Ngond wa 8

Ov, ukutwish kutongijokin mayingishin mamubachika Yehova kufundikish mu “mukand [wa] yivurikish” majin ma antu ading alondina yom yamekesha anch amwovil wom ni atongijokidin pa dijin diend? Yom tulondina yimekeshining yom yidia mu muchim wetu. Yesu walonda anch: “Kan ka muntu kakat kubudish yom yizwila mu muchim wend.” (Mat. 12:34) Yehova ukatin anch antu amukatina asanger mwom wa chikupu mwi ngand yisu. Mutapu wetu wa kulond ukutwish kumekesh anch Yehova ukutwish kwitiy difukwil dietu ap bwat. (Jak. 1:26) Mutapu wa kulond wa antu amwing akad kumukat Nzamb uding wa kuswej, wa nchir, ni wa chibud. (2 Tim. 3:1-5) Chakin tukatinap kamu kuyimburij. Tukatin kumusangaresh Yehova kusutin mutapu wetu wa kulond. Pakwez, ov, Yehova ukutwish kutusanger anch twalond mu mutapu uwamp ni wa rukat ku yikumangan ap mu mudimu wetu wa kulejan, pakwez oku tukat kulond mu mutapu wa chisum ni wakad rukat chisu twisambina ni antu a mu dijuku dietu?​—1 Pita 3:7. w22.04 5 par. 4-5

Nzamb ukuyinkish misengu dikum ni nnam wa chidiany michim ya kumushesh Babilon Mujim. Chakin kamu, Yehova ukuyibachik michid kusadin nnam wa ulombu usuz, charumburik anch Nations unies, mulong wa kurishikish marelijon mawonsu ma makasu ni kumashesh kamu. (Kuj. 18:21-24) Yom yiney yirumburikin ik kud etu? Tufanyidin kudandamen kulam ‘difukwil didia zwang ni diakad kwijond ku mes kwa Nzamb.’ (Jak. 1:27) Tufanyidinap kulikidil ap pakemp chakwel atupumbul kud Babilon Mujim kusutin mafundish mend ma makasu, misambu ya upagan, yisal yend yijondila, ni yom yend ya ayilembil! Ni tufanyidin kudandamen kuyikwash antu ‘kudiokalamu,’ chakwel kangal iyandjik niyau mu yitil yend.​—Kuj. 18:4. w22.05 14 par. 17; 14 par. 18

Anvaj, kimbany mitapu ya kwisamb nau anen piur pa Yehova ni piur pa yom yiwamp yakusadidinanay kal. (Kuv. 6:6, 7) Chinech chid cha usey nakash pakampwil anch dijuku dien did mu marelijon kushalijan, ukutwishap kutan mutapu wa kwilejang chisu chawonsu ni aney ku chikumbu. Nambaz Christine ulondin anch: “Nadingap ni yisu yivud ya kwambamb ni anam yom ya mu spiritu, chawiy nasadinang mutapu win wawonsu wamekanang mulong wa kuyifundish.” Chikwau kand, lond yom yiwamp piur pa dirijek dia Yehova ni piur pa akadivar ni anambaz ney. Kangal wayilond amakurump nayimp. Yom ulondina piur pau yikutwish kuyibachik aney kuyit ukwash ap bwat pa chisu cha maswir. Kasikesh chisambu ku chikumbu. Mekesh yisu yawonsu rukat rey mulong wa nfumwey ni aney. Lond mu mutapu uwamp ni wa kalimish piur pa nfumwey, ni yifumba aney kusal mwamu. Anch wasal mwamu, ukukasikesh chisambu chikuyikwasha aney kwilej piur pa Yehova.​—Jak. 3:18. w22.04 18-19 par. 10-11

Uruu wa Yesu kud in Kristu ading mu chikumangen cha mu Efes umekeshin anch amekesha kujijaman ni ading adandamedin kumusadin Yehova chikalap nchik yikokujol kushalijan yarishangau nich. Chikalap nchik mwamu, ashadisha rukat rau radingau nich kwinsambishin. Ading afanyidin kuchirish rukat riner chakwel Yehova adandamen kwitiyij difukwil diau. Chisik chimwing ni nlel, tufanyidin kusal yom yivud kusutamu kwau kwimen pa kumekesh kujijaman. Tufanyidin kujijaman nich mayingishin mawamp. Nzamb wetu ukat kushinshikin kadiap kwau ching kusu yom tusadina pakwez kand mulong wak tuyisadina. Ukwatining nich usey nakash yibachikin yetu, mulong ukatining difukwil dietu dimena pa rukat rikurikina mulong wendendiy ni muchim wetu wa kujikitish. (Jnsw. 16:2; Mar. 12:29, 30) Tufanyidin kudandamen kuchish ku mes ni kubabal. In Kristu a mu chikumangen cha Sarides ading ni milong kushalijan. Ap anch ipana nich mushiku mu mijikit ya mu spiritu pasak, pa chisu chinicha ading ashadishin kal mushiku mu mudimu wa Yehova. Yesu wayileja “kulank.” (Kuj. 3:1-3) Chakin kamu, Yehova kakuvuramenap mudimu wetu.​—Heb. 6:10. w22.05 3-4 par. 6-7

