Ngond wa 7

Chipan chetu cha kulond atwinkishach kud Nzamb wetu mukatish. Pakwez, chipan cha kulond achisadina mu mutapu uyimp. Satan Djabul wamudimba Ev, ni makasu minam mayishikija antu ku chitil ni kuburen kuwanyin. (Dis. 3:​1-4) Adam wasadina nayimp rudim rend chisu chamufishay nich Ev—chikupu ni Yehova—mulong wa kurumbuk kwa amwinend. (Dis. 3:12) Kain wamudimba Yehova kupwa kwa kumujip mwanchend Abel. (Dis. 4:9) Mu mafilm mavud nlel mud antu asadidina mazu mayimp. Ansand a shikol akat kutesh mazu mayimp ku shikol, ni antu amakurump akat kumatesh ku jindond ja mudimu. Anch tubabelap, tukutwish kwikal ni chaku cha kutesh mazu mayimp ni kuwil mu mupit wa kusambish niyetu kumasadin. Chakin kamu, mulong tud in Kristu, tukatin kumusangaresh Yehova, ni chinech chitinap kwau kwimen kusu pa kwipuk kulond yom yiyimp. Tukatin kusadin chipan cha kulond mu mutapu uwamp—mulong wa kumutumbish Nzamb wetu. w22.04 4 par. 1-3

Yesu wading ni chitongijok chisikena piur pa yom ya ku mujimbu. Wading ukatin kudia ni kuna. (Luka 19:2, 6, 7) Chisu chimwing, wasala mar mawamp nakash—chawiy chading chilay chend cha kusambish. (Yoh. 2:10, 11) Ni pa dichuku diamujipau, wading udjadin disun dia usey nakash. (Yoh. 19:23, 24) Pakwez Yesu kalikidinap yom ya ku mujimbu kwikal chom cha usey nakash mu mwom wend. Yesu wafundisha anch ang twakimb bil Want wa Nzamb, Yehova ukutenchik chakwel twikal ni yom tukweta nich kuswir. (Mat. 6:31-33) Kusadin yiyul ya manangu ma Nzamb piur pa nfalang kwayikwashin kal antu avud. Tushinshikinany chilakej cha mukadivar Daniel udia mujich. Ulondin anch: “Pinading mwanikanch, nakwata mupak anch nikutek yom ya mu spiritu pa ndond ya kusambish mu mwom wam.” Mulong wading ni mashakamin mapipela, Daniel watwisha kusadin chisu ni ukaliweny wend mulong wa kukwash kwi ndond kwading yinship ya mar ni kusadin ku Betel. Ulondin kand anch: “kwikil uvud kanang wa nfalang tukutwisha kwilikej ni yiyukish yinginkishinay Yehova.” w22.05 21-22 par. 6-7

Tukutwish kumekesh anch tukatin uyakin kusutin kwilej nich mushiku Bibil ni mikand yetu yimedina pa Bibil. Chom cha usey nakash tufanyidina kulam mu manangu chawiy ech: chikalap nchik uvud wa mivu twasadina kal mu uyakin, tuchikwet kal yom yivud nakash ya kwilej. Kwilej uyakin ud mudimu ukash, pakwez chid cha usey nakash kusal mwamu. Kadiap etu awonsu tukatina kutang ni kwilej Bibil. Pakwez Yehova utwitin ‘kudandamen kukimb’ ni ‘kudandamen kusurab’ mulong wa kwikal ni ronganyin rikurikina ra uyakin. (Jinsw. 2:4-6) Anch twipan mu kusal usu mud winou, tukutaninamu nakash. Pantaliken ni kutang kwa Bibil, Corey ulondin anch ukat kushinshikin pa verse umwing pa chisu chimwing. Urumburil anch: “Nikat kutang ma not mawonsu ni kutal mareferans matekinau, ni kupwa nikat kukimbijol kand. . . . Kusadin mulad winou wa kutang kwankwasha kwilej yom yivud nakash!” Tusadin mulad winou ap bwat, tukat kumekesh kujikitish kwetu mulong wa uyakin anch twishil chisu ni twasal usu wa kwilej uyakin.​—Kus. 1:1-3. w22.08 17 par. 13; 18 par. 15-16

Padingay pa divu, Yesu wasadina yitang mulong wa kuyifundish in kwilejend piur pa Tatukwend. Tushinshikinanaku malejan makemp mafundishay. Yehova uyikatining antu awonsu. Mu Mafundish ma pa Mukandu, Yesu wayileja in kwilejend piur pa muten ni ruval, yom yijidinau kal antu avud kuman ni yilikiningau kukwat mud yid ya pakampwil. Yom yiney yid ya usey mulong wa kudandamen kwikal ni mwom. Yehova wafanyina kwend kuyikish antu akad kumusadin yom yiney. Pakwez, mulong wa rukat rend, ukat kuyinakishin antu awonsu ruval ni kuyibudishin muten. (Mat. 5:43-45) Yesu wasadina dilejan dined mulong wa kuyifundish in kwilejend anch Yehova ukatin anch tuyikat antu awonsu. Chisu chawonsu usangaredina kwandam kwa muten ap umena karuval kawamp kanakina kwa matul, vurik rukat rakad kasolikany ra Yehova. Chilakej chend chikutwish kutubachik kumekesh rukat ra mutapu winou kusutil kulejan kud antu awonsu. w23.03 17 par. 9-10

