Ngond wa 7

Yom yawonsu yalonday ni yasalay Yesu, kuwejaku ni yilay yasalay wimburija chitongijok ni yovil ya Tatukwend. (Yoh. 14:9) Yom ik twilejidina ku yilay yasalay Yesu? Yesu ni Tatukwend atukatining nakash. Padingay pa divu, Yesu wamekesha mutapu wading uyikatinay nakash antu kusutil kusadin usu wend wa kusal nich yilay mulong wa kuyikwash antu ading amena mar. Dichuku dimwing, amputames aad amwilembina chakwel ayikwash. (Mat. 20:30-34) Umen anch Yesu “wayovila riy” ni kupwa wayoka. Dizu da Grek dikarumwinau pinap anch “wayovila riy” dimekeshin ranaken ripandakena rovilay muntu mukach mwend. Ranaken ripandakena mud riner, rimekeshina rukat, rawiy kand ramubachika Yesu kuyidish antu ading afila nzal ni kumwok mwin musong wa mak. (Mat. 15:32; Mar. 1:41) Tukutwish kwikal nich kashinsh anch Yehova, Nzamb “mwin riy ni ranaken,” ni Mwanend atukatin nakash ni chikat kuyisal nayimp anch atuman tukat kuman mar. (Luka 1:78; 1 Pita 5:7) Chakin kamu, achingedin nich impu nakash kupwish uyimp wawonsu uyimeshina antu mar! w23.04 3 par. 4-5

Tukutwish kusal usu wa kwipuk kutang ni kutesh yitongijok yiyimp yivulijadina mu mangand minam ma Satan. Tukutwish kwizwish manangu metu nich yitongijok yiwamp kusutin kutang ni kwilej Bibil, kukumangan ku yikumangan ni kwipan mu mudimu wa kulejan. Ku mutambu wend, Yehova utukanin anch kakwitiyap anch atupaka nich yom yipandakenamu usu wetu. (1 Kor. 10:12, 13) Etu awonsu tufanyidin kulembil nakash mulong wa kushal ashinshamena kud Yehova mu chirung chinech chikash cha machuku ma nsudien. Yehova ukatin anch ‘tumwazuril michim yetu’ mu malembil. (Kus. 62:9) Mushimana Yehova ni mujikitisha mulong wa yom yin yawonsu yisadinay. Mwita chakwel akukwash kwikal utakamena mu mudimu wa kulejan. Mwilembina chakwel akukwash kurish nich milong yin yawonsu ni kupandakan choziu ukutwisha kurish nich. Kangal walikidin anch chom ap muntu kanang akukangesh kumulembil Yehova. w23.05 7 par. 17-18

Mulong wak tukat kuya ku yikumangan? Cha kusambish, chid mulong wa kumushiman Yehova. (Kus. 26:12; 111:1) Cha kaad, tukat kukumangan ku yikumangan mulong wa kukasikeshijan muntu ni mukwau mu yisu yiney ya mar. (1 Tes. 5:11) Chawiy, anch twakul ku yikumangan, twawanyish kal yom yiney yaad. Pakwez kud yom yikutwisha kusal anch chitukasiken kwakul ku yikumangan. Tukutwish kwov wom chisu twakwila, ap tukutwish kukat kwakul tupamp tuvud pakwez yisu yimwing mukadivar utakedina kakutwishap kututond anch twazambul chikas. Yom ik yikutukwasha kupandakan milong yiney? Kambuy Paul walonda anch tufanyidin kushinshikin pa ‘kukasikeshijan muntu ni mukwau.’ Anch twajingunin anch tukutwish kuyikasikesh antu akwau kusutin kulond chom kanang piur pa ritiy retu, tukutwishap kov wom ap kwiyakamish piur pa kwakul ku yikumangan. Ni anch katutondinap mulong wa kwakul tupamp tuvud, tukwikal ni musangar mulong chinech chikuyinkish antu akwau mutapu wa kwakul.​—1 Pita 3:8. w23.04 20 par. 1-3

Mwant wijikisha anch in Yuda akwatau mu winkwal mu Babilon mu mivu 70, afanyina kuchirik mwi ngand yau ya chivadik, mu Isarel. (Esi. 1:2-4) Ching kusu Yehova ndiy wafanyina kuwanish chom chinech. Mu win yakin, in Babilon kayilikishangapaku antu akwatangau mu usuk. (Isay 14:4, 17) Pakwez Babilon wawa, ni ntakel musu wayileja in Yuda anch akutwish kubudik mwi ngand. Mwin Yuda mwawonsu, pakampwil antakel a majuku afanyina kukwat mupak wa kudiokal mu Babilon ap kushal. Winou wadingap mupak uswapela kukwat. Antu avud ading ananapin kal ni chafanyina kuyikasiken kusal weny ulemp. Ni kupwa in Yuda avud avadikina mu Babilon, ading kandikal ashakamangap ndond yikwau. Kud awiy, Isarel yading kwau ngand ya angakiril au. Chimeken anch in Yuda amwing ading ni mashakamin mawamp mu Babilon, chawiy chafanyina kuyikasiken kusha yikumbu yau yiwamp ap mijikit yau mulong wa kuya kushakam mwi ngand yakadiau kwijidin. w23.05 14 par. 1-2