Salomon watazuka musangar udiokila ku yibudikin ya mudimu wetu ukash anch “kupan kwa riy kwa Nzamb.” (Mul. 5:18, 19) Salomon wading wij kurumburik kwa yom yading yilondinay. Wading nsalamudimu mukash! Watunga yikumbu, wadima nviny, yir, ni wapunda majiy ma mem. Watunga kand misumb. (1 Ant 9:19; Mul. 2:4-6) Wading mudimu ukash wasalay, ni pakad kwidjidjek yamuletina musangar mu chilik kanang. Pakwez Salomon kachingejinap anch midimu yiney yawiy kusu yafanyina kumuletin musangar. Wipana kand nakash mu midimu ya mu spiritu. Chilakej, watakela mudimu wa kutung tempel wa ufun mulong wa difukwil dia Yehova—wasala mudimu winou mu mivu sambwad! (1 Ant 6:38; 9:1) Kupwa kwa kwipan mu midimu ya ku mujimbu ni ya mu spiritu, Salomon wajingunina anch midimu ya mu spiritu yid ya usey nakash kusutamu kwau ya ku mujimbu. Wafunda anch: “Kwinyim kwa yom yiney yawonsu, kwashal chom chimwing cha kulond. Mulimisha Nzamb, ziyil ku malejan mend.”​—Mul. 12:13. w22.05 22 par. 8

Bibil wizwil nich yilakej ya antu alikishinau kwa kwikatin kud Yehova. Nany wakweza kal mu manangu? Pamwing ap utongijokidin piur pa Mwant Manase. Ikundj winou muyimp wamubwambwila Yehova mu mutapu umwing uyimp nakash. Wifukwila anzamb a makasu ni wayibachika antu akwau kusal mwamu. Wayijipa anend ni wayipesha kud anzamb a makasu. Ni wasutisha chad chipim mu kutek atupwany a anzamb a makasu mu tempel utumbila wa Yehova. Bibil ulondin piur pend anch: “Wasala yom yipandakena kuyip ku mes kwa [Yehova], ya kumwovish ujim.” (2 Jsng. 33:2-7) Pakwez, chisu chamekeshay Manase kukarumuk kwakin kudiokila ku muchim, Yehova wamulikishina kwa kwikatin. (2 Jsng. 33:12, 13) Pamwing ap utongijokidin kand pa Mwant David, wasala yitil yikash ku mes ma Yehova, kuwejaku masandj ni kujipan. Pakwez, chisu chakarumukay kamu David chakin ni kwitiyin kurumbuk kwend, Yehova wamulikishina. (2 Sam. 12:9, 10, 13, 14) Mwaning, tukutwish kwikal nich kashinsh anch Yehova uswakeling kulikishin. w22.06 4 par. 7

Chiswapelingap chisu chawonsu kulam ruchingej rikash. Tufanyidin kushimpish muchim patuchingedina anch Yehova awanyish kushilamu kwend. Yehova ud wa chikupu, chawiy chisu tumena etu anch chilepin nakash, chid kwau chiswimp ku mes mend. (2 Pita 3:8, 9) Ukusal yom yawonsu yakanay kal mu mutapu upandakena kuwap, pakwez kakuyisalap pa chisu tuchingejidina etu. Yom ik yikutukwasha kulam ruchingej retu rikash patumuchingedina Nzamb anch awanyish kushilamu kwend (Jak. 5:7) Shal piswimp ni Yehova, mulong ndiy ukuwanyisha ruchingej retu. Chawiy, Bibil utukasikeshin anch mulong wa kwikal ni ruchingej, chitin kwikal ni ritiy anch Yehova udiaku, ni anch ndiy “ukata kufutan kuwap kud antu awonsu akata kumusurab.” (Heb. 11:1, 6) Anch twikal nich kashinsh anch Yehova udiaku kamu chakin, tukwikal nich kashinsh kakash anch ukuwanyish yawonsu yakanay kal. Mulong wa kukasikesh ruchingej retu, tufanyidin kwambamb nend mu malembil ni kutang Dizu diend. Ap anch tukutwishap kumuman Yehova, tukutwish kumusejin piswimp. Tukutwish kwambamb nend mu malembil, nich kashinsh anch ukututesh.​—Jer. 29:11, 12. w22.10 26-27 par. 11-13

Tongin bil mutapu wasadika yom. Job washakamang kal mu maut wovil kusansan kwakad kupwa. (Job 2:8) Arund nend adandamendin kumwel anch ud muntu muyimp ni kwikil chom chiwamp ap chimwing chasadinayap kal. Yikokujol yiney yimulimidin mud diyal dijim didia pa mutu wend, pakad kuvuramen ushon ukash ukwetay mulong wa rufu ra anend. Kwinsambishin, Job kakulap dizu. (Job 2:13) Anch arund inay amana kuninet kwa Job mud ufidin kumulik Sakatang wend, idimba kamu nakash. Kushik chisu chimwing, Job wazambula mes mend wayital arund inay a makasu ni wayel anch: “Djat ni ku rufu ram nikudandamen kamu [kulam kushinshaman kwam]!” (Job 27:5) Yom ik yamukwasha Job kwikal utakamena ni kwiman dang chikalap nchik mar mamanay? Ap anch wading unenganen nakash, kashadishap ruchingej rend anch Nzamb wa rukat ukupwish mar mend. Wading wij anch ap anch wafap nchik, Yehova ukumuvumbul.​—Job 14:13-15. w22.06 22 par. 9

