Ngond wa 5

Kupwa kwa kuman chisak cha mwiur, Yohan wamana kand “runtu ruvud.” Chinyim ni chisak cha antu 144 000, chikasiken kwijik uvud wa antu adia mu chisak runtu ruvud. Yom ik twilejina piur pau? Yohan walond anch: “Adi antu adiokila mu mar makash mapandakena. Awiy atutin kal ankandj au ni kuyitokish mu mash ma Mwan a Mukoku.” (Kuj. 7:14) Kupwa kwa kupand ku mar makash, “runtu ruvud” rikushakam pa divu ni kusanger yiyukish yikwamushena (Kus. 37:9-11, 27-29; Jnsw. 2:21, 22; Kuj. 7:16, 17) Twikal ni ruchingej ra kuya mwiur ap kushakam pansh, ov, twimen ayinetu pa chipich cha mazu mafundinau mu Kujingunik shapitre wa 7? Chakin, twimen kamu. Chikwikal chisu cha musangar mud ik ku yisak yawonsu yaad ya atushalapol a Nzamb! Tukwov musangar nakash pa kuman anch twakwata mupak uwamp wa kunung chikas ku winyikel wa Yehova. w22.05 16 par. 6-7

Chakwitinap kal kukwat mupak wa usey nakash, pakad kwidjidjek, walembila mulong wa kumwit Yehova manangu. (Jak. 1:5) Mwant Salomon wafunda anch: “Manangu chid chom cha usey nakash.” (Jnsw. 4:​7, NWT.) Chawiy, Salomon kadingap kisambidina piur pa manangu ma mitapu yawonsu. Wading wisambidin piur pa manangu madiokila kud Yehova Nzamb. Pakwez, ov, manangu madiokila kud Nzamb makutwish kutukwash kupwish milong turishina nich nlel? Mwaning, makutwish kutukwash. Mutapu umwing tukutwisha kamu kwikal in manangu ud wa kwilej ni kusadin malejan ma amakundj aad ading ni mamangu nakash. Wakusambish ud Salomon. Bibil ulondin anch “Nzamb wamwinkisha Mwant Salomon manangu ni ronganyin rijim nakash.” (1 Ant 4:29) Wakaad ud Yesu, Yesu wading ni manangu nakash makad kutwish kwilakej ni muntu mukwau. (Mat. 12:42) Asambela kulond piur pa Yesu anch: ‘Spiritu wa Yehova ukwikal padi ndiy, Spiritu wa manangu ni wa kujingunin.’​—Isay 11:2. w22.05 20 par. 1-2

Kangal twatong anch tud ipal nakash ni tukutwishap kuwanyish mipak ya mu spiritu. Man chilakej cha nambaz Beverley ukweta mivu 75. Wayela nakash ni chasala anch chimukasiken kwend. Pakwez wading ukatin nakash kwipan mu kampany wa Chivurikish. Chawiy wakwata mipak ya pakampwil. Pawanishay Beverley mipak yend piur pa kampany, wova musangar nakash. Usu wend wayibachika antu akwau kwipan nakash mu mudimu wa kulejan. Yehova ukwatin nich usey mudimu usadinau akadivar ni anambaz amapal, ap anch kud yom yimwing yakadau kutwish kusal. (Kus. 71:17) Kwat mipak ukutwisha kuwanyish. Kudish mikadil yikumusangaresha Yehova. Kudish ukaliweny ukukukwasha kwipan nakash mu mudimu wa Yehova ni kukwash dirijek diend. Kimb mitapu ya kuyisadin akadivar ni anambaz ney nakash. Mud Timote, kusutin chiyukish cha Yehova, “kukul kwey [kukumekan] ku mes kwa antu awonsu.”​—1 Tim. 4:15. w22.04 27 par. 18-19

Chikwikal nchik anch chikalap nchik usu usadinanya, mwanen umwing walond anch kakatinap kwend kumusadin Yehova? Kangal kulond anch udiany anvaj ayimp ni wakanganyan kal. Yehova watwinkishin kal etu awonsu—kuwejaku ni mwanen—want ipetu, kwawiy kulond anch ukaliweny wa kutond anch tukumusadin ap bwat. Chifanyidinap kushadish ruchingej ra kwel anch dichuku dimwing ukez kumuchirikin. Vurikany chilakej cha mwan washadika. (Luka 15:11-19, 22-24) Nsand winou wapumbukina kulemp nakash ni njil yitentamina, pakwez kwinsudiel, wachirika. Anvaj, ijikany anch akwinkishanya chisend chimwing chiwamp nakash cha kulil antu asu akumwifukwila Yehova machuku ma kurutu. (Kus. 78:4-6) Chisend chinech chiswapelap bwat, ni tukujikitishinany nakash mulong wa usu usadinanya wa kuyikwash anen kumukat Yehova ni kudandamen kuyikand ni kuyipup. Ikalany nich kashinsh anch Tatukwetu wa mwiur ukusangar kamu nakash.​—Efes 6: 4. w22.05 30-31 par. 16-18

