Ngond wa 2

Mufund wa nlel urumburik ik? Kukwatijan ni mutapu warumburilay Yesu, chinech chirumburikin kumukat muntu mukwau kusutamu ayinetu—rukat rikutwisha kumubachik mwin Kristu kufa mulong wa mukwau anch chitin kusal mwamu. Dizu dia Nzamb ditufundishin anch rukat ud mwikadil wa usey nakash. Chilakej, antu avud akatining maverse ma Bibil malondwilaku am: “Nzamb udi rukat.” (1 Yoh. 4:8) “Mukata mukwen mudi muwikatila ey amwiney.” (Mat. 22:39) ‘Rukat rikat kubwik miril ya yitil.’ (1 Pita 4:8) “Rukat rushiching chikupu.” (1 Kor. 13:8) Maverse minam ni makwau kand mamekeshin patok anch chid cha usey nakash kukudish mwikadil winou uwamp nakash ni kuumekesh. Rukat rakin ridiokiling ching kud Yehova​—ching antu akweta spiritu wend ni ayukishinau kud ndiy awiy akutwisha kumekesh rukat rakin pakach pau. (1 Yoh. 4:7) Ov, tukutwish kand kwiyipul mulong wak Yesu walonda anch rukat rakin rawiy rikuyimekesha in kwilejend akin? Mud mwasambelay Yesu kulejan, antu avud ayijingunin kal in kwilejend akin kusutin rukat rakin rimekeshijadidiningau pakach pau. w23.03 27-28 par. 5-8

Ov,ukatin kwikal mwin kuyilikishin antu akwau nakash? Ufanyidin kusambish kwilej ni kutongijokin pa yilakej ya antu alejenau mu Bibil ayilikishina akwau kwa kwikatin, ni antu alika kusal mwamu. Shinshikin chilakej cha Yesu. Wayilikishina antu akwau kwa kwikatin. (Luka 7:47) Chikwau kand, kashinshikinap pa kurumbok kwau, pakwez pa yom yading yitwishinau kusal. Chinyim ni Afaris a pa chirung cha Yesu, awiy “ayidiwol[ang] antu akwau.” (Luka 18:9) Kupwa kwa kutongijokin pa yilakej yiney, iyipula anch: ‘Yom ik nikata kuman mudiay muntu mukwau? Mikadil ik yiwamp yikwetay nikatina kushinshikin?’ Anch chikukasikedin kumulikishin muntu, sal usu wa kufund mikadil yiwamp yikwetay. Kupwa iyipula anch: ‘Yesu umumen mutapu ik muntu winou? Ov, ndiy ukutwish kumulikishin?’ Anch twasal mwamu, tukutwish kuswimp yitongijok yetu. Kwinsambishin chikutwit kusal usu nakash mulong wa kumulikishin muntu waturumbukinang. Pakwez anch twadandamen kusal mwamu, mu kusut kwa chisu chikwikal chad chaku. w22.04 24 par. 6

Mu buku wa Kujingunik, akankuny a Nzamb ayirumburil mu chifanakesh kusutin annam a yidiany sambwad. Chilakej, kud “nnam wa chidiany ubudikin[a] mu karung.” Ukwet “misengu dikum ni mitu sambwad.” (Kuj. 13:1) Kupwa pambakedin “nnam mukwau wa chidiany ubudikin[a] mu divu.” Nnam winou ukat kulond mud iyazangomb ni “washirisha kasu kudiokal mwiur.” (Kuj. 13:11-13) Kupwa tumen nnam mukwau, ‘nnam wa chidiany musuz,’ pashichay mband wa kusochik. Annam ayidiany asatu inay amekeshin akankuny amurishikisha Yehova Nzamb ni Want wend mu chisu chilemp. Chawiy, chid cha usey kuyijingunin anch ad anany. (Kuj. 17:1, 3) Tufanyidin bil kwijik chirumburikina mazu minam ma chifanikesh. Mutapu uwamp wa kwov kurumburik kwa mazu minam ud wa kulikidil Bibil aturumburil amwinend. Yijingidij yivud yidia mu buku wa Kujingunik ayirumburil kal mu mabuku makwau ma Bibil. w22.05 8-9 par. 3-4

