Ngond wa 12

Ov, mwin Etiopi kalal wa mu chipang wading uwanyidin chakin kamu yitinau mulong wa kumubatish? Shinshikin pa yom ey: Ikundj mwin Etiopi “waya ku Yerusalem mulong wa kumwifukwil Nzamb.” (Mid. 8:27) Chimeken anch wading mwin Yuda wadiokala ku muchid windj; witiya relijon wa in Yuda. Chakin kamu, wileja kumwijik Yehova kusutil Mifund ya Hebereu yitumbila. Pakwez wading ukwet kuswir kwa kwijik yom yivud. Chisu chamutanau mwinjil kud Filip, wading usadin ik? Wading ukat kutang muvungur wa uprofet wa Isay. (Mid. 8:28) Wading ukatin kudandamen kwilej. Kwawiy kwasalangay weny wa kudiokal ku Etiopi mulong wa kuya kumwifukwil Yehova ku Yerusalem. Mwin Etiopi amufundisha kud Filip yom yisu ya usey, ni pakach pa yom yiney wajingunina anch Yesu ndiy Mesia. (Mid. 8:34, 35) Rukat rend mulong wa Yehova ni Mwanend. Rukat riner ramubachika kukwat mupak wa usey nakash, kutambul dibatish ni kumulondul Yesu Kristu. Pamanay Filip anch ikundj winou wading uwanyidin kutambul dibatish, wamubatisha. w23.03 8-9 par. 3-6

Tukutwishap kumusangaresh Yehova anch tudiap in kashinsh. (Jnsw. 6:16, 17) Ap anch antu avud nlel amening mud chiyipinap kwau kulond makasu, etu tulamin chitongijok cha Yehova pa mulong winou. (Kus. 15:​1, 2) Chid chakin anch twipukining kudimban, pakwez twipukining kand kujindjik uyakin witina kulond. Tufanyidin kand kwipuk mboj. (Jnsw. 25:23; 2 Tes. 3:11) Anch waman anch mambamb men masambish kal kwikal ma mboj, sal usu wa kumaswimp mulong wa kwisambin yom yikasikeshina. Mulong tushich mu mangand mwizwila antu akweta mutapu uyimp wa kulond, tufanyidin kusal usu nakash mulong wa kuman anch mazu metu mamusangareshin Yehova. Ukuyukish usu tusadina mulong wa kusadin rudim retu mu mutapu uwamp mu mudimu wa kulejan, ku yikumangan, ni mu mambamb metu ma pichuku pichuku. Chisu chikusheshau mangand minam mayimp, chikutuswapel chad nakash kumushiman Yehova nich mazu metu.​—Jud 15. w22.04 9 par. 18-20

Anch twatongijokin pa mutapu utukatinau nakash kud Yehova ni Yesu, rukat rau rikat kutubachik niyetu kuyikat. (1 Yoh. 4:10) Muntu ni muntu pakach petu ukutwish kuyikat kand chipandakena anch witiyij anch Yesu wamufila ndiy pakampwil. Kambuy Paul witiyija uyakin winou, ni wamekesha kujikitish kwend mu mukand wayifundinay in Galatia. Walonda anch: “Mwan a Nzamb . . . wankata am, chad wapana mwom wend mulong wa kwingambat am.” (Gal. 2:20) Kusutin difut dined, Yehova wakupwitina kud ndiy chakwel ukutwish kwikal murund nend. (Yoh. 6:44) Ov, chikupukwinap ku muchim pa kwijik anch Yehova wamana chom kanang chiwamp mud ey ni wafuta usey ujim nakash chakwel wikal murund nend? Ov, yom yiney yikubachikinap kumukat Yehova ni Yesu chipandakena? Chawiy tufanyidin kwiyipul anch: ‘Rukat riner rifanyidin kwimbachik kusal yom ik?’ Rukat tukweta mulong wa Nzamb ni Kristu rikat kutubachik kuyikat antu akwau.​—2 Kor. 5:14, 15; 6:​1, 2. w23.01 28-29 par. 6-7

Bibil chid chom cha usey nakash chisadidinay Yehova mulong wa kuyikwash atushalapol end “kumusadin chikij ku chikij.” Kud yom yivud yafundikishay mu Bibil mu mutapu wakwel anch ching kusu in kutang ikepishina awiy akutwisha kuyitesh. (Luka 10:21) Bibil akat kumutang kud antu adia ku jindond jawonsu. Mwin kwilej milong ya Bibil umwing walonda anch: “Chid chakin anch Bibil ndiy buku utanginau kud antu avud nakash, pakwez ndiy kand buku ukatau kutang nich nkeu nakash kusutamu mabuku makwau.” Chikalap nchik mwamu, ching kusu antu ikepishina awiy akata kutesh nawamp yom yilondinay ni kuyisadin. (2 Kor. 3:15, 16) Kud kand mutapu ukwau tukata kujingunin manangu ma Yehova madia mu Bibil. Yehova ukat kusadin Bibil mulong wa kutufundish mud chikumangen, pakwez ukat kutufundish kand ni kutukasikesh muntu ni muntu panrend. Muntu ni muntu ukutwish kuman mutapu Yehova umubangidinay pakampwil chisu chitanginay Dizu diend. (Isay 30:21) Ov, chakushikedinap kal chisu urishina ni mulong kampand kutang verse wisambidina kamu piur pa mulong urishina nich, mud amufunda mulong weyey? Pakwez, Bibil amufunda chakwel atwish kumutesh kud antu awonsu. Chad mutapu ik ukutwishay kwisambin yom ukuman mud ayifunda kamu mulong wa maswir mey? Chid mwamu mulong Bibil amufundikisha kud Muntu ukweta manangu ma piur nakash.​—2 Tim. 3:16, 17. w23.02 5 par. 8-10

