Ngond wa 12

Ov, Yehova ukwet dikand da kuyivumbul afu? Mwaning! Ud “Mwin Dikand Diawonsu.” (Kuj. 1:8) Chawiy mulong ud mwin dikand diawonsu, ukutwish kumupandakan mukankuny win mwawonsu, ap rufu. (1 Kor. 15:26) Diyingishin dikwau ditwinkishina kashinsh anch Nzamb ukuyivumbul antu afila kal did anch ndiy kakuvuramenangap. Umwij katumbu ni katumbu pa dijin diend. (Isay 40:26) Chikwau kand, uyivurikin antu awonsu afila kal. (Job 14:13; Luka 20:38) Chikutwish kumuswapel kuvurik kachom ni kachom piur pa antu akuvumbulay, kuwejaku yifu ni yisalijok yau, yom yasalau mu mwom ni ukaliweny wau wa kuvurik yom. Chakin kamu, tukutwish kuchingejin mu kushilamu kwa Yehova piur pa divumbuk da machuku ma kurutu, mulong twij anch ukwet impu ni dikand da kuwanyish kushilamu kwinoku. Shinshikin kand diyingishin dikwau ditubachikina kuchingejin mu kushilamu kwa Nzamb piur pa divumbuk. Pasak, Yehova wamwinkisha Yesu ni atushalapol end akwau ashinshamena usu wa kuvumbul afu. w23.04 9-10 par. 7-9

Anch twarumburil yom mu mutapu uwamp nich kashinsh kawonsu, kadiap muntu mwawonsu ukwitiya yom tukulonda. Chakin kamu, anch muntu ukimbin kwend kututadikish ap kulond nayimp piur pa yitiyij yetu, chidiap kamu cha usey kudandamen nich mambamb. (Jnsw. 26:4) Pakwez chimeken anch antu avud kakusalangap mwamu; amwing—pamwing ap kand avud—akutwish kusanger kututesh. Chakin kamu, chid cha usey nakash kwikal muntu witudishina. Mulembila Yehova chakwel akwinkisha usu uswirikedina mulong wa kushal witudishina chisu wakwila ku yipul yikusarumwinau nich ap yiletishina ntad ja chamwamu. Vurik anch, mwikadil wey wa kwitudish ukutwish kukangesh ntad ja chamwamu. Ni kwakul kwey kwa kwitudish ni kwa kalimish kukutwish kuyikwash antu akwau kuswimp yitongijok yau piur petu ni pa uyakin udia mu Bibil. “Machuku mawonsu ikalany awanyidina kumwakul muntu mwawonsu ukukwipulany[a] kurumburil mulong wa ruchingej riukwetany[a] mu michim yen.” (1 Pita 3:15) Inge, El kwitudish kwikal usu wey! w23.09 19 par. 18-19

Shinshikin mitapu yinying tukutwisha kumekesh kushimpish muchim. Chakusambish, muntu mwin kushimpish muchim kakatap kujiman swa. Ukat kusal usu wa kwikuchik ni kulik kufundakesh anch amusarumun. (Kub. 34:6) Cha kaad, muntu mwin kushimpish muchim ukat kuchingel pakad kuzazat. Anch yisu yimwing yom yalab nakash kusutamu mutwada tuchingejina, antu amwing akat kusal usu wa kulik kuzazat ap kujiman. (Mat. 18:26, 27) Cha kasatu, muntu mwin kushimpish muchim kakatap kwipupwil yom. Pakwez anch muntu ushimpishina muchim ukwet chom cha usey cha kusal, kakatap kwipupwil kuchisambish, ap kuchipwish. Pa ndond pa kusal mwamu, ukat kwitekin chisu cha kutenchik nawamp yom yikusalay. Mwamu ukat kwitekin chisu chiwanyidina mulong wa kusal yom nawamp. Cha kanying, muntu mwin kushimpish muchim ukat kujijamen yikokujol pakad kwinan. Muntu mwin kushimpish muchim ukat kusal usu wa kudandamen kujijaman ni kulam musangar wend mu mudimu wa Yehova. (Kol. 1:11) Mulong tud in Kristu, tufanyidin kushimpish muchim mu mitapu yiney yawonsu. w23.08 20-21 par. 3-6

