Ngond wa 6

Job wading ni urund wa piswimp ni Yehova. Wading ni dijuku dijim dikweta musangar, ni wading mpich nakash. (Job 1:1-5) Pakwez mu dichuku kwau dimwing, Job washadisha yom yend yin yawonsu. Chakusambish, washadisha dipit diend diawonsu. (Job 1:13-17) Kupwa, anend awonsu akatish afa. Tongin bil pa kusansan, ushon, ni runeng rovay Job ni mukajend payilejau anch anau awonsu atan afa kal. Chidiap cha kushimok pa kuman anch Job wapula masun mend wabwikam pansh mulong wa kudil! (Job 1:18-20) Kupwa Satan wamwasa Job mayej masansena ni mamuletina kapipej. (Job 2:6-8) Kurutu kwa yiney, antu ading amulimishin nakash Job. Antu ezang kumwit chiyul. (Job 31:18) Pakwez pa chisu chinicha, antu amwiyepa. Amukwata mud muntu wakad usey, amudjibula kud anamakwend, arund nend a piswimp, djat ni kud atushalapol end!​—Job 19:13, 14, 16. w22.06 21 par. 5-6

Kupwa kwa dibatish, etu awonsu tufanyidin kulondul kubabesh kwa Paul kud in Kristu a ku Efes. Wayikasikesha kwikal “amakurump mu ritiy.” (Efes 4:13) Winou ud mutapu ukwau wa kulond urumburishina ‘kudandamen kuya kurutu.’ Wamukatin kal chakin kamu Yehova nakash. Pakwez rukat rey mudiay ndiy rikutwish kukul nakash kupandakan. Mutapu ik? Kambuy Paul wajimbulaku mutapu umwing mu Filip 1:9. Paul walembila piur pa rukat ra in Filip anch “rujimba kamu kakwau ni kakwau.” Chawiy, komb rukat retu rikutwish kukul. Tukutwish kusal mwamu kusutin kwikal ni ‘ronganyin rakin ni kujingunin kuwanyidina.’ Anch twadandamen kusal usu wa kumwijik Yehova nawamp kupandakan, rukat retu mudiay ndiy rikukul kupandakan ni tukukwat nich usey wuntu wend ni mutapu wend wa kusal yom. Impu yetu ya kumusangaresh yikupam, ni tukukatap ap pakemp kusal chom chikutwisha kumunenganesh. Tukusal usu wa kujingunin rusot rend ni mutapu tukutwisha kuriwanyish. w22.08 2-3 par. 3-4

Yom yifundinau mu buku winou yidiap mulong wa antu in awonsu, pakwez mulong wetwetu ipanina kal kud Nzamb mud atushalapol end. Mulong tud atushalapol a Nzamb, chitukashimwishinap pa kujingunin anch tukat kukwash kuwanyish uprofet udia mu buku winou usangareshina. Kambuy Yohan warumburila chisu chikuwanyina uprofet winou palonday anch: ‘Kusutin spiritu utumbila, nashika pa dichuku dia Nsalejetu.’ (Kuj. 1:10) Pafunday Yohan mazu minam mu muvu wa 96 C.C., “dichuku dia Nsalejetu” diading dichid kulemp. (Mat. 25:14, 19; Luka 19:12) Chawiy, kukwatijan ni uprofet wa Bibil, dichuku dined diasambisha mu muvu wa 1914, pikalay Yesu mwant mwiur. Kusambish kamu muvu winiwa, uprofet udia mu Kujingunik uyitadina atushalapol a Nzamb wasambisha kuwanyin. Chakin, tushich katat pa “dichuku dia Nsalejetu”!​—Kuj. 1:3. w22.05 2 par. 2-3

Nnam wa chidiany, ni [muprofet] wa makasu, awonsu mwaad wau ayidjibula aom mu dijiy dia kasu, diading ni kuzubuk kasu nich kasu ka diyal dipidilau anch soufre. Chawiy, maguvernema minam ma akankuny a Nzamb akumatan madandamedin kuyikel chisu chikumasheshau chikupu. Yom yiney yirumburikin ik kud etu? Mulong tud in Kristu, tufanyidin kushal ashinshamena kud Nzamb ni Want wend. (Yoh. 18:36) Chitwitin kwipuk kwiyandjik mu milong ya chipolitik ya mangand minam. Pakwez chikutwish kutukasiken nakash kusal mwamu, mulong maguvernema ma mangand makat kwit chakwel tuyikwash mu mazu ni mu yisal yetu. Antu akata kuziyin ku yibachikin yau akat kutambul chijingidij cha nnam wa chidiany. (Kuj. 13:16, 17) Chawiy, muntu mwawonsu ukata kutambul chijingidij chinech kakutwishap kwikal ni dilau dia Yehova, ap kutambul mwom wa chikupu. (Kuj. 14:9, 10; 20:4) Chid cha usey mud ik kud umwing ni umwing wa pakach petu kulik kwiyandjik ap pakemp mu milong ya chipolitik, chikalap nchik rishind ritutekinau kud maguvernema chakwel tumakwash! w22.05 10-11 par. 12-13