Mulong tud in Kristu akin, tumukatin Yehova nakash. Tukatin kusal usu wetu wawonsu mulong wa kuwapish mutapu wa kusal mudimu wetu mulong wa Yehova. Pakwez, anch tukatin kumusadin Yehova yawonsu tukutwisha, tufanyidin kukwat mipak ya mu spiritu, mud kukudish mikadil ya win Kristu, ukaliweny wa kusal yom, ni kukimb mitapu ya kuyikwash antu akwau. Mulong wak tufanyidina kushinshikin piur pa kuya kurutu mu spiritu? Chakusambish, tukatin kumusangaresh Tatukwetu wa rukat udia mwiur. Yehova ukat kwovang musangar anch watuman tukat kusadin ronganyin ni ukaliweny wawonsu tukweta mulong wa kumusadin. Chikwau kand, tukatin kuya kurutu mu spiritu mulong wa kutwish kuyikwash chipandakena akadivar ni anambaz netu. (1 Tes. 4:9, 10) Chikalap nchik mivu twasadina kal mu uyakin, etu awonsu tufanyidin kudandamen kuya kurutu mu spiritu. w22.04 22 par. 1-2

Piswimp ap maguvernema ma mangand minam makumukarumukin ni kumushesh Babilon Mujim, ap anch marelijon mawonsu ma makasu. Chinship chinech chikwikal nsambishil ya mar makash. Ov, chom chinech chikuyishikij antu kukwat mupak wa kumwifukwil Yehova? Bwat. Chinyim ni chinech, Kujingunik shapitre wa 6 umekeshin anch pa chirung chinicha chikash, antu akad kumwifukwil Yehova akukimb diking mu ditenchik dia politik ni dia yom ya kwisak dia mangand minam, yifanakeshinau nich mikandu. Mulong kakunungap chikas ku Want wa Nzamb, Yehova ukuyikwat mud akankuny nend. (Luka 11:23; Kuj. 6:15-17) Chakin kamu, atushalapol a Yehova ashinshamena akumekan anch ashalijangen kamu ni antu akwau pa chirung chinicha cha mar makash. Awiy kusu akwikala chisak cha antu pa divu amwifukwidila Yehova Nzamb ni alikina kumukwash ‘nnam wa chidiany.’​—Kuj. 13:14-17 w22.05 16-17 par. 8-9

Atushalapol a Nzamb kafanyidinap ching kusu kwimen pa kulejen “rusangu ruwamp ra Want”. (Mat. 24:14) Pakwez afanyidin kand kukwash mudimu wa angel alejenau mu Kujingunik shapitre wa 8 kushik ku 10. Angel inay akat kulejan milad kushalijan ya yom yiyimp yikuyishikena antu abwambwidina ku Want wa Nzamb. Chawiy, Atuman a Yehova akat kulejan uruu wa dirumburish, ufanikeshinau ni “mayal ma ruvul ni kasu,” marumburishina dirumburish dia Nzamb pantaliken ni yom kushalijan yidia mu mangand mayimp ma Satan. (Kuj. 8:7, 13) Antu akwet kuswir kwa kwijik anch disudiel did piswimp chakwel ashiken kuswimp mwom yau ni kupand ku dichuku dia ujim wa Yehova. (Sof. 2:2, 3) Pakwez antu avud kasangaredinap uruu winou. Mulong wa kulejan uruu winou, chitin kutakaman ku mutambu wetu. Pa chirung cha mar makash, uruu wansudiel wa dirumburish ukuyitap antu ku muchim nakash.​—Kuj. 16:21. w22.05 7 par. 18-19

Shinshikin chilakej cha ambau a uruu in Kristu adia piswimp ni kwikal anvaj. Mu kusut kwa mivu, ading ateshin kal madiskur mavud misambidina mutapu wa kulil an. Pakwez katat mbil jinej jikwikal ni kurumburik kukwau kud awiy. Aval kal mwan wau ayinau. Chisend chiwamp mud ik! Chakin kamu, yishiken yisu yikutwish kuswimp mutapu wetu wa kuman mbil ja Bibil twijing nawamp machuku mawonsu. Ni chinech chawiy chiyibachikina in kumwifukwil Yehova kutang Mifund, ni mud mwayilejau ant a Isarel kusal, afanyidin kutongijokin pa Mifund ‘machuku mawonsuʼ ma mwom wau. (Kuv. 17:19) En anvaj, ukwetany chisend chimwing chijim nakash chikutwishay mwin Kristu kwikal nich, kwawiy kulond anch chisend cha kuyifundish anen piur pa Yehova. Pakwez ufanyidinany kusal yom yivud kusutamu kwau kuyilej anen jinsangu piur pa Nzamb. Ufanyidinany kuyikwash anen kumukat Yehova nakash kamu. w22.05 26 par. 2-3

