Ngond wa 10

Ov, chakukasikenap kal kuziyin? Mwamu chamushikena Mwant David, chawiy wamulembila Nzamb anch: “Nkasikesha chakwel nikal nich muchim wa [kuziyin.]” (Kus. 51:12) David wading umukatin Yehova. Pakwez chisu chimwing chamukasikena David kuziyin, chawiy chimwing niyetu chikat kutushiken. Mulong wak? Chakusambish, mulong twaswana kal chisal chiyimp cha kubwambwil. Chakaad, Chisu chawonsu Satan ukat kutubachik kubwambwil mud mwasalay kal ndiy. (2 Kor. 11:3) Chakasatu, mulong mu mangand tushicha mud mwikadil wa kubwambwil, uda “[spiritu] uyikedila antu akata kumubwambwil Nzamb.” (Efes 2:2) Tufanyidin kusal usu nakash chidap kwau ching kurish ni chaku cha kusal yitil, pakwez tufanyidin kand kusal usu wa kurishikish yibachikin ya Satan ni mangand mend piur pa kubwambwil. Chawiy, tufanyidin kusal usu nakash wa kumuziyin Yehova ni kusal kand usu wa kuyiziyin antu awonsu atondinay kal mulong wa kututakel. w23.10 6 par. 1

Yom ik tukutwisha kwilejin ku chilay cha Yesu pakarumunay mem kwikal maar? Chilay chinech chitufundishin anch tufanyidin kwikepish. Yesu kibazap mulong wa chilay chasalay; kibazangap ap pakemp piur pa yom yasalangay. Pakwez, nich kwikepish wapanang chisu chawonsu katumb kawonsu kud Tatukwend. (Yoh. 5:19, 30; 8:28) Anch twamwimburij Yesu kusutil kudandamen kwikal ikepishina, tukwibazap mulong wa yom tusadina. El twibazany mulong wa dilau tukweta da kumusadin Nzamb ushimokishena, pa ndond pa kwibaz ayinetu. (Jer. 9:22, 23) Tumwinkishan Yehova katumb kamuwanyidina. Mulong kwikil chom chiwamp tukutwisha kusal pakad ukwash wend. (1 Kor. 1:26-31) Anch tud ikepishina, tukukimbap anch ing atutumbishang mulong wa yom yiwamp twayisadinang antu akwau. Pakwez tukusangar mulong twij anch Yehova umen ni ukwatin nich usey yom tusadina. (Ilakej ni Mateu 6:2-4; Heb. 13:16) Chakin kamu, tukat kumusangaresh Yehova anch twamwimburij Yesu kusutil kwikal ikepishina.​—1 Pita 5:6. w23.04 4 par. 9; 5 par. 11-12

Kambuy Paul amupepila chakwel ayikasikesha in Kristu kutek maswir ma antu akwau pa ndond ya kusambish. Mutapu ik tukutwisha kusadin chiyul chinech pa chisu cha yikumangan? Kusutil kuvurik anch antu akwau niyau akwet kuswir kwa kwakul ku yikumangan. Tongin pa chom ech. Anch wambambin nau arund ney, ov, ukukat ey ulonda nakash kushik ni mu chilik cha kuyikangesh kuman niyau mutapu wa kulond? Bwat! Ukukat anch niyau alond. Chilik chimwing, tukatining anch antu akwau niyau akula ku yikumangan. Chakin kamu, mutapu umwing wa kuyikasikesh akadivar ni anambaz ud wa kuyinkish mutapu wa kulond piur pa ritiy rau. (1 Kor. 10:24) Chom cha usey chid, kupan yakul yiswimp. Ap chisu wakwila mu wiswimp, ipuk kwisambin manans mavud. Anch wisambin yom yawonsu yidia mu paragraf, antu akwau kakumanap yom ya kulond. w23.04 22-23 par. 11-13

Tufanyidin kuvurik anch chid cha usey kudandamen kuyikwash antu akwau, pakampwil mu mudimu wa kulejan. Tufanyidin kwikal isikena mu mudimu wetu wa kulejan. Tukat kusankanijan ni antu akweta yitiyij, yaku ni adiokila kwi ndond kushalijan. Kambuy Paul wading kulejan kukwatijan ni mashakamin ma antu, chawiy tukutwish niyetu kwimburij chilakej chend. Yesu wamutonda Paul kwikal mud ‘kambuy wa michid.’ (Rom 11:13) Chawiy, Paul walejana kud in Yuda, in Grek, antu ileja nakash, antu akweta mashakamin ma pansh, antakel ni ant. Mulong wa kuyipukun antu ku michim, Paul wikala “yom yawonsu kud antu a mitapu yawonsu.” (1 Kor. 9:19-22) Washinshikina pa yaku ya antu, yishankur, yitiyij ya in kumutesh, ni walejana kukwatijan ni mashakamin mau. Tukutwish niyetu kuwapish mutapu wa kulejan anch twikal isikena ni kupakish kutongijokin pa mutapu tukutwisha kumukwash muntu ni muntu. w23.07 23 par. 11-12

