Ngond wa 6

Yehova wayiyukisha in Kristu a mu mivu chitot ya kusambish mulong asala usu wa kwijidin mashakamin maswimpa. Arisha yisu yivud ni kuzengol, ni yisu yimwing kuzengol kwinoku kwashikenang mu mutapu wakad kuchingejin. Shinshikin yom yamushikena Barnabas ni kambuy Paul pading palejenau mu musumb wa Listre. Kwinsambishin, antu ayaka nawamp ni ayitesha. Pakwez mu kusut kwa chisu, akankuny “ayikakila antu ku mutambu wau,” ni amwing pakach pa antu inay amwasa Paul mayal ni atonga anch wafa kal. (Mid. 14:19) Pakwez chikalap nchik mwamu, Barnabas ni Paul adandamena kulejan kwi ndond yikwau. Yibudikin ik yikalaku? Ikadisha ‘in kwilej avud,’ ni ayikasikesha ambay nau mu ritiy nich mazu ni chilakej chau. (Mid. 14: 21, 22.) Antu avud ataninamu mulong Barnabas ni Paul kimikap kulejan ap anch ayizengolap nchik. Niyetu anch twadandamen kusal mudimu wa Yehova chikalap nchik yakamish, tukutambul yiyukish. w23.04 16-17 par. 13-14

Mwant David warisha nau akankuny avud mu mwom wend, ni wakimbang chisu chawonsu ukwash wa Yehova mu malembil. Nfund a Kuseng David wading nich kashinsh anch Yehova wateshang ni kwakul ku malembil mend. Niyey ukutwish kwikal nich kashinsh mud kinak. Bibil utwinkishin kashinsh anch Yehova ukutwish kutwinkish manangu ni usu tuswirikedina mulong wa kujijaman. Ukutwish kusadin dijuku dietu da mu spiritu ap kand antu akad kumwifukwil ndiy nlel mulong wa kutukwash mu mitapu kanang. Ap anch chisu chawonsu Yehova kakwilingap ku malembil metu mu mutapu tuchingejina, twij chakin kamu anch ukwakul. Ukutwinkish yom tukweta nich kuswir ni ukusal mwamu pa chisu tuyiswirikedina. Chawiy, dandamen kulembil nich ritiy, ni ikal nich kashinsh anch Yehova ukukwakul nlel ni ukuwanyish ‘maswir ma antu awonsu akweta mwom’ mwi ngand yisu yikweza.​—Kus. 145:16. w23.05 8 par. 4; 13 par. 17-18

Tongin pa yiyukish ukutana anch wawanyish mupak wey. Yiyukish ik ukutwisha kutongijokin niyey? Chilakej, anch mupak wey ud piur pa kutang Bibil ap kulembil, tongin mutapu kusal mwamu kukutwisha kukasikesh urund wey ni Yehova. (Kus. 145:18, 19) Anch mupak wey ud wa kukudish mwikadil kanang wa win Kristu, tongin mutapu kusal mwamu kukutwisha kuwapish urund wey ni antu akwau. (Kol. 3:14) Umen nchik anch wasal list wa mayingishin makubachikina kuwanyish mupak wey? Sambish kushinshikin list winou chisu ni chisu. Chikwau kand, sutish chisu pamwing nau antu akukukasikesha kuwanyish mupak wey. (Jnsw. 13:20) Uyakin ud anch etu awonsu kud machuku mamwing twakading kwov ja kusal chom. Ov, chinech chirumburikin anch tukutwishap kuwanyish mupak wetu? Bwat. Niyetu tukutwish kusal usu wa kuwanyish mipak yetu ap anch tuburedin rusot ra kusal mwamu. Ap anch kusal mwamu kukwitin kusal usu nakash, ukwov musangar nakash anch wawanyish mupak wey. w23.05 27-28 par. 5-8

Kwijik anch tukwet chisend cha mipak tukwatina kukutwish kutubachik kulejan yitil yetu, kuswimp yaku yetu yiyimp, ni kwipuk kuchirikin yaku yiyimp. Kusal mwamu kukutwish kutukwash kudandamen kubambil mulong wa mwom. Anch wakwatin mupak uyimp, itiyin anch ukutwishap kuswimp yom yasadikina. Lik kushesh chisu ni usu wey mu kwiyingish nich ap kwifich nich ey amwiney ap antu akwau mulong wa mupak wey uyimp. Pakwez, itiyin kurumbuk kwey ni sal yawonsu utwishina kukwatijan ni mashakamin mey ma katat. Anch wifishin nich mulong wa yom yiyimp wasadina, mulembila Yehova nich kwikepish, itiyin kurumbuk kwey, ni mwita dilikishin. (Kus. 25:11; 51:3, 4) Anch kud antu warumbukidina, yita dilikishin, ni anch chid cha usey kimb ukwash wa amakurump. (Jak. 5:14, 15) Ilejina ku kurumbuk kwey, ni sal usu wa kulik kuchirikinamu. Anch wasal mwamu, ikal nich kashinsh anch Yehova ukukumekeshin ranaken rend ni kukwinkish ukwash uswirikedina.​—Kus. 103:8-13. w23.08 28-29 par. 8-9