Diyingishin dia usey ditubachikina kuchidij muchim wetu wa chifanakesh did anch Yehova ukat kuushinshikinang. Chinech chirumburikin anch ukat kuman yom yakadiau antu akwau kuman ni wij wuntu wetu wa mukach. Ukutukat anch twadandamen kutongijokin pa yiyul yend yiletina mwom. (Yoh. 4:14) Mwamu tukwichidij ku kwijond ni makasu ma Satan ni ma antu ayimp. (1 Yoh. 5:18, 19) Pitudandamedina kumusejin Yehova piswimp, rukat ni kalimish ketu mulong wendendiy yikupam. Mulong tusotinap kumunenganesh Tatukwetu, tukusal usu wa kukis chitongijok chawonsu chikutwisha kutushikij ku kusal chitil. Marta, nambaz wa mu Krowasi wapakau mulong wa kusal masandj wafunda anch: “Chankasikena kutong nawamp ni kwipuk kusangaresh mu kachisu kakemp maku mam ma chitil. Pakwez wom wa Yehova wanchidija.” Mutapu ik? Marta ulondin anch watongijokina pa yibudikin yafanyina kudiokal ku mupak uyimp. Niyetu tukutwish kusal mwamu. w23.06 20-21 par. 3-4

Yesu wading wij anch chitongijok cha Yehova chid cha kutumbish dijin dend ni kudidosh masaal mawonsu. Chawiy chom chayilejay Nsalejetu in kwilej end kulembil anch: “Tatukwetu uda mwiur, dijin dey aditumbish.” (Mat. 6:9) Yesu wijika anch yitang yawonsu yading yirishin ni mulong winou. Kwikil chitang ap chimwing chikweta manangu chikutwisha kutumbish dijin da Yehova mud Yesu. Pakwez pamukwatau Yesu, chitil ik chamukasinau kud akankuny nend? Amwela anch wasaalana! Yesu wading wij anch kusaadikish dijin ditumbila da Tatukwend chading chitil chijim nakash. Amufunda ni amufisha nich anch ud mpopol. Minam makutwish kwikal mayingishin masala anch Yesu ‘anenganana nakash,’ asaa akemp kurutu kwa kumukwat.​—Luka 22:41-44. w24.02 11 par. 11

Mu kubambil kwetu kwa mwom, tufanyidin kumukat Yehova ni Yesu kusutamu mutapu tuyikatina anamakwetu. (Mat. 10:37) Pakwez chinech chirumburikinap anch tufanyidin kudiul yisend yetu ya mu dijuku, mud ukwova anch yitukangeshin kumusangaresh Nzamb ni Kristu. Chinyim ni chinech, pakwel anch Nzamb ni Kristu atwitiy, tufanyidin kuwanyish chisend chetu cha mu dijuku. (1 Tim. 5:4, 8) Anch twasal mwamu, tukwikal ni musangar. Mulong Yehova wij anch majuku makwikal ni musangar anch ikundj ni mband akatijan ni kulimishijan, anch anvaj ayikat anau ni kuyifumb, ni anch an ayiziyin anvajau. (Efes 5:33; 6:1, 4) Chikalap nchik chisend ukweta mu dijuku, chingejin mu manangu madiokila mu Bibil pa ndond pa kuchingejin kwau pa yovil yey, yishankur yen, ap antu afila mu kan anch ad in kuyulan awamp. Sadin nawamp mikand yetu yimedina pa Bibil. Mu mikand yiney mud yiyul ya ukwash piur pa mutapu wa kusadin mbil ja Bibil. w23.08 28 par. 6-7

Amband in Kristu afanyidin kukudish ukaliweny ukutwisha kuyikwash. Ukaliweny umwing ukutwishay changadim kwilej ku wanikanch ukutwish kumukwash mu mwom. Chilakej, kwilej kufund ni kutang nawamp. Mu jindond jimwing, kutang ni kufund akat kuman mud kukwetap kwau usey kud muntu mband. Pakwez, yid yom ya usey nakash kud mwin Kristu mwawonsu. (1 Tim. 4:13) Chawiy kangal kulik chom ap chimwing chikukangesh kwijik kutang ni kufund nawamp. Yikukukwash nchik? Ukaliweny winou ukukukwash kuman mudimu. Ukwikal mwin kwilej ni mulej muwamp wa Dizu da Nzamb. Kusutamu yom yiney yawonsu, ukwikal piswimp ni Yehova piutangina Dizu dend ni kuditongijokin.​—1 Tim. 4:15. w23.12 20 par. 10-11

Mwita Yehova ukwash mulong wa kurish ni choziu. Mulong tud antu akad kuwanyin, chitwitin kusal usu nakash mulong wa kurish ni choziu cha kusal yom yidia yiyimp. Satan ukat kusal usu chakwel chitukasiken nakash kurish ni choziu mud chinech. Mutapu umwing ukatay kupakish kuyipish manangu metu ud kusutin kwipuwangej kwijondila. Kwipuwangej mud kwinoku kukutwish kukun yitongijok yijondila mu manangu metu—yitongijok yikutwisha kutwijondish ku mes ma Yehova ni kutushikij kusal chitil chikash. (Mar. 7:21-23; Jak. 1:14, 15) Tukwet kuswir kwa ukwash wa Yehova mulong wa kupandakan choziu chikutwisha kutubachik kusal yom yiyimp. Yesu wovakesha yom yiney mu malembil ma chilakej, palonday anch: “Kangal watutwal ku yoziu, pakwez tukamunina ku kuyip.” (Mat. 6:13) Yehova ukatin kutukwash, pakwez tufanyidin kumwit ukwash winou. Tufanyidin kand kusal yom kukwatijan ni malembil metu. w23.05 6-7 par. 15-17