Dizu da Nzamb ditukasikeshin kudandamen kukudish kujijaman, ranaken, ni rukat. Luka 21:19 ulondin anch: “Imanany dang, chad ukez kipandishany ayinen.” Kolosay 3:12 ulondin anch: “Djalany riy.” Ni 1 Tesalonik 4:9, 10 ulondin anch: “En ayinen akulejinany kal kudi Nzamb mutapu wa kukatijan muntu ni mukwau. . . . Pakwez anamakwetu in Kristu, twakulembijekany chakwel uwejanyaku kusal mwamu kakwau ni kakwau.” Ma verse minam mawonsu ayifundinam in kwilej ading akweta chaku cha kumekesh mwikadil wa kujijaman, ranaken ni rukat. Pakwez chading chiyitin kudandamen kukudish mikadil yiney. Niyetu tufanyidin kusal mwamu. Mulong wa kutukwash, ukushinshikin mutapu wamekeshau in Kristu mikadil yiney. Kupwa ukuman mutapu ukutwisha kuyimburij in kwilej inay ni kumekesh anch ud wirijekina mulong wa mar makash. Kupwa chisu chikusambisha mar makash, ukwikal wijikin kal mutapu wa kujijaman ni ukukwat mupak wa kudandamen kujijaman. w23.07 3 par. 4, 8

Twikala pakach pa azizidilau many ap pakach pa “amikoku akwau,” tufanyidin kudandamen kwendin mu “Mukombil Utumbila” mulong ukutukwash kudandamen kumwifukwil Yehova kusambish katat djat ni mu machuku ma kurutu pakuleta Want wa Nzamb mashakamin mawamp pa divu. (Yoh. 10:16) Kudiosh muvu wa 1919 C.C., mamiliyon ma amakundj, amband, ni an akat kudiokal mu Babilon Mujim, uda ditenchik dia relijon wa makasu, ni kusambish kwendin mwi njil yiney ya chifanakesh. Kurutu in Yuda adiokala mu Babilon, Yehova wasambela kuyirijekin njil yau. (Is. 57:14) Chid nchik piur pa “Mukombil Utumbila” wa mu chirung chetu? Mivu yivud kurutu kwa kushik mu muvu wa 1919, Yehova wasadina amakundj amwovila ndiy wom mulong wa kuyikwash antu kudiokal mu Babilon Mujim. (Ilikej ni Isay 40:3) Arijeka chom cha usey—njil ya mu spiritu, mulong wa kuyikwash antu atentamina kudiokal mu Babilon Mujim ni kwandam mu paradis wa mu spiritu, ndond yachirishinau kal difukwil dishitwila dia Yehova. w23.05 15-16 par. 8-9

Yehova ukatin anch tumusadin nich musangar ni kwa kwisotin. (2 Kor. 9:7) Chawiy, ov, tufanyidin kusal usu wa kuwanyish mipak ya mu spiritu anch twovilap ja kusal mwamu? Shinshikin chilakej cha kambuy Paul. Walonda anch: “Nikat kumesh mujimbu wam mar mulong winziyil.” (1 Kor. 9:25-27) Paul wikasikesha kusal yom yiwamp ap anch wading wovil ja kusal yom yindj. Ov, mudimu wa Paul wamusangaresha Yehova. Inge! Ni Yehova wayukisha usu wasalangay. (2 Tim. 4:7, 8) Chilik chimwing, Yehova ukat kusangar pakatay kutuman tukat kusal usu wa kuwanyish mupak wetu ap anch tukwetap rusot ra kusal mwamu. Ukat kusangar mulong ap anch chisu chawonsu tukatap kusal yom mulong twovil ja kusal yom yiney, pakwez wij anch tukat kuyisal mulong tumukatin ndiy. Mud mutapu wamuyukishay Paul, Yehova ukutuyukish kand niyetu mulong wa usu tusadina. (Kus. 126:5) Ni anch twaman mutapu Yehova utuyukishinay, tukutwish kusambish kukudish rusot ra kuwanyish mipak yetu. w23.05 29 par. 9-10

Kambuy Paul wafanakesha antu akulika kupand ku dichuku da Yehova nau antu alela. Ad antu akad kwijik yom yiyinyingumukina ap mutapu usutina chisu. Chawiy, kijap yom ya usey yisadikina, ni kakutwishap kuyitiy. Antu avud nlel alel tul twa mu spiritu. (Rom 11:8) Kakatap kwitiy uman umekeshina anch tushich mu “machuku ma kwisudiel” ni anch mar makash makwez kamu piswimp ap. (2 Pita 3:3, 4) Pakwez, twij anch chid cha usey nakash kud etu kushal achila ku mes dichuku diawonsu. (1 Tesalonik 5:6, 7) Chawiy, tufanyidin kutek manangu mwi ndond ni kulik kuzazat. Mwamu yikutukwash kulik kwiyandjik mu milong ya antu ap ya politik ya mangand minam. Payila dichuku da Yehova kusej piswimp, akutubachik nakash kwiyandjik mu milong yiney. Pakwez tufanyidinap kwiyakamish piur pa mutapu tukusala. Spiritu wa Nzamb ukutwish kutukwash kutek manangu mwi ndond ni kulik kuzazat ni kukwat mipak ya manangu.​—Luka 12:11, 12. w23.06 10 par. 6-7