Mupak wa kusambish ufanyidina kukwat ud wa kukudish ukaliweny wa kusal yom. Anch twakudish ukaliweny wetu, tukuwanyish yitinau mulong wa kwikal ni yisend yikwau. Tong mutapu kudia maswir ma in kusal mudimu avud mulong wa kutung ma Betel, Yot ya Yitentam, ni Yot ya Want. Avud akata kusal mudimu winou akudisha ukaliweny wau kusutin kusal pamwing ni akadivar ni anambaz ading akweta ukaliweny nakash. Nlel, akadivar ni anambaz akat kwilej kukudish ukaliweny uswirikedinau mulong wa kukwash kutung Yot ya Yitentam ni Yot ya Want. Mu mutapu winou, ap mu mitapu yikwau, mwawiy mukatay Yehova Nzamb “Mwant wa chikupu,” ni Kristu Yesu “Mwant wa ant,” kusal yom yikwamushena kusutin in kusal mudimu akweta ukaliweny. (1 Tim. 1:17; 6:15) Tukatin kusal usu wetu wawonsu ni kusadin ukaliweny wetu mulong wa katumb ka Yehova, kadiap ka ayinetu.​—Yoh. 8:54. w22.04 24 par. 7; 25 par. 11

Ku mutambu umwing, Salomon wading mpich mujim nakash, ni wading ushich mu chikumbu chiwamp nakash. (1 Ant 10:7, 14, 15) Ku mutambu ukwau, Yesu wading ni yom yikemp ya ku mujimbu, ni kadingap ni chikumbu chend. (Mat. 8:20) Pakwez, awonsu aad ading ni chitongijok chisikena piur pa yom ya ku mujimbu, mulong awonsu Musul wa manangu mau wading Yehova Nzamb. Salomon wading wij anch ku ukwash wa nfalang, tukutwish kuland yom tukweta nich kuswir, ni pamwing ap yom yikwau tukatina. Pakwez, chikalap nchik wimpich wend, Salomon wajingunina anch kud chom cha usey nakash kusutamu nfalang. Chilakej, wafunda anch: “Dijin [diwamp] dipandiken dipit dijim.” (Jnsw. 22:1) Salomon wajingunina kand anch antu akatina nfalang kakatap kusanger yikwetau. (Mul. 5:10, 12) Ni utubabeshin kulik kutek ruchingej retu rawonsu mwi nfalang, mulong chikalap nchik uvud wa nfalang tukutwisha kwikal nich, jikutwish kutwik pakad kulab.​—Jnsw. 23:4, 5. w22.05 21 par. 4-5

Anch twatongijokin pa yiyukish yetu ya katat, urund wetu ni Yehova ukukasikan. Ni kutongijokin pa yiyukish yikutwinkishay Yehova mu machuku ma kurutu kukukasikesh ruchingej retu ra kumusadin chikupu. Yawonsu yiney yikutuletin musangar wa kumusadin Yehova ‘ukwiman’ ku mutambu wetu mulong wa kutukwash chisu chikusheshay mangand minam. Tukwet kashinsh anch ang chisu chikusheshay Yehova mangand minam chawanyin—‘Nzamb wa kutentam’—kakulikidilap ap pakemp anch pasut dichuku dimwing dia mutun. (Isay 25:9) Tuchingedin nich impu dichuku dikutukolay Yehova. Mu kachisu kakemp kashalaku kal, tukwatany mupak wa kudandamen kusanger dilau dia kulembil, kwilej ni kusadin Dizu dia Nzamb, ni kutongijokin pa yiyukish yetu. Anch twasal mwamu, Yehova ukutukwash kujijaman nich musangar mu mudimu tumusadidina. w22.11 13 par. 18-19

Ap anch Bibil kalondinap chom piur pa dibatish dia Timote, chikutukasikenap kutongin musangar wovay makwend Yunis pa dichuku dinidia. (Jnsw. 23:25) Yunis warisha nich yikokujol pamufundishangay mwanend kumukat Yehova ni Mwanend Yesu Kristu. Timote amulila kud anvaj ading akad kwikal mu relijon umwing. Tatukwend wading mwin Grek, ni makwend ni ngakend mband ading in Yuda. (Mid. 16:1) Timote wading nsangarum chisu chikalau Yunis ni Loyis in Kristu. Pakwez tatukwend walika kwikal mwin Kristu. Chawiy, njil ik yafanyinay kulondul Timote? Nlel amaku in Kristu akatin majuku mau. Ni cha usey nakash, akatining kuyikwash anau kukudish urund wa piswimp ni Yehova. Nzamb wetu ukwatining nich usey nakash usu ukatau kusal. (Jnsw. 1:8, 9) Yehova wayikwashin kal amaku avud nakash ading asadina usu wa kuyikwash anau kwitiyij uyakin. w22.04 16 par. 1-3