Amwing pakach petu kakutwishap kusal yawonsu yikatinau kusal mu mudimu wa Yehova mulong wa upal ap mayej, ni chinech chikutwish kuyiziyish. Anch ukat kuziy yisu yimwing mulong utwishinap kusal yom kanang, iyipula anch: ‘Yom ik yingitinay Yehova kusal?’ Ukwitin anch usal yawonsu utwishina kusal kukwatijan ni mashakamin mey ma katat. Tongijokin bil pa chilakej ech: Nambaz ukweta mivu 80 ni kusut wiyovil kuziy mulong katwishinap kand kusal yom yivud mu mudimu wa Yehova mud mwasalangay padingay ni mivu 40 ni kusut. Ukat kutong anch chikalap nchik usu usadinay, chinech chimusangareshinap kwau Yehova. Pakwez, ov, mwawiy kamu muchidia? Tongijok bil. Anch padingay ni mivu 40 ni kusut wamusadina Yehova kukwatijan ni usu wend, ni udandamedin kusal yawonsu yitwishinay pawanyishay kal mivu 80 ni kusut, ov, umenap kwey anch kimikinap kumwinkish Yehova yom yend ya usey? Anch twasal yawonsu tukutwisha kukwatijan ni usu wetu, Yehova ukutwel anch: “Udi kashalapol muwamp!” (Ilakej ni Mateu 25:20-23.) Chikutwish kutuswapel kutan musangar anch twashinshikin pa yom tukutwisha kusal pa ndond pa kushinshikin pa yom tumena anch tukutwishap kuyisal. w22.04 10 par. 2; 11 par. 4-6

Kujingunik shapitre wa 21 ufanakeshin antu 144 000 nich musumb upandakena kuwap utazukinau anch “Yerusalem musu.” Musumb winou ukwet mufulandal ukweta mayal 12 pafundinau “majin ma atwimbuy dikum ni aad a Mwan a Mukoku.” (Kuj. 21:10-14; Efes 2:20) Kwikil musumb ukwau ufanakena ni musumb winou wa chifanakesh. Wading ni mukombil wa utad wa or wa zwang, yis 12 ya usang wa usey, mbumbu ni mifulandal yading ya mayal ma usey ukash, ni wading ni yilik yiwamp nakash ni yiwanyidina. (Kuj. 21:15-21) Pakwez, Yohan wamana anch kuburedin chom chimwing! Walonda anch: “Kinamanap Chikumbu cha Nzamb [tempel] mu musumb winou, mulong [Yehova] Nzamb Mwin Dikand Diawonsu ni Mwan a Mukoku awiy Chikumbu cha Nzamb cha musumb. Musumb kiukwetap kuswir kwa muten ap kwa ngond mulong wa kulet chimunyik, mulong uyaj wa Nzamb wawiy chimunyik chau, ni Mwan a Mukoku ndiy mwend wau wa kasu.” (Kuj. 21:22, 23) Antu afanakeshinau ni Yerusalem Musu akwikal pamwing ni Yehova.​—Heb. 7:27; Kuj. 22:3, 4. w22.05 17-18 par. 14-15

Ap anch Yehova ndiy Sakatang wetu, Mwin Kupan Yijil, ni Nkalansambu, ud kand Tatukwet wa rukat udia mwiur. (Kus. 100:3; Isay 33:22) Anch twasal chitil ku mes kwend ni twakarumuk kamu chakin, ukwet ulabu ni impu ya kutulikishin. (Kus. 86:5) Kusutin muprofet Isay, Yehova watwinkisha kashinsh kanak anch: “Yitil yen yasuzap nchik, yikez kikal yitok mudi mbundu.” (Isay 1:18) Mulong tud antu akad kuwanyin, etu awonsu tukat kulond ni kusal yom yikata kuyisal antu akwau nayimp. (Jak. 3:2) Pakwez, chinech chirumburikinap anch tukutwishap kwikal mu urund uwamp nau antu akwau. Tukutwish anch twilej kulikishin. (Jnsw. 17:9; 19:11; Mat. 18:21, 22) Anch twarumbukijadin mu tuyom tukemp, Yehova ukatin anch tulikishijadin. Tukwet mayingishin mawamp makusal mwamu. Diyingishin dia usey nakash did anch, Yehova ukat kutulikishinang “swa” kwa kwikatin.​—Isay 55:7. w22.06 8 par. 1-2

Ap anch tufanyidin kwipuk kwifanakesh ni antu akwau, pakwez tukutwish kutaninamu kusutin kwilejin ku yilakej ya atushalapol a Yehova ashinshamena. Mulong wa kwovakesh nawamp chitongijok, el tushinshikinany chilakej cha Yesu. Ap anch tudiap antu awanyidina mud mwadingay ndiy, tukutwish kwilejin ku mikadil yend yiwamp ni ku yom yiwamp yasalay. (1 Pita 2:21) Anch twasal usu wetu wawonsu mulong wa kwimburij chilakej chend, tukwikal atushalapol awamp a Yehova. Mu Dizu dia Nzamb mud yilakej yivud ya amakundj ni amband ashinshamena tufanyidina kwimburij, ap anch niyau ading kwau antu akad kuwanyin. Tongijokin piur pa Mwant David, watazukau kud Yehova anch “muntu . . . mudi mudia rusot ram.” (Mid. 13:22) Chakin, David wasala yitil yimwing yikash. Pakwez chikalap nchik mwamu, ud chilakej chiwamp kud etu. Mulong wak? Mulong kapakishap kwiyingish nich. Pakwez, witiya chiyul chamwinkishau ni wanenganana nakash mulong wa yom yiyimp yasalay. Mud chibudikin, Yehova wamulikishina.​—Kus. 51:3, 4, 10-12. w22.04 13 par. 11-12

