Ngond wa 11

Anch ud nvaj, yikwasha aney kurijek yakul kukwatijan ni mivu yikwetau. Yisu yimwing, mu dilejan mukutwish kwikal mafundish makash, mud milong ya uruw ap ya kwishitul, pakwez pamwing ap kukutwish kwikal paragraf umwing ap maad mukutwishay mwan kwakul. Chikwau kand, yikwasha aney kwijik anch kakutwishap pamwing ap kuyitond chisu chin chawonsu chizambwilau chikas. Kuyirumburil chom chinech kukuyikwash kulik kuziy anch ayitond antu akwau pa ndond pa kuyitond awiy. (1 Tim. 6:18.) Etu awonsu tukutwish kurijek yakul yikasikeshena, yimutumbishina Yehova ni yiyikasikeshina ambay netu in Kristu. (Jnsw. 25:11) Pa chisu twisambidina yom yimwing twamena kal, tufanyidin kwipuk kulond yom yivud piur pa ayinetu. (Jnsw. 27:2; 2 Kor. 10:18) Pa ndond pa kusal mwamu, tufanyidin kulond nakash piur pa Yehova, Dizu diend, ni antu end mu uvud.​—Kuj. 4:11. w23.04 24-25 par. 17-18

Rukat ni rawiy rid ra usey mulong wa kushal achila ku mes ni kutek manangu mwi ndond. (Mat. 22:37-39) Rukat mulong wa Nzamb rikat kutukwash kudandamen kulejan chikalap nchik yakamish tukutwisha kurish nich. (2 Tim. 1:7, 8) Mulong tuyikatining kand ap antu akad kumusadin Yehova, tukat kudandamen kulejan, ap kusutin kusadin telefon ni kufund mikand. Tukatap kushadish ruchingej anch dichuku dimwing amutej netu akutwish kuswimp ni kusambish kusal yom yidia yiwamp. (Ezek. 18:27, 28) Tuyikatin kand akadivar nau anambaz netu. Tukat kumekesh rukat mud riner kusutin ‘kukasikeshijan mu ritiy muntu ni mukwau.’ (1 Tes. 5:11) Mud amasalay asadina pamwing mulong wa kurish, tukat kukasikeshijan muntu ni mukwau. Chakin, isalay ukutwish kumuloz mukwau pakad kutongin chisu chidiau mwi njit, pakwez kakutwishap kusal mwamu kwa kwisotin. (1 Tes. 5:13, 15) Chisik chimwing niyetu, tukutwishap kumusal nayimp mukadivar ap nambaz netu kwa kwisotin ap kumuchirishin uyimp ku uyimp.​—1 Tes. 5:12. w23.06 10 par. 6; 11 par. 10-11

Mutapu umwing tukutwisha kukasikesh ritiy retu ud wa kutongijokin pa difut. Difut ditwinkishin kashinsh anch kushilamu kwa Nzamb kukuwanyin. Anch twatongijokin chikurikina pa diyingishin diamubachika Yehova kupan difut ni usey ukweta difut dined, tukat kukasikesh ritiy retu mu kushilamu kwa Nzamb kwa kuswinkesh mangand minam nich ngand yisu anch kud kwakin ni kukuwanyin. Mulong wak tulondina mwamu? Usey ik ukweta difut? Yehova wamutuma Mwanend kapokal mukatish, wadingay nend piswimp nakash, mulong wa kwez pansh mud muntu uwanyidina. Panap pa divu, Yesu wajijamena yikokujol ya mitapu ni mitapu. Wamana mar ni wafa rufu risansena. Dined diading kamu difut dijim diafutay Yehova! Yehova Nzamb wetu wa rukat kafanyinap kwitiy anch Mwanend aman mar ni kufa mulong wa kutwinkish kwau mwom uwamp mu ka chisu kakemp. (Yoh. 3:16; 1 Pita 1:18, 19) Mulong Yehova wamupana Mwanend wa usey nakash mulong wa kutukwash, chimeken anch ukwet kashinsh anch tukwikal ni mutapu wa kushakam chikupu mwi ngand yisu. w23.04 27 par. 8-9

Ov, Yehova ukwet kamu impu ya kuyivumbul afu? Mwawiy kamu. Wayipepila in kufund Bibil amwing chakwel afund kushilamu kwend kwa divumbuk da machuku ma kurutu. (Isay 26:19; Kuj. 20:11-13) Ni anch Yehova wakan chom, ching kamu wachiwanyish. (Jos. 23:14) Yehova uchingedin nich impu nakash kuyivumbul antu afila kal. Tongijokin pa yom yalonday Job. Wading nich kashinsh anch ap anch wafap nchik, Yehova ukumuvumbul. (Job 14:14, 15) Wawiy mutapu wiyovilay kand Yehova piur pa atushapol end awonsu afila kal. Ukwet impu ya kuyichirish kand ku mwom ni ukash wa mujimbu uwamp mulong wa kusanger kand mwom. Chid nchik piur pa antu afa pakad kwikal ni mutapu wa kwilej uyakin piur pa Yehova? Nzamb wetu wa rukat ukatin kuyivumbul niyau. (Mid. 24:15) Ukatin ikala niyau ni mutapu wa kwikal arund nend chakwel ashakama pa divu chikupu.​—Yoh. 3:16 w23.04 9 par. 5-6