Yom ik yikata kukwez mu manangu anch watesh dijin da Samson? Ukat kuvurik pamwing ap ikundj wa usu nakash. Chid kamu chakin. Pakwez Samson wakwata mupak uyimp waleta yibudikin yiyimp. Chikalap nchik mwamu, Yehova washinshikina pa kushinshaman kwa Samson, kwafundikishay mu Bibil chakwel twilejina ku chilakej chend. Yehova wamusadina Samson mulong kusal yom yishimwokishena mulong wa antwend atonday, in Isarel. Mivu yivud kupwa kwa kufa kwa Samson, Yehova wamupepila kambuy Paul chakwel aweja dijin da Samson pakach pa amakundj amekesha ritiy rikash. (Heb. 11:32-34) Chilakej cha Samson chikutwish kutukasikesh. Wamuchingejina Yehova ap mu yisu yikash. Chilakej chend chikutwish kutukasikesh ni tukutwish kwilejinaku malejan makwau ma ukwash. w23.09 2 par. 1-2

Tukutwish kukudish mwikadil wa kujijaman kusutin kumulembil Yehova chisu chawonsu ni kumulej milong yetu. (1 Tes. 5:17) Pamwing ap nlel urishinap ni milong yikash. Ap anch chid mwamu, ov, ukat kukimb umutakel wa Yehova chisu wovila ushon, ap chisu wakad kuman chom cha kusal? Anch kusambish katat ukat kumulembil Nzamb chisu chawonsu mulong wa kumwit ukwash chisu urishina ni milong ya pichuku pichuku, ukutwishap kwidjidjek kusal mwamu chisu ukurisha ni milong yikash mu machuku ma kurutu. Ukwikal nich kashinsh anch wij nawamp chisu ni mutapu ukusalay mulong wa kukukwash. (Kus. 27:1, 3) Chikutuswapel kujijamen mar makash anch twashal ashinshamena kud Yehova chisu turishina ni milong nlel. (Rom 5:3) Mulong wak tulondina mwamu? Akadivar nau anambaz avud ajingunin kal anch chisu chawonsu chikatau kupandakan chikokujol chipakina ritiy rau, chikat kuyikwash kujijaman. Anch ajijamen mulong kampand nich ukwash wa Yehova, akat kwikal nich kashinsh kawonsu anch Yehova ukatin kamu kuyikwash. Chawiy, mwamu ritiy rikat kuyikwash kujijamen yikokujol yikwau.​—Jak. 1:2-4. w23.07 3 par. 7-8

Kwikepish kwa Yehova ni riy rend yawiy yom yikata kumubachik kwikal wisikena. Chilakej, kwikepish kwa Yehova kwamekena patok chisu chasotay kushesh antu ayimp ading mu Sodom. Kusutil angel end, Yehova wamuleja Lot ikundj wading utentamina kuchinin kwi ndond ya mikandu. Lot wova wom wa kuya kwinikwa. Chawiy, wita chakwel ndiy ni dijuku diend achinina ku Zowar, ka musumb kakemp kakimbay Yehova kushesh. Yehova wafanyina kumushindin Lot chakwel aziyila yom yamulejay. Chawiy, Yehova kamukangeshap Lot kuchinin ku Zowar, ni waswimpa chitongijok chend cha kushesh musumb winou. (Dis. 19:18-22) Mu kusut kwa mivu yivud, Yehova wayovila antu a musumb wa Ninive riy. Chawiy, wamutuma muprofet Yona mulong wa kuya kulejan uruu wa disheshik dia musumb mulong wa antu ayimp. Pakwez, in Ninive akarumuka ni Yehova waswimpa chitongijok chadingay nich cha kushesh musumb winou.​—Yona 3:1, 10; 4:10, 11. w23.07 21 par. 5

Yom ik tukutwisha kwilejin ku chilakej cha Jowas? Wading mud mutond wakad kujamish mij ukweta kuswir kwa dinguj. Kupwa kwa rufu ra Jehojada—muntu wading mud dinguj, Jowas wasambisha kuyitesh in kupumbok ni kamushinshamenap kand Yehova. Chilakej chinech chimekeshin anch wom tumwovila Yehova ufanyidinap kwau kwimen pa yibachikin yiwamp ya anamakwetu in Kristu ap ya antu a mu dijuku dietu. Mulong wa kushal piswimp ni Yehova, tufanyidin kukudish rukat retu ni kwikal ni kalimish kakurikina mulong wendendiy. (Jer. 17:7, 8; Kol. 2:6, 7) Yehova katwitinap kusal yom yikash. Yom yitulejinay yid mu Mulej 12:13, ulondina anch: “Mulimisha Nzamb, ziyil ku malejan mend, mulong wa chom chinech chawiy chamutangilau muntu.” Anch twamwov Nzamb wom, tukutwish kumushinshamen chikalap nchik yom yikushikena mu machuku ma kurutu. Kwikil chom ap chimwing chikutwisha kuyipish urund wetu ni Yehova. w23.06 19 par. 17-19