Chitin kwau kwimen pa kunenganan mulong wa yitil twasalang. Tufanyidin kuswakal kuswimp. Chom cha usey chikatay Yehova kushinshikin kurutu kwa kukwat mupak wa kulikishin chid kuswimp. Kuswimp kurumburikin anch muntu ufanyidin kulikap yom yiyimp yading kusalay ni kwikal ni mashakamin makatinay Yehova anch antwend ikal nich. (Isay 55:7) Muntu ufanyidin kuswimp mutapu wend wa kutong chakwel amutakel kud manangu ma Nzamb. (Rom 12:2; Efes 4:23) Ufanyidin kukwat mupak wa kudjibul yitongijok yiyimp ni yisal yiyimp. (Kol. 3:7-9) Chakin kamu, ritiy retu mu yakupesh ya Kristu diawiy dishin diakin dikatay kusadin Yehova mulong wa kutulikishin ni kututokish ku yitil yetu. Yehova ukutulikishin kusutin chakupesh chinech anch waman anch tusadin usu chakin mulong wa kuswimp mwikadil wetu uyimp.​—1 Yoh. 1:7. w22.06 6 par. 16-17

An a antu ayil kal katumb kayimp ka kusalijan nayimp nakash amwing ni akwau. (Mul. 8:9) Chilakej, in kutakel akat kusadin nayimp ulabu wau, ambwitan akat kuyisadin akwau yom ya chisum, in dizaz ku shikol akat kuyisaal akwau ni kuyizengol, ni antu amwing akat kuyilond anamakwau a mu majuku kwa kuyizazumokin. Chawiy, chitushimokishinap pa kuman muntu ukat kumwov mukwau muntu wom! Chad mutapu ik ukatay Satan kusadin wom winou wa antu mulong wa kutwoz? Satan ukat kusal usu wa kutubachik kuyov antu wom chakwel twimik mudimu wa kulejan ap kusal yom yikwau yitwitinay Yehova kusal. Satan ukat kubachik maguvernema kukangesh mudimu wetu ni kutuzengol. (Luka 21:12; Kuj. 2:10) Antu avud a mu mangand ma Satan akat kupalangesh nsangu jiyimp ni ja makasu piur pa Atuman a Yehova. Antu akata kwitiyij makasu minam akutwish kutusip, ap kand kuturishikish. (Mat. 10:36) Ov, mipit yiney ya Satan yikat kutushimokish? Bwat kamu. Wayisadina kand mu mivu chitot yakusambish.​—Mid. 5:27, 28, 40. w22.06 16-17 par. 10-11

Ov, anany akwikala pakach pa “antu avud” akukarumunau kwikal atentamina? Pakach pa antu inay pakwikal antu akuvumbulau ni akupanda kwi njit ja Harmagedon, pamwing ni anau akuvadika mwi ngand yisu. Kwinsudiel kwa mivu 1000, antu awonsu pa divu akwikal awanyidina. Tufanyidin kuvurik anch kwikal muntu uwanyidina kukurumburikap anch muntu ukwikal kapamp kamwing ni mwom wa chikupu. Tongijokin piur pa Adam ni Ev. Ading antu awanyidina, pakwez afanyina kumekesh kuziyin kwau kudiay Yehova Nzamb chakwel ikal ni dilau dia mwom wa chikupu. Pakwez cha ushon, akanganya kumuziyin. (Rom 5:12) Kwinsudiel kwa mivu 1000 antu awonsu akwikal awanyidina. Ov, antu awonsu akwikala awanyidina akunung chikas ku winyikel wa Yehova chikupu ni chikupu bil anch antu amwing akwikal kwau mud Adam ni Ev—ashikena kubwambwil ap anch ading antu awanyidina? Tukwet kuswir kwa kwakul ku yipul yiney. w22.09 22-23 par. 12-14

Paumena yom yisadikina mu mangand nlel unou, ov, chikukasikedin kwikal ni ruchingej anch yom yikuwap? Majuku maurokin. Antu avud ayil mu kwikal in chisum nakash ni in kwitongin. Chiyikasikedin antu avud kuyichingejin antakel a ngand. Pakwez yom yiney yikutwish kukasikesh kashinsh key anch yom yikuwap. Mulong wak? Mulong antu asadin kamu yom kukwatijan ni uprofet wasambelau kulejan piur pa “machuku ma kwisudiel.” (2 Tim. 3:1-5) Kwikil muntu udia mwin kashinsh ukutwisha kutadik anch uprofet winou uwanyidin, ni kuwanyin kwau kumekeshin patok anch Yesu Kristu wasambishin kal kuyikel mud Mwant wa Want wa Nzamb. Pakwez winou ud kwau uprofet umwing pakach pa mauprofet mavud misambidina piur pa Want. Mud mukatay mwin kuchim kubomb pamwing tuyibel kushalijan mulong wa kuchim chidjal cha kabuj, mauprofet kushalijan makutukwash kutesh nawamp pitwashikedina kal mu kuwanyin kwa uprofet kukwatijan ni kalandriye wa Yehova. w22.07 2 par. 1-2

