Ngond wa 1

Yom ik yasala anch Yehova amusadin Timote nakash mud kashalapol wend? Yid mikadil yiwamp ya win Kristu yakudishay. (Fil. 2:19-22) Kusutin yom yalonday kambuy Paul, tukutwish kuman anch Timote wading muntu wikepishina, ushinshamena, ukweta mushiku, ni wa kuchingejin. Wading uyibangidin nakash akadivar nend. Mud chibudikin, Paul wamukata Timote, ni kidjidjekap kumwinkish yisend yikash. Chisik chimwing, tukutwish kumekesh kud Yehova anch tukatin atusadin nakash ni kukwash nakash chikumangen anch twakudish mikadil yikatinay. (Kus. 25:9; 138:6) Chawiy shinshikin mu malembil yom ukatina kuwapish mu wuntu wey. Tond mwikadil ukatina kukudish. Ov, ukutwish kukudish nakash ranaken? Ov, ukatin kwikal mwin kukasikesh? Chikwikal cha usey kumwipul murund ney wa piswimp chakwel akulej yom ufanyidina kuwapish.​—Jnsw. 27:6. w22.04 23 par. 4-5

Yehova ukatin anch twikal ni musangar. Twij mwamu mulong musangar ud chikunku cha dibuj dia spiritu utumbila. (Gal. 5:22) Mulong chiyukish cha mwin kupan chipandakenamu cha mwin kutambul, tukat kwov musangar nakash anch twipan mu mudimu wa win Kristu ni twayikwash akadivar netu mu mitapu kushalijan. (Mid. 20:35) Mud mulejenau mu mu mufund wa nlel, kambuy Paul wajimbula yom yaad yikutwisha kutukwash kudandamen kwikal ni musangar. Chakusambish, tufanyidin kumusadin Yehova yawonsu tukutwisha kukwatijan ni usu wetu. Tufanyidin kwov musangar anch twamusadin yawonsu tutwishina kukwatijan ni usu wetu. (Mat. 22:36-38) Cha kaad, tufanyidin kwipuk kwifanakesh nau antu akwau. Ap anch ukash wetu wa mujimbu, kufumb twatambula, ap ukaliweny wa chivadik tukweta yitukwashin kusal yom yivud, tufanyidin kumujikitish Yehova. Ku mutambu ukwau, anch antu akwau asadin yom yivud mu mudimu kampand kutusutamu etu, tufanyidin kusangar pa kuyiman akat kusadin ukaliweny wau mulong wa kumushiman Yehova. w22.04 10 par. 1-2

Disudien dia Babilon Mujim dikushik kwa chikashimwish, ni chikuyishimokish nakash antu adia pa mangand. (Kuj. 18:8-10) Kusheshik kwa Babilon Mujim kukunyikesh mangand ni kuletish mar nakash, pakwez atushalapol a Nzamb akwikal ni mayingishin majim maad ma kusanger. Mukankuny winou wa Yehova wasadina kal chisu chilemp akumushesh chikupu, ni kukwolik kwetu mu mangand minam mayimp kukwikal piswimp nakash! Daniel wasambela kulond anch ‘ronganyin rakin’ rikez ‘kuvulijan.’ Ni mwawiy chidia! Nlel tuteshin nawamp mauprofet mavud nakash matadina chirung tushicha. (Dan. 12:4, 9, 10) Kashinsh ka mauprofet minam katubachikin kumulimish nakash Yehova ni Dizu diend diapepilay. (Isay 46:10; 55:11) Chawiy dandamen kukasikesh ritiy rey kusutin kwilej Bibil nich mushiku ni kuyikwash antu akwau kukudish urund ni Yehova mu mutapu witiyinay. Ukuyipandish antu awonsu amuchingejidina nich muchim wawonsu, ni ukuyinkish “chisambu chiwanyidina” chikushakama chikupu.​—Isay 26:3. w22.07 6-7 par. 16-17

Buku wa Kujingunik umekeshin anch Want wa Nzamb wasambishin kal kuyikel ni Satan amopatin kal mwiur. (Kuj. 12:1-9) Chisal chinech chaletisha chisambu kud adia mwiur, pakwez chatuletina etu mar. Mulong wak? Mulong Satan upwishidin ujim wend pad antu amusadidina Yehova nich kushinshaman pa Divu. (Kuj. 12:12, 15, 17) Mutapu ik tukutwisha kulam kushishaman kwetu chikalap nchik kurishikish kwa Satan? (Kuj. 13:10) Yom yikutwisha kutukwash kud kwijik yom yituchingedina kurutu kwa machuku. Chilakej, mu buku wa Kujingunik, kambuy Yohan ulejen yiyukish yimwing yituchingedina piswimp ap. Pakach pa yiyukish yiney pakwikal kushesh akankuny awonsu a Nzamb. Mu shapitre ni verse wa kusambish, Kujingunik utulejin anch yom tukutanga ayilejen ‘kusutin yijingidij,’ charumburik anch kulond kwa chifanikesh.​—Kuj. 1:1. w22.05 8 par. 1-3