Bibil utazukin rufu anch mukankuny. (1 Kor. 15:25, 26) Tukutwish kwov wom wa rufu, pakampwil anch muntu tukatina uyedin nakash. Mulong wak twovila wom wa rufu? Mulong Yehova watutanga nich impu ya kushakam chikupu. (Mul. 3:11) Kwikal ni wom wisikena piur pa rufu kukutwish kutukwash kuchidij mwom wetu. Wom winou ukutwish kutubachik kukwat mipak yiwamp piur pa yom tufanyidina kudia ni kutond masengan mawamp mulong wa kwijidish mujimbu, kukimb ukwash wa mwingang ni kuland mon anch chid cha usey, ni kwipuk yom yikutwisha kutek mwom wetu mu ubaj.. Satan wij anch tukatin mwom nakash. Chawiy, ulondin anch tukutwish kulikap yom yin yawonsu—ap urund tukweta ni Yehova—mulong wa kuchidij mwom tukweta katat. (Job 2:4, 5) Satan ud mukamakasu nakash! Pakwez, mulong “[ukwet] ukash wa kulet rufu,” Satan ukat kusadin wom wa chivadik tukweta piur pa rufu mulong wa kutubachik kumulik Yehova.​—Heb. 2:14, 15. w22.06 18 par. 15-16

Anch akangesh mudimu wetu, tukutwish kusambish kukumangan ni akadivar mu tuyisak tukemp tukemp. Chawiy chid cha usey kulam chisambu pakach petu kusambish katat. Utufanyidina kurishikish ud Satan kadiap etu ayinetu. Kangal washinshikin pa kurumbok kwa akadivar ney, anch kwalank kupwitamijan pakach pey ni mukadivar ney, ufanyidin kusal usu wa kupwish milong swa. (Jnsw. 19:11) Ikal uswapela kuyikwash antu akwau. (Tit. 3:14) Mutapu wamukwashau nambaz wading mu maswir wikala ni yibachikin yiwamp pa mudimu wa chisak. Antu a mu chisak ikala piswimp nakash mud antu a mu dijuku dimwing. (Kus. 133:1) Tunan ni tunan twa akadivar nau anambaz in Kristu akat kumusadin Yehova chikalap nchik kukangesh kwa mudimu wetu mu jingand jivud. Amwing pakach pau akat kuyikas mu jinkan mulong wa ritiy rau. Tukutwish kulembil mulong wa awiy, mulong wa majuku mau, ni mulong wa akadivar atekina mwom yau mu ubaj mulong wa kuyikwash akadivar nau anambaz inay nich yom ya mu spiritu, ya kumujimbu, ni kuyilondin ku dirumburish. (Kol. 4:3, 18) Kangal wapipej usey wa malembil mey!​—2 Tes. 3:1, 2; 1 Tim. 2:1, 2. w22.12 26-27 par. 15-16

An yisu yivud akat kuyimburij anvajau. Chakin kamu, kwikil nvaj ap umwing uwanyidina. (Rom 3:23) Ap mwamu, anvaj akweta manangu akat kusal usu wau wawonsu mulong wa kuyishil anau chilakej chiwamp. Tatuku umwing ulondin anch: “Ad mud ma shifon makata kupwit mem.” Uwejidinaku kand anch: “Akutwish kuman anch chilakej chetu chikwatijadinap ni yom tusadina usu wa kuyifundish.” Chawiy ang tukatin kamu anch anetu amukata Yehova, rukat retu mulong wa Nzamb rifanyidin kwikal rikash nakash ni rimekan kud antu awonsu. Kud mitapu yivud yikutwishau anvaj kusadin mulong wa kuyifundish anau kumukat Yehova. Andrew, mukadivar umwing ukweta mivu 17 ulondin anch: “Anvajam ankasikeshang nakash kwijik usey wa malembil. Urel wawonsu, Tatuku walembilang niyam, ap anch am amwinam nading nalembilang kal. . . . Nlel nikat kwiyov nawamp nakash kwambamb ni Yehova ni nikat kumuman kamu mud Tatuku mwin rukat.” Anvaj, kangal amboku wapipejany rukat ren ukwetanya mulong wa Yehova, mulong rikutwish kwikal ni yibudikin padiau anen. w22.05 28 par. 7-8

