Ngond wa 3

Kambuy Pita wayikasikesha akadivar nend kusadin yiyukish yadingau nich mulong wa kuyikasikesh ambay nau mu ritiy. Pita wafunda anch: “Muntu mwawonsu wa pakach pen watambula kudi Nzamb yiyukish ya kusal nich, chawiy chifanyidin muntu ni muntu kusadil yiyukish yiney mulong wa kukwashijan nich.” (1 Pita 4:10) Tufanyidinap kwidjidjek kusadin ukaliweny tukweta mulong wa wom anch antu akwau akutwovil mukau ap kuziy. Pakwez tufanyidin kubabal chakwel kangal twashiken ku kwitutul. (1 Kor. 4:6) El tuvurikany anch ukaliweny wa chivadik wawonsu tukweta yid yipan yatwinkishau kud Nzamb. Tufanyidin kusadin yipan yiney mulong wa kukasikesh chikumangen, kadiap mulong wa kwitumbish. (Fil. 2:3) Anch twasadin usu ni ukaliweny tukweta mulong wa kusal rusot ra Nzamb, tukwikal ni diyingishin dia kusangar​—kadiap mulong tusadin yivud kuyisutamu antu akwau ap kwimekesh anch tud awamp kuyisutamu, pakwez mulong tusadidin yipan yatwinkishay Yehova mulong wa kumutumbish nich. w22.04 12-13 par. 7-9

Yesu wading ukatin Mifund Yitumbila, ni yovil yend ayilejana mu mazu ma uprofet tutanina mu Kuseng 40:9 ulondina anch: “Nikwet musangar pakusadil rusot rey, A Nzamb wam. Nilamin yijil yey mu muchim wam.” Mud chibudikin, wading ni musangar ni watwisha kumusadin Yehova. Niyetu tukutwish kwikal ni musangar ni kutwish kumusadin Yehova, anch twilej kukat Dizu dia Nzamb. (Kus. 1:1-3) Mud mutapu twamana kal mu mazu malonday Yesu ni kusutin chilakej chend, el tuwapishan ukaliweny wetu wa kutang Bibil. Tukutwish kuwapish mutapu wetu wa kutesh yom tutangina mu Bibil kusutin kulembil, kutang pakemp pakemp, kwiyipul yipul, ni kufund mu wiswimp yom kanang. Tukutwish kumekesh ukaliweny wa kujingunin kusutin kushinshikin nawamp yom tutangina mu Bibil, ni kusadin mikand yimedina pa Bibil. Ni tukutwish kulik Dizu dia Nzamb dituswimpa kusutil kwikal ni chitongijok chiwamp pitutangina. Anch twipan kusal mwamu, tukutaninamu nakash mu yom tutangina mu Bibil ni kumusejin Yehova piswimp nakash.​—Kus. 119:17; Jak. 4:8. w23.02 13 par. 15-16

Tond ukaliweny ukatina kukudish ni kupwa sal yom kanang ya pakampwil mulong wa kukudish ukaliweny wey. Mutapu ik ukutwisha kusal mwamu? Chilakej, tong bil mud anch ukimbin kuwapish ukaliweny wey wa kufundish. Ukutwish kwilej broshir Ipana mu Kutang ni mu Kufundish. Anch akwinkish chikunku cha kusal ku chikumangan cha mukach mwa rubing, ukutwish kumwit mukadivar uswila kutesh mutapu usadina chikunku chey ni kukuyul mutapu wa kuwapish kurutu kwa kuchisal mu chikumangan. Rijek nawamp chikunku chey kurutu kwa chisu, chakwel antu akwau aman anch ukwet mushiku ni ud muntu wa kuchingejin. (2 Kor. 8:22) Pakwez chid nchik anch ukaliweny ukatina kukudish ukwitin kusal yom yikukasikedining kusal? Kangal waziy! Ov, Timote wikala mwin kusal madiskur muwamp nakash, ap mulej wija kufundish nakash? Bibil karumburilap chom pa mulong winou. Pakwez, pakad kwidjidjek Timote wadandamena kwikal ni ukaliweny nakash mu kuwanyish yisend yend kusutin kusadin chiyul cha Paul.​—2 Tim. 3:10. w22.04 24-25 par. 8-11

Nnam wa chidiany ukweta mitu sambwad umekeshin yom ik? Twaman kal anch nnam winou ukwet mujimbu mud wa chisump, pakwez yidjatil yend yid mud ya ours, ni kan kend kad mud ka ntambu, kupwa ukwet kand miseng dikum. Yawiy kand yom yikwetau annam anying ajimbwilau mu buku wa Daniel shapitre wa 7. Pakwez, mu buku wa Kujingunik, yom yiney ayikwet kud nnam umwing, kadiap kud annam anying kushalijan. Nnam winou wa chidiany kamekeshinap guvernema ap want umwing. Nnam winou amulejen anch uyikedil “michid yawonsu, ni majuku mawonsu, ni jindim jawonsu, ni antu a mangand mawonsu.” Chawiy ndond ya winyikel wend yitandurikin nakash kusutamu ndond yiyikedining guvernema umwing wa ngand. (Kuj. 13:7) Komb nnam winou wa chidiay ufanyidin kumekesh maguvernema mawonsu mayikedila kal antu kudiosh pakur djat ni nlel unou. (Mul. 8:9) Uman ukwau umekeshina anch yisu yivud mu Bibil, uvud wa dikum umekeshining anch chom chid cha kabuj. w22.05 9 par. 6