Antwinkishin kal dilau diwamp nakash—dia kumusejin Sakatang wa diur ni divu mu malembil. Tong bil: Tukutwish kumufungwil Yehova muchim mu malembil pa chisu chawonsu tukatina, ni mu dizu diawonsu tukatina. Tukutwish kumulembil ap anch tud mu ulal wa mayej ku opital ap mu rukan, nich kashinsh anch Tatukwetu wa rukat ukututesh. Tujikitishin nakash mulong wa chipan chinech. Mwant David wakwata nich usey nakash dilau diend dia kulembil. Wamuwangina Yehova anch: “Tambul kulembil kwam mudi mulambu wa malash ma res ruwamp.” (Kus. 141:1, 2) Pa chirung cha David, malash matumbila masadinangau mu difukwil diakin kud in kupesh amarijekang mu mutapu uwamp nakash. (Kub. 30:34, 35) Chisu chajimbulay David malash, wamakesha anch wading ukatin kushinshikin nawamp pa yom yading yikimbinay kumulej Tatukwend wa mwiur. Niyetu mwawiy kamu tukatining kusal. Tukatin malembil metu mamusangaresh Yehova. w22.07 20 par. 1-2; 21 par. 4

Yehova ndiy mwin kufundakesh. Yehova katwinkishinap mbil ya kufundakesh anch muntu waturumbukin. (Rom 12:20, 21) Mulong tud antu akad kuwanyin ni tukwet mimbu ku mutapu wetu wa kuman yom, tukutwishap kamu kurumburish mulong mu mutapu uwanyidina mud mutapu wafanyinangay kusal Nzamb. (Heb. 4:13) Ni yisu yimwing, yovil yikutwish kutubwik pa mes ni kusal anch chitukasiken kurumburish nawamp. Yehova wamupepila kambuy Jakobu kufund anch: “Anch muntu wajiman kakutwishap kuwanyish yom yitentamina kurutu kwa Nzamb.” (Jak. 1:20) Tukutwish kwikal nich kashinsh anch Yehova ukutusadin yom yiwamp ni kuchirish kutentam kuwanyidina. Kulikishin kumekeshining anch tuchingejidin mu kutentam kwa Yehova. Anch twatek milong yetu mu makas ma Yehova, tumekeshin anch tumuchingejidin anch ukupwish milong yawonsu yidiokila ku chitil. Mwi ngand yisu yikaninay, kukwikalap kand kuvurik yom yiyimp yisansena ku muchim, mulong Bibil ukanin anch “yom yawonsu ya pakur akez kayivuramen.”​—Isay 65:17. w22.06 11 par. 11-12

Rukis ritumekeshidinau ud uman umekeshina anch tukwet dilau dia Yehova. (Mat. 5:11, 12) Djabul ndiy udia kwinyim kwa rupompat riner. Pakwez Yesu ukwet usu kumusutamu Satan! Kusutin ukwash wend, rusangu ruwamp arilejen kud antu a ku michid yawonsu. El tushinshikinany uman. Mulong tud in kulejan a Want, tukat kurish kand ni chikokujol cha kulejan kud antu alondina mazu kushalijan. Mu kujingunik kwapanay kud kambuy Yohan, Yesu walejana anch rusangu ruwamp rikupandakan chikokujol chinech ni kuyishik antu alondina mazu kushalijan. (Kuj 14:6, 7) Mutapu ik? Tukat kusal usu wa kuyikwash antu avud kwitiy uruu wa Want. Nlel, antu adia pa mangand mawonsu akutwish kutang mikand yimedina pa Bibil pa kapend ketu ka jw.org, mulong pad yom mu mazu 1000 ni kusut! Chisak Chitakedila chitiyijin kukarumun buku Sanger Mwom Chikupu!​—chamu chetu cha pakampwil cha kwikadish nich in kwilej, mu mazu 700 ni kusut! w22.07 9 par. 6-7

Yesu wayanakenang antu. Kambuy Mateu wafunda anch: “Chamanay yisak ya antu, ndiy wayovila riy, mulong awiy ading aziyin ni kujilijil mudi amikoku akad kafung.” (Mat. 9:36) Ni mutapu ik wiyovay Yehova? Yesu walonda anch: “Tatukwen udia mwiur kasotilap umwing wa anikanch inay kushadik.” (Mat. 18:14) Chisangareshin nakash mud ik! Anch twamwijik Yesu nawamp, rukat retu mulong wa Yehova rikukul. Ukutwish kand kwilej kukudish rukat nakash ni kukul mu spiritu kusutin kuyijik nawamp akadivar nau anambaz aswila mu spiritu mu chikumangen chen. Man mutapu ukwetau musangar. Kakatap kwinan mulong wa mupak wau wakwatau wa kumusadin Yehova. Yipula chakwel akulej yom yimwing yamanau kal mu mudimu wa Yehova. Chisu ukweta mupak wa usey ufanyidina kukwat, yita chiyul. Vurik anch mu “kuvul kwa in chiyul mudi dipandish.” w22.08 3 par. 6-7

