Ngond wa 8

Shinshikin manans maad ma usey madia mu Kuseng: (1) Antu atentamina arishin ni milong. (2) Yehova ukat kutukamunin ku yakamish. Mutapu ik ukatay Yehova kutukamunin? Ukat kusal mwamu kusutil kutukwash kwikal ni chitongijok chisikena piur pa mwom mu mangand minam. Yehova utushidinamu anch tukwikal ni musangar mu mudimu wend, pakwez pa chisu chinech katukaninap mwom wakad yikokujol. (Isay 66:14) Utukasikeshin kushinshikin pa machuku ma kurutu chisu tukwikala ni mwom ukatinay anch tusanger chikupu. (2 Kor. 4:16-18) Pa chisu chawiy chimwing, utukwashin kudandamen kumusadin dichuku diawonsu. (Mad. 3:22-24) Yom ik tukutwisha kwilejin ku yilakej ya atushalapol ashinshamena a Yehova a pasak ni a katat? Tukutwish kurish ni milong yitwakad kuchingejin. Pakwez anch twamuchingejin Yehova, ukudandamen kutukwash.​—Kus. 55:23. w23.04 14-15 par. 3-4

Tukutwish kwilejin ku chilakej cha Josef ni Mariy ading aziyidina antakel a piur ap anch chading chiyikasikedin kusal mwamu. (Luka 2:1-6) Padingay Mariy ni madikaj ma angond chidivu, kuziyin kwend ni kwa Josef akupaka. Mwant Ogust wa In Rom wapana mbil chakwel achinda antu awonsu ading mwi ngand yend. Josef ni Mariy afanyina kuya ku Betelehem, asala weny wa makilometre 150 kukaninik ni kusukumuk mikandu. Weny winou wading wa mar nakash pakampwil kudiay Mariy. Ambay a uruw inay iyakamisha nakash piur pa ukash wa mujimbu wa Mariy ni wa mwanau wafanyina kuvadik. Yom ik yela kushiken anch Mariy wavadina mwinjil? Wading usendin Mesiya washilaumu. Ov, afanyina kubwambwil ku chijil cha mwant winou? Josef ni Mariy iyakamisha pa mulong winou, pakwez aziyina ku chijil chinicha. Yehova wayiyukisha mulong wa kuziyin kwau. Mariy washika kamu nawamp ku Betlehem, kupwa wavala mwan wading ni ukash wa mujimbu uwanyidina ni wakwasha kuwanyish uprofet wa Bibil!​—Mike 5:2. w23.10 8 par. 9; 9 par. 11-12

Yom ik ukutwisha kusal anch ukat kwiyakamish ap kwov wom pa kwakul ku yikumangan? Ukutwish kutaninamu nakash anch wirijek nawamp. (Jnsw. 21:5) Anch wijik nawamp yom ukwilejanya ku chikamangan, chikukuswapel nakash kwakul. Chikwau kand, panang yakul yiswimp. (Jnsw. 15:23; 17:27) Ukutwishap kwov wom wa kwakul anch wapan yakul yiswimp. Anch wakul mu wiswimp ni pakad kutang, ukumekesh anch wirijekang nawamp ni uteshin nawamp yom wilejinanya. Chad chikwikal nchik anch wapakish kusadin yiyul yiney pakwez udandamedin kwov wom wa kwakul tupamp tuvud ku yikumangan? Ikal nich kashinsh anch Yehova ukusanger chakin kamu usu wey usadina mulong wa kusal yom ukutwisha kusal. (Luka 21:1-4) Yehova kakutwitangap kusal yom yipandakenamu usu wetu. (Fil. 4:5) Kwat mupak wa yom ukutwisha kusal, itekina rutong ra kusal yom yiney ni lembil chakwel Yehova akwinkisha chisambu mu muchim. Kwinsambishin, rutong riner rikutwish kwikal ra kwakul mu wiswimp. w23.04 21 par. 6-8

Kambuy Paul utufanakeshin ni amasalay achila ku mes ni adjadina yom ya njit mulong wa kuya kwi njit. Antu achingejining anch isalay ikal muntu wirijekina chisu chawonsu mulong wa kuya kurish anch kwalank njit. Chid kand mwamu kud etu. Tukat kushal irijekina mulong wa dichuku da Yehova kusutin kudjal rukibu ra ritiy, rukat ni chiful cha ruchingej. Rukibu rachidijang muchim wa isalay. Ritiy ni rukat yikat kuchidij muchim wetu wa chifanakesh. Yikutukwash kudandamen kumusadin Nzamb ni kumulondul Yesu. Ritiy rikat kutwinkish kashinsh anch Yehova ukutufut mulong tukat kumukimb nich muchim wetu wawonsu. (Heb. 11:6) Chinech chikutubachik kushal ashinshamena kuday Ntakel wetu Yesu, ap chikutwit kujijamen yikokujol yikash. Tukutwish kukasikesh ritiy retu mulong wa kurish ni yikokujol kusutin kushinshikin yilakej ya antu a chirung chetu alamina kushinshaman kwau chikalap nchik kuzengol ap kuburen nfalang. Ni tukutwish kwipuk ubaj wa kukat nakash nfalang ni yom ya kumujimbu kusutin kuyimburij antu apipeja mashakamin mau mulong wa kutek yisakin ya Want pa ndond ya kusambish. w23.06 10 par. 8-9