Yom ik yamushimokisha kambuy Yohan? Mband wading ushicha pa nnam wa chidiany musuz. Amurumburil mud “mband wa kusochik” ni amutazukin anch “Babilon Mujim.” Amulejen kand anch ukat kusal ‘masandj’ ni “ant a mangand.” (Kuj. 17:1-5) Nany udia “Babilon Mujim”? Mband winou kafanyidinap kumekesh ditenchik dia chipolitik, mulong amulejen anch ukat kusal masandj ni ant a chipolitik a mangand. (Kuj. 18:9) Chikwau kand, ukat kusal usu wa kuyiyikel ant inay, yawiy yimumekeshinau mu chifanakesh ushich piur pa nnam winou. Kupwa, mband winou kakutwishap kumekesh antu asadina ditenchik diyimp dia kwisak dia mangand minam ma Satan. Mulong antu inay ayijimbwil niyau panrau ni ayitazukin anch “in kwisak a pa mangand.” (Kuj. 18:11, 15, 16) Mu Babilon wa pakur mwawiy mwasambishina difukwil dia makasu. Chawiy, komb Babilon Mujim umekeshin milad yin yawonsu ya difukwil dia makasu, charumburik anch marelijon mawonsu ma makasu madia pa mangand.​—Kuj. 17:5, 18. w22.05 11 par. 14-16

Yisu yivud, chikat kumushikenang maku kwiyipul anch anau akutwish kukwat mupak wa kumusadin Yehova. Anvaj ij nawamp yikokujol yirishinau nich anau mulong wa yibachikin yiyimp ya mangand ma Satan. Chikwau kand, amaku avud arishin pa kulil anau ayinau pakad ikundj, ap pamwing ni ikundj wakad kwikal Kaman. Kadiap ching kusu anvaj akweta ambay a uruw akad kwikal Atuman arishina ni yikokujol mud yiney. Ap anch anvaj awonsu aad ad mu uyakin, chikutwish kuyikasiken kupukun michim ya anau mu chilik cha kuyikwash kwikal atushalapol ashinshamena a Yehova. Ap anch chidiap nchik mwamu, kangal wiyakamish nakash. Yehova ukukukwash. Ov, umen kand nchik mud anch wayipul anvaj akwau akweta ukaliweny mulong wa kukuyul piur pa mutapu wa kusadin yamu yidiaku mu difukwil dia mu dijuku? (Jnsw. 11:14) Yehova ukutwish kand kukukwash mu mambamb ni aney. Mwita chakwel akukwash kujingunin yitongijok yidia mu manangu ni mu michim yau.​—Jnsw. 20:5. w22.04 17 par. 4, 7; 18 par. 9

Tukutwish kukul mu rukat retu mulong wa Yehova kusutin kumwijik nawamp Mwanend wimburija mu mutapu uwanyidina wuntu wa Tatukwend. (Heb. 1:3) Mutapu uwamp wa kumwijik Yesu ud kusutin kwilej nsangu jidia mu ma Evanjil manying. Anch kandikal wikal ni chaku chiwamp cha kutang Bibil dichuku diawonsu, chid cha usey kusal mwamu kusambish katat. Piutangina nsangu piur pa Yesu, fund mikadil yend ukujingunina. Wading muntu uswapela kusejin; nich rukat wayisendang an akemp mu makas mend. (Mar. 10:13-16) In kwilejend iyovang pee anch ad nend, ni chayiswapelang kumulej yom yikwetau ku muchim. (Mat. 16:22) Pa mulong winou, Yesu wamwimburija Tatukwend wa mwiur. Yehova niyend uding uswapela kusejin. Tukutwish kumusejin mu malembil. Chisu tulembila, tukutwish kumufungwil muchim wetu wawonsu nich kashinsh anch kakutufishap nich. Utukatin ni ukat kutubangin.​—1 Pita 5:7. w22.08 3 par. 4-5

Mulong ud Sakatang wetu, Yehova wij yom yin yawonsu piur petu. Tong bil! Wij kachom ni kachom piur pa muntu win mwawonsu udia pa divu. (Kus. 139:15-17) Chawiy, ukat kuman ulim wawonsu twaswana kud anvaj etu. Chikwau kand, wij nawamp yom yin yawonsu yatushikena mu mwom yasala anch twikal chitudia nlel. Kwijik nawamp yom yikata kuyishiken antu kukat kumubachik Yehova kusal yom ik? Kukat kumubachik kuyisadin antu nich ranaken. (Kus. 78:39; Kus. 103:13, 14) Yehova wamekeshin kal anch uswakel kulikishin. Wij anch mulong wa yisal ya ikundj wa kusambish Adam, etu awonsu twawidin kal mwi njil ya chitil ni rufu. (Rom 5:12) Kwadingap mutapu wa kwikol ayinetu ap wa kuyikwol antu akwau mwi njil yiney. (Kus. 49:7-9) Pakwez chikalap nchik mwamu, Nzamb wetu wa rukat watumekeshina ranaken, ni warijeka mutapu wa kutukol. Mud mulejenau mu Yohan 3:16, Yehova wamutuma Mwanend kapokal mulong wa kutufil.​—Mat. 20:28; Rom 5:19. w22.06 3 par. 5-6