Pa chirung cha chipupu cha COVID-19, twatambwil umutakel wovikena piur pa mutapu wa kusutish yikumangan ni kusal mudimu wa kulejan. Pakad kulab, twasambisha kukumangan ku yikumangan ya win Kristu ni ku yitentam kusutin Internet. Twasambisha kand kulejan kusutin kufund mikand ni kutazukan ku telefon. Yehova wayukishin ma usu metu. Mitiy yivud yalejen anch uvud wa in kulejan wayil kurutu nakash. Ni antu avud atanyin yibudikin yikasikeshina pa chirung chinech. Pamwing ap antu amwing atonga anch dirijek niyau diapandakesh kal chad mbil piur pa chipupu. Pakwez tupamp tuvud, twashikena kuman patok anch umutakel twadia kutambul wading wa manangu. Ni anch twatongijokin pa mutapu wa rukat uyitadedinay Yesu in kwilejend, tukat kwikal nich kashinsh anch chikalap nchik yom yikutushikena diamashik ap dichada, Yehova ni Mwanend mukatish akwikal netu pamwing.​—Heb. 13:5, 6. w22.07 13 par. 15-16

Kupwa kwa kumushiman Yehova mu malembil, tufanyidin kand kumujikitish mulong wa yom yiwamp yitwinkishinay. Chilakej, tukutwish kumujikitish mulong wa ulombu uwamp nakash watekay ku yisalamb, yakudia yiwamp yivud kushalijan, ni musangar udiokila ku kwikal ni arund awamp. Tatukwetu wa rukat ukat kutwinkish yom yiney ni yikwau yivud kupandakan mulong wa kutuletin musangar. (Kus. 104:12-15, 24) Pakwez cha usey kupandakan, tumujikitishin Yehova mulong wa yakudia ya mu spiritu yivud nakash yitwinkishinay ni ruchingej ruwamp tukweta ra machuku ma kurutu. Chikutwish kutuswapel kuvuramen kumujikitish Yehova mu malembil mulong wa yom yawonsu yitusadidinay. Yom ik yikutwisha kutukwash kuvurik? Ukutwish kusal list wa yom kushalijan wamwitina Yehova, ni kusambish kushinshikin chisu ni chisu mutapu wakwilay. Kupwa mujikitisha mu malembil mulong wa ukwasha wend.​—Kol. 3:15. w22.07 22 par. 8-9

Twij anch tufanyidinap kwetu kwimen pa kwilej uyakin. Mulong wa kutaninamu nakash, tufanyidin kushakam kukwatijan ni uyakin, charumburik anch kusadin yom twilejin mu mwom wetu. Ching kusu anch twasal mwamu chad lel uyakin watuletin musangar wakin. (Jak. 1:25) Mutapu ik tukutwisha kwikal nich kashinsh anch tushich kukwatijan ni uyakin? Mukadivar umwing wapana chitongijok anch tufanyidin kwishinshikin ayinetu mulong wa kuman ku mutambu tukasikena ni ku mutambu tuziyina kwitina kuwapish. Kambuy Paul walonda pa mulong winou anch: “Chom chijim tudandamenany kamu salal mwi njil yitwayila kal djat ni katat.” (Fil. 3:16) Tongijokin bil pa yiyukish yidiokila ku kusal usu wa ‘kudandamen kwendil mu uyakin’! Tukatap kusu kwimen pa kuwapish mashakamin metu, pakwez kusal mwamu kukat kumusangaresh kand Yehova ni ambay netu in Kristu. (Jnsw. 27:11; 3 Yoh. 4) Ov, tukwetanap chakin kamu mayingishin majim mafanyidina kutubachik kukat uyakin ni kushakam kukwatijan ni uyakin? w22.08 18-19 par. 16-18

Mutapu ik ukutwishau amakurump kumekesh anch amukatin Yehova ni Yesu? Mutapu ujim ukutwishau kusal mwamu ud wa kuyibangin amikoku a Yesu. (1 Pita 5:1, 2) Yesu wamurumburila kambuy Pita patok yom yiney. Kupwa kwa kumutun Yesu tupamp tusatu, Pita wading ukwet kuswir nakash kwa kumekesh anch umukatin Yesu. Pavumbukay Yesu, wamwipula Pita anch: “Ov, Simon, mwan a Yohan, ey winkatil am?” Chakin kamu, kud yom yading yifanyidinay kusal Pita mulong wa kumekesh anch wading umukatin Nsalejend. Yesu wamuleja Pita anch: “Lam amikoku am.” (Yoh. 21:15-17) Kudiosh kamu pinipa djat ni ku rufu rend, Pita wamekesha anch wading umukatin Yesu kusutin kuyibangin amikoku a Nsalejend nich rukat. Amakurump, mutapu ik ukutwishanya kumekesh anch ukwatinan nich usey mazu mamulejau Pita kud Yesu? Ukutwish kumekeshany anch umukatinany nakash Yehova ni Yesu kusutin kwipan nakash mu mudimu wa ukafung ni kusal usu wa kuyikwash nakash antu alikina kal kumusadin Yehova chakwel amuchirikin kand.​—Ezek. 34:11, 12. w23.01 29 par. 10-11