Kwilam ud ukaliweny wa kuyikel yovil ni yisal yetu. Tuswirikedin kukudish mwikadil winou mulong wa kuwanyish mipak yetu, pakampwil anch chom tukimbina kusal chikasiken ap tukwetap rusot ra kuchisal. Vurik anch mwikadil wa kwilam ud chikunku cha dibuj da spiritu utumbila wa Nzamb, chawiy mwita Yehova spiritu wend utumbila chakwel akukwash kukudish mwikadil winou wa usey. (Luka 11:13; Gal. 5:22, 23) Kangal wachingel anch kukwez chisu chiwamp nakash chakwel uwanyish mupak wey. Pamwing ap tukwikalap kamu ni chisu chiwamp nakash mu mangand minam mulong wa kuwanyish mupak wetu. Anch twachichingel, pamwing ap tukezap kawanyish mupak wetu. Tukutwish kuburen rusot ra kusal chom pamwing ap mulong mupak wetu ukasiken nakash kuuwanyish. Anch wawiy mutapu udia mupak wey, umen nchik anch waukatwol mu tuyikunku tukemp tukemp? Anch mupak wey ud wa kukudish mwikadil kanang, umen nchik anch wasambish kuumekesh bil mu tuyom tukemp tukemp? Anch mupak wey ud kutang Bibil mwawonsu, umen nchik anch watek program wa kusambish kutang mu tuyisu tukemp tukemp? w23.05 29 par. 11-13

Mu chirung cha machuku ma nsudien, Yehova usadidin dirijek diend mulong wa kupalangesh yakudia ya mu spiritu yitukwashina etu awonsu kudandamen kwendin mu “Mukombil Utumbila.” (Isay 35:8; 48:17; 60:17) Tukutwish kulond anch, anch muntu witiy dilejan dia Bibil, ukwikal ni mutapu wa kusambish kwendin mu “Mukombil Utumbila.” Antu amwing akat kwendin mwi njil yijim mu kachintamp kakemp kupwa adiokalamu. Akwau akat kukwat mupak wa kudandamen kwendinamu djat ni kwinsudien. Nsudien yiney yirumburikin ik? Kud antu akweta ruchingej ra kuya mwiur, “Mukombil Utumbila” uyitwadin mu “paradis wa Nzamb” mwiur. (Kuj. 2:7) Kud antu akweta ruchingej ra kushakam pa divu, njil yijim yiyitwadin ku mwom uwanyidina kupwa kwa mivu 1 000. Anch ukat kwendin mwi njil yijim yiney, kangal wachirik kwinyim. Ni kangal wayisha djat kamu ni piukushikina mwi ngand yisu! w23.05 17 par. 15; 19 par. 16-18

Mupak wa kwipan amwiney kud Yehova ud wa pakampwil anch watongijokin pa yom yawonsu yakusadinay kal. (Kus. 116:12-14) Bibil umutazukin Yehova anch ud mwin kupan “[Yipan] yawonsu yiwamp ya kusal nich.” (Jak. 1:17) Chipan chipandakena kujimb pa yipan yiney chid chakupesh cha difut da mwanend Yesu. Pakish kutongin! Difut dakukwasha kwikal mu urund wa piswimp ni Yehova. Ni dakwinkisha ruchingej ra kushakam chikupu. (1 Yoh. 4:9, 10) Kwipan amwiney kud Yehova ud mutapu uwamp wa kumekesh anch umujikitishin mulong wa yom yakusadinay kal, ni mulong wa yiyukish yikwau yawonsu yakwinkishinay kal Yehova.​—Kuv. 16:17; 2 Kor. 5:15. w24.03 5 par. 8

Pantaliken ni milong yitadina kwishitul mu mangand minam, tukat kwiyov mud mwiyovay ikundj utentamina Lot. “Wanenganananga mulong wa usund wa antu ayimp.” (2 Pita 2:7, 8) Wom ni rukat mulong wa Nzamb yamubachika Lot kwipuk yisal yijondila ya antu ading amunyingumukina. Niyetu atunyingumukin kud antu akad kulimish yijil yishitwila ya Yehova. Chikalap nchik mwamu, tukutwish kushal ishitwila anch twadandamen kulam rukat ni wom wakin mulong wa Nzamb. Mulong wa kutukwash, Yehova ukat kutukasikesh ni kutwinkish usu wa kusal mwamu kusutin buku wa Jinswir. In Kristu in awonsu, amakundj nau amband, ansand nau amapal, akutwish kutaninamu anch ashinshikin chiyul cha manangu tutaninamu. Anch twamwov Yehova wom, tukat kusal usu wa kulik kusal yom yidia yiyimp. w23.06 20 par. 1-2; 21 par. 5