Mulong wa kwirijek kutambul dibatish, chom chimwing pakach pa yom yakusambish tufanyidina kusal kud kukarumuk chakin kamu ku yitil yetu. (Mid. 2:37, 38) Anch muntu wakarumuk kamu chakin, ukat kuswimp kand mwom wend. Ov, walikinap kal yaku yiyimp yikisinay Yehova, mud mwikadil wijondila, kuna ruwand, ap mazu mayimp ni ma masaal? (1 Kor. 6:9, 10; 2 Kor. 7:1; Efes 4:29) Dandamen kusal usu wa kuswimp. Isamba ni muntu wilejina nend Bibil ap yita amakurump a chikumangen chakwel akukwash ni kukulej yom ukutwisha kusal. Anch ud mwan uchidia ku chikumbu cha anvaj, dandamen kuyit anvajey ukwash chakwel utwish kulikap mikadil yawonsu yiyimp yikutwisha kukukangesh kutambul dibatish. Chid kand cha usey kwikal ni yaku yiwamp ya mu spiritu. Chinech chitin kukumangan ku yikumangan ya win Kristu ni kwakul. (Heb. 10:24, 25) Ni anch wasambish kulejan, ikal ni chaku cha kusal mwamu nich mushiku. w23.03 10-11 par. 14-16

Disambishil 3: 14, 15 ujimbwil “nnak,” ni ‘rubut’ ra nnak. Nnak wakinakin kafanyinap kwov yom yalonday Yehova mu chir cha Eden. Chawiy, chimeken anch Yehova wading urumburishin chitang chikweta manangu. Ov, chitang ik? Kujingunik 12:9 upatetwil nawamp. Ulejen anch “nnak mukur” wisambidinay ndiy Satan Djabul. Bibil ukat kusadin dizu ‘rubut’ mu mutapu wa chifanakesh mulong wa kumekesh antu akata kutong ni kusal yom mud ya tatukwau wa chifanakesh. Chawiy mwi mbut ja nnak mud angel antombwij ni antu akata kumubwambwil Yehova ni kuyirishikish antu End mud mukatay kusal Satan. Pakach pau pad angel asha jindond jau mwiur pa chirung cha Nowa, kuwejaku antu ayimp akweta mikadil mud ya tatukwau Djabul.​—Dis. 6:1, 2; Yoh. 8:44; 1 Yoh. 5:19; Jud 6. w22.07 14-15 par. 4-5

Kambuy Paul wading uyikatin akadivar nend nakash. Amwinend wamana mar nakash; chawiy chafanyina kumuswapel kumekesh ranaken ni kwitek pa ndond ya ambay nend in Kristu chisu chading chirishinau ni yikokujol yikash. Chisu chimwing, Paul waburena nfalang, ni chading chimwitin kwikal ni mudimu mulong wa kwikwash nich amwinend ni ambay nend. (Mid. 20:34) Wadinga mwin kutung minkand. Pashikay ku musumb wa Korint, chakusambish wasambisha kusal pamwing nenday Akila ni Prisil mudimu wa kutung minkand. Pakwez, “machuku mawonsu ma kwiswedish” ap anch sabat, wading kulejan rusangu ruwamp kud in Yuda ni in Grek. Kupwa pashikay Silas ni Timote, “Paul wipana chisu chawonsu mulong wa kurumburil rusangu.” (Mid. 18:2-5) Paul kavuramenap yom yading ya usey nakash mu mwom wend, kumusadin Yehova. Mulong Paul wading chilakej chiwamp piur pa kusal mudimu ukash ni kwiwanishin maswir mend ma ku mujimbu, chamuswapela kuyikasikesh akadivar ni anambaz nend. Wayivurisha kulik kulikidil rupompat rading ririshinau nich ni rusot ra kuwanyish maswir ma dijuku kuyibachik kudiul “yom yipandakena [usey]”​—milad yawonsu ya difukwil dia Yehova. w22.08 20 par. 3

Nlel rusot ra Nzamb rid anch rusangu ruwamp ra Want arilejan pa mangand mawonsu. (1 Tim. 2:​3, 4) Mudimu winou ud wa Yehova, ni chid cha usey nakash mutapu wautekinay kal mwinshin mwa umutakel wa Mwanend mukatish. Tukutwish kwikal nich kashinsh anch mwinshin mwa umutakel uwanyidina wa Yesu, mudimu wa kulejan ukuwanyin mu mutapu umusangareshina Yehova kurutu disudiel dishik (Mat. 24:14) Mutapu ik tukutwisha kwitiyij anch yom yiney yid yakin? Chisu chikemp kurutu kwa kuya mwiur, Yesu wakumangana pamwing ni in kwilejend amwing ashinshamena ku mukandu wa Galalia. Wayileja anch: “Anginkishin kal ulabu wawonsu wa mwiur ni wa pansh.” Tal mazu makwau ma usey malonday: “Yangany kudi antu a michid yawonsu, [yikadishany] in kwilejam.” (Mat. 28:18, 19) Chawiy, mu ulabu wamwinkishau, amwinkisha kand Yesu chisend cha kutakel mudimu wa kulejan. Ni anch mudimu wa kulejan wafanyina kudandamen kusadik mwinshin mwa umutakel wa Yesu djat ni mu chirung chetu. w22.07 8 par. 1, 3; 9 par. 4