Mutapu ik ukutwisha kukasikesh ruchingej rey? Chilakej anch ukwet ruchingej ra kushakam pa divu chikupu, ukutwish kutang ni kutongijokin maverse ma Bibil misambidina piur pa Paradis. (Isay 25:8; 32:16-18) Tongijokin mutapu ukwikal mwom mwi ngand yisu. Tongijokin mud ud mwi ngand yisu. Anch twitekin chisu cha kutongijokin nakash piur pa ngand yisu, milong yetu yikwikal ya ‘chisu chikemp ni yipipela.’ (2 Kor. 4:17) Ruchingej rikwinkishinay Yehova rikutwish kukukwash kujijamen yikokujol. Yehova ukat kukwinkish yom uswirikedina mulong wa kwikal ni usu udiokila kud ndiy. Chawiy anch ukwet kuswir kwa ukwash mulong wa kuwanyish chisend kanang, kupandakan chikokujol ap kulam musangar yey, mulembila Yehova nakash ni kimb yiyul yend kusutil dilejan dey da pakampwil. Itiy yiyul ya akadivar nau anambaz ney in Kristu. Itekina chisu cha kutongijokin pa ruchingej rey ra machuku ma kurutu. Anch wasal mwamu ‘akukukasikesh nakash ku dikand diend da uyaj, chakwel ukutwish kudandamen mu yom yawonsu nich kushimpish muchim nich musangar.’​—Kol. 1:11. w23.10 17 par. 19-20

Tukwet mayingishin mavud makutwisha kutubachik kumujikitish Yehova mu malembil. Tukutwish kumujikish Yehova mulong wa yom yawonsu tukweta; tuvurik anch chipan chawonsu chiwamp chidiokiling kud ndiy. (Jak. 1:17) Chilakej, tukutwish kumujikish mulong wa kuwap kwa divu ni kwa yitang yasalay yisangareshina. Tukutwish kand kumujikitish mulong wa chipan cha mwom, dijuku dietu, arund netu, ni mulong wa ruchingej retu. Ni tukatining kumujikitish Yehova mulong wa urund wetu wa usey nakash tukweta pamwing ni ndiy. Tufanyidin kusal usu pakampwil wa kutongijokin pa mayingishin mamwing makutwisha kutubachik kumujikish Yehova. Tushich mu mangand mudia antu aburedina mwikadil wa kujikitish. Antu avud akat kutongijokin kwau ching pa yom yikatinau pa ndond pa kutongijokin pa yom yikutwisha kuyibachik kujikitish mulong wa yom yikwetau. Anch twimburij mwikadil winou, malembil metu makutwish kwikal kwau ching ma kwit yom. Mulong wa kwipuk mwikdil mud winou, tufanyidin kudandamen kukudish ni kumekesh mwikadil wa kujikitish mulong wa yom yawansu yitusadidinay Yehova.​—Luka 6:45. w23.05 4 par. 8-9

Mulong ud Tatukwetu wa rukat, Yehova kakatiningap anch tumana mar. (Isay 63:9) Pakwez kakatap kukangesh anch milong yitushikena, yikutwisha kwikal mud karung ap mud muzuzu wa kasu. (Isay 43:2) Pakwez, ushidinamu kutukwash anch ‘twasutin’ mu yom yiney. Ni kwikil chikokujol chikutushikena katat, chikutukangesha kumusadin. Yehova utwinkishin kand ukwash wa kujijaman kusutil spiritu wend utumbila. (Luka 11:13; Fil. 4:13) Mud chibudikin, tukutwish kwikal ni kashinsh anch tukwikal chakin kamu ni chom chin chawonsu tukweta nich kuswir mulong wa kujijaman ni kushal ashinshamena kud ndiy. Yehova utwitin anch tumuchingejina. (Heb. 11:6) Yisu yimwing, yikokujol yetu yikutwish kumekan mud chikasiken kuyirish nich. Tukutwish kusambish kwidjidjek anch Yehova kakutukwashap. Pakwez Bibil utwinkishin kashinsh anch kusutil usu wa Nzamb tukutwish ‘kumatik pa mpwembu.’ (Kus. 18:29) Anch twasambish kwidjidjek nakash, tufanyidin kulembil nich ritiy rawonsu, ni kuchingej anch Yehova ukwakul ku malembil metu.​—Jak. 1:6, 7. w23.11 22 par. 8-9

