Ngond wa 9

Nzamb wamwinkin kal Yesu usu wa kupwish milong yawonsu yirishinau nich antu. Kusutil yilay yasalay, Yesu wamekesha anch ukwet usu wa kupwish milong yin yawonsu yatwakad kutwish ap pakemp kupwish etu ayinetu. Chilakej, ukwet usu wa kutukamunin ku musul wa milong yawonsu yirishinau nich antu—chitil twaswana ni yibudikin yau, mayej ni rufu. (Mat. 9:1-6; Rom 5:12, 18, 19) Yilay yasalay yamekesha anch ukutwish kupwish “mitapu yawonsu” ya mayej ni ukutwish kand kuyivumbul afu. (Mat. 4:23; Yoh. 11:43, 44) Chikwau kand, ukwet usu wa kudutish rinkind mukash ni wa kuyikamunin antu ku usu wa ayilembil. (Mar. 4:37-39; Luka 8:2) Chitukasikeshin mud ik pa kwijik anch Yehova wamwinkishin kal Mwanend usu mud winou! Tukutwish kwikal nich kashinsh anch yiyukish yitukaninay Nzamb yikuleta Want wend yikuwanyin. Yilay yasalay Yesu padingay pa divu yitufundishin anch ukusal yom yipandakena kujimb mulong ud Mwant wa Want wa Nzamb. w23.04 3 par. 5-7

Anch chikumangen chen chikwet in kulejan avud ni waman mud ey kakutondinap, ukutwish kuwil mu mupit wa kulikap. Pakwez ikasikesha amboku kwakul ku yikumangan. Rijek yakul yivud mulong wa chikumangan ni chikumangan. Chawiy anch kakutondinap mulong wa kwakul kwinsambishin kwa dilejan, ukutwish kwikal kand ni mitapu ya kwakul mu yikunku yikwau ya chikumangan. Anch wirijekin mulong wa Dilejan dia Chinong cha Kalam, tongijokin pa mutapu ukwatijadinay paragraf win mwawonsu ni mutu wa mulong. Anch wasal mwamu, ukutwish kwikal ni yakul yivud ukutwisha kupan pa chisu cha dilejan. Chikwau kand, ukutwish kurijek maparagraf misambidina mafundish ma Bibil makasikena kurumburil. Mulong wak? Mulong kukutwish kwikal antu akemp akutwisha kwakul ku maparagraf mud minam. Chad chid nchik anch wasadin yiyul yiney pakwez kupwa kwa yikumangan yivud waman anch udandamedin kuburen mitapu ya kwakul? Muleja ntakel wa Chinong cha Kalam kurutu kwa chisu piur pa chipul ukatina kwakul. w23.04 21-22 par. 9-10

Jozef walondula umutakel wa Yehova, ni chinech chasala anch ikala ikundj muwamp. Piswimp tupamp tusatu, watambula umutakel wa Yehova piur pa dijuku diend. Kapamp kin kawonsu waziyinang, ap anch chading chimukasikedin. (Mat. 1:20; 2:13-15, 19-21) Kusutin kulondul umutakel wa Nzamb, Jozef wamuchidija Mariy, wamukwasha, ni wamubangina. Tongijokin mutapu yisal ya Jozef yasala anch chimuswapel Mariy kumukat ni kumulimish! Angatan, ukutwishan kumwimburij Jozef kusutin kukimb chiyul cha Bibil piur pa mutapu wa kubangin majuku men. Anch wasadinan chiyul chinech ap anch chikasiken, ukumekeshany anch uyikatinany akajen, ni uruw wen ukukasikan. Nambaz umwing wa mu Vanuatu, watau kwasut kal mivu 20 ni kusut, ulondin anch: “Chisu chikatay nfumwam kukimb ni kusadin umutakel wa Yehova, nikat kumulimish chipandakena. Nikat kwiyov anch nid mu diking, ni nichingejidining mipak yend.” w23.05 21 par. 5

In Yuda adokala mu Babilon afanyina kwikal “antu atumbila” kud Nzamb wau. (Kuv. 7:6) Pakwez chinech chadingap chirumburikina anch kadingap kakweta kuswir kwa kuswimp yom yimwing mulong wa kumusangaresh Yehova. In Yuda amwing avadikina mu Babilon, ni chimeken anch ading ijidin kal mutapu wa kutong ni yaku ya in Babilon. Mu kusut kwa mivu kupwa kwa in Yuda akusambish kuchirik mu Isarel, Guverner Nehemiy washimoka pa kuman anch an avadikina mu Isarel ading kand kal kwau ilej dizu dia in Yuda. (Kuv. 6:6, 7; Neh. 13:23, 24) Mutapu ik wafanyinau an kwilej kumukat ni kumwifukwil Yehova mulong kadingap kateshina dizu dia Hebereu, dizu dia pakampwil mwafundau Dizu dia Nzamb? (Esi. 10:3, 44) Chawiy in Yuda afanyina kuswimp yom yimwing, pakwez chafanyina kuyiswapel kuswimp yom yiney mu Isarel, mulong kwi ndond kwinoku kwawiy kwafanyinau kuvuvurish pakemp pakemp difukwil dishitwila.​—Neh. 8:8, 9. w23.05 15 par. 6-7