Nany ukutaninamu mu yom yiwamp yiney yawonsu? Chakusambish, rid runtu rikupanda ku Harmagedon, pamwing ni an akutwisha kuvadik mwi ngand yisu. Pakwez Kujingunik shapitre wa 20 niyend ukanin anch afu akuvumbuk. (Kuj. 20:11-13) Antu ‘atentamina’ afa pakur, pamwing ni antu ‘akad kutentam,’ afa pakad mutapu wa kwilej piur pa Yehova, niyau akuyivumbul panap pa divu. (Mid. 24:15; Yoh. 5:28, 29) Ov, chinech chimekeshin anch antu awonsu akuyivumbul pa chirung cha Winyikel wa Mivu Kanan? Bwat. Antu ikala ni mutapu wa kumusadin Yehova kurutu afa pakwez alik kwau mulong wa muchim wau uyimp, kakuyivumbulap. Amekesha anch kawanyidinap kushakam mu Paradis panap pa divu, mulong kitiyap dilau diayinkishau dia kumusadin Nzamb.​—Mat. 25:46; 2 Tes. 1:9; Kuj. 17:8; 20:15. w22.05 18-19 par. 16-17

Kusutin ‘kashalapol ushinshamena ni kubabal,’ Yesu wasadin kal dirijek dikwamushena pa divu mulong wa kukasikesh difukwil dishitwila. (Mat. 24:45) Mutapu ik wiyovila piur pa dirijek dined? Mu chakul chey, pamwing ap utongijokidin pa mazu ma kambuy Pita wamwakula Yesu mazu madia mu mufund wa nlel. Kwisu kwafanyinangay kwikal umwing ni umwing wa pakach petu anch kakwatap mupak wa kwinung ku dirijek dia Yehova? Kusutin dirijek dined, Kristu ukat kushinshikin chakwel twikal ni yakudia ya mu spiritu pa chisu chiwanyidina. Ukat kutufumb kand mutapu wa kuwanyish nawamp mudimu wetu wa kulejan. Chikwau kand, ukat kutukwash kudjal ‘wuntu usu’ chakwel tumusangaresh Yehova. (Efes 4:24) Yesu ukat kupan umutakel uwamp nakash pa yirung yikash. Twamen patok ukwash wa umutakel winou pa chisu chasambishina chipupu cha KOVID-19. Padingau antu a mangand akat kujilijil mulong wa kwijik yom yifanyidinau kusal, Yesu washinshikina chakwel tutambul umutakel wovikena nawamp mulong wa kwichidij. w22.07 12 par. 13-14

Yehova wayileja anvaj in Isarel a pasak kuyifundish anau piur pend. (Kuv. 6:6, 7) Anvaj inay ading ni yisu yivud mu dichuku ya kwambamb nau anau ni kukudish rukat mulong wa Yehova mu michim yau. Chilakej, nsand mwin Isarel wasutishang asaa avud mu kumukwash tatukwend kukun mbut ap mu kwangul. Pakwez mpanyend wasutishang dichuku dia kabuj mu kumukwash makwend kuchim, ni kusal kand midimu yikwau ya ku chikumbu. Chisu chasalangau anvaj pamwing nau anau, isambinang kamu yom yivud nakash ya usey. Chilakey, afanyinang kwisambin uwamp wa Yehova ni kuman mutapu uyikwashinay mu dijuku diau. Mu jingand jivud, anvaj nau an kakwetap chisu chivud cha kwisamb mu dichuku. Anvaj akutwish kwikal ku mudimu, ni an akutwish kwikal ku shikol. Mud chibudikin, anvaj afanyidin kukimb yisu yikutwishau kwambamb nau anau.​—Efes. 5:15, 16. w22.05 28 par. 10-11

Yitil yijim kud kubwambwil kukash ku yijil ya Nzamb. Anch mwin Kristu wasal chitil cha mutapu winou, ufanyidin kumusejin Yehova mu malembil, ni ufanyidin kuya kuyiman amakurump a chikumangen. (Kus. 32:5; Jak. 5:14) Chisend ik chikwetau amakurump? Ching kusu Yehova ndiy ukweta ulabu wa kulikishin kamu yitil, ni ukat kusal mwamu kusutin dishin dia yakupesh ya difut. Chawiy, Yehova wayinkisha amakurump chisend cha kukwat mupak kusutin Mifund mulong wa kuman anch muntu wasalang chitil ukutwish kudandamen kushal mu chikumangen ap bwat. (1 Kor. 5:12) Mulong wa kusal mwamu, chiyitining kwakul ku yipul yiney: Ov, muntu wasalang chitil kwa kwisotin? Ov, wasambela kwirijek mulong wa kusal chitil chinech? Ov, wasalang chitil chinech tupamp tuvud mu chisu kanang? Cha usey kupandakan, ov, kud uman umekeshina anch muntu ukarumukin kamu chakin? Ov, kud uman umekeshina anch Yehova wamulikishidin?​—Mid. 3:19. w22.06 9 par. 4