Chitongijjok cha kulond anch mwin kulikishin akumulikishin achovakeshin patok mu yom yalonday Yehova kud kashalapol wend Job. Ikundj winou amunenganesha nakash kusutin mazu mayimp nakash masadinay Elifaz, Bilidad, ni Sofar. Yehova wamuleja Job kuyilembil. Kupwa kwa Job kusal mwamu, Yehova wamuyukisha. (Job 42:8-10) Chid cha ubaj kulam rukuny. Yehova ukatin anch tusanger chisambu tukata kwov anch twadiosh rukuny ku muchim. (Efes 4:31, 32) Ulondin anch “ikuchika ku kuswej, ulika ujim.” (Kus. 37:8) Chid cha manangu nakash kulondul chiyul chinech. Kulam rukuny kukutwish kwikal ni yibudikin yiyimp pa ukash wetu wa mujimbu ni wa mu manangu. (Jnsw. 14:30) Kumulamin muntu rukuny kud mud kuna ulemb ni chitongijok cha kumusal muntu mukwau nayimp. Pakwez mu uyakin chinech chikutwishap kumusal muntu waturumbukinang nayimp ap pakemp. Chawiy, anch twayilikishin antu akwau, tukat kutaninamu ayinetu. Tukat kwikal ni chisambu cha mu manangu ni mu muchim, ni chikat kutuswapel kudandamen mu mudimu wa Yehova. w22.06 10 par. 9-10

Ruchingej retu rikat kusal mud chiful cha chifanakesh chikata kuking yitongijok yetu ni kutukwash kwipuk mashakamin makutwisha kuyipish urund wetu ni Yehova. (1 Kor. 15:33, 34) Ruchingej retu rikutwish kutukwash kwipuk kutong anch kwikil chom tukusala chikutwisha kumusangaresh Yehova. Chilakej, antu amwing akutwish kutong anch: ‘Nikutwishap ap pakemp kwikal pakach pa antu akutambula mwom wa chikupu. Nidiap kamu kwam muntu muwamp. Nikutwishap ap pakemp kushakam kukwatijan ni mbil ja Nzamb.’ Vurik anch Elifaz, murund wa makasu weza kumwongoj Job, wasadina niyend yitongijok ya mutapu winou. Elifaz walonda anch: “Ov, muntu udi chom ik ing ikala wa zwang?” Kupwa walonda piur pa Nzamb anch: “Ap atumbila, Nzamb kayichingejinap kwend, ni maur kimishitwilap ku mes kwend.” (Job 15:14, 15) Makasu mayimp mud ik! Vurik anch Satan ndiy ukatina anch utonga mwamu. Wij anch ang wasambish kutong mwamu, ukusambish kushadish ruchingej rey. Chawiy, komb ipuk makasu minam, ni shinshikin pa kushilamu kwa Yehova. Kangal widjidjek anch Yehova ukatin anch wikal ni mwom wa chikupu, ni anch ukukukwash kuwanyish rutong riner.​—1 Tim. 2:3, 4. w22.10 25-26 par. 8-10

Satan wading ukatin Job atong anch umen mar mulong kakwetap dilau dia Yehova. Chilakej, Satan wasadina rinkind mukash chakwel chikumbu chiyiwila an awonsu atan a Job ading adila pamwing. (Job 1:18, 19) Waletisha kand kasu kudiokal mwiur chakwel kashesh yivam ya Job ni atushalapol end ading ayilamina. (Job 1:16) Mulong rinkind ni kasu yadiokala mwiur, Job watonga anch Yehova Nzamb ndiy wading Musul wa yom yiney. Mud chibudikin, Job watonga anch wasala chom kanang chamujimesha Yehova. Ap mwamu, Job walika kumushing Tatukwend wa mwiur. Job wavurika anch mu mivu yivud, Yehova wamwinkisha yom yiwamp yivud nakash. Chawiy watonga anch, mud mutapu wasangerangay kwitiy yom yiwamp, chimufanyidin kand kwitiy yom yimp. Chawiy walond anch: “Chifanyidin dijin dia [Yehova] ditumba kwau.”​—Job 1:20, 21. w22.06 21 par. 7

Yesu wayibabesha in kwilejend mu mutapu winou nich mazu mafundinau mu Yohan 17:14. Twamen chakin kamu kuwanyin kwa uprofet winou, pakampwil mu mivu 100 yasutina ey. Mutapu ik? Chisu chikemp kupwa kwa Yesu kwikal Mwant mu muvu wa 1914, Satan amudjibula pa divu. Katat ukat kunyingumokin ku divu ni uchingedin disheshik diend. (Kuj. 12:9, 12) Pakwez kavunginap makas pachingedinay disheshik diend. Satan ud kabaaj ni ukwet ujim nakash, ni upwishidin ujim wend pad atushalapol a Nzamb. (Kuj. 12:13, 17) Chawiy chisadina anch antu adia mu mangand ayikis nakash atushalapol a Nzamb. Ap mwamu, tukwetap diyingishin dia kumwov Satan ni awonsu adia ku mutambu wend wom. Pakwez, tukutwish kwikal nich kashinsh mud kadingay nich kambuy Paul wafunda anch: “Anch Nzamb udi ni yetwetu, ov, nany ukutwisha kutupompat?” (Rom 8:31) Tukutwish kutek ruchingej rawonsu mudiay Yehova. w22.07 18 par. 14-15