Kushinshaman kwa atushalapol a Yehova kukulangwish ujim kud akankuny a Yehova. Mud chibudikin, michid yikubombakan mulong wa kuyirishikish atushalapol a Nzamb pa divu diawonsu. Kurishikish kwinoku akujimbwil mu mazu ma uprofet anch kurishikish kwa Gog wa Magog. (Ezek. 38:14, 15) Mutapu ik ukusalay Yehova pantaliken ni kurishikish kwinoku kwa chisum kwa Gog wa Magog? Utulejin anch: “Nikez kumujimen.” (Ezek. 38:18, 21-23) Kujingunik shapitre wa 19 ulejen yom yikusadika kupwa kwa yiney. Yehova ukumutum Mwanend mulong wa kuyiking atushalapol End ni kuyishesh akankuny nend. Yesu pamwing ni “amasalay a mwiur,”​—charumburik anch angel ashinshamena pamwing ni antu 144,000. (Kuj. 17:14; 19:11-15) Yibudikin ik yikwikalaku kwi njit jinej? Akushesh chikupu antu ni yitenchik yawonsu yimubwambwidina Yehova!​—Kuj. 19:19-21. w22.05 17 par. 9-10

Chisu chikemp kupwa kwa Adam ni Ev kusal chitil, Yehova wayinkisha anau ruchingej kusutin uprofet wa usey nakash. Yom yalonday ayifundin mu Disambishil 3:15: “Am nikez kutek rukuny pakach pey ni mband, ni pakach pa mbut yey ni mbut ya mband. Ndiy ukez kukuchany ku mutu wey, niyey ukez kumusum ku kapolantundu kend.” Uprofet winou ud mu buku wa kusambish wa Bibil. Pakwez mabuku makwau mashala kal ma Bibil misambidin nimawiy uprofet winou mu mulad kampand ap kanang. Mud mutapu ukata chibur kubomb pamwing mapaj mawonsu madia mu buku, mazu madia mu Disambishil 3:15 mabombin uruu udia mu mabuku mawonsu ma Bibil mu uruu umwing ulondina anch, Nzamb ukutum Mupandish ukumushesha Djabul ni antu awonsu ayimp amulondwila. Chikwikal chiyukish mud ik kud awonsu amukatina Yehova! Kwilej Bibil kukutukwash kuman mutapu uwanyidina uprofet ni mutapu tukutwisha kutaninamu. w22.07 14 par. 1-3

Mwitany Yehova chakwel akwinkishany manangu ukwetanya nich kuswir mulong wa kuyikwash anen kumukat Nzamb. (Jak. 1:5) Ndiy Muntu uwanyidina kukwinkishany en yiyul. El tushinshikina yom yaad ey. Chakusambish, Yehova ukwet ronganyin nakash mud nvaj. (Kus. 36:9) Ni chad kaad, yiyul ya manangu yikatay kupan yiletining chisu chawonsu yiyukish. (Isay 48:17) Kusutil Dizu diend ni dirijek diend, Yehova utwinkishin yakudia yivud nakash ya mu spiritu yikutwisha kuyikwash anvaj kuyilil anau chakwel amukata Yehova. (Mat. 24:45) Chilakej, ukutwishany kutan yiyul yiwamp nakash mu mitu ya milong yilondina anch “Ukwash Mulong wa Majuku,” yabudishangau mu gazet Lankany! wa Français, kudiosh mivu yivud ni katat yid chad pa kapend ketu ka web. Chikwau kand, mavideo mavud mukatau kuyipul antu ni makata kurumburil yom yashikena madia pa jw.org, makutwish kuyikwash anvaj kusadin yiyul ya Yehova chisu chiyilidinau anau.​—Jnsw. 2:4, 5. w22.05 27 par. 4-5

Yehova ud chakin kamu Mwin Kulikishin mujim nakash mu mangand ma kabuj. Chakusambish, uswakeling kulikishin. Cha kaad, utwij nawamp kudiosh ku risuk djat ku rizal. Wij yom yin yawonsu piur petu, ni ndiy ukweta mutapu wa kuman anch tukarumukin kamu chakin. Ni cha kasatu, anch Yehova watulikishin, ukat kujimwangesh yitil yetu ni kutuman mud mwatumanangay kurutu tusal chitil. Chinech chikat kutukwash kwikal ni kom kishitwila ni kusanger dilau diend. Chakin kamu, mulong tud antu akad kuwanyin, tukudandamen kusal yitil. Pakwez chikalap nchik mwamu, tukutwish kutan rongoj mu mazu madia mu buku Étude perspicace des Écritures, Volim 2, paj 765, malondina anch: “Mulong wa ranaken rend, Yehova wij nawamp kuziy kwa mujimbu wa mbij kwa atushalapol end. (Kus. 103:8-14, 130:3) Anch adandamen kwendin mwi, njil ya Nzamb nich kom kau kawonsu, akwet mayingish ma kwov musangar. (Fil. 4:4-6; 1 Yoh. 3:19-22).” w22.06 7 par. 18-19