Kwitudish ud mwikadil ukata kulet usu, kadiap kuziy. Chifanyidin kwikal ni usu winou wa mukach mulong wa kulik kuzazat anch kwashiken chom chipakina kwitudish. Kwitudish ud mwikadil udiokila ku ‘dibuj da spiritu utumbila.’ (Gal. 5:22, 23) Dizu da Grek dikarumwinau anch “kwitudish” adisadinang yisu yimwing mulong wa kurumburil piur pa kabar wa mu masuku upitinau kud muntu. Tong bil piur pa kabar wa mu masuku wasambisha kal kwitudish. Ap anch witudishin katat, pakwez ukwet usu. Mutapu ik tukutwisha kwikal itudishina ni chisu chawiy chimwing kwikal ni usu? Tukutwishap kusal mwamu kusutil usu wetu ayinetu. Tufanyidin kulembil mulong wa kwit spiritu utumbila, ni kumwit Nzamb chakwel atukwasha kukudish mwikadil winou upandakena kuwap. Kud antu avud ilejina kal kwikal itudishina. Chilakej Atuman avud ikasikeshin kal kwakul nich kwitudish chisu chayisarumunau, chinech chayikwasha antu akwau kwikal ni chitongijok chiwamp piur pa atuman a Yehova.​—2 Tim. 2:24, 25. w23.09 15 par. 3

Mu chishimushimu chend, kambuy Yohan wamana mwiur amakurump 24 akat kumwifukwil Yehova. Amushimana Nzamb nich kashinsh anch ndiy uwanyidina kutambul “uyaj ni katumb ni ukash.” (Kuj. 4:10, 11) Angel ashinshamena akwet niyau mayingishin ma kumushiman ni kumutumbish Yehova. Ad nend mwiur ni amwijikin kal nawamp. Akat kuman mikadil yend kusutin yom yikatay kusal. Kushinshikin yom yisadinay Yehova kukat kuyibachik kumushiman. (Job 38:4-7) Niyetu tukatin kumushiman Yehova mu malembil, mu kumulej yom tukatina ni yitusangareshina piur pend. Piutangina ni kwilej Bibil, sal usu wa kujingunin mikadil yimekeshinay Yehova, pakampwil yikusangareshina ey. (Job 37:23; Rom 11:33) Kupwa, muleja Yehova mutapu wiyovila piur pa mikadil yiney. Tukutwish kand kumushiman Yehova mulong wa yom yisadinay mulong wetwetu ni mulong wa akadivar nau anambaz netu awonsu.​—1 Sam. 2:1, 2. w23.05 3-4 par. 6-7

Mu muvu wa 1919, Babilon Mujim kikalap kand ni usu padiau antu a Nzamb. Mu muvu winou, ‘kashalapol ushinshamena ni kubabal’ wasambisha kusal mudimu mulong wa kuyikwash antu atentamina kusambish kwendin mu “Mukombil Utumbila” wazurika. (Mat. 24:45-47; Isay 35:8) Mudimu wasalau antu akwau pasak wa kurijek njil wayikwasha antu asambisha kwendin mwi njil yijim kwilej yom yivud piur pa Yehova ni ntong jend. (Jnsw. 4:18) Afanyina kand kushakam kukwatijan ni mbil ja Yehova. Yehova kachingejinap anch atwend aswimpa kamu yisal yau yawonsu kapamp kamwing. Pakwez, wayikwasha kuswimp pakemp pakemp. Etu awonsu tukwikal ni musangar nakash anch kusambish katat, twamusangaresh Nzamb wetu mu yom yin yawonsu tusadina! Njil yin yawonsu yikweting kuswir kwa kuyirijek chisu chawonsu. Kudiokal mu muvu wa 1919, mudimu wa kurijek “Mukombil Utumbila” wadandamena, nich chitongijok cha kuyikwash antu avud kudiokal mu Babilon Mujim. w23.05 17 par. 15; 19 par. 16

Akadivar a mu Chisak chitakedina ayifumbin kal pakampwil ankwash avud mu ma komite kushalijan ma Chisak Chitakedina. Ankwash inay ashinshamena akwet yisend yivud nakash mu dirijek. Ayitenchikin kal mulong wa kudandamen kuyitakel amikoku a Kristu. Chisu chikuyau azizidinau many mwiur kwinsuden kwa mar makash, antu a Yehova pa divu akudandamen kumwifukwil nich kushinshaman. Mulong Yesu ukudandamen kutakel dirijek detu, atushapol a Nzamb akudandamen kumwifukwil Yehova nich kushinshaman. Twij anch chirung chinicha, kubombakan kwa michid kutazukinay Bibil anch Gog wa Magog, akuyirishikish antu a Nzamb. (Ezek. 38:18-20) Pakwez kurishikish kwinoku kukukangany, kukuyikangeshap antu a Nzamb kumwifukwil Yehova nich kushinshaman. Ukuyikwash chakin kamu! Mu chishimushimu, kambuy Yohan wamana “runtu ruvud” ra amikoku akwau a Kristu. Yohan amuleja anch “Antu inay” adokil “mu mar makash.” (Kuj. 7:9, 14) Chakin kamu, Yehova ukuyichidij! w24.02 5-6 par. 13-14