Mulong wa kukasikesh chisambu ni uumwing mu chikumangen, muntu ni muntu pakach petu ufanyidin kumusadin Yehova yom yikutwishay kukwatijan ni usu wend. Shinshikin chilakej cha in Kristu a mu mivu chitot ya kusambish. Ading ni ukaliweny ni yisend kushalijan. (1 Kor. 12:4, 7:11) Pakwez chinech chayishikijap kubambil ap kwaurok. Chikwau kand, Paul wamukasikesha umwing ni umwing kusal yom yading yiswirikedinau “chakwel ayikasikesha in Kristu, awiy kamu mujimbu wa Kristu.” Paul wayifundina in Kristu a ku Efes anch: “Chid ni chid chifanyidin kusal mudimu wach mudi muchifanyidina, chakwel mujimbu wawonsu ukutwish kukul ni kukasikan mu rukat.” (Efes 4:13, 11, 12) Antu awonsu asala mwamu akasikesha chisambu ni uumwing—yom tumena kand nlel unou mu yikumangen yetu. Kwat mupak wa kulik kwifanakesh ni antu akwau. Pakwez, ileja kusutin chilakej cha Yesu, ni sal usu wa kwimburij mikadil yend. Ikal nich kashinsh anch Yehova “utentamin, ndiy kakutwishap kuvuramen yisalijok [yey].” (Heb. 6:10) Usangaredin usu usadina ni muchim wey wawonsu. w22.04 14 par. 15-16

Chitwongojin mud ik pa kwijik anch chitwitinap etu kukwat mupak anch Yehova ukumulikishin muntu wasalang chitil ap bwat! Pakwez ap mwamu, niyetu tukwet mupak tufanyidina kukwat. Mupak ik? Yisu yimwing, muntu waturumbukinang nakash—pamwing ap nakash kamu—pakwez kupwa watwilembin ni watwit dilikishin. Yisu yikwau, pamwing ap muntu katwitangap kwetu dilikishin. Ap mwamu, tukutwish kukwat mupak wa kumulikishin, charumburik anch tukutwish kukwat mupak wa kudiosh rukuny ni ujim wawonsu twading twovila piur pend. Pakwez mu uyakin, chinech chikutwish kwit chisu ni usu, pakampwil anch aturumbukinang nakash. Chinong cha Kalam cha 15 Ngond wa 9, 1994 mu Français chalonda anch: “Anch wamulikishin muntu wasalang chitil, chinech chirumburikinap anch ukasikeshin chisal chend. Kud mwin Kristu, kulikishin kurumburikin kusha milong mu makas ma Yehova. Ndiy Nkalansambu utentamina pa mangand mawonsu, ni ukuchirish kutentam pa chisu chiwanyidina.” w22.06 9-10 par. 6-7

Yehova wakana anch mu chirung chetu, ukukumangej pamwing antu a michid yawonsu, a tubil twawonsu, ni a mazu mawonsu, chakwel amwifukwil pamwing ni mu umwing. Nlel, chisak chinech chijiken mud “runtu ruvud [chisak chijim, NWT].” (Kuj. 7:9, 10) Ap anch mu chisak chinech mud amakundj, amband, ni an adiokila ku jindond kushalijan, antu inay awonsu asadin dijuku dimwing dia ukadivar didia pa mangand mawonsu didia mu umwing ni mu chisambu. (Kus. 133:1; Yoh. 10:16) Ading kand aswakela kulejan ruchingej ra ngand yiwamp kud muntu mwawonsu ukatina kuyitesh. (Mat. 28:19, 20; Kuj. 14:6, 7; 22:17) Anch ud niyey pakach pa chisak chijim, pakad kwidjidjek, ruchingej ra yom yiwamp yezina kurutu rid ra usey nakash kud ey. Djabul ukatin kukubachik kushadish ruchingej rey. Chitongijok chend chid cha kukubachik kutong anch Yehova kakuwanyishap kushilamu kwend. Anch Satan watwish kutushadishin ruchingej retu, tukushadish kutakaman ni tukutwish kwimik kumusadin Yehova. w22.06 20-21 par. 2-3

Ruchingej retu rikat kutukwash kulik kuzazat anch twarish ni milong yikash, mulong twij anch chisu cha chisambu chezin kurutu oku. Vurik anch Yesu watubabesha anch akutuzengol. (Yoh. 15:20) Chawiy, kutongijokin pa kushilamu kwa Nzamb anch ukutufut kurutu oku kukutukwash kudandaken kumusadin. Man mutapu ruchingej ramukwasha Yesu kushal ushinshamena ap anch wading wij anch ukufa rufu risansena. Pa dichuku dia Pentekot wa muvu wa 33 C.C., kambuy Pita wajimbula uprofet udia mu buku wa Kuseng urumburila kulik kuzazat ni kashinsh kafanyinay kwikal nich Yesu anch: “Nikez kiswedish nawamp mulong wa ruchingej ram; mulong ey kiukez kanlikap mwi ndond ya afu. Ey kiukez kitiyap kashalapol wey utumbila kuvundil mwi nzay. . . . Ey ukez kwinsangarish nakash pinikushakama ni yeyey pamwing.” (Mid. 2:25-28; Kus. 16:8-11) Yesu wading wij anch wading ufanyidin kufa, wading ukwet kashinsh kakash anch Nzamb ukumuvumbul ni anch wafanyina kusanger kand kwikal mu umwing ni Tatukwend wa mwiur.​—Heb. 12:2, 3. w22.10 25 par. 4-5