Winou ud mutapu uwamp nakash urumburilau rukat rakin! Mazu minam makwet uyakin uyinkishina ambay a uruw kashinsh anch: akutwish kwikal ni rukat rukash umwing ni mukwau. Chiyitin ambay a uruw kusal usu mulong wa kukatijan umwing ni mukwau mu mwom wau wawonsu. Chilakej, kasu kakutwish kudandamen kwak anch muntu wadandamen kukundakesh nkuny. Anch kwikil muntu ukundakeshina nkuny, kasu kakutwish kujim. Chilik chimwing, rukat rudia pakach pa ikundj ni mband rikutwish kudandamen kwikal rikash chikupu anch akasikesh urund wau. Yisu yimwing, ambay a uruw akutwish kwiyov anch rukat rau riyil mu kutalal, pakampwil anch arishin ni milong ya kuburen nfalang, mayej, ap yikokujol yidiokila ku kulil an. Mulong wa kusal anch ‘muzuzu wa [Yah]’ udandamena kwak, ikundj ni mband afanyidin kusal usu pamwing wa kukasikesh rukat rau ni Yehova. w23.05 20-21 par. 1-3

Yom ik tufanyidina kusal mulong wa kukudish mwikadil wa kutakaman? Anvaj etu akutwish kutukwash kwikal atakamena, pakwez kakutwishap kutuswanish mwikadil winou mud yom yidiokila mu mash. Kwikal ni kutakaman akufanakeshin ni kwilej chom chisu. Mutapu umwing ukutwisha kwijik chom chisu ud wa kutal nawamp yom yisadinay mulej ni kupwa niyey wamwimburij. Chilik chimwing, tukat kwilej kwikal atakamena kusutil kushinshikin mutapu umekeshinau antu akwau kutakaman, kupwa niyetu twayimburij. Mud Daniel, niyetu tukwet kuswir kwa kwijik kamu nawamp Dizu dia Nzamb. Tukutwish kukudish urund wa piswimp ni Yehova kusutil kwisamb ni ndiy patok ni kusal mwamu chisu chawonsu. Ni tufanyidin kumuchingejin Yehova, ni kwikal nich kashinsh anch ukutukwash. Ni kupwa anch apak ritiy retu tukwikal atakamena. Antu atakamena akat kuyilimish kud antu akwau. Akat kuyikwash kand antu akin kumusejin Yehova. Chakin, tukwet mayingishin mawamp ma kukudish mwikadil wa kutakaman. w23.08 2 par. 2; 4 par. 8-9

Dizu da Grek dikarumwinau anch “Shinshikinany” adisadidin mulong wa kufanakesh nich mutapu ukatau kupim yom mud or ap argent mulong wa kwikal nich kashinsh anch yid yiwamp. Chawiy chimwing kand, tupak yom tuteshina ap yitutangina mulong wa kwikal nich kashinsh anch yid yakin. Kusal mwamu kukwikal kwa usey nakash kud etu payila mar makash kusej piswimp. Pa ndond pa kwitiy mud ayisup yom yilondinau antu akwau, tukat kusadin ukaliweny wetu wa kutong mulong wa kufanakesh yom tukata kutang ap kutesh nich yom yifundishinay Bibil ni dirijek da Yehova. Kusal mwamu, kukutukwash kwez kulik kutudimb ku makasu ma ayilembil. (Jnsw. 14:15; 1 Tim. 4:1) Twij anch tukupand ku mar makash, mulong tud atushalapol a Nzamb. Pakwez, twijap kamu yom yikushikena diamashik. (Jak. 4:14) Uyakin ud anch, ap anch twafa kurutu ap kupwa kwa mar makash, akutufut mwom wa chikupu anch twashal ashinshamena. Tusalany amboku etu awonsu usu wa kudandamen kushinshikin pa ruchingej retu ripandakena kuwap ni kushal irijekina mulong wa dichuku da Yehova! w23.06 13 par. 15-16

Twijap mutapu ukuwanyina uprofet wa Bibil. (Dan. 12:8, 9) Pakwez ap anch tuteshinap kamu nawamp mutapu ukuwanyina uprofet, chirumburikinap anch ukuwanyinap. Chakin kamu, tukutwish kwikal nich kashinsh anch Yehova ukutukwash kutesh nawamp yom tuswirikedina kwijik pa chisu chiwanyidina, mud mwasalay pasak. Kukwikal chijikish cha “chisambu ni kwikang.” (1 Tes. 5:3) Kupwa antakel a chipolitik a pa mangand mawonsu akweta dikand akumurishikish relijon wa makasu ni kumushesh. (Kuj. 17:16, 17) Kupwa akuyirishikish antu a Nzamb. (Ezek. 38:18, 19) Yinship yiney yikushikij kapamp kamwing kwi njit ja Armagedon. (Kuj. 16:14, 16) Tukutwish kwikal nich kashinsh anch yinship yiney yikushik kamu piswimp ap. Patuchingedina yom yiney, tudandamenany amboku kumujikitish Tatukwetu udia mwiur kusutil kwilej kamu nawamp mazu ma uprofet madia mu Bibil ni kuyikwash antu akwau niyau kusal mwamu. w23.08 13 par. 19-20