Wom wa rupompat ra maguvernema wawiyap kusu mupit umwing ukatay kusadin Satan. Antu amwing akat kwovang wom nakash piur pa yom yikutwishau kusal antu a mu dijuku anch ajingunin anch ikalang kal Atuman a Yehova. Ni wom winou uding ukash kusutamu wom ukutwishau kov piur pa yibul ap piur pa kuyisadin mu mutapu uyimp. Ayikatin nakash anamakwau, ni akatin anch niyau ashiken ku kumwijik ni kumukat Yehova. Chiyovishining nayimp nakash kuyitesh anamakwau akat kumulond Nzamb wakin nayimp ni atushalapol end. Pakwez, yisu yimwing antu a mu majuku ayipompatang anamakwau ading Atuman ashikena niyau kwikal atuman mu kusut kwa machuku. Chawiy, tong bil mud anch anamakwetu a mu dijuku atulik mulong wa yitiyij yetu yisu. Mutapu ik ukusala? Tukutwish kutan rongoj mu uyakin uwamp nakash kupandakan udia mu Kuseng 27:10. Anch twavurik kusu mutapu utukatinau nakash kud Yehova, tukwiyov anch tud mu diking chisu turishina ni rupompat. Ni tukwikal nich kashinsh anch ukutufut mulong wa kujijaman kwetu. Yehova ukutuwanyishin nawamp nakash maswir metu ma ku mujimbu, ma mu manangu, ni ma mu spiritu, kusutamu mutapu ukutwishay kusal mwan a muntu! w22.06 16-17 par. 11-13

Mu mudimu wend panap pansh, Yesu amudimbena makasu anch wading ikundj upumbila kudia ni kuna, anch wading kashalapol wa Djabul, mwin kujip chijil cha Sabat, ni mwin kumusaal Nzamb. (Mat. 11:19; 26:65; Luka 11:15; Yoh. 9:16) Pakwez, Yesu kakulap nich ujim. Mud Yesu, anch antu atulond mu mutapu uyimp, tufanyidinap kwakul niyetu mu mutapu uyimp. (1 Pita 2:22, 23) Pakwez, chid chakin anch chiswapelap kwilam mu mutapu winou. (Jak. 3:2) Yom ik yikutwisha kutukwash? Sal usu wa kulik kwimen pa yom yiyimp yilondinay mwin chikumbu. Mukadivar Sam ulondin anch: “Nikat kusal usu wa kushinshikin pa maswir makwetay mwin chikumbu ma kutesh uyakin ni kukarumuk mu mwom wend.” Yisu yimwing mwin chikumbu ukutwish kujiman kwend mulong twamwendin kal pa chisu chiyimp. Anch twatanijan ni muntu ujimena, tukutwish kusal malembil miswimp mu muchim, ni kumwit Yehova chakwel atukwash kulam ujim wetu ni kulik kulond mu mutapu uyimp wakad kalimish. w22.04 6 par. 8-9

Mutapu wa usey ukutwishau anvaj kuyikwash anau kumusejin Yehova piswimp ud kusutin kwilej nau Bibil. (2 Tim. 3:14-17) Pakwez Bibil ulejen kand mutapu ukwau ukutwishau an kwilej piur pa Yehova. Mu buku wa Jinswir isambidinamu tatuku umuvurishina mwanend kudandamen kushinshikin mikadil ya Yehova yimekena mu yitang. (Jnsw. 3:19-21) Anvaj, chakin kamu ukatiningan kuya mu kwendangan pamwing ni anen mulong wa kwipuwangej. Sadinany chisu chinech mulong wa kuyikwash anen kuman kukwatijan kudia pakach pa “yom yatangay” Nzamb ni mikadil yend. (Rom 1:20) Tal mutapu wasadinay Yesu yitang mulong wa kufundish. Dichuku dimwing, Yesu wayileja in kwilejend kutal ankwaj ni yisalamb ya mu masuku. (Luka 12:24, 27-30) Wayifundisha in kwilejend dilejan dia usey nakash piur pa mutapu utubangidiningay Yehova ni udingay mwin kupan: Yehova ukuyidish ni kuyidjik atushalapol end ashinshamena mud mutapu ukatay kuyidish ankwaj ni kuyidjik yisalamb ya mu masuku. w23.03 20-21 par. 1-4

Tukat kumujikitish Yehova mulong tukutwish kumulembil kusutin Mwanend. Yehova ukat kumusadin Yesu mulong wa kutuwanyishin yom tukata kumwit. Yehova ukat kutesh ni kwakul malembil tukata kusal mu dijin dia Yesu ni ukat kutulikishin yitil yetu kusutin dishin dia yakupesh ya Yesu. (Rom 5:1) Mifund yimurumburil Yesu mud “mwin kupesh mujim . . . ushicha ku chikas cha katatuku cha ditand dia Mwin Dikand Diawonsu dia mwiur.” (Heb. 8:1) Yesu ud “mwin kutulondilap . . . udia piswimp nend Tatuku.” (1 Yoh. 2:1) Tumujikitishin Yehova mud ik pa kutwinkish Mwin Kupesh Mujim ukweta riy wija nawamp mimbu yetu ni ukata ‘kutwitin kud Nzamb’! (Rom 8:34; Heb. 4:15) Chakupesh cha Yesu chawiy chisadina anch tutwish kumusejin Yehova mu malembil. Chakin kamu, tukutwishap kwimik kumujikitish nakash Yehova mulong wa chipan cha usey nakash chatwinkishay​—chipan cha Mwanend mukatish! w22.07 23 par. 10-12