Yesu wayikasikesha in kwilejend kukat kutentam. (Mat. 5:6) Charumburik anch muntu ufanyidin kwikal ni impu nakash ya kusal yom yitentamina, yom yiwamp, ni yishitwila ku mes ma Nzamb. Ov, ukatining uyakin ni kutentam? Chakin kamu. Ukisining makasu ni yom yin yawonsu yiyimp. (Kus. 119:128, 163) Makasu mamekeshin wuntu wa Satan, udia nyikel wa mangand minam. (Yoh. 8:44; 12:31) Chitongijok chimwing cha Satan chid cha kutwambin dijin ditumbila dia Yehova Nzamb makasu. Satan wamutwambidin kal Nzamb wetu makasu nakash kudiokal kamu chisu chasadika wintombwij mu Eden. Wamumekesha Yehova mud Nyikel mwin kwitongin amwinend ni wakad win kashinsh, uyikishina antu yom yiwamp. (Dis. 3:1, 4, 5) Makasu ma Satan madandamedin kuyibachik antu kumuman Yehova mu mutapu uyimp. Anch antu akwat mupak wa kulik “kukat uyakin,” Satan ukutwish kuyibachik kusal yom yawonsu yiyimp ni yakad kutentam.​—Rom 1:25-31. w23.03 2 par. 3

Pamwing ap usadin usu wa kulikap yaku yiyimp, pakwez yisu yimwing ukat kuchirikin kand yom yiyimp usadina usu wa kulikap. Ap pamwing ap umen anch chikukasikedin kushimpish muchim ni wiyovil rumbagan mulong umen mud chitin kuchingel nakash mulong wa kuwanyish mupak witekina. Yom ik yikukukwasha kujijaman? Rid rukat mulong wa Yehova—mwikadil wa usey nakash. Rukat ukweta mulong wa Yehova ud mwikadil uwamp nakash, wawiy mwikadil uwamp nakash ukweta. (Jinsw. 3:3-6) Kumukat Nzamb nakash kukutwish kukukwash kurish ni yakamish tukweta. Yisu yivud Bibil ukat kwisambin rukat rishinshamena ra Yehova mulong wa atushalapol end. Mwikadil winou urumburikin anch Yehova kakutwishap kuyidjibul atushalapol end ap kwimik kuyikat. Akutanga mu chifu cha Nzamb. (Dis. 1:26) Mutapu ik ukutwisha kumekesh rukat mud riner? Sambish kujikitish. (1 Tes. 5:18) Dichuku diawonsu iyipula anch: ‘Mutapu ik wanmekeshinangay Yehova rukat?’ Kupwa mujikitisha Yehova mu malembil mey, ni jimbul yom ya pakampwil yakusadinangay. Man yisal ya rukat ya Yehova mud ukusadidinay ey pakampwil. w23.03 12 par. 17-19

Yesu wayikwasha atwimbuy awonsu 12 nich rukat. Yom yiney yitufundishin ik? Yidia ya usey kidiap kwau ching kusu yom yisadinau antu akwau, pakwez kand yom tusadina etu piur pa kurumbok ni kuburen kuwanyin kwau. Yom ik yikutwisha kutukwash? Anch mbay netu mwin Kristu waturumbukin, tufanyidin kwiyipul anch: ‘Mulong wak yom yasalangay yinsadin nayimp nakash? Ov, yimekeshin chaku chiyimp nifanyidina kusal usu wa kwipuk? Ov, muntu wanrumbukinang ukwet mulong kanang urishinay nich? Ap anch nimen anch nikwet diyingishin dia kujiman, ov, nikutwishap kumekesh rukat rakin ni kudiul kwam?’ Anch twayimekeshin antu akwau rukat, tukumekesh anch tud in kwilej akin a Yesu. Yesu wading ni mutapu wa kutang mu michim. Pakwez etu tukutwishap kusal mwmu. Ap mwamu, tukutwish kuyishimpishin akadivar ni anambaz netu muchim anch aturumbukin. (Efes 4:1, 2; 1 Pita 3:8) Chikutuswapel kusal mwamu anch twilej kuyijik nawamp. w23.03 30 par. 14-16