Yesu kiyakamishap anch kukwikal in mudimu akemp pa chisu cha kwinsudiel kwa mangand. Wading wij anch mazu ma uprofet manam malonday nfund a kuseng mafanyina kuwanyin: “Dichuku diukurisha nau akankuny ney nich dikand, antwey akwipan, mulong wa kukwash.” (Kus. 110:3) Anch ukat kulejan rusangu ruwamp, ukat kumukwash Yesu ni kashalapol ushinshamena ni ukwashin kuwanyish uprofet winou. Mudimu udandamedin kuya kurutu, pakwez kud yikokujol yivud. Chikokujol chimwing chirishinau nich in kulejan a Want rid rupompat. In kupumbok, antakel a chirelijon, ni antu a chipolitik ayilejin kal antu avud nakash yom ya makasu piur pa mudimu wetu. Anch anamakwetu, antu a chijiken, ni ambay netu a mudimu itiyij makasu minam, akutwish kututek kasu chakwel twimik kumusadin Yehova ni kulejan. Mu jingand jimwing, akankuny netu akat kuyirishikish atushalapol a Nzamb, kuyovish wom, ni kuyitek mu jinkan. w22.07 8 par. 1; 9 par. 5-6

Yehova ukatin anch twishilang chisu pichuku pichuku mulong wa kwilej Bibil ni kutongijokin chikurikina pa yom tutangina. Anch twasadin yom twilejina, ritiy retu rikukasikan ni tukusej piswimp ni Tatukwetu wa mwiur. Mud chibudikin, tukwikal ni yawonsu tuswirikedina mulong wa kujijamen yikokujol. Yehova ukat kupanang kand spiritu wend utumbila kud awonsu akata kuchingejin mu Dizu diend. Ni spiritu winou ukutwish kutwinkish “ukash upandakena ukash wawonsu” mulong wa kujijamen chikokujol chawonsu. (2 Kor. 4:7-10) Nich umutakel wa Yehova, ‘kashalapol ushinshamena ni kubabal’ ukat kubudish mikand, mavideo, ni mizik yivud nakash yikutwisha kutukwash kukasikesh ritiy retu ni kushal achila ku mes mu spiritu. (Mat. 24:45) Yehova wayifundishin kal atushalapol end kwongojijan umwing ni mukwau pa yirung yikash. (2 Kor. 1:3, 4; 1 Tes. 4:9) Akadivar ni anambaz netu akat kwimburij chilakej cha Elihu kusutin kutukwash kushal ashinshamena chisu turishina ni yakamish. w22.08 12 par. 12-14

Kusutin kujimbul mikadil yiwamp ya akadivar ni anambaz netu tukuyikwash kusejijadin piswimp, ni chinech chikukasikesh rukat mu chikumangen. Yisu yimwing, ap in Kristu aswila kal mu spiritu akutwish kwikal ni yitongijok yishalijadina ap kupwitamijan. Yom yiney yamushikena kambuy Paul ni murund nend wa piswimp Barnabas. Amakundj inay aad apwitamijana nakash piur pa kumusend Marko chakwel ayitwalaku mu mudimu wau wa umishoner. “Atadikijana nakash” ni aurika. (Mid. 15:37-39) Pakwez Paul, Barnabas, ni Marko achirisha chisambu. Mu kusut kwa chisu, Paul walonda yom yiwamp piur pa Barnabas ni Marko. (1 Kor. 9:6; Kol. 4:10) Niyetu tufanyidin kukimb mutapu wa kupwish kupwitamijan kwawonsu kukutwisha kwikal pakach petu mu chikumangen, ni kudandamen kushinshikin pa mikadil yiwamp ya akwetu. Kusutin kusal mwamu, tukukasikesh chisambu ni uumwing. w22.08 23 par. 10-11

Patusadina usu wa kushakam kukwatijan ni mbil jitentamina ja Yehova, tufanyidin kwipuk chaku cha kuyirumburish antu akwau ni kuman kutentam kwetu ayinetu. Tufanyidin kutek mu manangu anch Yehova ndiy “Nkalansambu wa mangand mawonsu.” (Dis. 18:25) Yehova katwinkishap mbil yiney ya kuyirumburish antu akwau. Shinshikin chilakej cha ikundj wading utentamina, Josef. Wipuka kuyirumburish antu akwau, ap antu amusadina mu mutapu uyimp nakash. Anamakwend amupungana, amulandisha mu ubindj, ni amwinkisha tatukwau kashinsh anch Josef wafil. Mu kusut kwa mivu, Josef watanijana kand ni anamakwend. Pa chisu chinicha, Josef wading mwant mujim wa ngand, ni wading kwend ukwet mutapu wa kuyirumburish anamakwend kwa chisum ni kufundakesh. Anamakwend a Josef ova wom anch mwanamakwau ukusal mwamu, ap anch ading anenganen mulong wa yom yasalau piur pend. Pakwez Josef wayinkisha kashinsh anch: “Kangal wakamany kwen, bwat! Ov, yam nidia pa ndond ya Nzamb?” (Dis. 37:18-20, 27, 28, 31-35; 50:15-21) Nich kwikepish, Josef walikina chisend cha kurumburish mu makas ma Yehova. w22.08 30 par. 18-19