Antu atentamina, asala yom yiwamp kurutu kwa kufa, ‘akuyivumbul mulong wa mwom’ mulong majin mau makwikal amafundin kal mu mukand wa mwom. Chinech chirumburikin anch divumbuk dia “antu asala yom yiwamp” disambidinau mu Yohan 5:29 diawiy dimwing ni divumbuk dia ‘antu akad kutentam’ disambidinau mu Midimu 24:15. Kutesh kwinoku kukwatijadin ni mazu madia mu Rom 6:7, malondina anch: “Anch muntu wafa, amukwol kal, chad yitil kiyikumukwatap kand.” Chawiy anch muntu utentamina wafa, Yehova ukat kumulikishin yitil yend, pakwez ukat kuvurikang yom yawonsu yasalay nich kushinshaman pachadingay mwom. (Heb. 6:10) Chakin kamu, antu atentamina akuvumbulau akwikal ni kuswir kwa kushal ashinshamena mulong wa kulam majin mau mu mukand wa mwom. w22.09 18 par. 13, 15

Muprofet Daniel washa chilakej chiwamp nakash cha muntu wading wa kuchingejin. Ap anch amutwala mu winkwal mu Babilon, kupwa kwa chisu chikemp wijikana mud muntu ufanyidina kuchingejin. Antu amuchingejina nakash pamukwashau kud Yehova kurumburil yilat ya Nebukadinesar Mwant wa Babilon. (Dan. 4:20-22, 25) Mu kusut kwa mivu yivud, Daniel wamekesha kand anch wading muntu wa kuchingejin parumburilay uruu ukwamushena wamekana pa rubumbu ra chikumbu cha mwant mu Babilon. (Dan. 5:5, 25-29) Kupwa, Darius mwant wa Mediy ni atulal end niyau amana anch Daniel wading ni ‘spiritu ukwamushena.’ Ading ij anch Daniel “wading muntu wa kashinsh, kasalap chom chiyimp, ap kudimban makasu.” (Dan. 6:3, 5) Chiwapin kwiyipul ayinetu anch: ‘Ov, nijiken kamu mud muntu wa kuchingejin?’ Tukak ku mutumbish Yehova anch twikal antu a kuchingejin. w22.09 8-9 par. 2-4

Tukat kutaninamu anch twalondul mbil ja Yehova piur pa yom yitentamina ni yakad kutentam. Ov, ukutwish kwijik mulong wak? Tong bil anch adokter ni amingang alik kuziyin kwi mbil ja pa kampwil ja mudimu wau chisu chiyokinau antu; chinech chikutwish kujipesh ayej amwing okinau. Chakin kamu, mbil jiwamp jikat kulet diking. Chisik chimwing, mbil ja Nzamb piur pa yom yitentamina ni yakad kutentam jikat kutuking. Yehova ukat kuyukish antu akata kusadin mbil jend mu mwom yau. Washidinamu kal anch: “Mwin kutentam mwawonsu ukez kaswan ngand, ukez kashakamamu chikupu.” (Kus. 37:29) Ov, ukutwish kutongijokin piur pa uumwing, chisambu, ni musangar ukwikalaku pakach pa antu anch muntu ni muntu walondul mbil ja Yehova? Yehova ukatin anch wikal ni mwom mud winou. Chakin kamu, etu awonsu tukwet mayingishin ma kukat kutentam! w22.08 27-28 par. 6-8

Anch kwashiken chom chitutapina ku muchim, kushinshaman kwetu kudiay Yehova ni ku dirijek diend akutwish kukupak. Mutapu ik tukutwisha kupandakan yikokujol mud yiney? Tufanyidin kwilam ni kuchis ku mes, kwiman dang mu ritiy. Tukat kwilam kusutil kushimpish muchim, kutong nawamp, ni kusal usu wa kuman milong mud muyimenay Yehova. Anch twasal mwamu, yovil yikuyikelap manangu metu. Pamwing ap twiyov anch atusadidin mu mutapu uyimp kud mbay netu mwin Kristu, pamwing ap kud muntu ukweta yisend, mud mukurump wa chikumangen? Pamwing ap mukadivar kasalangap mwamu kwa kwisotin mulong wa kukusal nayimp. (Rom 3:23; Jak. 3:2) Pakwez, yisal yend yikutwish kukutap ku muchim. Ukutwish kwiyipul anch: ‘Anch mukadivar washiken kusal yom ya mutapu winou, ov, tukutwish kamu kulond anch dined did dirijek dia Nzamb?’ Chid kamu chakin anch wawiy mutapu ukatinay Satan anch utonga. (2 Kor. 2:11) Yitongijok yiyimp mud yiney yikutwish kutwauril ni Yehova ni dirijek diend. Chawiy, tufanyidinap kulam rukuny. w22.11 20 par. 1, 3; 21 par. 4