Anch ambay a uruw akwat nich usey urund wau ni Tatukwau wa mwiur, chisu chawonsu akusambish kusadin yiyul yend. Kusal mwamu kukuyikwash kwipuk ni kupandakan milong yikutwisha kusal anch rukat ra umwing ni mukwau risambisha kutalal. Antu akweta urund ukash ni Yehova akat kusal usu wa kumwimburij ni kukudish mikadil yiwamp mud kudimuk, kushimpish muchim, ni kulikishin. (Efes 4:32–5:1) Ambay a uruw amekeshina mikadil mud yiney, akat kusal anch rukat rau ridandamen kupam. Nambaz Lena watau kwasut kal mivu 25 ulondin anch, “Chiswapeling kumukat ni kumulimish muntu umukatina Yehova.” Shinshikin chilakej cha Bibil. Chisu chading chikimbinay Yehova kutond ambay a uruw afanyina kwikal anvaj a Mesia, wamutonda Jozef ni Mariy a mu dijuku da David. Mulong wak? Awonsu aad ading ni urund ukash ni Yehova, ni Yehova wamana anch uruw wau wafanyina kwimen pa rukat rau mulong wendendiy. w23.05 21 par. 3-4

Mwant wetu Yesu ud muntu uwanyidina, pakwez antu asadidinay mulong wa kututakel ad akad kuwanyin. Chikutwish pamwing ap kutukasiken kuyiziyin pakampwil anch atwit kusal yom yitwakad etu kukat kusal. Dichuku dimwing kambuy Pita widjidjeka pa kuziyin ku umutakel kanang wamwitau. Mwangel umwing wamuleja kuda mbij ja annam ading ijondila kukwatijan ni Chijil cha Moses, pakwez Pita walika—kalikap kapamp kamwing pakwez tupamp tusatu! (Mid. 10:9-16) Mulong wak walika? Yom yamulejau yadingap yimusangareshina. Chikwau kand, kambuy Paul waziyina pamulejau kud Amakurump in Kristu a mu Yerusalem kuya pamwing ni amakundj anying ku tempel mulong wa kwishitwish nau pamwing mulong wa kumekesh anch wading ulimishin Chijil. Paul wading wij anch in Kristu kadingap kand mwinshin mwa Chijil cha Moses. Ni kasalap chom chiyimp. Pakwez, Paul “waya nau, chikwacha, awiy asala yom yawonsu ya kwishitwish pamwing.” (Mid. 21:23, 24, 26) Kuziyin kwa Paul kwakasikesha uumwing wa mu chikumangen.—Rom 14:19, 21. w23.10 10 par. 15-16

Chimeken kamu anch ukwakul anch arund awamp afanyidin kukatijan ni kukwashijan umwing ni mukwau. Pakwez, antu akatina kwikal mu urund wa piswimp ni Yehova afanyidin ‘kumwov wom.’ Chikalap nchik uvud wa mivu twamusadidina kal Yehova, etu awonsu tufanyidin kumulimish chikurikina. Pakwez chirumburikin ik kumwov Nzamb wom? Muntu umulimishina Nzamb chikurikina kakatap kusal chom chikutwisha kuyipish urund wend ni Ndiy. Yesu wading “mwin kumuziyil Nzamb ni kumulimish.” (Heb. 5:7) Kazalangap kurutu kwa Yehova. (Isay 11:2, 3) Pakwez, wading umukatin nakash ni wading ukatin kamu kumuziyin. (Yoh. 14:21, 31) Mud Yesu, niyetu tumulimishin Yehova chikurikina ni tumwovil wom mulong Ukweting rukat, manangu, utentamin ni ukwet kand dikand. Twij kand anch Yehova utukatin ni chinech chikat kutubachik kuziyin ku mafundish mend. Anch twamubwambwil Yehova, ukat kunenganan, pakwez anch twamuziyin chinech chikat kumusangaresh.​—Kus. 78:41; Jnsw. 27:11. w23.06 14 par. 1-2; 15 par. 5