Kushilamu kwa Nzamb kusambishin ni mazu manam: “Chad ndiy ushicha pa ditand walonda anch.” (Kuj. 21:5a) Mazu minam mad kamu ma pakampwil mulong mamekeshin kapamp kakusambish mu tupamp tusatu tulondinay Yehova amwinend mu mukand wa Kujingunik. Chawiy mazu minam kamalondap kud mwangel ukweta dikand ap kud Yesu kupwa kwa kuvumbuk, pakwez kud Yehova amwinend! Mazu minam mamekeshin anch tufanyidin kamu kuchingejin mu mazu malondinay. Mulong wak tulondina mwamu? Chid mulong Yehova ‘kakudimbanangap.’ (Tit. 1:2) Chawiy mazu tutangina mu Kujingunik 21:5, 6 makuwanyin kamu. Katat el tushinshikina mazu ‘Tal!’ Mazu ma Grek makarumwinau anch ‘tal!’ amachirikidin tupamp tuvud mu buku wa Kujingunik. Mazu ik makwau malondwilaku? Nzamb ulondin anch: “Nikat kusal yom yawonsu yisu.” Chakin kamu, Yehova ulondin piur pa machuku ma kurutu makuswimpa, pakwez kud ndiy kushilamu kwinoku kud mud kwawanyidin kal kwau palondinay anch ukusal yom yawonsu kwikal yisu.​—Isay 46:10. w23.11 3-4 par. 7-8

Chikalap nchik yom yawonsu yamanay ni yateshay, kambuy Pita warisha ni kuziy kwend. El tushinshikinanyaku yilakej yikemp. Parumburilay Yesu mutapu ukumanay mar ni kufa mulong wa kuwanyish uprofet wa Bibil, Pita wamupupa. (Mar. 8:31-33) Tupamp tuvud Pita nau atwimbuy akwau atendang mulong wa kwijik nany wadinga mukurump pakach pau. (Mar. 9:33, 34) Chisu chamukwatau Yesu, Pita wakatula ditu da ikundj umwing. (Yoh. 18:10) Pa uchuku winiwa, Pita wova wom ni wamutuna Yesu tupamp tusatu ni kulond anch kamwijap kwend. (Mar. 14:66-72) Chinech chamushikija Pita ku kudil ni kushikok nakash Yesu kamulikap kambuy wend wading uziyina. Kupwa kwa Yesu kuvumbuk, wamekesha anch umukatin Pita. Yesu wamwinkisha Pita chisend cha kudish amikoku end. (Yoh. 21:15-17) Pita witiyina kuwanyish chisend chinech. Pa dichuku da Pentekot wading ku Yerusalem ni wading pakach pa antu akusambish azizilau many ku spiritu utumbila. w23.09 22 par. 6-7

Kambuy Pita wayileja amakurump akwau anch: “Yilamany yisak ya amikoku a Nzamb.” (1 Pita 5:1-4) Anch ud mukurump, twij anch uyikatin akadivar nau anambaz ney ni uyibangidin kamu. Pakwez yisu yimwing, ukutwish kwiyov mud ukwatiken nakash ni uziyin nakash ni anch ukutwishap kamu kuwanyish chisend chey. Yom ik yikutwisha kukukwash? Muleja Yehova mutapu wiyovila. Pita wafunda anch: “[Muntu] watambula mutapu wa kusal mudimu wa kukwashan, asala nich usu umwinkishinau kudi Nzamb.” (1 Pita 4:11) Akadivar nau anambaz ney akutwish kurish ni yikokujol yikutwisha kupwa ching mwi ngand yisu. Pakwez vurik anch Yesu Kristu udia “kafung mujim,” ukutwish kuyikwash chipandakena kusutamu mutapu ukutwishay kusal muntu mwawonsu. Ukutwish kusal mwamu nlel ni mwi ngand yisu. Nzamb uyitin kwend amakurump kuyikat akadivar nau, kuyibangin ni kwikal “chilakej chiwamp kud amikoku.” w23.09 29-30 par. 13-14

Tufanyidin kwipuk kukimb kwimburij yitongijok ya antu. Anch twaman yom mud muyimenau kud antu, tukutwish pamwing ap kulik kumuziyin Yehova ap kand kuziyin mbil jend. (1 Kor. 3:19, 20) “Manangu ma mangand” mayibachikining antu yisu yivud kumubwambwil Nzamb. In Kristu amwing a mu Perigam ni Tiatir ayimburija antu ading ayinyingumukina ni ading akweta yaku yinjondila ni ya kwifukwil akish. Yesu watuma yiyul yikash ku yikumangen yiney yaad mulong ading alikidil yisal ya masandj. (Kuj. 2:14, 20) Nlel unou tukat kurish ni yibachikin ya kwitiy yitongijok yiyimp. Antu a mu majuku ni antu akwau twijikijadina nau akutwish kutwel anch tupandakeshin ni kutubachik kubwambwil ku yijil ya Yehova. Chilakej, akutwish kutulej anch chidiap kwau cha usey kushal ishitwila ni anch mbil ja Bibil yid yom ya pakur nakash. Yisu yimwing tukutwish kutong anch mbil jitwinkinay Yehova jovakenap kwau. Akutwish ap kutupak kusal yom yakad kukwatijan ni “mazu mafundilau.”​—1 Kor. 4:6. w23.07 16 par. 10-11

