Ngond wa 10

Etu awonsu tukutwish kukwash chakwel yikumangan yetu yisut nawamp kusutin kuwang nich dizu dia piur ni kwakul yom twarijekang kal nawamp. Chiyikasikedining antu amwing kuwang ni kwakul ku yikumangen yetu. Ov, chid kand mwamu ku mutambu wey? Anch mwawiy, shinshikin yom yasalau antu akwau mulong wa kupandakan wom wau. Piur pa muminy, antu amwing atanin kal anch chikat kuyikwash anch awang nich musangar wawonsu. Chisu tuwangina miminy ya Want, tufanyidin chakusambish kushinshikin maswir metu ma kumushiman Yehova. Chawiy rijek ku chikumbu mutapu wa kuwang, mud mutapu ukata kand kurijek yikunku yikwau ya chikumangan ni pakish kushinshikin mutapu ukwatijadina mazu madia mu miminy ni yom ukwilejana ku yikumangan. Kupan yakul kukutwish kwikal chikokujol chikash nakash kud antu amwing.Yom ik yikutwisha kukukwash ey? Pakish kusal mwamu tupamp tuvud. Vurik anch chid chiwamp anch chakul chey chikal chiswimp, chiswapela kutesh, ni chovikeshina chitongijok cha pa dishin. Yehova ukwatining nich usey nakash mupak wetu wa kumushiman ku yikumangan. w22.04 7-8 par. 12-15

Mazu “mwin kwinkwash” makwet chitongijok cha muntu uyila mau mulong wa kumukwash muntu utoyina mulong wa kwit ukwash. Tong bil mud umumen Yehova ukat kuya mau mulong wa kumupandish muntu udia mu yakamish yikash. Ukutwish kwikal nich kashinsh anch Yehova ukwet kamu impu yikash ya kutukwash. Anch Yehova watukwash, tukutwish kujijamen yikokujol nich musangar. Yom ik yimwing yikatay kusal Yehova mulong wa kutukwash kujijamen yikokujol nich musangar? Mulong wa kwakul, el tushinshikinany chikunku cha buku wa Isay. Mulong wak? Mulong uprofet uvud wamupepilau Isay kufund uyitadin kand atushalapol a Nzamb nlel. Chikwau kand, Isay umurumburil Yehova mu mazu maswapela kutesh. Tal chilakej cha Isay shapitre wa 30. Mu shapitre winou, kusutin yilakej yitwinkishina chitongijok chikash mu manangu, Isay urumburil mutapu ukatay Yehova kuyikwash atushalapol end. Wafunda anch Yehova ukat kutukwash (1) kusutin kutesh ni kwakul ku malembil metu, (2) kusutin kutwinkish umutakel, ni (3) kusutin kutuyukish katat ni mu machuku ma kurutu. w22.11 8 par. 2-3

Mu uruu watumay Yesu ku yikumangen ya mu Simirin ni Filadelifiy, wayikasikesha in Kristu inay kulik kwov wom wa kuyizengol, mulong afanyina kuyifut mulong wa kushinshaman kwau. (Kuj. 3:10) Tufanyidin kutek mu manangu anch akutwish kutuzengol ni kwikal irijekina mulong wa kujijaman. (Mat. 24:9, 13; 2 Kor. 12:10) Buku wa kujingunik utulejin anch atushalapol a Nzamb afanyina kuyizengol pa “dichuku dia Nsalejetu,” charumburik anch chirung chitushicha nlel. (Kuj. 1:10) Kujingunik shapitre wa 12 ulejen anch kwalanka njit mwiur kapamp kamwing kupwa kwa Yesu kwikal Mwant wa Want wa Nzamb. Mikayel, udia Yesu Kristu kupwa kwa kuchirik mwiur, pamwing ni chisak chend cha amasalay, arisha ni Satan pamwing nau ayilembil end. (Kuj. 12:7, 8) Mud chibudikin, ayipandikana akankuny inay a Nzamb, ni ayidjibula pansh, chawiy aletisha mar nakash kud antu ading ashicha pa divu.​—Kuj. 12:9, 12. w22.05 5 par. 12-13

Chisu chawonsu, dirumburish dia Yehova diding diwamp ni ditentamina. Kakwetingap kasolikany ap pakemp. Dilikishin diend dimediningap kwau pa mutapu umekenay muntu ku mes, pa dipit dikwetay, pa usey ukwetay, ap pa ukaliweny wend. (1 Sam. 16:7; Jak. 2:1-4) Kwikil muntu ukutwisha kumukatul Yehova milamu. Kakatap kukwat mipak nich ujim ap katamuchim. (Kub. 34:7) Pakad kwidjidjek, Yehova ndiy Nkalansambu upandakena kuwap, mulong wij yom yawonsu piur petu, ni piur pa milong yetu. (Kuv. 32:4) Antu afunda Mifund ya Hebereu ajingunina anch dilikishin dia Yehova did dia piur nakash. Yisu yimwing, asadina dizu dia Hebereu disambidinau mu referans umwing anch “akat kudisadin mulong wa kumekesh ching kusu mutapu ukatay Nzamb kuyilikishin akayitil, ni kandikal adisadinangap mulong wa kumekesh mutapu wakad kuwanyin ukatau antu kulikishin.” Ching Yehova ndiy ukweta usu wa kumulikishin mukayitil rawonsu. w22.06 4 par. 10-11