Yehova watwinkishin kal ruchingej ruwamp nakash ra mwom wa chikupu. Antu amwing akwet ruchingej ra kushakam mwiur chikupu mud yitang ya mu spiritu yakading kufang. (1 Kor. 15:50, 53) Pakwez antu avud akwet ruchingej ra kushakam chikupu pa divu mu musangar, nich mijimbu yiwanyidina. (Kuj. 21:3, 4) Twikala ni ruchingej ra kutambul mwom wa chikupu mwiur ap pa divu, ruchingej retu rid ra usey nakash. Ruchingej retu mulong wa machuku ma kurutu rid rakin, mulong ridiokil kud Yehova. (Rom 15:13) Twij yom yakanay kal, ni twij anch ukat kuwanyishang chisu chawonsu yom yikatay kukan. (Kuch. 23:19) Tukwet kashinsh nakash anch Yehova ukwet impu ni dikand dia kuwanyish chom chin chawonsu chakanay kal anch ukusal. Tatukwetu wa mwiur utukatin kamu nakash, ni ukatin anch tumuchingejin. Anch ruchingej retu mudiay Yehova rikal rikash, chikutuswapel kujijamen yikokujol ni kuchingel machuku ma kurutu nich kutakaman ni musangar. w22.10 24 par. 1-3

Mulong antu alika kutesh, Isay wasambela kuyilej anch Yehova ukulikidil anch aman mar. (Isay 30:5, 17; Jer. 25:8-11) Ni yawiy kamu yom yasadika chisu chayikwatau mu winkwal kud in Babilon. Pakwez kwading antu ashinshamena pakach pa in Yuda, ni Isay wading ni uruu wa ruchingej piur pau, wayileja anch dichuku dimwing Yehova ukuyimekeshin ranaken rend. (Isay 30:18, 19) Ni chawiy kamu chom chasadika. Yehova wayikwola mu winkwal. Pakwez kwafanyina kusut mivu yivud kurutu Yehova ayikola. Mazu ‘Yehova uchingedil nich kushimpish muchim mulong wa kukwanaken ey’ mading mamekeshin anch chading chitin chisu kanang kurutu kwa kuyikol in Yuda ading ashinshamena. Chawiy, in Isarel asala mivu 70 mu winkwal mu Babilon kurutu kwa kuyitiyij amwing pakach pau kuchirik ku Yerusalem. (Isay 10:21; Jer. 29:10) Kupwa kwa kuchirik mwi ngand yau ya chivadik, mansoj ma ushon madingau nich mu Babilon amaswinkesha nich mansoj ma musangar. w22.11 9 par. 4

Nlel unou, mu jingand jivud, akadivar ni anambaz netu akat kurish ni yom mud yajijamenau atwimbuy mu mivu chitot yakusambish chisu chayizengolau anch mulong ading akat kulejan piur pa Yesu. Tupamp tuvud, anzuj a dirumburish dijim dia in Yuda ayileja anch “kangal akalond kand mu dijin dia Yesu.” (Mid. 4:18-20; 5:27, 28, 40) Pakwez, ading ij anch muntu ukweta dikand dia piur nakash ndiy ‘wayinkisha mbil ja kulejan kud antu ni kupan uman’ piur pa Kristu. (Mid. 10:42) Chawiy, Pita ni Yohan alonda nich kutakaman anch chifanyidin kumuziyin Nzamb kusutamu anzuj, ni alonda anch kakwimikap kulejan piur pa Yesu. (Midi. 5:29) Kupwa kwa kuyibul nfimbu mulong ashala ashinshamena, atwimbuy adiokala ku dirumburish dijim dia in Yuda, “asangara nakash mulong Nzamb witiya awiy kuman mar mulong wa kumwambat Yesu” ni adandamena kulejan!​—Mid. 5:41, 42. w22.10 12-13 par. 2-4