Mariy wading ukwet kuswir kwa kumukasikesh. Kadingap ngachik, pakwez wafanyina kwimish. Kadingap kija chom ap chimwing piur pa mutapu wa kulil mwan, pakwez wafanyina kumulil mwan ikundj wafanyina kwikal Mesiya. Ni mulong wading kandikal alalangap ni ikundj, mutapu ik Mariy wafanyinay kumurumburil Josef wamutonda rusangu riner? (Luka 1:26-33) Mutapu ik watambulay Mariy usu mulong wa kuwanyish chisend chadinga cha pakampwil ni chikasikena? Wita ukwash kud antu akwau. Chilakej, wamwipula Gabriel yom yikwau yafanyina kumukwash kuwanyish chisend chinech. (Luka 1:34) Kupwa kwa chisu chikemp, waya “mwi ngand ya mikandu” ya Yudeya mulong wa kumutal Elizabet. Elizabet wamujikitisha Mariy ni amupepila kud Yehova mulong wa kumulej Mariy uprofet ukasikeshina piur pa mwan wafanyinay kuval. (Luka 1:39-45) Mariy walonda anch Yehova “wasala yom yikwamushena ku usu wa chikas chend.” (Luka 1:46-51) Yehova wamukasikesha Mariy, kusutil Gabriel ni Elizabet. w23.10 14-15 par. 10-12

In kwilej akemp kusu a Kristu awiy azizilau many nich spiritu utumbila, ni akwet urund wa pakampwil nend Yehova. Antu inay 144 000 akusal mud in kupesh mwiur pamwing nend Yesu. (Kuj. 14:1) Ndond Yitumbila yadinga mu dizang yimekeshin anch antu inay ayilanda mulong wa kwikal an a Nzamb a mu spiritu chisu chidiau panap pa divu. (Rom 8:15-17) Ndond Yitumbila Nakash yadinga mu dizang yimekeshin mwiur, mushichingay Yehova. “Rido” waurila Ndond Yitumbila ni Ndond Yitumbila Nakash umekeshin mujimbu wa mbij wa Yesu, mujimbu winou wading umukangeshin kuya mwiur mud Mwin Kupesh Mujim wa tempel wa mu spiritu. Kusutil kupan mujimbu wend mud chakupesh mulong wa antu, Yesu wafungula njil yitwadina ku mwom wa mwiur mulong wa in Kristu awonsu azizidilau many. In Kristu inay afanyidin niyau kusha mijimbu yau ya mbij mulong wa kutambul difut diau mwiur.​—Heb. 10:19, 20; 1 Kor. 15:50. w23.10 28 par. 13

Gedeyon wakulang nich kwitudish pamulondangau nayimp kud in Eferayim. (Ank. 8:1-3) Kayichirilangap. Wamekeshang anch ud muntu wikepishina kusutil kuyitesh nawamp, wasalang nich nkeu mulong wa kukangesh yom yafanyina kuletish matend. Amakurump akweta manangu akat kwimburij chilakej cha Gedeyon ni kwakul nich kwitudish anch ayilond nayimp. (Jak. 3:13) Mwamu akat kukasikesh chisambu mu chikumangen. Chisu chamubazau Gedeyon payipandakanay in Madian, wapana ntumb yiney kud Yehova. (Ank. 8:22, 23) Mutapu ik ukutwishau amakundj akweta yisend kumwimburij Gedeyon? Akutwish kusal mwamu kusutil kumutumbish Yehova mulong wa yom yisadinau. (1 Kor. 4:6, 7) Chilakej, anch mukurump amujikitish mulong wa ukaliweny wend wa kufundish, ufanyidin kupwitin nkeu pa dizu dia Nzamb, didia musul wa mafundish, ap kupwitin nkeu pa kufumb tutambwila mu dirijek dia Yehova. Amakurump akutwish kand kwishinshikin anch yom yifundishinau yid mulong wa kumutumbish nich Yehova kadiap mulong wa kupwitin nkeu pad ayinau. w23.06 4 par. 7-8