Anch ulidin an pakad ikundj, ap ni ikundj wakad kwikal Kaman, ikal nich kashinsh anch chilakej chey cha kushinshaman chikat kuyikasikesh antu akunyingumukina. Chad mutapu ik ukusala anch waman anch chikalap nchik usu usadina, mwaney kitiyinap kwend? Vurik anch chitin chisu chilemp mulong wa kumufumb mwan. Anch wakun rubut, yisu yimwing ukutwish kwiyipul anch rubut riner rikupam kamu rikal mutond ni kubudish mabuj. Ap anch ukwetap usu wa kupamish mutond mud muukatina, pakwez ukudandamen kuwichil mem mulong wa kuukwash kupam. (Mar. 4:26-29) Mutapu wawiy umwing, mud maku, ukutwish kwiyipul yisu yimwing anch usu usadina uyikwashin kamu aney kumukat Yehova. Ukwetap cha kusal piur pa mipak yikwatinau aney. Pakwez anch wadandamen kusal yawonsu utwishina mulong wa kuyifumb, uyazuridin njil ya kukul mu spiritu. w22.04 19-20 par. 16-17

Padingay kashalapol ushinshamena wa Yehova, Salomon wading nich chitongijok chisikena piur pa amwinend. Padingay nsand, wijika nich kwikepish mimbu yend, ni wakimba umutakel wa Yehova. (1 Ant 3:7-9) Kwinsambishin kwa winyikel wend, Salomon wading wij kand nawamp ubaj wa kwikal mwin kwibaz. Cha ushon, mu kusut kwa chisu Salomon wakanganya amwinend kusadin chiyul chend. Chisu kanang mu winyikel wend, wikala mwin kwitutul, ni wasambisha kubwambwil kwi mbil ja Nzamb. Chilakej, chijil chimwing chading chilondin anch mwant mwin Hebereu kangal “wez wavudish amband end, chamwamu muchim wend ukez kupumbuk.” (Kuv. 17:17) Salomon wajipa chijil chinech, ni wata amband 700 ni wading kand ni amband a kuns 300! (1 Ant 11:1-3) Pamwing ap Salomon watonga anch yom yiney yafanyinap kwau kumuletin ubaj. Mu kusut kwa chisu, Salomon watana yibudikin yiyimp mulong wamubwambwila Yehova.​—1 Ant 11:9-13. w22.05 24 par. 12

Antu akwet mupak wa usey nakash uyitina kukwat nlel. Ov, akwikal ku mutambu wa Yehova Nzamb uwanyidina kuyikel mangand mawonsu, anch akwikal ku mutambu wa mukankuny nend muyimp nakash, Satan Djabul? Chimwitin muntu ni muntu kutond mutambu ukukwashay, kwikil ukushala cha pakach. Mupak wawonsu ukukwatau antu ukwikal ni chibachikin piur pa machuku mau ma kurutu. (Mat. 25:31-33, 46) Pa chisu cha ‘mar makash,’ akuyitek chijingidij mulong wa kumekesh anch akupand ap akusheshik. (Kuj. 7:14; 14:9-11; Ezek. 9:4, 6) Anch watondin kal kukwash ku winyikel wa Yehova, ijik anch wakwatin kal mupak wa manangu. Katat ukwet chisend cha kuyikwash antu akwau kukwat mupak uwamp. Yiyukish yiyichingedin antu akata kukwash winyikel wa Yehova nich kushinshaman. Chid chiwamp kushinshikin uyakin winou wa usey nakash. Kusal mwamu kukukasikesh mupak wetu wa kudandamen kumusadin Yehova. Chikwau kand, chikutukwash kusadin yom tukwileja mulong wa kuyikwash nich antu akwau kukwat mupak uwamp ni kulamat ku mupak winou. w22.05 15 par. 1-2

Tufanyidin kumutesh Yehova, pakwez akankuny netu bwat. Job wata matu kud Yehova chisu chading chilondinay. Nzamb watongijoka pamwing ni Job mu kumwipul anch: ‘Nij nawamp yom yawonsu yakushikedina. Ov, utongin anch nikutwishap kukubangin?’ Job wakula nich kwikepish ni wajikitisha nakash mulong wa kuwap kwa Yehova. Walond anch: “Nading ni kwov yeyey ching kusu ku matu, pakwez katat nakuman kal nich mes mam.” (Job 42:5) Chimeken anch chisu chalonday mazu minam, Job wading uchid mu maut mwading mushichay, mujimbu wend wading wizwil nich makwalong. Chikalap nchik mwamu, Yehova wamekesha rukat rend mulong wa Job, ni wamwinkisha kashinsh anch ukwet dilau diend. (Job 42:7, 8) Nlel kand, antu akutwish kutusaal ni kutusadin yom mud tukwetap kwetu usey. Akutwish kupakish kutupwishikish kalimish ap kupwishikish kalimish ka dirijek dietu ni Twilejin kusutin rusangu ra Job anch Yehova ukwet kashinsh anch tukushal ashinshamena kud ndiy chisu turishina ni yikokujol. w22.06 24 par. 15-16

