusal usu wa kuchirish chisambu ni mwanamakwend. Patanijanau, Jakob kapwitamijanap ni Esau mulong wa kwijik nany wading uyingina nich ni ufila nich. Chitongijok cha Jakob chadinga cha kuchirish chisambu ni mwanamakwend. Ov, ukutwish kwimburij chilakej cha Jakob?​—Mat. 5:23, 24. w21.12 25 par. 11-12

Anch watongin mutapu wafay Yesu mulong wa kubwik yitil yey, ukutwish kulond anch, ‘Nimen mud niwanyidinap difut dined.’ Mulong wak ukutwisha kwiyov mwamu? Mulong muchim wetu wakad kuwanyin ukutwish kutudimb ni kutushikij ku kwiyov anch tukwetap usey ap tuwanyidinap kutukat. (1 Yoh. 3:19) Anch twikal ni yitongijok ya mutapu winou, tufanyidin kuvurik anch “Nzamb udi mujim kupandakanamu michim yetu.” Ap anch twiyov anch Yehova katukatinap ni kakutulikishinap, Tatukwetu wa mwiur ukudandamen kutukat ni kutulikishin. Tufanyidin kusal usu wa kwitiyij anch Yehova utukatin. Mulong wa kutwish kusal mwamu, tufanyidin chisu chawonsu kwilej Dizu diend, kulembil chisu chawonsu, ni kukumangan pakad kujing ni atushalapol end ashinshamena. Mulong wak chid cha usey kusal mwamu? Ukwijik chad nawamp mikadil yipandiken kuwap ya Yehova. Mwamu ukwov chad kurumburik anch komb ukukatin nakash. Kutongijokin nakash pa Dizu dia Nzamb dichuku diawonsu, kukutwish kukukwash kuman yom zwang, “kuyitenchik” mu manangu ni mu muchim wey.​—2 Tim. 3:16. w21.04 23-24 par. 12-13

Mulong wa kwikal ni ritiy rikash, chitin kusal yom yivud kusutamu kwau kwikal ni ronganyin ra yom. Tufanyidin kutongijokin pa yom tutangina. Tal yom yamushikena nfund a Kuseng wa 77. Wading ni runeng mulong wading utongin anch ndiy pamwing nau ambay nend in Isarel ashadisha dilau dia Yehova. Yakamish yiney yamukangeshang kulal uchuku. (Verse wa 3-9) Yom ik yasalay? Wamuleja Yehova anch: “Am nikutong pa yisalijok yey yikwamushena, nikutong kand pa yisalijok yey yiwamp.” (Verse wa 13) Chakin kamu, nfund a kuseng winou wading wij nawamp yom yasalay Yehova pakur mulong wa antwend, pakwez ikundj winou wadinga ni yakamish wiyipula anch: “Ov, Nzamb wavuramena kal riy? Ov, Nzamb mu ujim wend wadioshil kal ranaken?” (Verse wa 10) Nfund a kuseng watongijokina pa midimu ya Yehova ni pa uman wading umekeshina anch wamekesha riy ni ranaken pakur. (Verse wa 12) Yisu yibudikin yikalaku? Nfund a kuseng wikala nich kashinsh anch Yehova kakutwishap kuyilik antu End. (Verse wa 16) w22.01 30-31 par. 17-18

Mutapu ik wiyovilay Yehova piur pa amakundj nau amband ashinshamena afila kal? Ukwet kuswir nakash kwa kuyiman kand! (Job 14:15) Ov, ukutwish kutongin mutapu ukwetay Yehova kuswir kwa kumuman murunend Aburaham? (Jak. 2:23) Ap Moses, wambambangay nend “mes ni mes”? (Kub. 33:11) Ni tongin impu yikwetay ya kumutesh David nau anfund a kuseng akwau akat kumuwangin kand miminy yiwamp ya kumushiman nich! (Kus. 104:33) Ap anch arund a Nzamb inay afil kal, pakwez Yehova kayivuramedinap. (Isay 49:15) Uvurikin kachom ni kachom piur pa wuntu wau wawonsu. Dichuku dimwing ukuyivumbul, ni ukutesh kand malembil mau ma win kashinsh ni kwitiy difukwil diau. Anch wafishin mukatish ney, el yitongijok yiney yikongoj ni kukukasikesh. Chisu chasambisha wintombwij mu chir cha Eden, Yehova wading wij anch yom yikupandikan kuyip kurutu kwa kuyiwapish. Yehova ukisin uyimp, kuburen kutentam ni chisum, yidia mu mangand nlel. w21.07 10-12 par. 11-12

