Ngond wa 11

Mazu mayimp makwetap ndond mu kan mwa mwin Kristu. Pakwez kud kulond kukwau kwa nchir kwakad kwijikan patok tufanyidina kand kubabel. Chilakej, tufanyidin kwipuk kulond yom yiyimp chisu twisambidina piur pa antu a kabil, muchid, ni ngand yikwau. Chikwau kand, tukatinap anch mazu metu mayovish antu kwau nayimp ku muchim. Lond mu mutapu uyikasikeshina antu akwau. Ikal uswakela kulond yom yiwamp piur pa antu akwau pa ndond pa kuyilond yom yiyimp ap kunyinyit piur pau. In Isarel ading ni yom yivud yafanyina kuyibachik kwikal in kujikitish, pakwez yisu yivud, adinga in kunyinyit. Chaku cha kunyinyit chikutwish kuyisamburikin antu akwau. Vurik anch rapor muyimp wapanau in kutentish dikum wayishikija “in Isarel awonsu [kumununganijan] Moses.” (Kuch. 13:31–14:4) Ku mutambu ukwau, kulond yom yiwamp piur pa antu akwau kukutwish kuyikwash antu awonsu kwikal nich musangar. Chawiy kimb mitapu ya kulond yom yiwamp piur pa akadivar ni anambaz ney. w22.04 8 par. 16-17

Kudiokal pasak, Yehova wayikwashin kal ansand avud nakash kwikal arund nend. Ukutwish kand kuyikwash aney kupam mu spiritu anch akwet maswir minam. (1 Kor. 3:6, 7) Ap anch aney amekan mud afil ukat mu spiritu, Yehova ukudandamen kuyital nich mes ma rukat. (Kus. 11:4) Anch amekesh kwau ap ka chijingidij kakemp anch akatin kumusangaresh Yehova, ukuyikwash kamu chakin kwikal arund nend. (Mid. 13:48; 2 Jsng. 16:9) Ukutwish kukukwash kulond yom yiwamp pa chisu chikwetau aney maswir nakash ma kutesh yom yiney. (Jnsw. 15:23) Ap ukutwish kumubachik mukadivar ap nambaz ukweta rukat kuyibangin aney pakampwil. Ap kand chisu chikupamau aney, Yehova ukutwish kuyivurish yom wayifundisha kudiosh pakur. (Yoh. 14:26) Anch wadandamen kuyifundish aney kusutin yom ulondina ni yisal yey, Yehova ukuyukish usu usadina. w22.04 21 par. 18

Mulong Satan kadingap kand ni mutapu wa kuchirik mwiur, chawiy wapwishina ujim wend padiau in Kristu azizidilau many achidia pa divu, in Kristu inay ad antimesh a Want wa Nzamb ni ‘akat kulejan uman wau piur pa Kristu.’ (2 Kor. 5:20; Efes 6:19, 20) Mu muvu wa 1918, akadivar chinan ijikena nawamp ayifunda kwa mafef, ayifisha nich, ni dirumburish diakwata mupak anch afanyidin kusal mivu yivud nakash mu rukat. Chamekana mud mudimu wa akadivar inay azizidilau many “aujipa.” (Kuj. 11:3, 7-11) Pakwez mwi Ngond wa 3, 1919, ayibudisha akadivar inay mu rukan, ni kupwa mayingishin ma makasu mayifishinau nich amalika. Kapamp kamwing, akadivar inay achirika ku mudimu wau wa Want. Pakwez chinech chamukangeshap Satan kudandamen kuyirishikish atushalapol a Nzamb. Kudiokal kamu pinipa, Satan ukat kuletish “wit mujim” wa kuzengol pantaliken ni atushalapol a Nzamb. (Kuj. 12:15) “Wawiy mulong winou ufanyidinau antu a Nzamb kudandamen mu ritiy [ni kujijaman].”​—Kuj. 13:10. w22.05 5-6 par. 14-16

Mu chishimushimu, kambuy Yohan wamana yisak yaad ya antu anungina chikas ku winyikel wa Yehova ni kutambul yiyukish ya mwom wa chikupu. Chisak cha kusambish chikwet uvud wa antu 144 000. Ayitondin pa divu mulong wa kusal guvernema, ap anch Want, pamwing ni Yesu. Akuyikel nend pamwing pa divu dia kabuj. (Kuj. 5:9, 10; 14:3, 4) Yohan wayimana mu chishimushimu iminy pamwing ni Yesu mwiur pa Mukandu wa Sion. (Kuj. 14:1) Mu kusut kwa yitot ya mivu, atondin kal tunan twa antu mulong wa kwikal mu chisak cha antu 144 000. (Luka 12:32; Rom 8:17) Pakwez, amuleja Yohan anch kamuzamu kusu kakemp ka antu a mu chisak chinech, awiy akwikala aom pa divu pa chisu cha machuku ma nsudien. (Kuj. 12:17) Kupwa, chisu chikemp pa chirung cha mar makash, atushal inay akuyisend mwiur mulong wa kutanijan ni antu akwau adia mu chisak cha antu 144 000, asambela kufa nich kushinshaman kwau. Kwinikwa akuyikel pamwing ni Yesu mu Want wa Nzamb.​—Mat. 24:31; Kuj. 5:9, 10. w22.05 16 par. 4-5