Muntu wa kuchingejin usadining usu wa kulond uyakin ni wa kuwanyish kushilamu kwend. (Kus. 15:4) Uding muntu wijikena kud antu akwau anch akutwish kumuchingejin. Tukatin anch akadivar ni anambaz netu iyova mwamu piur petu. Tukutwishap kuyishindin antu akwau kutuchingejin. Pakwez, tufanyidin kumekesh kusutin yisal yetu anch akutwish kutuchingejin. Alondining anch kwikal muntu uchingejidinau kud mud kwikal ni nfalang. Kujikal nich kukasiken nakash; pakwez kujishadish kuswapel. Chakin kamu, Yehova wamekeshin kal anch tufanyidin kumuchingejin. “Yisalijok yend yawonsu yidi ya kashinsh.” (Kus. 33:4) Utuchingejidin anch tumwimburij. (Efes 5:1) Musangar ni kujikitish mud ik tukweta mulong Yehova watupwitidin kal mu dijuku dia antu akweta rukat ni akuchingejin! Muntu ni muntu ukwet chisend cha kumekesh anch ud wa kuchingejin kud akadivar ni anambaz. Anch umwing ni umwing pakampwil wasal usu wa kumekesh rukat, kwikepish, ukaliweny wa kujingunin, win kashinsh, ni kwilam, tukukasikesh mwikadil wa kuchingejijadin mu chikumangen. El tumwimburijany Nzamb wetu Yehova, ni kudandamen kumekesh anch tud antu a kuchingejin. w22.09 8 par. 1-2; 13 par. 17

Ap anch tud mu dijuku dijim dia akadivar nau anambaz, tukutwish kwiyov yisu yimwing anch tud ayinetu ni kwikal ni runeng rikash ni kutong anch tukurish ni yovil yiney dia ayinetu. Yehova kakatinap anch twiyov mutapu winou. Tal mutapu wamukwashay Elija. Yehova Wamukasikesha Elija kulond. Wamwipula tupamp twaad anch: “Ov, Elija, usadil yom ik kunoku?” (1 Ant. 19:9, 13) Kapamp kawonsu kamwipulay, Yehova wamutesha Elija chisu chading chimufungwidinay muchim wend. Wamwinkisha kand Elija kashinsh anch wading ukwet ambay nend avud. (1 Ant 19:11, 12, 18) Pakad kwidjidjek, Elija wiyova pee kupwa kwa kumufungwil Yehova muchim wend ni kuman mutapu wamwakulau. Yehova wamwinkisha Elija yisend yivud. Wamuleja kumuzizil Hazayel many mud mwant wa in Siria, Jehu mud mwant wa Isarel, ni Elisha mud muprofet. (1 Ant 19:15, 16) Kusutin kumwinkish Elisha yisend yiney, Yehova wamukwasha kushinshikin pa yom yiwamp. Nzamb wamwinkisha kand murund muwamp wa piswimp, Elisha. w22.08 8 par. 3; 9 par. 5

Ov, chikumangen chen chatungin kal ap kurijek Chot cha Want? Anch mwawiy, chid chakin anch uvurikin kapamp key ka kusambish wakumangena mu Chot chisu. Wamekesha kujikitish nakash kudiay Yehova. Pakwez, pamwing ap yovil ya musangar yakupandakena ni chinech chasala anch chikukasiken kuwang muminy wa nsambishin. Yot yetu ya Want yitunginau nawamp yikat kumushiman Yehova. Pakwez tukat kumushiman kand chipandakena anch twipan mu mulad ukwau wa mudimu wa kutung. Mulad winou wa kutung urumburikin kusal chom cha usey nakash kusutamu kutung chikumbu. Urumburikin kutung antu akata kwez ku jindond jinej ja difukwil. Kambuy Paul wasadina dizu dikutwisha kand kurumburik anch “kutung” mulong wa kwisambin chitongijok cha kukasikeshijan amwing ni akwau, mud mulejenau mu verse wa mufund wa nlel. Kambuy Paul ud chilakej chiwamp nakash cha muntu wading wija mutapu wa kuyikasikesh ambay nend in Kristu. Wading kwitek pa ndond ya antu akwau. Tukutwish kumwimburij mu kuyikasikesh akadivar nau anambaz netu nlel.​—1 Kor. 11:1. w22.08 20 par. 1-2

Mwin Kristu ukatina kwikal utentamina ku mes ma Nzamb ufanyidin kand kwikal mwin yakin mu milong yend ya kwisak. Muntu utentamina ukisining kuman muntu ukat kumusadin mukwau mu mutapu wakad kutentam. Ni ‘mulong wa kumusangarish [Yehova] chipandakena,’ muntu utentamina kamu chakin ukat kushinshikinang mutapu ukumanay Nzamb mipak yikwatinay. Bibil umujimbwil Yehova mud Musul wa kutentam. Chawiy chimutazukinau anch ‘ndond ya kutentam.’ (Jer. 50:7) Mulong ud Sakatang, Yehova ndiy kusu uwanyidina kutek mbil piur pa yom yitentamina ni yiyimp.Tukutwishap kamu kwijik nawamp yom yitentamina ni yakad kutentam mud mutapu wijay Yehova. (Jnsw. 14:12; Isay 55:8, 9) Pakwez, mulong atutanga mu chifu cha Nzamb, chikutwish kutuswapel kushakam kukwatijan ni yijil yend piur pa kutentam. (Dis. 1:27) Ni tukatin kusal mwamu. Rukat retu mulong wa Tatukwetu ritubachikin kumwimburij mu chilik tukutwisha kusal mwamu.​—Efes 5:1. w22.08 27 par. 5-6