Pikalay Mwant Ozias ni usu, wavuramena anch Yehova ndiy wadinga Musul wa usu ni wa yom yasalay. Yom ik twilejidinaku? Tufanyidin kuvurik anch yiyukish ni yisend tukweta Yehova ndiy watwinkishay. Pa ndond pa kwitutul mulong wa yom tusadina, tufanyidin kumujikitish Yehova mulong utukwashin kusal yom nawamp. (1 Ko. 4:7) Tufanyidin kwikepish ni kwijik anch tud antu akad kuwanyin akweta kuswir kwa dipup. Mukadivar umwing ukweta mivu 60 wafunda anch: “Nileja anch nafanyinap kwikwat nich usey amwinam. Anch ampup mulong wa chom kanang chimekena mud chid cha usup, mu yisu kanang nikat kusal usu wa kumuchingejin Yehova.” Cha usey nakash anch twamuziyin Yehova ni kushal ikepishina, tukwikal ni mashakamin mawamp.​—Jnsw. 22:4. w23.09 10 par. 10-11

In Kristu a kusambish ading akwet kuswir kwa kujijaman. Kudioshaku milong yading yirishinau nich antu awonsu, arisha kand ni yikokujol yikwau. Avud pakach pau ayizengola, kadiap kwau ching kud amakurump a marelijon ma in Yuda ap kud antakel a in Rom, pakwez kand kud antu a mu majuku mau. (Mat. 10:21) Ni chading chiyitin kusal usu nakash chakwel mafundish ma in kupumbok mading min kwauril chikumangen malik kwikal ni usu pad awiy. (Mid. 20:29, 30) Chikalap nchik yawonsu yiney, in Kristu inay ajijamana. (Kuj. 2:3) Mutapu ik? Atongijokina pa yilakej yidia mu Bibil ya antu ajijamana, mud chilakej cha Job. (Jak. 5:10, 11) Alembila mulong wa kwikal ni usu. (Mid. 4:29-31) Ni ashinshikina pa yibudikin yiwamp ya kujijaman kwau. (Mid. 5:41) Niyetu tukutwish kujijaman anch twilej chisu chawonsu ni kutongijokin pa yilakej ya antu ajijamana yisambidinau mu Dizu dia Nzamb ni mu mikand yetu. w23.07 3 par. 5-6

Yehova ni Yesu kakutulikap bwat. Kupwa kwa kambuy Pita kumutun Kristu, wafanyina kukwat mupak wa usey nakash mu mwom wend. Ov, wafanyina kudandamen kwikal mwin kwilej wa Kristu ap kulikap? Yesu wamulembila Yehova chakwel ritiy ra Pita kangal raziy. Yesu wamulejamu Pita piur pa malembil minam ni wamekesha anch wading ni kashinsh anch Pita wafanyina kwikal ni mutapu wa kuyikasikesh akadivar nend. (Luka 22:31, 32) Patongijokinangay Pita piur pa mazu minam ma Yesu wikala nich kashinsh! Anch tukimbin kukwat mupak wa usey mu mwom wetu, Yehova ukutwish kuyisadin atufung akata kutubangin mulong kutwinkish kashinsh tuswirikedina mulong wa kushal ashinshamena. (Efes 4:8, 11) Mud mwawanyishay Yehova maswir ma ku mujimbu ma Pita ni ma atwimbuy akwau, Yehova ukutuwanyishin niyetu maswir anch twatek mijikit ya mu spiritu pa ndond ya kusambish mu mwom wetu. w23.09 24-25 par. 14-15

Yehova ukat kuman ap tuyom tukemp nakash tuwamp tukata kuyisadin akwetu. Ukat kuman tuyom twinetu mud chipan cha usey nakash ni mud dibaz tumusondjikina ndiy ni dikutufutay. Anch wasadin kal mud nkwash wa mudimu ap mukurump wa chikumangen, Yehova uvurikin mudimu wey wasala pakur ni rukat rakubachika kusal mwamu. (1 Kor. 15:58) Ni ukat kushinshikin kand rukat udandamedina kumekesh. Yehova ukatin anch etu awonsu tukudish rukat retu mulong wendendiy ni mulong wa antu akwau. Tukutwish kukasikesh rukat retu mulong wa Yehova kusutin kutang Dizu diend ni kutongijokin pa yom tutangina, ni kusutin kwambambang nend chisu chawonsu mu malembil. Tukutwish kukudish rukat retu mulong wa akadivar nau anambaz kusutin kuyikwash nich yom tukweta. Padandamedina rukat retu kukul, tukusej kamu nakash piswimp ni Yehova ni dijuku dietu dia mu spiritu. Ni tukusanger urund winou chikupu ni chikupu! w23.07 10 par. 11; 11 par. 13; 13 par. 18