Kangal wawil mu mupit wa kutong anch kwikil muntu mukwau uteshina kurumburik kwa mulong urishina nich pakampwil. Chamwamu ukushiken kutong anch ukwetap mutapu wa kuswimp ni anch ukwetap usu wa kujijamen maku mayimp. Pakwez Bibil kalondinap mwamu. Ulondin anch: “Yoziu yikata kushik kudi en, yawiy kand yikata kushik kudi antu awonsu. Pakwez Nzamb udi mwin yakin, kakwitiyap yoziu kukupandakanany en. Piyikushika yoziu yiney ndiy ukukulejany mutapu wa kukwasanik chakwel ukupandakanany wakad kuwa.” Chawiy ap anch maku mayimp mad makash, tukutwish kushal ashinshamena kud Yehova. Kusutil ukwash wend tukutwish kudandamen kwiman daang. Vurik chisu chawonsu anch: Mulong tud antu akad kuwanyin, tukutwish kwikal ni maku mayimp. Pakwez anch makushiken, ufanyidin kumipuk pakad kulab mud mwasalay Josef chisu chamuchinay mband a Potifar pakad kulab. (Dis. 39:12) Ukutwish kwey kutond kulik kuziyin ku maku mayimp! w23.01 13 par. 16-17

Kutentam ud mwikadil ukwau wa Yehova. (Kuv. 32:4) Kutentam kukwatijadin nakash ni kuburen kasolikany, ni Yehova kakwetingap kasolikany. (Mid. 10:34, 35; Rom 2:11) Mwikadil winou umeken mu mazu masadinau mulong wa kufund Bibil. Yehova wakana anch mu chirung cha kwinsudiel, ‘ronganyin rakin’ ridia mu Bibil rikez ‘kavulijan.’ Antu avud akez karijik. (Daniel 12:4) Mutapu umwing uvulijadina ronganyin riner ud kusutil mudimu wa kukarumun, wa kubudish, ni wa kupalangesh Bibil ni mikand yimedina pa Bibil. Bibil ndiy buku wakarumwinau kal ni kupalangesh nakash pa mangand. Ma Bibil makarumwiningau kud in kwisak makweting yisu yimwing usey nakash. Atuman a Yehova akarumwin kal Bibil wakabuj ap wa chikunku mu mazu 240 ni kusut, ni muntu mwawonsu ukatina akutwish kumwinkishay pakad kufut. Mud chibudikin, antu a ku michid yawonsu akat kutesh “rusangu ruwamp ra Want” kurutu disudiel dia mangand dishik. (Mat. 24:14) Nzamb wetu utentamina ukatin anch antu avud nakash amwijik kusutil kutang Dizu diend. Chid mwamu mulong utukatin etu awonsu nakash. w23.02 5 par. 11-12

Ov, ukatin kutentam? Pakad kwidjidjek ukatin. Pakwez etu awonsu tud antu akad kuwanyin, ni anch tubabelap, chitongijok chiyimp cha mangand piur pa kutentam chikutwish kutupumbul. (Isay 5:20) Pakatau kutongijokin antu piur pa muntu utentamina, avud akutwish kutong anch ud muntu witutwila, mwin kuyilond akwau nayimp, ap utongina anch ud muwamp kuyisutamu akwau. Pakwez Nzamb kakatiningap mikadil mud yiney. Padingay Yesu pa divu, wayifisha nich nakash amakurump a chirelijon a mu chirung chend, mulong atekang mbil jau ayinau piur pa kutentam. (Mul. 7:16; Luka 16:15) Muntu umekeshina kutentam kwakin kakatap kwiman anch ud wa usey kuyisutamu antu akwau. Kutentam ud mwikadil uwamp nakash. Mu wiswimp, kutentam kurumburikin kusal yom yiwamp ku mes ma Yehova. Mu Bibil, mazu makarumwinau anch “kutentam” makwet chitongijok cha kushakam kukwatijan ni mbil ja piur ja Yehova. w22.08 27 par. 3-5

Yesu wayichingejina in kwilejend chikalap nchik kurumbok kwau. (Yoh. 15:16) Pamwitau Yesu kud Jakobu ni Yohan mulong wa kwikal ni ndond ya piur mu Want wend, Yesu kiyipulap piur pa yom yading yiyibachikina kumusadin Yehova, ap kuyilik anch kadiap kand atwimbuy end. (Mar. 10:35-40) Mu kusut kwa chisu, in kwilej a Yesu awonsu amuchina uchuku wamukwatau. (Mat. 26:56) Pakwez, Yesu kadioshap ruchingej rend mudiau in kwilejend. Wading wij nawamp kuburen kuwanyin kwau; pakwez “ndiy wayikata kamu djat ni kwisudiel kwa mwom wend.” (Yoh. 13:1) Ap kand pa chisu chavumbukay, Yesu wayinkisha atwimbuy end ashinshamena 11 chisend chijim cha kutakel mudimu wa kwikadish in kwilej ni kuyilam amikoku end a usey. (Mat. 28:19, 20; Yoh. 21:15-17) Wading ni mayingishin mawamp ma kuyichingejin amakundj inay akad kuwanyin. Awonsu amusadina nich kushinshaman djat ni kwinsudiel kwa mwom wau wa panap pa divu. Chakin kamu, Yesu washa chilakej chiwamp cha kuyichingejin an a antu akad kuwanyin. w22.09 6 par. 12