Ap anch kukwikal kutoy kwa musangar mwiur chisu chikumusheshau Babilon Mujim, pakwez kukwikal kand chom chikwau chikuleta musangar nakash. (Kuj. 19:1-3) Kukwikal chinship cha usey nakash chilejenau mu buku wa Kujingunik—‘uruw wa mwan a mukoku.’ Chisak chawonsu cha antu 144 000 chikwikal mwiur kurutu kwa njit ja Harmagedon kusambish. Pakwez, chawiyap chisu chikusadika uruw wa Mwan a Mukoku. (Kuj. 21:1, 2) Uruw winou ukusadik kupwa kwa njit ja Harmagedon, ni kupwa kwa kuyishesh akankuny awonsu a Nzamb. (Kus. 45:3, 4, 13-17) Yom ik yikusadika pa chisu cha uruw wa Mwan a Mukoku? Chakin, mud mutapu ukata uruw kubombakesh mband ni ikundj pamwing, uruw winou wa chifanakesh ukumubombakesh Mwant, Yesu Kristu, pamwing ni chisak cha antu 144 000, adia “ngachik” wend. Chinship chinech cha usey chikusal guvernema musu ukuyikela pa divu mu mivu 1 000.—Kuj. 20:6. w22.05 17 par. 11-13

Yesu wasambela kulond anch pa chirung cha kwinsudiel, wafanyina kutond ‘kashalapol ushinshamena ni kubabal’ mulong wa kupan yakudia ya mu spiritu. (Mat. 24:45) Mwawiy kamu mutapu chidia nlel. Ntakel wetu wasadina kachisak kakemp ka amakundj azizidilau many mulong wa kuyinkish atushalapol a Nzamb ni antu asangaredina uyakin “yakudia [ya mu spiritu] pa chisu chiwanyidina.” Amakundj inay kakatap kuyikel pa ritiy ra antu akwau. (2 Kor. 1:24) Pakwez, ij anch Yesu Kristu ndiy “mwin kutakel ni kalam” wa antu end. (Isay 55:4) Kudiosh mu muvu wa 1919, kashalapol ushinshamena ukat kubudish mikand kushalijan yikata kuyikwash antu asangaredina kwilej kapamp kakusambish uyakin wa Dizu dia Nzamb. Mu muvu wa 1921, kashalapol wabudisha buku La Harpe de Dieu mulong wa kuyikwash antu asangaredina kwilej mafundish ma pa dishin ma Bibil. Mu kusut kwa chisu, wabudisha kand mikand yikwau. Buku ik wakukwasha ey kushiken kumwijik ni kumukat Tatukwey wa Mwiur? w22.07 10 par. 9-10

Yehova uding mwin kupan mujim nakash. Chikalap nchik yom ukumwinkisha, ndiy ukukuchirishin yipandakena kuvul. (Mar. 10:29, 30) Ukukwinkish mwom upandakena kuwap, wa musangar, ap mu mangand minam mayimp. Ni dined did kusu kwau disambishin. Ukutwish kudandamen kumusadin Tatukwey wa rukat chikupu. Rukat ridia pakach peyey ni Tatukwey rikudandamen kukul, ni ukushakam mud mushichingay ndiy, chikupu ni chikupu. Anch wipan kud Yehova ni akubatish, ukwikal ni dilau dia kumwinkish Tatukwey chom chimwing cha usey nakash. Chom chawonsu chiwamp ukweta, ni chisu chin chawonsu chiwamp wasutishinap kal, ndiy wakwinkishay. Ku mutambu wey, mulong wa kumujikitish, ukutwish kumwinkish Mwin diur ni divu chom chakadiay kal kwikal nich—kumusadin kwa kwikatin nich kushinshaman. (Job 1:8; 41:3; Jnsw. 27:11) Winou ud mutapu upandakena kuwap wa kusadin mwom wey! w23.03 6 par. 16-17

Anch muntu wabarik usand ap wangadim, ukutwish kwikal ni yovil yikash ya kulalijan, ni yisu yimwing akutwish kumubachik kud antu akwau kwiyandjik mu yisal ya masandj. Satan ukatin anch uziyin ku maku minam. Yom ik yikutwisha kukukwash kulam mwikadil wishitwila? (1 Tes. 4:3, 4) Mu malembil mey ma pakampwil, muleja Yehova yovil yey. Muleja kamu mutapu wiyovila, ni mwita chakwel akwinkish usu wa kujijaman. (Mat. 6:13) Vurik anch Yehova ukatin kukukwash, kadiap kukufish nich. (Kus. 103:13, 14) Kangal wapakish kupwish milong yey amwiney. Yirumburila anvajey milong urishina nich. Chakin kamu, chiswapelap kwisamb nau piur pa milong yey ya pakampwil,pakwez chid cha usey kusal mwamu. Kusutin kutang Bibil ni kutongijokin pa mbil jend, chikukuswapel kukwat mipak yimusangareshina Yehova. Ukujingunin anch uswirikedinap yijil pa mulong win wawonsu mulong wa kwijik rusot ra Yehova pa mulong kampand. w22.08 5 par. 10-12

