Ngond wa 4

Iyipula anch: ‘Mutapu ik nikata kusal anch anyul? Ov, nikat kwitiyin kurumbuk kwam bil anch nipakishining kwiyingish nich? Ov, nikat kuyifish nich antu akwau? Chisu utangina mu Bibil nsangu ja amakundj akwau ni amband ashinshamena, shinshikin mutapu wasalau kupandakan pa mulong mud winou. Pa rusangu ni rusangu, iyipula anch: ‘Mutapu ik nikutwisha kwikal mud kashalapol winou ushinshamena wa Yehova?’ Tukutwish kand kutaninamu kusutin kuyishinshikin ambay netu mu ritiy, ikala ansand ap amapal. Chilakej, ov, ukutwish kutongijokin piur pa muntu wa mu chikumangen chen ujijamedina nich kushinshaman chikokujol—pamwing ap yibachikin yiyimp ya antu akwau, rupompat ra mu dijuku, ap mayej? Ov, umen mikadil yiwamp yikwetay muntu winou ukatina niyey kukudish mu chilik cha piur? Kusutin kushinshikin chilakej chiwamp cha mwin Kristu winou, ukutwish kwilej yom yikutwisha kukukwash kujijamen yikokujol yey. Tujikitishin nakash mud ik pa kwikal ni yilakej yiwamp mwamu ya kwimburij ya antu a mu chirungu chetu!​—Heb. 13:7. w22.04 13 par. 13-14

Anch turishin ni yikokujol mu mwom wetu, tukat kwovang musangar anch mukurump mwin kubangin wishil chisu cha kututesh ni kutukasikesh. Anch tukwet kuswir kwa ukwash piur pa kutakel dilejan dia Bibil, tukat kwovang musangar anch chibol ukweta ukaliweny watutwalaku ni watwinkish yitongijok. Akadivar ni anambaz netu awonsu akwet musangar wa kutukwash. Niyetu tukutwish kwikal ni musangar winou anch twipan kuyisadin akadivar netu. Anch ukatin kutanduril mudimu wey mu mitapu yiney, yom ik yikukukwasha kuwanyish mipak yey? Tufanyidin kubabal ni kwipuk kukwat mupak ukweta yom yivud. Chilakej, ukutwish kutong anch ‘Nikatin kusal yom yivud mu chikumangen.’ Pakwez chikutwish kwikal chikash kwijik mutapu wa kuwanyish mupak winou, ni chikutwish kukukasiken kwijik anch wauwanyishin kal. Chawiy, kwat mupak umwing wa pakampwil. Ukutwish pamwing ap kufund mupak ukwatina ni mutapu utongina kuuwanyish. w22.04 25 par. 12-13

Nlel Yehova ukat kukumangej pamwing “chisak chipandikena kujimb” cha antu ni kuyifumb mulong wa kushakam mwinshin mwa winyikel wa Want wend. (Kuj. 7: 9, 10) Ap anch ashich nlel mu mangand maurokina mulong wa rukis ni njit, antu asadina chisak chinech akat kwikasikesh kupandakan rukis pa milong ya wan a ngand, ya muchid, ni ya kukisijan amwing ni akwau. Akat kumekesh kusutin yisal yau anch akat kuchil jimpak jau ja misamun kwikal jinkasu. (Mike 4:3) Pandond pa kwiyandjik mu milong ya njit jikata kushesh antu, akat kuyikwash antu kutan “mwom udia wakin” kusutin kuyifundish piur pa Nzamb udia wakin ni piur pa yitongijok yend. (1 Tim. 6:19) Akutwish kuburen nfalang ap kuyipompat kud antu a mu dijuku mulong akwashin yisakin ya Want wa Nzamb, pakwez Yehova ukat kushinshikin anch ikala ni yom yiswirikedinau. (Mat. 6:25, 30-33; Luka 18:29, 30) Yom yiney yawonsu yitwinkishin kashinsh anch Want wa Nzamb udiaku chakin kamu ni anch ukudandamen kuwanyish rusot ra Yehova. w22.12 6 par. 13

Kupwa kwa mivu 1 000, antu awonsu pa divu akwikal awanyidina. Kukwikalap kand muntu ukwikala ni yibudikin yiyimp ya chitil chatuswanishau kud Adam. (Rom 5:12) Mashing madiokala ku chitil cha Adam akumadiosh chikupu. Chinech chirumburikin anch, antu akushakama pa divu ‘akwikal aom’ mulong akwikal antu awanyidina kwinsudien kwa mivu 1 000. (Kuj. 20:5) Twij anch Yesu washala ushinshamena kud Nzamb chikalap nchik kupak kwa Satan. Pakwez, ov, antu awonsu akwikala awanyidina akuswakal kushal ashinshamena anch Satan wapakish kuyipak? Muntu ni muntu ukwiyakwilap amwinend ku chipul chinech chisu chikumulikijawaku Satan kupwa kwa mivu 1 000. (Kuj. 20:7) Antu akushala ashinshamena pa chirung cha kupak kwa nsudien akutambul mwom wa chikupu ni kusanger want ipau wakin. (Rom 8:21) Antu akubwabwila akuyishesh chikupu, pamwing ni Djabul ni ayilembil end.​—Kuj. 20:8-10. w22.05 19 par. 18-20