Chisu twazangena ap tuziyina mulong wa milong kanang, tukutwish kukimb mutapu wa kupwish milong yetu. Chiyipinap kwau kusal mwamu, pakwez tufanyidin kubabal chakwel kangal twiyandjik mu kusal chom chikisinay Yehova. (Efes 5:10-12, 15, 16) Mu mukand wayifundinay in Kristu a ku Filip, kambuy Paul wayikasikesha in Kristu inay kudandamen kushinshikin pa “yom yitentamina, . . . yidia zwang, . . . yom yikatishena, [ni] yom ya ranaken.” (Fil. 4:8) Ap anch Paul kadingap kafundina yom yiney piur pa milong ya kwipuwangej, yom yafunday yikutwish kututakel chisu tutondina milad ya kwipuwangej. Pakish kusal chom chinech: Pa ndond yawonsu padia dizu “yom” mu verser, diswinkesha nich dizu “miminy,” “mafilim,” “mabuku,” ap “masengan ma video.” Kusal mwamu kukutwish kukukwash kuman yom yikatinay Nzamb ni yikisinay. Tusotin kushakam kukwatijan ni mbil ja piur ja Yehova.​—Kus. 119:1-3. w22.10 9 par. 11-12

Mu mwom yau kurutu afa, ‘antu akad kutentamu’ amwing asala yom yiyimp nakash. Akwikal ni kuswir kwa kwilej mutapu wa kushakam kukwatijan ni mbil jitentamina ja Yehova. Mulong wa kuyifundish mutapu wa kusal mwamu, Want wa Nzamb ukutakel mudimu ujim nakash wa kufundish wakad kal kusadikangap kudiosh kwayitanginau antu. Anany akuyifundisha antu akad kutentam inay? Ad antu a mu chisak chijim ni antu atentamina akuvumbulau. Chakwel afund majin ma antu akad kutentam mu mukand wa mwom, antu inay afanyidin kukudish urund wa piswimp ni Yehova ni kwipan kud ndiy. Yesu Kristu ni azizidilau many akushinshikin nawamp padiau mwiur mulong wa kuman mutapu ukwakulau antu akad kutentam ku yom yikuyifundishau. (Kuj. 20:4) Mwawonsu ukulika kwitiy ukwash winou akumujip​—ap anch ukwet mivu 100. (Isay 65:20) Yehova ni Yesu akutwish kuman yidia mu michim ni kakwitiyap ap pakemp muntu kushesh yom mwi ngand yisu.​—Isay 11:9; 60:18; 65:25. w22.09 17 par. 11-12.

Mu verse winou, dizu “in kutakel” disambidin piur pa anyikel a chikawuntu akweta ulabu ni ayiyikedila akwau. In Kristu afanyidin kuyiziyin antakel inay. Akat kupwish kanrumbangesh pakach pa antu, kwikal nich kashinsh anch antu alimishin yijil, ni yisu yimwing akat kuyilondin atushalapol a Yehova. (Kuj. 12:16) Chawiy chitukasikeshinau kuyilambul yitad, kuyov wom, ni kuyilimish. (Rom 13:7) Ap mwamu, maguvernema minam ma antu makwet ulabu mulong Yehova ndiy ulikidila anch yikal mwamu. Yesu wovikesha chom chinech patok pamwipulau kud Guverner wa Rom Pons Pilat. Pisambinay Pilat piur pa ulabu wading ukwetay wa kumupandish Yesu ap wa kupan mbil ja kumujip, Yesu wamuleja anch: “Ey kiukwetap ulabu wa kwinsal am chom, ulabu wey ching anch akwinkishau kudi Nzamb.” (Yoh. 19:11) Mud mutapu wachading piur pa Pilat, ulabu ukwetau antakel awonsu a chipolitik ukwet mimbu. w22.10 14 par. 6

Mwant David amupepila mulong wa kufund yom piur pa mutapu ukeza kikal mwom mu chisu chikusambishay kuyikel mwant ukweta manangu ni ushinshamena. ( Kus. 37:10, 11, 29) Yisu yivud tuyitangidining antu Kuseng 37:11 anch twisambidin piur pa Paradis ukweza kurutu oku. Tukwet mayingishin ma kusal mwamu mulong Yesu wisambina piur pa chom chinech mu Mafundish ma pa Mukandu, mwamekeshay anch yom yiney yikuwanyin kamu mu machuku ma kurutu. (Mat. 5:5) Pakwez mazu ma David mamekesha kand mutapu wafanyina kwikal mwom mu chirung cha Mwant Salomon. Chisu chadingay Salomon mwant mu Israel, antu a Nzamb asangera chisambu ni yom yivud yading yiswirikedinau mwi ngand “yizwila mayel ni woch.” Nzamb walonda anch: “Anch wez wendilany mu yijil yam . . . Nikez kulet chisambu mwi ngand, niyen ukez kulalany kwakad muntu ap kusu umwing kwez kukwakamishany.” (Lev. 20:24; 26:3, 6) Kushilamu kwinoku kwawanyina mu chirung cha winyikel wa Salomon. (1 Jsng. 22:9; 29:26-28) Komb mazu madia mu Kuseng 37:10, 11, 29 mawanyina pasak ni makuwanyin kand mu machuku ma kurutu. w22.12 10 par. 8