Satan ukutwish kusadin chisu chinech mulong wa kutubachik kwitiy milad yiyimp ya kwiyokish. Adokter ni anamakwetu akad kwikal Atuman akutwish kutushindin chakwel atutek mash, yom yikutwisha kutushikij kujip chijil cha Nzamb. Ap muntu mukwau ukutwish kusal usu wa kutubachik kwitiy mulad wa kwiyokish wakad kukwatijan ni mbil jidia mu Mifund. Ap anch tukatinap kufa, twij anch Yehova ukudandamen kutukat ap anch twafap nchik. (Rom 8:37-39) Anch arund a Yehova afa, ukat kudandamen kuyilam mu manangu mud padiau aom. (Luka 20:37, 38) Ukwet impu nakash ya kuyichirish ku mwom. (Job 14:15) Yehova wafuta difut dipandakena kujimb chakwel tutwisha “kwikal nich mwom wa chikupu.” (Yoh. 3:16) Twij mutapu utukatinay Yehova chikurikina ni mutapu utubangidinay. Pa ndond pa kumulik Yehova anch tuyedina nakash, ap anch atulejin anch akimbin kutujip, tufanyidin kumukungamen ndiy chakwel atwongoj, atwinkish manangu, ni usu.​—Kus. 41:3. w22.06 18 par. 16-17

Bibil ulondin anch: “Kumwov [Yehova] wom diawiy disambishil dia manangu! Kumwijik ndiy Utumbila [Nakash] rawiy ronganyin.” (Jnsw. 9:10) Chawiy, anch tukwet mupak ujim wa kukwat, tufanyidin kwijik yom yitonginay Yehova—mulong “kumwijik ndiy Utumbila [Nakash] rawiy ronganyin.” Tukutwish kusal mwamu pitwilejina Bibil ni mikand yetu yimedina pa Bibil. Anch twasal mwamu, tukumekesh anch tukwet manangu makin. (Jnsw. 2:5-7) Yehova ndiy kusu ukutwisha kutwinkish manangu makin. (Rom 16:27) Mulong wak tulondina anch Yehova ndiy musul wa manangu makin? Chakusambish, mulong ud Sakatang, ukwet ronganyin rakad mimbu, ni wij nawamp yom yawonsu yatangay. (Kus. 104:24) Cha kaad, yom yawonsu yisadiningay Yehova yimekeshining manang mend. (Rom 11:33) Cha kasatu, yiyul ya manangu yipaniningay Yehova yikat kuyikwash chisu chawonsu antu akata kuyisadin. (Jnsw. 2:10-12) Anch tukimbin kwikal nich manangu makin, tufanyidin kwitiy uyakin wa pa dishin ni kwitiy anch utakel mipak ni yisal yetu. w22.10 19 par. 3-4

Kujingunik shapitre wa 12 wasambela kulejan anch amupandakana Satan, ni amudjibula pamwing ni ayilembil end pa divu. Mulong Satan wading ni ujim nakash, chawiy wasambisha kuupwishin pad antu, ni chinech chaletisha “riyind [pa] mangand.” (Kuj. 12:9-12) Mutapu ik tukutwisha kutaninamu mu mauprofet minam? Yom yisadikina mu mangand ni ud mikadil yiyimp tumena kud antu nlel yikutwish kutukwash kujingunin anch Yesu wikadin kal Mwant. Chawiy, pa ndond pa kwov ujim anch twaman yisal ya antu ya chisum ni ya kwitongin ayinau, tukat kuvurik anch yisal yau yikat kuwanyish uprofet wa Bibil. Want wa Nzamb uyikedin! (Kus. 37:1) Ni tufanyidin kuchingej anch yom yikupandakan kuyip nakash mu mangand pasejina Harmagedon piswimp. (Mar. 13:8; 2 Tim. 3:13) Tumujikitishin nakash Tatukwetu wa rukat udia mwiur mulong wa kutukwash kutesh nawamp mulong wak kudia milong yikash mwamu nlel mu mangand. w22.07 3-4 par. 7-8

Tukutwish kumwit Yehova chakwel ayikwash kujijamen mayej, mar madiokila ku yom yatangau, njit, kuzengol, ap yikokujol yikwau. Tukutwish kand kulembil mulong wa akadivar ni anambaz netu asadina usu wa kuyikwash ambay netu adia mu maswir. Pamwing ap wij antu amwing arishina ni yikokujol ya mutapu winou. Ov, umen nchik anch wayijimbul pa majin mau mu malembil? Tukat kumekesh rukat rakin ra ukadivar kusutin kumwit Yehova chakwel ayikwash kujijaman. Akadivar atutakedina mu chikumangen akwatining nich usey nakash malembil ma antu akwau ni makat kuyikwash nakash. Mwawiy kamu muchadinga piur pa Paul. Wafunda anch: “Nlembidilany kand niyam, chakwel Nzamb ukwinlej mazu ma kulond. Chawiy mwamu nikutwish kulond patok wakad wom mulong wa kuyijingunin antu ujindj wa rusangu ruwamp.” (Efes 6:19) Nlel kand tukwet akadivar avud asadina mudimu ukash wa kututakel. Tukat kuyimekeshin rukat kusutin kumwit Yehova chakwel ayukish midimu yau. w22.07 23-24 par. 14-16