Piswimp ap Yehova ukuyinkish antakel a chipolitik michim ya “kusal mudi mwatenchikay.” Chibudikin ik chikwikalaku? Mant minam ma chipolitik, ap anch “ant dikum,” makurishikish marelijon mawonsu ma makasu ni kumashesh. (Kuj. 17:1, 2, 12, 16) Mutapu ik twija anch disudien dia Babilon Mujim did piswimp? Mulong wa kwakul ku chipul chinech, chid cha usey kuvurik anch musumb wa pasak wa Babilon ading auchidijin mutambu umwing kud Wit wa Eferat. Buku wa Kujingunik ufanakeshin mamiliyon ma antu amukwashina Babilon mujim nich “mem.” (Kuj. 17:15) Pakwez ulejen kand anch mem ‘makuum,’ mulong wa kumekesh anch marelijon mawonsu ma makasu madia pa mangand makushadish antu au avud ading amakwashina. (Kuj. 16:12) Uprofet winou uwanyidin nlel, mulong antu avud akat kudiokal mu relijon wa makasu ni kusambish kukimb mutapu wa kupwish milong yau kwi ndond yikwau. w22.07 5-6 par. 14-15

Kwikal in kulikishin kumekeshin anch tud in kujikitish. Mu chishimu chimwing, Yesu wamufanakesha Yehova ni mwant wamulikishina kashalapol wend chikal chijim nakash chading chakadiay mutapu wa kufut. Pakwez, kashalapol winou walikishinau wakanganya kumwovil riy kashalapol mukwau wading ukweta chikal cha nfalang jikemp jading jifanyidinay kumufut. (Mat. 18:23-35) Yom ik yading yikimbinay kutufundish Yesu? Anch tud kamu chakin in kujikitish mulong wa ranaken rijim rikatay kutumekeshin Yehova, chinech chikutubachik kuyilikishin antu akwau. (Kus. 103:9) Pasut kal mivu yikemp, Chinong cha Kalam chimwing charumburila pa mulong winou anch: “Chikalap nchik tupamp tuvud twayilikishidina kal akwetu antu, tukutwishap kwilakej nich mutapu watulikishidinau kal kud Nzamb ni kutumekeshin ranaken kusutin Kristu.” Mwin kulikishin akumulikishin. Yehov ukat kuyanakenang antu akwetinga ranaken. (Mat. 5:7) Yesu wamekesha win kashinsh winou payifundishay in kwilejend mutapu wa kulembil.​—Mat. 6:14, 15. w22.06 10 par. 8-9

Yesu weza pa divu mud mwan a muntu. Wimburija mu mutapu uwanyidina wuntu wa Tatukwend. (Yoh. 14:9) Chawiy kusutin ndiy, twashikena kumwijik ni kumukat Yehova Nzamb. Tutanyidinamu kand mu mafundish ma Yesu ni mu umutakel wend upaninay ku chikumangen cha win Kristu nlel. Watufundisha kand kushakam mu mutapu umusangareshina Yehova. Ni etu awonsu tukutwish kutaninamu mu rufu ra Yesu. Pavumbukay Yesu, wafuta usey wa mash mend mud yakupesh yiwanyidina mulong wa “[kututokish] ku yitil yetu yawonsu.” (1 Yoh. 1:7) Ud katat Mwant ukweta usu ni kakezap kafa. Piswimp ap, Yesu ukumuchany nnak ku mutu. (Dis. 3:15) Musangar mud ik ukwovau antu ashinshamena chisu chikumusheshau Satan rawonsu! Kusambish katat, kangal twaziy. Nzamb wetu ud wa kuchingejin. Ukulet yiyukish yivud nakash ku “michid yawonsu ya pansh.” w22.07 18 par. 13; 19 par. 19

Tufanyidin kand kwikal aswakela kuswimp yitongijok chisu tukwatina mipak. Mulong wak? Mulong kukutwish kwikal yom yakad kutongin yikutwisha kushiken mu mwom wetu. Chilakej: Kambuy Paul wakwasha mulong wa kusal chikumangen chisu mu musumb wa Tesalonik. Pakwez, akankuny amwopata Paul mu musumb. (Mid. 17:1-5, 10) Anch Paul wakwata mupak wa kushakam kwinikwa, wafanyina kuyitek akadivar nend mu ubaj. Chikalap nchik mwamu, Paul kaziyap. Pakwez wijidina mashakamin masu. Mu kusut kwa chisu, wamutuma Timote mulong wa kubangin maswir ma mu spiritu ma in Kristu asu a ku Tesalonik. (1 Tes. 3:1,2) Tong mutapu wafanyinau in Tesalonik kwov musangar. Tukutwish kwilejin ku chilakej cha yom yamushikena Paul ku Tesalonik. Tukutwish pamwing ap kuwanyish yitinau mulong wa kwikal ni chisend kanang, pakwez yishiken yakad kutongin yatukangesh kuchikal nich. (Mul. 9:11) Anch chid mwamu ku mutambu wey, ikal uswakela kukwat mupak windj ukutwisha kuwanyish. w22.04 25-26 par. 14-15