Dichuku dimwing, atwimbuy end aad, Jakobu ni Yohan, amuleja makwau chakwel ayitin kud Yesu ndond ja piur nakash mu Want. (Mat. 20:20, 21) Kusutil kusal mwamu Jakobu ni Yohan amekesha anch ad in kwitutul ni asotil kwikal a usey nakash kuyisutamu akwau. (Jnsw. 16:18) Kadiap kwau ching kusu Jakobu ni Yohan amekesha yaku yiyimp mu chinship chinech. Tal yom yasalau atwimbuy akwau: “Pateshau in kwilej akwau dikum yom yiney, amujimena Jakobu ni mwanamakwend Yohan.” (Mat. 20:24) Tukutwish kutong anch Jakobu nend Yohan akulijana ni atwimbuy akwau. Yom ik yasalay Yesu pa mulong winou? Kajimanap. Kalondap anch ufanyidin kukimb atwimbuy awamp nakash, amakundj ikepishina akusambisha kumekeshijadin chisu chawonsu rukat. Pakwez Yesu wayitongisha nich kushimpish muchim amakundj inay mulong wading wij anch akatin kusal yom yiwamp. (Mat. 20:25-28.) Wadandamena kuyimekeshin rukat. w23.03 28-29 par. 10-13

Wasadin kal yom yivud. Wilejin Bibil nich mushiku, pamwing ap mu mivu yivud. Dilejan diey dia Bibil diakwinkisha kashinsh anch Bibil did Dizu dia Nzamb. Pakwez cha usey kupandakan, washikena kumwijik ni kumukat Yehova udia Musul wa buku winou utumbila. Rukat rey mudiay Yehova rakula mu chilik cha kwikal katat pakach pa atushalapol end ipanina kal kud ndiy ni abatishinau kal. Chom chiwamp nakash mud ik! Chid chakin anch warisha ni yikokujol yivud yapaka ritiy rey chisu wading uyila kurutu mulong wa kushiken ku dibatish. Pakwez piuyila kupam mu spiritu, ritiy rey akuripak kand mu mutapu ukwau. Satan ukupakish kuziyish rukat rey mudiay Yehova ni kukupumbul kulemp ni ndiy. (Efes 4:14) Ufanyidinap kulikidil chom mud chinech chikushiken. Yom ik yikutwisha kukukwash kushal ushinshamena kud Yehova ni kuwanyish machip ma kwipan kud ndiy wasala? Ufanyidin kudandamen kuya kurutu mulong wa kwikal mwin Kristu uswila.​—Heb. 6:1. w22.08 2 par. 1-2

Muntu ni muntu mu dijuku ukwet chisend cha kulam ujindj wa milong yimwing ya mu dijuku diau. Chilakej, mband mwin Kristu ukutwish kwikal ni chaku chimenay nfumwend anch chiwanyidinap. Ov, ufanyidin kuyilej antu akwau piur pa yom yiney ni kumukwatish mukajend usany? Chakin kamu, bwat! Mulong umukatin mukajend, kakukatap ap pakemp kusal chom chikutwisha kumunenganesh mukajend. (Efes 5:33) Ansand ni ayangadim akatining niyau kuyimekeshinaku kalimish. Chid cha usey kud anvaj kuvurik chom chinech. Kafanyidinap kuyikwatish anau usany kusutin kulejan kurumbok kwau kud antu akwau. (Kol. 3:21) An afanyidin kwilej mutapu wa kulam ujindj ni kulik kuyilej antu akwau yom yikutwisha kuyinenganesh antu akwau a mu dijuku. Anch muntu ni muntu mukach mwa dijuku wasal usu wa kulam ujindj wa mu dijuku, antu in awonsu a mu dijuku akwikal mu umwing nakash. w22.09 10 par. 9