Mwin Kristu win mwawonsu ufanyidin kukwat mupak piur pa mutapu ufanyidinay kwiyokish. Kud kusu yijil yikemp ya Bibil yifanyidinay kulimish mwin Kristu chisu chitondinay mutapu wa kwiyokish, mud mbil jilejena kwilam ku mash ni ku yom ya ayilembil. (Mid. 15:20; Gal. 5:19, 20) Yom yikwau yishadinaku piur pa kwiyokish ud mupak umutadina muntu amwinend. Chikalap nchik kashinsh tukweta mu mulad kanang wa kwiyokish, tufanyidin kulimish mipak ya akadivar ni anambaz piur pa mipak yau yikwatinau mulong wa kwiyokish. Chawiy, tufanyidin kulondul yiyul yinying yilondwilaku ey: (1) Ching Want wa Nzamb wawiy ukupwisha mayej mawonsu. (Isay 33:24) (2) Mwin Kristu mwawonsu ufanyidin kwikal nich ‘kashinsh’ ka yom yidia yiwamp ku mutambu wend. (Rom 14:5) (3) Tufanyidinap kuyirumburish antu akwau piur pa mipak yau yikwatinau ni tufanyidin kwipuk kuyipwakesh. (Rom 14:13) (4) In Kristu afanyidin kwijik anch uumwing wa chikumangen ud wa usey nakash kusutamu yitongijok yau.​—Rom 14:15, 19, 20. w23.07 24 par. 15

Ov, usangaredin urund wey ni Yehova nakash? Chakin kamu uusangaredin! Kudosh kamu pakur antu avud iyova mud mutapu wiyovila. (Kus. 104:33, 34) Antu avud ipana nakash mulong wa kumwifukwil Yehova. Wawiy mutapu wasalau in Nazir a mu Isarel wa pakur. Dizu Nazir dading dimekeshin in Isarel akweta mushiku ap antu ading ipanina ayinau mulong wa kumusadin Yehova mu mutapu wa pakampwil. Mu chijil cha Moses chitiyang muntu ikundj ap mband kusal machip ma pakampwil kud Yehova mulong wa kutond kushakam mud mwin Nazir mu chisu kanang. (Kuch. 6:1, 2) Anch mwin Isarel wasal machip ma kwikal mwin Nazir, wading ufanyidin kulondul umutakel wakad kulimishau kud in Isarel akwau. Mulong wak in Isarel asalang machip makwikal mwin Nazir? Rukat rau mulong wa Yehova ni kujikitish kwau mulong wa yiyukish yatambulangau yawiy yayibachikang kusal machip minam.​—Kub. 6:5; 16:17. w24.02 14 par. 1-2

Dizu da Hebereu dikarumwinau mu Bibil anch “kushinshaman,” ap “rukat rishinshamena,” dikwet chitongijok cha chirungul chikash ni cha rukat rishinshamena rikatay Nzamb kuyimekeshin atushalapol end. Dizu dawiy dimwing disadidinau mulong wa kumekesh rukat ridia pakach pa atushalapol a Nzamb. (2 Sam. 9:6, 7) Kushinshaman kwetu kukat kwikal kukash mu kusut kwa chisu. Shinshikin mutapu wakasikeshay Daniel kushinshaman kwend. Kushinshaman kwa Daniel kud Yehova mu mwom wend wawonsu akupaka. Pakwez kupak kujim kwashikena pawanyishay mivu 90. Pa chisu chinacha, Babilon wading mu makas ma in Med nau in Peris, ni mwant Darius ndiy wadinga uyikedila. Antu ading asadina mu chipang cha mwant kadingap kamukatina Daniel ni kadingap ni kalimish piur pa Nzamb wifukwilangay. Chawiy atenchika chakwel amujipa Daniel. Ateka chijil mulong wa kuman anch Daniel ukumushinshamen Nzamb wend ap mwant. Daniel wafanyina kumekesh anch umushinshamedin mwant kusutil kwimik kumulembil Yehova mu machuku 30. Daniel walika kumubwambwil Yehova.​—Dan. 6:12-15, 20-22. w23.08 5 par. 10-12

Yehova ukatin anch tudandamena kuyimekeshin akadivar nau anambaz rukat. Anch muntu wakangany kumekesh mwikadil kanang wa win Kristu, tukutwish kwetu kumuman mud mukadivar ap nambaz ukatina kusadin mbil ja Bibil, pakwez wasalang ap kulond pakad kutong. (Jnsw. 12:18) Nzamb uyikatin atushalapol end ashinshamena chikalap nchik kuburen kuwanyin kwau. Kakatap kutulik ap anch twarumbuk; kakatap kutulamin rukuny. (Kus. 103:9) Chid cha usey kud etu kumwimburij Tatukwetu ukata kulikishin! (Efes 4:32–5:1) Vurik kand anch, pasejina disuden piswimp, tukwikal ni kuswir kwa kushal piswimp nau akadivar ni anambaz. Tukutwish kuchingej anch akutuzengol nakash. Akutwish ap kututek ayinetu mu rukan mulong wa ritiy retu. Anch chom chinech chashiken, tukwikal kamu ni kuswir kwa akadivar nau anambaz nakash. w24.03 16 par. 6-7