Uprofet winou wawanyina chisu Satan chayibachikay in Yuda ni in Rom kumujip Mwan a Nzamb. (Luka 23:13, 20-24) Mud mutapu ukutwisha chitat cha ku kapolantundu kumukangesh muntu kwend ap kusal mudimu mu chisu kanang, rufu ra Yesu ramukangesha kusal chom ap chimwing mu machuku masatu masalay mwi nzay. (Mat. 16:21) Mulong wa kuwanyish uprofet udia mu Disambishil 3:15, Yesu kafanyinap kudandamen kushal mwi nzay. Mulong wak? Mulong kukwatijan ni uprofet, rubut rafanyina kumuchany nnak ku mutu. Chinech chirumburikin anch chitat cha ku kapolantundu ka Yesu chafanyina kuyerik. Ni mwawiy kamu chasadika! Pa dichuku dia kasatu kupwa kwa rufu rend, Yesu amuvumbula mud chitang cha mu spiritu chikweta mwom wakad kufang. Pa chisu chatenchikay kal Nzamb, Yesu ukumuchany Satan ni kumushesh chikupu. (Heb. 2:14) Antu akuyikela pamwing ni Kristu akumukwash kuyikomb akankuny awonsu a Nzamb pa divu—charumburik anch rubut ra nnak.​—Kuj. 17:14; 20:4, 10.w22.07 16 par. 11-12

Anvaj yikwashany anen kwikal nau arund awamp. Dizu dia Nzamb dilejen kamu patok anch arund netu akutwish kwikal ni yibachikin yiwamp ap kand yiyimp pad etu. Ov, wijany arund a anen? Yom ik ukutwishanya kusal mulong wa kuyikwash anen kwikal nau arund amukatina Yehova? (1 Kor. 15:33) Ukutwishany kuyikwash kukwat mipak ya manangu mu kuyitazuk antu akweta urund uwamp ni Yehova kwimbomb pamwing nen ku difukwil dia mu dijuku dien. (Kus. 119:63) Tatuku umwing utazukinau anch Tony urumburil anch: “Mu kusut kwa mivu, am ni mukajam twayitazukang kwol kwetu akadivar nau anambaz a mivu kushalijan ni a jingand kushalijan. Adiangang yakudia pamwing netu ni twasalang nau difukwil dia mu dijuku pamwing. Winou ud kamu mutapu uwamp nakash wa kwijikijan nau antu amukatina ni amusadidina Yehova nich musangar. . . . Yom yayishikena, mushiku wau ni muchim wau wa kwipan yayikasikesha kamu nakash anetu ni yayikwasha kumusejin Yehova piswimp.” w22.05 29-30 par. 14-15

Anch amakurump atanijan ni muntu wasalang chitil, rutong rau rid ra kukwat panap pa divu mupak wa mutapu umwing ni wasambelangau kal kukwat mwiur. Mutapu ik ukata chikumangen kutaninamu mu ditenchik dined? Ditenchik dined dikat kukwash kwikal nich kashinsh anch antu asadina yitil pakad kukarumuk, akutwisha kuyisal nayimp amikoku a usey a Yehova ayopatin mu chikumangen. (1 Kor. 5:6, 7, 11-13; Tit. 3:10, 11) Chinech chikutwish kand kumukwash muntu wasalang chitil kukarumuk ni kutaninamu mu dilikishin dia Yehova. (Luka 5:32) Amakurump akutwish kulembil mulong wa muntu wasalang chitil ukarumukina ni kumwit Yehova chakwel amukwash kuchirish urund ni ndiy. (Jak. 5:15) Chad chid nchik anch muntu wamekesh anch kakarumukinap chisu chatanijanangay kal ni amakurump? Anch chid mwamu, muntu winou akumwopat mu chikumangen. Pakwez, anch muntu wachirish manangu, wakarumuk chakin ni waswimp, Yehova ud kwaku mulong wa kumulikishin. (Luka 15:17-24) Chinech chid kand mwamu ap anch yitil yend yading yikash nakash.​—2 Jsng. 33:9, 12, 13; 1 Tim. 1:15. w22.06 9 par. 5-6