Ov, wij anch akutwish kukusadin kud Yehova mulong wa kwakul ku malembil ma muntu kampand? Wikala mukurump wa chikumangen, nkwash a mudimu, chibol, ap mwin kulejan, ukutwish kukwash. Chid kand mwamu ap anch ud nsand ap ipal, mukadivar ap nambaz. Anch muntu umukatina Yehova wamulembil mulong wa kumwit ukwash, Nzamb wetu ukat kuyisadin yisu yivud amakurump ni atushalapol end akwau ashinshamena mulong wa ‘kumukasikesh’ muntu winou. (Kol. 4:11) Did dilau dijim nakash dia kumusadin Yehova ni akadivar netu mu mutapu winou! Tufanyidin kwikal aswakela kuyikwash ni kuyongoj akadivar netu anch arish ni mayej makash, yinship yikash, ap anch ayizengol. Tukutwish kusot kumukwash muntu, pakwez chikutwish kutukasiken kusal mwamu anch anamakwetu a mu dijuku niyau amen mar. Tukatin kuyikwash akadivar netu chakin kamu, ni Yehova ukat kusangar anch twasal yawonsu tutwishina mulong wa kuyikwash.​—Jnsw. 19:17. w22.12 22 par. 1-2

Kwikal muntu wa kuchingejin kwimedin pa rukat. Yesu walonda anch yijil yaad yipandakena kujimb yid kumukat Yehova ni kumukat mutej netu. (Mat. 22:37-39) Rukat retu mulong wa Yehova ritubachikin kwimburij chilakej chend chiwanyidina cha muntu wa kuchingejin. Rukat retu mulong wa akadivar nau anambaz ritubachikin kuyilamin ujindj wau. Tusotinap ap pakemp kulejan yom yikutwisha kuyinenganesh, kuyovish usany, ap kuyovish kusansan.Kwikepish kukutukwash ni kwawiy kwikal antu a kuchingejin. Mwin Kristu wikepishina kakutwishap kupakish kwimekesh kusutin kwikal muntu wa kusambish kulejan nsangu. (Fil. 2:3) Kakatap kwimekesh anch ud wa usey nakash mulong wij nsangu ja ujindj jakadiay kufanyin kuyilej antu akwau. Kwikepish kukutubachik kwipuk kupalangesh yitongijok yetu piur pa yom yakadiay Bibil ap mikand yetu yimedina pa Bibil kulond. w22.09 12 par. 12-13

Mwangel umwing wamuleja Daniel anch mazu ma uprofet madia mu buku wa Daniel afanyina kumatesh kamu nawamp kud atushalapol a Nzamb pakwez “antu ayimp kakez kwovap kurumburik.” (Dan. 12:10) Chinech chawiy chisu tufanyidina kumekesh anch tudiap pakach pa antu ayimp. (Mal. 3:16-18) Yehova ukat kuyikung antu amenay mud “[ayend] a pa kampwil,” charumburik anch antu akwatinay nich usey nakash. Tusotin chakin kamu kwikal pakach pa antu inay. Chakin kamu, tushich pa chirung chisangareshina, ni yom yipandakana kuwap nakash yid piswimp ap. Piswimp ap, tukuman mutapu ukuyisheshau antu awonsu ayimp. Kupwa, tukuman kuwanyin kwa kushilamu kwa Yehova kud Daniel anch: “[ukez] kutambul difut diey kwisudiel kwa chisu.” (Dan. 12:13) Ov, uchingedin dichuku dikezay Daniel, pamwing nau akatish ney “kuvumbuk”? Anch mwawiy, sal usu wey wawonsu mulong wa kwikal ushinshamena, ni anch wasal mwamu ukutwish kwikal nich kashinsh anch ukudandamen kulam dijin diey mu mukand wa mwom. w22.09 24 par. 17; 25 par. 19-20

Chid chakin anch mazu minam mamukasikesha Ezekiel. Mulong wak? Pakad kwidjidjek, wavurika anch Yehova wasadina mazu ma mutapu winou chisu chamutonday Moses ni Isay mud aprofet End. (Kub. 3:10; Isay 6:8) Ezekiel wading kand wij mutapu Yehova wayikwashay aprofet inay aad kupandakan yikokujol yarishau nich. Chawiy Yehova pamulejay Ezekiel tupamp twaad anch: “Am nakutum kal ey,” muprofet winou wikala ni mayingishin ma kuchingejin mu ukwash wa Yehova. Chikwau kand, mu buku wa Ezekiel, tutaninamu tupamp tuvud mazu malondina anch: “[Yehova] wanleja anch.” (Ezek. 3:16) Ni mazu ‘Yehova wanleja kand anch’ amachirikidin tupamp tuvud. (Ezek. 6:1) Chakin kamu, Ezekiel wikala nich kashinsh anch amutumin kud Yehova. Ezekiel wading mwan a mwin kupesh mujim, ni chimeken anch tatukwend wamufundisha mutapu Yehova wayinkishangay chisu chawonsu aprofet end kashinsh anch ukuyikwash. Kusambishin ku Isak, Jakob, ni Jeremiy, Yehova wayilejang anch: “Am nidi ni yeyey.”​—Dis. 26:24; 28:15; Jer. 1:8. w22.11 3 par. 3