Yom ik tukutwisha kusal mulong wa kutambul spiritu utumbila? Tufanyidin kumwit mu malembil, kwilej dizu da Nzamb diapepilau kud spiritu winou, ni kukumangan pamwing mu dirijek ditakedilau kud spiritu. Kusal mwamu kukutukwash kukudish ‘dibuj dia spiritu.’ (Gal. 5:22, 23) Nzamb ukat kupan spiritu utumbila ching kusu kud antu adandamedina kulam yitongijok ni mwikadil wishitwila. Kakudandamenap kutwinkish spiritu wend anch twadandamen kutongijokin pa yom yijondila ap kuyisal. (1 Tes. 4:7, 8) Mulong wa kudandamen kutambul spiritu utumbila, tufanyidin kand kulik kudiul “mazu malondilau aruu a Nzamb.” (1 Tes. 5:20) “Uruu” winou wadiokala ku spiritu wa Nzamb, wisambidin kand dichuku da Yehova, ni chirung chetu chidia cha kuswapej. Tufanyidinap kudiosh dichuku dined mu manangu metu, ap kutong anch Armagedon kakushikap kwend pa chirungu tuchidia aom. Pakwez, tukat kumekesh anch tuchingejin anch dikushik kamu piswimp ap, ap anch tudilamin mu manangu, kusutin kwikal “in kudandamen kudi Nzamb.”​—2 Pita 3:11, 12. w23.06 12 par. 13-14

Yom ik tufanyidina etu in Kristu kusal anch yipich ya pornografi yamekan pa telefon ap tablet wetu? Tufanyidin kapamp kamwing kulik kutal yipich yiney. Chikutwish kutuswapel kusal mwamu anch twavurik anch chom cha usey nakash tukweta ud urund wetu ni Yehova. Ap yipich yakad kwikal ya pornografi yikutwish kutulangwish maku ma kusal masandj. Mulong wak tufanyidina kuyipuk? Mulong tukatinap kusal kachom ap kakemp kakutwisha kutushikij kwikal ni yitongijok ya kusal masandj mu muchim wetu. (Mat. 5:28, 29) David udia mukurump wa chikumangen mu Tayiland ulondin anch: “Nikat kwiyipul amwinam anch: ‘Ap anch yipich yimeken anch yidiap ya pornografi, ov, Yehova ukat kusangar chisu niyitadina?’” Kutong mutapu winou kukat kwinkwash kusal yom nich manangu. Chom chikutwisha kutukwash kusal yom nich manangu kud kukudish wom wakin wa kulik kumunenganesh Yehova. Wom wa Nzamb diawiy “disambishil dia manangu.” w23.06 23 par. 12-13

Dizu “yikumbu” dikutwish kufanakesh yikumangen yetu. Pa chirung cha mar makash, tukwikal mu diking mud mwakanay Yehova kusutin kwikal mu uumwing nau ambay netu in Kristu. Chawiy, kusambish kamu nlel tufanyidin kusal usu wa kulik kwau kwimen pa kudiul kuburen kuwanyin kwa akadivar, pakwez tufanyidin kand kuyikat. Tukupand anch twasal mwamu! “Dichuku Dijim” dia Yehova dikwikal diyimp kud antu. (Sof. 1:14, 15) Ap antu a Yehova akuman mar. Pakwez anch twirijek kusambish nlel, chikutuswapel kulik kuzazat ni kuyikwash antu akwau. Tukujijamen chikokujol chin chawonsu tukurisha nich. Tukusal usu wetu wawonsu mulong wa kuyikwash ambay netu arishina ni mar kusutin kumekesh ranaken ni kuyinkish yom yiswirikedinau. Ni anch twilej kuyikat akadivar nau anambaz netu nlel, tukuyikat kand mu machuku ma kurutu. Kwinsudien, Yehova ukutufut mwom wa chikupu mu mangand tukeza kavuramen yinship yikash ni mar.​—Isay 65:17. w23.07 7 par. 16-17