Yesu wayifundisha in kwilejend kwikal ni chitongijok chiwamp piur pa ayinau. Yesu wayinkisha kashinsh anch: “Nzamb wachindil kal nswich jawonsu jidia ku mitu yen.” (Mat. 10:30) Mazu minam matwongojin nakash, pakampwil chisu tukutwisha kwikal nich yitongijok yiyimp piur pa ayinetu. Chinech chirumburikin anch Tatukwetu wa mwiur ukat kutubangin chikurikina—anch tukwet usey nakash ku mes mend. Tufanyidinap kwidjidjek piur pa dirumburish dia Yehova ni kulond anch tuwanyidinap kwetu kwikal atushalapol end ni kutambul mwom wa chikupu mwi ngand yisu. Pasut kal mivu 15, Chinong cha Kalam chatukasikesha kukudish chitongijok chisikena piur pa ayinetu anch: “Chakin kamu, tufanyidinap kwitongin nakash mu chilik cha kwitutul; ap tufanyidinap kwiman anch tukwetap kwetu usey. Pakwez tufanyidin kukudish chitongijok chisikena piur pa ayinetu, ni kwijik usu wetu ni mimbu yetu.” w22.05 24-25 par. 14-16

Yom ik yikutwishay umwing ni umwing pakach petu kusal mulong wa kukwash kulam umwing winou mu chikumangen? Kusutin kwikal mwin kusal chisambu. (Mat. 5:9; Rom 12:18) Chisu chawonsu tukata kusal usu wa kushakam mu chisambu ni antu akwau mu chikumangen, tuwejin niyetu kuwap pa kuwap kudia mu paradis wa mu spiritu. Tukat kulam mu manangu anch Yehova wamupwitina umwing ni umwing pakach petu udia mu paradis wa mu spiritu mu difukwil dishitwila. (Yoh. 6:44) Tong bil mutapu ufanyidinay Yehova kwov musangar anch watuman tukat kusal usu mulong wa kukasikesh chisambu ni uumwing pakach pa antu amenay anch ad a usey nakash—atushalapol end! (Isay 26:3; Age 2:7) Mutapu ik tukutwisha kutaninamu nakash mu yiyukish tukata kutambul kud Nzamb mud atushalapol end? Tukutwish kutongijokin chikurikina piur pa yom twilejina mu dizu dia Nzamb ni mikand yetu yimedina pa Bibil. Kwilej ni kutongijokin mu mutapu winou kukutukwash kukudish mikadil ya win Kristu yikutubachika “[kukatijan] amwing ni akwau mudi mufanyidinau akadivar kukatijan” ni “kukasikesh kulimishijan amwing ni akwau” mu chikumangen.​—Rom 12:10. w22.11 12-13 par. 16-18

Anch twitiyij anch Yehova watulikishidin kal, tukat kusanger ‘yirung ya kwipimish,’ kuwejaku chisambu cha mu manangu ni kom kishitwila. Dilikishin dia mutapu winou dikutwishap kudiokal kud antu, pakwez ching kud ‘Yehova amwinend.’ (Mid. 3:19) Anch Yehova watulikishin, ukat kuchirish netu urund mud kandikal tusalangap chitil. Anch Yehova watulikishin, kakez katufishap kand nich ap kutupup mulong wa chitil twasala. (Isay 43:25) Yehova ukat kutwal yitil yetu kulemp “mud mudia kwingangel kulemp ni kurand.” (Kus. 103:12) Tukat kujikitish nakash ni kwov kand wom anch twatongijokin pa kujimb kwa dilikishin dia Yehova. (Kus. 130:4) Mupak wa Yehova wa kulikishin wimedinap pa kulond anch chitil chid chijim ap chikemp. Yehova ukwet ronganyin nakash mud Sakatang, Mwin Kupan Yijil, ni Nkalansambu, ni ukat kusadin ronganyin riner chisu chikwatinay mupak wa kumulikishin muntu. w22.06 5 par. 12-14

Yehova wayinkishin kal awonsu amukatina ndiy ruchingej ruwamp ra machuku ma kurutu. Piswimp ap ukupwish mayej, ushon ni rufu. (Kuj. 21:3, 4) Ukuyikwash antu “itudishina” amuchingejidina kukarumun divu kwikal Paradis. (Kus. 37:9-11) Ni ukumukwash umwing ni umwing wa pakach petu kwikal ni urund wa piswimp ni ndiy ukumuletina musangar nakash kusutamu musangar ukwetay katat. Riner rid ruchingej ruwamp mud ik! Pakwez yom ik yitubachikina kwitiy anch kushilamu kwa Nzamb kukuwanyin kamu? Chom chawonsu chikatay kukan Yehova ukat kuchiwanyish. Komb tukwet diyingishin diwamp dia ‘kumuchingejin Yehova.’ (Kus. 27:14) Tukat kumekesh mwamu kusutin kumuchingel Nzamb nich kushimpish muchim ni musangar chakwel awanyish kushilamu kwend. (Isay 55:10, 11) Elany amboku tushalany ashinshamena kud Yehova nich kashinsh anch ukuyifut “antu awonsu akata kumusurab.” w22.06 20 par. 1; 25 par. 18