Mwin Kristu udia ntakel wa dijuku ukwatining nich usey chisend chikwetay cha kuwanyish maswir ma ku mujimbu ma dijuku diend. Anch ud ntakel wa dijuku, Pamwing ap wiyakamisha anch chikutwish kukukasiken kuland yakudia mulong wa dijuku diey. Pamwing ap wova kand wom anch ang washadish mudimu wey, ukutwishap kand kutan ukwau. Ap pamwing ap widjidjeka anch ukutwishap kusal kuswimp kanang mu mudimu wey wa ku mujimbu, kukutwisha kwikal ni yibudikin kanang mu mwom wey. Satan watwishin kal kuyoz antu avud mu kusadin mitapu ya wom yiney. Satan ukat kusal usu wa kutubachik kutong anch Yehova kakatap kutubangin pa kampwil, ni anch kakutwishap kutukwash kuwanyish maswir ma dijuku dietu. Mud chibudikin, tukutwish kutong anch tufanyidin kusal yawonsu tukutwisha mulong wa kuchidij mudimu tukweta, ap anch kusal mwamu kukutwish kutushikij kudiul mbil jimwing ja Bibil. w22.06 15 par. 5-6

Twij nawamp anch Nzamb wetu ud mwin “ranaken ni mwin riy, wakad kwovang ujim swa, wizwila sens nich rukat ni uyakin.” (Kub. 34:6) Yehova ukatining kutentam. (Isay 61:8) Chimwovishining kusansan nakash pakuman tukat kuman mar, ni ukwet impu ni ukatin kupwish mar mawonsu pa chisu chatekinay kal. (Jer. 29:11) Chisangareshin mud ik! Chawiy chitushimokishinap pa kuman anch tumukatin Yehova nakash! Diyingishin ik dikwau tukweta dia kukat uyakin? Uyakin ukat kutuletin yiyukish yivud nakash. Shinshikin chilakej. Mu uyakin wa Bibil mwawiy mudia ruchingej retu ra machuku ma kurutu. Mud mutapu nkal ukatay kujamish waat, ruchingej retu rimedina pa Bibil rikutwish kutukwash kulik kuzazat chisu turishina ni yikokujol. Mu mufund wa nlel, kambuy Paul wading wisambidin piur pa ruchingej ra kuya mwiur rikwetau in Kristu azizidinau many. Pakwez mazu mend mayitadin kand in Kristu akweta ruchingej ra kushakam chikupu pa divu dikwikala paradis. (Yoh. 3:16) Chakin kamu, kwilej piur pa ruchingej ra mwom wa chikupu kwatuletina musangar nakash mu mwom. w22.08 14-15 par. 3-5

Rukat rawiy mufulandal wa ruchingej. Korint wakusambish shapitre wa 13 ujimbwil mikadil yidiokila ku rukat yikutwisha kutukwash kuyichingejin ap kuchirish ruchingej mudiau akadivar netu. (1 Kor. 13:4-8) Chilakej, verse wa 4 ulondin anch “rukat rikat kushimpish muchim, rudimukin kand.” Yehova ukat kutushimpishin muchim ap anch twasal chitil. Chawiy, chid chakin anch tufanyidin niyetu kuyishimpishin akadivar netu muchim ap anch alond ap asal chom chikutwisha kutujimesh ap kututap ku muchim. Verse wa 5 uwejidinaku anch: “[Rukat] kirukwovangap ujim swa. Rukat kirukumulaminangap muntu kuyip.” Tukatinap kudandamen kuvurik yom yiyimp yatusalau kud akadivar netu yatutapa ku muchim. Mulej 7:9 ulondin anch chifanyidinap kwikal “mwin kwov ujim swa.” Sal usu wa kuyiman akadivar ni anambaz ney mud muyimenau kud Yehova. Nzamb uyikatin ni kakatap kulam mu manangu yitil yau. Niyetu tufanyidinap kusal mwamu. (Kus. 130:3) Pa ndond pa kushinshikin pa kurumbok kwau, ufanyidin kusal usu wa kuman mikadil yiwamp yikwetau.​—Mat. 7:1-5. w22.09 3-4 par. 6-7

Buku wa Daniel ulejen yinship ya musangar yikusadika pa chirung cha kwinsudiel. Chilakej, Daniel 12:1 ulejen anch Mikayel, udia Yesu Kristu, ndiy “ukata kuchidij [antu a Nzamb].” Chikunku cha uprofet winou chasambisha kuwanyin mu muvu wa 1914, chisu chamutondau Yesu kwikal Mwant wa Want wa Nzamb mwiur. Pakwez, Daniel amuleja kand anch Yesu ‘ukwiman’ pa “chisu cha mar . . . mapandakena mar ma yisu yawonsu kudiokal ku disambishil dia mangand.” “Chisu cha mar” chinech chawiy chijimbwilau mu Mateu 24:21 anch ‘mar makash.’ Yesu ukuyipandish atushalapol a Nzamb kwinsudiel kwa mar makash pa chisu cha Harmagedon. Buku wa Kujingunik uyimekeshin antu inay mud ‘chisak chijim chidiokila mu mar makash mapandakena.’​—Kuj. 7:9, 14. w22.09 21 par. 4-5