Dizu da Nzamb yisu yivud dikat kuyimekesh antu ashinshamena mud antu akweta usu. Pakwez antu avud pakach pau ading akweta usu amekana yisu yivud mud kadingap ni usu. Chilakej, yisu yimwing, Mwant David wiyova anch ‘wading ukwet usu mud mukandu,’ pakwez, yisu yimwing kand ‘wova wom.’ (Kus. 30:7) Ap anch Samson wading nich usu wamukwashau kusutil spiritu wa Nzamb, pakwez wading wij anch pakad usu winou udokila kud Nzamb wafanyina ‘kuburen usu ni kwikal mud antu akwau.’ (Ank. 14:5, 6; 16:17) Amakundj inay ashinshamena ading nich usu mulong Yehova ndiy wayinkishau. Kambuy Paul wading wij anch ukwet kuswir kwa usu wa Yehova. (2 Kor. 12:9, 10) Ndiy wading ni milong ya ukash wa mujimbu. (Gal. 4:13, 14) Yisu yimwing, chamukasikenang kusal yom yafanyinangay kusal. (Rom 7:18, 19) Yisu yimwing kand wovang wom piur pa yom yafanyina kumushiken. (2 Kor. 1:8, 9) Pakwez, chisu chading chiziyinay Paul, chawiy chisu chadingay ni usu. Mutapu ik? Yehova wamwinkisha Paul usu wading uburedinay. Yehova wamwinkisha Paul usu. w23.10 12 par. 1-2

Anch chisu chimwing twiyov anch tukwetap usey, tukutwish kuvurik anch Yehova amwinend ndiy watupwitina kud ndiy. (Yoh. 6:44) Ukat kuman yom yiwamp mu etu yitwakad kuman ayinetu kuman ni wij muchim wetu. (2 Jsng. 6:30) Chawiy tufanyidin kumuchingejin patulejinay anch tud a usey kud ndiy. (1 Yoh. 3:19, 20) Kurutu twileja uyakin, amwing pakach petu asala yom yasala anch adandamen kwifish nich. (1 Pita 4:3) Ap in Kristu ashinshamena arisha niyau ni kuziy kwinoku. Ov, niyey muchim wey ukat kukufish nich? Anch mwawiy, chikutwish kukukasikesh pakwijik anch atushalapol ashinshamena a Yehova arisha niyau ni yovil yiney. Chilakej, pavurikangay kuburen kuwanyin kwend, kambuy Paul wiyova anch ud kwend ntany. (Rom 7: 24) Chakin kamu, Paul wading wakarumukin kal ku yitil yend ni ading amubatishin kal. Pakwez, walonda amwinend anch “nid mukemp nakash pakach pa atwimbuy” ni mukayitil “muyimp.”​—1 Kor. 15:9; 1 Tim. 1:15. w24.03 27 par. 5-6

Dilejan diakusambish tukutwisha kwilejin ku mupak uyimp wa Mwant Jowas did anch tufanyidin kutond arund awamp akutwisha kutukwash, amukatina Yehova ni asadina yom yimusangareshina. Tufanyidinap kutond ching arund akweta mivu yimwing ni yetwetu. Vurik anch, Jehojada wading mukurump kumusutamu Jowas. Tufanyidin kwiyipul piur pa mupak wa kutond arund anch: ‘Ov, ankwashin kukasikesh ritiy ram mudiay Yehova? Ankasikeshin kulimish yijil ya Nzamb? Akat kwisambinang piur pa Yehova ni piur pa uyakin wend? Amekeshining anch akat kulimish yijil ya Nzamb? Akat kwinlej yom nikatina kutesh bil anch akat kwinyul nich kutakaman?’ (Jnsw. 27:5, 6, 17) Chakin kamu, anch arund ney kamukatinap Yehova, ufanyidinap kwikat nau. Pakwez ufanyidin kukat arund amukatina Yehova, awiy afanyidina kwikal arund ney.​—Jnsw. 13:20. w23.09 9 par. 6-7

Dizu alpha did dakusambish mu alfabe wa Grek, ni dizu omega dawiy dipwishinau nich. Pasadidinay dizu ‘Alpha ni Omega,’ Yehova utukwashin kutesh anch ang wasambish chom ching kamu wachishikij kwinsudien. Kupwa kwa Yehova kumutang Adam ni Ev, wayileja anch: “Valijanany, vulijanany, shakamany, izwishany ngand ni kuyiziyish.” (Dis. 1:28) Pa chisu chinicha, chid mud Yehova wading ulondin anch “Alpha.” Walejana chitongijok chend patok: Chitongijok chinech chikuwanyin pakwizwishau an aziyidina ni awanyidina a Adam ni Ev divu ni kudikarumun kwikal paradis. Mu machuku ma kurutu, anch chitongijok chend chawanyin Yehova ukwikal ni mayingishin ma kulond anch “Omega.” Kupwa kwa kupwish kutang “diur ni divu ni mitapu ya yom yawonsu,” Yehova wapana kashinsh kamekeshina anch chitongijok chend chikuwanyin. Yehova wapana kashinsh anch kwikil chom chafanyina kumukangesh kuwanyish chitongijok chend piur pa antu. Chafanyina kuwanyin kwinsuden kwa dichuku da sambwad.​—Dis. 2:1-3. w23.11 5 par. 13-14