Pamwing ap warisha ni rupompat ridokila kud antu a mu dijuku, ap kand washa yom yey ya ku mujimbu mulong wa kutek yisakin ya want pa ndond ya kusambish mu mwom wey. (Mat. 6:33) Anch chid mwamu, ukutwish kwikal nich kashinsh anch Yehova wij yom yawonsu wasadina mulong wendendiy. (Heb. 6:10) Chimeken kamu anch wimedinap kal amwiney uyakin wa mazu malonday Yesu anch: “Nikulejinany chakin, muntu mwawonsu washila kal chikumbu chend ap anamakwend amakundj ni amband ap makwend ap tatukwend ap anend ap yir yend mulong wamam ni mulong wa rusangu ruwamp, ukutambul katat yom yiney tupamp 100 ni kusut—yikumbu, anamakwend amakundj ni amband, amakwend, anend, yir, pamwing ni rupompat—ni mu mangand mezina, mwom wa chikupu.” (Mar. 10:29, 30) Yiyukish yiukutambula yisutinamu chakin kamu kwipan kwawonsu wipana.​—Kus. 37:4. w24.03 9 par. 5

Chisu charishau in Kristu a ku Yudeya nich kamungun, akadivar a mu chikumangen cha ku Antiosh “atonda muntu ni muntu kutum chom mudi mukutwishay kusal, mulong wa kuyikwash anamakwau mu ritiy ading ashicha mwi ngand ya Yudeya.” (Mid. 11:27-30) Ap anch akadivar arisha ni nzal ading ashich kulemp, in Kristu a ku Antiosh akwata mupak wa kuyikwash. (1 Yoh. 3:17, 18) Tukutwish kumekesh ranaken nlel anch twatesh anch ambay netu arishin ni yinship yikash. Tukat kwipan mulong wa kukwash, pamwingap kusutin kuyit amakurump chakwel tukwash mu proje wa kupan ukwash, ap kusutin kupan yipan mulong wa mudimu wa pa mangand mawonsu, ap kand kusutin kulembil mulong wa antu arishina ni chinship chinech. Akadivar nau anambaz netu akwikal ni kuswir kwa ukwash mulong wa kwikal ni yom yiswirikedinau chakwel apanda. Chisu chikwezay Mwant wetu Kristu Yesu mulong wa kuyirumburish antu, ufanyidin kututan tukat kumekesh ranaken ni kutulej anch: “Ezany, uswanany Want.”​—Mat. 25: 34-40. w23.07 4 par. 9-10; 6 par. 12

Yesu wimburija mwikadil wa kwisikan wa Yehova. Amutuma pa divu mulong wa kuyilej “amikoku ashadikina, awiy kamu in Isarel.” Pakwez, wamekesha anch wading wisikena payilejay antu awonsu rusangu ruwamp. Chilakej, mband umwing mwin Isarel weza ni mwanend changadim wading ‘ukweta chilembil wamumeshang mar nakash’ chakwel amwoka. Yesu wamwovila riy ni wamwoka changadim winou. (Mat. 15:​21-28) Tushinshikinany chilakej chikwau. Kwinsambishin kwa mudimu wend, Yesu walonda anch: “Muntu mwawonsu ukata kwinlik . . . , am niyam nikez kamulik.” (Mat. 10:33) Ov, wamulika Pita muntu wamutuna tupamp tusatu? Bwat. Yesu wading wij anch Pita wanenganana nakash mulong wa yom yasalay ni wading ikundj ushinshamena. Kupwa kwa kuvumbuk, Yesu watanijana ni Pita ni wamukasikesha ni kumwinkish kashinsh anch udandamedin kumukat. (Luka 24:33, 34) Yehova ni Yesu Kristu ading isikena. Chid nchik piur petu? Yehova ukatin anch twikal antu isikena. w23.07 21-22 par. 6-7

Yom ik yitwinkishina kashinsh anch kushilamu kwa Yehova piur pa Paradis kukuwanyin? Chakusambish chid mulong Yehova amwinend ndiy ushidinamu. Buku wa Kujingunik usambishin anch: “Chad ndiy ushicha pa ditand walonda anch: ‘[Talany] nikat kusal yom yawonsu yisu!’” Ukwet manangu, dikand ni impu ya kuwanyish kushilamu kwend. Cha kaad, kuwanyin kwa yom yikaninay kud kwakin nakash, chawiy ku mes ma Yehova chid mud yawanyidin kal kwau. Ukwet kamu diyingishin da kulond anch: “Mazu minam, . . . madi makin, mafanyidina kumachingej . . . Yom yiney yawanyin kal!” Cha kasatu, kwikil chom chikutwisha kumukangesh Yehova kupwish chom chasambishinay kal, chawiy chilondidinay anch: ‘Am nid Alpha ni Omega.’ (Kuj. 21:6) Yehova ukumekesh kamu anch Satan ud mukamakasu ni kakutwishap kuwanyish rutong rend. Chawiy anch muntu walond anch “yom yiney yipandaken kuwap, yikutwishap kusadik!” Mutangina ni kumurumburil Kujingunik 21:​5, 6. Rumburil mutapu Yehova uletinay kashinsh ka kuwanyin kwa kushilamu kwend, mud ufachikinaku amwinend.​—Isay 65:16. w23.11 7 par. 18-19