In Kristu pa divu diawonsu atwishin kal kupandakan yikokujol yikash ni kurishikish kwa Djabul kusutin ukwash wa Yehova. (1 Pita 5:8, 9) Niyey ukutwish kusal mwamu. Piswimp ap, Yehova ukumwinkish Yesu pamwing ni antu akuyikelay nend mbil ya “kushesh midimu ya Sakudimban.” (1 Yoh. 3:8) Ni kashalapol wend mwawonsu ukwikala pa divu ‘kakwovap wom wa chom ap chimwing ni kakez kubangap chakamish ap chimwing.’ (Isay 54:14; Mike 4:4) Kurutu chisu chinech chishika, tufanyidin kudandamen kusal usu wa kupandakan wom wetu. Tufanyidin kudandamen kukasikesh kashinsh ketu anch Yehova uyikatin ni ukat kuyichidij atushalapol end. Yikutukwasha kusal mwamu kud kutongijokin ni kulond piur pa mutapu Yehova wayikwashay atushalapol end pasak. Ni tufanyidin kulam mu manangu mutapu watukwashay etu pakampwil kurish ni yikokujol yikash. Nich ukwash wa Yehova, tukutwish kupandakan wom wetu!​—Kus. 34:4. w22.06 19 par. 19-20

Dikand dia pa mangand mawonsu difanakeshinau nich “[yidjatil] ya utad ujal ni kam” diameken kal. Dieza kwikalaku pa chirung cha Njit ja Kusambish ja pa Mangand Mawonsu, chisu chabombakanay Grande-Bretagne ni États-Unis ni kusal pamwing. Chirumbidij cha mu chilat cha Nebukadinesar chasambela kulejan yom yafanyina kusal anch dikand dined dia pa mangand mawonsu dishalijan ni makand makwau masambelaku. Chinyim ni makand masambelaku malejenau mu chishimushimu, kubombakan kwa Angleter ni Amerik kakufanakeshap nich chikung chikash mud utad wa or ap wa argent, pakwez nich utad ujal ubombakeshinau ni kam. Kam umekeshin ‘majuku ma antu,’ ap antu a mwinshin. (Dan. 2:43) Mud muchimekena patok nlel, antu inay akwet chibachikin chikash pa kutond kwa ntakel wa ngand, pakatau kurishin want ipau wa antu, pakatau kubwambwil ku umutakel wa anyikel, ni pa yisak ya antu in kuyilondin ansalamudimu. w22.07 4-5 par. 9-10

Ov, widjidjekin kutambul dibatish? Yey kusu amwiney ukutwisha kwakul chipul chinech, ‘Yom ik nichingedina?’ (Mid. 8:36) Yesu wafanakesha kusal rusot ra Tatukwend ni yakudia. Mulong wak? Mulong kudia kud kwa usey kud etu awonsu. Yesu wading wij anch yom yawonsu yitwitinay Yehova kusal yid yiwamp mulong wetwetu. Yehova kakutwishap kutwit kusal chom chikutwisha kutusal nayimp. Ov, Yehova ukatin kand anch akubatish? Mwaning. (Mid. 2:38) Chawiy ikal nich kashinsh anch kuziyin kwi mbil ya kutambul dibatish kukukuletin yiyukish. Anch ukutwishap kwidjidjek kudia yakudia yiwamp, chad mulong wak ukwidjidjeka kukubatish? Uchingedin ik? Antu avud akutwish kwakul anch: “Chisu cham kandikal chiwanyin.” Chakin, mupak wa kwipan kud Yehova ni kutambul dibatish ud mupak umwing wa usey nakash. Chawiy, chid cha usey kuutongijokin nakash, kwitekin chisu, ni kusal usu nakash mulong wa kuuwanyish. w23.03 7 par. 18-20

Pamuzizilau many, Yesu wikala chikunku chakusambish cha mu rubut ra mband. Kupwa kwa Yesu kufa ni kuvumbuk, Nzamb ‘wamudjika chibangul cha uyaj ni katumb’ ni wamwinkisha “ulabu wawonsu wa mwiur ni wa pansh,” kuwejaku ulabu wa “kushesh midimu ya Sakudimban.” (Heb. 2:7; Mat. 28:18; 1 Yoh. 3:8) Pakwez kwafanyina kand kwikal chikunku chikwau mu rubut riner. Kambuy Paul wisambina antu a mu chikunku chinech payilejay in Kristu azizidilau many in Yuda ni a michid yikwau anch: “Anch en udiany ayen a Kristu, chawiy udiany a [rubut ra] Aburaham, mwamu udiany answan a chiyukish chashilayimu Nzamb.” (Gal. 3:28, 29) Anch Yehova wamuzizin mwin Kristu many nich spiritu utumbila, muntu winou wikal kal wa mu rubut ra mband. Chawiy mu rubut riner mud Yesu Kristu ni antu 144 000 akuyikela nend. (Kuj. 14:1) Antu inay awonsu akat kusal usu wa kutong ni kusal yom mud Tatukwau, Yehova Nzamb. w22.07 16 par. 8-9