Weny ukash wa kudiokal mu Babilon kuya mu Isarel wafanyina kusend angond 4, pakwez Yehova wayishilamu anch kukwikalap ubaj ap umwing ukutwisha kuyikangesh kuchirik. In Yuda ading ashinshamena amana anch kuchirik mu Isarel kwafanyina kuyiletin yiyukish yivud kupandakanamu yom yafanyinau kusha. Chiyukish chijim nakash diading difukwil diau. Kimwadingap tempel wa Yehova mu Babilon. Kwadingap chintamb pafanyinau in Isarel kupanin milambu ya kosh kukwatijan ni Chijil cha Moses, ni kwadingap in kupesh mulong wa kuwanish chisend chinech. Chikwau kand, uvud wa apagan ading akad kumulimish Yehova ni yijil yend wading upandakenamu uvud wa antu a Yehova. Chawiy, tunan twa in Yuda ading amukatina Nzamb akimba mutapu wa kuchirik kol kwau mulong wa kuchirish difukwil dishitwila. w23.05 14-15 par. 3-4

Tukwet kand kuswir kwa ukwash wa spiritu utumbila wa Nzamb ukutwisha kutukwash kudandamen kwend ‘mud an a chitokish.’ Mulong wak? Mulong chiswapelap kushal ishitwila mu mangand minam mijondina. (1 Tes. 4:3-5, 7, 8) Spiritu utumbila ukutwish kutukwash kurish ni yitongijok ya mangand minam kuwejaku ni ma filozofi ni yitongijok ya antu yikata kurishikish yitongijok ya Nzamb. Spiritu utumbila ukutwish kutukwash kand kukudish “yom yiwamp ya mitapu yawonsu, ni kutentam.” (Efes 5:9) Mutapu umwing tukutwisha kutambul spiritu utumbila ud wa kumwit mu malembil. Yesu walonda anch Yehova ukat “kupan [spiritu] utumbila kudi awonsu akata kwit.” (Luka 11:13) Ni tukat kutambul kand spiritu utumbila anch twamutumbish Yehova pamwing ku yikumangan ya win Kristu. (Efes 5:19, 20) Spiritu utumbila ukutwish kutukwash kushakam mu mutapu umusangareshina Nzamb. w24.03 23-24 par. 13-15

Ov, ukatin kwikal mwin kushimpish muchim nakash? Anch chid mwamu, lembil mulong wa kwit kushimpish muchim. Kushimpish muchim ud mwikadil wa dibuj dia spiritu. (Gal. 5:22, 23) Chawiy tukutwish kumwit Yehova spiritu utumbila ni kumwit kand chakwel atukwash kukudish dibuj da spiritu winou. Anch twarish ni chikokujol chipakina kushimpish muchim kwetu, tufanyidin ‘kudandamen kwit’ spiritu utumbila chakwel atukwash kushimpish muchim. (Luka 11:13) Tukutwish kand kumwit Yehova chakwel atukwash kuman yom mud muyimenay ndiy. Kupwa kwa kulembil, tufanyidin chad kusal usu wa kushimpish muchim dichuku diawonsu. Anch twadandamen kulembil mulong wa kwit kushimpish muchim ni anch twikasikesh kushimpish muchim, mwikadil winou ukusambish kukul mu muchim wetu ap anch pakur twadingap in kushimpish muchim. Kushimpish muchim kutukwashining kand kutongijokin pa yilakej yidia mu Bibil. Mu Bibil mud yilakej yivud ya antu ashimpisha muchim. Anch twatongijokin pa jinsangu jinej, tukutwish kwilej mitapu kushalijan ya kumekesh kushimpish muchim. w23.08 22-23 par. 10-11

Yesu wamwinkisha kambuy Pita kashinsh anch Yehova ukumuwanyishin maswir mend. Pavumbukay Yesu, wamukwasha Pita nau in kwilej akwau kukwat ansh avud mu chilay. (Yoh. 21:4-6) Chakin kamu chilay chinech chamwinkisha Pita kashinsh anch Yehova ukumuwanyishin maswir mend. Pamwing ap kambuy Pita wavurika mazu ma Yesu malondina anch Yehova ukuwanyish maswir ma antu akata ‘kudandamen kukimb bil Want.’ (Mat. 6:33) Yom yiney yawonsu yamukwasha Pita kutek mudimu wa kulejan pa ndond ya kusambish kulik mudimu wa kuta ansh. Walejana nich kutakaman pa dichuku da Pantekot wa 33 C.C., chinech chayikwasha antu avud kwitiy rusangu ruwamp. (Mid. 2:14, 37-41) Kupwa wayikwasha in Samaria ni antu akad kwikal in Yuda kwilej piur pa Yesu ni kwikal in kwilejend. (Mid. 8:14-17; 10:44-48) Yehova wamusadina Pita mu mutapu ushimokishena nakash mulong wa kuyikwash antu a michid kwandam mu chikumangen cha win Kristu. w23.09 20 par. 1; 23 par. 11