Chisu chisambinay kambuy Paul piur pa ritiy, ruchingej, ni rukat, wapwisha ni kulond anch “chom chijim chipandakenamu yawonsu, [rid] rukat.” (1 Kor. 13:13) Paul wakimba kulond ik? Mu machuku ma kurutu, tukwikalap ni kuswir kwa ritiy mu kushilamu kwa Nzamb piur pa ngand yisu ap ruchingej piur pa kuwanyin kwa kushilamu kwinoku, mulong kushilamu kwawonsu kukwikal kwawanyidin kal. Pakwez tukwikal ni kuswir kwa rukat mulong wa Yehova ni antwend. Chawiy, rukat retu mulong wa awiy rikudandamen kukul chikupu. Chikwau kand, rukat rid pakach pa mayingishin mamekeshina anch tud in Kristu akin. Yesu wayileja atwimbuy end anch: “Anch niyen wakatijanany mwamu, chawiy antu awonsu akez kwijik anch, en udiany in kwilejam.” (Yoh. 13:35) Chikwau kand, kukatijan umwing ni mukwau kukat kutukwash kushal mu uumwing. Paul watazuka rukat anch “mwoj wa kukukasany mu umwing uwanyidina.” (Kol. 3:14) Kambuy Yohan wayifundina ambay nend in Kristu anch: “muntu mwawonsu umukatila Nzamb, ufanyidin kand kumukat mwanamakwend.” (1 Yoh. 4:21) Anch twakatijan umwing ni mukwau, tumekeshin anch tumukatin Nzamb. w23.11 8 par. 1, 3

Bibil ufanakeshin mashakamin metu ma win Kristu ni masengan ma kubambil. In kubambil akubambila djat ni kwinsudien akutambul mwom wa chikupu. (2 Tim. 4:7, 8) Tufanyidin kusal usu wetu win wawonsu mulong wa kudandamen kubambil, pakampwil mulong mufund wansudien ud piswimp nakash. Kambuy Paul, watwisha kubambil djat ni kwinsudien, wisambina yom yikutwisha kutukwash kuwin mu kubambil kwa mwom. Watuleja anch “Chifanyidin . . . kudjibul yom yawonsu yitukangeshina . . . , mwamu tukutwish kuya mau kurutu mwi njil yatutenchikidinau kal.” Pafunday Paul anch tufanyidin kudjibul yom yawonsu yitukangeshina, ov, wakimba kulond anch mwin Kristu kakwetap kwend chisend chifanyidinay kusend? Bwat, kiyawiyap yafilay kulond. Pakwez wading ukimbin kulond anch tufanyidin kudjibul dilim din diawonsu diakad usey. Dilim dia mutapu winou dikutwish kutuziyish nakash. Mulong wa kujijaman, tufanyidin kwishinshikin mulong wa kuman anch tusendin dilim dia mutapu winou ni kudidjibul. Pakwez pa chisu chawiy chimwing, tukimbinap kand kutul kuns yisend tufanyidina kusend. Anch chamwamu tukutwishap kudandamen kubambil.​—2 Tim. 2:5. w23.08 26 par. 1-2

Kwikal isikena kukutwish kutukwash kulimish yitongijok ya antu akwau. Chilakej, kud anambaz amwing akatining kwipent pakwez akwau bwat. In Kristu amwing akatining kuna maar mu chilik chisikena pakwez akwau kakunangap kwau. In Kristu awonsu akatining kwikal ni ukash wa mujimbu uwamp pakwez akat kutond milad kushalijan ya kwiyokish. Anch twatong anch chisu chawonsu tusadining yom yiwamp ni kuyibachik akadivar ni anambaz kwitiy asala yom tukatina etu kusal, tukutwish kuyipwakesh antu akwau ni kulet kwaurok mu chikumangen. (1 Kor. 8:9; 10:23, 24) Chilakej, Yehova katulejinap kamu patok masun ma mutapu ik tufanyidina kudjal, pakwez utwinkishin mbil tufanyidina kulondul. Tufanyidin kudjal mu mutapu umekeshina patok anch tud atushalapol a Nzamb, umekeshina kand anch tud isikena, ni anch tudjadin mu ‘mutapu uwamp.’ (1 Tim. 2:9, 10) Pakwez, tufanyidinap kudjal masun mapwitidina nkeu pad etu. Mbil ja Bibil jikutwish kuyikwash amakurump kwipuk kutek yijil yau pa mulong utadina kudjal ni kukidish nsuch. w23.07 23-24 par. 13-14