Majin mafundinau kal mu mukand wa mwom akutwish kand kumakusul ap kumadioshamu, mud Yehova ukat kufund bil dijin ni penzil. (Kuj. 3:5) Tufanyidin kwikal nich kashinsh anch majin metu makushal mu mukand djat ni pa chisu chikumafundau chikupu, mud mufundiningau nich bik. Chisak chimwing cha antu akweta majin mu mukand wa mwom chid cha antu atondinau kal mulong wa kuyikel nend Yesu mwiur. Kukwatijan ni mazu ma Paul mayilejay antu “asala [nend] mudimu” mu Filip, majin ma antu amwing azizilau many, atazukau kuyikel pamwing ni Yesu, ading amafundin kal mu mukand wa mwom. (Fil. 4:3) Pakwez, mulong wa kulam majin mau mu mukand winou wa mwom, afanyina kushal ashinshamena. Chawiy, chisu chikuyitekau chijingidij cha nsudien, chikal kurutu kwa kufa ap kurutu mar makash masambish, majin mau makwikal amafundin kal chikupu mu mukand wa mwom.​—Kuj. 7:3. w22.09 14 par. 3; 15 par. 5-6

Ov, chom chinech chakushikenap kal? Muntu umwing ukat kwisuk yom ukatining nakash. Pakwez mulong pamwing ap ukwetap chisu chivud, ap ukwatiken nakash ni midimu yikwau, wasambish kuminy yom ya njuwjuw pakad kuyichakuny nawamp. Kupwa kwa kupwish kudia, wajingunin anch wadia kal mau mau nakash, ni watong anch wading ufanyidin kudia pakemp pakemp mulong wa kusanger yakudia yiney. Chikutwish kwikal mutapu umwing ni chisu utangina Bibil. Yisu yimwing tukutwish kumutang mau mau, ni kulik kusanger kamu yom tutangina. Ishila chisu cha kusanger Dizu dia Nzamb; sal mud umen yom mutapu uyisadikina, ni uteshin mazu ma antu alondina, ni tongijokin pa yom utangina. Kusal mwamu kukukuletin kamu musangar wakin. Yesu wamutonda ‘kashalapol ushinshamena ni kubabal’ mulong wa kutwinkish yakudia ya mu spiritu pa chisu chiwanyidina, ni utuwanyishidin nawamp maswir minam. (Mat. 24:45) Yakudia yawonsu ya mu spiritu yikatay kubudish kashalapol yimedin pa Dizu dia Nzamb.​—1 Tes. 2:13. w22.10 7-8 par. 6-8

Bibil wasambela kulejan anch mu machuku ma kwisudiel, kukwikal in kuswing avud ap in kuyisip akwau. (2 Pita 3:3, 4) akat kusal mwamu mulong akatining “kwisangarish ayinau nich maku mau mayimp.” (Jud 7, 17, 18) Mutapu ik tukutwisha kwilam chakwel kangal twayimburij in kuswing? Mutapu umwing wa kusal mwamu ud wa kwipuk arund akweta chaku cha kuyilond akwau nayimp. (Kus. 1:1) Chinech chirumburikin anch tufanyidinap kutesh ap kutang chom chin chawonsu cha in kupumbok. Twij anch ang tubabelap, tukutwish kusambish kwikal ni chaku cha kulond yom yiyimp, ni kusambish kwidjidjek piur pa Yehova ni umutakel tukata kutambul mu dirijek diend. Mulong wa kwipuk kuwil mu mupit winou, tufanyidin kwiyipul anch: ‘Ov, nikweting chaku cha kulond yom yiyimp anch twatambul umutakel usu ap anch kwikal kurumburil kusu? Ov, nikat kusal usu wa kukimbijol kurumbok kwa antu atakedila?’ Anch twikal aswakela kuswimp yaku yiney yiyimp, Yehova ukutusanger nakash.​—Jnsw. 3:34, 35. w22.10 20 par. 9-10

Spiritu wa Nzamb wamukasikesha Ezekiel kuwanyish chisend chamwinkishau—cha kulejan kud antu ading ‘akweta mutu ukash ni achinchikina michim’ ading amunyingumukina. Yehova wamuleja Ezekiel anch: “Katat niyam nakwikadish kal ey mwin kwikang ni kuchinchik mudi awiy. Nikukukasikesh ey mutu mudi diyal dikasikena kupandakan diyal dia kasu. Kangal wayov in kubwambul inay wom.” (Ezek. 3:8, 9) Chading mud Yehova wading umulejin anch: ‘Kangal kuchinchik michim kwa antu kwakuziyish. Nikukukasikesh.’Kusambish kamu pinipa, spiritu wa Nzamb wamukwasha Ezekiel mu mudimu wend wawonsu wa kulejan. Ezekiel wafunda anch: “Ukash wa [Yehova] wanwila am nich usu nakash.” Chamwita muprofet Ezekiel rubing rumwing mulong wa kwilej chikurikina ni kwov kurumburik kwa uruu wading ufanyidinay kulejan. (Ezek. 3:14, 15) Kupwa Yehova wamuleja kuya mwi nkurubuk mwafanyina ‘spiritu wa Nzamb kumwandam.’ (Ezek. 3:23, 24) Ezekiel wading chad wirijekina mulong wa kusal mudimu wa kulejan. w22.11 4-5 par. 8-9