Piswimp mivu yaad kupwa kwa in Babilon kushesh Yerusalem, Mwant Nebukadinesar wa mu Babilon wamana mu chilat chirumbidij chamwovisha wom nakash. Walonda kuyijip in manangu in awonsu kuwejaku ni Daniel, anch kamulejap chilat chend ni kurumburik kwach. (Dan. 2:3-5) Daniel wafanyina kusal yom pakad kulab; chamwamu antu avud afanyina kufa. Ndiy “waya swa kudi mwant mulong wa kumwit chisu chakwel ndiy ukutwish kumurumburil mwant chilat.” (Dan. 2:16) Chinech chading chimwitin kutakaman ni ritiy rikash. Bibil kalondinap anch Daniel wasambela kurumburil chilat kurutu kwa kumulembil Yehova. Wayileja arund nend “kumulembil Nzamb wa mwiur chakwel ndiy ayileja kand kurumburik [kwa] ujindj winou.” (Dan. 2:18) Yehova wakula ku malembil mau. Kusutin ukwash wa Nzamb, Daniel watwisha kurumburil chilat cha Nebukadinesar. Daniel nau arund nend kayijipap. w23.08 3 par. 4

Tal yiyukish yidiokiling ku kushimpish muchim. Anch tushimpishin muchim, tukat kwikalang ni musangar ni tukatap kuzazat. Komb kushimpish muchim kukat kukwash kwikal nich ukash uwamp wa mujimbu ni wa mu manangu. Anch twayishimpishin akwetu muchim, tukat kwikal nau mu urund uwamp. Chikumangen chetu chikat kwikal mu uumwing nakash. Anch muntu watusarumun, kulik kujiman swa kukat kukwash kukepish mulong. (Kus. 37:8; Jnsw. 14:29) Pakwez cha usey nakash, anch twashimpish muchim, tukat kumwimburij Tatukwetu wa mwiur ni tukat kumusejin piswimp nakash. Kushimpish muchim ud mwikadil uwamp ni wa ukwash nakash kud etu awonsu! Ap anch chikutuswapelap chisu chawonsu kushimpish muchim, pakwez ku ukwash wa Yehova tukutwish kudandamen kukudish mwikadil winou. Ni patuchingedina nich kushimpish muchim ngand yisu, tukutwish kwikal nich kashinsh anch “mes ma [Yehova] matadil kudi awiy akata kumulimish ndiy, awiy kamu akata [kuchingel] rukat rend ridimukina.” (Kus. 33:18) El etu awonsu tukwatany mupak wa kudandamen kudjal mwikadil wa kushimpish muchim. w23.08 22 par. 7; 25 par. 16-17

Jakobu walonda anch muntu ukutwish kutong anch ukwet ritiy, pakwez ov, rimeken mu yisalijok? (Jak. 2:1-5, 9) Jakobu wisambidin kand piur pa muntu umumena ‘mukadivar ap nambaz uburedin yidjal ap yakudia’ chad ndiy walik kumukwash. Ap mwamu muntu winou ukutwish kulond anch ukwet ritiy, pakwez rimekedinap mu yisal; muntu ukutwish kulond anch ukwet ritiy, pakwez yisal yend yikumekesh anch kakwetap kwend ritiy. (Jak. 2:14-16) Jakobu wasadina chilakej cha Rahab muntu wamekesha ritiy rend mu yisal. (Jak. 2:25, 26) Watesha piur pa Yehova ni witiyija anch ukuyikwash in Isarel. (Jos 2:9-11) Wamekesha ritiy rend mu yisal ni wayichidija in kutentish aad a in Isarel adinga mu ubaj. Mud chibudikin, mband winou wakad kuwanyin ni wading wakad kwikal mwin Isarel amutazuka anch utentamin, mud muchading piur pa Aburaham. Twilejin kusutil chilakej cha Rahab anch chid cha usey nakash kumekesh ritiy retu mu yisal. w23.12 5-6 par. 12-13

Mulong tud in Kristu, tukatiningap kwimen kwau kusu pa kwijik malejan ma piur piur ma Bibil. Nich ukwash wa spiritu utumbila wa Nzamb, tukat kwilej ‘djat ni yom yijingamina nakash ya Nzamb.’ (1 Kor. 2:9, 10) Ov, ukutwish kwitekin mupak wa kwilej mutu wa mulong umwing wa Bibil ukutwisha kukukwash kumusejin Yehova chipandakena? Chilakej, ukutwish kushinshikin mutapu wayimekeshinay atushalapol end a pasak rukat ni mutapu umekeshina yom yiney anch ukukatin niyey. Ukutwish kand kwilej mutapu wakatay Yehova anch amwifukwil kud in Isarel ni kwilakej nich mutapu ukatinay anch in Kristu amwifukwila nlel unou. Ap kand ukutwish kwilej chikurikina piur pa mauprofet mawanyishay Yesu mu mwom ni mu mudimu wend panap pa divu. Ukutwish kutan musangar nakash mu kwilej mitu ya milong mud yiney mu kusadin Index des publications des Témoins de Jéhovah ap Ukwash wa Kukimbijol Nich wa Atuman a Yehova. Kwilej Bibil chikurikina kukutwish kukasikesh ritiy rey ni kukukwash “kutan ronganyin ra Nzamb.”​—Jnsw. 2:4, 5. w23.10 18-19 par. 3-5