Tukutwish kwikal nich kashinsh anch mulong niyend ud ntakel wa dijuku, Yehova ukulimish mbil jafundikishay mu 1 Timote 5:8. Anch twikal nich kashinsh anch Yehova utukatin ni ukatin dijuku dietu, tukwiyakamishap ni kutong anch tukutanap yom tukweta nich kuswir. (Mat. 6:31-33) Yehova ukatin kutuwanyishin maswir metu, ni ud mwin rukat ni Mwin Kupan mujim mud ik! Patangay divu, wasala kand yom yivud nakash kusutamu kwau kwimen pa kutwinkish yom tuswirikedina mulong wa kwikal ni mwom. Nich rukat, wizwisha divu too nich yom yikutwisha kutuletin musangar nakash. (Dis. 2:9) Ap anch tukwet kwetu yom yikemp mulong wa kuwanyish maswir metu, chid cha usey kuman anch tukat kwibulibul mulong wa kuwanyish maswir ma usey mu mwom. Tufanyidin kuvurik anch Yehova ndiy watwinkishang yom yiney. (Mat. 6:11) Tufanyidin kulam mu manangu anch yom yikutwinkishay Nzamb wetu wa rukat katat ni mu machuku ma kurutu yid ya usey kupandakanamu yom ya kumujimbu tukutwisha kulikap katat.​—Isay 65:21, 22. w22.06 15-16 par. 7-8

In kwilej asu kawiyap kwau kusu aswirikedina yakudia yikash ya mu spiritu, pakwez etu awonsu. Kambuy Paul wafunda anch: “Paul wawejinaku anch kusadin yom twilejina mu Bibil kukutukwash “kwauril kuwap ni kuyip.” Nlel chikutwish kutukasiken nakash kuziyin kwi mbil ja Yehova mulong antu avud tushicha nau akwet mikadil yijondila. Pakwez Yesu ushinshikidin chakwel twikal ni yakudia ya mu spiritu yitaadila tuswirikedina mulong wa kukasikesh ritiy retu. Yakudia yiney ya mu spiritu akat kuyidiosh mu Dizu diapepilay Nzamb, Bibil. Mud Yesu, twapanin kal katumb kawanyidina ku dijin dia Nzamb. (Yoh. 17:6, 26) Chilakej, mu muvu wa 1931 twasenda dijin dia Atuman a Yehova dilejenau mu Mifund, chinech chatusejisha piswimp ni Tatukwetu wa mwiur mu mutapu wa pakampwil. (Isay 43:10-12) Chikwau kand, dikarumun dia Traduction du monde nouveau diachirishin dijin dia Nzamb pa ndond yawonsu padiading mu Dizu diend. w22.07 11 par. 11-12

Mu uyakin wa Bibil mud kand rusangu ruwamp piur pa Want wa Nzamb. Yesu wafanakesha uyakin piur pa Want nich dipit dijindjikinau. Mud mufundinau mu Mateu 13:44, Yesu walonda anch: “Want wa Mwiur ufanaken mudi dipit diajindjikau mu chir. Muntu mukwau wadibudikina niyend wadijindjik kand. Waya nich musangar nakash, walandish yom yend yawonsu yakwetingay chakwel achirik mulong wa kuland chir chinicha.” Man anch ikundj winou kadingap kwend kakimbina dipit dined. Pakwez padibudikinay, wasala usu wend wawonsu mulong wa kudikal nich. Chawiy, walandisha yom yend yawonsu yadingay nich. Mulong wak? Chid mulong wading wij usey wading nich dipit dined. Twij anch kwikil chom mu mangand minam tukutwisha kufanakesh nich musangar tukweta wa kumusadin Yehova katat, ni ruchingej tukweta ra kwikal ni mwom wa chikupu mu machuku ma kurutu mwinshin mwa winyikel wa Want wend. Dilau tukweta dia kwikal mu uruund wa pakampwil ni Yehova did dia usey nakash kusutamu yom yawonsu twipukina mulong wa kwipan kumusadin. Rusot retu rijim rid ra kusal “machuku mawonsu yom yikatilay.”​—Kol. 1:10. w22.08 15 par. 8-9; 17 par. 12