Anch tutambwilap yom twitang mu malembil, tukutwish kwiyipul ayinetu anch ‘ov, nalembilang mulong wa yom yiwamp?’ Yisu yivud tukat kutongang anch twij yom yida yiwamp kud etu. Pakwez yom twitina yikutwishap kamu pamwing ap kutukwash kurutu kwa machuku. Anch twalembil piur pa mulong kanang, kukutwish kwikal mutapu uwamp nakash wa kupwish mulong winou kusutamu yitwitina etu. Ni yom yimwing twitina yikutwishap kukwatijan ni rusot ra Yehova. (1 Yoh. 5:14) Chilakej, shinshikin chilakej cha anvaj amwita Yehova anch anau adandamena kumusadin ndiy. Kwinoku kumeken anch kud kwit kuwamp. Pakwez, Yehova kakatap kumushindin muntu ap umwing pakach petu mulong wa kumusadin. Ukatin anch etu awonsu, kuwejinaku anetu, twitondinap kumwifukwil. (Kuv. 10:12, 13; 30:19, 20) Chawiy anvaj afanyidin kumwit Yehova chakwel ayikwasha kupukun michim ya anau, kusal mwamu kukutwish kuyibachik kumukat Yehova ni kwikal murund nau.​—Jnsw. 22:6; Efes 6:4. w23.11 21 par. 5; 23 par. 12

Mulong wak kukasikeshijan umwing ni mukwau kud kwa usey mulong wa kuyimekeshin antu akwau anch tuyikatin? Kukwatijan ni mazu mamwing ma Bibil, dizu dasadinay Paul anch “kukasikesh” dirumburikin “kwikal ku mutambu wa muntu mulong wa kumukasikesh chisu chirishinay ni yakamish yikash.” Kusutin kumukasikesh tukat kumukwash mbay netu mu ritiy urishina ni yikokujol kwiman daang ni kudandamen kwendin mwi njil ya mwom. Chisu chawonsu tumukasikeshina mukadivar ap nambaz, tumekeshin anch tumukatin. (2 Kor. 7:6, 7, 13) Kuyovil antu riy ni kuyikasikesh yid yom yovijadina. Mu mutapu ik? Ranaken rikat kumubachik muntu kuyikasikesh antu akwau ni kuyikwash chisu chidau mu mar. Chakusambish anch twayovil antu riy, chinech chikutubachik kuyikasikesh. Shinshikin mutapu ukwatakeshinay Paul riy ra Yehova ni kukasikesh Kwend. Paul umumekeshin Yehova mud “Tatuku mwin riy ni Nzamb ukata kupan kwongoj kwawonsu.”​—2 Kor. 1:3. w23.11 9-10 par. 8-10

In kwilej awonsu a Kristu afanyidin kuchingej anch akuman mar. Shinshikin chilakej cha kambuy Paul. Wayileja in ku Tesalonik anch: “Mulong pitwadinga etu pamwing niyenen, twakulejanya kurutu anch, tukez kuman mar ma kutuzengol. Chawiy en wijany nawamp chakin anch yawiy yom yashikina.” (1 Tes. 3:4) Wayifundina kand in Korint anch: “Anamakwetu in Kristu, tusotil en wijikany mar mitwamana . . . Kitwamanap kand anch tukupand.” (2 Kor. 1:8; 11:23-27) Nlel in Kristu niyau akutwish kuchingej kuman mar mu mitapu yawonsu. (2 Tim. 3:12) Anch watek ritiy rey muday Yesu ni kumulondul, arund ni anamakwey akutwish kukusadin kwa chisum. Ov, kusal usu wa kwikal mwin kashinsh mu yom yawonsu kwakuletinap kal milong ku mudimu? (Heb. 13:18) Ov urishin ni rupompat ra mbur matad mulong ulejen piur pa ruchingej rey kud antu akwau? Paul ulondin anch tufanyidin kusangar chikalap nchik mar mawonsu tukutwisha kurish nich. w23.12 10-11 par. 9-10

Jakob warisha ni milong yikwau. An aad a Jakob, Simeyon ni Levi, aletisha katumb kayimp mu dijuku ni kusaadikish dijin dia Yehova. Chikwau kand, mband wading ukatinay nakash Jakob, Rechel, wafa pa kuval mwanau wa kaad. Mulong mwi ngand mwading nzal nakash, Jakob wafanyina kubuuk ku usu mulong wa kuya mu Idjibit ap anch wading wananapinap kal. (Dis. 35:16-19; 37:28; 45:9-11, 28) Chikalap nchik milong yiney yawonsu yarishay nich, Jakob kashadishap ritiy rend mudiay Yehova ap mu kushilamu Kwend. Ni Yehova wamekesha anch Jakob ukwet dilau Diend. Chilakej, chikalap nchik makasu ma Laban, Yehova wamuyukisha Jakob ni wikala ni mapit mavud nakash. Tongijokin mutapu wafanyinay Jakob kumujikitish Yehova pamumanay kand mwanend Josef​—watongangay kudosh pakur anch wafil kal! Mulong Jakob wading umukatin Yehova nakash, watwisha kurish ni milong yawonsu yashikena. (Dis. 30:43; 32:9, 10; 46:28-30) Anch twikal mu urund wa piswimp ni Yehova, niyetu tukutwish kurish ni milong yikutwisha kushiken pakad kuchingejin. w23.04 15 par. 6-7