Yehova ukat kutukasikesh kusutin kutwinkish ruchingej mulong wa machuku ma kurutu. Tushinshikinanaku kwetu yitongijok yimwing yidia mu Bibil yikutwisha kutwongoj chisu tudia mu yakamish. Mu Mifund, Yehova utwinkishin kashinsh anch kwikil chom—yikal yikokujol yikash—“chikutwisha kutwauril etu ku rukat ra [rend].” (Rom 8:38, 39) Utwinkishin kand kashinsh anch ud “piswimp kudi awonsu akata kumutazuk ndiy” mu malembil. (Kus. 145:18) Yehova utulejin anch ang twakungamen mwi ndiy, tukutwish kujijamen chikokujol chawonsu ni kutan musangar mu chilik kanang pa chisu tumena mar. (1 Kor. 10:13; Jak. 1:2) Dizu dia Nzamb dituvurishin kand anch yikokujol turishina nich yid kwau ya mu kachisu kakemp ni yikemp nakash mu kuyilakej ni yiyukish ya chikupu tukutambula. (2 Kor. 4:​16-18) Yehova utwinkishin ruchingej rakin anch ukupwish misul yawonsu yikata kuletish mar—Satan Djabul ni awonsu akata kulondul njil yend yiyimp ya wintombwij. (Kus. 37:10) Ov, walaminaku kal mu manangu mifund yimwing yikasikeshina yikutwisha kukukwash kujijamen yikokujol ya machuku ma kurutu? w22.08 11 par. 11

Ov, wiyipwilap kal anch ukutwish kamu kudandamen kushakam kukwatijan ni mbil ja kutentam ja Yehova, dichuku diapwa wakwat dikwau, muvu wapwa wakwat ukwau? Yehova wakana anch kutentam kwetu kukutwish kwikal “mudi mambek makata kwezang ku chikum cha karung.” (Isay 48:18) Tong bil mud ushich ku chikum cha karung mujim, ukat kutal mutapu ulondulijadina mambek. Ov, ukwiyakamish anchdichuku dimwing mambek minam makupwa? Bwat! Wij anch makudandamen kwez. Mwikadil wey wa kutentam ukutwish kwikal mud mambek ma pa karung! Mutapu ik? Chisu ukimbina kukwat mupak, chakusambish sal usu wa kwijik yom yikatinay Yehova anch usal. Kupwa yisala. Chikalap nchik kujimb kwa mupak ukimbina kukwat, Tatukwey wa rukat ukudandamen kwikal ney piswimp mulong wa kukukwash kushal wiminya dang ni kushakam dichuku diawonsu kukwatijan ni mbil jend ja kutentam.​—Isay 40:29-31. w22.08 30 par. 15-17

Kwinsudiel kwa mivu 1000, Satan akez kamulikijaku mu rukan. Chawiy, ukusal chad usu wa kuyipumbul antu awanyidina. Pa chisu cha kupak kwinoku, antu awonsu awanyidina akwikala pa divu akwikal ni mutapu wa kumekesh patok anch alimishin dijin dia Yehova ni kumekesh anch ndiy kusu umwing uwanyidina kuyikel. (Kuj. 20:8-10) Mutapu ukwakulau ku kupak kwinoku ukumekesh anch majin mau akumafund chikupu mu mukand wa mwom. Antu amwing, twakad kwijik uvud wau, akulik kuziyin ku winyikel wa Yehova mud Adam ni Ev. Yom ik yikuyishikena? Kujingunik 20:15 utulejin anch: “Muntu mwawonsu wakad kufundau dijin mu mukand wa mwom amudjibula kand niyend mu dijiy dia kasu.” Chakin, antu inay akubwambwila akuyishesh chikupu. Pakwez antu avud akwikala awanyidina akushal ashinshamena ku kupak kwinoku. w22.09 23-24 par. 15-16