Jehojada wamukwasha Jowas kwikal mwant muwamp. Mud chibudikin, mwant winou nsand wakatang kusal yom yimusangareshina Yehova. Pakwez kupwa kwa rufu ra Jehojada, Jowas wasambisha kuyitesh atulal in kupumbok. (2 Jsng. 24:4, 17, 18) Ap anch yom yiney yamunenganesha nakash Yehova, ndiy ‘wadandamena kuyitumin aprofet mulong wa kuyichirish kud ndiy . . . , pakwez kateshap kwau.’ Alika kumutesh ap Zakariy mwan wa Jehojada, wading kadap ching kusu muprofet wa Yehova ap mwin kupesh, pakwez kand musanyend a Jowas. Mwant Jowas washikena ap kumujip Zakariy, ap anch anvaj a Zakariy awiy apandisha mwom wa Jowas. (2 Jsng. 22:11; 24:19-22) Jowas kadandamenap kumwov Yehova wom, ni yom yayipa nakash ku mutambu wend. Yehova walonda anch: “Pakwez awiy ankwimpipeja akwikal antu amwamu.” (1 Sam. 2:30) Mu kusut kwa chisu, ka chisak kakemp ka amasalay a in Siria kapandakana “chisak cha njit chijim” cha Jowas ni “amusha ni yitat.” (2 Jsng. 24: 24, 25) Jowas amujipa kud antu end mulong wamujipa Zakariy. w23.06 18-19 par. 16-17

Paul wasutisha chisu mu Efes, wafundisha ni kulejan rusangu ruwamp. (Mid. 19:1, 8-10; 20:20, 21) Wading uyikatin akadivar nend nakash ni wasota kuyikwash mulong wa kushal ashinshamena kud Yehova. In Efes afundinau kud Paul ading cha kusambish asuk a mafundish ma marelijon ma makasu. Antu a mu Efes ading kusalang yom yijondina nakash ni kadingap ni usany wa kusal yom yiyimp. Mu masengan masenganangau ni misambu ya chirelijon yasalangau alondangamu mazu ma masaal. (Efes 5:3) In Efes avud ading “kusal yom yiyimp,” mazu marumburikina anch “Awiy kakwovangap kand kwau usany.” (Efes 4:17-19) Kurutu ileja kwauril yom yiwamp ni yiyimp, in Efes kovangap kwau kusansan kwa yom yiyimp yasalangau. Paul walonda anch “manangu mau madi mu mididim, awiy kakwetap uswan ku mwom ukat kupanay Nzamb.” Pakwez In Efes amwing, adokala mu mididim. w24.03 20 par. 2, 4; 21 par. 5-6

Mudimu wa winkalansambu wasalay Gedeyon wamwita usu nakash. Chisu chezau in Madian kumurishikish mu mapep ma uchuku, Gedeyon wayopata kudokal Mwinkurubuk ya Jezarel djat ku wit wa Yordan. (Ank. 7:22) Ov, Gedeyon wimena kwend ku Yordan? Bwat! Ap anch wading waziyang kal, ndiy ni antwend 300 awuka wit ni adandamena kuyilondul. Kupwa, ayikwata in Madian ni kuyipandakan. (Ank. 8:4-12) Gedeyon wikala ni kashinsh anch Yehova ukumwinkish usu, ni anch kakumulikap. (Ank. 6:14, 34) Kupwa, Gedeyon ni antwend ayilondula rapansh ant aad a in Madian adinga pa atumel. (Ank. 8:12, 21) Chawiy, nich ukwash wa Nzamb, in Isarel apandakana njit. Amakurump akutwish niyau kumuchingejin Yehova, muntu ‘wakad kuziyang ap kuzel tul.’ Ndiy ukuyinkish usu ukwetau nich kuswir.​—Isay 40:28, 29. w23.06 6 par. 14; 7 par. 16

Tukutwish niyetu kwikal ni muchim ukash chikalap nchik yikokujol tukutwisha kurish nich. Chawiy muchingejina Yehova. Tushinshikinany mutapu wapandakanay Barak njit mulong wamuchingejina Yehova. Ap anch kwadingap rukibu ap murumbu mwi ngand ya kabuj, pakwez Yehova wamuleja kuya kurish njit pantaliken ni kalal Sisera wa in Kanan ni amasalay end adinga ni mat mavud. (Ank. 5:8) Muprofet mband Debora wamuleja Barak kuya kushirik ku mukandu mulong wa kuya pa ndond yidinga mud kabeng mulong wa kusankanijan ni kalal Sisera ni matemb ma utad ujal 900. Ap anch kabeng yadingap ndond yiwamp ya kurishin njit kud in Isarel nich matemb, Barak waziyina. Pading pashirikinau amasalay ku Mukandu wa Tabor, Yehova wanakisha ruval mukash. Matemb ma Sisera majama, ni Yehova wasala anch Barak apandakana. (Ank. 4:1-7, 10, 13-16) Chilik chimwing kand, Yehova ukutukwash kupandakan anch twamuchingejin ni kulimish umutakel udiokila ku dirijek diend. w23.07 19 par. 17-18