Etu awonsu tukurish ni yikokujol mu mutapu kanang. Pakwez tukuyirishap nich ayinetu. Mud tatuku wa rukat, yisu yawonsu Yehova utadining mes mend pad etu. Ud netu piswimp ni ukatin kutesh malembil tukata kusal mulong wa kumwit ukwash, ni ud kwaku mulong wa kutukwash. (Isay 43:2) Tukwet kashinsh anch tukutwish kupandakan yikokujol yawonsu mulong watwinkishin kal yom yawonsu tuswirikedina mulong wa kujijaman. Watwinkishin kal chipan cha malembil, Bibil, yakudia yivud ya muspiritu, ni akadivar nau anambaz a rukat mulong wa kutukwash mu yisu ya maswir. Musangar mud ik tukweta wa kwikal ni Tatuku wa mwiur ukata kutal mes mend pad etu! “Michim yetu yikat kusanger mwi ndiy.” (Kus. 33:21) Tukutwish kumekesh kud Yehova anch tukwatin nich usey kubangin kwend kwa rukat kusutin kusal usu wa kutaninamu mu yom yawonsu yitwinkishinay mulong wa kutukwash. Ku mutambu wetu niyetu tufanyidin kusal usu wa kushal mu diking diend. Mu kulond kukwau, anch twadandamen kusal usu wetu wawonsu mulong wa kumuziyin Yehova ni kusal yom yitentamina ku mes mend, mes mend makwikal pad etu chikupu! w22.08 13 par. 15-16

Antu avud nlel kamenap nany ukutwishau kuchingejin. Akat kwiyipul anch antu alimishinau—mud in politik, in siyans, ni in kwisak ajim—akat kuyibangin chakin kamu. Chikwau kand, kayilimishinap antakel a marelijon alondina anch ad in Kristu. Chawiy, chitushimokishinap pa kuman antu akat kwidjidjek piur pa Bibil udia buku ukat kufau antakel a marelijon inay mukan anch amuziyidin. Mulong tud atushalapol end, tukwet kashinsh anch Yehova ud “Nzamb wa uyakin” ni ukatin chisu chawonsu kutusadin yom yiwamp. (Kus. 31:5; Isay 48:17) Twij anch tufanyidin kuchingejin yom yawonsu tutangina mu Bibil Twitiyijin yom yalonday mwin kwilej milong ya Bibil umwing anch: “Kwikil chom ap chimwing chalonday Nzamb chidia cha makasu ap chikulika kuwanyin. Antu a Nzamb itiyijin anch yom yalonday yid yakin, mulong Nzamb ndiy wapepila yom tutanina mu Bibil.” w23.01 2 par. 1-2

Tukat kuyikasikesh akadivar ni anambaz netu anch twayikwash kukasikesh ritiy rau mudiay Yehova. Amwing akat kuyisip kud antu akad kwikal Atuman. Akwau arishin ni mayej makash, ap chiyikasikedin kupandakan yovil yau yiyimp. Akwau kand achingedin kal chisu chilemp chakwel disudiel dia mangand dishika. Yom mud yiney yikutwish kupak ritiy ra in Kristu nlel. In Kristu a mu chikumangen cha mu mivu chitot yakusambish arisha niyau ni yikokujol mud yiney. Kambuy Paul wasadina Mifund mulong wa kuyikasikesh akadivar ni anambaz nend. Chilakej, chading chiyikasikedin pamwing ap in Kristu in Yuda kuman mutapu wa kumwakul muntu wa mu dijuku ulondina anch relijon wa in Yuda wading wa piur nakash kusutamu win Kristu. Pakad kwidjidjek, mukand wafunday Paul kud in Hebereu wayikasikesha nakash in Kristu inay. (Heb. 1:5, 6; 2:2, 3; 9:24, 25) Chafanyina kuyiswapel kusadin yitongijok ya usu ya Paul mulong wa kuyininetish nich akankuny nau. w22.08 23-24 par. 12-14

Mu mangand ma Satan, antu kakatap kuman nany wa kuchingejin. Akat kuyinenganesh chisu chawonsu kusutin mikadil ya antu ipanina mu milong ya kwisak, milong ya chipolitik, ni ya antakel a chirelijon. Antu akwau kand akat kushadish ruchingej mu arund nau, amutej nau, ap kand mu antu a mu dijuku diau. Chinech chikutwishap kutushimokish etu. Bibil wasambela kulejan anch: ‘Mu machuku ma kwisudiel . . . , antu akez kikal . . . akad kushinshaman, . . . in kafukej, . . . in kutungilijan matung.’ Mu kulond kukwau, antu afanyina kwimburij mikadil ya nzamb wa mangand minam wakad kutwish kuchingejin ap pakemp. (2 Tim. 3:1-4; 2 Kor. 4:4) Pakwez, mulong tud in Kristu, twij anch tufanyidin kumuchingejin Yehova. Tukwet kashinsh anch utukatin ni anch ‘kakuyilikap’ arund nend. (Kus. 9:11) Tukutwish kand kumuchingejin Yesu mulong wapana mwom wend mulong wetwetu. (1 Pita 3:18) Ni twilejin kal yivud kusutin yom twimedinap kal mu mwom wetu anch Bibil ukat kupan umutakel uwamp ni wa kuchingejin.​—2 Tim. 3:16, 17. w22.09 2 par. 1-2