Mu Bibil mud nsangu ja ansand adinga piswimp ni Yehova, ading ni dilau diend ni ikala ni mwom yisangareshina. David niyend ud pakach pa ansand inay. Padingay nsand, watonda kwikal murund wa Yehova ni kupwa wikala mwant ushinshamena. (1 Ant 3:6; 9:4, 5; 14:8) Anch wilej rusangu ra David, chilakej chend chikukubachik kumusadin Yehova nich kushinshaman. Ukutwish kwitekin chisu cha kwilej yom yivud kusutil chilakej cha Marko ni Timote. Ukuman anch asambisha kumusadin Yehova padingau anikanch ni adandamena kumusadin nich kushinshaman. Mutapu usadidina mwom wey kusambish nlel wawiy ukusala anch wikala ni musangar mu machuku ma kurutu. Anch wamuchingejin Yehova pa ndond pa kwichingejin amwiney, ndiy ukukukwash kukwat mipak ya manangu. Ukwikal ni mwom uwamp ni usangareshina. Vurik anch, Yehova ukwatin nich usey nakash yom usadina mulong wendendiy. Ov, umenap anch chid cha usey nakash kusadin mwom wey mulong wa kumusadin Tatukwetu wa rukat Yehova? w23.09 13 par. 18-19

Kambuy Paul wading wij anch akadivar nau anambaz nend ading antu akad kuwanyin. Chilakej, chisu chikemp kupwa kwa kusambish kukumangan, antu amwing kamwitiyap anch niyend ud mwin kwilej. (Mid. 9:26) Kupwa, antu amwing alonda yom yiyimp piur pend mulong wa kuyibachik antu akwau kulik kumuchingejin. (2 Kor. 10:10) Mukadivar umwing ukweta yisend wakwata mupak uyimp wafanyina kuyipwakeshish antu akwau, ni Paul wamana chom chinech. (Gal. 2:11, 12) Ni Marko, murund wa piswimp wa Paul wamuziyisha. (Mid. 15:37, 38) Paul wafanyina pamwing ap kulikidil anch yom mud yiney yimukangesh kwibomb nau antu amurumbukina. Pakwez, walama chitongijok chiwamp piur pa akadivar nau anambaz nend ni wadandamena kumusadin Yehova. Yom ik yamukwasha Paul kudandamen? Paul wading uyikatin akadivar nau anambaz nend. Rukat ra Paul mulong wa antu akwau ramukwasha kulik kushinshikin pa kurumbok kwau, pakwez pa mikadil yau yiwamp. Rukat ramukwasha kand Paul kusadin yom tutanina mu mufund wa nlel. w24.03 15 par. 4-5

Bibil ukwet nsangu jivud jimekeshina usey wa kwikal itudishina. Shinshikin chilakej cha Isak. Chisu chashakamay mwi ngand ya in Filistin ku Gerar, amutej nend ova ris ra majiy ma mem mapundau atushalapol a tatukwend ni amashikidina. Pa ndond ya kutendin kwau ndond yiney, Isak washemunikina kulemp ni wapunda majiy makwau kwinikwa. (Dis. 26:12-18) Pakwez in Filistin alonda kand anch mem ma ndond yiney mading nmau. Chikalap nchik mwamu, Isak wakulang mu mutapu wa chisambu. (Dis. 26:19-25) Yom ik yamukwasha kushal witudishina ap chisu chamusarumunangau kud antu akwau? Wimburija chilakej cha anvaj end, wilejina ku mitapu yamekeshangay Aburaham chisambu ni “muchim udimukina wa kwitudish” wa Sara.​—1 Pita 3:4-6; Dis. 21:22-34. w23.09 15 par. 4

Yehova wamutuma Mwanend wa kusambish pa divu mulong wa kuyifundish antu piur pa Want ni kupan mwom wend mulong wa kutukwol ku chitil ni rufu. Yesu wavumbukin kal ni wachirikin kal mwiur mulong wa kuyikel mud Mwant wa Want wa Nzamb. Mutu wa mulong ujim wa Bibil wisambidin mutapu ukutokishau dijin dia Yehova pakuwanyishay rutong rend mulong wa divu kusutin Want wend mwinshin mwa winyikel wa Kristu. Rutong ra Yehova rikutwishap kuswimp. Washidinamu kal anch ukez kariwanyish kamu. (Isay 46:10, 11; Heb. 6:17, 18) Pa chisu chiwanyidina, divud dikwikal paradis, ni an awanyidina ni atentamina a Adam ni Ev akusanger “mwom machuku mawonsu.” (Kus. 22:27) Pakwez yiney yawiyap kusu yikuwanyishay Yehova. Rutong rend rijim rid ra kukumangej yitang yend yawonsu yikweta manangu ya mwiur ni ya pansh. Kupwa antu awonsu akumuziyin mud Mwant wau. (Efes 1:8-11) Ov, mutapu uwanyishinay Yehova rutong rend ukusangareshinap? w23.10 20 par. 7-8