Yehova utulejin mutapu tukutwisha kwikal ni musangar wa machuku ma kurutu. Antu akata kwakul ku kutazuk kwa “mband chisup,” akat kushinshikin pa kwisangaresh nich chisal cha masandj. Disudien diau dikwikal “mwi ndond ya afu.” (Jnsw. 9:13, 17, 18) Pad kamu kushalijan kujim nau antu akata kwitiy kutazuk kwa “manangu [makin].” (Jnsw. 9:1) Tukat kwilej kukat yom yikatinay Yehova ni kukis yom yikisinay. (Kus. 97:10) Ni tukat kutan musangar mu kuyitazuk antu akwau mulong wa kwez kutaninamu mu “manangu [makin].” Chid mud tukat “kubarokin pa yinanginang ya piur pa musumb anch: ‘Muntu mwawonsu wa mwamu chifanyidin asutin kunoku.’” Yiyukish tukutambula pamwing nau antu atuteshina yikwikalap ya ka chisu kakemp. Yikwikal ya chirung chilemp, ni yikutukwash “kushakam” chikupu pitudandamedina kwend “salal mu jinjil ja ronganyin.”​—Jnsw. 9:3, 4, 6. w23.06 24 par. 17-18

Mutapu ik ukata kwiyov anch ambay ney a ku mudimu ap ambay ney a shikol akwipul piur pa yitiyij yey? Ov, ukat kujiman? Antu avud pakach petu akat kusal mwamu. Pakwez chipul cha mutapu winou chikutwish kutukwash kwijik yitiyij ya muntu mukwau, ni chikutwinkish mutapu wa kumulej rusangu ruwamp. Pakwez, yisu yimwing, muntu mukwau ukutwish kwipul chipul mulong wa kutusarumun. Tufanyidinap kukashimuk mulong wa chom chinech. Mulong antu amwing akat kulond mwamu mulong ateshap kal yitongijok yiyimp yikatau antu akwau kulond piur pa yitiyij yetu. (Mid. 28:22) Chikwau kand, mulong tushich mu ma “machuku ma kwisudiel,” chisu chidau antu avud “akad kwovijan” ap kand in “chisum.” (2 Tim. 3:1, 3) Pamwing ap ukutwish kwiyipul anch, ‘Mutapu ik nikutwisha kwikal witudishina ni mwin ranaken anch muntu wanjimesh mulong wa yitiyij yam?’ Yom ik yikutwisha kukukwash? Mu wiswimp kud kwitudish. Muntu witudishina kakatap kujiman swa, pakwez ukat kuninet anch amusarumun ap anch kijap nawamp mutapu wa kwakul. w23.09 14 par. 1-2

Yisu yimwing, tukat kutambul yiyul yikata kutuchidij ku ubaj mud kukat nakash yom ya kumujimbu ni mijikit yikwau yikutwisha kutubachik kujip yijil ya Nzamb. Mwi ndond tushicha tukat kutaninamu anch twalondul umutakel utwinkishinay Yehova. (Isay 48:​17, 18; 1 Tim. 6:9, 10) Chakin kamu Yehova ukudandamen kuyisadin antu mulong wa kutwinkish umutakel chisu chikweza mar makash djat kamu ni mu Mivu Kanan ya Kuyikel kwa Yesu. Ov, tukudandamen kamu kulondul umutakel winou? Chikutuswapel kusal mwamu anch twalondul umutakel wa Yehova nlel. Chawiy el tudandamenany kulondul umutakel wa Yehova, ni upaninay kusutil antu atondinay kal mulong wa kututakel. (Isay 32:1, 2; Heb. 13:17) Anch twasal mwamu, tukwikal ni mayingishin mavud ma kumuchingejin Ntakel wetu Yehova, ututakedina mulong wa kutuchidij ku ubaj wa mu spiritu ni kutushikij kwi ndond tuyila mulong wa kutambul mwom wa chikupu mwi ngand yisu. w24.02 25 par. 17-18

Kambuy Paul wading ni musangar mu mudimu wa Yehova, pakwez chamwita kupandakan yikokujol yivud. Paul wasalang yisu yivud maweny malemp, ni chadingap chiswapela kusal weny mu machuku minima. Mu maweny mend, yisu yimwing Paul wading “mu ubaj mulong wa mawit” ni “mulong wa ampongarik.” Yisu yimwing kand amubula kud akankuny nend. (2 Kor. 11:23-27) Ni akadivar in Kristu a Paul kadingap chisu chawonsu in kujikitish mulong wa usu wading usadinay mulong wa kuyikwash. (2 Kor. 10:10; Fil. 4:15) Yom ik yamukwasha Paul kudandamen kusal mudimu wa Yehova? Paul wileja yom yivud piur pa wuntu wa Yehova kusutin Mifund ni kusutin yom yamushikena. Paul wading nich kashinsh anch Yehova Nzamb umukatin. (Rom 8:38, 39; Efes 2:4, 5) Ni washikena kumukat Yehova nakash. Paul wamekesha rukat mulong wa Yehova kusutin ‘kuyisadin atumbila ni kudandamen kuyisadin.’​—Heb. 6:10. w23.07 9 par. 5-6