Isalay ukat kudjal chiful mulong wa kuking mutu wend. Piur pa njit ja mu spiritu, tufanyidin kuchidij manangu metu ku kurishikish kwa Satan. Ukat kututil yisu yawonsu mipit ni kutubachik kukudish yitongijok yikutwisha kwijondish manangu metu. Mud mutapu ukata chiful kuking mutu wa disalay, ruchingej retu rikat kuking manangu metu chakwel tudandamen kushal ashinshamena kud Yehova. anch ruchingej retu raziy ni twalikidil yitongijok yiyimp kukul mu manangu metu, tukutwish kuvuramen ruchingej retu ra mwom wa chikupu. Shinshikin chilakej cha in Kristu amwing ading ashicha mu Korint wa pasak. Ashadisha ritiy rau mu kushilamu kwa usey kwa Nzamb—ruchingej ra divumbuk. (1 Kor. 15:12) Paul walonda anch antu inay akad ruchingej ashich kwau mulong wa kusangaresh mwom yau ya katat. (1 Kor. 15:32) Nlel antu avud akad ruchingej mu kushilamu kwa Nzamb atongin anch mwom wawiy kwau winou, ni akat kusal yawonsu yikutwishau mulong wa kwisangaresh. Pakwez etu tushalijadin ni antu inay, mulong tukwet ruchingej mu kushilamu kwa Nzamb piur pa machuku ma kurutu. w22.10 25-26 par. 8-9

Yehova ukwitin chakwel umusejin mu malembil. Umen yikokujol urishina nich, ni ukwinkishin kashinsh anch ukwakul ku malembil mey pa chisu chiwanyidina. Usangaredining kutesh malembil ma atushalapol end. (Jnsw. 15:8) Piur pa yom ik ufanyidina kulembil chisu wiyovila anch ud amwiney? Mufungwila Yehova muchim wey. (Kus. 62:8) Muleja yakamish yey ni mutapu wiyovila mulong wa yakamish yiney. Mwita Yehova chakwel akukwash kurish ni yovil yey ni akwinkish kutakaman uswirikedina mulong wa kulond pakad wom. Ukutwish kand kumwit chakwel akwinkish manangu mulong wa kurumburil nich nkeu yitiyij yey. (Luka 21:14, 15) Anch urishin ni yovil yikuziyishina, mwita Yehova chakwel akukwash kwambamb ni mwin Kristu uswila mu spiritu piur pa yom yiney. Ukutwish kumwit Yehova chakwel amukwash muntu ukuleja yovil yey kukutesh nawamp chisu umurumburidina. Anch waman mutapu wakwilay ku malembil mey, ni witiy ukwash wa antu akwau; ukwiyovap nakash anch ud amwiney. w22.08 10 par. 6

In Kristu a mu chikumangen chisu cha mu Tesalonik arisha nich rupompat rikash. Chisak cha akankuny a chisum chayidadamijana “in kwitiyij amwing, ayitwal kudi amakurump a musumb,” (Mid. 17:6) Ov, ukutwish kutongijokin piur pa wom wafanyinau kwov in Kristu inay ading achidia kukarumukinap? Afanyina pamwing ap kushadish mushiku wau mu mudimu wa Yehova, pakwez kambuy Paul kakatap anch yom mud yiney yishiken. Wasala usu wa kwikal nich kashinsh anch chikumangen chinech chisu akudandamen kuchibangin nawamp. Paul wayivurisha in Tesalonik anch: “Twamutumin mwanamakwetu, Timote . . . , mulong wa kukukwashany ni kukukasikeshany mu ritiy, chakwel kangal umwing wenen wachirik kwinyim mulong wa kuzengol kuumenanya katat.” (1 Tes. 3:2, 3) Timote wamana mutapu Paul wayikasikeshay akadivar ku Listre. Chawiy, mulong Timote wamana yibudikin yikalaku ku ukwash wa Yehova, wafanyina kuyinkish akadivar ni anambaz nend inay asu kashinsh anch niyau yom yawonsu yafanyina kwau kuwap.​—Mid. 14:8, 19-22; Heb. 12:2. w22.08 21 par. 4

Mu muvu wa 1870, chisak cha in kwilej Bibil ading atakedinau kud Charles Taze Russell asambisha kwilej Mifund chikurikina. Ading akwet kuswir kwa kwijik uyakin piur pa usey wa chakupesh cha Yesu ni mutapu ufanyidina kuvurik rufu rend. Uyakin winou wakimbau mu mivu yivud pakur kud in Kristu inay in kashinsh utukwashin nakash nlel unou. Mutapu ik? Kusutil ukwash wa Yehova, uyakin winou watuburil kal mes pa chakupesh cha Yesu ni usey wach. (1 Yoh. 2:1, 2) Twajingunin kal kand anch Bibil wisambidin mitapu yaad ya ruchingej rikwetau antu asadina rusot ra Nzamb​—amwing akwikal nich mwom wakad kufang mwiur, ni akwau avud akwikal nich mwom wa chikupu pa divu. Kutongijokin pa mutapu utukatinay nakash Yehova ni yiyukish yivud yikutambulay muntu ni muntu pakach petu mulong wa chakupesh cha Yesu, kukat kutusejish piswimp nakash ni Yehova. (1 Pita 3:18) Chawiy, mud mwasalangau akadivar netu ashinshamena a pasak, tukat kuyitazuk antu akwau kukumangan netu mulong wa kusal Chivurikish mud mutapu walejanay Yesu kuchisal. w23.01 21 par. 6-7