Ap anch Adam ni Ev asala chitil chaletisha rufu kud anau, Yehova kaswimpap chitongijok chend chakusambish. (Isay 55:11) Chitongijok chend chidandamedin kwikal cha kuyinkish antu ashinshamena mwom wa chikupu. Tukutwish kwikal nich kashinsh kinak anch twatongijokin pa yom yalonday ni yasalay Yehova mulong wa kuwanyish chitongijok chend. Yehova washilamu anch ukuyivumbul afu ni kuyinkish mutapu wa kwikal ni mwom wa chikupu. (Mid. 24:15; Tit. 1:1, 2) Ikundj ushinshamena Job wading nich kashinsh anch Yehova ukwet impu ya kuyivumbul antu afila kal. (Job 14:14, 15) Muprofet Daniel wading wij anch antu akez kayivumbul mulong wa kwikal ni dilau dia kushakam chikupu. (Kus. 37:29; Dan. 12:2, 13) In Yuda a pa chirung cha Yesu ading niyau ij anch Yehova ukuyinkish atushalapol end ashinshamena “mwom wa chikupu.” (Luka 10:25; 18:18) Yesu wachirokina pa kushilamu kwinoku tupamp tuvud, ni ndiy amwinend amuvumbula kud Tatukwend.—Mat. 19:29; 22:31, 32; Luka 18:30; Yoh. 11:25. w22.12 4-5 par. 8-9

Yehova utwitin anch twikal nend piswimp. (Jak. 4:8) Ukatin kwikal Nzamb wetu, Tatukwetu, ni Murund netu. Ukat kwakul malembil metu ni kutukwash pa yirung yikash. Ni ukat kusadin dirijek diend mulong wa kutufundish ni kutuchidij. Tukutwish kumusejin Yehova kusutin kumulembil, kutang Dizu diend ni kutongijokin pa yom tutangina. Anch twasal mwamu, tukumukat ni kumujikitish nakash Yehova. Tukwikal ni impu ya kumuziyin nakash ni kumwinkish katumb kawanyidinay kutambul. (Kuj. 4:11) Anch twamwijik nawamp Yehova, chikutuswapel kumuchingejin ni kuchingejin mu dirijek diatwinkishinay kal mulong wa kutukwash. Ukat kupakish kutubachik pakemp pakemp kushadish ruchingej mudiay Yehova ni mu dirijek diend. Pakwez tukutwish kumupandakan. Anch ritiy retu ni ruchingej retu mudiay Yehova yid yikash, tukumudjibulap Nzamb wetu ni dirijek diend.​—Kus. 31:13, 14. w22.11 14 par. 1-3

Mu rusangu ra muntu, mashakamin ni mwom ya in Kristu akin avud yashikedin kal kwikal mu ubaj mulong wa rukat rau kud Yehova mud Mukaleng Mwant. Alama kushinshaman kwau nich kutakaman mud mwasalau in Hebereu asatu apandishau mu kasu kakash mulong alama kushinshaman kwau kud Udia wa Piur nakash. Nfund a kuseng David wafunda piur pa usey wa kulam kushinshaman kud Nzamb anch: “[Yehova] ukat kurumburish antu! Nrumburishap, A! [Yehova], mudi mudia kutentam ni mudi mudia kashinsh kam.” (Kus. 7:9) David wafunda kand anch: “Chifanyidin kashinsh ni kutentam yinchidija.” (Kus. 25:21) Mutapu uwamp wa kushakam ud wa kushal ushinshamena kud Yehova, ni kulamat kud ndiy, chikalap nchik yom yikutwisha kutushiken! Chawiy, anch twasal mwamu, tukwiyov mud mwiyovay nfund a kuseng walonda anch: ‘Ayuk kwau antu alamina kushinshaman kwau . . . , awiy kamu akata kwendil mu yijil ya Yehova.’”​—Kus. 119:1. w22.10 17 par. 18-19