Antu amwing a mu chikumangen cha mivu chitot yakusambish ajijameshina anch ading afanyidin kuyitwal Akamichid ikala in Kristu ku mukand, pamwing ap mulong wa kwipuk kuyilond nayimp kud in Yuda. (Gal. 6:12) Kambuy Paul kasangerap ap pakemp chitongijok chinech, pakwez pa ndond pa kujijamesh chakwel alondul chitongijok chend, watwala mulong winou kud atwimbuy ni amakurump ading mu Yerusalem. (Mid. 15:2) Mud chibudikin, mwikadil wend wakwasha in Kristu inay kulam musangar ni chisambu mu chikumangen. (Mid. 15:30, 31) Anch kwikal kupwitamijan kukash, tukat kukasikesh chisambu kusutin kukimb umutakel wa antu atondau kud Yehova mulong wa kubangin chikumangen. Yisu yivud, umutakel wimedina pa Bibil tukutwish kuutan mu mabuku ap mu mikand yetu yipanina umutakel yibudishinau mu dirijek dietu. Anch twitekin chisu cha kulondul umutakel winou pa ndond pa kukasikeshin pa umutakel wetu ayinetu, tukukasikesh chisambu mu chikumangen. w22.08 22 par. 8-9

Mwakumap nchik, etu awonsu tukat kwovang ja kumulej murund wa piswimp mutapu twiyovila. Yisu yimwing chikutwish kwikal chikash kusal mwamu. Chikutwish kutukasiken kwikal ni chaku cha kuyilej antu akwau yovil yetu ya mukach, ni chikutwish kutusal nayimp nakash anch twajingunin anch murund netu wayilejinamu antu akwau yom twamuleja. Chawiy, tukat kusangar nakash anch tukwet murund tukutwisha kulej yom ya ujindj ni kwikal nich kashinsh anch kakumulejamwap muntu mukwau! Amakurump ijikena anch akat kulam ujindj ad mud “chibwik cha kukangesh rinkind, ni ndond ya kujingam mulong wa ruvul wa rinkind mukash” kud akadivar nau. (Isay 32:2) Twij anch tukutwish kuyilej amakundj inay milong yetu, nich kashinsh anch akulam ujindj wa yom tuyilejina. Tukatap kuyishindin mulong wa kutujingunin ujindj wa yom yijau. Chikwau kand, tukat kuyijikitish amband a amakurump, mulong kakatap kupakish kuyipul anfumwau chakwel ayilej nsangu ja ujindj. Chakin kamu, chid chiyukish nakash anch amakurump alik kuyilej akajau nsangu ja ujindj ja akadivar ni anambaz. w22.09 11 par. 10-11

Tufanyidin kwikal nich kashinsh anch Yehova ukuyikamunin atushalapol end ashinshamena chisu cha ‘mar makash.’ (Mat. 24:21; Dan. 12:1) Ukusal mwamu chisu chikubombakana michid—kubombakan kutazukinau anch Gog wa Magog—mulong wa kuyirishikish nich chisum nakash atushalapol ashinshamena a Yehova adia pa mangand mawonsu. Ap anch pakach pa michid yiney yikubombakana pikal jingand jawonsu 193 jisadina Nations unies, jikutwishap kurish ni Udia Piur pa yom yawonsu ni amasalay end a mwiur! Yehova washilamu anch: “[Nikez] kwijikish kujimb kwam ni katumb kam ku michid yawonsu. Chad awiy akez kwijik anch am yam [Yehova].” (Ezek. 38:14-16, 23) Kurishikish kwa Gog kukuletish njit ja Harmagedon ni pawiy pakusheshay Yehova “ant a mangand mawonsu.” (Kuj. 16:14, 16; 19:19-21) Chinyim ni chinech, “antu atentamina akuswan ngand, ni antu akashinsh akushakamamu.”​—Jnsw. 2:21. w22.10 16-17 par. 16-17

Tukutwishap kwijik yidia mu michim; ching kusu Yehova ndiy ukata “kutal muchim.” (Jnsw. 16:2) Uyikatin antu in awonsu, adia ku jindond kushalijan ni akweta yishankur kushalijan. Ni utukasikeshin niyetu anch “anzurilany kand michim yen.” (2 Kor. 6:13) Tufanyidin kusal usu wa kuyikat akadivar ni anambaz netu awonsu, kangal kuyirumburish. Chinech chirumburikin kand anch tufanyidinap kuyirumburish antu adia pol pa chikumangen. Ov, wamurumburishinap kal mwanamakwey wakad kwikal kaman ni kulond anch: “Muntu winou kakezap ap pakemp kwikal mu uyakin”? Bwat, kusal mwamu kud kumatik mimbu yetu, ni kwiman ayinetu mud tutentamin. Yehova udandamedin kuyishil “antu awonsu adia mu jindond jawonsu” chisu cha kukarumuk. (Mid. 17:30) Kangal wavuramen anch Yehova ukat kuyiman antu awonsu atongina anch atentamin nakash kuyisutamu antu akwau anch katentaminap. Chifanyidin rukat retu mulong wa mbil ja Yehova piur pa kutentam rituletin musangar ni kutukwash kwikal yilakej yiwamp kud antu akwau chakwel atukat ni kumukat Nzamb nakash. w22.08 31 par. 20-22