Anch twikal nich kashinsh anch Yehova utukatin—ni anch ud netu—Satan kakutwishap kutwovish wom. (Kus. 118:6) Chilakej, nfund a Kuseng 118 warisha ni yikokujol yimwing yikash kushalijan. Wading ni akankuny avud, kuwejaku antu amwing ajim (verse wa 9, 10). Yisu yimwing warisha ni rupompat rikash (verse wa 13). Ni amupupa nakash kud Yehova (verse wa 18). Pakwez ap mwamu, nfund a kuseng winou weza kuwang anch: “Kinikovap kwam wom.” Yom ik yamukwasha kwiyov anch ud mu diking mwamu? Wading wij anch Yehova wading umukatin nakash ap anch wamupupap nchik. Nfund a kuseng wading ukwet kashinsh anch chikalap nchik chikokujol chikutwishay kurish nich, Nzamb wend wa rukat wafanyina kumukwash. (Kus. 118:29) Tufanyidin kwikal nich kashinsh anch Yehova utukatin pakampwil. Kwikal nich kashinsh kinak kukutukwash kupandakan mitapu ya wom yisatu yilondwilaku ey: (1) wom wa kukangany kuwanyish maswir ma dijuku, (2) wom wa antu, ni (3) wom wa rufu. w22.06 15 par. 3-4

Tufanyidina kwikal nich kashinsh anch difukwil dia Yehova did pa ndond ya kusambish mu mwom wey. Mulong Yehova ud Sakatang wetu, ndiy tufanyidina kwifukwil. (Kuj. 4:11; 14:6, 7) Chawiy, chom cha usey nakash chid anch tufanyidin kumwifukwil mu mutapu ukatinay ndiy, ‘mu spiritu ni uyakin.’ (Yoh. 4:23, 24) Tukatin anch spiritu utumbila atakel difukwil dietu chakwel dikwatijan ni uyakin udia mu Dizu diend. Difukwil dietu difanyidin kwikal pa ndond ya kusambish ap anch tushich mwi ngand mukangeshinau mijikit yimwing ap kujidik mudimu wetu. Pitulondina ap, kud akadivar ni anambaz 100 ni kusut adia mu jinkan mulong kwau ad Atuman a Yehova. Chikalap nchik mwamu, akat kusal nich musangar yawonsu yikutwishau mulong wa kulembil, kwilej, ni kuyirumburil antu akwau piur pa Nzamb ni Want wend! Chisu chituzengodinau ap kutulond nayimp, tukutwish kwikal ni musangar pa kwijik anch Yehova ud netu ni anch ukutufut.​—1 Pita 4:14. w22.10 9 par. 13

Mu buku wa Jinswir, Yehova upaninamu yiyul yikutwisha kutukwash chisu chawonsu mu mwom wetu anch twayisadin. El tushinshikinanyaku kwetu yilakej yaad ya yiyul yiney ya manangu. Chakusambish, sanger yom ukweta. Jinswir 23:4, 5 upanin chiyul chinech: “Kangal wiswidiosh mulong wa kupit dipit. . . . Anch wazazimwin mes pa dipit kidikumekanap. Dipit dikat kuminy jimpur ni kutwik, mudi mbur ukata kutwik kuya mwiur.” Pakwez ikal mpich ap kazwendj, awonsu akat kwinan mulong wa kwikal ni nfalang. Yakamish yiney yikat kuyishikij ku kwikal ni yisal yikata kuyiletin kapipej, kuyipish urund wau, ni ap kand kuyipish mijimbu yau. (Jnsw. 28:20; 1 Tim. 6:​9, 10) Cha kaad, tong kurutu kwa kulond. Anch tubabelap, mazu metu makutwish kuyisal antu akwau nayimp. Jinswir 12:18 ulondin anch: “Kudi amwing akata kulond mazu makash mudi kutap kwa mpak ya musamun, pakwez jindim ja in manangu jikat kwokan.” Tukat kulam urund uwamp anch twipuk kulondol piur pa kurumbuk kwa antu akwau.​—Jnsw. 20:19. w22.10 21 par. 14; 22 par. 16-17