Yehova wamukana Aburaham chom chinech padingay Aburaham ipal wa mivu 75 ni pakad mwan. Ov, Aburaham wamana kuwanyin kwa kushilamu kwinoku? Kamanap kuwanyin kwawonsu. Kupwa kwa kwauk Wit wa Eferat ni kuchingel mivu 25, Aburaham wamana chilay cha kuvadik kwa mwanend Isak, ni kupwa kwa mivu yikwau 60, wamana kuvadik kwa ijukurend Esau ni Jakob. (Heb. 6:15) Pakwez Aburaham kamanap ap pakemp mutapu wikalau anend muchid ujim ni mutapu waswanau Ngand ya Kushilamu. Pakwez ikundj winou ushinshamena wasangera urund wa piswimp ni Sakatang wend. (Jak. 2:23) Ni pakuvumbukay Aburaham, ukusangar nakash pakutesh anch ritiy rend ni kushimpish muchim kwend kwaleta yiyukish kud antu a michid yawonsu. (Dis. 22:18) Yom ik twilejidinaku? Pamwing ap etu ayinetu tukutwishap kamu kuman nlel kuwanyin kwa kushilamu kwawonsu kwa Yehova. Pakwez anch twashimpish muchim mud mwasalay Aburaham, tukutwish kwikal nich kashinsh anch Yehova ukutufut katat ni ukutufut kand chipandakena pakuwanyina kushilamu kwend mwi ngand Yend yisu.​—Mar. 10:29, 30. w23.08 24 par. 14

Padingay nsand, Mwant Ozias wading wikepishin. Wading “umwovil Nzamb [wakin] wom.” Ni Yehova wamuyukisha pawanyishay mivu 68. (2 Jsng 26:1-5) Ozias wayipandakana akankuny a michid yivud ni wikala ni kashinsh anch Yerusalem ud mu diking. (2 Jsng. 26:6-15) Ozias wasangera ukwash wawonsu wamwinkishau kud Nzamb mulong wa kusal yom yatwishay. (Mul. 3:12, 13) Mwant Ozias wayileja antu akwau kulondul umutakel wend. Ov, chinech chimekeshin anch wafanyina kusal chom chawonsu chatongay anch ufanyidin kusal? Chawiy dichuku dimwing Ozias wakwata mupak wa kwandam mu tempel wa Yehova ni nich kwitutul wakimba kwosh diseng dia malash pa chintamb, chisend chading chakad kuyital ant. (2 Jsng. 26:16-18) Mwin Kupesh Mujim Azaria wamupupa, pakwez Ozias wajimana nakash. Cha ushon nakash, Ozias kashalap ushinshamena ni Yehova wamwasa musong wa mak. (2 Jsng. 26:19-21) Mwom wend wafanyina kwikal uwamp anch wadandamena kwikal wikepishina! w23.09 10 par. 9-10

Ap kupwa kwa kwikal mwin Kristu uzizidilau many, kambuy Pita wadandamena kurish ni kuziy kwend. Mu 36 C.C., Nzamb wamutuma Pita kwa Korney muntu wading wakad kwikal mwin Yuda. Ni kupwa, Nzamb wamutonda Korney kwikal pakach pa antu azizidilau many, chom chamekesha patok anch “Nzamb kakwetap kasolikany” ni antu akad kwikal in Yuda akutwish kwandam mu chikumangen cha win Kristu. (Mid. 10:34, 44, 45) Kupwa Pita wasambisha kuda pamwing nau antu a michid, chom chading chakad kusalangayap kal. Pakwez, in Kristu amwing in Yuda asambisha kulond anch in Yuda nau Akamichid kafanyidinap kuda pamwing. Chawiy pashikau in Yuda inay ku Antiosh, Pita walika kuda kand nau akadivar nend ading akad kwikal in Yuda, pamwing ap mulong wading wovil wom wa kuyijimesh in Kristu ading in Yuda. Pamanay kambuy Paul yom yading yisadinay Pita wamupupa pakach pa in Kristu akwau. (Gal. 2:13, 14) Chikalap nchik kurumbuk kwend, Pita kaziyap. w23.09 22 par. 8