Antu avud ij mayingishin kanang masadina anch antakel a maguvernema ikalaku, ni yisu yimwing chitining kuziyin kwi mbil jimwing jitekinau kud ‘antakel’ inay. Pakwez, antu inay kand akat kwidjidjek pa kuziyin ku yijil yimwing yimekena anch yidiap yitentamina ap ayisadidin mu mutapu uyimp. Bibil ulondin anch maguvernema ma antu mawiy madia musul wa mar, ulejen kand anch maguvernema minam madi mwinshin mwa umutakel wa Satan ni piswimp ap akumashesh. (Kus. 110:5, 6; Mul. 8:9; Luka 4:5, 6) Bibil ulondin kand anch “muntu mwawonsu ukata kumubwambwil mwin kutakel ukat kubwambwil yom yatenchikay Nzamb.” Yehova ndiy ulikidina antakel a maguvernema kuyikel mu kachisu kakemp chakwel kangal kwikal kanvudangesh, ni utwitin kuyiziyin. Chawiy komb, tufanyidin, “kufut yom yawonsu,” kuwejinaku yitad, kuyilimish ni kuyiziyin mu mutapu wisikena. (Rom 13:1-7) Tukutwish kuman pamwing ap anch chijil kanang chiwanyidinap ap chidiap chitentamin kulimish. Pakwez tukat kumuziyin Yehova, ni utwitin kuyiziyin antakel inay chisu chitwitinau kusal mwamu, anch yijil yau yijipinap mbil ja Nzamb.​—Mid. 5:29. w23.10 8 par. 9-10

Chisu chavadikay Samson, in Filistin awiy ading ayiyikedila in Isarel ni ayimesha mar nakash. (Ank. 13:1) In Isarel amana mar nakash mulong in Filistin ading ni chisum nakash. Yehova wamutonda Samson mulong wa “kuyikamunin in Isarel kuyidiosh mu makas mwa in Filistin.” (Ank. 13: 5) Chading kamu chisend chikash nakash! Mulong wa kuwanyish chisend chinech chikash, Samson wading ufanyidin kumuchingejin Yehova. Chisu chimwing, amasalay in Filistin aya kumukwat Samson ku Lehi, mwi ngand ya Yuda. Amakundj in Yuda ova wom, chawiy akwata mupak wa kumupan Samson mu makas ma akankuny. Antu adinga ku mutambu wa Samson amukasa nich moj yisu ni amutwal kud in Filistin. (Ank. 15:9-13) Chawiy ‘spiritu wa Yehova wamukasikesha’ Samson ni wakatula moj yamukasau. Kupwa “chamanay rubangu ra chimbur rachading rutalel,” warinona, wajipa nich in Filistin 1000!​—Ank. 15:14-16. w23.09 2 par. 3; 3 par. 4

Yehova ukat kwijikish “kutenchik kwend kwa chikupu” mu Bibil. Chikwau kand, chisu chawonsu ukat kutwish mulong ‘wasala anch yom yawonsu yisadik mu mutapu wa kuwanyish rutong rend.’ (Jnsw. 16:4) Rutong ra Yehova rid ra chikupu mulong yibudikin ya yom yikatay kusal yikwikalaku chikupu. Risu rutong ra Yehova, ni yom ik yimwing yaswimpay kal mulong wa kuriwanyish? Nzamb wayileja antu a kusambish rutong rend mulong wa awiy. Wayileja anch: “Valijanany, vulijanany, shakamany, izwishany ngand ni kuyiziyish. Yikelany . . . annam awonsu” adia pa divu. (Dis. 1:28) Pabwambwilau Adam ni Ev, chitil chandama mu dijuku dia antu, pakwez chinech chafanyinap kumukangesh Yehova kuwanyish rutong rend. Watenchikirila mutapu wafanyinay kuriwanyish. Kapamp kamwing, wakwata mupak wa kutek Want mwiur wafanyina kuwanyish rutong rend mulong wa antu ni divu.​—Mat. 25:34. w23.10 20 par. 6-7

Yehova ukutwish kutukwash kujijaman. Chiswampelingap kamu kusal mwamu chisu chawonsu pakampwil anch turishin ni chom kanang chituziyishina ni chalabina kal. Pamwing ap, chikokujol turishina nich chikutwish kumekan mud chikasiken nakash kusutamu ni yarishay nich kambuy Pita. Pakwez Yehova ukutwish kutwinkish usu tuswirikedina mulong wa kujijaman. (Kus. 94:18,19) Chilakej, mukadivar umwing wasala utun mu mivu yivud kurutu kwa kwijik uyakin. Wakwata mupak wa kuswimp mwom wend ni kushakam kukwatijan ni yom yilondinay Bibil. Pakwez yisu yimwing, warishang ni maku mayimp. Yom ik yamukwasha kujijaman? Ulondin anch: “Yehova ukat kutukasikesh.” Uwejidinaku anch: “Kusutil ukwash wa spiritu wa Yehova nileja anch . . . , chiswapel kwikal ni mashakamin mamusangareshina Yehova . . . Yehova ukatin kamu kwinsadin, chikalap nchik kurumbok kwam udandamedin kwinkasikesh.” w23.09 23 par. 12