Padokalau in Yuda mu Babilon mulong wa kuchirik ku Yerusalem, machuku makemp kwau kamu asambisha kurish ni milong ya kuburen nfalang ni milong ya politik ni rupompat ra michid yading yiyinyingumukina. Amwing chayikasikena kutunguril tempel wa Yehova, chom chading cha usey nakash mu mwom yau. Chawiy, Yehova watuma aprofet aad, Age ni Zakariy, mulong wa kuyikwash antwend kuchirish mushiku mulong wa difukwil da Yehova. (Age 1:1; Zak. 1:1) Kupwa kwa mivu 50, in Yuda ading ni kuswir kwa kuyikasikesh. Esidera, wadiokala ku Babilon kwez ku Yerusalem mulong wa kuyikasikesh antu a Nzamb ateka difukwil dakin pa ndond ya kusambil. (Esi. 7:1, 6) Mud mutapu uprofet wa Age ni Zakariy wayikwasha antu a Nzamb pasak kudandamen kumuchingejin Yehova pa yirung ya rupompat, ukutwish kand kutukwash niyetu nlel kushal ashinshamena ni kwikal ni kashinsh anch Yehova ukutukwash pa yirung yikash.​—Jnsw. 22:19. w23.11 14-15 par. 2-3

Mulong wak tufanyidin kulam rukat rikash mulong wa muntu ni mukwau? Mutapu umwing tufanyidina kusal mwamu ud wa kuyikasikesh. Tukutwish kusal mwamu anch ‘twadandamen kukasikeshijan umwing ni mukwau’ (1 Tes. 4:18) Mutapu ik tukutwisha kulam rukat rikash umwing ni mukwau? Kusutin kusal usu wa kuyilikishin akwetu kurumbok kwau. Mulong wak chid cha usey nakash nlel kumekeshijadin rukat umwing ni mukwau? Tal diyingishin diletinay Pita: ‘Disudiel dia yom yawonsu didi piswimp. Chawiy, . . . Ikalany ni rukat rikurikina kud muntu ni mukwau.’ (1 Pita 4:7, 8) Mulong disudien da mangand minam mayimp did piswimp, yom ik tufanyidina kuchingejin? Pisambay Yesu nau in kwilej end, watakela kulond anch: “Antu awonsu akez kukukisany mulong wa kwingambat am.” (Mat. 24:9) Mulong wa kushal ashinshamena kud Yehova chikalap nchik rukis, tufanyidin kwikal mu uumwing. Anch twasal mwamu, Satan kakutwishap kutwauril, mulong rukat ritubombin pamwing.​—Fil. 2:1, 2. w23.11 13 par. 18-19

Uyakin uda mu Dizu da Nzamb ukwet usu upandakena. Kusutin kuyifundish antu piur pa Yehova ni wuntu wend, tukat kushiken kuman yom yiwamp nakash. Makasu ma Satan makat kuya mu kupwa pakemp pakemp, ni antu asambishin kal kuman mikadil yiwamp ya Tatukwetu mud mutapu tusadina etu. Akat kubaz usu wend wakad mimbu. (Isay 40:26) Akat kwilej kumuchingejin ndiy mulong dirumburish dend ditentamin. (Kuv. 32:4) Ilejin yom yivud piur pa manangu mend mapandakena. (Isay 55:9; Rom 11:33) Ni kwilej anch ud muntu wa rukat kukat kuyikasikesh. (1 Yoh. 4:8) Mulong akat kumusejin Yehova, ruchingej rau ra kushakam chikupu mud anend rikat kwikal rakin. Dined did dilau dipandakena kuwap kud etu da kuyikwash antu kumusejin Tatukwau! Anch twasal mwamu Yehova ukat kutuman mud “ambay a mudimu.”​—1 Ko. 3:5. w24.02 12 par. 15

Anch ud mwin kwilej wa Bibil ap anch akulidin kud anvaj atuman, ov, ukat kutongin pa dibatish? Ud mupak uwamp nakash! Kurutu akubatisha, ukwikal ni kuswir kwa kwipan amwiney kud Yehova. Mutapu ik ukutwisha kwipan amwiney kud Yehova? Ukushilamu mu malembil anch ukumwifukwil ching ndiy ni kutek rusot rend pa ndond ya kusambish mu mwom wey. Chakin kamu, ukumukan Yehova anch ukudandamen kumukat ndiy “nich muchim wey wawonsu, nich mupim wey wawonsu, nich manangu mey mawonsu, nich usu wey wawonsu.” (Mar. 12:30) Ukwipan ku ujindj, ey ni Yehova. Pakwez dibatish dimeken patok kud antu awonsu; dimekeshin anch wipanin kal kud Yehova. Kwipan kwey kud kushilamu kujim nakash ni Yehova uchingejin anch ukushakam kukwatijan ni kushilamu kwey.​—Mul. 5:4, 5. w24.03 2 par. 2; 4 par. 5