Musangar wakin yidiap kwau yovil ya muchim yikutwishay kwov muntu mu kachisu kakemp, kupwa yashadik kand. Muntu ukat kwikal ni musangar wakin mu mwom wend wawonsu. Mutapu ik? Yesu warumburila mu Mafundish mend ma pa Mukandu anch: “Ayuk kwau antu ija anch: ‘Tukwet kuswir kwa yom ya Nzamb mu michim yetu.’ (Mat. 5:3) Yesu wading wij anch antu ayitanga ni maku ma kumwijik ni kumwifukwil Sakatang wau Yehova Nzamb. Ni mulong Yehova uding ‘Nzamb wa musangar,’ antu awonsu akata kumwifukwil akutwish niyau kwikal ni musangar.” (1 Tim. 1:11) Ov, kwikal ni musangar wakin kurumburikin kuburen milong mu mwom wetu? Bwat. Mu Mafundish mend ma pa Mukandu, Yesu walejana anch ap “antu akweta runeng” akutwish kwikal ni musangar. Yesu walonda yom yawiy yimwing piur pa “antu azengodilau mulong awiy akat kusal mudi musotilay Nzamb” (Mat. 5:4, 10, 11) Yesu wading ukimbin kutufundish anch musangar wakin udiokilingap ku kuburen milong, pakwez ku kuwanyish maswir metu ma mu spiritu, ni ku kumusejin Nzamb piswimp.​—Jak. 4:8. w22.10 6 par. 1-3

Ukaliweny wa kujingunin ukumukwash mwin Kristu kwijik ‘chisu cha kunenet, ni chisu cha kulond.’ (Mul. 3:7) Ku jindond jimwing kuding chishimu chilondina anch: “Mazu mad mud utad wa argent, pakwez kunenet kud mud utad wa or.” Mu kulond kukwau, kud yisu yidia yiwamp kunenet pa ndond pa kulond.Shinshikin chilakej. Kud mukurump umwing ukweta ukaliweny ukatau kutazwok yisu yivud mulong wa kukwash yikumangen yikwau kupwish milong yikash. Mbay nend umwing udia niyend mukurump walonda piur pend anch: “Ubabeling nakash chisu chawonsu mulong wa kulik kulejan nsangu ja ujindj.” Mulong mukurump winou ukwet manangu, chawiy amakurump akwau a mu chikumangen chend akat kumulimish. Akwet kashinsh anch kakuyap kulond nsangu ja ujindj kud antu akwau. Win kashinsh ud mwikadil ukwau ukutwisha kutukwash kwikal antu a kuchingejin. Tukat kumuchingejinang muntu udia mwin yakin mulong twij anch ukulond chisu chawonsu uyakin.​—Efes 4:25; Heb. 13:18. w22.09 12 par. 14-15

Antu avud akat kujik mu matu chisu chikata manangu makin “kutazwokin mu mikombil.” (Jnsw. 1:20) Kukwatijan ni Bibil, kud yisak yisatu ya antu akata kulik manangu: “antu akad ronganyin,” “in kuswing,” ni “ayisup.”(Jnsw. 1:22-25) Antu akad ronganyin” ad antu akata kwitiy yom yawonsu yikatau kutesh, ni aswakela kudimb makasu. (Jnsw. 14:15, ftn.) Chilakej, tong piur pa mamiliyon ma antu akatau kudimb kud antakel a chirelijon ap a chipolitik. Amwing akat kunengananang nakash anch ajingunin anch antakel inay ayidimbin. Pakwez antu ajimbwilau mu Jinswir 1:22 atondin kushal akad mamangu mulong akatin kwikal mu mwikadil winou. (Jer. 5:31) Kakatinap kwilej yom yilondinay Bibil ap kuziyin ku yijil yend. Chakin kamu, tukatinap kuyimburij antu inay akatina ayinau kulik kujingunin uyakin!​—Jnsw. 1:32; 27:12. w22.10 19 par. 5-7