Anch wishinshikin nich kashinsh kawonsu ukutwish kuman yom ufanyidina kuwapish, pakwez kangal waziy. “Nsalejetu udi muwamp,” ni ukukukwash kuswimp. (1 Pita 2:3) Kambuy Pita utwinkishin kashinsh anch: “Nzamb . . . ukez kukupizurishany, ni kukukasikeshany, ni kukwimikany daang.” Dichuku dimwing Pita wiyova anch kawanyidinap kwikal pamwing ni Mwan a Nzamb. (Luka 5:8) Pakwez kusutin ukwash wa Yehova ni Yesu Pita watwisha kudandamen kumulondul Kristu. Chawiy amutonda Pita kwandam “mu Want wa chikupu wa Nsalejetu, ndiy kamu Mupandish wetu Yesu Kristu.” (2 Pita 1:11) Difut diwamp mud ik! Anch wajijaman mud Pita ni walik anch Yehova akufumba, niyey ukutwish kutambul difut da mwom wa chikupu. Mud ‘difut da ritiy rey, diawiy dipandish da mupim wey.’​—1 Pita 1:9. w23.09 31 par. 16-17

Dizang diading ni dibur dimwing. Dibur diading mu chipang ni yading ndond yimwing yidia pa mutaj mwasadinangau in kupesh midimu yau. Chintamb chijim cha utad wa kwivre chapeshilangau yakupesh chading mu dibur, pamwing ni dilong dijim dia mem dia utad wa kwivre diasadinangau in kupesh mulong wa kwishitwish kurutu kwa kusal midimu yau yitumbila. (Kub. 30:17-20; 40:6-8) Nlel, antu azizidilau many ashadilaku asadin nich kushinshaman panap pa divu mu dibur dia mukach dia tempel wa mu spiritu. Kwikalaku kwa dilong dijim dia mem kuyivurishin chom cha usey nakash, mud kand in Kristu awonsu, anch afanyidin kushal ishitwila mu manangu ni mu spiritu. Chad ‘chisak chijim’ chikat kwifukwil ndond ik? Kambuy Yohan wayimana “ading iminy kurutu kwa ditand,” dimekeshina panap pa divu dibur dia pol, mukatau “kumusadil ndiy [Nzamb] muten ni uchuku mu [tempel wend].” (Kuj. 7:9, 13-15) Tujikitishin nakash mulong tukwet ndond ya usey nakash mu difukwil dia Yehova! w23.10 28 par. 15-16

Mutapu umwing ukatay Yehova kutwinkish usu ud kusutin amakurump. (Isay 32:1, 2) Chawiy, anch wiyakamishin isamba nau amakurump piur pa mulong wey. Itiy ni kujikitish anch akukwash. Mulong Yehova ukutwish kukukasikesh kusutil ukwash wau. Kushilamu kuda mu Bibil kutwinkish usu ni ruchingej. (Rom 4:3, 18, 19) Ruchingej retu rikat kutukasikesh kujijamen yikokujol, kulejan rusangu ruwamp, ni kusal kand midimu yikwau mu chikumangen. (1 Tes. 1:3) Ruchingej mud riner rawiy ramukasikesha kambuy Paul. Paul ‘wamana mar,’ ‘wanenganana,’ ‘amuzengola,’ ni ‘kumwas pansh.’ Mwom wend wawonsu wading mu ubaj. (2 Kor. 4:8-10) Paul wikala ni usu wa kujijaman mulong washinshikina pa ruchingej rend. (2 Kor. 4:16-18) Paul washinshikina pa machuku mend ma kurutu piur pa ruchingej rend ra mwom wa chikupu mwiur radingay nich. Paul watongijokina pa ruchingej riner, ni mud chibudikin, wiyovang mud ukat ‘kupizurok dichuku diawonsu.’ w23.10 15-16 par. 14-17

Anch walembil, shinshikin bil anch chawiy chisu kud Yehova cha kwakul ku malembil mey. Tukutwish kwiyov anch tukwet kuswir anch Yehova akula swa-swa ku malembil metu. Pakwez chakin kamu, Yehova wij chisu chiwamp cha kutukwash. (Heb. 4:16) Anch tutambwilap kapamp kamwing yom twitang, tukutwish kutong anch Yehova ‘Katwakwilap.’ Pakwez chakul cha Yehova chikutwish pamwingap kwikal anch ‘Pinap bil bwat.’ Chilakej, mukadivar nsand umwing walembila chakwel ayerika. Pakwez kayerikinap. Anch Yehova wamwoka mu chilay, Satan wafanyina kulond anch mukadivar udandamedin kumusadin Yehova mulong wamwokin. (Job 1:9-11; 2:4) Chikwau kand, Yehova washil kal chisu cha kuyok ayej awonsu. (Isay 33:24; Kuj. 21:3, 4) Nlel unou, tukutwishap kuchingej kutwok mu chilay. Chawiy mukadivar ukutwish kumwit Yehova amwinkisha usu ni chisambu cha mu manangu mulong wa kujijamen mayej ni kudandamen kumusadin Nzamb nich kushinshaman. w23.11 23 par. 13