Ezekiel wading ufanyidin kwov nawamp kurumburik kwa uruu wading ufanyidinay kulejan. Wading ufanyidin kuchingejin mu uruu winou chakwel umwinkish kutakaman kwa kuulejan. Kupwa kwasadika chom chishimokishena. Ezekiel wajingunina anch muvungur “wading utadil mudi woch.” (Ezek. 3:3) Mulong wak? Kudiay Ezekiel, dilau dia kumulondin Nzamb chading chom chiwamp nakash ni chisangareshina. (Kus. 19:8-11) Wajikitisha nakash mulong wa dilau diamwinkishau kud Yehova dia kumusadin mud muprofet wend. Kupwa, Yehova wamuleja Ezekiel anch: “Tesh nawamp, ni kuvurik yom yawonsu yinakulejila.” (Ezek. 3:10) Kusutin mbil jinej, Yehova wamuleja Ezekiel kulam mu manangu mazu mading mafundinau mu muvungur ni kumatongijokin. Pasalay Ezekiel mwamu, ritiy rend rikala rikash. Kwamukwasha kand kwijik nawamp uruu wading ufanyidinay kuyirumburil. (Ezek. 3:11) Ezekiel povay nawamp kurumburik kwa uruu wa Nzamb ni kuwitiyij, chamuswakela chad kusambish mudimu wend wa kulejan ni kudandamen djat ni kwinsudiel. w22.11 6 par. 12-14

Anch kuswimp kusadikina mu dirijek kwapak ritiy retu, ov yom ufanyidina kusal? Sal kukwatijan ni kuswimp kwawonsu kusadikina mu dirijek. Padingau in Isarel mwimpay, antu a mu dijuku dia Kore ading akwet chisend cha pakampwil. Chisu chawonsu chashemuninangau in Isarel chibeng, antu amwing pakach pau atakelang kurutu nich mushet wa manswik. (Kuch. 3:29, 31; 10:33; Jos. 3:2-4) Dilau diwamp mud ik! Pakwez, yom yaswimpa pashikau in Isarel mwi Ngand ya Kushilamu. Mwinimwa mwadingap kand maswir ma kushemunin chisu chawonsu mushet wa manswik. antu amwing a mu dijuku dia Kore ikala in kuwang, akwau asala mud in kulam yis, ni akwau kand mud in kulam yipau. (1 Jsng. 6:31-33; 26:1, 24) Kwikil ndond yifundinau anch antu a mu dijuku dia Kore inana ap ita chakwel ayinkish yisend ya ntumb mulong wa chisend cha usey chadingau nich pasak. Yom ik twilejidinaku? Nich muchim wawonsu, sal kukwatijan ni kuswimp kusadikina mu dirijek dia Yehova, kuwejaku ni kuswimp kukutwisha kwikal ni chibachikin pa chisend chey. Tan musangar mu chisend chin chawonsu chikwinkishinau. Vurik anch chisend chey chawiyap chikwikadishina muntu wa usey nakash ku mes ma Yehova. Yikwatinay Yehova nich usey nakash yid kuziyin kwey, kadiap chisend ukweta. w22.11 23 par. 10-11

Onezifor wamukimba Paul, ni pamutanay wakimba mitapu ya kumukwash. Kusutin kusal mwamu, Onezifor wateka mwom wend mu ubaj. Dilejan ik tudioshinaku? Tufanyidinap kulikidil wom wa an a antu utuzazatish ap kutukangesh kuyikwash akadivar netu azengodinau. Pakwez tufanyidin kuyilondin ni kuyikwash. (Jnsw. 17:17) Akwet kuswir kwa rukat ni ukwash wetu. Man mutapu akadivar ni anambaz netu a mu Risi wayikwashinau ambay nau akatish akasinau mu rukan. Anch ayitwal amwing ku dirumburish, akadivar ni anambaz avud akat kwez mulong wa kuyikwash. Dilejan ik tudioshinaku? Anch ayidimben akadivar akweta yisend makasu, ayikas, ni ayizengol, kangal wov wom. Yilembila, yibangina antu a mu majuku mau, ni kimb mitapu yikwau ukutwisha kuyikwash.​—Mid. 12:5; 2 Kor. 1:10, 11. w22.11 17 par. 11-12

Amakurump akwet chisend cha kuyikasikesh akadivar kusutin Bibil ni cha kuyikwash antu akweta yakamish. (1 Pita 5:2) Anch yinship yikash yashiken, amakurump afanyidin chakusambish kusal usu wa kwikal nich kashinsh anch akadivar nau anambaz ad mu diking, akwet yakudia, ya kudjal ni ndond ya kushakam. Pakwez mu kusut kwa angond avud, antu asutidina mu yinship yikash akutwish kwikal ni kuswir kwa kuyikasikesh mu spiritu ni mu manangu. (Tang Yohan 21:15.) Harold usadina ku Komite wa Mutiy ni watanijana ni akadivar nau anambaz avud arisha ni yakamish yidiokila ku yinship yikash ulondin anch “chitining kamu chisu mulong wa kuvuramen yom yashikena. Antu akutwish kusambish kand kwiyov nawamp, pakwez chikutwish kuyikasiken kuvuramen akatish nau afila, yom ya usey nakash yashadishinau, ap mashakamin ma ubaj madingau nich. Kuvurik yom yiney kukutwish kulangwishiril kand kusansan ku muchim. Chinech chimekeshinap anch kakwetap ritiy pakwez yid kwau yovil yakin.” Amakurump akat kusadin chiyul chilondina anch “ovany ushon pamwing nau antu ovila ushon.”​—Rom 12:15. w22.12 22 par. 1; 25 par. 10-11