Pituda in Kristu akin, tufanyidin kulondul umutakel. Bibil upanin chiyul chinech cha usey: “Ukurish njit nich chiyul cha manangu. Ku kuvul kwa in yiyul kudi kupandakan.” (Jnsw. 24:6) Man mutapu ukata mbil jinej kutukwash kutwish mu mudimu wetu wa kulejan ni kufundish anch twajisadin. Pa ndond pa kusal mudimu wa kulejan mud mutusotina etu, tukat kusal usu wa kulondul yitongijok yikatau kutwinkish. Tukat kutambul umutakel wa manangu ku yikumangan ya win Kristu, kukatau in kuyulan akweta ukaliweny kusal ma diskur mimedina pa Bibil ni yakumenaku mulong wa kutufumb. Chikwau kand, dirijek dia Yehova dikat kutubudishin yamu yiwamp nakash​—mikand ni mavideo—​yikutwisha kuyikwash antu kutesh nawamp Bibil. Tujikitishin mud ik mulong wa yiyul yiwamp tutanina mu Dizu dia Nzamb! El tukwatany amboku mupak wa kudandamen kusal yom kukwatijan ni manangu matwinkishinau kud Yehova.​—Jnsw. 3:13-17. w22.10 23 par. 18-19

Mud mutapu tukata kukasikesh mujimbu anch twadia yakudia ni mujimbu wayitaat, tukat kwikal ni usu wa mu spiritu anch twilej Dizu dia Nzamb ni twatongijokin pa yom tutangina. Yehova ukatin anch ‘twikut’ Dizu diend, charumburik anch tudiova nawamp kurumburik. Tukutwish kusal mwamu kusutin kulembil, kutang, ni kutongijokin pa yom tutangina. Chakusambish, tukutwish kulembil mulong wa kurijek muchim wetu chakwel utambul malejan ma Nzamb. Kupwa, tukutwish kutang chikunku kampand cha Bibil. Dinsudien, tukutwish kwimikaku mulong wa kutongijokin chikurikina piur pa yom twatanga kal. Yom ik yikutwisha chad kushiken? Anch twatongijokin chikurikina, muchim wetu wa chifanakesh ukwizul ni Dizu dia Nzamb. Mulong wak chid cha usey kutang Bibil ni kutongijokin pa yom tutangina? Kusal mwamu kukat kutwinkish usu tukweta nich kuswir mulong wa kulejan uruu wa Want nlel unou, ni mulong wa kulejan uruu wa dirumburish udia mud mayal majim ma nvul mu machuku ma kurutu. Chikwau kand, anch twatongijokin pa mikadil yiwamp ya Nzamb, urund wetu ni ndiy ukwikal wa ukash nakash. w22.11 6-7 par. 16-17

Yesu wamekesha anch kadiap kwau ching kusu in kwilejend, pakwez kand antu akwau adia pol pa chikumangen akuyijingunin in kwilejend akin kusutin rukat rakin rikumekeshijadidinau amwing ni akwau. Rukat ridia pakach pa antu adia mu chikumangen cha win Kristu rid ra pakampwil nakash. Pakwez chid chakin anch Atuman a Yehova ad antu akad kuwanyin. (1 Yoh. 1:8) Chawiy, pitudandamedina kuyijik nawamp antu a mu chikumangen, chimeken anch tukujingunin kand kuziy kwau. (Rom 3:23) Cha ushon, antu amwing imika kumusadin Yehova mulong wa kurumbok kwa antu akwau. Mutapu ik rukat rikutwisha kutukwash kuyijingunin in kwilej akin a Yesu? Mutapu ik Yesu wayimekeshinay atwimbuy end rukat? Ni mutapu ik tukutwisha kwimburij chilakej cha Yesu nlel?’ Chid chiwamp kud Atuman a Yehova kutongijokin pa yakul ya yipul yiney. Kusal mwamu kukutukwash kumekesh nakash rukat, pakampwil anch muntu mukwau waturumbukin.​—Efes 5:2. w23.03 26-27 par. 2-4