Samson wasala kamu chom chiyimp nakash, pakwez kaziyap. Wakimba mutapu wa kuwanyish chisend chamwinkishau kud Nzamb cha kuyirishikish in Filistin. (Ank. 16:28-30) Samson wamwilembina Yehova anch: Nkwashaku amboku chakwel “niyifundakeshin in Filistin.” Nzamb wakin wakula ku malembil ma Samson ni wamuchirishina kand usu upandakena. Mud chibudikin, Samson watwisha kuyijip in Filistin avud pa chisu chinech kusutamu ajipay pakur. Ap anch Samson wamana mar nakash mulong wa kurumbuk kwend, kaziyap kusal rusot ra Yehova. Niyetu tufanyidinap kwimik kusal rusot ra Yehova anch twarumbuk ni anch atupup ap twashadish yisend. Tuvurikany anch Yehova ukatin kamu kutulikishin. (Kus. 103:8, 9) Chikalap nchik kurumbuk kwetu, Yehova ukutwish kutwinkish usu mulong wa kusal rusot rend, mud mwasalay kud Samson. w23.09 6 par. 15-16

Kujijaman kukukuletin dilau da Yehova. Chinech chirumburikinap anch Yehova ukat kusangar anch uman mar. Nzamb ukwitiyin ey. Kujijaman kwey kukukwikadish muntu wakin. Chid chiyukish chiwamp nakash! (Kus. 5:12) Vurik anch Aburaham wajijamena yikokujol ni chawiy chasala anch ikal ni dilau da Nzamb. Yehova wamumana mud murund nend ni wamutazuka anch ud muntu utentamina. (Dis. 15:6; Rom 4:13, 22) Chikutwish kand kwikal mwamu kud etu. Yehova ukat kutusanger kadiap mulong wa yom tusadina mu mudimu wend ap mulong wa yisend tukweta. Yehova ukat kusangar anch twashal ashinshamena chikalap nchik yikokujol. Chikalap nchik mivu tukweta, yishiken, ap ukaliweny, etu awonsu tufanyidin kujijaman. Ov, ujijamedin yikokujol katat? Anch chid mwamu, vurik anch ukwet dilau da Nzamb. Kwijik anch tukwet dilau da Nzamb kukutwish kutukasikesh. Kukutwish kukasikesh kand ruchingej retu. w23.12 11 par. 13-14

Ikundj mwin Kristu ufanyidin kwijik kwambamb nawamp nau antu akwau. Muntu ikundj wija kwambamb nawamp ukat kutesh nich manangu yitongijok ni yovil ya antu akwau. (Jnsw. 20:5) Ufanyidin kwijik mutapu ulondinau antu akwau, mu mazu maswapela ni kwikal mu urund ni antu. Ukwijik kusal mwamu ching anch ukat kusutish chisu nau antu akwau. Anch ukat kusadin chisu chawonsu yom ya elektronik mulong wa kwambamb, mud ma email ap ma mesaj, ukaliweny wey wa kwambamb nau antu mes ni mes ukutwish kukep. Sal usu wa kukimb mitapu ya kwambamb nau antu akwau mes ni mes. (2 Yoh. 12) Ikundj mwin Kristu uswila ufanyidin kwijik kwisadinap yom amwinend ni antu a ku chikumbu chend. (1 Tim. 5:8) Chid cha usey kwikal ni ukaliweny kanang ukutwisha kukukwash kutan mudimu wa kumujimbu. (Mid. 18:2, 3; 20:34; Efes 4:28) Ukwikal ni katumb kawamp anch wikasikesh kusambish mudimu ni kuupwish. Anch wasal mwamu, ukutwish kwikal ni mitapu ya kutan mudimu ni kuulam. w23.12 27 par. 12-13

Pisambidinay Bibil piur pa “dichuku dia [Yehova],” wisambidin chisu chikurumburishay Yehova akankuny nend ni kuyipandish antwend. Pasak, Yehova wayirumburishang antu yisu yimwing. (Isay 13:1, 6; Ezek. 13:5; Sof. 1:8) Mu chirung chetu, “dichuku dia [Yehova]” dikusambish ni kusheshik kwa Babilon Mujim djat ni kwinjit ja Armagedon. Mulong wa kupand ku “dichuku” dined, tufanyidin kwirijkek kusambish katat. Yesu wafundisha anch tufanyidinap kwetu ching kusu kwirijek mulong wa ‘mar makash’ pakwez tufanyidin kand “kudandamen kwirijek” mulong wa chom chinech. (Mat. 24:21; Luka 12:40) Mu mukand wa kusambish upepidilau wayifundinay in Tesalonik, Kambuy Paul wasadina yilakej yivud mulong wa kuyikwash in Kristu kudandamen kwirijek mulong wa dichuku dijim da dirumburish da Yehova. Paul wading wij anch dichuku dined diafanyinap kushik kamu pa chisu chinicha. (2 Tes. 2:1-3) Pakwez wayikasikesha akadivar nend kwirijek mulong wa dichuku dined mud dikushik diamashik. w23.06 8 par. 1-2