Tuchingejin anch tukurish ni yikokujol yikash mu chirung chinech cha machuku ma kwinsudiel. (2 Tim. 3:1) Mu yirung mud yiney, tukutwish kwov runeng nakash, pakampwil anch chimeken anch turishin ni yakamish yilondulijadina, ap kand yivud pa kapamp kamwing. Pakwez, vurik anch Yehova ukat kututal mes mend, ni kusutin ukwash wend tukutwish kwikal nich kashinsh anch tukupandakan yikokujol yin yawonsu. Shinshikin mutapu Yehova wamukwashay ikundj ushinshamena Job. Warisha ni yikokujol yikash nakash mu kachisu kakemp. Mu dichuku kwau dimwing, amuleja Job nsang jikash ni jitapina ku muchim anch annam end awonsu ayiya, atushalapol end ayijipa, ni cha ushon kupandakan anch anend akatish afa. (Job 1:13-19) Chisu chikemp kupwa kwa yiney, pa divund dia mar mend piweja kand mutond, Job wayela mayej masansena mamuyipisha mujimbu. (Job 2:7) Mes ma Yehova mading padiay Job. Mulong Yehova wading umukatin Job, wamwinkisha yawonsu yading yiswirikedinay mulong wa kujijamen yikokujol yend. w22.08 11 par. 8-10

Dipup dikutwish kutwovish ushon. Tukutwish kutong anch kwadiap mayingishin ma kutupupin, ap kand anch atupupang kwa chisum nakash. Mud chibudikin, chinech chikutwish kutukangesh kuman chom chidia cha usey nakash—kuman dipup mud chisal cha rukat cha Yehova kud etu. (Heb. 12:5, 11) Chawiy, itiy dipup, ni sal usu wa kuswimp. Tupamp tuvud, Yesu wamupupa Pita kurutu kwa atwimbuy akwau. (Mar. 8:33; Luka 22:31-34) Pamwing ap Pita wiyovang kamu nayimp nakash! Pakwez washala ushinshamena kudiay Yesu. Witiya dipup ni wilejina ku kurumbok kwend. Mud chibudikin, Yehova wamuyukisha Pita mulong wa kushinshaman kwend ni wamwinkisha yisend yivud mu chikumangen. (Yoh. 21:15-17; Mid. 10:24-33; 1 Pita 1:1) Tukat kutaninamu ayinetu ni antu akwau akat kutaninamu anch twalik kushinshikin pa kusansan kwa dipup twovila, ni twasal usu wa kwitiy dipup ni kuswimp. Anch twasal mwamu, akutusadin nakash kud Yehova ni kuyisadin akadivar netu. w22.11 21-22 par. 6-7

Aburaham wading wij anch Yehova kakutwishap kusal chom mu mutapu wakad kutentam ap wakad rukat. Kukwatijan ni kambuy Paul, Aburaham watonga anch Yehova wafanyina kumuvumbul mwanend mukatish Isak. (Heb. 11:17-19) Pakwez, Yehova wading washilamu kal anch Isak wafanyina kuval muchid, ni pa chisu chinicha, Isak wading kandikal avalap mwan. Aburaham wading umukatin Yehova, chawiy wachingeja anch Tatukwend ukusal yom yitentamina. Ku ritiy, waziyina ap anch chading chikasiken kusal mwamu. (Dis. 22:1-12) Mutapu ik tukutwisha kumwimburij Aburaham? Tufanyidin kudandamen kwilej piur pa Yehova mud mwasalay ndiy. Anch twasal mwamu, tukumusejin piswimp ni kumukat kand chipandakena. (Kus. 73:28) Kom ketu kakwikal kafumbinau ni katakedinau kud manangu ma Nzamb. (Heb. 5:14) Mud chibudikin, anch muntu watupak mulong wa kusal yom yiyimp, tukwitiyap. Tukukis chitongijok chawonsu cha kusal yom yikutwisha kumunenganesh Tatukwetu ni kuyipish urund wetu ni ndiy. w22.08 28-29 par. 11-12

Pachirikirilau ku Listre, ku Ikon, ni ku Antiosh, kambuy Paul ni Barnabas ‘atonda amakurump mu yikumangen yawonsu mulong wa awiy.’ (Mid. 14:21-23) Pakad kwidjidjek, amakundj inay atondau amekesha kwikal musul wa rongoj mu yikumangen yau, mud mutapu usadiningau amakurump nlel. Amakurump, ikalan nich nkeu ja kuyikwash antu akutwisha kwikal ni maswir ma “dizu diwamp” dia dikasikesh. Paul wayivurisha ambay nend in Kristu anch kusutin ukwash wa Yehova, “chisak chijim cha atuman” ajijamena yikokujol yikash. (Heb. 12:1) Paul wamana anch nsangu ja mwom ja antu atwisha kujijamen milad yin yawonsu ya yikokujol jikutwish kuyikwash akadivar ni anambaz nend kutakaman ni kushinshikin pa “musumb wa Nzamb mwom.” (Heb. 12:22) Chid kand mutapu umwing ni nlel. Nany wakadingawap kal kukasikesh kusutin kutang nsangu piur pa mutapu Yehova wamukwashay Gedeyon, Barak, David, Samuel, ni atushalapol end akwau kand?​—Heb. 11:32-35. w22.08 21-22 par. 5-6