Muprofet Abakuk warisha ni yikokujol yikash. Chisu chimwing, washikena kwidjidjek anch Yehova wading kamu ukat kumubangin. Chawiy, wamuleja Yehova yovil yend mu malembil. Yehova wakula ku malembil madiokila ku muchim ma kashalapol wend ushinshamena. (Aba. 2:2, 3) Kupwa kwa kutongijokin nakash pa mutapu Yehova wayipandishay antu end, Abakuk wachirisha musangar wend. Wikala nich kashinsh anch Yehova umubangidin ni anch ukumukwash kujijamen chikokujol chin chawonsu. (Aba. 3:17-19.) Dilejan ik tudioshinaku? Anch warish ni yakamish yikash, mulembila Yehova ni muleja mutapu wiyovila. Kupwa muchingejina mulong wa kukukwash. Anch wasal mwamu, ukutwish kwikal nich kashinsh anch Yehova ukukwinkish usu uswirikedina mulong wa kujijaman. Ni anch waman mutapu ukukwashinay, ritiy rey mudiay ndiy rikukasikan. Anch walam yaku yey ya mu spiritu, niyey ukutwishap kwitiyij anch yikokujol yikash ap kwidjidjek kukwauril ni Yehova.​—1 Tim. 6:6-8. w22.11 15 par. 6-7

Yesu ni ampongarik aad apampinau ku jimbet jend kafap kapamp kamwing, pakwez amana bil mar nakash kurutu kwa kufa. (Luka 23:32, 33) Awonsu aad amusipa Yesu. (Mat. 27:44; Mar. 15:32) Pakwez umwing waswimpa yitongijok yend. Walonda anch: “winvurikang am piukwandama mu want wey.” Yesu wamwakula mazu madia mu mufund wa nlel. (Luka 23:39-42) Mazu mamulejau mpongarik kud Yesu mafanyidin kutubachik kutongijokin piur pa mutapu ukwikala mwom mu Paradis. Nlel, tukutwish kwilej yom yimwing piur pa Paradis kusutin winyikel wa chisambu wa Mwant Salomon. Ni tukutwish kuchingejin anch Yesu, udia mujim kumusutamu Salomon, ukusal pamwing ni antu akuyikela nend pamwing mulong wa kulet mashakamin mapandakena kuwap pa divu. (Mat. 12:42) Chawiy chovaken patok anch “amikoku akwau” afanyidin kusal usu wa kushinshikin piur pa yom yifanyidinau kusal mulong wa kwikal ni dilau dia kushakam chikupu mu Paradis.​—Yoh. 10:16. w22.12 8 par. 1; 9 par. 4

Isay utwinkishin kashinsh anch Yehova ukututesh kamu pitumudididina, ni ukwakul mau malembil metu. Isay wafunda kand anch: ‘Anch wamulembil, ndiy ukukukwash [pakad kulab].’ Mazu minam makasikeshina matuvurishin anch Tatukwetu ukatin kamu—inge, ukwet impu—ya kuyikwash awonsu akata kukimb ukwash kud ndiy. Kwijik uyakin winou kukutwish kutukwash kujijaman nich musangar. Yehova ukat kutesh malembil ma muntu ni muntu pakach petu. Mulong wak tukutwisha kulond mwamu? Mu chikunku cha kusambish cha Isay shapitre wa 30, Yehova uyilejin antu end mu uvud mud chisak. Pakwez uruu udia mu verse wa 19 aulejen kud muntu ni muntu panrend. Isay wafunda anch: ‘Kiukez kadilap kand’; Ukez ‘kakwanaken ey’; ‘ukukukwash ey.’ Mulong ud Tatukwetu wa rukat, Yehova ukat kumubangin muntu ni muntu panrend ni kutesh malembil ma muntu ni muntu pakach petu.​—Kus. 116:1; Isay 57:15. w22.11 9 par. 5-6