Cha ushon, ap anch tukwet rusot ni twikasikeshin, kukutwish kwikal yishiken yikutwisha kutuchirish kwinyim. Chilakej, ‘yishiken yakad kutongin’ yikutwish kutusend chisu twafanyinang kusadin mulong wa kuwanyish mupak wetu. (Mul. 9:11) Tukutwish kurish nich chakamish ap chikokujol chikutwisha kutuziyish. (Jnsw. 24:10) Mujimbu wetu wakad kuwanyin ukutwish niwawiy kutushikij kusal yom yikutwisha kutukangesh kuwanyish mupak wetu. (Rom 7:23) Ap tukutwish kamu kwetu kuziy. (Mat. 26:43) Yom ik yikutwisha kutukwash kupandakan yom yituchirishina kwinyim ap yituziyishina? Vurik anch ang kwikal yom yikuchirishina kwinyim, chirumburikinap anch wakangany kal. Bibil ulejen anch milong ni yakamish yikutwish kutushiken. Pakwez umekeshin kand patok anch tukutwish kulank. Inge, anch wadandamen kusal usu chikalap nchik yom yikuchirishina kwinyim, ukumekesh anch ukatin kumusangaresh Yehova. Chakin kamu, Yehova ukusangar nakash anch waman usu udandamedina kusal mulong wa kuwanyish mupak wey! w23.05 30 par. 14-15

In Kristu amakundj avud aswila asambisha mudimu wa chisu chawonsu padingau ansand nakash. Ukat kuyikwash kand kwijik mutapu wa kusadin nfalang ni manangu ni kulik kujisadin mu mutapu wakad kuwanyin. (Fil. 4:11-13) Mutapu uwamp wa kusambish mudimu wa chisu chawonsu kud kusambish bil ni mudimu wa uchibol nkwash. Kusal mudimu wa uchibol ukutwish kukukwash kusal mitapu yikwau ya mudimu wa chisu chawonsu, mud kuya mu mudimu wa kutung ap ku Betel. Amakundj in Kristu afanyidin kwitekin rutong rikutwisha kuyikwash kwikal amakurump mulong wa kuyisadin akadivar nau anambaz mu chikumangen. Bibil ulejen anch muntu ikundj anch usotin kwikal mukurump ndiy usotin “mudimu uwamp.” (1 Tim. 3:1) Chakusambish, mukadivar ufanyidin kuwanyish yitinau mulong wa kusal mud nkwash wa mudimu. Ankwash a mudimu akat kuyikwash amakurump mu yom yivud. Amakurump avud ni ankwash a mudimu akat kuyisadin akadivar nau anambaz nich kwikepish ni akat kwipan nich mushiku mu mudimu wa kulejan. w23.12 28 par. 14-16

Mwant Yosias wading nsand pasambishay kumukimb Yehova. Wakata kwilej piur pa Yehova ni piur pa rusot Rend. Pakwez, chadingap chimuswapedina mwant winou nsand. Wakwata mupak mulong wa kushitwish difukwil diakin pantaliken ni difukwil dia makasu. Wafanyina kwikal utakamena! Kurutu Yosias awanyisha mivu 20, wasambisha kushitwish difukwil diakin pantaliken ni difukwil dia makasu diadinga mu muchid. (2 Jsng. 34:1-2) Ap anch ud mwan mukemp nakash, ukutwish kumwimburij Yosias kusutil kwilej yom yivud piur pa Yehova ni piur pa mikadil yend yipandakena kuwap. Chinech chikukubachik kwipan kud ndiy. Kwipan kwinoku kukwikal ni chibachikin ik pa mwom wey wawonsu? Luke, wabatishau ni mivu 14, walonda anch, “Kusambish kamu nlel, nikutek mudimu wa Yehova pa ndond ya kusambish ni nikusal usu wam wawonsu mulong wa kumusangaresh.” (Mar. 12:30) Anch niyey wasal mwamu ukutambul yiyukish yivud nakash! w23.09 11 par. 12-13