Dizu disadidinay Pita anch ‘rikurikina’ dikimbin kurumburik anch “kwikal ni rukat ripandakena kud umwing ni mukwau.” Chikunku cha kaad cha verse winou chirumburil usu ukutwisha kwikal ni rukat rikurikina. Rukat rikurikina mulong wa akadivar netu rikat kubwik yitil yau. Tukutwish kutongin mu mutapu ou: Tukat kulam rukat retu ni makas maad, mud chikunku cha diswun chidadimukina, ni kuchidadumun kushik ni pichikubwikina kadap chitil chimwing, kadap yaad, pakwez ‘miril ya yitil.’ Kubwik ud mutapu wa kulond umekeshina kulikishin. Mud mutapu ukutwisha chibel cha diswun kubwik pa chitaj, rukat ni rawiy rikutwish kubwik kuziy ni kuburen kuwanyin kwa antu akwau. Rukat retu mulong wa antu akwau rifanyidin kwikal rikash kushik ni mu chilik cha kuyilikishin ambay netu in Kristu kuburen kuwanyin kwau, ap anch chikasiken nakash kusal mwamu yisu yimwing. (Kol. 3:13) Anch twatwish kuyilikishin akwetu tukumekesh anch rukat retu rikasiken ni anch tukatin kumusangaresh Yehova. w23.11 11-12 par. 13-15

Padingay mukurump, Mwant Yosias wasambisha kurijek tempel. Pa chisu chinicha, abudikina “mukand wa Yijil ya [Yehova] yamwinkishau Moses.” Pateshay mwant mazu ma mukand winou, waswimpa yom kapamp kamwing mulong wa kuziyin ku mazu ma mukand winou. (2 Jsng. 34:14, 19-21) Ov, ukutwish kutang Bibil pakad kujing? Ov, usangaredin kusal mwamu? Ov, walamin kal maverse makutwisha kukukwash? Pawanyishay piswimp mivu 39, Yosias wasala chom chimwing chamushikija ku rufu. Wichingejina amwinend pa ndond pa kukimb umutakel wa Yehova. (2 Jsng. 35:20-25) Kud dilejan dia usey tudioshidinaku. Chikalap nchik uvud wa mivu tukweta, ap twasutishina kal mu kwilej Bibil, tufanyidin kudandamen kukimb umutakel wa Yehova. Chinech chirumburikin kumulembil chisu chawonsu mulong wa kwit umutakel, kwilej Dizu diend ni kwitiy yiyul yitwinkishinau kud in Kristu aswila. Mwamu ukutwish kwipuk kukwat mipak yiyimp ni kwikal ni musangar mu mwom.​—Jak. 1:25. w23.09 12 par. 15-16

Bibil wisambidin piur pa amband avud nakash ading amukatina Yehova ni kumusadin. Amekesha mikadil yilejenau mu mifund anch, “akad mboj” ni “in [win yakin] mu yom yawonsu.” (1 Tim. 3:11) Chikwau kand, anambaz akutwish kutan yilakej ya kwimburij ya anambaz aswila adia mu chikumangen cha win Kristu. Anambaz ayangadim, ov, wijanyaku anambaz umenanya anch ad yilakej yiwamp ukutwishanya kwimburij? Shinshikin mikadil yau yiwamp. Tongijokin mutapu ukutwisha niyey kumekesh mikadil yiney. Kwikepish ud mwikadil wa usey mulong wa kwikal mwin Kristu wakin. Anch muntu mband wikepishin ukusanger urund uwamp ni Yehova ni pamwing ni antu akwau. Chilakej mband umukatina Yehova ukat kulimish nich kwikepish umutakel upaninay Yehova piur pa antu atakedina chikumangen ni ntakel wa dijuku. (1 Kor. 11:3) Mbil yiney akutwish kuyisadin pakampwil mu chikumangen ap mu ditenchik da dijuku. w23.12 18-19 par. 3-5

Yehova uyitin amakundj kuyikat akajau mu kuyiwanyishin maswir ma kumujimbu, ma mu manangu ni ma mu spiritu. Kukudish ukaliweny wa kutong, kuyilimish amband ni kwikal muntu wa kuchingejin yikutwish kukukwash kwikal mbay wa uruw muwamp. Kupwa kwa kwatan, ukutwish kwikal tatuku. Yom ik ukutwisha kwilejin kud Yehova mulong wa kwikal tatuku muwamp? (Efes 6:4) Yehova wamuleja Mwanend Yesu anch: umukatin ni ukwet dilau dend. (Mat. 3:17) Anch wikal tatuku ikal ni kashinsh anch ukat kuyelang aney chisu chawonsu anch uyikatin. Yijikitisha mulong wa yom yiwamp yisadinau. Atatuku imburijina chilakej cha Yehova akat kuyikwash anau kwikal in Kristu amakundj ni amband aswila. Ufanyidin kwirijek katat mulong wa chisend chey kusutin kuyikat antu akwau, mu dijuku dey, mu chikumangen, ni mu kumekesh rukat rey ni kuyiman anch ad a usey kud ey.​—Yohan 15:9. w23.12 29 par. 17-18