Chid cha usey kushimpish muchim mulong wa kupand. Mud atushalapol ashinshamena a pasak, tufanyidin kumuchingel Nzamb nich kushimpish muchim chakwel awanyish kushilamu kwend. (Heb. 6:11, 12) Bibil utufanakeshin ni ndim. (Jak. 5:7, 8) Ndim ukat kusalang usu wa kukun mbut ni kujichil mem, pakwez kijingap chisu ik jikuswa. Chawiy ndim ukat kuchingel nich kushimpish muchim, nich ruchingej anch ukwangul mbut jend. Chilik chimwing, tudandamedin kwipan nakash mu yom ya mu spiritu ap anch “[twijap] dichuku dikez kashikay [Nsalejetu].” (Mat. 24:42) Tuchingedin nich kushimpish muchim, nich kashinsh anch ang chisu chatekay kal Yehova chawanyin, ukuwanyish kushilamu kwend kwawonsu. Anch tushimpishinap muchim, tukutwish kuziy ni kusambish kulik uyakin pakemp pakemp. Ni tukutwish kusambish kukimb yom tutongina anch yikutwish kutuletin musangar nlel. Pakwez anch twashimpish muchim, tukutwish kujijaman djat ni kwinsudiel, ni tukupand.​—Mike 7:7 w23.08 22 par. 7

Anch twafanakesh uprofet winou udia mu Daniel 2:41-43 ni makwau kand madia mu buku wa Daniel ni mu Kujingunik, tukutwish kulond anch chidjatil chinech chirumburishin kubombakan kwa Angleter ni Amerik, asadina dikand da pa mangand mawonsu nlel. Mu kushinshikin nawamp dikand dined da pa mangand mawonsu, Daniel ulondin anch “chikunku chimwing cha want chikez kwikal nich usu, pakwez chikunku chikwau chikez kwikal chiziyila.” Mulong wak kukwikal chikunku chiziyila? Mulong antu a mu want winou amekeshina kam, aukangeshin want winou kusal nich usu wa utad ujal. Twilejin uyakin uvud wa usey nakash kusutil chirumbidij chilejenay Daniel. Chakusambish, Dikand da pa Mangand mawonsu da Angleter ni Amerik diamekeshin kal usu wau mu mitapu yimwing. Chilakej, Dikand dined diasala mudimu ujim pa chisu cha Njit ja I ni ja II jasadika pa mangand mawonsu. Pakwez, dikand dined da pa mangand mawonsu diamekesha kuziy ni dikudandamen kuziy mulong wa kupwitamijan kudia pakach pa an angand. Cha kaad, dikand dined dawiy diyikedila da nsudien djat ni pakwezina Want wa Nzamb ukushesha mant mawonsu ma antu. w23.08 10-11 par. 12-13

Yisu yimwing, David waziya mulong wa yakamish ni yikokujol yawonsu yading yirishinay nich. (Kus. 18:4,5) Ap mwamu, rukat ni kubangin kwa Yehova yamupizurisha. Yehova wamutwala murunend wading uziyina mu “madil mawamp” ni “ku majiy ma mem ma chitosh chiwamp.” Mud chibudikin, David wachirisha usu wend ni watwisha kudandamen kumusadin Yehova ni musangar. (Kus. 18:28-32, 23:2) Chilik chimwing ni nlel, chid mulong wa “rukat rudimukina ra Yehova, ni riy rend yishiching chikupu” chawiy twakad kujiyang pitukata kurish ni yikokujol mu mwom wetu. (Mad. 3:22; Kol. 1:11) Yisu yivud mwom wa David wading mu ubaj ni wading ni akankuny avud ading ni usu. Pakwez, rukat ra Yehova rasala iyova anch ud mu diking ni amuchidijin. David wafanyina kwiyov anch Yehova wading nend mu mulong win wawonsu ni chom chinech chamwinkisha kashinsh. Chawiy chawangay anch: “[Yehova] wankamunina ku wom wam wawonsu.” (Kus. 34:4) Ap anch yisu yimwing David wova wom, pakwez watwisha kupandakan wom winou mulong wading wij anch Yehova umukatin. w24.01 30 par. 15-17