Dirumburish dia antu akuvumbulau dikwimen pa “yisalijok” ik? Ov, dikwimen pa yom yasalau kurutu kwa kufa? Bwat! Vurik anch akusula yitil yau pafau. Chawiy, pinap “yisalijok yau” kiyidiap ya mwom wadingau nich kurutu kwa kufa. Pakwez, afidin kwisambin piur pa yisalijok yau kukwatijan ni yom yikuyifundishau mu mangand masu. Ap amakundj ashinshamena mud Nowa, Samwel, David, ni Daniel niyau akwilej piur pa Yesu ni kwitiyij mu yakupesh yend. Anch amakundj inay akwikal ni yom yivud ya kwilej, chimeken anch antu akad kutentam akwikal ni yom yivud nakash ya kwilej! Yom ik ya nsudiel yikuyishikena antu akulika kwau dilau dined diwamp nakash? Kujingunik 20:15 utulejin anch: “Muntu mwawonsu wakad kufundau dijin mu mukand wa mwom amudjibula kand niyend mu dijiy dia kasu.” Chakin kamu, akuyishesh chikupu. Chawiy, chid cha usey nakash kwikal nich kashinsh anch dijin dietu adifundin mu mukand wa mwom ni didandamedin kushalamu! w22.09 19 par. 17-19

Mipak yivud tukwatining piur pa mujimbu wetu ni mutapu wa kwiyokish yimedining pa kom ketu kafumbinau kud Bibil. (1 Tim. 3:9) Chisu tukwatina mipak ni kuyisambin nau antu akwau, tufanyidin kusadin mbil yidia mu Filip 4:5, NWT: “El mwikadil wen wa kwisikan wijikan kud antu awonsu.” Anch tud isikena, tukwiyakamishap kusut chipim piur pa ukash wa mujimbu wetu; ni tukuyibachikap antu akwau kwitiyij yitongijok yetu. Tuyikatin ni tuyilimishin akadivar nau anambaz netu, ap anch mipak yau yishalijadin ni yetwetu. (Rom 14:10-12) Tukat kumekesh anch tumujikitishin Yehova, Musul wa mwom, anch twachidij mwom wetu ni anch twamusadin nich muchim wawonsu. (Kuj. 4:11) Katat, tukat kuyel ni kuman mar. Pakwez ukawiyap mwom wasotay Sakatang wetu anch twikal nich. Piswimp ap ukutwinkish mwom wa chikupu ni kukwikalap kusansan ap rufu. (Kuj. 21:4) Pa tuchingedina chisu chinicha, chid cha usey kwikal mwom ni kumusadin Yehova, Tatukwetu wa rukat udia mwiur. w23.02 25 par. 17-18

Yehova wamekesha patok anch ukwet ulabu wa piur nakash pad “in kutakel.” (Rom 13:1) Shinshikin yilakej yisatu. Farao wading ntakel wa mu Idjibit wayilama antu a Yehova mu uswik ni walika tupamp tuvud kuyilikijaku. Pakwez Nzamb wayikwola, ni wamujiyisha Farao mu Karung Musuz. (Kub. 14:26-28; Kus. 136:15) Belishasar Mwant wa Babilon wasala musambu ni “[witutula kurutu kwa] Nzamb wa mwiur” ni “[wayishimana akish] asalau nich utad wa or, ni a utad wa argent” pa ndond pa kumwifukwil Yehova. (Dan. 5:22, 23) Pakwez Nzamb wamushikumwisha. “Uchuku wa dichuku dinidia,” Belishasar amujipa ni apana want wend kud in Mediy ni Peris. (Dan. 5:30, 31) Mwant Herod Agripa I wa mu Palestin wamujipa kambuy Jakobu ni wamukasa kambuy Pita nich chitongijok cha kumujip. Pakwez Yehova wamukangesha Herod kusal yom yading yitonginay. “Muruu wa mwiur wamubula,” ni wafa.​—Mid. 12:1-5, 21-23. w22.10 15 par. 12

Anch watang piur pa mutapu Yehova wayibanginay antu ading amushinshamedina pasak, ruchingej retu rikukasikan kamu kupandakan. Yom yawonsu yafundau mu Dizu dia Nzamb ‘ayifunda mulong wa kutufundish nich etu, chakwel ku kujijaman kwetu ni ku rongoj ra Mifund tutwisha kwikal nich ruchingej.’ (Rom 15:4) Tongijokin piur pa mutapu wawanyishay Yehova kushilamu kwend. Shinshikin yom yasalay Nzamb kud Aburaham ni Sara. Ading apamin kal nakash ni kadingap ni mutapu wa kuval. Pakwez, Nzamb wayishilamu anch akuval mwan. (Dis. 18:10) Mutapu ik wiyovay Aburaham? Bibil ulondin anch: “Witiyija nich ruchingej, . . . [anch ukwikal] ngakiril wa michid yivud.” (Rom 4:18) Ap anch Aburaham kadingap kija mutapu ukuwanyina kushilamu kwa Nzamb, wading nich kashinsh anch Yehova ukuwanyish kamu kushilamu kwend. Yom yachingejay ikundj winou yawanyina kamu chakin. (Rom 4:19-21) Rusangu riner ritufundishin anch tufanyidin chisu chawonsu kumuchingejin Yehova anch ukuwanyish kushilamu kwend. w22.10 27 par. 13-14