Kulejan ni kufundish chikalap nchik rupompat kukat kutuletin chisambu ni musangar. Chisu chayikangeshau atwimbuy kulejan kud antakel in Yuda mu mivu chitot ya kusambish, amakundj inay ashinshamena atonda kumuziyin Nzamb. Adandamena kulejan, ni mudimu winou wayiletina musangar nakash. (Mid. 5:27-29, 41, 42) Chakin kamu, anch mudimu wetu aukangesh, chitwitin kubabal chisu tulejena. Pakwez anch twasal usu wetu wawonsu, tukwikal ni chisambu chidiokila ku kumusangaresh Yehova ni ku kulejan uruu wa dipandish. Ikal ni kashinsh anch ap anch yirung yikash yatushiken, tukutwish kwikal ni chisambu. Mu yirung mud yiney, tufanyidin kuvurik anch chisambu tuswirikedina chid chisambu chidiokila kud Nzamb, chisambu chipaniningay ching kusu Yehova. Muchingejina ndiy chisu urishina ni mayej makash, yinship yikash, ap kuzengol. Shal piswimp ni dirijek diend. Shinshikin mes mey pa yiyukish yipandakena kuwamp yikuchingedina kurutu oku. Anch wasal mwamu, “Nzamb ukata kutwinkish chisambu ukwikal ni [yey].”​—Fil. 4:9. w22.12 21 par. 17-18

Chitwitin kusal usu nakash mulong wa kusal mwamu. Tufanyidin kusal usu wa kudjubul mikadil yiyimp mud ujim, kusul ku muchim, ni kulam rukuny. (Efes 4:31, 32) Mulong wak chikutwish kwikal chikokujol pa kusal mwamu? Mulong mikadil yimwing yiyimp yikunin kal mu michim yetu. Chilakej, Bibil ulondin anch kud antu amwing ading ‘in ujim’ ni ‘antu akata kujiman swa.’ (Jnsw. 29:22) Pakwel anch muntu atwish kuyikel mikadil yiney yiyimp yikunina kal mu muchim wend, chikumwit kudandamen kusal usu ap kupwa kwa kumubatish. (Rom 7:21-23) Mulembila Yehova piur pa mikadil yikukasikedina kuyilik, ni kwikal nich kashinsh anch ukukutesh ni kukukwash. (1 Yoh. 5:14, 15) Ap anch Yehova kakudioshap mikadil yiyimp mu chilay, ukutwish kukwinkish usu chakwel kangal wachirikin mikadil yiney. (1 Pita 5:10) Chawiy sal kukwatijan ni malembil mey kusutil kwipuk yom yikutwisha kusal anch uchirikin wuntu ukur. Ni kangal wakudish yovil yiyimp mu manangu mey.​—Fil. 4:8; Kol. 3:2. w23.01 10 par. 7, 9-10

Mutapu umwing tukata kumekesh rukat ud kusutin kwipan nich mushiku mu mudimu wa kulejan. Tukat kwisamb ni muntu mwawonsu tukata kutan pakad katond, chikalap nchik ulombu wa chikit chend, muchid wend, ikala kazwendj ap mpich, wilejina ap bwat. Mwamu tukat kusal kukwatijan ni rusot ra Yehova usotina anch “antu awonsu apanda ni kwijik uyakin.” (1 Tim. 2:4) Tukat kumekesh kand anch tumukatin Nzamb ni Kristu kusutin kuyikat akadivar ni anambaz netu. Tukat kuyibangin nakash ni kuyikwash mu yisu ya mar. Tukat kuyongoj anch afish akatish nau, tukat kuya kuyital payedinau, ni tukat kusal usu wa kuyikasikesh paziyinau. (2 Kor. 1:3-7; 1 Tes. 5:11, 14) Tukat kudandamen kuyilembil, mulong twij anch “kulembil kwa muntu utentamina kukwet ukash wa kusal chom.”​—Jak. 5:16. w23.01 28-29 par. 7-8

Mud mutapu mwin kusal mudimu wa kutung mukatay kuwapish ukaliweny wend mu kusut kwa chisu, niyetu tukutwish kukudish ukaliweny wa kutungijan ap kukasikeshijan umwing ni mukwau. Tukutwish kuyikwash akwetu kwikal ni usu wa kujijamen yikokujol kusutin kwisamb nau yilakej ya antu ajijamana pasak. (Heb. 11:32-35; 12:1) Tukutwish kukasikesh chisambu kusutin kujimbul mikadil yiwamp tumena kud antu akwau, kulam chisambu anch kwikal milong yikimbina kuchipwish, ni kusal usu wa kuchichirish anch kwikal kupwitamijan. (Efes 4:3) Ni tukutwish kudandamen kukasikesh ritiy ra akadivar ni anambaz netu kusutin kwisamb nau uyakin wa usey udia mu Bibil, kuyikwash ku mujimbu, ni kumukwash muntu mwawonsu ukutwisha kuziy mu ritiy. Tukutwish niyetu kwov musangar nakash anch twipan mu kukwash mudimu wa kutung wa mu spiritu mu chikumangen, charumburik anch kuyikasikesh ambay netu mu ritiy. Chinyim ni kutung yikumbu yikutwisha kuya kuyip pakemp pakemp, yibudikin ya mudimu wetu yikutwish kushal chikupu! w22.08 22 par. 6; 25 par. 17-18