Yehova wambamba ni Job, wamuvurisha manangu mend makad musul ni rukat rikwetay mulong wa yitangil yend. Wamujimbwila annam avud akwamushena. (Job 38:1, 2; 39:9, 13, 19, 27; 40:15; 41:1, 2) Yehova wamusadina kand ikundj ushinshamena Elihu mulong wa kumukasikesh ni kumwongoj Job. Elihu wamwinkisha kashinsh anch Yehova udandamedining kuyifut atushalapol end mulong wa kujijaman kwau. Pakwez Yehova wamubachika kand Elihu kumwinkish Job yiyul ya rukat. Elihu wamukwasha Job kulik kushinshikin nakash ching kusu pa milong yimutadina ndiy kusutin kumuvurish anch tud akemp nakash mu kutwilakej ni Yehova, Sakatang wa diur ni divu. Yehova wamwinkisha kand Job chisend cha kuyilembil arund nend asatu asala chitil. (Job 42:8-10) Mutapu ik ukatay kutukwash Yehova nlel anch twarish ni yikokujol yikash? Yehova kakatap kwambamb netu mud mutapu wasalay ni Job, pakwez ukat kwambamb netu kusutin Dizu diend, Bibil.​—Rom 15:4. w22.08 11 par. 10-11

Mu chikumangen cha mu Rom mwading in Kristu in Yuda ni Akamichid. Chisu chafa chijil cha moses, yijidik yawonsu yading yikangeshina kudia chom kanang yadingap kand yitina kuyilimish. (Mar. 7:19) Kudiokal kamu pa chisu chinicha, in Kristu amwing in Yuda amana anch akutwish kwau kudia yakudia yin yawonsu. Pakwez, in Kristu akwau in Yuda kitiyijap kusal chom mud chinech. Chikumangen chaurika pa mulong winou. Kambuy Paul wamana usey wa kulam chisambu Chawiy, Paul wayikwasha ambay nend in Kristu kuman mutapu ukutwisha kupwitamijan kwinoku kwikal ni yibudikin yiyimp kud umwing ni umwing ni pa chikumangen cha kabuj. (Rom 14:19, 20) Wading kand uswakel kuswimp yaku yend mulong wa kwipuk kuyipwakesh antu akwau. (1 Kor. 9:19-22) Tukutwish niyetu kuyikasikesh antu akwau ni kulam chisambu anch twipuk kukasikeshin pa yitongijok yetu pa milong yitina kom ka muntu. w22.08 22 par. 7

Anch twalondul mupak umwing wa pakampwil mu Mudimu wa Yehova, tukusal usu wa kuuwanish. Chid kand mutapu umwing anch twalondul kutentam. Ni Yehova ukutukwash nich kushimpish muchim kuya kurutu. (Kus. 84:5, 7) Yehova utuvurishin nich rukat anch kusal yom yitentamina chidiap chisend. (1 Yoh. 5:3) Chinyim ni chinech, did diking ni chawiy kamu chom tuswiridining pichuku pichuku. Vurik yom yawonsu ya njit ja mu spiritu yajimbulay kambuy Paul. (Efes 6:14-18) Chikunku ik chikingining muchim wa Isalay? Chid ‘rikibu ra pantul ra kutentam,’rimekeshina mbil ja Yehova piur pa kutentam. Mud mutapu ukata rukibu ra pantul kuking muchim wakinakin, mbil ja Yehova piur pa kutentam jikutwish kuking muchim wey wa chifanakesh, charumburik anch wuntu wey wa mukach. Chawiy pa chinech, ikal nich kashinsh anch udjadin yom yawonsu ya njit pamwing ni rikibu ra pa ntul ra kutentam!​—Jnsw. 4:23. w22.08 29 par. 13-14

Dizu dia Nzamb dayitakedin kal amakundj ni amband ashinshamena mu tunan twa mivu. Mutapu ik? Yehova watenchika chakwel akopiril Mifund yitumbila. Ap anch in kukopiril ading antu akad kuwanyin, asala usu nakash wa kukopiril pakad ulim. Chilakej, mwin kwilej yom ya Bibil umwing walonda piur pa Mifund ya Hebereu anch: ‘Tukutwish kulond nich kashinsh anch kwikil buku mukwau ap umwing wa pakur wakopirilawap kal nawamp mwamu.” Chawiy, tukutwish kwikal nich kashinsh anch mazu tutangina mu Bibil nlel yawiy kamu yitongijok ya Muntu wamufundikisha, Yehova. Yehova ndiy Musul wa “yom [yipan] yawonsu yiwamp ni yiwanyidina.” (Jak. 1:17, TMK) Bibil ud pakach pa yipan yipandakena kuwap yatwinkishinay kal Yehova. Chipan chikat kutufundish chom kanang piur pa muntu watwinkishangach anch utwij nawamp ni ubangidin maswir metu. Chid kand mwamu piur pa Bibil. Pitukata kushinshikin chipan chinech, tukat kwilej yom yivud piur pa Yehova. Tukat kujingunin mutapu utwijay nawamp ni mutapu wijay maswir metu. w23.02 2-3 par. 3-4