Yesu wayifundisha antu piur pa yiyukish yikuletau kud Want wa Nzamb. We are thankful for the ransom because it opens the way for us to enjoy a close friendship with Jehovah and Jesus. Tujikitishin nakash mulong wa difut, mulong dikat kutukwash kwikal mu urund wa piswimp ni Yehova ni mwanend. Antu akweta ritiy mudiay Yesu akwet kand ruchingej ra kushakam chikupu ni rakumanijan ni akatish nau afila kal. (Yoh. 5:28, 29; Rom 6:23) Kwikil chom ap chimwing twasala mulong wa kuwanyin yiyukish yiney, ni tukutwishap ap pakemp kuyifut Nzamb ni Kristu mulong wa yom yatusadidinau kal. (Rom 5:8, 20, 21) Pakwez tukutwish kumekesh anch tuyijikitishin nakashe. Mutapu ik? kusutin kusadin chisu chetu, usu wetu, ni yom yetu ya ku mujimbu mulong wa kukwash mudimu wa Want. Chilakej tukutwish kwipan mulong wa kukwash kutung ni kurijek yikumbu ya Want. w23.01 26 par. 3; 28 par. 5

Antu akutakela mu Want wa Nzamb akubangin tutikit ni tutikit twa antu akushakama pa divu. Mud Yesu, antu 144 000 akusal niyau mud ant ni in kupesh. (Kuj. 5:10) Mwinshin mwa Chijil cha Moses, in kupesh ading chakusambish ni chisend cha kuchidij ukash wa mujimbu wa antu ni kuyikwash kwikal piswimp ni Yehova. Chijil chading “chijingidij cha yom yiwamp yikeza kwez,” chawiy chitwishikin kulond anch antu akutakela ni Yesu akwikal niyau ni chisend cha kubangin ukash wa mujimb wa antu ni kuyikwash kwikal mu urund wa piswimp ni Yehova. (Heb. 10:1) Twijpap mutapu ant ni in kupesh inay ukusalau pamwing ni antu akushakama pa divu. Chikalap nchik mutapu ukurijekay Yehova yom, tukwet kashinsh anch antu akushakama mu Paradis akutambul umutakel ukwikalau nich kuswir.​—Kuj. 21:3, 4. w22.12 11 par. 12-13

Diyingishin dimwing ditubachikining kuyitazuk antu wakwau kukumangan netu ku Chivurikish did anch tukatining anch antu akumangena netu kapamp kakusambish ilej uyakin piur pa yom yatusadidinau kal etu awonsu kud Yehova ni Yesu. (Yoh. 3:16.) Tuchingejin anch yom yikatau kutesh ni kuman ku Chivurikish yikuyibachik kwilej yom yivud ni kwikal atushalapol a Yehova. Tukat kuyitazukang kand antu imikina kal kumusadin Yehova. Tukat kusalang mwamu kusutil kuyivurish anch Nzamb udandamedin kuyikat. Avud akat kwez ku Chivurikish ni tukat kusangar nakash patukata kuyiman. Kukumangan ku Chivurikish kukat kuyivurish musangar wadingau nich pamusadinangau Yehova. (Kus. 103:1-4) Antu eza ku Chivurikish ap bwat, tukat kuyitazuk nich mushiku mulong twij anch Yehova ukat kusanger usu tusadina.​—Luka 15:7; 1 Tim. 2:3, 4. w23.01 20 par. 1; 22-23 par. 9-11

Uchuku wasambela rufu rend, Yesu wita chom cha pakampwil mu malembil mend masalay kud Tatukwend wa mwiur. Wamwita Yehova chakwel atal mes mend pad atushalapol end. (Yoh. 17:15, 20) Chakin kamu, chisu chawonsu mes ma Yehova mading pad atushalapol end—ukat kuyibangin ni kuyiking. Pakwez, Yesu wading wij anch in kwilejend afanyina kuyirishikish kud Satan mu mutapu wakadingayap kal kand kusal. Yesu wading wij kand anch akuswiriken ukwash wa Yehova mulong wa kujijamen kurishikish kwa chisum kwa Satan. Nlel mangand ma Satan makat kuyirishikish chipandakena in Kristu akin. Tukat kurish ni yikokujol ni yakamish yikutwisha kutuziyish ni kupak kushinshaman kwetu mudiay Yehova. Pakwez tufanyidinap kumwov Satan wom. Mulong Yehova utadin mes mend pad etu—umen yikokujol turishina nich, ni ud kwaku mulong wa kutukwash. Chakin kamu, “mes ma [Yehova matadil] kud awiy akata kumulimish ndiy, mulong wa kuchidij mom yau.”​—Kus. 33:18-20, TMK. w22.08 8 par. 1-2