Pafunday kambuy Paul mukand winou, chikumangen cha ku Tesalonik chading kandikal chiwanyish muvu ap umwing. Antu ading atakedila chikumangen chinech ading kandikal ikal ni ukaliweny ni afanyina kurumbok nakash. Ap mwamu, chading chifanyidin kuyilimish. Pasejina mar makash, tukwikal ni kuswir nakash kwa umutakel wa amakurump a chikumangen kusutamu nlel. Chikutwish kutukasiken kutambul umutakel udiokila kud akadivar adia ku biro mujim wa pa mangand mawonsu; chawiy chid cha usey kusambish kuyikat ni kuyilimish amakurump etu kusambish katat. Chikalap nchik chom chikutwisha kushiken, el amboku tudandamenany kutek manangu metu mwi ndond, ni kulik kushinshikin pa kuburen kuwanyin kwau, pakwez tushinshikinany pa kashinsh kamekeshina anch Yehova ukat kuyitakel amakundj inay ashinshamena kusutin Kristu. Mud mutapu ukata chiful kuchidij mutu wa isalay, ruchingej retu ra dipandish rikat kuchidij manangu metu ni kutukwash kutong nawamp. Tukuman anch yom yawonsu yidia mu mangand minam yid kwau yakad usey. (Fil. 3:8) Ruchingej retu rikat kutukwash kutek manangu mwi ndond ni kulik kuzazat. w23.06 11-12 par. 11-12

Antu akata kumutesh “mband chisup” afanyidin kutond anch akwitiy kutazuk kwend ap bwat. Kud mayingishin ma usey makutwisha kutukwash kwipuk yisal ya masandj. “Mband chisup” amulejen mud ukat kulond anch: “Mem ma wij matadil.” (Jnsw. 9:17) “Mem ma wij” yom ik? Bibil ufanakeshin kumanijan kwa ikundj ni mband adia mu uruw nich mem matadila. (Jnsw. 5:15-18) Ambay a uruw atijadina kal kukwatijan ni mbil ya ngand akutwish kusanger kumanijan mu mutapu uwanyidina. Pakwez chishalijadin kamu ni “mem ma wij.” Chinech chimekeshin chisal cha masandj chikangeshinau. Chisal chinech chisadikidining ku ujindj, mud mukatay mwij kwiy ku ujindj. “Mem ma wij” makutwish kumekan pakampwil mud matadil anch antu ipanina mu chisal chinech atong anch kwikil muntu uyimena. Pakwez idimbin kamu nakash! Mulong Yehova umen yawonsu. Kushadish dilau da Yehova chawiy chom chipandakena kuyip mu mwom, chawiy kwikil chom chikutwisha ‘kutaal’ anch chom chinech chikutushikij ku kushadish dilau dined.​—1 Kor. 6:9, 10. w23.06 22 par. 7-9

Yom ik ukusala anch wiyov anch malembil mey mad kwau mud ma kukubachik ap mudimu wey wa kulejan washal kal kwau wa kusal kwau mwamu? Kangal watong anch ukwetap spiritu wa Yehova. Mulong ud muntu wakad kuwanyin, yovil yey yikutwish kuswimp chisu chawonsu. Anch mushiku wey wasambish kukep, shinshikin pa chilakej cha kambuy Paul. Ap anch wapakisha kumwimburij Yesu, wading wij anch yisu yimwing kakwikalap ni maku ma kusal yom yikatinay. Paul wakwata mupak wa kusal mudimu wend chikalap nchik mutapu wafanyinay kwiyov yisu yimwing. Chilik chimwing, kangal walikidin kuburen kuwanyin kukubachika kukwat mipak yimedina pa yovil yey. Kwat mupak wa kusal yom yiwamp chikalap nchik yovil yey. Anch wadandamen kusal yom yiwamp, chisu chimwing yovil yey yikuswimp.​—1 Kor. 9:16. w24.03 11-12 par. 12-13

Tukutwish kumekesh rukat kud akadivar nau anambaz netu kusutin kuta nau urund ni kusutish nau chisu pamwing. (2 Kor. 6:11-13) Avud pakach petu ad mu yikumangen mudia akadivar nau anambaz adiokila jindond kushalijan ni akweta yaku kushalijan. Tukutwish kukasikesh rukat retu mulong wa antu inay awonsu kusutin kushinshikin pa mikadil yiwamp yikwetau. Anch twilej kuyiman akwetu mud muyimenau kud Yehova, tukumekesh anch tuyikatin. Tukwikal ni kuswir kwa rukat nakash pa chisu cha mar makash. Pakusambisha mar minam, kwisu tukutana diking? Shinshikin yom yayilejay Yehova antwend kusal pa chisu chamurishikishau Babilon wa pasak. Wayileja anch: “En, antwam, andamany mu yikumbu yen, wipatilanyamu. Jingamanyaku bil pakemp, ching ujim wasut.” (Isay 26:20) Chimeken anch mazu minam mad kand ma usey kud etu tukurisha ni mar makash. w23.07 6-7 par. 14-16