Ilejina ku mipak yiyimp yakwatay Jowas. Pafay Mwin Kupesh Mujim Jehojada, Jowas watonda arund ayimp. (2 Jsng. 24:17, 18) Wakwata mupak wa kuyitesh anat a mu Yuda ading akad kumukat Yehova. Ukutwish pamwing ap kwitiy anch Jowas wafanyina kwipuk arund ayimp. Pakwez, ndiy wakwata mupak wa kuyitesh arund inay ayimp. Chawiy, Zakariy musanyend a Jowas pakimbay kumuyul ndiy wamujipa. (2 Jsng. 24:20, 21; Mat. 23:35) Wading usup nakash! Jowas wasambisha nawamp, cha ushon wikala mwin kupumbok ni mwin kujipan. Kupwa atushalapol end amujipa. (2 Jsng. 24:22-25) Mwom wend wafanyina kwikal uwamp anch wadandamena kumutesh Yehova ni kuyikat antu adinga amukatina Ndiy! w23.09 9 par. 6

Yesu wading wij anch kambuy Pita ukutwish kushal ushinshamena. Chawiy nich rukat Yesu wamuleja Pita anch “Kangal wov kwey wom.” Yesu wading umuchingejidin Pita ni chinech chaswimpa mwom wend. Kupwa Pita ni mwanamakwend Andre alikap mudimu wau wa kuta ansh ni ikala in kwilej a Yesu, ni Yehova wayiyukisha nakash. (Mar. 1:16-18) Pita wataninamu nakash mulong wading mwin kwilej wa Kristu. Wamana mutapu wokangay Yesu ayej, kudosh ayilembil ni mutapu wavumbulay kand afu. (Mat. 8:14-17; Mar. 5:37, 41, 42) Pita wamumana Yesu mu chilay mud Mwant wa Want wa Nzamb wa mu machuku ma kurutu. (Mar. 9:1-8; 2 Pita 1:16-18) Chakin kamu, Pita wamana yom yivud, pakwez kelap kuyiman anch kikalap mwin kwilej wa Yesu. Inge, wova musangar nakash mulong watwisha kupandakan yitongijok yend yiyimp ni kuman yiyukish yiney yawonsu! w23.09 21 par. 4-5

Mu mukand wend wa kusambish, kambuy Pita wasadina mazu ‘rukat rikurikina.’ Rukat mud riner rikatap kwau ching kubwik kusu yitil yikemp, Pakwez “miril ya yitil.” (1 Pita 4:8) Pamwing ap Pita wavurika dilejan piur pa kulikishin dilejinay kud Yesu mivu yikemp kurutu afa. Pa chisu chinicha, chimeken anch Pita wading witiyijin anch wading muntu muwamp palonday anch ukutwish kumulikishin muntu mukwau kushik “tupamp sambwad.” Pakwez yom yamulejau kud Yesu yitufundishin kulikishin ‘tupamp makum sambwad ni sambwab,’ charumburik anch kwikil mimbu piur pa kulikishin. (Mat. 18:21) Anch chikukasikedin kusadin chiyul chinech kangal waziy! Atushalapol awonsu a Yehova akad kuwanyin chikat kuyikasiken awonsu kulikishin. Chom cha usey nakash kud ey chid kusal usu nakash mulong wa kuyilikishin akadivar ney awonsu ni kushakam nau mu chisambu. w23.09 29 par. 12

Pamuminyau kud insh mujim, Yona wading ukwet kashinsh anch Yehova ukutesh malembil mend ma kukarumuk ma kwikepish. Kupwa kwa machuku makemp, Yona amurikina ku chikum cha kawit, pakad kulab witiya chad chisend chamwinkishau kusal kud Yehova. (Yona 2:10–3:4) Chisu urishina ni yikokujol, ov, ukat kwov wom wa kumulej Yehova yikokujol yey mu malembil? Ov, ukat kwov kuziy mulong wa kwilej? Kangal wavuramen anch Yehova wij nawamp kamu milong yey. Chawiy, ap anch walond kwey yom yikemp mu malembil, ikal nich kashinsh anch ukukwinkish yawonsu uswirikedina. (Efes 3:20) Anch chikukasikedin kutang ni kwilej mulong uyedin, uziyin ap wiyakamishin, ukutwish kutesh mazu ma Bibil ni mikand yikwau yimedina pa Bibil yakwatinau kal. Ukutwish kand pamwing ap kutesh miminy yimwing ap kand mavideo madia pa jw.org. Anch twamulembil Yehova ni kukimb yakul kusutil yom yatenchikinay kal, chid mud tumwitin chakwel atukasikesh. w23.10 13 par. 6; 14 par. 9