Chid chakin anch tukat kusambish kwilej piur pa Yehova nich mafundish ma pa dishin ma Bibil. Mu mukand wend wayifundinay in Hebereu, kambuy Paul watazuka mafundish ma pa dishin anch “malejan ma kusambish.” Kadingap kapipejina “malejan ma kusambish”; wamafanakesha ni mayel makatau kwamu anakemp. (Heb. 5:12; 6:1) Pakwez wayikasikesha kand in Kristu awonsu kulik kwimen kusu kwau pa mafundish ma pa dishin ma Bibil, pakwez kwilej kand uyakin ukurikina wa Dizu dia Nzamb. Ov, wakudishin kal impu ya kwilej mafundish makurikina ma Bibil? Ov, ukatin kudandamen kuya kurutu, kudandamen kwilej piur pa Yehova ni rusot rend? Pakwez, chiyikasikedining antu avud pakach petu kwikal ni chaku cha kwilej. Chid nchik piur pey? Pawading ku shikol, ov, wileja mutapu wa kutang ni kwilej nawamp? Ov, wasangerang kwilej ni kutaninamu mu yom wading wilejina? Anch wamana anch ey yikukasikedining kwey kwilej yom yidia mu mabuku? Anch mwawiy, udiap amwiney. Pakwez Yehova ukutwish kukukwash. Ud Nzamb uwanyidina ni Mulej wa piur nakash. w23.03 9-10 par. 8-10

Anch twitudishin, tukwitiy anch Dizu dia Nzamb dikun mu michim yetu. Tukutwish kusadin mu mwom wetu malejan ma Bibil piur pa riy, ranaken, ni rukat, ching anch twipuk kutang nich chitongijok chiyimp, ni kwitutu. Yom tuyisadina antu akwau yikutwish kumekesh anch Dizu dia Nzamb dituswimpin. Afaris akangesha Dizu dia Nzamb kupukun michim yau, ni mud chibudikin, ‘ayifishang nich antu akad mulong.’ (Mat. 12:7) Chilik chimwing, mutapu tuyimena antu akwau ni yom tuyisadina, yikutwish kumesh anch tulikin Dizu dia Nzamb dituswimp. Chilakej, ov tukweting chaku cha kulond piur pa uwamp tumena mud antu akwau, anch tuswakeling kulond ching piur pa kurumbok kwau? Ov tuding in riy ni aswapela kulikishin, anch tuding in kulond nayimp ni in kulam rukuny? Yakul ku yipul yiney yikutwish kumekesh anch tulikin yom tutangina yiswimp yitongijok yetu, yovil yetu, ni yisal yetu.​—1 Tim. 4:12, 15; Heb. 4:12. w23.02 12 par. 13-14

Shinshikin chilakej cha Josef wa ku Arimatey. Amulimishang nakash kud in Yuda. Wading mu chisak cha dirumburish dijim dia in Yuda ditazukinau anch Sanedrin. Pakwez chisu chadingay Yesu pa divu, Josef kadingap katakamena ap pakemp. Yohan walonda anch Josef “wading mwin kwilej wa Yesu mu ujindj, mulong wading uyovil amakurump au in Yuda wom.” (Yoh. 19:38) Ap anch Josef wading ukatin uruu wa Want, pakwez kadingap kakatina antu amujingunin anch umwitiyijin Yesu. Chakin kamu wading wovil wom anch ukutwish kushadish kalimish ka antu anch amwijik anch ud mwin kwilej wa Yesu. Pakwez Bibil utulejin anch kupwa kwa rufu ra Yesu Josef “wisuma, waya kudi Pilat, wamwit mujimbu wa Yesu.” (Mar. 15:42, 43) Josef kajindjikap kand anch ud mwin kwilej wa Yesu. Mud Josef, ov, niyey wovap kal wom wa antu? w23.01 30 par. 13-14

Rusangu ra chisambu ni yom yivud yasangerau in Isarel mwinshin mwa winyikel wa Salomon ramushika mwant mband wa ku Seba. Mwant mband winou wasala weny ulemp nakash wa kuya ku yerusalem mulong wa kwimenap amwinend mashakamin madingau nich antu. (1 Ant 10:1) Kupwa kwa kuman mutapu wadinga yom mu want wa Salomon, walonda mazu madia kwiur oku. Pakwez mashakamin mu winyikel wa Salomon chading kwau chilakej cha yom yikusalay Yehova mulong wa antu chisu chikuyikelay Mwanend Yesu. Yesu umusutinamu Salomon kulemp mu yom yawonsu. Salomon wading muntu wakad kutentam warumboka nakash, ni kurumbuk kwend kwayiletina antu a Nzamb mar. Pakwez, Yesu ud Nyikel uwanyidina wakad kusalang chitil. (Luka 1:32; Heb. 4:14, 15) Kristu wamekesha anch kakutwishap kusal chitil ap kapamp kamwing ap kusal chom chikutwisha kuyisal antu end ashinshamena nayimp. Chid chakin anch did dilau dijim nakash dia kwikal ni Mwant mud winou. w22.12 11 par. 9-10