Yesu walejana mwikadil wa usey nakash tufanyidina kwikal nich anch tukimbin kwov kurumburik kwa yom tutangina mu Dizu dia Nzamb—ukaliweny wa kujingunin yom. (Mat. 24:15, NWT) Ukaliweny wa kujingunin yom chom ik? Ud ukaliweny wakuman mutapu yitongijok yikwatijadina, ap mutapu uyishalijadina ni kujingunin chitongijok chijingamina. Chikwau kand, Yesu walejana anch tukwet kuswir kwa ukaliweny winou mulong wa kujingunin yinship yiwanyishina uprofet wa Bibil. Tukwet kand kuswir kwa mwikadil winou, mulong wa kutaninamu nakash mu yom yawonsu tutangina mu Bibil. Yehova ukat kuyinkishang atushalapol end ukaliweny wa kujingunin. Chawiy mulembila, ni mwita chakwel akukwash kukudish mwikadil winou. Mutapu ik ukutwisha kusal kukwatijan ni malembil mey? Shinshikin nawamp yom utangina, ni tal mutapu yikwatijadina ni yom wija kal. Sal wusu wa kujingunin kurumburik kwa Mifund ya Bibil ni kuman mutapu ukutwisha kuyisadin mu mwom wey. (Heb. 5:14) Anch watang nich ukaliweny wa kujingunin, ukusambish kutesh nawamp Mifund. w23.02 10 par. 7-8

Tong bil mud anch muruney wakwinkish chikumbu. Chikumbu chinech chilayamijadinap kamu mud muchading pachitungau, ni chidjil. Chikalap nchik tumaulim twinetu, anch wakimb kuchilandish, akuchiland ku mamiliyon ma adolar. Chakin kamu, ukuchikwat chikumbu chinech nich usey nakash ni ukuchichidij. Chilik chimwing, Yehova watwinkishin kal chipan cha usey, mwom. Yehova wamekesha anch ukwatin mwom wetu nich usey nakash kusutil kumupan Mwanend mud difut mulong wetwetu. (Yoh. 3:16) Yehova ndiy Musul wa mwom. (Kus. 36:9, NWT) Kambuy Paul niyend wading witiyijin uyakin winou, walonda anch: “Ku ukash wend tukwet mwom, tukat kwend, tudiaku.” (Mid. 17:25, 28) Chawiy tukutwish kulond anch mwom wetu chid chipan cha Nzamb. Ku rukat rend ukat kutwinkish yom yawonsu tuswirikedina mulong wa kudandamen kwikal mwom. (Mid. 14:15-17) Pakwez Yehova kakatap kuchidij mwom wetu mu chilay. Ukatin anch twikasikesh kuchidij mijimbu yetu ni kudandamen kumusadin.​—2 Kor. 7:1. w23.02 20 par. 1-2

Tumujikitishin nakash Yehova mulong wa Bibil! Kusutin buku winou, ukat kutwinkish yiyul yikutwisha kutukwash kurish ni milong yetu. Ukat kutwinkish kand ruchingej ruwamp nakash mulong wa machuku ma kurutu. Pakwez cha usey nakash, Yehova ukat kusadinang Bibil mulong wa kutulej yom yivud piur pa wuntu wend. Kutongijokin pa mikadil yend yipandikena kuwap kukat kupukun nakash michim yetu ni kutubachik kumusejin Nzamb piswimp kusutin kuta nend urund wa piswimp nakash. (Kus. 25:14) Yehova ukatin anch antu amwijik. pasak, wiyijikisha kusutin yilat, yishimushimu, ap kand kusutin angel. (Kuch. 12:6; Mid. 10:3, 4) Pakwez twafanyinap kutwish kwilej yilat yiney, yishimushimu ni uruu walejanau angel anch kayifundap. Kwawiy kwayilejay Yehova amakundj amwing ‘kufund mu mukand’ wend yom yading yikatinay anch twijik. Mulong ‘njil ya [Nzamb] yiwapil zwang,’ tukutwish kwikal nich kashinsh anch mulad winou usadidinay mulong wa kwambamb netu ud uwamp nakash ni wa ukwash.​—Kus. 18:31. w23.02 2 par. 1-2

Itekina mipak ya usey. Itekina mipak yikukukasikesha ni kukukwash kuya kurutu. (Efes 3:16) Chilakej, ukutwish kukwat mupak wa kwikal ni chaku cha kusal dilejan dia pakampwil ni kutang Bibil. (Kus. 1:2, 3) Ap ukutwish kuman anch chikwitin kusambish kulembil nakash ni kuwapish mutapu wey wa kulembil. Pamwing ap chikwitin kushinshikin nawamp pa mutapu wey wa kwipuwangej ni wa kusadin chisu chey. (Efes 5:15, 16) Kuyikwash antu akwau kukukukwash kwikal mwin Kristu ukudila mu spiritu. Chilakej, ukutwish kwitekin mupak wa kuyikwash amapal ni ayilim adia mu chikumangen chen. Pamwing ap ukutwish kuyikwash kusutin kuya kuyilandin yom ap kuyilej mutapu wa kusadin nawamp yamu ya elektronik. Ukutwish kand kuyimekeshin antu adia pol pa chikumangen rukat kusutin kuyirumburil rusangu ruwamp wa Want. (Mat. 9:36, 37) Anch chitwishikin, itekina mupak wa kwipan mu mudimu wa chisu chawonsu. w22.08 6 par. 16-17