Dirijek dia Nzamb ditwinkin umutakel tufanyidina kulondul mulong wa kutuking. Atukasikeshining chisu chawonsu kuyilej amakurump ma nimero metu ap nsangu kanang piur petu chakwel atwish kutukimb anch kwashiken milong yitina kutambul ukwash wa mau mauTukutwish kand kutambul umutakel piur pa ndond tufanyidina kuchinin, chisu cha kuchin, ni mutapu wakutambul ukwash ap wa kuyikwash antu akwau, ni chisu tufanyidina kusal mwamu. Anch twalik kuziyin, tukutwish kutek mwom wetu ni mwom wa amakurump akata kuker mulong wetwetu mu ubaj. (Heb. 13:17) Akadivar nau anambaz avud achina mulong wa yinship yikash ap mulong wa kupwitamijan kwa antu, asala usu wa kwijidin mashakamin masu ni kusal yivud mu mudimu wa Yehova. Chilik chimwing ni in Kristu a mu mivu chitot ya kusambish apalangeshau mulong wa rupompat, adandamena “kurumburil mazu ma nzamb.” (Mid. 8:4) Kulejan kwayikwasha kushinshikin pa yisakin ya Want chikalap nchik yikokujol yarishau nich. Mud chibudikin, alama chisambu ni musangar wau. w22.12 19-20 par. 12-13

Yehova umukwatining muntu ni muntu nich usey. Kurutu kwa kuyitum mu mudimu wa kulejan, Yesu wayikasikesha atwimbuy end kulik kwov wom wa rupompat. (Mat. 10:29-31) Wasala mwamu kusutil kwisambin amiswesu, atujil ading ijikena nakash mu Isarel. Atujil inay ayilandishang ku usey wa pansh nakash pa chisu cha Yesu. Pakwez Yesu wayileja in kwilejend anch: “kwikil muswesu ukutwisha kuwa pansh wakad Tatukwen kwitiy.” Kupwa wayileja anch: “ukwetany usey uvud kupandakanamu amiswesu avud!” Mwamu Yesu wayinkisha in kwilejend kashinsh anch Yehova umukwatin muntu ni muntu wa pakach pau nich usey, chawiy kadingap kafanyidina kwov wom wa rupompat. Chakin kamu, pamanangau amiswesu mu misumb ni mu mal mwading mulejenau, in kwilej a Yesu avurikang mazu mend. Anch waman kakajil, vurik anch Yehova ukukwatin nich usey pakampwil mulong niyey “[ukwet] usey uvud kupandakanamu amiswesu avud!” Kusutil ukwash wend, ukutwish kurish nich rupompat ni kashinsh kawonsu. w23.03 18 par. 12

Yisu yimwing tukat kurish ni yikokujol yikash—mud rupompat ra mu dijuku ap kushadish mudimu. Anch twajijamedin kal yikokujol mu chisu chilemp, tukutwish kwiyov anch tukwetap ruchingej ni kunenganan nakash. Satan ukat kusadin yirung mud yiney ni kupakish kutubachik kwidjidjek piur pa rukat rikwetay Yehova mulong wetwetu. Djabul ukatin tutong anch Yehova ap dirijek diend yawiy misul ya mar tumena. Yom mud yiney yayishikena in Isarel amwing mu Idjibit. Kwinsambishin ading itiyijin anch Yehova ndiy wamutonda Moses ni Aron mulong wa kuyikol mu uswik. (Kub. 4:29-31) Pakwez chisu chayimeshikishau mar kud Farao, amufisha nich Moses ni Aron mulong wa milong yarishau nich. (Kub. 5:19-21) Ayifisha nich atushalapol ashinshamena a Nzamb. Cha ushon mud ik! Anch wajijamedin kal yikokujol yikash mu chisu chilemp, mufungwila Yehova muchim mu malembil, ni chingejin mu ukwash wend. w22.11 15 par. 5-6

Yehova ndiy Sakatang wetu ni ukwet usu wa kuyichirishin antu mwom. Wamwinkisha muprofet Elija usu wa kumuvumbul mwan ikundj wa mwadiamufu wa ku Sarepita. (1 Ant 17:21-23) Kupwa, Nzamb wamukwasha kand Elija kumuvumbul mwan ikundj wa mband mwin Sunem. (2 Ant 4:18-20, 34-37) Kuvumbuk kwinoku ni kwa antu akwau kuletin kashinsh anch Yehova ukwet dikand dia kuyichirishin antu mwom. Padingay pa divu, Yesu wamekesha anch Tatukwend wamwinkisha usu winou. (Yoh. 11:23-25, 43, 44) Nlel Yesu ud mwiur ni amwinkishin kal “ulabu wawonsu wa mwiur ni wa pansh.” Chawiy ukutwish kuwanyish yom yashilayamu anch “afu awonsu adia mwi nzay [ya chivurikish]” akuchirik ku mwom nich ruchingej ra kushakam chikupu.​—Mat. 28:18; Yoh 5:26-29. w22.12 5 par. 10