Mu muvu wa 1978 atunga etaj mulemp nakash mu musumb wa Tokyo, mu Japon. Antu iyipula anch mutapu ik ukutwishay etaj winou kwiman anch kwasadik kuzal kwa divu mwi ngand. Wisu wadinga ujindj? Antu ileja nakash yom ya kutung amusala mukash ni chisu chawiy chimwing uziyina nakash mulong ap anch kwikal kuzal kwa divu kafanyinap kuwa. In Kristu ad mud etaj winou. Mu mutapu ik? Mwin Kristu ufanyidin kwikal wisikena piur pa kushal wiminya daang ni kwikal uswapela kuswimp. Ufanyidin kwiman daang wakad kushemunik mu chisu chimwitina kuziyin ku yijil ni mbil ja Yehova. Ukat “kuziyin swa” ni kakatap kubwambwil. Ku mutambu ukwau chimwintin kwikal ni ‘[chitongijok] chiwamp,’ ap, kwikal uswapela kuswimp anch kud yishiken yimwitina kusal mwamu. (Jak. 3:17) Mwin Kristu wilejina kal kwikal ni chitongijok chisikena mu mutapu winou ukwipuk kwikal mwin kujikishin nakash pa chom ap mwin kulikidil yom nakash. w23.07 14 par. 1-2

Yesu wafanyina kujijamen yoziu ya Satan Djabul, ni kupak kwa patok kwafanyina kumushadishin kushinshaman kwend kud Nzamb. (Mat. 4:1-11) Satan wading usotin kamu kumusadikish Yesu chitil chakwel amukangesh kupan difut. Pa chisu cha mudimu wend panap pa divu, Yesu wajijamena yoziu yivud. Warisha ni kuzengol ni asota kumujip kud akankuny nend. (Luka 4:28, 29; 13:31) Warisha ni kuburen kuwanyin kwa in kwilejend. (Mar. 9:33, 34) Warisha ni yikokujol mu mwom wend, amumesha mar ni kumusip. Kupwa amujipa mu mutapu wa usany ni wafa rufu risansena nakash. (Heb. 12:1-3) Wafanyina kujijamen chikokujol chansuden amwinend, pakad ukwash wa Yehova. (Mat. 27:46) Chakin kamu, Yesu wamana mar nakash mulong wa kupan difut. Anch twatongijokin pa yom yawonsu yasalay Yesu mulong wetwetu, ov, chinech chitubachikinap kumukat nakash? w24.01 10-11 par. 7-9

Kushimpish muchim kutukwashining kushakam nawamp nau akwetu. Kutukwashining kutesh nawamp chisu chilondinau antu akwau. (Jak. 1:19) Kushimpish muchim kukat kukasikesh kand chisambu. Kukat kutukwash kulik kwakul mau mau ap kulond yom yiyimp chisu tukweta yakamish. Ni anch tud in kushimpish muchim, tukujimanap swa anch muntu watutap ku muchim. Pa ndond pa kufundakesh, ‘tukuduwulijan . . . ni kulikishijadin umwing ni mukwau.’ (Kol. 3:12, 13) Kushimpish muchim kukutwish kand kutukwash kukwat mipak yiwamp. Pa ndond pa kusal yom mau mau ap nich muchim wa kadwukudwuku, tukwitekin chisu cha kukimbijol ni kuman mupak uwamp wa kukwat. Chilakej, anch tukimbin mudimu, tukutwish kukimb kwitiy mudimu wakusambish ukutulejau, ap anch ukutukangesh kumwifukwil Yehova nawamp. Pakwez anch twashimpish muchim, tukwitekin chisu cha kushinshikin yom mud ndond, asaa a mudimu, ni yibudikin yikwikala nich mudimu winou pa dijuku dietu ni pa mashakamin metu ma mu spiritu. Kushimpish muchim kukutwish kutukwash kwipuk kukwat mupak uyimp. w23.08 22 par. 8-9

Anch waziy mulong urishin nich maku mayimp, kutongijokin pa kushilamu wamukana Yehova piwipana amwiney kud ndiy kukukasikesh mupak wey wa kurish nich choziu. Mutapu ik? Anch wipan kud Yehova, chid mud witunin amwiney. Chinech chirumburikin anch utondin kwipuk maku ma mujimbu makad kumusangaresh Yehova. (Mat. 16:24) Anch akupak ap anch warish ni yikokujol yikash, ufanyidinap kwiyipul piur pa yom ufanyidina kusal. Ukwikal ni kuswir kwa kukwat mupak wa yom ukusala mulong wa kushal ushinshamena kud Yehova. Ufanyidin kukwat mupak wa kushal ushinshamena mulong wa kumusangaresh Yehova. Anch wasal mwamu ukwikal mud Job. Ap anch warisha ni yikokujol yikash, wakwata mupak palonday anch: ‘Nikudandamen kamu kulam kushinshaman kwam!’​—Job 27:5. w24.03 9 par. 6-7