Patuyila kushik kwinsudiel kwa mangand minam, tukutwish kuchingej anch tukurish ni yikokujol yidiokila mukach mwa chikumangen. Yikokujol yiney yikutwish kupak kushinshaman kwetu kudiay Yehova. Chawiy tufanyidin kwilam ayinetu. Anch wiyov anch mbay ney mwin Kristu wakusadin kal nayimp, kangal walam rukuny. Anch akupup, kangal kushinshikin nakash pa kusansan wovila, itiy yiyul, ni swimp. Ni anch dirijek dia Yehova diaswimp yom yimwing yikweta chibachikin pad ey pakampwil, itiy nich muchim wawonsu kuswimp kwinoku ni ziyin umutakel. Ukutwish kumuchingejin Yehova ni dirijek diend chisu chipakinau kushinshaman kwey. ufanyidin kwilam, charumburik anch kwitudish, kutong nawamp, ni kuman yom mud muyimenay Yehova. Mwita Yehova ukwash mu malembil. Ni kangal wiyauril ap dichuku dimwing ni chikumangen. Mwamu, chikalap nchik yom yikutwisha kushiken, Satan kakutwishap kukwauril ni Yehova ni dirijek Diend.​—Jak. 4:7. w22.11 24-25 par. 14-16

Amakurump, yikwashany akadivar nen kwirijek kurutu kwa yinship yikash kushiken. Akwet kashinsh anch antu awonsu a mu chikumangen ij yom yifanyidinau kusal mulong wa kwichidij ap mulong wa kuyijikish amakurump. Yom ik ya pakampwil ufanyina kusal? Anch yinship yikash yashiken piswimp ni ndond ushicha, yipula amakurump mutapu ukutwisha kukwash. Pamwing ap ukutwish kwipan mulong wa kuyak antu ashila yikumbu yau ap ipanina mulong wa kukwash ku yinship yasadikina chakwel ashakama kwol kwey mu chisu kanang. Ukutwish kand kupan yakudia ni kuyikwash akadivar adia mu maswir. Ap anch yinship yikash yasadikin kulemp ni ndond ushicha, ukutwisha kand kukwash. Mutapu ik? Kusutin kulembil mulong wa antu adia kwi ndond yiniya. (2 Kor. 1:8-11) Ukutwish kand kunung chikas ku mudimu wa kupan ukwash kusutin kupan yipan mulong wa kukwash nich mudimu wa pa mangand mawonsu. (2 Kor. 8:2-5) Anch ukwet mutapu wa kuya kukwash kwi ndond kwashikedina yinship yikash, yipula amakurump akuleja mutapu ukutwisha kukwash. Anch akulej kusal mwamu, akutwish kukufumb chakwel akusadin kwi ndond ni pa chisu chikuswirikedinau nakash. w22.12 24 par. 8; 25 par. 11-12

Mu dikarumun dikwau dia Bibil verse winou wa nlel amukarumwin anch: “Kwikil choziu urishina nich chakadingau antu akwau kurish nich.” Mazu minam amafunda mulong wa amakundj nau amband in Kristu ading ashicha mu Korint. Kurutu ikal in Kristu amwing pakach pau ading in masandj, in utun ni in kuleu maar. (1 Kor. 6:9-11) Ov utongin anch kupwa kwa kuyibatish, maku minama mayimp mayichirikinap ap pakemp mu manangu? Tukutwishap kulond mwamu. Chid chakin anch awonsu ading in Kristu azizidilau many, pakwez ading achid kwau antu akad kuwanyin. Chawiy pakad kwidjidjek, arishang ni maku mayimp chisu ni chisu. Chinech chifanyidin kutukasikesh niyetu. Mulong wak? Mulong rusangu riner rimekeshin anch chikalap nchik maku mayimp urishina nich, kud kand muntu mukwau niyend wading umarishina nich pakwez watwisha kumajijamen. Bibil ulondin anch “imanany daang mu ritiy, .  .  . ijikany anch anamakwen in Kristu apalangena mu mangand akat kuman kand niyau mar ma mutapu umwing.”​—1 Pita 5:9. w23.01 12 par. 15

Yesu wamwita Yehova chakwel ayichidij in kwilejend. (Yoh. 17:11) Mulong wak kwijik uyakin winou kukat kutwinkish kutakaman? Mulong Yehova ukwet usu nakash kuyisutamu akankuny netu awonsu. (1 Yoh. 4:4) Yehova umen yom yawonsu. Tukwet kashinsh anch ang twamuchingejin Yehova, ukutukwash kupandakan wom ni kwikal atakamena. Ov, yisu yimwing ukat kwovang usany wa kwiyijikish anch ud Kaman wa Yehova? Ov, wijdjidjekin kwikal mwin kulejan ap kutambul dibatish mulong wiyakamishin piur pa yom yikutwishau antu akwau kutong piur pey? Kangal walik yovil yiney yikukangesh kusal yom wija anch yid yiwamp. Mulembila Yehova nich muchim wey wawonsu. Mwita chakwel akwink kutakaman kwa kusal rusot rend. Paukumana mutapu Yehova wakwilay malembil mey, ukwikal nich kutakaman ni usu nakash.​—Isay 41:10, 13. w23.01 29 par. 12; 30 par. 14