Mu mwom wend, Job wambamba ni antu avud. Pakwez yom yambambay ni Yehova yading ya pakampwil nakash. Mulong wa kumukwash Job kuchingejin nakash manangu ma Yehova ni kwikal nich kashinsh anch ukuwanyish maswir ma atushalapol end, Yehova wamuleja kushinshikin yitang yimwing yishimokishena. Chilakej, Yehova wamuvurisha Job anch ukat kuwanyishang maswir ma annam, chawiy ukumubangin kand niyend Job. (Job 38:39-41; 39:1, 5, 13-16) Kusutil kushinshikin yitang yimwing, Job wileja yom yivud nakash piur pa mikadil ya Nzamb wend. Niyetu tukutwish kwilej yom yivud nakash piur pa Nzamb wetu kusutil kwilej yitang. Pakwez chiswapelingap kusal mwamu chisu chawonsu. Chilakej anch tushich mu musumb ujim, tukutwishap kusambish kuman dichuku diawonsu yitang yivud ya Yehova. Ni ap anch tushich kwi ndond kudia yitang yivud, tukutwish kwiyov pamwing ap anch tukwetap chisu cha kuyishinshikin, mulong wak chid cha usey kwitekin chisu ni kusal usu wa kwilej yitang. w23.03 15 par. 1-2

Yesu wayileja in kwilejend anch kukez kikal “kunyikek kwa ngand kuyimp” ni yinship yikwau yikash yikwikalaku kurutu disudiel dieza. (Luka 21:11) Wasambela kand kulond anch “Kuyip kukez kuvulijan,” yom tumena kamu nlel unou. Chilakej, tumen kuvulijan kwa chisum ni kwa yisal ya kujipan. (Mat. 24:12) Yesu kalondap anch yom yiney yikuyishiken kwau ching kusu antu alikinau kal kud Yehova. Pakwez yom yiney yikat kuyishiken kand ap atushalapol ashinshamena a Yehova. (Isay 57:1; 2 Kor. 11:25) Yehova kakutwishap kusal yilay mulong wa kutuchidij ku yinship yawonsu yikash, pakwez ukutwish kutwinkish yawonsu tuswirikedina mulong wa kulam chisambu. Anch twirijek kurutu kwa chisu, chikutwish kutukwash kulik kuzazat anch kwashiken yinship yitwitina kusal yom swa swa. Pakwez, ov, kwirijek kurutu kwa chisu kumekeshin anch tumuchingejidinap Yehova? Bwat kwau. Pakwez kwirijek mulong wa yinship yikash yikutwisha kushiken kumekeshin anch tukwet kashinsh anch ukutubangin. Mutapu ik? Dizu dia Nzamb dikat kutukasikesh kwirijek kurutu kwa yinship yikash kushiken. w22.12 18 par. 9-10

Padingay Josef mu rukan, Yehova wamulatisha mwant wa Idjibit yilat yaad yamurumbangesha nakash. Pajinguninay mwant anch Josef wading ni ukaliweny wa kurumburil yilat, watuma antu kumukimb. Kusutil ukwash wa Yehova, Josef warumburila yilat, ni yiyul yiwamp yamwinkishay Farao yamupukuna nakash. Pamanay Farao anch Yehova wading ni Josef, wamutonda kwikal mwin kutakel wa yakudia yawonsu ya mu Idjibit. (Dis. 41:38, 41-44) Mu kusut kwa chisu kwikala kamungun mukash, kadiap kwau ching mu Idjibit, pakwez kand ni mu Kanan, mwi ngand mwading mushichau anamakwend a Josef. Josef wading katat ni mutapu wa kukwash dijuku diau, ni chinech chakwasha kuchidij dijuku dikuvadikinay Mesia. Chimeken kamu patok anch Yehova ndiy wamukwashang Josef mu yom yawonsu yasalangay. Ap anch anamakwend a Josef akimba kumujip, pakwez Yehova waswimpa yom chakwel awanyish rusot rend. w23.01 17 par. 11-12

Muntu ubabela uchiling ku mes pa ubaj win wawonsu usosombina urund wend ni Yehova, ni ukat kukwat mipak mulong wa kuwipuk. Mwamu ukat kwilam amwinend mu rukat ra Nzamb. (Jnsw. 22:3; Jud 20, 21) Kambuy Paul wayikasikesha in Kristu kubabal ayinau. Chilakej, wayileja in Kristu a ku Efes anch: “Babalany ku yaku yen. Kangal wikalany nich yaku ya antu ayisup, pakwez ikalany antu ababela.” (Efes 5:15, 16) Chisu chawonsu Satan ukat kukimb kuyipish urund wetu ni Yehova, chawiy mulong wa kwichidij ku mipit yawonsu ya Satan, Bibil utuyudin anch: “Ikasikeshany kushinshik rusot ra [Yehova]. (Efes 5:17) Mulong wa kukwat mipak yiwamp, tufanyidin kushinshik, ap kujingunin ‘rusot ra [Yehova].’ Tukutwish kusal mwamu kusutil kwilej chisu chawonsu Dizu dia Nzamb ni kutongijokin pa yom twilejina. Anch twijik nawamp rusot ra Yehova ni twakudish “chitongijok cha Kristu,” chikutuswapel kusal yom mud “antu ababela,” ap anch kwikil yijil yilejena patok yom tufanyidina kusal.​—1 Kor. 2:14-16. w23.02 16-17 par. 7-9