Ikal muntu wijikena anch ud wisikena. Iyipula amwiney anch: ‘Ov, antu anmening anch nid muntu wisikena ap ukata kudiul yom kanang? Anch anmening mud nid muntu uchinchikina, ap ukweta muchim ukash? Ov, nikat kuyishindil antu akwau chakwel asala yom mu mutapu nikatina am? Ap nikat kutesh yitongijok ya antu akwau anch chitwishikin kusal mwamu?’ Mu chilik tukata kumekesh anch tud antu isikena chawiy chikumekesha anch tumwimburijin Yehova ni Yesu. Tufanyidin kwikal isikena anch mashakamin metu maswimp. Kuswimp kumwing kukutwish kwatuletin milong kanang yakad kuchingejin. Chilakej, tukutwish kurish ni milong ya ukash wa mujimbu. Ap kand milong ya kuburen nfalang ni milong ya chipolitik yikutwish kusal anch mashakamin metu makasikan. (Mul. 9:11) Chikutwish kutukasiken kand anch atuswimp yisend mu dirijek. Tukutwish kwijidin mashakamin masu anch twalondul yiyul yinying yilondwilaku ey: (1) itiyin mashakamin ma katat, (2) tongijokin pa yom ukutwisha kusal katat, (3) tongijokin pa yom yiwamp, ni (4) yikwasha antu akwau. w23.07 22 par. 7-8

Muprofet Daniel wading uchid nsand pamutwalau mu winkwal mu Babilon kwindond kulemp ni Yerusalem. Pakwez ap anch Daniel wading uchid nsand wayishimokisha antakel a in Babilon. Alonda ‘yamanau ku mes’—anch Daniel kadingap ni ulim, ‘wading ni mujimbu uwamp’ ni udiokil mu dijuku diwamp. (1 Sam. 16:7) Chawiy, in Babilon amutonda kusadin mu chipang cha mwant. (Dan. 1:3, 4, 6) Yehova wamukata Daniel, kadiap mulong wa mujimbu wend uwamp ap mulong wa mu dijuku mwadiokalay, pakwez mulong wa wuntu wend. Chakin kamu, Daniel wading pamwing ap nsand ukweta mivu piswimp 20 chisu chalonday Yehova anch wading pakach pa antu ading ni ntumb yiwamp mud Nowa ni Job. (Dis. 5:32; 6:9, 10; Job 42:16, 17; Ezek. 14:14) Ni Yehova wadandamena kumukat Daniel mu mwom wend wawonsu.—Dan. 10:​11, 19. w23.08 2 par. 1-2

Anch ukimbin kuland chikumbu, ukukat kuya mulong wa kwimenap amwiney chikumbu chawonsu chakabuj. Tukutwish kand kusal mwamu chisu tutangina ni kwilej Bibil. Anch watang mau mau, ukutwish kwey kwilej kusu yom ya piur piur—“malejan ma kusambish ma dizu dia Nzamb.” (Heb. 5:12) Pakwez, mud mutapu ukweta kuswir kwa kwandam ‘mukach’ mwa chikumbu mulong wa kushinshikin yom yivud, uswirikedin kand kwilej Bibil mulong wa kumutesh nawamp. Mutapu uwamp wa kwilej Bibil ud wa kuman mutapu ukwatijadina yikunku kushalijan ya uruu wa Bibil. Ufanyidin kusal usu kadiap kwau ching wa kwijik yom witiyijina, pakwez wa kwijik kand mayingishin makubachikina kwitiyij anch yom yiney yid uyakin. Mulong wa kwov kamu nawamp Dizu dia Nzamb, tufanyidin kwilej uyakin ukurikina wa Bibil. Kambuy Paul wayikasikesha akadivar nau anambaz nend in Kristu kwilej Dizu dia Nzamb nich mushiku chakwel atwish kujingunin “kujimb . . . , ni kulep, ni kulep kwa kuya piur, ni kulep kwa kukurik pansh” kwa uyakin. Mwamu afanyina ‘kujikish ni kwiman daang’ chipandakena mu ritiy. (Efes 3:14-19) Mwamu tufanyidina niyetu kusal. w23.10 18 par. 1-3