Yehova ukat kutwinkish spiritu wend utumbila, mulong wa kutukwash mu usu wetu tusadina wa kusal yom yiwamp. Chisu twilejina Dizu dia Nzamb, tukat kulikidil chakwel spiritu utumbila atutakel. Tukat kutambul kand spiritu winou chisu tukata kukumangan. Ku yikumangan yiney ya win Kristu, tukat kusutish chisu ni akadivar nau anambaz asadina niyau usu wa kusal yom yiwamp mud etu, ni chinech chikat kutukasikesh. (Heb. 10:24, 25; 13:7) Ni anch twamusejin Yehova piswimp mu malembil ni twamwilembin chakwel atukwash pa ndond tuziyina, ndiy ukutwinkish spiritu wend utumbila ukutukwasha kudandamen kurishikish maku mayimp. Ap anch pamwing ap mijikit yiney yikupwishap maku metu mayimp, yikutukwash kujijamen chibachikin cha kumaziyin. Chid cha usey kulam chaku chinech ni kudandamen kukudish yaku yiwamp. w23.01 11 par. 13-14

Ap anch Bibil kadiap buku wa chimwingang ap ulejena yom tufanyidina kudia ni yitufanyidina kwipuk, pakwez utukwashin kwijik chitongijok cha Yehova pa milong yiney. Chilakej, utuyudin ‘kwiyep yom ya ubaj’ yikutwisha kushesh mujimbu wetu. (Mul. 11:10) Bibil ukangeshin wimpumb a kudia ni kuleu, yaku yitekina mwom mu ubaj. (Jnsw. 23:20) Yehova ukatin anch twilam mu yom tutondina kudia ni kuna, ni uvud way. (1 Kor. 9:25) Tukutwish kukwat mipak yimekeshina anch tukwatin nich usey nakash mwom, chipan cha Nzamb, kusutin kusadin ukaliweny wetu wa kutong. (Kus. 119:99, 100; Jinsw. 2:11) Chilakej, tukat kwikal isikena mu yom tudila. Anch tukatin yakudia kanang pakwez twij anch ang twayidia yikat kutuyedishang, chid cha usey kuyipuk. Tukat kumekesh kand anch tud in manangu kusutil kulal mu chisu chiwanyidina, kwiyijidish chisu chawonsu, kwikal inangina chisu chawonsu ni kwikal ni chaku cha kwinangish mu chikumbu chetu. w23.02 21 par. 6-7

Mutapu ik ukutwisha kudiosh malejan mu yom utangina mu Bibil? Shinshikin yom yilondinay 2 Timote 3:16, 17. Maverse minam malondin anch ‘Mufund wawonsu . . . ud wa ukwash’ mulong wa (1) kufundish, (2) kupup, (3) kutenchik yom, ni (4) kukand. Bibil ukutwish kukukwash mu mitapu yiney yinying ap kusutin mikand yawakading kutang nakash. Shinshikin rusangu mulong wa kuman rikufundishin ik piur pa Yehova, rusot rend, ap piur pa mbil ja Nzamb. Shinshikin mutapu udiay wa ukwash mulong wa kupup. Ukutwish kusal mwamu kusutil kushinshikin mutapu ukukwashinay verse kujingunin ni kwipuk maku ap mwikadil uyimp ni kushal ushinshamena. Shinshikin mutapu ukutwishay verse kukukwash kutenchik yom, ap kuswimp chitongijok chiyimp, pamwing ap chawatanang mu mudimu wa kulejan. Ni kimb jinkand jawonsu jidia mu maverse jikutwisha kukukwash kwimburij mutapu wa kutong wa Yehova. Anch walam manans minam manying mu manangu, ukudiosh malejan makukukwasha kutaninamu nakash mu yom utangina mu Bibil. w23.02 11 par. 11

Uprofet ukwau udia mu buku wa Daniel wasambela kulejan anch Yesu wafanyina kuyikel kwinsudiel kwa chirung cha uprofet cha mivu sambwad. Ov, chitwishikin kwijik chirung chawanyina chinship chinech chisangareshina? (Dan. 4:10-17) Chirung cha “mivu sambwad” chimekeshin mivu 2520. Chirung chinech chasambisha mu muvu wa 607 K.C.C. chisu in Babilon chamudioshau mwant wa nsudiel pa ditand dia Yehova mu Yerusalem. Chirung chinech cheza kupwa mu muvu wa 1914 C.C. pamudishau Yesu want kud Yehova—‘ndiy ukweta mbil ya kuyikel’—mud Mwant wa Want wa Nzamb. (Ezek. 21:25-27) Uprofet winou ukutwish kutukwash mutapu ik? Kwov nawamp kurumburik kwa uprofet wa “mivu sambwad” kukutwinkish kashinsh anch Yehova ukat kuwanyish kushilamu kwend pa chisu chiwanyidina. Mud mwatekay chisu chafanyina Want kusambish kuyikel, ukushinshikin kand chakwel mauprofet min mawonsu mawanyin kukwatijan ni kalandriye wend. Chakin kamu, chisu chikweza dichuku dia Yehova “kichikulabap, bwat.”​—Aba. 2:3. w22.07 3 par. 3-5