Tupamp twinch ukata kurijek mu chikumbu chey? Pamwing ap kurutu kwa kusok mu chikumbu wachirijeka nawamp. Pakwez yom ik yikushikena anch wadiul kurijekamu? Mud mutapu wijana, mukwizul rufunfut pakad kulab. Mulong wa kulam chikumbu chey nawamp, ufanyidin kuchirijekang chisu chawonsu. Chitin kand kusal usu mud winou mulong wa kudandamen kuswimp yitongijok yetu ni wuntu wetu. Chid chakin anch twasala usu nakash wa kuswimp yom yimwing mu mwom wetu kurutu kwa kutubatish, chakwel tutwish “kwishitwish ku yom yawonsu yikata kuyipish mijimbu ni mipim yetu.” (2 Kor. 7:1) Pakwez katat, tufanyidin kuziyin ku chiyul cha kambuy Paul cha ‘kudandamen kukarumuk kwikal asu.’ (Efes 4:23) rufunfut ra mangand minam rikutwish kutwijondish pakad kulab ku mes ma Yehova. Mulong wa kwipuk ubaaj winou ni kushal ishitwila ku mes ma Yehova, tufanyidin kushinshikin chisu chawonsu mutapu wetu wa kutong, wuntu wetu, ni yovil yetu. w23.01 8 par. 1-2

Tongin bil mutapu wiyovangau antu ateshang mafundish ma Yesu. Tongin tupamp twajimbulay Mifund yitumbila mu mutu! Yesu wajimbula Mifund mu mazu mend makusambish mafundau malonday kupwa kwa kumubatish, ni mu mazu mend mamwing mansudien malonday kurutu kwa rufu rend. (Kuv. 8:3; Kus. 31:6; Luka 4:4; 23:46) Mu mivu yisatu ni chikunku yasalay kudiosh kwamubatishau djat ni ku rufu rend, yisu yivud Yesu wajimbulang ni kutang Mifund kurutu kwa antu avud ni kuyirumburilay. (Mat. 5:17, 18, 21, 22, 27, 28; Luka 4:16-20) Mivu yasambelaku kurutu Yesu asambish mudimu wend, tupamp tuvud watangang ni kutesh mutapu utanginau Dizu dia Nzamb. Pakad kwidjidjek wateshang mutapu Josef ni Mariy wajimbulangau Mifund mu mambamb mau ma pichuku pichuku ku chikumbu. (Kuv. 6:6, 7) Chikwau kand, Yesu wakumanganang pamwing ni dijuku diend mu sinagog pa dichuku diawonsu dia Sabat. (Luka 4:16) Payangay kwinikwa, wateshang nawamp mutapu utanginau Mifund. w23.02 8 par. 1-2

Kud mayingishin mavud mafanydina kukubachik kumukat Yehova. Chilakej wilejin kal anch ndiy “musul wa mwom” ni ndiy ukata kupan “yom yawonsu yiwamp ni yiwanyidina.” (Kus. 36:9, NWT; Jak. 1:17, TMK) Yom yawonsu yiwamp usangaredina yidiokil kud mwin kupan mujim, Nzamb wetu wa rukat. Difut chawiy chipan chipandakena kuwap chatwinkishinay kal Yehova. Mulong wak? Tongin urund uding pakach pa Yehova ni Mwanend. Yesu walonda anch: “Tatuku winkatil” ni “am nimukatil Tatuku.” (Yoh. 10:17; 14:31) Urund wau wikala wa piswimp nakash mulong ashakama pamwing mu mivu yivud nakash. (Jnsw. 8:22, 23, 30) Tongin kusansan kukash kwovay Nzamb pitiyay anch Mwanend amana mar ni kumujip. Yehova uyikatining antu nakash—kuwejaku niyey—yawiy yitiyinay kumupan Mwanend mukatish mud chakupesh chakwel ey ni antu akwau wikalany ni mutapu wa kutambul mwom wa chikupu. (Yoh. 3:16; Gal. 2:20) Dined did diyingishin dijim nakash difanyidina kukubachik kumukat Nzamb. w23.03 4-5 par. 11-13

Tufanyidin kwipuk mafundish ma in kupumbok. Yesu wayikanda antu amwing a mu Perigam ading aletishina kwaurok. (Kuj. 2:14-16) Wayijikitisha in Kristu a ku Tiatir asala usu wa kwipuk “ujindj uyimp wa Sakudimban,” ni wayikasikesha ‘kulam baang’ uyakin. (Kuj. 2:24-26) In Kristu ading aziyina alondula mafundish minam ading afanyidin kukarumuk. Chid nchik piur petwetu nlel? Tufanyidin kwipuk mafundish mawonsu makad kutanijan ni yitongijok ya Yehova. Kwinsambishin in kupumbok akutwish kumekan mud alimishin yom yifundishinay Bibil, pakwez yisalijok yau yimekeshin anch kimwawiyap chidia.” (2 Tim. 3:5) Chikutuswapel kujingunin ni kwipuk mafundish ma makasu anch tud in kwilej akweta mushiku a Dizu dia Nzamb. (2 Tim. 3:14-17; Jud 3, 4) Tufanyidin kushinshikin mulong wa kwikal nich kashinsh anch difukwil dietu aditiyin kud Yehova. Anch tusadin yom tumena anch yikutwish kumukangesh Yehova kwitiy difukwil dietu, tufanyidin kuswimp pakad kulab.​—Kuj. 2:5, 16; 3:3, 16. w22.05 4 par. 9; 5 par. 11