Dikwikal kamu dichuku dia musangar nakash mud ik pakusambishau antu kuvumbuk panap pansh pa chisu cha Winyikel wa Mivu Kanan wa Kristu! Antu awonsu ashadishina kal akatish nau akwet impu ya kuyimaniril kand. Mwamu mwiyovilay niyend Yehova. (Job 14:15) Tongin bil musangar ukwovau antu awonsu akwikala pa divu chisu chikuyivumbulau akatish nau. “In kutentam” afundinau kal majin mu mukand wa mwom akez ‘kuvumbuk mulong wa mwom.’ (Mid. 24:15; Yoh. 5:29) Pamwing ap akatish netu avud akwikal pakach pa antu akuvumbulau chisu chikemp kupwa kwa Harmagedon. Chikwau kand, ‘antu akad kutentam,’ charumburik anch antu afa pakad kwikal ni mutapu wa kumwijik Yehova ap wa kumusadin nich kushinshaman, ‘akuvumbuk mulong wa dirumburish.’ Antu akuvumbulau akwikal ni kuswir kwa kuyifundish. (Isay 26:9; 61:11) Chawiy kukwikal mudimu ujim nakash wa kufundish wakad kal kusadikangap kudiosh kwayitanginau antu.​—Isay 11:10. w22.09 20 par. 1-2

Yehova wamekesha kand ulabu wend upandakena pad antakel avud abombakana. Wayirishina in Isarel ni wayikwasha kuyirishikish ant 31 a in Kanan abombakana pamwing mulong wa kuyirishikish in Isarel, ni wayikwasha kand kutambul chikunku chijim cha Ngand ya Kushilamu. (Jos. 11:4-6, 20; 12:1, 7, 24) Yehova wamekeshin kal tupamp tuvud anch ndiy Upandakena Piur pa yom yawonsu! Pitutulay Mwant Nebukadinesar wa Babilon mulong wa ‘usu wend ni dikand diend, ni uyaj wend ni katumb kend’ pa ndond pa kumekesh nich kwikepish anch Yehova ndiy uwanyidina katumb kawonsu, Nzamb wamuzarisha. Kupwa kwa kuchirish manangu, Nebukadinesar “[wamushimana] Nzamb Upandakena Piur pa yawonsu.” Walonda kand anch: “Kwikil muntu ap umwing ukutwisha kumukangesh kusal mudi musotilay.” (Dan. 4:30, 33-35) Nfund a kuseng walonda anch: “Wayuk muchid umutekina [Yehova] kwikal Nzamb wend, ayuk antu atonday ku uswan wend amwinend.” (Kus. 33:12) Diyingishin diwamp mud ik tukweta dia kulam kushinshaman kwetu kud Yehova! w22.10 15-16 par. 13-15

Uprofet uvud wa Bibil wawanyidina kal ukasikeshin ritiy retu anch yom yakaninay kal Nzamb mulong wa machuku ma kurutu yikuwanyin. Twiyovil mud nfund a kuseng wamulembila Yehova anch: “[Nichingedin nich impu] dipandish diey, A! [Yehova], pakwez nikungamedin ku dizu diey.” (Kus. 119:81) Mu Bibil Yehova watwinkishin kal “ruchingej ra kurutu.” (Jer. 29:11) Ruchingej retu mulong wa machuku ma kurutu rimedinap pa usu wa mwan a muntu, pakwez rimedin pa kushilamu kwa Yehova. Komb el tudandamenany kukasikesh ruchingej retu mu Dizu dia Nzamb kusutin kwilej chikurikina uprofet wa Bibil. Diyingishin dikwau dikutwisha kutubachik kumuchingejin Bibil did anch ukat kuyikwash antu akata kusadin yiyul yend. (Kus. 119:66, 138.) Chilakej, ambay a uruw amwing ading piswimp ni kujip uruw akwet katat musangar mulong asadina yiyul ya Bibil. Anau akwet musangar wa kupamin mu dijuku dia win Kristu mudia anvaj ayikatina ni ayibangidina.​—Efes 5:22-29. w23.01 5 par. 12-13

Tong piur pa mutapu watanidinamu kal mu kushilamu kwa Nzamb kudia mu Dizu diend. Chilakej, Yesu wakana anch Yehova ukukuwanyishin yom ya usey mu mwom. (Mat. 6:32, 33) Yesu wakukana kand anch ukukwinkish spiritu utumbila anch wamwit. (Luka 11:13) Yehova ukat kuwanyish kushilamu kwinoku. Pamwing ukutwish kutongijokin piur pa kushilamu kukwau kwakuwanyishidinay kal ey pakampwil. Chilakej, ukushidinamu kukulikishin, kukukasikesh, ni kukudish mu spiritu. (Mat. 6:14; 24:45; 2 Kor. 1:3) Anch watongijokin piur pa yom yakusadidinay kal Nzamb, ukukasikesh ritiy rey piur pa yom yikaninay kukusadin mu machuku ma kurutu. Tukwet kashinsh anch Yehova ukuwanyish kushilamu kwend kwawonsu. Mud kamu mwafunday nfund a kuseng anch “wayuk muntu . . . ukata kumuchingej [Yehova] Nzamb wend, . . . ndiy ukata kuwanyish kushilamu kwend kwawonsu.”​—Kus. 146:5, 6. w22.10 28 par. 15, 17