Mutapu ik wading wijay Josef anch Nzamb wafanyina kuman chisal cha kusotan mud ‘kuyip kujim’? Chijil cha Moses mudia chijidik chilondina anch: “Kangal wimik dis,” ading kandikal achifunda ni achifunda kupwa kwa mivu yitot yaad. (Kub. 20:14) Mulong Josef wading umwij Yehova nawamp, wajingunina mutapu wafanyinay kwiyov piur pa chitil cha kusotan. Chilakej, Josef wading wij nawamp anch Yehova watenchika anch uruw ufanyidin kwikal pakach pa ikundj umwing ni mband umwing. Ni pamwing ap watesha mutapu Yehova wasalay usu tupamp twaad mulong wa kuchidij kalimish ka ngakiril wend Sara padingay mu ubaj wa kumulal ku usu. (Dis. 2:24; 12:14-20; 20:2-7) Pading patongijokidinay Josef pa yom mud yiney, wajingunina yom yading yitentamina ni yakad kutentam ku mes ma Nzamb. Mulong wading umukatin Nzamb wend, Josef wakata kand mbil ja Yehova piur pa kutentam, ni wakwata mupak wa kujilimish. w22.08 26 par. 1-2

Uprofet winou wisambidinap divumbuk dia chifanakesh, divumbuk dia mu spiritu dia atushalapol a Nzamb disadikina mu machuku ma kwinsudiel, mud mutapu twading kwitiyij pa kusambish. Pakwez, mazu minam misambidin piur pa divumbuk dia antu dikusadika mwi ngand yisu yikweza. Mulong wak tushikedina kulond mwamu? Dizu “rufunfut” adisadidin kand mu Job 17:16, ni dirumburikin yom yimwing ni dizu “Nzay.” Yom yiney yimekeshin anch Daniel 12:2 wisambidin piur pa divumbuk din diakinakin dikusadika kupwa kwa machuku ma nsudiel ni kupwa kwa njit ja Harmagedon. Yom ik yifidinau kulond mu Daniel 12:2 palondinay anch antu amwing akez kayivumbul mulong wa “mwom wa chikupu”? Chinech chirumburikin anch antu akushikena kumwijik, ap anch akudandamena kumwijik ni kumuziyin Yehova ni Yesu kupwa kwa kuyivumbul pa chirung cha mivu 1 000, akutambul mwom wa chikupu.​—Yoh. 17:3. w22.09 21 par. 6-7

Mazu minam marumburikinap anch Yehova utwitin kuyichingejin antu akwau mud ambubu, pakwez utwitin kuyichingejin mulong ayinau amekeshin kal anch awanyidin kuyichingejin. Mud mutapu chiding piur pa kalimish, chimwitin muntu kumekesh anch uwanyidin kumuchingejin, ni chinech chitin chisu. Mutapu ik ukutwisha kukudish ruchingej mudiau akadivar ney? Ileja kuyijik nawamp. Isambang nau ku yikumangan. Itekina chisu cha kubudik nau mu mudimu wa kulejan. Yishimpishina muchim, ni yishila chisu cha kumekesh anch ad awanyidina kuchingejin. Kwinsambishin, ukutwish pamwing ap kutond milong yey ya pakampwil ukatina kumulej ni ukatina kumujindjikin muntu wakad kwijikijan nend nawamp. Chawiy paukumwijika nawamp, chikutwish chad kukuswapel kumulej pakad kwidjidjek mutapu wiyovila. (Luka 16:10) Pakwez, yom ik ukutwisha kusal anch mukadivar wayilej antu akwau yom wamulejang kulam ujindj? Kangal waswakal kujip urund. Pakwez, lik bil kusuta chisu chikemp. Ni kangal walikidil kurumbok kwa antu akemp kukuziyish ni kukukangesh kuyichingejin akadivar ney awonsu. w22.09 4 par. 7-8

Mukurump umwing utazukinau anch Miqueas wiyova anch amusadina mu mutapu uyimp kud mukadivar umwing ukweta yisend mu dirijek dia Yehova. Pakwez, Miqueas wilama ni wasala usu wa kuyikel yovil yend. Walembila tupamp tuvud mulong wa kumwit Yehova chakwel amwinkish spiritu wend ni usu wa kujijaman. Wakimbijola kand mu mikand yetu yom yafanyina kumukwash. Disu dilejan tudioshinaku? Anch wiyovil anch akusadidin nayimp kud mukadivar ap nambaz, itudisha ni sal usu wa kuyikel yitongijok yiyimp ukutwisha kwikal nich. Ukutwishap kwijik yom yamushikijang muntu ku kusal ap kulond yom mu mutapu winou. Chawiy mulembila Yehova ni mwita akukwash kuman yom mud mutapu uyimenay muntu winou. Kusal mwamu kukutwish kukukwash kutong anch mbay ney mwin Kristu kasalangap mwamu kwa kwisotin ni kumulikishin. (Jnsw. 19:11) Vurik anch Yehova wij nawamp milong urishina nich, ni ukukwinkish usu uswirikedina mulong wa kujijaman.​—Mul. 5:8. w22.11 21 par. 5