Muvu ni muvu pa chisu cha Chivurikish, tukat kumekesh kujikitish kwetu mulong wa yom yatusadinay Yesu kusutil kwitekin chisu cha kutongijokin mu malembil pa kurumburik kwa rufu rend. Tukat kulejan kand nich mushiku nakash mulong wa kuyitazuk antu avud chakwel akumangan netu ku chinship chinech cha pakampwil. Ni chakin kamu, tukatap kwitiy anch chom ap chimwing chitukangesh kukumangan ku Chivurikish. Ni tukat kutongijokin pa yiyukish yiyichingedina antu akweta ruchingej ra kushakam pa divu. (Isay 35:5, 6; 65:17, 21-23) Tufanyidinap kukwat uyakin winou nich kapipej. w23.01 20 par. 2; 21 par. 4

Kusutin kumupan Mwanend mud difut mulong wa kutukol ku yitil yetu, Nzamb wasala anch twikal ni dilau dia kutambul mwom wa chikupu. (Mat. 20:28) Kambuy Paul warumburila piur pa chikunku chinech cha usey cha chitongijok cha Nzamb pafunday anch: “Mudi murashika rufu mu mangand mulong wa muntu umwing, chawiy kand chimwing, kuvumbuk kwa afu kwikal kand aom kwashik kal mulong wa muntu umwing. Mudi mukat kufau antu awonsu mulong adiokala kudi Adam, chawiy kand chimwing, in Kristu awonsu akez kuvumbuk kwikal kand aom mulong wa Kristu” (1 Kor. 15:21, 22) Yesu wayifundisha in kwilejend kulembil chakwel Want wa Nzamb weza ni chakwel rusot ra Nzamb risadika pa divu. (Mat. 6:9, 10) Chikunku cha rusot ra Nzamb mulong wa antu chid anch antu ashakama chikupu pa divu. Mulong wa kusal mwamu, Yehova wamutondin kal Mwanend kwikal Mwant wa Want wend. Nzamb ukat kukumangej antu 144 000 pa divu dia kabuj, chakwel asal pamwing ni Yesu mulong wa kuwanyish rusot ra Nzamb.​—Kuj. 5:9, 10. w22.12 5 par. 11-12

Anch twafish muntu tukatina, tukat kumutong nakash! Kwinsambishin tukutwish kwiyov nayimp nakash anch twavurik machuku mend ma nsudien kurutu kwa kufa, pakampwil anch wamana mar nakash kurutu kwa kufa. Pakwez mu kusut kwa chisu, tukutwish kusambish kuchirish musangar anch twavurik yom yatufundishay, yalonday, ap yatulejay mulong wa kutukasikesh ap kand mulong wa kutusipish. Chilik chimwing, pitukata kutang nsangu jirumburila mar ni rufu ra Yesu, chikat kutwovish ushon. Pa chirung cha Chivurikish, tukat kwitekin chisu cha kutongijokin pakampwil pa chakupesh cha Yesu. (1 Kor. 11:24, 25) Pakwez kutongijokin pa yom yasalangay ni yalondangay Yesu padingay pa divu kukat kutuletin musangar nakash. Ni kutongijokin pa yom yisadinay katat ni yikutusadinay mu machuku ma kurutu kukat kutukasikesh nikwawiy. w23.01 26 par. 1-2

In kwilej a Yesu ova ushon nakash pafay. Pakish kwitek pa ndond yau. Afisha murund nau wading ukatinau, pakwez kand iyova mud ashadish kal ruchingej radingau nich piur pend. (Luka 24:17-21) Pakwez, Yesu payimekenay kupwa kwa kuvumbuk, wayikwasha kutesh mutapu wawanyishay ma uprofet ma Bibil. Kupwa wayinkisha mudimu wa usey wa kusal. (Luka 24:26, 27, 45-48) Pachirikay Yesu mwiur kupwa kwa machuku 40, in kwilej kadingap kand ni ushon, pakwez ading chad ni musangar nakash. Musangar winou wayibachika kumushiman Yehova pakad kuziy. (Luka 24:52, 53; Acts 5:42) Chakwel twimburija chilakej cha in kwilej a Yesu tufanyidin kutek Want wa Nzamb pa ndond ya kusambish mu mwom wetu. Ap anch tukwet kuswir kwa kujijaman mulong wa kudandamen kumusadin Yehova, ndiy ukanin anch ukutuyukish anch twatek yisakin ya Want pa ndond yakusambish mu mwom wetu.​—Jnsw. 10:22. w23.01 30-31 par. 15-16