Dizang ni ma tempel matungau mu Yerusalem mading kwau mutapu umwing mukach. Mukach mwading tupalakany twaad—“Ndond Yitumbila” ni “Ndond Yitumbila Nakash.” Ni kwading rido umwing wa kuchim wading waurila jindond jinej jaad. (Heb. 9:2-5; Kub. 26:31-33) Mukach mwa Ndond Yitumbila mwading mwend wa kasu wa utad wa or, chintamb cha kwoshin diseng da malash ni tebur wa kutekin mikat ya kulambul. Ching kusu ‘in kupesh azizilau many’ awiy ading akweta mbil ya kwandam mukach mwa Ndond Yitumbila mulong wa kusal midimu yau yitumbila. (Kuch. 3:3, 7, 10) Mwi Ndond Yitumbila Nakash mwading mushet wa mansuk wa utad wa or, wawiy wading umekeshina kwikalaku kwa Yehova. (Kub. 25:21, 22) Ching kusu mwin kupesh mujim ndiy wading ukweta mbil ya kuburil rido mulong wa kwandam mwi Ndond Yitumbila Nakash kapamp kamwing pa muvu pa Dichuku da Kuchakwish. (Lev. 16:2, 17) Wandamang nich mash ma annam mulong wa kwit dilikishin da yitil ya amwinend ni ya muchid wa kabuj. Mu kusut kwa chisu, Yehova wamekesha patok kurumburik kwakin kwa yom yiney yadinga mu dizang.​—Heb. 9:6,7. w23.10 27 par. 12

Dizu da Nzamb ditukasikeshin tupamp ni tupamp anch “[tukatijan] muntu ni mukwau.” (Yoh. 15:12; Rom 13:8; 1 Tes. 4:9; 1 Pita 1:22; 1 Yoh. 4:11) Pakwez, rukat ud mwikadil udiokila mu muchim, ap wuntu wa chivadik, ni kwikil muntu ukutwisha kuman yom yidia mu muchim wetu. Chawiy, mutapu ik tukutwisha kumekesh rukat retu patok kud muntu umwing ni mukwau? Chid kusutil mazu ni mu yisal. Kud mitapu yivud tukutwisha kuyimekeshin akadivar nau anambaz netu anch tuyikatin. Ey yawiy yilakej yimwing: “Londany uyakin kudi muntu ni mukwau.” (Zak. 8:16) “Shakamany nich chisambu kudi muntu ni mukwau.” (Mar. 9:50) Chifanyidin “kulimishijan amwing ni akwau.” (Rom 12:10) “Akijanany muntu ni muntu.” (Rom 15:7) ‘Dandamenany kulikishijadin umwing ni mukwau.’ (Kol. 3:13) ‘Kwashijanany, kwambulijan yisend muntu ni mukwau.’ (Gal. 6:2) “Kasikeshijanany mu ritiy muntu ni mukwau.” (1 Tes. 4:18) ‘Kwashijanany . . . muntu ni mukwau.’ (1 Tes. 5:11) “Lembilijadilany muntu ni mukwau.”​—Jak. 5:16. w23.11 9 par. 7-8

Dichuku diawonsu, tukat kukwat mipak yitina ritiy rikash. Chilakej, tukat kukwat mipak piur pa kutond arund, kwipuwangej, kwilej shikol, uruw, kuval an, ap kand piur pa mudimu wa ku mujimbu tukusala. Tufanyidin kwiyipul anch: ‘Ov mipak yam yimekeshin anch nikwet kashinsh anch mangand minam ma kusut ni anch akumaswinkan piswimp ap kud ngand yisu ya Nzamb? Ov, mipak yam yid mud yikwatinau antu akad kwitiyij anch akushakam chikupu?’ (Mat. 6:19, 20; Luka 12:16-21) Tukukwat mipak yiwamp anch twakasikesh ritiy retu anch ngand yisu yid kamu piswimp ap. Pamwing ap turishin kand ni yikokujol yitina ritiy rikash. Tukutwish kurish ni kuzengol, mayej madandamedina, ap kand yom yikwau yikutwisha kutuziyish. Kwinsambishin, tukutwish kuman anch tukutwish kujijamen yikokujol yiney ayinetu. Pakwez yikokujol mud yiney yikata kulab yitining kuyijijamen nich ritiy rikash mulong wa kudandamen kumusadin Yehova nich musangar.​—1 Pita 1:6, 7. w23.04 27 par. 4-5

Yehova utwitin tusal yom kukwatijan ni malembil metu. Chilakej, mukadivar ukutwish kumwit Yehova amukwash chakwel ashala ku mudimu wend wa ku mujimbu chakwel amana chisu cha kuya ku chitentam cha rejon. Mutapu ik ukwakulay Yehova ku malembil mend? Ukutwish kumwinkish mukadivar kutakaman kukwetay nich kuswir mulong wa kuya kumuman mukurump wend wa mudimu. Pakwez mukadivar ukwikal ni kuswir kwa kuya kumwit mukurump wend wa mudimu. Ukwikal ni kuswir kwa kumwit tupamp tuvud. Ni anch chid cha usey ukutwish kwitiyin pamwing ap kumukatun nfalang ja dichuku dinida. Yehova utwitin anch tudandamen kulembil piur pa milong yetu. Mud mwalonday Yesu, anch malembil metu mamwing kakutwishap kumakul kapamp kamwing. (Luka 11:9) Ap mwamu kangal twaziy! Lembil ni muchim wey wawonsu ni chisu chawonsu. (Luka 18:1-7) Anch twadandamen kulembil piur pa chom kanang, tukat kumekesh kud Yehova anch kwit kwetu kud kamu kwa usey, kudiap kwa chamwamu. Ni tumekeshin kand anch tukwet ritiy mu ukaliweny wend wa kutukwash. w23.11 22 par. 10-11