Tond arund amukatina Yehova. Kutond kwey kwa arund kukutwish kwikal ni yibachikin pa kukul kwey kwa mu spiritu. (Jinsw. 13:20) Julien, udia katat mukurump wa chikumangen, ulondin anch: “Pinading nsand, nikalang ni arund awamp panipanang mu mudimu wa kulejan. Arund inay ading akwet mushiku, ni ankwasha kuman mutapu ukata mudimu wa kulejan kulet musangar. Najingunina kand anch nading nikat kwishalap urund uwamp mulong nading nikat kwimen kwam pa kutond arund a mivu yam. Chikwikal nchik anch wajingunin anch muntu kampand mu chikumangen kadiap murund muwamp? Paul wading wij anch antu amwing pakach pa in Kristu a mu chikumangen cha mu mivu chitot ya kusambish kadingap aswila mu spiritu, chawiy chamukasikeshay Timote kuyiyep palemp. (2 Tim. 2:20-22) Urund wetu ni Yehova ud wa usey nakash. Tufanyidinap kulikidil chakwel muntu kampand ajip urund twasala usu wa kukudish pamwing ni Tatukwetu wa mwiur. w22.08 5-6 par. 13-15

Chinyim ni antu akisining yiyul yitentamina, etu tukat kukudish rukat mulong wa jinjil ja Nzamb, kuwejinaku ni yijil yend yawonsu piur pa kutentam. Tukutwish kukasikesh rukat riner kusutin kufanakesh yibudikin yikatau kwikal nich antu amuziyidina Nzamb ni antu amubwambwidila. Tal milong yikakidinau antu ayinau mulong wa usup wau kusutin kudjibul yiyul ya manangu ya Yehova. Kupwa shinshikin mutapu uwapina nakash mwom wey mulong ukat kumuziyin Nzamb. (Kus. 32:8, 10) Yehova ukatin kupan manangu mend kud muntu win mwawonsu, pakwez kakatap kumushindin muntu kumitiy. Chikalap nchik mwamu, ukat kulejan yibudikin yikatau kwikal nich antu akwatininga mupak wa kulik kutesh manangu mend. (Jnsw. 1:29-32) Antu akata kukwat mupak wa kulik kumuziyin Yehova “akez kadia mabuj ma yaku yau.” Mu kusut kwa chisu, mikadil yau yikuyiletinap chom chiwamp ap chimwing, pakwez runeng, mar, ni disheshik dia chikupu. Ku mutambu ukwau, antu akata kutesh yiyul ya manangu ya Yehova ni kuyisadin ayikanin kal anch: “Ukwintesha ukushakam wakad kwakam, ndiy ukwikal zong, wakad wom wa kuyip.”​—Jnsw. 1:33. w22.10 21 par. 11-13

Kumwov Yehova wom kurumburikin kumulimish nakash ni kwipuk kusal chom chin chawonsu chikutwisha kumunenganesh. (Jnsw. 16:6) Chawiy tukata kudandamen kusal usu wa kushakam kukwatijan ni mbil ja Nzamb piur pa kuwap ni kuyip mud murumburilau mu Bibil. (2 Kor. 7:1) Tukwikal ni musangar anch twasal yom yikatinay Yehova ni twipuk kusal yom yikisinay. (Kus. 37:27; 97:10; Rom 12:9) Muntu kafanyidinap kwend kwimen kusu pa kwijik anch Yehova ukwet ulabu wa kutek mbil piur pa kuwap ni kuyip, pakwez ufanyidin kand kuziyin mbil ja Nzamb mu mwom wend. (Rom 12:2) Tukat kumekesh kusutin mwikadil wetu anch tukwet kamu kashinsh anch mwom uwamp wimedin pa kulimish mbil ja Yehova. (Jnsw. 12:28) Wawiy mutapu wiyovay David, chawiy chalonday piur pa Yehova anch: “Ey ukat kwinlej njil ya mwom. Nizwil nich musangar anch nid pamwing ni yeyey. Ey ukat kwisangaresh chikupu ni chikupu.”​—Kus. 16:11. w22.10 8 par. 9-10

Yesu walama chitongijok chisikena ni cha kwikepish piur pa amwinend. Kurutu avadika pa divu mud muntu, Yesu wasala yom yivud yiwamp nakash mu mudimu wend mulong wa Yehova. Kusutin Yesu, Nzamb “watanga yom yawonsu yidia mwiur ni yidia pansh.” (Kol. 1:16) Pa chisu chamubatishau, chimeken kamu anch Yesu wavurika yom yasalay padingay ni Tatukwend. (Mat. 3:16; Yoh. 17:5) Pakwez kuvurik yom mud yiney kwamubachikap Yesu kwikal mwin kwitutul. Chinyim ni chinech, kasalap chom ap chimwing mu mutapu wa kwimekesh anch wading wa piur kuyisutamu antu akwau. Wayileja in kwilejend anch, “kezap mulong wa [kumusadil], pakwez weza mulong wa kuyisadil antu akwau, ni kupan kand mwom wend mulong wa kuyikwol antu avud.” (Mat. 20:28) Walonda kand nich kwikepish anch kakutwishap kusal yom yidiokila ku rusot rend amwinend. Kwikepish mud ik kwamekeshay Yesu! Watushila chilakej chiwamp nakash tufanyidina kulondul. w22.05 24 par. 13