Ov, uprofet piur pa kuchirish difukwil dishitwila ututadin niyetu nlel? Nakash kamu! Mutapu ik? Kudiosh mu muvu wa 1919 C.C., mamiliyon ma antu akolikin kal mu winkwal wa Babilon mujim—marelijon mawonsu ma makasu madia pa mangand. Akat kuyitwal mwi ndond yiwamp nakash kusutamu Ngand Yakushilamu yayitwalau in Isarel. Akat kuyikumangejin mu paradis wa mu spiritu. (Isay 51:3; 66:8) Kudiosh mu muvu wa 1919 C.C., azizidilau many akat kusanger kushakam mu paradis wa mu spiritu. Mu kusut kwa chisu, antu akweta ruchingej ra kushakam pansh, atazukinau anch “amikoku akwau,” akat kwandam niyau mwi ngand yiney ya mu spiritu ni kusanger yiyukish yivud ya Yehova. (Yoh. 10:16; Isay 25:6; 65:13) Paradis wa mu spiritu mushichau ud niyend pa mangand mawonsu. Chawiy, nlel, chikalap nchik kwi ndond tushicha, tukutwish kwikal mu paradis wa mu spiritu anch twanung chikas ku difukwil diakin. w22.11 11-12 par. 12-15

Ov chikukasikedin kwov kurumburik chitongijok cha kulond anch Yehova ud “wa chikupu”? (Isay 40:28) Chid mwamu kud antu avud. Elihu walonda piur pa Nzamb anch: “Kuvul kwa mivu yend kwikil ukutwisha kuyichind.” (Job 36:26) Pakwez anch tuteshinap chom, chirumburikinap anch chidiap chakin. Chilakej, ap anch tukutwishap kwov kurumburik kwa mutapu usadining kasu ka nzembu, ov chinech chirumburikin anch kasu kinak kadingakwap? Bwat kwau, chidiap mwamu! Chilik chimwing chikutwish kutukasiken etu an a antu kwov kurumburik chitongijok cha kulond anch Yehova udingaku ni ukudandamen kwikalaku chikupu. Pakwez chinech chirumburikinap anch Nzamb kadiap wa chikupu. Sakatang wa yom yawonsu kimedinap pa yom tukutwisha ap kukangany kwov kurumburik. (Rom 11:33-36) Ni wadingaku kurutu mangand mikalaku—kuwejinaku ni yom yikata kulet chimunyik, mud muten ni atutumbu. Tukwet kashinsh anch Yehova “watangila mangand mawonsu ku ukash wend.” Chakin kamu, wadingaku kurutu ‘atanga mangand.’​—Jer. 51:15. w22.12 2-3 par. 3-4

Yisu yimwing, akutwish kututond kulembil mulong wa antu akwau. Chilakej, nambaz utakedila dilejan dia Bibil ukutwish kumwit nambaz wamutwalangaku kulembil. Nambaz wamutwalangaku pamwing ap kamwijap nawamp mwin kwilej, chawiy ukutwish kutond kusal malembil kwinsudiel kwa dilejan. Mu mutapu winou, chikutwish kumuswapel kukwatikesh malembil mend nich maswir ma mwin kwilej. Mukadivar akutwish kumutond kulembil ku chikumangan cha mudimu wa kulejan, ap ku chikumangan cha yikumangen. Mukadivar winkishinau chisend chinech ufanyidin kulam mu manangu mayingishin tukata kukumangen. Malembil madiap mulong wa kupan chiyul mu chikumangen ap kufundish. Ku yikumangan yivud, akat kusha aminit atan mulong wa muminy ni malembil, chawiy mukadivar ulembila kafanyidinap kulond “yom yivud,” pakampwil kwinsambishin kwa yikumangan.​—Mat. 6:7. w22.07 24 par. 17-18

Bibil wisambidin piur pa yisak yaad ya antu akuvumbulau mulong wa kushakam chikupu pa divu, ‘antu atentamina’ ni ‘akad kutentam.’ ‘Antu atentamina’ ad antu amusadina Yehova nich kushinshaman padingau achid aom. Ku mutambu ukwau, ‘antu akad kutentam’ kamusadinap Yehova. Mulong antu a mu yisak yiney akuyivumbul, ov, tukutwish kulond anch majin mau mad makufund mu mukand wa mwom? Kurutu kwa kufa, ading afundin kal majin ma ‘antu atentamina’ mu mukand wa mwom. Ov, akusula majin mau mu mukand wa mwom pafau? Bwat, mulong achid “aom” mu manangu ma Yehova. Yehova “kadiap Nzamb wa afu . . . pakwez udi Nzamb wa aom, ap anch afap nchik, mulong kudi ndiy awonsu adi aom.” (Luka 20:38) Chinech chirumburikin anch pakuyivumbulau afu pa divu, majin mau makwikal amafundin kal mu mukand wa mwom ap anch kwinsambishin makwikal makufund “nich penzil.” w22.09 16 par. 9-10