Anch twayikat akadivar ni anambaz netu, tumekeshin kand anch tujikitishin mulong wa difut. Mulong wak? Mulong Yesu wapana mwom wend, kadiap kwau ching mulong wetwetu, pakwez kand mulong wa akadivar ni anambaz netu. Anch Yesu witiya kufa mulong wa awiy, chinech chimekeshin patok anch akwet usey nakash ku mes kwend. (1 Yoh. 3:16-18) Tukat kumekesh anch tuyikatin akadivar ni anambaz netu kusutin mutapu tuyisadidina. (Efes 4:29, 31–5:2) Chilakej, tukat kuyikwash anch ayedin ap anch arishin ni yoziu yikash, mud yinship ya mar. Chad yom ik tufanyidina kusal anch mbay netu mwin Kristu watujimesh mulong wa yom yalonday kal ap yasalay kal? Ov, chikat kukukasiken yisu yimwing kulikishin? (Lev. 19:18) Anch mwawiy, sadin chiyul chinech: “[Dandamenany kuduwulijan kuziy] akasikena ni aziyila, anch muntu ukwet mulong ni mukwau chifanyidin kulikishijadin umwing ni mukwau, mudi mwakulikishinanyau en kudi Nsalejetu. Niyen salany kand mwamu.” (Kol. 3:13) Chisu chawonsu tukata kuyilikishin akadivar ni anambaz netu, tukat kumekesh anch tumujikitishin chakin kamu Tatukwetu wa mwiur mulong wa difut. w21.04 18 par. 12-13

Tukutwish kusal mudimu ukash mulong wa Yehova, ni tukutwish kuyikwash antu avud kushiken ku dibatish. Pakwez twij anch tukutwish kusal yom yiney yawonsu ching ku ukwash wa Yehova. Twilejin kand dilejan dikwau kusutin chilakej cha Apolo ni kambuy Paul—anch tukwet yisend yivud mu chikumangen, tufanyidin kand kusal usu wa kukasikesh chisambu. Tukat kujikitish nakash anch amakurump ni ankwash a mudimu akasikesh chisambu ni uumwing kusutin kupan yiyul yimedina pa Dizu dia Nzamb, ni kulik kwimekesh mud akwet usey, pakwez mu kulondul chilakej cha Yesu Kristu! (1 Kor. 4:6, 7) Muntu ni muntu wa pakach petu ukwet ukaliweny kanang wamwinkishau kud Nzamb. Tukutwish kusadin ukaliweny winou “mulong wa kukwashijan nich.” Tukutwish kutong anch mudimu tusadin ud wa usweral. Pakwez ijik anch tuyom tukemp tukemp tusadina mulong wa kukasikesh uumwing tud mud ndand uchiminau pamwing mulong wa kusal disun. Chawiy tuyom twawonsu tusadina tukutwish kukwash uumwing wa chikumangen. Muntu ni muntu pakach petu ufanyidin kusal usu nakash wa kulik kwimekesh mud ud muwamp nakash kuyisutamu antu akwau. El amboku tukwatany mupak wa kusal yawonsu tukutwisha kusal mulong wa kukasikesh chisambu ni uumwing wa chikumangen.​—Efes 4:3. w21.07 19 par. 18-19

Ukutwish kwikal nich kashinsh anch ukuyimaniril akatish ney afila kal. Kudil kwa Yesu chisu chading chiyongojinay arund nend ading mu ushon ujim nakash kumekeshin anch ukatin nakash kuyivumbul antu afila kal! (Yoh. 11:35) Yongoja antu anenganena. Yesu kimenap kwend kusu pa kudil pamwing ni Mart ni Mariy, pakwez wayitesha kand ni kuyilej mazu makasikeshina. (Yoh. 11:25-27) Tukutwish niyetu kuyisadin antu anenganena mutapu winou. Mukadivar Dan, mukurump wa chikumangen ushicha mu Ostrali, ulondin anch: “Kupwa kwa mukajam kufa, nikala ni kuswir kwa rongoj. Kwezang ambay a uruw kushalijan muten ni uchuku mulong wa kwintesh. Kankangeshap kuyirumburil ushon nading nich ni kovap kuyip pinadilang. Ankwasha kand yom yivud mud kowish motak, kuland yakudia, ni kwisuk, chisu novang anch nikutwishap kusal midimu yiney. Ni yisu yivud alembilang nam pamwing. Amekesha kamu anch ad arund ni akadivar akin adia kwaku ‘mulong wa kukwash mu yirung yikash.’”​—Jnsw. 17:17. w22.01 16 par. 8-9