Mazu minam mawanyina chisu chayikwolau in Yuda mu winkwal. Yehova wamekesha amwinend anch ud mulej wau mujim, ni kusutin umutakel wend, antwend atwisha kuchirish difukwil dishitwila. Chid chiyukish mud ik kud etu kumwikal nend Yehova mud Mulej wetu Mujim. Isay watufanakesha ni in kwilej afundishinau kud Yehova palondinay anch: “Mes men makez kuman Mulej wen Mujim.” Mu chilakej chinech, Mulej amumekeshin mud ud kurutu kwa in kwilejend. Did dilau tukweta dia kwikal afundishinau kud Nzamb nlel. Mutapu ik ukatay Yehova kutufundish? Ukat kusal mwamu kusutin dirijek diend. Tujikitishin mud ik mulong wa umutakel wovikena tukata kutambul mu dirijek! Umutakel tukata kutambul kusutin yikumangan, yitentam, ap kusutin mikand yetu, ma program ma télédiffusion, ni yom yikwau kand, ukat kutukwash kujijaman nich musangar pa yirung ya mar. w22.11 10 par. 8-9

Yesu walonda piur pa chisu cha disudiel dia mangand anch: “Kwikil muntu wija kushik kwa dichuku dinidia ap kwa chisu chinicha. Aruu a mwiur kijap, ap Mwan, ching kusu Tatuku ndiy wija amwinend.” Kupwa wayibabesha in kwilejend awonsu anch “chishany ku mes.” (Mar. 13:32-37) Mulong wa kupand, in Kristu in Yuda a mu mivu chitot yakusambish ading afanyidin kudandamen kuchish ku mes. Yesu wayileja in kwilejend anch: “Piukumananya amasalay awombamu musumb wa Yerusalem, chad ukez kijikany anch, udi piswimp ni kusheshik.” Anch yom yiney yashik, ading afanyidin kuziyin ku mazu mayilejau kud Yesu anch “achinyin ku mikandu.” (Luka 21:20, 21) Antu ata matu ku kubabesh kwinoku apanda chisu chasheshau Yerusalem kud in Rom. Nlel tushich pa chirung cha disudiel dia mangand minam mayimp. Chawiy niyetu tufanyidin kwilam ni kuchish ku mes. w23.02 14 par. 1-2; 16 par. 3

Yehova ukat kuyifundish atushalapol end kwikal in kashinsh ni antu atentamina. Chinech chikat kuyiletin kalimish ni chisambu cha mu manangu. (Jnsw. 13:5, 6) Ov, wawiy mutapu wasalay piur pey chisu wading wilejina Bibil? Wileja anch jinjil ja Yehova jid jiwamp mulong wa antu awonsu, ni mulong weyey pakampwil. (Kus. 77:14) Chawiy ukatin kusal yom yimenay Nzamb anch yitentamin. (Mat. 6:33) Ukatin kulondin uyakin ni kumekesh anch yom yalonday Satan piur pa Nzamb wetu Yehova mading makasu. Mutapu ik ukutwisha kusal mwamu? Ukutwish kutond mwom umekeshina mud ulondin anch: ‘Nikisin makasu ma Satan, ni nikatin uyakin. Yehova ndiy Mwant wam ni nikatin kusal yom yilejenay anch yitentamin.’ Mutapu ik ukutwisha kusal mwamu? Ipana kud Yehova mu malembil ni kupwa mekesh patok anch wipanin kal kud ndiy kusutin kutambul dibatish. Kukat yom yiwamp ni yitentamina kwawiy kukukubachika kutambul dibatish. w23.03 3 par. 4-5

Kud chisambu chakadau antu mu mangand minam kwijik. Chid “chisambu cha Nzamb,” yovil yikata kusal anch twiyov pee ku muchim kusutin kwikal mu urund wa piswimp ni Tatukwetu wa mwiur. Anch tukwet chisambu cha Nzamb, tukutwish kwiyov anch tud mu diking. (Fil. 4:6, 7) Tukat kusanger urund wa piswimp ni antu amukatina ndiy. Ni tukat kusanger urund wa piswimp ni “Nzamb wa chisambu.” (1 Tes. 5:23) Anch twamwijik, twamuchingejin, ni twamuziyin Tatukwetu,chisambu cha Nzamb chikutwish kupizurish muchim wetu chisu turishina ni yikokujol yikash yitunenganeshina. Ov, chid kamu chiswapela kutan chisambu cha Nzamb chisu turishina ni milong yikash mud mayej makash, yinship yikash, kupwitamijan kwa antu, ap anch atuzengol? Milong yiney yikash yikutwish kutwovish wom nakash. Pakwez Yesu wayiyula in kwilejend anch: “Kangal wovany ushon ni kunenganan nakash. Kangal wovany wom.” Cha musangar mulong akadivar nau anambaz akat kulondul chiyul chinech cha Yesu chid mu mufund wa nlel. Nich ukwash wa Yehova, akat kutan chisambu ap chisu chirishinau ni milong yikash. w22.12 16 par. 1-2