Yehova wamukana murunend Aburaham anch michid yawonsu yida pa divu akuyiyukish kusutin ndiy. (Dis. 15:5; 22:18) Mulong Aburaham wading ni ritiy rikash mudiay Nzamb, wikala ni kashinsh anch kushilamu kwa Nzamb kukuwanyin. Ap mwamu, padingay Aburaham nich mivu 100 ni mukajend mivu 90, ambay a uruw inay ashinshamena kadingap kakweta mwan. (Dis. 21:1-7) Pakwez, Bibil ulondin anch: “Aburaham witiyija nich ruchingej, ap anch kikwadingap chom cha kuchingej, chawiy mwamu ndiy wikala ngakiril wa michid yivud mudi mwamulejau kudi Nzamb.” (Rom 4:18) Wij kamu anch ruchingej ra Aburaham rawanyina. Wikala tatukwend wa Isak mwan wachingelay mu mivu yivud. Mulong wak Aburaham wading ni kashinsh anch Yehova ukuwanyish kushilamu kwend? Mulong Aburaham wading umwij kamu Yehova nawamp, Aburaham wading ni kashinsh anch “Nzamb ukwet ukash wa kuwanyish” kushilamu kwamushilayimu. (Rom 4:21) Yehova wamwitiya Aburaham ni wamutazuka anch muntu utentamina mulong wa ritiy rend.​—Jak. 2:23. w23.12 8 par. 1-2

Nsand uda muntu wakuchingejin ukat kuwanyish yisend yend yawonsu. Shinshikin chilakej chipandakena kuwap cha Yesu. Kadingap mwin usweral ap mwin kukangany kuwanyish maswir mend. Pakwez wawanyisha yisend yend yamwinkishau kud Yehova ap pa chisu chading chikasikena kusal mwamu. Wading uyikatin antu, pakampwil in kwilej end, ni wipana kwa kwikatin mulong wa antu akwau. (Yoh. 13:1) Mulong wa kumwimburij Yesu, chitin kusal usu wa kuwanyish yisend yikwinkishinau. Anch wijap yom ufanyidina kusal, it chiyul nich kwikepish kud akadivar aswila. Kangal kwau kusanger ching yisend yipipela. (Rom 12:11) Pakwez, wanyish yisend yey mud uyisadin ‘mulong wa Yehova, ni chidap mulong wa antu.’ (Kol. 3:23) Chakin kamu, udap muntu uwanyidina, chawiy ikal muntu wija mimbu yey ni itiyin kurumbuk kwawonsu usadina.​—Jnsw. 11:2. w23.12 26 par. 8

Tukat kwov musangar anch twashiken ku dibatish ni kwikal mu dijuku da Yehova. Antu akweta dilau dined akutwish kwitiy mazu malonday nfund a kuseng David anch: “Wayuk muntu utondilau kudi ey [Yehova], ndiy kamu ukakila chakwel ashakam mu dibur diey.” (Kus. 65:4, TMK.) Yehova kakatap kumupwitin muntu win mwawonsu mu dibur dend. Ukat kutond kuyisejin piswimp antu akatina kumusejin ni ndiy piswimp. (Jak. 4:8) Anch wipan kud Yehova ni akubatish, ukutwish kwikal nich kashinsh anch kupwa kwa dibatish “ukuman yiyukish yivud ya mitapu ni mitapu yikudiokala mwiur.” (Mal. 3:10; Jer. 17:8) Anch akubatish chimekeshin anch wasambish kal chad kumusadin Yehova mu mwom wey. Ufanyidin kusal usu wey wawonsu mulong wa kushakam kukwatijan ni machip mey ap anch warish ni yoziu yipakina ritiy rey. (Mul. 5:4, 5) Mulong ud mwin kwilej wa Yesu ufanyidin kwimburij chilakej cha Yesu ni kulondul kamu nawamp mbil jend.​—Mat. 28:19, 20; 1 Pita 2:21. w24.03 8 par. 1-3