Kusutin kulik kumutesh Ezekiel, in Isarel ading alikin kumutesh Yehova. Mazu minam mamwinkisha Ezekiel kashinsh anch kulik kumutesh kud antu kurumburishinap anch wakangany kal mu chisend chend cha uprofet. Yehova wamwinkisha kand Ezekiel kashinsh anch chisu chikushika dirumburish, antu afanyina “[kwijik] anch muruu wa Nzamb wading mukach mwau.” (Ezek. 2:5; 33:33) Pakad kwidjidjek, mazu minam makasikeshina mamwinkisha Ezekiel usu wading uswirikedinay mulong wa kuwanyish mudimu wend wa kulejan. Kwijik anch Yehova ndiy ututumina kukat kutwinkish niyetu usu. Ukat kutulimish kusutin kututazuk anch “atuman” end. (Isay 43:10) Did dilau dijim mud ik! Mud mutapu Yehova wamulejay Ezekiel anch: “Kangal wayov wom,” mwawiy kand mutulejinay niyetu anch: “Kangal wakamany.” Mulong wak tukwetap diyingishin dia kuyov akankuny netu wom? Mulong mud mutapu uchading piur pa Ezekiel, Yehova ndiy ututumina ni utukwashin.​—Isay 44:8. w22.11 3-4 par. 4-5

Nlel tukat kuyisanger nakash amakurump ni ankwash a mudimu adia antu a kuchingejin. Twiyovil anch atuwanyishidin nawamp maswir metu ma mu spiritu kud akadivar inay ashinshamena, ni tumujikitishin nakash Yehova mulong wa amakundj inay! Chawiy, mu mitapu ik tukutwisha kumekesh anch tud antu awanyidina kuchingejin? Tuyikatin akadivar nau anambaz netu, ni tukatining kwijik anch akasiken ap bwat. Pakwez, tufanyidin kwikal isikena ni kulimish milong yau ya ujindj. Antu amwing a mu chikumangen cha win Kristu cha mu mivu chitot ya kusambish ading “in mboj, ni kwichik pa milong yayen, ni kulondol yom yakad kufanyin awiy kulond.” (1 Tim. 5:13) Chakin kamu, tukatinap ap pakemp kwikal mud awiy. Pakwez, tong bil anch muntu umwing wakurumburil rusangu rend ra ujindj, ni wakulej anch kangal wamulejamu muntu. Chilakej, nambaz ukutwish kutulej piur pa mayej mend ap chikokujol chikwau chirishinay nich, ni kutulej anch kangal twamulejamu muntu mukwau. Tufanyidin kulimish yom yatwitay kal kusal. w22.09 10 par. 7-8

Mazu ma Grek makarumwinau anch “kuswimp mutapu wen wa kutong” akutwish kumakarumun kand anch “kurijek yitongijok yen.” Chinech chirumburikinap anch tufanyidin kwetu kusal yom yikemp yiwamp mu mwom wetu. Pakwez, tufanyidin kushinshin wuntu wetu wa mukach ni kuswimp chom chawonsu chitina kuswimp, chakwel twikasikesh kuziyin kwi mbil ja Yehova. Tufanyidinap kusal kwetu mwamu kapamp kamwing, pakwez tufanyidin kudandamen. Patukwikala antu awanyidina, tukutwish chisu chawonsu kumusangaresh Yehova mu yom yawonsu tusadina. Patuchingedina chisu chinech, tufanyidin kudandamen kusal usu wa kasal yom yimusangareshina Yehova. Mu Rom 12:2, Paul ulondin anch tufanyidin kuswimp mutapu wetu wa kutong mulong wa kwijik chidia rusot ra Nzamb. Pa ndond pa kuvung makas ni kulikidil anch mangand minam matuumba, tufanyin cha kusambish kwishinshikin mulong wa kuman mu chilik ik tulikidila manangu ma Nzamb—kadiap ma mangand—kutakel ntong ni mipak yetu. w23.01 8-9 par. 3-4

Yehova kakatap kutukwol mu milong yin yawonsu yikata kutushiken. Ni kakatap kutenchik yom yawonsu yikata kutushiken chakwel kwikal diyingishin diwamp piur pa yom yawonsu yiyimp yitushikedina. (Mul. 8:9; 9:11) Pakwez twij anch: Anch turishin ni chikokujol, Yehova wij nawamp ni ukat kututesh chisu tukata kumudidil mulong wa kumwit ukwash. (Kus. 34:15; 55:22; Isay 59:1) Ni cha usey nakash, Yehova ukutwish kutukwash kujijamen yikokujol. Mutapu ik? Mutapu umwing ukatay Yehova kutukwash ud kusutil kutwongoj ni kutukasikesh, yisu yivud pa chisu chiwanyidina. (2 Kor. 1:3, 4) Ov, ukutwish kuvurik chisu chakukwashay Yehova mu mwom wey piwading ukweta kuswir kwa kukukasikesh ni kukwongoj nakash? Yisu yivud, tukat kuman mutapu watukwashangay Yehova kupandakan chikokujol ching anch chasut. w23.01 17-18 par. 13-15