Kurutu kwa kulikishin, Yehova ukat kushinshikin anch muntu wasalang chitil wading wij anch yom yading yisadinay yading yiyimp ap bwat. Yesu wovikesha patok chitongijok chinech mu Luka 12:47, 48. Muntu wirijekina mulong wa kusal chom chiyimp ni wija nawamp anch chom chikimbinay kusal chid chiyimp ku mes ma Yehova, wasal kal chitil chijim nakash. Yehova ukutwish kukwat mupak wa kulik kumulikishin muntu wa mutapu winou. (Mar. 3:29; Yoh. 9:41) Pakwez ov,kuchid ruchingej anch Yehova ukutwish kumulikishin? Inge! Kurutu kwa kumulikishin muntu. Yehova ushinshikidining kand mulong wa kuman anch muntu wasalang chitil ukarumukin kamu chakin. Kukarumuk kurumburikin “kuswimp yitongijok, yaku, ap maku mayimp.” Chinech chirumburikin kand anch muntu unenganen ni wovil ushon nakash piur pa yom yiyimp yasalangay ni kwifish nich mulong wak kasalangap yom yiwamp. Muntu ukarumukina kakatap kwend kunenganan kusu mulong wa yom yiyimp yasalangay, pakwez ukat kunenganan kand piur pa mwikadil wend uyimp wa mu spiritu wamushikijang kusal yom yiyimp. w22.06 6-7 par. 15-17

Kusutin radio, televizion, ni tupend twa Internet twa kutumijadin jinsangu, akankuny netu akat kupalangesh makasu ap nsangu jiyimp piur pa akadivar akweta yisend mu dirijek dia Yehova. (Kus. 31:13) Akadivar amwing ashikedin kal kuyikas ni kuyiman mud ampopol. Yom mud yiney yayishikena in Kristu a mu mivu chitot ya kusambish chisu chamudimbenau Paul makasu ni kumukas. In Kristu amwing alika kumukwash kambuy Paul chisu chamukasau mu Rom. (2 Tim. 1:8, 15; 2:8, 9) Tongin mutapu wafanyinay kwiyov Paul. Wajijamena yikokujol yivud nakash ni yisu yimwing mwom wend wadinga mu ubaj mulong wa awiy. (Mid. 20:18-21; 2 Kor. 1:8) Etu tufanyidinap amboku kwikal mud in Kristu inay amulika Paul! Chawiy, tufanyidinap kushimok pa kuman anch Satan ukat kukwat mupak wa kuyirishikish akadivar akweta yisend. Chitongijok chend chid anch kurishikish kwinoku kuziyish kushinshaman kwau ni kutwovish etu wom. (1 Pita 5:8) Dandamen kuyikwash akadivar ney ni kushal nau piswimp nich kushinshaman.​—2 Tim. 1:16-18. w22.11 16-17 par. 8-11

Mpongarik wakarumuka wapampau kurutu Yesu afa wading pamwing ap mwin Yuda. In Yuda amwifukwilang Nzamb umwing, pakwez antu a michid yikwau itiyijang mudiau anzamb avud. (Kub. 20:2, 3; 1 Kor. 8:5, 6) Anch ampongarik inay kadingap in Yuda, afanyina pamwing ap kwipul anch, “Ov, kiuyovilap anzamb wom?” Chikwau kand, Yesu kamutumap kuya kud antu a michid yikwau pakwez kud “amikoku ashadikina, awiy kamu in Isarel.” (Mat. 15:24) Nzamb wayijingunina in Isarel anch Yesu wafanyina kuvumbuk. Mpongarik wakarumuka wading wij pamwing ap chom chinech, ni mazu mend mamekesha anch, wading ukwet kashinsh anch Yehova wafanyina kumuvumbul Yesu mulong wa kuyikel mud mwant wa Want wa Nzamb. Chimeken anch ikundj winou pamwing ap wading uchingejin anch Nzamb wafanyina kand kumuvumbul niyend. Mud mwin Yuda, mpongarik wakarumuka wading ufanyidin kwijik rusangu piur pa Adam ni Ev ni Paradis mwayitekau kud Yehova. Chawiy mpongarik wafanyina kwijik patok anch Paradis wisambinay Yesu wafanyina kwikal chir chiwamp nakash chikwikala panap pa divu.​—Dis. 2:15. w22.12 8-9 par. 2-3