Jakob wamekesha patok anch wading umukatin nakash mwanend Josef. (Dis. 37:3, 4) Mud chibudikin, ayayend amwovila mukau. Kupwa amulandisha kud in kwisak a mu Madian pamanau mutapu wa kusal mwamu. In kwisak inaya aya ni Josef mu yitot ya makilometre mu Idjibit, kwinikwa amulandisha kand kud Potifar, kalal wa chisak cha atulam a mwant Farao. Mu ka chisu kakemp kwau mwom wa Josef waswimpa kapamp kamwing, mwan wading ukatinau nakash kud tatukwend wikala muswik mu makas ma mwin Idjibit! (Dis. 39:1) Yisu yimwing tukat kurish ni milong “yikata kushik kudi antu awonsu.” (1 Kor. 10:13) Ap tukutwish kuman mar mulong kwau tud in kwilej a Yesu. Chilakej, akutwish kutusip, kutupompat, ap kutuzengol mulong wa ritiy retu. (2 Tim. 3:12) Chikalap nchik chikokujol urishina nich, Yehova ukutwish kukukwash. w23.01 14-15 par. 3-4

Yisu yimwing anch mbay netu mwin Kristu waturumbukin, tukutwish pamwing ap kwov ja kwambamb nend pa mulong winou. Pakwez chakusambish, tufanyidin kwiyipul yipul mud: ‘Ov, nikwet kamu uman wawonsu piur pa yom yasadikang?’ (Jnsw. 18:13) ‘Ov, wanrumbukinang kamu kwa kwisotin?’ (Mul. 7:20) ‘Ov, niyam narumbukinap kal mwamu?’ (Mul. 7:21, 22) ‘Anch napakish kwisamb nend, ov, nikujimbishap kand mulong pandond pa kuupwish?’ Anch twitekin chisu cha kutongijokin pa yipul mud yiney, rukat tukweta mulong wa mukadivar netu rikutwish kutubachik kudiul kwau. Muntu ni muntu pakach petu ukutwish kumekesh anch ud mwin kwilej wakin wa Yesu, kusutin kuyimekeshin akadivar ni anambaz netu rukat rakin chikalap nchik kuburen kuwanyin kwau. Anch twasal mwamu, tukutwish kuyikwash antu akwau kujingunin relijon wakin ni kwibomb netu pamwing mulong wa kumwifukwil Yehova, Nzamb wa rukat. El tukwatany mupak wa kudandamen kumekesh rukat riyimekeshina in Kristu akin. w23.03 31 par. 18-19

Bibil umekeshin patok mwikadil ujim nakash wa Muntu wamufundikisha, mwikadil winou ud—rukat. Mulong Yehova utukatin, walika kufundikishamu yom yikutwisha kuturumbangesh manangu. (Yoh. 21:25) Yehova watumekeshina kand rukat rend kusutil kwambamb netu mu mutapu wa kalimish. Mu Dizu diend Bibil, katwinkishap muruzu wa yijil ulejena chom ni chom tufanyidina kusal mu mwom wetu. Pakwez wafundikishamu nsangu ja antu, uprofet, ni yiyul ya manangu yikutwisha kutukwash kukwat mipak yiwamp. Mwamu Dizu dia Nzamb dikat kutubachik kumukat ni kumuziyin nich muchim wetu wawonsu (Jak. 5:17) Cha usey nakash, kusutil kushinshikin mutapu wayikwashau antu inay kud Yehova, tukutwish kujingunin patok anch “[Yehova] wizwil nich kuwap ni riy.”​—Jak. 5:11. w23.02 6 par. 13-15

Buku wansudien wa Bibil usambishin ni mazu malondina anch: “Mu mukand winou mudi yom yajinguninay Yesu Kristu. Nzamb wamuleja Yesu yom yikushika mu chisu chikemp, chakwel ndiy ukuyijingunin atushalapol end.” (Kuj. 1:1) Chawiy tukat kuta matu ku yom yisadikina mu mangand katat ni kuman mutapu yikutwisha kuwanyish uprofet wa Bibil. Ni tukutwish kwov ja kwisambin yom yiney ni antu akwau. Pakwez chisu twisambidina ma uprofet ma Bibil tufanyidin kwipuk kulond anch “nimen mud,” ap “chimeken anch” yom yiney yawanyish kal uprofet kampand ap kanang. Mulong wak? Mulong tukatinap kulond chom chikutwisha kulet kwaurok mu chikumangen. Chilakej, anch watesh antakel a mangand akat kulond piur pa mutapu utonginau kupwish kupwitamijan kanang mulong wa kulet chisambu ni uumwing, pa ndond pa kusambish kutong ni kulond anch yom yiney yalondau kal yawanyish kal uprofet udia mu 1 Tesalonik 5:3, tufanyidin kwimen pa yom yansudien yijikishinay kashalapol. Anch mambamb metu mimen pa yom yilejenau mu mikand yetu, chikumangen chikwikal mu uumwing “nich chitongijok chimwing.”​—1 Kor. 1:10; 4:6. w23.02 16 par. 4-5