Akadivar ansand, ukutwishanap kwikal kapamp kamwing in Kristu aswila. Ufanyidinany kutond yilakej yiwamp ya kwimburij, kukudish ukaliweny wa kutong, kwikal muntu wa kuchingejin, kwilej ukaliweny ukutwisha kukukwash mu mwom ni kwirijek mulong wa yisend ya machuku ma kurutu. Anch watongin piur pa yom yawonsu ufanyidina kusal, ukutwish kwiyov anch yikasiken nakash. Pakwez ukutwish kwey kuyisal. Vurik anch Yehova udaku mulong wa kukukwash. (Isay 41:10, 13) Chakin kamu, akadivar nau anambaz ney mu chikumangen akukukwash. Anch wasal usu wa kwikal mwin Kristu uswila, mwom wey ukwikal uwamp ni usangareshina. Tukukatinany en akadivar ansand! El Yehova akuyukishany nakash piusadinanya usu wa kwikal amakundj in Kristu aswila. w23.12 29 par. 19-20

Tongin bil anch ud mu chisak pamwing ni akadivar nau anambaz. Wasutishang chisu chiwamp nakash ni kupwa kwa mambamb wasambish kutal yipich wakwatangana. Anch wanon yipich yaad, chakusambish kachikwatangap nawamp. Katat ukwet yipich yisatu. Pakwez chimwing pakach pa yipich yiney, mukadivar kadingap kasipina. Ukuchijip mulong ukwet yipich yikwau yaad wakwatangana pasipinay mukadivar. Katat tukwet mutapu wa kuvurik chisu chiwamp twasutishang pamwing ni akadivar nau anambaz. Pakwez tongin bil anch chisu chinicha mukadivar ap nambaz walondang ap wasalang chom chitukisishina. Yom ik tukutwisha kuvurik piur pa pend? Ov, umenap anch chid cha usey kuyivuramen mu manangu, mud mutapu tukutwisha kujip chipich? (Efes 4:32) Tufanyidin kusal usu wa kuvuramen kurumbok kwa akadivar nau anambaz, mulong tuvurikin yisu yiwamp twasutishina kal nau. Yiney yawiy yom yiwamp ya kuvurik tufanyidina kulam ni ya usey. w23.11 12-13 par. 16-17

Mazu ma Grek masadinau pinap mamekishin anch yidjal ya in Kristu amband yifanyidin kwikal ya kalimish ni yimekeshina anch alimishin yovil ni yitongijok ya antu akwau. Tukat kusangar nakash mulong wa anambaz in Kristu akata kudjal mu mutapu uwamp! Ukaliweny wa kujingunin yom ud mwikadil ukwau ufanyidinau anambaz in Kristu awonsu aswila kwikal nich. Ukaliweny wa kujingunin yom chom ik? Ud ukaliweny wa kujingunin yom yiwamp ni yiyimp ni kutond kusal yom yiwamp. Shinshikin chilakej cha Abigayil. Nfumwend wakwata mupak uyimp wafanyina kwikal ni yibudikin yiyimp nakash kud antu awonsu a mu chikumbu chend. Abigayil watumbuka kapamp kamwing. Wapandisha mipim mulong wasadina ukaliweny wa kujingunin yom. (1 Sam. 25:14-23, 32-35) Ukaliweny wa kujingunin yom ukutwish kutukwash kand kwijik chisu tufanyidina kulond ni chisu cha kuninet. Ni ukutukwash kand kuyibangin antu akwau pa chisu chikwetau yakamish.​—1 Tes. 4:11. w23.12 20 par. 8-9

Kambuy Paul wafunda mazu minam ku chikumangen cha ku Rom. Akadivar nau anambaz ileja piur pa Yehova ni Yesu, ikala ni ritiy ni kupwa ikala in Kristu. Chawiy Nzamb ‘wayitazuka anch atentamin mulong wa ritiy’ ni wayizizila many kusutil spiritu utumbila. (Rom 5:1) Mwaning, ikala ni ruchingej ripandakena kuwap. Mu kusut kwa machuku Paul wayifundila in Kristu azizidilau many a ku Efes piur pa ruchingej rayinkishau kud Nzamb. Akutambul ruchingej ra “uyaj wa uswan wend washilayimu kupan kudi antu a Nzamb.” (Efes 1:18) Paul walejana kand kud in Kolosay mutapu ukuwanyina ruchingej riner. Waritazuka anch ‘ruchingej rikulamidinanyau mu maur.’ (Kol. 1:4, 5) Ruchingej ra in Kristu azizidilau many, rid ra kuyivumbul mulong wa kwikal ni mwom wa chikupu mwiur pakuyikelau pamwing ni Kristu.​—1 Tes. 4:13-17; Kuj. 20:6. w23.12 9 par. 4-5