Tukutwish kuwanyish mudimu wa kulejan ching kusutin ukwash wa spiritu wa Nzamb. Mulong wak? Mulong Satan uturishikishin ni ukimbin anch twimik mudimu wetu wa kulejan. (Kuj. 12:17) Antu avud atongin anch Satan ukwet usu nakash ni tukutwishap kumupandakan. Pakwez kusutin mudimu wetu wa kupan uman, tukat kumupandakan! (Kuj. 12:9-11) Mutapu ik? Pitukata kusal mudimu wa kulejan, tukat kumekesh anch twovilap wom wa kurishikish kwa Satan. Chisu chawonsu tukata kulejan, tukat kumuwin Satan. Tukutwish kulond anch tukwet usu kusutin spiritu utumbila ni anch tukwet kand dilau dia Yehova. (Mat. 5:10-12; 1 Pita 4:14) Spiritu wa Nzamb ukutwish kutwinkish usu wawonsu tukweta nich kuswir mulong wa kupandakan yikokujol yin yawonsu mu mudimu wa kulejan. (2 Kor. 4:7-9) Chad, yom ik tukutwisha kusal mulong wa kwikal nich kashinsh anch tudandamedin kutambul spiritu wa Nzamb? Tufanyidin kudandamen kulembil mulong wa kwit spiritu winou, ni kwikal nich kashinsh anch Yehova ukutesh malembil metu. w22.11 5 par. 10-11

Tukat kumekesh anch tuyikatin akadivar ni anambaz netu anch twasal usu wa kushakam nau mu chisambu. Tukat kusal usu wa kwimburij chilakej cha Yehova cha kulikishin. Anch Yehova witiyina kumupan Mwanend chakwel afa mulong wa yitil yetu, ov, tufanyidinap niyetu kuyilikishin akadivar ni anambaz netu anch aturumbukin? Tusotinap kwikal mud kashalapol muyimp wisambinay Yesu mu chishimu chend. Kashalapol winou amulikishina chikal chijim nakash kud mwant wend. Pakwez ndiy wakanganya kumulikishin mukwau wading ni kachikal kend ka usweral. (Mat. 18:23-35) Anch kud muntu wakad kwovijan nend nawamp mu chikumangen, umen nchik anch wikal wa kusambish kuya kumanijan nend chakwel uchirishany chisambu kurutu kwa Chivurikish? (Mat. 5:23, 24) Anch wasal mwamu, ukumekesh anch umukatin nakash Yehova ni Yesu. w23.01 29 par. 8-9

Mutapu uwamp wa kwijik yom yiswirikedinau akadivar nau anambaz ney ud wa kuyisejin piswimp ni kuyipul yipul nich nkeu. (Jnsw. 20:5) Ov, akwet yakudia yiwanyidina, mwon wa kwiyokish nich, ni yom yikwau yiswirikedinau? Ov, ad mu ubaj wa kushadish mudimu ap wa kuyopat mu chikumbu mulong aburedin nfalang ja kuchifutin. Ov, akwet kuswir kwa kuyikwash kwit ukwash wa guvernema anch chitwishikin? Yehova utwitin etu awonsu kuyikasikesh ni kuyikwash akwetu. (Gal. 6:10) Ap anch twasal kwetu yom yikemp mulong wa kumukwash muntu uyedina, chisal chinech cha rukat chikutwish kumukasikesh nakash. Mwan mukemp ukutwish kumufundin mukadivar tumazu pa ka dipaper ap kumutumin kachifatul mulong wa kumukasikesh nich. Nsand wapamina kal ukutwish kumulandin yom ku sok ap kusal yom yikwau kand. Antu akwau a mu chikumangen akutwish kuyisukin antu ayedina yakudia ni kuyitwadin kwol kwau. Atuman amwing ayifundidin amakurump mikand mulong wa kuyijikitish piur pa mudimu ukash wasadinau pa chirung cha chipupu. Chid chom chiwamp nakash anch kumutambu wetu twasal usu wa ‘kukasikeshijan mu ritiy muntu ni mukwau, ni kukwashijan kand’!​—1 Tes. 5:11. w22.12 22 par. 2; 23-24 par. 5-6

Asadus ading ij nawamp mabuku matan makusambish ma Mifund ya Hebereu, pakwez akanganya kujingunin uyakin wa usey udia mu mabuku minam mapepilau. Chilakej, shinshikin mutapu wakulay Yesu chisu chamwipulau kud Asadus piur pa divumbuk. Wayipula anch: “Ov, kand kal utanganyap mukand wafunday Moses? Mu rusangu ra chifukis chadinga ni kutem, Nzamb wamuleja anch: ‘Yam Nzamb wa Aburaham, Nzamb wa Isak, yam kand Nzamb wa Jakob.’” (Mar. 12:18, 26) Ap anch chid chakin anch Asadus ading atangin kal tupamp tuvud mukand winou, chipul chipulay Yesu chamekesha patok anch akanganya kujingunin uyakin wa usey nakash mu Mifund​—mafundish ma divumbuk. (Luka 20:38) Dilejan ik tukutwisha kwilejinaku? Chisu tutangina, tufanyidin kushinshikin mulong wa kuman yom tukutwisha kwilejin ku verse ap ku rusangu kanang ra Bibil. Tufanyidinap kwetu kwimen pa mafundish ma pa dishin, pakwez tufanyidin kand kushinshikin uyakin ukurikina ni mbil jijingamina. w23.02 11 par. 9-10