Mulong tud atushalapol ashinshamena a Yehova, tukat kurish ni yikokujol, ni mayej makata kuyishiken antu awonsu. Tukutwish kand kurish ni rupompat ni kuzengol kudokila kud antu ayikisina atushalapol a Nzamb. Ap mwamu, Yehova kakutulikap ni ushidinamu kutukwash. (Isay 41:10) Kusutin ukwash wend tukutwish kulam musangar wetu, kukwat mipak yiwamp, ni kushal ashinshamena kuday ndiy chikalap nchik milong yikutwisha kutushiken. Yehova utukanin kutwinkish chom chitazukinay Bibil anch “chisambu cha Nzamb.” (Fil. 4:6, 7) Chisambu chinech chimekeshin kwiyov zoong, kulam yitongijok ya mu manangu yidokila ku urund wa usey ni Yehova. Chisambu chinech “chisutinamu ronganyin ra antu”; chipandakenamu yom tukutwisha kutongin. Ov, wiyovilap kal zoong kupwa kwa kumulembil Yehova? Kwiyov mwamu chawiy “chisambu cha Nzamb.” w24.01 20 par. 2; 21 par. 4

Kumukat Nzamb kukat kuyibachik antu ashinshamena kutumbish dijin dend ni muchim umwing. Mwant David wijika anch kutumbish dijin da Yehova kud kumutumbish Yehova amwinend. Chisu tukata kutesh dijin da Yehova tukat kutongin pa wuntu wend, tukat kutongin kand piur pa mikadil yend ni piur pa yom yipandakena yasalay. David wakata kuman dijin da Tatukwend mud ditumbila ni kuditumbish. Wakata kusal mwamu “nich yom yend yawonsu” ni muchim wend wawonsu. Chilik chimwing, in Levi akwata mupak wa kumutumbish Yehova. Itiyija nich kwikepish anch mazu mau makutwishap kamu kutumbish dijin ditumbila da Yehova. (Neh. 9:5) Chakin kamu, Kumutumbish Yehova ni muchim wawonsu ni kwikepish mud kwinoku kukat kusangaresh muchim wend. w24.02 9 par. 6

Yehova kakumanap mud wakangany kal mulong uwanyishinap mupak ukusutina chipim. (2 Kor. 8:12) Ilejina ku yom yikuchirishina kwinyim. Vurik mipak wawanyishina kal. Bibil ulondin anch: “Nzamb utentamin, ndiy kakutwishap kuvuramen yisalijok yen.” (Heb. 6:10) Chawiy, niyey ufanyidinap kuvuramen. Tongijokin pa mipak wawanyishina kal—mud kwikal murund wa Yehova, kuyilej antu akwau piur pend, ap kutambul dibatish. Mud mutapu waya kurutu ni kuwanyish mipak ya mu spiritu pakur, ukutwish kand kuya kurutu ni kuwanyish mupak wey ukweta katat. Nich ukwash wa Yehova, ukutwish kuwanyish mupak wey. Paudandamedina kusal usu wa kuwanyish mupak wey wa mu spiritu, kangal wavuramen kutal mutapu Yehova ukukwashinay ni kukuyukish pawikasikeshina kusal mwamu. (2 Kor. 4:7) Anch walik kuziy, ukutambul yiyukish yivud nakash.​—Gal. 6:9. w23.05 31 par. 16-18

Yehova ukat kukimb mitapu ya kumekesh kud antu end anch uyikatin ni anch uyisangaredin. Mifund yilejen tupamp twad twamwelay Yesu anch Mwanam mukatish, ukweta dilau dam. (Mat. 3:17; 17:5) Ov, ukatin kumutesh Yehova pakwinkishinay kashinsh anch ukwet dilau dend? Yehova kakatap kwambamb niyetu kapamp kamwing kudokal mwiur, pakwez ukat kulond niyetu kusutin Dizu dend Bibil. Tukutwish kutesh dizu da Yehova anch tukwet dilau dend ching anch twatang mazu ma Yesu mada mu ma Evanjil. Yesu wimburijin chakin kamu wuntu wa Tatukwend. Chawiy anch twatang yom yalondangay Yesu kud in kwilej end anch akwet dilau dend ap anch ading antu akad kuwanyin, niyetu tukutwish kutongin Yehova ukat kutwel mazu minam. (Yoh. 15:9, 15) Anch tukwet yikokujol, chirumburikinap anch twashadishin kal dilau da Nzamb. Pakwez, tukwet mitapu ya kumekesh anch tumukatin Nzamb ni tumuchingejidin.​—Jak. 1:12. w24.03 27-28 par. 10-11