Mu Bibil mud yilakej yivud ya antu ashimpisha muchim. Umen nchik anch wilej yilakej yiney mu dilejan diey? Chilakej, ap anch David amutonda uchid nsand mulong wa kwikal mwant wa Isarel mu machuku ma kurutu, chamwita kuchingel mu mivu yivud kurutu kwa kutambul want. Simeyon ni Ana amwifukwilang Yehova nich kushinshaman pading pachingedinau Mesia wakanau. (Luka 2:25, 36-38) Pawilejina nsangu mud jinej, kimb yakul ku yipul yiney: Yom ik yamukwasha pamwing ap muntu winou kushimpish muchim? Kushimpish muchim kwamukwasha mutapu ik? Mutapu ik nikutwisha kumwimburij? Kwilej kand yilakej ya antu alika kushimpish muchim kukutwish kand nikwawiy kukukwash. (1 Sam. 13:8-14) Ukutwish kwiyipul anch: ‘Yom ik yayikangesha pamwing ap kushimpish muchim? Yibudikin ik yatanau?’ w23.08 25 par. 15

Kambuy Pita wading muntu ushinshamena; kalikap chom ap chimwing chimukangesha kumulondul Yesu. Chilakej dichuku dimwing, Yesu walonda yom yalikau kutesh in kwilej end awonsu, pakwez Pita wamekesha anch wading muntu ushinshamena. (Yoh. 6:68) Pa ndond pa kukimb kutesh nawamp mazu mend, in kwilej avud alikap kumulondul Yesu. Pakwez Pita kasalap mwamu. Wading wij anch ching kusu Yesu ndiy wading “ukweta mazu makata kulet mwom wa chikupu.” Yesu wading wij anch Pita pamwing nau atwimbuy akwau akumuchin. Ap mwamu, Yesu wading ukwet kashinsh anch Pita ukuchirik ni ukushal ushinshamena. (Luka 22:31, 32) Yesu wading wij anch “muchim wa muntu usotil kusal nawamp, pakwez ndiy kakwetap usu.” (Mar. 14:38) Chawiy, ap anch Pita wamutuna, Yesu kamulikap kambuy wend. Kupwa kwa kuvumbuk, Yesu wamubudikina Pita padingay amwinend. (Mar. 16:7; Luka 24:34; 1 Kor. 15:5) Tongin mutapu chafanyina kumukasikesh Pita wading wovila ushon nakash mulong wa yom yasalay! w23.09 22 par. 9-10

Nzamb ukat kulikishin yitil ya antu atekina ritiy mudiay ndiy. Ukat kuyilikishin kamu rawonsu ni kulik kand kuvurik yitil yau. (Kus. 32:1, 2) Umening anch antu inay atentamin mulong wa ritiy rau. Ap anch Nzamb wayitazuka anch ad antu atentamina, Aburaham, David, ni atushalapol end akwau ading antu akad kuwanyin. Pakwez mulong wa ritiy rau, Nzamb wayimana anch atentamin, pakampwil anch wayifanakesh ni antu akad kumwifukwil ndiy. (Efes 2:12) Mu mukand wafunday kambuy Paul, warumburila anch tufanyidin kwikal ni ritiy mulong wa kwikal mu urund ni Nzamb. Aburaham ni David ikala arund a Nzamb mulong ading ni ritiy mudiay ndiy, niyetu tukutwish kwikal arund a Nzamb anch twikal ni ritiy. w23.12 3 par. 6-7.

Nleu unou, in Kristu awonsu akwet chisend cha kupan yakupesh yau kud Yehova mu kusadin chisu chau, usu wau ni mapit mau mulong wa kutwal yisakin ya Want wa Nzamb kurutu. Tukutwish kumekesh anch tusangaredin chisend chetu cha kumwifukwil Yehova kusutil kumwinkish yom yetu ya usey tukweta. Kambuy Paul wisambina piur pa yom kushalajin tufanyidina kusal chisu chawonsu pitumwifukwidina Yehova. (Heb. 10:22-25) Pakach pa yom yiney pad kumulembil Yehova, kuyilej antu akwau piur pa ruchingej retu, kukumangan pamwing ku yikumangan ni kukasikeshijan umwing ni mukwau ‘pitumena anch dichuku dia [Yehova] dikat kusej piswimp.’ Piswimp ni kwinsudiel kwa rusangu ridia mu Kujingunik, mwangel wa Yehova walonda tupamp twaad mazu malondwilaku am mulong wa kukasikesh: “Chifanyidin kumwifukwil Nzamb!” (Kuj. 19:10; 22:9) Kangal amboku twavuramenany uyakin winou ukurikina piur pa tempel mujim wa mu spiritu wa Yehova ni chisend tukweta cha kumwifukwil Nzamb wetu mujim! w23.10 29 par. 17-18