Mulong wak umukatin Yesu Kristu? Yesu ukatining uyakin, kwikepish, ni kutentam. Anch ukatin uyakin ni kutentam, kwakulond anch umukatin kand Yesu Kristu. Tongin mutapu Yesu walondinay uyakin ni kutentam nich kutakaman. (Yoh. 18:37) Chad mutapu ik ukatay kumekesh Yesu anch ukatin kwikepish? Yesu ukat kumekesh anch ukatining kwikepish kusutil chilakej chend. Chilakej, ukat kupan katumb kawonsu kud Tatukwend, kakatap kwitumbish amwinend. (Mar. 10:17, 18; Yoh. 5:19) Mutapu ik wiyovila pakuman kwikepish mud kwinoku? Ov, kukubachikinap kumukat Mwan a Nzamb ni kumulondul? Mwawiy kamu. Mulong wak Yesu wikepishining? Mulong umukatining ni kumwimburij Tatukwend, uding mwin kwikepish. (Kus. 18:35, NWT; Heb. 1:3) Ov, chinech chikubachikinap kumusejin Yesu, ukata kwimburij mikadil yiwanyidina ya Yehova? w23.03 3-4 par. 6-7

Bibil wisambidin piur pa yisak yaad ya antu akuvumbulau mulong wa kushakam chikupu pa divu, ‘antu atentamina’ ni ‘akad kutentam.’ ‘Antu atentamina’ ad antu amusadina Yehova nich kushinshaman padingau achid aom. Ku mutambu ukwau, ‘antu akad kutentam’ kamusadinap. Mulong antu a mu yisak yiney akuyivumbul, ov, tukutwish kulond anch majin mau mad makufund mu mukand wa mwom? Kurutu “antu atentamina’ afa ading afundin kal majin mau mu mukand wa mwom. Ov, akusula majin mau mu mukand wa mwom pafau? Bwat, mulong achid “aom” mu manangu ma Yehova. Yehova “kadiap Nzamb wa afu . . . pakwez udi Nzamb wa aom, ap anch afap nchik, mulong kudi ndiy awonsu adi aom.” (Luka 20:38) Chinech chirumburikin anch pakuyivumbulau afu pa divu, majin mau makwikal amafundin kal mu mukand wa mwom ap anch kwinsambishin makwikal makufund “nich penzil.”​—Luka 14:14. w22.09 16 par. 9-10

Yehova wakata anch muntu wakusambish asanger yitang yend. Chisu chamutangay Adam, wamwinkisha paradis muwamp nakash ni wamwinkisha kand chisend cha kumulam ni kumujimbish. (Dis. 2:8, 9) Tongin musangar wovangay Adam pakuman mutapu mbut jading jipamina ni mutapu wabikitang yisalamb. Dilau diwamp mud ik diadingay nich Adam dia kulam chir cha Eden! Yehova wamwita kand Adam kuyipil annam kushalijan majin. (Dis. 2:19, 20) Yehova wafanyina kuyipil kwend amwinend majin; pakwez wamwinkisha Adam chisend chinech. Chakin kamu, kurutu kwa kumupil nnam dijin, Adam wamushinshikinang nawamp, watalang yom yisadinay ni yaku yend. Chimeken kamu anch Adam wasangera nakash chisend chinech. Chakin kamu, chisend chinech chamukwasha kuman manangu ma Yehova ni ufun wa yom yatangay. w23.03 16 par. 3

Mulong adifanakeshin ni yidjatil ya chirumbidij mujim, dikand dia Angleter ni Amerik diawiy didia diansudien dialejanau mu uprofet wa Bibil. (Dan. 2:31-33) Kwikil want ukwau ukuswinkana dikand dined. Pakwez, akudishesh piswimp ap kud Want wa Nzamb pa chisu cha njit ja Harmagedon pamwing ni maguvernema makwau ma an a antu. (Kuj. 16:13, 14, 16; 19:19, 20) Mutapu ik tukutwisha kutanyinamu mu uprofet winou? Uprofet wa Daniel utwinkishin kashinsh kakwau kamekeshina anch tushich mu chirung cha kwinsudiel. Pasut kal mivu 2500 ni kusut, Daniel wasambela kulejan anch kupwa kwa dikand dia Babilon, kukwikal makand makwau manying makuyikela pad atushalapol a Nzamb. Chikwau kand, walejana anch Dikand dia Angleter ni Amerik, diafanyina kwikal dia nsudiel. Chinech chitukasikeshin ni kutwinkish ruchingej anch piswimp ap Want wa Nzamb ukupuchol winyikel wawonsu wa an a antu ni kuyikel pa divud diawonsu. w22.07 4 par. 9; 5 par. 11-12