Kuseng 23 ud muminy umekeshina kashinsh mu rukat ni kubangin kwa Yehova. David, muntu wafunda kuseng winou, wisambidin piur pa urund wading pakach pendendiy ni Kafung wend, Yehova. David kiyakamishap piur pa kumutakel kud Yehova mulong wading wij anch ud mu diking ni wamuchingejina kamu. David wading wij anch Yehova ukumumekeshin rukat rend dichuku diawonsu. Yom ik yamwinkisha kashinsh kinak? David wiyovang anch amubangidin mulong Yehova wamwinkishang chisu chawonsu yom yading yiswirikedinay. David wading wij anch Yehova wading murunend ni wading ni dilau dend. Chawiy chikalay nich kashinsh anch chikalap nchik yom yawonsu yafanyina kushiken mu machuku ma kurutu, Yehova wafanyina kudandamen kumuwanyishin maswir mend mawonsu. Ruchingej ra David mu rukat ra Yehova rading ripandakenamu nakash yakamish yend ni chinech chamuletina musangar nakash.​—Kus. 16:11. w24.01 28-29 par. 12-13

Kudosh chirung cha Njit ja Kaad ja pa Mangand Mawonsu, antu a Yehova asangera want ipau ni chisambu chikemp mulong wa kusal mudimu wa kulejan. Chawiy antu avud ashikena kumwijik Yehova, ni atushapol end alejen pa divu dawonsu. Nlel, antu ada mu Chisak Chitakedila adandamedin kulondul umutakel wa Kristu. Akatin kwikal ni kashinsh anch mbil jiyinkishinau akadivar nau jimekeshin chitongijok cha Nzamb. Ni akat kusadin atulam a munyingumuku mulong wa kupan umutakel ku yikumangen. Amakurump inay azizidinau many ad “mu chikas cha katatuku” cha Kristu. (Kuj. 2:1.) Chakin, amakurump inay ad antu akad kuwanyin ni akat kurumbukang. Moses ni Yoshua niyau arumbuka yisu yimwing mud mwasalau kand atwimbuy. (Kuch. 20:12; Jos. 9:14, 15; Rom 3:23) Pakwez, tukutwish kuman patok anch Yesu umutakedin kamu nawamp kashalapol ushinshamena ni amakurump atondinau, ni ukudandamen kamu kusal mwamu. Chawiy tukwet kamu mayingishin ma kuchingejin umutakel udokila kud akadivar inay atondau mulong wa kutakel. w24.02 23-24 par. 13-14

Nlel tukutwish kumusangaresh Yehova kusutin kulond piur pend nich chirungul, nich kujikitish ni nich rukat. Anch tud mu mudimu wa kulejan tukat kulam mu manangu anch rutong retu rid ra kuyisejish antu piswimp ni Yehova ni kuyikwash kwiyov mutapu tukata kwiyovang piur pa Tatukwetu wa rukat. (Jak. 4:8) Tukat kusangar kuyilej antu akwau yom yilejenay Bibil piur pa Yehova, mud rukat rend, kutentam, manangu, usu, ni mikadil yikwau kand yisangareshina. Tukat kumutumbish Yehova ni kumusangaresh kusutin kumwimburij. Anch twasal mwamu tukat kwimen kulemp ni mangand minam. Antu akuman anch tushalijadin nau ni akutwish kwiyipul anch mulong wak. (Mat. 5:14-16) Pitukata kutanijan nau mu mashakamin metu ma dichuku dawonsu, tukutwish kuyirumburil mulong wak tukata kusal mwamu. Mud chibudikin, antu akin akutwish kumusejin Nzamb wetu. Tukat kusangaresh muchim wa Yehova anch twamutumbish mu mutapu winou.​—1 Tim. 2:3, 4. w24.02 10 par. 7

Mulong wa kwikal ikundj mwin Kristu uswila, ufanyidin kukudish ukaliweny ukutwisha kukukwash. Ukaliweny winou ukukukwash kuwanyish yisend yey mu chikumangen, kusal mudimu wa kumujimbu mulong wa kuwanyish maswir ma dijuku diey ni kwikal mu urund wa piswimp nau antu akwau. Chilakej, ileja kufund ni kutang nawamp. Bibil ulondin anch wayuk muntu ukata kwitekin chisu mulong wa kutang Dizu dia Nzamb ni kuditongijokin. (Kus. 1:1-3) Kusutin kutang Bibil dichuku diawonsu ukushiken kwijik mutapu utonginingay Yehova, chinech chikukukwash kwijik mutapu wa kusadin nawamp yom utangina. (Jnsw. 1:3, 4) Akadivar nau anambaz akwet kuswir kwa amakundj ija kufundish ni ija kupan nawamp yiyul ya Bibil. Anch wij kutang ni kufund nawamp, ukutwish kurijek madiskur nawamp ni kupan yakul yikutwisha kuyikwash ni kuyikasikesh antu. Ukutwish kand kufund nawamp yom ukwileja ni kutesh mu madiskur ku yikumangan, ku yitentam ya munyingumuku ni ya rejon. Yom yiney ukufunda yikutwish kukukwash kukasikesh ritiy rey ni kuyikwash kand nich antu akwau. w23.12 26-27 par. 9-11