Atuman awonsu isambidinau mu mufund wa nlel arisha ni yikokujol yikash, pakwez ashala ashinshamena kudiay Yehova mu mwom yau yawonsu. (Heb. 11:36-40) Ov, kujijaman kwau ni midimu yau yikash yading kwau yakad usey? Bwat ap pakemp! Ap anch kamanap kuwanyin kwa uprofet wawonsu wa Nzamb chisu chadingau aom, adandamena kumuchingejin Yehova. Ni mulong ading nich kashinsh anch akwet dilau dia Yehova, ading nich ruchingej anch kushilamu kwawonsu kwa Nzamb kukuwanyin. (Heb. 11:4, 5) Chilakej chau chikutwish kukasikesh mupak wetu wa kudandamen kumuchingejin Yehova. Nlel tushich mu mangand mayila mu kupandikan kuyip nakash. (2 Tim. 3:13) Satan udandamedin kuyipak atushalapol a Nzamb. Piur pa yikokujol tukurisha nich kurutu oku, el tukwatany amboku mupak wa kumusadin nakash Yehova, ni kwikal nich kashinsh anch “tumuchingejin Nzamb mwom.”​—1 Tim. 4:10. w22.06 25 par. 17-18

Diyingishin dimwing pakach pa mayingishin matubachikina kusal usu wa kulam mujimbu uwamp did anch, ang tukwet mujimbu uwamp tukutwish kumusadin Yehova nakash. (Mar. 12:30) Chawiy tukat kwipuk kusal yom twija anch yikutwish kushesh mujimbu wetu. (Rom 12:1) Chakin, chikalap nchik usu tusadina, tukutwish kuyel. Pakwez tukatin kusal usu wetu win wawonsu mulong wa kumekesh anch tukwatin mwom nich usey, chipan chatwinkishay Tatukwetu wa mwiur. Mayej ni upal yikutwish kutukangesh kusal yom yivud twasalang kwinsambishin. Mud chibudikin, yikutwish kutwovish nayimp ni kutunenganesh. Pakwez tufanyidinap kuziy ap kudiul mujimbu wetu. Mulong wak? Mulong chikalap nchik upal ap mayej, tukutwish kudandamen kumushiman Yehova, mud mwasalay Mwant David. Chisangareshin nakash mud ik pa kwijik anch Nzamb wetu utukwatin nich usey ap anch tud antu akad kuwanyin! (Mat. 10:29-31) Ap anch twafa, ukuchingel nich impu nakash chisu cha kutuvumbul. (Job 14:14, 15) Patuchidia kal aom ap, tukatin kusal usu wetu win wawonsu mulong wa kulam nawamp mujimbu wetu ni kuchidij mwom. w23.02 20-21 par. 3-5

Ov, majin ma antu adia mu chisak chijim cha amikoku akwau makudandamen kwikal mu mukand wa mwom kupwa kwa kupand kwi njit ja Harmagedon? Mwaning. (Kuj. 7:14) Yesu walonda anch antu afanikeshinau ni amikoku akez “kandam mu mwom wa chikupu.” (Mat. 25:46) Pakwez antu akupanda ku Harmagedon kakutambulap kapamp kamwing mwom wa chikupu. Pa chisu cha Winyikel wa Mivu Kanan, Yesu “ukez kwikal kafung wau. Ndiy ukez kuyitwal ku misul ya mem ma mwom.” Antu akwitiya umutakel wa Kristu ni akushala ashinshamena kud Yehova awiy akufundau majin mau rawonsu mu mukand wa mwom. (Kuj. 7:16, 17) Pakwez antu afanakeshinau ni ampemb, akujiyishau kwi njit ja Harmagedon. Yesu walonda anch “akez kayitwal mulong wa kuyilej kadimu ka chikupu.” (Mat. 25:46) Kusutin spiritu utumbila, kambuy Paul walonda anch “kadimu kakez kayilejau kakez kikal kusheshik kwa chikupu.”​—2 Tes. 1:9; 2 Pita 2:9. w22.09 16 par. 7-8

Yitang ya Yehova yikutwish kand kukwash majuku kwipuwangej ni kusangar pamwing, ni chinech chikutwish kukasikesh uumwing pakach pau. Kusutin yitang yend, Yehova watwinkishin kal jindond jiwamp nakash mu tukutwisha kwipuwangejin. Majuku mavud makatining kusutish chisu pamwing mu masuku, ku mikandu, ap ku kawit. Mwi ngand yisu ya Nzamb, anvaj ni an akusanger yitang ya Yehova kusutamu katat. Pinipa, tukuyovap kand annam wom; niyau kakutwovap kand wom. (Isay 11:6-9) Tukusanger yitang ya Yehova chikupu ni chikupu. (Kus. 22:27) Pakwez en anvaj, kangal wachingelany anch ching chisu chinicha chashik chakwel lel chad usambishany kuyikwash anen kusanger yitang. Anch wasadinany yitang mulong wa kuyikwash anen kumwijik Yehova, akutwish kwiyov mud mwiyovay Mwant David walonda piur pa Yehova anch: “Kwikil kand midimu yidia mud yeyey.”​—Kus. 86:8. w23.03 25 par. 16-17