Tufanyidin kulam mu manangu anch tukurish nich rupompat patusadina usu wa kuwanyish mudimu wetu wa kulejan. (Dan. 11:44; 2 Tim. 3:12; Kuj. 16:21) Pakwez, tukutwish kwikal nich kashinsh anch Yehova ukutwinkish ukwash tuswirikedina. Mulong wak? Yehova ukat kuyikwashang chisu chawonsu atushalapol end kuwanyish yisend yau—ap anch chidiap nchik chisend chikash. Tushinshikinany yom yimwing yashikena mu mwom wa muprofet Ezekiel, walejana kud in Yuda ading mu winkwal mu Babilo. Mutapu ik wadingau antu adinga mu teritwar walejenay Ezekiel? Yehova wayirumburila anch ading akwet ‘mutu ukash,’ ‘michim yichinchikina,’ ni “in kubwambwil.” Ading antu a ubaj mud miy ap mud atwinvand. Chawiy, choviken mulong wak Yehova wamuleja Ezekiel tupamp tuvud anch: “Kangal wayov wom”! (Ezek. 2:3-6) Ezekiel wading ni mutapu wa kuwanyish chisend chend cha kulejan mulong (1) Yehova ndiy wamutuma, (2) amwinkisha usu kud spiritu wa Nzamb, ni (3) mazu ma Nzamb makasikesha ritiy rend. w22.11 2 par. 1-2

Yom yawonsu yikweta mwom yatangay Yehova pa divu yafanyina kufa, kudioshaku antu, mulong wayinkisha ruchingej ra kulik kufa. Yehova watutanga kand ni maswir makash ma kudandamen kwikal aom. Bibil ulondin anch Nzamb ‘wateka mu michim yetu maswir ma kushakam chikupu.’ (Mul. 3:11) Chawiy chisadina anch tumana rufu mud mukankuny netu. (1 Kor. 15:26) Anch twayel nakash ov, tukutwish kwetu kushakam mwamu pakad kusal chom ni kuchingel rufu? Bwat kamu. Pakad kulab tuyiling kwa mwingang ap kand kuna mwon mulong wa kwiyokish. Chikwau kand tukat kusalang yawonsu yitwishikina mulong wa kulik kufa. Ni anch mukatish netu wafa, ikal nsand ap ipal, tukat kwovang kusansan ni runeng mu chisu chilemp. (Yoh. 11:32, 33) Chakin kamu, tukutwish kudandamen kwilej chikupu ni tukwet maswir makash ma kushakam chikupu mulong sakatang wetu watutanga ni maswir minam. w22.12 3 par. 5; 4 par. 7

Ambay netu in Kristu avud akutwish kuyel, kwov wom ni kwiyov anch ad kwau ayinau pa yisu ya mar. Sal usu wa kwambambang ni akadivar nau anambaz ney. Chipupu chikutwish kusal anch tulama chintamp kanang ap anch tud ni ambay netu in Kristu. Mu chisu mud chinech, ukutwish kwiyov mud mwiyovay kambuy Yohan. Wading ukatin kumanijan ni murund nend Gayus mes ni mes. (3 Yoh. 13, 14) Pakwez, Yohan wading wij anch pa chisu chinacha kakutwishap kumanijan ni Gayus. Chawiy Yohan wasala yom yading yitwishinay kusal; wamufundina Gayus mukand. Anch chitwishikinap kuyendin akadivar nau anambaz ney, pakish kuyitazuk ku telefon, apel video, ap kuyitumin mesaj. Anch witekin chisu cha kwambambang nau ambay ney in Kristu, ukutwish kwiyov anch ud mu diking ni mu chisambu. Sal usu wa kwambamb nau amakurump anch wiyakamishin nakash, ni itiy ukwash wau wa rukat.​—Isay 32:1, 2. w22.12 17-18 par. 6-7

Bibil ulejen anch chisu chimwing Josef amuteka mend mwi mpompu ni mutu wend mu jimbwambu. (Kus. 105:17, 18) Mwom wa Josef wading uyil mu kuyip nakash. Kadingap kand kashalapol uchingejidinau, pakwez wikala chad muntu wa rukan. Ov, warishinap kal ni mulong ukash wading uyila mu kuyip nakash chikalap nchik malembil mey makurikina? Yom mud yiney yikutwish kushiken. Yehova kakatap kukangesh yikokujol ya mu mangand minam matakedinau kud Satan kutushiken. (1 Yoh. 5:19) Pakwez ukutwish kwikal nich kashinsh anch, Yehova wij nawamp milong urishina nich ni ukubangidin. (Mat. 10:29-31; 1 Pita 5:6, 7) Chikwau kand, wakanin kal anch: “Kinikukushap, kinikez kakulikap chikupu.” (Heb. 13:5) Yehova ukutwish kukukwash kujijaman ap anch milong urishina nich yimeken mud kwikil ruchingej. w23.01 16 par. 7-8