Tukatinap ap pakemp niyetu kurumbuk mud mwasalay Adam ni Ev. Tukutwish kwipuk yibudikin mud yiney anch twadandamen kwilej piur pa Yehova, twasanger mikadil yend, ni twasal usu wa kwijik mutapu wend wa kutong. Anch twasal mwau, tukutwish kwikal nich kashinsh anch rukat retu mulong wa Yehova rikukul. Tongin piur pa Abraham. Wading umukatin chakin kamu Yehova. Ap anch chading chimukasikedin kwov kurumburik kwa mipak ya Yehova, Aburaham kabwambwilap. Pakwez wasala usu wa kumwijik nawamp Yehova. Chilakej, pajinguninay mupak wa Yehova wa kushesh Sodom ni Gomor, kwinsambishin, Aburaham wova wom anch “Nkalansambu wa mangand mawonsu” wafanyina kukomb antu atentamina pamwing ni antu ayimp. Ku mes ma Aburaham chadingap chovikena kusal mwamu, chawiy wamwipula Yehova nich kwikepish yipul yivud pa mulong winou. Yehova wamwakula nich kushimpish muchim. Disudien, Aburaham washikena kwijik anch Yehova ukat kushinshikin muchim wa muntu ni muntu, ni anch kandikal apupangap muntu wakad mulong pamwing ni muntu ufila nich.​—Dis. 18:20-32. w22.08 28 par. 9-10

Mu muvu wa 455 K.C.C., papwishay Guverner Nehemiy kutunguril jimbumbu ja musumb wa Yerusalem, wakimba amakundj a kuchingejin afanyina kulam musumb. Pakach pa antu atonday Nehemiy pading Hanania wadinga mukurump wa dipat. Bibil umurumburil Hanania mud “muntu wa [kuchingejin], mwin kumwov Nzamb wom kupandakan antu amwing.” (Neh. 7:2) Rukat rend mulong wa Yehova ni wom wa kumunenganesh yamubachika Hanania kukwat nich usey yisend yamwinkishau. Mikadil yiney yikutwish kand kutukwash niyetu kwikal antu a kuchingejin mu mudimu tumusadidina Yehova. Shinshikin chilakej cha Tishik wading mbay wa mudimu wa kuchingejin wa kambuy Paul. Paul wamuchingejina Tishik, ni walonda piur pend anch wading ‘kashalapol ushinshamena.’ (Efes 6:21, 22) Paul wamuchingejina kadiap ching kusu mulong wa kumutwadin mikand kud akadivar a ku Efes ni ku Kolosay, pakwez kand mulong wa kuyikasikesh ni kuyongoj. Tishik utuvurishin chilakej cha amakundj ashinshamena ni akuchingejin akata kubangin maswir metu ma mu spiritu nlel unou.​—Kol. 4:7-9.w22.09 9-10 par. 5-6

Josef wamana mar nakash mu mivu piswimp 13. Josef wafanyina kwiyipul anch Yehova wading umukatin chakin kamu. Ni wafanyina kwiyipul anch Yehova wamudjibula pa chisu chadingay ni kuswir kwa ukwash. Pakwez Josef kalamap rukuny. Pakwez, wilama kusutin kushal witudishina. Chisu chikalay ni mutapu wa kuyifundakeshin anamakwend, walika kusal mwamu ni wayimekeshina rukat ni kuyilikishin. (Dis. 45:4, 5) Josef wasala mutapu winou mulong witekina chisu cha kutong nawamp. Pa ndond pa kushinshikin pa milong yend, watongijokina pa rusot ra Yehova. (Dis. 50:19-21) Disu dilejan tudioshinaku? Anch akusadin mu mutapu uyimp, kangal wamujimen Yehova ap kutong anch wakudjibwil. Pakwez, tongijokin pa mutapu ukukwashinay kujijamen yikokujol. Chikwau kand, anch antu akwau akusadin mu mutapu uyimp, pakish kubwik dis pa kuburen kuwanyin kwau nich rukat. w22.11 21 par. 4

Muprofet Daniel wamana yishimushimu yamekesha patok anch Yehova ud upandakena piur nakash kusutamu antakel awonsu. Daniel wamana chakusambish annam anying a yidiany amekeshina makand ma pa mangand mawonsu ma pasak ni dikand dia katat—Babilon, Mediy ni Peris, Grek, Rom, ni Angleter ni Amerik. (Dan. 7:1-3, 17) Kupwa Daniel wamumana Yehova Nzamb ushich pa ditand mwiur. (Dan. 7:9, 10) Nzamb ukat kutambul ulabu wa kutakel ku maguvernema ma an a antu ni kuupan kud antu akwau awanyidina kuwikal nich ni akweta dikand nakash. Kud antu ik inay? Kud “chom chifanakena mudi mwan a muntu,” Yesu Kristu, ni kud “antu atumbila a Nzamb Upandakena Piur pa yawonsu,” 144 000 akuyikela nend “mivu ni minang.” (Dan. 7:13, 14, 18) Chakin kamu, Yehova ndiy “Upandakena Piur pa yawonsu.” Yom yamanay Daniel mu chishimushimu yikwatijadin ni yom yasambelay kulond . Daniel walond anch: “Nzamb wa mwiur, ndiy ukata kuyiswanish ant ni kuyimwang.”​—Dan. 2:19-21. w22.10 14-15 par. 9-11