Etu awonsu tufanyidin ‘kudandamen kukatijan umwing ni mukwau.’ Pakwez, chid cha usey nakash kud etu kuvurik kubabesh kwa Yesu anch “rukat ra antu avud rikez kukep.” (Mat. 24:12) Yesu kalondap anch chinech chafanyina kuyikangesh in kwilej kumekeshijadin rukat amwing ni akwau. Pakwez tufanyidin kubabal chakwel kangal mwikadil wa kuburen rukat wa antu a mangand utukangesh kukatijan umwing ni mukwau. Pitulamina chitongijok chinech mu manangu, el tushinshikinany chipul chinech cha usey: Yom ik yikutukwasha kwijik anch rukat retu mulong wa akadivar rikasiken? Mutapu umwing wa kuman anch rukat retu rikasiken ud wa kushinshikin yom yimwing tusadina mu mashakamin metu. (2 Kor. 8:8) Yom yimwing ayijimbula kud kambuy Pita anch: “Kupandakan yom yawonsu, dandamenany nich rukat, mulong [rukat rikat kubwik miril ya yitil].” (1 Pita 4:8) Chawiy kuziy ni kuburen kuwanyin kwa antu akwau kukutwish kupak rukat retu. w23.11 10-11 par. 12-13

Tukutwishap kamu kuziyin kwi mbil ja Yesu piur pa rukat anch twayikat antu amwing mu chikumangen pakwez akwau bwat. Pakwez tufanyidin kwikal piswimp nau antu awonsu mud mwasalay Yesu. (Yoh. 13:23; 20:2) Kambuy Pita utuvurishin anch tufanyidin kwikasikesh kwikal ni “rukat ra ukadivar”—mud rikwetingau antu a mu dijuku dimwing—mulong wa akadivar nau anambaz netu awonsu. (1 Pita 2:17) Pita utukasikeshin ‘kukatijan nakash umwing ni mukwau nich muchim umwing.’ (1 Pita 1:22) Pinap dizu kukatijan ‘nakash’ dirumburikin kumukat muntu ap anch kusal usu wa kumekesh anch umukatin. Chilakej, yom ik ukusala anch mukadivar wakutap ku muchim mu chilik kanang? Tukutwish kwov ja kusal mud mwatusalangay ndiy pa ndond pa kumekesh rukat. Pakwez kusutil chilakej cha Yesu, Pita wileja anch kufundakesh kukatap kumusangaresh Nzamb. (Yoh. 18:10, 11) Pita wafunda anch: “Kangal wafundakeshany kuyip ku kuyip, ap masaal ku masaal, pakwez yiyukishany akusadilanya nayimp.” (1 Pita 3:9) Anch ukwet rukat rikurikina, rikukubachik kwikal mwin ranaken ni kuyibangin antu akwau. w23.09 28-29 par. 9-11

Chikat kulet musangar nakash pakuman mutapu upaminay mwan mau mau ni kwikal mukurump. Chimeken kamu patok anch kwikiling usu ukatay mwan kusal mulong wa kupam. Pakwez, mulong wa kwikal mwin Kristu uswila kwitining kusal usu ujim nakash. (1 Kor. 13:11; Heb. 6:1) Mulong wa kuwanyish rutong riner tufanyidin kwikal ni urund wa piswimp ni Yehova. Tukwet kand kuswir kwa kwikal ni spiritu wend utumbila mulong wa kukudish mikadil ya win Kristu, kukudish ukaliweny ni kwirijek mulong wa yisend ya machuku ma kurutu. (Jnsw. 1:5) Yehova watanga ikundj ni mband. (Dis. 1:27) Chiswapel kuman kushalijan kudia pakach pa ikundj ni mband, pakwez ashalishadin kand mu mutapu ukwau. Chilakej, Yehova wasala amakundj ni amband mulong wa kuwanyish muntu ni muntu chisend chend, chawiy akwet kuswir kwa kwikal ni mikadil ni ukaliweny ukutwisha kuyikwash kuwanyish yisend yau. w23.12 18 par. 1-2

Ov, Yesu ukatin anch antu akwau asadina dijin da pakampwil da Tatukwend? Mwaning. Antakel amwing a marelijon akat kwitiyij anch kusadin dijin da Nzamb kud kuburen kalimish. Pakwez Yesu kalikidinap yitiyij yiney yimukangesh kulimish dijin da Tatukwend. Shinshikin chisu chamudoshay muntu umwing chilembil ku Gerasen. Antu ova wom ni amuleja Yesu anch adokala mu ul wau, chawiy kafanyinap kushakam kand kwinikwa. (Mar. 5:16, 17) Pakwez, Yesu wakata anch dijin da Yehova adijika kwinikwa. Chawiy wamuleja ikundj umwing wokay kuya kuyilej antu anch, kadap Yesu usadina yom yiney pakwez Yehova uyisadina. (Mar. 5:19) Yesu ukatin anch niyetu tusala mwamu nlel, kusutin kwijikish dijin da Yehova pa mangand mawonsu! (Mat. 24:14; 28:20) Anch twasal mwamu tukat kumusangaresh Mwant wetu Yesu. w24.02 10 par. 10