Mifund yitwinkishin kashinsh anch Nzamb kakutwishap kutudjubul anch twarumbuk. In Isarel amurumbukina Yehova tupamp ni tupamp; pakwez chisu chakarumukangau chakin, Nzamb wayilikishinang. In Kristu akusambish niyau ading ij nawamp anch Nzamb uyikatin. Kusutil spiritu utumbila, kambuy Paul wayikasikesha in Kristu “kumulikishin ni kumwongoj” ikundj umwing wading wiyandjikina kal mu chitil chikash pakwez kupwa wakarumuk. (2 Kor. 2:6, 7; 1 Kor. 5:1-5) Chitupukwin nakash ku muchim pa kuman anch Yehova kakatap kuyidjubul atushalapol end mulong kwau akat kurumbok! Pakwez, nich rukat ukat kuyikwash, kuyipup, ni kuyitiy kand kwikal arund nend. Ukanin kand kusal mwamu nlel kud akayitil awonsu akata kukarumuk. (Jak. 4:8-10) Bibil umekeshin manangu ma Nzamb, kutentam kwend, ni rukat rend. Buku winou umekeshin anch Yehova ukatin anch tumwijik. Ukatin kand anch twikal arund nend. w23.02 7 par. 16-17

Tukwet diyingishin diwamp dia kushinshikin mutapu yom yisadikina katat mu mangand yiwanyishina uprofet wa Bibil. Chilakej, Yesu walejana yom ya pakampwil yikutwisha kutukwash kwijik anch chisu chikushika disudiel dia mangand minam ma Satan chasej kal piswimp. (Mat. 24:3-14) Kambuy Pita watukasikesha kuburil mes piur pa mutapu uwanyidina uprofet mulong wa kukasikesh ritiy retu. (2 Pita 1:19-21) Utukwashin kwikal ni chitongijok chisikena chisu tushinshikidina uprofet wa Bibil. Utukasikeshin ‘kuchingel [kulam chisu chawonsu mu manangu] Dichuku dikurumburishay Nzamb.’ Mulong wak? Kadiap mulong wa kukimb “uchuku ni muten” dichuku dikushika Harmagedon, pakwez mulong tusotil kusadil chisu chishadilaku mulong wa kwikal ni “mwom utumbila, [kwikal] kand in kudandamen kudi Nzamb.” (Mat. 24:36; Luka 12:40) Tukatil kulam mwikadil uwamp, ni kwikal nich kashinsh anch yom yawonsu tumusadidina Yehova tuyisadin mulong tumukatin nakash. Mulong wa kudandamen kusal mwamu, tufanyidin kubabal ayinetu. w23.02 16 par. 4, 6

Kud yom yifanyidinau “amikoku akwau” kusal nlel mulong wa kwikal ni dilau dia kushakam mu Paradis. Tufanyidin kumekesh mutapu twiyovila piur pa Yesu. Chilakej, tukat kumekesh anch tumukatin kusutin mutapu tukata kuyisadin akadivar nend azizidilau many. Yesu walonda anch ukez kayirumburish amikoku kukwatijan ni mutapu ukuyisadinau akadivar nend. (Mat. 25:31-40) Tukutwish kuyikwash akadivar nend a Yesu kusutin kuyinung chikas nich mushiku mu mudimu wa kulejan ni wa kwikadish in kwilej. (Mat. 28:18-20) Tufanyidinap kuchingel anch ching twandam bil mu Paradis chad lel twikal ni yaku yikatinay Yehova anch antu akushakamamu ikal nich. Kusambish katat tufanyidin kusal usu wa kwikal in kashinsh mu mazu ni mu yaku yetu ni kwikal isikena mu mwom wetu. Ni tufanyidin kwikal ashinshamena kud Yehova, kud mbay netu wa uruw, ni kud ambay netu in Kristu. Anch twasal usu wa kuziyin kwi mbil ja Yehova patudia mu mangand minam mayimp, chikutuswapel kusal mwamu mu Paradis. Tukutwish kand kukudish ukaliweny ni yaku yimekeshina anch twirijekin mulong wa kushakamamu. w22.12 11-12 par. 14-16