Yehova utusotidin yom yiwamp. (Jnsw. 4:20-22) Anch Yehova watuyul kusutin Dizu diend, mikand yimedina pa Bibil, ap kusutin mwin Kristu uswila, umekeshin anch utukatin. (Heb. 12:9, 10) Shinshikin pa chiyul, kadiap pa mutapu uchipaninau. Yisu yimwing tukutwish kuman anch chiyul kachipanangap mu mutapu uwamp. Chid chakin anch muntu upanina chiyul ufanyidin kusal usu wa kuchipan mu mutapu uwamp chakwel muntu achitiy swa. (Gal. 6:1) Pakwez anch yetwa kayudinau, chid cha usey kushinshikin pa uruu udia mu chiyul—ap anch tutongin anch ading afanyidin kuchipan mu mutapu uwamp. Tukutwish kwiyipul anch: ‘Ap anch nisangaredinap mutapu wanyulangau, ov, mwikilap uyakin ap ukemp wa chom kanang nikutwisha kwilejinamu? Ov, nikutwish kulik kushinshikin pa kurumbok kwa muntu wanyulang ni kusal usu wa kutaninamu mu chiyul chend?’ Chikwikal cha manangu ku mutambu wetu kukimb mutapu tukutwisha kutaninamu mu chiyul chin chawonsu chitwinkishinau. w22.02 12 par. 13-14

Yehova wij anch chitwitin chisu ni usu mulong wa kwipuk yitongijok ni yaku yiyimp. (Kus. 103:13, 14) Chawiy, kusutin Dizu diend, spiritu wend, ni dirijek diend, Yehova utwinkishin manangu, usu, ni ukwash tuswirikedina mulong wa kuswimp wuntu wetu. Sadin Bibil mulong wa kwishinshikin nawamp amwiney. Dizu dia Nzamb did mud dikalash; dikutwish kukukwash kushinshikin yitongijok yey, mazu mey, ni yisal yey. (Jak. 1:22-25) Ni Yehova ud kwaku mulong wa kukukwash. Ndiy muntu uwanyidina kukukwash, mulong wij chidia muchim wey. (Jnsw. 14:10; 15:11) Chawiy ikal ni chaku cha kumulembilang ni cha kwilej Dizu diend dichuku diawonsu. Ikal nich kashinsh anch mbil ja Yehova jid jiwamp nakash. Tukutwish kutaninamu mu chom chin chawonsu chitwitinay Yehova kusal. Antu ashicha kukwatijan ni mbil ja Nzamb ading antu ilimishina, akat kwikal ni mwom uwamp, ni musangar wakin.​—Kus. 19:8-11. w22.03 4 par. 8-10

Tukat kumwifukwil Yehova chisu tukata kutung ni kurijek jindond ja difukwil. Bibil ulondin anch mudimu wa kutung dizang ni yom yadingamu wading mudimu utumbila. (Kub. 36:1, 4) Nlel kand, Yehova umening mudimu wa kutung Yot ya Want ni yikumbu yikwau yikwashina mudimu wa Want mud mudimu utumbila. Akadivar ni anambaz amwing akat kusutish chisu chivud mulong wa kwipan mu mijikit yiney. Tukat kuyijikitish nakash mulong wa kwipan kwau mu mudimu wa Want. Chakin kamu, akat kwipanang kand mu mudimu wa kulejan. Amwing pakach pau akutwish kand kusal mud ayibol. Amakurump a chikumangen akutwish kumekesh anch akatin kukwash midimu ya kutung kusutin kuyikwash amakundj ni amband inay asadina mudimu ukash kwikal ayibol anch awanyish yitinau. Twikal ni ukaliweny wa kutung ap bwat, etu awonsu tukutwish kwipan mu kurijik ni kulam nawamp yikumbu yiney. w22.03 22 par. 11-12