Uruw win wawonsu ukweting yikokujol. Bibil ulejen patok anch antu atijadina “akuman mar mu mwom wau.” (1 Kor. 7:28) Mulong wak? Mulong uruw uyinungin antu aad akad kuwanyin, akweta mikadil, maku, ni akatina yom yishalijadina. Ambay a uruw akutwish kudokal kwi ndond kushalijan ap kwi ndond kuda yinshakur yishalijadina. Akutwish yisu yimwing, kumekesh mikadil yimwing yading yakad kumekan kurutu atijana. Yom yiney yawonsu yikutwish kuyiletin mar. Akutwish kwifish nich umwing ni mukwau mulong wa milong yiyishikedina, pa ndond pa kwijik anch muntu ni muntu ukwetamu chisend ni anch afanyidin kukimb mutapu wa kuyipwish. Akutwish ap kushiken kutong anch mutapu wa kupwish milong nawamp ud wa kwaurik ap kujip uruw. Pakwez kwaurik ap kujip uruw kukutwish kupwish milong? Bwat. Yehova uyilejin ambay a uruw kulimish ditenchik da uruw ap anch chikasiken kushakam ni muntu watijadinay nend. w24.03 16 par. 8; 17 par. 11

Ap kupwa kwa kwipan ni kukubatish, wadandamena kwilej yom yivud mulong wa kwikal mwin Kristu uswila, ruchingej rey ra kushakam chikupu mu paradis pa divu radandamena kukul. (Heb. 5:13–6:1) Wimenap kamu yom yilejenau mu Rom 5:2-4. Warishin ni yikokujol kushalijan, pakwez wayijijamedin ni wamen anch ukwet dilau da Nzamb. Mulong wij anch ukwet dilau da Nzamb, ukwet katat mayingishin ma kuchingej kutambul yom yakanay kal. Ruchingej rey rikadin rikash kusutamu pakur. Rid kamu rakin kud ey pakampwil. Rikadin kamu ni usu nakash kud ey. Rikadin ni yibachik nakash mu mwom wey ni rakukwashin kuswimp mutapu wa kuyisadin antu a mu dijuku diey, mutapu wa kwambamb ni mutapu wa kusadin chisu chey. Kambuy Paul uwejidinaku kand chom cha usey piur pa ruchingej kupwa kwa kutambul dilau da Nzamb. Ukwinkin kashinsh anch ruchingej rey rikuwanyin kamu.​—Rom 15:13. w23.12 12-13 par. 16-19

Anch turishin ni chikokujol, yovil, yitongijok yetu, ni mutapu wa kusal yom yikwikalap mud mutapu tuding dichuku diawonsu. Tukutwish kwiyov mud tuperokin ni mud tukwet yakamish yikash. Mutapu ik ukatay Yehova kutukwash anch yitongijok yiyimp yatupandaken? Utwinkishin kashinsh anch ukutukwash. Anch waat wasankanijan ni rinkind, ukutwish kuperok kwa ubaj mu kwibul oku ni oku. Chakwel kangal waat uperoka, maat mavud makweting chom chikata kumachidij chiding mu mem kwinshin kwa waat chibudikina ushad ni ushad wa waat. Chom chinech chikutwish kukepish kunyikek kwa waat, ni kukat kuyinkish antu ada mu waat kashinsh. Pakwez, yom yiney yikat kukwash waat anch wendin. Chilik chimwing Yehova ukat kutukwash anch tudandamedin kumusadin nich kushinshaman mu yisu yikash. w24.01 22 par. 7-8

Anch wov wom, iyipula anch, ‘Yom ik yansadinay kal Yehova?’ Tongin pa yom yatangay. Chilakej, anch ‘twatal’ mutapu Yehova ukatay kuyibangin atujil ni yisalamb​—yom yalikay kutang mu chifu chend ni yakad kutwish kumwifukwil, tukutwish kamu kukasikesh kashinsh ketu anch ukutubangin niyetu. (Mat. 6:25-32) Shinshikin kand yom yasalay Yehova mulong wa in kumwifukwil end. Ukutwish kwilej piur pa muntu umwing mu Bibil wamekesha ritiy rikash, ap ukutwish kutang yom yamushikena kashalapol wa Yehova wa pa chirung chetu. Ap kand, kutongijokin mutapu wakubanginay Yehova. Yom ik yakukwasha kwilej kumwijik? (Yoh. 6:44) Mutapu ik wakulay ku malembil mey? (1 Yoh. 5:14) Mutapu ik utanidinamu dichuku dawonsu kusutin chakupesh cha Mwanend mukatish?​—Efes 1:7; Heb. 4:14-16. w24.01 4 par. 6; 7 par. 17