Nnam winou wa chidiany ufaniken kamu nakash ni nnam wa chidiany wa mitu sambwad, pakwez ndiy ukwet ulomb usuz. Amutazukin anch “chirumbidij cha nnam wa [chidiany]” ni amulejen mud “mwant wa chinan.” (Kuj. 13:14, 15; 17:3, 8) “Mwant” winou amulejen anch wikalaku, kupwa wajimwangan, ni mu kusut kwa chisu wikalirilaku kand. Kurumburil kwinoku kutadin kamu ditenchik dia Nations unies, dikata kukasikesh yisakin ya chipolitik ya pa mangand! Chakusambish, ditenchik dined dikalaku ni aditazuka anch Société des Nations. Kupwa diajimwangana pa chisu cha Njit ja Kaad ja pa Mangand Mawonsu. Mu kusut kwa chisu, dikalirilaku kand ni aditazuka anch Nations unies djat ni nlel. Annam inay a yidiany, ap kand anch maguvernema, akat kuyibachik antu kumubwambwil Yehova ni kuyipompat antwend kusutin yitongijok yikatau kupalangesh. Mu chifanakesh, ayikungamejin “ant a mangand mawonsu” pamwing mulong wa njit ja Harmagedon, “dichuku dijim dikurumburishay Nzamb Mwin Dikand Diawonsu.”​—Kuj. 16:13, 14, 16. w22.05 10 par. 10-11

Pasambishay Yesu kwitanginap amwinend Mifund Yitumbila, kimenap kwend pa kwijik nawamp Mifund, pakwez wayikata kand ni kuyisadin mu mwom wend. Chilakej, vurik yom yasadika ku tempel chisu chadingay Yesu ni mivu 12. Alej ading ija nawamp yijil ya Moses “ashimwoka nakash, mulong [Yesu] wakulanga kwa manangu.” (Luka 2:46, 47, 52) Niyetu tukutwish kwijik ni kukat Dizu dia Nzamb kusutin kuditang pakad kujing. Tukutwish kwilejin ku yom yayilejay Yesu antu ading ija nawamp Yijil, mud Alej ayijil, Afaris ni Asadus. Antakel inay achirelijon atangang nakash Mifund, pakwez yom yatangangau yayikwashangap. Yesu wajimbula yom yisatu yasala anch Mifund yilik kuyikwash amakundj inay. Mazu mayilejay Yesu makutukwash kuwapish (1) mutapu wetu wa kutesh yom tutangina, (2) mutapu wa kutan malejan madia mu Dizu dia Nzamb ni (3) kwitiy chakwel Dizu dia Nzamb dituswimp. w23.02 8-9 par. 2-3

Pakach pa ubaj tufanyidina kwipuk pad yom mud kwizez ni muntu pakad chitongijok cha kwatijan nend, kwifunt kuna, kwifunt kudia, kulond mazu mayitapina antu akwau ku muchim, kwipuwangej kukweta yom ya chisum, pornografi, ap kand yom yikwau ya mutapu winou. (Kus. 101:3) Djabul ukat kukimb yisu yawonsu mitapu ya kuyipish urund wetu ni Yehova. (1 Pita 5:8) Anch tubabelap, Satan ukutwish kukun mu manangu ni mu michim yetu yovil ya mukau, kuburen win kashinsh, ris, rukis, kwitutul, ni rukuny. (Gal. 5:19-21) anch tukwatinap mupak wa kuyipuk pakad kulab, yovil yiney yikudandamen kukul mud mutond ukweta ulemb ni yibudikin yikwikal yiyimp. (Jak. 1:14, 15) Ubaj umwing wakad kumekan patok ad arund ayimp. Tufanyidin kuvurik anch tukat kuyimburijang nakash antu tukata kusutishang nau chisu pamwing. (1 Kor. 15:33) Anch twababal ayinetu mud mutapu watulejay Yesu, tukwipuk urund wachamwamu ni antu akad kushakam kukwatijan ni mbil ja Yehova. (2 Kor. 6:15) Tukuman ubaj ni kuwipuk. w23.02 16 par. 7; 17 par. 10-11

Rukat rey mudiay Yehova riyil mu kukul mulong udandamedin kwilej yom yivud piur pend. Chakin kamu ukatin kumusejin piswimp katat djat kamu chikupu. Ni ukutwish kusal mwamu. Ukukasikeshin kusangaresh muchim wend. (Jnsw. 23:15, 16) Ukutwish kusal mwamu kadiap kwau ching mu mazu, pakwez kand ni mu yisal. Mashakamin mey mawiy makutwisha kumekesh anch chakin kamu umukatin Yehova. (1 Yoh. 5:3) Winou wawiy mupak upandakena kuwap ukutwisha kwitekin mu mwom. Mutapu ik ukutwisha kumekesh anch umukatin Yehova? Chakusambish, ufanyidin kusal malembil ma pakampwil mulong wa kwipan kud Nzamb umwing kusu wakin. (Kus. 40:8) Kupwa, mekesh chad patok kurutu kwa antu awonsu anch wipanin kal kusutil kutambul dibatish. Mud twamanang kwinsambishin kwa mutu wa mulong winou, chinech chikwikal chisu cha musangar ni cha usey nakash mu mwom wey. Ukusambish mwom usu, kadiap mulong wa kwisangaresh amwiney, pakwez mulong wa kusal rusot ra Yehova. (Rom 14:8; 1 Pita 4:1, 2) Pamwing ap utongin anch winou ud mupak ukash nakash. Ni chid chakin. Pakwez kusal mwamu kukukukwash kwikal ni mashakamin mawamp nakash. w23.03 5-6 par. 14-15