Chid nchik anch ey ni mbay ney wa uruw ukatininganyap kusutish chisu pamwing? Yom ik ukutwishanya kusal? Shinshikin kand chilakej cha kasu. Kasu kakatap kamu kuyem kwinsambishin. Chitin kukakundakesh ni nkuny pakemp pakemp. Chilik chimwing, niyen ukutwish bil kusambishan kusutish pamwing kachisu kakemp kakemp dichuku diawonsu? Salany yom yiukatinanya en awonsu. (Jak. 3:18) Anch wasambishany kusal mwamu, pakemp pakemp rukat ren rikuzubuk kand. Kalimish kad ka usey nakash mu uruw. Kad mud rinkind ukwashina kasu kudandamen kwok. Pakad rinkind, kasu kakujim swa. Chilik chimwing, anch ambay a uruw kalimishijadinap, rukat rau rikutwish kutalal pakad kulab. Ku mutambu ukwau, ikundj ni mband asadina usu wa kulimishijan umwing ni mukwau akat kukasikesh rukat rau. Pakwez, lam mu manangu anch kutong anch umulimishin mbay ney kurumburikinap kamu anch umulimishin, pakwez chifanyidin kwikal nich kashinsh anch mbay ney wiyovil kamu anch umulimishin. w23.05 22 par. 9; 24 par. 14-15

Mu Bibil, atushalapol ashinshamena a Nzamb alejen chisu chayishikena yakamish ni pazalau mulong wa akankuny nau ap mulong wa yibachikin ya antu akwau. (Kus. 18:4; 55:1, 5) Chilik chimwing, tukutwish kurish ni rupompat ku shikol, ku mudimu, mu dijuku, ap ridokila ku guvernema. Tukutwish kurish kand ni wom wa kufa mulong wa milong ya kwiyokish. Yisu mud yiney, tukutwish kwikal ni kuswir kwa ukwash mud mwan mukemp. Mutapu ik ukutukwashay Yehova mu yisu mud yiney? Ukutukasikesh ni kutukwash kwiyov zoong. Tufanyidin kusutish chisu ni Yehova kusutin kumulembil ni kutang Dizu dend. (Kus. 77:1, 12-14) Anch chikal chaku chey, chom chakusambish ukusala anch uziyin chid kumulembil Tatukwey wa mwiur chakwel akukwash. Muleja yom yikovishina wom. Kupwa mutesha piutangina Dizu dend ni ukuman mutapu ukukukasikeshay.​—Kus. 119:28 w24.01 24-25 par. 14-16

Rusot rid ra usey nakash mulong wa kuwanyish mipak ya mu spiritu. Muntu ukweta rusot ra kusal chom ukweting impu yikash ya kusal usu wa kuwanyish mupak wend. Ni anch tukwet rusot rikash ra kusal chom, chikutwish kutuswapel kuwanyish mipak yetu. Chawiy, yom ik ukutwisha kusal mulong wa kwikal ni rusot rikash ra kuwanyish mipak yey? Mwita Yehova akukwash kukudish rusot rikash. Kusutin spiritu wend utumbila, Yehova ukutwish kukwinkish rusot ra kuwanyish mipak yey. Yisu yimwing tukat kwitekin mipak mulong twij anch chawiy chom chiwamp tufanyidina kusal. Pakwez pamwing ap tukwetap kamu impu ya kuuwanyish. Tongijokin pa yom yakusadidinay kal Yehova. (Kus. 143:5) Kambuy Paul watongijokina pa ranaken rijim ramumekeshinay Yehova, ni chinech chamubachika kwipan nakash mu mudimu wa Yehova. (1 Kor. 15:9, 10; 1 Tim. 1:12-14) Chilik chimwing, anch watongijokin nakash pa yom yakusadidinay kal Yehova, yikukubachik kuwanyish mupak wey.​—Kus. 116:12. w23.05 27 par. 3-5

Tukat kumusangaresh Tatukwetu wa mwiur anch twatumbish dijin dend. (Ks. 119:108) Ov, chirumburikin anch Nzamb mwin dikand dawonsu ud mud antu akad kuwanyin akata kukimb ntumb mulong iyovil anch kadap mu diking? Bwat kamu. Anch twamutumbish Tatukwetu wa mwiur tukat kukwash kumekesh kud antu akwau anch yom yilondiningay Satan mulong wetwetu yid ya makasu. Satan ukat kudimban anch kwikil muntu ukutwisha kulond piur pa dijin da Nzamb nich kushinshaman. Ukat kulond anch kwikil muntu ukutwisha kushal ushinshamena kud Nzamb anch amupak. Ukat kulond kand anch etu awonsu tukutwish kulik kumusadin Nzamb anch tutanidinapamu. (Job 1:9-11; 2:4) Pakwez ikundj ushinshamena Job wamekesha anch Satan ud muka makasu. Chid nchik ku mutambu wey? Etu awonsu tufanyidin kutond kumulondin Tatukwetu ni kumusangaresh kusutin kushal ashinshamena kud ndiy. (Jnsw. 27:11) Did chakin kamu dilau da kusal mwamu. w24.02 8-9 par. 3-5