Yom ik tufanyidina kusal anch kwi ndond tushicha kud mayej masamburokina? Tufanyidin kusadin yiyul yipaninau antakel a ngand, mud yiyul yitadina kowal ku makas, kulimish chintamp, kudjal mask, ni kutekan mu karanten. Anch twasal yom yiney, tukumekesh anch tukwatin nich usey nakash chipan cha Nzamb, mwom. Pa chisu cha mar, tukutwish kutesh jinsangu ja makasu kud arund netu, amutej netu, ni ku ma radio ap ma televizion. Pa ndond pa kwitiyij “mazu mawonsu” tuteshina, tufanyidin kutesh yom yilejenau ku misul ya jinsangu ya kuchingejin ya mburamatad ni ya milong ya rupital. (Jinsw. 14:15) Chisak Chitakedila ni ma biro ma mitiy akat kusal usu wa kukimb jinsangu jakin kurutu kwa kupan umutakel piur pa yikumangan ni mudimu wa kulejan. Anch twaziyin ku umutakel utwinkishinau, tukwichidij ayinetu ni kuyichidij kand antu akwau. Tukuyikwash kand antu akwau kwikal ni chitongijok chiwamp piur pa Atuman a Yehova.​—1 Pita 2:12. w23.02 23 par. 11-12

Pandamau in Isarel mwi Ngand ya Kushilamu, ashakama ku jindond kushalijan. Chafanyina kuyiswapel in Isarel ashicha kwi ndond yimwing kuyidiul akwau ashicha kwi ndond yindj. Pakwez Yehova watenchika chakwel in Isarel asambish kukumangan mu yisu kushalijan mulong wa kuyitangin Dizu diend ni kuyirumburilad. (Kuv. 31:10-12; Neh. 8:2, 8, 18) Tong mutapu wafanyinay kwiyov mwin Isarel ushinshamena anch washik ku Yerusalem ni waman mamiliyon ma in Isarel akwau adiokila ku jindond kushalijan! Wawiy mutapu wayikwashay Yehova antu end kushal mu uumwing. Mu kusut kwa chisu, chikumangen cha win Kristu ading achisadin kud amakundj ni amband ading alondina mazu kushalijan, ni pakach pau pading antu ading ijikena nakash ni akad kwijikan, pading kand ampich ni atuzwendj. Pakwez mulong ading akatin Mifund, amwifukwilang Nzamb wakin mu uumwing. Antu ikala in kwitiyij afanyina kutesh Dizu dia Nzamb ching kusu kusutil ukwash wa ambay nau in Kristu ni kusutil kukumangan nau pamwing.​—Mid. 2:42; 8:30, 31. w23.02 3 par. 7

Yehova wayishidinamu kal anch antu awonsu amuziyidina, akwikal ni “mwom wa chikupu.” (Rom 6:23) Anch twatongijokin piur pa yom yitwinkishinay Yehova,rukat retu mulong wendendiy rikujimb nakash. Tong bil: Tatukwetu wa mwiur utukatin kamu nakash mu chilik cha kwel anch tukezap kwaurik nend ap pakemp. Kushilamu kwa Nzamb piur pa mwom wa chikupu kukat kutukwash kujijamen yikokujol yetu ya katat. Ap anch akankuny netu atulej anch akimbin kutujip, tukwimikap kumusadin Yehova. Mulong wak? Chakusambish, mulong twij anch ang twafa ashinshamena kudiay Yehova, ukutuvumbul ni tukushakam chikupu pakad wom wa kufa dichuku dimwing. (Yoh. 5:28, 29; 1 Kor. 15:55-58; Heb. 2:15) Twij anch Yehova ukutwish kutwinkish mwom wa chikup mulong ud Musul wa mwom, ni udingaku chikupu. (Kus. 36:9) Bibil utwinkishin kashinsh anch Yehova udingaku ni ukudandamen kwikalaku chikupu.​—Kus. 90:2; 102:12, 24, 27. w22.12 2 par. 1-3

Mulong tud atushalapol a Yehova, chikatap kutushimokish anch twarish ni yikokujol. Ni mud mulondinay Bibil, twij anch “chifanyidin etu awonsu kuman mar nakash mulong wa kwandam mu Want wa Nzamb.” (Mid. 14:22) Twij anch milong yetu yimwing yikupwap kamu djat ni patukwandamina mwi ngand yisu ya Nzamb, mulong mwinimwa mukez “kikalap kand rufu, ap madil, ap kwishikokin, ap kusansan. (Kuj. 21:4) Yehova kakatap kukangesh yikokujol kutushiken. Pakwez ukat kutukwash kuyijijamen. Shinshikin yom yayilejau in Kristu a ku Rom kud kambuy Paul. Chakusambish wajimbula yikokujol yamushikena pamwing nau akadivar nend. Kupwa wafunda anch: “Tukat kupandakan nakash mulong wa ukash wa Kristu watukata.” (Rom 8:36, 37) Chinech chirumburikin anch Yehova ukutwish kutukwash ap anch tudandamedin kurish ni milong. w23.01 14 par. 1-2