Tukutwishap kukangesh yom yimwing kushiken mu mwom wetu. Chawiy, chid cha usey kulik kutong anch usey wetu wimedin pa yisend tukweta ap kwilakej yisend yetu ni yisend yikwetau antu akwau. (Gal. 6:4) Chid cha usey anch tukimb mitapu ya kuyikwash antu akwau ni kumwifukwil Yehova. Chikutwish kukuswapel kutanduril mudimu wey mulong wa Yehova anch wapipej mwom wey ni wipuk mabaz makad usey. Kwat tumipak tukemp tukemp tukutwisha kukukwash kuwanyish mupak ujim ukwatina. Chilakej, anch mupak ujim ud wa kwikal chibol wa rawonsu mu machuku ma kurutu, ov, ukutwish kwitekin chisu cha kusal mud chibol nkwash kusambish katat? Anch mupak wey ud wa kwikal nkwash a mudimu, ov, ukutwish kwishil chisu chivud mulong wa kwipan nakash mu mudimu wa kulejan ni kuyendin ayej ni akadivar amapal a mu chikumangen chen? Ukaliweny ukwikala nich katat ukukufungwil njil ya kwikal ni yisend yikwau mu machuku ma kurutu. Kwat mupak wa kusal yawonsu utwishina mu chisend chawonsu chikwinkishinau. w22.04 26 par. 16-17

Yehova ukutwish kutukwash kujijamen yikokujol turishina nich mu mwom wetu ni kutan musangar mu mudimu wetu utumbila. Anch twamulej mulong turishina nich, Yehova Nzamb wetu ukutwish chakusambish kutwinkish kapamp kamwing usu tuswirikedina mulong wa kujijamen yikokujol yetu. Ni anch milong turishina nich yipwilap pa chisu twadia tuchingejidina, tufanyidin kudandamen kumwit Yehova usu tuswirikedina mulong wa kujijaman. Utwitin kusal mwamu. Chawiy chitongijok chidia mu mazu ma Isay malondina anch: “Kangal wamulikany [Yehova] kwiswedish.” (Isay 62:7) Mazu minam marumburikin ik? Tufanyidin kudandamen kumulembil Yehova mu chilik cha kwel anch tud mud tumushidinap chisu chakwel iswedish. Mazu ma Isay matuvurishin yilakej ya Yesu piur pa malembil yidia mu Luka 11:8-10, 13. Mu yilakej yiney, Yesu utukasikeshin ‘kudandamen’ kulembil ni ‘kudandamen kwit’ spiritu utumbila. Tukutwish kand kumulembil Yehova chakwel atwinkish umutakel tuswirikedina mulong wa kukwat mipak yiwamp. w22.11 8 par. 1; 9-10 par. 6-7

Ey ni dijuku diey ufanyidinany kwirijek kusambish katat mulong wa kuzengol. Kangal wapakish kutong yom yiyimp yawonsu yikutwisha kushiken. Pakwez, kasikesh urund wey ni Yehova ni yikwasha kand aney kusal mwamu. Anch wikal ni yakamish yisu yimwing, ufanyidin kumufungwil Nzamb muchim wey. (Kus. 62:7, 8) Isambinany mu dijuku dien mayingishin mafanyidina kukubachikany kumuchingejin Yehova. Mud muchidia piur pa yinship yikash, kwirijek kwey ni kumuchingejin Yehova kukuyiletin aney kutakaman ni chisambu. Chisambu cha Nzamb chikat kusal twiyova anch tud mu diking (Fil. 4:6, 7) Kusutin chisambu chinech, Yehova ukat kutukwash kwiyov pee chikalap nchik mayej, yinship yikash, ap kuzengol kukutwisha kwikal ni yibachikin pad etu nlel. Ukat kuyisadin amakurump akata kusal mudimu ukash mulong wa kutubangin. Ni ukat kutukasikesh etu awonsu kukwashijan amwing ni akwau. Chisambu tusangaredina nlel chikutukwash kujijamen yikokujol ya kurutu, ap ‘mar makash.’​—Mat. 24:21. w22.12 27 par. 17-18