Dizu da dishin dilondina anch “kulam” adisadina mu usalay mulong wa kumekesh amasalay akerang mulong wa kulam musumb ni kuuchidij mulong wa akankuny. Antu a mu musumb uchidijinau alalang mu chisambu, mulong ading ij anch ad mu diking. Chilik chimwing, anch chisambu cha Nzamb chalam michim ni manangu metu tukat kwiyov zoong ni kwijik anch tud mu diking. (Kus. 4:8) Mud Ana, ap anch mulong wetu upwilap kamu kapamp kamwing, tukutwish kwikal ni chisambu. (1 Sam. 1:16-18) Ni anch twiyov zoong chikat kutuswapel kutong nawamp ni kukwat mipak nawamp.Yom ik tufanyidina kusal? Anch wiyakamish, mwita Yehova ukwash. Mutapu ik? Lembil mulong wa kwikal ni chisambu cha Nzamb. (Luka 11:9; 1 Tes. 5:17) Anch urishin ni yakamish, dandamen kulembil ni ukutwish kuman anch chisambu cha Yehova chikulam muchim ni manangu mey.​—Rom 12:12. w24.01 21 par. 5; 22 par. 6

Mulong wa kutumbish dijin da Tatukwend, Yesu wajijamena kuzengol, masaal, ni kumudimben makasu. Wading wij anch ufanyidin kumuziyin Tatukwend mu yom yawonsu, kafanyinap kov usany wa chom ap chimwing. (Heb. 12:2) Wading wij kand anch Satan wad ukat kumupak mu chisu chinacha chikash. (Luka 22:2-4; 23:33, 34) Satan wading utongin anch ukutwish kuziyish kujijaman kwa Yesu, pakwez Satan wakanganya kamu chakin! Yesu wamekesha anch Satan ud mukamakasu muyimp ni Yehova ukwet atushalapol ashinshamena akutwisha kulam kushinshaman kwau chikalap nchik choziu chikash! Ov, ukatin kumusangaresh Mwant wey uyikedina? Dandamen kutumbish dijin da Yehova ni kuyikwash antu akwau kwilej mikadil yipandakena kuwap ya Nzamb wetu. Anch wasal mwamu umwimburijin Yesu. (1 Pita 2:21) Mud Yesu, umusangareshin Yehova ni kumekesh anch mukankuny Nend Satan ud mukamakasu muyimp! w24.02 11-12 par. 11-13

Mu mivu yitan yasutina ey, antu avud ayibatishin mulong wa kwikal atuman a Yehova. Anch wipan kud Yehova, utondin kwikal mwin kwilej wa Yesu Kristu ni kusal anch rusot ra Nzamb rikala ra usey nakash mu mwom wey. Yom ik yimwitinau mwin Kristu wipanina kal? Yesu ulondin anch: “Anch muntu mwawonsu ukimbin kwinlondul, ufanyidin kwitun amwinend.” (Mat. 16:24) Dizu da Grek dakarumunau anch “kwitun amwinend” akutwish kand kudikarumun anch “kwidiul amwinend.” Mud muntu wipanina kal kud Yehova, ufanyidin kulik chom chin chawonsu chimukisishina Yehova. (2 Kor. 5:14, 15) Chinech chirumburikin anch ufanyidin kulik “yisalijok ya wuntu,” mud yisal ya masandj. (Gal. 5:19-21; 1 Kor. 6:18) Ov, kuziyin mbil jinej kukusal anch mwom ukukasiken? Bwat kwau, anch umukatin Yehova ni ukwet kashinsh anch yijil yend yid yiwamp kud ey.​—Kus. 119:97; Isay 48:17, 18. w24.03 2 par. 1; 3 par. 4

Yehova ukat kupan spiritu utumbila kud antu itiyijinay. (Mat. 12:18) Tukutwish kwiyipul anch, ‘Nikat kumekesh mikadil yidokiling ku spiritu utumbila?’ Ov, ukat kuyishimpishin antu akwau muchim kupandakanamu pa chisu wading kandikal umwijik Yehova? Chawiy, piudandamedina kumekesh dibuj da spiritu ukwikal ni kashinsh kamekeshina anch ukwet dilau da Yehova. Yehova ukat kusadin usey wa difut kud antu akweta dilau dend. (1 Tim. 2:5, 6) Pakwez chikwikal nchik anch twiyov anch tukwetap dilau da Yehova ap anch tukwet ritiy mu difut ni atubatishin kal? Vurik anch, tufanyidinap kuchingejin pa yovil yetu, pakwez tufanyidin kumuchingejin Yehova. Ukat kuyiman antu akweta ritiy mu difut anch atentamin ku mes mend ni ushidinamu kuyiyukish. w24.03 30 par. 15, 17