Anch wov wom, tongijokin pa yom yikusalay Yehova mu machuku ma kurutu pakumudoshau Satan. Chakumenaku chading ku program wa chitentam cha rejon cha 2014 chalejana mutapu tatuku umwing wisamba ni dijuku dend mu kukarumun mazu madia mu 2 Timote 3:1-5 piur pa Paradis anch: “Mu mangand masu mukwikal musangar. Mulong antu akukatijan umwing ni mukwau, akez kukat yom ya mu spiritu, akwikal akad kwibaz, itudishina, in kumusangaresh Nzamb, in kuziyin kud anvaj au, in kujikitish, atentamina, akweta rukat ra ukadivar, in kulikishin, in kulond yom yiwamp mulong wa akwau, in kwikand, ikepishina, in kukat yom yiwamp, akuchingejin, isikena, in kwikepish mu manangu, amukatina Nzamb pa ndond pa kukat kwisangaresh, in kwipan mu milong ya Nzamb wakin nakash, chawiy ey lamat daang kud antu inay.” Ov, niyey ukat kwambamb ni dijuku dey ap ambay ney in Kristu mutapu ukwikala mwom mwi ngand yisu? w24.01 6 par. 13-14

Musangar mud ik tukweta wa kwijik anch Yehova ukat kuyitiy antu end! Bibil ulondin anch: ‘[Yehova] ukat kuyisanger antu end.’ (Kus. 149:4) Pakwez yisu yimwing, antu amwing akat kwiyipul anch, ‘ov, Yehova ukat kamu kwinsanger am pakampwil?’ Atushalapol avud ashinshamena a Yehova a pakur idjidjekang yisu yimwing parishangau ni yikokujol. (1 Sam. 1:6-10; Job 29:2, 4; Kus. 51:11) Bibil ulejen patok anch antu akad kuwanyin akutwish kand kwikal ni dilau da Yehova, ap kuwap. Mutapu ik? Tufanyidin kutek ritiy muday Yesu ni kushiken ku dibatish. (Yoh. 3:16) Tufanyidin kumekesh patok anch twakarumukin kal kudokal ku yitil ni kumukan Yehova anch tukusal rusot rend. (Mid. 2:38; 3:19) Yehova ukat kusangar anch twawanyish nzau jinej mulong wa kukudish urund wa piswimp ni ndiy. Anch twasal usu wa kulam machip metu mulong wa kumusadin ndiy, Yehova ukat kutusanger ni kutukwat mud arund nend a piswimp.​—Kus. 25:14. w24.03 26 par. 1-2

Tukutwish kuyimburij in kwilej kusutil kudandamen kulejan ap anch antakel a ngand atukangesh kusal mudimu wa kulejan. Tukutwish kumulembil Yehova mulong wa kwikal ni kutakaman chakwel atukwasha tuwanyish mudimu wetu. Chawiy mwita Yehova chakwel akwinkish kutakaman, manangu ni ukwash mulong wa kujijamen yikokujol. Antu avud pakach petu akat kurish ni milong ya mayej, ya kuziy mu manangu, kufish muntu ukatinau, mashakamin makash mu dijuku, kuzengol ap kand milong yikwau. Ni yom yikwau mud yipupu ni jinjit yikat kusal anch yikokujol yiney yikasikan kurish nich chipandakena. Mwazurila Yehova muchim wey. Muleja milong yey mud mutapu ukutwisha kumulej murund ney wa piswimp. Ikal nich kashinsh anch Yehova “ukukukwash.” (Kus. 37:3, 5) Kudandamen kulembil kukutukwash ‘kujijaman mu mar.’ (Rom 12:12) Yehova wij nawamp milong yirishinau nich atushalapol end—“ukat kwov kudil kwau ni kuyipandish.”​—Kus. 145:18, 19. w23.05 5-6 par. 12-15

Anch tukimbin kukwat mupak wa usey, tufanyidin kudandamen “kushinshik rusot ra [Yehova]” ni kusal yom kukwatijan ni rusot rend. (Efes 5:17) Anch twajingunin mbil ja Bibil jikwatijadina ni yom turishina nich, chakin kamu tukukimb chitongijok cha Nzamb chikwatijadina ni mulong winou. Anch twasadin mbil jinej tukutwish kukwat mipak yiwamp. “Sakudimban,” mukankuny netu Satan, ukatin anch tukwatikan nakash mu kusal yom ya mangand minam, chakwel tulika kwikal ni chisu cha kumusadin Nzamb. (1 Yoh. 5:19) Chikutwish kumuswapel mwin Kristu kutek pa ndond ya kusambish mapit ma kumujimbu, kwilej mashikol, ap mudimu wa kumujimbu kusutamu kumusadin Yehova. Anch wasal mwamu, ukutwish kumekesh anch wasambish kal kutong mud antu akad kumwifukwil Yehova. Chakin kamu, yom yiney yiyipinap kwau, pakwez yifanyidinap kwikal pa ndond ya kusambish mu mwom wetu. w24.03 24 par. 16-17