Kupwa kwa chirung cha Moses ni Yoshua, Yehova wasambisha kuyisadin ankalansambu mulong wa kuyitakel antu end. Kupwa, pa chirung cha ant, Yehova watonda aprofet mulong wa kuyitakel antu end. Ant inay ashinshamena alondulang yiyul ya aprofet. Chilakej, nich kwikepish Mwant David witiya dipup da muprofet Natan. (2 Sam. 12:7, 13; 1 Jsng. 17:3, 4) Mwant Josafat walondula umutakel wa muprofet Jakaziel ni wayikasikesha antu mu Yuda anch “ikalany nich ritiy mud [aprofet a Nzamb].” (2 Jsng. 20:14, 15) Padingay mu chikokujol, Mwant Ezekias wamwita muprofet Isay ukwash. (Isay 37:1-6) Chisu chawonsu chalondulangau ant umutakel wa Yehova, muchid wading ni chiyukish ni diking. (2 Jsng. 20:29, 30; 32:22) Chamekana nawamp anch Yehova wayisadinang aprofet end mulong wa kuyitakel antu end. w24.02 21 par. 8

Satan ukatin anch twibomba nau antu akad kuziyin kwi mbil ja Yehova. Tufanyidin kuvurik anch urund wetu wimedinap kwau ching pa antu tukata kusutish nau chisu. Kuwejaku kand antu tutanijadina nau pa tupend twa kupalangeshin jinsangu. Tufanyidin kurish ni yitongijok ya mangand ya kwitiyij anch yaku yijondina yid kwau yiwamp. Twij anch yid yiyimp. (Efes 4:19, 20) Tufanyidin kwiyipul anch: ‘Ov, nitekidin kal mupak wa kulik kwikal mu uruund ni ambay a ku mudimu, ku shikol ap antu akwau akad kulimish mbil jitentamin ja Yehova? Ov, nikat kulam nich kutakaman mbil ja Yehova ap anch antu akwau angel anch upandakeshin?’ Mud mulejenau mu 2 Timote 2:​20-22, tufanyidin kubabal chisu tutondina arund ap mukach mwa chikumangen cha win Kristu. Tufanyidin kulam mu manangu anch amwing kakutwishap kutukwash kushal ashinshamena kud Yehova. w24.03 22-23 par. 11-12

Ov, wapakishap kal kutongijokin piur pa mutapu udingay Yehova? Ap anch tukutwishap kumuman Yehova, Bibil umulejen mu mitapu kushalijan. Amutazukin Yehova anch “udi muten ni rikibu” ni “kasu kakata kutemishan shutit.” (Kus. 84:11; Heb. 12:29) Yehova amufanikeshin kand ni diyal dijadirikina, ni chikung chilayina mud utad wa bronze, ni nkongal. (Ezek. 1:26-28) Mulong tukutwishap kumuman Yehova, chikutwish kutukasiken kuman anch utukatin. Amwing akutwish kuman anch Yehova kayikatinap mulong wa yom yiyimp yayishikena pakur. Yehova wij mutapu twiyovila ni wij kand mulong wak chikutwish kutukasiken kumusejin piswimp. Chawiy utukwashin kwijik wuntu wend kusutin Dizu diend. Dizu “rukat” diawiy dimumekeshina kamu Yehova nawamp. (1 Yoh. 4:8) Yehova ud rukat. Rukat rawiy rimubachikining kusal yom yawonsu. Rukat ra Nzamb riding ra chirungul ni rikweting usu nakash, chawiy ukat kurimekesh kud antu in awonsu amukatina ni akad kumukat.​—Mat. 5:​44, 45. w24.01 26 par. 1-3

Yehova wamutonda Moses mulong wa kuyitakel in Isarel kudokal mu Idjibit. Wasadina dinguj da didj mulong wa kuyitakel mwin njil ni wasadina kand dinguj da kasu mulong wa kuyitakel uchuku. (Kub. 13:21) Moses walondula dinguj damutwala ndiy ni in Isarel djat ku Karung Musunz. Pashikau pa Karung in Isarel ova wom nakash patongau anch ading ayilondwil kwinyim kud chisak cha amasalay in Idjibit. Pakwez chadingap mwamu. Yehova wamusadina Moses mulong wa kuyitwal antu end kwinikwa. (Kub. 14:2) Kupwa Nzamb wayikamunina mu mutapu ushimokishena nakash. (Kub. 14:26-28) Kupwa kwa mivu 40, Moses wadandamena kuchingejin dinguj da didj dasadinangay Yehova mulong wa kuyitakel antu end mu kabeng. (Kub. 33:7, 9, 10) Yehova wambambang ni Moses kusutil dinguj, ni Moses wapanang mbil jend kud in Isarel. In Isarel amana patok anch Moses wambambang ni Yehova. w24.02 21 par. 4-5