Yesu wayipula kand Afaris anch “Ov, en kand kal utanganyap?” mulong wa kumekesh anch ading ni chitongijok chiyimp piur pa Mifund. (Mat. 12:1-7) Pa chisu chinacha, Afaris alonda anch in kwilej a Yesu kadingap kalimishina chijil cha Sabat. Yesu wayakula kusutil kujimbul yilakej yaad yidia mu Mifund, ni wajimbula verse udia mu Ozey mulong wa kumekesh anch Afaris ading ashadishin kal chitongijok cha Sabat ni kadingap ni riy. Mulong wak yom yatangangau antu inay mu Dizu dia Nzamb yayiswimpap? Mulong katangangap ni chitongijok chiwamp ni ading in kwitutul. Mwikadil wau wayikangesha kwov kurumburik kwa yom yading yitanginau. (Mat. 23:23; Yoh. 5:39, 40) Tal kand Mateu 19:4-6, mwayipulau Afaris chipul chawiy chimwing kud Yesu anch: “Ov, kand kal utanganyap?” Ap anch ading atangin kal rusangu rilejena mutapu watangay Nzamb yom, akanganya kujingunin yom yifundishina Dizu dia Nzamb piur pa uruw. Mazu ma Yesu matufundishin anch tufanyidin kwilej Dizu dia Nzamb nich chitongijok chiwamp. Tufanyidinap kwikal mud Afaris, pakwez tufanyidin kwikal in kashinsh ni kwitiy kutufundish. w23.02 12 par. 12-13

Mu Chijil chayinkishau in Isarel kud Yehova mwading mbil jading jikwashina kwipuk ma aksidan makash ku chikumbu ni ku mudimu. (Kub. 21:28, 29; Kuv. 22:8) Kwading yibudikin yiyimp anch muntu wamujip mukwau pakad kutongin. (Kuv. 19:4, 5) Chijil chading chilejen kumupup ap muntu ukumusala mwan uchidia kal mwinvum uyimp pakad kutongin. (Kub. 21:22, 23) Mifund yimekeshin patok anch Yehova ukatin tusal usu wa kwipuk ma aksidan. Tukat kumekesh anch tukwatin nich usey mwom, chipan chatwinkishay Nzamb, kusutil kusal usu wa kwipuk ma aksidan ku chikumbu ni ku mudimu. Chilakej, anch twadjubul yom ya yit, ya ulemb, ap mwon, tufanyidin kwikal nich kashinsh anch tuyitekinap antu akwau mu ubaj, ni anch anikanch kakutwishap kuyiman. Tukat kubabal chisu tusadidina kasu, mem maswan, yom ya kasu ka nzembu, ni kwipuk kuya kulemp patusadina yom yiney. Tufanyidinap kwendish motak anch twanang kal maar, anch tunil mwon utulewishina ap utuziyishina, ap kand anch twovil tul, ap kand tufanyidin kwipuk kusadin telefon pa twendishina. w23.02 21-22 par. 7-9

Yehova ud Mulej ushimpishininga muchim, muwamp, ni ukat kwitek pa ndond ya in kwilejend. Ukat kukimb uwamp udia mudiau in kwilejend. (Kus. 130:3) Ni kakatap kutwit kusal yom yitusutina chipim. Vurik anch ndiy watanga wong wey, chipan chimwing chikwamushena. (Kus. 139:14) Sakatang wetu ukatin anch tudandamen kwilej chikupu​—ni kusanger kusal mwamu. Chawiy chid cha manangu kukudish “impu yikash” ya kwilej uyakin wa Bibil katat. (1 Pita 2:2) Itekina mipak ukutwisha kuwanyish, ni limish program wey wa kutang ni kwilej Bibil. (Jos. 1:8) Kusutil ukwash wa Yehova, ukukudish musangar wa kutang ni kwilej nakash piur pend. Chitinap kwau kwimen pa kwikal ni ronganyin. Ronganyin rikwikal ra usey ching anch rakukwash kwilej piur pa Yehova ni kukudish mikadil mud rukat ni ritiy mudiay ndiy. (1 Kor. 8:1-3) Piudandamedina kwilej, dandamen kumwit Yehova chakwel akukwash kwikal ni ritiy rikash. (Luka 17:5) Ukatining nakash kwakul malembil ma mutapu winou. w23.03 10 par. 11, 13

In kwilej a Yesu kadingap kafanyidina kuvung makas pading pachingedinau disudiel dia mangand. Yesu wayinkisha mudimu wa kusal. Wayileja kulejan rusangu ruwamp “mu Yerusalem, ni mu Yudeya mwawonsu, ni mu Samaria, djat ni kusudiedila mangand.” (Mid. 1: 6-8) Wading mudimu ujim nakash wayinkishau in kwilej a Yesu! Asadina nawamp chisu chau mu kwipan nakash mu mudimu winou. ‘Yishiken yakad kutongin’ yikutwish kumushiken muntu mwawonsu pakach petu. (Mul. 9:11) Tukutwish kufa pakad kutongin. Tukutwish kusadin nawamp chisu chetu kusutil kusal rusot ra Yehova ni kukasikesh urund wetu ni ndiy. (Yoh. 14:21) Tufanyidin ‘kwikasikesh, kwiman dang mu ritiy, ni kusal nich mushiku midimu ya Nsalejetu.’ (1 Kor. 15:58) Mwamu anch disudiel diashik​—dikala disudiel dia mwom wetu ap dia mangand minam mayimp—​tukwinanap piur pa mutapu twasadina chisu chetu.​—Mat. 24:13; Rom 14:8. w23.02 18 par. 12-14