Tukatin anch Yesu ikal Mwant wetu mulong ud Nyikel muwamp nakash. Yehova amwinend ndiy wamufumba Mwanend ni kumutond kwikal Mwant. (Isay 50:4, 5) Tongin bil kand rukat ripandikena kujimb ramekeshay Yesu. (Yoh. 13:1) Mulong Yesu ud Mwant wey, ufanyidin chakin kamu kumukat. Walejana anch antu amukatina chakin kamu—atazukinay anch arund nend—akat kumekesh anch amukatin kusutil kuziyin kwi mbil jend. (Yoh. 14:15; 15:14, 15) Did chakin kamu dilau dijim nakash kwikal murund wa Mwan a Yehova! Wij anch Yesu wikepishin ni ukat kumwimburij Tatukwend mu mutapu uwanyidina. Wilejin kal anch Yesu wayidisha antu ading afila nzal, wayikasikesha ading aziyina, ni wayoka kand ayej. (Mat. 14:14-21) Wimedinap amwiney mutapu utakedinay chikumangen chend nlel. (Mat. 23:10) Ni wij anch ukusal yom yivud nakash mu machuku ma kurutu mud Mwant wa Want wa Nzamb. Mutapu ik ukutwisha kumekesh anch umukatin? Kusutil kwimburij chilakej chend. (Yoh. 14:21) Ukutwish kusal mwamu kusutil bil kwipan kud Yehova ni kutambul dibatish. w23.03 4 par. 8, 10

Yehova ndiy watanga yom yawonsu yidia mwiur, pakwez ndiy kand watanga yom yawonsu yishimokishena yidia pa divu ni mu karung yikutwisha kutufundish yom yivud piur pend. (Kus. 104:24, 25) Ni tongijokin bil mutapu watutangau kud Nzamb. Watutanga ni mutapu wa kusanger ufun wa yom yatangay. Ni watwinkisha kand mutapu wa kusanger yitang kushalijan kusutil ukaliweny wa kuman, kutesh, kupukun, kwov kutal, ni kwov madjimb. Bibil ulejen kand diyingishin dikwau difanyidina kutubachik kushinshikin yitang. Yikat kutukwash kujingunin mikadil ya Yehova. (Rom 1:20) Chilakej, tongijokin pa mutapu upandakena kuwap watangay Yehova yom. Ov, yimekeshinap kwau manangu ma Nzamb? Tongin kand piur pa yakudia kushalijan tukutwisha kusanger. Ud uman umekeshina patok anch Yehova uyikatining antu. Kujingunin mikadil ya Yehova kusutil yom yatangay, kukat kutukwash kumwijik nawamp nakash ni kutubachik kumusejin piswimp nakash. w23.03 16 par. 4-5

Mulong mangand minam mayil mu kuyip nakash, ruchingej retu mu uyakin akuripak. Antu akutwish kutubachik kwidjidjek piur pa uyakin wa Bibil ap piur pa kashalapol ushinshamena ni kubabal watonday Yehova mulong wa kuyitakel atushalapol end nlel. Pakwez anch tukwet kashinsh anch Dizu dia Nzamb diding ching diakin, yom yiney yikutwishap kuziyish ritiy retu. Tukukwat mupak wa “[kutond] kuziyil yijil ya [Yehova] djat ni ku rufu.” (Kus. 119:112) ‘Kitukwovap usany’ wa kuyilej antu akwau uyakin ni kuyikasikesh kushakam kukwatijan ni uyakin winou. (Kus. 119:46) Ni Tukutwish kujijamen yikokujol yikash, kuwejaku kand kuzengol, “nich kushimpish kwa muchim nich musangar.” (Kol. 1:11; Kus. 119:143, 157) Uyakin winou ukat kutukasikesh ni kutwinkish umutakel mu mangand minam madia mu kanrumbangesh nakash. Ukat kutwinkish ruchingej mulong wa machuku ma kurutu mawamp nakash chisu chikuyikela Want wa Nzamb. w23.01 7 par. 16-17

Uchuku wasambela rufu rend, Yesu walembila chisu chilemp mulong wa in kwilejend, wamwita Tatukwend “[kuyichidij] kudi Sakudimban, ndiy kamu Muyimp.” (Yoh. 17:15) Chinech chimekeshin mutapu Yesu wading uyikatinay! Ap anch wading piswimp ni kurish ni yikokujol yikash; pakwez, wading wiyakamishin piur pa atwimbuy end. Mulong wa kumwimburij Yesu, tufanyidinap kwetu kushinshikin ching pa maswir metu. Pakwez, tufanyidin kudandamen kulembil mulong wa akadivar nau anambaz netu. Anch twasal mwamu, tukumekesh anch tuziyidin kwi mbil ya Yesu ya kukatijan umwing ni mukwau, ni tumekeshin kud Yehova anch tuyikatin nakash ambay netu. Kulembil mulong wa akadivar nau anambaz netu kudiap kushadish chisu. Dizu dia Nzamb ditulejin anch “kulembil kwa muntu utentamina kukwet ukash wa kusal chom.” (Jak. 5:16) Ambay netu in Kristu akwet kuswir kwa malembil metu mulong arishin ni yikokujol yikash. w22.07 23-24 par. 13-15