b Did dilau dijim nakash kud etu kwikal mu dirijek da Yehova mu chirung chinech chikash cha machuku ma kwinsuden. Payila mikadil ya mangand minam mu kuyip chipandakena, Yehova utwinkishin dijuku da akadivar nau anambaz a mu spiritu dida mu uumwing. (Kus. 133:1) Utukwashin kwikal ni dijuku da musangar. (Efes 5:33–6:1) Ni ukat kutwinkish manangu tuswirikedina mulong wa kupandakan yakamish ni kwikal ni chisambu cha mukach. Pakwez, tufanyidin kusal usu nakash mulong wa kudandamen kumusadin Yehova nich kushinshaman. Mulong wak? Mulong yisu yimwing akutwish kuturumbukin kud akwetu. Tukutwish kand kuziy mulong wa kurumbok kwetu ayinetu, pakampwil anch twachirokin kurumbuk kwawiy kumwing. Chitwitin kudandamen kumusadin Yehova (1) anch mbay netu mwin Kristu waturumbukin, (2) anch mbay netu wa uruw waturumbukin, ni (3) anch twaziy mulong wa kurumbuk kwetu ayinetu. w24.03 14 par. 1-2

Chisu ni chisu, ukutwish kutesh nsangu ja akadivar nau anambaz atwisha kutanduril mudimu wau utumbila. Pamwing ap aya ku Shikol ya in Kulejan a Want ap abukina kwi ndond kuda maswir nakash. Anch ukatin kwitekin mupak winou, chid chom chiwamp nakash kud ey. Atushalapol a Yehova akat kukimb mitapu ya kusal mulong wa kutanduril mudimu wau. (Mid. 16:9) Chikwikal nchik anch utwishinap kusal mwamu katat? Kangal watong anch udap wa usey kusutamu antu atwishina kusal mwamu. Mwom wa kubambil wa mwin Kristu witining kujijaman. (Mat. 10:22) Kangal wavuramen anch umusangareshin Yehova nakash kukwatijan ni yom usadina ni kukwatijan kand ni usu wey usadina. Winou ud mutapu uwamp ukutwisha kumulondul Yesu kupwa kwa kukubatish.​—Kus. 26:1. w24.03 10 par. 11

Tatukwetu wa mwiur ushidinamu kutulikishin anch twakarumuk. (Kus. 86:5) Anch twanenganan mulong wa yitil twasadina kal, tukutwish kwikal nich kashinsh anch Yehova watulikishidin kal. Vurik anch Yehova kakatap kwit yom yipandakena. Kakutwishap kutwit yom yivud yitukutwisha kukangany kusal. Ukat kusanger yom tukata kusal mulong wendendiy kukwatijan ni usu tukweta. Tongin kand pa yilakej yida mu Bibil ya antu amusadina ni muchim wau wawonsu. Tongin pa chilakej cha kambuy Paul. Wasala mudimu ukash mu mivu yivud, wenda ma kilometre mavud ni kutek yikumangan yivud. Pakwez, yishiken yamukangesha kusal mudimu wa kulejan mud mwasalangay, ov, washadisha dilau da Nzamb? Bwat kamu. Wadandamena kusal yom yatwishay ni Yehova wamuyukisha. (Mid. 28:30, 31) Chilik chimwing, mutapu tumusadidina Yehova ukutwish kuswimp mu kusut kwa chisu. Pakwez, chida cha usey kud ndiy yid yovil yitubachikina kumusadin. w24.03 27 par. 7, 9

Kusutin mutapu wamulembilangay amwinend Yehova, Yesu wayishila in kwilej end chilakej cha kulondul. Pasalangay mudimu wend wa kulejan, Yesu walembilang chisu ni chisu. Chading chimwitin kwitekin chisu cha kulembil mulong wading ukwataken nakash ni ading amulondwil kud antu avud. (Mar. 6:31, 45, 46) Walanka pamanch pa fee chakwel aya kwi ndond ya amwinend mulong wa kulembil. Pa chisu chinicha walembila uchuku wa kabuj kurutu kwa kukwat mupak wa usey nakash. (Luka 6:12, 13) Ni Yesu walembila tupamp tuvud uchuku kurutu kwa kufa, mulong wa kuwanyish chikunku cha chisend chend chikash panap pa divu. (Mat. 26:39, 42, 44) Chilakej cha Yesu chitufundishin anch, chikalap nchik mutapu tukwatakena, tufanyidin kwishil chisu cha kulembil. Mud Yesu, chikutwish kutwit kwishil chisu mulong wa kulembil—kulank pamanch nakash ap kushal ansudien urel kurutu kwa kulal. Anch twasal mwamu, tukumekesh kud Yehova anch tukwatin nich usey chipan chinech cha pakampwil. w23.05 3 par. 4-5