Yehova “Nzamb wa rukat,” ud netu! (2 Kor. 13:11) Umubangidining muntu ni muntu panrend. Tukwet kashinsh anch “[utwombinamu] nich rukat Rend rudimukina.” (Kus. 32:10) Anch twatongijokin pa mutapu utumekeshidinay rukat, tukuman kamu nawamp mutapu utubangidinay ni tukumusejin piswimp. Tukutwish kumulembil pakad wom ni kumulej mutapu tuswirikedina rukat rend. Tukumulej yakamish yetu yin yawonsu nich kashinsh anch ukututesh ni ukwet impu ya kutukwash. (Kus. 145: 19) Mud tukata kusejin ku chirungul cha kasu anch kud mashik, tukat kusejin ku rukat ra Yehova. Ap anch rukat ra Yehova rikwet usu nakash, pakwez rid kand ruwamp. Chawiy ikal ni musangar mulong Yehova ukukatin. Ni itiy rukat rend kusutin kulond anch: “Nimukatin Yehova”!​—Kus. 116:1. w24.01 31 par. 19-20

Yesu wasala yom yivud kusutamu kwau kuyilej antu anch dijin da Nzamb ndiy Yehova. In Yuda afundishau kud Yesu ading ij kal dijin da Nzamb. Pakwez Yesu wikala chilakej “mu kumwijikish Nzamb patok kud antu.” (Yoh. 1:17, 18) Chilakej Mifund ya Hebereu yilejen anch Yehova ud mwin riy ni ranaken. (Kub. 34:5-7) Yesu wamekesha patok uyakin winou pasadinay chishimu cha mwan ni tatukwend. Anch twatang piur pa tatuku wamumana mwanend wading mwin kukarumuk “pachadingay kulemp ni kwol kwau,” waya mau mulong wa kumubwikat ni wamulikishina ni muchim wawonsu, chilakej chinech chitukwashin kov kamu nawamp piur pa ranaken ni riy ra Yehova. (Luka 15:11-32) Yesu wayikwasha antu akwau kwijik chakin kamu wuntu wa Yehova. w24.02 10 par. 8-9

Yehova ukat kudutish ni kukasikesh antu ada mu mar. Mutapu ik tukutwisha kumwimburij Yehova mu kuyovil antu akwau riy ni kuyikasikesh? Mutapu umwing ukutwisha kutukwash kusal mwamu ud wa kukudish mikadil yiney mu michim yetu mulong wa kuyikasikesh antu akwau. Mikadil ik yimwing tufanyidina kukudish? Yom ik yikutwisha kutukwash kulam rukat tukweta nich kuswir mulong wa “kudandamen kukasikeshijan umwing ni mukwau” dichuku dawonsu? (1 Tes. 4:18) Tukwet kuswir kwa kukudish mikadil mud yiney, yovil mulong wa arund, rukat ra ukadivar, ni ranaken. (Kol. 3:12; 1 Pita 3:8) Mutapu ik ukutwisha mikadil yiney kutukwash? Anch twayovil akadivar netu riy ni twayibangin chakin kamu, tukwikal ni maku makash ma kuyikasikesh chisu chidau mu mar. Mud mwalonday Yesu anch “mulong kan ka muntu kakat kubudish yom yizwila mu muchim wend. Muntu muwamp ukat kubudish yom yiwamp mu chipau cha yom yiwamp ya mu muchim wend.” (Mat. 12:34, 35) Kuyikasikesh akadivar nau anambaz netu adia mu maswir ud mutapu wa usey nakash tumekeshina rukat retu kud awiy. w23.11 10 par. 10-11

Tufanyidin kwit ukwash anch tukimbin kutesh nawamp uprofet wa Bibil. Shinshikin chilakej ech. Tong bil anch uyil kwindond wakad kwijik nawamp, pakwez muntu uyila nend wij nawamp ndond yiney. Wij nawamp kwindond udanya ni kwisu uyilanya. Chakin kamu ukusangar mulong muntu winou witiyang kwez ney! Chilik chimwing, Yehova wij nawamp kwisu tudia ni kwisu tuyila. Chawiy mulong wa kutesh uprofet wa Bibil, tufanyidin nich kwikepish kumwit Yehova ukwash. (Dan. 2:28; 2 Pita 1:19, 20) Mud nvaj mwawonsu muwamp, Yehova usotin anch anend ikala ni machuku ma kurutu mawamp. (Jer. 29:11) Pakwez Yehova ushalijadin ni anvaj achika wuntu, mulong ndiy ukutwish kutulej machuku ma kurutu pakad kwidimb. Wafundikisha uprofet mu Dizu diend chakwel twijika yinship ya usey kurutu yisadika.​—Isay 46:10. w23.08 8 par. 3-4