Tufanyidin kand kusal usu wa kulik kwifish nich mulong wa yitil yikash twasala pasak. Chakin kamu, tufanyidinap kuman chipan cha difut mud diawiy diyingishin dia “kusal yitil [kwa kwisotin].” (Heb. 10:​26-31) Pakwez tufanyidin kwikal ni kashinsh anch ang twasal usu wa kukarumuk kudiokal ku chitil chijim, twakimb ukwash udiokila kud Yehova ni amakurump a yikumangen, ni twaswimp mwikadil wetu, ukutulikishin kamu rawonsu. (Isay 55:7; Mid. 3:19) Chipan cha difut chikwet usu wa kubwik yitil yetu yawonsu ni chawiy chisadina anch twikal ni ruchingej ra kwandam mu Paradis. Mwom mu Paradis ukwikal usangareshina nakash. Tukwikal chisu chawonsu pamwing ni antu awamp ni mudimu usangareshina nakash. Ni chipandakena kuwap, dichuku ni dichuku tukwikal ni mutapu wa kumwijik nawamp Tatukwetu wa mwiur ni kusanger yom yikutwinkay. Kukwikal kand yom yivud ya kwilej piur pend, ni piur pa yitang yend. w22.12 13 par. 17, 19

“Mband” winou kafanyidinap kwikal Ev. Uprofet wasambela kulond anch rubut ra mband ‘rikumuchany’ nnak ku mutu. Satan ud chitang cha mu spiritu, ni kwikil muntu wakad kuwanyin wa rubut ra Ev wafanyina kutwish kumuchany. Chad mutapu ik wafanyinau kumushesh Satan? Mband ujimbwilau mu Disambishil 3:15 amujingunin mu buku wa nsudiel wa Bibil. (Kuj. 12:1, 2, 5, 10) Mband winou kadiap wa pa divu! Ukwet ngond mwinshin mwa mend yend ni chibangul chikweta atutumbu 12 ku mutu wend. Uvadin mwan ushalijadina kulemp nakash ni mwan uvadiningay muntu—mwan winou ud Want wa Nzamb. Want ud wa mwiur, chawiy mband niyend ufanyidin kwikal mwiur. Mband winou umekeshin chikunku cha dirijek dia Yehova chidia mwiur mudia yitang ya mu spiritu yishinshamena (Gal. 4:26) Dizu dia Nzamb ditukwashin kand kwijik rubut ra kusambish ra mband. Rafanyina kwikal ra mu dijuku dia Aburaham.​—Dis. 22:15-18. w22.07 15-16 par. 6-8

Bibil ud chipan cha Yehova mwizwila manangu mend. Yiyul ya Bibil yikat kuyikwashang antu nakash. Bibil ukat kuswimp mwom ya antu. Chisu chafundau mabuku makusambish ma Bibil, Moses wayileja antu a Nzamb, in Isarel piur pa mazu minam anch: ‘Kangal wakamapipejany, mulong mawiy madia mwom wey.’ (Kuv. 32:47) Antu aziyina Mifund ading ni musangar mu mwom wau. (Kus. 1:2, 3) Ap anch Dizu dia Nzamb adifunda pakur nakash, pakwez ni katat dichikwet usu wa kuswimp mwom ya antu. yiyul yidiamu yikatap kand kudandamen kwikal ni usey. Ku mutambu ukwau, mbil ja Bibil jikat kulam usey waj chikupu; jikat kuyikwash antu a yirung yawonsu. Anch twatang buku winou utumbila ni kutongijokin pa yom twilejina, Muntu wamufundikisha ukat kusadin spiritu wend utumbila mulong wa kutukwash kuman mutapu tukutwisha kusadin yiyul ya Bibil mu mwom wetu. (Kus. 119:27; Mal. 3:16; Heb. 4:12) Chakin kamu, Nzamb mwom wafundikisha Bibil ukatin kukukwash. Ov, chinech chifanyidinap kutubachik kutang Bibil dichuku diawonsu! w23.02 3 par. 5-6

Kujingunik shapitre wa 13 utulejin anch mutu wa sambwad, udia Dikand Dia pa Mangand Mawonsu Dia Angleter ni Amerik ukat kusal yom mud nnam wa chidiany ukweta “misengu yaad mudi mwan a mukoku, pakwez ukat kulond mudi iyazangomb.” Nnam winou ukat kusal “yilay yijim, washirisha kasu kudiokal mwiur kez pansh ku mes kwa antu awonsu.” (Kuj. 13:11-15) Kujingunik shapitre wa 16 ni 19 umurumburil nnam winou mud ‘muprofet wa makasu.’ (Kuj. 16:13; 19:20) Daniel niyend ulondin yom yifanakena ni yiney anch, Dikand Dia pa Mangand Mawonsu Dia Angleter ni Amerik dikez “kashesh yom yivud.” (Dan. 8:19, 23, 24) Chinech chawiy kamu chom chasadika pa chirung cha Njit ja Kaad ja pa Mangand mawonsu. In siyans a mu Grande-Bretagne ni États-Unis d’Amérique awiy asala mabomb atomik maad mashikija ku kupwish njit jinej. Kusutin kusal mabomb minam, Dikand Dia pa Mangand Mawonsu Dia Angleter ni Amerik, “[diashirisha] kasu kudiokal mwiur kez pansh.” w22.05 10 par. 9