Mu verse winou wa nlel asadidinamu dizu “wizwishin.” Ndinguril umwing wisambidina milong ya Bibil wovikeshin dizu dined mud “rezin kud etu mud kawit.” Dizu dined dimekeshin chakin kamu rukat rikurikina ra Yehova pantaliken ni azizidilau many! Azizidilau many ij kamu anch ‘ayikatin kud Nzamb.’ (Jud 1) Kambuy Yohan wamekesha mutapu wiyovilau pafunday anch: “Talany mutapu wa rukat rujim ratukatay Tatuku chakwel atupil anch, an a Nzamb!” (1 Yoh. 3:1) Ov, Yehova uyikatin kwend ching azizidilau many? Bwat, Yehova utumekeshidin etu awonsu rukat rend. Yom ik yimekeshina chakin kamu anch Yehova utukatin? Difut. Kusutil difut dined, Yehova watumekeshina rukat ripandakena kujimb rakadingawap kal kumekesh kud muntu mukwau pa mangand mawonsu!​—Yoh. 3:16; Rom 5:8. w24.01 28 par. 9-10

Verse winou wisambidinau pinap ulejen mutapu wapandakanay David wom. Ap anch mwom wend wading mu ubaj, watongijokinang pa yom yikumusadinau kud Yehova. David wading wij anch Yehova ukumwakul pa chisu chiwanyidina. Kupwa kwa yom yiney yawonsu, Yehova wamwela David anch ukwikal mwant mu Isarel. (1 Sam. 16:1, 13) David wamana anch kukan kwawonsu kwa Yehova kwading kuwamp ni kukuwanyin. Yom ik yikaninay Yehova kukusadin? Tufanyidinap kuchingej anch Yehova atuchidija ku milong yawonsu. Pakwez vurik anch, milong yawonsu urishina nich mu mangand minam, Yehova ukuyidiosh mu mangand masu mezina. (Isay 25:7-9) Sakatang wetu ukwet usu kupandakanamu rufu, ni ukudiosh yom yawonsu yikata kutumesh mar.​—1 Yoh. 4:4. w24.01 6 par. 12-13

Tongin pa kwipan kwey ni dibatish diey. Wakwata mupak wa kwipan ni kukubatish mulong wakata kwikal ku mutambu wa Yehova. Tongijokin pa yom yakukwasha kwikal ni kashinsh anch watan kal uyakin. Washikena kwikal ni ronganyin rakin piur pa Yehova ni yawiy yom yakukwasha chakwel umukata ni kumulimish Tatukwey wa mwiur. Wakudisha ritiy ni rawiy rakukwasha ushikena kukarumuk. Muchim wey wakubachika kulik kusal yom yikisinay ni kusal yom yimusangareshina. Wiyova nawamp chisu wajingunina anch Nzamb walikishina yitil yey. (Kus. 32: 2) Wasambisha kuya ku yikumangan ni kuyilej antu akwau yom yiwamp yiwileja. Piudia katat mwin Kristu wipanina kal ni wabatishinau kal, dandamen amboku kwendil mwi njil ya mwom, kangal wadiokalamu. (Mat. 7:13, 14) Elany tushala iminya daang, mu kwikal ni muchim ukash wa kwipan kud Yehova ni kuziyil kwi mbil jend pakad kuziy. w23.07 17 par. 14; 19 par. 19

Anch watongijokin pa malembil mey ma kwipan kud Yehova, chinech chikukukwash kwikal ni usu wa kujijamen choziu chin chawonsu. Chilakej, ov, ufanyidin kwizez ni mband wa muntu mukwau? Bwat kamu! Wamukana Yehova anch ukutwishap kusal yom ya mutapu winou. Anch wasal mwamu ukwipuk kusansan kudokiling ku maku mayimp kurutu makuna mij. Ufanyidin ‘Kwipuk’ “antu ayimp.” (Jnsw. 4:14, 15) Anch watongijokin pa chilakej cha Yesu cha mupak wakwatay wa kumusangaresh Tatukwend, niyey ukutwish kulik pakad kulab kusal chom chin chawonsu chikutwisha kumukisish Nzamb kwa wipana. (Mat. 4:10; Yoh. 8:29) Yakamish ni yoziu yikat kukukwash kumekesh anch wakwatin kal mupak wa kumulondul Yesu. Anch wasal mwamu, ukutwish kwikal nich kashinsh anch Yehova ukukukwash. w24.03 9-10 par. 8-10